رواية مياس قلب الشهم الفصل الحادي والعشرون 21 - بقلم لبنى الموسوي

#مياس_قلب_الشهم

للكاتبه #لبنى_الموسوي

متابعيني الاعزاء .. ادعولي بالشفاء العاجل حتى اگدر استمر وياكم بالقصه لأن عيوني كلش تعبانه وحجزت عد الدكتور باچر
وحده الله يعلم شگد عانيت يلا گدرت اكتبلكم هذا البارت

بناء على طلباتكم اختصرت الكم المشاهد المؤلمه شگد ما اگدر واقتصرت على ذكر المهم فقط

ملاحضه: تم تغير الغلاف بناء على طلبات فانز بيج الست روعه على الفيس بوك

_______$$________

هذا المنه خايف چنت اگلكم
اجه الموت الگدر يبعدني عنكم
ابرولي الذمه خو ما زعلتكم
مو قصدي الله شاهد چنت احبكم
بعدكم يا ترى تذكروني بخير
انه الجوه التراب وبالي يمكم
دفنوتني ومشيتوا مشية وداع
وراكم صحت بس ما سمعتكم
تعالوا الليله وحشه لا تروحون
وحق العشره ما شبعان منكم
ما مرتاح احسكم جاي تبچون
منو المن بعدي گلكم محد الكم
بيكم بعد جيه ترى شتاگيت
لكن ما اريد اشلع گلبكم
بذراعي وجع بس مو وجع موت
مضت مده علي ما نومتكم 💔

للثنتين انسطرت من گد البچي خليت قميص مهيب على وجهي وما اعرف شلون نمت
بعدني هستوني نايمه شفت مره عجوز شكلها مقزز بشكل يشبه افلام الرعب

تتقرب عليه واني نايمه ع الچربايه .. احرك بنفسي اريد اگوم اشرد منها بس ما اگدر وكأنو احد مربطني

صعدت عليه گعدت على مقدمة رجلي وتعاينلي بعيونها البيضه وضحكتها الخلت دگات گلبي تضرب براسي

خلت ايدها على بطني ... جعصتها حيل وهي تگول بصوت يخوف : انطيني الطفل انطينيا

شاغت روحي من الوجع .. گمت اعيط بكل صوتي بحيث احس حنجرتي تجرحت وهي بعدها مستمره تضغط على بطني بقوه

صارت تضحك بصوت عالي فجأه سمعت منال تصيح بأسمي ؛

فزيت مرعوبه شفت النسوان متجمعات بغرفتي ومنال لازمه راسي وتصيح : اسم الله حبيبتي اسم الله

بعد ما وكلت مياس واطمأنيت عليها .. صعدت الغرفتي احاول انام بس ادري بنفسي مراح اگدر

غيرت ملابسي وتمددت بمكاني ... بدت الافكار توديني وتجيبني
ضحكات مهيب
صوته من يصيح بأسمي
اول مره شلته بيها من اجه للدنيا
فرحتي بي بيوم زواجه
عيونه المليانه ندم من يغلط ويجي يعتذر مني
منظر اشلائه لمن نزلتها بأيدي جوه التراب

حسيت على نفسي فقدت من هلافكار .. بچيت بچي بليلتها لحد ما گلبي انفطر وهاي ثاني مره ابچي بيها من بعد استشهاد ابويه

سيطر الوجع على راسي انتبهت لنفسي واستغفرت ربي : استغفر الله رب العالمين واتوب اليه لا اعتراض على امره فانا لله وانا اليه راجعون

گمت من مكاني توضيت وگعدت اقره قرأن هديه لروحه الطاهره

ساعات واني على هالحاله لحد ما سمعت مياس تصيح بشكل مخيف

گمزت من مكاني اركض حافي .. نزلت شفت النسوان صافنات بالصاله على غرفتها

شهم.. شصار ؟؟؟

منال.. والله ما ادري خويه

شهم.. ولچ رب الحلو تحركي شوفي البنيه شبيها بسرررررررعه

منال.. اي خويه اي رايحه

وگفت بمكاني اروح واجي من القلق منتظر منال تطلع تطمني ... انصدمت من سمعت صوت مياس رجعت تصيح

بعد ما شفت منال گدامي گعدت على حيلي مخروعه اتلفت بزوايا الغرفه ادور على العجوز بخوف : وين راحت هستوها چانت صاعده عليه

منال.. منو هي حبيبتي
شنو شفتي كابوس ؟؟

مياس.. اي وحده تخوف تريد تاخذ ابني

ويا ما تذكرت الصار حسيت وجع قوي ببطني .. وخرت الغطه ردت اگوم للحمام انصدمت من شفت الفراش مليان دم

منال.. صخام ولچ ليش نازفه هيچ

تخبلت من الشي الشفته گدامي .. لزمت بطني وكل جسمي ينفض خوف صار صوتها بأذني من گالت انطيني الطفل : صيحت بكل صوتي

مياس.. لاااااااااااااااااااااااااااااااااااااا

ويا ما عطت طب شهم يركض .. عاينتله ودموعي تجري مثل الشلال من خوفي على ابني ليصيرله شي واخسره مثل ابو

شهم.. شبيها منال ؟؟

منال.. الحگ خويه البنيه دتنزف ليروح الطفل منه

هي گالت مياس تنزف لو اني مدري شصارلي .. ركضت عليها دا اگومها حتى اخذها للمستشفى دفعتني وهي تشهگ

مياس.. ما اگدر امشي موجوعه كلش

شهم.. جيبي حجابها بسرعه

لبستني منال الحجاب وانصدمت من شفته شالني وركض بيه
صعدني بالسياره وصعدت منال يمي الطريق كله لازمه ايدي وتقره ايات قرأنيه

وصلنه للمستشفى راح شهم جابلي عربانه وصعدني بيها بس الألم كلما جاله يزيد اكثر واكثر

دخلونه للطوارئ ودخلت منال ويايه .. اجت الدكتور وسألت عن حالتي اخير شي تمددت تاخذلي سونار

مغمضه وادعي كون لا صارله شي لان ما اتحمل انفجع مره ثانيه .. سمعت الدكتور سألتني

الدكتوره.. ماما شمسويه بروحچ انتي

مياس.. بخوف : شنو ؟!!

الدكتوره.. الطفل ممرود مرد ببطنچ

مياس.. لا دكتوره لا
الله يخليچ لتگولين ابني مات

الدكتوره.. الله يعوضچ حبيبتي

فقدت وگمت ارفس بالسديه واني اصيح بصوت طالع من وجع گلبي

مياس.. شيعوضنيييييييييييييييي
منين يعوضني اذا ابو استشهد اليوم
منين ولكم منيييييييييييييين

ليش ربي ليش يعني تاخذهم مني ثنينهم بنفس اليوم والله هواي عليه هالشي ما اتحمل

زين يا الهي متاخذني وياهم المن مبقيني وحدي .. لسميحه ومصايبها لو الضيم فراگ حبيب گلبي لو القهر فقد ابني الما لحگت افرح بي

الدكتوره.. استغفري ربچ ماما حرام الدتحچي

منال.. صلي على محمد حبيبتي
متعرفين شنو الحكمه من هالشي
گولي الحمد لله والشكر وخلي الباقي على رب العالمين

مياس.. منال راح
ولچ ابن مهيب راح .. وبنفس اليوم هم
يعني مهيب اخذ ابنه وما اخذني ليش بس گوليلي ليش

گمت ابچي بحرگه ومنال والدكتوره يحاولن يهدأن بيه بس بلا نتيجه لأن محد يعرف بالنار الشاعله بصدري بهاي اللحظه

ظليت على هالحاله شويه واجت الدكتوره الثانيه سألت : منو مياس

مياس.. رفعت راسي والدموع بعيني : اني

منال.. خير دكتوره

الدكتوره.. راح نسويلها كورتاج لان الطفل ممرود ببطنها ولازم يتنضف الرحم

ما عرفت قصدها دنگت راسي ابچي بحرگه .. حسيت على منال گومتني

رحت وياها لغرفة ما اعرف مال شنو .. نيموني ع السديه شويه وبديت احس باوجاع فضيعه تدگ بگلبي

گمت اصيح بصوت عالي من وجع گلبي مو جسمي ... مر شريط ذكرياتي من بلغت مهيب بخبر حملي ونرسمت صورة ضحكته گبال عيوني

مياس.. ربي راح اموووووووووووووووت
گلبي يوجعني ولكم ... واحد بيكم ياخذ عمري ويريحني

- خطيه هاي شبيها هيچ تحچي

منال.. رجلها استشهد اليوم وبعدها دمعتها ما نشفت علي خسرت ابنها

- يا سوده عليه بعدها طفله وترملت

منال.. الحمد لله على كل حال

خلصوا بعد ما خلصت روحي من الألم .. ظليت شويه بعدين كتبولي على خروج

طلعت امشي بالگوه واني لازمه بأيد منال .. رفعت راسي شفت شهم داير ظهره النه وساند روحه ع الحايط ما انتبه علينه من طلعنه

منال.. شهم

بس سمعت صوت منال درت وجهي ع السريع .. عاينت المياس وجهه منتهي وهذا الشي الچنت خايف منه

شهم.. شنو راح ؟!!

منال.. امر ربك خويه

درت وجهي عنهن والدمعه بعيوني : چنت اريد اشيل ابنك بيدي واربي مثل ما ربيتك حتى اصبر نفسي بي على غيابك ليش اخذته وياك وحرمتنه من ريحتك مهيب

شفت شهم بهل حاله عرفته انقهر من الخبر ... حقه ينقهر اكيد چان متأمل هو وكل اهله بهل طفل حتى ينسون بي فراگ ابنهم

مسحت دموعي واستغفرت ربي : نرجع ونگول الحمد لله الذي لا يحمد على مكروه سواه

شهم.. عاينت المياس : الحمد لله ع السلامه بنيتي

مياس.. دنگت وبچيت بحرگه بلا ما اجاوبه

شهم.. لتبچين مياس كلشي يصير بي صالح للبشر خلي ايمانچ برب العالمين چبير

مياس.. تعبت كلش رجعوني للبيت

منال.. اي حقچ حبي .. يلا لزمي بيه خلي نروح

رجعت للبيت اول ما وصلت خليت منال تاخذني الغرفتي لأن مالي خلگ اشوف اي بشر گدامي

نضفتلي الچراچف ونيمتني .. ظلت يمي تحچي وتصبر بيه بس بالي مو يمها يم ضيم گلبي وقهري على ابني وابو

طلعت وطفت الضوه وراها ... اول ما سدت الباب شهگت بصوت مخنوگ حتى ليسمعوني

ظليت على هالحاله للصبح ما غمضت عيني ولا دقيقه وحده .. حاضنه روحي بيدي وراسي بين رجليه سمعت اصوات صياحهم العاليه

بچيت بحرگه لأن بعد ما اتحمل اكثر .. جريت موبايلي وخابرت شهم حتى يجي يطلعني من هالعذاب

ما گدرت انام طول الليل من القهر الچنت احس بي ... گمت فرشت السجاده وگضيتها بين الصلاة والقرأن لما صار الصبح

نزلت يم امي اواسيها على مهيب وابنه لان من عرفت الطفل راح تخبلت وشبعت بچي بعد ما حست بروحها خسرت مهيب للأبد

بقيت يمها ساعه كامله .. هستوني دا اگوم اشوف مياس دگ جهازي هي دتتصل
رفضتها ورحت دگيت الباب عليها

رفضني شهم دا اتصل بي مره ثانيه اندگت الباب .. ذبيت حجابي على راسي وصحت : تفضل

شهم.. ها بابا گعدتي

مياس.. ليش اني نمت اصلاً

شهم.. بيچ شي يوجعچ ؟؟

مياس.. گلبي

تحچي هيچ ومتعرف دتمرد روحي بكلامها .. تقربت منها جريت الطبله مالت الميز وگعدت گدامها

شهم.. مياس بنيتي اسمعي شراح احچي وياچ
انتي تدرين كلش زين هذا هو حال الدنيا
اليوم لو باچر احنه رايحين وميدوم إلا وجه الكريم

اليوم مهيب باچر اني ... قاطعتني بسرعه

مياس.. اسم الله عليك لتحچي هيج عفيه

شهم.. ما گتلچ راح اموت بس دا اگلچ هذا حال الدنيا ... كل احنه نمشي على ذات الطريق ونواجه نفس المصير

مهيب بطل وراح شهيد ... انتي تعرفين شنو يعني شهيد

يعني كل العالم تحسده على هيچ موته مشرفه
لان الشهاده منزله رفيعه ميحظه بيها إلا المحبب الى الله

مياس.. بچيت بحرگه : هو راح شهيد وارتاح وفوگاها اخذ ابنه ويا
زين واني ؟؟؟

شهم.. شبيچ انتي ؟

مياس.. منو الي من بعده
هم راح ارجع لكفخات الدنيا وظلم ناسها

شهم.. وسفه تفكرين هالتفكير واني موجود
وداعة الغالي الدفنته بيدي البارحه ما اخلي بشر يطخچ بورده ما طولني اتنفس هوى ربچ

انتي بنيتي قبل لا تصيرين مرت اخويه لو نسيتي مياس

مياس.. لا ما نسيت بس

شهم.. لا بس ولا غيرها
طمني روحچ واتركي عنچ هلأفكار ما دام ابوچ موجود ... ودگيت على صدري
يلا گومي حتى تتريگين واوديچ لنهى

مياس.. ما اشتهي والله

شهم.. مو بكيفچ گومي شو

گمت من مكاني غسلت ورحت حضرت ملابسي لأن ما اعرف شگد اطول يلا ارجع لهنا

طلعت للصاله شفت الكل گاعدين والحزن مخيم على وجوهم .. بس شافتني الحجيه گالت

الحجيه.. ابن وليدي چان امانه عندچ حتى هاي ما دبرتيها .. ليش ولچ ليش

منال.. يمه شنو هالحچي
هذا امر رب العالمين المسكينه شلها دخل هاي فوگ حرگت گلبها

شهم.. طلعت من المطبخ على صوتهم : شديصير هنا ؟؟

منال.. كلشي ماكو خويه لتخلي ببالك

شهم.. يلا امشي مياس تأخرت كلش

رحت ورى طبيت للمطبخ لگيت اخت نهى مجهزه الريوگ الي ولشهم
گعدت اكل بالگوه واني اذكر كلام الحجيه بس حقها لازم اعذرها لان حاسه بلوعتها

شويه وشفته گام گمت ويا ع السريع .. بس انتبهلي عاين صفح

شهم.. ليش ما اكلتي

مياس.. ما اشتهي

شهم.. بس ميصير هيچ .. يعني شلون تالي وياچ

مياس.. عاينت الاستكانه : گول لنفسك بلأول

شهم.. تنهدت : امشي بويه امشي

اخذتها وطلعنه لبيت خالتي ... قريب منوصل خابرت يوسف حتى يطلعلي

شهم.. السلام عليكم

يوسف.. وعليكم السلام حبيبي
شلونك بالي يمك والله

شهم.. الحمد لله على كل حال
سويلي طريق اريد اشوف نهى بالي يمها

يوسف.. اي تفضل .. عدهم علم بجيتك

طبيت سلمت بس ما گعدت يمهم .. اخذت مياس ورحت بوجهي لغرفة نهى

فتحت الباب وانصدمت بمنظرها
عيونها رايحه
وجهه اصفر
الدويات مكومه يم راسها
بس شافتني بچت بحرگه .. ركضت ع السريع حضنتها

شهم.. ليش دتسوين بروحچ هيچ
تردين تموتيني مو كافي قهر گلبي على اخويه هالدور انتي عليه

نهى.. والله شهم لحد الأن ممصدگه مهيب مات
مدا اگدر اتقبل الفكره والنبي مدا اگدر

شهم.. مسحت دموعها بيدي : كافي يروحي
مهيب هو الراد الشهاده وبالعافيه علي من حصل مراده

اعاينلهم ودموعي تجري .. رفعت راسها انتبهت عليه
شهگت وفتحتلي ايدها ركضت حضنتها وشبعنه بچي ثنينه

شهم.. كافي الخاطر الله مو راح تموتني

عفتهن وطلعت ع السريع لأن ما تحملت منظرهن گبالي وهن بهل حاله
وصيت البنات عليهن واخذت يوسف حتى ننصب فاتحة الغالي

ظليت يم نهى وحده صافنه بوجه الثانيه وبس دموعنه تحچي .. بقينه ساعات ع هالوضع لحد ما صار الظهر

جابت اختها الصغيره الاكل بس لا اني ولا هي اشتهينا ناكل

نهى.. اكلي حبي انتي حامل لازم تتغذين لخاطر ابنچ

مياس.. بچيت بحرگه : ماكو طفل راح

نهى.. لطمت على وجهه : يا يمه صدگ تحچين مياس !!
ولچ شلون صار هالشي ؟؟

مياس.. بنص الليل نزفت ومن اخذوني للمستشفى طلع الطفل ميت ببطني

گامت من مكانها ع السريع .. حضنتني حيل وهي تبچي

نهى.. سوده عليه حياتي منين تتلگيها الله يعين گلبچ ويقويچ

بهلاثناء انفتحت الباب وطبت اخت نهى

منى.. حبي مياس ابوچ اجه عليچ

بس سمعت ابويه جاي گمت ع السريع .. طلعت اركض لگيته واگف بالباب
حضنته وذبيت حرگة گلبي على صدره

اشرف.. اسم الله عليچ بنيتي
ليش كل هالشي يصير وياچ ومتنطينه خبر

مياس.. ما ردت اخوفك عليه

اشرف.. يعمر ابوچ
زين شدتسوين هنا ؟؟

مياس.. اختنگت من اجواء الفاتحه وشهم جابني يم مرته حتى ارتاح

اشرف.. امشي استأذني منهم حتى ترجعين ويايه

مياس.. وين ؟؟

اشرف.. بيت ابوچ اوله بيچ من الاغراب

مياس.. اوك بابا

طبيت استأذنت من نهى صح ما قبلت على روحتي بس من شافتني مصره سكتت

رحت ويا ابويه .. خايفه من سميحه كلش بس هناك احسن ع الاقل ما احس بالغربه مثل هنا

اول ما طبيت شفت اخواني بالصاله ديلعبون بس انتبهولي ركضوا لحضني لأن ما شايفيني من زمان

بوستهم ورحت بوجهي لغرفتي قبل لا اشوفها گدامي چنت ادري راح تسممني وفعلا صار هالشي

بعدني ما گاعده ع المندر انفتحت الباب .. درت وجهي وانصدمت من شفتها طبت عليه تضحك

سميحه.. ها حبي تالي رجعتيلي

ما جاوبتها .. شمرت الملابس من ايدي درتلها ظهري ونمت

سميحه.. ههههه سوده عليه مبين عليچ تعبانه
يلا حقچ البارحه مات رجلچ اليوم ابنچ وباچر الله يعلم منو لأن هالشي متوقع غير انتي فگر على امچ

نزلت دموعي بحرگه بس حاولت اكتم صوتي حتى لتسمعني ابچي

سميحه.. شفتي شلون الله ردها لمهيب
مد ايده على عماد بلا ذنب تالي انمدتله ايد الله وشلون مده ما ظل منه بس العظام

ما فهمت قصدها : شنو ما ظل منه بس العظام ؟!!
گمت من مكاني رحت للحمام حتى بلكت من ارجع الگاها موليه

طبيت وقفلت الباب على روحي .. گعدت ابچي لما عيوني ورمت وراسي انفجر

نص ساعه تقريبا تعبت واحتريت كلش .. طلعت للغرفه ما لگيتها الحمد لله

سديت الباب وتمددت بفراشي .. ابچي بحرگه على حظي مدري على رجلي مدري ع الوقت الاغبر اليخلي وحده مثل سميحه تتشمت بواحد مثل مهيب

لليل هلكت من البچي ونمت على روحي .. هستوني نايمه حلمت وكأني بمكان مثل الصحراء ما بي غير مخلفات الحرب ونيرانها

درت وجهي شفت مهيب لابس زي عسكري بس شحاله من الدخان والدم والتراب

لازم بيده الخوذه و واگف بعيد يعاينلي ببتسامته المعتاده .. تقربت منه ببطئ واني لازمه بطني لان متوجعه وصعب عليه امشي سريع

مياس.. هذا انت حبيبي ؟؟

مهيب.. اي مياس اني

مياس.. ليش رحت وعفتني شلون هنت عليك

مهيب.. ما عايفچ .. روحي وياچ

مياس.. مهيب انت مو

دا احچي فجأه اختفى من گدامي .. تخبلت گمت اركض بكل مكان واني اصرخ

مياس.. مهييييييييييييييييييييييب
تعال لتعوفني وتروح الله عليك
ولك مهييييييييييييييييب

فزيت على صوت ابويه ديگعدني .. حضنته حيل وبچيت بحرگه

اشرف.. اسم الله بويه اسم الله
ماكو شي لتخافين هذا حلم

رجعني لفراشي .. مسح على راسي قريب الخمس دقايق اخير شي طلع وطفه الضوه ورى

مرت ٣ ايام صعبه ما بيها غير وجع جسمي وگلبي ودموعي الما نشفت على مهيب

سميحه ما بطلت وهي تتشمت بيه ع الرايحه والجايه بس مچنت اجاوبها لان حالتي متسمحلي بهل شي

اما الاكل فما خليته بحلگي من اجيت هنا ولليوم بحيث احس كل جسمي يرجف من الضعف وفوگاها اخذ علاجي على معده فارغه

چنت يوميه اسمع ابويه يسأل سميحه دتاكل تگوله اي طبعا كلشي تاكل لتخاف عليها وهي بالچذب گلاص مي متجيبلي ادز اخواني هم يجيبولي علمود العلاج

لليل متمدده بفراشي ودموعي تجري بحرگه سمعت الجرس اندگ سريع كلش مال واحد مستعجل

خليت ايدي على گلبي ليكون عماد .. بعدين تذكرت ابويه هنا اتطمنت لان مستحيل يسويلي شي بوجوده

شويه وسمعت صوت شهم ما صدگت تذكرني واجه يسأل عليه .. لزمت بالحايط وتمشيت بالگوه لحد ما وصلت للباب

فتحتها شفته واگف يحچي ويا ابويه بس چان شكله كلش عصبي

خلصت الفاتحه واني ما شايف دربي بحيث ما ادري بالدنيا طشت لو رشت

ثالث يوم رحت لنهى ومياس حتى ارجعهن وانصدمت من طلعتلي نهى وحدها

شهم.. لعد وين مياس ؟!!

نهى.. اجه ابوها اخذها من اول يوم

تخبلت من سمعت بهل شي .. فقدت وگمت اصيح ع الكل لأن محد منهم انطاني خبر بروحتها بلأخص يوسف

اخذت نهى وطلعت ع السريع .. رحت لبيت اهل مياس بقيت نهى بالسياره ونزلت حتى ارجعها ويايه

دگيت الجرس .. طلعلي ابوها اول ما شفته انفجرت بوجها

شهم.. انت شلون تاخذ مياس بلا ما تنطيني خبر

اشرف.. انطيك خبر شنو ؟؟
غير هي بنتي تريد استأذن منك علمود اخذ بنتي !!!

شهم.. مثل ما هي بنتك فهي بنفس الوقت مرت اخويه يعني مو من حقك تتصرف من كيفك وتاخذها بلا علمنه

اشرف.. اخوك مات والله يرحمه
والطفل راح
يعني بعد ماكو شي يربطها بيكم .. لازم ترجع لهنا بيت ابوها اوله بيها

شهم.. عيب عليك والله
چان استحيت قبل لتحچي هالحچي
بعدين انت متعرف بلاصول ع الاقل خلي يخلص الاربعين يلا تسود وجهك بهل تصرف

اشرف.. اني ما اخذتها من بيتكم حتى جاي تعاتبني

درت وجهي شفت مياس واگفه تعاين علينه ودموعها بعينها

شهم.. مياس حضري روحچ بسرعه حتى ترحين ويايه

اشرف.. وين ؟!!

شهم.. لبيت رجلها من يخلص الاربعين عود نتفاهم

اشرف.. روحي بويه روحي خلي نشوف وين تصفى السالفه تالي

طبيت للغرفه اخذت غراضي وگلبي ينعصر الم لمن احس روحي مثل المتشردات حتى ما عندي مكان مثل العالم والناس ارتاح بي
ضحكت ويا نفسي : هو انتي فعلا متشرده مياس لو نسيتي ماضيچ

رجعنه للبيت الطريق كله ما حچه شهم شي بس اول ما طبينه عاط بيه

شهم.. ميااااااس ... گدامي لغرفتچ

دخلت للغرفه ثواني واجه ورايه .. رگع الباب وخزرني حيل ظليت صافنه بوجها

شهم.. شلون تولين لبيت اهلچ بلا ما تگوليلي
نسيتي عماد النذل شسوه بيچ اخر مره

مياس.. ابويه اجه اخذني
بعدين انت مشغول بالفاتحه وينك ويني

شهم.. ليش خابرتيني وما اجيتچ حاچيني ؟؟
شعليچ بيه مشغول مصخم ملطم انتي بس گولي واشعل امه على ابو الميجيچ ساعتها

مياس.. هسه مصار شي لتتعصب

شهم.. هاي شبيچ دترجفين هالشكل ؟؟
مياس احچي
شنو انتي مچنتي تاكلين لو مرت ابوچ ورى هل موضوع

دنكت بلا ما اجاوبه .. فجأه عاط بصوت نززني من مكاني

شهم.. مناااااااااااااااال

منال.. اجت تركض : ها خويه ها

شهم.. جيبي لمياس اكل ومتطلعين من يمها اذا ما كملته كله گدام عينچ

منال.. صار خويه من عيوني

طلعت من الغرفه روحي صايره بخشمي امشي وادردم ويا نفسي : والله هل مره راح تخبلني
شنو من بشر بس ارد افتهم ماكو بگلبها رحمه
لا وفوگاها الافندي يگول بيت ابوها اوله بيها خاب دطيررررررررر

طبيت الغرفتي ورگعت الباب ورايه ... مقهور حيل من الديصير والامر من كل هذا اذا خلص الاربعين شلون اتصرف حتى احمي مياس منهم لان مستحيل اخليها ترجع للضيم الچانت عايشه بي

گعدت بمكاني افكر وافكر وافكر لحد ما راسي انفجر .. اندگت الباب حسبالي نهى گتلها : طبي حياتي
تفاجأت بجهاد

شهم.. ها حبيبي صاير شي

جهاد.. لا خالو بس اريد احچي وياك شويه اذا تسمحلي

شهم.. طبعا يبعد خالك
تعال تفضل

گعد گبالي يفرك بأيده .. حاس بي لأن اعرف كلش زين شنو چانت طبيعة العلاقه التربطه بمهيب هذوله چانوا جسدين بروح وحده وهسه راحت هالروح وظل جهاد عايش بس جسد

شهم.. مديت ايدي على راسه : حبيبي كافي
ارحم روحك شويه ترى حرام الدتسوي بنفسك لو مهيب عايش ويشوفك هيچ راح يزعل منك كلش

جهاد.. دنگ يبچي : مو بيدي خالي والله مو بيدي

شهم.. احچي بلكت ترتاح

جهاد.. ما اتصور ارتاح

شهم.. ميخالف جرب

جهاد.. اول ما التحقنه بالحشد واجهنا صعوبه بشكل مو طبيعي واحنه نشوف بعيونه الحرب الما چنه نشوفها غير بس بلاخبار

مرت الايام وصرنه يوميه نتعود على شخص ونفقده لحد ما صار الموت عدنه عادي ومستعدين بأي لحظه نتوادع فچنه كلما نطلع للمواجهه واحد يسلم ع الثاني وقسم منهم يوصي وصيته لأن يحس بروحه راح يروح شهيد

ليلة استشهاد مهيب چنه متمددين بفراشنه نسولف ونضحك على ذكرياتنه فجأه گلي ارد اوصيك

تخبلت من سمعت منه هل حچي وبديت اغلس علي بأنواع الكلام بس حتى امنعه يكمل كلامه

ظل مصر ع الوصيه .. ما رضيت اسمع منه لحد ما ضاج كلش
عاط بيه بصوت عالي سكتني وهو يگول : خلي احچي لازم تسمع مني

سكتت وكمل كلامه : جهاد اذا صارلي شي ابد لتزعل وتضوج احنه اجينه لهنا وكل واحد بينه حامل روحه على چف ايده ينتظر منيته

كمل الطريق من بعدي وان شاء الله تنتصرون على اعدائنا

قاطعته سكتني بسرعه وهو يگول : خلي اكمل كلامي
ما اوصيك بعد لتأذي شهم وصيرله الابن اليحلم بي .. عوضه عن غيابي جهاد وصبره اذا شفته انهار وتعب بعد موتي

دير بالك على امك واختك لأن مالهم غيرك انت رجالهم وسندهم بهاي الحياة

جاوبته باستهزاء : شو اسكت عرج ميطبك يا عار

ضحك من فدوه رحت لضحكته الحلوه وضربني على صدري .. مد ايده بجيبه طلعلي ورقتين وگال : هاك الزم

استغربت وسألته : شنو هذني ؟

جاوبني : رسالتين وحده لشهم و وحده لمياس اذا صارلي شي واستشهدت امانه عندك تسلمها الهم

جسمي كله ينفض واني اسمع وصيت مهيب لجهاد .. من عرفته تارك رساله الي گلبي راح لأن ممصدگ راح ارجع اشوف كلامه من بعد ما فقدت الامل نهائياً

شهم.. وين الرسائل جهاد ؟؟

جهاد.. مسح دموعه ومد ايده لجيبه : تفضل خالي وانت سلم الرساله لمياس لأن اني ما اگدر انطيهيا

انطاني الرسائل وطلع من الغرفه .. عاينت الرسالتي مكتوب عليها اسمي فتحتها بأيد ترجف واني افكر شنو ممكن يكون كاتبلي بداخلها

انصدمت من شفت دموع مهيب عليها بحيث حتى الكلام قسم منه متشوه تقريباً

مهيب.. حبيبي
اخويه
ابويه
صديقي
ماكو فرق كل الالقاب تنطبق ع الشهم

اذا وصلتك هاي الرساله معناها اني ودعت الحياة للأبد وهذا يعني راح اودعكم ويا حياتي

شكرا على كلشي ....
شكرا على تربيتك
شكرا على شهامتك
شكرا على صبرك
شكرا على حنيتك العوضتني عن غياب ابويه

وصيتي الك تقوي گلبك بعد ميوصلك خبري
لتزعل ولا تحني ظهرك .. ارفع راسك ليفوگ وافتخر بابنك الشهيد

دير بالك على امي لان ادري غيابي راح يكسرها .. واسيها وظل ذكرها دائما اني ما متت حتى تبرد نار گلبها

مياس يا شهم .. مياس بنيتك البفضلك من بعد رب العالمين خلصت من ظلم البشر

ادري موتي راح يأذيها وممكن يدمرها بس كلما اتذكر انت موجود اطمأن وارتاح كلش

مرتي وابني الما لحگت اشوفه امانه عندك ليوم الحساب

تزوجها شهم .. كلش صعب عليه اگولك هالشي لان ادري راح اكسر نهى بهل قرار بس مجبور لأن ما عندي غير حل

ما اگدر أامنها عد بشر غيرك لأن ادري بيك احن عليها حتى مني .. اعتبر هالشي رجاء اخير وتأكد هذا اخر طلب الي يمك

اترجاك شهم تحميها من سميحه وعماد .. لتخلي مياس تنذل من بعدي ودير بالك تسمح الابوها ياخذها منك

ادري بيك ما تقبلت الفكره هسه بس تأكد بعدين راح تحبها غصباً عنك وهي هم كذالك لأن مستحيل اكو مره تعاشرك ومتحبك

مياس امانة الله ورسوله عندك وادري بيك كلش زين راح تكون گد هل أمانه

امسح دموعك لأن دموعك غاليه عليه يوالدي الروحي ... الله يطول بعمرك ويخليك خيمه على راس كل الناس اليحتمون تحت ظلك الدافي

الشهيد مهيب ...

اقره بالرساله وما اشوف الكلام من گد الدموع التجري من عيني .. من طلب مني اتزوج مياس راحت روحي بطلبه هذا

صعبه الأمانه الخلاها برگبتي لأن مياس مو بس مرت اخويه لا بل هي بنتي الما خلفتها

بست الورقه من كل مكان وكأني دا اقبل اخويه مو كلماته .. خليتها على گلبي اتنفس سريع واني احس الهوى ديرفض يطب الريتي والغصه وگفت بزردومي

گمت اردد بلاستغفار حتى اهدأ وارتاح لحد ما استجمعت نفسي شويه

شهم.. وگفت بالدرج صحت بكل صوتي : جهاااااااااااااااااد

جهاد.. ها خالي

شهم.. تعال اصعدلي بسرعه

رجعت طبيت للغرفه ثانيتين ودخل ورايه .. گتله يسد الباب حتى لحد يسمعنه

جهاد.. نعم خالو

شهم.. جهاد اريد اطلب منك طلب

جهاد.. خير أأمرني خالي

شهم.. اريدك تتزوج مياس ......

يتبع..