رواية منطقه13 الفصل الحادي والخمسون 51 - بقلم مريم السعدي

فرهدت بهدوء، صافنةً تقربت وأنا أركز عاقدةً حاجبي وانصدمت. ذهب خالتي اللي كانت لابساه. بتوتها العريضة وقرآنها ومحابسها. خليت إيدي على وجهي وبكيت. أحمد همس: مليكة شنو هذا، المن؟ قاسم حكى بصوت هادئ: أبو شهاب خلّيها تجر نفس، خل ترتاح. عيوني عالعلبة وأحمد عيونه عليّ، خلاني جوه كتفه وباوع لقاسم أشرله. تصبح على خير. قاسم كال: أي شي تحتاجون يمكم أني. صعدت، رجلي راحت حيل. لهنا وانتهت أعرف. لهنا وخلص حبل الوصل.

دز ذهب خالتي يعني. يعني هو عايش ومرتاح. ومعناها هذا ذهب خالتج وعيشي وحدج. دموعي تنزل وأحمد يشدد حضنه. وصلت لهولنا، سد الباب وكعدت بالكاع. كعد بصفي أحمد. همس وباس راسي: ملوكة. باوعتله. ليش هالدموع، مال من هذا؟ مال خالتي وضحى. هز راسه وباوع للعلبة، سدها وجر نفس. توقعت، بس شلون عرفتي الرمز؟ هزيت راسي بالرفض، ما بيه أحجي ودموعي تجري. ليش البجي يا عيني، غير أفتهم. كمت أشهق اختنكت، وهو شدد حضنه.

لج بابا شبييييج. هيييي. وأح أهفج. والله. شبيج حتموتين. يعني هاهيي، ما يجي بعد. ضربت على فخذي بقوتي، من دز الذهب يعني عايش. وراح هذا هو. أنتي صدك تحجييين؟ غطيت وجهي، إحساس الخذلان شكد صعب. جر إيدي أحمد بقسوة. صيح: اسمعي أكولج. إذا شفتج بعد تبجين عليّ أقلب الدنيا على راسج. الولد ساعدج، الله يوفقه ويهديه وخللللص. لهنا خلص مليكة. أمل بي ماكو، كتلت الأمل مليكة. بقيت صافنة ودموعي تجري.

ابجي منا لسبع سنين لو تموتين ما أخليج تفكرين بي. ولا هو اللي يحدر يوصل هنا مفهووووم. فزيت من صياحه وعصبيته، شمر العلبة وفات للغرفة، اسينات بس صافنة فززناها من النوم. من أحمد فات جتني كومتني، أحجي وأبجي وهي تهز راسها وتمسح بدموعي. ما قدرت أنام، أفتح بالعلبة وأسد. دورت كل ثغرة بيها ما لقيت شي، حتى التراب اللي داخلها مسحته أتخيله تلمسها وأشم بيها، ماكو ريحته ما موجودة.

ضميت العلبة ولبست الذهب والقرآن. أذن الفجر حسيت أحمد طلع يركض وتلفونه على أذنه. أي هاي طلعت، لا وداعتج طلعت لتخافين ماكو شي. ونزل. أحمد: ليلتها ما نمت، أختي مذبوحة بحب واحد مجرم قاتل ٣. شلون أخليها وأنطيها مجال، توّني أغمض ودق تلفوني، الظاهر الليلة ما تريد تخلص. نور. فزيت. ألو ألو نور. أحمد فدوة. تحجي وتشهق. أحمد أخويا بأربيل وعليّ ما يرد عليّ، فدوة تعال لي. خو ما بيج شي. مو أني أمي. أمي لا إيد ولا رجل.

جايج هاي لبست. فدوة لتتأخر، خايفة، وجهها أصفر كلش وأكعدها ما تكعد، فدوة. بس نبض باقي. جايج. عيوني أنتي لتتأخرين. طلعت طاير طبيت شلت أمها وياها وطلعت وديتهم مستشفى. صعدة ونزلة. ارتفاع ضغط مفاجئ وجلطة، ونور انهد حيلها. ماتت بجي، بقت الأم بالإنعاش ساعات. وأني أتوسل بنور بس أكلي شي، بس هذا عصير اشربي نور حتوكعين منو يدّاري أمج. لازمة راسها وكاعدة عالكراسي بالمستشفى.

جبرتها تنزل كافتيريا ووصيت عصير ولفة بيض، كوة أكلت وتتوسل كمليها أنتي. أكلي نور. تباوع لي وتنصي عيونها تعبانة. ابتسمت إلها. نصت تلفونها دق. ردت. ألو أي بالمستشفى تعال —سدته ولزمت راسها. باوعت لي: إذا صار بيها شي راح يحملني ذنبها بكولي لأن بقت يمج. لو يمي ألحق عليها. أخوج مو آدمي ولا كأنه أخوج. أبويا جان يكول شمسوي بدنيتي وأنطاني هيج ولد. الله يساعده ويرحمه، كافي بجي عيونج راحت، كملي لفتج لخاطري. كملتها وتغمض من تبلع.

بلاعيمج مو؟ هزت راسها معقجة وجهها، العصير ثلج وخّرته ووصيت حليب وكاكاو، جبرتها تشرب. كملته وغمضت: ألف رحمة على روح أهلك. ابتسمت، باوعت لي: هواي دأتعبك. تعبج أقصى درجات الراحة عندي. عفت أختك وحدها؟ لا يمها اسينات. هزت راسها تباوع لي وتنصي. شبّك ويا مها. جريت نفس وارتجيت. شكلت لج هي؟ كالت رزلني. وما كالت شسوت حتى أرزلها؟ نصت راسها.

بنت أخوج وكحة ترى اسمحي لي، نص الليل تدق السندويش، علبة من الفتحة اخترعت عبالي أنتي. من رحت شفتها ها خيرج، تكولي اشتاقيت لك. فكت عينها كلها. صددك؟ لعد شكلت لج. كالت رحت أودي صينية إله بيبي دزتني ويصيح عليّ. تدزين بيش ساعة، جتي ساعة ١١ بليل والبيت صنطة، توقعت أنتي وفزيت خفت لا بيج شي. خليها عليّ. ما عليّ منها أصلاً، ما كمت أبات بالسندويش بس الظهرية أخذ لي ركسة بي. أرتاح. بس جريئة ما توقعت منها هالشي.

مراهقة شسوي، أني أحاجيها وأعقلها، أوعدك ما توصل بعد. سكتت صافن عليها همست. هذا أخويا أجه. أني حأطلع خاف يحجي حجاية وما أتحمل. تعبتك ويا به أحمد. لا تعبج راحة ابتسمت. فدوة ديري بالك على روحج، أكلي تقوي. إن شاء الله. وطلعت من المستشفى. قبل للمحل. ما جيت لليل، ضل بالي، خابرت كم مرة ما ترد، متت قلق. أراسل ما ترد عليّ. تالي عزلت ورجعت للبيت. مليكة: الصار مرضني بس نايمة واسينات تروح وترجع. تتلمس كصتي. وأني أبقى مغمضة.

اسينات: بـ١٢ ونص الظهر طبت ضل تضحك. أسووونة بابا جابني أسونة. هلاو ضلولة والله اشتاقيت لج. بابا قبل كال من أرجع أجي عليج لأن بيبي حتروح كربلا. ها زين وجاب لي هواي شغلات باعي هاي لي ولج. رفعت علاقتها وهم بيها لفات مطعم. دآطب أكعد مليكة دق تلفوني هو. رنين رديت. ألو. ألو سلام عليكم. هلو أبو ضل. هاو شلونج اسينات إن شاء الله زينة. الحمد لله. تهانينا نجاحج. شكراً.

هاي ضل جلبت تريد تجي وما قبلت تروح ويا أمي لكربلا. بلكن بلا أمر تقنعيها حتى أدز خليل ياخذها لأن عنده روحة للنخيب. خليها يمي، كلتها بتوسل والله تونسني. جر نفس همس. مو أني ما أريد أعلمها، تتأذين وتتأذى باجر عكبه دوام. ما يخالف عود من أرجع من الكلية أجيها. الله كريم، أني ٣ أيام ونازل يعني تضل عندج هالفترة كلها والله فشلة ومصرف. هاي بس تتطلب.

لا والله حبابة هنا، وأني عادي حتى من ما تجي أسوي حلويات النا للبيت، فهي ويانا لتشيل هم. ماشي ما عندي غير حل، بس أريدها تبرد نارها وتكبر حتى أسيطر عليها من أجبرها ما تتأذى. سكتت. ألو وياي؟ أي. ماشي محتاجة شي؟ لا شأحتاج تسلم. ديله فيماللا ما أوصيج بيها بعد مثل أختج الصغيرة. أوك. سديته منه انتبهت على روحي. أصب عرك. ليش هلكد أتأثر ويدق كلبي. هيج إنسان هيبة. هيج إنسان كامل. وبدت ضلة تسولف. أنتي ليش كمتي ما تجين؟

امتحانات حياتي. أي بس احنا خوات. صحيح يله بعد أجي دوم وأنتي هم تعالي. بابا صيح عليّ وكال لي ما تروحين بعد، بالكوات قبل. بالكوات ههه ليش؟ جيف سبحنا. كالتها ونصت. ليش ما يقبل؟ أتلمس شعرها وأسولف وهي تلعب بشعر الكوشة مال قنفة. مو يكول ما يصير عندهم ولد عيب. جان كتيله بس أني ومليكة واسينات. كتله حتى كال لي منو سبحج بالحمام، كتله اسينات طبت يابه سبحنا سوه. وكف كلبي وهي صافنة. ضل كتيله فتنا للحمام سوه؟

كتله بس ما نزعت كل هدومها والله بقت بالـ —وضربت على كصتي مغمضة. راسن صيح كال لي كومي كومي حتسوولف. عضيت شفتي بخجل، أني شلون ما انتبهت لهال سالفة، هاي لسان ما تسكت، تخط الأكو والماكو وأني غبية. تبللت هدومي وذبيتها بقيت بالداخليات. بس غسلت شعرها خاف يبقى شامبو وطلعت. توبة بعد. مليكة صحصحت بس السكوت غزاها، ما تحجي أبد. تشتغل وتصلي وتأكل وتشرب وهادئة. أحمد ما يحاجيها بس عيونه تلاحقها وين ما تروح.

-خليل: وصلت بغداد، رحت لصايغ أخو صاحبي ودزيت على صاحبي وياه. طبيت بليل عليّ. انصدم من كمية الذهب، ساعتين ٣ يوزن ويكسر ويحسب ويضحك صاحبي. يول منين خامطهم؟ أمانة وروح أبويا أمانة. أم در خمسين مرة خابرت وتتوسل. حجية والله بالصايغ أني لتخافين. يمه خاف يبوكون الفلوس منك من تطلع؟ ديله. بله. نجومي وسلاحي أكش بي ذبان لعد. سديته منها كمل. حساب كال: هاي الملاوي محشية شمع وهذا السلاح كله شمع. المهم كسر بجمع شكد؟ كلها تصير.

٣٠٠ مليون شنو بايعين بيت ومسوين فلوسهم ذهب؟ أعتقد هيج. زين عمي شوكت تريد الفلوس؟ والله بأقرب وقت. أريد أشتري لهم بيت خطية. صاحبي نط. ولك بيت بصفي ديبعوه شلونه يخبل. صفنت: نظيف عمار يمعود؟ أي والله نظيف يخبل. زين أريد محل يعيشون من إيجاره. بي مشتمل معزول يكدرون يأجروه. ها محلولة لعد امشي نشوفه امشي. تسهلت والله ورحت وياه بصف بيت صديقي الحايط على الحايط. يخبل. ٢٠٠ متر والمشتمل ٨٠ متر. مرتبات وحيل نظيفة.

خابرت الحجية كالت إلا لأشوفه يله أحكم. حجية أنتي كاعدة أربع أيام تحبين أمر عليج؟ والله يمه أتعبك خاف. لا تعبج راحة. أحجي وأضحك بس خلي تصير. والله. وجبتها ثاني يوم توقعت البنات وياها ما جابت أحد وحدها. تفتر وتهز راسها موافقة. كالت: سوي مكاتبة. هاهي توكل بالله مدارس قريبة ثانوي وابتدائي سوق هم قريب كله يمها حتى أني يمها والمنطقة مرتبة هنا حيل. بيت صاحبي قريب على بيت خالي. كملنا مكاتبة، خطية الولد ما عافني كملنا كتله:

حبيبي سوي لي سويت ببيتك حكابلك وأكعد بعد. ليش شتصير منك الحجية؟ أم الدنيا كلها هاي أووف. ولك هههه بس لا أم زبرجد؟ زبرجد ولك مو زبرجد. لعد شسمها والله نسيت؟ أحسن لتتذكر. يول بس لا مصاحبها؟ يول. هو أني شفتتها مذهب الحلو؟ أحجي معصب، ابتسم عمار ورجعنا ورجعتها لكربلا وطلعت للنخيب. جان ببالي نزلة اللخ أشوفها وأكمل تجهيز البيت ما توقعت مكالمة أمها تدعي لي بالخير. يمه كون الله يحفظك ويكللك بالنصر بكل خطوة على عدوانك.

رحمة الله والديك حجية. يمه احنا كعدنا بالبيت وشوي شوي دناخذ وخطية صاحبك اللي كال لنا مأجرين. توهم عرسان والحمد لله. دبرت. صفنت. حجية شلون جيتو من كربلا؟ يمه تكسي وذبنا. البيت فارغ خالة. أي يمه. مو خطية أم سلام طلعت وياي واشترينا هواي شغلات المحتاجيهن بعد الله كريم. ألف عافية، جريت نفس مبتسم مرتاحين إن شاء الله؟ حيل مرتاحين. الله يجعلكم زين ومدارس البنات؟ بعد خطية أبو سلام كال أني يمي أكملها وأدزها بيد أم سلام.

الحمد لله. يله أبني الله يحفظك. سديته منها ابتسم. وين ترحين إذا مو بالبيت أشوفج بالمدرسة. وين تطيرين يختلوج مني؟ ما صدقت شوكت أنزل دأشوفها والحمد لله بنزلتي. رحت بيت خالي، خابرني سلام كال: ضل يم أختك جيبها لبيتنا أني أتأخر بنزلتي. خليها هناك شرايد منها؟ لا خليل فدوة تتعلم أمي بالبيت تضل يمها. خوش حجي. وفعلاً رحت لأهلي وجبت ضل وضلت تبجي تريد اسينات. تالي كتله امشي هناك محد اكو.

ما أريد همست، وجهي عابساه هسه بس أشوفني تقوم تنبش. جر نفس كال: أني موجود، أبقي بيت سلام، سلام أسبوع يله ينزل، يومين وأرجعج فضيها امشي. أوك. رحت وياه وصلنا كيفت بي أم سلام. وضل ما مصدكة جرتني لبيتهم، الخدامة جانت دتنظف بيت فريدة. وأم سلام بيومها خطية كلسا تجي يمنا مكيفة. جنت أتهرب من عيونها من تباوع لي أكول خاف تكولي شي أني ما أكدر عليه. بس ألكاها تسكت، عظيمة هالمرة تتفهم المقابل من نظراتها. خليل صاح عليّ. طلعت.

ها عيني؟ أكولج شسمه. عندي شغلة تجين وياي؟ يحجي ومتأنق ويحك بكصته منحرج. للأخير والعطر مالته سابقه بأمتار. وين شغلة وأني شلون أجي وياك؟ باوع عالكاع وباوع لي. مو. نسوان وما يصير أطب وحدي ما عندهم رجال. أبدل يعني؟ أي فدوة اا باعي. ها رجعت مديت راسي. همس: شحتلبسين؟ ابتسمت: أكشخ مثلك. أي ههه تفهميني. تدلل. بدلت وضل وياي وين حنروح؟ وي خليل. يعني وين؟ ما أعرف.

طلعنا وياه أخذ سيارة خاله. مرتبك جان بيده أوراق وهوياته بجيس مخليه كلسا يباوع لهن ويباوع للطريق وصلنا. ونزل باع لكاع الرصيف ابتسم. المي د يجري، دق الجرس ويعدل روحه كدام الجامة مال سيارة. صارت عيني بغينة رفعت تك حاجب. ابتسم وضم ضحكته. مفضوح حبيبي فتحت الباب مرة. تطلع بالخمسين. هلت بحرارة بي، أشر عليه كال: حجية أختي الصغيرة. هلا بيها تفضلوا تفضلوا. طبيت منحرجة وظل لازكة بيه. لهجتهم تختلف، وخليل منصي وجهه صار دم.

تفاجأت نزل خروف ويا من الصندوق وخلاه بالطرمة، ربطه وغسل وفات ورايه. طببنا استقبال مرتب رغم بساطة الأثاث بي، والمرة لسانها عسل بترحيبها. وحجه خليل: ظل انتبهت على بنية صغيرة تطلع أكبر منها كم سنة يم الباب، تمد راسها وتنهزم، قامت شوي شوي تبتعد مني، تباوعلها وتأشرلي: أروح يمها؟ لا ظُلوُلة كعدي. وتكعد بس عيونها عليه. المرة باوعتلها وباوعتلي: بنيتچ هاي؟ هه، لا مثل بنتي، هاي حفيدة أم سلام.

يا عيني سبحان الله، أقول ليش عيونها مملونة مثل أمها وخالها. ابتسم خليل منصي يقلب بالأوراق. صاحت: تعاي فيروزة، تعاي أخذي ضلة لعبيها وياچ. همست: هاي هم يتيمة سودة بوجهي. انتي الخير والبركة حجية. وحجه خليل: حجية أوراق البنات كاملة، خالي دزها بيدي بس بعد يراد بصمتهم وصور. إي عندي صور مال مخيم من طكينا أجيبهن. صفن خليل بلع ريقه ويباوع بحيرة: إي جيبيها.

جابتهن، لزقها بصمغ كان جايبه وياه، ووجهه تغيرت ملامحه. قام يتصرف بعصبية من يلزم الأوراق، من يقلب الحاجب انعقد، والوجه الأسمر انطعن دم. همس: هاي لازم بصمتهم. وقفت الحجية: هسه أبصمهم وأجيبها. أخذت الأوراق وهو صافن عض إصبعه بلا وعي، باوعلي رافع تك حاجب ويهز برجله بسرعة: شبّيك؟ هز بيده، فرك وجهه: أبو الخل. يا به شكو شبيه؟ باوعلي بغضب. عرفته عصب، ابتسمت، جت ضل كعدت يمي خربانة ضحك ورجعت تختل ورا الحايط تلعب ويا الطفلة.

وهو عينه على فيروز ويهز رجله نار غادي، كملت الأوراق وأخذتهن. كال: هاي توديها للمديرة، وأي شي تخابرين مرت خالي، ولو كلها كاملة. ظلت المرة تدعيله وهو مزنبر وكف. وباوعلي بغضب رافع تك حاجب همس: يله. طلعنا وهو يمشي بسرعة والمرة تدعيله. همس يمي: شحصلنا منچ غير الدعاوي؟ شنو يريد فلوس؟ معقولة. التفت باوع للمرة توه يحجي وعيونه تشكلت فوك ع الشباك مال غرف، ظل يتنفس بسرعة، شال إيده حك كصته. يصم ضحكته اللي ترست وجهه.

نصه راسه وقطع كلامه كال في أمان الله. طلعنا، المرة سدت الباب من طلعنا. ابتسم ولم شفته واني أراقبه. افتر ورد رجع كبال بيتهم. رفع راسه: واني عيوني وياه. تنهد انرفع صدره. من انتبه بنية واكفة ورا البردة تباوع وترد تختل وترد تباوع. ارتجى براسه مبتسم ع الكشن، همست: أبو الخل. ما جاوب، رايح بغير عالم. خليلو. هااا ها، وتلفت ها شبيه؟ اطلع، أشرت بحاجبي ع الطريق، ابتسم. اطلع حتجيبلها حجاية. تلفت وباوعلي: منو أحد شافني؟

يا به عالم رايحة جاية. هز راسه، رد اندار طلع إيده من الجامة مال سيارة ولزم السقفيه مال سيارة، انتبهت سواره يحاول يبينه. يمشي ويبتسم. مصلاوية مو؟ شفتيها؟ حجاها وباوعلي عيونه طايرة. ما انتبهت زين. إذا أمها ما اختلتها. بس شفتها. والله ما شفتها، يكفي أحس بيها تنتظرني أو تراقبني. هههه واكع. ادعيلي سونه، البنية أريدها حيل أريدها. السوار منها؟ باوعلي راسًا: لچ انتي شنوووو ولا عمار صاحبي. هههه من عيونك مبين.

إي مالتها لبسته الي بيوم النزلت من السيارة، هاي جانت. وحجالي القصة كاملة. الفرح بين سطورها. العشق والعاطفة بكل كلمة وابتسامة، وصفنة. كمل وباوعلي: بعد كل ما أنزل نمرلهم، شتكولين نقوي علاقتنا؟ ماشي شكو منها. تنهد همس: فايت أنام اني. ما تغديت؟ خلى إيده على قلبه: شبعت بعصير البرتقال وداعتچ. ههه فدوة لعمرك الله يجعلها من نصيبك. أوووف يا به اوف، هم صدك وتصير؟ طب نام بغرفة ببيت خاله واني يم ضل.

مليكة خابرت أكثر من مرة وكتلها اني راح أبات، خطية ضاجت. أحمد: يومين وما رجعوا وأخابر نور ما ترد، أعصابي تعبت. تالي رحت للمستشفى لمحت أخوها، درت وجهي، شافتني نور راسًا جت تجاهي. وينچ مو دا أخابر؟ والله بالاستعلامات تلفوني. أدري ليش ما طلعتو؟ ما كاعد تصحى، أحمد أمي دتروح. قالتها يائسة وجرت نفس: ما محتاجة شي؟ لا لا روح خاف هذا يسويلي هوسة. ماشي.

طلعت رجعت للبيت، مليكة وحدها زعلانة. عليه مكسور خاطرها واني مو بيدي أخاف عليها من صدك رجعتلي. وبديت أشاقيها: بدلي خل نطلع. ما أريد والله تعبانة. أخذچ ع الشط؟ لا لا ما أريد. زين نزور الخضر، تذكرين من كان أبويه ياخذنا؟ صفنت. ابتسمت، دبدلي يا عيني. هزت راسها طبت بدلت واني بدلت وطلعت تخبل بسترها وحجابها تتهرب بعيونها مني. زعلانة بعدچ؟ هزت راسها لا وبرطمت. شبيه مليكة؟ جرت نفس بخنقة وباوعت بعيني انترست عيونها دمع.

عبست حلقي: منو وياچ هلكد شايلة بعينچ حزن يا خويه. بيش مقصر فهميني؟ مو بيدي همست وشهقت، مو بيدي والله مو قصدي أقلل من هيبتك وأحجي كدامك وأبجي. ميخالف بس الله انطانا عقل نفكر بي. هزيت راسي لا، تنهدت: ما تدري شكد تعب لخاطري. بلعت ريقي: تتوقعين ليش ما حتا يطلعچ من ذاك المستنقع. وينقذچ؟ هزت راسها: إذن خلص الولد راح وما يرجع بعد. رجفت شفتها ونصت: مليكة الوكت أكبر مرهم للجروح، خليها للوكت. هزت راسها.

طلعنا وتباوع ع الشوارع، طبينا للخضر بكت هواي، غسلت وجهها ببير الخضر ونفس ما كانت أمي تكول: بيض وجهها بجاه هذا مقامك عد الله وريح قلبها. أحجي بداخلي وأغسل وجهها. ابتسمت براحة. وطلعنا صعدنا اليخت حيل تغيرت نفسيتها، ضحكت وسولفت ورجعنا كعدنا مطعم. رغم خوفها من كل الناس كانت تمشي ورايه. من يجي أحد كبالنا. واني عفتها براحتها. تعشينا، أكلنا دوندرمة، نزلنا سوق اشترينا كم غرض هي محتاجته. واني هم. اشتريت. آخر شي تسوقنا مخضر.

تنزلين ويايه حتى تعرفين شتركبين؟ أوك. نزلت وتختار، ردت أحسسها بمسؤوليتها ع البيت. رغم ما إن طبخها مو كلش بس دتتحسن. طبينا للأسواق هم تسوقت للريوك، جنت ما ناشيها باللي تريده. هي مكيفة رغم ما تصرف إلا للضرورة بس حسيت نفسيتها تغيرت. رجعنا قاسم كان بالباب. تقريب الـ 12 طبينا. باوعلنا ونصه: ها قاسم خوماكو شي؟ لا بس شسمه. تأخرتو. بقيت أباوعله عيونه بلا تحكم تروح لمليكة ويرجع يباوعلي يحاول يبينها عادي.

ارتباكه وملامحه القاسية ما أخفت مشاعره، واني أختي انلجم قلبها بعد استحالة أخليها بذمتهم. صعدت مليكة وبيدها أكياس، التفت باوعلها وباوعلي. شافني صافن بوجهه بسك. همس مرتبك: اا ردت أقولك تره التانكي طوافته عطلانة، جيت أصعد ووو شسمه قلت أقولك. ها لا هسه اني أسويها، بعد ما محتاج شي؟ نصه راسه وتنهد، رجع رفعه: شلونها ككالت أسينات مريضة؟ وديتها طبيب شنو؟ لا والله شوي تعبانة نفسيتها وطلعنا الخضر ومطعم سوق هالسوالف.

هز راسه مبتسم زين تسوي، كان يريد أي خيط يوصل بيه أي شي يسوي تواصل بيننا، مشكلتي اني ما دا أكدر. همس: أي شي تحتاجون؟ رديت راسًا: مشكور مشكور. سكت فات للبيت واني أفوت بالغراض. وأصعد. ومليكة ترجع. فتت نمت وهي هم. الأيام تمشي بسرعة واني بمكاني. أسبوع وأم نور توفت. ما شفتها بعد. العطلة على وشك تخلص والبيت فارغ. قلبي لعب. صاحبي بالعماره تواصل ويايه هذا من أيام السجن سوى. وكال الشغل بالعماره. بالإنشائية قوي.

حسيت أخوها حيدگ الناقصة. قدر الإمكان قلصت مسواكي وراسي يروح ويجي. أقساط السيارة ما مكملها بعدني. شلون حأتصرف ما ادري. وبعدني أخابر مغلق. أعصابي توترت حيل وتعبت من التفكير. والشغل عبالك زاد. صبغ. بواري. كهرباء. واني أطلع ما أقول لا بس ردت أجمع خاف يدگ الناقصة. أسبوعين بالتمام ودقت من شفت رقمها ظلمة وضوت عيوني. راسًا أخذت من خاطرها سكتت متلبكة حجيت عنها: نور تحبين أطلع من المحل؟ سكتت وصوت رجفة بنفسها. أحجي همست:

كون يمها وأشيل حزنها. أحمد اني وسكتت. أحجي نور لا تخجلين اني مهيأ روحي. والله ما أعرف ديحاربني يكولي ما تباتين وحدچ تجين هنا. وانتي سألتها حاير. اني أريد بيتي وبحت تعبانة هنا هوسة. ومرت أخويه تسمع راتبي صار شهرين إله. نترت بعصبية: انتي ليش ساكتة؟ مو أمي فاتحتها وتكاليف المستشفى. لا حول ولا قوة إلا بالله. نور ارجعي لهنا وما حد يكدر يحاجيچ اني يمچ. أخويه هذا أحمد.

جربت نفس بتعب أدري بتعبها شكد تعبانة وما دا أعرف أساعدها. ما أدري شلون طلعت مني: دخليني بحياتچ والباقي عليه. صفنت همست: شنو؟ سمعتي نور تنهدت سمعتي كلش زين. وشلون ما تفهميها. فهميها. دخليني لحياتچ. والباقي برقبتي. همست: غلطت من خابرتك. غمضت عيني براحتچ همست. مع السلامة. نور نور دقيقة. سكتت تنتظر. من تردين تنهين كلشي طيني خبر قبل كم يوم. همست: ماشي. الله وياچ سديته وشمرت الفون.

ما تعجب على ضعفها وخوفها وانصياعها إله وعفتها توازن الأمور، عفتها براحتها. فترة مرت، قدمنا اني وأسينات، حمزة كان ملتحق أخذتها ويايه وقاسم هم أجه. قدمت على كلية التربية بنات وانقبلت واني تربية مسائي قسم تاريخ. نفس الجامعة بس كل من قسم. أسينات كانت بس تبات عدنا الصبح نطلع سوى بسيارتي للجامعة وترجع بسيارة خال قاسم لبيت ضل لليل يرجعوها. هالشي صار براتب إنها مدرسة لضل. وسوولها غرفة. كانت من تجي وي مليكة تظل تشكي من رقية.

ومليكة تردد: شوكت أشوفها شوكت؟ من جنت أباوع لفراغ مليكة تأكل بروحي أكل. تالي فاتحتها. تدرسين شنو رايچ؟ صفنت بوجهي اخجل أداوم. لا تداومين درسي خارجي. مو خاف ما أعرف؟ اني وياچ. صفنت بحيرة همست خاف أفشل؟ جربي شخسرانة، وكت ودا يگضي وانتي وحدچ گاظيتها حرامات واني لو رسبتي تعيدين. هزت راسها حايرة واني ما صدكت جبت كلشي تريده. كتب وأقلام ملازم، صاحبي بالجامعة أخته توها تخرجت للإعدادية وأخذتهن منه.

جنت رغم الثقة بي مراقب مليكة هواي تلفونها حركاتها عيونها وصفناتها. واني بحيرتي. نور ما بينت. والبيت تأجر. والمحل بقى ما حد أجه بس كل شهر يجي أخو رجل نور ياخذ الإيجار لأخته. أخجل حتى أسأله عنها. يأست من جيتها. وكبريائي ما سمحلي أرد أتصل بيها رغم حاولت أخابر من تلفون مليكة مغلق. والسالفة نامت. لا صرنا ولا صيرنا لا كعدنا ولا ضحكنا ولا تشاركنا لقمة. أرقام غريبة تالي الليل تدق عليه سوالف مزعطة ونفس تلعب الروح وأسده.

مرة مرتين ثلاثة صوت بنية. تتنعوص. منو انتي؟ اني وحدة تخبلك وانت ما حاس. بديهيتي وإحساسي عرفت هاي مها. قررت أماشيها أعرف أخبار نور منها. وصارحتها: عرفتچ وعيب عليچ واني حاس بيچ. بچت وتتوسل مو بيدي ما تحملت. جنت أسكت أريد تجيب طاريها، أكثر من مرة قلتلها. نور تدري تره وهي سكتت. حد ما طگت روحي وسألتها بعد شهر من محاولاتها إنه أميل إلها. نور ليش أجرت البيت؟ قالت: صديق أبويه تقدملها وبابا حيبيع البيت. انصدمت سديته منها.

وأعصابي تفور. يومين وما قدرت بعد رحت للمدرسة إلها. دا تطلع وصحتها. باوعتلي ونصت بقت تتلفت خايفة. أشرتلها صعدي أوصلچ. تقدمت بلا نقاش صعدت. ما أدري شلون صايرة ملامحي اللي وجهها صار أصفر. طلعت بيها بالفروع ساكت. ساكت ساكت وهي ما نطقت. تالي توها تهمس: شلونك بالجامعة؟ وصيحت بعلو صوتي: شلون ترضخين لأخوچ شلون؟ غطت وجهها وقفت السيارة. كانت تبكي بخنقة وحسرة. نور خليني أساعدچ. هزت راسها برفض. نور باوعيلي.

التفتت عليه تتنفس وجهها أحمر دم وعيونها ذبلانة. بلعت ريقي. سكتت خلص الحجي. قالت: مها تحبك خطية لا تأذيها ليش حجيت وياها وأملتها وتركتها. فگيت عيني كلها بغضب: انييييي شعلّيه ما مأملها لا تكذب، مسجاتي مخزونة. عرفت. عرفت حتگلبها عليه. كلها أقولها ابتعدي ما أريدچ. بعدچ صغيرة. مو ببالي انتِ ما أملها. سكتت وتباوعلي بحيرة. تنهدت، أعصابي فارت. انزلي نور. صفنت عليه. انزلي هاي بيت أخوج، روحي. نزلت دتاخذ جنطتها.

همست وعيوني كبل. هالاسبوع أطلع من المحل، بلّغي علي. صفنت. باوعتلها رافع تك حاجب، طالع للعماره. دير بالج على روحج، يمكن آخر مرة نتشاوف. هزت راسها خانسة، بلعت ريج وسدت الباب تباوعلي من الجام، فاتحة حلكها وعيونها مدمعة، طلعت وعيوني بالمراية عليها بس تباوع لصفحتي. تعبتني حيل تعبت. فرغت المحل. وحجيت وي حمزة ومليكة، وفعلاً طلعت للعماره، الشغل هناك لوز، ما أكعد أبد، سويت دراستي امتحانات بس فصلي. يعني بنص السنة.

وبنهاية السنة. ظروف عملي وأبو سلام مشت معاملتي، قمت أظل أسبوعين بأربع أيام ببغداد. كم مرة أخذت مليكة هم ويايه بس جانت تستغرب حيل. مرت فترة وأني بالعماره، وخابرت مليكة جانت الساعة أربعة العصر. ها ملوك؟ أحمد تكدر تجي؟ شكو يا ستار؟ أحمد بطني ملختني مدري شبيه. صارلها شكد يمعوده؟ صار أسبوع بس اليوم فد مرة بعد. مليكة: بقيتِ وحدي، ما فد يوم خوفتني. جان الأمان بالنسبة الي من أشوف ماطور اليراقب يفوت بثقل. قمت أعرفه من صوته.

قمت أحس بوكت جيته. ماطور شحن يوكف بباب بيتنا، بشكل يومي يروح ويجي مرتين، ويختفي. وهيج بين يوم ويوم، نوبات يومية. أسينات تبات يمنا يومية، ونتعشى سوه. نوبات أحتاج شغلات تعلمني عليها بالدراسة. قمت أحس بصعوبة كلش. قمت أتعب بسرعة. وتهون عليه بعد وكت. وبطني هاجت. الليل كله تون. مدري ليش شاكل أي دهن، هاجت. طبيعتي ما أشكي إلا لمن فد مرة أصير. حد ما حسيت روحي تطلع، ها هي بعد. وخابرت أحمد.

خطية للعشرة بليل هو يمي، جنت متمرغلة بالكاع بس شفته صيحت لزمته من زيكه. ودينييي. ودديني مدا أكدر، ألم ألم قوي. قومني مرتبك، وجهه اخترع، وركض صعدني بالسيارة، باوعت للساعة بـ 11 وربع. وكت مرت الماطور هسه. للباب ووكعت بالكاع. عصرت كل بطني وبجيت. تصيحت كنتفدت على جسمي. حاول يشيلني أحمد بالموه، صعدني السيارة وأني أناشغ وأبجي. تذكرت أمي وألمها. باوعت لأحمد. أني داموت أحمد. ششششش مليكة، أملخ بشعري من الألم.

طلع أحمد وألمح أبو الماطور كدامنا صار وأني أتألم وأملخ بنفسي. سكنت روحي. لا هو. لا هودج. ولا أي واحد من المنطقة. حتى احتمال مو عليه جاي. احتمال من الشرطة. وما حسيت إلا ألم قوي كلش، انقطع نفسي صيحت وأحمد زيد بسرعته. وصلنا المستشفى وأني أيدي دميتها من التعضعض. ازدحام الشارع زيد ألمي. نزل أحمد يركض جاب كرسي وركض بيه طوارئ. سونار وتحاليل بعد ساعة ألم وبجي، صرحوا إنه المرارة مورمة، لازم تنشال.

أحمد الخوف الشفته بعينه تذكرت بي سلمان وخوفه على صبحة. يباوعلي وعيونه مغرغرة. خابر قاسم همس. الحكلي ابن عمي. أكثر حجاية آذتني، بجيت بقهر. حس روحه وحده حبيبي، من كثر الألم صار عندي إغماء. الدكتور كتب إحالة فورية عمليات. أسمع قاسم يلعلع. دكاتره بيهم حظ ماكو، انطيني تصريح. نقل مستشفى خاص ما أريد هنااا. وطلعوني وأني روحي تطلع، أحمد يحجي. قاسم جان سويناها هنا. أحمد المستشفى زباااالة جايز منها.

جان معصب وكلسا يندار عليه وأني أون. وصلنا مستشفى أهلي حسيت بالفرق من أخذوني راسن، عادوا تحاليل وطوني مسكن والدكتور بكل هدوء يحاجيني ويستفسر. أحمد تعب هلك كعد وقاسم واكف على راسي. ساعة ودخلوني عمليات. حسيت روحي أموت. لزمت أيد أحمد. غمض عينه ودار وجهه وعيونه مليانه دمع. بس أكولك شي؟ نصَّى أذنه عليه. أحمد ما قصرت ويايه والله. عبس وجهه صار أحمر، ما كدر يحجي. بس هاي الحجاية

إذا رجع وشفته بيوم كوله: سامحتك. ومنستك من دعائي. صفن بعيني. همست. كوله انتظرتك هواي. قلتها وبجيت. مسح دموعي وهز راسه مصبر، قاسم عيونه عليه ويهز برجله، تالي ما كدر تقرب مني. همس. لا تخافين ماكو شي. ما خايفة. هزيت راسي بالرفض. تنهد ابتسم: يله سبعة وكلي الله. يا رب. أخذوني. وخلوا القناع مال أوكسجين وبدت روحي تطير غمضت. ووجهه صار كبالي يضحك. هذا الهيج كايلي شسمه؟ ر. راء. راء عابس. اي تفطنت مالت رعددد رعد.

يقلد عليه من أحجيها ويضحك. همساته. أني الجنت أصعد وأشم عطرج. وطارت روحي. ما حسيت إلا شفافي تتبلل بطعم اللبن. بللتها بلساني. ريحتها بأنفاسي وكأنما مثل قبل من يجبرني أكل اللبن. بلعت ريج ودموعي نزلت. كذبت عليه. عفتني. كذذاب كذذاب كتلي ما أعوفج. صوت وحرارة بأذني. والللا ما عفتج ردتج تعيشين مليكة. أريد أفك عيني ما أكدر همس. طيني مجال أداريج فد طيني مجال. وصوت وخده ترد: حيفوتون وأتورط وياك.

حسيت يم ركبتي وجهه نفس قبل، غمضت وملت عليه. وصخيت. راح الإحساس. صوت أحمد. واعية ملوكة مليكة. والممرضة تهمس. كاعدة كاعدة. بس البنج قوي. فتحت عيني. جان حلم. جان ما موجود. بلعت ريج عيون الممرضة عليه وتدير وجهه، دموعي نزلت. أحمد ابتسم مسح وجهي. حمد الله عسلامتج حبيبتي. غمضت هزيت راسي. قاسم فات. همس. ها صحت؟ امم صاحية. شلونج مليكة؟ هزيت راسي مغمضة. خلت الممرضة المغذي بأيدي وتباوع بعيني. غمضت أريد أرجع لحلمي أريد أحس بي.

أحمد بيده عصير. همس. يله شربي. لا ما أريد. مليكة لازم. وخلى السدية موضع جلوس. كعدت وراسي ثقيل، خلى العصير يم شفتي بالقصبه، شلت أيدي البيها مغذي ألزم الكلاص وانتبه. بأيدي. مكتوب. ببطنها. 7850. شهقت أبجي وأضحك. أحمد صفن. شبيج شبيج مليكة؟ ضحكت ودموعي تجري أباوعله، قاسم صفن بوجهي وأحمد مبتسم: شبيج خبله؟ ما حجيت بس أرجف. كملت العصير بسرعة أريد يطلعون. أحمد أريد أنام. نامي كلبي.

تمددت طلعوا وباوعت بأيدي أبوس بيها وأشم بعمق، جان هنا متأكدة. ما جان حلم. طبت الممرضة. فدوة الله يخليج. بلي. فدوة. وينه الولد؟ أحجي ودموعي تنزل. ياهو النقيب؟ لا لا الكتبلي هاي. وجهه ارتبك، بعدت نظرها. ما أدري منو كتب وطلعت ركض. عابس أنت هنا عابس متأكدة. أحجي وأبجي بس كلبي فرحان كلش. مريم السعدي