المنطقه13
#بارت٢٣
مريم السعدي
والله صعد لغرفتي حتى
اباوعله عيونه انفكت ويباوع صفح
بقيت ساكته انتظر رده فعل ثواني صافن وباوعلي
همس. ودار وجهه
شفتي بعينج
لا لا حسيت بي وره شوي جان جوه يحجي وي خاله بيوم المطر وقبلها هم بس مشفته
هز رجله بسرعه وصك على سنونه هز راسه
مشفتي بغرفتج بس حسيتي
ااي
باوعلي ورمش عيونه ذبل
شون. شحسيتي يعني. همس
نصيت راسي ااسوالف مال ادبسزيه
بقيت منصيه احس وجهي جممر
هز راسه من باوعتله بلع ريك والتفت كال بهدوء
صعدي
بس اوكف شحتسويله
باوعلي عكد حاجبه منو
عكروط
مالج دخل يمي
كالها ودار وجهه عالحديقه
تقتله كلتها مرتبكه اذا قتلته اموت صوتي رجف خايفه
التفت متفاجا ليش
من ورايه انسان يموت مااتحمل
ماقتله كالها رفع تك حاجب روحي فوك
ليش قتلت دمام
التفت راسن وتقدم
انتي شنو متنامين بس تراقبين كالها بتهجم تغيرت ملامحه
بلعت ريكي ورجعت لالا انام بس الصبح كاعده وو بليل انام
وكف تنهد همس
صعدي ليشوفج احد
منقهرت علي حيوان خطيه. انت متحس بعذاب ضمير
نتر وعيونه عالبره متوتر حيل
صعددي عااد
ا
مشه مشيت وراه توني الوف لباب المطبخ وسمعت صوت
استاذي انت هنا
فزيت التفتت شفت الهودج عكد حاجبه من شافني اباوع لبو قبضه عض شفته بكل قوته والهودج راسن نصه والتفت تطانا ضهره
اباوع لاصابع ايد ابو قبضه شوي شوي تعقجت مثل اليريد يملخ شي وتوجه
عليه بسرعه نتر اصعدددددديي من خرب ---
لتكفر همست وبجيت راسن من خوفي
هز راسه وعيونه عالباب فتحها صعدي صعدي
شون فدوه
اصعدي شبيج لتخافين باوعلي بنضره. يهديني. بيها بلحضتها نسيت منو هذا ردت اي شي يطمني ويبرد خوفي
خاف يحجي خاف يجون عليه بليل. كمت اشهك وجسمي يرتعش
صفن عليه منو اليصعد دا-- وسكت غمض صعدي يابه همس ومغمض يهز راسه بقبول
باوعتله بثقه يباوعلي صعدي وارتاحي محد يوصلج
زين هزيت راسي وسد الباب ضل يباوعلي من الجام مال باب بثقه اشر بحاجبه روحي
صعدت فوك بسرعه
واباوع من الشباك طلع ابو قبضه منصي والهودج يلعب بالجلب كال
استاذي هاي صبيت الكاعيه
منايم هودج
لا والله
همم جر نفس والهودج منصي ولاجاب سيره
رفع راسه ابو قبضه عالشباك باوعلي ونصه مسمعت شديحجي
بس كل الفهمته انه هودج راسن سكته وخله ايده على كتفه
ابو قبضه مزين لامنا. بحمايتك. براحتك انت شتريد نعرف نعرف والمتريد نعرفها مو ضروري.
ابو قبضه هز راسه كل السمعته كال
تره مرتي
اي هذا. هو بس
وابتسم شون طببتها. تره راسي افتر معناها اني موخوش احرس
غمض ابو قبضه ليضل بالك انت احسن واحد تناوب. بس خليها بيننا هودج ابد ميطلع هالحجي
اتطمن
يله فايت ارتاح
اي اخذ راحتك
بقه يفتر ابو قبضه بالشارع والتلفون بيده يخابر ويسده. وكلسا عيونه يرفعها لحد مطلع عكروط
استاذي دكيت
تعال عكروط تعال
وكعدو عالقنفه عكروط وجهه انكلب ونصه راسه وابو قبضه مثل اليرزله وعافه وكام شوي وعكروط كام وراه ضل يبرر من همسهم مبين ابو قبضه صار عصبي بس يحجي همس وجهه صار دم وسكتو
من يومها اي شي محسيت وكمت انام براحه اكثر ولحد الان نضرته التطمني كلما اريد انام اتذكرها
شكد امنني بيها
يعني هو ادمي لو لا
يعني مجرم لو لا
بس هو كلش ساعدني لحد الان. رغم ما طلعني بس هم حقه
—-
احمد- الحياه قست عليه هواي. ارجع توالي الليل مكسر ودومي اغسل مي بارد يكون خلصان لان اسبح وانام نوبات حتى بدون عشه
كم مره صارت وحسيت باسينات تكعدني همس وتتلفت عالباب
احمد
احمد كوم تعشى موزين تنام جوعان
وافز من نومي اباوعلها ياربي شكد بريئه شكد حلوه وحبابه وحنينه.
ذيج الايام حنت احتاج لحنان واهتمام ازيد من ماده واكل ولخاطر متنقهر اكوم واخذ الصينيه منها تاخذ هدومي الوصخه وتصعد
كم مره تكررت الحاله عمي محمد اختفى مره لخ محد يعرف وينه يعلم الله من اختفه ارتاحيت اكثر لااكوً ريحه دخان لااغاني يشغل صلاتي احس عليها من وكت والغرفه مبيها ريحه تصير
واسينات تنضفها
وفد يوم غفيت وره مكملت العشا وغسلت المواعين والصينيه خليتها عالدرج وطبيت انام توني اغفه
حسيت بلمسات على شفتي نومتي خفيفه حيل فزيت واشوف رقيه بوجهي
رجعت ليوره
شتسوين هنا روحي الله يستر عليج
من خجلي غطيت روحي زين بفراشي كالت
اني احبك احمد مدااكدر انام الليل بس افكر بيك
كدما تاثرت كد ماخفت —روحي روحي الله يستر عليج روحي اخوتج اذا عرفو يطيحون حضج
ابتسمت وتقربت تبوسني من خدي دفعتها خزرتها وطلعت تضحك
توني افرزن واركز كمت قفلت الباب عليه وصفنت
خل افوت للحمام من الهبطه انحصرت فتحت الباب شفت اسينات تحجي وياها جانت ساعه خمسه ونص الصبح
عيون اسينات مليانه دمع مقهورة وهي تبتسم بحقاره. باوعتلي ودارت وجهه طبت للغرفه
بقيت صافن على اسينات التباوعلي حايره مبرطمه اخاف اسال شبيج مدري شسممت عقلها
والله يدري لاشايل بكلبي هاي ولا لهاي اسينات اموت عليها لان حنينه بس موحب ودكه كلب صعدت فوك واني طلعت من الحمام طبيت للصاله قفلتها مكدرت انام خفت من رقيه حيل
وكمت لبست وطلعت ولكيتها تراجع بالطرمه كالت بصوت لين
متتريك ويايه
ورجعت عليها لازم اخلي حد
شوفي رقيه انتي والجان هي مجرد خواتي والسويتي عيب خلي ببالج اذا هلمره سكتت مره لخ. كلت لحمزه لو عمي راجح
صفنت عليه وخزرت
انت تحبني اني حاسه بنضراتك
ياب دطيررري نضرات بابا اني بياحال تحبني والله يا الله
دتلزمني من زندي دفعتها وطلعت لعبت
روحي. وفتحت من وكت بقيت اشتغل حدما الولد جوي اني مكمل السيارات الباقيه بالورشه كلهن
الرجال اثنى على شغلي وبيومها غداني لفات كباب
بقى بالي يم اسينات ماريد تنقهر مني. هواي اعزها وهواي تعبتها بالست شهور مدري هالحقيره شكالتلها. وقهرتها
لليل كملت شغل ببالي اخذلها هديه بقيت امشي عالشارع شفت محل يبيع حجابات وشالات
اخذت شي بلون بشرتها ونوعا ما راقي ولفيته امشي واحجي وي روحي
اذا لكفتها امها مبيها شي اختي وحبيت اشكر تعبها ويايه
وصلت للبيت بقيت انتضر تنزل منزلت
طبيت للحمام وطلعت للصاله لكيتها توها تطلع وبيدها هدومي الوصخه
مرت عمي توها طبكت الباب مال غرفتها
توها تصعد اول درجه باوعتلها ابتسم
اسينات تعاي احاجيج
همست مبتسم هي ابد مباوعتلي وكملت الدرج
نار صاررت بيه شكد مجروحه ياعيني طبيت محضره العشا ازيد من قبل تعشيت وكملت غسلت المواعين فكرت اخلي الحجاب بالصينيه. وترددت
خليتها عالدرج
دااغسل طلعت رقيه من غرفتها نفس الاثناء طب قاسم بلبسه العسكري ابتسم من شافني
ها ابو شهاب الله يساعدك
هله يابه شونك
زين الحمد لله
رقيه حضريلي لكمه
اي خل اكعد ماما
عفتهم وطبيت للصاله قفلت الباب
صدك لليل هم احس الباب تنفتح همزين قافلها
مدرت بال الها صفنتني صلافتها وكحه وكحه ثاني يوم كالعاده عمل ورجعت بليل انتضر تنزل اسينات ماكو منزلت
سبحت و طلعت شفت حمزه نازل من فوك تعجبت وهو ابتسم كال
ها يابه دزو الصينيه بيدي
ها هه عاشت ايدك والله داتعبهم
كلبي انقبض هلكد اذيتها شكلتلها وهيج ضاجت
كمل كلام
مو اسو شوي مصخنه هسه صعدت شفتها
توني اكعد اكل بالكع ورجعت كمت
شبيها ياستار
باوعلي ابتسم كال مصخنه اكعد شبيك
عمي راجح فوك
اي فوك
الله عليك خاف يرادلها طبيب
لا ودوها وجوي
مكدرت اكل لكمتين وكمت خليت الصينبه عالدرج صافن اسمع سوالف حمزه وابراهيم وضحكهم كلش عجبني افوت للغرفه بس مماين عليهم طبيت للصاله
الوحده شكد موحشه وكريهه اتخيل لو ابويه. عدل واتذكر صدمتي بيوم سمعت خبر وفاته
لو عدل مجان ويايه هسه نطب ونطلع ببيتنا القديم
مجان مليكه يمي
مجان حسيت بهل الثكل على صدري والمنيه لكل حركه اتحركها هنا
ورجعت اقرا واجود بالتلاوه واتلوه باللحن نفس ماوالدي يقره. كان. اغمض لكل حركه كلي عليها
لا يابه هنا توقف نهايه ايه بدون حركات تصير
يابه بيها تنوين
اي ينقرا بدون تنوين لان نهايه ايه
وارجع اعيدها وياه
كملت قراءه الجزء وطبكته
احلى شي عدي من جنت اطبق ماضي وحاضر احسه موجود بصفي ويسمعني مبتسم ومن اكمل يكول نفس قبل
احسنت بارك الله بيك ولاغلطه
تمددت مغمض عيني براحه
ممحتاج رفقه احد الله ويايه شكبره
ويومين مرت اسو منزلت والصينيه والملابس تنزل واني انشب وانطفي
اخر شي صار بوجهي عمي راجح
سالته عليها
شون صارت اسينات
احسن عمي الحمد لله
عمي ااا بلكن وطلع حمزه من الغرفه
ها يابه صاعد لاسو عدها امتحان رياضيات
اي روح
بقيت اباوعله صعد وتحمحم
باوعت لعمي عمي بلكن اصعد اشوفها ضل بالي عليها هم مثل مليكه هي وخطيه هواي دارتني
بقه يباوعلي ابتسم اصعد عمي اصعد
صعد كدامي صاح
ام اسينات هذا حمودي صعد
كالت بصوت
هااه هله بي تفضل تفضل هله بيك يوم
نصيت راسي والحجاب بيدي ميت خجل
باوعت حمزه مد راسه يبتسم تعال هنا مو مثل قبل هه
هزيت راسي تقدمت تجاه حمزه جانت صاله بسيطه وبيها قنفات بسيطه. مرتبه ونضيفه حيل
كعدت مرتبك كال بصوت عالي
يله اسووو معوده داروح بيت خالي
شوي وطبت منصيه راسها
كالت
السلام عليكم
هلو اسينات ضل بالي عليج كال حمزه مريضه
باوعتلي ونصت راسها لا صرت احسن
حمزه منصي عالكتاب مالتها كال
حمزه-هذا الفصل مو
اسينات - بلي فد موضوعين
حمزه- ادري
احمد- يله اعوفكم تقرون اسينات هاي مال سلامتج فد شي بسيط
حمزه رفع راسه ابتسم ونصه
كله هداياا
والله فد شي بسيطه لان خطيه هي هواي تعبتها وهي حالها حال مليكه عدي
مقبلت دارت وجهه متقبل تاخذها
اذا مترضين حتى اكل مااكل منكم بعد وباوعت لحمزه حمزه انت من تشتريلها شي تاخذه
اي تاخذه اخذي لج اسوو هذا هم مثلي حمودي
اسينات- شكرا
مدت ايدها اخذتها باوعتلي مدمعه عيونها ونصت يله تصبحون على خير
حمزه- هلاو
نزلت جوه وعفتهم طلعت خاله مروه ووراها رقيه من الغرفه همست
امم صارو حبايب عشتووو عساكم بنار بينكم
رقيه عيونها تعلكت عليه بغضب عبالك دخونها طبيت للصاله وقفلت الباب
واحلم باحلام مزعجه احس ذيابه التمت عليه على نومتي سود كلها وواحد ابيض يباوع بعيد صغير اختنكت حيل كلها مسوين دويره على راسي
وفجاءه جلبه. جبيره بيضه . عدها باذنها طكعه جوزيه
والتمت عليهم جرتني من زيكي بحلكها منهم كوه انجريت جنت تعبان لدرجه شالتني على ضهرها وركضت فزيت من النوم ميت عرك
وارجف فتت للحمام وطلعت صليت وانهد كمت رحت للشغل وببالي ضل الحلم كلبي مقبوض حيل
———-
مليكه- صلاه الليل جنت اصلي وهوسه الشارع تدوي مرتين غلطت واستغفرت ورجعت عدت كملتها ورحت اشوف شبيهم تخبلو
شفت قفص طيور جايبين بيضه ورصاصي حمامات الله شون حلو يخبلون
ونوير اخو الهودج طاير بيهم ويعدل القفص ويرتب بي ويخلي المي والدخن
ابو قبضه صافن
يول يرادلهم تنضيف ريحه القفص اذا ضل يومين تذبح
استاذي والله اني انضفهم كل يوم
ويطبك هريش
دباوعهن شحلاتهن يعني اخليهن
خليهن شعدنا خليهن
ابو خبزه- اي خليهن خاف نعوز دجاج نذبحنه زوج
نوير عيونه تعلكت يريد ياكل ابو خبزه ضحكو عليه حتى اني ضحكت
وكام كل فتره يداري ويطير بيهم ويرجعهم قبل لينام نطو منضر حلو من يفترن بالمنطقه منضر براءه يختلف وب نفوسهم والجلب يلحكهم ويطيرن ويردون ينزلون
كمت بين يوم ويوم انزل لخاله انضف تسولف شوي عن المسلسلات واصعد من اكمل
اصعد انام وهي تبقى لل٨ تنام مثلهم
ايام عاديه مشت لاعكروط الوصل ولا ابو قبضه اللي رفع راسه
بس المنضفات الجانو يدزوها بالشهر زادت الشامبو والصابون ونوبات بليل بليل حلويات يجيبون
ايام عاديه تمشي والمنطقه هي هي. اللي جان يصور مموجود هالفتره المرت كلها
تالي لكفته بغير سطح لمحته يصور
عالبضاعه والتنضيف مال سلاح
كملو ساعه ٩ الصبح الدنيا ثلج نهايه الواحد وكلمن طب لبيته هدات المنطقه
الطيور كلمن انحشك باللخ خطيه يدورون دفو
واني صافنه مميله راسي اتفرج واسبح بيدي فجاءه لمحت الولد الديصور ديعبر من سطخ لسطح وصل لسطح بيت سمورا
الل كاعد بي الهودج وجماعته بقيت صافنه عبر عليهم لمحت نوير نزل من الدرج وبيده بطانيه ثخينه وينزل مدوهن نعسان وباله عالطيور
انسطرت بالولد الديصور
شفت نوير غطا القفص زين لمحت الولد معصب دينزل من درجهم على كيفه ويتلفت جان لازم بطنه وتفاجا بوجود نوير
نوير من شافه صاح
منو هاذ لااك
وتوجه عليه الولد ركض تقاوه وي نوير نوير رغم ما ضخم بس مكدرله لزمه من ركبته
واني روحي فرفحت اكمز يم الشباك
لف طرف اليشماغ المعصب بي على ركبه نوير وهذا فحط
اني روحي ساحت بله وعي كمت ادك عالحايط واصيح حيموت بس صوتي مطلع
نوير من لوعه كلبه جر يشماغه من وجهه طلع صبحو
فزيت بخوف كام. تقاوه وياه
وطلع صبحو. سجينه من صدره واني ادري بي قاتل. قبل. وخلاها على ركبتها
هنا وكف كلبي
حركه مكدرت اتحرك نوير هواي اضحك على سوالفه. انتضر يحجي ويضحك تعلمت عليهم حيل واحس واحد اعرفه ودينقتل كدامي
جمدت وكانما
بفلم
بحلم
دموعي بله مااحس تنزل وكلبي وكف
نحره كدامي كدامي اننحر ووكع بالكع والدم يطشر مثل النافوره
كعدت على ركبي اريد اتنفس مااكدر رجعت ليوره ماريد اشوف ماريد اشوف واضرب براسي بالحايط مات. لو بعده ورجعت اباوع مات لو لسه
الدم غرك الكع وصبحو اختفى
متت بجي تشنجت
اختنكت النفس راح مني
كمت كوه اتنفس كلبي دكاته وصلت لاذني دااسمعها
بس اباوع عليه عيونه مفتوحه والدم داير مدايره واتذكر اللقطه من نحره
مكدرت اتحمل الموقف شوي شوي كمت احس روحي تروح وغابت
وره وييين حسيت بهوسه مكلوبه الدنيا كلب
الهودج ميت بجي ويصيح
ماعوفه اللي ذبحه
ابو قبضه من عصبيته طرد الولد كلهم من المنطقه وهدو بالكوه كعدو
منو القتله شون انقتل
ابو كزله- ابو قبضه ميت مره كتلك خل نخلي كامرات
والتصوير من ينخزن وين يرررروح. هسه احنا عدنا بيننا مدسوس عرفناااافهمني نعرفه اطلعكم كلكم هسه من المنطقه واخلص ولا يوميه واحد مقتوول
يصيح فاقد تالي داخ وكعد مددو كوه وشالو جثه نوير ملفوفه ببطانيه الجان. يلف بيها الطيور
بجيت وانزويت بالزاويه لميت روحي وخليت راسي بحضني ميته بجي وتعبانه
المنضر مديروح من راسي
خاله صعدت باوعتلي
وتلمست راسي
سمعتي مو
خاله طلعيني مداكدر وروح ماما وبابا مداكدر شهكت ابوس ايدج طلعيني داموت.
نصت راسها ورجعت نزلت جوه
مداتحمل مداتحمل رجيت راسي على ركبي والمنضر حتى باحلامي زارني
وافز وماشيل راسي ابجيي بقهر يعني هو تاذه لو يمكن خاف من صار بي هيج
او يمكن كام يحركه المكان كلش
يا الله اخذني يم اهلي متت واني بالحياه
غفيت وراسي بحضني لامه رجلي لصدري ومجتفه رجلي حيل بعدها ليهسه الرعشه بيه
بعدها ليهسه المنضر ياكل بيه اكل
خاف يقتلهم كلهم خاف ياذيهم ماريد اشوف. شي بعد ماريد
ورجعت غفيت وراسي بحضني حسيت الصبح ثاني يوم جسمي مكسر واني بنفس الوضع احس روحي اغماء الصار عدي مو نوم وتذكرت ورجعت ابجي البارحه هيج وكت كتله. رفعت راسي على كيف ركبتي مكسره
صارت كبالي رجلين ضخمه بجواريب رصاصي وابيض رفعت راسي على كيف صعدته ليفوك
شفت. ابو قبضه عيونه دم ويتنفس بصعوبه
بجيت بقهر واشهك حيل مبيه
قتلله.
شفته بعيني كتله
غمض وقرفص كدامي جان قريب حيل اي مسافه ماكو بيننه باوع بعيني وميل راسه بتعب همس بالكوه. يغمض ويفتح بهدوء وتعب مفرط . ويحجي بتوسل
احجيلي كل الشفتي مليكه ——
يتبع
مريم السعدي
باجر اخذ استراحه لان شوي تعبانه
والكم جزيل الشكر
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!