رواية مياس قلب الشهم الفصل السادس والعشرون 26 - بقلم لبنى الموسوي

#مياس_قلب_الشهم

للكاتبه #لبنى_الموسوي

روحي ما تسعفني كلش
والخلگ صاير نحس
ولا تفززني اعله باچر
باچر اتعس من امس 💔

_____________________

شهم.. ها بابا بشري

مياس.. الحمد لله جاوبت

شهم.. اي الف الحمد لله والشكر
عفيه بالسباعيه

مياس.. هههه شكرا
يلا تجي عليه

شهم.. اي دقايق وجايچ بس ارمش اطلعيلي

مياس.. ماشي

سديت الخط ردت اگعد اجت العامله طردت البنات لان ميصير نظل بالمدرسه واكو طالبات يمتحنن

اخذت غراضي وطلعت بباب المدرسه دا اعاين للطريق انتظر جيت شهم ،،، چان انصدم بعماد واگف گدامي بمسافه قريب ومبتسم بوجهي

صفنت بوجها ما اعرف شسوي من الخوف .. تقرب مني لحد ما صار يمي كلش

عماد.. ها حبيبتي شلونچ

مياس.. عماد !!!

عماد.. اي عماد شو چنچ ممصدگه شايفتني گدامچ
اكيد اشتاقيتيلي

مياس.. الله يخليك روح منا
شهم على جيه واذا شافك ميصير خير

عماد.. اني مهيب المخبل ما خفت منه بوقتها ترديني هسه اخاف من شهم !!

مياس.. نترت بي : لتجيب سيرة مهيب على لسانك القذر تسمعنيييي

عماد.. هه الله يرحمه
اسمعي لچ ... مو مات رجلچ افتريتي على اخو
راح تتطلگين من شهم وترجعين تتزوجيني ورجلچ فوگ راسچ .. خلي هالكلام بدماغچ حتى لا اضطر اندمچ بعدين

حچه هيچ وراح .. ظليت صافنه ورى وجسمي يرجف من الخوف

مياس.. شنو يقصد ؟ شلون يعني اندم
زين هو شلون عرف بي هنا .. يا ربي متاخذه هو وخالته وتريحني منهم مو والله تعبت

وصلت للمدرسه شفت مياس صافنه ع الطريق وحتى ما انتبهتلي من صرت يمها .. دگيتلها هورن مرتين بس ما سمعت اخير شي نزلت من السياره اشوف شصاير وياها

شهم.. مياس
حركت ايدي گبال وجها : هيييي بابا وين صافنه

مياس.. گمزت من مكاني وخليت ايدي على گلبي : يمه خرعتني

شهم.. اسم الله يمعوده
شبيچ صاير شي وياچ

مياس.. اي
اقصد لا لا
ها اي صاير اي

شهم.. شكو احچي بسرعه !!!

مياس.. خل نصعد بالسياره عفيه .. رجلي بعد متشيلني

شهم.. فوتي گدامي

فتحت الباب وصعدتها .. ظليت اتلفت بالشارع اريد اشوف من شنو خايفه لهل درجه لحد ما صعدت وحركت السياره

شهم.. احچي مياس شنو شفتي ولونچ انخطف ؟؟

مياس.. شفت واحد

شهم.. اي اعرف بس منو هو ؟؟!

مياس.. عماد

شهم.. هي گالت عماد لو مدري شصاير بيه ضربت بريك ع السريع : شنو شنوووووو ؟!!

خفت منه لأن صار عصبي .. دنگت راسي بلا ما اجاوبه لحد ما عاط بيه بصوت خلاني انز من مكاني

شهم.. احچييييييييييييي

مياس.. عفيه على كيفك والله دتخوفني

شهم.. لا حول ولا قوة إلا بالله العلي العظيم
فركت وجهي بأديه حيل : احچي بابا احجي

مياس.. بعد ما خابرتك حتى تجيني .. گعدت انتظرك بالمدرسه بس العامله ما قبلت لأن الطالبات بعدهن يمتحنن

اخذت غراضي وطلعت بره .. تفاجأت بعماد واگف گدام الباب ينتظرني واول ما شافني اجه باتجاهي

شهم.. ايييي

مياس.. گلي اسمعي لچ مو مات رجلچ افتريتي على اخو
راح تتطلگين من شهم وترجعين تتزوجيني ورجلچ فوگ راسچ
خلي هالكلام بدماغچ حتى لا اضطر اندمچ بعدين

شهم.. صكيت على سنوني وشديت قبضة ايدي من العصبيه : الحيوان اخ بس لو الزمه ااااخ

مياس.. عفيه شهم خليك بعيد عنه .. هذا واحد ميخاف الله وكلشي مستعد يسوي حتى يحصل اليريده مني

شهم.. يحلم يمس شعره منچ طول ما اني عايش مياس

مياس.. مو اخاف يأذيك

شهم.. بي خير ورجال هو .. خلي يتدنالي ساعتها يكون دينصب چادر فاتحته بايده بلا ميحس على روحه

مياس.. يلا لعد شغل السياره خلي نرجع للبيت تعبت كلش 

شهم.. لتخافين بابا ترى عماد جبان انطي بس حچي .. الله وكيلچ كلشي ميگدر يسوي لان ما بي حظ
عموما هسه بس اوصلچ اروح انبش بيت اهله على راسه وراس الخلفوا على هل خلفه النگسه

مياس.. اهم شي تدير بالك على نفسك

شهم.. هههه صار تتدللين

وصلنه للبيت نزلني بالباب وراح .. اول ما دخلت اجتني نهى تركض

مياس.. يمعوده لتركضين مو حامل شنو سالفتچ

نهى.. بالي يمچ والله .. بشري شسويتي ؟؟

مياس.. الحمد لله جاوبت

نهى.. اي عفيه بالشاطره

منال.. ها حبي شلونچ بلامتحان ان شاء الله گدرتي تجاوبين بالي كله يمچ

مياس.. اي حياتي جاوبت ليظل بالچ

منال.. الف الحمد لله والشكر

نهى.. جرتني من ايدي : شو عاينيلي

مياس.. ها شنو ؟!!

نهى.. شصاير وياچ ؟؟

مياس.. ليش هل سؤال ؟!

نهى.. احس لونچ مخطوف .. تعالي ويايه بسرعه
اخذتي لغرفتي .. طبت وسدت الباب وراها

نهى.. احچي حبي خو ماكو شي

مياس.. شفت عماد

نهى.. ضربت على خدها : صخام الصخم راسه
شعنده جاي هذا

مياس.. ما ادري والله ما ادري

نهى.. شهم عرف بالموضوع ؟؟

مياس.. اي مثلچ بس شافني حس بيه شي فـ اضطريت اسولفله

نهى.. زين سويتي
يلا لعد ميحتاج تخافين خليها على شهم هو يحلها اكيد

مياس.. ان شاء الله تنحل بلا مشاكل لان والله مليت من هل وضع

نهى.. يا عمري انتي
خلي يولي انسي .. لازم تركزين على امتحاناتچ الباقيه لتضيعين التعب التعبتي بسببه

مياس.. ان شاء الله حبي

نهى.. يلا غيري ملابسچ واگعدي ادرسي
بس تخلص الصلاة ونصب الغده اجي اشرحلچ قواعد

مياس.. ماشي گلبي

غيرت ملابسي وطلعت الكتب حتى اقره بس ما گدرت بالي كله يم شهم اخاف يأذي عماد النگس

ما تحملت اكثر اخذت الموبايل وخابرته مكالمتين يلا رد عليه

شهم.. الو

مياس.. هاي وينك مو گلبي راد يوگف

شهم.. يابه شبيچ ؟ من شنو خايفه الخاطر ربچ

مياس.. انت وين

شهم.. گاعد ادور علي .. بس ماكو كالعاده فص ملح وذاب ابن الكلب

مياس.. ارجع عفيه .. خل يولي اتركه

شهم.. روحي بابا اقري زين وخلي عنچ هل افكار
صار لازم اروح مع السلامه

مياس.. بس شهم...

بعدني ممكمله كلامي سد الخط بوجهي : اوف يربي شگد عنيد
هسه اني شسوي بروحي والله فلا ارتاح اذا ما اشوفه بالبيت گدام عيني

ظليت على هل حاله وچذب اذا گدرت اقره كلمه وحده .. صارت الصلاه صليت وطلعت اساعدهم بالغده حتى التهي شويه

واگفه وحدي بالمطبخ اجهز بالمواعين سمعت صوته بالصاله ديحچي ويا الحجيه .. شمرت كلشي من ايدي وطلعت اركض

بعد ما نزلت مياس رحت بوجهي لبيت اهل عماد .. جريت الحچي من جوه لسان ابو بس للأسف ميعرفون عنه شي من يوم الشرد

اخذت منه عناوين جماعة ابنه ورحت ادور علي للظهر تعبت واني ممحصل نتيجه .. رجعت للبيت بس ناويله نيه إلا احفر الگاع واطلعه من جواها هل مره

دخلت لگيت الكل بالصاله سلمت عليهم دا احچي ويا امي طلعت مياس من المطبخ تعاينلي بخوف

الحجيه.. شو جاي وحدك وليدي .. وين جهاد عنك

شهم.. ما ادري يوم ما چنت بالمعارض اني

الحجيه.. لعد وين ؟؟

شهم.. عندي شغله گضيتها وبوجهي اجيتكم

نهى.. اصعد غير ملابسك حتى نتغده

صدت فوگ حسيت على نهى لحگتني .. من تصرفها عرفت مياس حاچيتلها عن الموضوع

نهى.. شهم

شهم.. ها حياتي

نهى.. شسويت على عماد

شهم.. ما گدرت أوصله .. اختفى مثل عادته

نهى.. الله يخليك دير بالك منه

شهم.. حبي جوعان .. فوتي صبي الغده بسرعه

نهى.. تتدلل عمري

فات من يمي مبتسم وصعد فوگ بلا ما اعرف شصار ويا .. رجعت للمطبخ اكمل شغلي ما صدگت شفت نهى طفرت لزمتها بسرعه

نهى.. ههههه يااا هاي شبيچ !!!

مياس.. عفيه گلبي راح يوگف
احچي شسوه ويا هل حيوان

نهى.. هههه ما گدر يلزمه لتخافين

مياس.. الله ياخذك يا عماد .. الله ياخذك ان شاء الله

نهى.. ان شاء الله حبي .. يلا خلي نستعجل بالغده حتى اشرحلچ ما ظل وقت

مرت الايام بشكل صعب بسبب الضغط النفسي .. مع ذالك شهم ونهى ما قصروا ويايه من كل النواحي

طول فترة امتحاناتي شهم يوديني وينتظرني بالباب لحد ما اخلص لان صار يخاف عليه من عماد وبيوم العنده دوام بالمركز يخلي جهاد بمكانه

خلصت الامتحانات على خير وبعد ما شفت عماد من هذاك اليوم ولا گدر شهم يعرف شي عنه حسب ما فهمت من نهى

ظليت انتظر النتيجه بفارغ الصبر والخوف مسيطر عليه لا ارسب واخيب امالهم لان حظي واعرفه كلش زين شلون مايل

وبعد اسبوعين من امتحاناتي خلصنه شغل البيت اني ونهى وصعدنه لغرفتها نسولف بين متنظفها

چنت متربعه ع الچربايه بلا حجاب .. اگلب بصورها ونحچي عن جهاز الطفل انفتحت الباب وطب شهم

گمزت من مكاني مخروعه .. جريت الحجاب وذبيته على راسي بالمگلوب

شهم.. درت وجهي بسرعه : اسف ما ادري بيچ هنا

مياس.. لا عادي تفضل اني نازله جوه

شهم.. خليچ دقايق واروح

نهى.. شعجب اجيت هسه ؟!!

شهم.. نسيت اللابتوب هنا واحتاجينا بالشغل

نهى.. اي صح انتبهت عليك ناسي .. هذاك ع الميز اخذه

شهم.. صدگ نهى حجزتلچ يم الدكتوره العصر

نهى.. يا دكتوره ؟؟

شهم.. مرت صديقي

نهى.. وليش ؟

شهم.. كلما اوديچ الدكتوره تگليلي ما عجبتني لو احسها متفتهم
هسه هاي معروفه وكل الناس تحمد بيها اريد اشوف شنو حجتچ بعد
ها وللعلم وصيتهم يسمحون المياس تدخل وياچ

نهى.. شنو سالفتك ترى دتچذبني بطريقه غير مباشره

شهم.. انتي ادرى

خله وطلع .. اعاين على نهى وجهه ميتفسر عرفتها خايفه من شي

مياس.. ليش خفتي حبي ؟

نهى.. هااا لا ما خايفه ومنو شنو اخاف قابل

مياس.. صدگ نهى .. ليش كل شهر تغيرين الدكتوره يعني ممعقوله كلهن ميفتهمن

نهى.. يمعوده هو احنه هم عدنه دكتورات مثل الاوادم

مياس.. صح بس لو خليت قلبت

نهى.. قلبت حبيبتي قلبت

مياس.. يلا خلي نشوف مرت صديق شهم بلكت يطلع بيها حظ وتستقرين عليها

نهى.. الله كريم
يلا خلي ننزل جوه كملت الغرفه

مياس.. يلا امشي

نزلنه كملنه الشغل للظهر اجه شهم .. تغدينه ورحت انضف بغرفتي بـ الاربعه ونص اندگت الباب ،، لبست حجابي ع السريع

مياس.. تفضل

شهم.. ها بابا شو بعدچ ما جاهزه

مياس.. هسه ابدل ع السريع .. التهيت بالغرفه  وما حسيت ع الوقت

شهم.. اگدر اطلب منچ طلب

مياس.. اي طبعا

شهم.. اسمعيني لعد
هسه من تروحون للدكتوره نهى راح تحاول تمنعچ تطبين وياها للدكتوره
شما حاولت وياچ لتسمعين منها مياس تفهميني لو لا

مياس.. شنو يعني .. تريد ادخل وياها

شهم.. اي ضروري

مياس.. زين ليش ؟؟

شهم.. اريدچ تسمعين كلام الدكتوره وتجين تگولي الي بالحرف الواحد

مياس.. واذا عاندت شلون ؟؟!

شهم.. گتلچ لتسمعين كلامها .. شتريد تسويلچ قابل

مياس.. اي فهمت

شهم.. يلا استعجلي شويه

مياس.. خمس دقايق واجهز

طلع من يمي .. بدلت واني افكر بكلامه : معقوله شاك بشي ويريد يتأكد من خلالي
يلا هي ساعه وكلشي يبين على شنو متعبه دماغي بالتفكير

وصلنه وظل منتظرنه بباب العياده .. وفعلا مثل ما گال شهم اول ما دخلنه حاولت نهى تمنعني اطب وياها

نهى.. حبي انتي ظلي هنا ميحتاج تجين ويايه

مياس.. لا حياتي لازم ادخل

نهى.. هاي شبيچ ما اتأخر .. عشر دقايق وارجعلچ

مياس.. ميخالف يعجبني اجي وياچ
بعدين اريد اشوف جنس البيبي مو راح تاخذين سونار

نهى.. اي عود اني اروايچ صورته

مياس.. لا عاجبني اسمع دگات گلبه اشتاقيت لهذا الشعور

نهى.. مياس لتعاندين

مياس.. نهى لتتعبين نفسچ اطب يعني اطب

نهى.. اهووووووو

مياس.. ديلا سدي حلگچ وفوتي گدامي .. متسمعين ديصيحون بأسمچ

دخلنه سوه سلمت ع الدكتوره وتعارفن بيناتهن بحساب زوجات اصدقاء .. سمعت نهى طلبت من الدكتوره تاخذلها سونار بلاول وهي ما عارضت هالشي

وگفت يم نهى اعاين ع الجهاز ومنتظره اعرف جنس الجنين بلهفه .. شويه وحسيت عليها دتبچي استغربت كلش

مياس.. يا حياتي شبيچ ؟!!!

نهى.. ما بيه شي بس ممصدگه راح اعرف شنو راح يصير عندي

الدكتوره.. يا حياتي راح تجيكم بنوته واكيد تطلع حلوه على امها

بس گالت الدكتوره هيچ نهى انهارت بالبچي نريد نسكتها ماكو اخير شي هددتها اطلع اگول لشهم يلا سكتت

مياس.. شبيچ هسه غير نعرف

نهى.. ما بيه شي بس مخنوگه شويه

الدكتوره.. نهى انطيني تقاريرچ

نهى.. دكتوره اگدر احچي وياچ على انفراد

مياس.. عاينت للدكتوره وهزيت براسي بمعنى لا

الدكتوره.. دنطينياهن هسه والله كريم

اخذت التقارير تعاين بيهن وگالبه وجهه .. لزمت گلبي ما اعرف ليش باوعت النهى دموعها تجري عشره عشره

الدكتوره.. شنو هاي نهى ؟؟

مياس.. الله يخليچ دكتوره احچي شكو

الدكتوره.. وضعها كلش صعب لذالك مدتستقر على دكتوره معينه حسب ما گال رجلها لان اكيد محد يقبل يتحمل مسؤولية مثل هيچ حاله

درت وجهي على نهى فاتحه عيوني .. عاينتلي ودنگت تبچي

مياس.. شنو يعني هسه ؟؟

الدكتوره.. نهى حاچيني
انتي من صار عندچ الحمل وراجعتي محد گلچ سقطي الطفل لأن اكو خطر على حياتچ

نهى.. اي گلولي

الدكتوره.. لعد شلون تجازفين لهل درجه

نهى.. ما گدرت اسقطه دكتوره
هذا بالنسبه الي كل حياتي شلون اتخلى عنه

الدكتوره.. ونفسچ ما فكرتي بيها

نهى.. الله موجود

الدكتوره.. ونعم بالله .. بس رب العالمين يگول ولا تلقوا بأيديكم الى التهلكه
مو احنه نروح للخطر برجلنه ونگول الله موجود
هذا مو حچي ترى

نهى.. الصار صار وانتهى الموضوع ميفيد الحچي بعد

الدكتوره.. اني راح استمر وياچ بس وقت الولاده ما اگدر ابلش بعمليتچ اذا ما احصل تعهد موقع من رجلچ بتحمل المسؤوليه

نهى.. ان شاء الله

الدكتوره.. الله يسهلچ حبيبتي

نهى.. امين

الدكتوره.. هذا العلاج لازم تستمرين علي
ابد لتقطعي لحد الولاده .. وهاي التحاليل والفحوصات اريدها منچ من تراجعيني الشهر الجاي

نهى.. ماشي
مشكوره حبيبتي .. نستأذن

الدكتوره.. الله وياكم عيني

طلعت ويا نهى بس احس نفسي راح انفجر لو بيدي اصيح عليها گدام العالم من حرگه گلبي

نهى.. مياس

مياس.. خير

نهى.. شبيچ تنترين بيه

مياس.. من كل عقلچ دتسأليني هالسؤال !!!

نهى.. مياس اترجاچ الحچي السمعتي قبل شويه يظل بيناتنا
ما اريد شهم يعرف بالموضوع لان راح يتخبل اذا افتهم بحالتي

مياس.. لا اگوله وهسه هم

نهى.. لزمت ايدي : تعالي فدوه

مياس.. وخري نهى ،، شو هدي ايديييي

نهى.. بس اسمعيني اترجاچ

مياس.. احچي يلا

نهى.. اذا گلتيله مراح يتغير شي
لان الوقت فات  وبعد ما بدينه شي نسوي
لتخلي يعيش بنفس القلق العايشته اني منا لما اجيب اترجاچ مياس اترجاچ

مياس.. انتي شنو من بشر بس فهميني
ولچ ما خايفه على روحچ .. ما خايفه ع المسكين الواگف برى والله يعلم شصاير بحاله من خوفه عليچ

اتركچ من كل هذا .. ما خفتي ع الطفله البطنچ اذا صارلچ شي شراح يكون حالها

اني فقدت امي واعرف كلش زين اليفقد امه شلون يعيش عمره بالذل ويصير لعبة بيد اليسوه والميسوه

نهى.. ليش تحچين هيچ .. والله مراح يصيرلي شي اني متأكده من هل شي

مياس.. تضحكين على نفسچ !! ما سمعتي الدكتوره شگالت ؟؟

نهى.. حچي .. يظل كل هذا حچي
كلشي بيد رب العالمين محد يعلم الغيب غيره

مياس.. اخ يا نهى اخ

نهى.. لزمت ايدي : عمري انتي
والله ادري بيچ خايفه عليه بس فدوه هدي نفسچ حتى لتخربين الدنيا
شهم ميتحمل اذا سمع هالحچي .. اترجاچ لتأذي وتأذيني ويا

مياس.. ماشي نهى ماشي .. مراح احچي بس اسكتي عني لان راسي راح ينفجر

نهى.. سلامتچ حبي
يلا خلي نطلع تأخرنه عليه وبعد ما اوصيچ

هزيتلها براسي وطلعنه .. شفته گاعد بالسياره يتصفح بموبايله ما انتبه علينه إلا من وصلنه يمه

وديت نهى للدكتوره وظليت اكل بنفسي من القلق ما عرفت شلون مر الوقت لحد ما شفتها گدامي

نهى.. ها گلبي خو ما تأخرنه عليك

شهم.. فدوه الكم حياتي
بشري شگالتلچ الدكتوره

نهى.. دتحرك بالطريق نسولف

شهم.. هاي تحركت .. يلا سولفي ترى انتظرتكم على اعصابي

نهى.. كلشي ماكو والله
الوضع كله تمام .. واخيرا اقتنعت بهاي الدكتوره وبعد ما اغيرها راح استقر يمها

عاينت المياس بالمرايه وجهه ميبشر بخير .. رفعت راسها انتبهتلي اعاين ابتسمتلي گبل شكيت بالموضوع

شهم.. صاير شي احچولي ؟!!

نهى.. شو ما سألتني على البيبي ولد بنيه

شهم.. ليش گدرتي تعرفين ؟

نهى.. طبعا

شهم.. وشطلع

نهى.. بنوته

شهم.. ابتسمت : صدقه للبنوته وامها

نهى.. ولأبوها هم

مياس.. يحچون بيناتهم بس اني مو وياهم بالي كله يم كلام الدكتوره : يارب كون تگوم بالسلامه لرجلها وبتها والي هم لأن ما عندي غيرها بهل دنيا

وصلنه للبيت راحت نهى تبشرهم واني طبيت بوجهي للغرفه مالي خلگ لأي شي من القهر .. هستوني ساده الباب اندگت فتحتها وتفاجأت بشهم

شهم.. اگدر احچي وياچ

مياس.. اي اسمعك

دفعني ليجوه وسد الباب ع السريع .. انصدمت من الشي السوى ظليت صافنه بوجها مستغربه حركته

شهم.. مياس احچيلي شگالت الدكتوره

مياس.. مو سولفتلك نهى

شهم.. لا اكو شي ما اعرفه وانتي وياها دتخفوا عليه

مياس.. صدگ ماكو شي غير السمعته منها

شهم.. بروح امچ

مياس.. اي

اندگت الباب نهى تصيح مياس .. تخبلت اذا طبت وشافت شهم يمي شراح يصير
جريته من ايده ع السريع للزاويه اليم الكنتور

شهم.. هاي شدتسوين ؟!!

مياس.. اششش اسكت الله يخليك لتسمعك

ركضت فتحت الباب صفنت بوجهي لأن تأخرت .. ابتسمتلها حتى اضيع الموضوع عليها

مياس.. اسفه حبي چنت ابدل

نهى.. ههههه لعد شو ما مبدله

مياس.. مو انتي دگيتي الباب ما لحگت بعد

نهى.. اگول شهم سألچ شي

مياس.. سكتتها بسرعه : لا ما سأل ولا حتى شفته
حياتي والله تعبانه اجلي اي حچي البعدين

نهى.. اوك گلبي على راحتچ

راحت .. طبگت الباب وايدي على گلبي
عاينت الشهم واگف بالزاويه يضحك استفزني بضحكته كلش

مياس.. من كل عقلك تضحك

شهم.. هههه مو تذكرت شي

مياس.. وشنو هو ؟؟

شهم.. هاي الحركه لحد الأن تكررت مرتين .. وبالمرتين چانت ناتجه عن غباء مو طبيعي

مياس.. هاي فوگاها !!!
انت متخيل لو شافتنه سوه بالغرفه والباب مسدوده شراح يصير

شهم.. كلشي ميصير وداعتچ
تدرين ليش ؟؟

مياس.. ليش ؟!!

شهم.. لأن تدري كلش زين انتي وياها دتطمطمون سالفه چبيره ومتوقعه اجي واسألچ لذالك دگت الباب حتى تحچي وياچ بس انتي سكتيها حتى لا اسمع

مياس.. انت شلون تفسر المواضيع !!!

شهم.. گولي چذب

مياس.. اي والله چذب

شهم.. الله شالچ يا چذابه

مياس.. صفنت بوجها : ياااا

شهم.. ووجعا
وخري عني اني راح اعرف شضامات عليه وساعتها اعلمچن شلون تچذبن عينك عينك

دفعني وطلع من الغرفه .. ظليت مصدومه من الموقف بالخمس دقايق تقريباً

حسيت على منال دخلت لغرفتي وهم سألتني على نفس الموضوع وحچيتلها نفس الحچي بس لأن نهى متريد احد يعرف

طلعت من يم مياس رحت لصديقي گبل حتى اشوف مرته شتگول على وضع نهى بما انو هن مصرات ميحچن الحقيقه

وصلت لبيته .. خابرته والتقيت بمرته بس تفاجأت من گالتلي نفس كلام نهى كلشي تمام وماكو اي شي يدعوا للخوف

اطمأنيت نوعا ما وگدرت ارتاح شويه واشيل الافكار المو زينه من بالي

قابلت يوسف .. رحنه للجم وظليت ويا للعشره
رجعت للبيت كلهم مجتمعين بالصاله ونهى دتشرح لمياس

شهم.. السلام عليكم

الكل.. وعليكم السلام

نهى.. شو تأخرت حياتي

شهم.. چنت ويا يوسف
انطيني عنچ اني اشرحلها .. ارتاحي انتي

مياس.. لا خلصنه خليها على باچر انت هم تعبان

شهم.. ههههه فدوه الچ كل التعب بابا

گعد يشرحلي وعادلي كل الماده حتى الشرحتها الي نهى .. فجأه طلع جهاد من غرفته يصيحني بصوت عالي

جهاد.. مياااااااااس

مياس.. صفنت علي : خير

جهاد.. الف مبروك نجحتي

گمزت من مكاني ممصدگه السمعته .. عاينت الهم يضحكون بوجهي ركضت نهى حضنتني حيل

نهى.. الف مبروك حياتي

مياس.. شنو يعني ؟ هسه اني نجحت يعني

نهى.. هههه اي ولچ اي

شهم.. هههه ممصدگه البنيه
هي هيچ يا جهاد صدمتها بخبالك

جهاد.. مو احسن ما انصب عليها

شهم.. لا والله سويتلها فضل
درت وجهي عليها : الف مبروك بابا چنت متأكد من نجاحچ ادري بيچ سباعيه وگدها

ظلوا كل شويه يباركولي فراحنين اكثر مني .. گامت منال جابت عصير وكيك وسووها حفله من صدگ والديجي على جهاد وما اسولفلكم ع المسبات الحصلها من الحجيه ههههه

مرت الايام واجت امتحانات اخير السنه .. صادفت نهى بشهرها وتعبانه كلش لذالك ما خليتها تشرحلي ابد واعتمدت على جهاد وشهم حسب اوقات فراغهم يشرحولي بالتناوب

خلصت الامتحانات وچان موعد عملية نهى بعد اسبوع من امتحاناتي

عشت بقلق مو طبيعي بهاي الايام واني ادعيلها بكل فرض كون تعدي العمليه بالسلامه وترجع تنور حياتنا بضحكتها الحلوه وگلبها الطيب

ليلة عمليتها چنت گاعده بالغرفه اتصفح بالجهاز دگت الباب وطبت عليه

نهى.. خو ما عندچ شي

مياس.. لا حبي تعالي تفضلي

گعدت گدامي تعاينلي بنظرات حزينه .. عرفتها خايفه من باچر
لزمت ايدها احاول اطمنها

مياس.. نهاوي لتخافين
هسه تگومين بالسلامه وتشيلين بنوتچ بين ايديچ وتفرحين بيها انتي وشهم

نهى.. مياس اني مخنوگه كلش
ما اعرف ليش احس هاي اخير ليله اعيشها بيناتكم

مياس.. الله عليچ لتحچين هالشكل

نهى.. اريدچ تسمعيني عفيه

مياس.. گولي حبي

نهى.. اذا صارلي شي بنتي امانه يمچ

مياس.. نزلت دموعي : كافي نهى
اترجاچ كافي

نهى.. خل اكمل بروح امچ

نزلت راسي اسمع الها ودموعي تجري من كلامها

نهى.. اذا صارلي شي بنتي امانه يمچ
ادري بيچ طيبه وماكو بالدنيا گلب يشبه گلبچ الصافي لذالك اعرف كلش زين راح تكونين گد هلأمانه

الله يخليچ لتخليها تعيش نفس المأسات العشتيها انتي بعد وفاة امچ الله يرحمها

ربيها واعتبريها تعويض عن طفلچ الراح حتى تصير مثل بنتچ

وبعد اريد اوصيچ على شهم .. ادري بي راح يتعب بعد وفاتي لذالك اتمنى منچ متخلي وحده

تقربي منه وتممي زواجچ ويا .. عوضي عن الايام الصعبه العاشها ويايه والايام الاصعب الراح يعيشها بدوني

مياس.. رفعت راسي صافنه بوجهه ودموعي تجري بخنگه : شدتحچين نهى !!!

نهى.. هاي وصيتي الچ مياس ومثل ما نفذتي وصية مهيب رغم كل المشاكل الواجهتيها اتمنى تنفذين وصيتي اني هم .. حتى اروح وگلبي مطمأن على شهم وبنتي

بس ها من هسه اگلچ هذا الحچي اذا متت
اما اذا الله كتبلي عمر وعشت ديري بالچ تشاركيني برجلي اذبحچ والله كلشي ولا شهم ههههه

مياس.. گمزت من مكاني حضنتها وشبعت بچي : الله ليگولها نهى
اموت من دونچ والله اموت

نهى.. اسم الله عليچ حياتي
عمرچ اطول من عمري ان شاء الله

مياس.. لا عمرچ اطول لان ما اتحمل افقدچ مو كافي عليه مهيب الراح وخله غصه بگلبي بس الله يعلم بيها
هالدور انتي تردين تذبحيني

نهى.. باستني وگامت : تصبحين على خير يا وجه الخير

مياس.. مسحت دموعي : شيلي هلافكار من بالچ .. انتي قويه وراح تگوميلنه بالسلامه لان منگدر نعيش بدونچ

نهى.. ان شاء الله حبي

بس طلعت شمرت روحي ع المخده وشبعت بچي .. بيومها للصبح ما گدرت انام من التفكير لحد ما صار وقت روحتنه للمستشفى

چنت گاعد اگلب بالتلفزيون بس بالي مو يمه لان خايف على نهى وباچر ولادتها

ما ادري وين راحت شويه وفتحت الباب مبتسمه بوجهي

شهم.. ها عمري وين چنتي

نهى.. يم مياس

شهم.. تعالي لحضني

نهى.. الله اكثر مكان ارتاح بي هو حضنك

شهم.. مكانچ هذا طول العمر حياتي

نهى.. شهم

شهم.. گولي كبد

نهى.. اريد اوصيك

شهم.. گمت من مكاني ع السريع : شنو هالحچي نهى

نهى.. هاي شبيك غير باچر عمليتي
اي انسان يدخل للعمليات يتوقع كلشي يعني هذا شي طبيعي

شهم.. سدي الموضوع الله يخليچ

نهى.. عفيه اسمعني

شهم.. شناويه نهى ؟؟؟ تردين تموتيني !!

نهى.. اسم الله عليك
بس اني اريد اگلك البگلبي حتى ارتاح

شهم.. ترتاحين واني اتعذب

نهى.. بروح مهيب اسمعني

شهم.. لا اله إلا الله
احچي يابه

نهى.. اذا صارلي شي .. بس اسمع الله يخليك لتقاطعني
اذا صارلي شي دير بالك على بتنه وها شرط تسميها على اسمي حتى تظل تذكرني طول العمر

ولتخلي احد يربيها غير مياس لان ادري كلش زين ماكو احد بالدنيا ممكن يكون حنين عليها اكثر من مياس

وانت هم لتضوج عيش حياتك الما گدرت تعيشها ويايه ... بس اذا ترديني ارتاح فلتتزوج غير مياس على الاقل انام واني مرتاحه عندك زوجه وام لبنتي تسوه الف مره بالكون بحنيتها وطيبتها

اي شهم تزوجها لان تستاهلك وانت بعد تستاهلها .. خلفوا اخوان لبنتي حتى لتظل وحيده وتستند عليهم من تكبر

شهم.. خلصتي ؟؟

نهى.. اي

شهم.. يلا دنامي .. الله يشافيچ ان شاء الله

نهى.. ههههه اليوم اريد انام بحضنك للصبح ولو راح اتعبك

شهم.. نامي بي لطول العمر .. مستحيل اتعب منچ يولي

نهى.. حياتي شگد احبك

نومتها على حضني امسد على شعرها وبالي يم كلامها ... حيل خفت وتألمت بنفس الوقت بحيث ما گدرت انام للصبح

گمت صليت الفجر وظليت ادعيلها واقره قرأن بلكت الله يعاين الحالي وميلچمني بيها من بعد اخويه الغالي

صارت السبعه گعدت نهى من النوم .. بس فتحت عيونها ابتسمت بوجهي

نهى.. صباح الخير

شهم.. صباح الحب حياتي
يلا گومي هم ياالله تأخر الوقت

غيرت ملابسي ونزلت گلت المياس تصعد تساعدها .. شويه ونزلوا سوه

طلعنه للمستشفى وحجزتلها بالخاص .. بعد ما وصلنه بعشر دقايق اجوا اهلها

اخذوها يجهزوها للعمليات اجتني الدكتوره قدمتلي ورقه

شهم.. شنو هاي ؟؟

الدكتوره.. تعهد اخلاء مسؤوليتنه من اي شي يصير اثناء العمليه

شهم.. بس انتي قبل كم شهر گلتيلي كلشي تمام وماكو شي يخوف

الدكتوره.. اي ماكو شي يخوف
بس انت تعرف بحالة مرتك لذالك الاحتياط واجب

شهم.. دفرت الورقه من ايدها : ما اوقع

يوسف.. خويه ميصير هيچ

شهم.. يوسف انت مدتسمع الكلام ؟!!

يوسف.. اسمع بس حقهم لان وضع نهى حرج وهذا الاجراء مطلوب حتى يطمأنون بشغلهم

شهم.. شنو يعني ؟؟ تريدني اوقع على موتهااااااااااا

يوسف.. هسه انت ليش متفاول عليها .. گول يا الله وان شاء الله تگوملك بالسلامه هي وبنتك

شهم.. اسكت الخاطر ربك اسكت

يوسف.. شال الورقه من الگاع : وقع خويي وقع

شهم.. يوسف

يوسف.. وقع يبعد اخوك وخليك واثق ميصير إلا الكاتبه ربك

انطاني القلم اريد الزمه ما اگدر ايدي ترجف اخير شي لزم ايدي وخلاني اوقع بالگوه

مرت ساعات صعبه واني انتظر روحي ترجعلي لان راحت ويا نهى

اعاين عليهم كلهم بقلق مثل حالتي واكثر

امها تسبح بلاستغفار ودموعها تجري
خواتها وحده لازمه الثانيه ويبچن
يوسف واگف بالزاويه ومنطينه ظهره
مياس تروح وتجي بقلق وعيونها حمر دم
منال گاعده يم امي تصبر بيها

صافن عليهم وبداخلي صراع من الخوف والقلق فجأه انفتحت الباب وطلعت الدكتوره...

يتبع..

ملاحضه/ حبايب مثل ما گلتلكم عملية والدتي الخميس القادم
لذالك...
يأما تعذروني وتقدرون وضعي
يأما اختم القصه البارت الجاي واسويها جزئين
وانتو بكيفكم بعد لان اذا استمريت بهل حاله راح اظلم القصه كلش