رواية مراهقة والاربعيني الفصل الحادي والعشرون 21 - بقلم ڼدىَ

#مراهقة_و_الاربعيني

،،،،،،، بقلم زينب ماجد ،،،،،،،،

الحلقة_31

بدلت وكعدت ابجي .. طبت نور عليه وتصبر .. ولا تهتمين وكلهم هيج.. وابو حرب ورده بس اعصابو ومن هلكلام ..

شويه وفاتت الحجيه.. كالتلها نور وينو 

-جا جماعتو وطلع يمهم كعد.. ليليان يمه ليش ما لابسه جبتج ... لابسه هاي ضيكه وضهرج مفصل وامتونج و صدرج..

انه ما حجيت كدامو بس حقو وتستاهلين..

-اي طبعا استاهل .. ابنج قابل راح توكفين وياي ضده.. اكوم انام احسنلي..

-ولج يمه ما راضيه بضربج بس حگو يعصب انتي شايفه ملابسج لو لا ..

- حجيه يرحم والديج تركيني والله ما بيه حيل.. كمت فرشت وتمددت ابجي بفراشي.. بجيت وخويت لحد ما نمت. 

ع العشا كعدني حرب .. كتلو ما اريد.. وبقيت بفراشي.. نايمه لحد ب2 بليل كعدت بلعومي مجرح من كد البجي..

كلها نايمه والبيت مطفى وضواه خفيف.. مشيت بالمطبخ شربت مي.  لكيت بالسله اللي ع الطبله سميري مال جهال

دنت نفسي عليه.. كضبتو وكمت افتح مثل الكبسول واخلي بحلكي.. ما احس اله صراع ضرب ايدي وزت السميري مني ويكولي

-شجاي تسوين يولي من كل عقلج انتي

-دنك شال السميري .. جان يكول .. وجعه كاعده تعلفين بهذا وانه عبالي جاي تشربين دوا تأذين نفسج..

-درت منو وضحكت خرب عبالو اريد انتحر ..خخخخخخ.. مشيت وعفتو ..

طلعت بره .. احس الجو يتنفس ومو بارد حيل .. طلع وراي .. يكلي فوتي لا تتمرضين..

ما رديت ولا كأنو موجود.. سحب ايدي ودارني الو.. دحك بوجهي.. اشرتلو على راسو وكتلو هدن

-مسودن انه ؟

- ما اعرف  بس انته نفسك الجان الظهر يغلط ويضرب.. وهسه وقت الهديت لازم احجي وياك واتقبلك واكولك سمعا وطاعه وادخل مو ..

-لا مو هيج.. انه نزلت بس اشوف منو جوه..

-انته عندك انفصام انصحك تتعالج تركتو وجرني حيل

-هلكلام عيب وما ....

-ما تريد تسمعو مرت لخ.. ما تقبل احد يهينك يجرحك يغلط عليك بس انت تحلل كلشي النفسك..

كل الاسويه تكولون ليليان عيب .. بس ولا مره شفتكم خفتو العيب لو استحيتو..

-راح اعتبر الكلام ما سمعتو ..

-السمعت والما سمعت متهمني.. يصير الصبح.. تخابرلي امي ولا تسمعني ولا اسمعك..

-سالفة اريد امي واريد ارجع لا تفكرين بيها.. واذا فكرتي راح تجبريني على موضوع انه ما رايد اجبرج عليه..

بس لو طلعتي من هينا لا تعتقدين اطلعين بنيه.. وتنهان رجولتي بيج.. خليني صابر عليج.. وانسي سالفة الرجعه ..

-ما فهمت ..

-مو مشكلتي .. انه العندي حجيتو وبراحتج..وفوتي جوه بساع اريد اقفل..

-تركتو وطبيت.. رحت لفراشي .. التوم يبجون.. واني شابعه نوم.. فتح الباب راد.يدخل.. نسى نور هينا..

دحك التوم يتباجون.. تراجع بساع وسد الباب وكاللها اخذي راحتج خويه.. وصاح.. ليليااان..

-ما رديت ولا طلعت..

نور:- يولي الرجال بالباب كومي ..

-ما رديت عليها.. هي لبست حجابها وكالتلو ابو حرب فوت خويه.. ما عدنا شي..

فات هو بعصبيه .. جر الموبايل من عندي وصعد.. ما حجيت.. بس بسيطه.  وكت اللي يدحك بلا مستحى ويريدني اتجاوب .. يجيبلي موبايل

وكت الما اريدو يمن بي وياخذو مني.. هسه لو يصير ذهب مو مبايل هم بعد امد ايدي عليه ولا اريدو..

نمت الصبح.. وكعدو.. ما طلعت  اسوي ريوك ولا كمت اشتغل واني اريد حجه يحجون.. حتى صدك اهج واشرد منهم..

بس محد حجه.. لان هو عصبي ومتوتر وهسه تصالحت ام سعد ما ادخلت ابد.. نور لمت البيت وام سعد سوت الريوك..

مرت سعد رايحه لبيت اهلها.. بقيت بالغرفه.. ابد ما طلعت على كد الحمام .. للظهر يلا طلعت للمطبخ.. بس دحكتو طب بسيارتو للكراج...

رجعت للغرفه.. فات هو .. نور صبتلو غدا.. سائلها عليه.. كالتلو ابد ما طلعت حتى ام سعد ضاجت بس ما حجت. 

ردها .. ولا تطلع ولا تشتغل .. انه ما اريدها تشتغل.. احسن واليضوج ما يعجبو محد جابرو ع العيشه هينا..

وصاعد نايم.. اني طلعت اتغده .. ويوم كامل ما دحكت بيه وحتى وجهو ولا كابلتو ..

لثاني يوم.. جت هيام.. شافتني مطنكره والوجوه مختلفه وصراع عطله وكالب وجهو ..

جت كالت يولي شصاير شكو.. بس لا مطگوگه چتله .. عمتي من يمها حجت وكلامها دفاع لصراع وتنطي الحق الو لان لابسه هيج..

بس هيام ما قبلت.. كالتلها حرام عليكم يمه حتى الكفار ميسوي سوايتو شجاه متكليلي..

هو اليدافعلها من الناس ويحميها وهو اليطيح حظها تره ما صايره .. على مود لبس وشصار.. هي لبست وانتهت ..

يعني لو كتلها شراح يصير .. خو بدل هلطك يكعد وياها ويحجي.. انتي لا تصيرين وي ابنج عل الباطله يمه حرام عليج البنيه يتيمه..

-يمه انا ما وياه وما رضيت بالطك بس هو يغار وهي تعرف ما يقبل باللبس الضيك..

-وما منع بنتو لو هاي صايره ملطشه الكم ياهو الاعصابو كابه جاتلها  

-يمه ذااااك هو اخوج روحي احجي وياه انه شعلي منكم .. لبست نظاراتها وفتحت القران..

هيام همت نفسها وكامت.. هو كاعد بالهول يدحك اخبار.. كالتلو ابو حرب من كل عقلك انت طاك ليليان هيج ..

شسوت يخوي زنت شفتها وي واحد.. شسوت گلي ..

-ام علي سدي الموضوع رحمه لاهلج..

-اشو ما اسدو.. واريد اعرف هلبنيه بهلبيت شنو مصيرها .. ام سعد كبت ضربتها انت عصبت ضربتها وتالي شنو   ملطشه عدكم..

-عجل ترضين بلبسها هذا جدام هلسرسريه وانتي كل الزين تعرفين زلمهم شنو من عيون عدهم وشلون يدحكون ع النسوان..

-اي وهي شعليها بعيونهم.. هذا ما حجي ابو حرب .. الطايح حظو ويدحك لو تلبسها غطا الكعبه هم ما تسترها من عيونهم..

خاف ربك خويه .. البنيه لا هاذ طبعها ولا هاذ لبسها .. مسيحيه ولبسها سفور وجت يمك لبست الحجاب و الجبه كلها خاطر ترضيك وانت ما راضي

شتسوي بعد وترضى.. تره مللتها .. ما تريدها وما تناسبك كول ليش اتعبها واتعبنا..

- ام علي سدي الموضوع

-لا ما اسدو وكافي خاف ربك .. فوك الاهاين السم السمعهتها من خوات مرتك تجي انت فوكهن..

-ومنو محاجيها

-سألتها انت منو محاجيج منو غثج .. لو هي بس طك..

خليصان حاده اسنانها على هلجاهله وتهين بيها جدام اليسوه والما يسوه وهي تسكت خوف منك ما تقبل ترد..

انت فهمني شرايد من البنيه..

-هي كالتلي احد.غاثها وما حجيت  مو كتلها اليسمعج حجي كليلي اردو  وانعل واالدي

-خويه رد نفسك عنها بالاول وعوف الناس هي ما تتأذى من الناس بكدك..

-هيام انه اكرهااا ؟؟! .. ليش تخليني اطلع عن طوري .. كلهم كوا....يد الواكفين.. ولج انه كاعد وعمي يحجي وهي منزله راسها وهم ما نزلو عيونهم عنها

ول يابه ما عونت عمي يخلص كلامو حتى اكلها كومي يلا.. ولج شبت النار بضلوعي وهي كاعده وهم يدحكون

اروح اسويلي مصايب ابيت عمي واكلو عمي ولدك يدحكون بمرتييييي.. ولج راسي اشتعل انتي تفتهمييييين لو لااااااا

اكومها من كدامهم .. تجي  ادنك كبالهم بنص الشارع تخليني احترك بهدومي ولج زين مني ما حركتهااااااا والله ..

-وهي شذنبها بيهم

-لا تكليلي شذنبها كل الزين تعرف انه ما ارضى بهلبس .. طبيتو لبيت عمي دحكتكم واحد واحد.بس هي ختلت مني وما شفتها

يعنيييي شنوو.. هي تعرف انه ما اقبل هلتختلت مني.. وغيرت ملابسها بساع بس طبت لييييييييش؟؟؟؟ تعرف انه ما راح اقبل

.. لا تكولين ما تعرف انه هذااااا الذابحني تعرف ما اقبل وعاندت.

-يا اخي احجي وياها ليش تضرب .. تره اعتقد تقتهم لو كلتلها هذا ممنوع  هي ما صغيره ..

-رحم الله والديج.. خوش كلمه.... ما صغيره مو.. عجل شكالت العقلها من لبست هيج  وطلعت وتختلت مني..

-يا عيني احجي وياها .. ما يحتاج ضرب والله..

خويه ارحم عمرها وطيشها .. مو بكد جهالنا.. ما يغلطون ونتحمل ونعلم وتوكع وذرة السانه من الحجي ويااااااهم..

باجر حلا تتزوج والتاخذه مثلك بدل ما يحجي وياها يضربها وما يعلمها .. تقبل انت بهيج تصرف وي بنتك ؟؟؟؟

يتيمه من تضربها وما الها احد يردك.. شكبر ادموعها يم الله..

ليليان:- ما سمعتو بعد رد عليها سكت  وهي ضلت تحجي.. وفك على حجي هيام.. كام يحاول يكسر الزعل

بس اني ما فكيت.. اسبوعين اتختل منو هو ينزل اني اسوي روحي نايمه .. هو يكعد بالهول اني افوت للغرفه..

يجي للغرفه... اطلع للحمام لاي مكان المهم ما انجمع بيه بمكان شكد حاول راد.. ابد ما رديت ولا حجيت وياه..

نزل الموبايل وحطو على فراشي.. ما فتحتو ثاني يوم بس طلع نظفت غرفتو وحطيت الجهاز على فراشو ..

3 مرات يودي وارجعو بنفس الطريقه.. عرف اني ما اريدو..

طلع للسوك.. جابلي ملابس صيفيه وحتى ملابس خفيفه لوقت النوم تراكات قصيره ثوب قصير.. حتى ملابس داخليه متسوكلي

وياهم عطور وشامبوات وكلشي احتاج.. وصايه مثل اللي انعجبت بيها ونفس الموديل .. بس قماشها اثخن وما بيها ردن ستريج..

حلوه تجنن عجبتني بس ما خذتهم ولا خليتهم بكنتوري.. شوفتنياهم الحجيه ورجعتهم بالعلاليك..

خليت العلاليك على حطتهم.. عرف ان ما اريد شي منو ولا اريدو..

صار يتحجج وقت الاشتغل يوكف بالمطبخ.. ويبقى ينتظر الفرصه اللي تخلي يطخني بيها..

لو يشمر حجي يضحك لو يسوي روحو مشتهي شي وهو يطبخ ويتأمر جيبي وودي بس كون احجي وياه..

وما ريحت كلبو ولا حجيت اخلصلو كلشي واني ساكته الكلمه ما تطلع..

جا من الدوام راد غدا.. سويتلو .. كال صعدي للغرفه.. حطيت الاكل ع الطبله وطبيت للغرفه ما صعدت

ادري بغرفتو ياخذ راحتو وما يستحي ولا يتكبر من شي..

من شافني ما صعدتها اتركها واصعد وما اكل... لشويه واني بالمطبخ عجبني اجرب حلويات الهي نفسي..

جا الحجي ابو ثرب طاكه براسو ومشتهي بيذنجان مشوي.. وكال اني اسوي وهو حط البيذنجان مباشر ع النار خله الدخان مالو والي. 

ويدندن وعاجبتو روحو واني اختنكت من الدخان.. رحت لعمتي كتلها عمه فدوه احجي وياه والله اختنكت ما اتحمل دخان هسه حبكت الا بيذنجان. 

احنه نشويلو بس خل يطلع المطبخ هسه نظفنا وماكو شي ما وصخو.. ... حجيت وصراع صار وراي طاب للغرفه   ردتني الحجيه.. منكم الو عاد هو يرد من احجي وياه. 

صراع:- هو الحجي شجاي يسوي ؟

الحجيه :- يشوي بيذنجان..

-وكل هدخان.. تركنا وراحلو ..

كلو: يابه بدينك شجاي تسوي ..

الحجي:- ما تشوف اشوي بيذنجان

-حجي بربك اختنكنه دطفي

-وانته شعليك..اصعد الغرفتك واقفل بابك ما يوصلك دخان..

-ادري بس انه بالبيت ما تكول ناس عدهم ربو ما يتحملون دخان..

-هااا هينا مربط الفرس كول مرتك تضايكت وجاي تفزعلها ..

هو كال هيج وصراع تخبل وكام يدفر وحرام بالحرم يا انه يا هاي الطبخه وعصب.. عاد الحجي دحك صراع ومعصب

طفى الطباخ... وطلع برا البيت زعل..

صراع :- ليليااان..

- سمعتو صاح رحت وكفت كدامو . 

-اختنكتي من الدخان مو..

-درت وجهي منو ورحت اكمل الاكله..

-طلعيلي بيذنجان اكبار...

-طلعتلو من الثلاجه وحطيتلو ع الكاونتر.. جا تقرب مني.. عود يريد يفتح الجراره بطلع سيخ..

زين اذا اني كدام الجراره وهو وراي شلون تنفتح واحنه واكفين.. بقيت واكفه بمكاني ادحك وين يريد يوصل..

اخذ نفس.. وحط ايدو على خصري ويكلي شو شويه وهو يلطش نفسو ..خوش دروب .. بس ما تنفع..

بعدت ايدو وخرت من يمو .. هو تنهد.. واخذ 2 سيخ وحط بيهم بيذنجان وطلع يشوي بره بالفحم  ع المنقله. 

اني لملمت وساختهم وكعدت اكمل.. شوي وطب صراع شاوي البيذنجان ومشيشهم بالسيخ .. اني واكفه اكلي وهو وكف وياي ثرم بصل وحط الطاوه وكعد.يطبخ الاكله..

و كل شوي يطخني متعمد.. ابد ما ريحت گلبو وتجاوبت.. وكأنو ما موجود..

كمل الاكله وحط عليها كمون وزعتر .. سواها صدك تشهي.. وعزل الماعون.. وكال حطي كبال الحجي ع العشا انه طالع ..

ابتسمت.. رغم زعلانه منو بس احب حنيتو مو بس وياي وي الكل يعصب ويگلب الدنيا بس يعتذر بغير طريقه ويصلح غلطو وما يحب احد يزعل منو..

صبينا العشا بليل جا الحجي متضايق.. كعد.. حطيتلو ماعون البيذنجان كبالو .. شو هذا ابو ثرب بساع فرح

وكال اااااالله هاي انتي سويتيها عفيه عفيه سباعيه.. وكعد ياكل.. صراع مدنك مبتسم وما حجه وهو ياكل..

بليل خلصنا شغل ودخلنا.. ردت انام.. صراع يحوص شلون يخليني اصعد فوك.. عاد شافلو خوش شغله..

مشتري ملابس صيفيه كومه وطب عليه  وكال صعدي وياي اريد اضم ملابسي الشتويه وابدل الصيفي..

بالله هذا وين اروح منو.. صعدت وياه دخلنا الغرفه.. بدل كبالي .. درت وجهي عنو.. وفتحت الجياس مال الملابس ..

تقرب مني .. ولطش نفس ويدنك ويكلي حياتي ما هيج.. استغربت .. حياتي اول مره يكولها.

ابتعدت منو.. تنهد وهو يصفط ويدحكلي صفح .. بنظرت واحد يكول تره تعبت كافي عاد...

بس ما ابطل .. دام يضربني اني ما اكف .. وهم اضربو واغثو بس بغير طريقه ما اضربو الو اضرب گلبو ..

هو يصفط واني احط بالكنتور اصلاً هو مخلص الشغل بس هيج حجه جايبني بس حتى يتحرش..

ما كلت شي لحد ما خلص كلشي لملمت الغراض وردت اطلع.. كضب ايدي وسد الباب..

-تره مو حاله هاي كافي.. يحجي همس.. ومد ايدو فتح شعري ويلعب بي ويشم بركبتي.. ول يابه شلعتي گلبي حرام عليج

بعدتو حيل.  وطلعت حتى قراصتي ما خذتها بقت يمو .. اوووف اذا ما اطلعلو گلب ..

ثاني يوم.. كعد الصبح وي الصلاة.. كاللها يمه انه راح اطلع.. العرفتو عندو واجب طالع اسبوع ومحظر جنطتو واني ما اعرف.. حتى ما وصاني عليها

بس كاللها كعدي ليليان تكوم تسويلي ريوك جوعان اكل گبل لا اطلع.. عاد كعدتني ما كلت لا.. كمت

نزل هو بملابسو العسكريه الاسود.. وبسطالو ... وعطرو اوووف منو..  كال صباح الخير..

ما ردت اطوخ وياه وهو مسافر .. رديت صباح النور بس واني دايره وجهي..

-مو احجي وياج.. صبحت تره مابيها شي لو صبحتي علي

-صبحت ورديت والله بس شكلك ما سمعت..

-كضب ايدي.. ليليان ليمتى انضل هيج كافي.. اعرف قسيت وغلطت وساعة عصبيه شسوي والله من فتي بطولج انه خيلت عليج ونزلت عيوني ما عرفتج..

من مشيتي ودنكتي يلا عرفت انتي .. وشاط راسي والله .. ما اتحمل احد يدحك بيج انتي مالتي وحدي

-اكعد تريك..

-ليليان كافي ابوس راسج بالله تعبت.. يولي مسافر اسبوع مدري ارجع مدري لا اطلع وانتي زعلانه اموووت ما اطيق زعلج بالقران..

-بعدت ايدو.. وكتلو ترجع بالسلامه.. وفتت للغرف..واسمعو يتنهد يكول ربي صبرك والله تعبت ..

تركتو ودخلت للغرفه.. كالت هاا حجيتي وياه..

-اي

-عفيه بنيتي كسبي رجلج تره الزعل ما زين يبعد الگلوب..

-مشيت لفراشي وما رديت..

من سافر اني انتقلت لغرفتو اكمل شغلي وانام واكعد بيها .. كم مره يخابر الحجيه يريد يحجي وياي واتحجج وما ارد..

ما اكرهو بس طلعت روحي من كد اذيتو .. لو اسوي بيه ربع اليسويه بيه جان من زمان طلكني وما تحمل  

بس اني لازم اتحمل.. ما اضربو ولا اذي .. اقل شي يقبل اسبو .. لو اسب ابوه.. ؟

عجل شلون اقبل يسب ابويه الميت وارجع اسامحو بلا كلشي.. تعبت ما تصيرلو جاره .. عاد خلي هيج يتمنى رضاي احسن. 

بهذا الاسبوع قررو يخطبون نور مرت عابد لنائل.. حتى يلم جهال اخو ويصيرون ابيت اهلهم..

ما يقبلون جهالهم يعيشون عند النسابه.. اهل اخلاص كتلو ارواحهم بس رادو حلا تعيش عدهم بعد موت امها ما قبل صراع..

قاعده عدهم بزرهم ما يعيش غير عدهم.. ف كالو عيب نسابتنه تصرف على جهالنا عود مثل الغرب نوديلهم مصرف نائل يلم جهال اخو ونستر عليهم وعلى امهم..

واتفقو على كلشي وكالو ما نسوي حفله ولا شي نعقد عليها ونجيبها للبيت.. وبس ..وانتظرو صراع يجي حتى يرحون يخطبون..

كالو باجر صراع يجي.. فكلت بليل انظف غرفتو واعطرها واسدها حتى من يجي الصبح يرتاح بيها..

كملت شغلي الظهر وصعدت شغلت التلفزيون .. ونمت ما حسيت.. شوي وحسيت شي يكعد ع التخت..

ردت اكوم.. بس من سوه احم.. وهو ينزع بسطالو عرفتو صراع.. احس شكد مشتاقتلو بودي اكوم احظنو .. ما بيدي ما اكدر اكرهو..

وهو بملابسو العسكريه فتح البطانيه وتمدد نام يمي وخلى راسي على ايدو .. اني حسستو نايمه اشخر..

بس اني محتاجه احظنو .. لو شكد ما اضوج وانقهر منو .. بس بحظنو راحتي.. حط راسي بصدرو وغمض عيونو وهو يبوس بكصتي خفيف ويشم بيها..

ويييي ضعت بحظنو.. صح تعبان وعركان.. بس كد ما جسمو مشبع عطر وما ينطي نفسو يتوسخ ابد ما تطلع منو ريحه مطيبه  

وحتى وهو تعبان عطرو يجنن .. بحجة نايمه غمرت راسي بصدرو.. بس هو ما كدر ينام ويغفى وما سابح..

كام على كيف.. سويت نفسي كعدت.. وفتحت عيوني.. هو شافني .. خلى ايدو عليه.. وكال

-لا تنزلين خليج نايمه بس اسبح..

-بعدت البطانيه.. ونزلت من الجهه الثانيه.. هو تنهد بتعب.. وشال راسو .. كال ليليااان..

-درتلو هااا

-حظريلي الحمام والملابس تعبان والله..

-هزيت راسي.. حظرتلو ونزلت..

هو سبح ونام ما كعد غير للصلاة ورجع نام وراها.. جرها لثاني يوم.. ع الريوك كالولو نريد نخطب وكذا وحجوله السالفه ..

ردهم :- بيها الخير ان شاءالله..

الحجي -ما نسوي حفله  ونعزم بس نعقد. عيب من الوادم

-يا وادم يابه خلي العالم تفرح والشباب تتونس حجي .. ليش ما تسوون.. المات الله يرحمو لو حزنا ما نرجعو هو يفرح بفرحنا ومن يشوف عائلتو فرحانه. 

هذا اول عرس لنائل لا تقصرون وياه وتنقصون فرحتو على حساب حزن اخو المات..

هو حجه هيج لو هاي الجهال صاحت هيييييييي كلها كامت تصيح وتركص وراح يصير عدنا عرس

والنسوان كامت تتراطم وحده باللخ ويا صالون ويا فستان.. هيام.. لبست عباتها وكالت خل اطلع الحك اتسوك  لبناتي وطلعت للسوك اشترت الها والبناتها ولحلا ..

اني ما ردت شي لان صراع مشتريلي فساتين.. وكلبو البيت فوك تحت ينظفون... العصر كالت هيام انه اروح للصالون التروح هلا بيها..

حلا كالت اروح .. ومرت سعد.. وخوات صراع من ام سعد.. عاد كلت للحجيه.. اريد فلوس اروح ويه هيام للصالون..

كالت ذاك رجلج فوك وروحي طلبي منو انه شكو فاتحتلج بنك يمي..

ابتسمت اعرف قصدها تريدني اصعد احجي وياه واكسر الزعل.. عاد عفتهم ورحت لحجي

كتلو عمو فدوه اريد اروح وي هيام وابو حرب نايم انطيني فلوس .. خطيه ما كال .. طلع 3 ورقات وانطاني..

عاد دزيت حرب على صراع  كتلو كول لبابا ليليان راح تروح وي عمه هيام للصالون.. شويه ونزل وكال ام علي انه اوصلكم..

لبسنا اني وهيام.  وحلا .. ورحنا وخوات نائل ام سعد اخذتهن..

وصلنا للصالون وحجابج نزلي وعينج لا ترفعيها وشعرج وطولج يبوووووه الف توصا وصى وبس عليه  

حلا بس كاللها ستري روحج بابا.. ويمي يتأمر.. نزلنا.. ردت انزل.. صاح يولي فلوس ما تردين..

-انطي للحجي 3 ورقات اخذت منو ..

-حدري شنو الحجي .. هاااه ليليااان شنو انه طرطور واطلبين من ابوي.. ما رديت نزلت وكتلو باي وسديت باب السياره..

ونزلنا للصالون وما درتلو .. حفيت وسوتلي شعري تسريح معالج وصبغتو .. صار يجنن وسوتلي تنظيف ومساج للبشره..

طلعت نانسي عجرم واكعه عليها الزاويه الا شويه. 

رجعنا للبيت وهو شافني حافه وصابغه.. فار طلعت روحو ويحجي وي هيام و محترك دمو .. يكلها

انه هيج وطاكه روحي من عيون العالم مو انوبه حافتلها ومدري شمسويه بوجهه هاي بالله وين اوديها..

هي ضلت تضحك على غيرتو.. دخل لغرفة الحجيه اني واكفه ع الكنتور اعدل بملابسي وعلي ابن هيام نايم على سرير الحجيه.. مكنك..

شو هذا زكح بيه.. كالو الف مره اكلك لا تزين جهرتك حلوه من الله عود انته ليش ما ترد..

الولد ضل صافن .. كالو خالو والله مامزين اصلا دا اكبر بشعري اريدو كفشه..

-انته دزين مره لخ وشوف شسوي بيك.. بالقران اشوه وجهك هذا الفرحان بي..

علي ضل صافن.. صراع طلع وصفك الباب وراه.. واني اضحك.. اندار عليه .. ويكلي خالو وياج لو وياي..

-انته معليك اطلع منها..

-عمي انه اصلا طالع من البيت كلو.. لا احصلي رزاله من خالو والله ما بيه لرزايلو..

-كلكم ما تتحملو بس اني مبتلي بي گلبي

-دسكتي عيني ام الكلوب لو ما خالو مشتعل جده من وراج. 

-اندرتلو  وتخصرت.. هلله وانت شدراك..

-ثلثين الولد علخال وانه اشبه خالي هلسوالف ما تعبر علي .. بنظره اعرف كلشي

-عوذه منك ومن خالك تف انوب اثنين ... اطلع منييييي 

-دصبري خل اكلو واشوف شلون تف

-لك علي لاااا والله يطيح صبغي الله عليك اليوم حافه ومعدله وجهي والله مابيه مكياج ازرك اهئ اهئ اهئ..

-ههههههههههههههههه اروح منج سوالفج ما بيهن خير ..

-ديلا عيني انشتاين سوالفي ما بيهن خير

كملنا نفسنا وتجهزنا باجر بس انظف البيت حتى عكبه العقد والعرس..

كلما تعشينا ونمنا من وكت.. هيام راحت البيت .. لان صرنا ازدحام.. واني الحجيه اطرد بيه طلعي فوك نامي ما تكفي الغرفه.

كتلها صعدي انتي نامي وخل نشيل سريرج ينامون بيه 3 بمكانج.... غمتني وتكول فلشج كون عود هم تردين يم راس يابس..

طفينا ونمنا.. من ال7 طب النا صراع يدفر ويضحك ويكول يلا كعدو كومو باجر عرس.. خلاها كلها تطفار

وهو نام ع التخت و تمدد على رجل الحجيه.. ويكلها اوووف يا يمه والله تعبت..

اني كاعده بفراشي.. والم بشعري..  .. هي تكلو يتعب عدوك يمه من عمري على عمرك..

- اسم الله عليج يمه بس شسوي اكو ناس شگد گلبهم اسود..

-عجل يمه تحسب گلوب الناس كلها مثل گلبك الطيب

-والله يا يمه شخص شگد احبو واداريه يقابلني بالصد .. وتعبتني حيل

الحجيه ما استلمت ابد.. كالتلو  يمه هي الدنيا مصالح وكلها ادور مصالحها..

-يمه طبعي عصبي وما بيدي وما ارضى بالاعوج.. بس مشكلتي وي هذا الكاتلني.. ويأشر على گلبو..

عاد الحجيه كالتلو .. يمعود روح الله يغث اليغثك ويفرفح كلبهم بجاه هاي الصبحيه وفاطمة الزهره البريه..

كعد من حظنها بساع ويكلها  لخاطر ربج يمه لا تدعين ماكو احد غاثني شسالفه ..

اني هزيت ايدي ما عاجبني وكمت.. لبست حجابي وطلعت منو.. ردت اروح للحمام صاير ازدحام..

عاد صعدت فوك هو صعد وراي.. صاح ليلياااان..

-ردت افوت كضب ايدي.. يولي مو اصيح ليش ما تردين..

-شتريد..

-وتالي كليلي شلون .. تبقين هيج..

-شبيه

-سألي روحج صار فوك الشهر زعلانه وعجزت بيا طريقه اراضيج دكافي

-غلطان ما زعلانه .. ودا اشتغل واخدمك وما مقصره بشي شرايد بعد...

-دحكي يولي تره النفس عزيزه وما تهون اذلها كدامج ... وصبري عليج بدا يخلص.. لا تشوفين لهسه منطيج وجه..

تره بالله العظيم لو لبستج برجلي ابو ابوج لو يجي ما ادحك بوجهج.. ان رضيتي وان زعلتي طبج طوب باقرب حايط رگعي راسج.. مو انه التذلني مره افتهمتيي

زت ايدي من ايدو حيل ومشى للغرفه بعصبيه.. فتت للحمام وطلعت نزلت جوه.. واني افكر بي الضاهر صدك طوختها وياه..

خل الين وياه باجر عرس ونفرح شمحصله اني من الزعل.. دا انزل دحكت اخلاص اجت هي وامها وابوها متحلمه بينا خلوص ام حثل..

حتى ما سلمت عليهم رحت للمطبخ.. هستوني دا احظر بالريوك.. نزل هو وجهو ما يكصو السيف..

كتلو الريوك راح يجهز لا تطلع.. ما رد.. صفك الباب وطلع .. نوال كالت هذا شبي .. ليش هيج سد الباب جان تكسرت...

-شسوي اعصابو كابه من الصبح.. اخذ سيارتو وطلع.. سد باب الكراج. 

بعدنا هسه دنحظر وما نحس الا وصوت قوي هز البيت علينا كلنا تصارخنا واني كعدت بمكاني وخليت اديه فوك راسي وصرخت يمااااااااا

الثريات والمراوح تحركت بالسكف من قوة الصوت.. 

.. طب الحجي يصرخ شنو هذا انفجار قريب .. نائل نزل يركض ابو حرب ووووووين..

-طلع هسه ..

-خررررررب .. دفر الكاونتر كسر العليه كلو .. وطلع بالكراج يخابر

جت الحجيه تركض .. وليدي وينو  يمتى طلع احجيييي

-عمه هسه والله هسه طلع..

نائل:- مغلق ليييييش .. افتح افتح لخاطر ربك افتتتتتتح.. اول مره بحياتو مغلق ليييييش

الحجي :- ولك انته بس كلي الانفجار وين

-سعد.طب من بره كالو الانفجار ع الشارع بالسيطره خوما اتأذيتو  ..

الحجي:- ولكم اخوووووكم دحكووووو اخوووكم وينو

الحجيه :-يمه عمى بعيني وليدي وينو ما صار ساعه نايم بحظني وينو حاجوني ..

-اني حاطه ايدي على حلگي وابجي واگول معقول يصير بي شي وهو طالع زعلان مني لا والله اموت ما اتحمل .. 

كاعده بمكاني وابجي واصرخ وحاطه ايدي على حلكي وهم كلهم طارت كلوبهم وطلعو بالشارع يدحكون وينو..... يتبع

☆☆☆☆☆☆☆

#زينب_ماجد#مراهقة_و_الأربعيني

،،،،،،، بقلم زينب ماجد ،،،،،،،

الحلقة_32

كانت هذه الفتره .. فتره سيئه جدا على اهل الانبار.. ناس جاعت ..ناس ماتت.. ماكو احد يسمع ..ماكو احد يعيل احد..

وما واكع بيها غير الفقير

ساحات الاعصامات مليانه .. عالم فاضت بيهم الحاجه وطلعت هوست تريد حقوقها..

شباب بلا عمل .. كهرباء ماء صحه بيئه كل هذه يحتاجلها المواطن حتى يعيش وكل هذا ما كان متوفر..

فطلع الفقير بحركة دم.. يهوس ويطالب بحقوقو من أناس كلبهائم يكاد لا يسمعون ولا يعون..

الفقير ما يعرف شنو اندساس وشنو كمية المباغته اللي دتصير .. كل همه حقو لكن للاسف كل شيء كان مباع ومسيس وما وكع بيها الا الفقير..

جنت اشوف نائل و صراع يتعاركون ودوم بينهم نقاش حاد سياسي..

ونائل جان يريد يطلع يتظاهر وصراع ما يقبل .. يكلو هذي نار ما نحصل منها غير الرماد... و الله يكول قو انفسكم واهليكم نارا وقودها الناس والحجاره..

وماكو ثمن لهنار غير ارواحنا وحياطين بيوتنا..

... فترة انتشرت بيها الفتنه انتشار واسع .. حتى اخر الايام صراع و ابوه واخوانو ما گامو يروحون لصلاة الجمعه.. يفضلون الصلاة بالبيت افضل..

انوبه صار استهداف للعساكر و الاماكن التابعه للدوله .. سيطره مركز قياده تتفجر ..

جنت ادحك الحجيه تكلو يمه ابو حرب اكعد واترك دوامك.. ما بينا حيل نخسر بعد والله ..وكل عسكري صار مستهدف..

بس ماكان يرد.. ومو بس ما يرد.. وكأن ما يسمع.. هذه عادة ابو حرب تطنيش اي حاجه ميحب يسمعها

.... بيومها طلع الحجي وولدو وعمتي يدورون على صراع .. توهم طلعو .. وگب الانفجار الثاني...

اني جنت كاعده مكبصه على رجليه و ابجي.. من قوة الانفجار.. كعدت على حيلي للكاع وحطيت اديه فوك راسي

والزجاج مال الشباك كلو تناثر فوكي .. كمت اصرخ من الخوف .. لان للحظه حسيت البيت راح يوكع ونندفن جواه..

فمجرد ما اختفى صوت الانفجار.. سندت ايدي للكاع اريد اكوم .. دخلت كزازه بين الابهام والسبابه.. الدم كام يتناثر من ايدي..

بس الخوف كان اعظم.. طلعنا من البيت كلنا نركض لان حسينا راح يوكع فوكانه.. كعدنا بالكراج كلنا نتصارخ نسوان وجهال..

وبيهم اللي ماد راسو من الباب يدحك شنو الصار.. وناس كاعده على حيلها وتبجي وتدعي الله ينجينا ويعديها سلامات ويحمي ولدنا..

واني بين الخوف والندم والأنكسار ومشاعر ملخبطه ودموع تتجاره ودم يتناثر من ايدي وكأن ما احس بي.. ضياع

شويه وطبت الحجيه و سعد..... الحجيه تولول وتبجي على ابنها.. و سعد زكح بينا وفتنا جوه..

واني عيوني ع الحجيه اريد استفسار منها بس الكلمه مدتطلع بس ادحك وابجي..

دخلنا جوه هم فاتو للهول.. واني فتت للمطبخ ابجي .. معقوله صار بي شي .. وين راح وليش خطو مقفول..

لهناك واجه نائل والحجي .. كالو:- هاا ما اجه..

جاوبو:- لا ما بين

يخابرون عليه والگلوب نار..

شويه وانفتح باب الكراج ودخلت سيارتو .. كلها طلعتلو وهو نزل بساع صاح هااا كلكم بخير كون واحد منكم طالع..

حظنتو الحجيه وكامت تبجي.. وحلا هم حظنتو وتبجي حيل وحتى اخلاص حظنتو وتكلو ما تتصور شكد ضل بالنا جان متنا

.. كال الهم :- يابه شجالكم كولو يا الله.. ما بيه شي ... انه الضل بالي عليكم

زكح بيه نائل وين جنت يخوي متكلي خطك ليش مقفول طلعت ارواحنا..

-يولي الموبايل طريتو بحايط غرفتي گبل لا اطلع جنت معصب .. وانه طلعت منا.. سمعت الانفجار واندرت رحتلو..

نقلت جثث بسارتي ورجعت.. عرفتكم راح يضل بالكم.. حظنو وتحمدولو ع السلامه.. وطبو ..

واني اباب المطبخ ادحك عليه ودموعي تجري ... دحكتهم فاتو جوه.. اني فتت للمطبخ وابجي ومخليه اديه على وجهي..

فات من الباب الثاني.. واجه .. دحكني وجان يكول عصفورتي شبيها تبجي.. واخذ وجهي يريد يشوفني..

اني حظنتو حيل وكمت ابجي بصوت عالي..

-ول يابه كل هلدموع لخاطري عجل شكد تحبيني يولو وساكته هههه..

جر الكرسي وكعد.. وكعدني على رجلو واني من كل عقلي حاظنه راسو بصدري وابجي بقوه.. وهو يضحك ويهدي بيه

دحك اديه كلها دم.. كال شو شو دا اشوف ايدج شبيها.. وخرت واخذ ايدي.. يدحك بيها وكال

-ول يابه هاي بيمن ذابحه ايدج.. ليش هشكل الدم ينضح..

نوال و حلا و اخلاص واكفات يدحكون.. اندار لحلا كال الها :-  باباتي من الخانه اللي بالحمام المعقم والگطن و الشاش بالعجل ..

راحت تجيب وهو يدحك بوجهي ويمسح بدموعي ويبتسم ويكول بسج.. طاح حظج الا بانفجار يلا ترضين علي .. طلعتي مانج سهله يولي..

واني ابجي ابتسمت.. جان يحجيها بضحكه ويكول : دبسج بجي يولي لا يگوم يطافر علينا خنن ..

خليت ايدي على وجهي وكمت اضحك.. ونوال هم تضحك وتكلو يابو حرب والله عليك سوالف..

واخلاص عاكسه ايدها ع الكاونتر وادحك بلا مستحه واني كل هلحجي منتجيه على رجلو كاعده..

اخذ من حلا الشاش والمعقم.. عقم ايدي ولفها وتيبها .. دحك الحجي اجه للمطبخ.. بعدني من رجلو..

وسأل:-  هاي الجام تكسرت هيج من الانفجار ..

والحجي استلمو اسئله ع الانفجار وانفتح موضوع سياسي .. ونائل وسعد دخلو يشاركون بالحجي ويتناقشون ع الانفجار..

خلصو حجي.. صراع حجه وي سعد :- اتصل برحمن ابو الجام خل يجي يرمم الشباچ ..

ودحك على نوال كاللها؛- خويه  نظفي انتي والبنات المطبخ گبل لا يجي الولد ابو الجام.. هاي ايدها مجروحه. ودحك عليه..

-يويلي شكد فرحانه بطولو وهو يصرعنه بأوامرو وواكف بنصنا.. ادحكلو واني مبتسمه...

كرص خدي بضحكه وفات.. كعد وياهم..

طبعا عادة العراقيين بهيج موقف من يصير انفجار .. ننخبص ونبجي وندعي واحد يكوم يضرب باللاخ..

وره ساعه تمر نمسح الدم ونصلح النهدم ونرجع طبيعيين وكان ماكو شي بس كل شوي نكول والله خطيه الاستشهدو والنجرحو ..

ونبقى نترحم للي مات وندعي للنجرح يكوم بسلامه وترجع الحياة تمارس بشكل اعتيادي جدا.. حتى الخوف والرهبه ما تضل وكأن ما صار انفجار

ويمكن هذا السر البينا اللي خله العراق رغم كل الانفجارات عايشين ومتفائلين واليكعد بيناتنا ما يحس عدنا هم ولا كأن خسرنا كومة شهداء..

نظفنا المطبخ .. وجا الولد صلح الجام ورجعت احلى من گبل وسوينا اكل ع السريع لان ما تريكنا والظهر گرب ..

خلصنا الاكل وكلها هبت تنظيف للبيت.. والولد بالاستقبال بعدهم على نفس النقاش السياسي بس اصواتهم طالعه.

كاعد.امسح بالهول و اخلاص و شيماء كاعدات.. جان تحجي بصوت ناصي تسمعني بي..

اخلاص:- يولي والله وتعرفين تمثلين حتى انه صدكت بدموعج الا شويه عفتي ناديه الجندي بالدرب على تمثيلج..

-منكم نتعلم خلوصه حبيبتي .. بس شوي كومي خل امسح الوصخ الجواج..

اكوم بيهن وهن يجرجرن وشيماء تگلها شتترجين منها .. ساقطه نغله بلا اصل .. 

-سمعتها كالت هيج.. كمت على حيلي وطريت الوصله بالكاع.. وكلت اني على شو متحمله سموجن .. عندي زلمه اكلو وهو يرد عني ما كاعده هينا حتى انهان وهو موجود..

اندرت ردت امشي .. جرتني ام سعد.. وكالت كضبي السانج يولي عرس وما بينا حيل مصايبج .. استجني شويه..

-عجل كضبي السان بتج وبت اختج حتى اني اكضب لساني وما اكلو ..

-تخزر بوجهي واندارتلهن.. بالله عوفنه من هاي الما تستحي تروح تسويلجن تمثيليه ويجي ذاك يصركع روسنا .. خلنا نخلص ونعدي عرس اخوجن على خير..

هزن اديهن.. فات صراع.. دحكني واكفه ادحك عليهن ومخصره اديه.. وهن يهزن بديهن

-ها ليليااان اكو شي ..

-هن انخرسن بساع .. كالتلو اخلاص لا ابن عمي جاي نتشاقى وياها..

-كتلو انكسر ظهري وهن ما يكومن امسح يا شقى هذا..

صراع:- بت عمي لو تمسحن بدالها لو تكومن بلا شقى ماصخ تره ايدها متأذايه ما بيها حيل لشقاجن

..حجاها واندار ما انتظر ردن منهن بس بساع كامن وينافخن.. اني مسحت بساع ورحت للحمام اشطف..

فات صراع يغسل ع المغسله.. واني مدنكه ع السطل اغسل بوصلة المسح...

صفر وطلع صوت خفيف ويكول ..

-يول عصفورتي طلعيلي فوگ شويه ..

-اندرتلو واني مدنكه.. ابتسمت.. متشوف عركانه وعدتشتغل .. انهد حيلي والرب

نكث اديه من الماي واندارلي.. ول يابه عمت عيني .. عصفورتي تتعب ليش .. والله لنعل شيب اهلهم..

كمت وكفت كدامو.. اضحك واكلو لا تگرب عرگانه والله..

- اخ يابه شلون تشعلني بنارها وانه روحي خلصانه.. وتگلي لا تگرب 

-هههههههههههه

-ششششش يول فضحتينا ..يمكصوفة الرگبه  هاي من ابعيد وانفضحنا عجل لو نگرب شلون..

-هههههه اي اطلع بس اكمل لا يفوت واحد ويشوفنا والرب عيب

-ويفوت وشنو يعني خايف من احد انه..  يولي حلالي انتي ..

-عجل خل اضحك براحتي دام هيج.. ههههههييييي .. وضحكت ضحكه مصريه

-لا يا طايحة الحظ على هسالفه هاي .. اشرد اشرفلي ..

-هههههههههه .. كملت شغلي وسبحت.. ورحت امشط بغرفة الحجيه..

شويه وكالو جت اسماء .. تصير بنت ام سعد.. بس هاي عادتها من تجي هي ورجلها واطفالها يباتون ويبقون ايام.. ما وحدها تبات الا رجلها وياها يجون ويرحون سوا..

صراع عدنا يتضايق من رجلها .. وعادة صراع عندو نظره للبشر يحللو ويقرر يرتاحلو لو لا..

وهذا ما يرتاحلو يكول.. گلبي ما يرتاحلو عيونو ادحك بحريم خلگ الله..

ف من اجو رأسا فات علينا جو ونبهنا ان ما نطلع كدامو ولا نقدملو شي  .. محمد او علي او اي واحد من الولد يقدملو شنو يحتاج

وحمام او وضوء .. يطلع بره للكراج ما يدخل لجوه ابد.. وهاي اوامر صراع .. بوجوده شحدو اللي يخالف..

حتى الكراج كال لا اطلعن .. هذا الكلام الي و الحلا و لنوال وهيام و بناتها.. گلنالو تم على امرك..

بقينا بالبيت انظف ونشتغل والغدا وهوستو والناس بزدياد.. لل4 صراع بدل وكال انه عندي شغل اطلع ...

... كالتلو الحجيه استر علي واكعد يمه.. كاللها الكاتبو الله نشوفو حجيه لا تخافين.. اودعناكم..

حجاها وطلع.. بس اشو من طلع والولد دخلو بالهول كعدو الحجي دخل رجل اسماء للهول .. اسمو عادل..

وفعلا مثل ما گال صراع عيونو ادحك ولا تبطل .. وابد ما مريح.. بحيث تقيدنا لا اكدر اطب ولا اكدر اطلع..

وهيام تخزرني عود لا تمشين كدامو بس شسوي غير اشتغل .. ما بيدي اضل اصعد انزل اروح للمطبخ..

باجر عرس وحساب الشغل معروف.. هوسه.. الحجي كال انه اخذلي نومه شويه من رخصتكم.. وبقى كاعد وي ام سعد والبنات..

شوي واستغربت شيماء تكلو فوت خويه قابل انت غريب ع البيت.. البيت بيتك.. اني واكفه اجلف ع السنك..

فتح الثلاجه يشرب ويدحك.. غسلت اديه نزلت اردانات كلابيتي.. وردت امشي .. جان يكول بصوت ناصي ..

-ول شهل طول هذا يابو لو اگضبو..

-اني من حجه كن كلمتو مثل واحد وبزني بظهري .. شردت من المطبخ بساع ودخلت لغرفة الحجيه..

دحكت بوجهي الحجيه وكالت:- يولي شجالج .. شبيج لونج مخطوف..

-حجيه بربج صراع مو كال عادل رجل اسماء ما يفوت للبيت .. شو فات

-حجه وياج شي ؟

-لا بس اتقيد وتعرفين صراع اذا يعرف اني ماشيه گبالو والله ليسلخ جلدي واني الاتحاسب

-ول لا تولولين انه هسه احاجي علي ياخذو للاستقبال وتفض لا تكبريها..

منا اسماء وخواتها لو سمعنج يسولج سالفه گضبي السانج يولي..

-هسه اني شحاجيه غير صراع هيج وصى .. وتالي اني الاكع بيها.. دصيحي علي بسرعه حجيه فدوه..

-والله سالفتج ماهي خاليه يولي مسمعج شي.. ؟

-اكوم منج اصيح علاوي احسنلي .. طلعت الغرفه ودحكت اميمه بت سعد .. كلت الها اميمه صيحي علاوي ابن عمه هيام فدوه..

راحت تركض .. صاحتو واجت هي وياه.. كتلو الحجيه تريدك..

دخل وهي وصتو يطلع عادل للاستقبال ..وهو گال الها  :- جده اعرف خالو صراع ما يقبل يفوت جوه وكتلو نكعد بالاستقبال

بس خاله شيماء ما قبلت تكلي قابل هو غريب اخونا هذا.. وفات .. هسه اذا الح يسوولي مصيبه وامي التكع بيها.. شوفيلج غيري جده يرحم اهلج..

عاد اندارت عليه .. وكالت:- يولي نائل فوك لو طالع..

-لا يمكن فوك..

-صيحيلو

-طلعت من الهول الحقير الخنثه عادل كاعد ويدحك.. صعدت لنائل لكيتو  بالحمام.. عيغسل وصافن..

-نائل

-بعدو صافن

-هيووو نائل وين صافن عيني

-هيو بعينج يولي شرايده. 

-غمزتلو .. هاا هااا

-شال ايدو من المغسله ونكثها بوجهي صار طفار المي عليه .. دكول استحيت بعد تزت مي شكو

-ههههه لج يول شرايده..

-لا صدك صدك نائل فرحان.. مشى لغرفتو واني امشي وراه  

-بشنو افرح

-باجر عرسك..

-شكد فطيره انتي .. وليش ما افرح عجل راح يذبحوني لو يزوجوني

-لا يعني قابل تتزوج مرت المرحوم

-انه ما فرحان اتزوجها بس هو عرس والفرحه راح اجيب ولد اخوي ابيتنا واصرف عليهم بلكن يرتاح بكبرو و يطمئن عليهم..

-همممم وغيرها ..

-غيرها طلعي منا يا حشريه خاطر ابدل اريد اطلع

-وسد الباب بوجهي .. رجعت فتحت الباب صاح هاااا .. كتلو قابل جايه اخذ رأيك فرحان لو لا ..بس اجيت اكلك الحجيه تريدك

بس دحكتك صافن و نسيت السالفه بس صدك الحجيه تريدك..

-اي دروحي بس ابدل وانزللها كليلها جاي..

-اكيد..

-شلون راح اكتلها .. وهم عليه .. صفكت الباب و ركضت منو .. واضحك..

نزلت هذا العقده رايح للاستقبال هم زين.. دخلت للمطبخ.. هيام تريد تصعد هي واخلاص يغسلن السطح..

مشت و شيماء دحكت بوجهي وتكلي طلعي لملمي الحديقه وكنسيها..

-صراع ما يقبل اطلع بالكراج

-دحكي عيوني ما نشتغل عند الخلفج لو عد صراع .. حالج حالنا تشتغلين ويانه ما دشوفين طايح حظنه بالشغل

سالفة صراع ما يقبل.. هاي ما توكل خبز .. طلعي يلا بساع ونفذي الكتلج عليه ..

... هفففف امري لالله شسوي.. لفيت الحجاب عدل وطلعت انظف بالحديقه.. شويه وشفت عادل طلع من الاستقبال..

انخبصت بالله هسه اني وين اروح .. و شعلي بي .. يطبو طوب ..خل اكمل.. وكفت اكنس.. جان يلزم ايدي..

نكثت ايدي من ايدو بساااع..

طرلي الرقم  ويغمز ويكلي خابريني يحلوه..

عفت كلشي وانخبصت طبيت اركض للبيت.. اندعمت بنوال كالت على كيفج يولي شبيج تركضين..

-ما بيه شي بس طلعي كملي تنظيف الحديقه بمكاني فدوه.. حجيت وردت اطب لغرفة الحجيه..

طلع نائل منها.. عفت الغرفه وصعدت فوك بسرعه.. هيام واخلاص يغسلن بالسطح.. وكفت كتلها ام علي بس شويه..

اخلاص:- كاعد نشتغل مو وكتج..

هيام:- ها ليون شكو يولي اريد اخلص

-بس تعاي خزرتها.. زتت الصونده من ايدها وگالت الها .. اخلاص كملي ثواني واجي بس ادحك شرايده. 

جت يمي اخذت ايدها وركضت ع الدرج نزلت لغرفة صراع.. وهي تصيح يمعوده شبيج شجالج شكووو ..

دحكت ماكو احد.. انداريتلها .. ام علي فدوه خلصيني وكليلي شتصرف

-شكو يولي شصاير

-هذا عادل رجل اسماء يتحرش بيه مساعه يكلي فدوه لهطول واخ لو اگضبو وهسه طرلي الرقم من جنت بالگراج انضف الحديقه .

-عزه بعينج ان شاءالله يولي صراع مو وصاج ما اطلعين اكبالو ولا نصل الكراج شطلعج

-انتي ما دحكتي يفتر بالبيت براحتو وشيماء الحقيره عندت بس صعدتي الا اطلع انظف عجل شسوي من وراكم بس طايح حظي ..

الليله لا بقى الوضع هيج حتى ما انام وامن على نفسي هذا ما يتأمن وخايفه منو

-خبري صراع وخل يتصرف

-لا يمه عزاا  غير يذبحني والرب ما يبقي بيه عظم صاحي

-عجل شلون يولي .. ذن الچلبات حادات اسناهن عليج ويردلج سالفه وراح يورطنج وي هذا ويعرفنو طايح حظو ..

السكتي يورطنج اكثر والحجيتي يزتنها براسج وانتي التخسرين وانه ما اكدر احجي كلها تصيحني وتعابيني لو حجيت وتهمتو .

خلي صراع يتصرف .. لا يورطنج اكثر يول لو يصورنج وبعدها ما نكدر نسوي كلشي وصراع لو سمع لو وصلولو شي عنج والله يذبحج ومحد يخلصج منو..

-عفيه شگلو اخاف انتي خابري

-يول غبيه لا تصيرين .. انه ما اكدر اخابرو بس صراع وافكارو وتعرفين هسه يكول ليش انتي تحجيلي اذا هو متحرش بيها ليش مو هي .. وليش تضمضم وانتي التحجين

وهو شكوكي يشك بأظافرو و يروح يطلعلج سالفه وتكبر .. كصري الشر و خابري وليني الكلام وياه وحاجي مثل التتنخين بي وتتوسلين  ينقذج وانتي خايفه

حتى لا يضل عليج شك لو يحسبلج حساب كليلو وخل تطلع من السانج وهو يتصرف ..

وخل اصعد انه لا تجي اي المصگوعه تروح تسمعنا وتسويلنا سالفه..

-تركتني وطلعت   يربي شسوي والله اخاف احجي لصراع يروح يعصب وابتلي..

بس لا .. اذا سمع من غيري مو بس يعصب يشيل سلاحو ويرميني والله .. ارحم نفسي واني اكلو اتحمل القليل من اعصابو ولا اكلها كلها ..

نزلت لغرفة الحجيه.. هي كاعد تقره قران.. مديت ايدي بجيبها .. اخذت الموبايل هي صفنت بوجهي. 

كمت اريد اطلع هي كاطعه القرايه وادحك.ما رديت عليها.. اخذت الموبايل وصعدت فوك..

دخلت بغرفتو وفتحت الموبايل.. بقيت ادور بالاسماء.. بساع لكيتو ابو حرب ..

دست اتصال.. يااا بس لا مغلق.. هو كاسر موبايلو.. رن.. اي همزين يمكن مشتري..

شوي ورفع الخط .  الوووو ها يمه..

-الو هااي اني

-ليون هاي انتي .. هلا حياتي كولي ..

-اااا انته وين

-لا يكون اشتاقيتيلي يولي كولي هسه بالحرام ازت البيدي واجيج طاير

-لا بس ...

- ليليان شبيج اكو شي ..

-تعال محتاجتك

-شبيج بويه ..شنو المحتاجتو كولي

-اكلك بس الله عليك لا تعصب تره والله اني معليه ...

-يولي لا تكفريني كولي شصاير ..

-بس اوعدني ما تعصب عليه

-تحجين لا بالله اطيح حظج دكولي شكو .. قلقتيني ..

-بس اسمعني .. لا تصيح هذا زوج اسماء والله حقير اني مالي شغل بيه وهو كام يتحرش واني خايفه حيل

-وهو منييييين شافج انه مو گلت لا تقدميلو شي ولا الكراج توصلين

-هو فات بالهول كاعد .. الحجي دخلو و شيماء شدت وياي الا اطلع للحديقه انظفها كتلها صراع ما يقبل ضلت تغلط عليه وترزل .

اني شسوي شبيدي فدوه تعال تره والله خايفه  

ضل يسب ويغلط واني گلت ما تفوتين كبالو ونبهتج ما اطلعين الكراج لو اكبر كو... يكلج طلعي تكليلو رجلي ما يقبل كلت لو لاااااا

انتي ما تردين والا تسويلي سالفه والا تسويلي مصيبه .وانتي وانتي واذبحج لو نزلتي جوه تنتظريني بالغرفه لبين ما اجي .... و سد الخط بوجهي..

اوف ربي اني شكو اذا رجل اختو حقير وبلا شرف..

بقيت بالغرفه ما طلعت للمغرب .. مليت وهو ما بين.. عاد نزلت .. لكيتهم يصلون .. رحت لهيام كتلها صراع ما جا

-لا انتي كلتيلو

-اي وضل يلوم عليه والله اني اللي راح يطيح حظي واني الاكلها..

-لا تخافين يولي ما يسويلج شي بس الخبر مو هين يسمعو واحد.يتحرش بمرتو ابيتو تلكينو عصب .. السكك ياكل ويشرب ويدنس عرضو بلا مستحى ..

...بقيت بالخوف ساعه اروح منا وساعه اجي منا ..

سألت علي على الاسمو عادل .. گال طلع وي خالو نائل للكوفي.. سوينا العشا ادحكهم ياكلون واني ما الي نفس اكل ..

خلصنا ونظفنا ولا صراع ولا نائل ولا هذا الحقير . 

واكفه بالمطبخ ع الجاي .. ودحكت صراع فات من باب الكراج ونائل كاضب عادل متشوه وجهو كلو دم وعينو مطفايه وكو يمشي بيه. 

مثل واحد.مكتول بحلبة مصارعه.. منتهي

اني دحكت صراع فايت .. لو خرطت العافيه طفيت الجاي وطكيتها ركضه لغرفة الحجيه..

سمعتهم انخبصو برجل اسماء واسماء تصرخ وتبجي .. واخاف اطلع بس ادحك من الباب .. شفت علي فات .. صحتلو .. شكو شصاير

-هلصعلوك متحرش ببنيه متزوجه ورجلها كاضبو ومتكاون وياه .. وجابوه خالو صراع ونائل ..

حجه وراح.. اني الخوف ذبحني كامت دموعي تجري .. وادحك من الباب خفيف..

شفت صراع طلع للهول.. صفكت الباب بسرعه ودخلت اطكطك بأديه من الخوف وابجي ..

فتح الباب وفات.. اني دحكتو والوجه معصب والحواجب معگوده.. مشيت حظنتو بسرعه گبل لا يحجي وكمت ابجي .. وكتلو والله هو الحقير اني معليه. 

مسد على راسي وحجه :- خلص كفي هلدموع اخذ جزاتو وربيتو عدل ..

-والله اخاف منو يخوف

-وعليش هالخوف بويه ..غير امو داعيتلو بالهفي اليوصل صوبج وانتي على ذمتي .. والله لحرك عشيرتو وعشيرة اهلو ..

باجر من الصبح ينگلع لاهلو ولا تهتمين  ..

رفع وجهي .. باس كصتي وكال بسج يلا وروحي غسلي وجهج.. وسويلي لكمه تره جوعان..

-شلت راسي من صدرو.. دا اروح.. اندرارلي .. ليون منو يعرف بهسالفه

-محد بس حجيت لهيام وهيام كالتلي كولي لصراع هو يتصرف .. حتى للحجيه ما حجيت

-احس ولا تحجين ابد.. وذن الحيايه بنات ام سعد لو صخرنج على شي .. طنشي واذا تعدن وياج علميني وانه اردهن عنج لو اخلي هيام تتصرف وياهن. .

بس لا تردين عليهن. 

-تمام.. طلعت اغسل وهو جا يغسل انتبهت لاديه كلهن دم ويغسل بيهن.. نشف اديه وزت الخاولي عليه ويضحكلي وطلع..

ابتسمت واطمنت خلص الخوف هووف الشكر للرب .. رحت للمطبخ سويتلو اكل وجا محمد اخذلو الصينيه. 

اني رحت لميت ملابسو من الحبل وفتت لغرفتو .. كويتهم.. وعلكتهم.. واكو الو ملابس نازعهم العصر..

خليتهم بالسله... جيت اسد الكنتور وبقيت ادحك على ملابسو وحتى وهن مغسولات العطر بعدو يفوح منهن والخانه متروس عطر بس تعال وشم..

تركت السله على جنب وكعدت بالكنتور مالت وحاظنه دشداشتو واشم بيه .. اووو كن حاظنه العافيه يربي شكد احبو ..

لو صاير بي شي ورايح من اديه كان متت والرب اني ما اطيق فراگو .. شكد يتعبني ويعذبني بس هلحجي بعيد عن كلبي ..

حبو فطره وگلبي يدكلو بدون استأذان..  مثل الطفل اليرتاح بريحة امو اني هيج ارتاح بريحتو .. اذوب وابقى اجر نفس واشتم براحتي واتنفسو ..

حاظنه بدشداشتو وهايمه بيها ما احس الا باب الكنتور تحرك   وهو وكف كدامي واني حاظنه ملابسو وابوس بيها ..

دحكتو لو تخربطت احوالي هو عاقد حواجبو ومبتسم ويكول ول يابه شجاي تسوين. 

يربي غير اكوم انخبصت ومن غبائي عود اريد اكوم جريت ملابسو وسندت حتى اوكف.. تالي وكعن الملابس كلهن ووكعت وياهن بنص الخانه..

هو ضل يضحك ويكهكه .. ههههههه ومدلي ايدو ويكلي حدري يولي حدري لشوف..

خذت ايدو واني ادحك للهدوم كلها تكومت .. عفتو وكتلو باجر اني المهن واعلكهن..

ومشيت بسرعه اريد اطلع.. سبقني بخطوه وحط ايدو ع الباب وقفلو ..

-ماكو طلعه من هينا الا تكوليلي شسالفتج تبوسين وتحظنين بهدومي..

-اااااه ما ما ادري هن وكعن وحدهن ..

-تقرب مني اكثر ويكلي يولي مو بس هدومي توكع جدامج .. انه بكبري وبعمري  وكعتلج  

-ااااا شو بس اروح.. حطيت ايدي على صدرو اريدو يوخر ارتبكت من قربو .. جان يدفعني للحايط ويبوسني من شايفي. 

بقيت متصنمه ما انطيت اي ردت فعل وكأن تجمدت.. اول رجال بعمري يوكف وياي بهلوكفه ويتجرأ يبوسني بهشكل..

ابتعد مني .. ومسح على شعري ويكول بدل اهدومي حدري وبوسيني انه حلالج يابه..

بقيت جامده بلا اي حركه واني ادحك بعيونو ..

-لازم عجبج الصار ...

-اي .... اااااقصد لا لا .. ااا لا يعني مو لا بس...

-يولي شو حدري انه محترك الخلفوني من وره فهاوتج.. سحبني من شعري ولف ايدو الثانيه على خصري ..

وتهت وياه بغير عالم.. ما اعرف اذا بوكتها احس لو اسمع لو اتنفس .. كل هاي ما حسيت عليهن واني بين اديه..

ضيعت كلشي وكأني فتت بغير عالم......يتبع

☆☆☆☆☆☆☆

#زينب_ماجد#مراهقة_و_الأربعيني

،،،،،،،، بقلم زينب ماجد ،،،،،،،،

الحلقة_33

مندمجه وياه بموقف ما اعرف شلون اعبر احساسي بي.. بين اديه.. بصوت انفاسو .. بحرارتو ولهفتو..

ما حسيت غير وهو يكعدني ع السرير ويبتعد لحتى يجك سحابة التراك.. وقتها حسيت على الموقف الاني بي..

كمت بسرعه.. جر ايد... وييين .. حدري..

-لا اروح

-يولو وين رايحه تعااي

-لا الحجيه هسه تسأل ما اكدر خل انزل

-انه رجلج لحد.يسأل ولحد يصيح .. ابقي شبيج..

-لا الله عليك خل اروح.. حس عليه توترت وارتبكت .. تنهد اخذ نفس.. ومشى برهاوه واجه يمي ..

-لا تخافين .. مراح ائذيج ولا اجبرج على اي شي ما تردي ..

-ما اعرف شحجي بقيت بس منزله راسي للكاع وابلع بريگي .. سحبني لصدرو حظني حيل واخذ نفس حسيت بنفسي اصعد وانزل مع انفاسو..

رفع راسي .. باس كصتي .. وكال براحتج حياتي

-هزيت راسي تمام .. خل انزل ..

-هوسه جوه الليله نامي يمي..

- ما اعرف اذا دحكت ماكو مكان اجي افرش هينا ..

-تقرب ويهمس .. يولي تفرشين هينا عجل وصدري المن ينفرش ..

-ما اعرف اجاوب بقيت بس اتعرگ واحك بگصتي من الارتباك..

-هههههه اموت ع اليخجل انه.. اخذي راحتج حبيبي شوكت ما يعجبج تعاي هاي غرفتج..

-تمام.. مشيت منو فتحت الباب وطلعت.. بس شطلعت مثل الواحد المضروب 16 راشدي..

مسطوره بين احساس بالتوتر والارتباك والحب والنشوه .. ضايعه بين كل هلمشاعر..

نزلت واني اصفن وللان افكر واتذكر الموقف واحس بيه.. لأول مره احس اني احب رجال من صدم وحب حقيقي..

فتت للحمام.. قفلتو ورحت للمرايه .. دحكت وجهي .. يويلي .. شصاير بوجهي... مثل اللي ضاربني تحسس  

حلكي وحنجي وركبتي كلها حمره.. لحيتو توها طالعه و شواربو حيل يأذون بس ما كنت احس بيهم هسه يله من شفت الاثار. 

غسلت وجهي وطلعت.. لكيتو نازل .. كاعد بالهول دحكت عليه.. غمزلي وابتسم.. ضحكت ودخلت للمطبخ..

يربي كل الرياجيل هيج ينحبون ويخبلون لو بس صراع.. جنت اكول عنو شايب لانو اكبر مني بهوايه و عُربي لان يلبس دشداشه

هسه صرت احب العرب كلهم من وراه .. اني احبو .. لا احبو شو الا اعشقو.. واكفه وادحك على الشباك مال المطبخ

مضلل وبليل يكوم ما نشوف البره الا نفتح الجام.. يصير كنو مرايه.  واكفه واحجي وي روحي ومستمتعه. 

واسمع اخلاص تتشاقى وياهم بصوت عالي ودخلت للمطبخ تضحك وتكول والله يابو حرب والله عليه سوالف .. تريد تحرك بكلبي

اندرت الها .. وكلت.. اكولج خاله على طاري سوالف ابو حرب المتخلص .. هذا الاثار البوجهي و رگبتي شلون اوخرهم عيب لا احد يروح يشوفهم استحي..

اني گلت هيج وهاي خزرت بوجهي وزكحت بيه .. لا صدك الاستحو ماتو يا قليلة الحيا ..

حجتها بعصبيه وطلعت بساع من المطبخ.. ها ها ها تستاهلين خلوص ام حثل.. عدلت حجابي و طلعت من المطبخ..

كلهم كاعدين بالهول .. والحجيه يم صراع بس فرق هي بالكاع و هو كاعد ع التخم.. والمكان الوره الحجيه فارغ. 

حطيت ايدي على راس الحجيه وكتله بس شوي اكعد وراج.. كعدت وصراع ثاولها مندمج بسوالفهم ويضحك..

بس صدك سوالفهم وشقاهم حلو.. والحلو من يذكرون مواقف مضحكه على ايامهم گبل والكل تصير تتذكر وتضحك..

ونص من حجيهم اليحجوه بلهجه عربيه اصيله ما افتهمو .. واسئلو وهو يترجملي ويعلمني على كلماتهم القحيه..

شويه و گالت الحجيه يمه گومي فرشيلنا جوه خل انام باجر ورانا عرس والساعه 1 .. حتى صلاة الليل ما صليت ولا قريت قران. 

گمت فرشت بالغرفه لهيام وجهالها واكو بنيه يمكن اول مره اشوفها تصير بت سعد.بس عايشه عد.خوالها .. جت اليوم ومندمجه ويه بنات هيام..

كامو طشو وفرشت لبنات ام سعد بالهول .. وما كفاهن بيهن نامن بغرفة الحجي .. وبغرفة الحجيه. 

كاعد افرش .. جان حلا تكول لابوها .. بابا خل انام بغرفتك.. غرفتنا ما بيها مروحه عاطله ..

كال الها .. صعدي بويه گاضبكم انه.  بس لا تهوسون ولا توصخون..

اني فرشت وكملت .. وصعدت لغرفة صراع..

جان حلا وكفتلي بالباب تكلي شكو وين جايه..

-وانتي شعليج ماكو مجال انام جوه وجيت هينا انام.   ادحك اخلاص كاعده على الفراش وتكلي ماكو مكان عيوني وين تنامين انه وبنات اختي هينا نمنا ..

... يمه شگد ما تستحي وعينها صلفه.. ردت احجي دخل صراع متوضي ويمسح على راسو ووجهو ..

ويكول شكو يابه .. شسالفه..

حلا :- بابا مو نطردها بس ماكو مكان تنام .. وهي معانده..

-عليش المصايح بويه صوتج .. نامي منو كاضبج .. المكان واسع ..

اندارلي وكال نامي ع السرير  ..

-اللي يعجبني اخلاص ولا استحت .. تمددت ونامت وحجابها فوك راسها..

رحت للتخت.. تمددت.. هو صلى ركعتين قبل النوم. وشغل مكيف على درجه ناصيه و تمدد يمي..

اني دايره ظهري .. مد ايدو وسحبني الو.. اندرت لوجهو.. باس گصتي وهمس .. بردانه لو زين الجو

-ما اعرف حظنك دافي ..

-ههههه اوف منج..

كضب حنجي وباسني... اووو عمو ميصير مو كاعدييين .

-يول منو عمج   انه ؟

-لا بس يعني شكلك استحي..

-صراع ..

-ابو حرب

-ينعل عشيرتج وينو حرب وفوتي بنصنا دحكي ما بيني وبينج حتى الهوى ما يفوت.  جبتي حرب بنص شكو

-عجل شكوووول .. ما تطلع والله ما متعلمه

-هششش نصي صوتج.. شال راسو دحك.. انوبه  غطانه.. كولي صراع

-ههههه الا اكول

-ويلي يابه كلشي معقدتها دكوليها ..

-صراع ههههه

-يروحلج فدوه هو وعشيرتو ..

-ههههه....... دا اضحك وقاطعني وهو يبوسني حتى لا يطلع صوت.. جان تعطس اخلاص عطسه كلت وكعت البنكه علينه من الصوت

مو عطسه انفجار.. الغرفه ظلممممه..  كف البطانيه وكال الها :- بت عمي اطفي المكيف خاف بارده..

-بكيفك ابن عمي

-تركه وما طفاه.. كتلو هاي ما تستحي نايمه هينا  

-هششش صوتج .. معليج بيها كل واحد ونفسيتو ..

-وهي بلا احساس ومستحى

- ول يابه اليوم انه مستفاد  انتي غردي وانه اسكتج بطريقتي واخلص من لغوتج..

-ههههههههه ... وبقينا لحد ما اني طفيت وغفيت وحدي هو بقى يشتم بگصتي ويبوس ..

ما حسيت غير بصلاة الصبح.. هو رافع اديه ووجهو للسماء ويدعي وانوبه ركع..

كعدت على حيلي اخلاص ماكو .. رجعت راسي وكمت اغفي هو خلص الصلاة ديسبح بالسبحه..

واخلاص طبت تريد التصلي المؤمنه..

هو تركها وجا نام وحط ايدو وجهو.. تقربت ردت اخلي راسي على صدرو خزرني واشر بعيونو عليها  

بقيت راسي يمو وحظنتو.. جر البطانيه وتغطى حتى لا تبين ايدي من حاطتها على بطنه  

.... يربي شكد متحس هلمره هاي ماكو هيج طاقه.

كملت نومي لساعه وكعدو .. كل شوي احس واحد طالع واحد فايت للغرفه وصراع نايم.. وهذا ذبحو ولا تضل تروح وتجي وصوت الباب يسمعو وخو نايم..

فشال راسه دحك اخلاص تعددل بحجابها وحلا تشيل بالفراش.. عاط بيها عيطه بحلا خلاهن كلهن تشاردن ...

وصاح وراهن.... والله لنعل شيب الخلفو اليصل الغرفه.. كلااااااااب

انقفلت الباب .. واني من صوتو حتى لو بعد بيه غفوه شويه طارت..

هو نايم على بطنو واني بصفو على ضهري وماد ايدو حاظن بطني ونايمين.. تحركت وردت اكوم..

مثبت ايدو حيل على بطني ما اكدر اكوم.  ردت ابعدها تحرك واندار بصفح .. ودخل ايدو جوه راسي وسحبني الو .. ورجع غفى ..

اندرت عليه.. وصرت ادحك بوجهو غافي .. مديت ايدي العب بشواربو .. راد يعض ايدي ومبتسم..

ابتسمت ومديت مره لخ.. كضب ايدي ويكلي يولي الا الشوارب لا تهينيني بيهن..

-ليش

-عيب الحرمه تلعب بشوارب الزلمه ..

-عود شنو يعني ..

-اني افهمج شنو يعني .. جر الغطا وخلاه فوك روسنا.. واخذ راحتو مثل واحد عطشان صبحيه  

بس حسيت لمساتو اكثر جرئه صارت.. وخرت الغطا وبعدت راسي منو وكتلو اريد اروح

-ول يابه وين رايحه

-بس انزل تلكاهم ديصبون ريوك واليوم عرس لازم نفضها   

-تركيهم خل نعرس وحدنا .. .

-لا عمو ..

-اويلي يابه هم رجعت كالت عمو .. كف الغطا  من جسمو وكام..

كمت .. عجل انت ما تكلي بويه بابا و باباتي ..

-اي اني يصير بس عمو لا ..

-وشنو الفرق .. تقرب.. لف اديه عليه وكال

-من اكول بويه لو باباتي لو بنيتي مو معناها ما احبج... حرك اديه وكام يلم بشعري ويكمل.. بس يعني الواحد. اذا حب شخص من كل گلبو يكلو بابا

لان الابن وحدو يطلع من روحك ..  وينبني منك .. فيصير اعز شي لانو منك.. وانتي مثل الورده الطالعه من گلبي ..

ول يابه لو بس تعرفين هذا شيسوي من يشوفج ويأشر بعيون على كلبو.. من اكلج بابا مو معناها ما اريدج بس لان احسج طالعه من روحي اكلج باباتي..

-زين يصير اكلك بابا ..

-ابتسم .. من اول يوم دحكتج عرف ادورين بيه اب اكثر من رجل ..

-اني عشت محرومه من كل هلمشاعر .. بابا مات واني عمري 12 ..  واخويه ما جان معوضني حنان بابا .. وماما جانت قاسيه حيل ومتعصبه  

وانت اول رجال اتشوفو عيني .. بعمري ما حلا بعيني رجال لو تمنيت احد غيرك .

اني ما اريدك بس زوج .. اني اللي مضيعتو اهلي .. حظنت صدرو واخذت نفس بقهر..

-يولي اهلج شنو والله انه امج وابوج واخوج وكلشي تريدين.. سريني ما اضرج.. شيريني ما اخيبج بس لا تخالفين الاكلج عليه..

من البسج حجاب مو لان اريد اظلمج والله ولا حتى انتقص من دينج ابدا..

بس احنه عدنا شرفنا نسوانا .. وحدتهن مثل الالماسه ما نكدر نخلي الرايح والجاي يدحك بيهن.. الا نظمهن ونخليهن تحت عيونا على طول حتى نرتاح ونأمن. 

وانتي عندي الماسه نادره .. ما اريد احد.يدحكج ولو حتى بنظره وحده انجن والله عگل ما يضل براسي..

من اگلج لا تسمعين اغاني مو معناها جاي افرض عليج حلال وحرام ديني.. بس انه اعرف ذن ما يفيدنج بس راح يخلنج تتذكرين وتتحسرين وتبجين  

وانه انجن بدموعج  ما اتحملهن...

كاعد.يحجي.. حلا صاحت من وره الباب .. بابااا ..

-ابتعد من صدري .. اندار وكال الها فوتي بابا..

فاتت:- تكول جده تعالو تريگو

-نازلين ..

-اندرت حظنت ظهرو وهو داير للكنتور.. سحبني باس راسي .. وكال :- نزلي تريكي لبين ما اسبح بساع وانزل ..

-تمام

-نزلت منهم .. كلت صباح الخير نص رد ونص لا رغم كلهم كاعدين..

-رحت للحمام اغسل .. يا عزززا .. ركبتي صايره فلم هندي .. اليكول بيه مرض مو الليل كله يشم ويبوس بيها..

غسلت وطلعت.. هم صابين.  شو فاتت من اخلاص وتنافخ وتصيح وين الله و يطم المايستحن

اندرت عليها وكتلها اصلي للرب لو انطمو ..  بس اعرف العار ما ينطم.. اندارتلي تخزر واالكاعدين انتبهو ..

ام سعد :- بدا اسمومج من الصبح يبث عيب استحي المره خطاره صارلج ساعه خاتله فوك وهي التشتغل جوه..

هيام:- حدري ليون كعدي.. كعدت وصحت حرب يكعد يمي حتى احجز مكان يمي لصراع..

شويه ونزل توه سابح ومبدل تراك ومعطر.. ضباح عليهم كلهم ردو .. ودحك يمي اشرتلو يكعد..

جا عصر ظهري بضحكه وشال حرب وكعد وخلاه بحظنو ويبوس بيه..

كملنا الريوك وفضيناه و ام سعد واخلاص بودهن ياكلني .. دخلت هيام واني اغسل وهمست لفي حجابج على ركبتج ولا تخلين واحد.يدحكج..

اني الشال شادتو ليوره وركبتي كلها طالعه من كالت هيج رجعتو ولفيتو عدل.. كالت عفيه عيب يطب واحد من الولد يدحك ركبتج هيج بساع يشمر تفكير..

-بس ما اني هيج سويت والله صر.......

-هششش ول غبيه نعرف مو انتي .. سكتي ..

-سكتت .. وكملت شغلي بس طلعن روحي بالبسامير مالتهن..

خلصت شغلي وغسلت ملابسنا وصعدت شريت.. ونزلت..

دخلت للغرفه مال صراع هو كاعد.يدقق اوراق.. رحت خليت الميز مال الاوتي اجيت اشكلو شو البلك هذا المثلث ماكو

مدري ياهو الشالعو.. دورت شي اثبت بيه الاوتي بالكهرب وادخلو ماكو..

تذكرت الطوقه السوده اللي براسي جريتها.. ودخلتها بنقطة الكهرباء حتى ادخل البلك.. وما احس صعقه كهربائيه شلت ايدي واني ما لابسه انعال ووطنيه..

صرخت بساع .. وزتتني  وييين .. هو من لهفتو طفر السرير وجه كضبني

-شجالج يول شبيج .. تكهربتي

-اااخ ايدي انشلت اوووف .. وافرك بيدي..

-شووو ادحك..  بيمن تكهربتي

-بس دخلت هاي الطوقه شو كضبتني ذبحتني .

-ضربني على راسي وكال يول غبيه انتي اكو واحد يدخل حديده بالكهرباء غير يموت..

-اتي متوجعن ورهبة الكهرب بجسمي وهو ضربني ضليت ابجي.. رد اخذني لحظنو ويكول

- ول يابه لو صاير بيج شي انه وين اولي وين اطي وجهي .. غير اموت بالقران.. غير اديرين بالج يا بويه..

طولي وياه اقل من كتفو .. وحاظني حميت اكثر وكمت ابجي بالزايد.. اخذني للتخت كعدني وجر مي انطاني ويسكت بيه..

-دحكي ليليان.. خل اگلج شغله   اول مره انطق بيها.. بالقران الكريم بعمري ما حبيت مره ولا دنكت راسي لمره .. ولا دخلت كلبي وحده ابد..

كل العشت وياهن ما عاشرن غير جسمي واخذن منو.. محد اخذت من گلبي شعرايه.. ومو بالسهل احب

بس يمج ما اعرف اختلف الموضوع... بعمري هذا وحبيتلي وحده كلشي ما تفهم .. بفهاوتها بغباءها بفطرتها ابراءتها  

انه لاكي بيج اشياء ما لاكيها بالنسوان كلهن.. بتي هاي من ادحك بيها ما احس ابرائتها مثلج..

الله زتج علي هديه يعوضني بيها وبنيه حليوه اربيها على ايدي .. يول من اگلج بتي .. انتي بتي صدگ ما اجذب

جيتي لهلبيت طينه كلشي ما تعرفين الكلمه ما تعرفين شلون تكوليها .. ويوم عن يوم اشوفج تتعلمين وتكبرين گبالي

يول من ادحكلج مو بس اشتهيج.. لج احس كل عاطفه بكلبي تشتغل بيج... انه البعمري ما حاب اول مره اجرب الحب وياج والله ..

لا تكليلي انته رجلي.. انه اهلج مو رجلج .. انه كلج .. انه فراشج انه خوفج انه راحتج.. كل احساس بداخلج انه  

وكل ما بگلبي انتي ..

-يحجي واني كاضبه ايدي .. وصافنه بي

-تقرب مني اكثر .. ليليان انه احبچ والله احبچ

-حجاها وتقرب يبوسني......

لهناك يلا حسيت على نفسي .. من ايدو تصير ثكيله ويكوم يتجرأ اكثر بساع احس منو وابتعد..

وهو ما يضوج يبتسم وعادي يعديها .. اكوم اكمل كوي

-كام من السرير كعد.. وكال انه اكويهن عنج ارتاحي

-تمام .. فتحت بابا غرفتو .. امشي واحجي وي نفس   معقوله هذا الرجال مالتي وحدي .. اني مو بس اعشقو .. اتنفسو  .

احساس اول حب عشتها وياه.. اول كلمات مغازله من رجال اسمعها منو واتقبلها .. اول بوسه او حظني يحتويني..

هو اول شي بحياتي كلو واحلى شي.. وياه احس ساعاتي وايام بلون وردي ..

نزلت منو وام سعد دحكت بوجهي لو تخبلت.. ما ادري شلون تحس لو تعرف .. بس بسبب شواربو وجهي كلو يتحسس ويمكن من هاي تعرف

بس حيل شدت وياي .. والناس بدت تجي وعزيمه وعرس ... خبصتني خبص .. وين ما ادير وجها صاحت ليليان وطليان. 

والولد صارو بالاستقبال و الكراج والبيت انترس نسوان وشغل دك بدا من ال9 ..

ب12 ونص صبينا الاكل بس احس هلكت. كل هذا وترفض نتغده بس اني ونوال الازيد تعبنا الباقي بس مرور الخطار وبس اسمهن واكفات بالمطبخ  

هيام باقيه بين اهل العروس و احنه وشنحتاج وشيردون.. ما متواجده..

انوبه غسلت الستكاين وصبينا جاي وجا محمد وعلي ينكلون .. شويه وطلع نائل .. كال  منو صب الجاي

كالتلو ام سعد نوال..

-فشلتونا يابه الستكاين زفره تلعب النفس..

-اندارت علينا منو غسلت المواعين

حجت نوال .. ليليان غسلتهن بنفس السفنجه الغسلنا بيها الجدوره..

-هو كام يحجي وفشلتونا وجاي ما ادبرون.. وام سعد .نزلت رزايل كتلو جيبهن ما صار شي هسه اغسلهن..

تركني وراح.يدردم ويحجي وهي ما خلت سب وغلط ما سبت وغلطت وهيج من ابوج وهيج من اخوج ..

اندار راسي منها واختنكت تروح كدام النسوان وتكلهن مرت صراع هيج ثوله وهيج فشلتنا وهيج شلت حالي

واني ابجي وانظف ..علبة الجاي والطرشي نفس الشي واني مغثوثه.. شلت الطرشي وفرغتو بالجاي ..  ابجي و دحكت شمسويه

اووف ربي شيخلصني من السانها .. كتلها نوال دحكي شسويت.. صاحت بساع كلبي بالزبل وخل انطلع جيس الزبل دام ما موجوده..

دا ازت الجاي بالزبل وفاتت فوك راسي وهي تخبلت هجامة البيوت الله لا يفوتج على بيت عامر وغلط وسب عليه..

وطلعت للنسوان تشهدهن وتكلهن دحكن ثولها هلمصلاويه ما فالحه بس تصعد تبوس وتنزل مطكعه غير هسوالف ما تعرف ..

كمت ابجي بالمطبخ حيل تعبت.. راحن كلهن يبدلن وحتى نوال راحت تبدل لبناتها وجهالها واني حاكمتني اغسل واعدل بالمطبخ

وصراع ما طلع وكلهن خاتلات جوه وحتى لو متواجدات كن تريد تنتقم مني.. بس اني تصخرني

كتلها اريد اصعد ابدل كلهن صعدن.. نزلت عليه غلط وفشار يكش منه البدن.. اخر شي تعبت .. صحت على محمد.كتلو كول لصراع ليليان بالمطبخ تريدك..

شويه وجا هو .. وهي واكفه.. انفجرت بوجهو .. وكتلو كلهن صعدن يبدلن بس اني لا ما تقبل شنو اريد ارووووح..

-صعدي يابه منو كاضبج ..

-احجي وي مرت ابوك لعبت نفسي

-خزرني وكال صعدي وهي تكلو بعد ما مخلصه شغل وين تصعد..

-ام سعد اذا احتاجيتي العرس عرس ابنج وخواتو موجودات خل يجن يعزبن بعرسو شرايده من هلجاهله

خل تصعد تبدل حالها حال البنات..

-حجاها ومشى لان مشغول.. اني ردت اصعد كرصتني كرصه من زندي حسيتها شلعت جلده مني ...

ضليت احك وامشي ما حجيت بس دموعي تجري .. اخذت ملابس من الكنتور وصعدت سبحت و رحت لغرفة صراع

اخلاص وخواتها وحلا وياهن... ديمكيجن.. كتلهن بس شويه ابدل ..

حلا وكفت وتخصرتلي .. وتكلي خاف مصدكه روحج وعبالج صايره مره لابويه والغرفه الج..

-اريد ابدل يا مره .. ابقي انتي بس اخلاص فدوه طلعي ..

-والله حبيبه كاعد امكيج روحي شوفيلج غرفه..

-ذن شحجي وياهن.. بهلاثناء طب صراع دحكهن بلا حجاب بساع طلع وضرب ع الباب ..

هييييييين اريد ابدل يولو طلعو .. حلاااااا

-كلهن تراكضن ولملمن وعافن المكياج وطلعن ركض..

-دخل هو ويصيح هيريني ليليان حدري

-والله ابتلي بنفسك كلها تجهزت الا اني .. كعدت بالكاع وكضبت ذيال كلابيتي وكتلو اطلع شويه الله عليك بس ابدل

ضحك واندار وكال بدلي بويه  مو يمج.... نزعت وشلت الكلابيه من راسي .. جان الكه واكف يدحك ويضحك

جريت الثوب بسرعه لااااا فدوه اطلع عيب والله 

-يول سابحه ونازعه كبالي وتكليلي عيب.. شو حدري ...

-شنازعه يمعود متشوف باقيه بالثوب الكصير (اتك) دعوفني مووووو وكتك والله عيب وخررررر

-هششش حدري اليوم الا اعرس گبلهم ..

-شتعرس دعوفني راح يرحون والله .. عوووفني .. خرب .. طارني ع التخت  ويضحك ومانعني اكوم واني ادفع بيه ولا كأنو يسمع..

جان يندك الباب وبلا انتظار الرد تفوت اخلاص وهي تحجي ... وتكول .. بس المكياج.. هي دحكتنا بهلوضع  ورجعت سدت الباب حيل

-احسن هيج شافتنا دكووووم . ما تستحي انت

-يولي عوفج منها هاي ما تستحي خليج وياي ركزي

-قربو كلو بركبتي هلرجال مو محروم نسوان.. محروم مال  رگب يمكن بعمرو ما شايف ركبة مره..

ذبحني  .. كوه دفعتو مني وكمت كتلو عليك الله لا تتقرب .. ضحك واندار .. يبدل ..

واني كعدت بين التخت والميز بدلت .. والمكياج كبالي .. ردت احط صاح ممنوووووع ...

-كلهم حطو والله

-حتى يكولون عليهن حلوات .. ولو واحد كال عنج حلوه .. بالحرام لكص ركبتو وركبتج  

-ايوووووو عجل شتريد يكولووون

-تره طلعو بدلي بساع..

هو دار وجهو يعدل.. اني خليت كحل ودا احط حمر.. جان يكضب ايدي وكال هااااا ..

-بس شوووويه وقربت احط..

-ممنووووع .. ودنك خربطلي الحمره سوه وجهي مثل المتبديه بيها مرگه .. دحكت نفسي لو جيت ابجي شيغسلني هسه..

دحكت عليه متورط مثلي يمسح من وجهو ويكول احترك شيب الخلفج شيخلصني هسه. 

مشورب ومحمر ليش ربي ليش هاي تاليتها من وراج

-اني ادحك عليه وميته ضحك.. شفت كلينكس مبلل مسحت بي.. شو  مسح بساع.. كتلو هاك هذا يفيد وتوب مني مره لخ معليك بيه..

اني وهو كوه نحجي من الضحك ونعدل .. وهم كامو يدكون على موبايلو .. كتلو بايك موبايلي واني اكول مشتري جديد  حرامي اريد موبايلي  ..

هو ولا منتبهلي باقي يرتب بنفسو .. كملت كلشي بس ما حطيت ما اعرف بس كحل وخفت من الحمره لا هم اتورط..

هم حركو الجو عليه.. كمل قبلي وكال طالع .. ركضت قبلو قفلت الباب .. كتلو بس تطلع يعوفوني ... الا وياك..

تخصر ووكف كال يلا خلصي يولي تأخرنا .. واني اعدل بالحجاب .. تقرب هو واني درتلو بس تكضبني ما تلوم الا نفسك والله.. وهو يضحك بصوت عالي ..

دكو الباب حيل انخبصت وهو ما يرد يكلي كملي بساااع اريد اولي..

لفيتو و طلعت .. كال هيج بفستان ترحين عجل الجبه وين..

كتلو جوه..

-يلا عجل خل نلحك..

-نزلنا البيت كلو طالع بس الحجيه ونسوان كبار كاعدات..

-فتت للغرفه ادور جبه ماكو .. وهو يلا يلا .. اندرتلو ...خل اطلع هيج الله عليك والله مستور وما بي شي ..

ابتسم  .. وكال يلا بس فضيني العالم كلها ولت وانه منتظر مدام زقجه ..

اخذت ايدي بأيدو .. وطلعنا .. ولد عمو واكفين واحد زتلو البرنو .. جان صاح بيهم ديرو وجهوكم لا اطشركم بالله... حرمتي تريد تفوت

كلها ضحكت ودارت وجوها ونص السيارات رايحه.. واني صعدت وياه.. وهم يعيرون بي ..

هاي تاليتك ابو حرب .. نسوان بصدر سيارتك.

وهو يسوق ويكلهم ما تحليها الا نسوانها يابه ... يمشون ويدكون هورنات وبيهم اليرمي. 

وهو يسوق وكل شوي كرص خدي ويضحك .. ويكلي بعد هم تحطين حمره ولج..

هههههههه هو وراك تبقى حمره..

سبق ووصل لسيارات الكبار شفت هيام و بناتها وحلا واخلاص.. ملت راسي ولوحتلهم بيدي ..

هيام ضحكت وودتلي بوسه بالهوى .. وذن كالبات وجوهن.. وصلنا لبيت نور ..

لابسه فستان ابيض عادي  ما قابله افستان عرس.. دخل نائل عقدولهم والنسوان تركص..

گبل لا يطلعون اني طلعت .. وصلت للسياره .. وصراع يمي جان يرفع سلاحو ويرمي وكلها ترمي وياه..

بساع خطرت على بالي لما خذوني من الموصل وبنفس الوكفه هاي واكف ويرمي... كعدت بالسياره ..

ورغم صوت الرمي ..ورغم اني احبو بس ظليت ابجي لبشاعة الموقف التذكرتو وخليت اديه على اذني

ردت اصعد السياره .. جا الحجي كال روحي صعدي وي النسوان.. خل الزلم تصعد ويا  ابو حرب...

تركت السياره.. وبقيت ادحك يا سياره بيها هيام.. جا صراع حط ايدو وراي وكال امشي لخاطر ربج لا تبطنشين بالشارع كلها زلم ما ادحكين  ..

وصلني لسياره جبيره .. وكف وراي يسدلي ومدلي ايدو سندني حتى اصعد.. صعدت وسد الباب وراي

كلهن صاعدات..وهيام كاعده يمها خالة حلا.. ووين ما اكعد.تجي وحده تكلي عفيه هذا مكاني..

عاد علي كاعد ليكدام يم السايق .. كال حدري ليليان لا تظلين واكفه.. وخزرني لان السايق يدحك بمراية سيارتو..

كعدني ع الكرسي الصغير اليم الباب وضل واكف كبالي.. مشت السياره واني ادحك ناس تغني وناس تحجي..

شلت راسي العلي.. شفتو يدحك لبنت سعد العايشه عد خوالها  اسمها حنين وهي صدك حلوه... صحت احمممم..

-وسم

-بكلبك..

-لا خو بكلبج شبيج تحمحمين

-لا هيج على ناس طايره عيونها .. وادحك بغير عالم..

ضحك وكعد ع الدكه مال الباب كبالي وكال بربج شلونها..

-لك من درت وجهك عليه دارت وجههه علينا يمكن هي هم احمممم ...

-لا بربج صدك جاي ادحك..

-اي والرب بس لا ادير وتفضحنا.. جريت الموبايل من جيبو وسويت نفسي اصورو .. وصورتها اشلون ادحك بيه..

هو دحك الصوره غير طار من الفرح وصار لونو احمر وعرك .. يربي شكد حلوين ههههه

خله ومسح الصوره بساع.. كتلو ليش .. جان يكلي عيب ادحك ابصورتها .. حتى حرام

-لك انته صراع مخلفك وناسيك.. هههههه نضحك واشوف اخلاص تحجي وادحك عليه ما اعرف شتحجي .

المهم وصلنا للبيت .. وام سعد تبجي على ابنها و سونها مناحه هي وبناتها ع المرحوم..

والرياجيل الحديقه والكراج ترسوه.. صعدت بدلت كلابيه ونزلت للمطبخ كلعاده خدمة بنگلادش ابلاش ..

بت سعد وكفت وي امها بالمطبخ ساعدتنا .. وعلي رايح راد للمطبخ عود يخدمنا ويودي ويجيب

الجهال من تفوت تفتح الباب وتتركو مفتوح.. علي جا ولكا الباب مفتوح واني و حنين  بت سعد نغسل

لو هذا تخبل كام يغلط ويكول الا تكفرني زلم ماليه البيت قفلنننننننن الباب .. ويخز بحنين هاي بساع قفلت وتصنمت يمي

ضحكت .. كتلها الظاهر حالج من حالي ..

-يعني شنو

-يعني حيطيح حظج من وراه تره هذا بلوه مثل خالو

- خجلت ودنكت وتكلي انه احب عمو صراع اموت عليه

-همممم وصلت ..

شويه وسمعنا الزلم ركصت جوبي.. فتحنا الشباك وضلينا اندحك .. وهذا علاوي الططوه واكف كبالنا ..

خرررب دنطيني خاشوكه خل اطر راسو بيها .. دحك عليه وخزرني .. وصاح سدي الشبااااااج..

اوووف ما كافي كلها صاعده فوك ادحك وبس احنه كاعدين نشتغل وفوكاها جانا هذا المصروع الجديد..

حنين طلعت مني وهم صعدت فوك بقيت بس اني ونوال تروح و تجي..

كفو العشا وخلصنا هوستو وهم زين سفري مو مواعين بس كل هذا وما نفتك السنك تكول مكبره ما يفرغ ..

كملو وطبو جوه وناس طلعت.. صراع دخل من باب المطبخ..  دحك بيا كال هاا تعبتي ..

دا اريد احجي طبت هيام.. كالتلو ابو حرب عندي موضوع وياك..

-خير

-خالة حلا ام وسام.. هم فتحت الموضوع وياي على سالفة حلا ...وكتلك كبل اسبوعين وما رديت جواب

-ام علي مو وكتها سدي الموضوع..

-شعدنا مو وكتها يا خويه كم مره ام وسام تخابرني .. دتعال خل نحجي

-ام علي كليلهم ما عندي بت للزواج وسدي السالفه رحمه لاهلج تعبان

-خويه كل ما فتحت السالفه تكلي تعبان.. بس تعال اكعد.. ترفض ليش البنيه لا طالبه ولا عدها شي توگف قسمتها ليش شعندك امبقيها ومتحمل مشاكلها زوجها

-شهلحجي ام علي بتي هاي شنو مشاكل شنو ازوجها بعدها صغيره تكبر والله كريم..

-خويه البكدها تزوجن هاي ليليان اصغر منها ..

-وتقيسين بليليان يا ام علي ما مشيبه كلشي ما تفتهم..

-صفنت بوجهه هاي عليه 😨

- خويه لا اول وحده ولا اخر البكدها هواي يتزوجن وكضبن بيوت .. دمشيها يا ابو حرب

-ان شاءالله خويه ان شاءالله

-يعني  اخابرها باجر انطيها موافقه

-لا كليلها صراع ما عندو بنيه للزواج

-يا ابو حرب متكلي زتالي تره ما زين لكل داك بابها وخاطب تكول لا

-عافها ومشى ..

-بالله هذا شتحجي وياه..

ليليان:- يمكن تعبان تركي هسه

-ولج خبلني بكل وقت ينهي الموضوع ويصيح تعبان ويكول لا ويمشي

الولد ما غريب .. وهي رايدتو .. وعد خالتها ما بعيده عليش يرفض بعد..

-تركتني وطلعت.. فضينا البيت .. و رحت لغرفة الحجيه .. هيام راحت وكالت للحجيه الظهر اجي ولازم اخذ رد من ابنج احجي وياه. 

وطلعت.. صراع من سمع بهذا الموضوع كاللهم تعبان وطنش وصعد نام.. وحلا تفتر وتتسمع على كل سالفه بهلخصوص .

ثاني يوم كملت تنظيف جان تنزل حلا.. وحجت وياي

-ليليان احجي وياج شويه

-بشنو تحجين..

-اخذتني فوك.. للغرفه وكعدت وياي وحجتلي على وسام وعود هي تحبو ويريد يخطبها وابوها رافض وتريدني اقشمره واتقربلو واحجي وياه بلكن يقبل..

كتلها اشوف..

بقت تتوسل وتتلوك واول مره احسها طيبه من تحجي.. خلصت نزلت منها واني متردده احجي وياه

لان اعرفو ما ياخذ كلام من احد.. صوتو براسو..

جا الظهر من الدوام هيام موجوده والحجيه هو فد واحد يقره الوجوه وما تعبر علي بساع عرف عدهم سالفه  

بس فتح الباب وكال ها اللله يساعدهم.. كالولو هلا بيك..  رادت هيام تحجي اول ما كالتلو ابو حرب

قاطعها وهو يكول ليليان صعدي برديلي الغرفه و حظريلي الحمام ..روحي طالعه ومالي خلك تعبان اريد ارتاح..

بسمار الهن ان ما اريد مناقشه ما بيه حيل اثنينهن سكتن هيام والحجيه..

صعدت كبالو شغلت المكيف و طلعت منشفه.. نزع ملابسو درت منو .. اتقرب مني ...

باسني يم اذني وهمسلي.. لا تنزلين  اسبح واجي

-  هزيت راسي .. نزلت بسرعه صبيتلو الاكل وصعدتو .. لكيتو يصلي تركتو بالكاع..

كمل واجه تمدد ع التخت وكال حدري...نمت بحظنو.. صرااع

-عيونو

-ليش تتهرب

-عقد حواجبو .. من شنو ؟

-ليش ما تريد بتك تتزوج ..

-مو كد زواج والولد ما اثق بي ..

-شعرفت عنو

-ما ارتاحلو

-بس هي تريدو

-هي حاجيه وياج وكايلتلج تحجين وياي

-اي ..

-ههههههه باس كصتي .. ليليان اريد منج حاجه..

-وهي ..

-دك موبايلو ..

لحظه

-فتح خط وحجه .. وكاعد.كبالي ومكيف مشتغل وباااارده حيل صارت مو مال مكيف الجو بس هو يشغل ..

تغطيت بالبطانيه .. اتاني واتاني يجي وهو بعدو يحجي وي واحد بالدوام.. اخر شي غفيت   

حسيت عليه وهو ينام وراي رفع راسي ومد ايدو  .. بقى يبوس بكتفي وبركبتي .. طار النوم من عيني..

نفسو تعالى وصارو وضعو  وحركاتو ما اعرف اشلونها يصعب شرحها.. بس حيل تضايقت منها

شوي و كن ايدو تمشي على بداية رجلي ويريد يبعد ثوبي

فزيت بساع وكعدت.. شرايد

-سلامتج..

-كمت وين وين

-ما اريد ابقى يمك..

-يولي نامي ما احاجيج 

-دا انزل من السرير وكال

- رجعي ..

-ما اريد

-مو على كيفج.. كلت رجعي

-ما رديت ردت اطلع  

-ليليان لا تعاندين وكتلج ما اذيج..

-عفتو وطلعت  

-نزلت هيام جوه كعدت يمهن.. نص ساعه ونزل هو الحواجب معقوده الوجه مكلوب الشرار تطلع من عيونو ..

كعد وداير وجهو مني .. هيام رادت تحجي شافتو هذا حاله سكتت.  بس الحجيه فتحت الموضوع وياه ..

وهو استغلها فرصه كام يغلط ويسب وما ازوج واليفتح وياي الموضوع يحسب الله ما خلقو وضل يكسر ويدفر

طلب مني مي... رحت اجيبلو .. وهو يصرخ وييييينج ويحجي وي امو ويتكاون على الموضوع وهيام والحجيه يحجون..

ما كفن منو بقن يحجن وياه ويكللو هذا ما وضع كل ما نحجي تعصب وتقلب الموضوع

...واني ادور على ماي بارد.ماكو بس حار.. وهو يصيح انخبصت جبتلو حار ..

هو شرب وعرفو حار .. طر الكلاص بالحايط ونزل سب وغلط وصياح وثوله وما بيج خير ونعال ما تسوين ووووووو

كل هذا بس لاني ما قبلت ابقى يمو .. هو ما يستحي .. اني اشنو ذنبي ..... يتبع

☆☆☆☆☆☆

#زينب_ماجد#مراهقة_و_الأربعيني

،،،،،،،، بقلم زينب ماجد ،،،،،،،،

الحلقة_34

بسبب حياتي السابقه اللي كانت مغلقه وما اطلع بيها غير على الافلام المصريه اللي اشوفها بالختله من امي..

وكنت اشوف القبل بين الفنانين .. كل اعتقادي هذا الشي اللي يصير بين اثنين متزوجين..

عمري مفكرت بعد هلشي شنو ممكن يصير.. كان اجرئ شي ممكن يفكر بي عقلي ان المره تخلع كدام زوجها ..

هذا اللي كان مستوعبو عقلي.. ومحد مستوعب ان اني ما  مستوعبه غير هذا الشي..

الكل كان يعتقد ان اني افهم.. لان بجيلنا نادرا ما يلكون وحده ما تفهم واذا ما فهمت يكولون عليها جذابه او عياره ..

وكلشي تعرف بس تثول نفسها.. لكن والرب هذه كانت الفكره.. عمري مسألت ولا تعمقت بهلامور لان عشت ابيت ما يحجي بهيج شي ابدا..

عيبببببب مستحيل نطرق لهيج شي .. يحيى شكد كان يغلط بس عمري ما سمعتو يفشر بكلام قبيح..

صديقات ..ماما كانت تمنعني اخالط..

وبابا كان فقير عمري مشفتو يتغزل بماما او يبوسها او او او ... كنت اعتقد هذا الشي هو اكبر شي ان يصير بين المره والرجال.. ولازم ما كدام الناس عيب..

بس لهنا وانتهى مدى تفكيري ..

لا صراع ولا اهلو ولا اي احد كان يعرف ان هذا عقلي واني ما اعرف حتى اطلب احد يعلمني..

اهلو ما عدهم عاده يدخلون بهيج شيء ابدا.. اما صراع فكان معتقد ان اني اخاف او استحي او بعدني صغيره واتعزز ..

فكان شوي يلين وياي و يعصب .. كنت حيل اتضايق منو من يعصب لان بعتقادي كل اللي اكدر علي دا اسوي فقط استحي احد يشوفني

هذه كانت اهم نقطة غباء بحياتي .. لاني ما كنت افهم.. ومحد يكول ما تفهم البنت مذنبه بكل شيء والرجل لا غبار عليه..

الكل كان يطالبني بحقوق .. لكن محد فهمني او فهم عقليتي وحاول يتوصللها..

.....بيومها كسر الكلاص وكام يغلط ومعصب .. وطلع بدل وراح.. ما جا غير بليل .. دحكني فارشه جوه..

صفن.. هز ايدو ترك علاكة الحلويات وطلع..

تركتو ما حجيت وياه.. يريدلو حجه حتى يعصب شسويلو .. لثاني يوم الصبح ساعه 7 طلعت حظرتو الاكل..

نزل هو بملابسو العسكريه السود.. دحكني واكفه اجهزلو.. جر الكرسي وكعد بدون ان يصبح بعدو مطنكر..

فتحت باب المطبخ.. وطلعت للحديقه .. صاح يوليييي .. رجعت هااا

-وين طالعه

-للحديقه اشم هوى

-كعدي تريكي

-ما اريد

-والله فوكها انتي الزعلانه

-درت وجهي عنو

-مو احجي وياج

-سألت حتى ارد.. شحجي

-بعد.بعد صيحي لميهم

-تره بشر احنه مثلك.. من تغلط وتسب نتضايق .. ما تقبل احد.يسب ابوك وهو هيانو جوه.. وانت ليل نهار تسب بأبويه وهو ميت.. وتريد عادي اتقبلها واني الممنونه والله ليش.. لان اني بنيه وانت رجال مووو

-هز راسو .. وكام.. حط الموبايل ع الطبله وكال:- هذا موبايلج  انه طالع .. عود ادعيلي اتفجر وتخلصين مني ومن همجيتي ..

-الله وياك.. جاي يمشي من حجيت دار وجهو عليه .  حجه ...ادب سز وطلع..

هزيت ايدي كلنا ما عدنا ادب .. بس الك عفنا الادب والمستحى ..

اخذت الموبايل ودخلت جوه كمت ادحك بيه.. لحد.ما كعدو فضينا هوسة الصبح.. كملت وصعدت بغرفة نور

كضبت الها الجهال اثنينهم يردون رضاعه ومن يبجون يثولوها ف اخذ واحد. ارضعو ممه والثاني هي ترضعو..

دحكت بالغرفه.. اكلج نور انتي ونائل عادي

-يعني شنو عادي .

-يعني زوج وزوجه  

-لا .. بس ورق هو هينا ينام ع القنفه واني ع السرير ..التوم يمي لو بسريرهم.. من انزل جوه ينام ع السرير ..

-نائل طيب خوش ولد

-كلهم ولدنا طيبين ابو حرب هم ما قاصر معدل ..

-بس عصبي وما ينفهم 

-كلهم اعصاب يولي منو البيهم ما اعصاب

-مو مثل صراع

-اي صراع اكثر منهم بس تره شايل گلب ريت الناس كلها مثلو يمعوده..

-اي جان طاح حظ العالم..

-هههههه يولي يحبج والله مبين بس انتي هم شوي بحبحيها وياه. 

-شسوي

-شنو شتسوين غرفتج فوك وانتي تاركتو ونايمه جوه

-غرفتيش يمعوده وكت اليحبني غرفتي ووكت اليعصب طلعي برا وارجع جوه   عليمن خليني جوه احسن وكت اللي يريدني يصيحلي ما طايره..

-والى متى هيج تبقون

-اني شعلي غير هو

-لا شنو شعليج .. صعدي ملابسج وحطيها فوك بغرفتو وشوفي شلون يطردج بعد.. انتي المخليه يروحج خطار عندو

-يمعوده اروح ازت بروحي عليه كوه .. ما اريد..

-بكيفكم هاي حياتكم بعد الله يوفقكم ويصلحكم 

نزلت منها كملنا شغل الظهر وردت اصعد اشر الملابس.. دشداديشو اكثر الاوكات ما يحب انشفها تنغسل وتنشر بدون تنشيف والشمس حاره بساع تنشف  

فطلعت سطلة الملابس للسطح وبقيت اشر وشمس حاره وهن كلهن مي تنكعت وعركت بنفس الوقت..

كملت شلت السطله ونزلت من السطح.. دحكت صراع جاي من دوامو ودا يمشي لغرفتو.. شافني .. صاح

-ليليااان

-اندرتلو هااا. 

-حدري هينا

-مشيت يمو.. فتح باب الغرفه ودخل بمعنى فوتي وسدي الباب..

دخلت .. كام ينزع بملابسو العسكريه.. وكال ابقي هينا اسبح واجي ..

-عندي شغل جوه

-سمعتي شگلت

-واني هم كلت عندي شغل

-ما عندج شغل غيري افتهمتي

-اريد انزل

-يولي تعاندين انتي لو شنو

-شرايد..

-تفهمين شرايد..

-ما بالغصب .. اني اريد انزل احظرلك الاكل

-متسمم ما اريد.. جرني من ايدي ودفعني للسرير كعدني.. كعدي هينا كتلج

-اكلك تره مو على كيفك وكت اللي تريدني تسب اهلي وكت اللي تهدأ لازم اهدئ وانسى كولشي وكأن ما صار ..

-والمطلوب

-المطلوب تعتذر عن السب والغلط اللي غلطتو .. بس على مي حار جبتلك گلبت الدنيا وحركت اهلي وهسه هادي وتريد نفتح صفحه ما اريد...

-هااااه وتردين انه اعتذرلج

-اي وتوعدني ما تعيدها..

-هههييي .. لج مو انتي التعلميني وتكليلي اعتذر واطلب السماح من وحده سز مثلج

-عجل خل انزل

-كلت كعدي

-ما اكعد.. هميت اريد اروح وهو كضبني من شعري

-ناويتها على شر انتي مو

-انته لا تحبني ولا شي تجذب عليه بهلكلام تريدني بس وقت الاجي ابالك .. لو صدك تحبني ما تأذيني وخر مني

-انه جذاب طلعت

-دوخر دفعتو حيل جر و دفعني وكام يحاول وياي .  ادفع بيه اريدو يوخر ماكو كتلو والله اصرخ والم الناس عليك

حط وجهو بوجهي ويحاولةيسكتني واني ادفع واضرب واريد اكوم.. اخر شي من قلة حيلتي .. عضيتو باطراف اسناني من يم اذنو خليت الدم يجري منو ..

رفع ايدو ضربني راشدي دفعتو مني ودفرتو برجلي وكمت بساع.. ردت اوصل الباب ويكلي تضربين يولي لا ما اعلمج..

راد يجرني اني جلبت بالباب.. فتحتو وردت اصرخ.. حط ايدو.. حس اكو واحد بالممر .. سد الباب وتركني ..

عوفني ما اريدك والله ما اريدك اصلا صارت تلعب نفسي منك.. انت ما تحس ..

هو يمسح الدم من ركبتو ويتنفس ويهز راسو بس عيونو حمر والغضب باين بوجهو ..

مشى وحدر يمي اني بساع رفعت اديه فوك راسي وغمضت عرفت راح يضربني..

جر ايدي وطرني بالكاع وكال طلعي برااااا .. وتحلمين بعد ادحك بوجهج والا اعلمج..

لا ما كسرت خشمج وعلمتج الله حك واجيبلج مره هينا ادللها وتذلج واعيشج خدامه والله .. وبعدها خل تلعب نفسج مني براحتج   بس صبري علي..

طلعي برا .. كوووومي طلعي برااااااااا..

كمت بسرعه طلعت برا .. وكعدت بالحمام ابجي .. جا دك الباب .. ما رديت.. ضرب الباب منو هينااااااا ..

فتحتو وما دحكت بوجهو طلعت بسرعه هو فات وصفك الباب وراه.. نزلت للغرفه اخذت ملابس الي.. الحجيه تعدلت..

-شبي صراع

-هو ابنج مصروع من يومو

--من قهرو يول احترمي نفسج    ما كافي عليه الوضع الخطر بالانبار وتهديد الموت على العساكر انتي تزيديها فوكو ..

-لا تخافين عليه كلشي ما يصير بيه

-يولي كضبي السانج ولا تتجاوزين عليه لا بالقران اتصرف وياج بالمايعجبج   احترميي

-اخذت ملابس وسديت الكنتور حيل وطلعت منها.  رحت للحمام. بقيت ابجي لحد ما تعبت..

كملت وطلعت .. سعد جاي ينقل بغرفتو وصوت عالي .. ونوال ودعتنا قبل يوم وراحت للبيت وهو بقى بس ينقل بالغراض..

دخلت للمطبخ.. فتحت التليفون وجنت اتلهى اطبخ.. اسةي اكلات حلويات. اطلع من الموبايل واطبق بيهن الينجحن وبيهن اليفشلن واشمرهن..

والمواد اخذ فلوسها من عمتي ما تحجي شي تحب اتعلم واصير ام بيت..

بس هي فرحت لما جت نور للبيت ورجعت ويانا تسميها خفيفة الشمايل .. وفعلا نور كانت خفيفه

بلحظه ادور تلكاها كافه كلشي عشا وبيت وغاسله.  هي هم ضعيفه وحركتها سريعه ..

ما توكف تخلي اكل ع النار وتروح تمسح وترجع تكلب وترد تكمل تنظيف يعني من اطفي الطباخ شغلها كلو خلصان لان ما توكف ولا تصفن تستغل الوقت وتخلص بساع وتصعد للتوم مالتها  

ما مثلي حاجه حاجه اخلص .. ما اعرف انخبص..

ف وكفت اسوي داطلي واتلهى بيه وانسى . نزلت نور هي والتوم كعدت بالمطبخ يمي وتسولف وتلعب بالتوم واطعمهم..

طلعت ام سعد.. شو دحكت بوجهي .. وتكلي هو بس هذا الفالحه بي .. بلا اصل جابوها من الموصل ما نعرف گرعة ابوها منين..

اندرت على نور..تهز براسها عود مشيها ولا تهتمين.. طلعت كتلها شتقصد هي على شنو تغلط..

-ابو حرب ما يكعد راحه اذا ما يطكع وجهج وهاي يمكن طاكها الجفاف هليام هلطلع الحركه بيج

-عجل مو عدها رجال .. اني شكو مخليه راسها وياي وحاسدتني عليه وهو شلونو فدوه الله ..

-يول رجال بي سكر خلصانه روحها وهاي تصغر بنفسها .. جانت مشيبتني من جنت وي عابد.. والله مطلعه روحي لله ..

من انزل اسبح الصبح يبوووه حتى الحمام تهجمو عليه وعابد جان ما يحجي يصف وياها..

-كبر غير زوجتو ليش ما يدافع..

-الله يرحمو حملت وياه ضيم ما ينحمل غير النسوان اللي يلعب عليهن ويطلع وياهن  

-مو سووه علينا قديس .  الا شوي كلت يسوع ماكو منو من كد ما مدحو بيه وهو مسكط .

- الله يرحمو يمعوده اذكرو محاسن موتاكم.. جان الفلس حصره عليه كلو بيد ام سعد.. ويقطر علي تقطر..

يستلم ابو حرب راتبو خطيه  يوزعلي حالي من حال هيام و حلا ويكلي صبري خويه هذا رجلج شتسوين لابد يوم ينعدل بعدو طايش..

وهسه اجيت اول يوم عد نائل انطاني مفاتيح الخزنه مالتو وكال ديري بالج عليهن ومخوله شكد ما تحتاجين انتي والتوم حلالج  

عود هذا لا حاسبني مره ولا رايدني.  يمكن الله رحمني وغير حياتي من جحيم عابد.

...دنحجي و رجعت فاتت ام سعد.وتغلط وتحجي وبلا حيا وساقطه ونغله وهيج من ابوج يل ما تستحين وهيج من اخوج يلعرمه..

عاد درتلها كتلها وانتي شكو خاله تره ما جايه من الشارع رجلي هو على شنو حاميه حمامج..

اني كلت هيج ونزلت عليه افشار ونور وكفت بنصنا .. كتلها احترمي نفسج احسنلج عيب عليج تحجين هيج..

شو زادت بالاكثر وصياحها زاد وانه الما استحي وانتي اتعلميني العيب.. اليوم لا ما اربيج اليوم واليوم..

جت عمتي تصيح واتفزع بينا وهي تصرخ.. فات الحجي وهي كامت تبجي وتحجي وتكلهم تالي عمري هاي الما نعرف اصلها منين تهين شيباتي  

عمي هم نزل غلط وصياح عليه وكال ينزل زلمتج و يتفاهم وياج انتي الضاهر ما تستحين وما الج رداد..

عمتي تهدي بيهم تعرف صراع عصبي اليوم تريدو يسكت اخذتهم للهول تسكتهم وام سعد تكول يا انا يا هاي المصلاويه اليوم بالبيت. 

اني تركتهم وبقيت بالمطبخ اكمل ويلفتي واكفه يمي وتكول ما كتلج اتركيها ليش تندكين بيها .. هسه تسويلج مصيبه..

شوي ونزل صراع.. وسمعت اصواتهم علت.. صاح ليليااااان.. كتلها نور كملي دا اشوف شيريد انوبه

نزلت ارداناتي ومشيت.. هو كاعد ومبدل وكاشخ ولاف غترتو وما هامو اكبر واحد..

كال... حدري .. يحجي بهدوء بس اعرف غضبو بداخلو .. ادحك بام سعد تبجي وتمسح بشيلتها..

وعمي حارگ الجو شلون متحاجيه وي مرتو يخاف تصير مثل ذيج وام سعد تنطرد فكام يدافع بقوه وطلعني من الكلجيه  

صراع:- شحاجيه وي ام سعد..

-ما حاجيه شي والله كل ما انزل تغلط وتفشر عليه وتكلي ما فالحه بس بالقلة الحيا وكلام يسم البدن عيب احجي..

الصعدت يمك والنزلت هي ما الها علاقه .. ابويه شعلي وتسبو.. تسب وتغلط وتتحجج عليه بالكلمه

الحجي:- مو هي عدوتج وتتحجج كلبه احترمي نفسج. 

صراع:- بوسي راسها بساع

-ابوس راسها واعتذر تمام ما عندي شي وياها بس قبل هاي  حجيها والسب مالها يوميه عليه وعلى ابويه شلووون

يعني اني حجيتلكم الموقف كلو ليش ما تحاسبوها شنو ذنبي من اجيت لليوم ما اسمع منها حجايه حلوه. 

-دحكي يولي  تنزلين تبوسين راسها ورجلج فوك راسج وكلمه زايده بالقران انهيج..

-دنكت بست راسها وكتلها حقج عليه خاله اعتذر.. بست راس الحجي هم.. ووكفت كبالو ..

وكتلو تأمر بشي بعد عمو .. وتعمدت اكلو كلمة عمو اليضوج منها اللي تحسسو شكد اني صغير وهو جبير بعمرو ..

فرك ايدو وكال انگلعي من وجهي.. عفتو ومشيت دخلت المطبخ دموعي وحده وره اللخ ..

خلصنا العشا وصبينا وفتت جوه .. جت سلفتي نور .. كعدت يمي وحط ايدها على رجلي

-خايبه كومي اكلي هي تهين وتصيح وانتي حارمه روحج من الاكل عليها .. تسوى .. دكومي لا تخليها تأثر عليج وتستشفي بدموعج  

لخاطري كومي حبيبه وغثيها بضحكتج وكأن ما مهتمتلهم.. مسحت دموعي وكالت يلا كومي

... حسيت كلامها صدك وقنعتني هاي اذا شافتني حزنانه تستقوي عود اني اعتذرت منها..

كمت وياها.  بس ما اشتهيت اكلهم بليل .. صبيت كلاص جاي وسويت لفة جبن واجيت كعدت وياهم واخذت الريموت اگلب. 

حرب رادو افلام كارتون بقيتو.. توني اريد اكل.. اندار عليه صراع.. محفظتي و الموبايل بالحمام كومي جيبيهم..

كمت رحت جبتهم وانطيتهم الو.. كعدت ..

-هذا الموبايل ما بي شحن .. كومي شحني بساااع

-اخذت نفس.. وگمت .. موبايل الحجي ع الشحن.. شلتو وحطيت موبايلو..

رجعت..

-وينو شو ما دحكتج صعدتي حطيتي

-خليتو على شاحنة الحجي لبين ما اخلص عشا

-كومي صعدي خلي على شاحنتي بسرعه

-اي بس اكمل عشا

-تاكلين سم كلت صعدي

-اختنكت حيل وهم كلهم يدحكون حتى فشلت منهم.. صعدت حطيتو على شاحنتو .. شفت الشحن مالتو 95 .. عرفتو عيخبث وياي

نزلت .. كعدت.. كال كومي صبيلي جاي.. كرهني نفسي لان يصخرني لما اكعد ما يحجي واني واكفه. 

الحجيه:- يمه خلها تاكل البنيه شجالك شليت حالها..

نور:- انه اصبلك كعدي حبيبه

صراع:- كعدي نور.. .. ادارلي.. شحجيت .. 

-گمت صبيتلو جاي وانطيتو .. واندرت مشيت لغرفة الحجيه.. صاح وييييين

-اريد انام..

-كعدي تعشي

-ما اريد...

-اشو تكعدين وتكملين عشاج كلو واذا ما نفذتي اعرف اشلون اتصرف وياج..

الحجيه:- يمه سممتها يا عشا هاذ

-سهمج الراحه يمه لا تدخلين. 

-كعدت.. كوه اتجرع الجاي حسيتو مثل السم لو باقيه وما طالعه وياهم ولا هذله...

ما اسمعهم شيحجون بس عيوني احس احتركت اريد ابجي وما اكد والعبره خنكت بلعومي.

ما اعرف شيحجون وهو كال:- والله هو هيج ينراد.. حرميتين تخليهن بالبيت وانت الملك .. يتسابقن عليك وهن الممنونات. 

اندارلو عمي وضحك ويكلو ها ابو حرب تريد تتزوج.. جاوبو وشكو بيها الله حلل 4..

سمعتو هيج كمت بسرعه من الاكل وفتت بغرفة الحجيه .. حطيت راسي ع المخده وكمت ابجي بحركه..

حسيت حيل هاني كدامهم ومتعمد.. شويه وفاتت الحجيه.. صاحت ليليااان ما گمت ..

كعدتني غصب عني وكعدت كبالي:- شصاير بينكم يولي و ابو حرب يهدد بزواج ثاني 

-ما صاير شي ..

-لا والله صاير كولي ولج ابني واعرفو لا هدد وحط براسو ينفذ .. وتخسرين كلشي يخايبه احجي  

-على اساس هسه اني شرابحه هااا شو بس بس الذل شفتو عندو

-شردين تربحين  كاس لو تاخذين جايزه.. رجال يحبج ويقدرج ويخاف عليج   والف وحده تتمنى مثلو ومثل عيشتج. 

طاكج الجوع.. مدور وراج شمسوي وتكولين شمحصله هي التتزوج شتريد تحصل يعيني يجومها ويخدمها

المسلسلات والافلام لا تخليهن يأثرن على عقلج يمه .. الموصل كايمه كاعده واهلج ما نعرف مصيرهم وين ترحين هااا..

شيلي فراشج بساع وصعدي بغرفتج يلا

-ما بكيفج انتي غبيه وجاي تخسرين كلشي بغبائج لا تخليني استخدم وياج الگوه كومي يلا

-ما اكوم شنو اطرديني

-اي اشو اطردج يلا بساع كومي تنامين بغرفة زلمتج ولو فتت بليل ولكيتج لابسه هدوم البيت ونايمه عذا الله كتبو عليج يا ليليان. 

اصعدين مثل النسوان تغسلين وتتعدلين وتنامين بفراشج وتنتظرين لا تعتذرين منو بس ابقي بغرفتج ولا تسمحيلو يمليها بغيرج. 

يلا يلا بساااع كومي

-حجيه الله عليج عوفيني والله ما الي خلك. 

-كلت صعدي وفوك ابجي براحتج انه راسي يوجعني ما بيه هوسة البجي مالج  

-حجت هيج.. كمت بساع وكتلها ما اكول بس الله ياخذ روحي واخلص منكم ومن حكمكم

طلعت من الغرفه ابجي.. صعدت.. فتت للغرفه.  هو واكف يدحك بالموبايل 

-شرايده

-ما حاجيتو ..

-مو احجي وياج

-طلعت فراش من الخانه وجاي افرش كضب ايدي ..

-اكفي اكفي .. منو سمحلج تجين هينا .. برا يلا

-وخر ايدك .. نكثت ايدو من ايدي..

-دحكي لج .. لا تخليني اكسر راسج والله طلعي منا

-ويييييييين ارووووووح اكتل روحيييييي انته تطررررد وامك تطرررررد .. وين امشييييي

-لا تصرخين لا انعل اهلج والله

-لا تنعلني ولا انعلك.. اتركني .. احرك روحي واروح يم ابويه هواي ارحملي. 

عفتو ومشيت بسرعه جرني .. لا تتخبلين كعدي..

وخرررر مني..

كضبني بثنين اديه ودفعني للتخت وطلع وقفل الباب.. عدلت الفراش وكعدت ابجي بجي لحد ما تعبت ونمت واني اشهك..

حسيت بي يحط شي يم راسي و زت الغطا فوكي..

شميت ريحة اكل.. لكيتو جايب لحم بعجين ومخلي يم راسي.. اندرت وما اكلت و كملت نومي..

كعدت الصبح وهو يبدل يطلع للدوام.. ما رديت ولا اندرتلو .. بقيت متمدده بفراشي

طلع.. وره شويه سمعت سيارتو طلعت الكراج وانسد الباب كمت نزلت.. نور كاعده .. بقت تحجي وياي وتهديني وتصبر بيه...

شوي تغيرت نفسيتي .. اجه الظهر هو .. سويتلو غدا وصعدتو.. ما يحجي وياي ولا اكل .. داير وجهو عني. 

ما اهتميت كلت براحتو.. تمددت بفراشي ع الموبايل.. وهو بتختو هم يدحك بالموبايل..

شوي وكام بدل وتعطر وتخشخ وطلع  .. اني هم تركت الموبايل وگمت سمعت ابن نور يبجي  

رحت يمها مفرفح .. تريدو ياخذ الحليب صدرها ما يقبل بس يبجي.. الحجي وصراع و نائل ماكو. 

ام سعد رايحه لبتها من الصبح بس عمتي بالبيت وهي مريضه رجليها ما تعينها تمشي وتاخذو..

عاد كالتلها يمه انتي تندلين السوك.. والدكتور بصف السوك.. اخذي حلا وروحي شوفي الوليد شبي واتركي احمد يمي..

صعدت لحلا نايمه ما تقبل تكعد سهرانه بليل وهي اصلا حيل تضايقت من ابوها رفضت اعتكفت بغرفتها. 

عاد كالتلي ليليان كومي وياي ..

-ما عندي شي بس صراع خاف ما يقبل اطلع

-ما يكول شي والله دامج وياي ومضطرين اطلع وحدي صعبه والشارع كلو رياجيل انه وياج ثنين نسوان محد الو دخل بينا. 

انداريت على عمتي .. كالت خبري رجلج واخذي شورو وطلعي لا اطلعين بدون حسو..

خابرتو .. اول مره ما رد.. ثاني مره انطاني مشغول .. كل عقلو اتوسلو لو اريد ادلل عليه بالموبايل

عاد كمت لبست الجبه و الحجاب وكلت للحجيه من يجي كوليلو.. 

اني مجمعه مصرفي من صراع يم الحجيه اخذت منها فلوس وطلعت وي سلفتي .  رحنا حجزنا عد الدكتور ونزلنا السوك..

اشتريت كلشي احبو .. علبة مكياج صغير ودشاديش صيفيه و وسوارات وهلسوالف والحجيه اخذت الها قطعة قماش وحلا ملفع.

رحنا للدكتور بعدو ما واصل سرانا. موبايلي بالبيت و نور شحنها صفر.  وجا المغرب حتى رجعتنا صعبت  

بألف يا الله فتنا وانطانا وصفة العلاج وطلعنا كالت بعد ما الحك اشتري علاج انطي النائل وهو يجيب خل نرجع. 

وكفنا تكسي ومشينا .  بس هذا ابو التكسي لزكه استلمنا اسئله انتو من يا عمام دليم جبور .. ويدحك..

نور ما ردت ولا اني رديتو.. بقى بس يحجي وحدو.  دخلنا الفرع وكلنالو ذاك البيت.  شو كال هاااه انتو من بيت ابو حرب .. ابو حرب شيقربكم..

نور:- عزه العزاني انوبه طلع يعرفنه 

وصلنا الباب ننطي كروه وما ياخذ ويكول مو عيب اخذ من اهل ابو حرب.. عاد نور زتت الكروه ع الكشن ونزلنا

دنزل الغراض. دحكنا نائل شايل احمد ديفتر بالفرع  وصراع طلع من البيت   .

كال دخلن جوه نحنه انزل الغراض وراح سلم على السايق ووكفو وياه

طبينا الحجي تلكتنا وين صرتن متكللي الولد فرفح من البجي .. اجه صارع لكاه يبجي خبص الامه وطلع بي يسكتو واجه الحجي يريد يسكتو وما يقبل

عاد نائل جا واخذو يفرفرو بالفرع حتى يسكت..

نور:- عمه والله ازدحام كوه طلعنا من الدكتور حتى علاج ما لحكت اجيب.. هي حجت وفات نائل

كضبها رزايل ودحتي بالسوك ما فكرتي ابنج فرفح گلبو وجهازجن طافي و ما تحسن وووووو صف وعد ..

خطيه هي ما ردتو ابد.. بس وجهه صار احمر.. كعدت نزلت حجابها وطلعت صدرها وكامت ترضع بأبنها ومدنكه..

ونائل اعصابو تفور عاد كعدتو الحجبه وكالتو ما تعرف الدكاتره قابل بيدها غير الوليد مريض. 

شرب مي بس بعدو يزت بالكلام ويرزل ..

شوي وفات المجنون مالي ..

اول شي استلم نور طلعتي ما كلتي ابنج وجهازج مغلق وما مهتمات لاحد..

عاد كتلو .. ما هيج والله هي خطيه جهازها طفى واني تاركتو بالبيت..

هو واكف واديه وره وكاضب سبحتو .  اندارلي وكال انتي احسابج يمي ما ناسي يولي ..

شلون اطلعين بلا علمي.. كوا..... كاعد هينا انه. 

-دحك جهازك دكيت عليك مرتين وما ترد شسوي

-ومن ما ارد تنجبين وتكعدين اطلعييين بلا علمي شنوووو مو بعينج احد انتي . 

-ما طالعه اتونس الطفل مريض وكعدت تتوسل ابتك معتكفه بغرفتها وامك مريضه وما تكدر تطلع وحدها ونخابر عليكم محد يرد.. شنسوي

... الحجيه كامت تهدي بيه.. عاد كال اي وانتن عفتن سيارات الدنيا كلها وصعدتن وي هذا  المسقط .

اكيييد كعد يسأل ويدحك وانتي بلا خجل كلتيلو انه مرت ابو حرب وصخمتي وجهي .. وكام يصيح

-ما كتلو وبعدين اعذرنا ما ندري بيه صاحبك ساقط ونصعد وياه لو نعرفو صاحبك حتى ما نصعد..

شو جاوبتو وهذا هد ويكول وتجاوبين ولج تراددين بوجهيييي اليوم لا ما اربيج ساااااقطه ..

وكفو  نائل والحجي يفزع بينا وهو يصرخ ويغلط ويسب .. دفعو نائل للاستقبال وسدو الباب وصوتهم طالع..

والحجيه تخزر وتكلي كتلتيني بلسان اخخخخ لو اكصو ونرتاح ولج مو هاي وياج شكد حجه وسأل ورزل ردت لو بس انتي اتجاوبي على كل اسألتو

ما تعرفين تنلصمين ما تعرفين تكصين السانج وتسكتين رجال مشورب واكفه بعينو وتجاوبين وتراددين شنوو..

عاد عفتها ونور كامت للمطبخ واني رحت وياها .. عاد كالت حبيبه مسحيها بوجهي ترزلتي من وراي

كتلها يلا يمعوده هي بيها وبلاياها يوميه مترزلين تعودنا...

فضيا العشا مگليات شلون ما جان وصبينا.. الحجي ونائل اجو ويسولفون ويضحكون بس صراع ما طلع من الأستقبال

عفتو ودخلت للمطبخ احط الجاي على نار هادئه حتى بعد العشا نصب.. دخلت نور .. كالت ليليان احلفج بعزاز گلبج فوتي على رجلج صالحي وخل يجي ياكل

-نور ما يحتاج هو يهدئ وحدو..

-لا لخاطري والله اضل اكل بنفسي واعتبر مكاونكم بسببي

-لا مو بسببج بس هو هليام عصبي مدري شبي

-ولج المره هي التمتص غضب زلمتها وابو حرب طيب والله بس روحي احجي وياه لخاطري..

-عاد مشيت للاستقبال.. دخلت جان يخابر شافني .. نهى المكالمه

-ليش ما تكوم تتعشى

-تزقنبت ليكدام ما اريد

-تقربت وكلت حبيبي لتكبرها

-رفع ايدو .... لا تگربين

-والله مو شغلة اكسر كلامك بس....

-طلعي برا

-صراااع لتسوي هيج بداعتي

-گلت طلعيييييييي برااااا

-خجلني بصوتو خلاني بنص اهدومي هسه شيكولون عليه راحت تتوسل بي .. اني اصلا صوجي اجيت هو هم يتحاجى .. اليكول الله خلقو وكسر القالب مدري على شنو شايف روحو ..

تركتو وطلعت .. كملنا عشا وتنظيف وكعدنا بغرفة الحجبه طلعنا الغراض وكمنا نشوفها للحجيه  

فتح الباب واحنه كاعدين ودحكلي ...

-ثواني واشوفج فوك .. اندار يطلع ورد كال.. والغراض اللي اشتريتيهن هم جيبيهن..

.... كمت لميت غراضي بالعلاكه  الحجيه كالت لا تراددي لو شما يحجي سكتي ..صعدت.. هو ماكو .. حطيتهم ع التخت ..

كعدت انتظرو بس نص حيلي نزل والخوف ماكلني اعرفو لما ما يقبل يتعشى ويحجي وي احد يعني اعصابو واصله حدها.. ومجبوره اواجهه

.. فات هو كن غسل.. دحكتو.. كال :- اي ست الحسن شوفيني بالله شنو الغراض المهمه النزلتي علمودهم وكسرتي كلمتي..

-ما على شي والله كتلك ابن نور جان مريض و....... ما انتظرني اكمل طش الغراض ع التخت.. جر العلبه مال المكياج دحك بيها گلبها وطرها بالكاع بلا اهتمام.. سواهم طحين

جر السوارات.. كسرهن بادي وزتهم وراه.. مشى جاب المكص من المجر وكصص الملابس وصله وصله.  واندارلي اي وبعد شجايبه..

كمت وكفت.. خلصت

-طلعي شعندج بعد خل نشوف وياج الغراض المهمه..

-بردت گلبك هسه من كسرت كلشي  .. عفتو وردت اطلع .. جر ايدي وكال

:- صايره گويه يولي كن مالج رداد..

-لا گويه ولا ابد بس انته صاير ما تنحمل... تكرب وعيون مخزره من الاعصاب..

-شفتي يولي ادب سز شلون سلفتج ما راددت زلمتها ولا رفعت عينها بعينو.. بس العتب مو عليج انه المطي الما عرفت اربيج.. ودفعني

وخرتو وكتلو والله كلمن يعرف نفسو

تقرب.... شلوووووون شنو عيدي

-بعدني ما حاجيه جابني بچف وردو بالثاني وكام يغلط ويسب ويشمر عليه بالغراض ويضرب بيهن ما خله كلمه ما حجاها ..

اني ما حجيت بعد بس الدموع تتجاره واحس خدي نار من قوة ايدو .. واذني تصفر..

شال العطر وضربني بي.. جا بيدي .. وانطر بالكاع بس احس اصبعي انقلع وصاح طلعي برااااااا

عفتو ونزلت .. الحجيه متمدده نايمه و حلا كاعده تخابر بخالتها وطافي الضوه . كعدت ابجي

ما انبلعت وياي ابد.. احس حيل تضايقت واصبعي انشل من الوجع وخدي للان مشتعل نار واذني تصفر

شنو فرقو عن الارهابي .. يفجرني ويخلصني اني اريد اموت واخلص.. اكوم ارجع لاخوي وانجب عندو ولا هلذله..

كمت علگت الضوه وفتحت الكنتور طلعت الجبه لبستها .. حلا سدت المكالمه وكالت شكو ليليان الساعه 12

ما رديت عليها تعدل الحجيه وكال يا خايبه وين موليه بهليل ستري على روحج واكعدي..

جريت الجنطه خليت الموبايل و الملابس لفيت الحجاب وطلعت.. كامت الحجيه وحلا وراي وستري علينا ودنيا الليل

كتبها والله ما ابقى احجي والدنوع تجري.. صعدت لغرفة نائل .. فتحت نور الباب وضربت خدها ولج وين موليه يا

نور صيحيلي نائل بسرعه..

-ولج والله تصير بوجهي عديها فدوه وستري علينا ..

طلع نائل .. ها خويه وين

-امشي وصلني لبيت هيام اني باجر من الصبح اخابر اخوي يجيني .  ومعليكم اعيش وي ارهاب وي اي بشر كعده هينا بعد ما اكعد..

-خويع دكولي يا الله ساعه 12 خل يطلع الصبح والله كريم

-ما ابقى والرب تاخذني هسه لا والله احرك روحي وتبتلون بيه..

نزلت واني ابجي واكلهم اذا ما تاخذوني ازت على روحي نفط واحركها واخلص والله..

طلع الحجي وام سعد.. كال بويه وين وجهج بهليل كعدي..

ماكو قفلت الا اطلع يتوسلون ويدفعون بيه للغرفه  ويحجون واني دموعي تجري واكلهم قسم بيسوع ما ابقى هينا .. اروح لهيام وباجر اخوي يجي ياخذني

نزل صراع وهمه هوسه كال .. شكو شديصير هينا

الحجي:- ولك بويه هجتت مريتك بهليل دحك ليش هيج وياها.. ما تخاف الله انته

صراع:- انجبي وامشي فوتي جوه يلا بساع بلا كلام..

-والله ما بكيفك ملطشه عندك اني بس تضرب وتغلط وتسب .. تودوني لهيام ومن صباحيات الله اطلع لاهلي. يلا

صراع:- تعوذي بليس وفوتي لا اطلعين اعصابي تره متحملج  گوه بالقران

-ما مجبور بيه اريد اهلي

الحجي: بويه اخذيها مني والله باجر انه بيدي ازتج لو الف ارهابي بس صبري الليله. 

الحجي حجاه هيج وصراع زكح ...قندرتيش هاي وتتوسل بيها .. عندي مره تتشرط انه.. انعل ابوها لابو الساس الطلعت منو ..

وكام يهد ويصرخ ويغلط ويسب.. الحجي صرخ بنصنا

ولكم ياااااااااااازي عاد كافي ما عيشه هاي بس مكاون الله و اكبرررررر عليكم..

-احجي وي ابنك بس يضرب ويكفخ بيه ليل نهار .. مو هذا نائل تفهم الموضوع وسكت بس هو من ذيج لساعه لهسه يكفخ.. عبالو المراجل بالضرب ..

سمع هيج لو تخبل كام يصرخ بكل صوتو  ول يابه حرام بالحرم اليوم اذبحها  لكم هاي البكد قندرتي تعلمني المراجل .. اليوم انعل عشيرتج بت الحرام .. اليوم اعلمج المراجل على اصولها.. وووو

كلهم بوجهو ويدفعون وما كدرو عليه .. كضب راسي من بينهم ويجر بيه وسحلني شطح للسياره..

وعمي يتوسل ويكلو بصلاة محمد عليك لا تاذيها والحجيه تتوسل بيدو..

دفعهم فتح باب الكراج . وصعد.. داس وشحط السياره بينا........يتبع

☆☆☆☆☆☆#مراهقة_و_الأربعيني

،،،،،،،،، بقلم زينب ماجد ،،،،،،،،

الحلقة_35  (ال100 ناقه 🐪 😆)

مشى بالسياره واني الدموع بعيوني جمدت من الخوف.. وادحك بعيونو و ع الطريق وين راح ياخذني..

وهو يكول لا ما ربيتج وعلمتج حك الله .. سبي عشيرتي واحد واحد.. انه الج..  الله كريم

يحجيها وكوه مسيطر على اعصابو .. حيل خفت منو.. وصلني لباب بيت هيام.. نزلني و دك الباب برجلو دفر..

طلع علي بساع فتح الباب دفعو وفات بيه جوه.. وهو يكول فوتي مدام..  هيام طلعت متفاجئه بعدها ما سأئله وهو كال هذي الكلبه تبات الليله هين لبين ما يطر الصبح ويجون اهلها ياخذوها

ورجعه لعندي تحلم ترجع بعد..

-ابو حرب وين خويه بس اكعد.نتفاهم.  شصاير غير اعرف.

طلع بلا ما يدحك وراه.. اخذ سيارتو وراح.. اندارت عليه هيام.. ولج شصاير فهميني..

اني بس ابجي وامسح بدموعي..

-غير افهم شصاير دحجي ليش هيج صراع عصبي وما يريدج شمسويه شمصخمه وما يريدج ابيتو ..  

علي:- يمه لخاطر الله وكتج ما ادحكين البنيه تبجي واعصابها تلفانه تلحكين تعرفين كلشي

دخليها جوه انطيها ماي ارتاح واعرفي السالفه بعدين  

.. اخذتني هيام وفوتتني جوه ساره فرشتلي وعلي كاعد يمي وهيام تلوب  انطوني مي شربت ودرت وجهي ونمت بس ابجي ..

للصبح هيام كعدت وياي سولفتلها السالفه كلها وهي نزلت عليه غلط وطلعتني صفر .. وتستاهلين وحيل بيج وما ادخل

وج تالي اخوي مو رجال وانتي تعلمينو المرجله .. لو ما السانج ضاربج.. مو هاي نور وياج ليش ما تنضرب مو نوال جانت شو ما راددت

جيتي طينه شوكحج بساع اخذتي اللسان والوكاحه .. تستاهلين وكل اليجرالج من ايدج..

تريدين اهلج روحي ولا ادحكين وراج اذا اخوي مو رجال ومرجلتو بس ضرب.. ما وكفت بعينج من يوكف بنص عمامو ويدافعلج. 

ما صار بعينج حبو وخوفو عليج وانه الاكول تتحمل تالي بس كبت اعصابو كلبتي علي ..

هسه جايه تتضايقين لو ضربج .. ولج اخوج باعج برخص المي وانتي مالج ذنب وزتج علينا مكسره ضلوعج..

ما حجيتي .. واخوي الطعنو بكرامتو وين ما يكعدون يكولون يمشي براس مراهقه وعاشكلو مراهقه ويعايروه بيج

هاي تاليتج يولي تهيني گبال اهلو.. بكدج هو بعمرج وتوكفين تراددين وياه..

سوالف المراجل هاي والرجال ما بالضرب عد رياجيلنا ما تمشي ليليان فزعتلج مره وكلت خطيه ولمتو لان ضربج بلا ذنب

بس هسه لا والله تستاهلين .. لا بمسلسل تركي احنه ولا تعيشيلي كلام الرايح والراد.. هذا واقعنا حبيبه ترضين بي اهلا وسهلا ما ترضين براحتج  

محد يجبرج... روحي دوري اليناسبج اذا اخوي ما رجال وما تكدريلو .. محد يموت وره احد..

.... كلام هيام كان مثل الكف الضربني وصحاني على اخطائي .. اني اعرف شنو يغثو واي كلمه تسم بدنو واعرف ماكو نتيجه

ومع ذلك استخدمت الساني وكأني اريد اثبت حظوري بلساني وما اخلي يتعدى عليه بس اللي صار اني اللي تعديت حدودي. 

ثاني يوم علي رايح لبيت جدو و صراع كايلو تاخذ كل غراضها هينا حتى تروح وي خالها راح يجيها  

جابهم علي... كابلتهم وبجيت ما اعرف اشنو اريد.. اهلي لو هو .. وقت اعصابي جنت بس اريد اطلع

بس من هديت احس فراگو صعب .. اني احبو وغلطت وياه ما اكدر اروح وانسى كلشي مستحيل ..

هو اول رجل لمني واحتواني وشفت وحسيت وياه جثير شغلات ما حسيت بيها گبل ..

بقيت يومين عد هيام .. لا خالي جا ولا صراع سأل ولا واحد منهم خابر.. ابد .. ضليت بنار وفكر يروح ويرد..

كعدت وي هيام وبقيت ابجي واكولها ما عرفت اتصرف شسوي هو يغث   وبقيت بس ابجي

عاد كامت تهدي عليه وانتي طايشه وعنادج و مزاجج بهيج عمر يصير وابو حرب ان شاءالله يتفهم وبس يهدأ احجي وياه بس كون تتعلمين. 

..خطيه ساره وعلي ما فارگوني كعدو وياي وضحك وحلويات رغم عدهم امتحانات .. علي راد يسويلي فيسبوك. 

بس اعرف صراع ما يقب لان كال ممنوع اي برنامج تواصل ينزل بموبايلج نت و يتويوب وخط كافي عليج   غيرها ممنوع .

بس شفت هو ماكو .. گلت خل اسوي واشوف شنو هلفيسبوك.. سوالي صفحه وسماني اسم مستعار ..

(مشاعر بريئه ) سميتو اول اسم فيسبوك وحطيت صورة بنيه حلوه وعلمني ادخل كروبات  

التهيت شوي .. انوبه كالي اذا حافظه رقم وتردين بحثينو بس حطي هينا وهو يطلع اسمو 

حطيت رقم صراع.. بساع طلع صراع ال***** اسم عشيرتو.. دحكت بروفايلو .. يعلم لدى وزارة الدفاع العراقيه. 

وصورة رتبة عسكري ويمها سلاح.. بقيت اقلب بصفحتو فارغه كلشي ما ينشر بيها بس يغير بصور الشخصيه. 

راسلتو .. ودزيتلو طلب.. ما رد.. ولا قبل الطلب. 

عاد بقيت اضيف وامشي بكيفي.. لهناك تذكرت رقم ام ساره صديقتي بالموصل.. عصرت مخي وكتبتو ودست. 

طلع اسم اخوها.. راسلتو .. نص ساعه ورد عليه كتلو اني ليليان ساره وينها.. كال تزوجت صارلها 5 اشهور

كتلو صدك شكد فرحتلها.. بس اريد رقمها.. كال رجلها ما يقبل انطي رقمها بس عدها صفحه ع الفيسبوك.  راسليها..

انطاني اسم صفحتها بأسم زوجها.. راسلتها وكتلها اني ليليان جرجيس ردي فدوه حيل مشتاقتلج  

ماكو رد.. بقيت افتر شوي وتركت الموبايل.. ونمت .. كعدت على صوت الجهاز وهو يرن.. عبالي صراع..

فزيت بساع شفتو اسم زوج ساره.. بساع جاوبت هي كالت الو.. اختنكت وكلتلها الو ساره اني ليليان وهي انفجرت بجي. 

ونص ساعه بس اني وياها نبجي ومشتاقين لبعض هي تكلي مشتاقتلج واني اكلها مشتاقتلج  

كملنا البجي وسألتني اشلون عيشتج هناك .. شلون رهمتي وياهم..

-ساره متعرفين شكد صعبين .. لج الجنت اخاف منو وكعت بي ..

-عربي ولابس دشداشه ما..

-مو دشداشه ساره .. القصه هي عقلياتهم و وضعهم تخيلي مخلصتها بس حجاب و كلابيه وحمره ما يقبل احط..

-اوووف اشنو هذا ليش هكذ ..

-شسوي

-ليكون شايب

-عمرو 43

-عااااااااأاااااا تحكي صدق ؟

-اي والرب . 

-شايب هذا

-لا انجبي ما شايب يخبل .. غير لو تغشعينو

-هااا تحبينو

-اي كثير

-لكن اشنو المشكله

-اتركج مني احجيلي عنج  

-ما في شي مهم من تزوجتي وبقيت وحدي ابد ما حبيت اكمل ولا عندي قدره اطلع للمدرسه عاد قبلت باللي خطبني وتزوجت وهسه حامل

-حبيييبتي الف مبروك. 

-قلبي يوم الالك..

-الا اكولج شخبار الموصل بالي حيل مشغول والاخبار نار

-نحنا انتقلنا من الجانب الايمن للايسر من تزوجت  بس الوضع ما تمام حيل صعب ويوم عن يوم يصعب اكثر

-شنو داعش ذوله انوبه

-هم نفسهم الدوله الاسلاميه ويحيى وياهم وبس الله اليستر من الجاي .. الحياة حيل صعبت والنس بخطر وخوف ..

-يعني ماكو طريق نجي للموصل

-يا طريق الموصل حاليا اشبه بنار جهنم.. اليوصلها يحترق ..

بقينا نسولف عن وضع الموصل حيل صعب واستحاله اكدر ارجع .. زين شلون ارجع ووين ارجع اذا الموصل ما اكدر ادخلها..

لثاني يوم جت الحجيه العصر .. اني گلت جايه ترجعني.. شو طبت سلمت وما ادحك بوجهي وزعلانه ..

نزلت اني بستها وسلمت عليها. هي استلمتني رزايل ما تستحين وتالي شيباتو انتي تقارنينو باخوه وتهينين رجولتو ..

واستلمتني.. تالي كتلها شلون ..

-انه معلي بيكم كعدي وسكتي واستري على روحج

-يعني ما جايه تاخذيني

-لا يمه اخذج ليش انتي وزلمتج تتجازين هاي اذا بقى زلمتج انه جايه على بنيتي ما جتني هليام وجيت اشوفها..

.. حيل تضايقت وما اعرف شتصرف .. عاد كمت فتت جوه اخذت الموبايل وخابرتو كلت احجي وياه واعتذرلو بلكن يلين. 

ما ردت .. رجعت اتصلت هم ما رد.. و20 مكالمه ابد ما رد.. اخر شي انطاني رفض ..

كمت الوب بمكاني بالله هسه اني شحصلت من راددتو .. لا واحد.من اهلي اجاني ولا اني ابيت رجلي كاعده..

بقيت روحي معلكه لا هين ولا لهين .. شويه وطلعت الحجيه ما كعدت يمعا هواي لان حيل مثكله عليه وتزت بالحجي. 

وحكو يتزوج وما اجبر ولا احجي وياه وما الومو رجال تعب وتريد التداري التحس بي ..

ما رديت بقيت جوه لحد.ما راحت طبت هيام.. كتلها الله عليج خابري واحجي وياه اني ميرد عليه. 

-اتركي ليليان خلي تهدئ اعصابو

-تلكينو هدأ صار 3 ايام.. خابري

-لا ما هادي وتلكين كلامج واهانتج تاكل وتشرب وياه وما جاي يبلعها

-واذا خطب وتزوج شلون ؟

-براحتو والصوج صوجج عاد شنكدر نسوي هو قرارو براسو .. نحجي وياه وياه بلكن يلين بس ما نكدر نفرض عليه هو اعرف..

ضليت اكل بروحي بهلايام.. مر اسبوع وهو لا خابر ولا سأل ولا واحد.من اهلي اجه الوضع بالموصل صعب وخالي ما كادر يجي ياخذني

لازم على مطار بغداد ويجي للرمادي انوبه يرجع لبغداد ومن المطار طياره لاربيل.. والوضع ما تمام ما كادر يجي..

وحتى وضع الانبار هم سيء بس الرمادي شوي احسن من باقي المناطق .. الا الفلوجه نار هي والگرمه راحن ..

سمعتو رايح لبغداد.. لو روحي كامت تلوب اكيد رجلع لزوجتو ذيج اللي اسمها ام مصطفى ..

بقيت لا اكل ولا شرب بس الوم بنفسي شكد اخابرو ما يرد.. اخر شي كام يطلعلي (لا يمكنك الاتصال بهذا الرقم حاليا)

كلت لعلي شنو معناها كال حطج بلائحة الرفض .. كتلو يعني شنو ..

-يعني اي رقم مزعج تحطينو بهاي اللائحه بعد ما يكدر يخابر ابد..

-حيل تضايقت واحس النار تشب بجسمي من كال هيج.. ليا مرحله وصلت نفسي..

بقيت 3 ايام واني گاطعه الاكل حتى تمرضت.. سمعت هيام خابرتو وحجت وياه  

يكلها ام علي قفلي الموضوع ليليان صفحتها انطوت ما اريدها.  ولو سمعت رادتها لبيتي منج اتبره والقران. 

لا تعيدين تاريخ وجدان وتذلوها كبالي وتخلوني اكرها واستصغرها .. خلوها تروح وبدربها السلامه تلگه غيري جثير عاگلين وما يضربون ما مثلي قليل مرجله. 

كالتلو حشاك بس هي صغيره وتعرف طيش هلشباب وعديها .. ما سمع كاللها ابد.. ما تصيرلي مره ولا ترجعلي..

... اني اسمعو هيج يحجي وما يريدني واهلي ماكو وخالو ما يجي كرخت روحي فد نوب كمت ليل نهار ابجي..

ساعه 1 و ما غافيه عيني.. بس ابجي وصوتي طبك وحيلي راح كد السهر والبجي وقلة الاكل..

كمت وهيام نايمه يمي دحكت موبايلها .. جريتو وطلعت.. خابرتو رد بسرعه لان رقم اختو والوقت متأخر..

-ها خويه هيام بيج شي

-اني ليليان..

-اخذ نفس وسكت..

-لا تقفل الخط الله عليك..

-بس يتنهد وما يحجي..

-غلطت وعرفت غلطي واعرف غثيتك وهنتك بس والله ما علقصد .. احسبني حلا وغلطت الله عليك كافي والله تعبت.. كوه احجي واني ابجي جاوبني بكل برود

- والمطلوب

-ما عرفتك هيج حقود انت مو تكول تحبني ليش هيج وياي والله اسفه ما قصدي

-مع السلامه

-لا تقفل الله عليك.. بس اسمعني .. تنهد بخلك طويل

بس اسئلك سؤال انت وين .. ومنو يمك الله عليك جاوب

-انه ابغداد.. واليمي انتي مالج دخل بيهم .. ومن الاخير رجعه الي  لا تحلمين ترجعين .. وبس اشوف طريقه ارجعج لهلج وانعل اليوم الشفتج بي .

وهسه انكلعي عندي شغل

-اني كال شغل ونجنيت .. كتلو يا شغل هااا يا شغل انته وين.......سد الخط بوجهي

اكيد يمها رجعلها اكيد.. يربي شسوي تعبت .. كمت افتر مثل التطلك بالبيت والوب ..

لوجهه الصبح يلا كعدت.. بس كعدت لا اشيل ايد ولا رجل .. المرض داكني دك.. حاولت عيام تعالجني بدوا باكل ..

كل خلك وواهس ما الي .. لثاني يوم اني على نفس المرض.. عاد خابرت هيام على عمتي وكالتلها مرت صراع حيل مريضه

حدرو شوفوها شنو ترجعوها ميته. لا تاكل ولا تشرب انه شكدر اسوي..

عاد العصر اجت الحجيه .. كعدت يم راسي وكالت هيج احسنلج يخايبه من انتي داكج المرض وهو داك صدرو يريد يتزوج

شنو الحصلتي من السانج شفادج.. شفادتج الافلام والمسلسلات التركيه والرجال ما يضرب والرجال بس يبوس

ولج يمه هذا ما واقعنا احنه بالعراق اصحي.... انهجم بيت المسلسلات الشيشت النسوان على زلمهن وكامن يحطن روسهن بروس الزلمه ويتاكونن وياه..

وج يمه احنه مجتمعنا ما يقبل بهلكلام ليليان .. شوكت تردين..

هي تحجي واني بفراشي نايمه.. كالت كومي بدلي.. كمت لبستني هيام وعدلتني وكعدنا .. دقايق ودك هورن بالباب

كالت كومي.. طلعتني صراع واكف يسلم على هيام من شافني دار وجهو لامو كاللها يلا يمه صعدي

-ابو حرب هاي مريضه اخذها وياك خناك داروها

-شال فلوس وكاللها رجعه لبيتي لا تضنين ترجع اخذيها طبيب لحد ما يجون اهلها وياخذونها..

ضلن يتوسلن بي هو طنش وطلع بالسياره وكاللها يلا يمه.. وما قبل اركب وياه.. شكد استحقرني وذلني بهلموقف..

دخلت واني ابجي بالزايد.. ويوم يومين يمر وهو ما جا...

اجه علاوي كال لامو بيت جدو صالح عد بيت جدو اهلج.. طالتلو منو جاي بيهم كاللها بس جدود وجده و عمتي اخلاص..

اني سمعت هيج.. لو انجنيت بالزايد.. هسه يوافق عليها ويكسرني ويعرفني اموت لو وافق عليها..

وصلت لحاله ما اعرف شاصرف بيها.. كمت دكيت عليه.. رن .. معناها فاتح رقمي من القائمه..

رن رن .. شوي و رد.. وكال خير يا طير .. حجه وهو مرتاح وصوت الضحك يمو احس الدم كام يفور بجسمي

-فرحان مووو.

-شرايده ما عندي وكت

-هااا بس لخليصان عندك وكت مووو .. انتي ليش تسوي بيه هيج وشنو غايتك..

-بت عمي مالج غرض بيها وما عندي غايه متاني واحد.من اهلج يجي ومحد يريدج حتى ملو من كد ما ادك عليهم واكلهم تعالو اخذوها

-هااا .. اختنكت.. اهلي ميردوني وانت ما تريد ترجعني ولا تجي ولا ترجعني ما اريدك.. بس اذا صار بيه شي لو سمعت اعرف انت السبب وحوبتي بركبتك..

مثل ما طلعت باخوك ومات بيومو .. تطلع بيك.. قفلتو .. وگمت ابجي حيل

لثاني يوم اريد انتحر واخاف من هلخطوه .. اخاف ما اموت وابقى عاله ولا اني هيج ولا اني هيج واتعلعل اكثر من هسه..

بقيت للظهر بفراشي .. احس حيلي باد كلشي بيا تعب .. الموت جان اهون اليه من وضعي..

نايمه واندكت الباب ما اهتميت عبالي علي اجه.. وما احس الا صراع بملابسو العسكريه طاب علينه. 

بقيت ادحك بوجهي شكد.مشتاقتلو بس اريد ابجي واحظنو.. هو سلم وكعد واندار عليه.. وكال يلا كومي خالج جاي فد شويه راح ياخذج..

ما حجيت شي .. جابتلي هيام الملابس وليستني وكوه كومتني.. كاللها ما راحت طبيب لا انوبه يحسبوها علي مره ويكولون اموتها ...

ما سمعت كلامو مشيت كبالو.. بس عيوني وارمه المرض ماكلني كن بلا روح.. صعدت وياه السياره. 

هو ما كن شايفني جا وصعد ودعهم وحرك.. واندار عليه .. كال شبيج ..

-اني مو كال شبيج مثل تانكي مي بعيوني وبزيتو وانفجر دموع..

-اريد افهم على شنو تبجي

-ما رديت..

-ادكين وتخابرين وميته .. عليمن بويه مو انتي ما ترديني مو انتي الركبتي راسج وكلتي اريد اهلج وهل جايين اهلج اليوم وترحين وياهم بعد عليش هلبجي ..

عجل مو انه رجال ما انحمل والعيشه وياي مره.. هذا انه بويه لا مهند ولا بطل افلامج السخيفه.. انه رجال عربي وهمجي واضرب وما اسمع من احد كلمه مرادد

وهاي اطباعي ما اتغير .. ما عاجبتج بويه درب السلامه منو كاضبج .. المراجل خليناها لاخوج انه لا رجال ولا ابد...

خلصي مني وروحي لاهلج. 

هو يحجي واني ما اجاوب بس ابجي..

وكف السياره وانطاني مي.. كال شربي وغسلي بويه ..

-ما اريد..

-عجل شتردين

-ما رديت

-تردين تظلين وما ترحين وي خالج

-احس انزل من كرامتي لو جاوبت بقت بس دموعي تجاوب .. سكت وشغل السياره واني الف فكره تاخذني وتردني..

شلون اروح واني احبو ما اكدر اعيش من دونو تعلمت عليه وعلى كل اطباعو .. ما اكدر اتركو ابد..

بس ما اكدر احجي واكول ما اريدك..

وصلنا للبيت دخلت كبل لغرفة الحجيه واني بس ارجف وكلبي يدك بسرعه ..

كامت الحجيه كالت خايبه شسوالج شو صفره

-ما سوالي شي ..

-عجل عليمن تبجين..

-ما بيه شي..

تركتني وطلعت مرت ساعه وساعتين وخالو ماكو وللمغرب وهو ما جا ولا خالي بين .. اخر شي مليت وتعبت ونمت بمكاني..

كعدت بليل مسطوره وراسي فد مره صداع.. كتلها حجيه خالو ما جا ..

-يولي يا خالج

-صراع كال راح يجي شو لا خالو ولا صراع

-ول شبيج صراع تعشى ويانا وطلع فوك نام وكال لا تكعدوها ..

-كمت على حيلي .. اخذت الموبايل الساعه 11 بليل .. خابرتو وانطاني رفض رحت للمطبخ..

حسيتو نزل .. اجه للمطبخ .. كال .. خير شكو ادكين

-من العصر شحنتني وراح يجي خالج وما بين وينو

-ليباجر يجي الدرب مسدود روحي نامي ..

-ما اعرف احسو يريد يضحك وكاضب نفسو كوه مسيطر..

بس ما اهتميت.. كعدت ع الكرسي ..

-تعشيتي

-ما اشتهي

-زين بس صعدي خل اخابر خالج اشوف بيش الساعه باجر يجي حتى اتحظر مملني واني يوميه ناطرو

-اختنكت من كلمتو .. وكمت صعدت رحت لغرفتو دا الكضب الموبايل فات هو ..

-اي ليون ان شاءالله بهل كم يوم استعدلتي وعرفتي غلطج عل التمام

-اندرتلو .. خالو يجي لو شنو .. خابرو

-خالج مل مني يوميه اخابرو واكلو تعال شو اليوم زكخ وكال خذها انت ربيها انه ما اريدها..

يحجي وكوه كاضب نفسو ما يضحك..

-شو خابرلياه شنو ميريدني. 

-ول يابه لو ما رادج انه اريدج والله حجاها وابتسم..

-انت شنو تلعب عليه

-من كل عقلج مصدكه انه انطيج لاحد.. شوكت تفهمين انتي مالتي وبس ..

-يعني انت ناصب عليه مووو تضحك وتلعب بعصابي .. دفعتو جرني وكضبني من ركبتي وبوسني

دفعتو وكمت ابجي بصوت عالي وهو يضحك وجرني لحظني ويكلي الله وكيلج لا خابرتو ولا خابرني ابد وما يدري بسالفه

كل القصه ردت اعلمج ادرس .. ول يابه حتى السانج اطويل اشتقيتلو ..

-وخر مني يلا وخر تضحك عليه.. وانفجرت ابجي حيل .. كضب راسي بثنين اديه واخذني الو وضيعني بأحساسو

لا كن بجيت ولا تألمت .. كأن احتييت من جديد بين اديه.....يتبع

☆☆☆☆☆☆

واجمل 100 ناقه لعيون 3 مليون 😍😍
واليغلس ع السحك ادزله ناقه ابلاش 😆

#زينب_ماجد

#زينب_ماجد#مراهقة_و_الأربعيني

،،،،،،،،،، بقلم زينب ماجد ،،،،،،،،

الحلقة_36

قربني منو واني من كل عقلي بعدني ابجي رغم تجاوبت وياه.. بس احس الفشله بعدها بداخلي

3 اسابيع ما اعرف اني لاهلي لو الو .. وكاعده على نار وانتظار وقلق وغيره وتالي يضحك عليه..

صراع:- مو كافي ليش تبجين

-انت جذبت عليه

-يولي والله احبج واعشق كل شبر بيج.. بس ليليان انتي تجبريني اذيج بتصرفاتج .

الف مره عدتها عليج.  كلمه اكلجياها تكولين امرك وتم وتسكتين اذا انه غلطان وما اعترفت وقت اعصابي من اهدئ اجي ابوسج واعتذر منج

بس اذا انه عصبي وانتي تعاندين شسوي ؟؟ يصير جدام اهلي تصغريني وتقارنيني بأخوي..

انه من ردت اقارنج بنور وكتلج شوفي ما راددت زلمتها حجيت گبالهم ؟؟ .. هنتج وخليت سلفتج تتعلى عليج..

لا .. عدنا غرفه ندخل نحجي ونتكاون و نفرغ كل البگلبنا وممنوع اي كلمه تطلع خارج الغرفه..

فهمتي.. ؟

-اي بس انت تضرب وتأذي ..

-ليليان وكت اعصابي لا تحجين لا تراددين حتى اضربج تجفي شري انه بنفسي ما اكدر اسيطر على اعصابي .. سكتي

ج ومن اهدئ حدري وحاسبيني على اغلاطي وحده وحده وكليلي ليش تغلط ليش تسب.. انه مو نبي وابليس يركبني وكت اعصابي شسوي

من اهدئ وادليني اخطائي انه اعتذر منج وابوس راسج هم.. بعد

بس مو انه راسي محترك واريدلي حجه انفجر بيها وتجين اطلعيلي لسانج متر وتردين اكضب اعصابي ..

مايصير لازم واحد يرفع والثاني يكبس.. وانتي حرمتي صح واجبي اصونج وما اكسرج بس هم واجبج تمتصين غضبي وما ترادديني..

اتفقنا ؟؟

-هزيت راسي .. اي ..

-لج يولي والله ما ينطيني گلبي ائذيج بس اخ شسويلج..

-توعدني ما تضربني بعد..

-دحكي حبيبي الرجال لو وعد لازم يوفي واوعدج هسه ويومين تثور اعصابي واضربج واكسر وعدي ما اكدر

ما اگلج ما احاول اكضب اعصابي اكثر بس انتي لازم تحاولين اكثر مني تمتصين غضبي وما تنطقين كلام يزيدني نار فوك ناري وتالي انفجر بيج..

-تمام .. قربت راسي وضميتو بصدره.. باسني بشعري وشد عليه وهو يتنفس حيل.. رفعتلو..

-ينطيك گلبك تتزوج عليه

-ههههه من كل عقلج.. شبيه مسودن.. ما تزوجت صار اسنين اجي هسه وانه عندي حوريه تتملعب على گلبي ..

بس ليليان والله انه بشر .. وج والله ما رايدج نزوه ولا قصة اريدج وقت اللي احتاج..

لو فعلا هيج غايتي ما اكعد انتظر اكو جثير نسوان واكدر اخذ شكو صابر عليج صارلي 7 اشهر..

بس انتي مرتي فهمي .. والله انه ما نبي هسه منيمج على ايدي وكاضب روحي منج بس ليوين ..

تردين احبج واجي يمج واخذج بين اديه ولا تتقرب اكثر .. ادري حكم فرعووون يابويه شسوي

-اشنو اكدر اسوي اكثر .. الاكدر علي عدسوي بس اني والله اخاف منك بذاك الوقت والله تصير جنك وحش ..

-هههه انه وحش والله عمي خلف الله عليج..

اخذ راسي باسني وحظنو وكال نصبر يابه شنسوي المهم انتي يمي وما زعلانه..

.. بقيت بحظنو نايمه.. لشويه حسيتو نام وايدو ثگلت على بطني .. سحبت نفسي منو بهدوء ونزلت نمت جوه..

للصبح بعد ما نامت عمتي وخلصت قران الفجر.. رحت للمطبخ فجر و حظرتلو ريوك يجنن وكمت افيك بيه وخلك طويل وصبح توها تطلع شمس 

فتحت فيروز وكعدت امط بأديه براحه.. وييي .. حبو جنه ومن يبتعد ادمر مو بيدي .. بس فكرة احنه متصالحين .. تخليك نشيط

رتيت الطاوله.. وصعدت على كيفي لغرفتو فتحت و فتت هو نايم وطبيعتو بس بالشورت ينام تضايقو الملابس ..

قربت وكعدت.. هو حس .. راد يسحبني .. تعدلت.. وكمت امشي اصبعي على حواجبو وجهو .. هو ارتاح للوضعيه بقى مغمض عيونو..

لعبت بشواربو فز وكضب ايدي ..

-الا الشوارب يول

-ههههههههههه

-حدري لشوف

-لا لا لا كوم ويايه كوم.. مسويتلك ريوك والجاي ع الني والساعه 6 ونص .. ساعه وتروح لدوامك خل اكعد.وياك..

-هلله هلله شو مدلل اليوم ..

-كمت من يمو .. وهو كام وراي وصلني للباب و مسك قفل الباب وكال اي شو ما كلتيلي ليش مدلل اليوم..

-واكف كدامي بطولو بس بالشورت .. خرب والله استحي غمضت عيوني وكتلو مشتاقتلك..

-بقيت مغمضه وهو ماكو ردة فعل منو .. فتحت لكيتو مايل راسو ويدحك بوجهي..

-رجعت غمضت .. بدل الله عليك..

-صار ساعه نايمه يمي ما استحيتي من وكفت يلا ..

-ما اعرف هسه يلا استحيت دروووح.. احجي ومغمضه وهو واكف يضحك..

-زين شرايج تسبحيني انتي

-فتحت عيوني حيل.. يا ما تستحي .. طراااخ .. ضربتو راشدي ودفعتو وطلعت.. وهو يضحك ويكهكه بصوت عالي

خرررب اني صوجي اصعدلو الصبح .. نزلت للمطبخ طفيت الطباخ وبعدو وجهي احمر .. شكد.زين بس تجي اوكات شو يصير ما يستحي ...

عاد بقيت التهي اكمل تحظير وانتظرو شوي ونزل لابس رسمي مو عسكري..

-صباح الخير .. ول يابه شهلصباح

-صباح النور .. وابتسمتلو.. بس اكول ليش ما لابس عسكري اشنو ما عندك دوام

-لا هناك ابدل .. الملابس العسكريه صارت خطره..

-ليش

-تنظيم داعش كاعد يترصد العساكر

-يعني شنو يكتلوك

-الروح بيد الله محد يكدر يگربلي اذا عمري ما خلصان..

-بس هيج راح اخاف عليك.. بطل من الدوام فدوه

-لو بطلت وانهزمت تعدمني الدوله لو انسجن .. ومو مرجله نشرد من الموت .. هاي ارضنا ندفع عنها لحد الممات..

-لا صراع هيج راح اخاف عليك والرب .. طيب خل نطلع بره العراق واخلص ما تگدر

-مستحيل اعوف كاعي واشرد شبيه..

-يعني شنو معقول ماكو حل الدوله ما تسيطر على داعش..

-هي انباعت لا دوله ولا مواطن ..  ظهر الفساد في البر والبحر بما كسبت ايدي الناس..

احنه الرمادي ارحم الفلوجه و الموصل نار ليليان..

-كال الموصل دمعو عيوني.. اخذني لحظنو وكال عوفي هلامور وخلينا بريوكج .. اييي شمحظره بالله..

-ابتسمت .. وفركت عيوني .. كتلو اكعد..

-بس طفي الغناء حرام

-ههههه ماشي

اكلنا اني وياه بأحلى صباح هو يوكلني واني اوكله.. وبقينا نسولف لل7 ونص .. كال انه لروح تحتاجين شي..

كتلو سلامتك.. باسني بگصتي وطلع.. دحكتلو وهو يطلع سيارتو واني مبتسمه.. الرب يحمي

خلصت يومي واني انتظرو .. واتذكر كلامو الي البارحه لما يكول لا تعانديني وكت اعصابي وتخلين اعصابي تنفجر بيج وتتأذين

واخذت وعد وي نفسي ما اعاندو ولا اراددو واحاول ابتعد عنو وكت اعصابو والومو من يكون هادئه حتى يعتذرلي وما يبقى يهيني..

خلص اليوم وهو ما اجه.. خابرتو اكثر من مره ما رد..

لليل يلا هو خابر .. كال حبيبي انه انذار وما اكدر انزل .. بقينا نحجي شويه وكال تعبان انام ومن اكعد اخابرج  

كتلو ماشي .. خليت الموبايل يم راسي حتى من يدك اسمعو وكل شويه افز ادحك الموبايل بي مكالمه لو لا وما الگه..

صلت عمتي الفجر وهو ممخابر .. عاد كلت خطيه تعبان.  وكملت نومي.. شويه وحسيت بطانيتي انفتحت وتمدد صراع وياي بالفراش  

اندرتلو .. اجيت

-لا بعدني بالباب منتظرج ...

-ههههه

-اشتاقيتلك

-مو اكثر مني .. وتقرب لوجهي..

الحجيه :-سبحان الله سبحان الله

- همسلي كاعده الحجيه..

-لا نامت بس يمكن كاعد تتحلم بالصلاة .. انتظرتك تخابر شو ما خابرت

-شسوي كوه فلتت من الدوام الوضع ما زين  وعكب باجر طالع واجب لتكريت

-بس مو خطر عليك لتكريت

-ول يابه اموت ع اليخاف عليه .. وتقرب

الحجيه :- لااااا اله الا الله

-ابتعد كتلو هاي الحجيه حتى بالحلم تتحلم بالله

-ما تعرفين سوالفها  جاي ادكلي على وتر..

جر البطانيه وغطة روسنا .. باوسني   والحجيه صاحت اااااااالله اكبر

كف الغطا وكاللها شني يمه وذني فد مره وگومي صلي بينا .. شسالفتج

-وانته ياهو يمك .. انه جاي اعبد ربي

-دكولي گوم اطلع وفضيها سوالف العريفي بطليها حجيه  

-عفيه بأبني النچر اليفهمها وهي طايره عجل كوم يشوفني طولك..

-بالله هم انني علي حجيه ما كافي مكضيها نواشف ..

-شجالك يمه اذكرنك رزن وثكيل وخةش زلمه شو استخفيت ورجعت اغو ادور محاظن.. كوم يمه عيب لا يكعدون جهالك يشوفونك بهلوضع زحمه..

..هذا الحجي تحجي وهي دايره ظهرها عنا  بس تحس بينا واني غاطه راسي بالمخده واضحك.. هو راد يكوم كال.. يحلوه يبنيه تجين يمي فوك شويه..

كتلو .. يلا دا انطي ايدي نگوم جان تصيح

- ولج كرصي روحج واستجني بمكانج واثگلي شويه..

- شلقضيه يمه انتي فوك ضيمي تعلاوه ...

كام وطلع وهو ينافخ ما قابل.. واني اضحك..

الحجيه:- يلفطيره لا ترخصين نفسج وتصيريلو متعه وانتي ما محصله شي.. خل يخلص شغلو وينزل يعقدلكم وكضبي عقد زواجج بيدج وصعدي حظني وبوسي براحتج..

صراع يحب الصعب والثكيل ثكلي روحج يثوله لزكتي بي من رجعتي لحد هسه مخابر طول الليل

-شسوي يمه غير هو تعبان واني احبو

-حبي محد كايلج لا تحبي.. بس لا تزتين روحج عليه.. يوم طلعي يمو ويوم كعدي خلي يتمناج ما يملج .. ولا تهملينو ويدور غيرج.. وازني

-تمام حجيه تمام .. وكمت يمها عجل يمه من تعرفين هيج ليش خليتي ام سعد تكون على الحجي

-يمه ياما ردت وياما رحتلو وداريت وتعبت بس رجال عن رجال ييمه يفرق ..

بيهم الصدك رجال وبيهم تخوط بلحاياهم النسوان..

تجيبين صراع وي الحجي.. صراع لا يمشي بشور احد ولا يخلي احد يگودو .. ويفهم الامور وهي مدستره ويعرف الكيد من الصيد ..

عمج فقير وام سعد مكونه عليه واركبتو من اول ما خذتو .. انه ما اعرف امشي حجايتي على زلمه.. شيكول اكلو تم على امرك..

جبت الولد وجبت البنيه واشتغل بالكاع وحالي حال الضيم وادور رضاه وهو ما بعينو غيرها .. عجل يبنيتي الما يريدني ربح شلي بخسارتو..

يم الله ما يضيع حك.. عرفي تصرفي يبنيتي ولا تخلين الزلمه يضيع من ايدج.. لا الين زين ولا الصلب زين..

الامام علي يكول لا تكن لينا فتعصر ولا تكن صلبا فتكسر.. وازني وياه بنيتي ليني وصعبي .. 

-تمام.. حبيت كلام عمتي وحبيت اخذ بيه.  بس هلحجي ما يمشي عد صراع..

من كمت ما اصعدلو والحجيه طلبت منو يعقد عليه محكمه ويضمن حقوقي .. ما عارض بس كال الها خل افضى ..

لان بوكتها انذارات هواي وعلى ساعه يخابروه ويروح.. ف من يجي يكلي طلعي حظريلي هدومي او صعديلي جاي او شوف شيطلب

ويستغل طلبو وياخذ راحتو .. ما مسوين شي غلط ولو الحجيه تكول لا تصعدين وهو يضوج يكلي طلعيلي ..

فمره اخذ كلام الحجيه ومره اطلعلو لان اني هم احبو واشتاقلو .. ما بس هو يريدني اني هم اريدو..

ام سعد حيل يغثها طلعتي لصراع فوك.. وما بطلت مني تغلط وتتجاوز اذا نزلت منو وتكول ما فلحه غير بالطلعه فوك وتنزللنا مطكعه..

اني ما ناسيتلها اشلون ذلتني ذيج المره وبست راسها.  فكمت من اغسل ملابس ملابسها ما اغسلهم..

جنت اكول حتى لو هي ما زينه ما اصير مثلها واغسل .. بس شفتها ما تستاهل اتعب روحي

فمن ادخل اغسل ملابس اعزل ملابسها وره الباب نور من تغسل ملابس نائل تغسل وياها. 

نور تغسل ملابس بين يوم ويوم كل يومين تلم ملابسها وملابس نائل و التوم وتشوف الحجي وام سعد..

بس صراع ما يقبل .. الشي اللي ينزعو اليوم باجر يريدو مكوي ومصفط بخانتو واذا ما شافو يكوم يحجي

بيمن ملتهيه وشياخذ من وكتج وتخلين ملابسي تخمخم ..  يريد كلشي بوقتو.. ما يتبيت شي بوصاختو..

فمن اغسل ملابس فد مره شعندي من ملابس الي للحجيه للحجي لحرب لحلا مرات هم اغسللها ويانه واخلصهم يوميه ما يبقى..

ف مره غسلت ملابس وعزلت ملابس ام سعد على صفحه.. طبت هي كالت عجل ليش عازله هدماتي شني بيه مرض..

-والله عندج جنه وتغسلج انه ما جنتج  

-هاااه تستنجسيني ولج نجسه انه وما تغسلين هدماتي

-بكيفي اغسل ما اغسل .. مو انتي تحاسبي

-ولج شو راجعه براس گوي لا عبالج الشور بيدج لو هذا بيت رجلج وصلاة محمد اهجج منا بظهريه حمره

-عود اليجي بيدج لا تقصرين بي.. اني كلت هيج وهاي شيلي السطله وضربيها بظهري صرخت ااااااااخ شبيييييج ليش تضربين ..

طلع عمي كال هاي ويامن يولي معليه حسج  

-احجي وياها ليش تضرب

-ابو صراع انه هيج زاته ملابسي وما تغسلهن شبيه جرب .. انه هاي المصلاويه البلا اصل تهيني وتصرخ علي..

-مصلاويه وتاج راس لكل واحد.ما يعجبو ما انه اللي تقللين من اصلي.. والبشر بخلاقو ما بنسبو ..

.. الحجي وهنت مرتو كام يعد ويصف جت الحجيه تستر ع الموضوع عاد ام سعد متعاركه وياها ودافعتها ..

وتكلها كله منج انتي التشيشين بهاي النغله علي وكامت ع الحجيه صياح ومكاون والحجيه فقيره لمت نفسها وطبت بغرفنها بس حيل تضايكت وكامت تلوم عليه لان كبرت الموضوع..

والحجي يصيح ويغلط بنص البيت وصايرلي فاندام ويهدد يجي ابو حرب لو لا يا المصلاوي لا ما خليتو يربيج ويخليج تتمنين الدخله لهين..

يعيرني بطلعتي منا ويهدد يكول لصراع.... وصراع بالدوام ما نازل .. عاد كلت خل اتغده بيهم كبل لا يتعشون بيه..

صعدت بحرارة دموعي وهو يصيح جوه ويعيط.  شلت الموبايل وخابرت .. هو كال الو واني انهديت بي ابجي..

وكتلو يعيرون بيه كلو من وراك..  ويهددون بيه يحجولك عليه حتى تضربني ..  اني تعبت ما اريد اعيش وياهم بعد.شوفلك حل

-يولي منو محاجيج بس كولي شبيج والله تعبانه والضيم فوك راسي

-بس اكلك تقبل كل ما يكومون يكولون عليه نغله مصلاويه بلا اصل ...

-ول يابه اكص السانو اليتعداج.. منو الحاجي عليج

-اسمع صريخ ابوك جوه اسمع .. عيهدد ويغلط لان ما غسلت ملابس ام سعد وهي شالت السطل وضربت ظهري وهدت ع الحجيه تكاونت وياها..

بالله لوين نضل هيج اني بعد ما اتحمل صراع فدوه

-هي تكاونت وي امي ؟؟

-اي تكلها انتي تشيشينها علي وما تخليها تغسلين ملابسي وضلت تغلط والحجيه ما حجت طبت بغرفتها ضاجت..

-اجي الظهر ويصير خير.. كعدي بغرفتي ولا تنزلين وانه اتصرف وياهم وانعل والديهم والله..

-سديت الخط منو .. وكتلها تستاهلين ام سعد العوبه والححي ابو ثرب يعيرني ويهدد يطردني من البيت ..

بقيت بالغرفه افتر اخر شي رحت نزلت اخذت الملابس شريتها وطبيت سبحت بس الضربه بظهر متأذيه ومجرحه.. من اغسل تحركني

طلعت و سعد جاي وام سعد مسويتلها فلم وكاعده تبجي

وسعد يكول سعله ولا نربيها وما تسوه دموعج ..وتروحلج فدوه وتخدمج وغصبا عليج  

-غصب عليه ابو فلس .. ما تاخذها يمك وتخلي نسوانك تخدمها لو تخاف تصرفلك فلسين زياده...

غميتهم وصعد ..

للظهر جا صراع.. سمعت صوت سيارتو .. نزلت بسرعه تلكيتو من الباب تعبان روحو طالعه..

اول ما دحكني  زكح.. انه مو كلت نزله ماكو شعندج هينا ..

-سمعت صوت سيارتك فاتت ونزلت على مودك..

-ضربتج

-اي بظهري..

-ديري بالله اشوف

-لاااا عيب ..

- ابتسم كوه وهو تعبان و يكول .. عجل حتى ما بيج فزعه دولي عليمن متعب روحي

-تخصرتلو .. عافني وفات الحجي منتظرو بالهول .. اول ما طب كال السلام عليكم..

ردو عليه.. قبل لا يحجي الحجي.. كال عجل امي وينها ..

الحجي:- نايمه بغرفتها ..

-منو مضايكها

-لازم الحجي جالك ليكدام..

-عجل من تعرف الحجي جالي ليكدام.. ما تعرف تكضب حرمتك يابه ..

سعد :- بس حرمتك..

-بالله سعد يواشك .. خلك ابيتك ولا تدخل..

الحجي:- مرتك وكحه يبو حرب و.........

-حجي صبر الله وصبرك لهين وكافي .. يازي عاد تعبنا .. امي وحرمتي ما اسمح لحد يتعداهن..

هلحجي تفهمو ام سعد خير على خير ما تفهمو حرام بالحرم اخلي عاليها واطيها .. وقسم بذات الله لو مره ثانيه سمعت احد كال عن مرتي نغله لو بالله اصل

الا اعلمو الاصل شلون يصير ...انتو وتالي وياكم .. غلطتي وياها ذاك اليوم ورغم هاي خليتها تبوس راسج وقدرتج ..

كلولي وتالي .. مره مشيبه حاطه عگلج وي جاهله بكد احفادج.. لكم ما عيب ما تستحون ما كافي ..

ابيع هلمهجوم هذا واهجولكم وارتاح.. ولكم صبرو علي بس اشتري بيت ما ابقى هينا والله .. اخذ مرتي وامي وجهالي واهج..

تعبت انه منين الاكيها من داعش والحكومه الطايح حظها والدوام لو منكم ومن البيت وين ارتاح كلولي ..

يحجي ويصيح وعصبي .. اخر شي دولكه يمو مال مي طرو بنص الهول وكال دنعل هلبيت الجايف الما بي راحه.. وصعد..

بس ولا واحد حجه سعد ابو فليس عود زعل طلع ويكلهم الضاهر صراع صار يمشي وره النسوان ويفزعلهن وما يريد طبتي

كالو الحجي اسكت لا يسمعك وينزل وتكب بينكم بويه عساها بحظها وابختها هلمصلاويه ...

اني طلعت من المطبخ فتت لغرفت الحجيه واسمعو يتفل وراي ويكول لا بارك الله بيج وجه الگراد..

ما اهتميت سديت الباب .. وكعدت يم الحجيه..

-انتي گلتي الصراع ع الصار

-اي اني خابرتو

-يولي خافي على زلمتج تعبان وادخلينو بمشاكل البيت ما كافي الوضع الصعب بشغلو .. انتي فوكو

-يمه عجل منو اليفزعلي .. ما سمعتي الحجي شلون يعايرني بسببو ..

-حتى لو بنيتي اتحملي وصبري لخاطر زلمتج تراه جثير تعبان ابو حرب ..

-تمام حجيه بس فركيلي ظهري والله ذيحني من الالم.. رفعتلها كلابيه وكعدت يمها وهي تفرك وتكلي هسه لو غاسلتلها هدماتها شصار

-اغسل كفنها وادفنها السعلوه .. تهي يا الله اخدمها فوك ما تغلط وتشتم بيه..

-دنحجي .. وفات صراع.. جريت الشال على رجليه خليتو لان هي ماده ايدها بظهري تفرك.  ورافع الكلابيه واني كاعده..

تگرب باس راسها وكاللها شلونج يمه..

-هلا يبعد بيتي شلونك وليدي

-تحت رحمتو .. الا ما ضايقتج هاي السگط

-لا يمه عيني بعين الله هاي شنو وتضايگني ..

-مدلي راسو ويكول يمه هاي اكو وحده بذاته بس تخابر وتجي تريدلها واحد يفزعلها .. لا سألت متغدي لا

-نسيت هيهيهي

- ضحك وضربني على راسي و يكول ثول الثولج حتى.. دكومي سويلي چاي 

-اگلك عود انته ليش ما تصخر بتك بس فوك معتكفه.. گادر بس عليه

-بالله تلام بيج من ترزلج وتضربج ببو زايد السانج شطوله

-لا والله شبيك والله ظهري يوجعني

-بالله شو يمه خل ادحك وين اليوجعها

- وخر ايد الحجيه ومد ليدو يحك .. ياااا وخرر شبيك.. واخزرو عود الحجيه منا

- عجل غير مرتي انه امرغلها ظهرها ..

الحجيه:- شو دخذها يمها واطلعو منين ثنينكم ومرغلها تمرغلك مالي غرض بس سدو الضوه  خل انام

-رحمه الله والديج يمه والله تفتهمين.. جر ايدي وگمنا .. جان تصيح وراه

-ساعه وتنزلي سالمه البنيه صراااع..

-وين اطي وجهي يمه حتى انتي وراي لا تخافين هي من الله يابسه

-ههههههه صعدنا.. وتمددنا ع السرير خله راسي على صدرو وايدي بأيدو

-اي من دحكتي طلعت عصبي ليش ما لحكتيني للغرفه

-عجل غير انته كلتلي تجفي شري من اني عصبي

-وهاي بساع سمعتيها ونفذتي لو كايل غير شي جان ما نفذتي

-شنو يعني شتريد

-يعني لو الله يهديج الليله وتباتين يمي

-اي

- شنو اي ترديلج فزعه وانتي فارغه املي عيني حتى من افزعلج اكول والله مريتي وافزع واكاون بحيل صدر مو هسه كلشي ما محصلين  

-وشتريد تحصل

-انتي ابقي الليله يمي ومعليج..

-لا عيني الحجيه ما تقبل

-من خذاج وخذا الحجيه وراج

-وين ياخذنا

-بتكسي للسوك ويرجعجن عجل وين ياخذجن هو انه اكدر بلياجن

-هههههه حبيبي .. بقى حاظني ويغفي .. للمغرب يلا كعد نزلت وي نور للعشا وهو راح يصلي. 

كاعد اسوي بالعشا خلصنا بس ننقل .. ادحك ساره تخابر.. كتلها نور بس شويه.. طلعت للحديقه اخابر النت يضعف هناك ويتقطع الصوت..

دخلت صبينا العشا وكتلهم ما اشتهي.. صراع كعد ياكل واني صعدت بغرفتو.. رفعت خط وضلينا نحجي بالنص ساعه ونسأل على بعض

وانطتني رقم ماما لان عجزت ادورو بجهاز صراع ماكو ما الكاه ومن غير جهازو ايست منو..

كالت دزيلي صورة المحروس استاذ شايب نغشعو

-ترحيلو فدوه لج .. غير يجنن

-اي يلا رسلي نشوف ونحكم

-قطعت الخط منها سحبت صور من موبايل صراع الو يخبلون وحده بالدشداشه والغتره ووحده لابس بيها قميص وجينز بعمان قبل لا نتزوج حيل حلوه

رسلتهم الها وخابرت .. كالت هلله هلله والله هلشايب حلو طلع بي شوفه..

-احلى منج يولي

-اي مبين احلى مني من صايره تحجين مثلو عينييي يولي ..

-هههههه من عاشر قوما صار منهم

-الله يديمكم حبيبتي لا بس صدك الله يحفظو حلو .. كثيغ يشبه حسام الرسام

-لاااا ما يشبهو بس طول وسمن .. زوجي احلى عيني

-القرد بعين امو غزال

-قرد بعينج يا قرده..

-ههههههههه بعثيلي صوره الج مشتاقتلج اريد اغشعك

- ما عندي هسه اصور وادزلج.. قطعت الخط ووكفت على المرايه فتحت شعري وصورت وبعثتها..

شو ما عدها نت.. يمكن الكهرب انقطعت عدها.. واكفه وشعري مفتوح واراسل .. دخل صراع

اني من خوفتي طفيت الجهاز بسرعه وكمت ادحك بوجهو ..

-شبيج

-مابيه شي ماكو شي

-شنو ماكو شي شو ادحكين بوجهي ..

-لا والله ماكو شي ..

-شجنتي تسوين بالموبايل

-لا ما اسوي ادحك على الفديوات مال الطبخ . حدر يمي اخذ الموبايل ..

-هلله وحاطتلو رمز .. بالله شو فتحي

-ما بي شي والله

-اي اعرف ما بي بس فتحي عاجبني اگلب بي ميصير 

- اريد اكضب الموبايل اديه ترجف حتى الرمز ما اعرف شلون اسوي .. اسوي وارجع اعيد..

تخصر وتنهد .. يلا فضيها ..

-احس الهوى انقطع.. صراع اگولك شغله

-لا فتحي

-شوف اني ...

-گلت فتحيييييييييي بسااااااع

-فتحتو وانطيتو ..

-ول يابه محمله فيسبوك و ماسنجر وانه يا غافل الك الله .. ما حذرتج تنزلين برامج..

-اي حذرت ..

- عجل ليش ما تسمعيييييين  ... رجع دحك بالموبايل دخل اول محادثه بأسم رجال .. زوج ساره وهو فتح عيونو حيل

-ليليان منو هذا المراسلتو ..

-الدموع كامت تجري .. بس افهمك..

-ول باعثتلو صورج .. حجاها وجابني جف على وجهي..

-بس اسمعني والله ما مراسله ولد.. كضبني من شعري ويصرخ منو هذاااااااااا ..

واني ابجي واتوسلو يهدأ ويفهمني.. يدور بالموبايل ماكو محادثات بس اتصالات وصور ..

كام يعت بشعري ويكلي احجيييييييي منو هذا ..

-صديقتي والله صديقتي

-ول صديقتج رجااااااال انتي شايفتني قشمرررر گبالج..

-خاله ايدي فوگ ايدو وكتلو انت كلت ما تضربني وتسمع مني .. الله عليك خل احجيلك..

-شسمع يول شسمع مكالمات بينج وبين زلمه ما اعرفو منووووووو انه كايل ما تحملين هلبرامج لو لااااااأ

حجاها وطرني بالكاع.. وكعت حيل ورجعت ليوره.. والم بشعري واگلو والله صديقتي قسم بمريم العذاء صديقتي .. صراع الله يخليك اسمعني..

- يتصل بالحساب وهو يفور يجي منا وي وح منا كعد يمي اني علكاع بين التخت والميز لامه نفسي وادحكلو بخوف .

وهو ع التخت وكل شوي يركل برجلو ..

-خابرها والله صديقتي من الابتدائيه بس باسم زوجها لان ما يقبل تسوي صفحة بنيه.

-بنت ********* غير ترد ماكو .. ولج يطلع رجال وناصب عليج بنت الكلب .  انه وين اطمج حيوااااانه.. كلت ما تراسلين لو لا ..

-والله گتلي وما مراسله غيرها والله بس هي صديقتي تريد الموبايل اخذو ما اريدو ما على طول اخابرها نت ضعيف بالموصل

-احجي وهو يهز براسو ويكلي انه الج الظاهر بعدج ما تربيتي ..

كاعد يحجي واتصلت ساره.. كمبص يمي وفتح خط وكال احجي.. كلت الو .. هي گال الو ها ليونه اسفه النت ضعيف ويقطع يولي شصاير بيج شكد متغيره

-ساره روحي هسه بعدين اخابرج..

- براحتج حبيبتي اني هم اروح اسوي عشا لرجلي راح يجي.. باي

-احجي وادحك بوجهو .. سد الخط وكال

-طلعي برا

-حبيبي والله بعد ما اعيدها..

-شال ايدي وكال طلعي مني لا تخليني انفجر بيج واكسر راسج طلعييييي مني ..

طلعت منو ونزلت بغرفة الحجيه جانت فارغه.. فرشت ونمت و ضليت ابجي بفراشي لحد ما نمت ..

ثاني يوم كعدت حزرتلو ريوك وردت اصعد اكعدو طلع كاعد.. كتلو صباح الخير ما رد..

بدل وطلع بلا ما ياكل.. ضليت الوم بنفسي .. واكول استاهل هو حذرني واني ما خذت .. لو صراع قبل كان ذبحني بس عداها وحاول كد.ما يكدر يكضب اعصابو مني وما يضربني قوي ..

هو حاول وياي بس اني اللي ما خذت كلامو .. حظرتلو الغدا وضميتو لحد ما يجي. 

ما جا .. لل9 بليل وماكو .. خابرتو مره مرتين . انطاني مشغول وخابر الحجيه   كال الها انه طلعت واجب لتكريت ما ارجع واحتمال باجر هم ما ارجع لا يضل بالج  

كالتلو ترد بالسلامه يمه الگلب داعيلك.. سلم عليها وقفل الخط.. صعدت لغرفتو وكمت اتخيلو بيها..

ذيج الليله شكد سمعت وعدت اغنية

يا كثر ما شلت في گلبي عليك ..
ويا كثر ما كلت ما اسامحك خطاك
من اشوفك ترجف اضلوعي تبيك
وادري هذا كله من حرة هواك ...
اخلق الاعذار من لمسة ايديك ..
والمس جروحي واثاريها دواك ..
حسبي الله على الهوى وحسبي عليك
الله ياخذني ولا انه خذاك .

ليله شكد حسيت بحبي الو .. كرهت نفسي لان عاندتو وحملت برامج هو ما يحبها ..

الليل كلو اخابرو وما يرد.. لثاني يوم هم ما جا.. احس روحي فرحت عليه بس اريد اشوفو..

3 يوم يلا نزل الصبح جانت هيام توها جايتنا.. اني بس سمعت باب الكراج انفتح وسيارتو دخلت .. رحت حظرتلو مي وخليت بي قوالب ثلج صغار

لان الجو جان حيل احتر وما ينحمل صار .. وجو الانبار جدا مزعج لان رمله واكثرو صحرا ف الجو حراره برطوبه تذبح. 

دحكتو فات من الباب الثاني مو من المطبخ .. وسلم وكعد يمهم حيلو مهدود من التعب وجهو مسمر..

طبيت للهول كتلو شلونك ابو حرب وقدمتلو المي .. رفع عينو وكال هلا .. واخذ المي من ايدي

شرب الكلاص كلو .. بس ما كال بعد.. رحت طلعتلو بيبسي وخليتو ع الثلج .. وقدمتو الو .. ما كال لا بس شافو كال اي والله جا بوكتو  

رغم ما يحجي ويايه بس من عطشو الحر مالتو طلعت منو .. وجهتلو المكيف عليه  

ورحت شغلت ماطور المي وحظرتلو الحمام لان مي التانكي يحمي ويصير حار تطلع روحك.من تسبح بي..

طلعت للغرفه اطلعو ملابس.. دخل هو دحكتو دخلت وراه هيام وتكلو ابو حرب والله عيب

-ام علي كتلج تركي الموضوع تعبان

-يا اخي ما يرادلها شي حرفي ا  و  ي  ... اي وتفض .. ليش تكبر الموضوع وكلما نحجي تسد السالفه

كلها ما معارضه.. الا انت كافي مشيها للبنيه..

-ام علي الولد ما خوش وما يحمل مسؤليه اعرفو .. وعيونو ع الرايحه والجايه يشلع گلبها وحلا ما تتحمل

-اگلك خويه لا اتعبني ماكو شاب ما يدور نسوان .. سعد ما دور انت ما دورت كبل زواجك نائل عابد الله يرحمو..

ما كلكم جنتو ادورن واتزوجتو وعين الله ترعاكم.. بعد.. واذا على حلا ف خويه الا اكلك هي رايدتو للولد

-شنو هلحجي هيام .. ممنوع.. اكسر راسها والله

-شتكسر .. ابن خالتها ورايدتو وجا يخطبها بعد وين الغلط.. لا تكبرها وفضها فدو اروحلك والله يوميه يخابروني..

-الله كريم هسه عوفيها بس ارتاح ..

-اكييييد

-گام منها ما رد عليها.. راد يتقرب للكنتور كتلو حمامك جاهز .. جهزتو..

اندار وطلع.. سبح ورجع .. ردت احجي وياه كال تعبان مو وكتج خليني بروحي..

-طلعت منو .  نام وما نزل لحد ما اجو خوال حلا وجدها وعمامو .. وكالو جايين على ابو حرب النا يمو حاجه. 

عاد صعدت كعدتو.. بدل وغسل وجهو ونزل..  كاعدين بالاستقبال وبس اصواتهم نسمع ويتوسلون بي يفض السالفه وينطي البنيه. 

اخر شي مل منهم وعرف بنتو تريد لان بقت مراقبتو واكفه يم باب الاستقبال .. عاد كال كبعوها يابه بيها الخير ان شاءالله..

هلهلت خالتها وكامت تهوس بعبايتها يمنا وحلا بودها اطير من الفرح دمعت من الفرحه.. فرحتلها خطيه تحبو

كالوله حدد يوم للخطبه.. عاد جاوبهم ع عندي واجب عكب باجر بسامرى .. اسبوع وارجع ويصير خير ..

خال حلا كاللهم عجل باجر يعقدون.. والله بس يروح اسوع ويرجع يبدل ويكول ما عندي مره للزواج ويتراجع

ضحك.. هو وكالو والله انه ما موافق بس لخاطركم ولخاطر الوجوه الطيبه وهو ابن خالتها بعد..

....وخوف من ان يغير رايو ويتراجع.. كالولو باجر نعقدلهم ما نريد لا خطبه ولا هوسه هي الوضعيه تعبانه مو مال عرس ..

كاللهم براحتكم بعد..

هو كالها وهم انخبصو يعني باجر خطبه .. ناس تخطط للغدا وناس للتنظيف وناس للبس وناس لبدلة خطبتها ومكياجها..

اني ما اهتميت الهم كلهم .. كل عيوني على صراع وهو كاعد ما دحك بوجهي ابد... بس تعبان حيل كوه كاعد..

كمل منهم .. وصعد.. صعدت وراه.. دخلت ردت افتح موضوع وياه.. شو اول ما دخلت كال سدي الضوه اريد انام تعبان..

سديتو كال علي المكيف وسدي الباب وراج.. اوووف من كمية التجاهل .. زعلو حيل ما ينحمل ..

مرات اكول كون يرجع يضربني واكرهو ولا يتجاهلني واني احبو واحس بتأنيب الضمير لان مزعلتو ..

طلع من يضربني ويرجع يعتذر بساع .. بس لان ينقهر ان هو اذاني فيرجع يصابح بسرعه.  بس من ما يضرب ويتجاهل يطول بزعلو وابد مو سهل

بحيث يخليتي انشوي على نار هادئه.. 

لثاني يوم .. هوسة خطبه معروفه لا دحكتو ولا ابد مدفونه بالمطبخ.. حتى ما لحكت ابدل .. جو ب2 ونص

اني ونور نغسل بالمطبخ ونسوي جاي .. بس دحكت حلا من جت من الصالون تجنن طالعه كأنها لعابه 

رحت للمطبخ شفت صراع يصيح وينتر وروحو طالعه .. دخن جكاره يمنه ومتوتر وضايج مو كن بنتو تنخطب كأنو مجبور على الزواج..

ويلوم بروحو شلون وافقت وشبيه وانه انطي لذول وهيام واكفه تهدي بي.. ادحك الايد مالتو ترجف من العصبيه..

بس يدخن ويمسح ع شواربو .. لحد ما صاحو سعد.. كالو ساعة السوده الشفتكم بيها .. زت الجكاره يالكاع سحكها وراح..

شويه و هلهلو وخالتها يركصون وخلوص هله هله مثل حصان الربل مدندشه ذهب وتركص وتهوس بالنص زين ما صار عدنا زلزال من الحثل مالها..

طلعو الرياجيل وهو فات ما اتحمل بعد حتى ما بارك البنتو .. رادن يتشكرن منو وكفن هو طنش وصاح ليلياااان .. صعدي وراي ..

يمه يفرحة گلبي من صاح بسمي ركضت حتى بدون نعال وراه ع الدرج.. فات للغرفه .. نزع الدشداشه طرها بالكاع طفى الضوه وتمدد وحط ايدو على عيونو ..

زين اني على شنو صاحني بقيت واكفه ادحك.. وهو امدد شال ايدو وكال ما تكعدين شبيج. 

كتلو اي.. كعدت على طرف التخت وهو على نفس نومتو .. لا ونام فد مره غط بنومتو زين اني شنو موقعي من الاعراب ..

عاد تقربت منو .. هو اني ميته عليه وهو نايم.. فتحت ايدو.. ونمت عليها.. حس بس ما تحرك بقى على نفس نومتو..

تقربت حطيت راسي على صدرو وجريت الغطا تغطينا .. حط ايد على ظهري وكمل نومو..

وهاي بس كعد المغرب.. بعدو زعلان جر ايدو من راسي و گام.. صلاة وكال حظريلي الملابس .. بدل وطلع..

ما رجع غير ب1 .. حتى لا احد يحاجي على الخطبه لو يباركلو لو يدحك بنتو  فرحانه بخطبتها.. ما اعرف ليش هيج متوتر من الموضوع.. 

ثاني يوم .. من الفجر نزل ونزل جنتطو وكال الها يمه انه طالع اسبوع .. من هسه اگلكم جيه لخطيب حلا ممنوع

كلش كلش انتي والحجي تكعدين يمهم ما تكومين لحد ما يطلع.. اسمع مختلي بيها والقران البيت اگلبو فوك روسكم..

گالتلو على امرك.. عاد ودعها اني گمت وياه للباب كال يله ديري بالج على نفسج.  كال هيج .. جلبت بركبتو وحظنتو

وكتلو والله حرام عليك تتجاهلني هلكد كافي عرفت غلطي بعد ما اعيدو والله. 

حظني .. وابتعد.. باس راسي .. ابتسم ابتسامه خفيفه وكال ما اوصيج ديري بالج على نفسج وعلى حرب..

كتلو ترجعلي بالسلامه.. باسني بخدي وطلع..

.. شو ثاني يوم وسريح علينه خطيب حلا .. اول بدايه كعدت الحجيه يمهم ..

ثاني يوم هم اجه .. كعدت يمهم الحجيه.. شويه وحلا اخذت خطيبها وصعدت فوك بغرفتها

الحجيه تخبلت .. رادت تصعدلها .. ام اسعد ما قبلت تكلها هم عاقدين وتحت شرع الله شعندج كاعده على كلوبهم..

والحجي حجت براسو السعلوه وما حجه .. بس الحجيه كامت تلوب .. كالت لو يسمع صراع يتخبل والله يموت ..

ادز عليها حرب .. ما تنزل حلا .. وتكل لحرب لا كلساع داك الباب علينا  عيب حبيبي..

عاد نزل وطلع الولد وكضبتها الحجيه رزايل .. تكلها شنو شعليكم انتو هو بحساب رجلي احنه عاقدين

مو هاي ليليان تصعد يم بابا وياخذون راحتهم وهو بعدو مو رجلها ليش ما تحجين لو بس عليه گادرين

والسانها شطولو.. عاد الحجيه كالتلها يجي ابوج ويتفاهم وياج.. بس ما ردت.. تعرف الحجيه اطمطمها.. وتخاف على صراع يعصب..

صار يوميه جاي الولد وصاعدين فزك وتنزل مطكعه الركبه ازرك... وبكل عين وكحه تترادد وي الحجيه لو حجت..

احنا حاسبين لصراع 7 ايام ويجي .. وخطيب حلا جا وكاعد بغرفتها.. واني بالحمام الفوك كاعد اغسل بيه..

ما احس الا صراع فوك راسي .. ها الله يساعدج..

اني دحكتو ورحت حظنتو بساع.. شفت الحجيه صعدت.. تذكرت خطيب حلا صفرت..

هو راد يدخل للحمام.. اندار ينطيني الساعه.. وكال شبيج لونج خطف.. كالتلو الحجيه شلونك يمه..

عقد حاجبو من دحك الحجيه صاعده.  لان هي ابد متصعد بس بالمشاكل لان ما بيها حيل

هو ما سلم بساع كال الها يمه شصاير ... اني من ثولي بقيت ادحك على غرفة حلا اكول اروح ادك الباب حتى تحس..

كتلو فوت حبيبي ماكو شي .. بس خرب عرضو شكد نبه ويفهمها بساع.. توجه لغرفة حلا وكال منو موجود..

ركضتلو كتلو محد.تعال.. كضبني من ركبتي احجي منو موجود.. كضبتو الحجيه يمه بصلاة محمد عليك اهدئ وهو بعدو كاضبني من ركبتي كتلو خطيبها بس صراع الله ع............

مجرد ما نطقت هو راح لباب غرفتها راد يفتح مقفول.. بلا اي تردد فورا بدفره وحده على قفل الباب كسرو.........يتبع

☆☆☆☆☆☆☆

#زينب_ماجد#مراهقة_و_الأربعيني

،،،،،،،، بقلم زينب ماجد ،،،،،،،،

الحلقة_37

مد ايدو يفتح الباب .. ما انفتح مقفول بلا اي تردد فورا دفر الباب على مكان القفل وكسر الباب..

هو دخل وحلا وخطيبها واكفين كل واحد بمكان.. بس حلا شعرها مكفوش  و الولد حزامو مفتوح..

اول شي سطر حلا راشدي.. وجر الولد من ظهر قميصو من يم رگبتو.. وجر بيه..

واني والحجيه جلبنا بأديه صراع فدوه اتركو .. اندارلي والعيون نار وصاح .. طبي جوووووووووه كلبه. 

تؤكتو ورحت منو ركض وبس الحجيه تهدي بي .. وام سعد جت وتجر و الحجي صعد. والولد كام يدافع..

هذا دافع لو دم صراع احترك.. ضربو كله وللكاع نومو وكع عليه بوكسيات وهم يجرون بي ..

اني واكفه من بعيد واطكطك باديه وابجي وما اكدر اسوي شي. 

كام منو و شالو من قميصو ونزل بيه كتل سوه وجهو فلم .. وطردو من البيت وگالو انعل شرفكم لو جيت ووصلت لهين ابن الكلب اريد اشوف كواااااا... منكم وصل هينا والله لنعل شيب الخلفوكم..

وضرب الباب وراه.. واني من من باب المطبخ ادحك عليه.. فات .. بكل عصبيه .. كال ذيج الساقطه وينها..

الحجيه نزلتها بغرفتها وقفلت الباب.. هو صعد ما لكاها نزل كال وينها.. كضبت قميصو الله عليك اهدئ

دفعني من كدامو وصرخ وينهاااااااااا وراد يفتح باب غرفة الحجيه شافها مقفوله كام يفتح باليده مال الباب حيل ويصرخ يمه فتحييييي الباب

الحجيه:- ما افتح روح اهدئ وحدر نحجي هسه لا تتوقع احاجيك..

-كام يدك الباب حيل ويكلها لا تخلين اكسر الباب والله طلعيهاااااااااااا ..

-ودين محمد يا صراع لو كسرت الباب لا انه امك ولا انت ابني اهج ويحرم علي بيتك ..

-يمممممممممممه اكلج فتحي الباااااااب .. لج ساااااقطه اكضبج لووووو لاااااااا

انه ما گلت فوت للبيت ممنووووووع .. ولكم مسودن انه احجيييييي وحدي كلمه الي بهلبيت ما تتنفذذذذ

والله لهججكم اليوم كلاااااااااااب ..

الحجي:- ولك هدي شوي شجالك الرجال عاقد.عليها اليسمعك يكول فايت من الشباك.. غير رجلها

-رجلهااااا منييييين .. كلب ابن 16 كلب يختلي ابتي ابيتي مكرن انه فاتحلي مكو..... هييييييين

-بويه هو عاقد عليها شرعا رجلها

-لا تخليني اكفر بشرعك ياااااااااا شرع .. خذها وانت نايم مثل رجل الكرسي جوه بيا كاع اطم راسي

تالي عمري ينكشر شرفي وانت ناااااااايم .. ما دحكتو وهو يصعد.. ما منعتووووووو

انه مخليك هين شنوووو تردون تموتوني انتم ..

يصرخ بكل صوتو شرايين ركبتو كلها طلعت احسها من كد العصبيه راح تنفجر ويطكلو عرج..

ابجي وادحكلو لا اكدر اتقرب ولا اكدر اتركو بهلحاله.  عاد صعدت خابرت نائل كتلو راح يموت والله الحكنا

كال انه بالطريق جاي كالتلي نور .. سديتو ونزلت وهو على نفس الصياح.. بس شايل البلازمه كاسرها ..

طبلتين طارهم بالكاع مسويهم طحين.. وبعد يصيح.. واكفه ع الدرج وادحك.. فات نائل وكام يجر بيه وهو يدفعو ومستمر بصياحو ..

اخذو غصب عنو ودخلو للاستقبال وصاح ليلياااان ماي لرجلج بساااااع..

اني ركضت اخذت بطل وكلاص وركضتلو ... دخلت صراع يفرك بوجهو ويصفك باديه ونائل يحجي ويهدي بي..

قدمتلو مي ما اخذ .. نائل اخذو وكال اشرب واهدئ خويه وغصبو يشرب شوي ..

انطاه الكلاص لنائل واندارلي.. انه شكم مره اخابرج ليش ما تكليلي هلساقط يدخل بيتي مخيلتيني على عمى عيني والماي جوااااي

-اني شعليه واكول من غير هيج الكل يكرهوني مو انوبه افتن..

صراع: وتاركتني مثل المطي اكلج شلونهم تكليلي بخير حقييييره

نائل:- خويه لا تلوم عليها انوبه رجعت على هاي شلها دخل وتحجي هم يكولون فتنت على بنتو وخلا يضربها ويسووها مرت اب..

كعد يحجي وياه.. عاد كام وكعد بالهول صراع وكالاهم انه كاعد هينا وارد.اشوف شلون تطلع بت وجدان لا ما اطمها بصف امها فلا اتسمى بسمي..

وبقى كاعد يشرب جكاير ويزت بالكلام ونائل يمو واني ونور انظف بالهول سوه الكزاز طحين بكل مكان وماكو شي بمكانو.. 

ساعه ساعتين صار العصر وهو بمكانو والكل كاعد مترقب يمو .. اني خلصت شغل سبحت وطلعت..

بردتلو غرفتو وطفيت الضوه .. ونزلت كتلو كوم لغرفتك.. ما رد.. حبيبي الله عليك اصعد ارتاح

-بعدي من وجهي لا تخليني ابتلي بيج والله..

عاد كومو نائل و نور كوه وصلوه للدرج.. وكال انه اذني يم الباب لو سمعتها انفتحت .. انزل واعلمكم التربيه شلون تصير..

راح للحمام كبل ما فات لغرفتو.. بقيت انتظرو شوي وفات سابح... بدل وتمدد ودار وجهو ونام..

خفت اتقرب منو لو انطق كلمه.  اعرفو مثل الجمر الابيض التحسو هادي بس تهيجو وتتگرب منو يشتعل ويحركك..

ولا اكدر اطلع او انزل جوه.. اولا يفز وينتبه ويرجع يتعصب لو يعصب اكثر ويكول انه ما هامج ما تكولين اگابل رجلي لا يموت اتركيني نايم ومو ابالج..

ف باوقات اعصابو احير شنو اسو .. اخاف حتى اتحرك من السرير ويطلع صوت وستفزو..

فنمت بمكاني واني داره وجهي عليه.  هذا احسن حل.. نايمين وظلمت الدنيا وصارة الصلاة وهو ما كعد..

خفت اصحي.. اندكت الباب .. فزيت من مكاني وفتحتو .. طلعت نور.. كالت بس خبري ابو حرب كوليلو اهل الولد.جوه يردون يعتذرون منك...

سديت الباب ودرتلو كاعد ومنزل رجليه من السرير .. ردت احجي هز راسو بمعنى سمعت 

حسيتو شوي اهدئ من نام  تقربت يمو وهو كاعد منزل عيونو بالكاع ويفكر.. حطيت ايدي على زندو وگربت بستو بخدو..

اندار يدحكلي..

-لا تسوي شي بروحك فدوه .. والله اخاف عليك.. من بعدك اضيع والله.. حجيتها وبجيت ..

شال ايدو وحظني بيها .. رفعتلو راسي الله يخليك فكر بيه  لو صار بيك شي وين انطي وجهي محد يفتحلي بابو واخويه بداعش مايرحمني والله..

-باس گصتي ... لا تحجي هشكل .. يمج انه ما اروح.. 

حجه وگام بدل ورتب نفسو  ونزل .. نزلت بوراه..

شو الوجوه مگلبه عليه.. هو فات للاستقبال واني ادحك بيهن وحدتهن تخزرني.. خالات حلا موجودات وخلوص وياهن وام سعد..

اخلاص:- بالله شستفاديتي من فتنتي على البنيه وكلتيلو خطيب حلا بغرفتها

-اني هيج كلت

ام سعد:- اي وتنكرين انه صعدت وبوجهو حجيتي هلكلمه و خليتي يدفر الباب

-ما اني والله سألو الحجيه..

-الحجيه ماكو كاعده هناك يم الرياجيل..

-والله مو صوجكم اني اصلا ردتو يدخل الحمام حتى ادك الباب وانبها

اخلاص:- ما حرام عليج بس تردين تتشفين بيها وتخلصين منها ... انكتلت هسه شستفاديتي من اسمومج..

-دحكي اخلاص اني لا سبب ولا جنت سبب واحترمي نفسج لا وقسم بيسوع اصيحو هسه واخلي يطردج من البيت

عاد اختها كالتلها سكتي منها رحمه لاهلج اخلاص ما عايزين لا تروح بيها حلا من وره هلمسمومه 

دا اريد ارد.. طلعت حلا من غرفة الحجيه وتگلي لا تتوقعين اعديلجياها بالقران لا ما طردتج من هلبيت على ايدي فلا اطلع انا بت ابوي ..

-دولي لج.. تهدد .. بيج خير اكفي كدامو مو جايه تهددين بيا من وراه..

عفتها ومشيت وهن يغلطن  ويتحسبن عليه..رحت يم باب الاستقبال .. هيام واگفه.. كتلها هلا جيتي.. اشرتلي اشش ..

ووكفت اتسمع وياها.. اهل الولد باسو راس صراع وتعذرو منو ويقسسمولو شهر وياخذوها بس يكملون تجهيزات بيتهم..

عاد گال الهم ما ادحك وجهو ابيتي منا ليوم العرس واذا شفتو..  لحد يلومني لو حطيتلو چيله براسو..

كالوله مثل ما تريد.. عاد جد حلا حجه وياه حتى ما يضرب حلا وگالو انه اريدها هليومين عندي

جاوبو صراع.. حلا مالها طلعه من هلبيت الا بيوم عرسها تنگص رجلها وما تطلع 

شويه واعتذر منهم كال الهم انه اترخص البيت بيتكم تعبان جنت بواجب اليوم اجيت.. اتعذر منهم وهم كلهم سلمو عليه وگامو ..

الحجيه طلعت گبلو هي وهيام وراحن للغرفه .. الحجيه طبت و هيام وكفت بالباب حتى ما يكتلها  

هو ما اهتم الكل الموجودين ولا الهيام.. صعد كبال بدون كلام.. اني رحت للمطبخ حظرتلو عشا وسويتلو عصير فريش برتقال.. ورتبتلو صينيه تفتح النفس وصعدت..

دخلت امدد ع التخت وصافن بالتلفزيون.. يدحك اخبار.. كتلو تعال تعشى .. هز راسو كام اني خليت الصينيه بالكاع ومستمر يدحك بالاخبار..

تنهد وكال بالله شتحجي لا دوله بيها خير لا شغل بي خير لا اهلك يريحون بالك وين اهج  من الله لا ينطيكم  

-حتى المره ما بيها خير مو .. وابتسمتلو

حجه وهو يمد ايدو للاكل ويكول .. :-تعرفين نفسج ما حاج احجي . 

-سكتت.  بقيت ادحك ع الاخبار كلها تخص الموصل والجيش .. الوضع نار

اصلا اليسمع اخبار تحترك روحو فوك قهرو.. ياكل وهو عين ع الاكل و عين ع الاخبار ومعليي..

ما حجيت وياه كلشي لان هم معصب ويسب بالحكومه و بالارهاب ومحروگ دمو ..

كمل راح يغسل واني نزلت الصينيه.. وصعدت.. هو راجع لنفس كعدتو بالكاع ومنتجي ع التخت  ومدد رجلي..

اخذت موبايلي ونمت على رجلو .. حط ايد على راسي وهو يدحك تلفزيون واني العب بالموبايل   

ما حسيت الا هو يشيل راسي من رجلو ويحط مخده.. واني غاطه بنومي.  زت مخده ثانيه يمي وجر الغطا من السرير ونام ع الزوليه وياي  وغطاني

ودار ظهرو للتلفزيون بعدو يدحك اخبار اني هم درت منو وكملت نومي..

لثاني يوم.. فتحت عيني .. جسمي مكسر من الكاع.. حسيتو ورايه.. اندرت .. ماد.ايدو على راسو وصافت..

جريت ايدو ونمت عليها وكتلو بشنو صافن..

-ليليان الوضع ما زين كلما جالو داعش يتمرد والعساكر بخطر .. اليبطل ينسجن او ينعدم و اليبقى يلاحكو داعش ويكتلو ..

لا دوله تحمينا ولا واحد يأمن حياتنا.. الخطوه الاخطيها من الباب ما اتأمل ارجع الخطوه سالم لبيتي. 

-لتحجي هيج حبيبي والله دوم ادعي الرب يحميك .. هز راسو بس ما رد..

بست كتفو وبقيت نايمه يمو .. وهو يتنهد.ويفكر.. گتلو كوم واترك كلشي على ربنا هو يرحمنا ويحمينا..

گمت منو .. هو كام كعد ع التخت.. لميت شعري وعدلت نفسي وطلعت..  غسلت ورحت للمطبخ احظر الاكل..

سمعت صراع ونائل يحجون ويسبون ويفشرون .. طلعت اركض .. لكيتهم على الاخبار..

ما اهتميت .. بس من كالو سقطت الموصل .. هينا نص حيلي .. يعني شنو سقطت الموصل ..

-وكعت بيد الارهاب اخذوها الدواعش والجيش انسحب كلو ولا جندي بقى على ارض الموصل سقطت  ..

الحجيه:- يمه اسم الله الستار ربي .. يمه وين نروح لا يوصلون الرمادي وين ننطي وجوهنا..

... ادحك ع الاخبار والدموع تتجاره.. مو فقط محافظه وسقطت لاا.. اللي سقطت هي امالنا وذكرياتنا واهلنا وحياتنا طفولتنا ولمتنا وقيمنا 

ادحك الجوامع والقنوات والاذاعات استحلتها داعش..وكامت تذيع منها ..

اندرت على صراع كتلو بالله عليك خابرلي امي..

-ليليان سكتي رحمه لاهلج

-صراع امي بالموصل وهي مسيحيه فدوه خابرها لا يكتلوها بس اسمع صوتها .. صراع الله يخليك..

-ولج شخابر حتى شبكات بالموصل ما بقى ... داعش استحلت كلشي ...

-زين خابر يحيى يطمني على امي

-ليلياااااان تنسين اسم شخص اسمو يحيى بحياتج هاذ داعشي تعرفي شنو يعني داااااااعشي

-بس اني اريد امي حرام عليك اريد اعرف هي وينها ..

نائل:- صراع خابر خالها دحك يمكن امها عد خالها و خل تطمن عليها..

-رفع الموبايل بحيره.. متردد يخابر يدحك بوجهي ابجي ويتنهد.. خابر الله عليك بس اعرف امي..

داس اتصال وخابر على خالو .. سلم عليه وحجه وياه على الاوضاع بالموصل.. خالو حالو حالنا يحاول يتصل بأمي ماكو

كل اللي يعرفه هي جانت ناويه تطلع الموصل على الاحداث بس ما جت.  وداعش طلب من المسيحيين اخلاء المدينه والمغادره فورا..

وانطاهم يوم واحد يتركون اموالهم وبيوتهم و فلوسهم ويتفتشون ع الحدود ويطلعون بس بارواحهم..

مئات المسيحيين طلعو من الموصل بيومها وحتى مسلمين شردو وتهجرو وطلعو من الموصل..

اول دخول داعش ع الموصل ما فرض قوانين راد يستدرج الاهالي ويعاملهم باللين .. ما قتل وذبح وفرض النقاب للمرأه وتقصير البنطلون وتطويل اللحيه للرجل ..

بس من شافو اغلب الاهالي رافضين دخولهم فرضو القوانين وقامو الحدود واخذو الناس قتل وترهيب

كنت منتظره امي تطلع من الموصل بس انقطع اثرها وصراع ما يقبل يتصل بيحيى و الخطوط تقريبا انقطعت والشبكات شبه ادمرت..

بوقتها حتى النت قطعوه ع الموصل .. بقى گلبي مثل النار على امي .. لا اني للسما ولا اني للكاع.. اتمنى بس اعرف خبرها..

حتى ساره صديقتي انقطع التواصل بينا رغم صراع كال راسلي ودحكي بلكت اطمنج على امج.. بس ماكو كن اختفت لان هي ما طلعت الموصل بقت ابيتهم..

گابلني صراع واني ابجي.. وكمبص گبالي وكعد..

ليليان   سمعيني يابه.. وضعنا ماهو زين واذا اطلع ما اتوقع ارجع.. سمعه هلچلمه مني ولا تنسيها

لو متت وصار بيه شي

-لا تحجي هيج ما بقالي احد لا تحجي هيييج..

-دحكي يابه واسمعي فدوه لعينج  ..لو متت ممنوع ترجعين لاهلج.. الج حصه بكل ما املك.. تكعدين وي امي ما اطلعين. 

لا تسمحين بعد.موتي يكولون مرت ابو حرب عد الدواعش.. صوني شرفي حتى بمماتي ولا تنزلين راسي ..

انسي عندج بيت واهل بالموصل انسيهم راحو.. هذا بيتج وانه اهلج.. لو متت كعدي ابيت ولا اطلعين ورجلج على رجل امي وهيام

... حظنتو وگمت ابجي .. ايام عشتها بالقهر من وره امي واهلي وناسي بالموصل .. لا اكل ولا اشرب ..

وصراع يا دوب نشوفو .. اكثر ايامو خفارات وما ينزل ... واني حالتي تعبت وفوك همي انوبه وجع صار بسني ما طبيعي

كمت اكضب راسي واصيح من الالم..  خابرت عمتي على هيام .. كالتلها العصر اجي اخذها للدكتور .

للظهر وطب صراع سلم بس ضايج والتعب هاد حيلو ونفسيتو تعبانه.. رغم صارلو اسبوع ما داخل النا..

بس كن ما طايق احد.. سلم وهو ماشي.. وكال صاعد انام اليكعدني يحسب الله ما خلقو..

اني جنت جوه كاعده شكد مشتاقتلو بس لا شفتو ولا شافني وما بيه اكوم من وجع سني احس بالموت من وراه..

هيام ما كدرت تجي العصر خابرت الحجيه كالتلها باجر اجي اخذها علي عندو امتحان فيزيا وهو درجتو مو قويه وبس اطلع يطلع يسرسح وي جماعتو ويترك امتحانو

يطلع باجر للامتحان واجيكم اخذ ليونه .. انطيها براسيتول و حبه مال التهابات بلكت تهدأ منا الباجر..

عاد ضليت اخذ بالحب مال الدوا وما يفيد.. اخذت فاليوم ونمت كوه لثاني يوم الصبح..

كعدت الم بفكي السفلي يموت كمت ابجي.. شديت راسي وافتر وابجي واخذ حبوب كن بالحايط ماكو اي مفعول

والحجيه تصيح.. يولي حدري اعزملج.. كتلها بربج يوووم هي مال عزامه والله جاي امووووت..

لل11 وطبت هيام.. اخذتني للمستشفى .. دخلنا شافتني الدكتوره..

كالت هاي يحتاجلها عمليه لان ضرس العقل يريد يطلع  لازم نفتح اللثه ومسحبو..

سمعت بيها عمليه.. سحبت بوش.. كتلها ام علي خل تكتبلي مخدر وحب ونرجع ما اسوي لو اموت

كلتها وطلعت وهيام تصيح يولي صبري عجل شلون تموتين من الوجع اتحملي ساعه ولا 24 ساعه ولج خبله. 

ابد ما رديت هي مال عمليه هو اني صايره فلم هندي.. عاد اخذتلي علاج ورجعنا للبيت

صراع كاعد بالهول وگالب الجهره ومعصب والبيت هدوء من وراه كلها تخاف يبتلي بيها..

دحكني فايته من بره ا گاضبه خدي وامشي ميته من الوجع..

حجه :- وين جنتي يولي طرطور انه عينا ما تحجين من اطلعين..

عفتو ودخلت للغرفه ما بيه احجي وابرر .. حجتلو هيام كل الحجي.. عاد فات عليه اني بعدني بالملابس والحجاب..

كال:- ليش ماسويتي العمليه وخلصتي من الالم..

-ما رديت سني موتني بس اون..

-كومي بويه انه اوديج

-اشرتلو لا ما حاجه .. روح روح

زكح: اكلج كومي بساااااع لا تضلين بس تونونين انه اخذج دكتور اختصاص يفتهم ويداويج بدل ما ضاله ميته هينا.. كووومي

-كمت وگفت هي فزه وهي وگفه .. عصبي وما يتحاجى و مابيه جفو خدي وحدو سايح من الالم

-انتظري ابدل وانزل

صعد بدل ونزل .. جانت بالوحده كال لل2 يفتح صبري شويه .. شافني ما اتحمل اكعد..

صراع:- كومي بويه اخذج افرج تبقين هينا تموتين..

-صعدت وياه يفر وينافخ ويسب بالوضع وساعه يدحك عليه وبالو يمي ويكول سهله سهله

وهم يرجع يسب بالسياسيين.. يمكن طبو الجنه كلهم من وراه كد ما يسب بيهم..

اني صايره فلم وهو يحجي بالسياسه بالله شفهمني وشحجي وياه.  .. عاد شافني ما رد.. سكت وكام يمشي وينافخ ويرجع يدحك ويكول هسه اخذج لليل يطيبج والله..

وصلنا الدكتور كوه اجه ودخلنا اول الناس .. كالو نفس الحجي اللي كالتلو الدكتوره والا عمليه  

كالو اي سويها الها.. اني اندرتلو وفتحت عيوني وصحت اااااااااا

-وجعاا هشششش خل يسويها واخلصي لا اطلعين حسج. 

-حتى ما اكدر احجي وادافع سني ذبحني وصروع يتأمر انوبه عمليه اهئ اهئ اهئ

دحكت الدكتور حظر ابرة البنج.. فتحت عيوني ...احس اطرافي ثلجت من الخوف .. وصراع كاعد بعيد عني واني متمدده..

جا تقرب.. وكال فتحي حلكج والابره بيدو.. كمت ابجي وكتلو اني بشاربك تكتور لا قوي عفيه. 

-ضحك الدكتور وكال ما اذيج.. وصراع كام وكف يمي ويضحك ويكلي صبري شويه ام شوارب بساع تفض. 

- غمضت عيوني واني كاضبه ايد صراع.. واعصر بيها حيل تبنجت بس من يشتغل احس بوجع حقير..

سويتها فلم مو عمليه ساعه كامله لا اكدر اصرخ ولااكدر ادفع الدكتور بقيت اعصر بأيد صراع واكرص بيها واشلع بشعر ايدو

وهو ما اسمع منو بس ردات فعل ششش اووو .. اخر شي كال كرصي بس بربج عوفي شعر ايدي هلستيني. 

اني كن ما اسمع واكرص اهلس حتى يحس بألمي .. خلص الدكتور العمليه واني الدموع تجري..

جر الكلنكس ومسح وجهي وسندني وكومني .. كتبلنا علاج وطلعنا للسياره .. كن فاقده سندت راسي ولا اني نايمه ولا كاعده..

بس مغمضه وفاقده.. سمعتو وهو يكلي هاا توجعج.. اشرتلو لا..

نزل يم محل مرطبات .. اخذلي علبة ايس كريم وصعد.. حطها بحظني ويمسح على راسي ويكلي خليتو يخليلج عليها كاكو ..

..للحظه حسيت نفسي ابنو حرب وعيشهي ويمازحو حتى ينسى  مو مرتو وشكبرني..

وصلنا للبيت .. جايين خطار عفيه بيت مكبره ياخذ ما ينطي ابد ما يخلا.. كلها ملتمه.. فوتني من باب الهول وصلني للدرج صعدني اول درجه..

اختل عندي التوازن كعدت.. كال هااا اصعدج..اشرتلو لا لا ودنكت.. صاح ام عليييي .. وهو بيدو علاكة العلاج و الموطه..

جت وهم يسألون شبيها .. هو ما رد هيام كالتلهم مسويه عمليه الثتها .. واخذت العلاليك من صراع ودتهم وجت اخذتني وصعدت وهو راح للاستقبال..

صعدنا.. اشرتلها منو موجود.. بيت عمي عزام و بيت صالح.. نفخت روحي واشرتلها يعني ام حثل وياهم..

ضحكت وكالت اي.. اهووو

نومتني وجابتلي كلابيه بدلتني و انطتني العلاج ونمت.. نص ساعه وفزيت على وجع اويلي احس وجهي مشلوع

كمت لحيلي افتر متت الوب.. اخذت الجهاز دكيت على هيام ما ترد.. دكيت على صراع.. رد بساع .. واني ابجي كتلو الحكني راح اموووت

خطيه قفل الخط وثواني وفات للغرفه. شافني منهاره من الوجع..  انطاني العلاج واني الوب ادفن راسي بالمخده واصرخ من الوجع وهو يحوم فوك راسي . 

عاد دحكتو طلع واني ابجي شوي وطب بيدو حبه مال مفاصل قويه .. كال شربي وهسه يروح بساع الوجع ..

شربنياها.  وانطاني ماي.  وكعدني بحظنو ويفرك بضهري واني الو.. شوي وفعلا هديت حسيت اختفى الوجع

وهو يبوس براسي ويحظن ويكلي هانت حياتي خلصتي منو .. بقيت نص ساعه نايمه على رجلو..

وصحيت كعدت.. كال هااا شلون صرتي..

-احسن..

-ننزل شوي تاكلين وتغيري جو الغرفه..

-يلا.. نزلت بس بعدني ثكيله من الالم وحلكي كن مضروب شرجي.. نزلت كافيين العشا..

ناس بالمطبخ ناس بغرفة الحجيه كعدت يم عمتي بالهول وخليت راسي على متنها.  وهو كعد يمي ..

عمامو اثنينهم كاعدين.. هو كعد يكللهم على مريضه و عمليه .. وصاح هلى حرب كالو كوللعمتك تجيبلها الموطه.. خل تاكل شويه..

الفتت خليت راسي على زند صراع وهو كاعد..

شو خلوص من يمها نطت على اساس تتشاقى وتكول شنو شكو سالمين ليووون تره لا اول ولا اخر وحده على شنو هلعياره حياتي هيهيهيييييي 

اريد ارد حلكي وارم.. عاد هو اندار وكال الها ليكون تدلل عليج بت عمي ..  مريتي وتمون تتدلل على گلبي

فجأه اختفت الضحكه من وجهه وتكلو ول شسالفه ابن عمي تره دنشاقيها

-وكت شقاج يابه المره شاكين لثتها بعمليه وتكليليها عياره ..

-الكل كان يحجي مع بعض بس شو صار صنطه وكلها انتبهت هي كامت تنطي الوان.. بس والله ثلج گلبي بردو. 

جا حرب انطاه علبة الموطه باسو بخدو وكالو جيب خلشوكه وتعال اكل وياها.  خطيه ركض ..

كام ياخذ شويه ويطعمني.. همستلو وين هيام هو نزل راسو ويقرب مني اذنو حتى يسمعني لان هوسه كاعدين...  كال راحت تردين شي

شفت خلوص ادحك بستو بخدو وكتلو تعبتك.. هو تفاجى وفتح عيونو وضحك  وعمامو ضحكو ويكلوله ياله شنو هلدلال ناس توكل وناس تبوس عمي ما تصعدون فوك..

هو ضل يضحك ويحك برگبتو من وره.. انوب همسلي وهو منصي..:- والله جاي على بالي اصعد اخلاص يمنا فوك..

اشوفها مفعولها قوي وياج  بكلمه غرتي وبستيني جدام عمامي عجل لو اصعدها يمنا شسووين ..

بلكن الله يهديج علي وتفض ..

ضحكت ودرت وجهي منو .. كعد حرب كابلنا وياكل موطه وياي لشويه والكل راح.. اني فتت كوه فرشت الي ولحرب ونمت..

وحلا نايمه بمكانها بس لا اني احجي وياها ولا هي تحجي ويايه والايام الفاتت اني مريضه ما تكربت مني .. ولا اني الي علاقه بيها..

صراع سحب الموبايل منو بس اخلاص تجي كل يومين تبقى العصريه وتروح.. وتخلي الموبايل عد حلا..

صراع يعرف بس ثاولها ما يريد يضغط اكثر مكتفي بخوفها منو هيج لا موبايل ولا هو يجي يشوفها

بس اني حيل اتضايق من تجي اخلاص.. تضل تستغل اي فرصه تحجي بيها وي صراع وتبقى هو يكللها بت عمي وهي ابن عمي..

تكول كاعدين باب الحاره مال اكضبهم راس براس طكت روحي منهم..

لا وتصير خيره وتنفرد بي عود تريد تقنعو يحجي وي حلا ويسامحها بس هو ابد ما يقبل لا يدحك وجه بنتو ولا تكابلو..

ف يوم دخل صراع لببيت من الدوام وكعد بغرفة الحجيه يحجي هو وياها.. كسر المخده و مدد وهو يحجي .. 

بعد شويه تكاسل ونام بمكانو كال بس صعدي بومبايلي ع الشحن .. طلعت كالت نور ما يصعد فوك..

كتلها ما يقبل تكاسل وما بي حيل يصعد.. البيت يضوج من ينام جوه لان ممنوع باب الحجيه ينفتح كلساع ومننوع صوت بالهول

لازم سكوت تام فيتقيدون ويريدو يصعد فوك.. خاصه غرفة الحجيه مزار ناس اطب وناس تطلع وين تنفع ينسد بابها وينام. 

واذا ما انسد معناها يكعد عصبي ويبتلي باللي فتحالباب وتصير هوسه .. ف كل واحد طب بغرفتو وسكتت البيت. 

وصعدت للغرفه مالتو حطيت موبايلو .. جان يدك .. دحكت الاسم .. كاتب بنت العم..

انطيتها رفض .. اتصلت وهم رفضت و5 مرات ارفض.. عاد. بعثتلو مسج.. (شكو ابن عمي تخلي بالي ليش ما تجاوب.)

بعدني اقره اتصلت.. من غبائي دا ارفض .. جاوبت .. وسديتو ع السريع بعثت مسج لاخ.. ( لايكون ضجت مني وجاي اضايقك بس حبيت استفسر على اللي كتلك عليه ليش ما تجاوب فدوه )

صفنت .. هذا شيتملعب من وراي .. والله لنعل الخلفوكم لابو عمامكم بت عمي وابن عمي . 

عاد بعثتلها مسج (بت عمي حسي على نفسج شويه واخجلي دشوفين جاي افصلو ليش تلحين)

بعثتها شو هاي هرتني هري بالمخابره فوك ال10 نرات انوب بعثت.. (شجالك ابو حرب ذيج الساعه شلونك وياي شغيرك)

بعثتلها ( والله هذا الموجود بت عمي والشغله البالج انسيها) رجعتلي الرساله (والله خلف الله عليك بس انت وعدتني وهسه تراجعت. واني ظاله عليك ما توقعتها منك ابو حرب)

عاد حذفت كلشي من رسايلو ونزلت.. بس شنو الشغله التريدها اخلاص من صراع لا وهو واعدها ومن وراي .. وهي ضاله عليه العوبه..

عاد والله نزلت وادحك عليه نايم.. واني من افكر بشغله .. انثول جبت مخده ونمت وتاجيه راسي بايدي وادحك عليه..

شجاي يلعب من وراي هذا لا انوبه يعرف وانكتل... بس والله لتغدا بيك گبل لا تتعشى بيه  

بيناتنه شبرين وامدده وياه طول بطول وادحك بوجهو.. كعد وشافني كبالو فز ..

-ها بويه سالمين مضيعه اهلج بوجهي. 

-عاد خجلت  وكمت بلا ما احجي ..

-ول يابه شكو .. يولي احجي شبيج.. 

طلع واني ادحكلو طلب جاي انطيتو وصعد يسبح واني بغرفتو.. افتر هله هله ويريد يطلع  اي مو هي بكيفو يتواعدون..

فتح باب الغرفه تخصرتلو.. دحكتو بالمنشفه درت منو بساااع .. لبس و جا يمي وهو يلبس بالفانيله. 

-شبيج يولي شو ما على طبيعتج اكو شي ..

-اندرتلو وتخصرت والله انت كلي شكو

-غير افتهم حتى اكلج يابويه شتردين.  يحجي وهو يلبس ..

واني متخصرتلو واثقه من نفسي.. كتلو وين طالع

-للنادي ليش محتاجه شي..

-احترت شلون الوفها علي واطب بسالفه عاد حجيت بصيغة تهديد وفتت بالموضوع وكتلو..

دحك لو عرفت ضام شي عليه لو لاعب بذيلك تحلم اسامحك..

-هو رافع ايدو يمشط بشعرو.. فتح حلكو وعيونو وكال هاي ويايه تحجين

-عجل وي خيالك..

-عقد حاجبو بتعجب وكال لا وتهددين .. طر المشط ع الميز وكال تعالي لشو بويه سالفتج ما خاليه. 

جر الطابويه وكعد.. وكال حدري لشوف فهميني شكو براسج..

-عاد هينا ضليت اصوصي خاف احجي والوصها على روحي ..  يربي شلون حطيت روحي بموقف بايخ

قويت روحي ورجعت تخصرتلو وكتلو شعندك شغل وي بت عمك

-شغليش هذا يولي

-والله ما اعرف  اسأل نفسك

-وانتي شدراج

-شدراني عيني من الموبايل الماسكت بشنو واعد الهانم بالله. 

شو هذا فز راح لاموبايل بحوش ماكو شي.  اندارلي يولي شمصخمه. 

-والله هسؤال ديرو النفسك وكول شمصخم من وراي.. احجي ومكفه ايد واهز برجلي مسيطره

شو هذا بساع اتصل.. اني فتحت عيوني واجيت احجي.. هو كال الو ها ام عمر خويه..

واني سحبت بوش  هااااا يعني مو اخلاص عزاااااااا .. شو هذا بساع خزر وعض ايدو ويسولي اشارة الانعل ابوج 👌👌

هنا مثل واحد وصب فوكي بطل زيت الاصت عدي فد مره عاد لازم اتصرف بذكاء وانقذ نفسي بس شلون وهو يخزر واشارة الانعل ابوج تشتغل .....يتبع

☆☆☆☆☆☆☆

#زينب_ماجد
#منقوووولة        
                                     #فوفة الحلوة