رواية مياس قلب الشهم الفصل الثاني والثلاثون 32 - بقلم لبنى الموسوي

#مياس_قلب_الشهم

للكاتبه #لبنى_الموسوي

- والله وصرت مثل المطر تفرح الناس بطيحتي 💔

_________________

فد يوم نونه ما اعرف شلون الله هداها ونامت طول الليل

حسيت بالتسعه الصبح گمت سويت الريوگ ورحت الغرفة سمر من يومها صرت اتريگ وياها حتى اسويلها واهس لان متقبل تاكل إلا بهل طريقه

دخلت عليها لگيتها گاعده تبچي .. بس شافتني مسحت دموعها ع السريع

مياس.. صباح الخير حبي

سمر.. صباح النور حياتي

مياس.. شلون صرتي ؟؟ احسن ان شاء الله

سمر.. اي احسن

مياس.. يلا تعالي خل نتريگ

سمر.. كلش ما اشتهي

مياس.. عفيه گومي ع الواهس ترى اني هم ما اتريگ اذا عاندتي

گامت غسلت واجت گعدت ويايه .. احچي وياها واتشاقه بس هي مو يمي حقها اذا من يمي اختنگت من الوضع الهي بي

كملنه الاكل گمت شلت الصينيه دا اطلع من الغرفه انفتحت الباب حيل ودخل شهم

اعاين علي عيونه صايره بگصته ووجها احمر مثل الدم من العصبيه

شهم.. نتر بيه : اطلعي بره مياس

مياس.. بس

شهم.. اطلعي برررررررررره

مياس.. ركضت لزمت ايده : ابوس ايدك لتأذيها ... بروح مهيب ونهى سامحها واسمع منها قبل لتسوي اي شي

شهم.. اطلعي مياس اطلعي

مياس.. شهم

جرني من ايدي حيل .. دفعني لخارج الغرفه رگع الباب بحركه قويه وقفلها بسرعه

ويا قفلتها نزلت دموعي بخوف .. درت وجهي شفت منال واگفه گدام الغرفه حاطه ايدها على راسها وتشهگ من البچي

مياس.. ركضت حضنتها : يا عمري لتبچين
والله ميسويلها شي لأن تدرين بي شگد طيب وعاقل بنفس الوقت
اكيد راح يحل الموضوع بطريقته وهسه تشوفين

حچيت هيچ حتى اطمنها بس بالحقيقه كل الكلام الگلته الها مجرد كلام لأن شكل شهم لمن دخل على سمر ابد ميبشر بخير

واگفه يم منال لازمه ايدها ونعاين لباب غرفة سمر منسمع إلا شهم يصيح بصوت عالي و ويا صيحته ارتفع صوتها بالبچي

ركضت منال تدگ ع الباب وتتوسل بي وهو ولا كأنه يسمعها .. انخبص البيت بالصياح
الحجيه من جهه ورنا من جهه ثانيه من غير امها الحسيت بيها راح تفقد الوعي من گد البچي

رحت ع السريع اخذت موبايل منال واتصلت على ايهاب

ايهاب.. ها خيتي

مياس.. ابو مجتبي اني مياس
عفيه تعال الحگ على شهم ليسوي السمر شي

ايهاب.. لتخافين كلشي ميسويلها

مياس.. ايهاب شنو كلشي ميسويلها !!
من اجه لحد الان قافل الباب ومنسمع بس صياحه وبچيها

ايهاب.. مياس گتلچ ميسويلها شي
عموما هسه جايين احنه مسافة الطريق

مياس.. لتتأخر عفيه

ايهاب.. ان شاء الله

سديت الخط ورجعت يمهم لگيتهم على نفس الوضع والهوسه .. شويه واجوا ايهاب ويوسف وجهاد بس شافتهم منال ركضت عليهم

منال.. خويه ايهاب الحگ البنتي
يوسف الله يخليك اتصرف راح تموت بين ايدي

يوسف.. لتخافين منال وروح اختي  ميأذيها بس جاي يأدبها شويه على عملتها ويفتهم منها السالفه

بهلاثناء انفتحت الباب وطلع شهم صاير مثل النار من يمي متت خوف من شكله .. نتر على يوسف بصوت عالي

شهم.. يوسسسف امشي ويايه

جهاد.. اني هم اريد اروح وياكم

شهم.. لا بس يوسف

جهاد.. ليش خالي !!

شهم.. جهاد مو وكتك
يلا يوسف استعجل

يوسف.. ما عندي شي خويه امشينه

اول ما طلعوا ركضنا لغرفة سمر .. بس شفتها نمرد گلبي على حالها لأن مبين علي ضاربها ومبهذل احوالها

خلينه امها يمها حتى تحچي وياها وطلعنه كلنه .. تذكرت نونه رحت الغرفتي اركض لگيتها فاحطه من البچي واني ما ادري

بعد ما التحقت حسيت نفسي ارتاحيت شويه لأن گدرت انشغل عن كل همومي هناك لذالك طولت اكثر من ٣ اشهر وچنت ناوي اظل اكثر لو ما اتصال يوسف الغير كل مخططاتي

بالعاده جهازي يكون مغلق .. فد يوم فتحته دا اتصل بمياس اسأل عليهم وعلى نهى عاينت الجو محترگ بالمكالمات من يوسف

ظل بالي لان مو عادته يتصل ويلح بلاتصال .. خابرته ع السريع ثواني ورد عليه

شهم.. ها يوسف

يوسف.. شلونك شهم

شهم.. الحمد لله .. خير صاير شي !!

يوسف.. اي صاير وضروري تجي لبغداد اليوم قبل باچر

شهم.. الله عليك شصار ؟؟ احچي مو وگعته الگلبي

يوسف.. سالفه طويله شهم ما اگدر اشرحها الك بالموبايل لازم اشوفك بأسرع وقت

شهم.. تخص منو ؟؟

يوسف.. جهاد

شهم.. خو ما بي شي جهاد

يوسف.. لا لتخاف

شهم.. بروح نهى

يوسف.. يابه وروح نهى ما بي شي

شهم.. باچر من الفجر تلگاني يمك

يوسف.. زين لعد تعال لبيتنه بوجهك

شهم.. هو راح اخابرك حتى تجي توصلني

يوسف.. ان شاء الله

سديت الخط وگلبي يفور من القلق .. الف فكره وفكره اجت ببالي منا لما گدرت انام

گعدت ب ٣ الفجر نهيت التحاقي ونزلت البغداد
اول ما وصلت خابرت يوسف اجاني بسيارته

يوسف.. الحمد لله على السلامه يا بطل

شهم.. الله يسلمك
شصاير يوسف الله عليك احچي

يوسف.. ادري اسولفلك بالطريق غير نوصل للبيت
دصبر شبيك چنك عباس المستعجل

وصلنه لبيت خالتي طبيت بوجهي للاستقبال .. وگفت انتظر يوسف ع اعصابي قريب الخمس دقايق يلا اجه

شهم.. هاي وين صرت !!
ديلا احچي بسرعه شعندك

يوسف.. راح احچي يخوي
بس قبل كلشي اوعدني تلزم اعصابك
كافي عليه جهاد مثل الثور الهايج صارلي فتره احاول اسيطر علي وماكو نتيجه

شهم.. يمعود اوعدك بس فضني واليرحم والديك

يوسف.. تذكر يوم الچنت يمكم وسمر تأخرت بالجامعه ل٣ الظهر

شهم.. اييي

يوسف.. وانت طلبت مني اراقبها الك

شهم.. اي وگتلي راقبتها وما شفت عليها اي شي

يوسف.. اي صح بس

شهم.. بس شنو ؟؟؟

يوسف.. بداية هاي السنه وتحديداً قبل اسبوعين لگفتها تحچي ويا ولد ما حبيت استعجل گلت يجوز زميلها بالكليه لذالك رحت سألت عنه

شهم.. وشطلع

يوسف.. مو من الجامعه اصلا

شهم.. لعد شلون تعرفه ؟!!

يوسف.. طلع اخو صديقتها

شهم.. وبعدين

يوسف.. بعد ما اكتشفت هالموضوع كثفت المراقبه عليها گمت اطلع من دوامي اروحلها بوجهي لان اغلب لقاءاتهم تكون بعد الدوام لحد قبل اسبوع تقريباً

شهم.. شصار قبل اسبوع !!!

يوسف.. طلعت من الدوام رحت الكليتها .. اول ما وصلت شفتها واگفه وحدها عبالي دتنتظر الخط بس انصدمت من وگفت سيارة الولد يمها وصعدت ويا

شهم.. لا الله عليك يوسف

يوسف.. اهدأ خويه بس خل اكملك

شهم.. كمل كمل

يوسف.. اول ما تحركوا مشيت وراهم بس بقيت مسافه عنهم حتى ليكشفوني .. بيني وبين نفسي اتصورت طالعين للمطعم او هيچ شي بس

شهم.. شنو بس يوسف ؟!! لتگلي اخذها للبيت

يوسف.. دنگ راسه : اي

تخبلت من سمعت هالكلام منه .. فارت اعصابي هستوني دا اطلع ركض عليه لزمني حيل

يوسف.. انتظر شهم .. الله عليك انتظر لازم تسمعني للأخير

شهم.. شسمع ولك شسمع
جاي تگلي اخذها ويا للبيت شظل بعد ينحچي اكثر من كل هذا

يوسف.. غير تفتهم شصار هناك

شهم.. داحچي بسرعه

يوسف.. وصلوا يم شقه ونزلوا سويه .. نزلت وراهم ع السريع راقبتهم من بعيد صعدوا للطابق الثاني

سألت الجيران على اصحاب الشقه لأن ردت اعرف اهله موجودين لو هاي خاصه بي

شهم.. وشطلعت ؟؟

يوسف.. خاصه بي
واول ما عرفت هالشي استوعبت هدف هذا القذر من سمر .. صعدت للشقه طلعت سلاحي خليت طلقه بالكيلون ودفرت الباب

دخلت للغرفه ومثل ما توقعت چان ديحاول يعتدي عليها وهي تصيح حتى تخلص منه وطبعا اني من الصدمه ما گدرت اركز على اي شي گدامي لحد ما شرد مني للأسف

شهم.. گعدت ع القنفه ولزمت راسي : اخ يا ربي شوكت ارتاح من كل هالمصايب
ليش كلما التحق ارجع الگه الدنيا مگلوبه ؟ منين اتلگاها اني ما ادري
والله ما ادري .. ما ادرييييي

يوسف.. اعصابك شهم ليرتفع ضغطك

شهم.. رفعت راسي : كمل يوسف وشصار بعدين ؟!!

يوسف.. اخذتها للبيت بس ما گدرت اضبط اعصابي عليها بحيث حتى ضرب ضربتها .. اول ما وصلنه اجوا ايهاب وجهاد وعرفوا بالسالفه من منال

بيني وبينك حاولت اطمطمها بين ما تجي انت لان ادري بجهاد ميتفاهم بس للأسف ما لحگت

اني اعرف بجهاد طالع عليك اعصابه نار لذالك توقعت ردة فعله بس المچنت متوقعه راح يكتلها خلاص بعد ما سمع بالصار

شهم.. گمت مفزوع : شنو يكتلها ماتت !!!!!!

يوسف.. لا لتخاف لحگنه عليها الحمد لله

شهم.. اخذت نفس : الف الحمد لله

يوسف.. بعد يومين جهاد حچه ويا سمر حتى يعرف الموضوع وما فهم منها غير شي بسيط انو هو اخو صديقتها وعائلتهم متكونه من اب وام وهو واخته غير هذا متعرف بعد

شهم.. اي وشصار بعدها

يوسف.. اخذنا اني وايهاب ورحنه نسأل عن الولد بس للأسف طلع كلشي حاچيلهيا چذب بچذب

شهم.. شلون يعني چذب ؟!!

يوسف.. شوف اول شي سألنه عن عنوان البنيه صديقة سمر من خلال زملائها بالجامعه

من عرفنه عنوان بيتهم رحنه نسأل بالمنطقه طلعوا عائله چبيره وبس بنات ما عدهم اخو اصلا

شهم.. شلون يعني بس بنات !!! لعد وهذا المصخم منين جاي

يوسف.. مو اخوهم شهم مو اخوهم

شهم.. شلون يعني لتخلبني

يوسف.. مچذب عليها هو وصديقتها شبيك يخوي 

شهم.. اي وشسويتوا تالي

يوسف.. جهاد تخبل من عرف .. دگ رجل إلا يروح لبيتهم ويعرف شنو السالفه من البنيه بس طبعا اني منعته لأن اذا يسوي هيچ راح تنفضخ گدام اهلها وتصير سالفه الها اول مالها تالي والاهم من كل هذا سمعة سمر تروح بالرجلين اذا طلعت السالفه من بيناتنا

شهم.. اي صح زين سويت
زين وبعد شلون تصرفت وراها ؟؟

يوسف.. رحتلها للجامعه
واجهتها بالبدايه نكرت بعدين من عرفت رايحين وسألين عنهم خافت وبدت تعترف

گالت هذا الولد اسمه نذير ويصير حبيبها الهاي البنيه بس اتفق وياها على سمر لان عنده وياك مشاكل ويريد ينتقم منك من خلالها
ها ومچذب على سمر بكلشي حتى اسمه گايللها طارق مو نذير

شهم.. انيييي !!!!

يوسف.. اي انت يجوز من خلال شغلك

شهم.. يجوز
المهم وبعد

يوسف.. حاولت اخذ منها معلومات عنه بلكت نگدر نوصل الشي بس للأسف كلشي ما عرفنه غير الشي الگلته الك

طول هاي الفتره گوه لازم جهاد عن هاي البنيه .. متخبل يريد يروح لاهلها ويحچي كلشي حتى تنفضح ومن خلالها يگدر يوصل لهذا الولد

لحد البارحه بلليل راح الابوها إلا شويه لو ما لحگته على اخير ثانيه .. لذالك خابرتك حتى تجي تلگه حل للموضوع لان ماكو احد غيرك يحله ويخلصنه من هل مشكله

شهم.. ماشي اني رايح السمر افتهم منها كلشي بعدين اتصرف بس اهم شي تخابرلي جهاد وايهاب يگعدون ويسكتون منا لما ارجعلكم ليسوولي طلابه ويخربون كل الشغل عليه

يوسف.. الله عليك مو تأذيها

شهم.. لازم تتربى بس لتخاف ميوصل بيه الخبال مثل جهاد
خابرهم اخاف النسوان يتصلون بيهم علمود يجون يخلصوها مني لحد يتدخل وهذا الحچي الك هم

يوسف.. صار بس ارجع واگلك بروح مهيب ونهى عليك لتأذيها

شهم.. ان شاء الله

طلعت من يمه بوجهي للبيت اول ما وصلت گامتلي امي حضنتها وسلمت على منال حسيت بيهن خايفات عبالهن ما اعرف السالفه

شهم.. وين بنتچ ؟؟

منال.. ليش تسأل عليها خويه

شهم.. جاوبي على گد السؤال

منال.. عرفت مو

شهم.. عرفت منال عرفت
وگرت عينچ وعيني على عملة بنتچ الصخمت وجوهنا

منال.. جرت ايدي باستها : ابوس ايدك خويه سامحها .. بروح مهيب عليك تغاضى عن الموضوع لان جهاد ويوسف ما قصروا وياها
واوعدك نيابه عنها بعد متشوف العيبه منها طول ما انت عايش

شهم.. لتخافين منال مراح اسويلها شي بس لازم تتحاسب على عملتها السوده
لذالك راح احاسبها بطريقتي الخاصه من غير ما أأذيها طمني گلبچ خيتي

منال.. الله يريح بالك خويه
تلگاها بغرفتها هي ومياس ديتريگن

الحجيه.. يمه فدوه البت هستوها مضروبه ببطنها لتقسي وياها وليرحم ابيك

شهم.. ان شاء الله يوم

عفتهم ورحت لغرفة سمر اول ما طبيت ركضت مياس تتوسل خايفه عليها مني .. ردتها تطلع ماكو عاندت اخير شي دفعتها بره وسديت الباب

درت وجهي على سمر گامت ترجع ليوره وعيونها تجري دموع .. تقربت منها سحبتها من ايدها حيل

سمر.. شهگت بحرگه : والله ما اعيدها بعد
وروح خالو مهيب متنعاد بس سامحني ابوس ايدك سامحني

ضربتها راشدي بكل قوتي وگعت بالگاع .. سحبتها من شعرها وگفتها ورجعت ضربتها بنفس القوه

سمر.. والله ما اعيدها .. ما اعيدها وروح ابويه  بس ارحمني تعبت من الضرب

شهم.. دفعتها ع الحايط وخنگتها بيدي : احچي چلبه شلون سلمتي روحچ بهل سهوله

دفعت ايدي تحاول تفك نفسها .. ما وخرت لحد ما شفتها دتموت بين اديه لأن اختنگت

بس هديتها وگعت بالگاع تگح وتتنفس سريع .. رجعت جريتها من شعرها ورفعت راسها الي

شهم.. خلي عينچ بعيوني واحچيلي كلشي

سمر.. صاحت وهي تبچي : شعري خالو  بس هدني الله عليك هدني

شهم.. احچييييييييييييييييي

سمر.. والله احچي
والقرأن احچي
بس هد شعري بعد ما احس براسي من الوجع

شهم.. شمرتها حيل : يلا الغيييييييييي

سمر.. شتريد تعرف

شهم.. شسمه

سمر.. طارق

شهم.. لا مو طارق

سمر.. وروح ابويه طارق إلا اذا مچذب عليه هو

شهم.. زين شلون تعرفتي علي

سمر.. عن طريق صديقتي لان يصير اخوها

شهم.. شگد استمرت علاقتكم

سمر.. من العام

شهم.. چنتي تحچين ويا بالتلفون

سمر.. اي

شهم.. انطيني رقمه بسرعه

سمر.. موبابلي مو يمي اخذه جهاد

شهم.. يعني تريدين تقنعيني ما حافظته

سمر.. لا حافظته

شهم.. ردي ولچ ردي

ردتلي الرقم كتبته بجهازي ورجعت اسألها بلكت اگدر اوصل الشي عنه

شهم.. شوداچ ويا بهذاك اليوم ؟؟
لهل درجه ما عرفت اربيچ حتى تنزلين راسي بالگاع لمن تسلميله روحچ بلا متحسبين حساب الأي شي

سمر.. لا والله خالو ما سلمته روحي ولا مفكره بيوم اسويها .. انت تعرفني ومربيني على اديك شلون تتوقع اگد اسويها

اعترف تصرفت بغباء او ثول او طيش شتريد تسمي سمي بس والله العظيم ما ادري بي نذل وراح يدگ الناقصه بيه

شهم.. ليش رحتي ويا سمر ؟؟

سمر.. بيومها صديقتي ما اجت للدوام .. خابرتها ومن ما جاوبت ظل بالي فخابرته اله

گلي امي مريضه كلش وتريد تموت .. طلب مني اروح ويا حتى تشوفني قبل لتودع لان هاي امنيتها الاخيره

طبعا اني حاچيه ويا امه اكثر من مره واحبها كلش لذالك وافقت اروح

اجه عليه ورحنه سوه بس انصدمت من نزلني يم الشقه ... مع ذالك ظليت واثقه بي مثل الثوله ولمن طبيت تفاجأت بي يريد يعتدي عليه لو ما يوسف لحگني باخر لحظه

شهم.. زين خلينه نرجع ليوره شويه .. شچنتوا تحچون طول هالفتره ؟؟

سمر.. حچي عادي

شهم.. شلون يعني عادي ؟!!!

سمر.. اغلب الاحيان چان يحچيلي عن اهله واني هم احچيله عنكم

شهم.. شحچيتي عنه بالضبط

سمر.. كلشي بس اكثر شي چان يسألني عن مياس لان انقهر عليها من عرف بخالو استشهد وتركها

شهم.. شيسأل يعني فضينيييييييييييي

سمر.. اسئلة خالو اسئلة

شهم.. جريتها من شعرها : احچي لچ لتخليني ادفنچ بمكانچ

سمر.. شهگت حيل : والله خالو ما اعرف شجاوبك
شتريد تعرف بالضبط مدا افهم عليك ؟!!

شهم.. اريد اعرف هذا الساقط مالتچ شنو هدفه لمن چذب عليچ اكيد مو حب مثل ما وهمچ

سمر.. اي اسأل واجاوبك بكلشي تريده

شهم.. احچيلي عن شغلات غريبه چان يسويها

سمر.. صفنت شويه : اي بالفاتحه مالت نهى الله يرحمها خابرني ياخذ بخاطري بس استغربت من ظل يسأل اسأله غريبه

شهم.. اي شنو هل اسئلة ؟!!

سمر.. منو راح وياكم
منو ظل بالبيت
شوكت ترجعون
خالچ وين
اخوچ وين
منو يم مرت خالچ
هيچ شي بحيث من يمي استغربت اسئلتة هاي

شهم.. خليت ايدي على راسي
عماد والله عماد

سمر.. شنو خالو

شهم.. اريدله صوره ما عندچ

سمر.. لا والله خالو مچان يرضى نتصور يگلي اخاف اهلچ يشوفوها وتصيرلچ مشكله بسببي

شهم.. اوصفي الي

سمر.. حنطاوي
طويل وملامحه كلها كبار
عنده جدحات بشعره ودائما يزين حفر
واكو فوگ حاجبه شامه وسط مو كلش چبيره

شهم.. گمت من يمها ضربت على وجهي : عماااااااااااااااااد ... ولك توگع بيدي وساعتها وروح اخويه اذا ما اشرب من دمك ما اطلع شهم

سمر.. منو عماد خالو

درت وجهي خزرتها دنگت راسها رحت جريت شعرها وخليت وجها بوجهي

شهم.. حسابي وياچ ما انتهى سمر
راح اندمچ شر الندم على عملتچ هاي بس مو هسه

اصبريلي خلي افرغلچ وساعتها ادعي لربچ لان بس هو يگدر يخلصچ من بين اديه

شمرتها ع الگاع وطلعت بسرعه لگيت الكل ملتمين بالصاله اخذت يوسف ورحت لماهر

الطريق كله يوسف يسألني شصار و وين رايحين بس ما اگدر اجاوبه من وجع راسي اخير شي سكت لان عرف بيه تعبت

وصلنه لماهر خابرته اخذ زمنيه وطلع ويانه

ماهر.. ها شهم خير ظل بالي

شهم.. عماد اريده حالاً .. اخلقه الي من جوه الگاع الله يخليك

ماهر.. اذا ببغداد هسه اجيبلكيا بس اذا بغير محافظه

شهم.. قاطعته بسرعه : عسى ما بالمريخ اريده ماهر اريدددده

ماهر.. هههه شبيك شهم !!!

شهم.. كلشي بيه ومراح ارتاح اذا ما الزمه بيدي لهل ××××

يوسف.. ماهر تصرف ترى السالفه چبيره كلش

ماهر.. صار خلوني اشوف شغلي ساعه وارجعلكم خبر مو اكثر

شهم.. انتظرك لتتأخر خويي

صار.. ان شاء الله

نزل من السياره شغلتها ورجعت للبيت اول ما طبيت رحت للاستقبال بوجهي تمددت

يوسف.. مراح تحچيلي شي

شهم.. تعرف هذا الساقط طلع منو

يوسف.. يا ريت اعرفه

شهم.. هو نفسه عماد

يوسف.. منو هذا عماد ؟!!

شهم.. ال×××× ابن اخت سميحه

يوسف.. ضرب على راسه : لا بشرفك شهم گول غيرها

شهم.. شفت بالله
بكل صلافه يتجرأ ويحاول يعتدي على عرضي .. بس الزمه وين يريد يشرد اني اله هل حيوان

يوسف.. لك هذا شنو من بشر ؟!!
ادري شيريد من سمر .. اصلا شيريد من مياس ميگول مره متزوجه شنو هالعرض السگط التدني نفسه على اعراض العالم

شهم.. مريض خويه مريض

يوسف.. وهسه شنو ؟!!
لازم نلزمه شهم عفيه

شهم.. انتظر ماهر حصله كان بها ما حصله انبش شيب الخلفوا لحد ما اطلعه من جوه الگاع

يوسف.. گوم خلي اشوفلك ضغطك خاف صعد

شهم.. اي صعد لان راسي ديموتني

اخذلي ضغطي طلع فعلا صاعد .. وصيته ميحچي شي وطلعت اشوف بنتي وهو ظل يم امي بالصاله

دگيت الباب ودخلت لگيتها گاعده بس مياس دتحاول تنوم بيها .. انصدمت كلش لمن شفتها لان كبرانه ومحلوه بت الاودام

مياس.. بس شفته گدامي كيفت : ها شهم شلونك

شهم.. الحمد لله
همزين گاعده حتى اشوفها

تقرب اخذها مني يبوس بيها .. عاينت علي وجها احمر بشكل مو طبيعي

مياس.. شهم

ما جاوبني مستمر يبوس بنونه ويحچي وياها

شهم.. ابويه الحلوه
حياتي
عمري
فدوه لهل ريحه الترد الروح
شتاقيتلچ وشتاقيت العيونچ التاخذ عقلي مني بنظره وحده
شلون صايره ولچ تنگرطين والله تنگرطين

مياس.. شهم مو دا احچي وياك

شهم.. العفو ما سمعت

مياس.. ضغطك صاعد

شهم.. اي

مياس.. صدگ تحچي ؟!! شو تگول اي بكل برود

شهم.. شتريديني اسوي مثلاً

مياس.. ظل يم نونه هسه شويه وارجعلك

عفته وطلعت اركض جبتله حباية ضغط من الحجيه وخليتله الحامض ع النار

ظليت واگفه يمه انتظره يصير .. حسيت على جهاد ورايه

جهاد.. شنو هم صعد ضغطه

مياس.. اي

جهاد.. شلون تالي ويا طلايب هذا البيت المتخلص
ربي متاخذني وتريحني المن خليتني عايش لو ماخذني ويا مهيب احسن من شلعان الگلب هذا

مياس.. اسم الله عليك ليش تحچي هالشكل

جهاد.. وديله حبايه عود

مياس.. اي هاي جبتله

جهاد.. رايح يم يوسف اي شي يصير تعالي گليلي

مياس.. ان شاء الله

شغلت القوري سويتله چاي ولفيت ويا لفه .. خليتهن بالصينه ورجعت للغرفه لگيته گاعد ع الچربايه يلعب ويا نونه ويضحك وياها

شهم.. رفعت راسي شفت الصينيه : هاي شنو ؟!!

مياس.. تتريگ وبعدين تاخذ علاجك واخير شي تشرب الحامض

شهم.. لا ما اگدر كافي الحبايه والحامض

مياس.. لا شهم مو زين لازم تتريگ بلاول

شهم . ما اگدر والله

مياس.. بداعة نونه

شهم.. هههه حلفتيني بالغاليه بعد ما اگدر اردچ

مياس.. هههه الف عافيه

اخذتها منه گعد يتريگ واني اعاين علي .. بس كمل اخذ العلاج وشرب الحامض

مياس.. صحه ان شاء الله

شهم.. على گلبچ

رجع اخذ نونه من ايدي خمس دقايق ورجعها الي .. دار وجها ديطلع صحته

مياس.. شهم

شهم.. نعم

مياس.. شصار وياك مراح تگولي

شهم.. تعرفين منو هذا الولد التحبه سمر

مياس.. اي گالتلي اسمه طارق يمكن .. بس شعرفني بي

شهم.. طارق هو نفسه عماد

مياس.. فتحت عيوني : يا عماد

شهم.. يا عماد يعني

مياس.. الله عليك شهم تحچي صدگ !!!

شهم.. ليش الموضوع يتحمل غير الصدگ

مياس.. تهسرت كلش : هذا شيريد منه
من الله لا يوفقه ولا ينطي العافيه بجاه الحبيب محمد

شفت شهم مو گتلك هذا واحد نذل وكلشي يطلع منه .. عاين بعيونك شلون گدر يأذيك باعز شي عندك وانت بعدك تستهين بي

شهم.. وداعتچ اندمه وهسه تشوفين

مياس.. نزلت دموعي گبل : يأذيك شهم والله يأذيك

شهم.. لتخافين مياس ما ظل شي ويوگع واذا وگع هل مره بعد ميگدر يگوم لاخير عمره

مياس.. دير بالك على نفسك الله يخليك

شهم.. ان شاء الله
وها صدگ هذا الكلام ما اريد احد يعرفه من البيت منا لما اتصرف بالموضوع

مياس.. شتريد تسوي

شهم.. كلفت جماعه يدورون علي بس الگفه ساعتها يوصلچ الخبر شراح اسوي بي

مياس.. عليك الله خليك حذر منه .. هذا فد واحد حقير متعرفه شلون يغدرك بلا متحس علي

شهم.. بويه لتخافين وتالي وياچ اليوم

مياس.. مو بيدي والله مو بيدي
ما عاولي رجعتلنه بالسلامه هالدور طلعلي عماد صفح

شهم.. ليظل ببالچ كلها يوم يومين وكلشي ينتهي

مياس.. الله يسمع منك

شهم.. يلا تردين شي قبل لا اروح

مياس.. لا سلامتك

طلعت للصاله لگيتهم ملتمين ويا يوسف .. گعدت وياهم بس بالي مو يمهم فكري كله يم عماد

جهاد.. خالو شصار وياك

شهم.. بعدين افهمك

جهاد.. ليش بعدين

شهم.. وتالي وياك جهاد .. تعبان وراسي ديموتني لتلح زايد

الحجيه.. يمه على كيفك ويا روحك ليصيرلك شي

شهم.. لتخافين حجيه

دگ جهازي بهلاثناء .. طلعت من جيبي ع السريع وما صدگت ماهر ديتصل

شهم.. الووو

ماهر.. ها حبيبي

شهم.. بشرني

ماهر.. ابشر خويه هذا وينه بين ايدي ....

يتبع..