رواية من فجر ديسمبر الفصل الحادي والأربعون 41 - بقلم Zoka 🌷

من فجر ديسمبر
🍁
🍁
نتكثت ايده واجيت اركضن للجرف واسمعنه يصيح ..
- شهااااب لووو عبرت وجبتهه اثنينكم تنفصلون من العشيررررره ولو يجي النبببببي مايشفعلكم عنددددي هدهاااا وارجع عاااااد

- طزززز بيك وبعشيرنك هالعشيره التلفي هيج شكوووول غداره ااااانه المااضلن بيهه

عفته وركضت وصلت للحافه جريت دشداشتي ذبيتهه واشوفنهه تطبش بالماي وغطست عاد
وانه كبل كمزت للماي وغصت ليهه جانت كلش
هاديه جوا بالماي ومسلمه روحهه للماي ياخذ بيهه ويجيب انه كلبي يدك الف الف عليهه ماريدن بس اصلهه ... عاد وصلتهه وجريتهه من خصرهه وطلعنه روسنه وهيه جرت نفس شهكته ومجلبه بجتافي ..
- عاونيني خل نصل للجرف حركي الماي بايدج هيج مثلي يلا كوي روحج يارويحتي يلاا

وجهه احمر وشفايفهه زررك الماي جان ثلج عبن هاذ شهر ال١١ وبارد الجو والماي ابرد بعد
ضلت تحرك بالماي مثلي وانه حاضنهه واجدف بالماي بيمنتي لحد ماوصلنه وطلعتهه من الماي وهيه ترجف وتكح ..
ضليت اضرب عله ظهرهه وهيه تذب الماي من راسهه وتكح وترجف عاد انه جريتهه لحضني
ماهمني اي احد بهالدنيا بس خوفي عليهه وللحظهه هجست انه مالحكن عليهه وتروحن من ايدي نشف دمي بعروكي ... ضليت حاضنهه وحاط راسهه بصدري وهيه تلملم بنفسهه لصدري ونفسهه بدا يهدا وانه ضال جسمي ينكط ماي ورجولي اهجسهن تخدرت من البرد بس ماهمني الا هالكلب الصار جنه طبل اريدنه يهدا بيهه ...

شفت محمد جاي صوبنه وشايل بطانيات اثنين
اشرتله يكف مجانه وهوه ضل واكف ويعاينلنه وانه بعدني حاضنهه وهيه ترجف كلتلهه وانه حاط راسي كريب اذانهه ..
- يابعد كلبي وهلي اهدي انتي بامان روحي لروحج فدا .. نشف دمي عليج يالحبيبه بسج خوف انه هنايه عندج وكلشي طاح شره يالنفس انتي تهدي تهدي وسمي باسم الله
- اخذني للبيت شهاب كلبي يوجعني
- اسم الله عليج يابعد كلبي صار

اشرت لمحمد يجي ووخرتهه من حضني شويه وضليت كاض ايدهه وهيه ترجف وتمسح بالماي من وجهه .. خذيت البطانيه من محمد ولفيتهه عليهه وخذيت الثانيه حطيتهه عله جتافي وكمت
ووكفتهه وضليت حاط ايدي عله جتفهه ونمشي
وجان محمد جايب السياره صعدنا بيهه واخذنه للبيت طبينه جوه وصحت عله عمتي اجتي وهيه تخرمش بوجهه اخذتهه لحجره جدتي وانه رحت لحجرتي واجتني زهره طلعتلي هدومي وراحت
وكفت جدام المرا نشفت جسمي وانه كلساع تطلع جدامي صورتهه من يدفعها ذاك الجلب وابوه الاجلب منه وهوه يجلب بيه ...
عاد لبست بساع وطلعت رحت ادور عله صياد
وتالي لكيته توه جاي يصعد لطريك بيتهم عاد
كضيته من ياخته وضربته كله وكبل مطلته بالكاع
وضليت اضرب بي بهالبوكسيات واصيح عليه

- هيييييي جللللللب انتتتتته جللللللب حييييوااااان يااااخسييييس وانه محسبك عضيييييدي واخووووي تغدر بيه هييييييج ليييييش ليييييش
لك حرمتتتتتتتي هاااي رويحتي حرمتتتتي شلوووون تطيحهااااا بالماااااااااااي شلووون شعندددددك ويااااهاااااا

جنت اضرب بي بكل مجان بعينه وفجه وخشمه وهوه بس يتفل دم جوي علينه ولد عمي يفاججون بينه وانه اصيح تسودنت بساعتهه ماضل ولا خيط عكل براسي ... وهمه يجرون وانه اضرب بي
وهوه غدا لا ايد ولا رجل جواي عاد مادري شلون
بدفعهم بيه كمت من صدره وانه اصارخ عله كل من جدامي عفتهم ورديت للبيت وكبل مشيت لحجرتي وانه ناااار ...
من جهه يطك بالي حجي الشيخ هساع احنه مالنه كعده هنايه وهااااذ ودكته الخسيسه وهذول عمامي شسويلهم يعني مابيدي شي عليهم ازيدن من هيج
وانه النار شابه بضلوعي عاد جنت افتر بالحجره وصرخت وضربت المرايه بيمنتي ومشيت كعدت
وجريت باكيت الجكاير وكعدت اشعل بالجكاره وايدي ترجف من الاعصاب .. ضليت ادخن وايدي تنكط دم شويه وجان تطب ربى اجتي بكل هداوه كعدت بسدي وجرت ايدي كضتهه وكالت

- حتروح نفسك بالاعصاب اهدا ليش هيج ماذي نفسك
- عوفيني واليرحم اهلج

كامت طلعت وانه جريت الباكيت اخذتلي جكاره الثانيه وجان يدك تلفوني عاينت هاذ وليد مارديت
مالي خلك روحي مو عاد هالسوالف .. ضل يدك مرتين وثلاثه جاوبته ..
- وليد ولي مني هستااااع لاتلح
- شصاير ولك فهمني
- اجل كلشي بعدين
- شاجل ولك بس لا كلبت عليه باجر اني جايكم
- كتللللللك اجلهه بعددددين لا تلح روووووح عاااد من وجهههههي ولي

سديته وشمرت التلفون عله الجربايه وطبت ربى وبايدهه صينيه حاطه بيهه طاسه ماي وعلبه الاسعافات اجتي حطتهه بالكاع وكالت ..
- تعال اكعد بالكاع حتى اسيطر على ايدك
- اااااانه موش كتلج عوفيني عليييش تلحين انتي
- تعاااال شهاب لاتعاند ايدك حتلتهب شوف الكزاز نابت بيهه كووم

جرت ايدي ونزلت كعدت بالكاع وهيه جدامي واخذت الكطن تبلله وتمسح الدم وكامت تطلع بالكزاز وانه صافن وبالي حجي الشيخ يدك
كلتلهه

- الشيخ حجه وياج شي
- لااا صار كم يوم ممحاجيني
- شافج البارحه
- لا رحتله كالو يمه زلم ومن رجعت بالليل مادز عليه بعد ليش تسال
- هيج

جانت تمسح بايدي ونفسهه يخرخش وتكح كلساع
رفعت وجهه علي وكلتلهه ..
- كلبج شلونه ياذيج !
- لا زين اخذت دوا
- ونفسج مختنكه مو
- اي شويه
- امشي البسي اخذج الطبيب
- مايحتاج عوفني خلي اكمل

دنجت راسهه وكامت تلف بالشاش عليهه وانه اعاينلهه وعاينت بالباب جدتي واكفه وابوي شافنه هيج دار ظهره ومشى وجدتي ضلت تعاين علينه
والنوب اجتي امي يمهه تبسملي واخذت جدتي ومشت .. شفتهه كملت ورادت تكوم تشيل الغراض
كلتلهه ..
- عوفي كلشي وامشي البسي عباتج نفسج يخرخش جاي اسمعه لاتعاندين
- ماشي

طلعت وهيه تكح وتكض صدرهه وتلكتهه امهه
وانه صحتلهه ..
-عمممممه تجهزوا انه سابكم للسياره

هزت براسهه ومشت ويه بنتهه وانه كمت اخذت السويج وطلعت للباب رحت افتحت باب السياره واجاني ابوي ..
- شنهي الصايرررر شهااااب عليش كاض ولد الشيخ ومجنزه هيييج شمالك تسودنت بويه
- اييييي بويه تسودددنت زيييين انه تسوددنت
- تحججىىىى عددددل
- بوووويه امششششي شوف شمصخم هااااذ الجلب وتعااال حاجيني

عفته وصعدت بالسياره وشغلتهه وضليت ادك هورن لحد ماطلعن وصعدن وره .. شفتهه وجهه احمر وفاتحه الجامه وبس تكح عاد اخذتهه لمضمد كريب هنايه كلت اسرع من طول الطريك للمستشفى ... نزلتهه وهيه تضغط عله ايدي وتكح
كبل الولد الجوه طلعو والمضمد جاب جهاز الاوكسجين وخلاه ليهه وراح جاب ابره موسع قصبات راد يضربهه اشرتلي بلا
دنجت يم راسهه وهيه وخرت الجهاز منهه وكالت
- ماريد مايحتاج
- لاتعاندين بويه
- شهاب استحي واخاف هيج عفيه
- خويه ماعندك غير الابر شراب شي
- اي عندي شراب بس هاي اسرع
- لااا انطينه شراب بعد اخوك

ابتسمتلهه وهيه غمضت ورجعت الجهاز لخشمهه
عاد انه طلعت موبايلي وصورت الجهاز كلت اجيب ليهه منه عليش ضالين حايرين هالشكل
جابلنه الشراب فتحته وحطيتلهه بالقبق وشربتهه
وامهه واكفه وكاضه جتفهه وتنشرلهه بهالايات

ضلت هيه مغمضه وتتنفس من هالجهاز وميله راسهه لبطن امهه وانه واكف واعاينلهه وافورن بدمي هالشيخ لو بس اكضه وعلي مايوكفني عنه بشر ...
وره نص ساعه شالته وكالت ..
- خلي نروح صرت احسن
- اكيد تره ماعدنه شي اهم من صحتج نضل ماعليج بشي
- لا هاهيه ارتاح صدري اكثر بس اريد اتمدد ارتاح
- زين جا يلا امشينه

تشكرت من الزلمه ومشينه للسياره وكبل طلعت بيهم لاهلهم وعاد امهه كالت ..
- عمه وين مودينه شنو تيهت
- لااا عمه مامتيهه بس بيتكم احسن خلهه ترتاح
- وغراضنه والمهر شلون
- مامش مهر هالساع تأجل وغراضكم تصلكم هسه حايرتلي بالغراض خلي البت تريح
- ياااه شلون تأجل خطيه وزهره صارلهه تحضر من اسبوع مايسوه الصار عمه لا تخرب فرحه اختك
- عمممممه انتي ماتعرفين الا عرفنه وهالسالفه ماتنسد
- شنو شبيك شهاب جنك ناوي النيه
- جااا ترديني اسكت اااااانه بعيني شفته يكضها ويشمرها بالمااااي وحك علي ماتعدي هالسالفه هيج صح انه فلشت وجهه بس مابرد كلبي لساااع
- الله اليستر من الجاي الله يستر هسه الشيخ شيسوي بس يدري بابنه

من سمعت بطاري جن ذبت عله ناري بانزين وشعلتني ازيد ضليت اسوك بكل سرعتي واطك بهالهورن وروحي طافره ... وصلتهم وتطمنت عليهم ورديت للبيت وجان وليد كلساع يدك

- شماااااالك تسودنت اكلك وللللي عليش تلح
- شهاااب حركت اهلي دفهمني شبيكم شصارلكم
- وليييييد بالعباس النفس مطايكه بخشمي لاتلح عاااد بعدين احاجيك وباجر مامش مهر ولا شي بعددددددين سمعتتتتت بعددددددين لاتدك بعد

سديت الخط وطلعت دورت عله الشيخ سالت عليه بكل مجان محد يعرفن وينه .. رحت لبيت الريم
حاجيتهه سالت عنه وهم ماتعرفن وينه ... انه ذيج الساع يامن يجيبه ليه بس اريدن افهم علليييييش
هيج يغدددر ويطعن بيهه عليييييش والله لو انهه درت كبل يكف كلبهه وتموت بكاعهه ماتحمل
وهوه عايفهه بنص الموت ويعاين ليهه ....

ضليت اليوم كله ازامخ واعارك روحي وساعه افكر اخذ اهلي وامشي وساعه اكول شلون لازم احجيلهم الصار بينه وماريدن يتشمتون بيهه وضليت اكل بروحي من الحيره وماعرفن شسوي

طلعت من البيت رحت كعدت عله الجرف وانه ادخن وافكر بحل لهالمصيبه .. حيل صعبه انه اطلع من العشيره وهاي موش بذمتي بعدهه شلون بيه بيهه لا اكدر اخذهه وامشي ولا اكدر امشي واخليهه ...

ضليت الليل كله كاعد وادخن وتلفوني عفته بالبيت
ماريدن احد يزيدنهه علي بملحته ... كريب الفجر رديت للبيت رحت صليت ونمت من التعب وثاني يوم من الصبح وليد يخابر جاوبته ..

- هااا خيرك
- يمعود شبيك وياااااي هسه من وصلت للحلك توكع شنو من حظ حظي ماعرفتو تتعاركون الا هسه
- قسمتنه بعد
- زين كولي هسه شنو الي بالك مو صارت زينه البنيه شكو اجلت الخطوبه
- بكييييييفي تعترض
- لااا يابه وين نكدر نعترض بس هم ارحم بالحال
- وليد جم يوم وتصفى الاوضاع وتعالو هلا بيكم بس هسه اعذرنه عبن ساعت الساعه انه حسويلي مشكله خلي تفض وعله راسي انته تدلل
- يسللللم راسك اي هيج ريحتني ..لعد اخذ راحتك شكد متريد بس اهم شي ماتكنسل السالفه
- لااا نطيتك جلمه بعد ماتراجع بيهه
- كفوووو والله
- يلا خلي اروح عندي شغل
-الله وياك

كمت من الفراش ومشيت طلعت غسلت وتريكت وطلعت سألت ع الشيخ هم محد يدري عنه ..
انه استغربت شعنده هيج يختفي وهاد الديوان والعشيره وماشي محد يعرفن وينه ؟؟؟؟
جنت كل مااشوفن صياد اخزره وهوه شليع يشرد
مره رحت عليه كضيته من جتفه ودرته علي

- شهاب كافي دخيل جدك بسك عاد
- شني شني بوووويه جا تريدني اطنشهه ليك
وانته جيت تكتل حرمتي !!!!
- استغفر الله غلطه وصارت موش بالكصد
- لاااااا متكصد انه شفتك بعينننني شني اجذبن عيوني .... كِلي شعندك وياااهه عليييش هيج تاذيهه كِلي صياااااد ماريدن اطيح خوتنه هيج احججججي برد كلبببببييي
- كتلك موش كاصد هالشي موووش كاصده عليش ماتصدك
- ليييين انته جذاااااب خسسسسيسسسس تتحيون ويياي وعينك عينك تجذب بس وحك هو علي ماعديهه ليك اصبر وشوف

هديته ومشيت انه انتظر الشيخ يرد وانصفي هالحسابات عاد عبن هسه اي تصرف اسويه ينحسب ضدي جريت خلك اريدن افهم عليش الصار؟؟؟؟؟

مرت اربع ايام وجان يخابرني ابو وليد
وضل يسأل عليش هالتاخير وشني الصاير ويانه ويريدن يكطع مهرهم كبل محرم ..انه جنت ناسي هالسالفه مال جيه محرم وهاذ مفلفل وعيب من اهله متحضرين وباخر جم ساعه وكفتهم ..
كلتله هالجمعه حياكم الله ...

رحت انطيت خبر لزهره وهيه شفت جن رد الدم بوجهه ضحكت فرحت لفرحتهه جنت شايل همهه
هسه ارتاحيت من عاينتهه فرحت هالشكل ..

بالليل جنت اتسأل بربى اشو هيه الروحه روحه
حته جلمه شكراً ماحصلت منهه وانه جيت طلعتهه من الموت بطرك روحي معكول ماهمهه هالشي!!!

جنت حيل محتاج شوفتهه واريدن اسألهه بلكي تعرف شي عله الشيخ وشنهو الدار بينهم وهيج حجه !! ثاني يوم من الصبح كعدت رتبت لحيتي شويه ولبست بلوز ركبه اسود وبنطرون اسود
وستره اسود ومشخطه برصاصي ورحت لكليتهه
وصلت ليهه حوالي ساعه ١١ ضليت واكف انتظرهه بره وجان دزيتلهه وساله ...
" انه انتظرج باب الجامعه " ماطولت ربع ساعه وشفتهه اجتي وهيه تتمشى لابسه ثوب طويل نيلي ساده وفوكاه جاكيت ماروني ببيجي مبين مفاتن جسمهه وخدودهه مورده .. ابتسمتلهه وانه واكف منتجي عله السياره والتلفون بايدي اجتي وتتمشى بالكعب الرفيع تحرك اهلي بي ...
- ياهلااا منور الجامعه ابن عمي
- منوره بهالجمال شلونج
- تمام
-اصعدي خلي نطلع نتغدا
- ماكلت للخط راح اطلع شلون
- وينه هو جاي هسه
- اي بالكراج يتنظرنه
- امشي نحاجي ونطلع
- واهلي يدرون بيك جاي ؟
- لااا
- لعد وبسام شلون
- لتسويهه سالفه هاي هسه احاجيه

شلت التلفون وخابرت بسام وهيه صافنه بوجهي
- شلونك خويه
- هلاا بابن العم
- هلا بيك ..اكلك انه رايح اخذ ربى ونطلع بشغله ساعه وانه اردهه للبيت وانتظرك تجون حته العصر نرد للعماره باجر المهر راح يصير
- هاااا وين تطلعون بووويه شهالحجي
- اكلك تره حرمتي لاتمسلت
- هاااع من يمتى
- من اول مانخلكت لا تطولهه يلا انه اجيت اكلك موش اخذ رايك يلا باي باي

سديت الخط وعاينتلهه وهيه فاتحه حلكهه
- شنالج تصفنين
- هاي شحجيت عزا بعينك
- شني حاجي شي غلط
- جررررريء
- ههههههه بيج انه ابوي ماعرفه ... امشي شوفيني هاذ خطج وين او اكلج نطيني رقمه شعنده مضيعين وكت
- اي هاك خابره من تلفوني

اخذته وخابرته وتالي طلعنه مشينه شويه ووكفنه بازدحام انداريت عليهه وكلتلهه ..
- صايره فوك وصف الكمر
- ممم شكراً
-ههههه اول مره اشوفنج تخجلين من حجيي
- ممم

مشى السير وانه اعاينلهه واتبسم عاد رحنه لمطعم بالجادريه حته نتغدا .. ومثل كل مره تريد تكعد جدامي وماخليهه الا بسدي .. كعدنا وطلبنه الاكل وعاد انه انداريت ليهه وعاينت بعيونهه المكحله
وشفت حواجبهه مثخنتهن ولونهن اطوخ صاير
- انتي عليش متجوزين من هالسالفه
- شنوو
- نوبه رموشج وهالساع حواجبج عليش تكلبين لونهن فهميني
- اي كلش خفاف هيج احلى يصيرن
- ياهو الضاحك عليج وكايلج احلى
- هااه صدك محلوات حواجبي !!!
— ايييي محلوات
- لا عليك الله صدك صدك يعني نشاز صايرات
- هههه شمالج تسودنتي بنتي حلوات مابيهن شي بس انه ماحبن اشوفج تغيرين شي بملامحج انتي تضوين عليش هالمكياج هاذ
- والله مو لشي بس اني احبه
- زين زين بس لا تحطينه جدامي
- اممم
- اكلج صدك شني سالفتج شو هيه الروحه روحه حتى جلمه شكر ماحصلت منج شني بويه فهمينه
- مناسيتك

رفعت تك حاجب وانه اعاينلهه من كالت هالجلمه
عاد جرت جنطتهه وفتحت جزدانهه وطلعت منه
محبس رجالي فضه وبي فص نيلي يلمع كِلش فخم

عاينتلي وهيه تفر بي بايدهه وكالت ..
- هديه شكر لموقفك الي عمري مراح انساه
- حلووو من يمتى اشتريتي
- من زمان
- وضاله شايلته وياج
- هو بقى بالجزدان واني مااغيره دائماً وياي
هسه اريدك البسه الك ممكن
- ممكن ليش لا

مديتلهه ايدي اليمنه ..
-لاا اليسرى اريد
- بنتي يحطوهه باليمنى التختم باليمين
- ماااا اني اريد باليسره
- هااج بويه لا تضوجين

ضحكت وجرت ايدي ولبستني اياه باليسرى والنوب كلبت ايدي ولامست باطن ايدي بحركه مافهمتهه بس هيه جانت تتبسم وصافنه بيهه
ضليت اعاينلهه وفرحان بهاذ تغيرهه وياي وهيه جانت رايحه بغير عالم بايدي كلتلهه ...
- جنهه عجبتج
- ايي
- عله شني تعاينين بيهه هيه ايد

ابتسمت وكالت ..
- حلوه
- ااااخ بويه شني اليوم امي داعيتلي من الجنه
- هههههه

جابو الاكل وانه شهيتي انفتحت وضلينه ناكل وبس نتبسم انه كملت اكل كبلهه .. جريت تلفوني واخذت صور وهيه شايله العصير وهيه تضحك وتكلي وخر .. عاد كالت ..
- عندي برنامج حلو مال صور خلي ناخذ بي
- يلا جيبي
- بس اني اخذ
- ماشي عمي تلفونج وبكيفج اخذي

طلعت تلفونهه وفتحت البرنامج وكامت تخلي اشكال وانه اكللهه تشيلهن وهيه ماترضى عاد كلتلهه..
- اريد اشوفن صورج الماخذتهن عادي
- اي عادي هاك كلب بيهن

انطتني تلفونهه وضليت اشوفن صورهه ويه صاحباتهه وهيه تحجيلي هاي هيج اسمهه وبيتهم بفلان مكان وانه استمعلهه واعاين للبسهه مرات تلبس بنطرون وشي طويل واكثره تنورات والكعب ميفاركهه .. بس العجبني دايماً لبسهه محتشم رغم كلش كشخه وماتطوخ مكياجهه نفس ماكل مره اشوفنهه بي ... جنت اشوفن ليهه جم صوره ماخذتهن بالبيت ومسويه حركات بشعرهه ووجهه
حيل عجبني ...
- هالصور اريدهن
- نووووو
- شننني نوو اريدهن حلوات واريدهن ادزيهن فهمتي
- مااا صوري شنو ادزهن
- خاب انجبي شني دازتهن لغريب
- ما مادز
- صايره عنوديه ولج
- اممم .. اكلك نكوم نطلع ضجت
- نطلع بس احركج لو مادزيتيهن
- الله كريم

كمنه طلعنه وهيه كالتلي ..
- شهاب اريد اشتري هديه لزهره بمناسبه خطوبتهه اريد اهديها شي اخذني هسه
- شتاخذين يعني
- مادري محتاره بس لازم اخذلهه شي خاص مني
- امشي ندور ونشوف

صعدنا بالسياره ومشينه لشارع كله محلات نزلنه
افترينه كالت تريد ملابس طبينه شو غيرت رأيهه
وطلعنه جان النوب كالت اريد دبب هم رحنه وغيرت رايهه ردينه طلعنه ..
- اثبتي عله راي بنتي
- يعني غير واحد يشوف
- استغفر الله
- شنو ضجت تره بعدنا مافترينا
- هههه لااا عليج علي !!
- اي والله شبيك هنه كلهن يمكن اربع لو خمس محلات شمفترين
- ااااخ بويه لج انه اطب محل واحد اخذ كلشي وامشي شجاي تحجين انتتتتي
- هو انتو الولد كلشي تلكون بسرعه

جاي نمشي وجان صاحت ..
- شهااااب لكيتهه
- شني شمالج
- مكياج اخذلهه مكياااج اي امشي امشي
- شتصخم بالمكياج
- تحتاجه مو يجيهه خطيبهه اكيد تحتاج وهيه ماعدهه يلا يلااا لا تضيع وكت

طبينه لمحل المكياج وانه لكيتلي كرسي رحت كعدت وهيه تحاجي ابو المحل نزلي هاذ وانطيني هاذ وتلغمط باديهه وجمعتلهه كووومه من مدري شني .. واخر شي اجتي علي ..
- شو كاعد
- جا شسوي
- تعال يمي ساعدني
- شني شمفهمني بهالسوالف انه
- عوف المكياج عطر متعرف تختار عطر
- لا بهاااي تدللي

اختارينه عطر ورادت تدفع خزرتهه جان تاشرلي دنجتلهه شاورتني ..
- هديتي يعني بفلوسي اموتك بس تدفع
- خاف مايعجبج
- شهااااب نتزاعل والنبي خلينه صلح
- هههههخخخخ ادفعي بس خلصيني هو انه عايز

دفعت وانتبهت لجزدانهه مصفطه بي كله حمر وورقتين عله جهه مخليتهن ..
ضحكت وكلت هاي تمشي بزودهه والله مال اهلهه كله بجيبهه ...

طلعنه وبعدنه نمشي وشفت صايغ وكلت هاي اخيتي والوحيده من امي شلون ماهديهه شي
عاد اخذتهه وطبينه المحل ..

ضليت اعاين للذهب وجان ربى تكلي
- شنو الي بالك واني اختارلك
- كلاده لو تراجي ماخذلهه سوار
- تمام

اختارت كلاده بيهه ورده حمره من فوك وبيهه شخوط فضيه والباقي ذهب ..
- هاي زهره وتلوك لزهره ههه

اخذناهه ...حطهه بعلبتهه ودفعت وطلعنه وكبل للسياره رحنه
وبالدرب كلتلهه ..
- انتي بيش ساعه تخلصين دوام
- مو سوه مرات بال ١١ ومرات ب ١ مرات ١٢
حسب المحاضره
- واليوم جنتي مخلصه ب ١١
- لا مدخلت محاضره
- هاااااا عليش بويه
- لان هيج
- احجي شكو
- هذا هو يعني .. استاذ هاي الماده يزعجني وماحب احضرهه
- شننننني شنننننني
- الله عليك مو تكول لاحد
- احجيلي من الاول كلشي يلاا
- من نص السنه مال العام هو راقب علينه بالامتحانات مره وضل بس يصفن عليه وواكف كدامي هواي جان يربكني ومن داومنه وره العطله
جان بس يشوفني يضل يشمر بالحجي بس يعني مو كدام الطلاب بس يجي يمي ويضل يحجي

- شيحجججججي
- على عيوني وهيج
- رببببببببببببى
- والله رزلته والله .. وهددته هو اختفى ومن داومنه هالسنه هو ياخذنه بوحده من المواد ورجع جلبلي والطلاب بدوا ينتبهون دائماً يصيح باسمي لو يجي يوكف يمي بكل امتحان فعاد تجنباً للحجي كمت مادخل محاضرته

- استغفرررررر اللله عليييييش ماكلتي عليييش ساكته جان شلتي هالمهجوم وخابرتي اجي اسحله بنص الكليه شنييييي المسكتتتتتج فهميييننننني

- اهدء شبيك اهدء .. اني بس ماردت تصير مشاكل وهي بس هالسنه وراح اتخرج ويولي

- غلللللللط غلللللط تسكتين رببببى غلللللط

- لو حاجيه جان ذبو الصوج بيه متعرف هالناس شلونهم .. خلي يولي والله رزلته مرتين والمره الثالثه هددته وكتله افضحك كل هالطلاب تعرفني بنت شيوخ  وماتطلع مني الزله وبتلفون واحد لعمامي اهجم عليك الكليه عاد هو راح ابتعد بس المصيبه بهالسنه طلع هو استاذنه شمدريني هيج

- لااااا يالله لااااااا استغفررررررك رببببببي خلي يجي الاحد وانه اعلمه شني تضلين شارده من دروسج من وره جلابته

- اني داخذ المحاضرات من البنات واقراهن ماهملت الماده بس بقى الحضور يمكن يفصلوني

- وساااااكته حضره جنااااابج ساااكته تنتظريهم يفصلوج وتحجيييييين !!! همزين سألتج حته اعرف هالمصيبه ولج بويه انتتتتتي يمتى تفهمين
الزلام العندج يطيحون روس الخلفوهم اليندك بيج لو بحجايه اكوووول احجي

- اني بس خفت لاتصير مشاكل
- خرررررب ربى اسكتي عاد اسكتتتي
- ماشي ماشي سكتت

ضليت اسوق لحد البيت وانه كالب خلقتي وتوعدتله الاحد انعل سلفه سلفاه ...
طبينه للبيت وجان بسام موجود سلمت عليه وربى صعدت لحجرتهه وانه ترخصت من بسام كتله اصعد اناملي ساعه وكعدوني حته نمشي ...

نزعت سترتي وتمددت بجربايه بسام وجنت تعبان كبل نمت ... وتالي كعدت عله صوت بسام وهوه يكعدني عاينت ساعه اربعه ... نزلت غسلت وانتظرنه ربى نزلت غراضهه وطلعنه ...

ربى كبل نامت بالدرب وانه بسام ضلينه نسولف
وهوه شويه جان مثكل بالحجي وياي .. لحد ماوصلنه كعدناهه ونزلنه لبيتنه عبن امهه جانت
جايه من الظهر بيتنه وعماتي ملتمات هم ..
ووليد كلساع يخابر باجر امان اجي لو تعلكوهه
وانه تضحك عله سوالفه ...

الليل كله اسمع ضحكهن ويه بنات عماتنه فوك
وكركرتهن طولت للفجر .. انه ماجاني نوم
افكر الشيخ وين اختفى ؟؟؟ انه هالمره ردته وهيج يختفي من خرب بحضي الاكشر ...

ثاني يوم من الصبح كلهه مخبوصه نص بالاكل
ونص بالتنظيف وربى وامهه وزهره واختي مناهل اخذهن محمد للصالون وانه والولد ضلينه
نرتب كراسي ونكسر بالثلج للماي والقواطي
ومحمد جاب الكيك .. كل المهر احنه شلناه مارضيت يحط وليد لو دينار كتله انتم خطارنه بهاليوم شني تدفع فلوس ضيافتكم !!!

وللظهر ربى خابرتني كملن رحت للصالون اجيبهن .. صعدن وكلهن عبايه ومبوشات
كلتلهن ...
- خير عمه بنياتنه وينهن
- جوه البوشي عمه هههههه
- هاااا جنهن ملونات موش صح حجيي
- لعبن لعب
- خلنه نشوف بله كلجن خياتي ارفعن خلي اشوف شكولجن الفضائيه
- ماااكوو متشوف شي
- انتتتي بالذاااات اول وحده ترفعين
- والله ابببببد
- ماااشي سهله سهله

جانن يتبسبسن ويضحكن لحد ماوصلنه البيت
طبن البنيات وعلت الهلاهل ... زهره لبست بدلتهه بالبيت شني السبب ماعرفن صراحه هنه شيفكرن
انه التهيت ويه الولد لحد ماخابرني وليد كال وصلنه واسمعن من بدايه السلف صوت الهورنات
لحد ماطبكو باب البيت نزل وليد وركض اجه حضني انه فرحتي هاليوم ماتنوصف ...
عبن هاي خطوبه الغوالي هاذ رفيج عمري وهاي اخيتي من امي ريحتهه الضلتلي الوحيده هيه زهره
جنت حاضر بفرحه اغلى اثنين وفرحتي تعدت فرحتهم وامشي وادعيلهم بالتوفيك عبن اثنينهم ماريدن ليهم غير الفرحه والسعاده بحياتهم ...

كطعنه مهر السيد ووليد كل ساع غامزلي ويكمش بايدي وهوه يزخ عرك بنص هالبرد ووجهه احمر
اجيت كتله ..
- هاا يالعضيد بالمبارك
- مبارك عليه نسابتك ياخويي يشهد الله فرحتي باني راح اصير نسيب صاحب كلبي وبير اسراري تضاعف مليون مره فرحتي بزواجي
- اي بعلي انه مثلك
- لك انه مامصدك راح اضل مكابلك كل العمر وتصير خال الجهاااال ااااويلي يمه اووويلي يبيت منذر طيرتوني للجنه
- هههههههههههه عساهه دوم هالفرحه امش يلا
ماتريد تشوف عروستك
- اركضلهه ركض خويه

طب وهوه يعدل بالستره ويمسح بوجهه ولحيته
وانه وياه وصلته للباب وردت امشي كض ايدي
- وين رايح
- شعندي طاب
- لعد تعوفني وحدي لتنسى اخوهه وصاحبي يعني اعتبر نفسك حاضر عرسين اوكفلي هسه دوري عوف اختك
- بويه شهالحجي امشي طب انته انه شكو
- والحسين ماطب اذا مو وياي
- لك بويه طب منا الوادم تناظر علينه
- هسه اصيح واكلهم بطلت اخوهه ميريدني والله اصيح اذا ماطب وياي والله حلفت ماحرك هالرجل اذا مو رجلك وياي
- شوف يالله هاي شلون بييييييك
- امشي احسن يلا ومن نطلع نتعارك بس لتخرب فرحتي يلا خيي يلاا

طبيت وياه والكل تهلهل عاينت اختي ببدلتهه الورديه وشعرهه مفتوح وملولو والمكياج كالبهه كلاب انه يمكن ماشايف شعرهه لو مرتين لو ثلاثه كله بالحجاب ماتنزعه ... عاد شفت حسنهه هلمره
واشوفن ضحكه وليد تجمعت الدمعه بعيني من فرحتي بيهم شوف ربي يرزك كلمن عله نيته
وهذول اثنينهم فطر كلب وانجمعو ...
انه عيني راحت من بين هالحريم كلهه تدور عله
غزالتي ورويحيتي وعاينتهه واكفه بجهه اليمنه
يم زهره وجدامهه امهه ومرت ابوي .. عاينتهه حاطه الشال عله راسهه وشعرهه الاحمراني
مبين نصه .. عاينت لوليد موش بحال احد عينه
بعين زهره وفاصل من الدنيه ... انه استثكلت وكفتي هيج عاد سحبت روحي بلايه مايحس وطلعت بره وكفت بين ماجانو يلبسون الذهب
ويكطعون الكيك ...

ضليت بالباب واكف وانتظره يطلع وهاذ جنه نام
لا الركص خف ولا الهوسات ولا التهلهل ..
عمامه واهله كلهم بره ينتظرون وهوه نام جوه
عاد طبيت شويه ومن بعيد اشرله وهوه ولا يمه
انتبهت عليه ربى واشرتلهه تصيحه .. دنجت هيه وشاورت زهره وخلتهه تكله وهوه كبل رفع راسه
وصاح ...
- خوييي تعال بروح العزاز

اجتي جدتي دفع بيه لحد ما وصلت يمهم اخذنه صور واتذكرت هديه زهره طلعت العلبه من جيب الستره وهيه وكفت وانه دنجت ليهه لبستهه وبست راسهه ..
- بعد اخوج اريدنج ترفعين راسي صاحبي هاذ واخوي الماجابته امي داري مثل ما اداريني وازيد بعد واحفظي بحضوره وغيابه وطيعي باليرضيج
وانه عندج شما مشى بيج العمر تضلين ذيج الشلتهه بحضانتهه وبايدي الاعبهه

- يبعد رويحتي ياامي وابوي انته يالعزيز
وين الكه مثلك انه خويه

- هاي انه سلمتج بيد الي مثلي

حضنتهه وبوست راسهه وجانت ربى تصورنه
وبعدين جريته وكتله ..
- امششش عاد الزلم واكفه تنتظر لطشت شمالك
- هسه ماتشوف الكمر شعندي طالع يم المصخمين
- ولييييد ماتجووووز انته
- كااااطع مهر لااااتحجي رجاءاً اني بالحلال وبزوووودي يلا رجاءاً امشي مرتي تريد تاخذ راحتهه
- لااااااه هيج صارت ... هين ياوليد امش بره ونتفاهم اله اغدي وجهك بلون سترتك
- حبيب كلبي العضيد الشهب اشاقيك يول

جريته من ايده ومشينه بره اخذته خنكت راسه
جوه ايدي ومشيت واسحل بي وهوه يصيح
- لك عررررريس يمخبل عوووفني طااااح حضك ولك خنكتني سترتي تعقجت لكككك هددددني
- بالعباااااااس لو حجيت هيج كبالي نوبه الثانيه اجنززززززك سمعتتتت
- اييي اييييي بس هد. هددددددد

وخرته وجانو عمامي يضحكون علينه وهوه ينافخ عاد رحت حضنته ودكيت عله ظهره وكتله
- والله وكبرت وصرت عريسسس اااخ شني هالدنيا ومضاميمهه عرفتك بالغربه حته اجيبك اليوم واخليك تصير نسيبي
- شفت فايدتي الك شكبررررهه وانته تخنك بيه جان روحتني هو هيج
- احسن تستاهل .. امشي ماتريد تاكل كيك
- اي كيك ليش لا شو حطو وحده شكبرهه كدامي اكلت نتفايه حتى طعمهه محسيته شنو بروح امك جيبلي هيج ماعون هالكبرررر
- مال ثريد اجيبلك هاا
- اييي بروح العزاز
- هم حاسب نفسك عريس
- لعد شنو مو بعينك الكشخه والزيان هذا كله
- ههههخخخ جا ماتثكل شويه .. هيج تمنيت لو مره بعمرك تستحي بشي جدامي يامصخم حته هاليوم ماستحيتلك شويه
- مو انته مشكلتك مدتفهم السالفه بعدك ممستوعب
- اي شني فهمني بله
- انته عندي هسه مثل قمصله ام وجهين
جهه صاحبي وجهه اخو مرتي الحلو فاني اتيه مرات كمت اشبج يعني يجوز بالمستقبل اتعود واكوم شويه استحي كدامك بعد انته وحظك
- رحمه الله والديك هاي انه تاليتي قمصله!وام وجهين مال باله !
- لاااا تاج راسي انته ... لك امشي لحك هاي كله حصلت واحنه بعدنه شو اخوك هذا مايوجب شبي شنو نساني
- هخخخخخخ حاسبك من البيت بعدين ينطوك
هههااااااي
- خااااب دطير اروح الحك احصل كيكايه وانته ضل اتمضحك وحدك ضل عنست يول عننسسست
سبقتك والحمزززه اااخ يافرحتي اااخ

يمشي وهوه يحجي وانه اضحك عليه .. راح اخذ ماعون وكعد ع الكرسي وصاحلي رحت كعدت بالكرسي الجدامه وضل يوكلني ..
- قمصلتي اموت عليج اشبعي اشبعي
- خخخخخخخ بالعباس ححط الماعون بوجهك شجلبت بالقمصله
- شصيحلك لعد
- من خرب بحضي اذا هيج
- خاب ماتزوج شبيك شمتاني
- اتاني حضرت الاميره تحن علينه
- لاااا هاي انه يصير عندي دسته جهال وانته بعدك ضل حش بهالجكاير
- عوفني انه ادبر روحي
- من دبش اذا دبرتهه
- كمل الي بحلكك
- كوم جيب حصتك دناكلهه يلا لتصير فاهي امشي
- شمالك الله فجعك بالاكل اليوم
- ممتغدي وداعه الكمر اقصد وداعه الكيك هذا
- لسااااانك لا احشه
- جيبلي ماعون واسكت وعيونك

كمت طبيت للمطبخ اخذت جم قطعه حطيتهن بماعون ورحت وديتهن اله ياكل شويه ويرد يحط بحلكي وانه عيني بالتلفون اراسل ربى
" بس يطلعون الكاج بحجرتي "
ردتلي" لااااا والله شعندي جايه  "
" اريد اشووفج شني كل هالوادم تعاين لطولج وانه لاااا "
" ماعليه مااجي "
" بنت امج وسىويهه ولا تجين "
" شهاب امي وعماتنه هنا عيب هالسوالف "
" ماشي وره العشه الكاج هناك وان بدلتي لو غيرتي شي بيج املصه  لراسج وبس الله يخلصج مني "
" يلا عود نشوف بعدين نحجي باي "

- هااا شحتتك
- خاااااي وليييييي عليش حاط عينك بجهازي ياطايح الحظظظظ
- ههههههههيييييي املصه لراسج اوي ياقاسي

كمت دفرت الكرسي وهوه ذب الماعون وركض
وركضت وراه حطيت راسه جوه ابطي وسحلته لوره البيت وهوه يضرب ويصيح ...
- ماتجووووز انته الااااا ادفنك زوجتتتتتك وماخلصت منننك
- حممممممممموت لك عوووووفني املص راسهه هي اني شكووو مسكين والحمزه مسكييين
- شاااالك الحمزه كووون ولييييي من وجهههي
وحك محمد النوب امطططلك هنايه واطلع مصارين بس تعيدهه وجلمه وحده من الشفته ماتحجي فهمممممت
- هاااي شبيك خيي المن احجي
- لوكاله الانباء
- ياهيه
- خخخخخخخ بعدين تعرف

ردينه يم الزلم وهمه كلساع يحجون علينه جيف نتعرك ونرد نتصافى وانه خربانين ضحك عليهم مايدرون هاذ جزء مايتجزء من كعداتنه ...
راح وليد لسيارته جاب علاكه كال بيهه تلفون لزهره يريد يشوفهه وينطي الهه ..

عاد كلت لعمتي وهيه اخذت زهره لحجرتي
وراح وليد طب ينطيهه التلفون وانه ضليت اخبث عليه حركت عليه التلفون عاد جاوبني ..
- لك هاااا هااااااا من لعنت الله عليك شكوووو شكووو
- مشتاكلك خويه ماتجي يمي عليش مكابل هالمصكوعه
- صكع اليصكعك كون امشي عوفني

سد الخط وتالي دكيت لكيته قافله ضليت بالباب انتظره وشويه وطلع ويضحك ويمدد بايده اجه حضني وكال ...
- ااااخ كون امشي ابوس ترابات امك على هالخلفه
- وانه كون امشي عليك هالنعال عله هاللسان المايكضن روحه
- يابعد رويحتي نياااااااهههههااااا

كفخته عله راسه ومشينه بره واحنه جنه مجهزين العشه بس مارضو يتعشون عاد مشو لاهلهم وانه رحت اشوفن  يمتى يحطون العشه حته الم الولد
جان لمحت الشيخ طلع من مضيفنه وصارت عيني بعينه هوه رفع حاجبه وانه درت وجهي ومشيت طبيت للبيت وسألت عماتي كالن هسه نصب

طلعت صحت الولد واجوي شالو الاكل ودوه للمضيف وكعدنا ناكل وراهه بدا التعزيل وانه
عفت كلشي ورحت خابرت ربى
- ها شهاب
- منتظرج تره
- شهاب ماكدر اهلنه متشوفهم كلهم موجودين
- ماااااااعليه ارييددددج دبري روحج
-يعني شتريد بالضبط
- من اشوفج اكلج يلاا دبريهه انه هنايه بره
- ماشي عود ادزلك مسج
- زين

سديته ومشيت يم الولد عاونتهم وعيني كلساع ع التلفون لحد ما وره ساعتين اجتني رساله
"انتظرك بغرفتك "

كبل هديت كلشي بايدي ورحت ليهه .. مشيت
وعاينت مامش احد جوه كلهه فوك صواتهه
عاد طبيت كبل لحجرتي وكفلت الباب وانداريت
شفتهه واكفه يم الكنتور ... مشيت ليهه وهيه تعاينلي ... شفت ثوبهه الطويل الزيتوني مخصر
وكل مفاتنهه زايده حلاه بي والشعر الاحمراني
متموج ونازل لنص ظهرهه وحاطه بي طوك ليلو كرستالي ومرفوع من جدام بارز مكياجهه ركزت
شفت نمشهه ماهوه عاد كبل خليت ايدي عله وجهه

- ولللج النممممش وين راح
- هههه موجود بس مخفي
- طاحظج عله هالدكه وكع كلبي عليش تخفيهه لج هوه كل جمالج بي
- غير المكياج بعد
- لانعل ابو المكياج .. شني هالحلااااه بووويه ناويه علي انتي احمد الله واشكره انتي بنت عمي ونهوتي وكل هالسلف تعرف انتي حرمتي جان هساع هالنساوين خذنج ومشن
- هههههههه ومنو كال اني حرمتك استاذ شهاب
شنو بكيفك تقرر
- تعترضين جنابج
- اي اعترض

تكربت عليهه ومشيت ايدي عله شعرهه وهيه تعاين للكاع ..
- صايره تخجلين هواي وين راح هذاك اللسان مامتعود عليج هيج
- شهاب وخر وكولي شنو ردت تحجي
- هههههه ضعيف صوتج ياحلوه موش مثل اول
- شهااااب
- ياااعيونه وكل هله

كلتهه وانه امشي ايدي عله خدهه وهيه غمضت واخذت نفس كوي وكالت ....
- بطل هالحركات وكولي شتريد وخلي اروح هسه اميي ادور عليه بالكوه طلعت منهم
- مشتاااااكلج اااانه مشتاااك ولهاااان عليج يااميرتي انتي الغيره كلتني من راسي لجدامي
لين هالحريم كلهه شافتج وانه لا .. هالحسن كله لشهاب موش ليهم ياحلوه افهمي انه اولى منهم بشوفتج كلبي يدورج دواره وتريديني اهدج بهالليله
- انته هواي تاخذ راحتك بالحجي وياي عوفني خلي اروح
- اضمج لصدري وروحي
- ماااا وخر كافي عيب هيج
- موووش عيب هاذ بيتج بصدري موجود شني العيب
-شهاب
- تجين بالكيف لو بالغصب
- لا هاي ولا هاااي

وخرت تريد تطلع وانه جريتهه وحضنتهه ودنجت ليم اذنهه وهيه ادفع ...
- بس اهدي واسمعي كلبي العمرج كله ترفضي وهوه مغليج .. اوووووووف يريحتج تردلي من العمر عمر وتزيد فوك حيلي حيل

هديت شويه بصدري وبس كربت لركبتهه دفعتني
وعقجت الوجه وكالت..
- غثيث
-هههههه تاليج بحضني وين  تشردين من الغثيث

خنزرت وهيه تعاينلي وتمشي تعثرت بثوبهه
ومشت تفتح بالباب بعصبيه وانه اضحك عليهه
كبل شمرت روحي عله الجربايه وانه اضحك
اااااخ انتعشت بيهه يربي حووور الجنه دزيتلي
دحنن كلبهه عاد مو اشتعلو اهلي ..

كمت اخذت هدومي وطبيت سبحت وطلعت لكيتهن كلهن نازلات دك تنظيف انه طبيت لحجرتي تمددت اخذتلي غفوه وكعدت بنص الليل واسمع صوت ضحك بره ... كمت عاينت من الشباج
كاعدات غادي ربى وزهره وجانت زهره تخابر وربى تضحك يمهه وحاطه ايدهه عله حلكهه
عاد رحت جريت تلفوني وخابرتهه...
جاوبتني ..
- هلوو
- هاي شني التمضحك ويامن
- ويه نسيبنه
- وانتي شكووو بنصهم كومي عله صفحه
-متقبل زهره والله
- اهوووو سددي سدي

رحت ليهم وره البيت وزهره من شافتني كبل نزلت التلفون وكامت تمتمت ..
- طبي جوه بحجرتي زهره لاتمرضين الجو بارد
-اي خويه صار
- وانتي جدااامي امشي
- وين غير اروح وياهه
- شعندج وياهه انتي وياي امشي

كضيت ايدهه ومشيت وزهره راحت كبل جوه
كبل اجتني رساله من وليد ..
" هااا ماصدكت لكيتلك حجه مفلفل "
ضحكت وسديته بله هسه هاذ شحجي وياه

- شهاب وين ماخذني بهالليل شبييييك اوكف
- صووووتج فضحتينه
- اييييي شكو تجرجر بيه عوفني
- اريد اكعد وياج شويه مايصير
- لااا مايصير
- لا يصير امشي بويه مو عيب كاعده بنصهم وهمه يحجون
- ماعليه اني هيه زهره تكلي اخاف احجي وضاله مجلبه بيه وكلساع تكلي شكول شكول ولاعبالك ام لسان هطوله
-ههههه انهجم بيتك ياوليد رادهه عله لسانهه وهسه اخرست جدامه
- اي والله متعجبه عليهه ترجف رجف متعرف تحجي بس تضحك واني اضحك عليهم
- وشعدجن هنايه بره
- غير فوك صايره ازدحام كل البنات نايمات وجهالهن هوسه صايره وين نروح يعني
- يلا همزين طلعت وشفتجن جان تجمدتن هساع
- اي وهسه انته مو حتجمدني وين ماخذني
- لااا يمي ماعليج شي

اخذتهه وكعدنه بنفس هذيج التله الكعدنه بيهه الفجريه كبل ... جان كلشي حوالينه هادي وبس صوت الحشرات بالزرع ينسمع ... اعاينلهه
جانت تعاين بالسمه وكالتلي ...

- شهاب باعتقادك الدنيا شنو
- زمن الاختبار
- زين هسه بهاي كعدتنا موجود كلشي حوالينه مو
-اي
- تعتقد هالشي كله حي او ميت
- حي طبعاً اله طريقته بالحياه وكلمن يختلف من الثاني
- الحي يتكلم مو
- اي كل هالخلايك الهه طريكه تواصل مختلفه
- ليش متكدر تسمعه ؟
- لين مامأذون لي اسمعنه موش بيدي بيني وبينهن حاجز
-زين .. هسه انته بحكم دراستك بشي من نوع الطب والتشريح وهيج اكيد شايف جسم الانسان من الداخل
- اي شابع منه
- يعني انته واعي وفاهم للعمليات الايضيه والدمويه والهضميه الي تصير بداخل جسمنا
- اي
- زين ليش ماتحس بيهن مو هنه بداخلك ؟
- مالهن صوت وماكدرن اشوفهن بس احس بيهن وكت المرض
- لان صار شي يختلف من كل مره متعود عليه
- اي صح لوين تردين تصلين
- انته تؤمن وتفهم علمياً ان الاشياء الي تاذي الروح تظهر على الجسم بشكل كدمات زرك او خضر واحياناً بشكل مرض ممعروف منين مو
- اي اكيد هالشي
- زين متخيل يكون اكو شي يكسر هالحاجز ويخليك تسمع الي تشوفه ساكت ويحسسك بكل عمليه تصير بجسمك
- اذا صار هالشي يمكن ماكدرن عليه يشوش هواي عله عكلي اذا كمت اسمع كل صوت مرات الوعي الزايد ياذي ازيدن مايفيد
- اكيد ماتتحمله لانك راح تسمع كلشي من كلشي بدون متميز هذا لمنو ولمنو
- والخلاصه وين
— الخلاصه اني اريد ارجعلك شي اليوم
— شني ترجعيلي؟
- تذكر من قبل كتلك اليوم اني قررت عنك ونفذت هاليوم راح ارجعلك القرار الك بحياتك وطريقها
- شلون
- شهاب اذا جنت تريد تكسر هالحاجز الي بينك وبين الاحياء الكاني واذا تريد حياتك هادئه ابقى بمكانك
- وين راح ترحين
- اريدك تغمض وتفكر بحجيي هذا جواب لكل مره سالتني بيهه شنو شعندج وليش ماتحجيلي تذكر مو
اني هسه ماريدك تجيني بفضول ولا بشغف لشي ماعندك وتريد تملكه وتشوفه شنو اريد تحكم عقلك
وتحط قابليتك مقابل عينك وتفكر بكل كلمه حجيتهه الك ارجع اذكرهن كلهن وفكر بيهن .. وقرر بنفسك وبكل هدوء ..اني راح اكون هنا قريبه
دورني والكاني قبل الفجر اذا قررت ومن دون فضول واستغراب ولا مستحى من شي اريد قرار رجل واثق ويعرف هو شنو يريد من حياته ولا تربطهه بالحب ولا بالزواج هذا موضوع ثاني ماشي

- ماشي بس انتبهي عله نفسج

- تمام .. يلا تمدد وغمض

تمددت وغمضت وهيه خلت ايدهه المثلجه عله عيوني شويه وراحت ...
.
.
يتبع

# بعنوان البارت الجاي قنبله الموسم 😄 ابد ماحب اخليكم فضوليين ابببددد