رواية مياس قلب الشهم الفصل الخمسون 50 - بقلم لبنى الموسوي

#مياس_قلب_الشهم

للكاتبه #لبنى_الموسوي

مر اسبوع ع الموضوع ومياس متقبل تسمع مني حتى بعض الاحيان احسها متطيق وجودي وياها بمكان واحد

فد يوم چنت بالنادي ويا يوسف اتصلت بيه منال .. فتحت الخط عليها سمعت صوت نهى تصرخ بالبچي

شهم.. ها ام جهاد خير

منال.. عفيه شهم تعال شوفلك صرفه ويا بنتك من راحت مياس لحد الأن متقبل تسكت
ليش مدتخليها تاخذ الطفله وياها وتروح ؟؟

شهم.. لحظه لحظه
شنو راحت !!
وين راحت مياس ؟!!

منال.. لبيت اهلها غير .. ليش متدري انت ؟؟
جهاد وداها وگالت...

تخبلت من السمعته منها .. سديت الخط بلا ما اخليها تكمل كلامها وخابرت جهاد ع السريع

جهاد.. ها خالو

شهم.. جهاد انت وديت مياس لبيت اهلها ؟!!

جهاد.. اي
ليش تسأل ؟!!

شهم.. منو سمحلك توديها بلا متنطيني خبررررر

جهاد.. على كيفك خالي
اني سألتها وگالت منطيتك خبر بروحتها

شهم.. اخذت ملابسها وياها ؟؟

جهاد.. اي جنطه كلش چبيره وحتى اني تفاجأت بس هي گالت راح تطول هناك لان ابوها رجع ولازم تظل يمه حتى تداري

شهم.. روح جهاد روووح

سديت الخط واتصلت بيها اكثر من مره بس ما ردت
طلعت من النادي ظل يوسف يصيح ورايه ما گدرت اجاوبه من الصدمه

صعدت السياره ورحت البيتهم .. دگيت الجرس بشكل سريع لو بيدي افلش البيت على راسها من هاي سوايتها الما تتسولف

فتح الباب ولد شاب تفاجأت بي واستغربت بنفس الوقت

احمد.. نعم منو حضرتك

شهم.. انت المنو ؟؟

احمد.. ترى انت الداگ الباب عليه مو اني

طفرت اعصابي منه .. دفعته حيل ودخلت لگيت مياس وابوها بالصاله
باوعت عليها بحقد

شهم.. شجابچ هنا

اشرف.. شكو شهم .. صاير شي ؟؟

شهم.. اي صاير ابو مصطفى
بنتك المصون ثاني مره تسويها وتطلع من البيت بلا علم زوجها

بالمره الاولى صارت مصيبه اكبر من راسها ومع ذالك وگفت وياها وانطيتها الحق وفضلتها حتى على اخويه

درت وجهي عليها : بس هسه مراح اسكتلها عن عملتها هاي
لا والله فلا اغفرلها السوته لو مهما حچت او حاولت تبرر موقفها الي

مياس.. واني لا راح احچي ولا راح ابرر موقفي الك خلي يطمأن گلبك

اشرف.. مياس بابا شبيچ ؟؟
شلون تحچين هيچ ويا رجلچ گدامنه
عيب بحقچ وحقه بنيتي

شهم.. جريتها من ايدها حيل : امشي ويايه ولچ

احمد.. لزم ايدي بسرعه : ميصير الدتسوي ترى

شهم.. وانت منو حتى تتدخل !!

احمد.. ابن عمها

شهم.. واني رجلها فـ وخر من گدامي لا اخربطلك خلقتك حتى اريح گلبي بيك

اشرف.. شجاك شهم !!
ما عرفتك هيچ والله العظيم
اخذ مرتك للاستقبال وحلو مشكلتكم بيناتكم بلاها هالتصرفات الصبيانيه

مياس.. امشي للاستقبال شهم .. كلام ابويه صح الدنسوي ميصير

شهم.. گلي النفسچ هالحچي

مياس.. دمشي نحچي هناك احسن

رحت قبلها للأستقبال شويه واجت ورايه
طبت تباوع عليه بنظرات غريبه ما عرفت افسرها .. عتب لو حقد لو ايش بالضبط

مياس.. شهم اني صح طلعت بدون علمك بس طلعتي هالمره تختلف عن المره الاول

كل الي بالبيت عرفوا بيه رحت لأهلي وجهاد بنفسه وصلني وغير هذا اني طلعت بأرادتي مو مجبوره مثل قبل

اني ما گتلك لأن تدري بيك راح تمنعني فما حبيت يصير بيناتنه اصطدامات على اخير علاقتنه

شهم.. اخير علاقتنه !!!

مياس.. اي شهم
خلص وصلنه للنهايه واترجاك ظل شهم ويايه للأخير واتركني بحال سبيلي بلا مشاكل

شهم.. ونونه مياس
تدرين كلش زين هي تعتبرچ امها لأن فتحت عيونها عليچ

ما فكرتي بيها ؟!!
ما رف گلبچ عليها قبل لا تخطين مثل هالخطوه ؟!!

تدرين منال خابرتني قبل شويه سمعتها تفحط من البچي لأن انتي ماكو

مياس.. من ايدك شهم
كلشي صار وراح يصير انت السبب بي مو اني

شهم.. اعتذرت منچ الف مره وراح ارد واعتذر للمره الالفين بس انسي الصار

مياس.. انسى !!!
عموماً لتعب نفسك شهم .. رجعه مراح ارجع
خلص چنت اشوفك رجال بس للأسف ما طلعت...

شهم.. طفرت لزمتها من زندها :  شنو دتتحديني حضرتچ ؟!!

مياس.. لا دا اخش بعينك مثل ما سويت ويايه

شهم.. مو اني التلوين ايدي مياس
انتبهي النفسچ زين قبل لا تحچين كلام تندمين علي بعدين
اني شهم ولچ تعرفين شنو يعني شهم لو لاااااا

مياس.. اي ولأن اعرفك شهم لازم ابتعد حتى تظل بعيني مثل ما چنت اشوفك دائماً

شهم.. صبرك ربي .. صبرك صبرك صبررررك

گمت ارح واجي بالمكان .. احاول اهدأ بنفسي من العصبيه قبل لا تكبر المشكله اكثر

شهم.. مياس لتنسين نهى وصتچ ببتها وبهذا تصرفچ دتخالفين الوصيه الـ برگبتچ

مياس.. عادي انت خالفتها قبلي ما ظلت عليه

شهم.. لا اله إلا الله .. لا اله إلا الله
ولچ بابا انتي غبيه لو شنو بالضبط

صخمت بوجهي ووجه الخلفوني وغلطت بلا ما احس على روحي ومع ذالك اجيت واعتذرت منچ الف مره

ليش مدتستوعبيني مياس ؟!!
اني حالياً عايش بدوامه من الصراع وبس الله يعلم براسي شديصير من ورى التفكير .. لتزوديها عليه اترجاچ

مياس.. اني الاترجاك شهم
اتركني على الاقل فتره بلكت ارتاح وانسى الصار وعود بعدها نگعد ونتفاهم بهدوء

هسه انت عصبي واني مجروحه منك يعني لا راح تفهمني ولا اگدر افهمك

بروح نهى ومهيب عليك افهم موقفي وقدر الشي الأني بي حالياً

شهم.. هذا منو بره ؟!!

مياس.. ابن عمي

شهم.. ادري ابن عمچ بس منو بيهم ؟؟

مياس.. عمي ابراهيم الچبير واسمه احمد

شهم.. شعنده جاي ؟؟

مياس.. علمود ابويه ميگدرون يعوفوا وحده وهو بهاي الحاله

شهم.. ماشي مياس ماشي
راح انطيچ على مايچ بس اكو شروط لازم تسمعيها مني وتتقبليها هم وإلا اخذچ غصباً عنچ وارجع للبيت حالاً

مياس.. وشنو هي ؟!

شهم.. متطلعين الباب البيت بدون علمي

تفعلين النت على جهازچ وشوكت ما اتصل بيچ او اراسلچ تجاوبيني

ابن عمچ هذا .. ما اريد تطگين ويا فچ
انتي بمكان وهو بمكان ثاني واذا سمعت غير هالشي متلومين إلا نفسچ وهايني حذرتچ

مياس.. ماشي
غيره .. اكو شي بعد ؟!

شهم.. طلعت محفظتي : هاچ هاي الفلوس خليهن يمچ واي شي تحتاجي بس انطيني خبر .. وهذا رصيد حتى تفعلين بي الانترنيت

مياس.. شكراً

شهم.. درت وجهي دا اطلع رجعت نظري الها : مياس

مياس.. نعم

شهم.. راح اشتاقلچ هواي

مياس.. واني هم راح اشتاقلكم

طلعت من يمها ورحت للصاله حتى اسلم على ابوها فشله من العصبيه نسيت اتحمدله بالسلامه

شهم.. ابو مصطفى اعذرنه على الصار والحمد لله على سلامتك خويه

اشرف.. معذور حبيبي .. بس ان شاء الله گدرتوا تحلون مشاكلكم

شهم.. ماكو مشاكل ان شاء الله
مياس راح تظل يمكم فتره علمود تداريك وانت هم دير بالك عليها ما اوصيك بعد

اشرف.. بعيوني لتخاف عليها

شهم.. تريد شي قبل لا اروح

اشرف.. خليك تعشه .. اشرب شي

شهم.. لا رحم الله والديك
مع السلامه

اشرف.. الله وياك
احمد عمو وصله للباب بلا زحمه عليك

احمد.. صار عمي

سلمت وطلعت .. دا اروح صاحني ابن عم مياس

احمد.. شهم

شهم.. نعم

احمد.. عرفنه عليك قبل لتروح

شهم.. اني رجل مياس وهذا كلشي

احمد.. مدلي ايده يصافحني : تشرفنا بيك رجل مياس هههه

شهم.. الي الشرف يا ظريف

خليت ورحت بس بيني وبين نفسي متعجب من تصرفاتي
لأول مره اتعامل ويا احد بهل حديه وتكون طريقة كلامي جافه لهل درجه

رجعت للبيت لگيت نهاوي منتهيه من البچي اول ما طبيت تلگتني منال من الباب

منال.. خويه وين صرت تعال شوفلك صرفه ويا بنتك

شهم.. تعالي بابا شبيچ متگليلي

اخذتها من منال وصعدت بوجهي الغرفتي .. ظليت احاول اسكت بيها ماكو معانده ع البچي لحد ما خابرتلها مياس عسى ولعل اذا سمعت صوتها تهدأ شويه

- بعد ما راح شهم دخلت الغرفتي اشهگ من البچي
صعب عليه افصل روحي عن روحه بس مستحيل استمر ويا بعد كلشي صار

تذكرت كلامه عن نونه وزدت بالبچي : سوده عليه ماما
والله العظيم انجبرت اعوفچ وگلبي دينزف دم على دموعچ وفراگ وجهچ الحلو

مرت اكثر من ساعه واني على نفس الوضع لحد ما سمعت جهازي يدگ
گمت ادور علي من اجيت لحد الأن ما ادري وين شامرته

فصل الخط شويه ورجع يدگ .. ظليت اتبع صوته لحد ما لگيته بين غراضي
شفت شهم يتصل جاوبت بسرعه حتى اتجنب المشاكل ويا

اول ما خليته على اذني سمعت صوت نونه تبچي بحرگه تملخ گلبي عليها

شهم.. مياس تسمعيني

مياس.. شبيها تبچي هيچ ؟؟

شهم.. تريدچ غير

مياس.. سوده عليه خلي الموبايل على اذنها حتى احچي وياها

شهم.. يلا احچي

مياس.. ها نونه حياتي .. اسم الله عليچ كافي بچي هسه اجيچ ما اتأخر

سمعتها سكتت بسرعه
ظليت احچي وياها بالخمس دقايق وهي هادئه تقريباً بس مجرد تگول ماما وتوتو لأن عدها لعبه مال بطه كلما العبها بيها اگلها هاي توتو تلعب وياچ

شهم.. شوفي شلون سكتت بس سمعت صوتچ
فعلي النت حتى تظلين وياها حد متنام

مياس.. اي هسه

سديت الخط منه وشحنت الرصيد ع السريع .. فعلت النت ورجعت اتصلت بي لگيتها تبچي

شهم.. بس عفتيها رجعت تبچي تعبتني

مياس.. ميخالف طول خلگ وياها شويه بين متنام
يلا خلي على اذنها حتى تسمع صوتي

تمددت بفراشي احچي وياها لحد ما تعبت يلا نامت واخيراً

شهم.. نامت ابشرچ

مياس.. لتگعد يمعود نصي صوتك

شهم.. بعد كل هالتعب حتى النفس راح اكتمه مو بس صوتي ههههه

مياس.. يلا راح انام اني

شهم.. ماشي تصبحين على خير

مياس.. وانت من اهل الخير

مرت اربع اسابيع على وجودي ببيت اهلي وماكو شي جديد

ما انكر اشتياقي الشهم يزيد يوم بعد يوم وكلما اسمع صوته اضعف كلش بس مع ذالك دا اقاوم حتى ارجع كرامتي النمسحت بالگاع بسببه

وهو هم كذالك بعد عني وصار ميراويني وجها حتى الشغلات الاحتاجهن يدزهن الي بيد يوسف وهالشي احسن الي واله

اما نونه فـ اشتياقي الها ديسحن بگلبي بحيث احس نفسي عايشه بس جسد لأن روحي ظلت يمها من يوم العفتها هناك واجيت لاهلي وحدي

تبارك ومنال يخابرني باستمرار بس ما بينت الهن اني زعلانه وچنت اتحجج بمرض ابويه وهن مصدگات وما شكن بالوضع نهائياً

فد يوم چنت واگفه اصب الغده دخت كلش بحيث عيوني غوشت وبعد ما اشوف شي گدامي

لزمت راسي وطلعت من المطبخ امشي بالگوه
صار احمد گدامي هستوه راجع من الشغل لأن خطيه راح يشتغل بمكان ابويه حتى ليفصلوا ويظل حاير بروحه ومنها يساعدنه فدنوب

احمد.. ها مياس خيرچ

مياس.. ما اعرف دخت كلش

احمد.. سلامتچ .. روحي ارتاحي اني اكمل عنچ

مياس.. لا شنو هالحچي ميصير

احمد.. لا ميصير ولا شي
فوتي اگعدي وبس يصير العصر اخذچ للدكتور لان وضعچ صارلو كم يوم ما عاجبني ابد

مياس.. ليش شبيه

احمد.. ما منتبها الوجهچ شلون صاير اصفر مثل الكركم
اخاف هابط ضغطچ او عندچ فقر دم لأن اكلچ ابد مو تمام بهاي الفتره

عفته ومشيت الغرفتي .. وگفت گدام المرايه اباوع النفسي
فجأه فتحت عيوني ولزمت بطني ع السريع

مياس.. لا يا ربي معقوله !!!

لا لا مستحيل شنو من مره وحده احبل وين صايره هاي

لحظه مياس انتي فاتتچ صارلها كذا يوم بس ناسيتها حضرتچ

شنو يعني حامل ؟!!

يا الهي لا .. فدوه ربي كلشي ولا هاي السالفه مو وكتها ابد

زين شنو السالفه هي مره معقوله ؟!!

اي لعد ليش مو نهى تقربلها مره وحده وحبلت

اااخ يا شهم شسويت بيه وشراح تسوي اكثر من هذا بعد

طلعت تغديت ونظفت المطبخ بسرعه حتى ارجع الغرفتي انام لأن تعبت من التفكير بهذا الموضوع

نومت اخواني وتمددت بصفهم .. نمت لحد ما حسيت ع الباب تندگ
خليت حجابي على راسي وگمت افتحها

احمد.. يلا مياس امشي اوديچ للدكتور

مياس.. لا ميحتاج صدگ

احمد.. مياس لتحاولين مراح اخليچ بهاي الحاله لو شما حچيتي

صفنت ويا نفسي : لازم اتأكد حتى ارتاح من التفكير والقلق الدا احس بي حالياً

مياس.. ماشي اروح وياك بس مو للدكتور

احمد.. لعد وين ؟؟

مياس.. للمختبر
اخذني احلل لأن شاكه بنفسي...

احمد.. حامل؟!

مياس.. دنگت خجلانه : يمكن

احمد.. امشي بدلي ع السريع .. تلگيني بالصاله بس تخلصين

مياس.. ماشي

بدلت واستأذنه من ابويه حتى نروح .. وصلنه للمختبر القريب من بيت اهلي سويت التحليل وگعدنه ننتظر النتيجه

شويه وصاحوا اسمي .. راح احمد جابها ورجع مبتسم
خفت كلش من هالابتسامه لأن معناها شكي طلع بمحله

مياس.. ها !!

احمد.. حامل بت عمي الف مبروك

عقچت وجهي بس سمعت الخبر .. انتبه عليه وانصدمت من سمعته يگول

احمد.. ادري بيچ زعلانه ويا شهم ومن اول يوم هم

مياس.. وشعرفك انت ؟؟

احمد.. متعبر عليه هيچ امور مياس
وهسه شنو ؟؟ لازم تگولين الرجلچ بأسرع وقت ممكن

مياس.. مستحييييل
ودير بالك تگله احمد وربي ازعل عليك

احمد.. مياس شلون تضمين علي مثل هالخبر حتى حرام عليچ

مياس.. ما ادري .. بس مو كتها
هسه بس يعرف بحملي يجبرني ارجعله واني ممستعده ارجع حالياً

احمد.. ليش ما مستعده
الدا اشوفو انتي تحبي كلش وحتى ذبلتي ببعدو مو مثل اول مره شفتچ بيها

مياس..ما اگدر احچيلك شي بس كل الأگدر اوصله الك اني ما اريد ارجعله هسه وهذا كافي

احمد.. ماشي براحتچ

مياس.. يلا خلي نرجع تأخرنه عليهم

احمد.. امشي يلا

طلعنه من المختبر بس گلبي رايح من الخبر العرفته : ابد مچان موضوع الحمل مناسب بمثل هيچ وقت
بهذا الخبر تربطت ايدي ورجلي بسلاسل ومفتاحها يم شهم

وگفنه قريب الشارع دناخذ تكسي تفاجأت بشهم صار گدامنه .. فتحت عيوني مصدومه لأن ما شايفته صارلي بالشهر تقريباً

- مرت الاسابيع ومياس معانده متقبل ترجع .. خليتها براحتها بس چنت مطمأن راح ترجع الي خصوصاً لمن شفتها ما حچت شي الاهلي عن مشكلتنه ولا فهمتهم بزعلها

نونه ظلت تبچي يوميه عليها لذالك صارت مياس تتصل بلليل علمود تنومها على صوتها واني هم تعودت على هالشي لدرجة مرات احسب لليل ساعه ساعه حتى اسمع صوتها

بعدها عني مچان سهل ابد .. شويه شويه حسيت نفسي شگد متعلق بيها بس مچنت اعرف هالشي إلا بعد ما بعدت عني وخسرتها

ابتعدت عنها حتى ترتاح وتاخذ وقتها بالتفكير فـ ظليت وياها على الاتصال وبس واذا اريد اوديلها شي فـ ادزه بيد يوسف حتى لتشوفني وتتخربط اوضاعها

بعد اربع اسابيع رحت للمختبر الـ بمنطقتنه حتى اجيب التحاليل مالت رامي

اخذت التحاليل وطلعت من المختبر .. دا اصعد السياره لمحت مياس طالعه ويا ابن عمها لو اني تخبلت

سديت الباب ورحت باتجاهم ع السريع بس شافتني گدامها وسعت عيونها من الصدمه

شهم.. ليش طالعه بدون علمي مياس اني شحذرتچ ؟!!

احمد.. يابه مرحبا عود

شهم.. باوعتله بطرف عيني : اهلا
احچي مياس شبيچ ساكته

احمد.. ممكن نحچي شويه لو تسمحلي

شهم.. تفضل

مياس.. احمد شتريد تحچي ويا ؟!!

احمد.. اصبري مياس ولتخافين .. البيناتنه يظل بيناتنه

شهم.. هو شنو البيناتكم !!

احمد.. اصبر انت الثاني .. شجاكم خبلتوني ترى

مياس.. احمد امشي خل نروح

شهم.. احمد احچي شكو

مياس.. احمد امشي الله يخليك

شهم.. احمد ماكو روحه اذا متشرحلي شديصير هنا

احمد.. احمد الله يساعدك هههههههه
دار وجها علي مياس .. طبي جوه انتظريني شويه واجيچ

مياس.. عفيه احمد لا

احمد.. دنگ شاورها بس سمعته لان صوته واضح : لتخافين ما اخبرو صدگي اريد اقنعو حتى يروح

عافتنه وطبت تنتظره بالمجمع .. ظليت اباوع وراها صحيت لمن صاحني احمد

احمد.. شهم وين صافن

شهم.. گول يلا شصاير وياكم

احمد.. مرتك طلعت حامل

هو گال هيچ لو اني مدري شصار بيه .. صفنت ويا نفسي مصدوم : شنو السالفه شو يا هو الاتقرب منها من مره وحده تحبل
راح اتخبل والله العظيم راح اتخبل

احمد.. ها شهم مراح تحچي

شهم.. شلون عرفت بهذا الشي ؟؟

احمد.. هاي طلعتنه من المختبر جبتها حتى تحلل وطلعت حامل

ردت اروحلها لزمني من ايدي ع السريع .. باوعت علي بخزره مستغرب تصرفه هذا

احمد.. لتباوعلي هيچ
ميصير تروح عليها هسه لأن راح تعاند اكثر ومترجع وياك
اضافه لهذا راح تلومني لأن حچيتلك وهي وصتني ما احچي عن خبر حملها وإلا تزعل عليه

شهم.. شنو وصتك ؟؟ شدتحچي انت !!

احمد.. شوف شهم .. اقسملك بالله هستوني يلا عرفت انتم زعلانين لان مياس مچانت تقبل تحچي اي شي عنكم

مياس مبين عليها مجروحه منك حيل لذالك رافضه حتى تبلغك بخبر حملها لأن متريد ترجعلك حالياً

شهم.. وليش گتلي لعد ؟؟

احمد.. لان من حقك تعرف بهالشي هذا السبب الاول
اما السبب الثاني اتمنى ترجعون البعضكم بعد ما شفت بت عمي شلون تحبك وذبلت ببعدها عنك

شهم.. وشلون نرجع اذا هي دتخفي عني الحمل وانت دتطلب مني ما اواجهه بمعرفتي بالخبر

احمد.. اكيد راح تلگه طريقه ترجعها الك وهي مقتنعه برجعتها مو تجبرها على هذا الشي

شهم..ماشي فهمت عليك
ماعندك سياره مو ؟؟

احمد.. اي ما عندي

شهم.. لعد روح صيحها حتى اوصلكم للبيت
واذا سألتك عني تحججلها بأي شي بس لتخليها تحس اني عرفت عن الموضوع هذا

احمد.. اكيد

راح يصيحها وظليت انتظرهم بمكاني
شويه وطلعوا سوه .. شافتني واگف تعجبت
رحت باتجاها ع السريع

شهم.. امشي خلي اوصلكم

مياس.. ميحتاج شهم
روح منا واحنه نرجع وحدنه

شهم.. مو بكيفچ مياس
لتخليني اجبرچ على شي متحبي وتدرين بي من احچي شي اسوي لو على گص رگبتي

صعدت بالسياره بدون مترد عليه .. وصلتهم بسرعه ورجعت بوجهي للبيت

بعد ما شفت شهم گدامي ضجت كلش لأن بشوفته هاي كلشي بيه حن اله ولا كأن صاير شي بيناتنه

وگف احمد يحچي ويا واني طبيت جوه انتظره شويه ورجعلي

مياس.. احمد خو ما گتله

احمد.. لا طبعا
قنعتو وگتلو عدها فقر دم فتخربطت فجأه لذالك جبتها تحلل
حچيت هيچ بس حتى ليحاسبچ على طلعتچ بدون علمو

مياس.. اي زين سويت

احمد.. يلا خلي نرجع

مياس.. يلا

طلعنه من المجمع شفت شهم واگف بعده .. اجه باتجاهي وطلب مني اصعد بالسياره حتى يوصلنه
ما قبلت بالبدايه بس بعد ما هددني استسلمت حتى اتچفه الشر ويا

رجعت للبيت ومشاعري مضطربه .. ما اعرف افرح لأن راح اصير ام واجيب اخ لنونه
لو اضوج لأن بهذا حملي انربطت بشهم غصباً عني

شويه وتذكرت وجوده يم المجمع بنفس وقت وجودي هناك : شنو يعني چان يراقبني معقوله ؟!!

لا لا .. مستحيل
شهم ميسويها ما اصدگ

يمه بس بلا مريض لذالك شفته .. اي اي صح شفت بيده تحاليل والله شفتهن

تخبلت لمن شكيت بي مريض .. بعدني دا افكر وحايره شلون اعرف بي مريض لو لا
دگ جهازي

طلعته من الجنطه شفت تبارك دتتصل بيه

مياس.. هلو حبي شلونچ

تبارك.. ولچ مياس الحگي نونه

مياس.. يمه اسم الله .. شبيها بنيتي احچي ولچ شبيهاااا

تبارك.. انشمرت مره ثانيه وهسه اخذوها للمستشفى
لو تلحگين عليها لو لا

مياس.. بچيت بسرعه : عفيه گولي غيرها
بيا مستشفى خلي اروحلها هسه
احچي الله يخليچ احچييي

تبارك.. هسه ادزلچ جهاد هو ياخذچ الها

مياس.. بسرعه .. عفيه بسررررعه

سديت الخط اروح واجي بالغرفه مثل المخبله ودموعي تجري بلا وعي
طلعت اركض الابويه

مياس.. بابا

اشرف.. نعم بويه

مياس.. نونه مشموره وماخذيها للمستشفى
راح يجي جهاد ياخذني الها

اشرف.. سلامتها بنيتي
على راحتچ

اندگ الجرس راح احمد فتح الباب .. جبت جنطني وطلعت اركض

مياس.. جهاد شبيها نونه

جهاد.. انشمرت

مياس.. اخذني الها بسرعه

جهاد.. اي هسه اخذچ بس اهدي شويه

مياس.. اموت اذا صارلها شي والله

جهاد.. اسم الله عليچ وعليها
يلا دمشي

طلعنه سويه .. بالطريق دگ موبايل جهاد

جهاد.. ها بشر
صدگ .. يا الله
زين لعد جايين للبيت

مياس.. شصار جهاد

جهاد.. رجعوها للبيت لتخافين ما بيها شي

مياس.. الف الحمد لله والشكر
يلا استعجل عفيه .. اريد اشوفها

جهاد.. ههههه صار

وصلنه للبيت نزلت اركض .. دگيت الباب بسرعه فتحتها تبارك

مياس.. وين نونه

تبارك.. دسلمي اول

مياس.. نونه وين تبارك احچي لتشلعين گلبي

تبارك.. طبي بغرفتچ تلگيها

رحت اركض الغرفتي
فتحت الباب ما شفتها استغربت وخفت بنفس الوقت

درت وجهي دا اطلع تفاجأت بشهم واگف گبالي بس باوعلي سد الباب واجه باتجاهي يضحك....

يتبع..