رواية مياس قلب الشهم الفصل السادس والخمسون 56 - بقلم لبنى الموسوي

#مياس_قلب_الشهم

للكاتبه #لبنى_الموسوي

شهم.. مياس احچي التردي بلا لف ودوران

- شنو رأيك حبيبي لو تزوج اختك منال لأبوية

حچيتها وحطيت ايدي گبال وجهي
تحسباً لأي ضربة تايهة لأن ما اضمن شنو حيكون رد فعلة بعد هالكلام

بالبداية انصدم وظل صافن بوجهي
شوية واستوعب الموضوع نفض ايدة من خصري حيل ودار عني بلا ميجاوب

صرت گبالة بس گلت شهم دفعني
عادي اخذتها بابتسامة حقة مصدوم بس لازم اقنعة بفكرتي

- ممكن تسمعني شوية

- ولا نفس مياس ولا نفسسس

- هسه شبيك ليش صرت عصبي هو اني شحچيت

- لا بوية اصلاً ولا حچيتي شي

- حبيبي حياتي ابو بيتي

حچيتها ورجعت حضنته
باوعلي رافع تك حاجبة كافي وخري من وجهي اريد انزل جوة

- ما ما اوخر

- لا اله إلا الله
ولچ بابا شبيچ تخبلتي

- اي تخبلت واريدك تعقلني شكو بيها

- مياس

- حبيبي اسمعني
من راح احچي وياك اريدك تفكر بأختك قبل الكل

بعدني ممكملة كلامي كفخني براسي حيل
نزل شعري على وجهي بقيت على نفس وضعي ما عدلت روحي

سمعتة صاح
هالموضوع ما اريد اسمعة منچ مرة ثانية مفهوووم

- كملت ؟؟
يلا عدل شعري مو بس شاطر تخربة

- عدلي انتِ

- شهمممم

حچيتها بدلع
باوعلي مبتسم وعدل شعري بالقراصة
اخذتلي صفنة على وجها هذا مستحيل يقتنع وهو بهالحالة شغلي مخچ مياس واعرفي شلون توگعي

جريت ياختة بـ ايدي وقربتة من وجهي
- حبيبي مشتاقتلك تدري لو لا

- مو بگدي

- امممم
لعد شنو رأيك لو نتوكح مادام مهيب يم عمتة

- والله مخبل اصير اذا اگول لا

- ههههههه
الـ لا ميگولها شهم المياس ااااابد

- صح
بس بالشي المعقول طبعاً

- لا حبيبي
بالمعقول والغير معقول هم
لأن انتِ اب عود بنتة ع الدلال ومجبور يتحمل دلالها 

- اگول ليش تتموعين بالحچي

- ههههه
لعد شلون اوگعك حياتي

- ميحتاج
واگع من گاعي الله وكيلچ

حچاها وباسني بلهفة
دللته بيومها دلال مصاير عسى ولعل مزاجة يتعدل ويقبل يسمعني

اخذ ملابسة وراح للحمام
سبح وطبيت ورى سبحت ع السريع وطلعت لگيتة متمدد ع الچرباية يگلب بالتلفزيون

- نعيماً

- والك حياتي
شعجب ما نزلت جوة

- تعبت شوية ما بيه انزل بعد

- عززززة
رجلي صاير شايب من اول گيم يذب اليدة

- ولچ منو هذا الشايب

حچاها وطفر علية
بعدة الخاولي على راسي ذبة بالگاع وسحبني للچرباية

ظليت اضحك وادفع بي
ردت حاولت يمعود والله اتشاقى عدل بدل
عمي مو انت الشايب اني العجوز ولا سمع اخذها حجة حتى يسوي البراسة

ابتعد عني يباوعلي بمكر
- ها ششفتيني شايب لا احچي لتضحكين

- ترى مشهودتلك
قابل اجي احچي بانجازاتك تالي عمري

- لعد لتعيديها بعد حبابة

- اووي چنت اتشاقى
بعدين والله انت حيال ردتها حجه ادري بيك متشبع

بس حچيتها سحبني علي
- ليش العندة مثلچ يگدر يشبع ؟!!
انتِ مثل فاكهة الجنة شگد ما ناكل منها نصيح هل من مزيد

- اممممم
يعني بعدك تحبني

- بس احبچ
اني ميت بحبچ ام نهاوي الوردة

- اروح فدوة لنهاوي وابوها ومهيب وياهم

- ههههه
اسم الله حياتي
يلا اگوم اسبح لو تردين شي بعد...وغمزلي

- عمي شو دروح وچفيني شرك
والله ظهري گام يوجعني ترى مصارلي هواي جايبة

- ها حبيبتي هسه منو العجز اني لو انتِ

- خو انت راح تچلب بهالحچاية
عود ليش الزلم ميتقبلون الواقع ويضوجون من كلمة الحق

- يا واقع هذا ؟!!

- ماكو واحد يظل شباب والكل يجي يوم ويعجز

- يعني ما توبتي ست مياس

تقرب عليه رجعت ليورة اضحك
- هاي شبيك ليش ما خليتني اكمل كلامي

اني ردت اگول
الكل يجي يوم ويعجز بس شهم راح يظل كل عمرة شباب وسيد الشباب هم

- مقبولة منچ
المهم نقذتي روحچ حتى لو بالحيلة

حچاها وگام اخذ ملابسة
باوعت للساعة راح تصير الـ 12 نزلت جوة لگيت منال تنوم بمهيب

تقربت منها ملابسي بـ ايدي
- اسفة تأخرت بس دقايق اسبح واجيچ

- لا يمة عادي
ماعندي شي متونسة ويا ونونه هم نامت من نص ساعة

- اي عاشت ايدچ

حچيتها ورحت للحمام
سبحت ع السريع وطلعت اخذتة منها صعدت چان شهم ديجفف بشعرة اشرتلة طفي ليگعد

نومته بسريرة ومشطت شعري
اجيت يم شهم لگيتة دينام گرصتة من خشمة گوم شعندك نايم من هسه

- مياس والله تعبان

- مو اني مشتاقتلك

- لعد قبل شوية شچنه نسوي

- ليش هو الاشتياق عندك بس بهالسالفة

- لا طبعاً
بس هالسالفة تطفي جزء من الأشتياق والباقي على باچر حياتي

- شهم وكت شقاك

- نامي حبيبتي
شوية بعد ويگعد ابنچ استغلي الفرصة ونامي على نومته ترى وراچ سهرة للصبح

- بس اسمعني

گبل حط ايدة على حلگي سكتني
نومني بصفة ودار ظهري علي حضني حيل وباسني من رگبتي

- تصبحين على خير

- وانت من اهل الخير

غمضت عيني ضايجة
كل شي سويتة حتى احاول اقنعة بي انشمر بالشط وراح ارجع باچر النقطة الصفر من ورى شهم افندي

خلصت الليل سهرانة ويا مهيب
ثاني يوم كملت شغلي وظليت ادرس بس فكري كلة بهذا الموضوع بحيث گوة مركزة بالمادة

الضهر اجة شهم تغدة وصعد ينام
ردت افتح ويا الموضوع بس لا الوقت مو مناسب

بلليل الفرصة تصير احسن
لأن ادري بي راح يطلع روحي يلا يقتنع هاي اذا صارت المعجزة واقتنع اصلاً

الواحد من ينتظر شي الساعة تصير متمشي
احس اليوم صار سنة ومنا لما اجت التسعة گلبي خلص من الانتظار

اجة شهم تعشى وظل گاعد جوة
باوعت علي ملتهي يسولف ويا الحجية هسه هذا شلون اشلعة منا والكل گاعدين

عفتهم يحچون وصعدت الغرفتي
فتحت الباب صافنة افكر شسوي حتى اجيبة لهنا

باوعت للميز چان عندي مزهرية چبيرة بيها ورد
صح اني احبها بس عادي تتعوض المهم يصعد شهم بدون ما اتعب نفسي بالتفكير الزايد

شلتها من الميز ومن كل عقلي اعتذرت
سامحني ترى راح تروحين ضحية الخططي الشريرة

حچيتها ورگعتها بالگاع
الصوت صار كلش عالي لأن الرگعة قوية وهي هم چبيرة نوعاً ما

ماكو ثواني وطب شهم يركض
باوعتلة بخوف دانظفها ما ادري شلون وگعت من ايدي

- فدوة حبيبتي عبالي صار بيچ شي

- لا لتخاف ما بية

راد يطلع صحته وين ؟!!
- نازل جوة ليش تردين شي

- صدگ تحچي شهم
متشوفني لوني مخطوف من الهبطة

- ترى حبيبتي هي مزهرية وانكسرت
مو قاذفة وگعت يم رجلچ لتكبرين الموضوع

- ماشي روح روح

سويت نفسي زعلت
سد الباب واجة يضحك حضني وحط حلگة يم اذني همس بصوت دافي

- ليش احس بيچ مشتاقتلي ودتتحججين علمود تجيبيني يمچ

- حبيبي ذكي ميعبر عليك شي

- خو دزيلي رسالة
حياتي تعال مشتاقتلك احسن من هالخساير السببتيها... واشر ع المزهرية

- فدوة الي والك

- يابة فدوة فدوة مگايل شي

- وهسه
حچيتها وجريته من ياختة

- ههههه
التردي يجرالچ هسه وبعد عشرين سنة

- يا ليش هم بيك حيل بعد عشرين سنة

- اليوم اشعل شيب الخلفوچ بسسسسيطة

- هههههه
لا شهم لاااا والله اتشاااااقى

استاهل اصلاً
لأن ابو المثل يگول لتدوس ع الجني ولتگول بسم الله الرحمن الرحيم

طبيت سبحت قبلة حتى لينزل جوة
طب وراية سبح وطلع بس جفف شعرة اجيت سحبتة للچرباية گعدتة وگعدت گبالة

- هسه ممكن تسمعني

- خير ان شاء الله

- كل الخير والله بس لتتعصب حتى تگدر تفكر صح

- احچي شكو

- على موضوع منال

بس حچيتها نفض نفسه وگام
- هم رجعنا مياس اني شلغيت البارحة

- بس اسمعني الله يخليك اسمع
ليش دتسد الموضوع قبل لا تسمع رأيي وتنطيني رأيك

- رأيي واضح
اصلاً عيب تفتحين هيچ موضوع وياية

- ليش عيب هاااا
اريدك تفهمني وين وجه العيب بالموضوع ؟!!

ما ناقص بعد بس تگول حرام حتى تكمل السالفة
لا شهم الموضوع لا هو عيب ولا حرام ويا تقنعني يا اقنعك اليوم

- مياس لتلحين

- ليش شهم ؟!!
طول عمري اگول عنك شهم گول وفعل
عاقل فاهم مثقف والأهم من كل هذا عادل بس بتصرفك هذا دتمحي الصورة الي رسمتها الك براسي

- انتِ مستوعبة الگاعد تگولي لو لاااا

- لتصيح
مجاية حتى اتعارك وياك ترى التفاهم حلو

فرك وجها وراد يگوم
سحبت ايدة حيل تعال بعدني ممكملة كلامي

- مياس عوفيني

- شهم بداعتي اذا صدگ تحبني خليك گاعد

- انتِ شبيچ بابا ؟!!
من كل عقلچ تردين اوافق بس علمود اخوانچ

- لا شهم لا
شنو علمود اخواني ممقبولة منك والله

اي صح ما انكر
اول شي فكرت بي هو اخواني بس مو حصرت تفكيري بيهم وبس

فكرت بهواي غيرهم
واهم اثنين فكرت بيهم بعد اخواني ابوية واختك

حاچيني بضميرك
منال ششافت من حياتها الراحت ؟!!
شو تزوجت طفلة وصارت ام هي وطفلة وترملت هم هي وطفلة

وفوگ كل هذا
فنت حياتها وشبابها علمود تربي جهاد وسمر خوفاً من اهل رجلها لا تتزوج وياخذوهم منها

وهاي همَ ما شاء الله
كبروا وتزوجوا وشافوا حياتهم
زين ما فكرت انت ولا همَ منو لهاي المسكينة ؟!!

ابوك والله يرحمة
وامك مرة تعبانة ما بيها حيل حتى النفسها
وانت وايهاب الله يساعدكم كل واحد حاير بحياته يا دوب دتلحگون على عوائلكم

زين وهاي شلون ؟!!
منو الها بكبرتها ولتگولي جهاد انت تدري مثل ما الرجال ما يگدر يستند غير على مرتة المرة كذالك متگدر تسند روحها غير على رجلها

واذا الحچي غير هذا
مچان تزوجتني شهم وانت ما رايدني بوقتها
بس علمود تصيرلي سند وظهر احتمي بي من الدنيا وناسها

احچي ويا وهو واگف
گمت من مكاني صرت مقابيلة ولزمت وجها بـ ادية الثنين

باوعتلة مبتسمة
ومررت اصابعي على اطراف حاجبة حتى يسترخي من العصبية

- شهم حياتي
يمكن الحچي الحچيتة والراح احچي يضوجك
بس لو فكرت بعاطفتك ولو شوية راح تعرف شگد اني على حق

منال انسانة
تعرف شنو يعني انسانة لو لا
يعني مثل انت واني عدنة احتياجات فطرية هي هم عدها

هالشي غصباً عنك وعني وعنها
لأن رب العالمين خلق الأنسان بهذا التكوين

لا مو بس هيچ
الله سبحانه وتعالى اسس الحياة بكاملها على اساس العلاقة التصير بين المرأة والرجل

ولو ما هالعلاقة الها قيمة لكل البشر
مچان ربك قدسها وذكرها بكتابة لمن وصف المرأة بروح الرجل (ومن اياته ان خلق لكم من انفسكم ازواجاً لتسكنوا اليها وجعل بينكم مودة ورحمة)

والأهم من كل هذا
اختك جربت الحياة الزوجية وعرفت قيمتها
يعني الحرمان العاشت بي بكل هالسنين الفاتت يعتبر جهاد والله جهاد

دار وجها عني يستغفر
صح بعدة ضايج وعصبي بس حسيته بدا يقتنع بكلامي

تحركت من مكاني ورجعت صرت گبالة
- صدگني محد راح يعوض منال عن القهر الشافته بحياتها غير ابوية

مو لأن هو ابوية
بس انت تعرفة شگد انسان طيب وعلى نيته
هي سمحية الكلها شر من راسها الرجلها گدرت تمشي مثل متريد فما بالك بمنال

اكيد بطيبتها وگلبها الچبير
راح تجبرة يصير مثل المحبس بـ اصبعها

- مياس هالكلام ترى ممقبول
شنو مثل المحبس باصبعها طلي هو خوما طلي

بس حچاها طگيتها بضحكة وصلت للصالة للجوة
باوعلي يهز بـ ايدة الله يشافيچ ان شاء الله بدل ما تدافع عن ابوها گاعدة تضحك علي الفطيرة

- مو بيدي والله
ترى انت حاچيها من قبل بس بغير طريقة لتنكر

- اي مو چان يحرگ اعصابي بتصرفاته ويا سميحة

- غير هي الله يغفر ذنبها چانت تشتغلة

- لا سحر ولا بطيخ
هو من اول صاير خرخاشة بيدها وكملتها ويا باعمالها الشيطانية

- هسه وين رجعتنا انت
المرة ماتت عوفها نايمة بگبرها وخلينا بالأحياء

- شرايدة يمعودة

- صدگ تحچي ؟!!
لعد صارلي ساعة شحچي وياك بشرفك

- ما اقتنعت شسوي

- لا والله اقتنعت
بس گول كبريائي يمنعني انطق الأي بعد ما گلت لا لأن لازم اصر على موقفي حتى لو چان غلط

باوعلي صفح وكشر وجها
- يمة اروح فدوة لليبقى حلو حتى من يعصب

- مياس بطلي عاد
ادري طفل گدامچ شنو هالسوالف التعبانة

- اي طفل ليش لا
همَ مو يگولون الرجال حتى لو يصير عمرة 80 سنة يرجع مثل الطفل بحضن مرتة

يلا وليدي الحلو
گول الماما اي مو شلعت گلبها حتى الله ميرضاها

باوعلي ودار وجها
ندست بطنه بطرف اصبعي رجع باوعلي مبتسم
گبل صحت صلوات ربي مداصدگ هالابتسامة على وجه عبدك الفقير

- ههههههه
لا والله انتِ اليوم فلا صاحية اكيد طابگة فيوزاتچ ما بيها مجال

- گول اي
يلا حياتي گول اي اي يلا گول اي حبااااااب بداعة نونة ومهيب گول اااااي

- لا اله إلا الله
زين ابوچ يدري بهالكلام لو من كيفچ تحچين

- اي طبعاً يدري وشاريها بمي عيونة

هو چذب ميدري ولا عندة خبر بالموضوع
بس ما اگدر اگولة لا واني ما عاولي يلين شوية وياخذ وينطي وياية بالحچي

- ومنال شلون

- اني اقنعها
ومو بس هي حتى سمر خليها علية
بس انت عليك جهاد وامك اذا اقتنعوا اعتبر الزفة الخميس الجاي

- احچي ويا منال
اذا اقتنعت وگالت اي عود احچي وياهم ساعتها

- والله
حچيتها وحضنته اضحك
احبك وداعة گلبك الطيب وعقلك الچبير احببببك

- مصالح يابة

- مع الأسف عليك
هسه طلع حبي الك مصالح الله يسامحك

- هههههه
امشي نومي الجهال لأن تأخر الوقت وتعالي خل ننام

- احچي صدگ حبي الك تشوفة مصالح

- لا بابا
وين الگة مثل حبچ لو افر الدنيا كلها من الشرق للغرب

- ههههه احبك والله

- واني اموت عليچ ام عقل الصغير

بست خدة حيل ونزلت
نومت نونة بغرفتها وصعدت مهيب نومتة بسريرة

تمددت بفراشي اقل النص ساعة نام شهم
ظليت بمكاني الوب شيجيب الصبح ما بية اصبر اكثر

باوعت للساعة توها بالوحدة
منال عادتها تگعد الصلاة الليل لبست حجابي ونزلت

غرفتها ظلمة يعني بعدها نايمة
ظليت گاعدة بالصالة للثنتين شغلت الضوة گمزت من مكاني وگفت گبال الباب

فتحتها وچان تنز ذيچ النزة
حسيت گلبها راد يسكت حتى الوجه صار اصفر
بس والله ما تقصدت اخوفها شجاها وهيچ اخترعت

ركضت للمطبخ جبتلها شكر
حطت بحلگها وناوشتها گلاص المي شربت وباوعتلي بخزرة

- شموگفچ هنا مثل افلام الرعب متگوليلي

- والله مو قصدي اخوفچ
بعدين الضوة مشتغل على شنو نزيتي هيچ

- وشمعرفني انتِ هنا
هو اني النوم بعده بعيني والدور افتح الباب واشوفچ گبالي مثل الجنية شتريديني اسوي

- ههههه اسفة والله

- عادي مصار شي
بس ما گلتيلي شعندچ هنا خو ما متعاركة ويا شهم

- لا يمعودة الله ليجيب الزعل بيناتنا
بس نزلت حتى احچي وياچ بموضوع ضروري

- بالثنتين ؟!!

- مو گتلچ ضروري

- خير ان شاء الله

- خير خير
بس روحي غسلي وتوضي حتى تصحصحيلي شوية

بس حچيتها گامت تغسل
قريب الخمس دقايق ورجعت طبينا الغرفتها وسديت الباب وراية

ردت احچي بدون لف ودوران
خلي اوفر الحچي لمن احاول اقنعها مثل ما قنعت شهم لذالك گلتلها وبدون مقدمات ابوية طلب ايدچ من شهم وشهم وافق

ظلت تباوعلي فاتحة عيونها
مررت ايدي گدام وجها منال وياية لو شنو مناااال

ولا جاوبت
گرصت ايدها حيل چان تعيط يمعودة صدگ تحچين عبالي انجلطتي

- مياس انتِ هنا لو اني داحلم

- هههههه
لا هنا ومو وحدي ابوية وياية

- احچي عدل عاد

- دتعالي گعدي خلي نتفاهم

سحبتها من ايدها وبديت اقنع
نفس الكلام الگلته الشهم گلته الها واكثر بعد لأن هي چانت رافضة الفكرة نهائياً

حاولت هواي بس ما اقتنعت
كلمة والثانية جهالي اهلي الناس العالم تفكر بالكل إلا روحها متفكر بيها قيد شعرة

عجزت واني اقنع
اخر شي استسلمت وعفتها تصلي بس هالاستسلام لليوم وبس باچر لازم ارجع احاول من جديد

ثاني يوم ظليت يم راسها
زن زن زن لحد ما گامت تصيح حتى الحجية عبالها دنتعارك

ورغم هالشي ما يأست
يوم واثنين واربعة واسبوع قبطت عشر ايام ضبط يلا نطقت النعم بعد ما طلعت روحي

چانت شايلة هم جهاد وسمر اكثر شي
گلتلها جهاد خلي على شهم وسمر عليه بس المهم خليچ على رأيچ ولتغيري لو شما يصير

مباشرتاً وبنفس اليوم
رجعت خبر الشهم بموافقتها ظل مصدوم بالخبر
لأن كل ظنه منال مراح توافق

ميدري شغله ووراها مياس
تصير حتى لو چانت من مستحيلات الدنيا وعجائبها

لليل خليته يوديني لأهلي
گعدت ويا ابوية وفتحت موضوع زواجة من منال

عادي ما انصدم كلش
لأن هو چان بس يريد حل يطلعة من الأزمة العايش بيها ومستحيل يلگة انسب من هالحل واحسن منه

للعشرة اجة شهم عليه
بالسيارة گال حچيت ويا جهاد وبالگوة قنعتة بنفس الطريقة القنعتيني بيها واكثر بعد

ثاني يوم اجت سمر
اخذتها الغرفتي وهم بطلعان الروح قنعتها بالسالفة

المجهود البذلتة بجمع هالراسين بالحلال
يعادل مجهود جمع ألف راس والخطط الخليتها حتى اقنعهم بالموضوع توازي خطط اتفاقية سان ريمو بكبرها

بس كله يهون
المهم بالأخير صار الي ردته
ولو الحجية شبعتني رزايل وحچي يغث لأن تدري كلش زين اني السبب بموافقة الراس الچبير (شهم)

وحتى گالتها
مدري شسوت للولد وضربته على راسة هيچ بحيث وافق وهو مغمض بدون ميگولها لا

ههههه
حقها متدري شصار بيه يلا قنعتهم تحديداً شهم بس يلا المهم بالاخير اقتنعوا

اتصل ابوية على عمامي حتى يجون
اسبوع وصارت مشية يشهدلها التاريخ هم علمود العالم تعرف وميصير حچي زايد وهم ابوية راد يرفع راس منال گدام اهلها

يومين وتم العقد
ما طولوا هواي يا دوب بس جهز ابوية نواقص البيت وكمل غرفتهم وراها حدد موعد العرس

طول هالفترة منال مشافت ابوية
يا دوب بس مرة وحدة من اختارت غرفة النوم لأن چانت تستحي وتگول احنه كبرنا على سوالف المراهقين

اليوم العرس
رفضت تروح للصالون مثل ما رفضت الزفة
وگالت اني اجهز نفسي بنفسي ما احتاج المساعدة احد

واگفين اني وسمر وتبارك فوگ راسها
نباوع عليها متدري شتسوي ساعة ترفع شعرها ساعة تنزلة شوية تگوم شوية ترجع تگعد

باوعت السمر وضحكت
هزت راسها حاچيها هزيت براسي اي خليت مهيب ع السرير ورحت يمها

- منال ممكن تهدين

- ليش احد گلچ اني مخبلة مثلاً

- هههههه
لا حشاچ بس ممنتبها النفسچ ما ثبتي ع الكرسي دقيقة وحدة

- اطلعن شعدچن واگفات تراقبني

- باوعتي الساعة لو لا
ترى راح تصير الأربعة وانتِ كل شي مسويتي غير الحمام العالم دينتظرون برة

- بطلت
ما اريد اسوي شي خليني هيچ احلى

ذبت سمر زيوني يم ابني واجت الأمها
- بس ماما ميصير هيچ
انتِ اليوم عروس شلون مترتبين نفسچ

- اني ويني وين الزواج
بس شگول على هاي اااااخ... وعضت اصبعها حيل
شلون قنعتني ما ادري

- هههههه
لولا الملامة يا هوى لولا الملامةةة
لفرد جناحي ع الهوى زي اليمامةةة
واطير وارفرف بالفضا واهرب من الدنيا الفضاااا
وكفايا عمري كفايا عمري الي انقضى وانا بخاف الملامةة وااااااااه من الملامةةةةةةة

ويا جرت الاه اجاني النعال طاير
- من كون اصيح ااااه على گبرچ يمگموعة

دارت وجها ورجعت باوعتلي
- لا اسم الله مو علمودچ بس علمود اخوية المسكين الي يموت بدونچ

- هههههه
فديت التخاف على مرت اخوها

- اخوها
صححي العبارة وگولي اخوها

تبارك.. ههههه
كافي ولچ ميااااس والله خطية

سمر.. يلا ماما خلي اني ارتبچ

منال.. اني ارتب روحي
بس طلعوا هاي من يمي والتردوا يصير وروح ابوية

مياس.. ليش والله اني حبابة

منال.. يا اختي موترتني
حاسة عبالك ماخذيني الحبل المشنقة وانتِ گدامي شارگة حلگچ

مياس.. هههههه
ماشي راح اطلع بس ها من هسه اگولچ
اذا ما تمكيجتي عدل ولبستني هذا الفستان والله اظل اكل بگلبچ لحد متسوين الاريدة

- ان شاء الله بس ولي من گدامي

اخذت البنات وطلعت
ظلينة گاعدين بالصالة ننتظرها قريب الساعة يلا طلعت

فتحنا عيونة عليها
يا اخي هالمرة حلوة قلباً وقالباً قابل هي گوة

سحبتها سمر من ايدها وگامت تجر بالهلاهل
وراها اني وتبارك كملناها رادت حاولت حتى تسكتنة ما گدرت

چانوا الاقارب مجتمعين
سوينا گعدة بسيطة والبنات ما قصرن حتى رگص رگصن

لليل اجة شهم ويا ايهاب وجهاد
سوو طريق طب ابوية بس والله ضحكت عليهم ضحك حتى الشباب ميخجلون بگدهم

بالگوة گعد على اعصابة
خمس دقايق وگال صيحي رجلچ حتى نطلع منا

اجة شهم سلمها اله ووصى عليها
اخذها وراحوا بس اخواني ظلوا يمي بيومها
نومتهم بالغرفة الجوة يم نونة ومهيب وصعدت الغرفتي

فتحت الباب لگيت شهم متمدد وضاربها صفنة
قفلتها ورحت يمة مشيت طرف اصبعي على رگبتة فز من صفنته

- ها حبيبي وين صافن

- لا هيچ

- شبيك شو شكلك ضايج

- ما بية مياس لتلحين

- شوف حبيبي
هي صح اختك هسه بحضن ابوية بس بالحلال هااا

- ميااااااس

- ههههههه
ادري انت ليش عصبي لعد مو بنتة صارلها سنتين بحضنك

- الجهال ناموا

- اي

- يلا طفي الضوة اريد انام

- هاي شنو
لعد هالترتيب والتعديل كله المن اذا حضرتك تريد تنام گبل

- مياس تعبان فكي عني

- ها يعني شيبت

- لتحاولين سوالفچ حفظتهن ترى

- واذا اگولك اني مشتاقتلك

- تشتاقلچ الجنة حياتي

- وانت متشتاقلي

حط ايدة على عيونة بدون ميجاوب
گمت ضايجة فتحت الكنتور داطلع ملابس حسيت علي حضني من ورى وهمس يم اذني

- اني بكل لحظة اشتاقلچ

- مو توك گلت تعبان

- اي بس ما گدرت اقاوم زعلچ

- اممممم
شوكت تبطل تضحك عليه بكلمة وحدة

- شعور متبادل
تضحكين عليه اضحك عليچ مرة ورجال ماكو فرق بيناتنا ان شاء الله

- هههههه
احبك ابوية الحلو

- واني اموت عليچ بنيتي العسل

توني طالعة من الحمام سمعت مهيب گعد يبچي
رحت اخذته من يمهم وصعدتة للغرفة شلع گلبي فوگ الساعتين يلا نام

ثاني يوم بلليل
اخذت اخواني ورحت ويا شهم لبيت اهلي

دگيت الباب طلع ابوية
سلمنا وباركنالة وراها طب هو وشهم للصالة واني رحت اشوف منال

دگيت باب الغرفة صاحت تفضل
طبيت لگيت الوجه مورد والضحكة تارسة الشفة

گبل صحت
ااااخ كله من هاية وإلا اني ويني وين الزواج

- عود الله يبارك بيچ

- هههههه
الف مبروك حبيبتي زواجة الدهر ان شاء الله

- رحم الله والديچ

- اي شكو ماكو سولفيلي

- يااااا شسولف ولچ

- هاي شبيچ لتفهمين غلط
قصدي شلون شفتي ابوية بهاليوم حامض حلو

- مو چن عبارتچ بيها أنَّ

- هههههه
ذكية مرت ابوية

دنحچي اجو اخواني
خليتهم يسلمون عليها وراها گلتلهم من اليوم هاي ماما اريدكم تسمعون كلامها مثل متسمعون كلامي

مصطفى وميادة چانوا مثل النسمة
حتى مرات اصفن عليهم ما صدگ ذولة الملائكة خلفت سميحة بس يجوز رب العالمين يحب ابوية وخله جهالة يطلعون طيبين علي

من حچيت هيچ هزوا براسهم اي
گامت منال بوستهم واخذتهم اني للصالة بين ما تبدل

شوية واجت سلمت على شهم بالگوة مستحية
ظلينة گاعدين يمهم ساعة تقريباً وراها استأذنة ورجعنا للبيت

مرت الأيام بهدوء
صارت امتحانات اخير السنة والحمد لله تعبي ما ضاع وطلعت المعدل اليأهلني الكلية التربية

وفعلاً انقبلت تربية انگليزي
عاد الحمد لله تبارك چانت متخرجة فصرت اخلي جهالي يمها بين ما اداوم وارجع

وهيچ عدت السنة بحلوها وبمرها
بديت احضر للسنة الجديدة والفرحة طاغية على كل مشاعري لأن ممصدگة دراستي الچانت حلم بالنسبة الي بين ليلة ويوم صارت حقيقة

گاعدة ارتب بالكنتور اتصلت سمر
- هلا والله بسمورة

- باركيلي

- مبروك
بس ليش شنو يوسف راح يتزوج

- طيح الله حظچ ان شاء الله

- هههههه
لا صدگ على شنو ابارك

- راح يجي اخ او اخت الزيوني

- يا عمررري
الف مبروك تگومين بالسلامة ان شاء الله

- الله يسلمچ حبيبتي

ظليت احچي وياها بالعشر دقايق
توني سادة الخط رجع موبايلي دگ جاوبت بدون ما اباوع لأن بالي يم الملابس

- ها ولچ شنسيتي

- هاي ويامن دتحچين

- يااا منال
عبالي سمر توها چانت تحچي وياية حامل واجت تبشرني

- اي خابرتني قبلچ

- شبيچ لعد شو ضايجة

- ولچ عيني اخوچ واختچ راح يشيبوني

- ههههه خير شبيهم

- يغارون واحد من الثاني عبالك ضرارير

- وشنو موضوع الغيرة

- عليه

- اي يا عيني
غير انتِ بالغتي بدلالهم طبعاً يظلون يغارون عليچ

- اني ممعترضة
خلي يغارون بس مو توصل يزعلون بيناتهم بسببي

- ههههه
اني متأكدة انتِ گدها وراح تحلين هالموضوع
منال لتنسين هم عاشوا حياتهم محرومين من الدلال وهسه يلا عرفوا

- اي صح
يلا خلي اروح اكمل العشى

- شلونچ ويا ابوية

- الله يخلي الية ليش وين اكو منه

- هههههه
عيني عيني الله ع الحب الله

- هههههه
دروحي ولچ الأكل ع النار ليحترگ

- ههههه سلميلنا

حچيتها وسديت الخط اضحك
عبالها بس اخواني هيچ خل تجي تشوف غيرة نونة من مهيب ساعتها تحمد ربها عليهم ألف مرة

مشت الأيام وثار الشعب ضد الظلم
ثورة اكتبور الچانت من اكبر الثورات الشهدها العالم مو بس العراق

وبهاي الثورة تعطل كل شي حتى الدوام
واكبر فائدة صارتلي هالفترة هي نقل شغل شهم من الحدود البغداد بحيث بيومها من عرفت الخبر للصبح گاعدة من الفرحة ما مر عيني النوم ولا دقيقة

واكيد جهاد حال حال كل هالشباب
رفض يظل بالبيت وطلع يشارك اخوته بهاي المظاهرات السلمية

حاول هواي شهم يمنعة بس ما گدر
ومن گلة امك ما عدها غيرك واذا صارلك شي تموت
جاوبة امي مو احسن من باقي الأمهات واذا صارلي شي خلي تصبر روحها بمصابهم وتگول راح فدوة للعراق مثل ما راح قبلة خالة

ايام والوضع هادئ
بس بعدين بدت الأوضاع تتأزم وتحولت المظاهرات من سلمية لمظاهرات السلاح بأنواعة

بلليل سويت العشى وصعدت فوگ
خليتة گبال شهم بعدة توة ديتعشى سمعنا صوت تبارك ترس البيت

طفر من مكانة مفزوع
نزلت اركض ورى ومن الدرج اسمع تبارك تصيح بكل صوتها

- شنو مااات؟!!
لا لا چذذذب ما اصدگ يسويها مستحيل جهاد يموت ويعوووووفني....

يتبع