رواية مياس قلب الشهم الفصل التاسع والعشرون 29 - بقلم لبنى الموسوي

#مياس_قلب_الشهم

للكاتبه #لبنى_الموسوي

ظليت ابچي بحرگه واني اتذكر ذكرياتنا الحلوه من اول ما طبيت لهل بيت لحد قبل يوم عمليتها .. فجأه سمعت الجرس يندگ

مياس.. گمت بخوف : معقوله نسوا شي ورجعوا ياخذوا ؟!!

عاينت من الشباك ما شفت ظل جوه الباب .. انتبهت اكو ورقه بالگاع

طلعت اركض شلتها وايدي ترجف .. فتحتها ع السريع وانصدمت من قريت هالكلام

عماد.. ها يا حلوه شلون تردين اطب للبيت
تفتحيلي الباب
لو اطفر من الحايط
لو تختصرين عليه كل هذا وتجين ويايه بارداتچ

مياس.. گمت اتلفت مثل المخبله : تحركي مياس اذا دخل عماد لهذا البيت مراح يرحمچ

ركضت طبيت جوه وقفلت الباب بسرعه سمعت الطفله تبچي..

رحت شلتها ووگفت بالشباك اعاين شراح يصير بهلاثناء شفت ظل بنيه جوه الباب واندگ الجرس

مياس.. منو هاي ؟!!
معقوله بت عم شهم الگال عنها
زين هسه اني شسوي ؟ افتح الباب
لا لا بلا فتحتها وطلع عماد دازها حتى يگدر يدخل للبيت
احسن شي انتظر لان لو

دا احچي ويا نفسي قاطعني صوت موبايلي .. ركضت اشوف منو عاينت شهم ديتصل

مياس.. الوو
چان صوت هوسه يمه بحيث بالگوه اسمع كلامه

شهم.. هاي وينچ

مياس.. شنو مدا اسمعك

شهم.. وووويننننننننچ

مياس.. بالبيت وين يعني ؟

شهم.. فتحي الباب التبارك بسرعه

مياس.. اي ميخالف

سديت التلفون وحمدت الله وشكرته لان اجت بوقتها : اكيد عماد ديراقب البيت وبما انو شافها فمراح يتجرأ وينفذ تهديده الي

خليت الطفله بالصاله اخاف اطلعها بره الجو بارد .. رحت فتحت الباب بس طبت قفلتها ع السريع

تبارك.. شلونچ حبي .. البقيه بحياتكم

مياس.. حياتچ الباقيه حبيبتي
تفضلي

دخلنه للصاله اول ما شافت الصغيره راحت شالتها بسرعه تحچي وياها

تبارك.. يا حياتي فدوه لله شگد تشبهين نهى
سبحانك ربي
سوده عليه تيتمتي من اول يوم الچ بهل دنيا

اگول مياس...

مياس.. نعم

تبارك.. شسمها ؟؟

مياس.. نهى

تبارك.. اي توقعت هل شي لان كلنه نعرف شهم چان يحب المرحومه كلش

مياس.. تفضلي اگعدي ليش واگفه

تبارك.. شكرا حياتي

ظلينه گاعدين اكثر من نص ساعه بس نتصفن بلا مننطق حرف لحد ما سمعتها تسأل

تبارك.. شلونه شهم البارحه ؟

مياس.. تخربط خطيه

تبارك.. سوده عليه .. ميستاهل والله
رجعنه سكتنه عاينتلي وابتسمت
شنو راح نظل هيچ ساكتين ؟!!

مياس.. تبارك اعذريني ترى نفسيتي زفت ومالي خلگ للحچي

تبارك.. اوك حبي على راحتچ

اخذت نونه منها حللتها وانطيتها ممه .. نص ساعه ونامت اخذتها الغرفتي خليتها ع الچربايه ورجعت يم تبارك

تبارك.. نامت

مياس.. اي

تبارك.. خو الحمد لله

عفتها ورحت للمطبخ حتى اسوي الغده علمودها وإلا اني كلشي ما اشتهي من القهر

شغلت الطباخ وگفت اطبخ فجأه نزلت دموعي بحرگه لمن تذكرت نهى وذكرياتنا سوه بهذا المكان مثل هيچ وقت

حسيت گلبي راد يوگف من القهر .. گمت اشهگ بصوت مسموع اجت تبارك تركض على حسي

تبارك.. يا عمري ليش دتبچين
انطيني انطيني .. اني اسوي الغده روحي ارتاحي انتي

رحت من يمها بلا ما اجاوب .. گعدت بالصاله حضنت نفسي بأيديه وشبعت بچي لحد ما عيوني انتهت وصدري ضاق بالنفس

واني على هل حاله سمعت صوت نونه تبچي ركضتلها

مياس.. حياتي شبيچ ؟؟ ليش مدا تنامين !!

شلتها اهز بيها بالگوه يلا گدرت ارجع نومتها .. خليتها بمكانها وطلعت للصاله لگيت تبارك مشغله التلفزيون ع القرأن

تبارك.. هاي شنو عيونچ ؟!!!
فدوه لهل درجه چنتي تحبيها

دنگت راسي ورجعت ابچي .. ركضت حضنتني تهديني بس بدل ما اهدأ زدت اكثر لان چنت مخنوگه حيل

ظليت طول اليوم على هالحاله والبنيه تعبت وهي تحاول تسكت بيه بس بلا فائده

للمغرب سمعت صوت الباب .. رحت اركض اشوف منو لان صارت بيه خوفه من عماد

عاينت الايهاب ديدخل سيارته گدرت اجر نفس .. رجعت للصاله شويه ودخلوا تلاثتهم

شهم.. السلام عليكم

مياس.. عليكم السلام
شلون صرت بالي يمك

ايهاب.. لتخافين نزل ضغطه شويه
بس فوتي سويله حامض مثل البارحه حتى ينزل اكثر

مياس.. صار

رحت للمطبخ خليت الحامض ع النار ورجعت للصاله ع السريع .. اعاين علي گاعد ورافع راسه ليفوگ وشكله منتهي من التعب والقهر

تبارك.. شهم ترجعوني لبيتنه لو شلون ؟؟

ايهاب.. لا ظلي گلت العمي تبقين الباچر متسوه انتي من الصبح كون تجين ظلت ع الليله باتي هنا

تبارك.. اي ماشي

رجعت للمطبخ انتظر الحامض لحد ما صار .. صبيتله وبالگوه جبره ايهاب يشربه
اول ما كمله گام صعد فوگ

جهاد.. مياس ظل حامض

مياس.. اي

جهاد.. جيبيلي راسي ديموتني

ايهاب.. شنو بس لا صعد ضغطك ؟!

جهاد.. ما ادري خالو

ايهاب.. جيبولي الجهاز خلي اقيسله

تبارك.. اني اجيبه وين هو ؟

مياس.. بلاستقبال ع البوفيه

راحت جابته ورجعت ع السريع .. گعد يقيسله فجأه رفع راسه يعاينله بصدمه

ايهاب.. شنو هاي جهاد !!!

جهاد.. شنو ؟؟

ايهاب.. يمعود ضغطك نازل كلش الله ستر ما شربت الحامض چان رحت بيها

مياس.. يااا
هسه شلون ؟؟
ابو مجتبى اخذه للمستشفى

تبارك.. لا ميحتاج
اني دائما يهبط عندي هسه اسويله حلاوه نص ساعه ويتسقر

ايهاب.. متأكده

تبارك.. اي والله
اسأل مجرب

ايهاب.. يلا روحي سويله ع السريع

جهاد.. ما اريد

ايهاب.. مو بكيفك
كافي عليه خالك العنودي مو هالدور انت تعاند براسي

راحت تسويله الحلاوه ... ظليت واگفه يمه اعاين علي بخوف : خطيه كلهم تأثروا بموتها لان چانوا يحبوها مو بس اني وشهم

شويه واجت مسويتله حلاوة طحين .. انطتها الها وگعد ايهاب فوگ راسه حتى يخلي ياكلها

عفتهم وصعدت فوگ لان بالي يم شهم .. احتاريت ويا نفسي : ادگ الباب اخاف نايم ويفز
افتحها گبل اخاف گاعد وفشله منه

اخير شي قررت افتحها والباقي على الله .. فتحت الباب شفته نايم على وجها بملابسه ارتاحيت كلش

سديتها على كيف حتى ليحس عليه ونزلت اول ما شافني جهاد سألني

جهاد.. ها شلونه

مياس.. نايم

جهاد.. خو الحمد لله

كلمن راح الغرفته لان محد اله خلگ للحچي واني هم اخذت تبارك ورحت الغرفتي

ظلينه طول الليل سهرانين ويا نونه لان مترضى تنام
خطيه تبارك عاونتني بيها هواي بس اخير شي ما قاومت غفت على نفسها وظليت گاعده وحدي

للفجر صليت شلون ما چان لأن دتبچي حيل حتى ما فهمت شگلت بصلاتي
كملت ع السريع .. لبست الحجاب شلتها وصعدت فوگ اشوف شهم

دگيت الباب ودخلت لگيته گاعد ع السجاده يقره قرأن

مياس.. صباح الخير

ثاني يوم الفاتحه اول ما رجعت صعدت الغرفتي .. ما اعرف شلون الله لطف بحالي ونمت بسرعه

گعدت قبل الاذان بس احس روحي دتطلع من الوجع البصدري .. گمت توضيت شويه وأذن

صليت وبقيت اقره قرأن لحد ما حسيت على مياس دخلت للغرفه وصبحت عليه

رفعت وجهي شفتها شايله نهى بيدها .. هزيت راسي طبگت السجاده وگمتلها

شهم.. اخذتها من ايدها الحضني : هم ما نامت

مياس.. اي خطيه نومها كلش قليل حتى بالنهار تنام دقايق وتگعد

شهم.. تعبناچ ويانه بهل يومين

مياس.. شنو هالحچي شهم لتزعلني منك
اي احچيلي شلون صرت ؟؟

شهم.. الحمد لله احسن

مياس.. راح اسويلك ريوگ حتى تاخذ علاجك
يلا انطيني نونه عنك خل انزل

شهم.. لا خليها شويه يمي بين متكملين

مياس.. ماشي بس عفيه دير بالك عليها من تشيلها لتنمتن

شهم.. مو مگمطتها ليش تنمتن

مياس.. اذا شلتها بطريقه مو صحيحه ورجع راسها ليوره تنمتن لا سامح الله حتلو مگمطه

شهم.. وانتي شعرفچ بكل هذا ؟

مياس.. اذكر اختي چانت تنمتن بأيدي دائما لان سميحه كله ذابتها عليه واني چنت طفله ما اعرف اشيلها بصوره صحيحه

شهم.. بالمناسبه اجه ابوچ للفاتحه وسلم عليچ

مياس.. صدگ شهم كلش مشتاقه اله والاخواني خليني اروحلهم عفيه

شهم.. توو ... ممنوع

مياس.. عفيه الله يخليك والله ما اتأخر ساعه وتعال اخذني

شهم.. گتلچ لا يعني لا .. لتلحين

مياس.. تنهدت : ماشي يلا رايحه اجهزلك الاكل بس اصيحك انزل

شهم.. ان شاء الله

طلعت وسدت الباب وراها .. رحت نومت نهى ع الچربايه وظليت صافن عليها

شهم.. شفتي بابا شلون امچ عافتنه وراحت
هي مو بس يتمتچ بروحتها هاي .. حتى اني تيتمت بلياها

گامت تبچي فجأه .. شلتها اريد اسكتها ماكو اخير شي نزلت لمياس بلكت تسكت يمها

واگفه اسوي بالريوگ سمعت نونه تبچي درت وجهي شفت شهم دخل للمطبخ يهز بيها

شهم.. مياس ما ادري شبيها مدتسكت

مياس.. هسه ثواني

طگيت البيض ع السريع .. ركضت حضرت الميز صبيتلهم الچاي ورحت اخذتها منه

شهم.. بس شالتها سكتت صفنت عليها : هاي شلون سكتت هيچ !!!

مياس.. ما اعرف

شهم.. معقوله تعودت على ريحتچ

مياس.. يجوز
ديلا اگعد تريگ حتى تاخذ علاجك قبل لا تطلع

تريگت ويا ايهاب وجهاد واخذت علاجي وطلعت

خلصت هوسة الفاتحه وشالوا الچادر .. واگف على كتر ويا يوسف اعاين عليهم انتبهت الجهاد وضعه مو طبيعي

شهم.. يوسف

يوسف.. ها خويه

شهم.. روح شوفلي جهاد شبي

يوسف.. شنو شبي

شهم.. شو جاي تسألني !! دروح الخاطر ربك

يوسف.. اي صار رايحله

راح يشوفه شبي وگفت اعاين عليهم من بعيد .. شويه واجوني سوه

يوسف.. هذا خالك وگله هالحچي

شهم.. شنو ؟!!

يوسف.. يگلي ضغطي هابط من البارحه ودايخ
ولمن گتله اخذك للمستشفى گال لا ما بيه شي
هاك اتصرف ويا انت لأن تعبتوني ثنينكم

شهم.. شنو هالحچي جهاد

جهاد.. خالي والله ما بيه شي ليش متصدگون

شهم.. شدتحس هسه

جهاد.. كلشي ما احس

صاحب.. جهااااااااد
تعال شيل هذني بسرعه

جهاد.. اي هسه جايك
يلا خالي اروح اساعدهم تريد شي

شهم.. لا سلامتك .. بس اذا حسيت بدوخه گلي حتى اخذك للمستشفى

جهاد.. صار

دار وجها ومشه مسافه .. ظليت اعاينله مشيته ممتوازنه فجأه وگع من طوله تخبلت من شفته بهل حاله

يوسف.. لك شهم الحگ

شهم.. جهاااااد

ركضت علي شلته ع السريع وصيحت على يوسف يفتحلي باب السياره

اخذنا للمستشفى استلموا مني وظلينه واگفين ننتظر خبر شويه وطلع الدكتور

شهم.. ها دكتور طمني عفيه

الدكتور.. خير ان شاء الله ماكو شي يخوف بس ضغطه هبط كلش وحالياً علگناله مغذي بس يخلص تگدرون تطلعوا

شهم.. الف الحمد لله والشكر

يوسف.. دكتور الاخ الگدامك ضغطه مفول شوفله صرفه بطريقك

شهم.. يوسف

يوسف.. لا يوسف ولا بطيخ شوف وجهك شلون احمر ليصيرلك شي دخيل ربك

الدكتور.. صح خويه وجهك يدل على انو ضغطك مرتفع كلش
تعال ويايه

يوسف.. يلا روح الله يخليك

رحت ويا .. قاس ضغطي بعده صاعد .. نزلوا الي ساعه كامله يلا خلصوا مني
اول ما طلعت صار يوسف بوجهي بس شافني اجه يركض

يوسف.. ها بشر

شهم.. اخذت علاج ونزل شويه

يوسف.. اي الحمد لله
يلا تعال نروح الجهاد لان الطبيب كتبله خروج

شهم.. شفته ؟؟ شلون صار

يوسف.. اي شفته
احسن الحمد لله المغذي فاده

شهم.. الحمد لله والشكر

رحت ويا يوسف دخلت للغرفه لگيت جهاد متمدد

شهم.. الحمد لله على سلامتك حبيبي

جهاد.. الله يسلمك خالي

شهم.. خوفتني عليك ولك

جهاد.. اعتذر منك .. خاف انت عايزك قهر اجيت اچملها عليك

شهم.. لتحچي هالحچي
يلا گوم اذا تحسنت حتى نروح نجيب النسوان

يوسف.. لا روحوا بوجهكم للبيت اني وصاحب نجيبهن

شهم.. راح نزحمك

يوسف.. ولو يمعود اقل منها

شهم.. رحم الله والديك حبيبي

ظليت طول اليوم محتاره بالطفله بس تبچي بحيث يا دوب گدرت اصلي وبعد كلشي ما سويت كله على تبارك خطيه

لليل شايلتها وافتر بيها بلكت تسكت .. سمعت صوت شهم يصيح يا الله
لبست حجابي ع السريع ورجعت شلتها

شهم.. السلام عليكم

مياس.. وعليكم السلام

شهم.. شبيها تبچي

مياس.. ما ادري طول اليوم ما سكتت ولا شويه

شهم.. اخذتها لحضني : شبيچ بابا ليش تبچين

جهاد.. خالو وديها للدكتور اخاف بيها شي

شهم.. اسم الله يمعود

جهاد.. الله ليگولها طبعا
بس هيچ احسن حتى نطمأن لان وضع الطفله مو طبيعي

شهم.. مياس البسي بسرعه خل ناخذها للمستشفى

تبارك.. واني

شهم.. شبيچ انتي ؟!

تبارك.. منو يوصلني

شهم.. جهاد بيك حيل تودي تبارك

جهاد.. اي خالو عادي ماكو مشكله

رحت غيرت ملابسي ع السريع واسمع نونه تصرخ .. طلعت لگيت شهم يفتر بيها بالصاله

مياس.. انطينياها مو ماتت من البچي

شهم.. هاچ يلا استعجلي

طلعنه للمستشفى والطريق كله احاول اسكت بيها ماكو .. وصلنه وداها شهم لقسم حديثي الولاده

دخلت وياها ظلوا يفحصون بيها بالساعه تقريبا اخير شي جابتها الي الممرضه

مياس.. عفيه خو ما بيها شي

-والله حبيبتي ما اعرف هسه تجي الدكتوره وسأليها

ظلت بيدي بس هدأت شويه .. ربع ساعه طلعت الدكتوره ركضت عليها

مياس.. ها دكتوره خو ما بيها شي

الدكتوره.. لا ماما اطمأني سوينالها فحص كامل كلشي ما بيها بس الضاهر بنتچ من النوع النحس شويه لذالك مدتسكت

مياس.. الحمد لله
وهسه شلون دكتوره

الدكتوره.. راح اكتبلچ علاج مال غازات انطيهيا بلليل بلكت ترتاح علي شويه وتنام لان عدها مغص ولادي كلش قوي

مياس.. اي عاشت ايدچ

كتبت العلاج شلت نونه وطلعت .. شفت شهم گاعد ويهز برجله بس طلعنه ركض عليه

شهم.. چنت گاعد على اعصابي ما صدگت شفت مياس گدامي گمت ع السريع : ها بشري

مياس.. لتخاف كلشي ما بيها مثل الورد

شهم.. بروح امچ

مياس.. وروح امي

شهم.. رفعت راسي : الف الحمد لله والشكر ربي
زين لعد شبيها تبچي ما گالولچ ؟؟

مياس.. اي تگول الدكتوره هي من الجهال النحسين شويه .. اضافه لهذا عدها مغص ولادي مديخليها ترتاح
عموما انطتني علاج الها وان شاء الله تتحسن علي

شهم.. ان شاء الله
ديلا امشي خلي نرجع تأخرنه عليهم هسه اجوا اهلي واكيد ظال بالهم يمها

رجعنه للبيت اول ما طبينه ركضت الحجيه اخذتها من ايدي

الحجيه.. يمه بنيتي شبيها ولكم

شهم.. يمه لتخافين .. ما بيها بس العافيه

الحجيه.. لعد ليش اخذتوها للمستشفى ؟؟
تضحك عليه شهم !!

شهم.. حجيه والله ما بيها شي
چانت تبچي ومتقبل تسكت فأخذناها نطمأن عليها والحمد لله طلع مجرد مغص ونحوسيه

منال.. الف الحمد لله والشكر .. انتظرناكم على اعصابنه والله من افتهمنا لحد هسه

الحجيه.. هاچ يمه منال خليها يمچ بعد

مياس.. راح گلبي من سمعت كلامها : ليش خاله ؟!!

الحجيه.. وان شاء الله تردين اخلي بت ابني يمچ

منال.. شكو بيها يوم .. بعدين نهى الله يرحمها وصتني قبل لتموت بتها تتربى على ايد مياس

شهم.. وصتچ ؟!!!

منال.. اي خويه
گالتلي امانه اذا صارلي شي لتخلين احد ياخذ بنتي من مياس اريدها تتربى عدها

مياس.. نزلت دموعي بسرعه : و وصتني الي هم

واگف اسمعلهم .. بعدني ممستوعب صدمة منال هالدور مياس زادتها عليه من گالت وصتني هم

شهم.. شنو وصتچ ؟؟

مياس.. گالت ربي بنتي واعتبريها تعويض عن طفلچ الراح لان ادري ماكو احد احن عليها منچ

الحجيه.. شوف شوف الچذابه

مياس.. وروح امي هاي وصيتها .. ما چذبت عليكم بحرف

شهم.. كلامها صح يمه لان نفس الحچي گالته الي
وگالته لمنال هم
ليش من توصل لمياس تچذبيها

الحجيه.. صح او مو صح
الطفله متربه بيد مياس وخلصنه بعد

شهم.. هي بتمن ؟؟

الحجيه.. شنو يعني ؟!!

شهم.. جاوبي حجيه .. هاي الطفله منو ابوها

الحجيه.. انت غير

شهم.. زين لعد
بما انو اني ابوها .. فاني اگول محد يربي الطفله غير مياس ما طول نهى وصت بهل شي وانتهى النقاش

خله وصعد فوگ .. اعاين ع الحجيه تريد تاكلني إلا شويه
اخذت نونه من منال ورحت الغرفتي اخلص من المشاكل

اول ما دخلت حللتها حتى ترتاح .. عفتها ع الچربايه وگمت ابدل هستوني مخلصه دگت الباب منال

منال.. افوت حبي

مياس.. طبعا حياتي

منال.. فدوه لمسره عاينيلها شلون مرتاحه لان تحللت

مياس.. نهى

منال.. شنو !!!

مياس.. اسمها نهى مو مسره

منال.. دمعت عيونها بسرعه : شهم سماها بهل أسم ؟؟

مياس.. اي

منال.. الله يكتبلها ايام احلى من ايام امها

مياس.. امين يا رب

گعدت ع الچربايه واخذت اطراف اصابيعها تلعب بيهن .. حسيت عليها دتبچي رحت خليت ايدي على چتفها

منال.. راحت نهى مياس

مياس.. بچيت وياها : الله يرحمها ويصبرنه على غيابها

منال.. ليلة عمليتها اجتني توصيني لأن چانت حاسه بروحها راح تودعنه

مياس.. واجت الي هم

منال.. شگالتلچ

مياس.. هواي حچي

منال.. ممكن اعرفه

مياس.. اول شي وصتني على بتها وطلبت مني اربيها على ايدي
والشي الثاني هسه ما اگدر اگلچ بي اعذريني

منال.. على راحتچ حبي
عموما اني راح اساعدچ بيها لتخافين

مياس.. لا حياتي ميحتاج .. اصلا ممتعبتني

منال.. يمعوده تبارك گالتلي للصبح متنام

مياس.. اي صح بس اني ما ضايجه من هالشي بالعكس مرتاحه وجودها منسيني كلشي

منال.. فدوه الگلبچ الطيب

مرت الايام ببرود قاتل .. كلشي بالبيت مات ويا موتت نهى حتى الضحكه

صار الوضع كأيب ومحد اله خلگ الحچايه .. الكل اعتزل الكل بطريقته الخاصه

اما شهم فگمت ما اشوفه طول اليوم يجي اخير الليل يشوف بنته خمس دقايق ويصعد الغرفته

اما اني فالشي الوحيد الچان مصبرني على غيابها هي نهى الصغيره الصارت روحي من الدنيا بحيث اتخبل اذا احد اخذها مني دقيقه حتى سهر الليالي مثل العسل على گلبي وياها

اجه الاربعين راحن النسوان البيت اهل نهى من الصبح واني ظليت يم الجهال كالعاده

قبل لا يطلع شهم خابر عمه حتى تجي تبارك يمي وما راح إلا لمن اجتني

سويتلها ريوگ بس هالمره گدرت اتريگ وياها مو مثل الفاتحه .. حسيتها تريد تحچي شي بس متردده

مياس.. اي شلونچ انتي

تبارك.. الحمد لله حبي

مياس.. سولفي ليش ساكته

تبارك.. شلون صار شهم ؟؟ بعده متأذي على موت نهى الله يرحمها

مياس.. اي خطيه بس اكيد احسن من اول ايام

تبارك.. الحمد لله
زين انتي نجحتي ؟؟

مياس.. اي نجحت بس ولا حسيت بفرحة النجاح ... چنت اتمنى نهى تشاركني بهالخبر خصوصا بعد التعب التعبته علمودي

تبارك.. مسحت دموعي بايدها : يا روحي لتبچين هي اكيد تحس بيچ ومن يمها فرحانه لفرحتچ
ترى الميت تظل روحه ويا اهله للاربعين يلا يغادرهم

مياس.. شتاقيتلها كلش .. وشهگت بحرگه

تبارك.. حضنتني ع السريع : حبيبتي فدوه شگد طيبة گلب انتي
ادعيلها احسن الدموع متفيدها بشي

ظليت ابچي بالنص ساعه يلا گدرت اهدأ .. گمت لميت الريوگ وتبارك ساعدتني بي وبلشنه بشغل البيت

تبارك.. عادي انظف غرفة جهاد لو ميقبل

مياس.. لا حبيبتي عادي ميگول شي خطيه

راحت للغرفه تنظفها واني رتبت غرف الحجيه ومنال طلعت لگيتها بعدها ممخلصه من غرفة جهاد .. استغربت ويا روحي ورحت اشوف شنو السالفه

طبيت لگيتها منطتني ظهرها ولازمه صورة جهاد بأيدها تعاين عليها .. بس حست عليه ارتبكت وسوت روحها دتمسح بيها .. عرفت السالفه گبل

مياس.. ها حبي خلصتي

تبارك.. هااا
اي
اي خلصت

مياس.. يلا تعالي للمطبخ نسوي الغده ونسولف

تبارك.. يلا امشي

مياس.. سبقيني انتي .. اروح اشوف نونه اخاف گعدت واجي وراچ

تبارك.. ماشي حبي

رحت لغرفتي فتحت الباب على كيف لگيتها نايمه بسريرها .. گزگزت عليها بس تعوذت من الشيطان لأن لو تگعد بعد متنام للعصر

طلعت لگيت تبارك بالصاله .. اخذتها ورحنه للمطبخ نسوي الغده وگفنه نشتغل ونسولف

مياس.. اي حبي گوليلي شگد عمرچ شنو دراستچ ما حاچين بهل مواضيع من قبل

تبارك.. اي صح
عمري ١٩ مرحله ثانيه تربيه انگليزي

مياس.. حياتي العمر كله بس تدرين ممبين عليچ

تبارك.. شلون يعني

مياس.. مبينه اصغر من عمرچ

تبارك.. هههه اي مو لأن ناعمه

صفنت عليها كلشي بيها حلو
نعومتها
ملامحها
كلامها الهادئ
شعرها الطويل
والاحلى من كل هذا خجلها

تبارك.. ها صفنتي

مياس.. تدرين انتي كلش حلوه

تبارك.. هههه حبيبتي اكيد مو احلى منچ

مياس.. هم حبيتي بحياتچ ؟؟

تبارك.. ارتبكت بسرعه : ها لا ويني وين الحب
اني مو من هذا النوع
اول شي استحرم وبنفس الوقت خاله سمعت ابويه وتربيته الي بين عيوني

مياس.. لا حبي ما قصدت هيچ
يعني اني هم بنيه واعرف هالشي يصير لابد تنعجبين بشخص حتلو من بعيد مو إلا تسوين علاقه ويا بالفعل

مثلا اني قبل لا اتزوج مهيب الله يرحمه حبيت رجال اكبر مني بهواي ومن كل عقلي تعلقت بي كلش بس لمن تزوجت كلشي انتهى بداخلي

تبارك.. يااااا
يعني اذا انعجب بشخص واتزوج غيره ممكن انسى برأيچ

مياس.. اي طبعا هذا الواقع

تبارك.. ما اتصور

مياس.. ليش

تبارك.. يعني اني ما اتخيل اذا حبيت شخص اگدر احب غيره بعد

مياس.. الحياة تمشي والدنيا تنسي
هاي اني گدامچ مات رجلي ومشت حياتي من بعده صح بصعوبه بس اسمها ماشيه

تبارك.. اذا يموت اي بس اذا عايش وتشوفي گدامچ مستحيل تنسي او تگدرين تصيرين الغيره

مياس.. امممممم
كلامچ مال وحده متلوعه بالحب مو بس مجربته

تبارك.. لا والله لا

مياس.. احچيلي ولتخافين
وروح مهيب الكلام التگولي يظل بيناتنا

تبارك.. شنو احچيلچ ؟؟

مياس.. جهاد مو

تبارك.. دنگت راسها خجلانه : اي

مياس.. هههه والله عرفت
زين من شوكت ؟؟

تبارك.. اوووووووو من چنت طفله

مياس.. صدگ تحچين ؟؟

تبارك.. اي والله

مياس.. سولفيلي بلا

تبارك.. چنه نلعب اني وخواتي ويا مهيب وجهاد
طبعا مهيب الله يرحمه چان نحس بشكل بحيث خانگنه بغيرته
لتطلعون ولتلعبون وليرتفع صوتكم اخاف الجيران يسمعوكم وغيره

فچان جهاد دائماً يوگف بوجها ويگوله شتريد منهم وخلينه متونسين لتصير معقد ومن هالحچي

اني مچنت اعرف بهاي الامور .. لذالك چنت اتخبل من مهيب واموت على جهاد لحد ما كبرت وكبر حبه ويايه

بس من كبرت عرفت مهيب الصح وجهاد هو الغلط .. بديت افتح عيونه على تصرفات جهاد الممقبوله عند الكل واولهم ابويه الميحبه ابد لحد الان

بس الغريب ظليت احبه رغم كلشي .. تصوري اجي مرات هنا اسمعه بأذني يخابر البنات يتشاقه وياهن ويتغزل بيهن واني مثل الثوله ما عندي شي اسوي غير ارجع للبيت واشبع بچي من غيرتي علي

مياس.. يعني هو ميعرف بحبچ ؟؟

تبارك.. لا طبعا

مياس.. وانتي ما بينتيله ابد

تبارك.. لا يمعوده مستحيل اسوي هالشي
متعرفيني بعدچ .. بس اوگف گدامه اصير اكبر طرنه بالعالم كله

مياس.. وهو ولا مره حسسچ بشي

تبارك.. ابد الله وكيلچ الحايط اذا يحچي بهالسالفه عود جهاد يفكر يحچي ويايه

مياس.. شگد تحبي

تبارك.. دنگت خجلانه : كلمة حب قليله علي اصلا اموت على الگاع اليمشي عليها ولو ميستاهل

مياس.. هههه ليش ولچ

تبارك.. اعوج خيتي اعوج

مياس.. چان حبي چان

تبارك.. شنو يعني ؟؟

مياس.. يعني تغير مو نفسه جهاد القديم
من استشهد مهيب الله يرحمه صار غير شخص بس انتي ما عايشه ويا حتى تعرفين بي

تبارك.. الله عليچ گولي الصدگ
يعني شنو بعد ميخابر بنات ويسهر وياهن

مياس.. شيخابر من كل عقلچ
ليش هو شايف دربه يركض للمصايب ومملحگ عليهن

تبارك.. اي خطيه شفتي شصار بي بالفاتحه والله انمرد گلبي علي

مياس.. احمممممم

تبارك.. اوي مياس هاي شبيچ

مياس.. هههههه تدرين والله جهاد اثول
لو ما اثول چان فتح عيونه وشاف الجوهره المتتفوت گدامه

تبارك.. لتحچين علي عفيه

مياس.. خايبه دگومي لا اهفچ راشدي اصحيچ على زمانچ .. كل شويه براي

تبارك.. شسوي غير حبه خبلني .. لا وفوگاها ابويه ميطيقه يعني لازم اغسل ايدي بقاصر مو بس صابون

مياس.. ههههه لا حبي لتحچين هيچ
اذا قسمتچ يصير لو ما ابوچ لو كل الدنيا تعارض

تبارك.. الله يسمع منچ حبي

مياس.. يلا خلي نسوي الغده راح يجون الزلم واحنه نسولف

تبارك.. ههههه الحلوه اذا اجو ولگونه ممسوين غده شيسوون الله عليچ

مياس.. هههه محد بيهم يحچي كلهم فقره من هالناحيه

تبارك.. زين والله اني ابويه يدخلنه بأنذار لو يجي وميلگه غده

ظلينه نشتغل ونسولف .. للظهر اجه ايهاب ورى بنص ساعه اجو شهم وجهاد

تفاجأت كلش بجيته .. من ماتت نهى لليوم ما اشوفه بالبيت إلا تالي الليل وانصدمت اكثر من سألني ع الغده لان صارله فتره مياكل ويانه :

شهم.. مياس مسويه غده

مياس.. اي طبعا

شهم.. لعد صبي ع السريع لان جوعان

مياس.. ابتسمتله : صار تتدلل

صبينه الغده وگعدنه ناكل وبما اني عرفت السالفه فگمت احوص على تبارك بحيث شكلت عيني ويا تصرفاتها

اعاين عليها تاكل بس مرتبكه خطيه .. درت وجهي على جهاد ولا يمه السالفه من صدگ اثول هالولد

گمت قبل الكل خليت الچاي ع النار شويه واجت تبارك شايله المواعين

مياس.. انطيني من ايدچ وروحي اخذيلهم الچاي

تبارك.. ليش اني

مياس.. مو بللازم مبين تعبتي

تبارك.. جرت ايدي : لا حياتي والله ما اقصد
هاي رايحه اودي الهم ولا يهمچ

اخذت الصينيه وراحت .. طلعت وراها ع السريع اشوف جهاد بلكت الله يسوي اي شي يبين بي مشاعره اتجاها بس ماكو للأسف

دترجع شافتني واگفه بالباب فتحت عيونها استوعبت السالفه

تبارك.. يا مياس والله ما توقعتها منچ

مياس.. ههههه امشي حبي الله يعينچ على هلاثول مبين راح يتعبچ هواي

تبارك.. هه راح ... ولچ ابويه سالگه شمبقي بيه لخاطر الله

مياس.. يوگع حياتي اذا مو اليوم باچر وگولي مياس گالت

تبارك.. اوف والله ما اصدگ يرادلها نذر

مياس.. نذري

تبارك.. انذر الچ شتردين بس گولي

مياس.. ههههه اذا صرتي لجهاد درسيني منا لما اتخرج

تبارك.. يااااا جنچ على دراسه إلا اطلعچ دكتوره بس خلي تصير

مياس.. هههههه عاد مو لهل درجه .. لتچذبين حتى بلكي الله يعاين لحالچ

تبارك.. لا ربي مو دكتوره چذب لتصدگني
اطلعها مدرسه مثلي

مياس.. اي هسه تمام ههههه

دنضحك دخل شهم للمطبخ .. سكتت بسرعه فشله منه بس استغربت من شفته ابتسم بوجهي

شهم.. ليش سكتوا ضحكوني وياكم

تبارك.. لا ابن عمي سالفه مال بنات

شهم.. اممم صايرات صحبه

تبارك.. هههه هيچ شي

شهم.. الله يديمها
اگول مياس وين نهاوي بعدها نايمه

مياس.. اي لان الليل كله سهرانه فتعوضها بالنهار

شهم.. دتتعبچ مو

مياس.. فدوه الها اكو ام تتعب من بتها

شهم.. تقرب مني حط ايده على راسي : الله يخليكم الي

مياس.. ويخليك النه ان شاء الله

شهم.. صاعد انام بلاربعه گعديني بلا زحمه عليچ

مياس.. من عيوني

شهم.. تسلم عيونچ

اول ما طلع لزمتني تبارك من ايدي .. درت وجهي صفنت عليها

مياس.. شبيچ

تبارك.. بينكم شي

مياس.. شنو قصدچ

تبارك.. انتي وشهم

مياس.. لا يمعوده شدتحچين

تبارك.. كلنه ندري بزواجكم شكلي بس هسه الوضع مچان طبيعي حسب ما حسيت

مياس.. هاي شبيچ هو شنو المو طبيعي
من يوم يومه يعاملني هيچ

تبارك.. هااااا

مياس.. اي ديلا سدي الموضوع

تبارك.. تعالي نطلع للصاله بلكت جهاد موجود

مياس.. لا حبي تلگي راح ينام

تبارك.. گلت بلكي

مياس.. هههه يلا امشي

طلعنه للصاله وصدگ لگينا بعده گاعد يگلب بالتلفزيون .. بس حس بينه دار وجها

جهاد.. رايح انام تردون شي

مياس.. وين ؟؟ گاعد ويانه

جهاد.. لا والله تعبان

مياس.. على راحتك

راح ظلينه نعاين ورى .. متت ضحكت من سمعت تبارك تگول

تبارك.. خرب حظي على هالحظ المايل

مياس.. هههههه اگول انتي قبل لا تحچيلي شلون چنتي تفرغين گلبچ

تبارك.. بالبچي .. الله وكيلچ كلما اختنگ ابچي لما الله يگلي بس

مياس.. سوده عليه حالتچ مستعصيه ويحتاجلچ علاج فوري

تبارك.. علاجي جوه بس غير يحس

مياس.. ههههه امشي نشوف نونه احسن من الحچي

رحنه لغرفتي لگيتها گاعده بس ساكته متبچي .. حللتها وظلينه نسولف لحد ما صارت الاربعه

طلعت ويا تبارك انطيتها نونه ورحت اگعد شهم بعدني بأول درجه سمعت باب غرفته انفتح

رفعت راسي ونزيت من مكاني لمن عاط بيه بصوت عالي

شهم.. مياااااااااااس تعاليلي بسرعه....

يتبع..

________

ملاحضه/ حبايبي تابعوا حسابي بالوتباد بلا امر عليكم
مرات اريد انشر شي ع المنصه يخص القصه بس ابطل لان اغلب متابعين القصه ممتابعين حسابي الخاص فـ بالتالي مراح يوصللهم اشعار النشر
وما اگدر اظل انشر توضيحات داخل القصه لان تصير هوسه

تحياتي للجميع ❤