رواية مياس قلب الشهم الفصل السابع والأربعون 47 - بقلم لبنى الموسوي

#مياس_قلب_الشهم

للكاتبه #لبنى_الموسوي

انتباه/ بارت مفاجئ لعيونكم والقفله خفيفه ع المعده بس خلي يكون بعلمكم باچر ماكو نشر لان مراح اتواجد بالبيت لاخير الليل .. متابعه شيقه وتستاهلون حتى تحچون عليه زين

_____________

اذا لم تستطع اسنادها اسقط معها ❤

بعد ما واجهت مياس وجهاد طلعت ع السريع من البيت لان اعرف بقائي يسبب مشكله الها اول مالها تالي

خابرت يوسف المنقذ الوحيد الي بمثل هالمواقف .. طلبت اقابله وما تأخر اقل الساعه واجاني

يوسف.. ها حبيبي خيرك

شهم.. فركت وجهي : يا خير يوسف ياخير

يوسف.. شصاير ولك احچي

شهم.. دگعد خلي اسولفلك

بديت اشرحله كلشي صار لأن هو بالنسبه الي مثل المرايه افرغ گلبي گبالها واني متطمن هالكلام راح ينمحي بنفس اللحظه

يوسف.. مصار شي شهم

شهم.. شلون يعني ؟!!

يوسف.. يخوي سالفه اكل عليها الدهر وشرب
اولاً البنيه چانت تشتغل بالشوارع والعفو من هالكلمه خاف تضوج لان هي مرتك

شهم.. لا يول شنو هالحچي

يوسف.. يعني قصدي طبيعي تتعرض المثل هيچ مواقف .. الشارع كلشي بي

ثانياً اذا جهاد حلفلك انو ما صار شي بيناتهم من يوم التزوجها مهيب وهي اكدتلك كلامي فليش دتحاسبه على شي صار ماضي

شهم.. بس هو غلطان يوسف
بكل الاحوال الغلط راكب جهاد من ساسه الراسه

يوسف.. وياك اني بهاي النقطه
جهاد غلطان لمن تحارش ببنيه مسكينه تبيع بالشارع بس مو غلطان من ناحية مياس

تفهم عليه شلون ؟؟
يعني هو تحارش بيها كـ بنيه غريبه مو كـ مياس

وعليه ميصير تحاسبه على هالشي .. تريد تحاسبه حاسبه على غلطه ويا مياس قبل لتصير مرت مهيب وبس

ولو اني اشوف السالفه متسوه لأن كلنه نعرف جهاد تغير بعد استشهاد مهيب وانت اولنه

اخاف صرت تحبها يول من هاي ضجت لهل درجه

شهم.. احب منو ؟!!

يوسف.. تحبني الي
مرتك غير

شهم.. هههه شوف هذا
بابا يا حب هذا .. مياس بالنسبه الي مثل بنتي وگايلها الك من زمان

يوسف.. شلك بيها هاي
لو بس تبطل من هاي الكلمه چان گدرت تشوف گدامك
يعني البنيه..

شهم.. گوم گوم لتكمل
خلي نروح للنادي

يوسف.. دخليني احچي شبيك

شهم.. گوم يمعود

يوسف.. اشرد حبيبي اشرد
اول تالي توگع توگع واذكرك ساعتها

شهم.. هههه الله يشافيك

اخذته ورحنه للنادي .. دا ارجع بطريقي للبيت اتصلت بيه ام رامي

شهم.. ها عيني ام رامي

ام رامي.. عفيه شهم الولد كلما جاله حالته تصير اسوء
شلون بيه والله راح اموت

شهم.. وربچ حجزتله والموعد بعد اسبوعين لان الكادر الطبي اليشرف على علاجه ميتواجد بالمستشفى إلا بهذا التاريخ

ام رامي.. الله ينطيك العافيه خويه
ادري دا اثگل عليك بس شسوي ما عدنه غيرك ولا اگدر اشوف ابني يموت گدام عيني واظل اتفرج

شهم.. شنو هالحچي الزايد منچ
اسم الله علي عمره اطول من عمري ان شاء الله

بعدين هذا ابني مربي على ايدي يعني مالي اي فضل علي هذا واجب عليه

ام رامي.. رحم الله والديك والله يرحم غوالي گلبك ويخليلك نهاوي ومتشوف بيها مكروه يا رب

شهم.. رحم الله والديچ خويه
عموما باچر امرلكم اجيبلكم غراض للسفر وانطي خبر للحجيه حتى تتحضر لأن هي تسافر ويايه اكيد

ام رامي.. اي هي
ماشي خويه دوختك .. تصبح على خير

شهم.. وانتي من اهل الخير

سديت الخط منها وگلبي ينعصر من الألم على رامي
طفل مسكين نولد بهاي الدنيا يتيم وفوگاها الف مرض ومرض بي

رجعت للبيت اول ما وصلت صار جهاد گدامي
گام باتجاهي سريع .. باوعت علي واشرتله براسي بمعنى شكو

جهاد.. خالو قبل كلشي اعتذر منك
وروح مهيب الغالي ماكو شي صار غير العرفته اليوم

شهم.. وبعد ؟؟

جهاد.. رنا

شهم.. شبيها

جهاد.. شوفلك صرفه وياها
حاطه بالها من مياس وهي الطلعت السجل من كنتورها بس حتى تخليك تشوفه

شهم.. وانت شلون عرفت بهالكلام ؟!!

جهاد.. غير صارت عركه شگدها ومياس تلازمت وياها بالگوه يلا فكيتهن

شهم.. تحچي صدگ ؟!!!

جهاد.. اي خالي
لذالك صار لازم تتدخل .. اني ما حبيت احچي ويا خالو ايهاب إلا لما تجي انت

شهم.. زين سويت

دخلت للصاله لگيت ايهاب گاعد ... فتحت الموضوع ويا ع السريع  لان من يمي ضجت منها ومن تصرفاتها المو طبيعيه

ظلينه نتجادل لحد ما طلبت منه يطلع من البيت لأن ادري النقاش ميجيب نتيجه
هاي هي رنا من اجتنه وهي على نفس وضعها مستحيل تتغير

صعدت فوگ اتفرج اخبار لحد ما نمت على روحي من التعب
ثاني يوم طلعت من الصبح للمعارض ل١١ اجاني يوسف

يوسف.. ها ابو الشهامه شلونك

شهم.. هلا بالغالي

يوسف.. يابه خالتك زعلانه منك تروح تصالحها لو شلون

شهم.. حقها والله
ادري بنفسي صاير بذات بس دتشوف وضعيتي بعينك
حرام اذا شايف دربي

يوسف.. الله يساعدك
حقك يابه بس هاي الحنينه يعني مستحق تخليها زعلانه بلا متراضيها

شهم.. هههه يلا اليوم جايكم ع الغده انطيها خبر

يوسف.. شوف راح اتصل بيها گدامك
بس اسمع شراح تحچي واخرب ضحك

دگ عليها جاوبت بسرعه

يوسف.. ها يمه شلونچ

ام يوسف.. هلا حبيبي
زينه انت وين ؟؟

يوسف.. يم حبيب گلبچ

ام يوسف.. يم شهم ؟؟

يوسف.. هااا
يعني تعترفين هو حبيب گلبچ

ام يوسف.. چان بس هسه لا .. ميستاهل بعد

يوسف.. لا على بختچ يمعوده
والله يريد خاطرچ لذالك اليوم عازم نفسه ع الغده يمچ

ام يوسف.. لا يجي ما اريده

اسمعها وخربان ضحك .. ردت احچي سكتني يوسف لمن اشرلي بيده

يوسف.. يمه هسه شنو يعني ؟؟ اگله لتجي

ام يوسف.. يعني هو صدگ يريد يتغده يمنه ؟؟

يوسف.. اي يمه قابل دا اتشاقه وياچ

ام يوسف.. دروح لعد خلي اگوم الف الدولمه ادري بي يحبها

يوسف.. هااااا
مو على اساس زعلانه وبالك عني

ام يوسف.. اي زعلانه طبعا
بس خو ما اخلي الرجال بلا اكل غير اطبخله شي احطه گدامه من يجي

يوسف.. ودولمه ؟!!

ام يوسف.. اگلك ترى هذا ابن خالتك ومثل اخوك
مو ضرتك حتى حاط عقلك ويا .. امشي يلا ولي

يوسف.. ههههه احبچ وربي

ام يوسف.. واني اموت عليك يمه
يلا عوفني اسوي الغده لابو نهاوي يستاهل اتعبله

شهم.. رحم الله والديچ خاله

ام يوسف.. يا يمه هاي انت هنا

شهم.. هههه شلونچ حبيبتي

ام يوسف.. زعلانه عليك وروح نهى

شهم.. اجي واراضيچ من عيوني الاثنين

ام يوسف.. تسلم عيونك

يوسف.. يلا يمه اخذي راحتچ

ام يوسف.. خو انت فد واحد بس اني اعلمك خربت عليه الزعله

يوسف.. ههههه لو تزعلين من كل العالم من شهم لا

ام يوسف.. تعرفوني ثنينكم ملاعين

يوسف.. حافظيچ صم يمه هههه
يلا الله وياچ

سد الخط ودار وجها عليه : شهم صدگ نسيت اگلك
ابو اسماعيل جايب شلون غرف إلا بشده
مو تريد تبدل غرفتك انت ؟؟

شهم.. اي لأن صارت قديمه كلش
وبنفس الوقت كلشي بيها يذكرني بنهى وهالشي يتعبني حيل

يوسف.. لعد العصر نروحله شنو رأيك ؟؟
وربي يفوتنك تحفه فنيه وگول يوسف گال

شهم.. مو هسه عفيه والله مالي خلگ

يوسف.. مو بكيفك
نتغده وتاخذلك كسره والعصر نروح حتى نشوفهن ولتناقشني كافي

شهم.. الله كريم

ظل يمي للظهر .. خلصت شغلي ورحت تغديت يمهم
بالگوه يلا گدرت اراضي خالتي لأن زعلها صعب اتجاهي

للعصر طلعنه نشوف الغرف وفعلاً چانت كل غرفه احلى من الثانيه

خابرت منال حتى تصفي غرفتي .. ساعتين اخذت العمال ينصبوها
رحت بلليل وديت الغراض الاهل رامي وبلغتهم بموعد السفر علمود يتحضروله

مرت الايام بشكل بارد
مياس صارت تتجنبني كلش واتصور السبب خجلها مني لأن قريت سجل ذكرياتها وعرفت تحبني
واني هم ابتعدت عنها حتى لا احرجها ويايه

قبل السفر بيوم رحت الغرفتها حتى يصير عدها علم بسفرتي واخلي يمها فلوس اخاف تحتاج شي بغيابي

حچيت وياها چانت بارده كلش بكلامها
تفهمت الوضع وما حبيت اضغط عليها اكثر

ثاني يوم سافرت للهند ويا بيبية رامي علمود علاجه وطولت سفرتنه اسبوعين تقريباً

طول هاي الفتره ما تواصلت ويا مياس بس چنت اعرف اخبارها هي ونهاوي من امي

كملت فترة علاجه على خير ورجعنه .. اول ما طبيت چنت متلهف لشوفة مياس ونهى بس ما شفتها وياهم

سلمت عليهم واخذت نهاوي ابوس بيها لحد ما انطفت نار اشتياقي الها

رحت للمطبخ لگيت مياس واگفه تشتغل وما اهتمت الجيتي 
صحت عليها سوت نفسها متدري بيه ومشيتها الها حتى لا احرجها

حچينه بطريقه بارده
صرت اضوج من العلاقه المتوتره النبنت بيناتنه بعد معرفتي بالسجل مالتها .. احس اكو شي مو طبيعي ديصير وهالموضوع كلش مضايقني

صعدت نمت للعصر حتى ما گعدت اتغده ..
صارت الاربعه ونص گمت غسلت وبدلت حتى اشوف يوسف

شهم.. مشتاقلك والكعبه

يوسف.. مو بگدي بعد گلبي
بشر شلون صار رامي

شهم.. الحمد لله على الله
نجحت عمليته وهسه راح يظل ع العلاج منا لشهرين

يوسف.. الله يشافي بحق الحبيب محمد

شهم.. امين يا رب العالمين

يوسف.. اي انت شلونك ؟؟ شسويت ما سويت بسفرتك

شهم.. شسوي يعني ظليت مگابل رامي وگاعد قابل رايح اتونس

يوسف.. متأكد .. وغمزلي

شهم.. سلامات يوسف .. شبيك ؟!!

يوسف.. ههههه
اگلك شوكت نفرح بيك .. ترى حتى نهى الله يرحمها متقبل على وضعك هذا

شهم.. الله وايدك .. عندك مره الي ؟؟

يوسف.. نهى شوصتك ؟؟

شهم.. اعيش حياتي غير

يوسف.. وبعد ؟

شهم.. وين تريد توصل يوسف ؟!

يوسف.. للي خطر ببالك هسه
حرام عليك بشرفي .. البنيه تحبك حس بيها دخيل ربك
بعدين من واجبك الشرعي تتقرب منها لأن

شهم.. قاطعته بسرعه : اششش
شدتحچي يوسف بس والله مو صوچك
صوچي اني الاثول الاجيت وحطيتها بحلگك

يوسف.. هذا حق ليش تزعل منه

شهم.. امشي ابو الحق .. عازمك ع العشه

يوسف.. تعرف شلون تسكتني

شهم.. طبعا ههههه

تعشينه سوه وساعتين تقريبا يلا رحنه نتمرن .. ردنه نرجع للبيت مطرت قوي

ظلينه اني ويوسف گاعدين ننتظر المطر يخف ماكو .. صارت ال١٢ خلينه ورجعنه بعد ما يأسنه توگف

اول ما طبيت للمنطقه طگت المحوله بسبب المطر .. دخلت سيارتي وشغلت لايت الموبايلة حتى اشوف

دخلت البيت هدوء لأن الكل نايم .. صارت مياس گبالي مبينه چانت بالحمام لأن مبلله وترجف

سألتها بردانه جاوبتني كلش ... عيوني سرحت بجمال وجها المبلل وشعرها النازل على رگبتها

لأول مره اشوفها مره گدامي مو طفله
ولأول مره ارغب الها بكل ما بيه .. ما حسيت على نفسي إلا واني ساحبها الصدري

حضنتها حيل وايدي على شعرها المبلل .. جمدت بمكانها من الصدمه رفعت راسها بيدي اباوع بعيونها المستغربه مني

مياس.. شهم

شهم.. اشششش

ما خلاني احچي قاطعني من حط ايده على حلگي وسكتني بسرعه .. سحبني من ايدي وصعدني الغرفته

گلبي صار يدگ بالدقيقه الف
صدمه
على خوف
على ارتباك
كل المشاعر المضطربه حسيت بيهن بوقتها

دخلني وسد الباب .. دار وجها قفلها رجعت ليوره
باوع عليه وتقرب مني بابتسامه

مياس.. شهم

لزمني من ايدي وقربني منه .. حاوطت ايده خاصرتي وبعد شعري عن صدري بأيده الثانيه

اباوع عليه مرتبكه
ما اعرف شلون اتصرف بمثل هيچ موقف ولا دا اوصل للسبب الغيره بهل شكل الغريب

قرب وجها مني غمضت بسرعه
حسيت على شفته لامست شفتي انتهيت بشكل مو طبيعي

جمدت بمكاني من الصدمه حتى اخاف لا اتحرك ويطلع كل هالشي حلم واصحى منه ندمانه

نزل على رگبتي وسحبني من خاصرتي الحضنه
ذبت بين ايده بسرعه

دخت كلش .. ردت اوگع إلا شويه لو ما شالني بايده ونومني ع الچربايه

صار فوگايه يبوس بيه بلهفه لحد ما فقد تقريباً .. تأذيت منه حاولت ابعده عني بس ما استجاب لان مديسمعني نهائياً

حچيت ويا نفسي : طلعت سالفة فصل الفيشه وراثه عد هاي العائله

وخر مني وشمر نفسه ع الچربايه .. باوعت علي يتنفس سريع
سحبت الچرچف وحاولت احاچي

مياس.. شهم

شهم.. اششش
تعالي الحضني

ظليت صافنه علي ممصدگه الدا اسمعه مني .. باوعلي وفتح ايده
دنگت بسرعه .. نمت بحضنه مرتاحه ونسيت الدنيا وما بيها

ما اعرف شلون غفيت
فتحت عيوني الفجر مرتاحه كلش .. رفعت راسي استغربت من ما لگيته يمي

تذكرت نونه گمزت ع السريع مفزوعه لبست ونزلت اركض الغرفتي.....

يتبع..