رواية منطقه13 الفصل الثالث والستون 63 - بقلم مريم السعدي

اسينات -ثاني يوم الصبح بدلت بيومها. كانت امتحاناتي خلصانة وبقى لها بس امتحان الفرنسي، والمعلمة دازة على أهلها. راحت ٩ ونص بخطها صعدت، وأنا ورا نص ساعة طلعت. بقيت أنتظر. كملت الامتحان. البيت الجبير كان هادي والباب مسدود. طلعت السايق يمسح بسيارته بالطرمة الخارجية. باوعلي صافن ونصه. انحرجت ورا هوسة البارحة. وتقربت منه. عمو توديني لمدرسة ضل؟ أي صار. صعدت. وصلني. كتله أخابرك من أكمل وراح.

بقيت أنتظر تطلع ضل من الامتحان. مدرستها أهلي دراستهم إنجليزي. دا أنتظر وطلعت معلمة سألتها، كتله: ضل سلام، ثاني -أحمر. كالت: توهم كملوا الامتحان. وطلعت ضل تمسح بوجهه وتسولف وي صديقتها. عيونها وارمة بعدها. شافتني ضحكت ركضت عليه. حضنتها. تباوع بعيوني. أجيتي مكذبتي عليه؟ أي حبيبي واعدتج. لعد هسه نطب عالمعلمة مو؟ هزيت راسي. أوك. وين تكعد معلمتج؟ بغرفة المعاونة. جرتني. لازمة إيدي ومرتبكة. شنو حتقليلها؟ معليج، أنا أحاجيها.

بقت تباوعلي وأصبعها بحلكها. طبيت سلمت. المعاونة سألتني عليمن جاية. معلمة صف ثاني ابتدائي. ودزوا عليها بغرفة المديرة. ضل طلعوها. گلتلي: تفضلي. كعدت. كالت: حضرتك والدتها؟ أي نعم. أنا الأقريها بس صار أسبوعين مريضة. أي لاحظت تراجع مستواها. كالت: كادر المدرسة وفريق التدريس، إذا الطالب وصل ٥ درجاته، نطلعه غير صف. لا، طوها مجال. أنا هسه تعافيت ومراح أخلي مستواها ينزل. ها هي. وقعي هنا.

مكتوب توقيع والدة الطفل. دا أوقع ظهري عالباب وسمعت صوته. السلام عليكم. وكفوا كدامي. غمضت عيني. كال بحزم: أنا والد الطالبة ضل سلام. ابتسموا. باوعتلهم وكملت كتبت اسمي. المديرة همست: أهلًا أهلًا سيادة الـ -أهلًا بيج عفواً. دازين على ولي أمرها. همست معلمتها كدامي: أي هاي والدتها لبت الدعوة. تفضل. خنس سلام. طبت ضل وي معلمتها ووكفت. معلمتها الثانية همست: وينها أمج؟ أشرت عليه وتباوع لأبوها مرتبكة. التفتت مبتسمة.

حتى بابا أجه علمودج. بقت تباوعله بخوف وأصبعها بحلكها. جريته. بقى يباوعلي ويباوعلها. وكف كال: ست، أي شي بعد؟ لا لا ها هي. تعبناكم بس لازم متابعة. أي لا ما بيها شي. هذا من الحرص. إيه، نترخص احنا. يله بابا امشوا. حاول يبين كلشي طبيعي. طلع كدامنا. لابس هدوم العسكرية. لبس نضارته ومشى سريع واحنا وراه. ضل تباوعلي همست: عصبي؟ لا لا. نروح وياه؟ صفنت. والله ضلولة ما أدري. طلعت أنا وضِل وراه. گلت إذا ما گال صعدوا أتمشى.

صعد بالسيارة. والتفت باوع بطرف عينه همس: ضل بابا صعدوا. ضل تقدمت صعدت ليورا. صاحت بارتباك: اسينات. ما باوعتله. همست: أشوفج بالبيت. حتروحين؟ دمعت عينها وتباوع لأبوها ليكدام. وهو ساكت لازم الستيرن بعصبية. همست: أي هسه أجي أجيب غراض مال كيك حتى نحتفل. كملت الامتحانات. ابتسمت وهزت راسها همست: جيبي نوتيلا جبيرة. ميخالف ههه. سديت باب الورا. وصعدت للرصيف. طلع بسرعة. وأنا تمشيت للأسواق.

ورجعت مشي. طبيت للبيت. رقية توها جاية من بيت خالتها. يمكن أحسن شي صار إنها كانت بايتة عندهم البارحة. طبيت شفت ضل بحضن أبوها. حاضنته ولازمة وجهه تحجي وهو يحجي بعتب وهي تحجي وتبوسه من خده. والله ما أسويها بعد، لتزاعلني. هز راسه. جر نفس. حضنها ونزل عينه. ما باوعلي أبد. باوعتلي ابتسمت. أسونة تصالحنا أنا وبابا. خوش. نسوي كيكة؟ أي يله بس خل أبدل. همست: أنا أرتب المطبخ. يله. طبيت للغرفة تذكرت هدومي هناك.

جنت أتصرف بكل سلاسة. وحدة غيري تنحرج إلا أنا. طبيت للغرفة. دكيت الباب. همس: تعاي بابا. طبيت لغرفته. ما باوعله. طلعت ملابس إلي. وجهي انعكس بالمراية. مخلي أصبعه جوه راسه يباوعلي ببرود. طلعت من الغرفة للحمام اخذت الشامبو مالتي والفرشة مال أسنان والمنشفة. وطلعت بدلت بغرفة ضل. وطلعت للمطبخ. ما طلع من الغرفة أبد لل٣. دنتغده أنا وضل لفات دناكل مال همبركر وطلع. باوعلنا أنا نصيت. حتى ما محسبة حساب بأكل إله. طلع بهدوء.

وكفت ضل: بابا حتروح؟ لا بابا هنا يم بيبي. أوك. وردت كعدت تباوعلي. همست: بعد أنتي وبابا ما تصيرون عروسين. حبيبتي لتفكرين بهالسوالف. أخاف تروحين. مو گلتلج ما أروح. هزت راسها وكملت لفتها. كمنا نسوي الكيك وهي تخلي النوتيلا. طيرت نص القوطية وهي تمسح عالكيكة. كافي ضلولة. مو طيبة ههه. هسه برشي النستلة هاي. كعدت تبرش وتاكل. لج ماما شبقى منها؟ ضحكت بصوت عالي. روحي ردت. حضنتها. قرصت خدها. التفتت شفته يباوعلنا ضايج.

باوعتله ودرت وجهي. وضل صيحت: بابا صارت الكيكة. أي بابا. تأكل؟ لا لا حنام أنا. لتصيحين زين. أوك. كملنا الهوسة وعفناها تبرد. طبيت بغرفتها أبدل لأن تدمرت. أباوع ٢٥ عالميز كاتب عليها: فلوس مواد الكيك. خليتها بالجنطة وبدلت. ضل طبت تضحك. كالت: بيبي جابتلنا تراكسودات أنا وياج. فتحتهن بلهفة صيحت: ألله خوات خوات. وأجه صوته: ضللل! بابا أريد أناااام. أي أي بابا. خلت إيدها على حلكها تضحك.

الأيام تمر. التحق سلام بيومها بليل. دز على ضل وهواي طولت يمه. يله جتي. هالفترة كلها أنا وضل غدانا وحدنا سوالفنا ونومنا وهو كله ببيت أهله بس من ينام. فترة وكسر الجو. لبسنا التراكات الجابتها أم سلام. بدلنا اثنيننا. شوي بي كصف بس كلش حلو. ضفرت شعري فرنسية وهي هم ضفرتها الها. طلعنا سيت دنسولف أنا وياها. هي تمسح الكاونترات وأنا أغسل مواعين. ونباوع عالكرتون سوا. سمعت همس: السلام عليكم. التفتت متفاجئة. أم سلام.

باوعتلنا اثنيننا تبتسم. ضل بقت صافنة. تقربت بوست بيبيتها وتباوعلي. تقربت مني بوستني. همست: شونج ماما؟ زينة الحمد لله. تستقبلون خطار لو تصوجون؟ لا خالة العفو تفضلي. كعدت وأشرت: تعاي يمي. كعدت يمها أستمع الها. وبدت تعتذر. عيونها تدمع وأكول: والله مو قصدي أغثج والله وأنتي يتيمة. بس أنا أم مو بدية. ما لمتج أنا خالة بس لمت أخوتي لأن ما كلولي. تباوع لضل وتباوعلي. همست: الله ينطيج أجرج على هالدلال. يله أعوفكم.

وكفت وطب سلام. صاح: ضلل بابا. وصيحت ضل: أجه بابا. ركضت عليه بوسته. شالها مغمض ويبوس بيها. شونج حبيبتي؟ زينة. باوع شنو سوينا بيتزا. أمه تقربت منه بوسها. ها يوم اليوم يم ضله. باوعتله وباوعتلي همست: الله يهدي سركم. طلعت وضل تكمز: صارت البيتزا مالتي حتى بابا يذوقها. بعد شوي. باوعلنا ودار وجهه فات للغرفة. بدل وطلع لبيت أهله. شوي ورجع. ضل تقنع بي. بابا كلش طيبة حتى أنا عجنتها وي اسينات. ما اشتهي بابا. حباب بابا حباب.

ماشي خل أسوي جاي أول. وكام فات للمطبخ. أسوي بالعصير وتشنجت بسبب وجوده بالمطبخ. تلفوني دك. قاسم. رفضته. رجع دك رديت رفضته. أجه من يمي أخذ شكر ودك تلفوني عالكاونتر. باوع للشاشة. مديت إيدي رفضته. دار وجهه ورجع لمكانه. واكف عالطباخ. والبيتزا بداخل الفرن. وكفت يم الطباخ والحمايات بيدي. التفت عاكد حاجبه وأنا ما أباوع بوجهه. نتر: شكو؟ البيتزا بالفرن. گلتها بجمود: ابتعد من الطباخ. فتحت الفرن. الحماية

(الوصلة اللي يحمل بها الأواني الحارة) بيها زيت. دا أطلع الصينية وكبت بيدي. ذبيتها. رديت أخذت نار أنفض ومتروح. نتر: هاي شنو؟ وجر إيدي ركض جوه بوري السنك طفاها. نتر: أدري شنووو انتبهيي. باوعت بعينه. جريت إيدي بهدوء. باوعتله باستهزاء. جريت عيني. طلعت الصينية وقسمتها. صحت: ضلولة يله. وجتي ركض. جايبة الكاتشاب ترش وتقسم. خلت لأبوها بالماعون مكيفة. أبوها كعد بالهول يدخن. ودتله. باوعلها وباوعلي. شافني أباوع عليه من المطبخ.

حر عينه همس: هلي هنا بابا. بابا مو تبرد. طفى الجكارة وأخذ الماعون. كعدت يمه تأكل وتباوع لحلكه. طيبة بابا؟ تخبل عاشت إيدج باباتي. كمل وكام نام. عاد ارتاحيت. خليل مرته تخرجت وأنا نجحت وضلولة هم نجحت. واشتغلت طلباتها. جان طاير بيها وكأنما تخرجت من الجامعة. لزكت شهادتها عالباب الألمنيوم أول ما يطب للمشتمل. وتنتظر: شوكت يجي بابا؟ لعد شو تأخر؟ آخر شي خابرته. أشرتلها لتگوليله. هزت راسها لا. رد: ألو ضل بابا.

بابا حبيبي شاقيتلك شوكت تجي؟ ها بابا بعد يومين أنزل. خوما بيكم شي؟ لا بس ضجنا. من أجي أطلعج. خوش أنتظرك لعد. زين آآآ منو يمچ؟ بس أنا وأسونه. ها خوش. بيبي وين؟ تكدرين تودين الفون الها دا أحاجيها. أي هسه. طلعت شوي وجتي. زمرد حتى يمي جانت منحرجة ونفس الوقت مشتاقتلي. ما لها ذنب بزعلي منهم. والتلمينا أنا وياها وفيروز. جانت تنتظر خليل لأن ينزل وي سلام. متشوقة أمر من ضله. تريد عدية نجاحها مكيفة.

باتت يمي يومين ورقية تنزل مرتين يمنا. وتلح عليها تعاي يمي هناك. وهي تكتفي بأخجل من عمو أبو سلام. تعاي يمي فوك. كوه كوه قنعتها تبقى يمي. أنا ما أناقش أبد. رقية دخلت بالسادس مكيفة. دتجهز. لأول مرة أحس روحي بيه نقص. رغم عشت اليتم من الصفحتين بس ما حسيت بيوم عدي نقص. إلا من عرفت روحي ما أخلف. زمرد هم توها حامل. تريد تحجي وأخاف أنقهر. تالي گلتلي. حضنتها وأتخيل خليلو أب. رغم زعلانة عليهم بس كلش فرحتله.

وكملت اليومين. رجعت زمردة الليل كله تحجي وي خليل حبيبات وأسمع ضحكها وهمساتها وقبلاتها. ابتسم. يضحكون. بليلتها بقيت وي ضل وحدنا. من تجي زمرد أستغلها أبشع استغلال. ننظف جسمنا ونسوي كبب وبورك وباسطرمة. أترس الفريزر حد ما تروح. وهي مكيفة. راحت لبيت أهلها حتى باجر تنتظر خليل. سديت باب المشتمل. طبيعته إذا انسد من جوه من برا إلا بمفتاح يله يفتح. توني دا أغفى يم ضل ودك تلفونها. ضل نايمة وأنا يمها شلته. أبوها. رفضته. رجع دك.

يعني دتشوف دا أرفضك. رديت رفضته. رجع دك. رديت. نعم. سكت شوي كال: ألو. ألو. نايمين؟ اممم. أوك تصبحون على خير. سديته. أباوع للشاشة مكبسل هذا. غفيت. الصبح حسيت أحد يهمس. ضلولي بابا. فتحت عيني ضل بصفي محشوكه بيه. ضل بشش. فتحت عيني عاكدة حاجبي. الغرفة ظلمة. شغلت تيبل لامب. رغم لبسي ربع ردن بس ماخذة راحتي. هو ما يباوع أبد مو يمه. باوعلي. أشر نامي بس دا أكعد ضل. الله يساعدك. كعدت لميت شعري.

جان ديحجي من باب الغرفة. وجهه يضحك. تقرب فاتح قميصه كله والنطاق. ابتعدت وكمت من الفراش. رفع عينه باوعلي ونصه يبتسم. يبوس بضل. حبيبة بابا. وفزت ضل: بابا جيت شفت شهادتي هـ -ههه أي بابا جيت حبيبتي. شنو هالشهادة التخبل. شالها ويبوس بيها ويضحك. سباعية أنتي. شنو حتجيبلي؟ شنو تردين أجيبلك؟ أريد أسافر مثل صديقاتي. لا بالله ههه. شنسافر ولج ميصير. بابا كلهم حيسافرون لتركيا. منو يا مصخم هذا؟

باوع شوف. فتحت تلفونها وتشيل شعرها. كعد على قنفة غرفتها وهي بحضنه. جريت البردات. التفت باوعلي ودار وجهه على فون ضل. شغلت سنابات صديقاتها. باوع هاي أريز سافرت. وهذا سجاد هم أخذه أبوه. بابا حباب شنو بس أنا؟ جر نفس وباوع بوجهه يعدل بشعرها يبتسم: يراد نبجي لجدج شوي يسويلنا ورقة ونطفر. صدك بابا؟ بعدنا أبويه خل أتأكد. التفتت عليه: باعي أسونه مو گلتلج. ابتسمت الها، شاورتها: ريحة حلكج مو طيبة، بسرعة فرشي أسنانج.

خلت إيدها على حلكها فازة وركضت للحمام. باوعلها أبوها: ها شكو؟ وين ضل؟ بالحمام بابا ريحتي مقرفة. باوعلي وخله إيده جوة خده، ابتسم. همس: مشكور تعبك. باوعتله ودرت وجهي، مسؤوليتي هاي. لا مو مسؤوليتج. جر نفس وبقه يباوع للشهادة. توجعت للفراش أنفض وأرتبه. طلعت ضل بدلت تراكسودها: أسونة. ها عيني. هسه صار الكراميل؟ إي بس من تقلبيه دير بالج. إي بابا كوم ناكل سوينا كراميل. يله وكليني اليوم أنا بيدج، شلون متجولكيني جولكيني.

كام وراها. طلعت، خليت الجاي عالنار. وأفتر براحتي، هم كاعدين بالمطبخ ياكلون. ديحجي أبوها وياها وسكت. متوقعت عيونهم عليه. شهكت ضل: أسونة، اكو دم بثوبج مجروحة؟ صفنت عليها، جريت دشداشتي والمح بيها طكعة من وره. سلام راسًا نصى راسه. وأنا متت فشلة، ركضت للغرفة. مكدرت أطلع بعد، اليوم آخر يوم ليش كسرت؟ طبيت سبحت وبدلت وبقيت أخجل أطلع. طبت ضل مرتين تسأل، قلت لها انجرحت. كالت: نتريك. روحي سوي لفة جبن عمري. بابا سوى الجاي.

إي تريقي. أضوج وحدي، أنتي مريضة توجعج رجلج مال جرح. لا حبيبي. لا بابا وين؟ نام بغرفته. خوش. كمت وأضفر بشعري. حضرنا الريوك، تريقنا أنا وياها وتباوعلي بقلق. كملنا وخليت الأكل عالنار، جان جايب لحم. وضل عاجبها من زمان لحم عالتمن. سويته وعفته يستوي وأرتب وي ضل. حسيته طلع تحمحم وأنا مدري وين أودي عيوني. همس: وين ضل؟ توها راحت لبيبيتها جوي من كربلا. همم دتقتهم. امم. جر الكرسي وكعد، همس: مبروك نجاحج. صفنت، ناطيته ظهري. همس:

ممكن كلمة؟ نعم. تفضلي شوي هنا. تقدمت وكعدت كباله على كرسي ميز الطعام بالمطبخ. نصى راسه ويلعب بباكيت الجكاير. جر نفس ورفع راسه كال: صار شهرين للهوسة البيننا صارت. كالها وحك راسه منصي عالميز. هزيت راسي. تنهد ورفع راسه، همس: العلاقة البينج وبين ضل خايف منها أسينات، بنتي إذا عفتيها تموت. بقيت أباوع بوجهه: ومنو كال أعوفها؟ فرك وجهه وخله عكوسه عالميز، مقرب وجهه. تعبت ملامحه ونصى: شلون تردين نستمر ومثل ما تريدين يصير؟

بقيت أباوع بعينه، عجيبة القوة الصارت عندي: نستمر مثل ما احنا. بلع ريق وارتجى، باوع على كتفه، إيدي تحديد جسمي الصار بكعدتي. دار وجهه وتنهد. هز راسه: مرتاحة أنتي عندي وي ضل؟ امم. وإخوتج؟ مالك دخل بينا. هز راسه: خليل تره كلش متأذي. بيناتنا قلت لك. براحتج. زين إذا رفعت راسي. إذا ردنا نطلع سوة لتركيا شلون؟ وين منو؟ أنا وخليل. صدك حيسافر؟ نسافر عائلتين. مو كلتوا ميصير؟ حاجيت الحجي، كال أمشيلكياها بواسطة.

ها زين أنا شعدي جاية؟ باوعلي، ميل راسه: أدري بالمرة ويانا، بالحلوة نعوفج أمشي غيري جو، ضل تكيف وياج. جواز ما عندي أنا. بسيطة يومين يطلع. ماشي. فار جدر الضغط، التفت راسًا فاز: هاي شنو؟ جدر الضغط صفر. دتسوين؟ تشريب ضل صار كم يوم عاجبها. هز راسه مبتسم، باوعتله ونصيت. همس: رايد أفتح وياج موضوع حساس ومتردد من ردة فعلج. باوعتله كعدت: تفضل. أحجي براحتي؟ إي عادي. متثورين هو سؤال ورد، جوابه يا إي يا لا. أوكي. تنهد:

الطب باسطنبول متطور. صفنت، فكيت عيني، سكت. وعبس وجهه، ملامحه تغيرت، نصى راسه: مراح نكدر نتفاهم هيج. إذا تريد طفل روح تزوج. بس نروح نجيك ما نسوي شي. ليش؟ قربت وجهي: أنت مو ماهذني لضل؟ مو مقهور عليه ووصية حمزة؟ عبس وجهه وغمض، نتر: كيفج. وعاف الميز وكام طب بغرفته وسد الباب ركعها. وأنا أسوي بالتمن وأرجف. مجرد ذكر الموضوع يرعبني. يوعبني حتى الأمل. أخاف أتأمل ويكلولي ميصير، أخاف.

يومين وهو بالبيت. ناكل سوة بكل هدوء. بعد الحجينا أبد ما صار بيننا كلام. طلع وازي التحق للشغل أربع أيام ورجع نزل. كال: عكب باجر نطلع. فرحة ضل هواي أثرت بيه. وأنا تحمست، أول سفر إلي. زمرد ميت مرة هابرت شناخذ وشنحط. وخليل يشاقى وياها طاير بيها. صباح الأربعاء وصلنا السايق ورجعنا. خليل وزمرد باتوا عندنا بيومها. جنت جدا ثقيلة بأسلوبي وي خليل. حاول يتشاقى يسولف وأنا حدية.

للصبح ما نمنا أنا وزمرد، ثنينا ما مسافرين. أم قاسم جلبت بينا وخليل كلها جوازج يتأخر وطفر. صعدنا بالطيارة، ضل حيل متحمسة. وأنا خايفة. كعد بصفي سلام. وضل كدامنا يم ولد شوي أكبر منها. كلسا تلتفت علينا تضحك: بابا شوكت نطير؟ انطي مجال باباتي. همس يم أذني وأنا أباوع عالجامعة: ما صاعدة قبل طيارة مو؟ جج، التفتت ابتسم. ابتسم لهالقرب ودار وجهه. باوعت لزمرد وخليل كبالنا بالضبط.

خليل يغرغرها وتضحك، وهوه وجهه أحمر مكيف بيها ويضحك عليها نيته خوف. وبدت تمشي الطيارة: خليل فدوة. حنكع حنكع. خليل اش اش. خلاها جوه حضنه وطرنا وأنا أباوعلهم يخبل خوفه عليها. كعدت عدل. خايفة؟ سال سلام. جج. ضل رفعت راسها: بابا أريد أكعد يم أسينات. ميصير بابا كعدي. خزرها. عبست وكعدت. وصلنا بالهبوط، قبط ضغطي. انتبه عليه: ها. أذني. غمضي، أرخي، نامي رجي راسج وتنفسي من حلكج.

سويت الكاله لحد ما وكفت الرجة. فتحت عيني شفته يباوعلي بطريقة أول مرة هيج نظرات يحاوطني بيها. بلع ريق، انتبه على روحه، دار وجهه، مسح وهمس: ضلولي. نعم. نايمة؟ امم. قومي بابا وصلنا. نزلوا كلهم ونزلنا. جانت أحلى تسع أيام بحياتي. أحلى أماكن وأحلى جو. ما كنا ننام هواي بالفندق. كلمن غرفة جرباية أم نفرين وجرباية وحدة. كنت أنام عليها وضل يم أبوها. قريبة عليه، البيننا بس الميز. وهم بليل نسولف قصة وهي تستمع بس مو وحدها.

جان سلام هم عيونه عليها وعليه. لحد ما تغفى يغطيها ويباوعلي. همس: شيصير بعدين؟ ههه انتظر باجر. أريد أعرف. باجر تعرف. التفتت، طبته صهري. طفى التيبل لامب ونمنا. ثاني يوم حسيت ضل مو بالغرفة، فزيت. سلام نايم. وهي مكانها فارغ. كمت راسًا بالحمام ماكو، طلعت جيت يمه: سلام. هم. سلام كاعد. همم. ضل ماكو. باوعلي عاكد حاجبه، عيونه حمر. همس: راحت وي أخوج والمصلاوية يجيبون ريوك. ها موجوه، اكو مطعم يوميه نتريك بي.

ما قبل أبو الخل عاجبه باجة. همم. تمعصر وكام. همس: حفوت للحمام وبدلي أنتي. أوكي. لملمت الغرفة وبدلت. طلع بالبرنص، طبيت للحمام غسلت وجهي ومكيجت خفيف ولبست الحجاب. صاح: لأول مرة: أسونة. مديت راسي: يله ما كملتي؟ أخوج مرتين خابر. مكملة أنا. لبست حذائي، تعطر يباوع لشكله بالمرايه وانتبه عليه أباوعله. مشى كدامي وأنا وراه. خليل جان بحديقة قريبة عالفندق فارش سفرة وزمرد كاعده بعيد وإيدها على خشمها. أول ما شاف سلام صاح:

سيادة الـ... سلام تفضل تفضل الباجة تفوتك. تربع سلام والتفت: مرتك شو عازلة روحها. زعلانة عالطلي أمل. مالك دخل ولك هاي بتك عظامه. ضلولة تخرب عاللحم. أثرد داد. خليل: أسونة جبتلج لفة شاورما هناك وي زوز. كعدنا دناكل. والبنات بالشورتات يفترون. خليل ينغى: باوع باوع. يرفع راسه ويرجع ينصي. و زمرد: تنتز: خليلو. عيونه ولج شلون كراعين تفوتج. تخزره وهو خربان ضحك. ويرد تفوت بنية ويطخه: لك سلام عاين. هااا إيي مننزقنب شلون يعني.

كيفك ما تسوي واهس. كملوا أكل وتمدد سلام عالخشيش. ويسولف وي ضل النايمة بصفه ومرتجية على صدره وهو يلعب بشعرها. طكيتلهم صور. همس: أكلتي لو بعدج جوعانة؟ لا لا شبعت الحمد لله. هز راسه والتفت على خليل: كوم لك ورانا طريق. ضل: وين حنروح؟ للشط مو تردين بالباخرة؟ إيي ههه. كملت أيامنا بونسه من العمر. جنت أحسه يريد يقترب. مرتين زمرد راحت دكتورة، يباوعلي وأنا أدير وجهي. ما يحجي. مرة وحدة بليلة البيها نطلع من تركيا.

ضل نامت من التعب، شالها خلاها بفراشي. لأن الهدوم جانت بفراش الجبير، غطاها وأنا دالملم وأحط بالجنط، هو خله غراضه. يباوعلي ويدير وجهه: شبيهك؟ جوعان ما شبعت باللفات مال المطعم وأنتي ما أكلتي. ما طيبة. ننزل ناكل. ضل نايمة شلون؟ غافية والتلفون يمها إذا كعدت تخابرني. أوكي. بدلي. كالها وتنهد. بدلت ونزلت. طلعنا من الفندق نفتر. همس: تعاي منا. جر إيدي من عضدي وعبرنا. طبينا محل شعبي يبيع أكلات طيبة. ناخذ سفري؟ لا نكعد.

أخاف تكعد يضل بالي. يابه تخابر ونرجع. أوكي. كعدنا ناكل ونباوع عالعالم كبالنا ثنين عشاق يوكلها بيده وهي تضحك لو يبوس إيدها. بلا وعي باوعتلهم ودرت وجهي، صارت عيني بعينه. باوعلي ونصى عالاكل: كلش طيبة البتيته. امم تخبل. هسه يله شبعت. أنا هم نكوم. يله. بقينا نفتر. وهو يمشي بهدوء همس: كلش غيرت جو. أني هم تخبل تركيا. أمم، باوعلي خو ما، وسكت جر نفس. شنو؟ خو ما بقلبك حقد تجاهي؟ خو ماكو شي بقى؟ بقيت أباوع بعينه، همست:

أني تأذيت من إخواني أكثر مما تأذيت منك. راسه ونصة إيده بجيوبه همس: بعدك صغيرة عالقهر. تعلمت، باوعتله همزين ضل موجودة. باوعلي متفاجئ، ابتسم وهز راسه: ربك رحيم. والنعم بالله. وصلنا الفندق، صعدنا وضل على نومتها انتبهت عاد باوعتله: وين حنّام؟ باوعلي: كيفك، تردين أنام يمها؟ متكفي. لا يابه. تدفر بنومتها. منو ضل؟ أي والله. ههه، لا عادي أخذي واحتجي. بدلت وطبيت للفراش، شفته غافي عالحافة نايم. غفيت، جنت تعبانة.

حسيت على صوت المنبه. فتحت عيني، حسيت بحرارة يم زندي. التفتت شفت وجهه جوه زندي محشوك. فزيت وخرت، أباوعله غافي. بقيت أباوعله، طفيت المنبه عكد حاجبه. فتح عينه. دايرة صفحتي عليه صافنة، همس: موتتني هاي بنومتها. ما حجيت. وكمل كلام: جيت نمت هنا، خو ما ضايقتك؟ كمت ما جاوبت، بس كلي تأثير قلبي يدق سريع. بدلت وكعدت ضل ورجعنا. كان البيت فارغ الصبحية. سلام متفاجئ، حتى السايق ما موجود. خابر أبوه، أباوع وجهه انقلب: وين أنت حجي؟

شوكت هاي؟ لا إله إلا الله. شكو؟ غمض أشرلي: صبرًا. زين، جايك جايك، سده. شكو؟ عمي فدوى بالإنعاش، خابري أخوك أو أنا أخابره. هاي أم إيه؟ أي أي، يله قفلي الباب عليكِ، لا تطلعون ترى الحرس مال حجي ويانا والسايق هم. أوك. طلعوا وضل بالي لليل، رجعوا بس هو أجه، وجهه تعبان كلش. ضل جانت نايمة. كعد عالقنفة شمر روحه وذب قميصه. بقيت أباوعله، باوعلي ونصة، همس: توفت. ضربت على وجهي، نصة وهز إيده: بني آدم على ساعة، أستغفر الله ربي.

الله يرحمها خطية إيه. سكتي، قطعت روحها أبويه راد يموت من وراها. روحه بيها، أصغر وحدة ببنات عمتي هاي. خطية. دمعت عيني، كعدت يمه حيلي انهد، همس: نامت ضل مو؟ أي تعبت. جر نفس همس: راسي يطق. جبتله كلاص عصير، جان ديدخن صافن. وكفت كباله، باوع على طولي والجكارة بين إصبعين. نصيت بهدوء، جريت الجكارة، بقى صافن عليه بهالقرب وخليت بيده الكلاص. بلع ريقه، رجعت وكفت وطفيت الجكارة. شلت الباكيت والنفاضة. شرب العصير ساكت، همس وتمدد:

ألف رحمة على روح أهلك. تنام هنا؟ ما بيه حتى أروح للغرفة. كوم اسبح، جنت مستشفى. هز راسه: صح والله. كام فات للحمام وطلع تمدد، باوعلي همس: كعديني بـ ٥ تقدرين؟ أي أوك. طلعت من يمه وفتت نمت يم ضل، بالي بس يم إيه. شنو حالها هسه؟ وتذكرت روحي من راحت أمي. يا عيني شكد تنحب خطية، وحتى أمها مالها أذية. كعدته الفجر كام باوعلي: فدوة حضريلي هدومي. أي أوك. الأسود. أي أي أعرف. بس أفوت للحمام.

حضرتهن وطلعت سويت عصير لأن ما راح يأكل، أعرف أقلها عصير يلزم قلبه. طلع مستعجل، فيماللا. أوكف. ها، شكو؟ بس اشرب هذا وروح. باوعلي وباوع لأيدي. أخذه جره كله وغمض همس: احتمال هنا الفاتحة مال نسوان، عينك على ضل، هاي تفز من الصياح. لا لا، لا يضل بالك. أني عقب باجر يله أجيكم. أي أوك. تنهد باوعلي وطلع. وفعلًا للـ ١٢ والنسوان قاموا يجون، ضل تباوع من الشباك ساكتة. همست: حتى عمة فدوى راحت للجنة.

واشتغل الصياح واللطم وي القراية، وأني طبيت سمعت كومة لغاوي على عمته بالإنعاش ومرته أخذته وراحت لتركيا تتونس. أي فكر ونطوها رجال. وأشكال حجي. لابستهم جنت. إيه خطية هلقد تقهر، منزويه وتبجي بخنيك. نسوان إخوتها وياي ساعدوني، وأم سلام تروح وتجي. كعدي يمه. ما لكِ دخل، البنات يسوون. ثاني يوم انجمعوا البنات بغرفة رقية وضحكهم لجوه نزل فد مخازي. كملت الفاتحة، وصل ما عافتني من يعيطون تفز. زمرد أجت وي أمها.

وتحجيلي عن خليل خطية تأثر. قالت: عفيه شيوي ذبيت دم، أخاف الطفل يوكع. يا لعد روحي دكتورة. باجر أروح، خل تكمل الفاتحة وأروح. خوش. التهت ضل وي فيروز لحد ما كملت الفاتحة وراحوا. العيون جانت عليه بحقد، لأن جاية من السفر اللي يكول من عماته. مبين عليها الخير واللي يكول متفحجة جانت شحالها. وأني أغلس. كملت وأخيرًا. ورجع سلام. باجر يلتحق وي خليل. ومليكة خابرت، سولفنا وضحكنا هواي، سديته ونمت.

يومين وخليل نزل وحده طب لخاله، شفته يمشي مستعجل بالطرمة. طب وراسًا توجه لخاله صاح: خالّلي! أبو سلام فز. صاح: شكو؟ منو هاي خليل؟ خالي ألحقني. شكو بابا؟ شبيك؟ خالي أموت وروح أبويه، ما أكدر. شبيك ابني فهمني. باوعلي خليل ويفرك بوجهه، بعده ببدلة العسكرية. يعض بأصابعه ويضرب على فخذه. لك ابني شبيك؟ تعاي بابا سوي لأخوك قهوة. أي عمو. قلبي رجف، همست: قاسم بي شي؟ جاوب: لا، وعيونه دم. أوراق بيده.

حرة أبو سلام كعدوا بالهول، أم سلام كعدت بصفه وإيدها على جتفه تقرأ. وهو يلوّب. خالي شفتهن، شتكول؟ جر نفس همس: لا حول ولا قوة إلا بالله، ابني أمر لازم يتنفذ. خالي مااا أكدررررر، ما أكدر. صاح عليه: اكعدددد، صير رجال. خالي أبوس إيدك سوي شي. يا ابني ديكولك، ولد عمها اثنين وإخوتها اثنين بالسوون الداعشية، شنو أسويلك؟ لك خالي، مراتي هاي سويلي جارة، أخذها وأطفر. همس: تنسجن ابني تنسجن. وضرب على راسه:

شون شسوي فهمني، حامل مالها ذنب. أبويه القانون ما يعرف هالحجي، اكعد ارتاح. شرتاح خال؟ شرتاح؟ واج نار أني للسما، خالي وين أروح؟ هز براسه وطبق الأوراق همس: مو صلاحيتي هاي بابا. خليل تخبل، وكف يروح ويجي، آخر شي قاله: حسافر باجر أخذها وأسافر، مرتي شنووو كيفكم تطلقوني منهااا؟ خاله سكت ونصة. عاف البيت وطلع. متت بجي عليه. خابرت قاسم قال: يمي بيت أهلي، أني يمه. شون هسه؟

أمر نازل، قرار متصدق، وقفو هويته وباجه وحتى جوازه من بغداد ما يكدر يطلع. شون تالي صدك يطلقها منه؟ أي لعد شيسوون؟ عزه، معقولة؟ لا مستحيل، هذا يموت دونها. هاي شتسوي حظها هيج؟ زمرد حامل قاسم. صفن همس: خرب حظك خليل، توه جر عدل من تزوج. عفيه لا تعوفه، وين عايفه؟ هاي نايم يمه وأمي هم يمه. سديته منه وأدعيله، متت قهر. خابرت زمرد ردت: ها عيني. أسونة حبيبة دزيلي الفير، دألف شعري على عيد ميلاد خليل. بجيت بخنيك. ألو. ها عيني.

محتاجته. لا لا، عود أدزه أوك. أكولكِ الثوب الأبيض الشترالي ضيق عليه، أدزه لكِ بس ديري بالكِ عليه، من أجيب أخذه. همست: كيفكِ. سدته مني وأني لزمت راسي، مدري أنقهر عليها مدري عليه. ثاني يوم رايحلها للبيت. خابرتني تهمس: فدوة شسوي؟ شقرة صديقي ميت بس يتصفن ويحضن بيه، خفت عليه كلش ما يأكل شي. ما قدرت أجاوبها، سديت الخط على أساس انقطع وطبيت للغرفة أبجي، مردتني مرد. طلاق سياسي، أبشع مصطلح سمعته.

فصل إجباري، كون المرأة عندها من أقاربها أو إخوتها إرهابي والزوج بالسلك العسكري. أخويه أثره تغير عليها، راد يكرهه بيه، انقلب. صار يضربها. صار يصيح عليها وهي تخابر تبجي تكولي: والله ما مسوينله شي، كسر البيت وطلع حتى ما يروح للشغل. وأني أفور نار ومالي غير الدعاء، حتى مايكة خليتها تدعيله. من القهر روحي احترقت، حساسية طلعت عندي وخفت لا ضل تنعدي مني. ورحت للطبيب أخذت علاج.

جنت أدهن برجلي ودموعي تنزل من أسمعها تحجي وتبجي، شكد خيرين من سافرنا، من سبحها شايلها على كتفه ونزل البحر كدام الكل يبوس بيها ويحضنها. يداهر ويصالح وما يتحمل زعلها. يتشاقى ويعضها وراها يبوس ويراضيها، هذا شون تقنعه يعيش وراها؟ بدت تمل بدت تتعب. شهر فات وخليل تخبل عليها. أعرف شيريد، يريدها تكرهه. قام يسبها. قام يأذيها. وين ماكو حجي يوجعها يحجي. وهي بدت تنفر ما تتحمل. وللأسف ضربها وأثرها سقطت طفلها.

حاله نفسية وألم وسهر، راح الطفل. كانت القاضية بالنسبة لخليل. بيومها كلش صارت بينهم. ليش تغيرت عليّ؟ وينها حنيتك؟ هذذذا أنيييي، هو أني هييييج، مخبببل مخبلل، أحب أضرب وما تطلعين للباب، لا دراسة ولا غير شي، وأمج ما توووصلج. ليش حبيبي وين حبنا؟ لج امشي لللج، أم الحبببب، أني توقعت أحبكِ بس للأسف، طلع كله شفقة. وعفت اللي أحبها من وراجججج، انخدعت مدري شسويتيلي ما أعرف. ليش هيج أنت تحجي؟ ما أصدك، ما أصدك يطلع منك هالحجي.

هذااا أني، ما يعجبكِ روحي لأمج، والقرآن إذا طلعتي أطلقكِ. روحي لأمج، حتى بس نسوان بالبيت، تحلى الشغلة علني، حتى خاف هناك ما لحقتوا وي الجماعة هنا عالضيف تصير. ضربته راشدي ما تحملت. ينقص لسان أكبر واحد يجيب سيرة شرفي أني وأمي، ما أبقى عسى ما طلقت، أنعل أبو الذلة. شفته كعد يتنفس بصعوبة وأني ألم هدومي، مرتين وجهه تغيرت ملامحه يتقدم عليّ، عيونه تدمع يريد يحجي ويرجع. تالي طلع من البيت.

وأني لميت هدومي ورحت لأهلي، ما أصدك هالاسبوع المر من ضربه وإهاناته وكلامه السم، ما أصدك. —راحت لأهلها. وبنفس اليوم وقع موافقة، لأن ماكو غير حل عنده. واندزلها تبليغ. أم در حتى لأبوه سلام تعتب وأبو سلام يهمس: هاهي خلها تتطلق، ما يتفاهمون. بقت صافنة وبعزة نفس صيحت: مو لازم خل يطلقها. وطلعت من البيت. هالحجي خليل جان بصالة بيت خاله سمعها بس ما كدر يطلع. وأجاني جنت أحضر غراض ضل، ما بقى شي عالسنة الدراسية الجديدة.

أدنجلد بالكتب. وأشوف خيال كدامي، رفعت راسي شفته. ضل تباوعلي وتباوعله، تعرف من هوسه كل يوم اكو شي. وكفت نصة على كتفي همس: خابريها. بس اسمع صوتها وخلص. جريته لحضني، بجى على كتفي. ويردد: حرموني منها أسينات. اذكر الله حبيبي. داموت، الله يدري بيه داموت. اصبر. شصبر؟ راحت من إيديه. جريته للهول، تمدده عالقنفة وراسه بحضني، أمسد على راسه وأقرأ. وهو يردد: خابريها. ليش تأذي نفسك؟ ما كدر. أروحلك فدوة خليل. خابريها، نتر.

خابريها خابريها خابريها. صاح ضرب على راسه. دقيت عليها، غمض يتنفس بسرعة. هواي دق يله ردت. صوت مخنوق: ألو. ها أسينات شونج؟ هلو قلبي شونج أنتِ؟ أباوعله عيونه تحري مغمض. همست: زينة الحمد لله. جريت نفس. همست: دز تبليغ. أعرف. ليش هيج؟ وبجت: والله أعشقه، أريد أرجع للشقة، خلي يطيح حظي. بجت بقهر: ما أكدر أسينات، لج روحي بيه. تحملي خلص، فدوة لعينج. زين هو وين؟ كوليله حترجع ما يخالف. همست: طلع من الشقة. اجروها زمرد. شهقت تصيح:

ليش ليش؟ شقتنا هاي ليش؟ بجيت وياها، قلبي معصور. أباوع إيد خليل نزلت من كيفها وراي نزل. فزيت: خليل! خللللليل! ذبيت الفون أكعد بيه، نزف خشمه صرخت حاضنته. خليللل يربي شون؟ أبو سلام طب يركض: شبي شبي