رواية مياس قلب الشهم الفصل السادس 6 - بقلم لبنى الموسوي

#مياس_قلب_الشهم

للكاتبه #لبنى_الموسوي

طلعت من الصبح حتى اشوف مياس اخاف صاير وياها شي وللمره الثانيه ما لگيتها بمكانها

صح ظل بالي عليها بس ما عرفت شلون اتصرف ،، صعب كلش اروحلها للبيت مثل هذاك اليوم ولا اگدر اخابرها بأي وقت اخاف اسببلها مشكله

حركت سيارتي رحت لشغلي وبالي كله يمها ،، التهيت بالشغل للتسعه ونص اجاني مهيب

مهيب.. السلام عليكم

شهم.. رفعتله حاجبي باستغراب ،، شعجب من الصبح بينت ولك ؟!!

مهيب.. درد السلام بلاول

شهم.. هههه وعليكم السلام بس اعذرني مصدوم بشوفتك هنا بمثل هيچ وقت

مهيب.. لا منا وجاي اجي حتى قبلك

شهم.. هههه گول والله يعني تجي ب٨

مهيب.. اگولك شو انت جاي تستهزأ منو اليلزملك الشغل من تلتحق

شهم.. غصباً عليك هذا شغلك مثل ما هو شغلي بعدين اني چم مره گتلك بطل سهر انت وجهاد مو راح تموتوني ناقص عمر من عمايلكم

مهيب.. يا خويه شتريد منه ترى مرايحين نسهر بالبار هي گهوه وگاعدين بيها ويا جماعتنه كلهم ولد عالم وناس مو مسربتين

شهم.. مهيب اسمعني زين ،، تصرفات جهاد ابد ما عاجبتني وبالگوه دا احاول اسيطر علي حتى لينجر للسوالف التعبانه فلا تزيدها عليه فدوه اروحلك المفروض منك تعقله بدل متتخبل ويا تفهم قصدي لو لا ؟؟

مهيب.. افهم شهم بس لتنسى اني تربيتك يعني مستحيل اسوي شي غلط

شهم.. وهذاك تربيتي وربيتكم سوه هماتين بس شنو النتيجه شوف سوالفه وفهمك كفايه

مهيب.. خلي اگوم اشوف الحسابات احسن السالفه وياك تعبانه كلش

شهم.. هههه اشرد كالعاده هو هذا الفالح بي مهيب افندي

مهيب.. هههه اليسمعك يصدگ ... هو اكو احد يگدر يشرد منك دخيل الله

گاعدين نشتغل اني ومهيب ديسألني ع الارقام رفعت راسي وانصدمت من شفت مياس واگفه گبال الباب

مياس.. دفعت الباب وقبل لا ادخل اجه ع السريع باتجاهي وسألني باستغراب

شهم.. هاي شنو مياس شلون اجيتي لهنا ؟

مياس.. رحت للمركز وهناك چان اكو شرطي هو انطاني العنوان

شهم.. صار وياچ شي احچي بسرعه ؟!!

مياس.. محتاجه مساعدتك

شهم.. دگولي بويه ترى وگعتي گلبي

مياس.. والله ما اعرف شگول ومستحيه منك كلش بس ابو التكسي بره وما عندي احاسبه

شهم.. رفعت راسي شفت التكسي ينتظر ع الشارع ،، ماشي انتظري هنا دقيقه وارجعلچ

مياس.. طلع يحاسب ابو التكسي واني ظليت جامده بمكاني حايره شحچيله وشلون افتح الموضوع ويا !! عاينت لهذا الولد اجه باتجاهي

مهيب.. مرحبا

مياس.. نعم

مهيب.. هههه شبيچ يمعوده شهل نظره خوفتيني

شهم.. رجعت للمعرض شفت مياس مخنزره على مهيب وهو يضحك : ها شكو ؟؟

مياس.. لازم نحچي ضروري

شهم.. تعالي نگعد هناك

اخذني ورحنه گعدنه يم المكتب شو هذا الولد اجه گعد يمنه

مياس.. عاينتله باستغراب ،، اريد احچي وياك وحدنه لو تسمحلي !!

شهم.. گولي مياس هذا اخويه مو غريب

مياس.. اعذرني ما اگدر لأن الموضوع كلش خاص

شهم.. مهيب عوفنه وحدنه بلا زحمه عليك

مهيب.. تأمر خويه

شهم.. يلا هاي ظلينه وحدنه احچيلي اسمعچ

مياس.. اعاين للمعرض متروس عمال : يا ربي هسه شلون احچيله وكل هالزلم هنا

شهم.. مياس ليش صافنه

مياس.. عفيه هنا هوسه خلي نحچي بغير مكان

شهم.. وين يعني بالسياره ميخالف ؟؟

مياس.. اي عادي ع الاقل احسن منا محد يسمع حچينه

شهم.. يلا گومي ،، مهيييب

مهيب.. ها حبيبي

شهم.. طالع اني شويه وارجع

مهيب.. خو ماكو شي شهم

شهم.. لا ماكو شي بس عندي شغلة ضروريه ما اتأخر

مهيب.. على راحتك

طلعت ويا وبس صعدنه بالسياره دار وجها عليه سألني :

شهم.. شصاير وياچ بسرعه اريد اعرف ؟؟

مياس.. صفنت علي حايره وما اعرف منين ابدي لحد ما عاط بيه نززني من مكاني

شهم.. دلغي عااااد

مياس.. اي بس اصبر ما اعرف شلون ابدي

شهم.. ليش هي معادله حتى حايره بيها يلا شلعتي گلبي فضيني

مياس.. شوف اني امي ماتت من چان عمري ٨ سنوات وبعد وفاتها بسنه تقريبا ابويه تزوج سميحه
من اول زواجه تأذيت كلش وما عرفت طعم الراحه بيوم لان مرته وحده متخاف الله ولا اكو بگلبها رحمه
كلشي شفت منها التتوقعه والي متتوقعه من ضرب - سب - تعذيب نفسي وجسدي
حاربتني بكل تفاصيل حياتي حتى دراستي نحرمت منها بسببها وبطلت بأرداتي مع اني ما حابه هالشي
فتره بسيطه وسيطرت على ابويه بشكل مو طبيعي بحيث خلتني اطلع اشتغل بالشارع واتعرض لأنواع التحرشات والمضايقات وهو واگف يتفرج ميحرك ساكن ومتأكده اذا گالتله بنتك ويا فلان لو سوت فلان شي گبل يصدگها بدون ميجي ويسألني حتى
هذا كله يهون ومو مشكله حياتي واني راضيه بيها لان يظل هو ابويه وتظل هي ام اخواني
شغله وحده هي الخلتني اتجرأ واجي اليوم احاچيك

صافن عليها واسمعلها بتمعن وممستغرب الكلام التحچي لان امثال مرت ابوها هواي وموجودين بكثرة بمجتمعنا بس القاهرني صدگ ابوها نفسه والله العظيم حرام يتسمى رجال

شهم.. وشنو هاي الشغله احچي ؟؟

مياس.. ابن اختها واحد مو زين لأبعد الحدود وكل قذارات الدنيا بي لزگ يريد يتزوجني

سميحه عجزت وهي تقنع بأبويه حتى يوافق بس بلا نتيجه
ومن شافت ماكو امل اصير اله قررت هي ويا يلعبون لعبه حقيره حتى يجبرون ابويه يوافق على زواجي منه ومو بس يوافق يشمرني علي هم

شهم.. شلون يعني !!

مياس.. سمعتهم يحچون بيناتهم ويخططون يعتدي عليه وسميحه تبين لأبويه الشغله صارت بأرادتي حتى يزوجني اله وهيچ هي تستفاد منه بالفلوس وهو يتزوجني غصبا عني وبنفس الوقت انذل ويا طول العمر

شهم.. مياس صدگ تحچين ؟؟!!!

مياس.. اي والله تذكر يوم الاجيت لبيتنه هذاك الاسبوع قبلها بلليله گلتلي لتطلعين للشغل لان چانت متفقه ويا تروح لبيت اهلها وتاخذ اخواني وياها
وهيچ اني راح اظل وحدي وبهلاثناء يدخل عماد للبيت لان هي منطيته المفتاح وينفذون خطتهم النگسه ومن يجي ابويه يتبين اله اني فتحتله الباب بارادتي لان عندي علاقه ويا وصار الي صار
بس اني الف الحمد لله والشكر سمعتهم من چانو ديتفقون عليه
طبعا ردت اگولك بوقتها وخابرتك فعلا بس ما گدرت احچي
اخير شي جريت السرگي وخربت عليهم السالفه بس هسه وتحديدا اليوم رجعوا يردون يعيدون الموضوع لان سميحه خابرتني وگالتلي تعالي للبيت بسرعه اريد اخذ اختچ القحها واكيد هي متفقه ويا بس اجي للبيت يجي يعتدي علي وياخذ مني شرفي وهالمره مضبطه الوضع كلش زين لان سمعتها گالتله راح اخرب السرگي اشوف بعد شلون تسد الباب
وهاي اني تالي عفت كلشي واجيتك حتى تساعدني

شهم.. انضربت على راسي من سمعت كلامها يعني ماكو هيچ عالم توصل بيهم السالفه يتاجرون بشرف طفله !!! زين انتي يمرت ابوها ليش ولچ مو هاي اخت جهالچ والشغله التمسها راح تمسهم بعدين

مياس.. احچي الله يخليك ليش ساكت

شهم.. وين موبايلچ

مياس.. ليش

شهم.. يمعوده لتطلعيني من طوري وين الموباااايل

مياس.. هذا بس لتصيح

سحبت منها الموبايل ع السريع وفتحته لگيت مرت ابوها حارگه الدنيا بلاتصالات عليها هاي من غير الرسائل الغالطه بيهن اشكال الوان لان مدا ترد عليها

شهم.. الزمي خابريها

مياس.. قاطعته واني اصيح ،، لا عفيه والله اخاف

شهم.. خليني الغي لتقاطعيني .. تخابريها وتگوليلها صار ويايه حادث والناس ساعدوني شويه وراجعه للبيت

مياس.. بس اني ما بيه شي

شهم.. يصير بيچ شي المهم سوي الگتلچ علي

مياس.. حاچيته بخوف : شتريد تسوي عفيه

شهم.. شنو خايفه مني

مياس.. هااا لا ما خايفه

شهم.. لعد نفذي بلا حچي زايد ،، فتحي السبيكر خلي اسمع

مياس.. مو ما عندي رصيد

شهم.. رمشيلها هسه هي تخابرچ بسرعه

مياس.. اخذت منه الموبايل وايدي ترجف رمشتلها رجعت خابرتني گبل وبس جاوبتني عاطت بيه وهي تفشر

سميحه.. ولچ ××× هي ×××× وينچ اليوم تعالي إلا ××××××  يا ×××× ×××××

مياس.. عاينتله واني خجلانه من الشي الديسمعه وبس شافني التفتتله دار وجها عني

سميحه.. ردي ولچ ردي ×××××

مياس.. شبيچ انطيني صبر احچي مو صار ويايه حادث والناس خلف الله عليهم ساعدوني لذالك ما گدرت اجيچ ولا ارد على اتصالاتچ شويه وراجعه للبيت

سميحه.. حادث شنو

مياس.. من اجي احچيلچ ما اتأخر

سميحه.. دتعالي وبسيطه يبت اشرف اليوم اراويچ النجوم بعز الظهر

سدته بوجهي قبل لا ارد عليها .. هه عادي على اساس ما شايفه النجوم بعز الظهر من قبل حتى تهددني هسه واخاف منها

مياس.. وهسه شنو ؟

شهم.. تعالي ويايه

مياس.. وين ؟؟!!

شهم.. انزلي ولتسألين

نزلت ويا تمشينه مسافه بسيطه لحد ما دخلنه بمكتبه كلش چبيره

وگف يحچي ويا ابو المكتبه واني اعاين على السجلات والاقلام شگد احب سوالف المدرسه بس للأسف نحرمت منهن

شهم.. دا اشتري اصباغ درت وجهي شفتها تعاين على السجلات ،، تردين ؟؟

مياس.. شنو ؟؟

شهم.. بلا زحمه عليك انطيني سجل من هذا ودرزن اقلام من هالنوع

- تأمر

شهم.. تسلم حبيبي تفضل الحساب

اخذني ورجعنه للمعرض صار اخو گدامنه اول ما طبينه

شهم.. مهيب تعال

مهيب.. ها خويه خير شصاير وياك

شهم.. فرغلي الغرفه الداخليه من العمال ع السريع

مهيب.. ليش ؟!!

شهم.. مهيب بلا اسألتك هسه

مهيب.. صار خويه ثواني وتفرغ

شهم.. امشي گعدي هناك بين ميفرغلنه الغرفه

رحت گعدت قريب الخمس دقايق وهو ما اعرف وين راح لان طلع من المعرض شويه وشفته رجعلي

شهم.. يلا گومي

مياس.. بتردد ،، و وو وين ؟!!

شهم.. شبيچ مياس بس لا خايفه مني !!

مياس.. لا طبعا ما خايفه

شهم.. لعد گومي بسرعه ما ظل وقت لازم ترجعين للبيت احسن ما تبتلين بمشكله ثانيه

مياس.. خفت من گال هيچ ،، شنو ارجع للبيت وسميحه !!

شهم.. هسه افهمچ بس گومي وفضيني

مهيب.. يلا خويه الغرفه فرغت

شهم.. عاشت ايدك

طبينه للغرفه واشرلي اگعد ع الكرسي

شهم.. مدي رجليچ

مياس.. ليش ؟

شهم.. اذا كل حچايه والثانيه تصيحين ليش ابطل احسنلي

مديتها بدون ما احچي ويا .. وخر حذائي استحيت كلش من حركته ،، عاينت علي يفتح بلاصباغ وراها بلش يشخبط برجلي بلا ما يطخها

مدري شديسوي برجلي لان بالي مو يمها ،، صافنه علي وسرحانه بتفاصيله
گعدته .. حركة ايده .. عيونه وهو مركز .. وجناته .. شواربه ،، لحد ما نزيت على صوته

شهم.. انطيني هذا

عاينت يأشر على چيس مال صيدليه شلته وانطيته اله ،، نزلت عيني ع رجلي شفت شكلها يخوف صايره حمره ومبين عليها الورم

مياس.. هاي شنو رجلي شسويت بيها !!

شهم.. اكيد من ترجعين مرت ابوچ مراح تصدگ انتي سويتي حادث إلا اذا شافت بعينها يعني هذا الشي كله حتى تقتنع بالسالفه ومتشك بيچ عرفتي شي عن خطتها

مياس.. وانت شلون تعرف تسوي هيچ

شهم.. ههههه دمدي رجلچ زين خلي الفها الچ

لفها ع السريع وراح يغسل ،، ظليت اعاين على رجلي حسيته يمي

شهم.. مياس اسمعي

مياس.. نعم

شهم.. هسه راح ارجعچ للبيت مثل ما اتفقنه انتي سويتي حادث والناس ساعدوچ ... ها وبعد شغله خلي مشيتچ ممتوازنه حتى تصدگ بيچ

مياس.. شلون اذا لگيت عماد بالبيت

شهم.. لا متلگي خربت خطتهم اليوم

مياس.. وبعدين ؟!!

شهم.. بعدين اني اتصرف لتخافين ،، شوكت تكونين وحدچ حتى اخابرچ لان راح يظل بالي يمچ ؟؟

مياس.. بلليل بس اني اخابرك احسن

شهم.. تمام بس مو تنسين ... هاچ هذا السجل والاقلام الچ

مياس.. لا ما اريدهن

شهم.. خزرتها حيل .. الزميبي

مياس.. شلون اخذهن اذا شافتهن سميحه شگولها

شهم.. خليهن على كتر ومن تولي من گدامچ شيليهن

مياس.. شكرا

شهم.. العفو ،، يلا امشي

طلعنه شفت اخو گاعد ع المكتب يشتغل رفع راسه وحچه من بعيد

مهيب.. ها شهم

شهم.. رايح اني للبيت عزل والحگني

مهيب.. بس بعد وكت

شهم.. تعبان اليوم اذا تريد كمل عني

مهيب.. براحتك خويه

طلعنه سوه والطريق كله ساكت ما حچه اي شي لحد ما وصلنه

شهم.. يلا بابا صيري حوك ولتخليها تشك بيچ

مياس.. ان شاء الله وشكرا على وقتك

شهم.. تتدللين بنيتي

ردت انزل من السياره تذكرت الكلنس عفته بالشارع هسه شيخلصني منها ... عاينتله بخجل

شهم.. احچي مياس رايده شي

مياس.. الكلنس

شهم.. شبي ؟؟

مياس.. عفته بالشارع من اجيتك

شهم.. مديت ايدي بجيبي واني اضحك ،، بسيطه يابه هاچ فلوسه

مياس.. ثگلت عليك كلش

شهم.. تمونين على ابوچ

مياس.. شكرا الك

نزلت قريب على شارعنه تمشيت واني اتلفت علي واگف ينتظرني لحد ما وصلت

طبيت للبيت وگبل ذبيت الغراض بالزاويه حتى لتنتبه عليهن ،، بس سمعت الباب اجتني تركض

سميحه.. ها ساقطه شرفتي

مياس.. شبيچ والله صار ويايه حادث حتى شوفي رجلي

سميحه.. ثوله من يومچ احچي ××× شلون سويتي حادث

مياس.. من دا ابيع بنص السيارات اجت سياره سريع وضربتني برجلي

سميحه.. امشي ×××× اشتغلي شغلچ وحسابچ ويايه بعدين

مياس.. صار ... دا اروح للغرفه صاحتني

سميحه..  تعالي صخام

مياس.. ها

سميحه.. الكلنس وين

مياس.. بعته هاچ هاي فلوسه

انطيتها الفلوس ورحت ابدل تعمدت اگزل گدامها حتى لتشك بشي لحد ما صار الظهر واجه ابويه

اشرف.. شبيها رجلچ مياس

مياس.. سويت حادث

اشرف.. شلون بابا غير تنتبهين على روحچ

مياس.. صارت بعد بس لتخاف بسيطه ما بيها شي

اشرف.. سميحه صبيلي غده

سميحه.. بنتك تصبلك

اشرف.. متشوفين رجلها شبيچ انتي

سميحه.. رجلها مو ايدها يعني تگدر تصبلك

اشرف.. سميحه گومي صبيلي زقوم لا ابتلي بيچ

سميحه.. گايمه گايمه لتصيح

راحت تصبله اكل ،، اخذت اخواني ورحت للغرفه انومهم ..

وصلت مياس ورجعت للبيت ... بس طبيت من الباب تلگتني امي

الحجيه.. شجابك هسه وليدي

شهم.. ههههه خوش سلام هذا

الحجيه.. احچي شهم خو ماكو شي ظل بالي

شهم.. شبيچ يمه كلشي ماكو خليت مهيب بالمعارض واجيت ارتاح لو ميصير

الحجيه.. لا يمه زين سويت خلي يتعلم

شهم.. جهاد وين

الحجيه.. قبل شويه رجع لف راسه ونام

شهم.. خوش لعد صاعد فوگ من يصير الغده صيحولي

منال.. ها خويه شو راجع من وقت

شهم.. هههه لا اله إلا الله شبيكم يمعودين صدگ تحچون

منال.. هاي شبيك غير ظل بالي وسألتك

شهم.. ليظل بالچ كلشي ماكو

نهى.. ها شهم شعجب...

شهم.. يمعوده لتكملين تعبت واني اجاوبكم ،، صاعد ارتاح فوگ ما اريد هوسه

صعدت غيرت ملابسي وتمددت افكر بهذوله الحشرات لازم الگالهم حل قبل لا يأذون الطفله ... حسابكم ويايه عسير بس اصبرولي

ما اعرف شگد مر وقت ع التفكير لحد ما حسيت الباب تندگ

شهم.. تفضل

مهيب.. ها خويه خو ما نايم وگعدتك

شهم.. لا حبيبي ما نايم تعال تفضل

مهيب.. احچيلي شهم منو هاي البنيه و وين اخذتها ورحتوا

شهم.. ضروري تعرف يعني

مهيب.. هههه اي ضروري لان الفضول يمي يقره الف حاليا

شهم.. هههه لا يمعود على شنو هسه اسولفلك بس قبل كلشي الحچي الراح تسمعه مني ما اريد مخلوق يعرفه غيرك

مهيب.. وسفه خويه من شوكت اني مطلع سرك

شهم.. لا محشوم دسمع لعد

گعدت اسولفله على كلشي من لحظه ما شفت هذوله الولد محاصريها لحد اليوم

مهيب.. هاي شنو معقوله اكو هيچ عالم

شهم.. كلشي اكو مهيب هذا حال الدنيا بيها الخير وبيها الشر اضعافه

مهيب.. راح تساعدها يعني

شهم.. طبعا اساعدها شلون تريدني اوگف اتفرج

مهيب.. لا طبعا متتفرج اصلا اذا ما ساعدتها اني اساعدها بمكانك

شهم.. ضربته على چتفه ،، ههههه كفووو اخويه النشمي

مهيب.. شهم والله صفنتني زين ابوها شلون يقبل بنته تشتغل بالشوارع ترى كلش صغيره يعني حتى متگدر تدافع عن نفسها اذا تعرضت الموقف

شهم.. والله ما ادري شگولك بس انت شوف مرته وراح تعرف السبب
بعدين لتخاف عليها الشوارع قوت گلبها وكبرتها قبل عمرها يعني مياس مو سهله مثل متظنها

مهيب.. اگولك هي هاي الخابرتها هذا اليوم ونهى تخبلت عليك

شهم.. هههه اي هي

مهيب.. والله عرفت لان ادري بيك متسويها وتصاحب على مرتك

شهم.. هههه يمعود ويني وين هالسوالف التعبانه

مهيب.. وتالي گلتلها عليها لو لا ؟

شهم.. لا مهيب ما گلتلها ولا اريدها تعرف بعد ما اوصيك

مهيب.. تمام خويه بس خليني بالصوره الله عليك لان خفت عليها حيل

شهم.. تتدلل حبيبي

مهيب.. رايح اغير ملابسي واصلي تأخرت بلازدحامات

شهم.. ليش اذن !!

مهيب.. ههههه وين نايم انت يمعود صارله ساعه من مأذن

شهم.. والله ولا انتبهت استغفر الله رب العالمين واتوب اليه شلون فاتتني بلا ما احس

مهيب.. معذور خويه هاي القصه تصفن اكبر واحد

شهم.. يلا روح خلي اصلي لتلهيني اكثر

مهيب.. ههههه رايح

صليت ونزلت اتغده لگيتهم صابين وگاعدين ع السفره ينتظروني

شهم.. ها ولك جهاد شرفت واخيرا

جهاد.. هههه خالي ليش حاط گورك من گوري

شهم.. جهاد قسما برب العباد راح تطلعها الروحي شوكت تصير ادمي ولك

جهاد.. شبيك خالو ليش اني شمسوي قابل ؟!! ترى انت معظم السالفه كلش عوفني بحالي يرحم والديك

منال.. ولك لتنتر بوجه خالك ،، من تحچي ويا احچي باحترام

شهم.. عوفي خويه ،، گوم تعال اريدك

جهاد.. يمعودين دخلونه نتزقنب هسه وكت مشاكلكم انت وامي

شهم.. گووووم بسرعه ولك

تقرب مني جريته من اذنه وايدي الثانيه ورى راسه

شهم.. راسك اكسره بعد اذا سمعت صوتك يعله عليه لو على امك

مهيب.. شهم مو هيچ

شهم.. اسكت انت

جهاد.. العفو خالي مو قصدي

شهم.. يلا اگعد اكل

جهاد.. ما اشتهي رايح لغرفتي

شهم.. ماكو روحه اگعد بسرعه اشوف

الحجيه.. اگعد بيبي لتزعل خالك منك

گعدنه ناكل انقهرت علي بداخلي بس لازم يتربى صاير صلف كلش وماكو شي يوگف بعينه

اول ما خلصت الاكل صعدت نمت للعصر رجعت للمعارض

صار الليل سويتلهم عشه ولملمت هوسة المطبخ

صارت ساعه عشره اخذت اخواني نومتهم وگعدت العب حيه بالموبايل من ضوجتي

رفعت راسي تذكرت الدفتر والاقلام ظلن بالزاويه نسيت اجيبهن ،، طلعت اتسحب على كيف لان ابويه وسميحه گاعدين بالهول .. جبتهن ورجعت للغرفه ركض

ضميتهن جوه راسي اخاف السعلوه تشوفهن وتمددت افكر بالصار اليوم

اخذتني ذاكرتي اله من چان يسوي رجلي بلاصباغ ونرسمت صورته گدامي لمن صفنت على ملامحه الرجوليه

ظليت على هالحاله واني اتخيله گدامي ومبستمه ويا نفسي لحد ما سمعت ابويه ديسد بالبيبان يعني راح ينامون

شويه وطلعت اشرب ماي حتى اشوفهم نامو وفعلا چان البيت هدوء والكل نايمين

رجعت ع السريع طلعت الدفتر واختاريت اللون الاحمر من الاقلام

اني دائما اكتب بوقت فراغي خصوصا قبل لا انام لذالك خطي زين رغم تاركه الدراسه

فتحت السجل كتبت بنص الورقه (مفكراتي) ،، گلبت الصفحه ردت اكتب ترددت اخاف يوگع بيد سميحه وشيخلصني ساعتها

گلبت بي اعاين للصور لحد ما شفت نفسي وصلت لنص السجل ايدي وحدها اخذت القلم وكتبت ،،، احبك شهم

صفنت على الورقه هاي شسويت اني شنو هذا الكتبته ما عرفت افسر تصرفي هذا وخفت من نفسي كلش

سديت السجل ع السريع والخوف مسيطر عليه ،، رحت ضميته بجهة الكنتور ليجوه كلش حتى ليبين ورجعت انام

مياس.. عزه بعينچ مياس رجال بگد ابوچ شنو تكتبين احبك شهم حب شنو هذا التحسين بي اتجاه واحد متعرفي ولا تعرفين تفاصيل حياته اكيد متزوج وعنده جهال بطولچ لذالك اصحي على نفسچ وكافي غباء

غمضت عيوني وگلبي يوجعني وجع مو طبيعي بحيث احس النفس انحجب عني وحتى بعد ما اگدر ابلع ريگي

شويه وتذكرت لازم اخابره واگوله بالصار ويايه من رجعت للبيت ،، يا الهي شلون راح من بالي

اخذت التلفون ورمشتله اكثر من مره بس ماكو ما اتصل

شمرت الموبايل هستوني دا انام فزيت من دگ الجهاز بأذني ،، عاينت رقمه بسرعه جاوبت

مياس.. الووو

مهيب.. ها حبيبي مخابرتني ،، اسف موبايلي چان صامت وما انتبهت على مكالماتچ بس هسه مرت شهم جابتلي موبايل رجلها گالت ديرمشون علي شوف منو ومن شفتچ مرمشتله عرفت متصله عليه وظال بالچ  لذالك دگيتي على رقم اخويه

اول ما جاوبني انصدمت من كلمة ها حبيبي وچان صوته غريب مو صوت شهم

ظل يحچي بلا ما يسكت ،، يشرحلي واني صافنه علي شويه واستوعبت السالفه اكيد مرته مسويتله مشكله وديحلها اخو اله بحجة اني حبيبته

مياس.. اي ظل بالي عليك وينك متگولي

مهيب.. مو گتلچ موبايلي صامت ما شفت اتصالچ

مياس.. ما صار شي واعتذرلي من شهم اخاف ازعجته بهيچ وقت

مهيب.. لا حبي مصار شي ،، عموما شويه واخابرچ من جهازي انتظريني لتنامين

مياس.. ان شاء الله

سديت الخط بسرعه ورگعت الموبايل ع المندر بكل قوتي

مياس.. غبيه مياس غبيه غبيييه ،، على شنو مخابرته وتخلين روحچ وتخلي وياچ بمثل هيچ موقف انتظري للصبح واحچيله بالي صار احسن من هاللغوه الصارت

لزمت الجهاز غلقته وگمت غسلت وجهي لان احس نفسي صرت جمر

رجعت تمددت بمكاني وبعد صراع طويل من التفكير والقهر نمت ما اعرف شلون

چنت بالحمام اغسل طلعت لگيت مهيب واگف يحچي ويا نهى

مهيب.. ميصير هيچ نهى يعني والله حرجتيني بهالطلعه مالتچ

نهى.. مهيب والله ممرتاحه للشي هذا هو قبل اسبوع يگولي حاله انسانيه انت هسه تگول حبيبتي شديصير اريد احد يفهمني

شهم.. شكووووو

مهيب.. ها شهم رمشت حبيبتي يعني اقصد مياس على رقمك ونهى مثل متعرف من غيرتها ما تحملت وجابتلي موبايلك خابرتها گدامها حتى تتأكد

شهم.. شدتحچي مهيب شنو حبيبتك شنو خابرتها

نهى.. ها شوف حتى هو مستغرب والله عرفتك دتچذب عليه مهيب

مهيب.. عيب عليچ نهى من شوكت سامعتني مچذب ، هي صح هاي حالة انسانيه بس اني تعرفت عليها عن طريق شهم وحبيتها شصار يعني بعدين مو خابرتها گدامچ واني فاتح السبيكر خو سمعتي كلشي بأذنچ بعد على شنو هالحچي الزايد منچ

شهم.. لحظه لحظه شنو يعني خابرتها ؟!!!

مهيب.. اي يمعود .. يحچي ويأشرلي بحواجبه على نهى

شهم.. استغفر الله رب العالمين واتوب اليه وتالي وياچ بس فهمينيييييي ،، مليت والله مليت من غيرتچ وشكچ مليت منچ ملييييت

الحجيه.. لتصيح عليها شهم ترى ما اقبلها عليك

شهم.. شوفيها يمه قبل لا تحچين ،، ليش دتتصرف هيچ ششافت عليه حتى تنعدم ثقتها بيه لهل درجه بس اريد اعرف

منال.. ميخالف خويه اعذرها غيرتها دليل على حبها

شهم.. انعل ابو هيچ حب ،، الحب بلا ثقه فلس ميسوه

سمر.. خالو ما صار شي لتكبر الموضوع ،، اكيد عدها ثقه بيك بس الغيره عمتها

سحبت موبايلي من ايد مهيب وصعدت فوگ ،، رگعت الباب حيل خابرتها ع السريع ماكو مغلق

شهم.. اوف منچ نهى اوف اوف

واگف گدام المرايه انشف شعري واعصابي فالته مني طبت عليه نهى

نهى.. اسفه

شهم.. درت وجهي الها خزرتها بقوه ،، اعتذارچ ممقبول وخري من خلقتي

دفعتها ونزلت جوه صحت المهيب ،، طبيت لغرفته شويه ودخل ورايه

شهم.. تعال مهيب سولفلي شصار بسرعه

مهيب.. يمعود شبيك راح تنفجر ترى مصار شي غير تحبك وتغار عليك

شهم.. احچي مهيب شصار

مهيب.. اول گولي خو ما اذيتها الله عليك

شهم.. ليش اني اگدر أاذيها تدري باخوك ما بي حظ وياها

مهيب.. لا حشاك بس ...

شهم.. مهيب عوف هالسالفه وادخلي بالموضوع المهم شگلت المياس من خابرتها

مهيب.. چنت گاعد ويا اهلي بالصاله اجت نهى ومدتلي موبايلك بوجهي سألتها شو هذا گالت رقم غريب هواي يرمش الشهم هلايام واريد اعرفه منو
حاولت امي ومنال وسمر يهدوها بس چانت مصره تعرف الرقم المن ومن اصرارها عرفت لازم اخابر لان راح تسويلك مشكله الها اول مالها تالي

شهم.. مو من حقك تخابر مهيب تصرفك اتعس من تصرفها

مهيب.. شتريدني اسوي يا شهم ،، حقك ما شفتها شلون چانت اعصاب وترجف والله خفت عليها ليصيرلها شي من القهر

شهم.. كمل وشصار تالي

مهيب.. خابرت مياس وما انطيتها مجال تحچي حتى لا نهى تشك بشي وگلتلها حبيبي مخابرتني اسف ما ادري موبايلي صامت وهسه مرت اخويه جابت موبايله لان رمشله رقمت غريب فعرفتچ متصله عليه

شهم.. گمت على حيلي افتر بالغرفه واضرب على گصتي ،، والله عيب سوايتكم هاي لا تنحچه ولا تنگال
هسه فهمني اني شلون اعاين بوجها بعد الصار ولك حتى جهازها غلقته تدري لو لا

مهيب.. اكيد راح تقدر الوضع اصلا هي من جوابها الي عرفتها اتفهمت

شهم.. هي السالفه واگفه على تفهمها ،، ولك اني اني النحطيت بنص هدومي من هالموقف .. وادگ على صدري

مهيب.. الله عليك شهم اهدأ والله الشغله ممستاهله

شهم.. گتلي ممستاهله مو

فتحت الباب حيل وطلعت من الغرفه ،، صعدت فوگ لگيتها گاعده ع الچربايه تبچي

ما اهتميتلها لأول مره لأن بالعاده نقطة ضعفي دموعها ،، طفيت الضوه وتمددت انام

نص ساعه تبچي بلا ما تمل او تتعب اريد انام ما اگدر من وراها

شهم.. شلون تالي كافي اريد انطمر ورايه گعده

نهى.. متنام منو لازمك

شهم.. شلون انام وانتي گاعده تبچين براسي

نهى.. شلون يعني ناقص تحاسبني على هالسالفه هم

شهم.. لا احاسبچ ولا شي نازل جوه وخلي الغرفه الچ اشبعي بچي للصبح

جريت موبايلي من الميز ونزلت جوه بلاستقبال ،، سحبت الكوشه تمددت وما طولت نمت بسرعه من التعب

گعدت على صوت المنبه گمت غسلت وصعدت فوگ ابدل ،، طبيت لگيتها گاعده وعيونها مورمه من البچي

ما حاچيتها طلعت ملابسي دا ابدل شفتها گامت تريد تطلع من الغرفه

شهم.. وين رايحه

نهى.. اسويلك ريوگ

شهم.. ما اريد لتعبين نفسچ

نهى.. شلون تطلع بلا متاكل

ما جاوبتها ،، مشطت شعري ولبست ساعتي والمحابس

نهى.. راح تظل هيچ ويايه مو كافي البارحه نمت جوه بلا متفكر صارلي شي من القهر لا

طلعت من الغرفه بلا ما ارد عليها ،، ميهون عليه زعلها بس لازم تعرف غلطها حتى لتتكرر سالفة البارحه

شغلت سيارتي وطلعت لشغلي ،، وصلت قريب على مكان مياس شفتها گاعده ارتاحيت كلش

ما گدرت اروحلها لان مالي عين درت السياره وغيرت طريقي ،، بعدين اخابرها واعتذر منها على الشي الصار

گعدت الصبح على صوت ابويه ،، گمت سويت ريوگ تريگنه وطلعت لشغلي

وگفت بمكاني وعيوني تدور علي بلا ما اعرف السبب بس لأول مره ميجي

صارت بثمانيه ايست من جيته ،، اكيد صارتله مشكله ويا مرته لذالك راح يگطع مني بعد

طلعت موبايلي من جيبي فتحته لان چان مغلق شويه واجاني اشعار هو متصل بيه بلليل

فرحت كلش بعدين انتبهت على نفسي وانقهرت من الشي الدا احس بي ما اعرف شلون اتخلص منه لانه غلط بغلط ومو من حقي اصلا

سديت الموبايل وگعدت ارتب بالباكيتات مالت الكلنس ،، احس روحي حتى مالي خلگ اوگف يم السيارت علمود ابيعهن مثل كل يوم

حسيت احد وگف يمي بلا ميحچي ،، عاينت لحذائه رفعت راسي بتردد وانصدمت ....

يتبع..