#مياس_قلب_الشهم
للكاتبه #لبنى_الموسوي
- بإستطاعتي أنّ أهرُب ,من كل شيء دُون إستثناء
ولكن لا أستطيع الهرُوب من قلقْي وأرقي , من أفكارُ رأسي وإنطفائي حينما اشعر بشيء من الحب نحوك ❤️
_______________________
اخذت جنطتها طلعت وهي تبچي على تدعي على تغلط محتاره شتسوي من حرگة گلبها .. عاينت الابويه رجع يدخن سحبت الجكاره منه
مياس.. كافي بابا
حاچيني شراح تسوي وياها
اشرف.. اطلگها شسوي يعني
مياس.. واخواني ؟؟
اشرف.. شبيهم اخوانچ
مياس.. ناوي تبقيهم يمك
اشرف.. طبعا قابل اعوفهم الهاي ال×××× حتى يطلعون عوج مثل تربيتها
مياس.. زين منو الهم اذا انت طول النهار بالشغل ؟!
اشرف.. ما ادري مياس والله ما ادري
مياس.. عاينت الشهم : بابا اذا طلگت سميحه اني ارجع لهنا حتى اظل يم اخواني
اشرف.. لا يابه شنو هالحچي ؟؟ شنو ترجعين غير انتي متزوجه وعلى ذمة رجال
مياس.. بابا احنه....
قاطعني شهم ع السريع قبل لا اكمل كلامي
شهم.. ابو مصطفى مو مشكله لتشيل هم الجهال
تگدر يوميه تجيبهم المياس تهتم بيهم منا لما ترجع من الشغل وبيوتنا قريبه مراح تاخذ منك الشغله وقت
بس گال هيچ درت وجهي علي متفاجأه وفرحانه بنفس الوقت
لان ما اگدر اعوف نونه هاي بنتي الما جبتها بس بالمقابل اخواني هم خطيه منو الهم اذا اني ما اوگف وياهم بمثل هيچ ظرف
اشرف.. لا بويه منريد نزحمكم اخاف الاهل يتضايقون من هالشي .. خلي الموضوع ربك يدبره بمعرفته
شهم.. ابو مصطفى البيت بيت مياس قبل الكل ومن حقها تستقبل بي اخوانها شوكت متحب بدون متلگه اعتراض من اي احد
مياس.. اي بابا عفيه وافق
اصلا اهل شهم كلهم طيبين .. متأكده مراح يضوجون من وجود اخواني ويايه طول النهار
اشرف.. الله كريم بنيتي خلي احل الموضوع ويا سميحه ولكل حادث حديث
مياس.. درت وجهي : شهم تريد چاي
هز راسه بمعنى اي ... رحت للمطبخ وانصدمت كلش من المنظر الصار گدامي
المواعين مكومه للضالين
الگاعيه سوده مصخمه من الوساخه
الريحه تكتل
الطباخ سيان
الكاونتر ميتعاين من الهوسه
اجيت اتقيء إلا شويه
گمت اعاين مثل المخبله ما شايفه هيچ قذاره بكل حياتي لأن چانت معتمده عليه بكلشي
افتر داير مداير نفسي اريدلي شي نظيف اسوي بي الچاي ماكو لا قوري لا خاشوگه لا استكان .. واني بهاي الحاله طب شهم عليه وطبيت بنص هدومي ويا طبته
بعد ما وصلت مياس الاهلها دخلت وياها لان ابوها اصر واني هم ما اگدر اعوفها هناك الوحدها
فرحت لمن عرفته طرد مرته وقرر يطلگها لأن هذا اقل جزاء تستحقه على كلشي سوته .. اثناء مدتحچي مياس ويا ابوها تفاجأت بيها طلبت منه ترجع للبيت علمود تبقى يم اخوانها
ضجت كلش....
يمكن لان تعودت على وجودها بحياتي
او يمكن لان هي ام بنتي بالفعل والطفله متعلقه بيها كلش بعدما فتحت عيونها على ريحتها
او يكون السبب خوفي من رجوعها الابوها لان ما اضمن يكون گد المسؤوليه ويگدر يحافظ عليها من الدنيا ومشاكلها
تدخلت بسرعه وقنعته يجيب الجهال يمنه
من جهه مياس تفرح بيهم وتلتهي وياهم
ومن جهه ثانيه تنحل السالفه من يمه لان شفته شلون حاير خطيه بعد كلشي صار
چنت بيومها تعبان كلش ما عاولي ارجع للبيت حتى انام شويه بلكت ارتاح من وجع راسي بس اكتشفت مياس مناويه ترجع بعدما سألتني تريد چاي
وافقت لأن حسيت راسي يريد ينفجر .. راحت تسوي الچاي فكرت اگوم وراها بلكت احچي وياها تستعجل شويه ونرجع ساعه گبل حتى ارتاح من هالدوخه
شهم.. ابو مصطفى
اشرف.. ها حبيبي
شهم.. اگدر احچي ويا مياس
اشرف.. اي اكيد
تلگاها بالمطبخ واعذرنه مقدماً عن هوسة البيت
شهم.. معذورين خويه
گمت من يمه وكل ظني من تعذر چان يقصد هوسة الصاله بس انصدمت من طبيت للمطبخ وشفت القذاره المتنوصف
عاينت المياس بعيون مفتوحه دنگت مني بسرعه .. تقربت عليها اتلفت ممصدگ الدا اشوفه بعيوني لأن عمري كله مشايف هيچ وضع مزري ومريب بنفس الوقت
شهم.. مياس شنو هاي ؟؟!!
مياس.. اي لعد شحسبالك
العيشه ويا سميحه قذره قلباً وقالباً
شهم.. سديت خشمي بأيدي : يا بويه شلون متحمله تعيش بنص هالوساخه بس اريد اعرف
مياس.. انت شجابك لهنا
دروح للصاله بين ما اسويلك الچاي
شهم.. ولچ
يا چاي
يا صخام
الخاطر الله
ليش بعد الشفته اگدر اتقبل شي بمعدتي
راح اتقيء وروحه الابويه
مياس.. ههههه لعد شلون
شهم.. امشي خـ نروح
مياس.. وين شهم مدتشوف الوضع ؟؟
على الاقل انظفلهم البيت شلون تريدني اروح واعوف هل هوسه ورايه
شهم.. مياس وحق القرأن راسي راح ينفجر من التعب
اريد انام حسي بيه
مياس.. اي حاسه بيك والله بس شسوي متگلي
زين روح وتعال عليه بلليل
شهم.. مستحيل
وها ذكرتيني بعدين احاسبچ شلون تگولين لأبوچ ارجع لهنا لو طلگت سميحه
مياس.. مو انت
شهم.. اشششش لتكملين
مياس.. هسه شلون
شتريد بالضبط بس فهمني
شهم.. اريد انام
مياس.. عاينت العيونه : ههههه تدري عيونك صايرات احمر وجوزي الابيض مختفي حالياً
شهم.. وشنو اليضحك بالموضوع خاتون
درت وجهي للمطبخ : اگلچ احنه شلون دنحچي بهل خيسه الخاطر الكائنات
مو بعد دقيقه لو نظل هنا نتجرثم ومحد يلگالنه علاج
مياس.. ههههه تجرثمنه ورحنه
زين بما انك متريد تروح فـ شنو رأيك تنام هنا
شهم.. وين بالطبخ
مياس.. ههههههههههههه لا طبعا
بغرفتي اني واخواني
شهم.. خاف الگاها اضرب من هالمكان
مياس.. والله مو بعيده على سميحه بس ولا يهمك مهما كان الوضع يترتب بخمس دقايق
شهم.. ههههه دمشي يلا لان راح يغمى عليه من التعب
اخذته وطلعنه من المطبخ .. رحت للصاله لگيت ابويه يشرب جگاير ويتصفن كالعاده انقهرت علي كلش
مياس.. بابا
اشرف.. ها بابا
مياس.. راح اخذ شهم الغرفتي يرتاح شويه لان خطيه الصبح رجع من دوامه وما گدر ينام لحد الأن
اشرف.. اي بنيتي البيت بيته خل ياخذ راحته
شهم.. رحم الله والديك
رحنه للغرفه فتحت الباب لگيت اخواني ديلعبون .. عاينت للمكان صح هوسه بس ارحم بهواي من وضع المطبخ
مياس.. صفاوي
مصطفى.. ها ميوسه
مياس.. اخذ دودي وروح البابا لان عمو يريد ينام هنا
مصطفى.. منو ؟؟ هذا ... واشر على شهم
مياس.. عيب تگول هذا
مصطفى.. العفو
شهم.. دنگت يمه اضحك : انت شسمك يا بطل
مصطفى.. مصطفى
شهم.. تشرفنا مصطفى باشا
مديتله ايدي اصافحه : واني اسمي شهم
مصطفى.. اهلا عمو انت تصير رجل مياس
شهم.. ههههه اي
مصطفى.. بس اتذكر شكلك مچان هيچ
شهم.. اي مو كبرت
مصطفى.. هااا
مياس.. يلا كافي حچي سوي الگتلك علي بسرعه
مصطفى.. يلا مياده نروح يم بابا
طلعوا من الغرفه .. لملمتها ع السريع شلون مچان لان شفت شهم تعبان كلش وبس يريد ينام
عاينت للكنتور المندر مالتي علي .. خليت الكرسي دا اصعد اجيبه جرني شهم
شهم.. هاي شدتسوين ؟!!
مياس.. اجيبلك المندر غير
شهم.. واني شنو واگف هنا ؟!!
حايط مثلاً .. لو تمثال
مياس.. ههههه انتَ ليش بسرعه تصير عصبي
شهم.. شسوي اذا الداير مدايري كلهم يطلعون الروح مو بس الاعصاب
مياس.. ديلا نزل المندر حتى افرشه الك
دفع الكرسي وجاب المندر بكل سهوله لانه طويل ما شاء الله
انطانيا فرشته وطلعتله مخاديد نظيفه من الكنتور خليتهن وگتله : تفضل نام
شهم.. عاينت الروحي : شلون انام بلا بملابسي هاي !!
مياس.. اي صح
شوف اني راح اطلع وانت انزع ونام براحتك محد راح يدخل عليك لتخاف
شهم.. زين انطيني چرچف اتغطى بي ع الاقل
مياس.. اي تتدلل
طلعتله الچرچف
انطيتهيا ورحت للباب داطلع تذكرت شي .. درت وجهي اسأله انصدمت من شفته نازع القميص وظال بس بالفانيله الداخليه الضاهر مستعجل حتى ينام
مياس.. شهم
شهم.. نعم مياس
مياس.. اگعدك لو تگعد وحدك
شهم.. لا اني اگعد
اصلاً ما اتصور راح اطول بالنومه لان مو مكاني هذا
مياس.. ماشي
اخذ راحتك رايحه اني
طلعت وسديت الباب ورايه .. رحت بوجهي للمطبخ جلفته جلفه مال ييز وقهر
فوگ الساعه يلا خلصت منه وراها بلشت بالبيت لحد ما ظهري انكسر
اجيت امسح الجام انصدمت من شفت الدنيا اظلمت
عاينت الابويه مستغربه
مياس.. بابا شوكت صار الليل ؟!!
اشرف.. ههههه الله يساعدچ بنيتي التهيتي تنظفين قذارة سميحه لما مر الوقت بلا متحسين علي
تعبناچ بويه عاشت ايدچ
مياس.. لا بابا شنو هالحچي ماكو اي تعب اصلا تونست بالشغل
بگلبي گلت : اخ ظهري بعد ما احس بي من ورى سميحه الوسخه
اشرف.. شفتي رجلچ اخاف گعد ويستحي يطلع
مياس.. عززززه شلون نسيته هيچ
رحت اركض فتحت الباب على كيف وما صدگت من شفته بعده نايم لدرجة خفت ليكون صايرله شي لا سامح الله
فتحت الثريا علمود ضواها خافت حتى ليتأذه بضوه الگلوب القوي .. تقربت منه بهدوء عاينت الصدره يصعد وينزل بالنفس ردتلي روحي شويه
چان ذاب الچرچف بس على رجله .. شابك ايده فوگ راسه ونايم بعمق بحيث حتى ميتحرك مجرد بس يتنفس بوضوح
صفنت ويا روحي حايره اگعده لو لا .. اخذتني صفنتي الملامحه الحاده
ما اعرف شبيه گمت اركز بتفاصيل وجها وليش دا احس باحساس غريب واني اعاين علي
نفضت راسي بخوف مو طبيعي .. طلعت ع السريع وسديت الباب ورايه بس احس روحي دتطلع من الوجع الصار بصدري ساعتها
اشرف.. ها شنو بعده ما گاعد
مياس بابا مو احچي وياچ
ميااااااااااس
چنت احس على ابويه ديحاچيني بس ما اگدر اجاوبه ما اعرف ليش مثل المتربطه .. فزيت على صوته من صاحني بقوه
مياس.. ها بابا دتصيحني
اشرف.. صارلي ساعه احچي وياچ
شبيچ بنيتي صاير شي ؟؟
مياس.. هااا
لا
لا كلشي ما صار .. قابل شيريد يصير يعني
اشرف.. بويه شجرالچ احد كضبچ من عقلچ لو شنو بالضبط
هسه ع العموم حاچيني رجلچ گعد لو لا ؟؟
مياس.. منو تقصد
اشرف.. ههههههه لا حول ولا قوة إلا بالله
شبيچ بويه تسودتني
شهم يمعوده شهم
مياس.. ها لا بعده مبين علي تعبان خطيه
اشرف.. زين لعد ديري بالچ على اخوانچ
اروح اتسوگ وارجع فشله من الرجال لازم يلگه العشه جاهز اول ميگعد
مياس.. ماشي بابا
راح يتسوگ ظليت گاعده يم اخواني اتصفن ويا روحي حتى ايدي متاخذ ع الشغل بعد
مياس.. شبيچ مياس ؟!!
والله انتي فلا صاحيه اي اي مو صاحيه
شنو مو صاحيه بابا انتي مخبلللللله
لا والله مخبلة شنو المخبل يحس انتي حيوانة اي ااي حيوااااانة
مصطفى.. شبيچ ميوسه ويامن دتحچين
مياس.. ويا الحيوانه
مصطفى.. منو هاي
مياس.. وحده متعرفها
مصطفى.. اگلچ اني جوعان
مياس.. حياتي انت
اصبر شويه هسه بابا راح يجيبلنه شغلات طيبه اسويهن الك ع العشه
مصطفى.. اخاف يتأخر
مياس.. لا ميتأخر ان شاء الله
عفتهم ورحت للمطبخ .. ظليت حايره شسوي عشه بعدني افكر ويا نفسي انفتحت الباب وطب ابويه
اشرف.. تعالي اخذي مني بابا
مياس.. صار
اشرف.. اگول شنو انتي بعدچ بحجابچ شنو السالفه ؟!!
مياس.. هاا
مو دا اشتغل حتى ليدمر تراب ودهن ومن هالسوالف
اشرف.. خوش
اخذت المسواگ من ايده ودخلته للمطبخ .. فتحت العلاليگ اشكال جايب خطيه
صفنت على المواد اجه ببالي اسوي كباب .. بلشت عجنته وحضرت الزلاطه والفنگر بين ما اختمر شويه و وگفت اگلي بي
نص ساعه وكملت كلشي .. فرشت السفره خليت العشه عليها ورحت اگعد شهم لان صارت التسعه
دخلت للغرفه بعده نايم على نفس الوضع .. تقربت منه وصحته اكثر من مره بس ولا حس عليه اخير شي طخيته بأيده
مياس.. شهم گوم
شهم.. فز مخروع : ها شكو !!
مياس.. اسم الله شبيك اخترعت
شهم.. شنو هاي صار الليل ؟!!!!
مياس.. اي
شهم.. ليش بيش ساعه هسه
مياس.. بالتسعه
شهم.. لا بشرفچ
ردت اوخر الچرچف اگوم همزين تذكرت اني نازع البنطرون
مياس.. طالعه اني
گوم البس ملابسك وغسل حتى تجي تتعشه ويانه
شهم.. لا يا عشه لازم نرجع للبيت فوراً
مياس.. سويته بعد
وابويه هم خطيه طلع علمودك تسوگ ودينتظر بالصاله
شهم.. يلا هسه جاي وراچ
طلعت من يمه رحت للصاله .. شويه وشفته وگف يم المغسله غسل واجه سلم
اشرف.. صح النوم
شهم.. اعتذر والله
ما حسيت على نفسي من التعب
اشرف.. براحتك يابه على شنو تعتذر بيتك هذا
شهم.. مشكور ابو مصطفى
گعدنه نتعشه وعيوني تراقبه .. انتبهتله ما اكل شي مع انو ابويه لح علي كلش بس بلا فائده
گمت ع السريع لملمت السفره ونظفت المطبخ حتى ارجع النونه لان حيل اشتاقيتلها
ما ادري شمسويه بدوني هسه بس شويه مرتاحه لأن منال يمها
وديتلهم الچاي ورجعت اكمل الشغل بين ميشربون .. شويه وطب شهم للمطبخ بأيده الصينيه
شهم.. اي هسه البيت صار مال اوادم
عاشت ايدچ
مياس.. وايدك
يلا نروح ترى كلش شتاقيت النونه
گلبي طگ عليها
شهم.. تحارشت بيها لان شفت اللهفه بعيونها : وليش نروح ؟! ظلي هنا اروح وحدي
مياس.. شنو اظل ؟!!
ونونه شلون اعوفها
شهم.. شكو عليها منال وامي يمها
مياس.. صدگ تحچي شهم !!!!
شهم.. هههههه يابه لتموتين
دا اتشاقه وياچ ليش انخطف لونچ
بعدين اذا ما بيچ حظ ومتگدرين تفارگيها شكو تبيعين بطولات براسي قبل كم ساعه
مياس.. هو هذا هم شقه الله عليك
ديلا بسرعه اخذني الها بعد ما اتحمل اكثر
شهم.. هههه امشي بويه امشي
مياس.. دقيقه بس اغسل الاستكاين
شهم.. يلا انتظرچ
خضيتهن ع السريع وطلعنه سوه .. سلمنه على ابويه ورجعنه للبيت هستونه دنصعد السياره دگ موبايل شهم
شهم.. هاي منال
مياس.. خير يارب
شهم.. يجوز ظل بالها لأن تأخرنه كلش
مياس.. دجاوب بسرعه شوفها شرايده
شهم.. ها خويه
منال.. وين صرتوا خويه
شهم.. اسمع صوت نهى تصرخ : هاي شبيها تبچي هالشكل
منال.. ليش هيچ سكتت
الله وكيلك من عفتوها لحد الان على فد صرخه لان تريد امها
شهم.. جاين خويه بالطريق
دقايق ونصير يمكم منتأخر حاولي تسكتيها خطيه گلبها انگطع
اسمعه يحچي ويا منال واغلي بداخلي على نونه .. اول ما سد الخط نزلت دموعي بلا وعي لان حسيت نفسي مو گد هل امومه لمن قررت اتركها وارجع الاهلي بكل انانيه
مياس.. سوده عليه دتبچي مو ؟؟
كله مني شلون عفتها كل هالفتره
شهم.. وانتي ليش دتبچين لو ع الواهس
مياس.. اكيد فرفح گلبها عليه واني نسيت نفسي هنا
بس والله ما نسيتها كل الموضوع ابويه واخواني چانو محتاجيني شويه وما گدرت اعوفهم بهيچ وضع
مع ذالك غلطت لمن خليت نونه كل هالوقت وحدها .. شلون ما فكرت ممكن تستفقدني وتبچي بدوني
شهم.. بويه اهدي شجاچ مصار شي
هسه نوصل وتاخذيها الحضنچ وكلشي ينتهي
مياس.. استعجل شهم الله يخليك استعجل
شهم.. ههههه مستعجل وعيونچ
اول ما وصلنه نزلت اركض .. وگفت يم الباب لان ما عندي مفتاح دگيتها حيل بس محد طلع
اجه شهم حط ايده ع القفل فتح الباب جهاد قبله
جهاد.. واخيراااااااااااا
الحگولنه دخيل ربكم
راسنه انفجر من نهاوي يمعودييييييييين
شهم..ههههه وجع لتصيح فضحتنا شبيك
فتت من يمه ع السريع .. بعدني ما داخله للصاله سمعت حسها تفرفح
ركضت بكل سرعتي جريتها من منال بلا ما اسلم عليهم
مياس.. يا روحي انتي
يا عمر امچ .. الله ياخذني لام عفتچ طول النهار على هالحاله بس والله مو بيدي
ظليت ابوس واشم بيها دقيقه وسكتت بيدي .. حضنتها حيل على گد ما چنت مشتاقه الها لحد ما سمعت الحجيه تگول
الحجيه.. شوف الفرخه
طول النهار صرعتنه بالبچي بس اجت مياس شالتها دقيقه سكتت ولا چنها سودنتنه ساعات وساعات
منال.. غير امها طبيعي تسكت بحضنها وترتاح
اول ما دخلت شفت مياس شايله نهى وتصرخ بأديها
بوستها تعتذر منها فجأه سكتت من البچي
بلشت امي تهجم ومنال تدافع اعاين المياس مو يمهم ملتهيه تضحك ويا نهاوي وتحضن بيها
مياس.. منال الزميها شويه خلي اسويلها ممه حتى انومها
منال.. لا عيني لا
هلكت طول اليوم من وراها
انطيها الابوها خل يبتلي بيها شويه لو بس فالح يخلف ويشمر علينه
شهم.. اخذتها من حضن مياس : ههههه جيبيها عمي الله ليعوزنه عليكم اليگول شامر عليها بزونه
منال.. ايباااااااااااااااااا
خليني ساكته لان بس احچي اطلع قهر اليوم بيك وبالدبدوبه الشايلها بحضنك
شهم.. هههههه مياس رايح الغرفتچ لتتأخرين
مياس.. اي جايه وراك
اخذها وراح للغرفه .. سويت الممه ع السريع ورجعت لگيته ديفتر بيها وهي بس تبچي
شهم.. هاي شنو مياس ؟!!
حقها منال تجزع من هالوضعيه
شجاها مدتقبل تسكت حتى بلاعيمها طگت من الصياح
مياس.. غير نعسانه سوده عليه
شو ناوشنياها بسرعه
گعدت ع الچربايه تربعت وخليتها بحضني سكتت گبل ... انطيتها الممه ماكو ثواني وغفت على ايدي من التعب
رفعت راسي لگيت شهم صافن علينه ومبتسم .. حچيت بصوت خافت حتى لتگعد
مياس.. شبيك تضحك ؟!!
شهم.. لا هيچ ماكو شي
مياس.. اشرتله على شفتي : اشششششش
لتگعد يمعود نصي صوتك
شهم.. هههه تردين شي قبل لا اروح
مياس.. وين رايح ؟!!
شهم.. اصلي واطلع اشوف يوسف واگضي چم شغله من طريقي
مياس.. لا سلامتك
ها صدگ جيب النونه حليب وحفاظات
شهم.. صار
طلعت من يمها صليت ورحت بوجهي للمركز .. سألت على عماد گالولي حالته مستقره بس بعده بالمستشفى
خابرت يوسف وتقابلنه بالجم مثل العاده
يوسف.. ها شهم شلون صرت
شهم.. الحمد لله احسن
يوسف.. يستاهل الحمد
اگول شناوي تسوي بعماد الساقط
شهم.. اعدمه العافيه غير
وغلاتك عندي إلا اخلي يتمنى الموت وميشوفه منا لما الله ياخذه بأرادته
يوسف.. بعد ايدي لتقصر ويا
شهم.. لتوصيني يخوي
گلبي موجر منه ومن افعاله النگسه صارله سنيين
يوسف.. ديلا خلي نتمرن
من وراك صارلي اشهر مشايف الجم حتى كرشي بده ينط
شهم.. هههه شعليك بيه والله حلوه هاي
يعني شنو كلما التحق تعتزل كلشي
بلا متت شراح تسوي ساعتها !!
يوسف.. اسم الله عليك شنو هالحچي الماصخ
بعدين اي مكان مابي شهم اني ما اريده
شهم.. حضنته اضحك : الله يخليك الي اخوي الذهب
يوسف.. ويخليك الي حبيب گلبي انت
بس احسدك بشرفي
شهم.. على شنو ؟؟ على طيحان الحظ مثلاً
يوسف.. ههههه لا على كرشك المسفوط
عود ليش متكرش وانت اشهر متتمرن الخاطر ربك
شهم.. هههههه ولك انت شايف الحصو الناكله هناك
الله وكيلك ما اگعد بالگاع إلا بس وقت النوم وساعتين مو اكثر شلون تريده ينط بلا
وفوگاها قائد فرقه يعني ٣٠٠ جندي براسي تعال وجههم واركض وراهم حتى تسيطر على الوضع قبل لا يفلت منك
يوسف.. ههههه اتشاقه وياك
اعرف والله ومقدريلكم هالشي انت وكل الابطال الوياك
شهم.. ديلا خلي الحچي عنك مو ضاع الوقت
ظليت ويا ل١٢ يلا رجعت للبيت .. دگيت الباب على مياس گالت تفضل بصوت بالگوه ينسمع عرفت نهاوي بعدها نايمه
شهم.. السلام عليكم
مياس.. وعليكم السلام
شهم.. هاي شنو ؟!! معقوله بعدها نايمه
مياس.. اي مو منال گالت ما نامت ولا دقيقه فطبيعي تتعب هالشكل
شهم.. زين لعد هاي الحليب والحفاظات
مياس.. اي عاشت ايدك
شهم.. وايدچ
انتي شعندچ گاعده
مياس.. چنت بالحمام هستوني طلعت
بس انشف شعري وانام
شهم.. حمام العافيه
مياس.. الله يعافيك
مر اكثر من اسبوعين والوضع هدوء تقريباً .. ابويه طول هاي الفتره اخذ اجازه علمود اخواني ويوميه اخابره بلكت يقتنع يجيبهم يمي ويرجع للشغل بس بلا نتيجه
اما سمر فحالها ظل مثل ما هو .. الكل زعلان منها ومحد راضي يسامحها او يحچي وياها ع الاقل
چانت تروح للجامعه وترجع الغرفتها متطلع إلا ثاني يوم للدوام حتى الاكل اني اودي الها لان لو عليها متحط لگمه بحلگها من القهر التحس بي
فد يوم چنت واگفه بالمطبخ اسوي العشه وحدي لان رنا ببيت اهلها تفاجأت بسمر دخلت عليه
مياس.. واخيراً طلعتي من الغرفه
سمر.. مياس اريد احچي وياچ ضروري
مياس.. اي مو تتدللين
وين تردين نحچي هنا لو بغرفتچ
سمر.. لا بغرفتچ انتي لأن محد يجي لهناك
مياس.. مثل متحبين
طفيت النار ورحنه للغرفه .. گعدت ع الچربايه اعاين عليها مرتبكه هزيتلها براسي بمعنى اسمعچ شو هاي گامت على حيلها
مياس.. شبيچ
سمر.. بطلت ما رايد شي
مياس.. رادت تطلع صرت گبالها : وين حبي ؟!!
گولي من شنو خايفه احنه مو اتفقنا نصير خوات ونحچي اسرارنا البعض
سمر.. مياس ... وسكتت
مياس.. هسه غير تحچي وتفضها
سمر.. اني احب يوسف
مياس.. استغربت كلش : من شوكت ؟!!
سمر. من زمان
مياس.. بس انتي قبل فتره گلتي ما احبه
وعلى ما اذكر الولد اجه اعترفلچ بحبه وصديتي .. صح لو اني غلطانه
سمر.. صح
بس سمعي القصه وانتي حكمي
مياس.. يلا سولفي اسمعچ
سمر.. اول ما فتحت عيني صار يوسف گبالي بحكم صداقته القويه ويا خالي شهم فچان يتواجد يمنه اغلب الاوقات
ما انكر چنت معجبه بي كلش بس اكو هواي امور تمنع گلبي يدگ اله واولها يشبه خالي بشكل مو طبيعي
مياس.. وهذا شي مو زين برأيچ ؟؟!!
سمر.. بهذاك الوقت اي
مياس اني ربيت بهذا البيت بين ٣ زلم
واحد اضرب من الثاني بالتعقيد لدرجة چانوا يحسبون عليه الهوى الاتنفسه
مياس.. غير خايفين عليچ ترى حقهم سمر
سمر.. وياچ اني
بس كلما بالموضوع چنت مختنگه من هالوضع وحلمي الوحيد ارتبط بانسان سبورتي وهادئ ميشبه اي واحد بيهم
بمرور الايام بديت اكتشف بيوسف شغلات تناقض تفكيري تماماً .. ومن هاي الشغلات
عصبيته
غيرته الزايده
تعقيده المبالغ بي
شبها الخالي
فارق العمر البيناتنا
كل هلامور خلت من يوسف بنظري شي مستحيل لذالك توقفت عن التفكير بي لحد ما اجتني نهى الله يرحمها وگالتلي شغله صدمتني صراحه
مياس.. وشنو هي ؟؟
سمر.. گالت يوسف معجب بيچ ويريد يتقدملچ
هذا الحچي چان قبل زواجچ من خالي مهيب الله يرحمه بكم شهر
مياس.. اي وشنو چانت ردة فعلچ
سمر.. انصدمت كلش
اني ما عاولي اطلعه من بالي وافكر صح تالي بهذا كلامه رجعني لنقطة الصفر
رفضت بلا ما افكر بأي شي .. تفاجأت بنهى گالتلي مراح اگوله رفضت لأن اريدچ تفكرين زين ترى يوسف فرصه متتعوض مو لأن اخويه بس لأنه يوسف وبس
المهم عشت بحالة صراع بين گلبي اليريده وعقلي اليرفضه بكل ما بي .. بعد فتره بسيطه صارت عدنه مناسبه عرس ابن خالة امي الچبيره
رحت للحفله ويا جهاد .. صار وقت الزفه من الهوسه بعد محد يشوف الثاني
تيهت كل اهلي حتى خوالي واخويه اريدلي واحد اصعد ويا ماكو لحد ما شفت صفاء اخو العريس
صحته ع السريع : صفاء اجيت والله جابك
يمعود اخذني وياك محد صعدني ويا كلهم نسوني
جاوبني بضحكه : تعالي اصلا اني وحدي محد ويايه بالسياره
صعدت ويا بالصدر عادي يعني بحكم اقارب و واحدنه متعود ع الثاني .. بلشت الزفه شغل اغاني وبدت الونسه طبعا صفاء سبورتي كلش عكس اخوته
ظل الطريق كله يغلط على جماعته وهم يتحارشون بي صراحه تونست كلش ويا چانت الزفه بكوم وتصرفات صفاء واصدقائه بكوم ثاني
بنص الطريق دار وجها عليه بابتسامه : سمر شطولچ شعرضچ هلهوله متعرفين
دسمعي النسوان شلون خبصن الدنيا وانتي مگضيتها بس تصفگين
والله لو مصعد ويايه خالتي سهامه هم اشرفلي
جاوبته : مع الاسف عليك اني ما اعرف اهلهل دسمع لعد
وچان اطگه بهلوله معوقه هو من الضحك تيه السياره وراد يگلبنه إلا شويه
ما حسينه إلا يوسف شخط سيارته گدامنه ونزل بعصبيه .. اجه باتجاهي فتح الباب جرني من ايدي حيل وعاط بيه : شدتصخمين انتي هنا
جاوبته : هاي شبيك يوسف
شسوي يعني غير بالزفه
يوسف..وشصعدچ ويا صفاء
سمر.. وشكو بيها يعني قابل صفاء غريب !!
صفاء.. شبيك يوسف صاير شي ؟؟
يوسف.. لا صفاء مصاير شي
تعال اخذ النسوان من سيارتي وخلي سمر ويايه
صفاء.. ليش ؟؟
يوسف.. بدون ليش اسمع الكلام
نزل النسوان راحن ويا صفاء واني صعدت ويا .. ظل فتره طويله ساكت ما حچه كلمه
اعاين الوجها يريد ينفجر من العصبيه فما تحملت وسألته بسرعه :
سمر.. شبيك يوسف صاير شي ؟!
يوسف.. لا عيني سلامتچ شبيه يعني قابل
سمر.. لا صدگ
احچي اريد اعرف شنو المضوجك لهل درجه
وگف السياره بسرعه وجرني من ايدي .. ظليت صافنه بوجها متفاجأه من حركته كلش
يوسف.. الزفه كلها لازم نفسي عنچ گوه واني اشوف شقاچ وضحكچ ويا صفاء وجماعته
انتي شنو من بشر ؟!!
ما عندچ خجل
ما عرف شهم يربيييييييييچ
سمر.. عتيت ايدي منه وصيحت حيل : احترم نفسك خالي رباني وتعب عليه متجي انت على اخر الوقت تقيم تربيتي واخلاقي
اسمع يوسف مو من حقك تتحكم بيه لان ماكو شي يربطنه غير الدم
اني رفضتك من اول ما اجت نهى وگالتلي بطلبك بس هي اصرت تضم عليك على امل ارجع بقراري
اطمأن انت وياها .. لو تظل اخير رجال بالدنيا ما افكر ارتبط بيك على هاي عقليتك المتخلفه تسمعني لو لا
يوسف.. لزمني من فچي : هاي عليمن ولچ
منو المتخلللللللللف
سمر.. اي هدنيييييي
ليش تخليني اگول الخالي عليك
يوسف.. حرك السياره بلا ميجاوبني وصلنه يم خالي مهيب نزلني ويا
شفته دار السياره وراح ما اعرف وين يمكن رجع للبيت
من بعد هالشي قررت الغي يوسف من حياتي والسبب گتلچ علي ... مو هو الانسان السبورتي الاحلم بي بكل عمري
مرت السنين ومن وقتها ما صار حچي بيناتنا اني ويا حتى السلام صار رسمي مو مثل قبل
اجه الوقت التعرفت بي على عماد الله ينتقم منه .. عيشني باحلام ورديه لدرجة حسيت نفسي ملكه ويا : واخيراً حصلت على الانسان الاحلم بي واكثر هم
چان راسم لروحه صوره بعيوني احلى من الخيال .. وهمني باخلاقه وطيبته وحرصه عليه
هاي من غير اختلافه الجذري عن خوالي ويوسف لان چان سبورتي ومرح وحتى من اغلط بشي يناقشني ميفرض رأيه بلا ميسمع رأيي
وبعد ما صار الي صار وبين عماد على حقيقته القذره عرفت بنفسي غلطانه
طول هاي الايام اني انام واگعد افكر بيوسف
صرت متأكده كلشي چان يسوي من خوفه وحرصه عليه بس اني غبيه مچنت اعرف مصلحتي وين وحسبالي يريد يتحكم بيه لمن يتصرف بهل شكل
صح اذاني من فضحني گدام اهلي بس مثل ما گال ما اگدر اذب الصوچ بي واني الغلطانه لأن هو رجال واني عرضه
يعني صعب يشوف المنظر الصار گدامه ويظل ساكت
مياس.. يعني شنو هسه
انتي تحبي ؟؟
سمر.. اي مياس احبه كلش
بس شنو النتيجه بعد كلشي صار مستحيل يعاين الخلقتي مره ثانيه
مياس.. منو يگول
اذا يحبچ صدگ راح يسامحچ ويبدي وياچ صفحه جديده خصوصا اذا عرف بحبچ اله
سمر.. ما اتصور
مياس.. جربي شخسرانه قابل
سمر.. شلون اجرب
مياس.. اممممم مثلا راسلي
سمر.. ومنين اراسله مو تدرين ما عندي جهاز
مياس.. عاينت للميز : بس اني عندي
سمر.. ههههه شنو يعني اراسله من جهازچ
مياس.. اي شكو بيها بس كون تجيبين رقمه
سمر.. يمعوده رقمه ماكو اسهل منه هن رقمين ومكررات
مياس.. هاچ لعد راسلي
سمر.. شگله بلا
مياس.. انتي وشطارتچ بعد .. قابل اجي اعلمچ
سمر.. زين ظلي يمي
ساعديني ع الاقل الله يخليچ
مياس.. هههه يلا راح اظل لتتوسلين
سمر.. ههههه عابتلچ
اخذت الجهاز كتبت الرقم وخزنته بجهات الاتصال .. دخلت ع الفايبر راسلته اقل الدقيقه جاوب
🗯️ شلونك يوسف
🗯️ الحمد لله
منو ويايه ؟
🗯️ سمر
🗯️ منيلچ جهاز !!!!
🗯️ مالت مرت خالي شهم
🗯️ رايده شي
🗯️ شبيك تحچي ويايه هل شكل
🗯️ شلون ترديني احچي وياچ لعد
🗯️ ياااااا
🗯️ رايده شي ؟ عندي شغل ما فارغ اضيع الوقت عليچ
🗯️ لا سلامتك
طلع من البرنامج بسرعه .. عاينتلي وعيونها مليانه دموع حضنتها چان تشهگ بحرگه
سمر.. شفتي هاي حتى يوسف ما قابل يسامحني حاله حال الكل
مياس.. يا عمري لتضوجين
ترى والله بعد كلشي سولفتي الي حقه يتصرف بهل شكل
هسه يهدأ ويفكر زين واذا چان فعلاً يحبچ فمستحيل يگدر يتخلى عنچ مهما كانت الاسباب
سمر.. انت تشوفين هيچ
مياس.. طبعا
يلا مسحي دموعچ وگومي ويايه خلي نسوي العشه لا بيبيتچ تتولانه بالعصا
سمر.. هههههههههه
مياس.. اي هيچ اضحكي يمعوده انعل ابو الدنيا
سمر.. خلي ارجع الغرفتي احسن
مياس.. لا تجين ويايه وانتهى النقاش
يلا يلا بسررررعه
گمت جريتها من ايدي واخذتها ويايه
سوينه العشه سوه وجبرتها تتعشه ويانه حتى شويه شويه ترجع الامور لمجراها الطبيعي
ثاني يوم خابرني ابويه يريد يخلي اخواني يمي .. جابهم الصبح ساعتين واجه عليهم تفاجأت برجوعه من وقت ولمن سألته صدمني من گال راح طلگ سميحه ورجع
فرحت كلش واخيراً طلعت من حياتي وحياة ابويه وانطرد وياها كل الشر العاشرنا بوجودها
صفنت ويا روحي تذكرت اخواني انقهرت عليهم لأن مالهم ذنب يتشردون بيناتهم بس شنسوي اذا هي مو ادميه
مر شهرين ع الحادث وصار عمر نونه ست اشهر
اخذناها الصبح اني وشهم للمستوصف لقحناها اللقاح الدوري
لليل چنت نايمه حسيت الساعه بالوحده ونص اني بالعاده اگعد كل شويه اطمأن على نونه وارجع انام لان الليل كله تتكشف واغطيها
رحت يم سريرها وچان اجفل بمكاني لمن اشوف عيونها مگلوبات ليفوگ وما اعرف شطالع من حلگها مثل الرغوه البيضه...
يتبع..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!