رواية مراهقة والاربعيني الفصل الثاني والعشرون 22 - بقلم ڼدىَ

#مراهقة_و_الأربعيني

،،،،،،،، بقلم زينب ماجد ،،،،،،،،،

الحلقة_38

ادحك بوجهو بخوف يربي هاي مو اخلاص عزا بعيني ..

صراع:- والله خويه كمل روحي استلمي لان انه اليوم ما صارتلي طلعه للجوازات..

-يلفشله الشغله شغلة جوازات واني عقلي جرخ بغير سالفه والله اذا كضبني هذا ما يخلي بيه عظم صاحي..

يحجي ويخزر بيه ويكول بالله الكريم اسف جدا جنت نايم جوه والجهال الضاهر لاعبه بموبايلي ..

ويأشرلي عود اصطبريلي.. اني هينا كمت اتراجع خطوه خطوه نحو الشرده.  واريد اوصل الباب ودحكتو ضحك..

ويكول اسف بالله ما يصير خاطرج الا طيب.. اي هههه يمكن ..بعد مراهقه وابتليت بيها شسوي..

يحجي ويتقرب ويكول مراهقه وابتليت بيها هذا شراح يسوي بيه والله ليجرم بحالي.  اشرلي عود اكفي بمكانج ولا اطلعين.. هينا قريت على روحي السلام..

تمنيت اتبخر ولا اضل كدامو .. وهو يحجي :- سهله ان شاءالله سهله انتي صوريهم الرسايل و بعثيلياهم خاص .. .

لا شلون ما صار شي غير افتهم واحاسبها حتى لو مراهقه.. في امان الله هلا بيج خويه.. هلا بخيتي..

قفل الخط وكضبني من ايدو .. هينا حسيت روحي مثل حاجه زتوها من سطح وتكسر واطشر .. بخوف ادحكلو ..

-شمسويه ولج ..

-ما مسويه شي  

رن الجهاز.. وهو كاضبني من ايدي فتحو ولكه تصوير للمحادثه الباعثتها اني ...عقد حاجبو وهو يقره..

كمت ارجف كلت هاي بعد.. الله يرحمني  .. دحكلي بخزره

-يولي منو سمحلج اتفتشين بموبايل كم مره انه محذرج..

-والله بعد ما اعيدها

-انتي ما تستحيييين.. ما كلتي هذا شنو موقفو من بنت عمو من راسلتي من موبايلي شكال عقلج..

-عبالي اخلاص والله ما عبالي هاي

-ولج هااااااي شنو انتي شعليج بشغلي وموبايلي .. طر الموبايل ع التخت

. ويحجي ويعت بيدي وياخذني ويردني  .. يول انت ما عندج عقل ..  شلون هيج تفشليني جدام العالم وتصغريني

دحكتو حيل معصب كمت ابجي وحظنتو وكتلو ما اعرف ما عبالي هيي..

مسك راسي من شعري وجرني من صدرو وكال هسه انه شسوي بيج  بدينج انطقي شتصرف ويااااج. 

-اي اضرب اضرب شتسوي هو بعد اني صايره ملطشه عندك لو عندي اهل ما يخلوك تضربني بس شسوي مالي احد...

عقد حاجبو وكال يولي شتخرطين انتي.. ويعت بشعري

شفت البجي ما فاد وياه .. عاد حطيت عيني بعينو وخزرتو واني احجي واكلو بكيفي ما اقبل تراسلهم والله اذا راسلتهم اراسلهم بعد وارزلهم انت رجلي وحدي واللي تتقرب منك والله اكطعها وصل..

خف ايدو بشعري وحسيت عيونو تريد تضحك ويكلي خبله انتي يولو ..

.. شفت وجهو بي مجال ضحكه ..وكفت على رس اصابيعي وجلبت بركبتو وحظنتو وكمت ابجي واكلو والله انته اليه مالتي معليه   

ضحك وتغيرت كل ملامحو وهدأ لف اديه على خصري وحظني.. :- يولي شوكت تكبرين وتعقلين ذبحتيني

باسني جوه اذني وابتعد وكال دحكي هلمره راح اعديها  واكول جاهله بس قسما بالله العظيم يا ليليان لو شفتج مره لخ كاضبه جهازي محد.يخلصج من ايدي

كضبي مرة  اللخ وشوفي والله لعلمج النسوان شتجيب.. 

حظنتو وكتلو تمام.. بعدني وكضبني من حنجي ويكلي :- هو انه ما محصل منج غير التمام وماكو شي وياج ماشي تمام  

عقدت حاجبي .. ليش

ابتسم وتقرب باسني.. وابتعد.. اندار للمرايا عدل نفسو ودنك للجهاز اخذو .. داس بيه دحكو يشتغل   ..

اخذ الساعه لبسها وطلع وهو يلبس بيها.  هينا تنفست الصعداء وييييي خلصت جان متت الحمدلله الدموع جابو نتيجه 

نزلت بوراه.. طلع للكراج.. سمعتو يحجي وي نائل وصوت كلب بالحديقه.. طلعت وراهم شفت كلب صغيروني كاضبو نائل

وصراع واكف يدحك لحرب فرحان بي.. اني طرت من الفرحه على شكل الكلب كلو شعر ويخبل صغير..

كتلو نائل هذا المن..

-مال صديقي خلاه يمي نداري كم يوم لبين ما يرجع

-صراع كعد ع الكرسي كبالنا واني كعدت للكاع شلت الكلب وحطيتو بحظني.  وحرب واكف ويايه ويمسح بشعرو ويكلي لييان لا يعضج. 

-لا لك حلو ما يعض اني جان عندي جرو صغيرون بس من مات بابا باعو يحيى ..

كضبت ادينات الكلب واناغي وصراع يدحكلنا مبتسم هو ونائل والحجيه طلعت كعدت هم بالحديقه صيف والجو واكف وعصريه

احسن من كعدة البيت ..

اني من احب شي واكوم احجي .. اضل الوص واجفص وما اعرف شحجي احمى بساع   .

ف اناغي للكلب واكلو حبيبي حياتي

صراع:- لا يا مكصوفة الركبه على هلطلعه هاي حبيبج كلب ..  الله ياخذج بس

-اني اسمعو يحجي بس فرحتي بالكلب اكبر ومندمجه .. واكول ول عمري الحلو يمه ول ابويه  

اني كلت ابويه لو هذا نائل وصراع انفجرو من الضحك دحكت بوجه نائل واندرت ادحك لصراع ليش يضحكون

نائل:- والله يا خويه هاي مال ول ابويه سالفه ما زينه كلش.. ههههههههههه

ضحكت وتفشلت .. حسيت على نفسي شكلت وصراع ما عون .. رافع راسو ويضحك حيل ..والحجيه هم تضحك..

عاد ضحكت وياهم من فشلتي شكول بعد.. كام صراع وتقرب وهو يكول وتزعلين من اكلج بت الكلب هلطلع الكلب ابوج..

ما رديت بس تضايقت حيل وما بينت بقيت ادحك.بالكلب واضحك.. 

صارع شويه وراح.. وللمغرب اني و حرب وي الكلب نلعب واناغي.. ونائل وام سعد و الحجيه كاعدين ع الثيل يسولفون..

قرب المغرب نور صاحتني للمطبخ.. غسلت اديه وفتت وياها .. دا اسوي بالعشا جتي حلا متخصرتلي ..

-موبايلج وين

-ليش

-شعليج اريدو شويه عندج مانع

-غير اعرف شتسوين بي ذاك اليوم ابوج راد يكص ربگبتي لان مراسله صديقتي لا تسوين شي وتكع براسي

-هسه تنطيني لو لا

-يوووه روحي اخذي بعرفة الحجيه بس اي شي اكلو حلا هااا مو عبالج..

-دفتني وشوفي شسوي بيج..

-دولي

-هاي عليمن

-على الكلب عدنا كلب بابيت عدكلو ولي انتي منو يمج قابل انتي كلب

-ادبسز احجي وشوفي

-خايفه منج

نور:- ولج هسه انتي دسكتي .. لا انتي القويه وتبزين عينها ولا انتي الخايفه وساكته ..

-شحدها والله اكول لصراع عليها

-ليليان انسي هلسالفه وديري بالج حتى لو تأذيج لتوصلين لصراع تحملي شهر وتولي تتزوج لا اطلعين بالوجه الاسود..

-هم صدك.. يله شسويلها.. خلصنا العشا وتنضيفو ولل11 جا صراع والموبايل عند حلا  

حط علاكة الحلويات يم الحجيخ وسولف وياها شويه وكال ليليان صعديلي موبايلي ع الشحن

.. طبعا هاي حجه يصعدني بيها كبالو حتى يجي ياخذ راحتو ...اخذت موبايلو وصعدت..

ما خليتو ع الشحن كعدت العب بي.. دخل هو .. بدل وكمل واجه تمدد يمي واني عيني بالموبايل العب...

-عجل موبايلج وين اليوم محوله على موبايلي..

-العب وطلعت مني بلا ما اقصد.. عد حلا

-عقد حاجبو وحط ايدو على موبايلو وكال.. شيسوي عد حلا

-ااااا .. لا هيج تلعب بي شويه خطيه تلكاها ملت..

-كومي جيبي بساع كوليلها ابوج يريدو..

-انطيتو الموبايل وكمت رحت لغرفتها كتلها ابوج يريد.الموبايل ..

فزت بوجهي بساع.. :- كلتيلو عد حلا

-عجل اجذب

-يا فتانه يا مسمومه بس تردينو يضربني

-وشستفاد لو ضربج .. تره اذا تشوفين كل همج يضربني ويكرهني لا عبالج كل الناس مثلج.  وانطيني الجهاز والله خوش ..

والله خوش فوك شينو كواة عينو

-صبريييييي .. كضبت الموبايل مدري شمسحت بيه وزتتو بوجهي.. وكع بالكاع.. اندرتلها .. هزيت بيدي اخذتو ورحت ..

دخلت لصراع انطيتو .. اول شي دخل على برنامج اسمو انستكرام.. دخل بيه .. طلب تسجيل حساب

يعني ماسحه كلشي..

-اذا طلبت جهازج بالنهار لا تبخلين بي انطي الها تحجي وي خطيبها شوي بس بليل ممنوع..

-ليش شنو الفرق اني ما احتاجو بليل انام..

-مثل ما اكلج..

-زين ليش ما تنطيها موبايلها.  ..سحب ايدي وجرني الو ويكول لتعبين عقلج بهلسوالف فكري بيه وبس ..

ابتسمت... بقيت يمو شويه لما نام سحبت نفسي منو ونزلت.. نمت يم حرب..

ثاني يوم ب9 عادة اكعد رغم ام سعد والحجيه ب7 او ب8 .. ونور ب8 يوميه.. وحتى لو احد يحجي ما عدت اهتم.. تعودت على حجيهم فكمت اهم شي راحتي واتجاهلهم. 

كملت شغلي وكاعد امسح بالميز مال الهول.. نزلت حلا ومطنكره سبحان الله نفس طنكورة صراع..

كعدت ع الدرج وتكلي هيي انتي

اندرت .. هاي عليه

-اي .. روحي سويلي ريوك بساع يلا

-روحي نامي حبيبتي هاي بعدج تتحلمين..

-هدت تريد.تجين وزكحت الحجيه :- حلاااا خير ان شاءالله مصبحه ع الشر ...

-اي مصبحه ع الشر واذا ما تگوم تسويلي ريوك العب بيها طوبه والله

الحجيه:- ولج انتي شنو من بنيه لا عبالج ابوج ناسي .. ان شفتي هدا فما معناها نسى متحلفلج .. والظاهر جلدج يحج اليوم

-اي جلدي يحكني انتي شعليج

-ولج احترمي الا اكصو للسانج والله

.. اندارت عليه وتكلي فوتي سويلي ريوك..

-ما خدامتج اني افتهمتي عندج ادين حركيهن..

جت كضبتني من جتف دشداشتي .. زكح الحجي نائل ..

-حلاااااااا شديصير

-عمو اريد ريوك

-سم ذاك هو بالمطبخ وروحي سوي محد.كاضب عنج الاكل يلا تحركي..

-تركتني و مشت ما كدرت تحجي وي نائل ...تقرب هو وكال شبيها هاي

-تكول مصبحه اريد الشر

-عاد رفع صوتو وكال بكلبي شر ضامو عليج هلكدو اذا تريدين اطلعو تدللين حلا.. مشاكلج بهلبيت ما تخلص ادبسز ..

ما ردت.. بس ام سعد طلعت تكلو مكاون نسوان يمه مالك غرض منهن

-شحدها المره التتكاون بهلبيت اكسر ظهرها والله .. حجه وطلع..

ام سعد غمتني وتوكول حتى ابني شيشتي عياره ام السحوره..

ما رديت عليها.. خلصت ريوك حلا.. وطلعتلي .. ملابسي بالغساله شو ما تغسليهن..

ام سعد :- تتنجس الهانم من عدنا البلا اصل

-والله حبيبتي ما تغسليهن انتي اروح احرك الغساله بس على هدومج..

-بنت الفكر بس فالحه تفتنين علي يم ابوي ما ناسيتج اصطبريلي ما اطلع من البيت لا ما اهجج والله

-اليجي بيدج لا تقصرين بي حبيبتي

-بقت تمشي وتغلط بلا اصل .. اخت داعشي امج اخذوها داعش ...وووو حجي هواي .. بس شسوي اتحملها هلشهر..

طبت هيام تلهث حاره وجايه من الخياطه جايبه ملابس لعمتي.. حجت وهي تعبانه يولي شبي حسج واصل ليبره ..

-والله انتي محد حاجي وياج لا تدخلين..

-الحجيه تصلي صاحت ااااااااالله اكبر

هيام:- ولج انتي شو ما تستحين ولا تحشمين احد ادبسز..

-والله بكيفي اليعجبو اهلا وسهلا ما يعجبو ذاك الباب يفوت جمل..

هي حجت هيج و محتره وتعبانه نزعت نعالها وتولتها كتل وحلا تصرخ وتعيط وتغلط وتسب بيا..

سلفتي واكفه اباب المطبخ بيدها الجفيجير وتكول حل بيها شو السانها زايد..

-وعمتي مناك تصيح وتغلط عليها وتكلها هيام عوفيها لهطايحة الحظ..

وام سعد طبكت الباب وطبت لغرفتها ما ادخلت..

كتلتها كتله عدله وتغلط وتضرب بيها نتفتها.. كوه خلصتها من ايد هيام حلا صعدت تغلط وتبجي  وهيام تصيح عليها..

نور جابت مي لهيام.. وكعدت تشرب وتكول والله لا ما خلي يربيها وهينا كاعده يجي الخلفها لشوف شلون تطردني لهلكلبه..

مستسخه خالاتها الكلبه الف مره اگلها يمه لا تخليها تروح لخالتها تتعلم العرامه على اصوله تتوسل بصراع يقبل وخطيه وخطيه لما شدت راسها..

ما بالحيف بالله هاي بت صراع..

... انوبه اندارت عليه وكالت وانتي عوبه ما تعرفين تكضبيها تفركين حلكها من تغلط..

-اكلج هي تغلط واني الاطلع مو خوش عجل لو اضربها شصير ..

-عليمن تكاونت وياج ..

-حجيتلها السالفه وكالت بسيطه يجي الخلفها لو لا.. 

عمتي واكفه وتهدي بيها وتكلها لا توصليها لصراع .. وام سعد بس واكفه تتطمش كن مسرحيه گبالها..

.. وصدك هيام ما راحت .. كعدت بالهول وتنتظر صراع.. دخل الحجي .. ودخل نائل والاوضاع مشحونه..

وهيام ما تحجي .. سأل الحجي شكو شصاير .. الحجيه كالتلو ماكو شي ..

لل3 الظهر وطب صراع من دوامو.. حتى خطيه تعبانه ووجهو من الشمس مسمر .. كعد كال ليليان ماي بارد بساع..

اني محظرتلو بساع جبتو وجيت انطيتو .. اخذ الكلاص.. وهمسلي .. شكو شصاير الوضعيه ما تمام ..

-كتلو ماكو شي.. اندرت لهيام خزرتها بعيوني عود لا تكوليلو هسه .. هي فهمت لان تعبان.. صبيتلو غدا وصعد.سبح وارتاح ونزل

عرف اكو سالفه ما اطمن.. فكعد كال شصاير اكو شي..

-عمتي تعض باصبعها وتخزر بهيام.. عود لا تحجين.. بس هيام ما سكتت..

-دحك.خويه انه جيت من صباحيات الله طافحه روحي ع الصيدلي والخياط من وره امي ولازم ارجع لجهالي بلا غدا بس كلت انطيك خبر

لان اذا تبقى على امي يحترك بيتك وما تخبرك ولهينا وبس وصلت حدها ..

-هو كان منتجي ضهرو للتخم ولاف رجل على رجل.. بساع تعدل وكال ..خير ام علي شصاير

-دحك خويه انه ما على بنتك غلطت عليه..وحجت حجي اكبر من راسها انه ضربتها وخذت حيفي منها

بس انه على هلفاهيه ... وتأشر عليه.. الواكعه بيها مسبه ومعاير باهلها وهاي الثوله ساكته وبتك تتأمر تريد تخدمها

- ام علي اسألج بالله .. حلا شغالطه عليج

-انه خذت حكي منها وكتلتها وما قصرت بس بتك يحتاجلها تربيه

-هياااااااام لا اطلعيني عن طوري كلتلج كلمه وما اثنيها احجييييي

-اكوم اروح لبيتي احسن انه كلتلك خذت حيفي

.. اندار عليه... :- ليلياااان شحجت حلا على هيام..

-اني حجه لو احس گلبي وكف .. ادحك الحجيه وهيام يخوزرن بيه حتى ما احجي..

-احجيييييييييي..

- حلا غلطت عليه وهيام ردتها وحلا كالتلها الما يعجبو الباب يفوت جمل ..

-اني بس نطقت هو انتفض دفر الطبله كبالو وبسرعه لزم محجر الدرج وكل 4 بايات بطفره..

ركضنا وراه بسرعه وهيام صاحت غبييييه ليش حجيتي

-عجل تريدين اني الاكع بيها والله يذبحني

فتنا وراه وهي واكفه ع التخت وهو يخزر بيها ويصيح نزلي لا تعذبين گلبي

مسكتو هيام من كتافو وكالتلو بصلاة محمد عليك خويه .. المثل يكول حمر عين ورخي ايد.. لا هيج لخاطري

-نفض اديها من جتافو وزكح طلعووووو برا  والله اكتلكم وياها طلعوووو

وكفنا بالباب والحجيه تصيح من جوه:- ولك يمه ما بيه اصعد ابو حرررب لا هيج وياها راح تعرس وتولي اتركها..

وحلا واكفه ع التخت وتكلو والله بابا ما اني هي الحركت الفتنه ما سويت شي والله بابا

... رغم حقارتها شكد انكسر كلبي عليها وهي تتوسل بي وتگلو بابا..

وهيام ايد مكتفتها وايد على حلكها واندحك..

سحبها من ايدها .. وتولاها راشديات.. بلا مبالغة صوت الراشدي يفزز البدن احسو بوجهي كد قوة صوتو يرررن

دخلت هيام رادت تسحبها.. زكح بيها وكال الها ابتلي بيج والله.. يضرب ويكولها يولو العار ماتت وخلت على كلبي بمكانها ..

سحبها من شعرها وطلع بيها وهي تصرخ وتبوس بيدو.. كضبنا ويصرخ بينا.. زتها بغرفة عابد.. وسد الباب وقفلو وهو يلهث يتنفس سريع

وكال:- والله ثم والله اسمع نازله جوه لو طالعه من هلغرفه لا احط جيله براسها واخليها تلحك امها الما حوتها..

... حجه وراح لغرفتو .. ونائل طلع .. كال والله ردت اطلع احاميها بس حل وياها تستاهل خل يربيها..

نزلت هيام.. واني رحت للغرفه.. ردت افوت .. خفت عاد نزلت وره هيام.. تحجي وي روحها انه صوجي اعرف اخوي ما ينحجيلو

-شفتي ليش اني اتحمل وما اكلو هذا اخوج وهاي اعصابو لو ما طالعه منج جان كالو ليليان ..

-وانتي هم ما قصرتي الفاهيه سألج اسكتي الا تحجي امداج..

-شسوي اخاف والله ما شفتي عصبي ..

  لبستها عبايتها كالت اروح اتأخرت جهالي بلا غده..

-تاني اني اصبلج من عدنا.. حطيتلها بجدوره صغار وطلعتلها صفطة خبز وخليتو بعلاكه وراحت..

ادحك وين اروح.. اروح اصعد يمو لا يبتلي بيه انوبه.. صعدت فتت للغرفه.. نازع اهدومو

القميص يم الباب البجامه طارها ع الميز الفانيله بالكاع وامدد بس بالشور وايدو على عينو 

هو متمدد ويحجي بصوت ناصي ويتمتم ما اعرف شيحجي.. لميت ملابسو علكتهم وكعدت..

شال ايدو وحجه... فزيت من يمي عبالي يريد يضربني.. زكح هاي الكلبه الباب ما ينفتح بس للحاجه.. ما اريد ادحك طولها بالبيت ..

كتلو اي تأمر.. رجعت كعدت.. رجع مرت اللخ.. زكح.. وهم فزيت وخليت ايدي على صدري

-انه شاكيلج هااا مو اليتمادى وياج ويعيرج تعجيلي انتي ليش هلكد ضعيفة شخصيه..

-كعدت يمو وتنهد شسوي صراع .. يعني كل اليغلط اجي احجيلك وهيج تعصب وتضربها ..

هي هم بنيه يتيمه لو شكيتلك وانضربت بسببي وين اروح من الله.. شسوي اتحملها هي شهر ومعرسه.. احسن من المشاكل..

تقربت يمو .. وكتلو بس انت ليش هيج تضربها والله خطيه تره انت تأذي وهي جاهله وخالتها يقرن براسها..

حرام هي كم يوم ورايكه ظنك لليش هيج تقسي وياها واعصابك فايره ومأذيها ومأذي روحك..

اصعد هدد واتفاهم وياها لا تضربها بربك..

.. سكت.. ورد فتح ايدو .. وكال حدري لشوف .. تمددت يمو

-يولي من تالي تعقلين بيه

-ما اعقلك والله انته العقل كلو بس ماكو شي يصير بالضرب صراع ايدك تأذي وهي عروس حرام عليك والله لا تتشوه بيدك وين تروح

-باس كصتي وكال شيصير لو هي مثلج مو ثنينكم نفس العمر.. شو لليوم تموتين لو كضبت ثوبج وهي جن ماكو مستحى

-هي احسن مني والله بس غير تربية خلوص اللزكه شتطلع يعني..  مو زين ما طلعت فيفي عبدو ..

-هز راسو وضحك..

-والله انته تعرف خلوص شلون لازكتلك بلا مستحى
.

-حط راسو على راسي وسكت.. ما رد.. بقى يتنهد وياخذ نفس لحد ما حسيت بيه ثكل .. عرفت نام..

انسحبت منو وطلعت.. رحت فتحت الباب ادحك لا ميته.. مديت راسي هي صافنه.. ووجه احمر..

بس شافتني شالت واير وطرتو عل الباب قفلت الباب بساع وهي تصيح صبريلي لا ما اخلي يطلكج والله..

هزيت ايدي .. البنيه طاكات فيواتها اكثر من ابوها..

نزلت يم نور ضلينا نسولف وخلصنا شغل.. وبالفعل ما انفتح الها الباب الاكل يوصلها .. و بس بليل تروح للحمام. 

ثاني يوم.. صراع بالدوام .. الضهريه شطفت الكراج.  خلصت .. دا الف بالصونده.. وما احس الا شي انطر من فوك الباب

وصوت دراجه شحطت بساع.. تقربت جفيه (محرمه) سوده.. فتحتها بيها ورقه ملفوفه وداخلها شي..

فتحتها... طلقه ومكتوبه على الورقه ابو حرب..

خليت ايدي على صدري .. وصليت.. يارب احمي واحفظو .. شنو هذا ..

دخلت للحجي اركض..  دكيت الباب على غرفتو حيل واصيح عمووو عمووو .. اطلع شوف هاي شنو فدوه..

طلع واخذها مني .. فتح عيونو .. وزكح منيلج هاي

-انطرت من فوك الباب ودراجه ناريه تحركت بساع..

-شال الموبايل وخابر على صراع ونائل بسرعه.. والحجيه كامت تلطم زالليت كلو وكف على حيلو و

والحجي فار خطيه يروح ويرجع ويكول راح وليدي بويه.. شويه وفات نائل  محترك دمو ويكول غير يرد غير كون يببببببطل

للظهر .. جا صراع .. عمي انتفض كدامو .. ويصرخ بويه ابوس راسك استر علينا بطل وليدي

صراع:- كول يا الله يابه شلقصه .. ما يصيبنا الا المكتوب علينا ..

هو حجى هيج الحجيه نزعت شيلتها وكامت تصرخ وتشلع بشعرها.. انت تريد.تصخم وجهي.. انتي تريد تعزيني. 

يمه ابخت محمد عليك اترك دوامك يمه لا تكسر هلبنات البركبتك.. انه امداني ما تفكر ابمرتك وبتك وين يرحن ورااااك..

مالهن احد غيرك يمه.. فدوه اروحلك..

اني واكفه وابجي .. شسوي .. اعرف ما ياخذ كلمه.. وهو ما عندو غير كلمة الله كريم يمه ان شاءالله..

نزلت حلا ع الدرج ووكعت يم رجليه وتبجي وتكلو بابا اذبحني ولا تطلع فدوه لا تروح لا تيتمني بابا والله ما الي احد غيرك..

ابتسم ودمعت عيونو رغم زعلان منها جرها وباس راسها وكاللها لا تخافين بويه ما يصير شي ..

ما رد وما رد نائل يحجي والحجي و احنه نتوسل وهو يكل اي شبيكم ان شاءالله الله كريم يمعودين..

كاعدين كلنا كابلنا خاف يطلع والعيون عليه.. وهو كاعد ويانه بس الف فكره براسو..

شويه وخابر صديقو .. كالو جايك.. نائل وكف بوجهو كالو بدين محمد عليك اكعد

-شلقصه ناااااائل فيران احنه نختل ببيوتنه من الموت يا يوم خفنا المنيه حتى نخافها هسه..

ان جانا الموت هلا بيه .. احنه رجالو ..

تركو وطلع كالو لا تطلع بسيارتك انه اخذك.. ما رادد. وطلعو.. واحنه ندعي وناس تبجي وناس تصلي

حالة رعب رهيبه بذاك اليوم.. محد يعرفة لذة الامان الا اليفقدو..

... صارت 10 بليل .. وصراع ماكو ما اجه.. ب1 وماكو وكلهذا واحنه متنا خوف نخابر محد منهم يرد لا نائل ولا صراع..

لل3 بليل وعمي يخابر على موبايل نائل جان يكلو هذا الرقم لواحد تصوب اليوم بانفجار ..

صرخ عمي لو كلنا صرخنا وكمنا نتلاطم.. وهو يصرخ بينا خل افتهمممممم..

كالو بس كلي ولدي عايشين لو ميتين.. .. رد الاول زين بس الثاني حالتو حرجه......يتبع

☆☆☆☆☆☆

#زينب_ماجد#مراهقة_و_الأربعيني

،،،،،،،،، بقلم زينب ماجد ،،،،،،،،

الحلقة_39

كالو بس كلي ولدي عايشين لو ميتين.. رد... الاول زين بس الثاني حالتو حرجه...

الحجي كام يصرخ بويه ولدي راحو يابه تصخم وجهي وكام يصيح.. لبس وطلع بسيارتو ..

واحنه نتلاطم الحجيه تبجي وتكول حسبي الله ونعم الوكيل وام سعد كابلتها تصرخ.. وحلا تمشي بالبيت وتبجي بابا و بابا

ونور مخليه التوم بحظنها وتبجي..  اني ادحك عليهم ودموعي تتجاره..

مو تشائم بس والله احس ما محظوظه بشيء .. كلما جيت افرح .. انكسر .. كلما الكى سند.. يضيع ...

وكأن الله حاب يخليني وحيده.. لا ام لا اب لا اخ .. وحتى ما عندي اخت التجئ الها...

فرحت بصراع ورغم كل الشفتو منو متمسكه بيه لان احس بحبو من كل قلبو ما حسيت بي زوج بكد ما حسيت بحنيتو اب..

احس حبو الي مثل حب امي.. شكد جانت تأذيني وتضربني وتمشيني بشورها بس هي اكثر الناس تخاف عليه..

تصيح عليه وتهين بس من احد يصيح بيه تنتفض وتكون تكاون وتفزعلي.. صراع مثلها بالضبط ..

هو يصيح يغلط يأذي بس ابد ما يتحمل فكرة واحد يأذيني احسو يثور .. اني شديت ظهري بيه وكمت ما اخاف من واحد لان هو بوراي..

من اشوفهم يبجون .. احس احلامي دتتلاشى كدامي..  كل شي الي بهلدنيا ما بقى..

شگد جنت كارهه زواجي منو.. بس صرت احس وياه روحي بأمان.. وبلحظه فقدت كل هلأمان..

لا ساعه ولا ساعتين احنه نبجي للصبح نتصل بالحجي وسعد وماكو رد.. اخر شي علي ابن هيام راح للمستشفى بدون علم امو ..

لان هو يتخبل على صراع .. يكول هو ابويه اني ما شفت اب غيرو ..

فراح الو وخابرنه كاللنه خالو صراع زاتين عليه رمانه ذريه  وهو واكع على نائل حتى يحمي .. والاثنين متأذين ..

بس خالو صراع متأذي اكثر لان الشضايا نابته بظهرو  .. وخالو نائل رجلو متأذيه كلش ..

شصار بينا ع الخبر .. فرفحت ارواحنا ومتنا لا حيل ولا دموع بقت بعيونا .. ابجي وارفع راسي للسما واكوله ليش ربي ليش ..

من دون العالم العراقيين ما مرتاحين .. نخلص من مصيبه تطلعنا الثانيه .. ربي والله تعبنا ارحمنا كافي ..

ملينا انفجارات ملينا الموت تعبنا من التهديد والخطر يلف حوالينا بكل بمكان.. شبابنا تهجرت طلعت كلها هجت

وحتى الهجو اخذهم البحر وماتو وين نروح وين ننطي وجهنا من هلبلد والله تعبنا..



رغم همومنا وتعبنا .. واحدنا ما بي حيل يكوم.. بس الخطار والناس ما وكفت رايحه راده..

و ينراد حيل ووكف وخلك.تكعد.تسلم وتجامل وتخدم وانت كل حيل ما بيك..

تمنيت بس اشوفو لصراع .. لو اكلمو .. ما شفت منو شي ابد.. كل اليجي يكول زين بس مرت 3 ايام وهو ما بين وحتى ما خبرنا لو طمنا ..

بس الحجيه وام سعد يرحون احنه باقين بالبيت نتوسل الحجايه من الرايح والراد يطمنا.  وفوك كل هذا خدمه وكسران ظهر

كل اليجي يريد غدا وجاي وعشا وماي وواجب وما لازم تقصر ..احس والله حيل ما ضل بيه..

كل يوم اصعد بغرفتو اشبع بجي لحد ما انام واتمنى يطب يكلي ها الله يساعدج.. لو گواج الله..

احس حتى صوتو اشتاقيتلو وانتظر ساعه ساعه شوكت يطلع واشوفو..

مر اسبوع وهو ماكو.. بس نودي ترامز جاي للمستشفى .. وكلشي ماكو ولا صراع ما جا

بيومها جابو نائل وفرحو بي ويحظنون وفرحانين بي .  سلمت عليه بس الغصه ابلعومي تخنك..

طلعو اثنينهم ورد بلا صراع .. يربي والله تعبت شوكت يجي مو متت  ..

وره يومين گالو اليوم يطلع صراع.. ما كن خبر.  اوف .. كن واحد ميت وحيوه..

كالو عدليلو ورتبيلو غرفة سعد القديمه لان ما بي حيل يصعد.. وصدك رتبتها وعدلت سرير بيها .

واحس صرت نشيطه وحيلي رجع بس كون اشوفو.. وكل دقيقه تمر اكول هسه يفوت واكحل عيوني بشوفتو..

لل7 بليل يله سمهنا خورن سياره بالباب وصاحو الجهال جابو عمو صراع  .. كل  احنا فزينا. 

وكفت اباب المطبخ.. الرايجيل ولد عمومتو كلها واكفه.. نزلو من السياره كاضبينو كوه يمشي. 

شفت الحجيه وهيام تلكنو بالسلام وحظنو .. اني اجيت امشي .. والحجيه حاضنتو .. دحكلي وخزر واشر بعيونو فوتي جوه..

تراجعت صدك الكراج كلو زلم.. بس ما بيدي مشتاقتلو اريد احظنو ..

مشوه على مهل وفوتو من باب الهول وللاستقبال .. يلا المهم شفتو الشكر للرب على سلامتو ..

بقيت بالمطبخ عشا وجيب وودي وروح.. صبينا عشى  وفاتو اهل اخلاص .. كلت لا هله..

شوي وفاتت علينه اخلاص العيون حمر دم وكفت وتكول لهيام شلونو صراع ام علي ..

-كالتلو الحمدلله اخوي ذيب وطلع منها .. وجن خواتها هم يواسن ويحجن وي هيام. 

واخلاص ما بطلت بجي.. فات سعد كالتلو صراع وينو ابو محمد..

-هسه نفوتو بغرفتو وسلمو عليه بس نصب عشا..

-شكد مقهوره على صراع بس احترك دمي من شفتها تبجي عليه.. نائل اقرب الها من صراع يصير ابن عمها وابن خالتها..

الحقيره تتبجبج عليه  اليكول عبالك زلمتها ومصوب .. بالله اني وين اروح.. شلون يربي اشيل هلسجينه واحطها ابطنها واخلص..

بقيت بالمطبخ انظف اني و سلفتي .. شويه وصاحت هيام... ليليان غسلي وتعاي راح يطلع صراع..

والله غسلت ووكفت انتظرو.. هستوه طلع وكلهن كبن يسلمن.. اريدلي مكان اندحس بيه واسلم ماكو وهو متوجع وكوه يسلم..

واخليصان جلبت بركبتو وحظنتو وتبجي وتكلو لو صاير بيك شي جان كتلت روحي وهو يتبسملها ويكلها اسم الله عليج بت عمي..

اني سمعتو هيج ويمو وما دحكلي درت ورحت عنو .. والله تكتل روحها وهو اسم الله عليج بت عمي واني ذابحه روحي هينا مو صوجكم امداني كبر يطمني..

مشيت للمطبخ محترك دمي اغسل بالمواعين واشطف وازت بنتر .. عاد شويه وصاح سعد .. ليليااااان..

طلعت كن خاف البيت الناس رايحه.. بس بيت عمهم.. واخلاص حاطه على ايد على بطنها وما عاجبها ادحك من وره خشمها  

رحت لسعد بغرفتو القديمه.. كال خويه شجالج زلمتج طالع من الموت وانتي ملتهبه بالمطبخ حدري شوفي سلمي عليه..

يحجي ويلبسو بالتراك.. تقربت منو .. كتلو اجيت اسلم والله بس محد انطاني مجال.  تركو سعد وكالو صراع انا هينا بايت شتحتاج بس رمش تلكاني يمك..

صراع:- ما تقصر ابو محمد كفو منك..

-طلع واني درتلو .. كضبت راسو بين اديه وكتلو انت ناوي تموتني ليش هيج تسوي بيه..

-لج يولي مشتاقلج بكد رحمة الله.. حدري وسحبني لرجلو كعدني.. حظنتو وكمت ابجي حيل..

هو يهدي بيا ومسح على راسي واني ما سكتو دموعي .. حاطه راسي برگبتو وابجي..

تحركت.. صاح اخخ يابه اخخخ..

-سلامتك حبيبي بيه ولا بيك والله ردت اموت بغيابك ما تعرف شصار بحالي.. ما ناوي ترحمني انته. 

ضل يضحك بألم.. شلت القميص مال التراك مالتو وكتلو اشوف وين متصوب.. كضب ايدي وجرها ..باسها وكال

- والله ما بيا شي لا تخافين..

قربني الو.. وحظني واخذ راسي بيدو ويبوسني بلهفه احس هو مشتاقلي اكثر مني كد لهفتو..

اني احس غفيت يبوووه كن سبحت من همومي يمو.. وبهلوضع واندك الباب .. فزيت مثل الواحد.جان نايم ع السريع وكفت..

ضل يضحك.. وصاح فووت ..

فاتت اخلاص وبيدها العلاج واني الملم بشعري المحروس حتى وهو رومانسي يملخني من شعري .. مو بوسه تكول مكاون..

بس من شفت اخلاص اختلف الامر نزلت قراصتي .. وفتحت شعري عود الم بيه.  شو هي نصت وحظنتو

وتكلو ما تتوقع شكد عشنا رعب من سمعنا بالخبر جينا نموت.. هو طبطب على ظهرها ودحكلي .. عيني عليهم ومصدومه منها..

هو كاللها الحمدلله بت عمي بس شويه .. جرحي متأذي.. ابتعدت منو وتكلو سلامتك ابن عمي ان شاءالله بعدوينك..  وادحكلي وضايجه.  كن عرفت شجنه انسوي

نظرة وحده تريد تاكلني .. بالله هاي هم تستحي .. سلمت عليه وطلعت واني عيني على الباب واهز بيدي

هو ضحك وسحب ايدي ورجعني لحظنو ويكلي اي وين وصلنا ..

-صراع شصار وياك احجيلي ليش هيج يأذونك..

-يولو شلج بهسوالف شو تعاااي..

ورجع كمل .. دك الموبايل هو عصب و بوعدني بنتر ويكول هلكواو.... ما ناوين يخلوني ارتاح..

ضحكت وهو رد.. تركتو وشلت الملابس النزعها ولبست الحجاب وطلعت خليتهم بالغساله..

ادحك لوجهي عزااااا.. واني اكول هاي شبيها ضاجت.. اوف منك صراع ادري متحلفلي .. يربي حتى عيب من الناس شتكول ..

محد.يكول رجلها ما يستحي .. يطلعوني اني الما استحي.. بالحمام و كالت ساره .. خالو صراع يصيحج..

اخذتلو ماي بارد ورحتلو شرب .. وعدلتلو المخاديد تمدد..

-وين حدري يمي..

-اكمل ملابسك..

-اتركيهن نامي يمي

-صراع الناس كاعده بالهول .. وانت وجهي مسوي خريطه..

-يولي مرتي حلال منو يفك حلكو وياج غير اگصلو السانو ..

-سرير نفر ما يكفي..

-يولي لا تثوليها علي .. ما ادحكيني مسگط يعني بالج امين بس اغفى على ريحتج  ول يابه شبيج..

تقربت يمو .. وتمددت لفني بأيدو حتى لا اكع وحط راسو على راسي ونام...

حسيتو غفى وثگلت نومتو.. ابتعدت منو و گمت طلعت كن ماكو احد بس الحجي والحجيه وام سعد بالاستقبال اصواتهم.. رحت للحمام خلصت ملابسو وفتت لغرفة الحجيه..

لكيت هيام وبناتها ونوال وحنين بت سعد فارشات وامددات و اخلاص و حلا هم فارشات بصف بعض وضاربات عكس ومتمددات ويحجون..

من فتت دحكو عليه. 

هيام:- ها ليووون شلونو صراع

-لا نشكر الرب زينه صحتو ..

هيام:- ما لحكنا نكعد وياه عمت عيني

-اي والله تعبان بس تمدد نام..

-ما اعرف اخلاص شنو همستلخن كامن يضحكن..

عاد نوال كالت حقو الرجال يشوفلو بنيه صغيره وحليوه ليش ما يتسودن عليها..

بس حلا ما سكتت كاضبه موبايل خالتها وتكلب بي وتكلها خاله اشايفه من هاي ..

عيشتها بس فتنه وتنزل مطكعه..

هيام:- لج ادب سز بلا تربيه انتي شكو .. مره هي وزلمتها انتي شكو حاشره روحج وادحكين بوجهاا .. ملحكه علعرس وتطكعين..

حلا واني شكو وتكليلي ادبسز العيب ع الما تعرف العيب ومكيفه بهسوالف الطايح حظها عبالها تغورنه..

ليليان:- وانتي شكو منو حارگ حمامج زوجي  .. ما دخلتو ابيت ابويه وصعدت اتختل بيه بالغرف..

حلا:- هاي ويامن ولج

نوال:- يمعوداااات .. استهدن بالرحمن الرجال مريض شبيجن

هيام دارتلي وزكحت.. :- وانتي شعندج هينا ما ترحين لزلمتج تنامين يمو ..

-اي هسه اروح انام بس اريد اسبح متت..

ضحكت هيام:- اي روحي سبحي بالعافيه يستاهل ابو حرب..

اخلاص دارت وجها وتخزر ونامت وتكول ادب سز ..

.. اني بوقتها ما فهمت هيام شنو قصدت ولا عرفت اخلاص على شنو خزرتني.. كلت اريد اسبح لان ميته حر وبملابس الطبخ كلت اسبح حتى ارتاح..

فيما بعد فهمت هلموقف شنو قصدو بيه.. بعد ما طاح حظي..

.. اخذت ملابس وفتت للحمام سبحت ورحت للغرفه البيها صراع.. نايم بس يون من الوجع..

فتحت الغطا ونمت يمو.. هو يون ويصيح اخ يا يابه.. اني من التعب بساع نمت بلا ما احس

فزيت علي وهو يگوم مني نزل واني تكاسلت اكوم.. راح على مهلو يمشي .. كتلو اجي اسندك. 

-لا حبيبتي نامي ما يحتاج..

رجعت نمت .. شويه وفات بيدو سجاده.. كمت فرشتها عنو وكف يصلي بس كوه ينحني للصلاة حسيتها شده عندو

من كمل كعد.. ارتاح وانوبه اج يمي.. تمدد.. حط ايد على شعري وكام يمشي ايدو بيه  

-يولي سابحه شعرج رطب

-هزيتلو اي واني غافيه..

-بقى يلعب بشعري ويمشي ايدو على خدي وعيوني ويحجي.. :- يولي والله مشتاقلج ما تعرفين غاد شكد اتخيلج واحن الج..

ابتسمت..

-ليليان

-همم

-ما بيه اصبر بعد والله

-فتحت عيوني ..شبيك ..

-مو كافي 

-اتعدلت ردت اكوم..

-هاي وين شبيج لا تخافين

-لا بس اكوم اشرب مي

- يولي ليش خليفه شنو اللي موخوفج احجيلي حتى افتهم تره تعبت ..

-انت مو مريض

-مالج شغل بيه مريض او لا.. تره نص مرضي منج تعبت.. غير تكليلي من شنو خايفه..

-صراع انت ما اعرف شلونك تصير اخاف والله مثل ذاك اليوم تكضب قوي وتأذيني .. خل اكوم

-يولي بس هديلي روحج والج الصافي

-شتريد مو نايمه يمك بعد.شتريد صراع..

-يولي انتي جاي تثوليها علي .. دكافي مو والله مليت .. حتى الناس تسأل شيگلون عني مو رجال .. جاي تذليني انتي بس لان احبج  

-صراع بشنو اذلك لخاطر ربك عوفني. 

ردت اكوم منو .. صاح يول حدري شبيييج.. دفعتو و كمت.. صاح اخ يااابه.. وكضب كتفو..

رجعت تخبلت .. اذيتك بالله شو  .. كاعد تتأذى ..

هو كاضب كتفو ومغمض يعصر من الالم.. كمت ابجي واكلو شتريد ذبحتني شتريد ليش هيج يتغير حالك من اجي يمك..

-ول غبيه احبج والله حدري ..

تركتو وطلعت هو ضاج وكام يصيح وراي مو حاله هاي والله طكت روحي بس انه هيج الله باليني بيج..

طلعت صعدت بغرفتو.. تمددت وافكر شيريد.. اني انام يمو ووابوسو ومخلصه كل واجباتي وياه شغل تنظيف خدمه منقصره وياه بشي

كلشي اشوف المزوجات يسووه اسوي وما اقصر وياه واحسو يريد بعد.. شنو اليريد بعد اسوي ما اعرف شلون ارضي

ومن يتغير حالو واكوم منو يعصب.. حسيتو يريد شي اكبر من فهمي ... ودوم اسألو شتريد ما يجاوبني ويصير حالو ما اعرف شلون احسو يريد يفترسني

زين هسه اسأل منو واعرف شيريد.. لا عندي ام ولا صديقه.. وهيام والحجيه يصعب عليه اكلهم هو شيسوي واشرحلهم شي عيب..

بقيت حايره.. وافكر بيه.. والتعبني اكثر هو ضاج ودار وجهو عني.  اجي احجي وياه واكلو شتريد..

يكلي ما تحبيني لو تحبيني صدك وترديني جان ما تعزين علي روحج بس ما اعرف شنو تفكيرج و على شنو ناويه..

مرات اصل وياه لنقطه احس لا هو فاهمني ولا اني فاهمتو ..

مرات اكول خل اتحمل واتركو على راحتو.. وادحك وين يصل واشوف اشنو اللي يريدو..

بس ما بيدي والله من يتجرأ و احس بيه يتغير حالو .. وتصير لمساتو قويه واتأذى اخاف لا اراديا واصير اتذكر البنات بالمدرسه من يكولون الرجال يتغير حالو ويصير يكضب قوي وهواي بنات ماتوو

وحدها الفكره تهتز بذاكرتي واخاف وادفعو واشرد ابجي بلا ما احس..

اني ما تزوجت حالي حال البنات حتى امي تعلمني ليلة عرسي او انجبر بواقع ليلة عرس وافتهم..

اتزوجت ورحت لبيت رجال حسبتو حالو حال ابويه .. لا احد كعدني ولا احد فهمني شنو زواج..

انتركت اني وعقليتي شلون نفسر الامور.. واتهرب واشرد كلما اتذكر كلام البنات بالمدرسه واشوف هلتصرفات تصير بصراع انهزم فورا..

خطار رايحه وناس جايه وهو كالب وجهو عليه .. وما يحجي وياي.. ومن يحجي كام يحجي وياي بنتر ويكلي هاي فض صبري وياج وتبينلي انتي ما ترديني زوج. 

انتي حاسبتني اب..

مرات احاول اسأل هيام لان هي اقرب وحده ولو ما عندي وياها ميانه تبقى اكبر مني بهواي واخجل .. بس من قهري افكر احجيلها..

ولما احاول اجي يمها واريد اسأل يختنك السوال ابلعومي واستحي اكولو.. شكول تعاي هيام فهميني ليش هيج تصير حالو ويكوم يتجرأ وانزل من هيبتو كدامها بهاي السوالف

خصوصا هو دوووم يحذرني من يصير بيناتنا هيج شي يكلي ديري بالج تحجين شي البيناتنا يبقى بيناتنا ..

لو سمعتج حاجيه ومطلعتني ما بيه خير وما اكدرلج بالله العظيم ابتلي بيج. 

ف يفشل السؤال بداخلي وما احجي..

وره اسبوع من الحادث.. قل الخطار وصار نادر يجي واحد باليوم نستقبلو ورجع البيت على حالو وصراع كام لحيلو

وقله التقي بي .. لان كام يطلع ما يبقى .. ومن يرجع اينام.. لو بغرفتو على موبايلو..

الحجي والحجيه ملو من الحجي وياه بطل ..اكعد.. اترك دوامك.. راسو والف سيف ما يقبل ولا يرد..

وضع البيت رجع طبيعي .. الا وضعي كل ما جالو يتأزم و صراع كام ينفر مني .. حتى ما يسخرني ولا يطلب مني ..

واذا صدف وصار بيناتنا كلام يزكح ويأمر من وره خشمو.. واني شسوي اتحملو. 

عمتي انتبهت.. وجت يمي ..:- يمه ليون شجالو صراع ليش هيج اعصاب  شصاير بيناتكم

-بقيت صافنه شكوللها .. يربي اشكي واحجي.. لو شكو وهو محذرني.. عاد فات من الباب هو للمطبخ..

خفت بالزايد لا يسمع ومحذرني ما اشكيه يم احد.. وسكتت وانلصمت بالزايد وكتلها لا هو هيج كن وحدو بسبب الوضع شسوي

كعدت يمي اصبري وهو تعبان هلفتره ووضع الانبار ما يسر ودوامو صعب ومن هلكلام..

ايام شدت بيه حيل.. حلا شاده وياي وصراع ما يحاجيني وزعلان والحجيه شبيكم و ليش وليدي ضايج   اكلها سألي شبي وشيريد بلكت هو يفهمها شيريد..

لا  هي سألتو ولا هو جا وشكالها عني.. هو ما عندو سالفة يشكي من حرمتو يحسها عيب.. لو شكد ما يشوف مني يتحمل وياحسبني بنفسو او يزعل بس ما يدخل احد.بيناتنا..

وباقيه على هلحاله كارهه روحي .

بيومها جت مره تصير عمتو.. ام ابو خطيب حلا .. ما اعرف شلون خابطه بس هيج هي..

مره حبابه ولسانها عسل وابد متجرح بالكلام واول ما شافتني حبتني.. حطيت الجاي ع النار وكعدت اطعم ابن سلفتي ..

طب صراع للمطبخ.. اني مدنكه صافنه واوكل بالطفل... همس

-هييي يولي

-رفعتلو عيني

-منو موجود..

-عمتك اسمها صبريه. 

-هااا .. صفن ع الحديقه.  فرك سبحتو وفات سلم واسمع صوت السوالف والضحك بالهول..

خلصت اكل الطفل.. غسلتلو وحطيتو بالكرسي مالو .. ورحت صبيت جاي ومشيت اقدملهم..

هو كاعد ع التخم انطيت للحجي جاي واجيت قدمتلو.. نتر بيه كال :- تحركي جيبي الطبله بسااع

خليت الصينيه وحطيت الطبله كبالو وقدمت لعمتو والحجيه كاعدات بالكاع..

جان تكلي صلاوات على النبي خاله يا بخت وسام بيج شحلاتج.  عبالها اني حلا..

اندرت اطلع صراع بين عليه الانزعاج وكاللها عمه هاي حرمتي بتي حلا فوك..

بقت متعجبه وتكلو لا بصلاة محمد عليك.. وينها وينك يولي بكد ايدك هاي ..

واندارت علي .. ولج انتي شگد عمرج. 

هو خزرني وكال فوتي جيبيلي كلاص ماي ما خلاني اجاوب.. طلعت للمطبخ فتحت الفريز.. كضبني من ايدي

-يولي والله وصلت حدها وياج.. حاسبيج علي مره وانه كلشي ما محصل ..
-شتريد يعني

-دحكي لج هذا الوضع بعد.ما يصرفلي ... اخذج غصب اخذج كوه خلال هليومين هذا الوضع لازم يتغير الضاهر انتي مو مال عيني واغاتي شفتيني احبج كمتي تتعززين علي ..

يول والله لو اريد اندمج واكسرج ما ارحمج بس اكول خطيه واحبها بس ليوين .. اسمي بالحصاد ومنجلي مكسور......يتبع

☆☆☆☆☆☆

#زينب_ماجد
#منقووولة
                           #فوفة الحلوة