#مياس_قلب_الشهم
للكاتبه #لبنى_الموسوي
اعتذر على التأخير كهرباء مچانت عندي هسه يلا اجت ...
احببتكـَ وڪأنكَ ماءً تحيّي ڪل جزء ذبل في داخلي ❤
رحت جبت غراض نونه وفصلت الاجهزه عن الكهرباء .. قفلت البيبان وطلعت ويا شهم
صعدت بالسياره باوعت علي وجها ميتفسر من العصبيه : الصبح مچان بي شي !!
استغربت وخفت بنفس الوقت
من الهوسه والقهر مچنت منتبهه على شكله وحالته المو طبيعيه
مياس.. شهم صاير شي ؟؟
شهم.. خل نوصل للبيت
خفت من رده كلش بس ما جاوبته ولا حاولت افهم شبي .. اول ما وصلنه للبيت اخذ نونه مني وگال :
شهم.. اسبقيني الغرفتچ
مياس.. وين ماخذها ؟!!
شهم.. المنال
يلا روحي الغرفتچ انتظريني هناك
مشيت عنه والخوف سيطر حتى على رجلي .. ما اعرف شمسويه من مصيبه وديحاول يحاسبني عليها
دخلت للغرفه وفتحت عيوني لمن شفت سجل مذكراتي مشمور ع الچربايه
مياس.. لا يا ربي هذا شجابه هنا !! منو طلعه من الكنتور
معقوله شافه شهم ؟!!
لا لا اكيد ما شافه
اي اي ما شافه ما شافه
لا يمكن شافي
دمعت عيوني : يا ربي شلووووون
ما اتصور شافه لأن مو طبيعته يدخل الغرفتي ويفتش بلا ميستأذن
زين الدفتر شيسوي هنا ؟!!
ممكن تكون منال ؟
سمر
رنا
تبارك
الحجيه
عزززززززه اذا صدگ الحجيه
مياس الحجيه وين تعرف تقره من ثول الثولچ هي يا دوب تقره قرأن لأن حافظته
ولچ اركضي ضمي قبل ليجي
شمرته جوه الچربايه ع السريع .. هستوني رفعت روحي دخل شهم
عدلت نفسي بخوف .. اباوع علي عيونه ع الچربايه : شنو يعني ديدور على السجل ؟!! لا يا ربي لاااا
- بعد ما وديت نهى لمياس اصرت عليه ابات يمهم
وافقت لأن بصراحه استصعبت اعوف بنتي واروح ما ادري ليش
نمت بسرعه .. بلأساس چنت نايم ومنال گعدتني فظلت النومه بعيني
فتحت عيوني لگيت الضوه طالع .. باوعت النهاوي نايمه بصفي والبرائه مرسومه بملامحها
ما تحملت المنظر الملائكي
دنگت بستها بهدوء دا ارفع راسي صارت مياس گدامي
صفنت عليها نايمه والممه بيدها والايد الثانيه على صدر نهى
ظليت اركز بملامحها بلا وعي لحد ما حسيت على نفسي وصحيت
گمت ع السريع لبست ملابسي دا اطلع بچت نهى .. هزتها وهي نايمه
مياس.. اششش ماما نامي الله يخليچ والله تعبانه
هزيت راسي وضحكت من تصرفها هذا .. اخذت محفظتي من جيبي خليتلها مبلغ جوه مخدتها وطلعت للمعارض
مر اسبوعين على بقاء مياس يم اهلها
چان البيت بارد بغيابها هي ونهى لأن بالنسبه الي هم اقرب شخصين لگلبي من بعد امي طبعاً
ظلت حالة ابوها تتدهور يوم بعد يوم اخير شي اخذت رقم اهله منه وخابرت على اخوته حتى يجون يشوفله حل خطيه
بعد ما عرفوا بوضعه قرروا ياخذوا الشيخ معروف بالرمادي
اتفقت وياهم على يوم الثلاثاء ورحت من الصبح انطيت خبر لابو مصطفى حتى يستعد للسفر
طلعت منهم للمعارض للظهر يلا رجعت للبيت
تغديت وصعدت انام للاربعه وربع حسيت على صوت المنبه
دخلت للحمام غسلت ع السريع ونزلت حتى اروحلهم قبل ليجون اخوته
لگيت الكل بالصاله .. سلمت عليهم دا اطلع انتبهت على ابن ايهاب شايل بيده سجل يشبه السجل الشتريته المياس قبل زواجها من مهيب
صار عندي ردة فعل : هو لو لا ؟!!
اخير شي رحت علي اخذته من ايده حتى اتأكد
فتحته لگيت اسمها بأول ورقه وكاتبه علي (مفكراتي) وجوه التاريخ ١٢ اب ٢٠١٣
استغربت كلش من هذا الشي .. گلبت بي باستعجال
فارغ تقريباً والاوراق المكتوب بيهن ينعدن ع الاصابع
دا اتصفح بلاوراق ع الطاير لمحت كتابه بنص الدفتر من بين الاوراق الفارغه
رجعت ادور عليها من جديد وانصدمت لمن شفتها كاتبه احبك شهم باللون الاحمر اما باقي الدفتر كل الكتابه بي بلاسود
رفعت نظري ليفوگ كاتبه التاريخ ١٢ اب ٢٠١٣ يعني نفس اليوم الشتريتلها بي السجل من اجتني للمعارض
انضربت على راسي من هذا الموقف .. اخذت الدفتر وصعدت الغرفتي : لازم اعرف شنو الفلم لأن حالياً كلشي مدا استوعب من الصدمه
دخلت وقفلت الباب ورايه .. گعدت ع الچربايه وبديت اقره بي باستعجال
چانت تشرح معاناتها ويا زوجة ابوها والاذيه التتلگاها من ولد الحرام يوميه لمن توگف تشتغل بالشارع
انتبهت على ولد يتردد عليها باستمرار وچانت مياس منزعجه منه بشكل مو طبيعي حسب ما قريت بكتاباتها الى ان وصلت بي الصلافه يتجرأ ويبوسها بنص الشارع
بعد فتره بسيطه تغير هذا الشخص وصار يتردد عليها حتى يساعدها ويگلها باستمرار احبچ .. اما مياس چانت خايف من تغيره المفاجئ واعترفت بهالتغير لمن گالت :
مياس.. الاحبچ دتطلع منه بشكل غريب وكأنو دينطقها بصدق مو مثل كل مره بس مع ذالك يظل حقير وقذر ومراح اسامحه طول حياتي
بديت اتلقى الصدمات واني اقره مشاعرها الغامضه اتجاهي من بين السطور وتضحلي چانت خايفه تعترف بهذا الشي حتى ويا نفسها
بس مع ذالك فشلت تخفي هالمشاعر بشكل تام بحيث كلماتها عني تبين حجم الحب الشايلته الي حتى وان حاولت تخفي هالشي
وصلت الفترة خطوبتها من مهيب الله يرحمه وهنا افصحت مياس عن سبب رفضها اله بشكل واضح وكالأتي :
مياس.. شلون اقبل بمهيب واني احب شهم ؟!!
شلون اگدر اتزوجه واتأقلم ويا وگلبي ينبض بحب اخو
صعبه .... كلش صعبه
لذالك اني مضطره ارفضه حتى لا اظلمه ويايه
ادري حبي الشهم عبث .. وادري بي متزوج ويحب زوجته وهي هم تحبه
بس مو بيدي
كلشي بيه ينبض بحبه حتى عقلي الي يعرف كل الحقائق مع ذالك متقبل هالحب ومسلم نفسه الگلبي
اني قابله يظل هالحب حلم بس مستحيل اقبل اتزوج اخو واني احبه لأن هالشي حرام وعيب بنفس الوقت
استمرت تشرح معاناتها بعد الرفض الى حين قبولها المهيب وچانت مختصره سبب القبول بهاي العباره
مياس.. صار لازم اختار بين عقلي وگلبي
عقلي يوديني للخلاص
وگلبي للتهلكه
لذالك راح اختار عقلي واقبل بمهيب حتى اخلص من سميحه وعماد ومن هذا الرجال الابويه يريد يزوجه الي
اثناء خطوبتهم بدت مياس تتغير وتتعلق بمهيب يوم بعد يوم بس چانت تعترف مجرد تعلق خالي من الحب تماماً
وهنا اجتني الصدمه الحقيقيه المچنت متوقعها لمن قريت مياس مصدومه مثلي بعد ما عرفت جهاد هو نفسه الولد الچان يتحارش بيها باستمرار وباسها بيوم من الايام
شهم.. رفعت راسي وعيوني مفتوحه : هذا هو سبب رفض جهاد المياس وعركته ويا مهيب بهذاك الوقت
وبنفس اليوم العرفت بي هي يعني لمن طلعوا يشترون الغرفه !!!
رجعت اكمل الكلام بسرعه .. شفت معاناة مياس بهذاك اليوم لمن اكتشفت اقرب شخص المهيب هو اكبر عدو الها
شرحت بكلامها خوفها من خسارة مهيب بسبب هذا الموضوع واعترفت بحبه واخيراً
چانت هاي اخير ذكرى الها ومن بعدها نهمل الدفتر بشكل نهائي بحيث مكاتبه شي بعد زواجها من مهيب
گلبت بي ع السريع حتى اتأكد .. شفت التواريخ مدونه فوگ كل ورقه وكلها چانت قبل زواجها بالفعل
سديت السجل مصدوم واعصابي طافره براسي من مياس وجهاد
هي لأن ضمت عليه مثل هالموضوع وقبلت تجي لهنا وهي تعرف بمشاعر جهاد الها
وهو لأن اكتشفت بي شخص ثاني غير الاعرفه وربيته
شخص كلشي بي يدل على تربية الشوارع حاله حال اولاد الحرام والساقطين وال××××
بهلاثناء دگ جهازي مياس دتتصل .. جاوبت بس حاولت اكتم غضبي وما ابين الها شي لحد ما احل سالفة ابوها
شهم.. الوو
مياس.. ها شهم اجو عمامي ودا انطيك خبر
شهم.. اي هسه جاي
مياس.. ماشي ننتظرك
سديت الخط واخذت السجل بيدي .. نزلت خليته بغرفتها ع الچربايه وطلعت وصيت منال حتى لحد يدخل للغرفه مره ثانيه
وصلت البيتهم لگيت كل عمامها موجودين .. اخذوا وطلعوا قبل ليرحون صحت عمها الچبير
شهم.. ابو احمد
ابو احمد.. ها عيني
شهم.. تعال يمي بلا زحمه
ابو احمد.. تقدم باتجاهي : خير ان شاء الله
شهم.. الزم هذا المبلغ خلي جوه ايدك اخاف يعتاز ابو مصطفى شي
ابو احمد.. لا يمعود شنو هالحچي
احنه صح ناس فقره وعلى گد حالنه بس مو معناها نمد ايدنه للغير
شهم.. اني مو غريب .. اني نسيبكم يعني منكم وبيكم
عموماً هذا دين ونتفاصل بي اني وابو مصطفى لمن الله يعافي ويرجع لهنا بالسلامه
ابو احمد.. بس والله
شهم.. لتكمل رجائاً
الزم الفلوس خليهن يمك وظل ويايه على تواصل حتى تطمني وتطمن بنته عنه
ابو احمد.. رحم الله والديك يا طيب نجازيك بلافراح ان شاء الله
شهم.. والديك بالرحمه عيوني
يلا توكلوا على الله ما ظل وقت
ابو احمد.. اودعناكم
شهم.. توصلون بالسلامه
راحوا وظليت انتظر مياس بالسياره شويه واجت .. اول ما صعدت باوعتلي وعرفت اكو شي
سألتني شبيك بس ما جاوبتها لأن الكلام وحده ميكفي حتى يبرد نار گلبي من القريته بسجلها
وصلنه للبيت اخذت منها نهى وطلبت منها تسبقني للغرفه
خليتها يم منال ورجعت .. فتحت الباب ما شفت السجل ع الچربايه
باوعتلها مرتبكه عرفتها ضمته كل ضنها ما شفته ودتحاول تخفي عني
شهم.. السجل وين مياس ؟!!
مياس.. راح گلبي من سأل علي : يا سجل شهم مدا افتهمك ؟؟
شهم.. جيبي مياس جيبي بسرعه
من نبرة صوته عرفته قاري .. دنگت بخوف طلعته من جوه الچربايه
رفعت راسي اله شفته يخزر بيه
شهم.. انطينيا بسرعه
مشيت بخطوات بطيئه لحد ما صلت يمه .. مديتله ايدي بلا ما احچي شي
جره مني بعصبيه
اباوعله يگلب بي واعصابه طافره بوجها .. فجأه وگف عد ورقه ظل يباوع عليها اخير شي رفع السجل يم وجهي واشر باصبعه على نص الورقه
شهم.. هاي شنو !!!
قريت بارتباك بحيث حتى الكلام گلبته من الخوف
جفلت بمكاني لمن شفت كلامي بيوم العرفت جهاد هو نفسه اليتحارش بيه
مياس.. دمعت عيوني من القهر : شهم هذا
شهم.. هذا شنووووووووو
مياس.. باوعني والله السالفه مو مثل ما افتهمتها
اكيد عبالك اكو علاقه بيني وبين جهاد
شهم.. اش ولچ اششش
مياس.. والقرأن الكريم ماكو شي من البالك
شهم.. هو شنو البالي
لتخبليني .. شنو البالييييي
ولچ فهميني شلون اجيتي لهنا وانتي تعرفين بجهاد يحبچ
شلون گدرتي تضمين مثل هالموضوع على مهيب وكأن مصاير شي
شلون گدرتي تحطين عينچ بعيونه يوميه وانتي تچذبين علي
مياس.. شهم بس خلي افهمك
شهم.. اصبري شويه
فتح الباب ع السريع وعاط بكل صوته : جهاااااااااااد
ظل يخزر بيه بعصبيه لحد ما اندگت الباب .. فتحها صار جهاد گبالي استغرب منظر وجهي لأن چنت ابچي
شهم.. فوت طب
جهاد.. ليش خالي !!!
شهم.. طب وانت تعرف
اول ما دخل رگع شهم الباب حيل .. وگف گدام جهاد اجيت بصفه لأن خفت من ردة فعله
جهاد.. خير خالي شبيكم ؟!!
شهم.. متستحي على شواربك بلا
اني هيچ ربيتك جهاد .. يا حيف التربيه بيك
يا حيفها والله
جهاد.. شكو خالو .. شمسوي اني
شهم.. شمسوي ولك !!
گول شنو الما مسوي يا قذر
شلون تتجرأ وتلمس بنيه بالحرام ؟؟
شلون تعذبها ايام وليالي وهي خايفه منك ومن سفالتك على شرفها
جهاد.. باوعلي فاتح عيونه : شنو مياس ؟!!
شهم.. مو هي گلتلي لأن هي اجبن من ان تعترف بمثل هالمواضيع
اني قريت كلشي من مذكراتها
جهاد.. خالي اني اعترف غلطت بس هالشي فات علي عمر
شهم.. هسه يلا فهمت سبب حقدك عليها ورفضك زواجها من مهيب
ولهذا السبب تجرأت ومديت ايدك عليها لمن صار موضوع عماد
ولنفس السبب رفضت زواجك منها بعد استشهاد مهيب
وين غيرتك وانت تحب مرت خالك حاچيني ولك حاچينييييييي
جهاد.. لا خالي والله لا
صح اني حبيتها قبل ليخطبها مهيب بس اقسملك برب العالمين بعرشه
كلشي انتهى بمجرد زواجها منه
ما انكر ظليت حاقد عليها بسبب حبي الها بس مچنت افكر بيها غير مرت خالي وبس
مهيب هذا قطعه من روحي شلون تتصور اگدر اخونه حتلو بيني وبين نفسي
خالي وداعتك عندي وانت تعرف بنفسك اب بالنسبه الي واكثر
ميربطني بمياس غيرك انت ومهيب الغالي .. غير هذا كلشي ما عندي وياها وروحه الابويه
شهم.. وتصرفك قبل زواجها من مهيب ؟!
جهاد.. چنت ارعن
طايش
عديم شرف
شتريد تسميني سميني بس والله العظيم اني تغيرت خصوصاً بعد الشي الصار ويا سمر
شهم.. اطلع بره جهاد
جهاد.. خالي
شهم.. اطلع برررررره
خله وطلع بعصبيه .. باوعت الشهم ظل صافن ع الباب : ما اعرف بيش ديفكر بس اكيد مو مو بالخير
مياس.. شهم وداعة نونه عندي
كلام جهاد كله صحيح
ثق بالله طول الفتره العشت بيها يمكم ما تجاوز حدوده ويايه نهائياً
اصلاً حتى مچان يجمع بيناتنه كلام مشترك
مره وحده حچه ويايه وذكرني بالشي الصار وهو بيوم حادثة سمر
گلي جمله وحده : چنتي تدعين دائماً الله يطلعها بشرفي وهاي ربچ استجاب الدعائج بلاخير
هذا كل الموضوع .. واترجاك لتلوم جهاد على شي صار بالماضي
فعلا هو تغير وما عاد جهاد القديم
چان بوقتها صغير ويجوز متأثر باصدقاء السوء حسب مچان يسولفلي مهيب
بس من بعد استشهاد مهيب الله يرحمه جهاد صار شخص ثاني
حتى وان سيطر الشيطان علي بيوم من الايام بس يظل رجال لأن انت مربي وهالشي كلش كافي
شهم.. بعد مياس شضامه عليه
احچي كافيني صدمات منچ
دنگت احچي ويا روحي : شظل هو ما عرفته شهم
حتى حبي الضامته بگلبي سنين وقافله علي وصلك اكيد بعد ما قريت هذا السجل
شهم.. ليش ساكته
مياس.. ماكو شي احچي شهم
صدگني ما سويت شي يغضب رب العالمين او يقلل من احترامي وحبي المهيب الله يرحمه
اني حافظت على شرفي من اول يوم طلعت ابيع بي بالشوارع لحد هذا اليوم وانت اكثر واحد تعرف هالشي لأن چنت ويايه بكل معاناتي وضيمي
هز راسه وطلع من الغرفه بلا ميجاوبني .. انهاريت بالبچي ورى
مياس.. حچيت كل هالحچي حتى تعرف شهم
ما ظلتلك مشاعر بگلبي بعد زواجي من مهيب
حبي الك رجع نزرع بيه قبل فتره بسيطه ومو بيدي هالشي والله العظيم مو بيدي
گمت اگلب بالسجل بحرگه واني اقره شلون چنت احچي عن حبي الشهم و ويا كل كلمه اصعد للستار من اتخيله قاري كل هالكلام
مسحت دموعي وطلعت بسرعه
دگيت الباب على تبارك طلعلي جهاد .. بس شافني بهالحاله گلب وجها
جهاد.. ليش دتبچين مياس ؟!!
مسحي دموعچ لأن مالچ ذنب بكل الصار
الذنبي ذنبي وحدي
مياس.. اريد تبارك بلا زحمه عليك
جهاد.. خو ما اذاچ
مياس.. ليش هو يگدر يأذي غير نفسه ؟!!
جهاد.. هز راسه : روحي شوفيها يم امي لو بيبيتي
رحت ادور عليها اخير شي لگيتها بالغرفه يم منال .. دگيت الباب ودخلت
مياس.. تبارك تعالي شويه
منال.. گامت بسرعه : شبيچ مياس شنو هذا حالچ ؟!!
مياس.. بعدين منال بعدين
يلا تبارك استعجلي فدوه
تبارك.. اي جايه
وگفت يم غرفة الحجيه انتظرها .. شويه واجتني تمشي سريع
تبارك.. خير مياس شصاير احچي
مياس.. منو طب بغرفتي بفترة غيابي
تبارك.. شهم بس
مياس.. لا
اكو غيره تبارك لأن شهم حتلو يدخل الغرفتي فمستحيل يفتش بغراضي
تبارك.. صارت مشكله بسبب السجل ؟
مياس.. فتحت عيوني : شتعرفين انتي ؟!!
تبارك.. باوعي مياس
والله ما اريد اسوي مشاكل بس انتي شكلچ مصره تعرفين لان اكو شغله چبيره حسب ما دا اشوف بعيونچ
مياس.. بالضبط لذالك اترجاچ تحچين التعرفي
تبارك.. قبل يومين شفت باب غرفتچ مفتوح بالنهار فاستغربت لأن مو بالعاده
رحت اشوف شكو .. لگيت رنا دتفتش بكنتورچ وبيدها سجل ما اعرف مال شنو
حچيت عليها .. ظلت تتحجج اريد منها مكياج ومن هالحچي وضاعت السالفه بيومها
لحد اليوم گاعدين العصر بالصاله شفت السجل نفسه بيد مجتبي يلعب بي
دا اگوم اخذه منه ما لحگت لأن شهم اخذه قبلي
هذا كل الصار فعرفت المشكله كلها بسببه
اكيد كاتبه بي شي ومتردين احد يعرف مو صح
مياس.. عفتها ومشيت ادردم ويا روحي : يا حقيره يا رنااا
گلبتي الدنيا وخليتيني انفضح گدام شهم كله علمود تأذيني
ليش ولج ليش .. شمسويتلچ بس اريد اعرف
رجعت الغرفتي وطبگت الباب حيل
ظليت اروح واجي احاول اهدي بنفسي ماكو اخير شي ما تحملت بعد
طلعت ع السريع ادور على رنا لگيتها بالمطبخ تسوي العشه
مياس.. رناااااااااا
رنا.. وجعه ليش تصيحين
مياس.. تعالي ولچ اليوم ابوچ اسمطه بت الكلب
اذا ما اطلع قهر گلبي بيچ ما اصير اني مياس
لزمتها سحل من شعرها ولأول مره امد ايدي على بشر بهالشكل
رنا.. اااااااخ يا ××××
هدي شعري لا امردچ بيدي
مياس.. عضيتها حيل : اااااااخ لو اكلچ متبرد نار گلبي يا حقير
ظليت اسحل بيها لحد ما طلعنه للصاله .. التم الكل على اصواتنه
اجه جهاد يحاول يفكني عنها
جهاد.. مياس عوفيها
ولچ ميااااس .. تخبلتي مو دا احچي وياچ
مياس.. وخر جهاد
شو هدني عليها الهاي النذله
الحجيه.. يا يا تسودنت الفرخه
تبارك.. جهاد دفكهن متشوف حالهن گبالك
جهاد.. ولچ مياس دفهمينه السالفه
شسوتلچ يمعوده
مياس.. ولك بسبب هاي الحقيره خالك عرف كلشي
جهاد.. شلون يعني !!!
مياس.. هي الطلعت السجل من كنتوري وانطته لابنها حتى يشوفه شهم
هي جهاد هي
جهاد.. شنو هالحچي رنا ؟!!
رنا.. ايييي
مو تردون تاكلوني بالحچي حتى تطمطون على
جهاد.. سكتها بسرعه : اششششش
ديري بالچ تكملين لان ساعتها تشوفين مني شي ميعجبچ وحق الخلقچ
الحجيه.. شكو ؟!! شنو بيناتكم بيبي
جهاد.. خلي يجي خالي ايهاب ويشوفلچ صرفه لأن تصرفاتچ مينسكت عنها بعد
احمدي ربچ واشكري انتي مره وإلا چان عرفت شلون اربيچ واطلع هالسم البداخلچ بأديه الاثنين
رنا.. واني شمسويه قابل
شبسرعه صدگتها لهاي الحقيره جهاد
جهاد.. الصمي حلگچ لأن هاي اخير مره احذرچ بيها
عفتهم ورجعت الغرفتي ابچي .. الخنگه الچنت احس بيها بيومها ما اگدر اوصفها لو شما حچيت
ظليت لليل على هاي الحاله .. گاعده ابدل النونه سمعت صوت صياح قوي
اخذتها وطلعت ع السريع لگيت شهم واگف ديتجادل ويا ايهاب وجهاد بصفه
شهم.. مثل ما گتلك ايهاب
انت اخويه وعلى عيني وراسي بس تصرفات مرتك زادت عن حدها
اذا ما عاجبتها العيشه ويانه وظاله تدور مشاكل من جوه الگاع اخذها واطلع
ايهاب.. مو هيچ الحچي شهم
شهم.. لا هيچ واذا ما عاجبك فربيها شويه حتى نخلص من شرها
رنا.. صدگني اني ما لعبت بغرفة مياس
اكيد الجهال هم ورى هاي السالفه
شهم.. لتچذبييييين
احترمي نفسچ حتى تجبريني احترمچ سامعه
ايهاب.. لتعصب خويه
الك التريده بس هدي الله يخليك ليصعد ضغطك
عافهم وصعد فوگ .. رجعت الغرفتي كملت تبديل نونه وظليت العب وياها لحد ما نامت
نمت وراها مباشرتاً ما گعدت إلا الفجر على صوت بچيها .. سويتلها ممه ورجعت نومتها حتى اصلي
بيومها ما شفت شهم لان گعدت ما لگيته بالبيت والظهر هم ما اجه ع الغده
للعصر چنت واگفه اسوي كيكه من ضوجتي سمعت منال تحچي ويا بالتلفون
ظليت صافنه عليها اريد اعرف وينه لأن ظل بالي يمه لحد ما سدت الخط واني ممفتهمه شي
مياس.. ليش ما اجه ع الغده
منال.. ما اعرف والله
مياس.. شيريد خابر ؟؟
منال.. يريد ارتب غرفته لأن راح يجون العمال بعد شويه يبدلون الاخشاب صارله فتره عنده نيه يغيرها واليوم عزم هالشي
تعالي ساعديني اذا ما عندچ شغل
مياس.. اي ليش لا
طلعنه سوه صاحت سمر وصعدنه .. ظلينه نطلع بالغراض لحد ما صار الغروب
سمر.. اخ ولكم ظهري انكسر
عود خالي ليش يريد يغير اخشابه ؟؟ بس لا ناوي يتزوج
انخمش گلبي من كلامها .. باوعت على منال بخوف چان اسمع سمر تطگها بضحكه
سمر.. يمه الله عليچ باوعي شكلها صار مثل النوميه
يخرب بيت الحب وسنينو
مياس.. ضربتها بالشال البيدي : يا حقيره ناصبه عليه اني اعلمچ
سمر.. ردت اشوف غلاوة خالي عندچ
اثاريچ مو قليله واگعه ومحد مسمي عليچ يحلوه
منال.. هههه سمر عوفي البنيه بحالها
سمر.. احب اتحارش بيها مو بيدي
مياس.. اني الچ بس خلي تروح امچ وارجعها اصبريلي
سمر.. يمه لتعوفيني فدوه ههههه
بهلاثناء سمعنه صوت شهم صاح يا الله .. نزلنه ع السريع الغرفة سمر لان هي اقرب شي النه
ظلينه هناك ساعات لحد ما سمعناهم راحوا .. طلعنه ع السريع صعدنه نشوف الغرفه قبل ليجي شهم
سمر.. واااااااو
منال.. انه اختك يشهم
شنو هالذوق ولك والله تجنن
مياس.. تموت مو بس تجنن
منال.. ان شاء الله تصير الچ عن قريب .. وغمزتلي
دنگت مقهوره : حقها متدري بالمصايب العرفهن شهم عني
عفتهم ونزلت للمطبخ اكمل الكيكه لأن عفتها ع النص
مر اسبوع ع الموضوع وشهم ميحچي ويايه نهائيا واني هم مالي عين اباوع بعيونه بعد كلشي صار
فد يوم چنت گاعده بالغرفه ارتب بالكنتور اندگت الباب وطب شهم .. استغربت لأن من يومها ما دخل الغرفتي بعد
شهم.. شلونچ
مياس.. الحمد لله
شهم.. راح اسافر باچر اجيت انطيچ خبر
مياس.. بالسلامه ان شاء الله
شهم.. يعني ما سألتي وين ؟!
مياس.. وليش اسأل
المهم تروح وترجع بالسلامه
شهم.. الله يسلمچ
مد ايده الجيبه : هاچ هاي الفلوس خليهن يمچ
مياس.. اخذتهن منه : شكرا
تريد احضرلك جنطتك
شهم.. لا ميحتاج اني جهزت كلشي من البارحه
راح على نونه چانت دتلعب .. گعد يمها وخلاها بحضنه
ظل يبوس بيها ويلعب وياها واني صافنه عليهم
نص ساعه تقريبا طلع من الغرفه
ضجت كلش لمن عرفته راح يسافر بس اكيد سبب سفره هذا الطفل المريض الله يشافي
وفعلا ثاني يوم سافر من الصبح ولمن سألته الحجيه وين گلها : رايح شغل
اسبوعين ما اعرف عنه اي شي بس لمن يخابر الحجيه اعرف اخباره من خلالها انو هو زين والحمد لله
ظليت على تواصل ويا ابويه وللأسف نفس وضعه ومحد گدر يوگع على علته ويريحنه من هالمصيبه الچبيره
وبعد اسبوعين ضبط چنت واگفه بالمطبخ اسوي الريوگ ويا منال سمعت صوت شهم يحچي ويا الحجيه
طرت من الفرح
ردت اطلع حتى اشوفه على گد ما ميته من شوقي اله بس فجأه تذكرت الصار ولزمت روحي بالگوه
شويه وطب للمطبخ .. ظليت دايره وجهي عنه
سويت روحي ما حسيت علي لحد ما حاچاني
شهم.. مياس
مياس.. تعمدت الصدمه : هاي شوكت اجيت ؟!
الحمد لله على سلامتك
شهم.. الله يسلمچ
شلونچ ؟
مياس.. زينه الحمد لله وانت ؟؟
شهم.. الحمد لله
مياس.. شفت نونه
شهم.. اي شفتها
عافني وطلع .. ظليت صافنه ويا روحي : شبيچ مياس سلامات
شنو هالحوار السخيف مثلچ .. هو هيچ يستقبلون الرجال لمن يجي من السفر
لعد شلون استقبله يربي
ما اگدر اشمر روحي علي بعد كلشي عرفه حتى لياخذ نظره محلوه عني
ظلت الافكار تجي وتروح براسي لحد الظهر .. انتظرنا ع الغده ما نزل اخير شي صعدتله سمر چان نايم لذالك ما تغده ويانه
للعصر گاعده وياهم بالصاله وعيني على غرفته : مشتاقتله كلش حتى ما لحگت اشبع منه وهو ولا چنه
اكيد ميهتم ليش شنو اني بالنسبه اله حتى يهتملي
شويه وانفتحت الباب .. باوعتله نزل مبدل ديطلع
دنگت بسرعه حتى لتفضح عيوني الشوق البداخلي اله
اخذ نونه من حضني بوسها وظل يلعب وياها عشر دقايق تقريباً
الحجيه.. وين العزم يمه ؟؟
شهم.. اشوف يوسف حجيه مشتاقله
الحجيه.. چا واحنه لو يوسف ربه وحد
مياس.. حچيت بگلبي : لا عاب حلگچ خاله
اليشوفه يگول متزوج يوسف .. مگابله حتى اكثر مني
شهم.. يمه وين طاير اني
مگابلكم يوميه وراح تشبعون مني
يلا مع السلامه
الحجيه.. الله وياك وليدي
طلع لاخير الليل وهو ماكو .. صارت ب١٢ باوعت من الشباك دتمطر كلش قوي والجو يخوف
مياس.. يا ربي هذا وين صار بهيچ مطر
اخابره ؟؟
لا لا اكيد هسه يجي ميتأخر اكثر
اخذت ملابسي ورحت للحمام حتى التهي ما طول الكل نايم واولهم نونه
غسلت قريب ما انشف انطفت الكهرباء يمكن طگت المحوله بسبب المطر
گلبي وگع لأن ماكو اجبن مني بهاي السالفه .. لبست ملابسي ع السريع حتى ما نشفت وطلعت اتلفت خايفه من الظلمه
چان اكو ضوه بالصاله بس كلش قليل .. دا اورح للغرفه سمعت الباب انفتح
ظليت جامده بمكاني بيدي الخاولي واعاين بخوف
مياس.. اجه الحرامي
والله اجه .. ولچ مياس اشردي بسرعه
دا اركض الغرفتي صار شهم گبالي .. جريت نفس براحه
مياس.. هاي انت هبطتني والقرأن
شهم.. شنو چنتي بالحمام
مياس.. اي
ياااا هاي ليش هيچ مبلل مو هسه تستبرد
شهم.. گولي الروحچ بلأول
مياس.. هااا
مو انطفت الكهرباء واني بالحمام فمن الخوف طلعت بلا تنشيف
شهم.. ليش دترجفين ؟؟
باردتلچ
مياس.. اي كلش
سكت بس ظل صافن عليه
بقيت اباوع بعيونه مستغربه نظراته شويه وسحبني من ايدي لحظنه بقوه .....
يتبع..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!