رواية مياس قلب الشهم الفصل الخامس والخمسون 55 - بقلم لبنى الموسوي

#مياس_قلب_الشهم

للكاتبه #لبنى_الموسوي

سلاماً على الذين إذا عاهدوا لم يغدروا
لأنهم يعرفون أنّ "العهد كان مسؤولاً"
وإذا أعطوا ميثاقاً لم ينقضوا
لأنهم يعرفون أنه "ميثاقاً غليظاً"
وإذا أخذوا قلباً لم يعبثوا به
لأنهم يعرفون أن الله أمر أن نؤدي
الأمانات إلى أهلها
سلاماً على أصحاب
القلب الواحد
والوجه الواحد
والموقف الواحد

صافنة على بطني واحرك ايدي فوگاها بهدوء
حملي چان كلش متعب ما مرت الأيام علية بسهولة

من بدايتة لحد شهر التاسع التنسى مستمرة
هاي من غير فقر الدم والهبوط الظل ملازمني طول فترة الحمل

بس هانت
كلها اسبوع ويشرف استاذ مهيب
وساعتها راح يهون كل هالتعب مجرد ما تصير عيني بعيونة واضمة الحضني والگلبي المتلهف علي

بعدني العب اطراف اصابيعي على بطني تحرك
ضحكت بصوت عالي واخيراً سلمت على ماما مو من الصبح منتظرتك وماكو

دخل شهم للغرفة بـ هالأثناء
لزمت بحافة الچرباية وگمت بالگوة
چان واگف گبالي ويباوعلي بابتسامة باوعت الروحي بالمرايا شكو بية شي ليش دتضحك

- هههههه
لا انتِ ليش دتضحكين

- هااا
مو چنت اسلم على ابنك

- وابو شنو متسلمين علي
حچاها واجه حضني من بطني باوعتلة مبتسمة

- الله يساعدك حبيبي

- ويساعدچ حياتي
بشري شلون صار ضغطچ كملتي الكرزات الجبتهن الچ الضهر

- اي
وتبارك قبل ساعة قاستليا
الحمد لله صاعد شوية يعني احسن من الصبح

- الحمد لله
مياس لتهملين روحچ اترجاچ
خلي هالاسبوع يعدي على خير لأن ما ظل شي وتگومين بالسلامة ان شاء الله

- هاي شبيك شهم
لتخاف ترى وضعي طبيعي والحمد لله
واذا ع الهبوط وفقر الدم فـ هذا شي وارد لأن اغلب الحوامل يعانن من عندة

باوعلي وسكت
ادري كلش زين الخوف مسيطر علي
لأن من بعد موت نهى الله يرحمها صارت عندة عقدة من الحمل والولادة

بس شبيدي علي
شگد ما گاعد احاول ويا ميفيد
هالشي بالنسبة اله صار مثل الحالة النفسية وهو مريض بيها

حاولت اغير الموضوع حتى ليظل يفكر بي
سألتة متعشي گال اي اكلت ببيت خالتي ام يوسف

نزلت للمطبخ
سويت عصير برتقال وصعدت
چان ديغسل بالحمام شربت قبلة دقيقة تقريباً وطلع

ابتسمت بوجها وشلت الگلاص قدمتة اله
- يلا حبيبي هاك اشرب حتى تريح اعصابك شوية

- انتِ الي لازم تشربين مو اني

- شربت والله
حتى شوف هذا الگلاص ع الميز

سحب الگلاص مني وباس ايدي
توة ديشرب دگ جهازة راد يجاوب ما خليتة اشرب العصير وبعدين رد

- دخليني اشوف خاف صاير شي بـ هالليل

- حتى لو صاير
ممنوع تجاوب قبل متخلص عصيرك

بس حچيتها شربه على مرة وحدة
- هاچ يلا باوعي خلص وهسه خليني اروح اشوف منو الديتصل

وخرت من طريقة مبتسمة
طلع جهازة من جيبة وباوع بـ استغراب
تقربت منة شفت اسم ابوية خفت كلش شصاير حتى يتصل بـ 12 بلليل

- شهم شكو

- ان شاء الله خير بس اصبري

حچاها وانطا اتصال لأن فصل الخط
ظليت اباوعلة بقلق لحد ما جاوب سمعت صوت ابوية من رد بس الصوت مچان واضح

- ها ابو مصطفى
وعليكم السلام الحمد لله اسأل عنك

اي بالبيت
شنووو شوكت صار هالحچي
لا حول ولا قوة إلا بالله العلي العظيم الله يرحمها ويغفر ذنبها

هسه شنو المطلوب مني ؟؟
اي صار تتدلل عشر دقايق واصير يمك بين ما اغير ملابسي

بس سد الخط باوعتلة بخوف
- منو هاي الـ الله يرحمها شهم اااااحچي ؟!!

- مياس شبيچ اهدي

- سميحة مووو !!!

- الله يرحمها ويغفر ذنبها

هو حچاها لو اني مدري شصارلي
گعدت ع الچرباية وصرت اناشغ من البچي اريد اجر النفس الصدري بعد ما اگدر

ما ادري هذا شنو يتسمى
غباء لو طيبة زايدة المهم بالنهاية اني ضجت عليها وكأنها وحدة مني وبية

يمكن لأن اني بت حلال
وغزرت بية عشرتها حتى لو چانت هالعشرة مرة
خصوصاً بعد ما شفت بعيني شصار بيها بالفترة الاخيرة بسبب مرضها

ويمكن لأن اذتني هواي
وادري ماكو بعد شي يشفعلها يم رب العالمين غير دموعي ودعائي الها

ويمكن ضجت علمود اخواني
لأن بالنهاية اني جربت قبلهم شعور اليُتم
لمن فقدت امي بأول عمري وصفيت ذليلة بـ ايد مرت الأب المتحمل بگلبها ذرة رحمة ولا انسانية

لحظات مرت علية بمشاعر ممفهومة
بين الرفض والقبول احتار عقلي لحد ما حسيت على شهم گعد يم رجلي واخذ ايدي بـ ايدة

- مياس صدگ تحچين ؟!!
بعد كل شي سوتة وياچ وبعد الظلم والاذية العيشتچ بيها عمر كامل جاية هسه تبچين عليها

- خطية شهم راح تتعذب هواي بسببي

- هذا عدل ربچ
لعد المن خلق الجنة والنار غير جزاء للبشر كلمن حسب افعالة

- ميخالف اني مسامحتها
صح اذتني هواي بس تظل مرت ابوية الفتحت عيني عليها والأهم من كل هذا تظل ام اخواني

- والله هذا الشي راجعلچ
تردين تسامحيها تردين لا عندچ عقل وخلي هو اليسيرچ اتركي گلبچ على صفحة

- الله يسامحها ويغفر الها

- يلا اني لازم اروح لأن ابوچ دينتظرني

حچاها وسحب قميصة لبسة سريع
باوعتلة ومسحت دموعي خليني اجي وياك عفيه خو ما يظلون اخواني وحدهم

- لا وين تجين بهذا وضعچ اگعدي يمعودة

- لعد شلون شهم !!!

- اني عود من طريقي اجيبهم الچ

من گال هيچ سكتت
بدل ونزل رحت ورى ظليت افتر بالصالة فوگ النص ساعة سمعت الباب انفتح

ركضت سريع شفتة طب هو واخواني
طلعت اخذتهم منه سمعتة قفل الباب وراح صعدت وياهم الغرفتي

بس طبينا صاروا يبچون
ظليت حايرة شلون اسكتهم معقولة عرفوا امهم ماتت والـ هالسبب مديسكتون ؟!!

سحبتهم للچرباية گعدتهم ونزلت المستواهم
مسحت دموع ميادة وباوعت المصطفى شبيك حبيبي ليش دتبچي

- صدگ امي ماتت ؟!!

- منو گلك هالحچي

- بابا

نزلت راسي ادردم ويا نفسي
صدگ تحچي بابا هو هيچ يبلغون الجهال بموت امهم ما خفت عليهم ليدخلون بحالة صدمة 

- مياس احچي صدگ امي ماتت

- حبيبي اسمعني زين
بس اوگف خلي اگعد يمكم بطني گامت توجعني

- خاف راح تجيبين

- لا لتخاف بعد وكت

گمت گعدت بنص الچرباية وگعدتهم گبالي
لازمة ايدهم بـ ايدي احاول امنع دموعي تنزل حتى انطيهم قوة مني علمود يقتنعون بالكلام الراح احچي وياهم ويبطلون بچي

- شوف صفاوي وانتِ هم ميود
احنه رب العالمين خلقنا بالدنيا خطار يعني لازم يجي يوم ونغادرها محد يظل عايش لا اني ولا انتم ولا بابا ولا ماما

- ليش؟!!

- هسه اني اگولك ليش
يعني انتم بالبيت من يجي خطار الكم شگد يبقون

- شوية ويرحون

- زين هم شفت خطار اجة وبعد ما راح

- لا

- وهذا حال الدنيا
ماكو خطار يبقى والكل راح يروح اذا مو اليوم باچر

- يعني اني هم راح اروح

- اسم الله عليك حبيبي
الله يطول بعمرك وافرح بشوفتك من احسن الناس واتباهى بيك گدام العالم

يعني اني قصدت
الأنسان من يكبر ويتمرض شلون ماما يروح حتى يرتاح من العذاب والمرض

- زين هي وين راحت

- المكان حلو كلش
كله ورد وفراشات واكل طيب والعاب مثل الاماكن التشوفوها بأفلام الكارتون

ميادة چانت بس تسمع وتبچي
من حچيت هيچ ابتسمت ومسحت دموعها بضحكة

- الله مياس
لعد اني هم اريد اروح وياها لأن احب الاكل والالعاب وتدرين بيه ماعندي

- اسم الله ولچ
اني اشتريلچ اطيب الاكل واحلى الالعاب بس لتحچين هيچ مرة ثانية

اقناع مصطفى مچان بالشي الصعب لأن چبير ويفتهم اما ميادة اخذت مني جهد ووقت يلا سكتت ونزلتهم للغرفة الجوة ناموا لأن صار الفجر

قريب الـ 3 چنت متمددة افكر طب شهم
گمتله ع السريع ها شصار شو تأخرت كلش ؟!!

- اخوانچ وين ؟؟

- ناموا بالغرفة الجوة

- خو ما شلعوا گلبچ

- يعني بعد تدري اطفال وامهم ميته مو شي سهل

- الحمد لله عاد مچانوا عايشين وياها

- هسه ما گتلي شصار وياكم

- ماكو ظلت بالمستشفى
يشرحوها ونستلم الجثة الصبح حتى ندفنها

- الله يرحمها

- ويرحم الجميع

حچاها وراح للحمام
اخذتله ملابسة سبح وگبل نام من التعب
اما اني للصبح ما گدرت انام يا دوب شكلت عيني اقل الساعتين وگعدت على صوت نونه

لگيت شهم طالع
غسلت ونزلت جوة سولفت المنال بلي صار
عاد همزين هي اهتمت باخواني لأن احس حيلي انهد هم من القهر وهم لأن ماكو نوم

للضهر رجعوا من الدفنة
الفاتحة صارت ببيت اهلها ردت اروح ما قبل شهم لأن حامل وتعبانة گال اهلي يرحون بمكانچ

توسلت بمنال حتى تقنعة
حاولت ويا هواي وين يلا اقتنع خليت اخواني يم تبارك ورحت ويا منال والحجية لبيت اهل سميحة

ظلوا اخواني يمي لحد ما خلصت الفاتحة
وراها بيومين چنت نايمة الفجر حسيت على اوجاع ببطني بس اوجاع بسيطة

صح خفت بس ما گعدت شهم
ظلت كلما تشكل عيني يجي وجع قوي يصحيني ثواني ويروح ومن ارجع انام يرجع يصحيني وهكذا للصبح

ما گدرت بيومها انام زين
گمت صليت الفجر وگعدت شهم صلى ورجع نام للسبعة دگ المنبه بجهازة گعد شافني ارتب بملابس مهيب باوعلي مستغرب

- شمگعدچ من الصبح ؟!!

- ما اجاني نوم ورى الصلاة
فـ گعدت الهي روحي بـ أي شي يصير گدامي

كف الغطا وگام
- شبيچ مياس شو وجهچ اصفر تحسين بشي ؟!!

- اگولك بس مو تخبصني ترى هو شي عادي...

- احچي بلا هالمقدمات

- گاعد احس بوجع بسيط يمكن تشاليع الولادة

- وليش سااااكته صدگ تحچين ؟!! 

- شهم اهدا وخليني افهمك
هاي تشاليع يعني تمهيد للولادة مو الولادة نفسها

فـ لازم اتحملها بين ما تبدي الطلوگة
عود وراها اراجع المستشفى واظل هناك لحد ما الله يسهلي واجيب

- تعالي وياية بسرعة

حچاها وسحبني من ايدي
نزلنة جوة ع السريع چانت منال توها گاعدة بس شافتنة گالت خير من الصباحيات

- مياس تگول عدها اوجاع

- يا صلوات صلوات يعني راح تجيب
اصلاً حتى مبين لأن بطنها كلش نازلة عن البارحة

- شو انتِ فرحانة غير داگولچ البنية متوجعة

- ههههه
خوية شبيك شنو تريد ابنك يبقى ببطنها طول العمر

- لا طبعاً بس سوي شي
يعني اتصلي على دكتورتها لو جهزيها حتى اخذكم للمستشفى خو ما تظل هيچ

- شهم ترى هاي مجرد تشاليع
يعني لو جايتها الطلوگة متظل گاعدة گبالك بهالبرود هذا لذالك هدي روحك شوية

بعدين انت من شنو مخبوص وخايف
مو هاي تبارك جابت قبلها بشهرين والحمد لله حتى ما حسينا شوكت طلگت وشلون جابت

لو بس نسوانك
من يحبلن لحد ميجيبن احنه نوگف على تك رجل من وراك

- منال مو وكت شقاچ

- روح خوية روح
غسل وصحصح زين وارجع لهنا
حتى اسويلك ريوگ وگلاص چاي يعدل راسك وعوف الباقي عليه

لتباوع هيچ
مرتك يمي اني شوكت ما اشوفها تحتاج المستشفى راح اگولك تاخذنا لتفكر بشي واني موجودة

- شهم اسمع كلام منال
ترى والله ما بيه شي حتى الألم بسيط هي تشاليع لعد من اطلگ شراح تسوي

باوع عليه وسكت
دفعته منال يلا حس على روحة وتحرك
ظليت گاعدة بالصالة وكل شوية منال جايبتلي شي وتعالي اشربي

قريب العشرة گعدت تبارك
بتها بـ ايدها حطتها بحضني وگالت دخيلچ بقيها يمچ راح ابچي والله الليل كله ما خلتني انام

- ولچ البنية دتجيب وكتچ هسه

- ياااا عمة صدگ يعني بدت عدها الطلوگة

- اي ان شاء الله لليل هي جايبة

دارت وجها عليه رادت تاخذ بتها ما قبلت
- عوفيها بحضني وروحي تريگي اني هم مشتاقتلها

- لا يمعودة جيبيها وينچ وين الجهال هسه

- ما انطيها ولي من وجهي

شلتها وگمت الغرفة نونه
فتحت الباب بعدها نايمة ظليت امرر ايدي على وجها لحد ما فتحت عيونها

- صباح الخير بنوتي الحلوة

- صباح الخير ماما
حچتها بتكسير بعدة كلامها ما مضبوط

بس شافت مريم بحضني
گمزت من مكانها بضحكة حطت ايدها على خدها وباست راسها حيل

- تحبيها

- اي احبها هواي

- واخوچ تحبي

- اي احبه شوكت اشوفة ماما

- ادعيلي بلكت اليوم اگوم بالسلامة ونشوفة اني وياچ

صفنت بوجهي متعرف شتگول
ابتسمت واخذت ايدها رفعتها ليفوگ وظليت القنها بالدعاء لحد ما طبت تبارك علينه

اخذت مريم ونونه وياها حتى تريگهم
واني طلعت للصالة ما خلتني منال اگعد ظليت افتر عود حتى تسهل ولادتي واجيب بسرعة

بدت الاوجاع تزيد شي ورى شي
عزلتني منال بالاستقبال وما قبلت شهم يجي يمي لان تدري بي راح يتوتر ويوترني ويا

للعصر صارت الألام متنحمل
من تجيني احس بروحي تريد تطلع صح ما صيحت بس الوجع چان ياكل بگلبي اكل

رفعت عيوني ع الساعة بالخمسة
تمشيت بالگوة لحد ما وصلت للباب فتحتها وطلعت صار شهم گدامي گاعد بالصالة

بس شافني گام ع السريع
اول ما وصل يمي اجتني الأوجاع قرفصت على نفسي يم الباب لزم ايدي وگعد بصفي

- شبيچ حياتي الألم زاد عندچ ؟!!

- اااي كلششش
عفية صيح منال خلي تاخذني للمستشفى بعد ما اتحمل

- اي هسه بس گومي من الگاع باردة عليچ

- ماااا اگدررر
والله ما اگدر احس بنفسي راح اموووت

- اسم الله ليش تحچين هيچ

باوعلي ومسح دموعي بـ اطراف اصابيعة
شالني بحضنة وصلني للصالة شافتة الحجية صاحت شكو شايلها يمعزة

رد بنترة يمة مو وكتچ ااابد
گعدني ع التخم وراح يصيح المنال مدري شدتسوي بغرفتها

ظلت تبارك تفرك ظهري بهدوء
نونه گبالي تباوعلي ابچي وتبچي وياية ع الواهس
مدري ليش اجاني احساس بعد مااشوفها وراح ترجع تتيتم للمرة الثانية

سحبتها الصدري حضنتها حيل
خايفة كلش منا شهم يتدمر لو صارلي شي
ومنا اطفالي نونه ومهيب ما اريدهم يعيشون العشتة اني قبلهم

بعدها بحضني ودموعي تجري بحرگة
طلع شهم ويا منال شافني ابچي سحبها من ايدي انطاها التبارك وگومني من مكاني

- مياس لتسوين هيچ
راح تگومين بالسلامة وترجعيلنا
لأن مستحيل رب العالمين يلچمني للمرة الثانية بنفس الوجع

- اي ارجع ان شاء الله

حچيتها واني اناشغ
مسح دموعي بـ اصابيعة وابتعد عني لبستني منال الحجاب چان تطب سمر صاحت بيها امها

- يا ولچ هاي شجابچ

- السيارة جابتني

- اني مداتشاقى سمررر

- واني هم ما اتشاقى يمة السيارة جابتني

- شعندچ اجيتي فهميني

- شنو شعندي !!
مياس دتجيب وتريديني اظل گاعدة بمكاني

- شنو شنووو
يعني حضرتج تردين تجين ويانة للمستشفى ؟!!

- اي غير الي تجيب تحتاج امها واختها وياها
انتِ امها واني اختها فـ وفري الكلام وخلينا نروح بسرعة لأن البنية شكلها دتتأذة

- ولچ وين تجين
بطنچ واصلة الحلگچ شنو تردين تجيبين علينة هناك

- عادي واذا جبت
بالعكس احسن الكم يصير توفير بالبانزين والطاقة

شهم.. انتِ رجلچ يدري بالخبال التردين تسوي

- اي خالو يدري اصلاً هو الجابني

مياس.. اباوعلهم واتلوى من الوجع
ظلوا يحاولون وياها شگد بس محد گدر عليها لحد ما سوت البراسها واجت ويانة

وصلنا للمستشفى
ظل شهم ويا يوسف برة واني ومنال وسمر طبينا للاستشارية

فحصتني الدكتورة گالت بعد هواي
بالقليل يحتاجلها اربع ساعات يلا تجيب
اخذتني منال گعدتني بصف سمر وخلت الغراض يمها

رادت تروح وگفتها وين رايحة ؟!!
جاوبتني طالعة الشهم
گمت بدون ما احچي گالت ها وين رديت اريد اشوفة وياچ

ظلت سمر يم الغراض واحنة طلعنا للولد
لگيت ابوية وجهاد هم جايين سلمت عليهم واخذت شهم على صفحة

- ها بشري

- بعد كلش هواي بالقليل اربع ساعات

- ميخالف حبيبتي تحملي ما ظل شي

- شهم اريد اوصيك

- اهووووو
بدت السوالف التعبانة
اترجاچ مياس بلا هالسيرة ترى گلبي خلصان

- حباب لازم تسمعني

- ما اسمع اسكتي
راح تگوميلي بالسلامة انتِ وابني بغير هالشي مراح ارضى

- باوع اني هسه رايحة للموت
ما ادري راح اگوم بالسلامة لو لا لأن هالشي بيد رب العالمين

بس لازم احچي البگلبي كل شي يصير
اذا الله ما كتبلي عمر اكثر فـ ابني وبنتي امانة عندك لتفرط بيهم لو شما يصير

عادي تزوج وعيش حياتك
بس خلي نونه ومهيب من اولوياتك ماكو شي يتقدم عليهم غير امك فهمت قصدي

- الله يهديچ

- شهم اوعدني
ما اريد اطفالي يعيشون العشتة اني

لأن وحدك تعرف شگد عانيت
وچان ممكن اعاني اكثر لو ما رب العالمين دزك الي ملاك منقذ بهيئة بشر

- مياس دتأذيني تدرين لو لا

- راح ارجعلك ان شاء الله

داحچي لزمني الوجع
اكلته بگلبي لحد ما اختفى گال شبيچ اشرتلة براسي ما بيه ورجعت كملت كلامي

- راح ارجعلك صدگ
بس مع ذالك ما ارتاح اذا ما توعدني شهم

- ليش تحچين وكأنچ متعرفين منو شهم
تتصورين اكو شي بالدنيا اهم منچ ومن اطفالنا بالنسبة الي

مع ذالك مراح اوعدچ
لأن اذا وعدتچ معناها اتقبل فكرة بعدچ عني ولو 1٪ واني مستحيل اتقبلها مياس مستحييييل

بيچ شهم گدر يرجع للحياة
تردين ترحين وتسلبين حياتي مني للمرة الثانية ؟!!!

يلا حبيبتي
گولي يا الله وادخلي ويا منال جوة
كلها كم ساعة واشوفچ گدامي واخذچ انتِ ومهيب الحضني ان شاء الله

- ان شاء الله

حچيتها وتمشيت على كيف
وصلت يم الباب لزمني الوجع كتمت بگلبي لحد ما منال حچت ويا شهم واجت طببتني جوة

سمر.. مرت ساعات صعبة كلش على مياس وعلينه

كلما چانت تتألم اخاف من يمي لأن ولادتي قربت
بس مع ذالك چنت احاول ما ابين الهم خصوصاً بعد ما اصريت اجي واني بهذا الوضع

صار وقت ولادة مياس ودخلوها للصالة
ظلت امي تنتظرها يم الباب بس اني طلعت لصالة الانتظار

ما اتحمل اسمع صياح النسوان
كلما يصيحن تصير اوجاع ببطني عبالك اريد اجيب

بقيت گاعدة بمكاني
شوية اسولف ويا النسوان شوية ادعي واقرالها قرأن لحد ما دگ جهازي

طلعتة من الجنطة خالي ديتصل
هي ما صارلها نص ساعة من طبت للصالة بس هو خايف وحقة لان ذاق هاللوعة من قبل

رديت اجاني صوتة يرجف
- ها خالو مو باردة عليكم ليش متطبون جوة

- بشريني ماكو خبر جديد

- لا بعدها بالصالة
لتخاف مصارلها هواي من طبت

- بس يصير شي اتصلي عليه مو تنسين

- منو يمك ؟؟

- ماكو احد بس ابو مصطفى
رجلچ واخوچ رجعوا للبيت لأن البرد مينحمل هنا

- اي لعد انتو هم تعالوا جوة باردة بالشارع

- لا گاعدين بالسيارة
ما ظل شي ان شاء الله تجيب ونرجع للبيت

- ان شاء الله

سديت الخط ورجعت اقرا قرأن
كلش طولت لا ساعة لا ساعتين وخالو كل شوية متصل اخر شي طب هو وابوها يمي

شوية ودزني اشوف شديصير
لگيت امي واگفة بالباب والوجه اصفر بس شافتني گالت شجابچ لهنا

- شنو السالفة يمة
مو چنها طولت هواي حتى خالي گلبة فاير عليها

- ما ادري شديصير جوة
طلعت الممرضة قبل ساعة گالت بعدها دتجيب وراحت والروحة روحة اصيح اريد محد يجاوبني

دنحچي طلعت الممرضة
لزمت امي بيها تسألها وبالگوة تجاوب من ورى خشمها

بس طلعت الـ 25 من جنطتها
جرت عدل وبدت تحچي مثل الاوادم افتهمنا منها ولادة مياس متعسرة كلش وگالت شوية وتطلع الدكتورة تفهمكم

ربع ساعة واحنه بالباب
لا بيه ابقى وخالي ديلوب برة على خبر من مرته ولا اگدر اعوف امي واروح واني ما اعرف شنو وضع مياس بالضبط

شوية وطلعت الدكتورة
صاحت منو المرافقة ويا مياس اشرف ركضت عليها امي

- اني حبيبة گولي

- ولادتها متعسرة للأسف
الطفل نازل كلش يعني منگدر نحولها ع العمليات بهالحالة

فـ اترجاكم تنتظرون شوية ولتخبصونا
لأن كل شوية طابة الممرضة تگول اهلها ديسألون عليها

- اي ميخالف ننتظر دكتورة
بس عفية خو ماكو خطورة عليها وعلى ابنها

- عليها ان شاء الله لا
صح راح تتعب بس ماكو حالة صحية معينة تهدد حياتها

- والطفل

- اذا طالت الولادة اكثر احتمال نخسرة

- لا عفية لتگوليها

- كل شي بيد ربچ ما عليكم غير الدعاء

حچتها وطبت جوة
اخذتني امي وطلعنا لخالي بعد ما اشوف الطريق من الدموع الترست عيني

حچت ويا بحالة مياس
بس بطريقة تختلف عن طريقة الدكتورة حتى لتخوفة اكثر من الخوف الچان عايش بي بوقتها

ظل بمكانه يلوب
گلها خل يحولوها ع العمليات گلتلة ميصير الطفل نازل كلش الوضع مو مال عملية بعد

ساعات مرت علينه بصعوبة
خالي شبه تخبل حتى لقسم الادارة راح وحچة وياهم

وعلمودة خابروا كذا دكتورة
وخلوها تجي بنص الليل علمود يحاولون ينقذون حياة مياس وابنها من الموت

سبع ساعات وهي بصالة الولادة
للأربعة الفجر واگفين نقرالها قرأن وخالي رايح جاي بالممر انفتحت الباب وطلعت امي تركض

طفر خالي قبلنا
صاح ها خوية گالتلة البشارة اول
طلع محفظته خلاها بيدها هي والبيها من خوفة

- ههههه
شنو خوية جنسيتك ما تريدها

- ام جهاد احچي ترى گلبي وگف

- ألف مبروك خوية گامتلك بالسلامة هي ووليدك

بس حچتها وگع خالي بالگاع وسجد بمكانه
منعرف نضحك لو نبچي ع الموقف بس حمل چبير ونزاح عنه بهاللحظات الصعبة

اخذت امي ملابسها وراحت
اما خالي خابر يوسف علمود يجي ياخذني لأن شافني شلون تعبت طول الليل وخاف عليه لا اروح اجيب وهم معايزين

مياس.. لحظات الولادة
هي اللحظات الي تفصل حياة الأم عن موتها

واللحظات الي عشتها اني بالذات مچانت هينة
بس كل شي صار ورى ظهري مجرد ما سمعت صوت مهيب ترس المكان

نزلتة الدكتورة من ايدها الحضني گبل
باوعت علي ودموعي تجري فرحة على خوف

وجها ازرگ بشكل
بحيث كل شي ممبين من ملامحة
لأن چان ديختنگ سودة عليه طول الساعات الي تعسرت بيها ولادتي

طلعوني ورى ساعة تقريباً
تلگتني منال بالباب گالت ببتسامة الحمد لله على سلامتچ يمة ردت اجاوبها ما گدرت مدري ليش حسي ما طلع

اخذت منال مهيب من حضني
ودوني للغرفة نوموني ع السرير وحطوا الطفل يمي

شوية وگالت حاولي ترضعي
بالي كله يم شهم اريد اسألها علي ماكو معقولة من الهبطة صرت خرسة

اشرتلها على حلگي صفنت علية
رجعت ضربت على حلگي گالت شنو متگدرين تحچين هزيت براسي اي

عافتني وراحت
شوية ورجعت هي والدكتورة
ظلت تحچي وياية حاولت هواي علمود اجاوبها بس صوتي مختفي تماماً

سمعتها گالت المنال
لتخافون كل الموضوع صوتها طبگ من الصياح يوم يومين ويرجع طبيعي

غمضت عيوني براحة
هيچ ولا غير شي ألف الحمد لله والشكر يارب العالمين

للصبح كملوا كل الاجرائات وصار وقت طلعتي
اخذت منال مهيب والغراض واجت الممرضة گعدتني بالعربانة وطلعنا من المستشفى

چانوا شهم وابوية بالباب
اول ما شافوني اجوي بنفس اللحظة ظل شهم واگف انتظر ابوية يسلم وراها اخذني من ايد الممرضة

صعدني بالسيارة وتقرب مني عود يعدلني
همس بصوت ناصي الحمد لله على سلامتچ حياتي
ابتسمت بوجها لأن ما اگدر ارد

وصلنا ابوية وراها رجعنا للبيت
بقيت بغرفتي القديمة وشهم طول اليوم ما عافني حتى بلليل نام يمي مع العلم مهيب لعب بينة جولة ولا لحظة سد حلگة ورغم هالشي منال ما قصرت ويانة

ثاني يوم صوتي بدة يرجع
گمت احس حرگة ببلاعيمي لأن تجرحت من الصياح والحچي كلش يأذيني حتى المي گوة اجرعة

جابلي شهم علاج
ومنال والحجية كل شوية مسوياتلي شي اشربة حتى يرجع صوتي وتروح الحرگة منها

لليل اتصل يوسف
گال سمر اجتها الطلوگة وراح تجيب

منال ظلت تدگ على راسها
گالت ما گدرت تصبر شوية مو رجلي صايرة خيوط من وگفت البارحة

بقت حايرة شلون تعوفني وتروح
بس شهم گال الها كلهم هنا ليظل بالچ يمها واخذها وراحوا للمستشفى

ظلت تبارك يمي
حايرة بيني وبين ابني وبتها اخر شي جهاد اخذ مريم منها حتى يخفف عنها شوية

الحمد لله ولادة سمر چانت سهلة
ساعتين واتصلوا گالوا جابت بالسلامة وشرف زيوني للدنيا

مرت الأيام بصعوبة
چنت داحضر لامتحانات السادس التمهيدية ومهيب طول الليل يخلصها بچي لو ما منال تساعدني بي مچان عرفت شسوي وشلون اقرا وانجح

صارت الامتحانات
والحمد لله يا دوب گدرت انجح بالدفعات ويا وضعي هذا

بس العبرة في الخواتيم
واكيد راح اشد حيلي بالنهاية حتى اطلع معدل يأهلني لكلية التربية اذا الله راد

بشهر الثالث
گاعدة بغرفتي العصر ايد تهز بمهيب والأيد الثانية لازمة بيها الملزمة واقرا تاريخ دگ جهازي

باوعت من بعيد ابوية ديتصل
شمرت كل شي من ايدي وگمت جاوبتة ها بابا شلونك

- هلا بنيتي
انتِ شلونچ اطفالچ رجلچ ان شاء الله بخير

- بخير نسأل عنكم

- تسأل عنكم العافية
اكو خبر مو زين عرفتو قبل ساعة

- خير يا ستار

- ام رضا توفت

- ياااااا
الله يرحمها والله انقهرت عليها كلش

- كلنا على هذا الطريق الحمد لله على كل حال

- اي صح
انا لله وانا اليه راجعون

- بوية ما تگدرين تجين النه حتى تظلين يم اخوانچ يومين

- اي من عيوني بس ابلغ شهم واجيكم

- تسلم عيونچ بنيتي
ع العموم اني انتظر منچ جواب سواء اجيتي او لا

سلمت علي وسديت الخط
ظليت افكر ضايجة منا مقهورة على ام رضا ومنا افكر بأخواني بعد منو الهم ورى ما ماتت هاي المرة

اجة شهم بلغتة وبالگوة قبل اروح الهم
ظليت هناك اربعاء وخميس لليل رجعت لأن الجمعة عطلت ابوية

طبيت سلمت عليهم وصعدت غيرت ملابسي
نزلت چوة چان مهيب بحضن منال تلعب ويا وتناغي وهو مبتسم بوجهها

اخذتلي صفنة عليهم
وديتها منا جبتها منا اي ترهم ليش لا اصلاً ماكو حل يناسب الكل غير هذا

عفتهم وصعدت اركض
طبيت للغرفة لگيت شهم ديبدل قفلت الباب ورحت حضنته من ظهرة باوعلي مبتسم

- ها حياتي مبين مشتاقتلي

- اني بكل لحظة اشتاقلك شنو قابل متعرف هالشي

- واني ويا كل رمشة عين اشتاقلچ
فـ ياريت تسوين حل حتى بعد لتعوفيني وترحين

- امممم تدري الحل عندك وبس

- شلون يعني ؟!!

- ام رضا وماتت الله يرحمها
واخواني ظلوا تايهين بدونها صح هم كبار بس مع ذالك ميصير يبقون وحدهم بالبيت طول اليوم

- اي وبعدين

- واني ما اگدر اروحلهم يوميا
لأن حضرتك كلما اريد اروح لازم اظل ابوس واتوسل يوم كامل يلا تنطق الـ اي وتوديني لاهلي موووو

- اي
هو صح اخوانچ خطية بس والله مو بيدي

اني ما اگدر افارگچ انتِ والجهال بين يوم والثاني
مو كافي عليه شغلي الحارمني منكم الدور حتى باجازتي تخلصيها يم اهلچ

- حچي حلو
زين لو اگولك حل هالموضوع عندك وتگدر بكلمة منك تخلصني وتخلص نفسك من كل هالدوخة ؟!!

- مياس احچي التردي بلا لف ودوران

- شنو رأيك حبيبي لو تزوج اختك منال لأبوية....

يتبع