رواية مياس قلب الشهم الفصل الحادي والخمسون 51 - بقلم لبنى الموسوي

#مياس_قلب_الشهم

للكاتبه #لبنى_الموسوي

‏بين قيود ذراعيك انا اتخلى عن حريتي 💓

اول ما وصلت صحت تبارك وجهاد لأن نويت ارجع مياس للبيت بعد هذا الخبر وبـ أي طريقه

جهاد.. نعم خالو هستوني دا اطلع تبارك گالت تريدني

شهم.. اي صيح تبارك هم .. اريدكم ثنينكم بموضوع مهم

جهاد.. هسه دتجي ورايه بس خير خالي خو ماكو شي ظل بالي ؟؟

شهم.. خير ان شاء الله اصبر شويه

تبارك.. ها شهم صحتني

شهم.. اي تعالي
اسمعوني ثنينكم اريد منكم تساعدوني نرجع مياس للبيت

تبارك.. وليش ؟!

جهاد.. شنو زعلانه خالو ؟؟

شهم.. هيچ شي
كل الموضوع معانده متقبل ترجع وتعوف ابوها وحده مع العلم ابن عمها يمهم وجاي من الرمادي لهنا علموده

تبارك.. بس هي ما گالتلي زعلانه

شهم.. تبارك لتلحين عوفي الموضوع .. سوي الراح اگلچ علي وبس

جهاد.. ههههه لتعصب بعد گلبي تعرف الفضول عند النسوان شلون صاير
ميرتاحن اذا ما عرفن السالفه من طق طق للسلام عليكم

شهم.. ههههه شلون تالي وياكم انتو الزوج
تخلوني احچي لو اولي اشوف غيركم

جهاد.. هههه لا خالي حاضرين أأمر

شهم.. تبارك اريدچ تخابرين مياس وتگليلها نهى نشمرت وحالياً بالمستشفى

تبارك.. قاطعتني بسرعه : اسم الله عليها يمعود

شهم.. لا اله إلا الله
يمعوده اسم الله الف مره مو مره وحده بس خلي اكمل كلامي

جهاد.. حبيبتي الضاهر عاجبچ تنبسطين اليوم

تبارك.. ههههه لا لا سكتت والله
يلا كمل وبعد شسوي

شهم.. كلشي لتسوين بس لازم تخليها تصدگچ يعني حاولي تنقلين الها خوفچ حتى متشك بشي

تبارك.. سهله
ولو خطيه راح تنهبط عليها بس شسوي ما اگدر اگلك لا

شهم.. عفيه من اول هيچ لو لازم تشلعين گلبي

تبارك.. ههههه

جهاد.. واني خالو شنو المطلوب مني

شهم.. اكيد مياس راح تطلب من تبارك عنوان المستشفى فهي راح تگللها جهاد يجيچ
كل العليك تروح تجيبها للبيت وتجي

جهاد.. مو هستوك گلت بالمستشفى
اذا جبتها للبيت راح تشك اكيد

شهم.. لا مو اني راح اخابرك بالطريق واگلك رجعنه للبيت فـ بدورك حاول تفهمها السالفه من خلال كلامك ويايه بالموبايل

جهاد.. ههههه خالو صاير مخرج واني ما اردي

شهم.. هههه الحياة تتطلب الاخراج والتمثيل
عليه الاخراج
وعليكم التمثيل

تبارك.. شلون ما اشوف تالي تجلطون البنيه من ورى تمثيلكم هذا

شهم.. هههه دروحي جيبي موبايلچ حتى تخابرينها گدامي

تبارك.. صار

راحت جابت جهازها وخابرتها گدامي فاتحه سبيكر
من جهه اسمع لهفة مياس وخوفها على نونه ومن جهه ثانيه تمثيل تبارك الصفني الدرجة حتى اني صدگتها رغم معرفتي بكل التمثيله

راح جهاد يجيبها وخابرته بالطريق مثل ما اتفقنه
اول ما سمعت الباب گلت التبارك تفتحه الها حتى تدزها على غرفتها مباشرتاً

وگفت بزاوية الممر انتظرها شويه وطبت تركض ع الغرفه
رحت وراها دخلت لگيتها تدور على نونه .. دارت وجها شافتني گدامها انصدمت

سديت الباب وتقربت باتجاها اضحك على شكلها وداخلي منقهر عليها بس للأسف ما بقتلي خيار غير هذا

شفت شهم تقدم باتجاهي يضحك لو اني تخبلت : شنو يضحك ؟؟

ونونه وينها لعد معقوله صارلها شي وديواسيني بهاي الضحكه !!!
لا لا اسم الله عليها الف اسم الله

صافنه بوجها بصدمه وافكر بداخلي لحد ما صحيت على صوته يصيحني

شهم.. مياس

مياس.. شهم وين نونه ؟؟

شهم.. لتخافين موجوده بالصاله يم منال

مياس.. وخر لعد خلي اروح اشوفها والله گلبي راح يوگف من خوفي عليها

شهم.. مياس اهدي شويه
نونه ما بيها شي .. اني گلت التبارك تگلچ هيچ حتى تجين لهنا

مياس.. صفنت بوجها فاتحه عيوني : انت تحچي صدگ لو دتتشاقه ويايه

شهم.. حددي بيا سالفه صدگ وبيا سالفه اتشاقه

مياس.. لتلعب بأعصابي شهم
نونه صدگ نشمرت لو لا

شهم.. لا ما نشمرت

هو گال هيچ لو اني حسيت گلبي راح يوگف : ما اعرف اضوج من المقلب السوا بيه لو افرح نونه بخير وما بيها شي

ما شفت نفسي إلا اركض علي بحركه سريعه واضربه حيل على صدره بگد الخوف العيشني بي بهاي اللحظات

مياس.. شلون تسوي بيه هالشكل !!!
تدري اجيت اموت إلا شويه .. وحق الله مدا احس بدگات گلبي من ورى شقاك المااااااصخ

شهم.. لزم ايدي يضحك : تستاهلين كلشي صار
شگد حاولت وياچ حتى ترجعين لهنا وانتي معانده اخير شي جبرتيني اسوي هاي التمثيله علمود ارجعچ

مياس.. ترجعني شنو ؟!!
هسه بس اشوف نونه ارجع ويا جهاد البيت اهلي

شهم.. هههههه احچيلچ وياها

مياس.. ليش تضحك !!!
والله ما اظل هنا لو تذبحني .. ما اظل والله ما اظل

شهم.. لتحلفين بابا

هو گال بابا اجيت اخنگه إلا شويه لو ما لزمت نفسي عنه بالگوه
باوعتله بطرف عيني وهزيت ايدي باتسهزاء

شهم.. ههههه شبيچ هيچ تباوعيلي

مياس.. ممكن افهم ليش دتضحك
گدامك قرقوز مثلاً !!

شهم.. هيچ شي

مياس.. شنو انت دتلعب باعصابي ؟!!

شهم.. هم هيچ شي

مياس.. شهم والقرأن مدا اعرفك
ليش هالشكل دتتصرف بس فهمني

شهم.. شنو هو الـ ليش ؟!!
انت متزوجه ومكانچ يم رجلچ وبنتچ مو يم اهلچ
لذالك صار لازم ترجعين ان عجبچ او لا

مياس.. بس احنه اتفقنه نترك بعض فتره وبعدين نتناقش بهدوء

شهم.. واني نفذت الاتفاق
صارلي شهر تاركچ على راحتچ وحتى شكلي ما راويته الچ طول هاي الفتره ولا ضغطت عليچ فد يوم

يعني ما اتصور قصرت بشي لو عندچ غير رأي ؟؟

مياس.. ميخالف اني احتاج بعد وقت

شهم.. شگد يعني ؟!
لما تكبر بطنچ مثلاً او من تجيبين يلا ترجعين لهنا وتفاجأيني بالطفل الـ بايدچ

مياس.. وسعت عيوني : انت شعرفك بحملي

شهم.. ماكو شي يفوتني مياس
بعد ما شفتچ يم المختبر سألتهم عن تحاليلچ وگالولي مسويه تحليل حمل وطلع ايجابي

مياس.. ااااااااف
شهم الله يخليك ما اريد ارجع لهنا ليش مدا تفهمني

شهم.. شتريدين لعد ؟!!

مياس.. دنگت راسي : تطلگني وكلمن يروح بطريقه

شهم.. من كل عقلچ !!
اني من قبل ما اقبل اطاوعچ بهذا الشي هالنوب ابني ببطنچ وتريدين تتطلگين مني
مستحيل مياس مستحيل

مياس.. واني مستحيل ارجعلك بعد السويته بيه

شهم.. ماشي على راحتچ
لعد ظلي هنا لحد متجيبين .. بعدها اخذ ابني والله ومحمد وعلي وياچ

صفنت بوجها مصدومه من رده عليه .. باوعت بعيونه شو هذا ابتسم
فعلاً بديت اتهستر من تصرفاته المدا اعرف افسرهن

مشيت باتجاه الباب دا افتحها حتى اروح وگفني صوته

شهم.. مياس اذا طلعتي من هذا البيت قسماً بالله العلي العظيم ميصير خير وهذا قسم عظيم يكسر الظهر

لحد الأن اني زين وياچ واخاف الله بيچ بكل تصرفاتي بس مو اني التلوين ايدي واوگف اتفرج

اذا عتبتي الباب بخطوه وحده راح تندمين وروح مهيب الغالي وهايني حذرتچ وانتي حره بقرارچ بعد

باوعتله بحزن وخيبة امل لأن مچنت متوقعه منه هذا الشي ابد
فتحت الباب وطلعت من يمه .. صار صوت تهديده بأذني خفت كلش

رجعت بخطواتي ليوره بس تراجعت
درت وجهي ردت اطلع من البيت رجعت سديت الباب ع السريع : خايفه اذا اطلع منا اخسر هواي واندم من قراري هذا

دا اروح للصاله طلع شهم من غرفتي
بس شافني گدامه ابتسم بوجهي .. باوعتله بحقد ومشيت ع السريع لأن ضايجه منه كلش

اول ما دخلت لگيت نونه بحضن منال ركضت عليها قبل حتى ما اسلم عليهم
اخذتها الحضني ابوس بيها حيل

مياس.. يا روح امچ
شتاقيتلچ والله شتاقيتلچ يابعد عمري انتي

جرت دموعي بسرعه
باوعتلي تضحك وتبوس بيه وايدها على وجهي لأن فرحانه بشوفتني مثل فرحتي واكثر

نسيت كل اليمي والتهيت وياها
ظليت بالخمس دقايق ابوس واحضن بيها ممصدگه شايلتها بين ايدي ودا اشم ريحتها الطيبه

شويه وهدأت .. باوعت للكل صافنين علينه والابتسامه على وجهم
استحيت منهم كلش نسيت اسلم عليهم بسبب شوقي النونه

مياس.. خاله اعذريني التهيت بنونه ونسيتكم

الحجيه.. معذوره يمه
شعجب شفناچ بس گليلي شلون انطاچ گلبچ تعوفين نهى وترحين كل هاي الفتره
الطفله نمردت بغيابچ

مياس.. باوعت الشهم : بعد ما اروح خاله
چنت مجبوره على روحتي بسبب حالة ابويه بس خلص ما اگدر ابعد عن نونه اكثر من هالشي

الحجيه.. وشلون صار هسه

مياس.. لا الحمد لله احسن ان شاء الله

الحجيه.. الحمد لله

بوست منال وتبارك وسمر وسلمت على ايهاب بس رنا لبستها لأن من يوم المشكله ما تحاچينه بعد

گعدت وياهم بالصاله .. شويه وطلعوا الولد للشغل
اخذت نونه ورحت الغرفتي
خابرت ابويه حتى انطي خبر برجعتي ليظل باله

اشرف.. ها بابا بشري شصار

مياس.. ماكو شي بابا .. زينه نونه بس راح اظل يمها لأن ما اگدر اعوفها بعد

اشرف.. اي بويه على راحتچ
اگول غراضچ شلون ؟!

مياس.. اي والله كل ملابسي يمكم
يلا اشوف منو ادز عليهم يجوز شهم او جهاد عود انطيك خبر اذا رادو يجون

اشرف.. ماشي يابه

مياس.. سلم على احمد وبوسلي اخواني

اشرف.. يوصل .. هذا وينو واگف گدامي ويسلم عليچ

مياس.. الله يسلمه ويسلمك
اشوفكم بخير

اشرف.. الله وياچ بنيتي

سديت الخط ورجعت النونه ابوس بيها مدا اشبع من ريحتها وعيونها الحلوه

لليل خلصنه العشه والتمينه بالصاله .. ظليت اسولف ويا سمر وتبارك مشتاقه الجمعتنه سوه
فجأه گامت تبچي نونه تريدني اشيلها واوگف بيها

گمت شلتها وظليت واگفه بالربع ساعه لحد ما ظهري وجعني
گعدت ارتاح رجعت تبچي حاولت اسكتها ماكو إلا تريد وگفه

استسلمت ورجعت شلتها بس حتى تسكت .. دخل شهم بهلاثناء سلم ودار وجها عليه يباوعلي

شهم.. ليش شايلتها و واگفه ؟؟

مياس.. تبچي تريد اشيلها متقبل اگعد

شهم.. جيبيها عنچ مو زين عليچ

مياس.. لا شكو عليه قابل

شهم.. خزرني بعصبيه : جيبي ولتعاندين

اخذها مني بسرعه .. باوعتلهم صافنين علينه بس طبعا الحجيه مستحيل تسكت اذا ما عرفت السالفه

الحجيه.. ليش مو زين عليها ؟؟ شبيها يعني

منال.. صاحت بنبرة شك : ولچ مياااااااس

باوعت الشهم يضحك خبلني : مدا اعرف بشنو ديفكر بالضبط
رجعت الحجيه للتحقيق

الحجيه.. شهم دحچي شبيها الفرخه

شهم.. حامل يمه

درت وجهي عليه فاتحه عيوني .. هزلي راسه يضحك بس ضحكته غريبه ماعرفت افسر سببها

هل هي شماته
لو انتصار
لو بداية الأعلان الحرب بيناتنه

هلهلت الحجيه هلاهل بحيث الجيران سمعوهن يمكن
ركضتلي منال ع السريع جرتني من ايدي للغرفه حتى ما لحگت احجي وياها

منال.. طبت وسدت الباب : احچي ولچ من شوكت هاي ؟ وشلون تضمين عليه مثل هالشي ؟!!

مياس.. منال والله مو وكتها

منال.. انچبي لتخليني ابتلي بيومچ
بختچ بلي بطنچ وإلا چان طلعت القضه والمضه بيچ

اتعب واخطط وگاعده احرگ بنفسي ليل نهار وافكر شلون اگدر اجمعكم سوه
تالي يجي شهم يذب القنبله والله شنو مياس حامل

احچي ولچ شوكت تقرب منچ وشلون ؟؟! والاهم من هذا ليش ما فرحتيني بهذا الخبر

مياس.. افرحچ !!!
خليني ساكته منال احسن

منال.. شكو مياس احچي

مياس.. ماكو شي والله
بس صدگي ما صارت فرصه احچيلچ لأن مباشرتاً رحت البيت اهلي علمود رجعت ابويه

منال.. ولو ممصدگتچ بس ما اگدر اجبرچ تحچين اذا ما حابه

مياس.. اي الله يخليچ

منال.. زين ع الاقل گليلي شلون ترى الفضول راح يموتني

مياس.. هههه والله ضحكتيني
ما ادري شلون فجأه صارت

منال.. شلون يعني فجأه ؟!!

مياس.. طلعت من الحمام بنص الليل صار گدامي لأن هستوه راجع من بره
بس شافني سحبني من ايدي الغرفته وصار الي صار

منال.. وشلون شفتي الشغله .. وغمزتلي

مياس.. ياااا
منال شبيچ ؟ صدگ تحچين !!!

منال.. هههههه لا اكيد دا اتشاقه
الله يسعدكم ويگومچ بالسلامه ان شاء الله

مياس.. حبيبتي مشكوره
يوم التوته حتى تجيبلچ اول حفيد

منال.. يسمع منچ ربي
يلا متجين للصاله نگعد وياهم

مياس.. لا اغير النونه والعب وياها شويه بعدين انومها وانام

منال.. على راحتچ

طلعت من يمي خليت نونه ع الچربايه اغيرلها وافكر بلي صار
ما اعرف ليش شهم تصرف بهالشكل وشنو چان قصده من ورى كل هذا

گعدت العب وياها حتى اتعبها وتنام .. اندگت الباب دخل شهم
بس شفته گدامي گلبت وجهي بوجها

مياس.. خير شكو ؟!

شهم.. ههههه شبيچ اليوم !!

مياس.. عود شنو هذا السويته قبل شويه

شهم.. ليش شسويت ؟!

مياس.. والله راح تخبلني
لويش تگلهم مياس حامل بس اريد افهم

شهم.. اول وتالي يعرفون
فخلي يسمعون مني هسه احسن ما ينصدمون ببطنچ على ساعه ههههه

مياس.. يبووووو
والقرأن راح انجلط منك

شهم.. سلامتچ ان شاء الله

صفنت بوجها حايره .. رجعت دنگت على نونه شويه واجه شالها يلعب وياها

عفتهم سوه وطلعت للصاله لگيت الكل موجودين هناك

بس شافني سمر وتبارك گامن الي بسرعه : يبووو على حظي الاعوج لو باقيه يم شهم اشرفلي والله

شلون سالفه هاي يربي !!
شگول عليك شهم شيخلصني اليوم من ورى عملتك المصخمه

تبارك.. وين صافنه مو دا احچي وياچ

مياس.. ها خير

سمر.. امشي الغرفتي ولچ حالياً انتي قيد التحقيق

مياس.. ههههه عفيه كافي ما عاولي سكتت منال هالنوب انتن

سمر.. امشي عيني امشي

اخذني يجرن بيه احاول افلت منهن ماكو .. دخلني وقفلن الباب وراهن

اباوع عليهم تخبلن للاخير
وحده تغمز وتهز بالرگبه
والثانيه تعض شفتها وتحرك باديها

مياس.. هههههه خبال الخبلچن اي والله

تبارك.. اي عيني ليش لا
حقچ تضحكين منو گدچ ست مياس وانتي شايله ابن شهم ببطنچ

مياس.. ليش هو منو شهم ؟! نبي الله مثلاً

بداخلي گلت اي والله هنيالي ولو ضايجه منه كلش بس يظل شهم

سمر.. شو ما عاجبچ ست مياس

مياس.. شلون تالي وياچن اليوم

تبارك.. دحچي حبيبتي ماكو مهرب من الحقيقيه
يا تحچين يا تحچين وانتي بكيفچ اختاري

مياس.. اگول جهاد شلونه وياچ

تبارك.. يلا لچ تردين تغيرين الموضوع

مياس.. اي سموره شخبارچ انتي

سمر.. انچبي واحچي بسرعه مو علينه هالسوالف

مياس.. ههههه يا ربي شلون ورطه
والنبي هسه اطلع اصيحه يشوف حل للسالفه الگشره هاي

سمر.. رفعتلي ايدها تأشر بالمفتاح وتضحك : اطلعي من زرف الباب يحلوه

مياس.. عززززه
ولچن انطني المفتاح خلي اولي .. هسه شهم يعوف نونه وتبچي من متشوفني يمها

تبارك.. والله حبيبتي هذا الشي راجعلچ
تردين تحچين خير على خير وتطلعين منا سالمه غانمه

لا والله عاجبچ تاخذين وتنطين حتى تشردين من السالفه فـ هذا الحچي يفيدچ لأن مراح نعوفچ اذا متخلين بحضنه كل السالفه

مياس.. شتريدن تعرفن ؟!

تبارك.. شلون حبلتي

مياس.. ههههه والله حلوه هاي
شلون يعني حبلت ؟؟

نزل عليه الوحي مثل مريم العذراء وما شفت نفسي إلا حامل بالنبي المتعجبين بي حضراتكم

سمر.. بلا شقه مياس لا اگوم اهلس كفشتچ
قصدنه شلون انجمعتوا ؟!!
مو چنتو بابا وبنته لو مشتغلينه بهاي السالفه وتلعبون علينه من جوه الجوه

مياس.. عزه بعينچ عزززه
هاي بعدچ ممتزوجه وهيچ لو تزوجتي شراح تسوين

تبارك.. شتسوي يعني مثل السويتي انتي وحبلتي نتيجته

مياس.. يااااا
تبارك هاي انتي الخجوله هيچ صايره !! والقرأن صدمتيني كلش

تبارك.. اگلچ سمور هاي ما منها فايده
دگومي خلي نندفها من الكتل لحد متقر بكلشي بكامل ارادتها الحره

سمر.. اي والله گومي

شو هذني چاتن عليه يضربن من كل عقلهم
توجعت من ايدهن وشعري نهلس هلس .. احاول ابعدهن ماكو اخير شي صيحت

مياس.. راح احچي والله راح احچي بس وخرن عني

سمر.. يلا غردي

مياس.. يعني والله ما ادري شلون احچيلچن حتى عيب

تبارك.. العيب بالجيب والحرام بالحمام
فضينه لا نرجع نندفچ عدل خاف ما شبعتي من هالكتله

مياس.. باوعن هي مره وحده والله العظيم

سمر.. صوفرت مثل الولد : الله يحيوووو خاااااااااااالي

تبارك.. لعد شبي حظي صارلنه شهرين نضرب بطناش بالهوى

مياس.. ههههههه لا لا انتن اليوم بيچن شي مو طبيعي
اروح اصيح شهم يسكتچن احسن حل

تبارك.. اگعدي لچ
كملي شلون صارت هاي المره

مياس.. شنو شلون ؟!! صارت بعد اجي اشرحلكم قابل

سمر.. طبعاً تشرحيلنه

مياس.. عيب والله عيب

تبارك.. هم گالت عيب
شو تعاااااي .. جرت شعري عطت بصوت اندگت الباب بسرعه

منال.. شديصير هنا

تبارك.. ليظل ببالچ دنسويلها بالشيره

مياس.. يا يا يااااا

سمر.. انچبي لتتنفسين

منال.. مو وكتچن عوفن البنيه حامل ميصير تشوط

مياس.. منال تعالي خلصيني...
سدت حلگي تبارك ع السريع حتى تمنعني افهمها

سمر.. ميخالف يوم راح نعوفها الخاطرچ

صار هدوء يمكن راحت .. وخرت تبارك مني وهي تضحك عليه

باوعتلهن بمكر لأن المفتاح صار گدامي .. طفرت دا اخذه گمزت سمر قبلي خلته بجيبها

سمر.. يلا عيني اذا انت لوتيه فأني الوت منچ
عود عبالچ ما لگفتچ من باوعتي علي ههههه

مياس.. استسلمت والله استسلمت
راح احچي كلشي بس اعتقني الخاطر الله

تبارك.. يلا نسمع

مياس.. گتلچن هي مره وتحديداً قبل لا اروح البيت اهلي باسبوع

تبارك.. اي فتهمنا .. وغيره ؟؟

مياس.. فد يوم طلعت من الحمام بنص الليل وچنتو نايمين فصار شهم گدامي لأن هستوه راجع من بره
بس شافني سحبني من ايدي الغرفته وصار الي صار

تبارك.. شصار دحچي

مياس.. يا شصار يعني غير تقربلي

تبارك.. شلون

مياس.. اگلچ شو انتي فد نوب صايره ادب سز
اني هم سألتچ شصار بينچ وبين جهاد بيوم عرسكم

تبارك.. بدون متسألين راح اگلچ قابل استحي مثلچ والله يا الله
اسمعن اسمعن

مو عفتني وطلعتن...

مياس.. قاطعتها بسرعه : يا ولچ اسكتي

سمر.. انتي اسكتي
خلي نسمع بطولات اخويه حتى نرجعلچ تسولفيلنه عن بطولات خالي

تبارك.. دسمعن والله تفوتچن السالفه

سمر.. سولفي حبي معليچ بيها كلي اذان صاغيه

مياس.. ههههه سمر السرسريه

سمر.. على الاقل مو من جوه الجوه مثل ما سويتي خاتون

تبارك.. تخلوني احچي لو لا

سمر.. احچي حبي

تبارك.. المهم مو عفتني وطلعتن قفل جهاد الباب واجه باتجاهي

بوقتها مچنت افكر بشي غير بسلامته لأن چنت خايفه علي كلش

گمت ع السريع لزمت ايده بهدوء حتى ليتوجع .. باوعت بعيونه وبچيت

تبارك.. خو ممتوجع حياتي

جهاد.. لا حبي ممتوجع ليظل ببالچ

مسح دموعي بأيده وهو مبتسم .. باس راسي وراها نزل مباشرتاً على شفتي بلا مقدمات

صفنت علي مصدومه لأن ناسيه هاي السالفه من ورى الصار ومتوقعته يتقرب مني وهو بهذا الوضع

تبارك.. جهاد

جهاد.. ها حياتي

تبارك.. احبك

جهاد.. واني اموت عليچ

تبارك.. ارتاح هسه لان تعبان ونأجل السالفه بعدين

جهاد.. عيب عليچ والله
مو جهاد اليأجل عرسه على غير يوم يولي .. وغمزلي

استحيت منه وخفت بنفس الوقت .. دنگت وجهي شو ما حسيت إلا سحبني الحضنه حيل

ما انطاني مجال اتنفس الله وكيلچن .. طبعا وبكل فخر سحت وذبت ومعت بين ايدي

بس تدرن شنو
جهاد يخوف كلش بهاي السالفه .. بيومها شگد اذاني بس ولا حس على ورحه كأنه راح لغير عالم مو ويايه

مياس.. ههههههههههههههههههههه
اني گلت فصل الفيشه وراثه بهاي العائله بس محد صدگني

تبارك.. هههه ليش شهم هم هيچ

مياس.. كلهم حبيبتي
ظل بس يوسف نجربه عن قريب ان شاء الله بلكت ميطلع مثلهم وإلا عليها العوض ومنها العوض التاخذه

تبارك.. خو گولي سمر وفضيها

مياس.. ياااا انتي تعرفين ؟!!

سمر.. اي ولچ تعرف
غير طگت روحي من رحتي فما شفت نفسي غير واني اقر الاول والتالي بحضن هاي العوبه

تبارك.. عوبه بعينچ يولي

مياس.. هههههه يلا لعد خل نحچي بالقلم العريض
سموره تدرين لو طلع يوسف هيچ الله يعينچ صراحه

سمر.. يمعوده عسى ما يطلع طرزان بس خلي يتحرك مو موتني بسكوته

تبارك.. ولچ يا الله يعينها
غير كاتله نفسها علي شدتحچين انتي

مياس.. ههههه بس اسمعي سمر من هسه اگلچ يوسف هم يفصل فيشه لأنه نسخه طبق الاصل من شهم

سمر.. شكو بيها اني هم افصل فيشه ويا
غير احنه من عائله وحده يعني الجينات الوراثيه مشتركه اكيد

مياس.. عزززه بعينچ اي والله
انطني المفتاح خلي اولي بسرعه

تبارك.. اي والله اني هم اروح الرجلي خليتوني اشتاقله نزول عليچن

سمر.. ها حميتي هههه
يلا انتي روحي الجهاد وانتي صعدي الخالي واني اظل احلم بالفيشه شوكت تفصل وتخلصني

مياس.. ههههههه كافي والله بطني گامت توجعني من الضحك لا اطرح بسببچن

سمر.. اسم الله يمعوده
روحن يلا خلني بضيمي

تبارك.. جايچ السره اصبري شويه هههه

سمر.. هو شعندي غير الصبر
قابل اروح افصل الاريل من يوسف حتى يوشوش عليه

مياس.. ههههه يمه بعد ما اتحمل خلي افلت احسنلي

طلعت من يمهن خربانه ضحك بس فعلاً چنت محتاجه اگعد وياهن وانسى همي بسوالفهم الحلوه

دخلت الغرفتي لگيت شهم بعده موجود يم نونه تعجبت

مياس.. شو ما رحت ؟!!

شهم.. غير منتظرچ تجين شلون اعوفها واروح
وين چنتي صدگ ؟؟

مياس.. يم تبارك وسمر

شهم.. ها زين
يلا تعالي لنهى خلي اروح تعبت كلش

مياس.. تصبح على خير

شهم.. وانتي من اهل الخير

طلع مني يمي بس ضربني بچتفي اثناء مـ ديفوت .. ما اعرف سوه هاي الحركه بقصد لو بدون قصد بس المهم خلع چتفي وراح

نومت نونه ونمت بسرعه من التعب
ثاني يوم گعدت ما لگيته لأن چان عنده دوام بالمركز فـ طالع من الصبح

للظهر اجه تغده ومدري شحچه ويا منال وراها صعد ينام

چنه واگفين بالمطبخ نرتب هوسة الغده اني وسمر وتبارك .. دخلت علينه منال وگالت

منال.. يبنات تعبن نفسچن شويه ولمعن البيت زين لان جاينه خطار العصر

مياس.. خير منو راح يجي

منال.. خطابه السمر

مياس.. منو يوسف ؟!!

منال.. لا واحد من جماعة شهم
يلا ما اوصيجن بعد

باوعت السمر اصفرت من الهبطه .. بس طلعت منال من المطبخ انهارت بالبچي

مياس.. يا عمري اهدي بس اهدي والله كلشي ينحل

سمر.. شنو الينحل مياس
دتگلچ واحد من جماعة خالي يعني اكيد راح يوافقون علي بلا تردد ومستحيل يسألوني او ياخذون رأيي بعد الصار

تبارك.. ليش هو شصار ؟؟

سمر.. ماكو شي حبي
اسمعي سموره .. والله حاسه انتي من نصيب يوسف بس خليچ متفائله شويه

سمر.. تضحكين عليه مياس لو شنو ؟!!

يوسف ميريدني وانسحب من حياتي من هذاك اليوم الواجهني بي گدامچ

خلص يوسف شالني من باله مياس والله شالني شالني .. وگامت تشهگ

ما تحملت منظرها وصعدت اركض الشهم : اريد اشوف شلون يقبل تنخطب الصديقه وهو يعرف بيها تحب يوسف ويوسف هم يحبها رغم كلشي صار

دگيت الباب ودخلت چان متمدد دينام بس شافني گام ع السريع

شهم.. خير

مياس.. انت صدگ گايل المنال اليوم يجون خطابه السمر من جماعتك

شهم.. اي

مياس.. وانت موافق !!!

شهم.. طبعا موافق

مياس.. زين ليش ؟!!!!
انت مو تدري بيها تحب يوسف ومتريد غيره

شهم.. بس يوسف ميحبها مياس
اكثر من مره حاولت اجر منه الحچي بس هو قافل لذالك خلي براحته

مياس.. مستحيل ميحبها شهم
هو مجروح من الشي الصار وبنفس الوقت عباله سمر متحبه خصوصاً بعد ما صدته

باوعلي اليحب مستحيل اكو شي ينسي حبه غير الموت ثق بالله العظيم

تقرب مني بابتسامه
فات من يمي سد الباب ورجعلي .. باوعت علي مستغربه تصرفه هذا

ظل يتقرب مني واني ارجع ليوره بخوف لحد ما انحصرت يم الباب

صرت بين شهم وبين الباب ما بيني وبينه غير سنتيم واحد
دنگ عليه حط گصته على گصتي وغمض عيونه.....

يتبع..