رواية مياس قلب الشهم الفصل الحادي والثلاثون 31 - بقلم لبنى الموسوي

#مياس_قلب_الشهم

للكاتبه #لبنى_الموسوي

اولئك الذين يكسرون قلباً فينزعون شيئاً من سلامه 💔
كيف لهم ان يرددوا عند كل صلاة "السلام علينا و على عباد الله الصالحين " !!

_____________________

مرت اكثر من ٣ اشهر على التحاق شهم .. صار يتصل بيه كل يومين تلاثه خمس دقايق يسأل شلونكم ويسد الخط

طول هاي الفتره التهيت بين نونه والسهر وياها وبين تبارك الصارت تراسلني يوميه بحيث اذا فد يوم گطعت اني اراسلها لان تعودت عليها

فد يوم چنت واگفه بالمطبخ ويا منال بالثنتين الظهر دنجهز الغده انهبطنه لمن سمعنه صوت صياح رجال وبچي قوي بس چان الصوت بعيد كلش

طلعنه نركض نشوف شديصير عاينت للحجيه مستغربه مثلنه فجأه انفتحت الباب وفتحنه عيونه ويا فتحتها على الموقف الصار گدامنه

يوسف ديجر بسمر واعصابه مثل البركان يغلط ويفشر ويسب وهي منتهيه من البچي بين ايده

ركضت منال على يوسف تدفع بي تريد تعرف شصار بس هو فاقد بحيث مديعرف شيحچي وشلون يفشر .. صاحت الحجيه حتى تسكته

الحجيه.. بروح نهى يخاله فهمنه السالفه مو گلبنه وگف من وراك

يوسف.. اشر على سمر : هاي الساقطه مصادقتلها واحد ×××× ورايحه ويا للشقه
على اخير لحظات لحگتها قبل ليسلب شرفها

حچه هيچ وركض دفرها برجله تكومت بالگاع .. بس سمعت هالحچي منال نزلت ضرب بيها ركضت افكها عنها بس ما گدرت لان چانت فاقده ومتتفاهم بعد

انگلب البيت صياح على بچي على ضرب على غلط وفشار يوسف الما وگف ولا لحظه لحد ما دخلوا ايهاب وجهاد

لزمت گلبي بس شفتهم گبالي .. عاينت الجهاد فتح عيونه لمن شاف اخته متمدده بالگاع وحال الضيم حالها لان منال ما قصرت وياها حتى شعرها هلسته بايدها

جهاد.. رفع راسه ليوسف : شصاير يوسف !!!!

يوسف.. استغفر الله رب العالمين واتوب اليك

جهاد.. ولك احچيييييي

ايهاب.. شديصير هنا احد يفهمنه

يوسف.. هسه احچيلكم بس تعالوا نگعد

حسيته يريد يهدأهم بهذا التصرف بس بالمقابل شكله يناقض افعاله لأن چان هو يحتاج واحد يهدي مو العكس

جهاد.. لك احچي بسررررررعه

منال.. شيحچي ولك شيحچيييييي
اختك مصاحبتلها واحد ورايحه ويا برجلها لشقته حتى تنطي شرفها وتطمس راسنه بالوحل

سمر.. لا والله يمه .. مو هيچ مو هيچ
والله مو هييييييييييچ

عيوني تراقب جهاد خايفه من ردة فعله بس الما چنت حاسبه حسابه ايهاب هو اليفقد عليها لان جهاد دخل بحالة صدمه وظل بس صافن

لزمها ايهاب من شعرها و وگع بيها دگ .. راحله يوسف ع السريع حاول يفكها منه بس ما گدر شويه وعاينت الجهاد ركض للمطبخ

ظليت اراقب الباب اريد اعرف شديسوي تخبلت من شفته طلع وبيده السچينه .. ركضت گدامه وفتحت ايدي

مياس.. لا جهاد لا .. الله يخليك لا

دفعني حيل وگعت على وجهي .. گمت ع السريع جريته من قميصه اتوسل بي

مياس.. جهاد عفيه اصحى
ولك جهاااااااااااااد

فلت مني تقرب عليها رفع ايده ديضربها غمضت حيل .. سمعت صوت منال تصيح ليوسف

منال.. يوسف الله يخليك الزم جهاد يوسسسسسسسسسسف

فجأه سمر عاطت بصوت طالع من گلبها ... فتحت عيوني ع السريع
تهسترت لمن شفت السچينه نابته ببطنها والگاع غرگانه بالدم

ركضت عليها اني ومنال .. رفعت راسها احچي وياها بس هي دتنازع حتى الحچي ميطلع منها

رفعت راسي عليهم .. تلاثتهم صافنين ومحد بيهم مستوعب الشي الصار
صحت بيهم ودموعي تجري بحرگه

مياس.. ولكم الحگولهاااااااااااااا
راح تموت بسرعه ولكم بسرررررررعه

گمت على جهاد هزيته حيل : جهاد اختك دتموت ولك جهاااااد
ركضت اليوسف : يوسف الله يخليك لحگ عليها

محد منهم تحرك .. انگلب البيت بصياح منال والحجيه ورنا والجهال فحطوا من البچي على المنظر الصار گدامهم

رجعت على سمر ابچي بحرگه واحاول اشيلها من الگاع .. فجأه حسيت على احد دفعني رفعت راسي شفته يوسف

يوسف.. شالها ع السريع وصاح عليه : افتحي الباااااااااااب

فتحتها ورحت ويا ع السريع ساعدته يخليها بسيارته .. رجعت اركض لايهاب

مياس.. ابو مجتبي روح ويا .. تسمعني
ماكو صافن : بروح مهيب اصحى ايهاب
تحرك الله عليك تحررررررررك

واخيراً صحى طلع يركض حتى يلحگهم .. لزمت وجهي بايدي وشبعت بچي حسيت على منال فقدت رحت عليها اهديها

مياس.. اهدي منال الله عليچ اهدي

تخبلت فجأه .. گامت وهي فاقده ضربت جهاد على صدره حيل

منال.. شسووووووووووويت
ولك جهاد كتلت اختك
يمعزه راحت سمر .. راحت راحت ولك راااااححححت
وگامت تشرمخ بخدودها

اريد الزمها ماكو .. اعاين الجهاد بعده صافن فوگاها جهال رنا خبصوا الدنيا بالبچي

مياس.. رناااااا ولچ جهالچ .. سكتيهم يمعوده

راحتلهم تنحب بصوت عالي .. درت وجهي على منال وما اشوفها إلا تكومت بالگاع اجتها الحجيه تركض

نحاول نگعد بيها ماكو .. رفعت راسي الجهاد حاچيته بس مدا يستوعب الكلام ركضت علي كفخته على وجها
فتح عيونه عليه بعد هالحركه .. صيحت حيل

مياس.. كافي اصححححى اختك دتموت وامك متمدده گبال عينك وانت ولا يمك

جهاد.. جيبيلي عطر ع السريع

ركضت الغرفتي دا اجيب العطر لكيت نونه گاعده ومنتهيه بالبچي بس من الهوسه الـ بالصاله ما سمعت صوتها

شلتها وطلعت ع السريع .. حط العطر على خشمها بالبدايه ما صحت بس شويه وبدت تحرك بعيونها

جهاد.. يمه گومي .. الله يخليچ فتحي عيونچ

اول ما فتحت عينها وشافت جهاد گدامها نهارت بالبچي .. حضنها وصار يبچي حيل نزلت دموعي وياهم

منال.. ولك يمه شسويت .. شلون تكتل اختك
والله اذا صارلها شي فلا اسامحك يا جهاد

الحجيه.. بيبي گوم روحلهم .. لتخلي اختك وحدها
ترى اذا صابها مكروه راح تعيش عمرك كله وانت ندمان على هاللحظه

جهاد.. رايح بس ديروا بالكم على امي

ظلينه للعصر ننتظر منهم خبر بس محد اتصل وطمنا ... تهسترت منال خصوصا من خابرنه ايهاب وجهاد وما ردوا
لبست عبايتها رادت تروح للمستشفى لزمتها الحجيه تمنعها

منال.. يمه وليرحم والديچ هديني
اذا ما اروح واشوف بنيتي بعيوني اتخبل والله اتخبل

الحجيه.. يمصخمه وين ترحين ؟!!
ولج الرياجيل كلهم يمها تردين تفضحيهم بالمستشفى بخبالچ هذا

منال.. يوم عوفيني .. شو وخري عني خلي اروح اشوف شديصير وياهم وليش محد ديتصل يطمن بالنه عليها

الحجيه.. اگعدي منال

منال.. يمه وخررريييييي

الحجيه.. هاي تاليها تصيحين على امچ بعد هالعمر
خلف الله عليچ بنيتي

منال.. بچت بحرگه وحضنتها : يمه والله مو قصدي
بس هذوله بنتي وابني وثنينهم ديروحون من ايدي واني واگفه بس اتفرج لا حول ولا قوة

الحجيه.. اسم الله عليهم بنتي
كلها كم ساعه ويرجعون الحضنچ بس اهدي شويه خلي الزلم تتصرف احسن ما تخربيلهم الاول والتالي

گعدت ع القنفه تبچي .. خليت نونه بصفي وگعدت يمها عسى ولعل اگدر اخفف من قهرها شويه

منال.. مياس حاچيني اني شمسويه بحياتي حتى المصايب متقبل تعوفني

ترملت بعز شبابي .. راح رجلي وعافلي ثنين جهال برگبتي
لا اعترضت على امر رب العالمين ولا فد يوم تعبت منهم بالعكس حاربت الدنيا كلها واولها بيت جدهم بس حتى يظلون بحضني ومحد ياخذهم مني

فنيت عمري بتربيتهم وچنت افضل راحتهم على راحتي .. وصلت المرحله نسيت بيها حتى نفسي كله في سبيل اكبرهم حتى اگدر اعتمد عليهم لمن حيلي يروح

من تالي هاچ شوفي بعينچ شصار
بنيتي الچنت اتمنى اتباهى بيها گدام العالم وازفها بيدي للانسان اليستاهلها طلعت حالها حال بنات الشوارع والرخاص الينطن نفسهن بسهوله بدون ميحسبن حساب لا الربهن ولا الاهلهن

وابني .. ولچ ابني العشت عمري انتظره شوكت يكبر ويحل محل ابو حتى يخفف عني الحمل .. اجه بلاخير وكسر ظهري لمن كتل اخته بايده وضيع روحه وضيعها ويا

مياس.. الله عليچ كافي
لتسوين بروحچ هالشكل .. ان شاء الله يعدي الموضوع ع خير
هسه تگوم سمر بالسلامه وتنحل السالفه بلا مشاكل هيچ اني حاسه

منال.. ولچ شتنحل ؟!! صدگ تحچين
انتي متخيله من يجي شهم ويعرف بالصار شراح يسوي ولچ شراح يگوووول
عزه العزاچ منال .. تصخمتي وتعزيتي يمنال .. وتدگ على خدودها

مياس.. لزمت ايدها : عفيه اهدي عايني الجهال شصار بيهم
دوري وجهچ على امچ وشوفي حالها ارحميها شويه

منال.. رنا خابري رجلچ لو يجاوب لو هسه اگوم اروحلهم ومحد يمنعني

رنا.. اي خيه هسه اخابر بس اهدي

راحت تتصل دگ التلفون بيدها گمزت تصيح : ايهاب ديخابر

منال.. ردي بسرررعه

رنا.. الووو
ها ايهاب
اي شنو بشر
ها الف الحمد لله والشكر .. زين شوكت تجون
اي ميخالف يلا عود خابرنه لتخلي بالنه يمكم
مع السلامه

منال.. ها ولچ شگااال ؟؟

رنا.. زينه لتخافين
بس راح تظل بالمستشفى الباچر الصبح حتى يراقبون حالتها اخاف تتدهور لا سامح الله

منال.. الله عليچ زينه

رنا.. اي وداعة جهالي

منال.. مياس بلا زحمه عليچ جيبي موبايلي خلي اخابر جهاد ما بيه حيل اخطي خطوه وحده بعد

مياس.. صار تتدللين

ناوشتها الموبايل ورجعت يمها خليت نونه بحضني .. اتصلت بي مرتين يلا جاوبها

منال.. ها ولك جهاد ليش مدا ترد
المهم اختك شلونها
لتحچي عليها مو كافي السويته
هسه يلا لتعلي صوتك على امك عيب عليك وليدي
روح جهاد روووح

سدت الخط بعصبيه افتهمت من كلامها جهاد بعده متوتر ومناوي ع الخير

مر الوقت بصعوبه لان بالنه يم سمر والولد مديخابرون ولا يجاوبون إلا بالصدف يمكن جزعوا من ملحتنه بلاتصالات طول اليوم

ظليت طول الليل سهرانه ويا نونه كالعاده رغم كبرت بس بعدها نومتها ممنتضمه

للسبعه الصبح الله هداها ونامت .. شمرت روحي ع الچربايه مثل الميت فزيت على صوت جهاد يصيح

لبست حجابي وطلعت اركض .. لگيت سمر خاله راسها على صدر امها و وجهه اصفر بلون الكركم وجهاد حاير شيحچي عليها

عاينت اليوسف واگف على تك رجل متچتف وساند روحه ع الحايط وايهاب مگمبص بالگاع وحاط ايده على راسه

خفت من منظرهم بس لا مسويلها شي هالنذل .. رحت لرنا اركض

مياس.. رنا

رنا.. ها

مياس.. شصار يمعوده

رنا.. شيصير يعني اكثر من هالشي

مياس.. الله يخليچ لتگولين مسويلها شي

رنا.. لا اسم الله .. كلشي ممسويلها

مياس.. وجهاد خو مراح ينحبس ؟؟

رنا.. لا يوسف دبرها ويا معارف شهم وطلع من السالفه

مياس.. لعد اذا هيچ ليش حالهم هالشكل ؟!

رنا.. بعد تدرين بالزلم دمهم حامي مو قليل يعتدون على شرفهم ويوگفون يتفرجون

مياس.. اي بس
دا احچي فزيت من عاط جهاد

جهاد.. يوم لتبرريلهاااااااااااااااااا
اسمعي لچ
جامعه بعد ماكو
طلعه وطبه ماكو
موبايل ماكو
حتى النفس ما اريدچ تتنفسي

گمز عليها جرها من ايدها : وهذا ال×××× مالتچ تنطيني كل معلوماته حتى اگدر اوصله واراوي شلون يعتدي على شرفي

يوسف.. اجه جره منها : كافي جهاد البنيه تعبانه وهستوها طالعه من الموت
اهدأ شويه حتى نگدر نتصرف

جهاد.. اهدأ !!! هههههههه
احلف بالله

ايهاب.. جهااااااااد ... بسك عاد تعبتنا من البارحه لليوم ترافس ومحد گادر يوگفك

جهاد.. خالي تحچي صدگ
يعتدون على شرفي وشرفك وتالي جاي تگلي بسك
من كل عقلك خالي من كل عقلك

ايهاب.. شتريدني اسويييييييييييييي
اذبحها بيدي گدامك مثل ما سويت انت ؟!!
ترتاح بهل شي حاچيني جهاد حاچينييييييي

يوسف.. كافي الخاطر ربكم كافي
منال اخذي سمر الغرفتها لازم ترتاح

جهاد.. وين !! متگوم منا اذا متحچيلنه كل السالفه

يوسف.. جهاد البنيه تعبانه مدتشوف حالها
مو وكتك اجل الموضوع شويه

جهاد.. لا ميتأجل لازم اعرف كلشي اليوم قبل باچر

يوسف.. منال اخذيها الغرفتها

جهاد.. گتلك متتحرك منا يعني متتحرك

يوسف.. مو بكيفك احنه نمشي

راح جر سمر من ايدها اعاين عليها بالگوه تمشي .. ركض جهاد عليهم دفعه يوسف اجوا يتلازمون لو ما ايهاب عاط بيهم

ايهاب.. شبيييييييييكم
هي هاي الناقصه تتعاركون بيناتكم وتعوفون المصيبه الوگعت على روسنه
جهاد فوت اگعد خلي سمر ترتاح هسه عود بعدين تفهم التريد تفهمه منها

جهاد.. بس خالي

ايهاب.. گتلك بعدين كافي تلح

راحت منال اخذت سمر من ايد يوسف ودتها الغرفتها ورجعت بسرعه

ظل الجو مكهرب قريب الساعتين واحد يصد و واحد يرد بس اكثر شي چان يخوف هو جهاد .. حسيته على ساعه ينفجر ويرجع يكرر الكارثه السواها البارحه لان مديگدر يسيطر على اعصابه نهائياً

عاينت الساعه صارت عشره ونص والكل بعدهم لاهين بالمصيبه .. رحت للمطبخ اسويلهم الغده دا اشتغل سمعت الثلاجه انفتحت درت وجهي شفت جهاد ديشرب ماي

انتبه عليه من عاينتله .. ذب الگلاص واقترب مني
فتحت عيوني علي متفاجأه من تصرفه

صار يمي كلش حط ايده ع الطباخ ونصه النار بلأيد الثانيه .. تقرب من اذني وهمس بصوت خافت

جهاد.. هاي الله طلعها بشرفي مثل ما چنتي تدعين دائماً
اذا تذكرين مره گلتيلي متخاف على شرفك ؟؟ گتلچ اني ما شامر شرفي بالشارع حتى اخاف علي

للأسف لو شامره بالشارع يمكن يطلع طاهر ونقي عكس القذاره التلوث بيها هسه وهو تربات الحسب والنسب

حچه هيچ وخله وطلع .. ظليت صافنه ورى وعيوني تجري بلا وعي

اول مره يفتح ويايه الموضوع لدرجة مرات انسى جهاد هو نفسه الشخص الچان يتحارش بيه وانسى فد يوم تجرأ ولمسني غصبا عني

صح بوقتها اذاني وصح دعيت علي من كل گلبي بس والله ما اتمنى الشي الصار هسه ولا ارضى بي

هذوله اهل مهيب يعني اهلي العاشرتهم سنين وعشت وياهم اجواء العائله الما حسيت بيها بكل حياتي شلون بعد كل هالشي اتمنالهم الشر باعز شي عدهم

وعيت ع الدخان ترس المطبخ .. عاينت الگدر دخن شلته ع السريع شمرته بالحوض وشغلت الساحبه حتى يطلع الدخان

بالگوه گدرت اكمل الغده لان كلام جهاد حيل اثر بيه وقهرني بنفس الوقت

طلعت من المطبخ لگيت رنا شايله نونه اخذتها غيرتلها الملابس وريگتها ورجعتها السريرها تناغي ويا روحها بين ما اصلي

دا الف السجاده دگ جهازي .. بس شفت شهم ديتصل لزمت گلبي اخاف عرف بالسالفه وجاي يسألني ،، جاوبته على اخير لحظه

مياس.. الوو

شهم.. ها مياس وينچ إلا شويه اسد الخط

مياس.. چنت اصلي

شهم.. الله يتقبل

مياس.. منا ومنكم

شهم.. شلونها نهاوي

مياس.. زينه هاي دتناغي اسمعها
قربت الموبايل منها سمعته يضحك على صوتها

شهم.. هههه ها شنو شوكت كبرت الملعونه

مياس.. غير انت طولت كلش
شوكت ترجع شتاقينالك

شهم.. واني هم شتاقيتلكم
ما ظل شي ان شاء الله .. احچيلي شخبارهم

مياس.. الحمد لله زينين ويسلمون عليك

شهم.. شو لعد خابرت الحجيه ما جاوبتني

مياس.. مو تدري بيها دوم متيها موبايلها حتى متعرف منو خابرها منو سأل عليها

شهم.. ماشي صار لازم اروح سلمي ع الكل

مياس.. يوصل
دير بالك على نفسك

شهم.. وانتي هم
بوسيلي بنتي

مياس.. هههه يوصل

سديت الخط وشلت نونه شبعتها بوس لحد ما ضاجت وگامت تبچي

مياس.. لا ماما لتبچين بس هاي من ابوچ
اكيد هو مشتاقلچ هسه واذا يلزمچ راح يضوجچ من البوس مثلي واكثر بعد

مر اليوم بالمشاكل وظل يوسف يمنه ما راح واتصور بقائه علمود جهاد لان حس اذا عافه راح يسويله مصيبه الها اول مالها تالي

ثاني يوم الصبح فتحت عيني ساعه بالعشره .. بالگوه شلعت نفسي من الفراش لان يا دوب صارلي ساعتين نايمه مو اكثر

لبست حجابي وطلعت للصاله لگيت منال تفتر بقلق رايحه جايه .. والحجيه تدعي ما اعرف على منو
سلمت عليهم ورحت الرنا

مياس.. رنا شبيهم من الصبح ؟!!

رنا.. اسكتي جهاد تخبل فدوره
من الصبح لزم سمر دگ ضرب وتحقيقات علمود يعرف الولد منين .. وهسه طلع هو ويوسف وايهاب يدورون علي

مياس.. لا بربچ

رنا.. اي والله متشوفين منال شحالها
خايفه على ابنها ليتورط ويا هذا الساقط
الحچي بيناتنا اني هم خايفه لان ايهاب طول الليل يهدد ويتعود بس يلزمه مراح يرحمه ابد

مياس.. يا ربي كون تعدي السالفه على خير
الهي احفظهم وهديهم قبل لا تكبر المشكله وتتعقد بالزايد

رنا.. امين يا رب امين

رحت يم منال احاول اهدي بيها بالنص ساعه اخير شي عفتها ورحت الغرفة سمر

دگيت الباب ما جاوبتني .. فتحتها على كيف وتملخ گلبي عليها من شفت حالها

الوجه اصفر
العيون رايحه من البچي
جسمها مزورگ من الضرب
متمدده بنفس ملابسها من البارحه لليوم بحيث حتى الدم يبس بيهن

تقربت منها دارت وجهه عني .. گعدت على طرف السرير ولزمت ايدها

مياس.. حياتي گومي خلي اساعدچ تبدلين

سمر.. ما اريد

مياس.. مو زين تظلين بهاي الملابس الكلها دم جرحچ يلتهب

سمر.. عوفيني واطلعي الله يخليچ

مياس.. والله العظيم ما اطلع اذا ما گمتي غسلتي وغيرتي ملابسچ

سمر.. عاينتلي وعيونها انملت دموع : متشمته بيه مياس

مياس.. صفنت عليها : شدتحچين سمر ؟!!
اني بالغريب ما اتشمت ترديني اتشمت بالمني وبيه بس حقچ تحچين هيچ لان بعدچ متعرفيني
ع العموم گومي غيري ملابسچ وغسلي بعدين نحچي

مديتلها ايدي لزمت بيها وگامت بالگوه ... اعاين عليها عاقچه وجهه من الوجع ما گدرت تمشي خطوه وحده

سمر.. ما اگدر مياس عوفيني

مياس.. زين ظلي بمكانچ ميحتاج تغسلين بس خلي اجيبلچ تراك حتى تغيرين ملابسچ ع الاقل

هزتلي راسها وگعدت ع السرير .. فتحت كنتورها طلعلتها ملابس وساعدتها تبدل بس غمضت عيوني حتى لتخجل مني

سمر.. شكرا

مياس.. العفو حبيبتي
سموره اعتبريني مثل اختچ .. اذا حابه تحچين اسمعچ منا لباچر بلا ما امل والله
حاولي تسولفيلي حتى تفرغين گلبچ وترتاحين شويه

بس حچيت هيچ بچت بحرگه .. حضنتها ع السريع احاول اسكتها بس ماكو نص ساعه يلا گدرت تحچي وهي تشهگ

سمر.. والله مياس اني مو هيچ
صدگيني اني مو ساقطه مثل ما گال جهاد عني
كل الموضوع حبيته وامنت بي .. مچنت اعرف بي واحد نذل وعديم شرف إلا لمن وگعت بين ايده وما رحمني ساعتها عرفته شنو من شي بس بعد ما فات الأوان

مياس.. اهدي حياتي .. بس اهدي ولتبچين حتى افهم عليچ
سولفيلي كلشي من البدايه حتى اگدر اساعدچ

سمر.. تعرفت علي بالجامعه وساعة السوده التعرفت بيها على جهرته الزفره

مياس.. يعني وياچ هو بالجامعه

سمر.. لا يصير اخو صديقتي چان يجيها دائما ومن خلالها تعرف علي

مياس.. وبعدين

سمر.. عادي چان تعارفنه طبيعي يجي مرات يسلم ونوگف نحچي شويه بس مرور الايام حسيت تصرفاته تغيرت

فجأه اجه اعترفلي بحبه بالبدايه صديته بس بعدين تعلقت بي غصبا عني لان هو جبرني باهتمامه الزايد وحبه اليه

اخذ رقمي وظلينه نسولف .. تعرفنه على بعضنه وحچالي عن كل تفاصيل حياته من الصغيره للچبيره لحد قبل يومين الي هو يوم الحادثه

مياس.. شصار بيومها ؟؟

سمر.. رحت للدوام ما لگيت صديقتي .. خابرتها اكثر من مره ما ردت اخير شي خابرته اله گلي امي مريضه كلش لو تعيش لو تموت

تخبلت من سمعت كلامه لان كلش احب امه وحاچيه وياها اكثر من مره .. طلب مني اجي اشوفها لان حابه تشوفني قبل ليصيرلها شي وافقت بسرعه بلا ما اتردد لان چنت واثقه منه بشكل مو طبيعي

خلص الدوام اتصل عليه .. طلعتله ورحت ويا بس انصدمت من نزلني يم شقه صغيره

سألته باستغراب : بس هذا مو بيتكم ؟!!جاوبني امي جايه يم اختي الچبيره حتى تداريها لان هناك محد الها

صدگته وصعدت ويا اول ما طبيت قفل الباب .. رجعت ليوره اتلفت بالشقه ماكو احد استوعب الموقف بسرعه

ظليت اتوسل بي حتى يعوفني بس بلا فائده بده يتقرب مني واني احاول اشرد منه لحد ما چتفني ودخلني للغرفه

ردت اعيط سد حلگي .. رفع ملابسي ونام عليه فجأه سمعنه صوت اطلاق نار ثواني وانصدمت بيوسف طب للغرفه

من شافني بهل حاله التهه بيه ونسى فهو بهلاثناء گدر يشرد منه
جرني من ايدي وضربني راشدي حيل طلعني من الشقه يسب ويغلط الطريق كله اتوسل بي حتى ليگول الاهلي لان ادري بجهاد وخوالي مراح يرحموني اذا افتهموا بس ما سمع مني لحد ما صار الصار وشفتي الباقي بعينچ

مياس.. حضنتها ع السريع : سوده عليه حبيبتي الله يطلع حقچ من بين عيونه
صدگيني مراح تفوتله هل عمله وگولي مياس گالت

سمر.. ان شاء الله يا رب

مياس.. ارتاحي هسه لازم تنامين بعدين نكمل حچي

سمر.. والله خايفه من جهاد

مياس.. لتخافين حبي جهاد گلبه طيب
واذا اذاچ هذاك اليوم فلأن چان فاقد وما حاس على نفسه بس هسه مستحيل يرجع يأذيچ لأن يحبچ وما عنده غيرچ بهل دنيا

سمر.. شكرا مياس
شكرا على كلشي

مياس.. العفو حبيبتي شسويت قابل
يلا نامي شويه

جريت البرده وطلعت .. رحت للمطبخ اشتغل لحد ما سمعت صوت نونه تبچي ركضت لغرفتي

مياس.. لا يروح الماما
لتبچين حياتي .. تعالي گلبي تعالي

شلتها ابوس بيها لو بيدي اكلها وما اشبع من العسل البيها على گد ما احبها

غيرتلها واخذتها للصاله خليتها يم منال ورحت سويتلها الممه هستوني دا انطيهيا استلمتني الحجيه

الحجيه.. خاتون اليوم شوكت تكملين شغلچ

مياس.. هسه خاله بس اكمل من نونه .. اسوي كل الشغل ولا يهمچ

الحجيه.. شو مدا اشوفچ تگمطيعها هلايام

مياس.. عافت الگماط صارلها فتره

الحجيه.. يييع صدگ تحچين
ولچ مو زين شنو هي بكيفچ وتوخرين الگماط منها احنه قبل للسنه يلا نهد الگماط من الطفل منو سمحلچ تعملين عملتچ السوده هاي

مياس.. خاله شسوي يعني
هي متريده وبس اگمطها تظل تبچي ومتسكت إلا من احلها قابل اجبرها علي

الحجيه.. اي تجبريها واذا مو گدها انطي الطفله المنال واطلعي منها احسن

سكتت عنها حتى لا اسوي مشاكل لان مناقصين .. شويه وسالتني منال عن سمر طمنتها وگلتلها نايمه

للظهر اجوا الزلم من برى .. وجوههم متتفسر من العصبيه ومحد منهم رضا يحچيلنه اي شي ولا گدرنه نفهم شصار وياهم

مر اسبوع ع الحادث سمر بدت تتحسن بس من يومها ما طلعت من الغرفه ولا احد طب يمها الكل زعلانين منها بس اني الاتفقدها طول اليوم وجهاد يروح يجي يضربها ويطلع حرگته بيها بطلعان الروح يلا اگدر افكها منه

فد يوم نونه ما اعرف شلون الله هداها ونامت طول الليل

حسيت بالتسعه الصبح گمت سويت الريوگ ورحت الغرفة سمر من يومها صرت اتريگ وياها حتى اسويلها واهس لان متقبل تاكل إلا بهل طريقه

دخلت عليها لگيتها گاعده تبچي .. بس شافتني مسحت دموعها ع السريع

مياس.. صباح الخير حبي

سمر.. صباح النور حياتي

مياس.. شلون صرتي ؟؟ احسن ان شاء الله

سمر.. اي احسن

مياس.. يلا تعالي خل نتريگ

سمر.. كلش ما اشتهي

مياس.. عفيه گومي ع الواهس ترى اني هم ما اتريگ اذا عاندتي

گامت غسلت واجت گعدت ويايه .. احچي وياها واتشاقه بس هي مو يمي حقها اذا من يمي اختنگت من الوضع الهي بي

كملنه الاكل گمت شلت الصينيه دا اطلع من الغرفه انفتحت الباب حيل ودخل شهم ...

يتبع..

لتنسون الــ ⭐⭐⭐⭐