رواية مياس قلب الشهم الفصل العشرون 20 - بقلم لبنى الموسوي

#مياس_قلب_الشهم

للكاتبه #لبنى_الموسوي

قبل لا ابدي بكتابة البارت اعتذر منكم شديد الاعتذار على كمية الألم الراح تعيشوها بين هاي السطور بس للأسف هي هاي الحقيقه ما اگدر اغير منها شي وهذا هو واقع حال اغلب البيوت العراقيه

وقبل لا تبدون بقراءة البارت اطلب منكم تحضرون باكيت كلنس يمكم لان اني شخصيا صرفت باكيتين ونص يلا گدرت اكمل هذا البارت 😔

____________

بعدها اعله الصوره مفتوحه العيون
وبعد عدنه امل باچر تردون
مشيتوا بلايه موعد فجأه للموت
بلكي بلايه موعد هم تعودون
نگوم بحيلنه وي دگت الباب
ويطلع غيركم ونسد الجفون
فتحنه گلوبنه عوفوا الگبر حار
فرشنه احضانه وبيهن تنامون
ليش اليتسحق الموت مرتاح
وليش الزين جوه الگاع مدفون
من گد شوگنه الكم يلاحباب .. تعنينه قسم لو بالگبر باب
لان چنتوا النفس ويانه بالبيت .. عگبكم نختنگ من الهوى الهاب
يالچنكم طيور الجنه حلوين
ملامحكم حرام تلوحها تراب
والله نگول حيل وياكم الموت
لو عدكم ذنب لو چان اكو اسباب
بس هي البرائه منيلها ذنوب
طاريكم فقط بالزينه ينجاب
تعالوا الخاطر الله مو لاحنه الشيب
مو بس الشعر حتى الگلب شاب
~~~~~~~~

گعدت الصبح على صوت اتصال : لزمت گلبي يا ستار يا رب

نهى.. هاي منو من الصباحيات ؟!!

شهم.. ما ادري الله اليستر

اريد اروح لموبايلي بس خايف واگف بنص الغرفه واعاينله من بعيد : دخيلك ربي كلشي ولا البالي فدوه لاسمك الهي لتفجعني بواحد منهم

نهى.. شهم الاتصال راح يفصل روح جاوب

رحت للميز شلت جهازي وايدي ترجف .. دا اشوف منو رجع الرقم يتصل فتحت الخط واحس گلبي دگاته صارت براسي

شهم.. نعم منو !

جهاد.. ولك خااليييييييييييييييييييييييي

شهم.. سمعت جهاد يشهگ من البچي لو اني تخبلت : جهاد شبيك لتگولها الله يخليك

جهاد.. راح الغالي ولك خالي راح مهيييييييييب

وگع موبايلي من ايدي
كل جسمي ينفض اريد اوگف بعد ما اگدر
نزلت على ركباتي ونزلت دموعي ويا طولي

شهم.. مهيييييييييييييييييييييييييييييب
لا خويه لاااااااااااااااااا

اجت نهى تركض ... تخض بيه حيل حتى تصحيني :

نهى.. شهم شهم شنو احچي شصار .. شهم شصاااااااار

شهم.. ولچ استشهد البطل ولچ حزام ظهري رااااااااح ... وليدي راح نهى راح راح راح راح ،،، اصيح وادگ على راسي بحرگه

نهى.. لا فدوه لا .. گول غيرها
لا شهم والله دتچذب
لا لا ما اصدگ
والله ما اصدگ ما اصدگ ما اصدگ

ركضت نزلت جوه بس ما گدرت استوعب الموقف حتى امنعها تگول لأهلي

گاعد بالگاع ... ايدي على راسي ودموعي تشرح قهر گلبي
سمعت الصياح جوه نزلت اركض ع السريع حتى الحگ على امي ومياس ليرحن بيها من ورى هالخبر

عاينت البيت مخبوص وكل وحده بيهن تلطم بكتر بس مياس ماكو بيناتهن

ايهاب.. شهم بروح ابوك چذبهم قبل لا اتخبل
شهم گول هالحچي مو صحيح
الله يخليك شهم ... الله يخليك

دنگت راسي وايدي على عيوني اداري بيها دموعي

شهم.. انا لله وانا اليه راجعون

ايهاب.. انهار بالبچي : لا شهم لا
مهيب ما مات لا لا ما مات لتچذب حرام عليك تلوع گلوبنه

اجتني امي تركض ويا ما واصلتلي وگعت على وجهه لزمتها بسرعه

الحجيه.. ولك يمه شهم دخيل الله ودخيلك گلي وليدي ما بي شي
لك يمه ريح گلبي ليصيرلي شي من القهر

شهم.. بست راسها : اهدي يمه فدوه اروحلچ اهدي ... هذا حكم ربچ ولا اعتراض على حكمه

الحجيه.. شنو يعني شفهم من كلامك اخوك مااااااااااااااااات

شهم.. ما مات يمه ... مهيب بطل وراح شهيد
الف هنياله على هيچ عاقبه هلهلي حجيه فرحي بوليدچ السبع وهلهلي

الحجيه.. گلللللللللللللللللللللللللللللللللووووش وگلللللللللللللللوووش وگللللللللللللووووش

وگعت بالگاع تهلهل وتبچي .. نزلت يم رجليها خليتها بحضني ونهاريت وياها بلا ما احس على نفسي

بعد ما سمعت اصوات الصياح .. گمزت مفزوعه
وگفت ع الچربايه اعاين للباب بخوف واني اسمع الصراخ مستمر وكلها تصيح بأسم مهيب

فجأه سمعت هلاهل : انصدمت كلش شبيهم ؟!! هاااا يمكن مهيب رجع وفرحانين بي لذالك ديهلهلون ويصيحون

اعاين ع الباب واتأمل يطب عليه حتى اركض لحضنه مثل العاده بس ما صار هالشي

بدت الاصوات ترتفع .. خليت حجابي على راسي وطلعت اشوف شكو رغم الخوف البداخلي

عاينت للصاله مگلوبه گلاب ...
شهم والحجيه بالگاع يبچون بحرگه
منال تملخ بشعرها
نهى وسمر يلطمن على وجهن
ايهاب حاط راسه على محجر الدرج وينحب بصوت مسموع
رنا حاضنه جهالها ودموعها تجري مثل الشلال

مياس.. ياااااااااا هاي شبيكم ؟!!

رفعت راسي بس سمعت صوت مياس ... عرفتها ممستوعبه الموقف من سألت شبيكم باستغراب

عفت امي وگمت الها .. وصلت يمها مسحت دموعي وخليت ايدي على راسها

مياس.. شبيك !!!
بعدين وين مهيب اني مو سمعتكم تهلهلون معناها اجه
لعد وينه شو مدا اشوفه
مهيييييييييييب
شهم وينه هم خاتل ويريد يفاجأني لو شنو

شهم.. نزلت دموعي من كلامها : البقيه بحياتچ بنيتي

مياس.. دفعت ايده حيل : شدتحچي شهم شنو البقيه بحياتچ

منال.. ولچ رجلچ استشهد يمگروده
راح مهيب يمياس
راح اخويه البطل قبل لا يفرح بأبنه ويشيله بحضنه

مياس.. هههههههههههههههههههههه
اسكتي الله يخليچ كافي شقى ماصخ ترى مو حلوه منچ تتفاولين علي حتلو بالشقى

شهم.. مياس

مياس.. شكو شترييييييد

شهم.. اصحي بنيتي

مياس.. شبيه قابل شايفني مخبله مثلكم
اصلا كلكم مخابيل بس اني البيكم عاقله
گاعدين تتفاولون على مهيب وهو ما بي شي گبر اي والله گبر

عافتنه ورجعت لغرفتها .. درت وجهي عليهم هسه اني المن اوصي يدير باله عليها اذا كلمن ضيمه شكل

انتبهت النهى منتهيه من البچي .. رحتلها اركض خايف عليها لتتخربط

شهم.. گومي نهى اصعدي فوگ

نهى.. عوفنييييييي

شهم.. ولچ گومي مو زين عليچ البچي لتفجعيني بالزايد

نهى.. گتلك عوفني عوفني عوفنييييييييييييي ... وتلطم على راسها حيل

شهم.. يا ربي هاي شلون شغله
ربي ساعدني دخيلك ... تعبت والله تعبت

طلعت موبايلي خابرت يوسف حتى يجي ياخذها قبل لا تتخربط من القهر

شهم.. الو يوسف ... سمعته يبچي عرفت وصله الخبر

يوسف.. ااااخ شهم مدا اصدگ الخبر والله مو بيدي ما اگدر اصدگه

شهم.. الحمد لله الذي لا يحمد على مكروه سواه
گوم تعال الاختك بسرعه راح يصير بيها شي من البچي
اني لازم اطلع لجرف الصخر

يوسف.. راح ادزلها صاحب لان اني اريد اجي وياك

شهم.. وين تجي هسه راح اطلع اني ما اگدر اتأخر

يوسف اي عادي الاگيك ع الطريق ... ما اعطلك لتخاف

صعدت بدلت ع السريع واخذت المستمسكات ويايه .. دا اطلع لزم بيه ايهاب يريد يجي

ايهاب.. اخذني وياك شهم

شهم.. لا حبيبي ظل هنا اهلك محتاجين رجال على راسهم يصير ميصير

ايهاب.. بچه بحرگه : شيصبرني اريد اشوفه

شهم.. خليت ايدي على چتفه : الصبر من صاحب الصبر يبن امي

طلعت من البيت احس نفسي اريد اطير واحط يم مهيب ما ظلي صبر بعد لازم اشوفه بأسرع وقت

بنص الطريق خابرني يوسف تلاگيت ويا وانطيته يسوق عني لأن صعبه عليه اركز ع الطريق

مرت ساعات صعبه بطريق مجهول ما بي غير دموعي وحرگة گلبي على اخويه وابني بنفس الوقت

وصلنه لجرف الصخر خابرت القائد مالتهم حتى اعرف مكانهم .. دلاني عليهم وتوجهم الهم بسرعه تشبه سرعة دگات گلبي بهذيچ اللحظه

اول ما وصلت صار جهاد گدامي مگمبص يم الحايط وحاط ايده على راسه

شهم.. جهاااااد

رفع راسه عيونه رايحه من البچي بس شافني اجه يركض حضني بحرگه

جهاد.. خالييييييييييييييييي

شهم.. يروح خالك البقيه بحياتك
الله يصبرك ويصبرني وياك

جهاد.. اختنگت خالي راح اموت ورى والله

شهم.. اسم عليك من الموت
لتأذيني بكلامك هذا

يوسف.. البقيه بحياتك جهاد

دنگ يمسح دموعه بلا ما يجاوبه .. رفعت راسه بيدي وسألته :

شهم.. وينه البطل ؟؟

جهاد.. شهگ بحرگه : جوه خالي جوه بس انصحك لتشوفه

شهم.. شلون استشهد ؟

يحچي ويشهگ بحيث گوه افهم على كلامه :

جهاد.. الفجر چان عدنه مداهمه لمقر للدواعش

چان المفروض كلنه نطب نداهمهم بس القائد ما قبل گال بس اربعه يرحون والباقي يراقبون المكان من بعيد

طبعا ردت اروح اني بس مهيب ما قبل گال واحد منه يروح لا ثنينه واصر هو يروح

وگفنه من بعيد نراقب بس چان گلبي حاسني راح يصير شي وفعلا اول ما دخلوا للمكان انفجر بيهم لأن چان مزروع بلألغام

خالي البطل التحچي عنه صار وصل والله صار وصل والله

حچه هيچ ونزل بالگاع يشيل التراب ويشمر على راسه .. دنگت گومته وضميته الصدري حيل حتى اهدي بس بالحقيقه اني چنت محتاج احد يهديني ويطفي ناري

مسحت دموعي وتوجهت للداخل .. طبيت لگيت بقايه الشهداء واحد بصف الثاني ومغطيهم بالعلم العراقي

شهم.. اي واحد بيهم ؟؟

جهاد.. اشرلي ودموعه تجري : هذا خالي هذا

نزلت على ركباتي يمه .. خليت ايدي الترجف ع الغطه ورفعته عنه
بس شفته غمضت عيوني بسرعه
اشلاء متناثره ما ظال باخويه غير دمه المرتبط بدمي

يوسف.. الله اكبر ... الله اكبررررررررر

رجعت الغطه علي ونزلت حضنته بدموع حاره

شهم.. الله وياك وليدي ... يتلگاك سيد الشهداء واخيه ابو فاضل ان شاء الله
روح واني راضي عنك دنيا واخره يرفعة راسي وحزام ظهري وثمرة تعب سنين عمري

حسيت على يوسف جرني من ايدي .. گمت بالگوه لان حيلي راح بروحة وليدي

يوسف.. گوم حبيبي الله يقويك ويعينك

شهم.. بصوت مخنوگ : جهاد جهز نفسك حتى ترجع ويانه ندفنه قبل الغروب

جهاد.. شنو خالي راح ندفنه ؟!!

شهم.. لعد شلون

نزل بالگاع يبچي بحرگه .. حاول ويا يوسف حتى يگومه بس فقد ميقبل يتحرك من مكانه

شهم.. گعدت گباله ورفعت راسه بايدي : وليدي شد حيلك
انت وهذا البطل النايم گدامك من اجيتوا لهنا شنو چان هدفكم
احچي ليس ساكت ؟؟

جهاد.. شهگ بصوت مخنوگ : اما النصر او الشهاده

شهم.. خلص لعد بالعافيه علي حصلها للشهاده وبدمه هو وكل الشهداء الويا راح تحصلون النصر انتو

جهاد.. حضني حيل : خالي لو ميت اني ولا هو والله ما اتحمل حياتي بدونه
هذا توأم روحي وصديق طفولتي شلون اصبر بهل دنيا بدونه فهمني خالو فهمني

شهم.. الحياة تمشي وليدي 

جهاد.. حياة بدون مهيب ما ريدها خالي والله ما اريدها

شهم.. گول يا الله وگوم على حيلك

سندت ايده ارفعه من الگاع ما اعرف شصار وشلون وگعت اني بدل ما اگومه

يوسف.. اخ ربي عيني وعينهم : گوم شهم
گوم خويي گوم

كمشت بيوسف وگمت بالگوه .. راح جهاد يجهز نفسه واني رحت للقائد حتى استلم منه جثة مهيب

استلمناها وخابر يوسف كل عمامي وخوالي تلگونه بالطريق ... وصلنه لبغداد شفت الدنيا مخبوصه جماعتي على جماعته على اقاربنه
يعزون بيه واني بس اهز براسي بلا ما ارد عليهم لان الكلام ميرضى يطلع مني

لگيتهم مجهزين كلشي .. سلمته الهم وظليت گاعد على صفحه ما بيه اشوفهم وهم يچفنوا گبال عيني

ساعه واجوي حاطي بالتابوت نزلوا يم رجلي واجو جماعته غلفوا تابوته بالعلم العراقي والورد واصوات صلواتهم ملت المكان كله

رفعت طرف التابوت خليته على چتفي صح هو اخف من الريشه لان مهيب ما ظال منه شي بس حسيته بثگل الجبل من قهري گلبي على اخويه

صعدنا ع السياره وتحركنه نزوره .. صار تشيع رهيب خله العالم البلشارع تصفن من يمها على هل منظر الديشوفوا گدامهم

زورنا وكملنه .. گلت اليوسف حتى يبلغهم نودي للبيت يشوفوا اهله قبل لا ندفنه لمثواه الاخير

گاعده بين حيطان غرفتي اضحك ويا روحي مثل المخبله لأن ما مستوعبه الشي السمعته منهم

بدت اصوات البچي والنعي تعله شويه شويه
وحسيت البيت بلش ينهرج بالعالم مع ذالك ظليت رافضه اتقبل الفكره لان مستحيل مهيب يعوفني ويروح هو وعدني يرجع وراح يظل عد وعده الحبيبته

رجعت اكل باظافري مثل قبل مع اني عفت هالعاده من تزوجت مهيب .. احرك برجلي سريع وصافنه ع الباب : هسه راح يطب عليه مبتسم ويفتحلي ايده حتى اركض لحضنه

مر وقت طويل على گعدتي رفعت راسي شفت الساعه بالوحده : شو تأخر ؟!! يلا مهيب وينك الله يخليك تعال حتى يصدگوني ويتأكدون من كلامي

فجأه سمعت اصوات هورنات قويه مثل التصير بالزفه ... گمزت من مكاني حطيت الشال على راسي وطلعت اشوفه اكيد اجه وديستقبلوا

وگفت يم باب غرفتي اعاين ع الصاله عباره عن نسوان لابسات اسود مگابلات الحجيه ومنال ويلطمن بحرگه

صافنه عليهن : شنو هذا حالهن وليش هيچ ديصيحن ؟؟!! لحد ما سمعت صوت شهم يصيح : يا الله سوو طريق بسرعه

گمزن من مكانهن حطن العبي على راسهن واجتمعن گبال الباب ... عيني ع الممر انتظر طبت مهيب عليه وادعي كون اشوفه طوله حتى يرتاح گلبي

طب شهم شايل جنازه على چتفه .. عاينت للطرف الثاني شفت جهاد : شنو هاي لعد وين مهيب ليش ما اجه ويا

اسمع النسوان بدن يهلهلن بس دموعهن تجري يعني مو هلاهل فرح .. ذبت الحجيه نفسها ع التابوت هي ومنال وسمر

الحجيه.. ولك وليدي وين رحت وعفت امك
شلون گلبك انطاك تلوعني على غيابك
فهمني شلون راح اعيش حياتي وانت جوه التراب
جاوب يمهيب جاوووووووووووووووووووب

شهم.. يمه صلي على محمد ميصير الدتسوي

الحجيه.. دفعت ايده : وخر عني خلي يگوم اريد احچي ويا
والله ما ارضى عنه يروح بلا ما يوگف گبالي واعاتبه

ولك مهيب گوم اريد منك حگ رباي وسهر الليالي
ولك يمه ردتك انت التنام على جنازتي وتنوح عليه موش انه
گوم وليدي وريح گلب امك قبل لا تموت وراك

منال.. گوم مهيب مدتسمع امك تحاچيك ليش مترد عليها اول تالي
مهيب گوووووووووووووووم
الله يخليك گوم گوم گوم

سمر.. اي خالي گوم
فدوه الطولك الحلو گوم
گوم يبو ضحكة الحلوه ... گوم يبو گلب الطيب
گوووووووووووووووووووم

شهم.. كافي يلا شيلوا التابوت عنهن

منال.. لا عفيه لا
اوگف ما شبعنه منه لتاخذه
اوگف شهم اوگف

ام يوسف.. وين ماخذ وليدي يشهم
خلي يمنه ولا تاخذه بلكت يبرد گلبنه الملچوم بمصابه

التمن عماته وخالته ع التابوت ينوحن ويعيطن من كل گلبهن .. اعاين للحجيه فقدت من البچي

الحجيه.. يبووووووووووووووو
ريتني تمددت بمكانك
ريت انطيتك عمري الظال ومتت قبلك
ريت ربك اخذ امانتي ولا اخذ امانتك
ولك وليدي مهيب گوم يمه گوم
گوم لخاطر امك گوم

منال.. ولچ يمه ميجاوب
هسه غير يحچي ويريحنه ليش نايم وميقبل يرد علينه

شهم.. شيلوا العريس الغرفته خلي يودع فراشه لأخر مره

سحبوا التابوت منهن .. شالوا وارتفعت اصواتهم
بلا اله إلا الله ... لا اله إلا الله

وصل شهم يمي فتح باب الغرفه وطببوا التابوت ... دخلت وراهم شفتهم حاطي ع الچربايه اشر الهم طلعوا وظليت بس اني ويا

هنا اني استوعبت مهيب مات خلص .. وهذا هو نايم على فراشه بس جثه بلا روح

تقربت منه .. گعدت ولزمت التابوت بيدي امسح علي

مياس.. مهيب حبيبي .. شو چنك سويتها صدگ !!

مهيب مو گتلي وعد ارجعلچ وما اعوفچ وينه وعدك وانت مدد گبالي بتابوتك

شو متجاوب ؟!!

زين تذكر من گتلك اذا عفتني مراح اسامحك ؟

والله مراح اسامحك ما دامك مترضى تجاوبني

شهم.. مياس

مياس.. يلا حبي جاوب وگلي ارجعلچ
احچي اي شي لتظل ساكت

حسيت على شهم جر ايدي حتى يبعدني عن التابوت نهاريت بهل لحظه

هزيت التابوت بكل قوتي واني اصرخ بصوت طالع من اعماق گلبي

مياس.. لاااااااااااااااااااااااااااااااااااااااااااااااا
ولك گووووووووووووووووووووووووووم
يلا شو گوم لتزعلني مني

ولك وين رايح وعايفني ؟!!
زين المن عايفني وانت تدري كلش زين ما عندي بالدنيا غيرك

يلا عفيه گوم اكيد دتتشاقه ويايه مثل هذاك اليوم
يلا عوف الشقه ... وگوم يلا مهيب يلا يلا يلا

شهم.. مياس كافي

مياس.. درت وجهي علي ابچي بحرگه : خلي اشوفه عفيه

شهم.. متگدرين لافي بالچفن

مياس.. زين ع الاقل افتح التابوت خلي اشم ريحته اخير مره

شهم.. ما اگدر مياس ما اگدر

مياس.. ليش متگدر شهم ليش لييييش

شهم.. دنگت ونزلت دموعي شگلها ما باقي من جسمه بس چم وصله : كافي راح اصيحهم يشيلوا منا

مياس.. لا الله عليك خلي يمي لتاخذه والله اموت اذا اخذته
خلي بغرفته هو هذا مكانه مو جوه التراب

شهم.. لتأذيني مياس البيه مكفيني وزايد

مياس.. دنگت ع التابوت ابوس بي : مهيب گوم ابنك يريدك شلون تروح وتيتمه قبل لا يجي للدنيا حتى

مهيب سامحتك بس گوم الله يخليك .. لتكسر خاطري مو من شيمتك تردلي طلب

گوم خلي احضرلك الحمام حتى تغسل وترتاح

مهيب كافي تتدلل شقاك زاد عن حده هالمره

شهم.. درت وجهي ع الحايط وگمت اون من البچي واني اسمعها شلون فقدت وبعد متعرف شتحچي

سمعت صوت شهم يبچي گمت ركضت چلبت بملابسه

مياس.. لتبچي والله ما بي شي هو بس ديتشاقه لان مسويها بيه من قبل
اي صدگني مسويها .. اسأليني الي اني اعرف بسوالفه
ديسوي هيچ حتى يشوف معزته عدنه يعني يحب يتدلل علينه

رجعت اركض للتابوت : يلا حبيبي گوم خو شفت شصار بينه بغيابك
كافي گوم والله نحبك ميحتاج تتأكد من حبنه بهل تصرفات

شهم.. يوووووسف

يوسف.. ها خويه

شهم.. صيح الولد حتى يشيلوا

نايمه ع التابوت اعيط وابچي بحرگه ما ادري بالدنيا شديصير .. فجأه شهم جرني حيل گومني من مكاني

عاينت للرياجيل شالوا التابوت لو اني تخبلت .. ركضت على جهاد لزمته من خاصرته

مياس.. جهاد عوفه الله يخليك عوفه
لتاخذه بعدني ما شبعت منه
والله بعدني ما شبعت منه

دنگ راسه يبچي بلا ميجاوبني .. تحركوا من الغرفه طلعت اركض وراهم مثل المخبله

التموا النسوان عليهم دفعهم شهم وهو يصيح : كافي راح يصير الغروب لازم ندفنه

طلعوا بره طلعت وراهم ع السريع اصيح عليهم بكل صوتي حتى يرجعوا

لزمني شهم من ايدي دفعته حيل ردت اركض طوقني بأيده حتى يمنعني گمت ارفس بي بكل قوتي بس اريده يهدني ماكو

مياس.. وخررررررررر .. اريد اروح ويا

شهم.. بابا وين ترحين

مياس.. ادفني ويا عفيه ادفني ويا
ما اريد اعيش بعده ..
اصلا المن اظل عايشه اذا هو راح شتسوه حياتي بدونه

حط راسه يم اذني وحچه بصوت خافت حتى يهديني

شهم.. مياس اهدي بويه الخاطر البطنچ حرام عليچ الدتسوي بروحچ وبي

درت وجهي شفتهم ديصعدون الجنازه ع السياره .. عفت شهم ورحت اركض لجهاد

مياس.. اوگف عفيه جهاد اوگف لتصعده

ما سمعوا مني .. گمت اصرخ بكل صوتي گدام الرياجيل

مياس.. نزلوووووووووووووووووووووووو

درت وجهي على شهم عاينتله بنظرات توسل

مياس.. الله يخليك خلي ينزلوا
اخير مره والله بس خلي اشم تابوته قبل لا تاخذوا للأبد

شهم.. ما گدرت اقاوم دموعها ونظراتها وهي تتوسل بيه .. اشرت الهم بأيدي حتى ينزلوا الها

اول ما حطوا بالگاع وگعت علي حضنته حيل واني ابچي من كل گلبي ولو بيدي اطب اتمدد بصفه حتى لا اعوفه

مياس.. حياتي ما اگدر اگلك مع السلامه
ولا اگدر اگلك اشوفك بخير
ولا اگدر اوصيك تدير بالك على نفسك مثل كل مره
بس كل الأگدر اگوله الك .. الله وياك يا كل اهلي وناسي
مودع بالله يروح مياس

حسيت على چم ايد گومتني .. رفعت راسي شفت شهم وجهاد وابويه

گمت بلهفه شبگت ابويه وذبيت كل حرگتي بحضنه

اشرف.. يبعد ابوچ كافي
ادعيله الدموع مترجع الميت

اجت الحجيه تركض شمرت نفسها ع التابوت والنسوان لحگنها

الحجيه.. ولك وليدي صدگ رايح بلا رجعه
يعني خلص هانت عليك امك تعوفها بالضيم وتروح

شهم.. يلا شيلوا بسرعه

اخذوا من يمنه .. صعدوا ع السياره واصواتهم تصدح بلا اله إلا الله

ركبوا بالسيارات تحركوا واصوات الهارونات ملت المكان لان ديزفون الشهيد .. اعاين ورى وگلبي ينزف من الوجع

معقوله انتهى كلش ؟؟
معقوله هنت عليك وعفتني للأبد ؟؟
ليش مهيب كسرتني بروحتك هاي .. شلون راح اكمل عمري بدونك

صحيت على نفسي من شفت السياره بعدت .. گمت اركض بالشارع مثل المخبله واصيح : رجعوووووووووووو

اجتني اخت نهى جرتني من ايدي .. درت وجهي شفت النسوان واگفات بالباب ويلوحن بأديهن للجنازه
ركضت على منال حضنتها بقوه

مياس.. راح منال راح خلص بعد ميرجع

منال.. بچت بحرگه : اي حبيبتي راح
الله ومحمد وعلي ويا

طببوني للبيت واخذني بنات خالته لغرفتي ... گعدت ع الچربايه اعاين على مكانه وعيوني تنزف دم بدل الدموع

شويه وبديت اسمع اصوات النعي واللطم .. حسيت روحي اختنگت من كل البيت لا بل اختنگت حتى من نفسي

خليت المخده على راسي حتى احجب الصوت عني بس بلا فائده .. گمت للكنتور طلعت سويچ سيارة مهيب ورحت للكراج

فتحت السياره وگعدت بيها .. اعاين لكل مكان بيها واتخيله ويا كل نظره مني

لزمت الستيرن اتلمسه باصابيعي حتى تشتبك لمساتي بلمساته .. نزلت المرايه الاماميه صارت صورته مالت المعاملات گدامي

اخذتها صافنه على ملامحه .. شويه وگمت اشهگ بحرگه واني ابوس بيها

وصلت المرحله ما اشوف گدامي من الدموع .. دورت على كلنس ماكو فتحت الچكمچه وانصدمت من شفتها متروسه بالكلنس الچان يشتري مني

مياس.. ليش عفتني حياتي ؟؟
مو تدري محد راح يرحمني من بعدك شلون انطاك گلبك تعوفني للذل اني وابنك

ظليت ساعات على هالحاله .. مره ابچي مره احچي ويا مره اعاتبه لحد ما سمعت صوت شهم يصيح : ميااااااااااااس

رحنه حتى ندفنه والله وحده يعلم شصار بيه من نزلته بالگبر بثنين اديه

دنگت بسته ودموعي تجري بحرگه
طلعت من الگبر شمرت علي التراب واني أأمنه على اخويه لحد ما اختفى من نظري

انطيت الكرك للدفان وگعدت بالگاع اعاين عليهم شلون يدفنون بي لحد ما خلصوا

گمبصت يم گبره قريتله ياسين ورشيت علي مي ورد ودموعي ما جفت ولا دقيقه واني اودعه للمره الاخيره وداع ابدي

شهم.. مودع بالله يالبطل ..
بالعافيه عليك الشهاده وان شاء الله احصلها مثلك حتى نلتقي يم الكريم بوجه ابيض

بست تراب گبره وشلت جهاد بالگوه لان نايم ع الگبر وميقبل يگوم

شهم.. گوم وليدي گوم

جهاد.. خالو شلون اعوفه واروح
وحشه علي يظل وحده بعد شويه راح تصير ظلمه

شهم.. دنگت ابچي : ربك ميعوفه وحده لتخاف علي

جهاد.. هيچ مهيب رحت وعفتني
انتي مو مواعدني العمر كله نظل سوه شصار هسه وخلفت بوعدك الي

يلا ضلعي لتضوج من كلامي .. اني من حرگت گلبي دا احچي هيچ مو قصدي اضوجك
غمض ونام رغد لتفكر بينه المهم راحتك

اخذته واني اسحل بي لحد ما طلعنه من الوادي
صارت رجعتنه للبيت ويا اذان المغرب عاينت للصاله عباره عن نسوان ينوحن بس كلهن اقارب

رحت يم امي گعدت يم رجلها اواسي گلبها الملچوم ع المدلل مالتها

الحجيه.. ها يمه دفنته واجيتني

شهم.. ادعيله يمه .. ادعيله وصليله صلاة الوحشه حتى تهون علي هالليله

الحجيه.. ما يحتاج ييمه .. ابني شهيد مكانه بالجنه مو بالگبر

شهم.. بست راسها : اي يمه الجنه نخلقت لمهيب وامثاله
سامحي اذا فد يوم غلط بحقچ او عله صوته عليچ

الحجيه.. مسامحته من گلب ورب يوليدي
صفحته بيضه ويايه من يومه .. الله يرضى علي ويعجل بيومي من بعده

شهم.. اسم الله عليچ يمه عمرچ طويل ان شاء الله ... لتحچين هيچ

درت وجهي على منال شفتها حاطه راس جهاد وسمر بحضنها ويبچون تلاثتهم .. رحت عليها بست راسها

منال.. خويه لحد الأن ممصدگه مهيب عافنه وراح

شهم.. انا لله وانا أليه راجعون

منال.. انا لله وانا اليه راجعون

گمت من يمهم تمشيت لغرفة مياس .. دگيت الباب ما جاوبت

شهم.. سهى

سهى.. ها شهم

شهم.. مياس نايمه ؟

سهى.. يمكن

شهم.. طبي شوفيها وتعالي طمنيني

سهى.. صار

راحت تشوفها شويه وطلعت تركض

سهى.. شو مموجوده

شهم.. شنو يعني مموجوده ؟؟ خاف بالصاله يم النسوان

سهى.. لا اصلا اني دخلتها للغرفه حتى تنام اول ما طلعتوا للدفنه .. وبعد ما شفتها ابد

شهم.. صدگ تحچين
ليش هيچ مو وصيتچ عليها الف مره

سهى.. والله حسبالي نامت

صعدت اركض لغرفتي ماكو .. دورت بكل البيت ما لگيتها تخبلت من خوفي عليها

طلعت للكراج اصيح عليها بلكت گاعده هناك .. تفاجأت من لگيتها گاعده بسيارة مهيب

جريت نفس بعد ما شفتها ... فركت وجهي ورحت باتجاها

فتحت الباب شكلها رايح من البچي .. جريتها من ايدها ونزلتها من السياره

شهم.. ليش هيچ بابا خوفتيني عليچ
شمگعدج هنا متگليلي

مياس.. بچيت بحرگه : صياحهم خنگني

شهم.. اسم الله عليج بنيتي
امشي خلي اوديچ لغرفتچ ترتاحين بيها وباچر اخذچ يم نهى حتى تخلصين من الصياح

وداني للغرفه گعدني ع الچربايه وراح .. شويه ورجع بيده صينيه بيها اكل

مياس.. ما اشتهي والله

شهم.. اكلي الخاطر ابن الغالي

مياس.. نزلت دموعي : احاول

شهم.. يلا گدامي خلي اشوف

گعدت اكل بالگوه ودموعي انمزجت بلاكل .. چم لگمه ودفعت الصينيه

مياس.. كافي بعد ما اگدر

شهم.. المهم اكلتي
يلا نامي ارتاحي والصبح اجي عليچ حتى ترحين لنهى

مياس.. ان شاء الله

طلع وطفه الضوه عليه .. تمددت انام بس ما گدرت كل شويه واذكر مهيب بصوته وشكله وحركاته وضحكته وكلشي بي

گمت للكنتور طلعت قميصه اشم بي واون بصوت عالي مثل الطفل اليريد امه وميشوفها گدامه

للثنتين انسطرت من گد البچي خليت قميص مهيب على وجهي وما اعرف شلون نمت
بعدني هستوني نايمه .....

يتبع..

______________

الرحمه والخلود لشهدائنا الابطال تحديدا شهداء الحشد الشعبي وعلى رأسهم الشهيد البطل مهيب 💔 الى جنات الخلد والملتقى عن الحسين ان شاء الله 💔💔