رواية مياس قلب الشهم الفصل السابع 7 - بقلم لبنى الموسوي

#مياس_قلب_الشهم

للكاتبه #لبنى_الموسوي

حسيت احد وگف يمي بلا ميحچي ،، عاينت لحذائه رفعت راسي بتردد وانصدمت من شفت اخو شهم واگف گدامي

مهيب.. شلونچ مياس

مياس.. تعجبت وانحرجت بنفس الوقت ،، انت شدراك اني هنا ؟!!

مهيب.. مو مهم شلون المهم دريت .. اعتذر منچ عن كلام البارحه بس انجبرت علي لان مرت اخويه چانت واگفه يمي وتسمع الحچي مالتنه

مياس.. وشهم دزك حتى تعتذر ؟!!

مهيب.. لا طبعا هو ميعرف بجيتي لهنا واصلاً حتى مخابرتي الچ ميدري بيها لأن چان بالحمام بوقتها ومن عرف كلش ضاج وسوالنه مشكله

مياس.. مصار شي حقكم ،، اني الاعتذر اخاف سببتله احراج باتصالي

مهيب.. اگول تبيعيلي الكلنس كله ؟؟

مياس.. عاينتله بابتسامه ،، انت هم تريد تساعدني مثل اخوك ؟؟

مهيب.. هههه لا يمعوده بس نحتاجه بالمعارض هواي نصرف كلنس هناك من التربان

مياس.. متأكد ؟

مهيب.. اي طبعا

مياس.. ماشي اخذه بس من هسه اگولك لتنطيني اكثر من سعره حتى لا تحرجني وتحرج نفسك ويايه

مهيب.. يمعوده منيلي حتى انطيچ زياده ،، انتي اذا عندچ يا ريت تداينني محتاج اشتري رصيد ومفلس

مياس.. هههههه اني عندي بس اذا نطيتك معناها انام بالشارع اليوم

مهيب.. مرت ابوچ مو ؟

مياس.. وسعت عيوني علي : شنو شهم مسولفلك كلشي الضاهر !!

مهيب.. اني طلبت منه يحچيلي بس لتخافين محد يعرف بسالفتچ غيري وتگدرين تعتبريني اني وشهم واحد لان ماكو فرق بيناتنا

دنگت راسي بلا ما اجاوبه خجلانه كلش من وضعي ومن الشي العرفه عني لحد ما سمعته يحاچيني

مهيب.. مياس

مياس.. نعم

مهيب.. ارفعي راسچ ولتخجلين من اي شي انتي احسن من الف بنيه گاعده معززه مكرمه يم عائلتها

مياس.. عاينت للشارع باستهزاء ،، هه بهذا الشارع

مهيب.. اي بهذا الشارع ترى مقياس الشرف والعفه مينقاس بهالشكل

مياس.. شلون ينقاس لعد ؟!!

مهيب.. اكو الگاعدات بين اربع حيطان ويبيعن شرفهن بأقرب فرصه
واكو الگاعده بنص الف رجال ومع ذالك تحافظ على شرفها 
مقياس العفه هو شلون تگدرين تحافظين على نفسچ مو شلون تبيعيها

مياس.. شكرا على كلامك ،، مبين عليك طيب مثل اخوك

مهيب.. هههه شكرا للمجامله

مياس.. بس هاي حقيقه مو مجامله

مهيب.. يلا انطيني الكلنس وخلي اوصلچ لان تأخرت كلش

مياس.. شكرا الك بس ماكو داعي بيتنا قريب اروح مشي

مهيب.. لا اني اوصلچ وما اريد اعتراض إلا اذا چنتي ما واثقه مني

مياس.. لا العفو مو قصدي

مهيب.. لعد گومي بسرعه

گمت ويا فتحلي الباب الخلفي واشرلي بأيده اصعد

مياس.. شكرا

مهيب.. العفو

صعدت ويا بهدوء بلا ما نحچي ثنيناتنه لحد ما وصلت الراس فرعنا

مياس.. نزلني هنا

مهيب.. شنو وصلتي

مياس.. لا بعد شويه بس ما اريد احد يشوفني وياك

مهيب.. اي وصلت الفكره بس مياس اي شي يصير خابري شهم وگوليله لتخلين الشي الصار البارحه يأثر عليچ
ترى محد يگدر يساعدچ غيره وطبعا اني هم اساعدچ اذا احتاجيتيني

مياس.. تسلم يلا مع السلامه

مهيب.. الله وياچ ،، ديري بالچ على نفسچ

مياس.. ان شاء الله وشكرا على التوصيله

مهيب.. لا ولو تتدللين

نزلت امشي ،، التفتت لگيته بعده واگف ينتظرني ضحكت من سوالفه يشبه اخو بكلشي 

طبيت للبيت چانت الساعه ثمانيه ونص هسه شيخلصني من سميحه ولسانها

لگيتها هستوها گاعده هي واخواني وديتريگون بالهول

سميحه.. هاي شنو شجابچ هسه

مياس.. انزع بملابسي واحچي وياها ،، خلصت شغلي وبعت وجبت اليوم كلها لذالك رجعت

گمزت عليه جرتني من ايدي حيل وهي تصيح

سميحه.. شلون بعتي بهالسرعه ولچ احچي ك××× منو ديساعدچ وشنو المقابل

مياس.. عتيت ايدي منها ،، ولد الحلال هواي وابن الحلال من يساعد ميريد مقابل المساعدته

سميحه.. ك××× عليه هالسوالف اگص ايدي اذا ما چنتي ×××× لان سالفتچ مو خاليه ابد

مياس.. شنو هالحچي مدتشوفين اخواني گاعدين گبالچ والله عجيب

سميحه.. من باچر تاخذين ضعف الكميه تبيعهن ما دام اكو من ×××× ويساعدچ مقابلها

مياس.. فتحت عيوني عليها ،، شدتحچين يمعوده هو اني هذني اوگف بيهن من الصبح للظهر يلا ابيعهن هالدور ضعفهن معناها لليل ما ارجع

سميحه.. والله هذا العندي ما عاجبچ تزوجي وخلصيني من چهرتچ

مياس.. اتمنى هالشي بس غير الگه ادمي يخلصني من المعاناة وياچ خو ما اتزوج ابن اختچ حتى ارجع اطمس روحي بالطهاره مره ثانيه وهالدور شلون طهاره واصله لسابع گاع يعني العمر كله ما اگدر اطلع منها

سميحه.. تگولين علينه طهاره ولچ بسيطه اني اعلمچ

ركضت جابت الصونده كالعاده ظلت تضرب بيه حيل واخواني يتصارخون من البچي لحد ما گطعتها عليه

سميحه.. ×××× گومي اشتغلي بسرعه وحسابچ ويايه عسير بس اصبريلي

گمت من يمها بالگوه لان جسمي منتهي من الضرب ،، طبيت للغرفه ابدل ودموعي تجري بلا وعي

بلأثناء سمعت موبايلي يدگ نزيت من الخوف .. ركضت بسرعه رفضته وسويته صامت لتسمع وشيخلصني بعد ،، عاينت رقم شهم

ضميته بالكنتور بين الهدوم وطلعت اسوي شغل البيت

جريتها شغل لحد الغده غسلت المواعين واخذت اخواني للغرفه انيمهم

انتظرتهم ينامون ورحت للكنتور طلعت موبايلي لگيت شهم متصل عليه مكالمتين ودازلي رساله

شهم.. وينچ ردي ظل بالي عليچ

ترددت اخابره اخاف مرته يمه وتصيرله مشكله ،، طلبت الرصيد عندي بي مال رساله يلا ادزله مسج والله كريم حتلو اظل بلا رصيد

مياس.. ما عندي رصيد اخابرك بس ليظل بالك كلشي ما بيه

خليت الموبايل ع المندر ،، گعدت وعيني علي لحد ما شفته لمض

رفعته ع السريع شفت رساله من الشركه فتحتها لگيته محولي رصيد ٥٠٠٠

مياس.. لا يا الله شگد عيب افتهم السالفه هالشكل

بعدني صافنه ع الشاشه شفته يخابر گبل فتحت الخط علي

بعد ما وصلت لشغلي ظل بالي كله يمها لان ما اعرف شصار وياها البارحه واحتاريت شسوي حتى الهي نفسي شويه واجاني اشعار فتحت خطها

اخذت الموبايل وخابرتها ما جاوبتني ،، شبيها معقوله زعلت من سالفة البارحه ؟!!

ساعتين ورجعت خابرتها رفضتني !!! اتصلت بعدها  مرتين ما جاوبت اخير شي دزيتلها مسج وانتظرت ردها بس بلا فائده

خلصت شغلي بالمركز ورجعت للبيت اول ما طبيت صاحتني امي

الحجيه.. هلا يمه الله يساعدك تعال اريدك

شهم.. بس خلي ابدل واجيچ

الحجيه.. لا تعال هسه لاحگ ع التبديل

شهم.. يوم والله تعبان شبيچ تلگيتيني

الحجيه.. راح تزعلني منك

شهم.. هههه كلشي ولا زعلچ ،، هاي گعدت تفضلي اسمعچ

الحجيه.. شبيك ويا نهى

شهم.. لحگت تشكيلچ

الحجيه.. ما شكتلي بس حسيت عليها عيونها رايحه من البچي وما اكلتلها لگمه من الصبح لحد الان

شهم.. انتي شفتيها شسوت البارحه لو لا

الحجيه.. اي شفت بس يمه حقها غير غيرتها دليل على حبها الك ،، بعدين شلون انطاك گلبك وهانت عليك تخليها زعلان بهالشكل هاي نهى حبيبة گلبك لو نسيت

شهم.. لا يمه لا نسيت ولا هانت عليه بس لازم تتعلم مو كلشي يجرالها
الغلط يظل غلط ما اگدر اتجاوزه بسهوله حتلو احبها

الحجيه.. هسه شنو مراح تصالحها

شهم.. هههه طبعا اصالحها بس انتي اطلعي من الحمره

الحجيه.. خلف الله عليك

شهم.. بست راسها واني اضحك ،، الله يخليچ النه يا اطيب گلب بالدنيا

الحجيه.. ويخليك الي يشمعة بيتي وعكاز گلبي

شهم.. رايح ابدل تردين شي بعد

الحجيه.. لا يمه روح ارتاح

صعدت فوگ لگيت نهى دتنضف بالغرفه ومن گد ما باچيه عيونها رايحه

نهى.. الله يساعدك

شهم.. هلا ،، حضريلي الاكل حتى انام كلش تعبان

نهى.. مرت ايهاب راح تصب اني دا انظف بالغرفه

شهم.. دا اگولچ تعبان استعجلي يمعوده

نهى.. هاي شبيك لتصيح هسه نازله اصبلك

غيرت ملابسي نزلت لگيتهم صابين غسلت وگعدت اكل وياهم

خلصت غده واگف ع المغسله اغسل سمعت مهيب يحچي ورايه

مهيب.. خابرتها

شهم.. بتعجب منو تقصد ؟!!

مهيب.. مياس

شهم.. اي خابرتها بس ما جاوبت

مهيب.. اني رحتلها اليوم لمكان شغلها

شهم.. درت وجهي علي بعصبيه ،، شلون تسوي هيچ مهيب منو سمحلك

مهيب.. شبيك شهم سويت هالشي بس حتى اخلصك من الاحراج لان شفتك البارحه شلون چنت شايل هم لهل موضوع

شهم.. وحتى تخلصني من الاحراج تگوم تحرجها الها

مهيب.. لا خويه شنو هالحچي مو قصدي احرجها مثل متگول بس حبيت اوضحلها الشي صار بدون علمك وبنفس الوقت ساعدتها

شهم.. شلون يعني ساعدتها ؟؟

مهيب.. اشتريت منها الكلنس ورجعتها للبيت

شهم.. ما گالت شي ؟!!

مهيب.. بالبدايه حسيتها ضاجت بس بعدين اقتنعت وحتى قبلت تصعد ويايه اوصلها

شهم.. رايح انام اني بعدين نحچي

عفته ومشيت ضجت من تصرفه كلش لان امنته محد يعرف تالي راحلها وحرجها بروحته ،، بلا هسه شتگول عليه من تعرف سولفت على مشكلتها لاخويه اوف منك مهيب شگول عليك

سحبت موبايلي من ع الميز دا اروح للاستقبال صاحتني نهى

نهى.. وين شهم

شهم.. للاستقبال انام

نهى.. ليش ؟!!

خزرتها وهزيت بيدي بلا ما اجاوبها ،، طبيت للاستقبال سحبت الكوشه ونمت بسرعه

فزيت على صوت الرساله لان جان الموبايل يم راسي ،، فتحت تك عين من التعب بس شفت رقم مياس گمت على حيلي وصحصحت

من عرفت ما عدها رصيد گبل دخلت على رصيدي چان عندي ٧ حولتها ٥ وخابرتها ع السريع

مياس.. الو

شهم.. هاي وينچ

مياس.. شو ما شفتك الصبح

شهم.. خجلان منچ والله على الشي الصار البارحه اعتذر كلش

مياس.. اني الاعتذر اخاف سببتلك احراج ويا عائلتك

شهم.. لتحچين هيچ بابا ترى ازعل منچ

مياس.. اجاني اخوك اليوم دريت

شهم.. اي وهم اعتذر عن هالشي

مياس.. لا بالعكس ساعدني خلف الله علي

شهم.. شصار وياچ البارحه سولفيلي

مياس.. كلشي ما صار انت نقذتني من سويتلي رجلي لان بس شافتها سميحه صدگت وخلصت من شرها وإلا بس الله اليعلم شچان سوت بيه لو ما هالسالفه

شهم.. مياس فتحي مخچ زين وركزي ويايه اريدچ تراقبيها هي وابن اختها النذل لان اكيد راح يرجعون يتفقون عليچ مره ثانيه لازم تعرفين بخطتهم حتى تگوليلي واگدر اصيدهم

مياس.. شلون يعني

شهم.. سوي الگتلچ علي ومعليچ بالباقي اهم شي لتظلين وحدچ بالبيت لان بس تطلع وتعوفچ معناها اكو خطر عليچ انتبهي  لهل شي

مياس.. ماشي راح اراقبها واشوف شلون تصير تالي ،، اسفه الضاهر گعدتك من النوم

شهم.. هههه شلون عرفتي ؟؟

مياس.. من صوتك

شهم.. مو مهم فدوه الچ باباتي

مياس.. صدگ شكرا على الرصيد بس مچان اله داعي والله

شهم.. عيب عليچ هالحچي الف مره گتلچ اني مثل ابوچ

مياس.. اوك اخذ راحتك تعبتك ويايه

شهم.. مياس

مياس.. نعم

شهم.. خابريني بأي وقت ولتشيلين هم لشي تسمعيني بابا

مياس.. اي

شهم.. يلا ديري بالچ على نفسچ ما اوصيچ

مياس.. شكرا

شهم.. الله وياچ

سديت الخط منها ورجعت نمت لان چنت تعبان كلش

بعد ما خابرني نمت اقل الساعه وگعدت على گعدت اخواني

غسلتلهم بالحمام وغسلت وراهم طلعت لگيت ابويه طالع من البيت وعماد گاعد بالصاله ويا سميحه

مياس.. لا هلا بالقذر

رحت للغرفه اركض نشفت شعري وغيرت ملابسي لان تبللت من جسمي وطلعت ع السريع حتى اسمعهم شيحچون

عماد.. ها مياس شلونچ

مياس.. زينه

سميحه.. روحي سويلنه چاي شعندچ واگفه يمنه

رحت بلا ما اجاوبها خليت الچاي على النار ورجعت ع السريع وگفت بطرف الممر اتسمع عليهم

سميحه.. هسه وكتك انت

عماد.. هاي شبيچ دا اگولچ شغل استثمار وباربيل يعني يربحني الملايين
لاحگ على مياس بعدها صغيره كلها كم شهر وارجع افتح الموضوع ويا ابوها اذا ما قبل ساعتها اسوي التفقنه علي واخذها غصبا عنه

سميحه.. براحتك بس بكل الحالات اذا صارت مياس الك حصتي موجوده

عماد.. هههه تتدللين

رجعت للمطبخ ممستوعبه السمعته .. شنو يعني راح يولي واخلص من الخوف الحسيت بي بسببه كم شهر ،، يا ربي فدوه لاسمك مدا اصدگ نقذتني من عنده واخيرا

وديتلهم الچاي ورحت اركض الغرفتي ،، حسيت جسمي يرجف من الفرحه بحيث مدا اگدر اسيطر على مشاعري

گمت اضحك ويا روحي مثل المخبله شلت الموبايل ردت اخابر شهم بس تذكرت الصار البارحه بطلت

گعدت من النوم العصر طلعت ويا مهيب وجهاد للمعارض صارت بثمانيه هم راحوا للگهوه واني خابرت اخو نهى اجه عليه ورحنه للجم نتدرب مثل العاده

يوسف.. ابو الشهامه خيرك احسك مو طبيعي

شهم.. اسكت يوسف اختك راح تخبلني والله

يوسف.. يا ستار بس لا خربتوا من تالي عمركم

شهم.. ههههه لك انت تالي وياك

يوسف.. اني لو انت ؟!! ... زين احچيلي شسوتلك

شهم.. تغار عليه حتى من خيالها تعبتني وعلي

يوسف.. غير تحبك بعدين يا شهم قدر وضعها تدري بيها دتحس نفسها عاله عليك

شهم.. لا يوسف عاله شنو !! بس يا اخي ماكو ثقه انعدمت خلص

يوسف.. ثقتها بروحها انعدمت مو بيك

شهم.. شلون يعني

يوسف.. اصفنلها وراح تعرف شلون ،،، عموما گوم ويايه خالتك زعلانه عليك شد حيلك حتى تراضيها

شهم.. ههههه هي هاي الچانت عايزه

يوسف.. وربي متخلص منها اليوم وگول يوسف گال

شهم.. تعلمني بيهن هي وسهامه نفس النقشه سبحان الله هههه

رحت لبيت خالتي طبيت دا اسلم عليها چان تدور عني وجهه

شهم.. ههههه هاي شنو خاله مسويتها صدگ

ام يوسف.. ولي عني بعد لا اني خالتك ولا انت ابن اختي خربنه خلص

شهم.. لا يابه ههههه زين ليش فهميني

ام يوسف.. لا تسأل لا تگول چنك نسيت عندك خاله وواجبك تسأل عليها

شهم.. هههه والله حقچ بس اولا مشغول تدرين بشغلي وصعوبته بعدين تراني هذاك الاسبوع چنت يمچ شتريدين اجيب نهى واصير گعيدي عندچ

ام يوسف.. ههههه والله يمه امنيتي هاي

يوسف.. حلوووو حتى سهامه تجي تفلش البيت على راسچ انتي وبنتچ هههه

ام يوسف.. اطلع منها انت ،،، اني واختي نتجازه ليش تغار

يوسف.. ههههههه دستلم بلا ،،،، عمي والله انتن النسواين مصيبةةةةةةة اويلي منچن

شهم.. لتحچي على خالتي وامي ولك

يوسف.. هاي شنو شو چنك بعت القضيه بسرعه ... عموما اذا انت عاجبك تصير دوشك مال رزايل اني ياهو مالتي

شهم.. ههههه جوعان اريد عشه خاله تعشيني لو لا

ام يوسف.. عمه بعيني وليدي جوعان وما اعشي خسه الجوع اي والله

شهم.. بستها من راسها واني اضحك ... اسم الله عليچ خالاتي

ظليت يمهم التالي لليل رجعت وصعدت للغرفه لگيت نهى گاعده تنتظرني

شهم.. شو گاعده

نهى.. ليش تأخرت ؟

شهم.. چنت ويا اخوچ وبعدين رحت لبيت اهلچ تعشيت يمهم ،، ها ولو مراح تصدگيني لان حضرتچ ما عندچ ثقه بيه لذالك شيلي التلفون خابري حتى تتأكدين

نهى.. شهم ليش تحچي ويايه بهالطريقه

شهم.. هذا الكلام رد على تصرفاتچ نهى لان اخير فتره حيل تماديتي وصار لازم اوگفچ عد حدچ

نهى.. صدگ تحچي كل هذا بس لان غرت عليك

شهم.. لا طبعا الغيره مالها علاقه بالموضوع ،، گولي شكيت بيك .. صغرتك گدام اهلك .. تدخلت بخصوصياتك .. بس لتگولين غرت

نهى.. گتلك اسفه شلون تالي مراح تنسى

شهم.. شيفيد الاسف اذا على اقل موقف ترجع تصرفاتچ هي هي ميتغير منها شي

نهى.. براحتك شهم الضاهر بديت تمل مني لذالك گمت تدور حجج

شهم.. هو هذا تفسيرچ الكلامي ،، عموما افتهميها مثل متحبين مالي خلگ اشرحلچ

درت وجهي فتحت الكنتور وغيرت ملابسي سمعتها گامت تبچي كسرت خاطري وما گدرت اتحمل اكثر

شهم.. كافي لتبچين

بس گلتلها هيچ زاد بچيها لحد ما گامت تشهگ ،، رحت حضنتها ع السريع

شهم.. كافي يمعوده ما تعبتي من البچي مو صارلچ يومين موتيها الروحچ

نهى.. ليش دتعاملني بهالشكل شهم ،، گولي مليت مني والله مستعده انسحب من حياتك ولا اشوف هالكره بعيونك

شهم.. شنو مليت شنو كره شدتخربطين انتي لخاطر ربچ !! ولچ وتالي وياچ راح تموتيني ليش فجأه نهزت ثقتچ بحبي لهل درجه بس جاوبيني

نهى.. تشهگ وتگول : لان انت تغيرت كلش شهم
ممنتبه على نفسك شلون صارلك فتره بس تتصفن هاي من غير الشغلات الضامهن عني والله حاسه اكو شي بس متقبل تگولي

شهم.. وداعتچ بگلبي ماكو شي ،، يولي كل الموضوع تعبان من ضغط الشغل واكو حسبه ببالي اريد احلها بس مو يمچ السالفه

نهى.. وشنو هي ؟؟

شهم.. گتلچ مو يمچ على شنو تردين تعرفيها

نهى.. يعني افهم من كلامك بعدك تحبني

شهم.. لا يا الله وچ انتي مخبله !! تحچين من كل عقلچ لو تتشاقين
بابا عيب عليچ تسأليني هالسؤال وانتي اكثر وحده بالدنيا فاهمتني عدل

نهى.. تحبنيييي

شهم.. هههه خبال اي والله

نهى.. جاوب هاي شبيك

شهم.. اي احبچ ومو بس احبچ اموت عليچ بعد شتردين

نهى.. احضني لعد مشتاقه الحضنك حارمني منه من البارحه يا خبيث

شهم.. هههه چنچ على حضن بس قبل كلشي توعديني تبطلين خبالاتچ

نهى.. اوعدك يلا افتح ايدك بسرعه

شهم.. هههه تعالي حياتي واني هم شتاقيت الحضنچ

نهى.. احبك والله احبك واعشق كلشي بيك حتى زعلك عليه

شهم.. هههه واني هم احبچ واحب حتى عقلچ من يطگ فيوز ويطلعني من طوري

نهى.. مشتاقتلك

شهم.. واني هم مشتاقلچ

نهى.. وتالي

شهم.. التالي خلي نلف راسنه وننام ورايه گعده

نهى.. ليش اكو غير حل

شهم.. ههههن صايره سرسريه ولچ

نهى.. هسه اني شگتلك قابل واگفلي ع الكلمه

شهم.. هههه تعالي حياتي حضنه منچ تسوه الدنيا وما بيها

اخذتها بحضني ونيمتها على ايدي لحد ما غفينه ثنيناتنه

گعدت الصبح تريگت وطلعت للشغل ،، وگفت بمكاني واحس نفسي اراقب الطريق .. زين ليش دا اراقبه معقوله انتظر جيته وتالي شلون بيه لازم اصحى على نفسي ميصير الدا اسوي

شفت سيارته من بعيد فرحت بداخلي بس ما بينت هالشي حتى لنفسي ،، تقرب مني ونزل الجامه

شهم.. صباح الخير

مياس.. صباح النور ،، شلت باكيت وانطيته

شهم.. ما اريد

مياس.. صفنت بوجها بتعجب : ليش ؟!!

شهم.. غير عندي بالمعرض دسته كامله من وراچ انتي ومهيب

مياس.. هااا براحتك

شهم.. ههههه جيبي جيبي دا اتشاقه وياچ

مياس.. هههه لا حقك صدگ عندك كومه شتسوي بي

شهم.. جيبي ولچ

مياس.. هاك بس لازم تنزل اريد احچي وياك ضروري

شهم.. طفيت السياره ونزلت ع السريع ،، خير صار شي ؟!!

مياس.. اي البارحه العصر اجه عماد للبيت

شهم.. اي ؟؟

مياس.. تسمعت عليهم مثل ما وصيتني سمعته گللها راح يسافر الاربيل كم شهر عنده استثمار ويا صديقه ومن يرجع يطلبني من ابويه اذا ما قبل ساعتها ينفذ اتفاقهم

شهم.. صدگ تحچين !!

مياس.. اي شو ضجت توقعتك تكيف مثلي

شهم.. لا مياس اكيف شنو غير اني دا اعد الدقايق حتى اصيده وابرد نار گلبي بي لهل ساقط

مياس.. هيچ احسن متعرف رب العالمين شكاتبلي ،، احس هل شي بي صالح للكل واولهم اني

شهم.. ونعم بالله ،، دهاچ الفلوس خلي اروح تأخرت واي شي تحتاجي خابريني مو تترددين

مياس.. ليش عندي غيرك

شهم.. هههه يلا مع السلامه

مياس.. الله وياك

راح وظليت صافنه ورى مدري شبيه اول مره احس بهل احساس ،، هواي صادفت شباب وزلم وشياب ساعدوني من قريب او من بعيد بس محسيت بالشي الدا احسه اتجاه شهم

عمري كله ما نظرت الولد بالشارع ولا نعجبت برجال ولا حتى دگ گلبي لأي بشر ولو دقيقيه وحده بس هسه دا احسه يدگ ويدگ سريع هم شنو يعني معقوله حبيته ؟!!!!

بس ميصير والله ميصير .. هو متزوج ورجال بگد ابويه وفوگ كل هذا يعتبرني مثل بنته ،، الله يهديچ مياس شكل الضيم الشفتي بحياتچ ضرب على عقلچ وخرفيتي من صغرچ

ساعه تقريبا واني بالي مو يمي بحيث احس نفسي اختنگت من التفكير لحد ما شفت اخو شهم صف سيارته گدامي

مهيب.. ها مياس شلونچ

مياس.. هههه هاي شنو راح تلزمون عليه مناوبه انت واخوك رايحين جايين علمود تشترون مني وتساعدوني

مهيب.. مساعده شنو يمعوده اريد كلنس السيارتي ما عندي

مياس.. والدرزن مالت البارحه وين وديته ؟

مهيب.. ذبيته بالمعرض ونسيت احط واحد هنا

مياس.. راح اسوي روحي مصدگتك ،، عموما تفضل

مهيب.. لا اريد الدرزن كله

مياس.. لا عفيه ما اگدر

مهيب.. ليش ؟!!!

مياس.. ما اگدر وبس

مهيب.. مياس احچي لتضوجيني

مياس.. دنگت وحسيته نزل من السياره بس تفاجأت من اجه گعد ع الرصيف بصفي

مهيب.. يلا سولفيلي

مياس.. فتحت عيوني علي ،، هاي شسويت گوم لا الناس يشوفوك

مهيب.. خلي يشوفون عادي شكو بيها

مياس.. صدگ تحچي ترى اني الراح اوگع بيها مو انت

مهيب.. ماشي احچيلي لعد حتى اروح

مياس.. شحچيلك ؟؟

مهيب.. ليش متردين اشتري منچ كل الكلنس

مياس.. مرت ابويه

مهيب .. شبيها هالغضب

مياس.. من تشوفني ارجع من وكت تحچي عليه حچي يفشل وتشك اكو احد يساعدني بس بمقابل

مهيب.. شلون يعني !!

دنگت استحيت اجاوبه شتقصد سميحه من كلامها لحد ما سمعته صاحني

مهيب.. مياس

مياس.. نعم

مهيب.. تتهمچ بشرفچ يعني ؟؟

مياس.. نزلت عيوني منه وجاوبته : اي

مهيب.. لا يا ربي لكم هاي شنو من بشر والله راح اتخبل

مياس.. يلا مدام عرفت صار لازم تروح

مهيب.. ممكن اطلب منچ طلب قبل لا اروح

مياس.. شنو گول

مهيب.. اريد رقمچ ضروري

مياس.. جاوبته بخزره :  شتسوي بي ؟!!

مهيب.. لتعاينين هيچ ترى اني مو من هالنوع بس عندي وياچ موضوع ضروري الضهر اخابرچ واگولچ علي

مياس.. خو احچي هسه

مهيب.. لا هسه ما اگدر

مياس.. ماشي انطيني موبايلك اسجلك الرقم

طلع موبايله صفنت علي مشايفه هيچ موبايل كلش حلو وحديث

مهيب.. شو صافنه اذا عجبچ گدامچ

مياس.. هههه لا يمعود افتهمت غلط ،، جيب خلي اسجله

اخذت الموبايل وكتبتله رقمي ،، سلم وراح حتى نسى ياخذ الكلنس مني

لل١١ اني ما بايعه بس باكتين يا ربي شلون بيه اليوم ماكو رزق شيرجعني للبيت اذا ما بعتهن كلهن

شويه ووگف گدامي ابو المي ورد ... اهووو هذا شجابه هسه

- شلون صرتي بالي يمچ

مياس.. وانت شعليك روح منا

- لا هالمره مدا اتحارش فعلا دا اسأل عنچ لان انشغل بالي عليچ

مياس.. ما اريد سؤالك ولي من گدامي

- زين اريد كلنس

مياس.. رفعتله راسي باستغراب : شنو ؟!!!

- اريد الكلنس وكله

مياس.. ما ابيعلك انقلع يلا

- شنو متبيعيلي لعد شعندچ گاعده هنا

صفنت بيني وبين نفسي .. دخلي ابيعه اله واخلص احسن ما ارجع للبيت واكلي رزايل وضرب من سميحه

مياس.. يلا اخذه وخلصني

طلع الفلوس من جيبه انطانياهن وهو صافن بوجهي ،،، يعاين عليه بنظرات غريبه

-تفضلي

اخذتهن منه ورحت ع السريع بس ظليت مصدومه من تصرفه .. هذا شبي !! والله راح يخبلني كل ساعه بوجه

طبيت للبيت ولان من وكت شويه هم سمعت كلام من سميحه بس ما رديت عليها

اشتغلت بالبيت لحد ما صار الغده تغدينه واخذت اخواني نيمتهم

تمددت حتى انام وكالعاده لازم يجي شهم على بالي واتذكر ملامحه وكلامه وضحكته وابتسم ويا روحي مثل المخبله بلا ما امل او اتعب حتى

ادري بي حلم مستحيل وادري اكو مره بحياته تحبه وتغار علي بس مو بيدي ما اگدر ابطل تفكير بي لدرجة حسيت اليوم گلبي وجعني لأول مره معناها هذا هو الحب

غمضت عيني واستغفرت ربي حتى انام سمعت موبايلي يدگ

شلته ع السريع اخاف سميحه تحس عليه ،، عاينت رقم غريب يمكن اخو شهم

مياس.. الو

مهيب.. ها مياس اني مهيب

مياس.. اي عرفتك

مهيب.. شلونچ

مياس.. تمام وانت ؟

مهيب.. الحمد لله

شو هذا سكت ما حچه شي بعد ،، عاينت للشاشه بعده موجود ع الخط

مياس.. مهيب بعدك ويايه

مهيب.. اي وياچ

مياس.. لعد احچي شبيك ساكت شردت مني الصبح ؟؟ .... بعد لحظات من الهدوء سمعته يسألني :

مهيب.. مياس تتزوجيني ؟؟ ....

يتبع..