رواية مياس قلب الشهم الفصل السابع والخمسون 57 - بقلم لبنى الموسوي

#مياس_قلب_الشهم

للكاتبة #لبنى_الموسوي

بلليل سويت العشى وصعدت فوگ
خليتة گبال شهم بعدة توة ديتعشى سمعنا صوت تبارك ترس البيت

طفر من مكانة مفزوع
نزلت اركض ورى ومن الدرج اسمع تبارك تصيح بكل صوتها

- شنو مااات؟!!
لا لا چذذذب ما اصدگ يسويها مستحيل جهاد يموت ويعوووووفني

رجلي بادت
اريد انزل الدرج ماكو
اباوع للجهال يتصارخون يمها على صوت صياحها

صرخ بيها شهم شدتحچين تباااارك
جاوبته بشهگة ما ادري هذا ديگول جهاد اااستشهد

سحب منها الموبايل
صاح الو اكثر من مرة محد رد الظاهر سدوا الخط

رجع اتصل وگام يفتر بالصالة
الحجية ورى خبصت الدنيا بالبچي اليگول جابوا جنازتة للبيت

شوية وسمعتة صاح الووو منو وياية
اي اني خالة
خوية متأكد من كلامك لو من يمك دتحچي

واذا لگيتهن بالگاع
خو مو كل اليوگع معناها استشهد ميصير هيچ تنطي الخبر الاهلة

زين لعد
خليك بمكانك خمس دقايق واجيك

سد الخط وركض فوگ سوة الدرج خطوتين
ما گدرت اصعد ورى شايلة مهيب ومريم بحضني ونونه يم رجلي دتبچي

باوعت التبارك منهارة
صبرتها من بعيد ماكو شي ان شاء الله بس لتفاولين علي

سمعت خطوات شهم ع الدرج
گمت ع السريع صرت يمة وهمست بصوت ناصي
شبي جهاد الله يخليك احچي قبل لتروح

- مابي شي ان شاء الله
صايرة مواجهة بين قوات مجهولة والولد بالساحة
قسم منهم تصوب والقسم الثاني استشهد

- وجهاد

- متصوب مياس لتعطليني

حچاها وطلع من البيت يركض
ما ادري ليش ما ارتاحيت الكلامة احس جابولة خبر جهاد بس ما قبل يحچيلنا قبل لا يتأكد

ظلينا نلوب بمكانة
لا ساعة لا ساعتين صارت الـ 11 وماكو خبر منهم

عشر دقايق ودگ جهاز الحجيه
گمت اشوف منو لگيتها سمر اكيد متصلة بيه بس جهازي ظل فوگ ما نزلته وياية

فتحت الخط اجاني صوتها تبچي
- شبيچ دخيل الله اااحچي

- ولچ جهاد ويونس متصاوبين

- ألف الحمد لله والشكر يارب

حچيتها بصرخة على صوتي اجت تبارك تركض
- شبيچ داگولچ متصاوبين شو فرحانة

تبارك.. شكو الله يخليچ طمنيني

مياس.. اصبري شوية
اي سمر منو گلچ بالخبر احچي بسرعة

- هسه يوسف اتصل عليه

- ألف الحمد لله
ريحتينا الله يريح گلبچ عبالنة جهاد استشهد وگلبنة خلص من الانتظار

- يمه اسم الله
الله لا يگولها ويحفظة الشبابه والنه

- امين يارب
هسه شوية واتصل بيچ

سديت الخط وباوعت التبارك اضحك
ابتسمت والدموع بعيونها شنو عايش موووو مياس گولي عايش الله يخليچ

- عايش وروح مهيب عايش

بس حچيتها حضنتني تبچي
وينه لعد ليش ما رجع لسه شگالتلچ سمر

- خطية متصوبين هو واخو يوسف
بس لتخافين اصابته زينه مو خطيرة كلش
ان شاء الله شويه وتشوفي واگف گبالچ بس لتبچين

مسحت دموعها بحجابها وراحت البتها
شالتها تبوس بيها

حيل انعصر گلبي عليها
لأن مريت بهالموقف من قبل والاحساس الحست بي تبارك حسيته قبلها

احساس بشع للغاية
ما اتمنى اي بنية تمر بي او تحس بمرارته
لأن شعور انك تدفن عزيز گلبك بالتراب وتنحرم من شوفته كل العمر هو اسوء شعور ممكن يعيشة الأنسان بالدنيا

عشنا ليلة متنوصف
ليلة ما بيها غير البچي والخوف
واذا جهاد رجعلنا بالسلامة فـ اكو غيرنا انفجعوا بهذا اليوم

كم ام اليوم فقدت ضناها
وكم اخت انحرمت من سندها وعزوتها
وكم زوجة خسرت عامود خيمتها وبالتالي وگعت هالخيمة على راسها وراس اطفالها

بس مع شديد الأسف
هذا واقعنا ومجبورين نتعايش ويا
خسرنا ودنخسر وراح نظل نخسر ماطولنا عايشين بهالبلد المنكوب

اتصل بيومها شهم طمنا
وظل يوصي بينه حتى لنوصل خبر المنال
لأن يدري بيها تتخبل اذا عرفت ومستحيل تظل بمكانها ومتروح للمستشفى حتى تشوفة

ما گدرنا ننام للصبح
قريب التسعة اتصل شهم گال جهزوا فراش بالأستقبال النفرين دنجي بالطريق

ركضت تبارك قبلي
جهزت الاستقبال وراحت تسوي بالغدة فرحانة

ربع ساعة وانفتحت الباب
باوعت من الشباك صاح شهم يا الله چان اكو ولد هواي وياهم

اخذت تبارك ورحنا بغرفة الجهال
تونه طابين الهلاهل صارت ترگع باوعت عليها شو هاي شبعت بچي

- يمعودة شبيچ
ترى ديهلهلون لأن رجع بالسلامة عليش هالبچي

- ولچ مياس متدرين شصار بيه
كلما اتخيل جهاد يعوفني اني ومريم احس بروحي دتطلع من جسمي

- ما عافچ ولا راح يعوفچ
وين يگدر يخليكم ويروح غير انتم روحه
وانتِ تعرفين محد يتخلى عن روحه إلا اذا الله شاء

- ونعم بالله
الحمد لله من لطف بحالي وحال امه المسكينه وكتبلة عمر ثاني

- دسكتي ذكرتيني
داتخيل منال تعرف بالسالفة يبووو إلا تگلبها مناحة

- حقها والله
بس همزين ما گلنالها البارحة
چان ماتت والله هو اني وگوة عديت الليلة سلامات

دنحچي اندگت الباب
صحت تفضل طب شهم شحالة هدومة كلها دم ودگم قميصه مفتوحة من فوگ

بس شفته بهالحالة ركضت علي
- بيك شي شهم شنو هذا حالك خو ما تصوبت

- لا شبيچ
غير چنت بالمستشفى ويا المصابين

يلا اني رايح اسبح
خوية تبارك اخذي مريم وروحي للأستقبال
جهاد يريد يشوفكم بس احسبي حسابچ لأن يونس موجود ويا

- اي ان شاء الله

حچتها وطلعت تركض
باوع شهم للجهال راح شال مهيب وحضن نونه

- شلونهم الحلوين

- بابا هاي شبيك

- ما بيه شي يروح ابوچ
يلا عينچ على اخيچ بين ما اسبح واجيكم

بوسهم وگام صعد
طلعت ورى لگيت تبارك توها دتطلع من غرفتها چانت تبدل لبتها

باوعت عليها
يلا يمعودة شمنتظرة روحيلة

- متجين وياية

- هسه وراچ جاية

حچيتها ورحت للمطبخ
چيكت الطبخ وعدلت حجابي بالمرايا
رحت للاستقبال لگيت جهاد گاعد ظهرة ع الحايط يبوس بمريم وتبارك يم راسة تمسح دموعها بهدوء

- الحمد لله على سلامتك ابو مريم

- الله يسلمچ خوية رحم الله والديچ

التفتت على يونس
- الحمد لله على سلامتك خوية

- الله يسلمچ
بس سويلي طريق بلا زحمة عليچ اريد اغسل

- اي تفضل ماكو احد

گام بالگوة سند نفسه ع الحايط ومشى
باوعت التبارك بـ ابتسامة وسديت الباب خلي يظلون وحدهم اكيد محتاجة تفرغ گلبها يمه

تبارك.. بس طلعت مياس نزلت يم جهاد
اخذت منه مريم خليتها بالگاع وحضنته حيل ابچي

ردت اموت
تعرف شنو يعني ردت اموت
حرام عليك والله شلون انطاك گلبك تسوي بيه هيچ

- اسم الله عليچ حبيبتي
هاي اني گاعد يمچ على شنو هالبچي بعد

رفع راسي من حضنه مسح دموعي بـ ايده
باسني من گصتي خشمي خدي وصل الشفتي چان تصير مريم بنصنا

- هههههه
ها ولچ هالدور انتِ على ابوچ لييييش

وخرت ايدي من صدرة وحطت ايدها بمكاني
تباوعلي بعصبيه لو بيدها يمكن تضربني لأن مريم كل شي ولا جهاد خط احمر بالنسبة الها

- شبيچ بابا ليش ضايجة

- اني احبك

- واني احبچ واحب ماما وياچ

- لا حبني اني لتحب ماما

- ليش مو خطية

- لا ماما مو حبابة

تبارك.. هههههه
هو هذا هم حظي الحمد لله والشكر

- شبي حظچ
هالجمال كله ومعترضة حضرتچ.. ويلعب بلحيته

- ههههههه
الغرور مو زين حبيبي

- لعد اسيا

- هههههه
رجعت لسوالفك متبطلها

- لعد شتردين
خاف عبالچ اموت وتخلصين من مغثتي

باوعتلة والدمعة بطرف عيني
- اسم الله عليك
عسى الله لا يحرمني منك ومن حسك ويجعل يومي قبل يومك

- لتحچين هيچ
ليش جهاد شيسوة بدون تبارك
وبدون هالبنوتة الحلوة... وباس مريم من خدودها حيل

واني ومريومة هم منسوة بدونك شي
لذالك اترجاك دير بالك على نفسك لتموتنا وياك

اندگت الباب بـ هالاثناء
گمت من يمة صحت تفضل طب يونس ويا امة

گمت بوستها وتحمدتلها بسلامة ابنها
درت وجهي على جهاد
راح اخذ مريومة وياية حتى ترتاح

هز راسة بالموافقة
شلتها وطلعت لگيت خوات يوسف وسمر بالصالة
بس شافني اجن سلمن عليه وتحمدنلي بسلامة جهاد وراها راحن للولد للاستقبال

شوية واجت عمتي منال
خبصت البيت بالبچي وظلت تعتب عليه
شلون ما گلتلها لو ما مياس حلفتلها شهم ما قبل نحچي چان سوتها زعلة وياية

مياس.. الحمد لله الموضوع مر بسلامة وگام جهاد على حيلة ورجع للمظاهرات ما فاد ويا لا كلام شهم ولا دموع امه ومرتة

مرت الأيام وماكو اي تغيير
وبدل ما يصير حل لوضع العراق زاد الوضع سوء لمن ظهر ڤايروس كورونا

وهنا كل شي تعطل
حتى الدراسة صارت الكترونية
وهالشي خدمني لأن السنة الفاتت كلش تبهذلت بالدوام ويا نونة ومهيب

طبعاً ما درست زين
ولمن عرفت الأمتحانات هم راح تصير الكترونية سختت حالي حال باقي الطلاب

ليلة راس السنة 2020/1/1
مچنت ادري هالسنة شلون راح تكون وحبيت احتفل بيها مثل كل السنين الفاتت

شهم بالعادة يتأخر بالرجعة بسبب الأوضاع
نومت الجهال جوة من وكت وصعدت زينت الغرفة ورتبت روحي

للوحدة وهو ما جاي
ضجت كلش اخذت الموبايل داتصل بي انفتحت الباب وطب

باوعلي وابتسم
- هاي شمسوية ولچ ههههه

- لا ولو ايدك العايشة
بس شوية حبيت اغير الروتين واحتفل ويا زوجي براس السنة تالي وصلنا الذيلها وهو مجاي

- هههههههه
گولي يا الله يمعودة
ترى ما راحت من السنة إلا ساعة واحدة يعني بعدلنا 12 شهر إلا ساعة

- لا مگايل شي
ليش هو الأحتفال شوكت يصير
غير بالدقايق الأخيرة قبل لندخل السنة الجديدة

- لا حبيبتي
سد الباب واجة حضني
وياچ بكل يوم وكل ساعة وكل دقيقة شهم يحتفل بالحب والحياة القدمتيهن اله بلا مقابل

- قشمرني اي قشمرني
هي هاي دروبك اصلاً حفظتهن مثل اسمي

- هههههه
ليش ولچ عندچ شك بحبي الچ

- مو چنك مقتبس هالجملة من كاظم الساهر هل عندكِ شك

- هل عندكِ شك أنكِ أحلى وأغلى امرأة في الدنيا؟!
وأهم امرأة في الدنيا هل عندكِ شك؟!
هل عندكِ شك أن دخولكِ في قلبي
هو أعظم يوم في التاريخ وأجمل خبر في الدنيا
هل عندكِ شك ؟!!

- وتالي

- كل خير حياتي

حچاها ودنگ باسني
كالعادة بكلمة منة مياس تتقشمر
عادي ولا كأني زعلانة مشيت الموضوع واني الممنونة

سبح واني سبحت جوة
صعدت والكيكة بيدي لگيتة ديجفف بشعرة باوعلي وابتسم

قطعتها داقدملة گال ليش ما گعدتي الجهال
باوعتلة صفح ضحك
شبيچ غير يحتفلون ويانة بالسنة الجديدة والله مو حلو الأحتفال بدونهم

- اي صح مو حلو
مو هو السمچ شوكت يذموا غير بعد الأكل

- هههههه
صايرة لسان مينگدرلچ ام نهاوي

- تعلمت منك والله 
عود صدگ ليش هيچ تأخرت ؟!!

- هاي يعني مراح تفوتيها
على العموم صار عندي شغل مهم وتأخرت بسببة

- شغل شنو هذا بالوحدة بلليل ؟!!

- مياس شبيچ !!!

- شبية كل هذا بس لأن سألتك شنو هالشغل

- ومن شوكت انتِ تسأليني عن شغلي

- لمن يكون الشغل علي علامات استفهام
هنا اصير مجبورة اسألك وبالمقابل انت هم مجبور تجاوبني

- انتبهي الكلامچ زين
ما احب هالأسلوب مياس لتخليني اخرب وياچ

- لتغير الموضوع وجاوب شنو هالشغل

- لا صدگ زودتيها اليوم

حچاها وگام رگع ماعون الكيك ع الميز وطلع
ما ادري ليش گلبي ممرتاح وهاي اول مرة احچي ويا بهالأسلوب لأن حسيت اكو شي موطبيعي بالموضوع

فوگ الساعة وهو ماكو
لملمت الميز ونزلت المواعين للمطبخ
باوعت بالصالة ماكو رحت للأستقبال هم مموجود يربي وين راح هذا ؟!!

ردت اصعد اتصل علي
صارت عيوني على غرفة الجهال رحت فتحتها على كيف لگيته حاضن مهيب ونايم

سديت الباب وصعدت
يمكن اني زودتها ويا بس مع ذالك اذا الموضوع ما بي أنَّ ليش مُصر ميحچيلي

بالگوة گدرت انام
گعدت الصبح على بوسات دافية تنطبع على كل وجهي فتحت عيني ابتسم وگال صباح الخير حبيبي

- صباح النور
هسه بس اغسل واسويلك ريوگ

- لا خليچ مستعجل ما ظل وكت

- ليش ما گعدتني قبل لتبدل

- ادري بيچ تأخرتي بالنوم
رجعي كملي نومتچ اكل برة لتشيلين همي

ابتسمت بوجها باسني من راسي وطلع
مرت الايام واني مخبوصة بين دراستي والجهال وشغل البيت

واگفة العصر انظف بغرفتي حسيت الدنيا تفتر بيه
عادي متعودة بسبب الهبوط بين فترة والثانية تصير وياية هالحالة

گعدت ع الچرباية وسندت راسي ع التاج
غمضت عيني ارتاح شوية مدري ليش اخذني التفكير للحمل

منريد اطفال ولا مقررين نسوي
بس تذكرت بمهيب نفس التعب مر عليه
حتى جسمي احسة باد وبعد ما بيه اوگف على رجلي

من گد ما تعبانة بالبيت والجهال حتى ما احسبلها
شگد حاولت اعصر مخي واتذكر موعدها المضبوط بس ما گدرت

اخر شي گلت لا مستحيل
اكيد متوهمة هسه بس اشيل الموضوع من راسي تجي وتخلصني

يوم يومين اسبوع ماكو
رحت بيت اهلي حتى اشوفهم وهناك گلت المنال

صح فرحت بالخبر
بس شالت همي كلش لأن شافت شصارلي بولادتي المهيب

جابتلي تحليل حللت طلع ايجابي
خفت كلش مو وكتها ابد دراستي جهالي البيت
كلهم يردون واني احس بعد ما بيه طاقة بحيث حتى نفسي هاملتها

لليل اجة شهم علية
ظلينة ع العشى للتسعة رجعنا للبيت
گعدنا شوية يم الحجية وراها صعد شهم للغرفة واني نومت الجهال ولحگته

طبيت چان متمدد يباوع اخبار
گعدت بصفة باوعتلة بتردد ما ادري هالخبر راح يفرحة لو العكس

مديت ايدي ندسته بچتفة
- شهم اريد احچي وياك شوية

- انتظري بس تخلص الأخبار

- شهم ضروري عوف الأخبار هسه

كتم الصوت وعدل گعدتة
- خير ان شاء الله

- اني حامل

بالبداية باوعلي بصدمة
شوية من استوعب الموضوع كشر على وجها وصاح بصوت عالي

- شلون صار هالموضوع

- شنو يعني شلون ؟!!
والله اجت حچاية بحلگي بس ما اريد اعم على روحي واحچيها

- مياس احنه مو ماخذين احتياطاتنا

- انت ماخذ مو اني
بعدين على شنو ضايج ترى مو اول مرة تسويها شو هاي شغلتك تحبل وانت متدري

- احچي عدل عاد

- احد گلك داحچي اعوج
عموماً اذا حضرتك متريد جهال انزلة ترى ماكو اسهل منها

بس حچيتها كفخني على راسي
انتِ غبية لو شنووو بالضبط لچ بابا اكو احلى من الأطفال خصوصاً بالنسبة الي لأن عمر عشته واني محروم من ريحتهم

- لعد شبيك ضجت هيچ من عرفتني حامل ؟!!

- خايف عليچ ي الثولة
من جبتي مهيب متت بالدقيقة ألف موتة
علما گمتيلي بالسلامة وابد ممستعد اعيد المآسات هاي مرة ثانية

- بس شهم هاي الحياة
اذا كل واحد يخاف على مرتة من الولادة وميخليها تحبل الدنيا راح توگف هيچ

- اني غير
وتعرفين ليش لذالك ماله داعي كلامچ هذا

- اعرف علمود نهى الله يرحمها
بس نهى چانت مريضة ونتيجة حملها واضحة من البداية

اني چنت وياها من راحت للدكتورة
وگالتلها بالحرف هذا الحمل مو الصالحچ يا انتِ يا الطفل وهي اختارت نونه على حساب حياتها

بس اني ما بيه شي
يعني عادي احبل واجيب حالي حال امك اختك بت اختك وكل النسوان

- ما بيچ شي ووصلتي للموت لعد لو بيچ شلون
بعدين حقچ متدرين شصار بيه واني انتظرچ تگومين بالسلامة

- اي مو چنت بالصالة العب مراجيح
ههههه ترى اني الوصلت للموت يعني المفروض اني الاخاف مو انت

- مياس انتِ روحي
لا والله انتِ مو بس روحي انتِ حياتي وكل اهلي

واذا صابچ مكروه لا سامح الله
ساعتها ماكو شي يرجع الحياة الشهم
ولا اكو وحدة راح تعوض مكانچ مثل ما عوضتي مكان نهى وحق من خلق هالروح باحشائچ

- ليش مفاول عليه
ان شاء الله اگوم بالسلامة واجيبلك اخ او اخت الجهالك بس گول يا الله

للعلم اني هم مردت هالحمل
بس صار بعد وحرام نعترض على ارادة رب العالمين

باوعلي وسكت
گمت من مكاني حشرت نفسي بحضنة وشميتة من رگبتة حيل

- تدري شگد احب خوفك عليه
يعني لو امي الله يرحمها عايشة هم مچان خافت عليه كل هالخوف الداشوفة بعيونك الحلوة

- شتحچين مياس اخاف عليچ حتى من الهوى اني

- الله ليحرمني منك

- ولا يحرمني منچ حبيبتي

مرت الأيام وانعادت سالفة التأخير بلليل
هالمرة صارت الثنتين وهو ماكو ادگ علي يشغلني ويدز رسالة عندي شغل شوية واجي نامي لتنتظرين

انسحنت روحي من القهر
اريد اعرف ليش يسوي هيچ ولمن اسألة ما احصل منه جواب يريح گلبي بي

ظليت گاعدة انتظرة
قريب الثنتين ونص اجة سلم ما رديت
غير ملابسة وتمدد يمي سحبني علي دفعت ايدة حيل

- هاي شبيچ ؟!!

- وين چنت شهم

- شغل

- شغل شنوووو
وين اكو شغل بالثنتين بلليل احچي الحقيقة متزوج موووو

- هههههه
الله يهديچ ان شاء الله

- شهم لتنرفزني
داحچي وياك جد ماكو داعي للاستهزاء

- حبيبتي مداستهزأ
بس كلامچ يضحك يعني تحچين وكأنچ متعرفيني

- لا اعرفك واعرفك كلش زين
بس اريد تفسير منطقي التأخيرك هذا حتى ارتاح

- مساعدة انسانية
ناس محتاجيني ومن واجبي اوگف وياهم

- وشنو نوع هالمساعدة

- هاااا
تفكيرچ گام يصورلچ شغلات والعياذ بالله ههههه

- شهم لتضحك
احچي منو هذولة وبشنو دتساعدهم

- منو متعرفيهم
بشنو اساعدهم بالي الله يقدرني علي

- ادري ليش متحچي لو فرحان على مغثتي

- ترى اني هذا طبعي مياس
وكت الچنت اساعدچ هم نهى الله يرحمها
يوميا مسويتلي مشكلة شكل بس علمود تعرف منو انتِ بس ما حچيتلها

- هااا
يعني الدتساعدها بنية صغيرة وحلوة مووو

- اي صغيرة وحلوة بس اكيد مو احلى منچ

- شهمممممم

- ههههههه
لچ بابا نامي خليني انام
لا انزل جوة احضن جهالي واخليچ هنا تاكلين بروحچ من التفكير والقهر

- والله تحچيلي وهسه تشوف

- الله يشافيچ

- ااااني مو مخبلةةةةة

- لا حشاچ حبيبتي
يلا تصبحين على خير

حچاها ودار وجها نام
والله لو يسولفلي شعندة لو ما ابقى ويا دقيقة وحدة

تمددت بس چذب لو گدرت انام
ظليت اتگلب لوجه الصبح يلا شكلت عيني ونمت

ثاني يوم العصر
شهم بالحمام دگ جهازة باوعت مكتوب ام محمد ك

صفنت ام محمد منو
وهاي الكاف شنو معناها معقولة كـ×××× ؟!!!

عزززززة لا لا
مستحيل شهم يعرف هيچ نماذج ابد ما اصدگ

رفعت الخط وايدي ترجف
حطيتة على اذني اجاني صوت بنية
وچان صوتها ناعم بشكل بحيث من سمعته استحيت من جبار البداخلي

- الووو عمو تسمعني

- منو انتِ

- هذا مو موبايل شهم ؟!!

- مو قبل شوية چان عمووووو

- انتِ منوو

- مرتة حبيبتي
مرتة وام جهالة الثلاثة خاف ما عندچ علم بيهم

- اهلاً وسهلاً
ممكن احچي ويا ضروري

- لا مو ممكن
اول اريد اعرف انتِ منو وبعدين افكر تحچين لو لا

سكتت ما جاوبت
صحت الووو چان يطلع شهم من الحمام شاف موبايلة بيدي لو هو تخبل

اجة سحبة مني وباوع للرقم
خزرني وگال الووو نعم ها عمو رهف خير
اي ميخالف اني اجيبة من امرلكم لا تتدللون رايدة شي ثاني

بقيت اباوعلة والدمعة بعيني
سد الخط وعاط بية انتِ شلون تجاوبين على موبايلي

- ليش ممنوع ؟!!
لو شفتني جاوبت على رجال مثلاً وضجت حضرتك

لو لاااا
يمكن خفت على مشاعرها لا اكون جرحتها بالكلام واني احاول اعرفها منو هي وشتريد من رجلي

- مياس زودتيهااااا

- لا والله ااانت الزودتهاااا
واني هالوضع بعد مابية اتحملة لذالك هسه تاخذني لأهلي

- لترفعين صوتچ اخر مرة انبهچ

- لا تنبهني ولا انبهك فوت وديني لأهلي

حچيتها ورحت للكنتور
طلعت جنطة صغيرة كلش خليت بيها ملابس الي وللجهال

لبست حجابي هو هم عافني واندار يمشط
نزلت جوة بدلت للجهال بغرفتهم دامشط الهم طب شهم

- ديري بالچ على نونه

رفعت عينه باوعتلة بخزرة
- مثل ما مهيب ابني نونه بنتي
ترى اني الربيتها شهم من عمر ساعة يعني ميحتاج توصيني عليها

- اي اعرف
يلا گومي اوصلچ حتى اروح الشغلي

سحبت الجهال وطلعت قبلة
احس روحي راح انفجر بس ما بينت هالشي لأن مستحيل اتراجع اذا ما سويت البراسي

وصلنا البيت اهلي
ذبني من الباب گال سلمي عليهم وراح
طبيت ابوية بالشغل ومصطفى ويا اصدقائة بس منال وميادة گاعدات بالصالة

سلمت عليهم
باوعت منال للجنطة گالت خو مصاير شي گلتلها لا بس تعبت من الجهال واجيت تساعديني بيهم يومين

حسيتها ما صدگت بس عبرت السالفة
لليل اجة ابوية تعشينا وظليت گاعدة وياهم بالصالة

نص ساعة واندگت الباب
طلع مصطفى شوية وسمعتة صاح تفضل عمي تفضل

عرفته شهم
گام ابوية استقبلة وطب للصالة ظلوا يسولفون بعدين اشرلي يريد يحچي وياية

گمت اخذتة للأستقبال
وگف گبالي گال يلا جهزي الجهال حتى ترجعون وياية

- اني ما اجيت لهنا حتى ارجع شهم

- مياس لتكبرين السالفة

- هي چبيرة بس الظاهر انت ممستوعبها زين

- گتلچ مساعدة انسانية شنو قابل مچذب عليچ قبل

- اي واني مرتك
يعني من حقي اعرف كل شي عنك
ومثل ما عرفت سالفة ام رامي اريد اعرف سالفة هاي البنية

- هالشي ميخصني حتى تردين تعرفي
واني الخير الأسوي للناس ما احب احچي بي حتى الأمي

- الناس مووو
لو للبنات الصغار التساعدهن وبعدين تتزوجهن مثل مسويت وياية

بس حچيتها ضربني على زندي
- يعني اني تزوجتچ لأن ساعدتچ هذا الطلع وياچ هسه

- شتريد شهم
مو انت العصر ممهتم وعندك عادي الموضوع
حتى ما كلفت نفسك بكلمة وگلت لترحين لأهلچ

- اني تقصدت اجيبچ لهنا حتى تغيرين جو
بس مو معناها اخليچ تباتين انتِ وجهالي بعيد عن حضني

- واني ما ارجع اذا متحچيلي كل شي

- شنو عود دتلوين ايدي بـ هالطريقة ؟!!

- والله افهمها مثل متحب

- امشي صيحيلي الجهال

فتحت الباب وصحت
نونه مهيب تعالوا بابا يريدكم.. اجو يركضون

دنگ بوسهم وطلع من العلاگة
لعبة المهيب ودفتر رسم والوان النونه لأن تموت ع الرسم

گام حط فلوس ع الميز
ودار وجها طلع بدون ميسلم اني هم اخذت الجهال وطلعت ورى لگيتة يم الباب ديروح

گبل صاحتني منال
ظلت تحقق وابوية يسمع وهو ساكت
اخير شي سولفتلهم الموضوع بصورة سريعة

لا هي ولا ابوية ايدوني
ظلوا ياكلون بگلبي انتِ الغلطانة والسالفة متسوة
محد منهم تفهم غيرتي وضوجتي من تهميش شهم الشخصيتي

گمت من يمهم طبيت للغرفة
نومت الجهال وظليت گاعدة اگلب بالموبايل من الضوجة

للوحدة طبيت للواتس اب
باوعت على محادثة شهم نشط انتظرتة بالربع ساعة وهو بالبرنامج

انسحنت روحي
معقولة خلاله الجو وديحچي ويا هاي البنية ؟!!

دزيت رسالة
- دتحچي وياها شهم

شوية ورد
- !!!!!!!!!!!!!

- جاوب دتحچي وياها مووو

- اي تردين شي ترى عطلتيني

- لا عيني ما اريد ارجع للحلوة مالتك

ما جاوب بعد
غلقت التلفون ورگعتة بالگاع بعد ما شلتة حتى لا احرگ بدمي منا لما غفيت

گعدت الصبح على صوت مهيب
غسلت واخذتهم للصالة خليتهم يلعبون ورحت للمطبخ

واگفه ع الطباخ
اسوي بالريوگ وگلبي يفور من القهر والافكار توديني وتجيبني اجتني نهى تبچي

- شبيها نونه الحلوه

- ماما دارسم واجه مهيب جر شعري تقبلين

- مهيب تعال ولك ليش تأذي اختك

صفن بوجهي ما عرف يجاوب شي
ضحكت على منظره خصوصاً واني اشوف الخوف بعيونه

- ماما حبيبتي ميفتهم اعذري
بعده صغيره ويغار منچ لان احلى منه وغمزتلها

درت وجهي علي
يلا تعال بوس دادة ترى بعد ما احبك

تقرب منها
يجر بثوبها ويصيح ابوسچ دنگت علي باسها وهي هم باسته وضحكت

باوعت عليهم بـ ابتسامة
يمكن هم احلى شي صار بحياتي بوجودهم انسى كل الخوف البداخلي من المستقبل المجهول

ريگتهم هستوني دانظف گعدت منال
- صباح الخير

- صباح النور
الچاي بعده حار اصبلچ

- لا حبيبتي اني اصب لتتعبين نفسچ

گعدت الملم بالصالة
ونونه ومهيب يمي يلعبون اجت منال جايبه الريوگ هستوها خلته گعدوا اخواني

ميادة.. صباح الخير

مياس.. صباح الورد

مصطفى.. ماما اني ما اريد ريوگ
لازم اطلع هسه لأن جماعتي ينتظروني بالباب

منال.. ماكو ما اريد
مو زين تطلع بلا ريوگ وفوگاها تريد تلعب طوبه يعني راح تتعب وتحتاج طاقه

مصطفى.. سويلي لفه لعد لأن مستعجل

ميادة.. هنيالك والله شكو بيها لو الله خالقني ولد

مياس.. اي والله البنية بكلشي مظلومه

منال.. هههه گرت عينچ بدل متعقل اختها تخبلها بالزايد

ميادة.. ماما اني هم ما اريد ريوگ

منال.. لا والقسمة هاي هم گامت تتدلل

ميادة.. اي عيني ليش لا
الدلال كله المصطفى واحنه كخة

منال.. هاك صفاوي
واكلها مو تشمرها ترى والله ازعل عليك

مصطفى.. صار ماما

طلع من يمنه وظلت منال تقنع بميادة وتقشمرها لأن كلش تغار من مصطفى على منال
للضهر اجه ابوية

اشرف.. السلام عليكم

منال.. وعليكم السلام الله يساعدك ابو مصطفى

اشرف.. ويساعدچ عيوني
باوعلي وابتسم شلونچ بابا

مياس.. زينه بابا
بس شنو هالسؤال عبالك مشايفني صارلك اسبوع

اشرف.. هههه خابرني شهم اليوم

مياس.. شيريد

اشرف.. انتي ليش غالقه تلفونچ
ترى ميصير الرجال حقو يريد يطمن على جهالو
لويش دتخلين المشاكل الجانبيه تأثر على علاقتكم

مياس.. احسن بابا

اشرف.. لتزعليني منچ مياس شهم ماكو منو بطلي دلال زايد

مياس.. دلال زايد !!
عموما اني البارحه اجيت مصارلي قرن حتى يريد يتطمن على جهاله بس ما گتلي شراد خابر ؟!

اشرف.. ماكو حچه ويايه بموضوعكم وطلب يشوفني فگتلو العصر

مياس.. يعني راح يجي لهنا ؟؟

اشرف.. اي

مياس.. خير ان شاء الله

صبيت الغده ويا منال
وبس كملنه رحت نومت الجهال

للعصر طبيت للحمام
توني دانشف شعري سمعت الجرس يندگ
لبست ملابسي ع السريع وطلعت صار بوجهي شهم

باوعلي وابتسم
درت وجهي ورحت للغرفة نشفت ومشطت شعري وطلعت

لگيتة ديحچي وياهم
من شافني ابوية گال اخذي رجلچ ورحوا احچوا وحدكم ومتطلعون اذا متحلون السالفة

طبيت للاستقبال وسديت الباب
- ها شهم گول

- ليش غالقة موبايلچ

- اريد ارتاح لو ممنوع

- شبيچ مياس
ليش دتسوين كل هذا شنو ماعندچ ثقة بيه

- لا مو بيك ما عندي ثقة بالدنيا
عشت كل عمري تكفخ بيه من كل اتجاه هسه تجي تنصفني وبدون مقابل

- يعني

- يعني اغار عليك
واخاف لا فجأة اخسرك وارجع النقطة الصفر

- ههههههه
لچ بابا بطلي هالتفكير ترى ما فارغ اني السوالف المراهقين

ادري بيچ خايفة
لا اروح انعجب واحب واتزوج مووو
بس اني بشبابي وبالنقص الچنت عايشة ويا نهى ما سويتها اجي اسويها بعد ما كملت وياچ

- اي ليش لا
بحجة مساعدة لو مدري شنو وتتزوج علية مثل ما تزوجتني على نهى

- لتقارنين روحچ بغيرچ
اني ما فاتح سبيل لبنات العالم
ومن اخذتچ چنتي وحدة مني وبيه ماكو داعي نرجع نفتح الدفاتر القديمة

- زين ممكن طلب واوعدك ينسد هالموضوع للأبد

- گولي

- اريد اعرف منو هاي البنية بروح مهيب احچي

- هي ترى البنية مو اساس الموضوع
هذا ولد شاب معيل الاهلة ماعدهم غيرة لا اب ولا اخ

استشهد بالمظاهرات
ومن الصدمة امة وگعت بالفراش حتى ميعرفون علتها شنو وعلى ساعة تتخربط توصل للموت

لذالك دتشوفيني
مرات اتأخر النص الليل بسببها
وبنفس الوقت اساعدهم بالي الله يقدرني علي

خصوصاً ما ظللهم احد
ولا عدهم مصدر رزق يعتمدون علي بعيشتهم

- اي لعد ليش متحچي من اسألك

- مياس
يمكن انتِ او غيرچ تشوفون اكو مبالغة بتصرفي هذا

بس اني هيچ الله خلقني
ما احب اسوي شي واسولف بي لأي بشر

والرسول عليه وعلى اله افضل الصلاة والسلام
بمضمون الحديت يگول
ورجل تصدق بصدقة فأخفاها حتى لا تعلم شماله ما تنفق يمينه

واذا حچيتلچ هسه
فـ حتى لا تكبر المشكلة بعقلچ الصغير هذا

اني ممجبور اسولفلچ كل اعمالي
وكت الي تلزمين عليه لزمة عوجه او تشوفين عليه تصرف من تصرفات رياجيل هالوكت ساعتها الچ حق بكل شي تسوي

بس مو اني شهم
وتعرفين منو شهم ومع ذالك تحاسبيني مثل الرجال الخاين

هالتصرفات اتخبل منها مياس
ومو بس وياچ عانيت ويا نهى الله يرحمها هم عانيت من نفس السالفة

عرفتيني شهم
وراح اظل شهم مثل ما عرفتيني
لتخافين لا من الدنيا ولا من ناسها لأن ماكو شي يغيرني عليچ او ياخذني منچ غير الموت وداعة جهالنا

- اسم الله عليك
خلاص اسفة بعد ما اعيدها لتضوج اشك بنفسي وما اشك بيك

بس سؤال اخير
ويامن چنت سهران بالواتس اب ومو عبالك شك لا والله مجرد فضول

- هههههه
شلون اني بفضولچ
خالتي ام يوسف اتصلت عليه بلليل وما گدرت اجاوبها

ومن رجعت راسلتها
گاعدة جاوبتني اي خالة اتصلت واخذتنا السوالف

- هااا اي اني هم عرفت هي

- هههههه
صحيح بوية صحيح

- لتضحك ترى الغيره تموت والله

- هاي في حال لو اگدر اشوف غيرچ بالدنيا

- هههههه
عساك كل العمر تظل اعمى يم غيري

- ههههه
يلا لعد جهزي نفسچ
بلليل من ارجع امر عليكم من طريقي

- صار

بس حچيتها دنگ باسني من خدي
طلع سلم عليهم وراح ظلت منال تتحارش بيه لأن شافتني اضحك عادي اخذت الموضوع بروح رياضية

عدت الأيام وصار وقت ولادة سمر
وبسبب الأوضاع وصعوبتها ما قبلت تجيب بالمستشفى

حجزت يم دكتورتها وصارت ولادتها بالعيادة
بس بسبب خطأ طبي غير مقصود تحولت هالولادة الكارثة علينه

دخلت سمر بغيبوبة
واستمر النزيف الحاد ايام بعد ولادتها وبسبب هالشي رادوا يستأصلون رحمها

يوسف تخبل بوقتها
ما خله شي ما سوا حتى اتصل بدكاترة بالخارج علمود وضعها

والحمد لله
الله لطف بحالة وحالنة وگومها بالسلامة بالاخير هي وابنها

هنا شهم زاد الخوف عندة
طول فترة حملي اشوف القلق بعيونة بس ميگدر يحچي حتى ليزيد الموضوع عليه

اخذت سونار وطلع بيه ولد
نونه ضاجت لأن تريد اخت بس شهم ظل يقنع بيها لحد ما تقبلت الموضوع ورضت بالأمر الواقع

وبيوم من الأيام
رحت البيت اهلي لأن الجهال ضاجوا من حبست البيت وهناك اجت جيرانة

ظلت بالنص ساعة گاعدة تسولف
واول ما راحت اجة شهم عليه ويا الأيام بدت تظهر عليه اعراض الڤايروس

حچيت الشهم تخبل
هم خاف عليه وهم ع الجهال
عزلني عنهم بالغرفة بس ابد ما عافني وكلما اگولة لتنعدي يگول لتخافين عليه المهم انتِ والطفل ميصيرلكم شي

اسبوع وحالتي ساءت
نقلني شهم للمستشفى وشفت ايام ميعلم بيها غير رب العالمين

وصلت للموت بذاك الوقت
ومچنت خايفة على نفسي بگد مخايفة على ابني ليصيرلة شي واخسرة قبل لا اشوفة

والحمد لله
كتبلي رب العالمين عمر جديد للمرة الثانية وحفظني الزوجي والاطفالي

بعد شهر گعدت من الصبح على اوجاع
عرفت ولادتي حانت گعدت شهم تريگنا وبلغته بالموضوع

ارتبك وظل حاير شيسوي
خله الجهال يم تبارك واتصل بمنال
ظليت اكل بالوجع لليل يلا اجتني الطلوگة القوية

اخذوني للمستشفى قريب العشرة
ظل شهم ويا ابوية ومنال طبت وياية
الحمد لله ولادتي هاي اهون من ولادتي المهيب بألف مرة

الطلوگة هدت حيلي
بس بصالة الولادة ما تأخرت اكثر من نص ساعة

وهيچ شرف يوسف للدنيا
طبعاً هالأسم انفرض علينه جبراً وليس اختياراً بعد ما يوسف حلف لو تسمي ابنك يوسف لو تنتهي خوتنا لأن هو هم سمة ابنة شهم 

طلعت من المستشفى الصبح
تلگاني شهم من الباب باس راسي واخذ الطفل من ايد منال اذن بأذنة

باوعت للممرضة عيونها علي تباوعلة باعجاب
ندسته برجلة امشي عاد ترى هاي راح تاكلك بعيونها

- هههههه بطلي الغيرة يولي

- والله العدها مثلك لازم تغار علي حتى من روحها

- هههههه
ليش محسستني متزوجتلچ نبي

- لا مو الـ هالدرجة
بس انت كامل والكمال لله سبحانه وتعالى فـ حقي اغار واخاف عليك

باوعلي وابتسم
اشرتلة لأن گاعدة ع الكرسي دنگ عليه وگال ها حبيبتي

- انت شهم حياتي واني اموت ع الشهم

ضحك لأن تذكر العبارة
- واني اموت على مياس قلب الشهم

النهاية....