رواية مياس قلب الشهم الفصل الخامس والثلاثون 35 - بقلم لبنى الموسوي

#مياس_قلب_الشهم

للكاتبه #لبنى_الموسوي

بارت مفاجئ سهرة الخميس لعيون ماتبعيني بالوتباد + الفيس بوك + بيج قصص الست روعه

__________________

مر شهرين ع الحادث وصار عمر نونه ست اشهر .. اخذناها الصبح اني وشهم للمستوصف لقحناها اللقاح الدوري

لليل چنت نايمه حسيت الساعه بالوحده ونص اني بالعاده اگعد كل شويه اطمأن على نونه وارجع انام لان الليل كله تتكشف واغطيها

رحت يم سريرها وچان اجفل بمكاني لمن اشوف عيونها مگلوبات ليفوگ وما اعرف شطالع من حلگها مثل الرغوه البيضه

تخبلت من منظرها .. گمت اگمز ويا روحي ودموعي تجري بلا وعي ردت اشيلها خفت كلش ركضت حتى بدون ما البس الحجاب

صعدت ع السريع فتحت الباب على شهم بلا ما ادگها
چان نايم على وجها وما حس عليه من طبيت للغرفه مع اني دفعت الباب حيل

مياس.. صحت بحرگه : شهممممممممم

نص الليل چنت نايم فزيت مخروع من صوت مياس .. رفعت راسي اعاين عليها تشهگ بالبچي وترجف بحيث شفايفها صايره زرگ وحتى حجاب ما ذابه على راسها

شهم.. شكوووووو ؟!!!!

مياس.. اريد احچي ما اگدر وگعت بالگاع ابچي حسيت علي گمز من مكانه شالني يهز بيه حتى اصحه

شهم.. مياس احچي شصاير ولللللللچ

مياس.. نونه

بس گالت هيچ ركضت حافي نزلت للغرفه وچان اشوفها بمنظر الموت گبال عيوني .. شلتها ع السريع دا اطلع اجت مياس تركض وبيدها سويچ سيارتي وموبايلي

مياس.. هذا المفتاح والموبايل

شهم.. انطينياهن

سحبته منها وركضت للسياره .. فتحتها وخليت نهى ليوره عاينت المياس صعدت بهذا وضعها صيحت بسرعه

شهم.. ويييين

مياس.. اجي وياك

شهم.. هيچ تجين ؟!!

مياس.. شنو يعني

شهم.. ولچ لتخبليني فوتي ذبي سلابات على جسمچ وراسچ

مياس.. اي بس انتظرني الله يخليك 

شهم.. استعجلي يمعوده
مياس لحظه

مياس.. ها ها

شهم.. جيبي فلوس من يمچ لان نزلت بالتراك

مياس.. اي صار

صعدت بالسياره انتبهت النفسي حافي .. نزلت ع السريع لبست برجلي ويا رجعتي اجت مياس تركض

شغلت السياره وتحركنه للمستشفى .. الطريق كله خبصتني مياس بالبچي وعاد اني شلون مركز
احس مثل المضروب على راسي من الشي الصار

شهم.. كافي مياس كافي

مياس.. شهم شوف حالها ولك راح تمووووووووت

شهم.. اشش اسم الله لتحچين هيچ

مياس.. استعجل ابوس رجلك استعجل

وصلنه للطوارئ صحت من الباب بكل صوتي حتى يستقبلونه ويستلموها .. اجو يركضون اخذوها من ايدي وراحوا ع السريع

وگفنه بالباب ما قبلوا ندخل .. تخبلت مياس گامت تنحب مثل الميتلها ميت بحيث الناس كلها گامت تعاين

شهم.. كافي مياس
شهگت بصوت مخنوگ لأن مدتگدر تحچي من گد ما بچت

مياس.. اذا صارلها شي اموت وراها
والله اموت وهنا بنص المستشفى هم حتى تدفنه سوه

شهم.. اسم الله عليچ وعليها شنو هالحچي الزايد منچ

مياس.. وگعت بالگاع على ركباتها : گلبي ديوجعني شهم
نونه بنيتي واحلى شي بحياتي .. والقرأن خسارتي الها متعادلها خساره بكل هالدنيا

ما تحملت منظرها واني اشوفها بهل حاله .. دنگت عليها گومتها من الگاع وحضنتها حيل
بادلتني الحضن بس زادت بالبچي بدل متهدأ

شهم.. مياس كافي عليش دتفاولين عليها
ترى البيه كافيني ليش دتأذيني بالزايد بهذا كلامچ

ارحمي حالچ وارحميني وياچ
ان شاء الله ميصيرلها شي لأن ممعقوله رب العالمين يلچمنه مره ثالثه باغلى شي عدنه

مياس.. شهم وين صاروا ؟!!
حاچيهم خلي يسمحون النه ندخل ونشوفها
والله بعد ما اتحمل انتظر هنا ولا لحظه واني ما اعرف شديصير وياها وشلون حالها هسه

شهم.. اصبري لحظه
وخرتها من حظني ورحت للممرضه : بلا زحمه عليچ ادخلي شوفي شصار وياهم جوه لو تخلينه احنه نفوت ونشوف بنفسنه

- لا عيني اني هسه اشوف واجي اطمنكم

شهم.. استعجلي شويه

اول ما دخلت رجعت وگفت يم مياس .. اسمعها تبچي واني الوجع بصدري يزيد مينقص
فعلا هالمره انتهي اذا خسرت بنتي لأن ما ظلي حيل اتحمل قهر جديد ومصيبه جديده

تذكرت شكلها شلون چان يخوف من دخلت لغرفة مياس وشفتها .. خليت ايدي على راسي اردد ايات قرأنيه عسى ولعل رب العالمين يرحم بحالي ويطلعني من هل بلوه

حسيت الباب انفتح .. رفعت وجهي بس شفنه الممرضه گدامنه ركضنالها اني ومياس

شهم.. ها بشري

- امها وين

مياس.. اني

- الدكتوره تريدچ تفضلي ويايه

شهم.. خو ما صار بيها شي ؟!!!

- لا لتخاف الحمد لله عدت سلامات

شهم.. جريت نفس وسجدت بنص المستشفى : لك الحمد ولك الشكر يا الله يا رب العالمين
حمداً جزيلاً وثناءاً جميلاً على فضلك ورحمتك

گمت ع السريع : يلا مياس ادخلي شوفيهم

ما صدگت شلون مر الوقت لحد ما طلعت الممرضه وطمنتنا على نونه .. شفت شهم سجد بالگاع عيوني غوشت من الدموع

اعاين علي وگلبي ينمرد لأن ادري بالخوف الديحس بي مثل خوفي واكثر بعد

دخلت ويا الممرضه ادور على نونه مثل المخبله بس اريد المحها حتى يرتاح گلبي سمعت صوت وحده من الممرضات

- وين جايه عيني

مياس.. اشوف بنتي

- اطلعي بره ممنوع

- الدكتوره دزت عليها يمعوده شجاچ

مياس.. هاي شبيها ؟!!

- معليچ بيها حبيبتي امشي ويايه

فجأه سمعت صوت بچيها درت وجهي وتخبلت من شفتها گدامي .. ركضت ردت اشيلها منعتني الدكتوره

الدكتوره.. اتركيها ماما ميصير تشيليها هسه

مياس.. شصار وياها دكتوره

الدكتوره.. مصخنه صخونه داخليه ومتدرين بيها لذالك نشمرت
بس الله لطف بحالها وتلاحگنه الها باخر لحظاتها چان لو تموت لو يصير بيها صرع الله ليقدر

مياس.. سوده بوجهي ان شاء الله شلون غفلت عنها هالشكل
والله دكتوره اني طول اليوم اراقب بيها لأن اليوم لقحناها بالمستوصف وگالوا احتمال تصخن بس ما شفت عليها علامات الصخونه

الدكتوره.. اي ماما مو داخليه متبين
شوفي حبيبتي هذا النوع من الصخونه ينعرف من اماكن معينه بالجسم

مثلا البطن تصير حاره وكذالك منطقة الرقبه والاذن اما باقي الجسم يميل للبروده على عكس المناطق الذكرتهن بلأخص الاطراف

مياس.. اي فهمت
زين دكتوره خو ما عليها خطر هسه

الدكتوره.. اي اكيد ما طول انشمرت مره لازم تراقبيها باستمرار خصوصاً بهل كم يوم لأن لو تكررت هالحاله تصير مزمنه وممكن تتفاقم وينتج عنها مرض الصرع لا سامح الله
لذالك اتعبي عليها وطولي خلگ بالسهر منا لما تعدي الخطر

مياس.. اي طبعاً اراقبها وحتى نوم بعد ما انام والله

الدكتوره.. هههه لا مو لهل درجه
الله يحفظها الكم ان شاء الله

عموما راح اكتبلچ علاج الها تستمرين علي اسبوع كامل .. نص ساعه وتگدرون تطلعوها منا
ما عدها غير العافيه ان شاء الله

مياس.. الله يعافيچ دكتوره

الدكتوره.. تفضلي انتظريها بره لو سمحتي ومن تستلمين الطفله من الممرضه تنطيچ الراچيته مالت علاجها

مياس.. ان شاء الله

تحركت من يمها بس عيني ما شلتها من على نونه لحد ما طلعت .. اول ما شافني شهم اجه باتجاهي ع السريع

شهم.. ها طمنيني

مياس.. انشمرت

شهم.. شلون يعني

مياس.. مصخنه صخونه داخليه وما ادري بيها لذالك انشمرت

والله العظيم اني دايره بالي عليها وكل شويه ارقب حرارتها بس الدكتوره تگول متبين إلا من مناطق معينه وعلمتني عليهن حتى اذا تكررت الحاله لا سامح الله اعرف بيها

شهم.. هسه شنو يعني تعدت الخطر لو بعدها ؟؟

مياس.. بعد
لازم اظل اراقبها هل كم يوم لأن لو تكررت هاي الحاله يصير بيها صرع اسم الله

شهم.. اسم الله القرأن
زين شوكت نگدر نطلعها منا

مياس.. فد نص ساعه

شهم.. لعد فوتي اگعدي هنا ما تعبتي من الوگفه

رحت گعدت ع الكراسي ظل واگف يگلب بموبايله مدري شچان يسوي .. شويه واجه گعد بصفي

رفع راسه انتچه ع الحايط وغمض عيونه .. صارت عيوني علي صفنت ويا نفسي وتذكرت لمن نام يم بيت اهلي نفس المنظر هذا بالضبط مع اني من هذاك اليوم ما تكررت ويايه هالحاله وما عاينت علي بعد

ظليت على هالحاله اراقبه بلا ما احس على نفسي .. نزيت من مكاني لمن سمعته يگول

شهم.. لتفكرين بهل شي غلط

خليت ايدي على گلبي من الخوف : شنو معقوله عرف بيش دا افكر زين شلوووون !!!

شهم.. فتح وعاينلي بطرف عينه : شبيچ صافنه ؟!!

مياس.. شنو ما فهمت قصدك ؟!!

شهم.. قصدت لتفكرين يصير النهاوي شي
شيلي هلافكار من بالچ حتى تطردين الشر منها

الامام علي سلام الله عليه يگول : تفائل بما تهوى يكن
لذالك خليچ متفائله بالخير واتركي عنچ الافكار السلبيه

مياس.. جريت نفس براحه : لا ما افكر بشي غير سلامتها
اصلاً ما اگدر اتخيل يصيرلها شي لأن اموت ساعتها بمجرد التفكير

شهم.. مبين عطشانه

مياس.. اي كلش

شهم.. چان گمت جبتلچ ماي بس ما اگدر اعوفچ وحدچ واروح
عموما هسه بس نطلع نهاوي اشتريلچ من الطريق

مياس.. لا عادي اتحمل ليظل ببالك

بقينه ننتظر وفعلا نص ساعه طلعت الممرضه وبيدها نونه .. ركضت اخذتها منها ابوس بيها بلهفه ممصدگه رجعتلي وشايلتها بيدي

مياس.. اروحلچ فدوه ماما
بيه المرض ولا بيچ يروحي انتي وحياتي وكل دنيتي

شهم.. الف مره گتلچ اتركي عنچ هالحچي الماصخ
شو انطينياها

اخذها مني حضنها حيل .. ظليت اعاين عليهم لحد ما وعاني صوت الممرضه

- عيني مو دا احچي وياچ

مياس.. العفو ما سمعتچ
گولي حبيبتي

- هذا العلاج مال بنتچ مكتوب علي طريقة الاستخدام
عموماً ابو الصيدليه راح يأشرلچ علي لتشيلين هم

مياس.. اي عيني شكرا

- العفو

مياس.. عاينت الشهم مستمر يبوس بنونه : شهم يلا خل نرجع

شهم.. انطيني الراچيته حتى اجيبلها العلاج من صيدلية الطوارئ

مياس.. شنو نجي وياك

شهم.. اي بس تظلون بالسياره

مياس.. يلا دمشي لعد

طلعنه من المستشفى الحمد لله .. مشينه مسافه شويه ونزل شهم يجيب الدوه لنونه

شهم.. راح اقفل باب السياره عليكم
ما اتأخر دقيقتين وراجعلچ

مياس.. اي على راحتك

راح للصيدليه وظليت ويا نونه بالسياره .. حاضنتها على صدري واحس گلبي يدگ سريع من الفرحه لأن رجعت الحضني ورب العالمين حماها الي والابوها

شويه ورجع شهم جايب العلاج وعلاگه ما اعرف مال شنو .. دا اشمرهن ليوره منعني ع السريع

شهم.. لحظه لحظه

مياس.. شكو

شهم.. هاي وين دتشمريهن

مياس.. وره غير

شهم.. دفتحيها طلعي الماي منها مو عطشانه

مياس.. يا رحت للأسواق ما ادري والله

شهم.. اي بصف الصيدليه اكو واحد مفتح

مياس.. اگلك صدگ هذوله شلون يفتحون بهيچ وقت

شهم.. علمود للمستشفى
رزقهم على مصايب العالم ههههه

مياس.. هههه يلا خلي العالم تستفاد

شهم.. جبتلچ نساتل كلهن تاكليهن لان وجهچ صار اصفر حيل يمكن هبط ضغطچ

مياس.. شكرا الك

هز راسه بابتسامه  .. شربت ماي واكلت بس نستله وحده لان مو كلش ويا الحلو اني
شويه و وصلنه للبيت واخيراً

اخذت المفتاح من شهم دخلت للبيت وهو راح يصف السياره بالگراج .. هستوني خليت نونه بسريرها دا اغير ملابسي اندگت الباب

مياس.. تفضل

شهم.. ها مياس
نامي انتي وخلي نهاوي يمي

مياس.. لا شنو اخليها يمك اصلاً مو نعسانه
بعدين شلون تريدني انام بعد كلشي صار

شهم.. ههههه شلون لعد تظلين بلا نوم

مياس.. اي عود بالنهار اعوض لمن تگعد منال وتاخذها مني
تدري الدكتوره شگد نبهتني علمود ما انام گالت كلشي يصير تروح تصخن مره ثانيه وتنشمر لا سامح الله ساعتها شلون اعرف بيها واني نايمه

شهم.. بس ميصير هيچ لأن راح تتعبين كلش

مياس.. فدوه الها

شهم.. زين عندي فكره خلي نتناوب عليها

مياس.. شلون يعني ؟

شهم.. يعني شويه انتي تنامين واني اسهر وياها وشويه انتي تسهرين واني انام

مياس.. يعني تظل يمنه لو تاخذها بالغرفه وياك ؟؟

شهم.. بكيفچ

مياس.. لا ظل هنا ما أأمن اخليها يمك

شهم.. هههه خلف الله عليچ

مياس.. هههه مو قصدي والله
يعني قصدت ما أأمن تنام بعيده عني

شهم.. يلا صدگتچ لتحلفين

مياس.. هسه شنو

شهم.. هسه نامي واني اظل گاعد وياها عود اذا جاعت اگعدچ بس قبل كلشي انطيها دواها

مياس.. اني منعسانه نام انت

شهم.. واني هم منعسان

مياس.. براحتك اول وتالي اني مراح انام

شهم.. شگد تعاندين

مياس.. مو علمود شي بس والله ما اگدر انام بعد كلشي صار

شهم.. على راحتچ
انطيها دواها مو تنسين

مياس.. اي هسه

انطيتها الدوه وظليت يم سريرها اهز بيها بلكت تنام .. حسيت علي طلع من الغرفه ما اعرف وين راح شويه ورجع

شهم.. هسه مراح تنامين

مياس.. لا منعسانه والله
انت نام اذا تريد

شهم.. اذا نعست عود انام
اگول مياس صار الوقت حتى تحضرين للسادس

مياس.. مو المفروض سنتين يلا اقدم

شهم.. اي بس لازم تقرين حتى لمن تجي الامتحانات انتي مسيطره ع الماده

مياس.. اي صح

شهم.. عموما راح اجيبلچ كتب واسويلچ جدول حسب اوقات فراغچ ويا نونه

مياس.. تذكرت نهى صارت غصه بگلبي : ومنو يدرسني ؟؟

شهم.. شنو هالحچي لعد اني وين رحت

مياس.. شكرا الك

شهم.. تتدللين

راح گعد على طرف الچربايه وانتچه ع التاج يگلب بالموبايل .. ظليت على نفس وضعيتي قريب الساعه لحد ما انسطرت نونه ونامت

درت وجهي على شهم شفته نايم على گعدته .. فتحت الكنتور طلعت چرچف ورحت غطيته

وگفت گباله اعاين التفاصيل وجها وضايجه من نفسي : ليش هيچ فجأه رجعت اشوفك شهم القديم التعرفت عليك بالشارع وصار اول حب بحياتي

اني مو نسيتك وماتت كل المشاعر البگلبي اتجاهك شـ حياها من جديد .. شنو الخلاك ترجع تدخل بگلبي رغم البحار والاميال البيني وبينك

حسيت على نفسي اختنگت كلش من هذا الاحساس الخطأ .. تعوذت من الشيطان اخذت ملابس من الكنتور ورحت بدلت بالحمام

رجعت لگيته متكشف ضحكت ويا نفسي : سبحان الله اگول بنته عليمن طالعه متحب الغطه

تقربت منه على كيف غطيته بهدوء ورحت فحصت حرارة نونه الحمد لله چانت طبيعيه .. گعدت ع الطبله اعاين على شهم وهو نايم

انتبهت على موبايله ديلمض .. گمت تقربت منه شفت دتجي رسائل على الوتساب
اشتغل الفضول او الاصح اشتغلت الغيره

تجرأت شلت الموبايل على كيف .. بس رفعت الشاشه انفتح تعجبت لان ما خاله رمز بس المهم فتح حتى اشوف شديصير هنا

دخلت على البرنامج وانصدمت لمن شفته....

يتبع..