#مياس_قلب_الشهم
للكاتبه #لبنى_الموسوي
لگيت إسمي وطن مهجور
بي اخر رسالة من التعب للرب
بعد مابيه حيل انحب 💔
_______________________
فد يوم چنت گاعده العصريه بغرفتي اقره وحدي لان نهى يم اهلها .. تفاجأت من طبت عليه بلا متدگ الباب ولونها مخطوف
نهى.. عاينتلي بوجه اصفر والصدمه واضحه على ملامحها : ولچ مياس
مياس.. شبيچ يمعوده ؟!! شنو هذا حالچ خوفتيني
نهى.. اني حامل
مياس.. طفرت من مكاني مفزوعه : صدگ تحچين !!!
نهى.. اي
مياس.. ولچ شلون انتي مو گلتي شهم مديتقربلي !!!
نهى.. هي بس مره وصار الحمل بيها
مياس.. وشلون قبل يخليچ تحبلين
نهى.. ميدري گتله اخذ مانع
مياس.. يعني انتي متعمده ؟؟
نهى.. اي اصلا چنت اتمنى هالشي ورب العالمين ما قصر ويايه حتى لا اتعب زايد بالمحاولات
مياس.. ليش نهى ليش
نهى.. مياس شنو فائدتي لشهم بس حاچيني ؟؟
مره اله ... لا
ام لجهاله ... هم لا
اني ممستعده اعيش العمر كله انتظر اللحظه اليكرهني بيها شهم لمن يحس بروحه ضيع حياته على لا شيء بس لان حبني وتورط بيه
مياس.. اسمحيلي اگلچ تفكيرچ اكبر غلط
الحياة الزوجيه تنبني ع الحب مو ع الشهوه والاطفال
زين انتي ما فكرتي بالمسكين اذا عرف شراح يصير بي ؟؟
نهى انتي تدرين كلش زين شهم يحبچ
وهم تدرين بنفس الوقت الحمل مو زين عليچ
شلون تسوين هالشكل ما خفتي على نفسچ ؟؟
عوفينه منچ .. ما خفتي علي هو شراح يصير بي اذا عرف بهل خبر
نهى.. اي راح يضوج كلش ويمكن يعصب هماتين
بس اكيد بعدين من يهدأ حـ يفرح بالطفل اليحلم بي كل عمره
مياس.. والله احتاريت شاحچي وياچ
الضاهر انتي مغمضه عيونچ وعايشه بلاحلام
فتحي نهى ... فتحي حتى تشوفين الواقع قبل لا تروحين بيها بلا متحسين على نفسچ
نهى.. هاي شبيچ يمعوده
دگولي مبروك وسدي الموضوع .. الله موجود ميعوفني
رحت عليها حضنتها حيل بس داخلي ميته خوف من الورطه الحطت نفسها بيها
مياس.. الف مبروك حياتي
الله يگومچ بالسلامه انتي والبيبي
نهى.. حياتي الله يسلمچ ويسعد گلبچ
مياس.. گلتيلهم ؟؟
نهى.. لا بعدني اجيت بوجهي الچ
مياس.. يلا لعد روحي بشريهم شمنتظره
نهى.. اي رايحه
طلعت من الغرفه واني ظليت بمكاني ما گدرت اتحرك لان خايفه عليها كلش
ما اعرف شچانت تفكر من سوت هالشي بروحها وهي تدري كلش زين الحمل خطر حيل بوضعها هذا
شويه ورحت للصاله اشوف شديصير .. وفعلا مثل ما توقعت الكل ضاجوا مثلي وديلومون بيها على حملها
الحجيه.. هسه اخابر امچ حتى تجي تشوفلها صرفه وياچ
منال.. نهى حچي امي صح اسمعي كلامها
نهى.. دروحوا بابا من كل عقلكم تردون انزل الطفل الاحلم بي صارلي سنين
الحجيه.. مو احسن ما تموتين وتكسرين گلب وليدي
نهى.. ما اموت لتخافين
اني لا اول ولا اخر وحده تحبل وهي بهل وضع قابل كلهن يموتن
الحجيه.. ولچ يمصخمه مو تدرين بوضعچ شگد صعب
بعدين تعالي گوليلي رجلچ شلون حبلچ وهو يدري بحالتچ تعبانه كلش
نهى.. اني حبلت هو ماله علاقه
الحجيه.. ها يعني جبتي من بيت الخلفچ
نهى.. هههههه لا مو هيچ
الحجيه.. گاعده تضحك الفطيره ... شلون تخليني اگوم اكسر العصا على راسها اليابس
نهى.. شبيچ يمه شو چنچ ما فرحتي بحفيدچ
الحجيه.. خايفه عليچ يالثوله .. بس انتي شيفهمچ اليگول مطي ومتمدد براسچ
نهى.. راحت حضنتها : لتخافين والله ميصيرلي شي
راح اظل اتابع حالتي ويا الدكتوره لحد ما الله يسهلي واگوم بالسلامه
الحجيه.. والله اني مالي غرض .. بس يخابر رجلچ اگله وهو يتصرف وياچ
نهى.. لا يمه فدوه .. تدرين بي شگد تعبان هناك وما شايف دربه تجين انتي تزوديها علي
الحجيه.. هسه صرت اني الاذودها !!!
منال.. يوم عوفيها ختولي .. يجي شهم ويتصرف وياها محد يگدر عليها غيره
نهى.. يا منال ليش تحچي ويايه بهل شكل
منال.. شلون ترديني احچي لعد وانتي مسويتلچ مصيبه اكبر من راسچ
نهى.. كافي الله يخليكم مو حتى طلعتوا فرحتي بالطفل من خشمي
عافتنه وصعدت فوگ .. ظلوا يتناقشون بيناتهم وعرفت من كلامهم شگد خايفين عليها لأن يحبوها
اخير شي عفتهم يحچون ورجعت الغرفتي اكمل دروسي
مر اكثر من شهرين ع الموضوع والكل بده يتقبل حملها بس شهم بعده ميعرف بالخبر حسب ما گالتلي هي
ظلت نهى تدرسني ليل نهار لان امتحاناتي بقالها اقل الشهر ومرات جهاد ومنال يساعدوها بالشرح لان يشوفوها شگد تتعب ويايه
مره من المرات گاعدين ندرس كالعاده حسيت عليها تريد تحچي شي بس متردده
مياس.. شبيچ حبي گولي
نهى.. لازم اراجع الدكتوره علمود اشوف وضعي بس خايفه كلش
مياس.. لا حياتي خايفه شنو ؟؟ ضروري ترحين كل شهر تچيكين وضعچ انتي والطفل ميصير تظلين گاعده وساكته
نهى.. اذا اروح اليوم تجين ويايه ؟؟
مياس.. طبعا اجي هو هذا هم سؤال
نهى.. ماشي لعد .. راح احاچي جهاد ينتظرنه العصر حتى يوصلنه بطريقه
مياس.. اي انطي خبر من هسه خاف يطلع
نهى.. رايحه
انقهرت عليها كلش .. صح حقها تفرح بالحمل بس والله خايفين عليها مو بيدنه
للعصر ودانه جهاد للدكتوره وانتظرنه حتى يرجعنه .. طبت نهى وحدها واني ظليت بالصاله ما گدرت افوت وياها
شويه وطلعت حسيت بيها مو طبيعه بس نكرت هالشي
مياس.. شبيچ حبي شگالتلچ الدكتوره
نهى.. كلشي تمام
مياس.. ما اتصور لان وجهچ ميگول هيچ
نهى.. والله ماكو شي ليش متصدگين
مياس.. الله عليچ احچي الصراحه
نهى.. امشي ناخذ سونار بس هالمره راح تطبين ويايه حتى تشوفين ابن اختچ بعيونچ
مياس.. يمه فدوه الگلبه شگد متلهفه اشيله بايدي
نهى.. ان شاء الله تشيلي وتشبعين منه
بس يلا امشي تأخرنه
رحت وياها للسونار نص ساعه يلا گدرنه نطب .. وگفت يمها وعيني على الجهاز انتظر اشوف الطفل بس كلشي مدا افتهم من الصوره
فجأه سمعت صوت النبض .. عاينت عليها فاتحه عيوني
وحده تضحك بوجه الثانيه مثل الممصدگات
الدكتوره.. ها ماما سمعتي صوت النبض مالته
نهى.. اي اي
مياس دتسمعين الصوت ؟؟
مياس.. اوووووي حياتي من فدوه رحت لهل نبضات
نهى.. اسم الله عليچ حبي
الدكتوره.. كلشي تمام والحمل طبيعي والحمد لله
الله يگومچ بالسلامه انتي وابنچ
نهى.. شكرا دكتوره
بس ممكن صوره للسونار
الدكتوره.. تتدللين
اخذنه الصوره وطلعنه .. الطريق كله تعاين عليها ما رفعت راسها لحد ما وصلنه لجهاد
جهاد.. ها بشروا
نهى.. هاك شوف ابن خالك
جهاد.. وينه
نهى.. هذا مدتشوفه
جهاد.. ششوف شو كله اسود
نهى.. ههههه ولك هذا
جهاد.. شنو دتضحكين عليه انتي ؟!!
مياس.. هههه هاي انت مثلي هم كلشي ما افتهمت منه
بس المهم سمعنه نبضاته والدكتوره گالت كلشي تمام
جهاد.. خو الحمد لله والشكر
يلا اصعدوا خوش شتله من الاربعه للسته
نهى.. منستاهل
جهاد.. لا عمي تستاهلين انتي وابنچ وابو ابنچ وياكم
نهى.. ههههه شكرا شكرا
رجعنه للبيت تلگونه منال والحجيه .. ظلوا يسألون عن وضعها وهي تحلف ماكو شي وكلشي طبيعي لحد ما تعبت وياهم
نهى.. والقرأن ماكو شي
هاكم حتى شوفوا صورة السونار
منال.. صدقه لله يعني بين النبض
نهى.. اي حتى سألي مياس من سمعنا شصار بينه
مياس.. هههه اي والله گلبي راد يوگف من الفرحه
الحجيه.. ان شاء الله تكونين صادقه ينهى ولو گلبي ممرتاحلچ ما اعرف ليش
نهى.. ركضت حضنتها : يوم بداعة شهم عندچ
افرحي بحفيدچ وفكيها عاد .. لتخربين عليه الفرحه خليني بواهسي
الحجيه.. الله يتمملچ على خير بنيتي
نهى.. شكرا يا احلى ام بالدنيا
وبعد يومين بالضبط چنت واگفه اغسل بالممر سمعت الباب انفتح .. رفعت راسي وفرحت كلش لمن شفت شهم رجع بالسلامه
خلصت التحاقي على خير ورجعت للبيت بلا ما انطيهم خبر
اول ما طبيت صارت مياس گدامي دتغسل بالحديقه بس شافتني ابتسمت واجتني تركض
مياس.. الحمد لله على سلامتك
شهم.. الله يسلمچ باباتي
شلونچ ؟ ودراستچ شلونها
مياس.. الحمد لله كلشي تمام
انت شلونك شو وجهك اصفر خير ؟؟
شهم.. تعبان شويه
مياس.. سلامتك الف سلامه
طب جوه ارتاح تلگه الكل بالصاله
ابتسمت الها ومشيت .. اول ما دخلت گامتلي امي ع السريع
الحجيه.. هلا بالغالي
هلا بشمعة بيتي
شهم.. بست راسها : هلا بيچ حجيه .. شلونچ ؟؟
الحجيه.. بشوفتك صرت زينه يبعد گلبي
شهم.. عساچ بخير يمه
بهلاثناء طلعن منال ونهى من المطبخ .. بس شافتني اجت تركض الحضني
نهى.. حياتي شتاقيتلك
شهم.. هههه بعد روحي واني هم شتاقيتلچ
نهى.. شو ما گلت جاي
شهم.. مفاجأه غير
نهى.. ههههه احلى مفاجأه
منال.. شو دوخري لطشتي .. انطينه مجال نسلم
شهم.. هههه هلا خيتي شلونچ
منال.. زينه يروح اختك .. الحمد لله على سلامتك
شهم.. الله يسلمچ
جهاد وسمر شلونهم
منال.. زينين الحمد لله
جهاد بالمعارض وسمر بالجامعه هسه على جيه
شهم.. خوش .. اني صاعد اغسل وارتاح شويه بين ميصير الغده
الحجيه.. على راحتك وليدي
صعدت فوگ بس طبيت للغرفه اجتني نهى .. انتبهت عليها متغيره وحتى مورمه ما ركزت عليها اول ما اجيت
شهم.. شبيچ حبي شو شكلچ مو طبيعي ؟؟
نهى.. هااا ،،، شنو ؟؟ قابل شبيه
شهم.. اني جاي اسألچ مو انتي
نهى.. ما بيه شي حبيبي .. ليش هالسؤال ؟!!
شهم.. ما ادري .. دا اشوفچ مورمه ولونچ مخطوف شويه
نهى.. كلشي ما بيه .. اصلا انت الوجهك اصفر مو اني
شهم.. دفوتي طلعيلي ملابس خلي اغسل ع السريع بعد ما اطيق الهدوم العليه
نهى.. صار حياتي
ذبيت غراضي وطلعت للحمام اغسل .. طبيت للغرفه لگيت نهى دتمسح بيها
شهم.. لتعبين نفسچ مدا تشوفيها نضيفه
نهى.. نعيماً
شهم.. ينعم عليچ عمري
ذبيت الخاولي مني وگفت امشط .. عاينتلها بالمرايه مشيتها غريبه : لا لا بيها شي مو طبيعي اني متأكد
شهم.. نهى
نهى.. نعم
شهم . احچي شبيچ ؟!!
نهى.. شنو سالفتك ؟ شو كل ساعه تصيح شبيچ !!
شهم.. كلشي بيچ مو طبيعي
شكلچ
لونچ
مشيتچ
وحتى احسچ سمنانه
احچي شنو تخربطتي بغيابي ؟؟
نهى.. سمنانه !!
زين خلي نگول سمنانه .. شنو يعني معاجبك
شهم.. ههههه تردين تفريها عليه
نهى.. لعد شنو معنى كلامك هذا
شهم.. دا اگلچ احس بيچ شي .. واريدچ هسه تحچيلي لا انزل جوه واعرف كلشي من امي وتدريها متقصر بس افتح حلگي واسألها
نهى.. صدگ كلشي مابيه
شهم.. ماشي شويه وارجعلچ ،،، دا انزل صاحتني
نهى.. لا تعال عفيه
شهم.. ها شو خفتي ؟؟ مو گتلچ اكو شي وضامته عليه
نهى.. اي اكو
بس بلاول خلي نتغده و وراها احچيلك كلشي
شهم.. لا هسه نهى
نهى.. الله يخليك اصبر لبعد الغده
شهم.. گتلچ هسه يعني هسه
نهى.. اهوووو
شهم.. احچي بسرعه
نهى.. اني حامل
شهم.. شنووووو !!!!
نهى.. حامل
شهم.. منين حامل
نهى.. من ابن الجيران
شهم.. احچي عدل لا اخربط خلقتچ
نهى.. لعد شنو منين
شهم.. نهى الله عليچ لتتشاقين .. تعبان ومالي حمل شقاچ الماصخ
نهى.. والله ما اتشاقه اني حامل وبشهر الثالث هم
تخبلت من سمعت نهى حامل .. ما عرفت إلا اصفن عليها والصدمه سيطرت على كل جوارحي
نهى.. شبيك شو صافن
شهم.. انتي تحچين من كل عقلچ !!!
نهى.. توقعتك تفرح
شهم.. لتچذبيييييييين
كلش زين تعرفين بيه راح اضوج وچنتي خايفه من ردة فعلي لذالك ما گدرتي تگوليلي واصريتي تأجلين الموضوع البعد الغده
نهى.. اي ادري
اعرف الموضوع هذا يغثك كلش وحاچين بي من قبل هواي بس توقعت لمن يصير تنسى كلشي وتفرح بالطفل
شهم.. ولمن تدرين بكل هالحچي شلون تحبلين ؟؟
اني مو سألتچ بهذاك اليوم الاگشر وگلتيلي ماخذه مانع .. شنو يعني دتستغبيني ؟!!!
نهى.. لا شهم .. مو قصدي والله
كل الموضوع اني تعبت من روتين حياتنا الممل .. بس فهمني المن عايشين اذا ما عدنه جهال يملون علينه البيت
شهم.. ترى اني لحد الان مدا استوعب الموضوع
معقوله سويتي كل هالشي بس حتى تخليني گدام الأمر الواقع
نهى.. اي لان اريد جاهل وادري بيك لو احچي منا للصبح فلا تسمعني
شهم.. امشي بدلي ع السريع
نهى.. وين !!!
شهم.. اخذچ تنزلين الطفل
نهى.. لزمت بطنها : من كل عقلك ؟!!
والله لو اعرف اعوفك واروح لأهلي ولا انزله
شهم.. راح تنزلي وتروحين لأهلچ هم
نهى.. لا شهم ... حرام عليك
شلون تگدر تكتل طفل بي روح متخاف من الله
شهم.. ركضت عليها لزمتها من ايدها حيل : وانتي شلون ينطيچ گلبچ تكتلين نفسچ بدم بارد .. حاچينيييييييي
نهى.. والله ما عليه شي دا اراجع الدكتوره وكلشي تمام .. صدگني شهم اترجاك صدگني
شهم.. وينه هذا الصخام
افتر على روحي ما اعرف شأسوي لحد ما صاحتني نهى
نهى.. على شنو دتدور ؟؟
شهم.. الموبايل وييييين
نهى.. هذا ع الميز .. بس شسوي بي ؟؟
شهم.. اخابر اخوچ يجي يلگالي چاره وياچ
لان اني تعبت .. خلص خلص تعبت
اخذت الموبايل اريد اخابر يوسف ما اگدر .. من العصبيه ايدي ترجف ودماغي مديركز على اي شي
نهى.. شبيك شهم ؟؟
شهم.. يلا رد رد رد .. يمعود ردددددد
يوسف.. هلا بابو الشهامه .. الحمد لله على سلامتك
شهم.. يوسف تعالي بسرعه
يوسف.. خير شهم خو ماكو شي
شهم.. تعال وتعرف بس لتتأخر الله يخليك
يوسف.. ماشي جاي جاي
سديت الخط منه .. درت وجهي طلعت من الغرفه ورگعت الباب حيل اول ما صارن امي ومنال گدامي نزلت عليهن
شهم.. انتن شلون ساكتات على الموضوع كل هل مده
الحجيه.. چا قابل احنه الحبلناها .. ليش دتصيح علينه شلنه غرض بصخامكم
شهم.. يمه صدگ تحچين ؟!!!!!
ع الاقل چان جبرتوها تنزل الطفل قبل ليصير بي نبض
منال.. خويه حاچيناها بس انت تدري بنهى شگد عنيده ... حتى اهلها ما گدروا عليها تريد تسمع كلامنه احنه
مياس.. اعاين على شهم صاير اعصاب .. لو بيده يهجم علينه واحد واحد
ما فاد حچي منال والحجيه ويا .. ظل يصيح ويغلط واحتار شيسوي لحد ما سمعنه الجرس يدگ
شهم.. ذبي چفن على راسچ اجه يوسف
منال.. صار خويه بس الله يخليك لتكبر السالفه
شهم.. ليش هي على اساس مو چبيره
رحت للباب فتحتها .. عاينت اليوسف بخزره صفن عليه گبل
يوسف.. هاي شبيك ؟!!
شهم.. طب طب
يوسف.. هههه والله ولا اطب .. تروح تغتالني بهاي چهرتك الما يگصها الطبر
شهم.. جريته من ايده : شو دفووووووت
يوسف.. خاااااااااااله
الحجيه.. اجت تركض : ها يمه
يوسف.. تعالي نقذيني من ابنچ المخبل
الحجيه.. ههههه واني عبالي صار شي
دطب الله يعقلك
يوسف.. ويعقلكم ويايه يبيت رسميه
طبينه للصاله نزلت نهى بهلاثناء عيونها مورمه لأن چانت تبچي .. عاينتلها صفح مستغرب من وضعها : هم غلطانه وهم تتبچبچ والله حلوه هاي
يوسف.. شبيك شهم دحچي عاد
شهم.. مغشم نفسك يوسف افندي
يوسف.. هاااااااا وصلت وصلت
شهم.. شوفلك صرفه ويا اختك قبل لا ابتلي بيها گدامكم
يوسف.. صلي على محمد حبيبي .. تعال ويايه حتى نحچي براحتنا
شهم.. ماكو حچي يوسف
تنزل الطفل يعني تنزله وانتهى الموضوع
الحجيه.. يمه حرام اتقي الله
شهم.. لا مو حرام ما دام حياة الام بخطر
يوسف.. دمشي للاستقبال يمعود
خزرت نهى ولأول مره بحياتي احس نفسي ضجت من تصرفاتها .. رحت للاستقبال اجه يوسف ورايه اول ما طب صيحت علي
شهم.. يوسف حل السالفه ترى بعد ما اتحمل خبال اختك
يوسف.. خويه اهدأ اهدأ
بس اسمعني وبعدين سوي التريده
شهم.. شنو احچي
يوسف.. اول شي حرام تطلب منها تنزل الطفل تعرف ليش ؟؟
شهم.. ليش
يوسف.. لان وضعها مستقر ودتراجع الدكتوره كل شهر وكلشي تمام يعني ماكو خطر على حياتها
بعدين لتتوقع من نهى تسمع كلامك وتنزل الطفل .. اذا بيها مجال چان سمعت منه من اول ما عرفت بخبر حملها .. ماكو قافله لتحاول
اذا ظليت مصر راح تخسرها شهم .. اني اخذتها للتحليل بنفسي ولمن عرفت بيها حامل صيحت عليها وتعاركت وياها وما خليت شي ما سويته الله وكيلك
بس لمن شفتها مصره على الموضوع استسلمت وبعدين سألتها شهم شلون ؟؟ اذا عرف اكيد يخليچ تنزلي
تعرف شنو چان جوابها ؟؟
شهم.. شنو
يوسف.. گالت لو الطفل لو مالي عيشه ويا شهم بعد اليوم
استسلم مثلي يخويه وخليها ورى ربك احسن الك والها وللكل
شهم.. يوسف لتخبلني انت تدري بصحتها متتحمل ... يعني نوگف نتفرج عليها شلون تموت گدام عيونه ونظل ساكتين
يوسف.. گول يا الله يمعود
مو انت مؤمن وتدري الاعمار بيد الله سبحانه وتعالى .. محد يموت قبل اجله
اطمأن خويه تعددت الاسباب والموت واحد
شهم.. ونعم بالله
بس اختك صايره ما تنطاق وتعرف منو السبب ؟؟
اني السبب لان انطيتها مجال تتمرد بحبي الزايد الها
يوسف.. هههههه والله وكت شهم يحچي على نهى
شهم.. لك والله خايف عليها .. بس لو تعرف شدا احس هسه چان عذرتني
يوسف.. ضربني على چتفي : ادري خويه
وحقك والله حقك بس شي وصار بعد شتريد تسوي قابل
حاول توگف وياها حتى تعدي حملها على خير ترى هي ممحتاجه احد غيرك .. بيك تتقوه شهم
شهم.. اوووووووف يا نهى
يوسف.. تگوم تغديني لو اسبك انت ونهى هسه
شهم.. ههههه ابو بطن احد لازمك .. هذيچ خالتك وروح تزقنب يمها
يوسف.. رحم الله والديك عود حسبالك ما عندي كرامه ؟؟
لا عندي بس خلي اتغده بلاول وبعدين اراويك الزعل على اصوله
شهم.. ههههههه امشي خويه ما ادري شچان سويت بحياتي لو ما انت موجود يمي
يوسف.. احم احم ... حتى تعرف قيمتي
شهم.. وتمنك هم ... هاهاها
يوسف.. صاير سخيف ولك
شهم.. مو اسخف منك هههههه
اخذته وطلعنه لگيناهم صابين الغده وينتظرونه .. عاينت سمر بعدها ما راجعه
شهم.. شو بتچ ماكو منال
منال.. اكيد عدها محاضرات خويه
يوسف.. محاضرات شنو ؟! الساعه ثنتين ونص
خابريها بسرعه شوفي وينها
منال.. صار بس تعالوا للاكل راح يبرد
يوسف.. دفوتي اتصلي عليها لاحگين ع الاكل
بعد ما راح شهم ويا يوسف .. اخذت نهى ورحنه لغرفتي
حچيت وياها شويه حتى اهديها لأن چانت تعبانه كلش ربع ساعه وطلعنه نصب الغده
اول ما كملنه طلعوا من الاستقبال .. سألوا عن سمر وما قبلوا ياكلون إلا ما يتطمنون عنها
خابرتها منال گالتلها بالطريق .. اكثر من نص ساعه يلا اجت بحيث الاكل ثلج
تفاجأت بيوسف اول ما طبت من الباب ركض صيح عليها
يوسف.. وين چنتي ولچ
سمر.. چان عندي محاضرات
يوسف.. محاضرات شنو الساعه فوگ الثلاثه
سمر.. وانت منو حتى تحاسبني
منال.. تأدبي سمر
شهم.. سمر اصعدي غيري ملابسچ وحسابي وياچ بعدين
سمر.. خالو شسويت اني
جهاد.. شبيكم
شهم.. وين چنت انت الثاني
جهاد.. بالمعارض هسه يلا عزلت
شهم.. وليش هيچ متأخر ؟؟
جهاد.. چان عدنه طلبيه وتأخرنه بتسليمها
شهم.. خوش .. دفوت غسل حتى تتغده ويانه
جهاد.. شديصير هنا فهموني
شهم.. ماكو شي لتلح بالموضوع
جهاد.. عاين السمر : شنو انتي هستوچ راجعه !!
شهم.. اي تأخرت واني رحت رجعتها بنفسي
جهاد.. ها زين
مياس.. واگفه اعاين عليهم ومستغربه تصرفاتهم .. كل الفهمته شهم چذب على جهاد علمود لتصير مشكله بينه وبين اخته
اول ما خلصنه الغده رحت لغرفتي حتى ادرس لان ضاع اليوم مني بلا فائده
- ظليت گاعد ويا يوسف للعصر يلا راح .. اول ما طلع صعدت اركض لسمر
فتحت الباب بس شافتني طفرت من مكانها .. رگعت الباب وتقربت منها بعصبيه
سمر.. شبيك خالو
شهم.. احچي ولچ وين چنتي ؟؟
سمر.. والله خالو بالجامعه .. اذا ممصدگني اخابرلك صديقتي حتى تتأكد
شهم.. واني غبي حتى اتأكد من صديقتچ
سمر.. شنو قصدك ؟؟
شهم.. راح اتأكد سمر بس بطريقتي الخاصه
سمر.. شلون يعني ؟؟
شهم.. راح تعرفين كلشي .. لتستعجلين على رزقچ
طلعت منها طاگه روحي : عساني لا رجعت من اول يوم تلگوني بمشاكلهم الما تخلص
طبيت الغرفتي بدلت وطلعت ع السريع لان اختنگت من البيت والي بي
رحت شفت بيت اهل نهى وعاتبت خالتي لان سكتت النهى بس چان جوابها مثل يوسف الكل محاولين وياها بس بلا فائده
لليل رحت للجم رغم تعبي بس حسيت عندي طاقه سلبيه محتاج اطلعها بأي شي
رجعت للبيت قريب العشره شفتهم مجتمعين بالصاله .. عاينت الجهاد لازم الكتاب وصافن علي ومياس بصفه
شهم.. ها شبيكم
جهاد.. خالي هالمسأله خبلتنه
لا اني ولا نهى گدرنه نحلها
شهم.. انطيني خلي اشوف
اخذت الكتاب صفنت بي شويه ونحلت ويايه .. گعدت يم مياس وسحبت الدفتر
شهم.. سهله يابه ركزي ويايه
شرحتلهيا واول ما كملت ضحكني جهاد من گال :
جهاد.. والله انت فيثاغورس بس دبل ماكس
شهم.. ههههه رحم الله والديك
ها مياس عندچ شي بعد
مياس.. لا شكرا تعبتك
شهم.. ماكو تعب بنيتي
منا وجاي يوميه بلليل تعالي اشرحلچ الماده لان امتحاناتچ قربت مو مال تعتمدين على هالزوج الما منهم فايده
نهى.. انعم الله عليك
جهاد.. عادي مرت خالي .. رجلچ كلشي يطلع منه ظلت على هاي
شهم.. ههههه صاعد انام .. تصبحون على خير
صعدت فوگ بعدني ممغير ملابسي اجت نهى .. عاينت عليها عيونها تلالي بالدموع بسرعه رف گلبي
شهم.. وتالي ويايه شوكت ابطل اضعف گدام دموعچ
نهى.. لتبطل الله يخليك
شهم.. فتحتلها ايدي : تعالي يعمري
نهى.. حضنتني تبچي : فدوه لتزعل عليه
صدگ كلشي زين .. كلها كم شهر وتفرح بسلامتنه اني وابنك
شهم.. اتمنى هالشي نهى لان بس الله وحده يعلم شگد خايف عليچ
نهى.. لتخاف يگلب نهى وحياتها
انت بس ادعيلي وعوف الباقي على رب العالمين
شهم.. الله يگومچ بالسلامه بحق محمد وآل محمد
نهى.. امين يا رب
مشى الوقت سريع واجت امتحاناتي .. طول هالفتره شهم ما قصر ويايه بحيث يگعد بلليل ساعات يشرحلي وهو تعبان .. نهى وجهاد چانوا يساعدوا بس التعب الاكبر علي
باول يوم امتحاني للفجر ما نمت من القلق .. بعد ما صليت الصبح گدرت اخذلي غفوه ساعه ونص تقريبا
گعدت على صوت المنبه .. لزمت گلبي احسه يريد يطلع ليبره من الخوف
استغفرت ربي وگمت غسلت وبدلت .. دا اطلع من الغرفه اجتني نهى
نهى.. صباح الخير يا حلوه
مياس.. صباح النور حياتي
نهى.. شلونها معنوياتچ
مياس.. زفت والله
نهى.. ههههه طبيعي تحسين بهل شي
هسه بس ترحين للقاعه وتگعدين گدام الاسئله تسترخين وترجع المعلومات الدماغچ بالتدريج
مياس.. الله يسمع منچ لان راح اموت من الخوف
نهى.. سلامتج عمري
يلا تعالي سويت الريوگ تريگي ويا شهم
مياس.. عاشت ايدچ
طلعت وياها لگيت شهم ديغسل .. كعدت ثواني واجه للمطبخ
شهم.. ها مياس بشري شلونچ
مياس.. خايفه والله
شهم.. لتخافين يابه ترى الخوف مراح يخليچ تجاوبين
هي كلها امتحانات تمهيديه بالنهائيه شراح يصير بيچ لعد
مياس.. مو بيدي
شهم.. ظلي رددي بلاستغفار حتى تنسين الخوف منا لما تجي الاسئله
مياس.. ان شاء الله
شهم.. يلا تريگي خلي نطلع ما ظل وقت
تريگت بالگوه لان ما اشتهي بس شهم جبرني على ابو ميصير ترحين للامتحان بلا ريوگ
طلعنه سوه والطريق كله يوصي بيه سوي هيچ ولتسوين هيچ لحد ما وصلنه
شهم.. يلا قوي نفسچ وخلي الخوف على صفحه ما اوصيج بعد
مياس.. ان شاء الله
شهم.. اول متطلعين خابريني .. دقايق واكون يمچ
مياس.. اي ماشي
شهم.. الله يوفقچ بنيتي
مياس.. امين
نزلت من السياره اشرتله بيدي وراح .. طبيت للمدرسه مستغربه كلشي ما اندل ولا اعرف شنو المفروض اسوي
وگفت يم البنات اراجع لحد ما سمعتهم يصيحون : يلا طالبات للقاعه بسرعه
ذبيت الكتاب من ايدي وطبيت بس احس نفسي اريد اوگع على وجهي من الخوف بحيث ما ادري شلون وصلت للرحله
گعدت اردد ايام قرأنيه واستغفر ربي مثل ما وصاني شهم لحد ما اجتي الاسئله
والحمد لله بعد تعب وجهد مو طبيعي گدرت اجاوب .. طلعت من القاعه اخذت موبايلي من المديره وخابرت شهم
شهم.. ها بابا بشري
مياس.. الحمد لله جاوبت
شهم.. اي الف الحمد لله والشكر
عفيه بالسباعيه
مياس.. هههه شكرا
يلا تجي عليه
شهم.. اي دقايق وجاييچ بس ارمش اطلعيلي
مياس.. ماشي
سديت الخط ردت اگعد اجت العامله طردت البنات لان ميصير نظل بالمدرسه واكو طالبات يمتحنن
اخذت غراضي وطلعت بباب المدرسه دا اعاين للطريق انتظر جيت شهم ،،، چان انصدم بعماد واگف گدامي بمسافه قريبه ومبتسم بوجهي...
يتبع..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!