رواية مياس قلب الشهم الفصل الثامن والعشرون 28 - بقلم لبنى الموسوي

#مياس_قلب_الشهم

للكاتبه #لبنى_الموسوي

لعيونكم علمود قفلة البارحه .. بس اليوم وتعذروني بعد 💔

جهاد.. گومي وديله الحامض وشوفي شلونه

ما صدگت جهاد گلي هيچ .. ركضت للمطبخ صبيتله بالگلاص وصعدت ع السريع

دگيت الباب اكثر من مره ما جاوب .. خفت علي كلش فتحتها بسرعه وچان اتخبل من اشوفه واگع بنص الغرفه

- صعدت ويا جهاد الغرفتي لان محتاج اظل وحدي .. اول ما طبيت طلبت منه يطلع

شهم.. جهاد اطلع بلا زحمه عليك

جهاد.. شلون اخليك وحدك خالي !! مو انت تعبان

شهم.. ما بيه شي ليظل ببالك شويه وارتاح

جهاد.. ماشي بس اني راح اظل بالصاله
اي شي تحتاج بس صيحني واجيك بلحظتها

شهم.. ان شاء الله

طلع من يمي وسد الباب ورى ..
عاينت بزوايا الغرفه اختنگت كلش لمن تذكرت نهى
درت وجهي للميز شفت صورتها گبالي .. هنا بعد ما گدرت اتحمل وفقدت السيطره على نفسي تماماً

للمره الثانيه ابچي بحرگه ومن كل گلبي من بعد استشهاد مهيب

ظليت واگف بمكاني اريد اتحرك للچربايه ماكو .. خليت ايدي على راسي افرك بي لأن انتهيت من الألم فجأه افترت الدنيا بيه وما حسيت على شي بعد

- اول ما شفته بالگاع شمرت الگلاص من ايدي وركضت علي .. اهز بي حيل اريده يفتح عيونه ماكو

مياس.. شهم
شهم
ولك شهم گوووووم
عفيه فتح عيونك لتعوفني وتعوف بنتك وحدنه ..
منو النه من بعدك فدوه گوم جاوبني شهمممممم

على صوتي اجوا جهاد وايهاب يركضون .. اول ما شافوا بهل حاله دفعوني وشالوا ع السريع

ركضت وراهم مفزوعه ما اعرف شسوي .. صعدوا بالسياره ردت اصعد وياهم جرني جهاد

جهاد.. وين يمعوده

مياس.. اجي وياكم عفيه

جهاد.. والجهال شلون تعوفيهم ؟!!

ايهاب.. استعجل يمعوووووووووووود

جهاد.. اي خالي جاي

مياس.. جهاد عفيه خابرني اول متوصلون

جهاد.. ميخالف بس قفلي الباب ورانه
تسمعيني لو لا ؟؟ لتفتحيها لأي من كان حتلو من البيت

مياس.. اي اي

فتح الباب الرئيسي وشخط ايهاب السياره بسرعه .. رحت وراهم قفلتها ورجعت للداخل

مياس.. اول ما طبيت فقدت من البچي : يا رب احمي الي والبنته
يا رب كون ميصيرله شي ما ظلي احد بالدنيا غيره

خسرت مهيب ومن بعده اختي نهى .. ما ظل بس شهم اموت اذا خسرته اله هم

سمعت صوت الطفله تبچي .. ركضت لغرفة جهاد شلتها بس ما گدرت اسكتها لان جاعت

عفتها ع السرير ورحت للمطبخ اسويلها ممه .. اسمع صوتها فحطت اريد اكمل الممه ماكو نثولت بعد

مياس.. جايه حبيبتي جايه
يا الهي راح يگعدون جهال ايهاب على صوتها وشيخصلني بعد

اخذتها مستعجله دا اطلع من المطبخ ع السريع .. وگعت الممه مني وتفلشت لان رنا جايبتها كزاز

مياس.. اااااف رنا اااف
ما لگيتي غير الكزاز تشتريها .. هسه اني شسوي بروحي

ظليت افتر على نفسي اخير شي صعدت الغرفة نهى ادور بجهاز الصغيره بلكت مشتريتلها ممه احتياط بس للأسف ما لگيت

نزلت ركض والطفله ما بطلت بچي ولا دقيقه وحده .. رحت لغرفتي لبست حجاب واخذت فلوس حتى اطلع اشتريلها ممه

مياس.. حبيبتي اصبري شويه هسه ارجعلچ
عفيه اسكتي عفيه
ولچ مياس تحركي .. مخبله تحچين ويا الطفله على اساس راح تفتهم عليچ

اخذت المفتاح وقفلت الباب ع الجهال بس بالي كله يمهم ... چان اكو صيديله براس الشارع رحت اشتريت منها الممه ورجعت ع السريع

اعاين للطريق ما بي احد شتا والناس كلها خاتله بالبيوت وحتى الشارع اظلم .. دا امشي حسيت احد لزم ايدي من ورى

درت وجهي بخوف بحيث حسيت گلبي راد يوگف من الموقف .. فزعت من شفت عماد گدامي اول ما عاينتله ابتسم واشرلي بأيده بمعنى هلو

مياس.. عماد الله يخليك عوفني

رفع ايده ليفوگ يعني عافني .. ضحك وهزلي براسه
ما صدگت حركته ركضت واني اتلفت لحد ما طبيت للبيت وقفلت الباب

مياس.. يا ربي هذا شجابه ؟؟ وشعرفه اني طالعه معقوله ديراقبني
زين ليش عافني فجأه وما سوالي شي .. شنو قصده بهل حركه السواها ؟!!!

وعيت على صوت الطفله دتفحط .. دخلت ع السريع واشوفلك جهال رنا گاعدين يمها ومنتهين من البچي

مياس.. اسم الله حبايبي اسم الله
اجيت لتخافون .. اني يمكم بس اصبروا لحظه

رحت اركض سويتلها الممه ورجعت .. خليتها بحضني اشرب بيها وايدي محاوطه مجتبى وحسن

مجتبى.. اريد ماما

مياس.. هسه تجي يا عمري انت
شنو رأيك بعد منخلص اكل هاي الحلوه اسولفلك قصص انت وحسن لحد متنامون

مجتبي.. بچه بحرگه : ما اريد قصص اريد ماما

مياس.. ياربي ساعدني .. هسه اني شسوي واسكتهم

عاينت عليهم انتهوا من البچي : زين اريد انوم الطفله شلون وهم مديسكتون

مياس.. مجتبي حياتي اسمعني
شو اسكت خلي احچي وياك

مجتبي.. اريد مامااااااااا

مياس.. اي هسه اوديك الماما بعد ما انوم الطفله
بس شرط تسكت حتى تنام واگدر اخذكم لامكم

مجتبي.. اي اسكت

مياس.. يلا لعد اخذ اخوك وروحوا لغرفتكم بين ما انومها واجيكم

واخيرا اقتنعوا .. اخذ حسن واني ظليت اهز بيها لحد ما نامت

گمت ع السريع طلعت من غرفة جهاد وسديت الباب ورايه ..

مياس.. تذكرت من عفتهم وحدهم : عزه همزين الله ما شايلين الطفله ومسويلها شي
يمه الله سترها الف الحمد لله والشكر

رحت لغرفتهم لگيتهم مستمرين بالبچي .. وگع لساني واني اقنع بيهم بلا فائده اخير شي تعبوا من النوح وناموا بمكانهم

غطيتهم وطلعت على كيف .. اجه ببالي شهم الصار ويايه نساني كلشي

ركضت الغرفتي اخذت الموبايل شفت رقمه متصل بيه اربع مكالمات

طرت فرح يعني هو بخير .. رجعت دگيت علي واول ما نفتح الخط سمعت جهاد يعيط حيل

جهاد.. هاي ويننننننننچ

مياس.. شبيك ما چنت يم الجهاز

جهاد.. گلبي وگع واني افكر شصار بيچ .. ثوله انتي بس فهميني

مياس.. ظليت صافنه مستغربه صياحه شويه وسألته : شهم شلون صار ؟؟

جهاد.. زين الحمد لله
هسه شويه ونطلعه .. طبعا سأل عنچ بس گتله زينه لان لو عرف بيچ ممجاوبتني يتخبل وهو ما ناقصه
اريد افتهم وين چنتي ؟؟

مياس.. الجهال خبصوني بالبچي
بت شهم من صفحه وجهال ايهاب من صفحه ثانيه .. بالگوه يلا گدرت انومهم هسه

جهاد.. قفلتي الباب ؟؟

مياس.. اي قفلتها

جهاد.. خو ما صار وياچ شي

مياس.. لا .. يعني شيريد يصير قابل

جهاد.. خوش يلا راح اسد الخط ديري بالچ عليهم وعلى نفسچ هم

مياس.. يعني متتأخرون

جهاد.. لا ان شاء الله اقل الساعه ونرجع

مياس.. ان شاء الله

جهاد.. مع السلامه

مياس.. الله وياك

سديت الخط ورحت للمطبخ اكنس الگزاز قبل لا يجون ويفتهمون بالصار

ظليت ساعه الوب بالصاله .. اروح واجي مثل المخبله
الدمعه ما نشفت من عيني على نهى
وگلبي خلص من قلقي على شهم

اعاين للساعه متقبل تمشي والبيت خنگه صاير .. كل زاويه بيها ضحكه او ذكرى لنهى الراحت وعافتني بلا سبب

سمعت صوت الباب دينفتح خليت ايدي على گلبي لان تذكرت عماد .. تقربت من الشباك بخوف جريت نفس من شفت جهاد دخل

ظليت اعاين عليهم فتحوا الباب ودخلوا السياره .. شويه ونزلوا شهم بس شفته طلعت اركض

-بعد ما فقدت الوعي فتحت عيوني لگيت نفسي بالمستشفى وجهاد وايهاب فوگ راسي

ايهاب.. الف الحمد لله على سلامتك
شفت شسويت بروحك ظل عاند ظل

جهاد.. مو هيچ خالي .. الرجال تعبان

ايهاب.. غير خايف علي مو شفت بعينك شصار بينه لحد ما فتح عينه

جهاد.. الحمد لله على سلامتك خالو

هزيت راسي بتعب .. درت وجهي عنهم اداري وجعي شويه وتذكرت مياس

شهم.. جهاااد

جهاد.. ها خالو

شهم.. مياس
الجهال
شنو
شلون عفتوهم ؟ بس لا ظلوا وحدهم

جهاد.. اهدأ خالي اهدأ
اني وصيتها تقفل الباب منا لما نرجع

شهم.. صدگ تحچي ؟!! انتو الزوج اكو براسكم عقل لو لا
ولكم شلون تركتوهم بهل لليل وحدهم

ايهاب.. شنسوي شهم
حقك ما شفت حالك گوه تلاحگنه عليك الدكتور گال شويه لو متأخرين چان انضربت جلطه

شهم.. عساني ان شاء الله
موبايلي وييييين

جهاد.. خالي اعصابك الله يخليك
مو زين عليك

شهم.. اريد موبايلي بسرعه

جهاد.. هذا الزم
بس شسوي بي ؟؟

شهم.. اتصل على مياس

جهاد.. انطيني الجهاز اني اخابرها

شهم.. الزم .. خابر بسرعه

طلع بره يخابر .. تأخر بالخمس دقايق يلا رجع

شهم.. هااا

جهاد.. ليظل بالك جاوبتني وماكو شي يمهم
الجهال نايمين وهي دتنتظرنه
اروح للدكتور اشوف شوكت نگدر نطلع منا

ايهاب.. خليك يم شهم اني اروح

جهاد.. ماشي

ظل جهاد يمي بس احسه مو طبيعي .. يروح ويجي بتوتر
ساعه يفتر
ساعه يگعد ويهز برجله
ساعه يطگ باصابيعه
واني بهالحاله المزريه انتبهت علي  .. سألته باستغراب

شهم.. جهاد شبيك !!

جهاد.. ها شنو يعني شبيه

شهم.. ما ادري اني دا اسألك ؟!!

جهاد.. بعد كلشي صار طول اليوم ما اتصور هذا السؤال بمحله

دگ جهازي بهلاثناء .. عاينتله ركض علي اخذه وطلع بره

صفنت ويا نفسي : لا اكيد صاير شي ما بيها مجال

شويه ودخل للغرفه ردت اسأله لزمني الوجع شل حتى لساني

جهاد.. شبيك خالو ؟؟ شدتحس

شهم.. فركت راسي : اريد اطلع بسرعه

جهاد.. هسه خلي يجي خالي ايهاب حتى نشوف يسمحولك تطلع لو لا

شهم.. يسمحون او لا .. طلعوني منا حالاً

ايهاب.. ها شبي شهم

جهاد.. يريد يطلع

ايهاب.. لازم ننتظر ساعه بعد

شهم.. ما انتظر ولا دقيقه
ردت اگوم لزمني جهاد .. دفعته حيل رجع جرني للسرير

جهاد.. الله يخليك خالي تحمل شويه
والله العظيم وضعك تعبان ليش مدا تستوعب هالشي

شهم.. شبيها مياس ؟؟

جهاد.. شنو كلشي ما بيها
ليش هالسؤال ؟؟

شهم.. احلف بروح ابوك

جهاد.. وروح ابويه مابيها شي

رجعت تمددت وما اعرف شلون مرت الساعه .. وصلنه للبيت واول ما دخلنه اجت مياس تركض ارتاحيت من شفتها گبالي

مياس.. الحمد لله على سلامتك
شلون صرت ؟

شهم.. الحمد لله

عفتهم وطبيت .. رحت بوجهي لغرفتي دخلت وسديت الباب ورايه

گعدت ع الچربايه ممصدگ نهى راحت خلص .. تمددت وايدي على راسي صار صوت ضحكتها بأذني اختنگت بدمعتي

حاولت الزم نفسي بس ما گدرت إلا ما ابچي بحرگه على رفيقة عمري وحب حياتي .. سمعت الباب يندگ گحيت وصحت : لحظه

سحبت الكلنس مسحت وجهي .. احاول اتماسك بس اخاف من حچايه وحده اضعف وتفضحني دموعي

شهم.. تفضل

- اول ما رجع شهم من المستشفى صعد لغرفته .. ظليت افتر بالصاله وعيني على الباب خايفه لا يتخربط مره ثانيه

مياس.. جهاد

جهاد.. نعم

مياس.. شگال الدكتور علي

جهاد.. ضغطه مرتفع كلش وچان انجلط إلا شويه

مياس.. بسم الله علي
هسه شلون والله ما ارتاح يظل وحده

جهاد.. صعدي شوفي

مياس.. اخاف يضوج

جهاد.. ظل حامض ؟؟

مياس.. اي

جهاد.. لعد روحي صبيله گلاص وودي اله .. هم يفيده للضغط وهم نطمأن علي بالمره

مياس.. خوش فكره

رحت اركض للمطبخ .. جهزته اله وصعدت دگيت الباب بالبدايه صاح لحظه
شويه يلا گلي تفضلي

دخلت لگيته متمدد ع الچربايه وايده على عيونه .. استغربت من ظل على هالوضع حتى بعد ما حس بيه يمي

مياس.. شهم

شهم.. نعم

مياس.. هاك هذا الحامض اشربه ينزل ضغطك

شهم.. خلي ع الميز

انتبهت الصوته مخنوگ .. من هالشي گدرت افسر تصرفه هذا

مياس.. ماشي راح اخلي هنا .. بس الله عليك اشربه مو تعوفه

شهم.. ان شاء الله

خليته ع الميز درت وجهي دا اطلع صاحني .. التفت علي منتظرته يحچي شويه وگال :

شهم.. نهى شلونها

فتحت عيوني : يا سوده عليه الصار ضرب على عقله ونسى نهى ماتت
نزلت دموعي واني بمكاني .. رفع ايده من وجها صفن عليه

شهم.. شبيچ !!!

مياس.. انت زين

شهم.. لتخافين بعدني ما تخبلت
دا اسأل ع الطفله

مياس.. شنو يعني ؟!!

شهم.. اسمها نهى

راح گلبي من سمعت كلامه .. نهى چانت تريد تسميها مسره بس هيچ احسن حتى تظل ذكراها عايشه ويانه لاخر العمر

مياس.. مسحت دموعي : زينه الحمد لله

شهم.. شلون دتوكليها ؟؟

مياس.. رنا راحت اليوم اشترتلها ممه وحليب وعلمتني عليهن

شهم.. ديري بالچ عليها

مياس.. بعيوني لتخاف

درت وجهي طلعت وسديت الباب بس روحي دتنمرد على شهم .. نزلت جوه شفت جهاد متمدد ع القنفه حس عليه شال راسه بسرعه

جهاد.. ها شلونه ؟؟

مياس.. تعبان كلش

جهاد.. عدل گعدته : ااااااخ يا ربي اخ

مياس.. جهاد لتعوفه وحده

جهاد.. شسويله يا مياس
مستحيل يقبل اظل يمه .. بعدين هو مصيبته چبيره والله يعينه عليها
اكيد يحتاج يظل وحده حتى يفرغ گلبه من الوجع البي

مياس.. وشلون تالي

جهاد.. روحي انتي ارتاحي
اني راح اظل بالصاله حتى اذا صار شي لا سامح الله اعرف بسرعه

مياس.. اجيبلك فراش تنام ؟

جهاد.. هه ليش هو اكو نوم بمثل هيچ وضع

هزيت راسي ورحت لغرفته .. شلت الطفله وديتها الغرفتي
ظليت اعاين عليها ودموعي تجري لحد ما گعدت تبچي

بقيت الليل كله سهرانه وياها متقبل تنام حرت شسوي حتى اسكتها بس بلا فائده

صار الفجر سكتت شويه .. طلعت توضيت ع السريع ورجعت اصلي بس كملت رجعت تبچي

شلتها افتر بيها ما ادري شسويلها حتى مو جوعانه هستوني منطتها ممه بهلاثناء اندگت الباب خليت حجابي على راسي وصحت تفضل

- الليل كله ما گدرت انام من وجع راسي وگلبي
انعادت عليه مأسات موت اخويه وما لگيت شي يهدأ الم روحي غير الصلاة والقرأن

للفجر واني اسمع الطفله تبچي ما سكتت طول الوقت .. نزلت اشوفها صار بوجهي جهاد ديصلي

جهاد.. گاملي ع السريع : ها خالو شلون صرت

شهم.. الحمد لله على كل حال

جهاد.. بعده راسك يوجعك ؟؟

شهم.. لا احسن ليظل بالك

عفته ورحت لغرفة مياس دگيت الباب ودخلت لگيتها شايله الطفله وتفتر بيها

مياس.. عاينت لعيونه منتهيه عرفت گضى الليل بالبچي انكسر گلبي علي : شلون صرت ؟؟

شهم.. الحمد لله
شبيها تبچي ؟؟

مياس.. ما ادري والله
بس ليظل بالك اكيد هسه تنام لان طول الليل گاعده

تقرب عليه اخذها من ايدي .. شالها يشم برگبتها نزلت دموعي لا ارادياً من شفت هالمنظر گبالي

درت وجهي عنه حتى لينتبه .. البي كافي ما عايز قهر زايد

شهم.. اشم بريحتها واتخيل نهى بيها .. غصيت بعبرتي بس لزمت نفسي بالگوه : اگول مياس

مياس.. مسحت دموعي ودرت علي : نعم

شهم.. اذا تعبتچ اخذها لخالاتها

مياس.. لا لا .. عفيه لتاخذها اصلا ولا تعبت

شهم.. مو مدتنام

مياس.. عادي والله
هو اني بكل الاحوال ما اگدر انام

شهم.. ماشي لعد لزميها هاچ
وراح ادزلچ وحده من البنات هم تساعدچ بيها وهم تظل وياچ طول ما احنه برى

مياس.. على راحتك

شهم.. راد يطلع رجع بخطواته : اگول مياس

مياس.. نعم

شهم.. صار وياچ شي من رحنه للمستشفى

مياس.. ارتبكت من سؤاله : ها لا
لا طبعا
قابل شيريد يصير

شهم.. شبيچ بابا

مياس.. شنو ؟؟ كلشي ما بيه والله

شهم.. مياس اذا اكو شي احچيلي

مياس.. وداعتك ماكو شي

شهم.. ماشي يلا مع السلامه

مياس.. الله وياك

لزمت گلبي بأيدي لان ردت انفضح إلا شويه .. ابد مو وكت عماد وصخامه
الرجال روحه دتطلع وينه وين هل نگس

ظليت افتر بيها والافكار تاخذني وتجيبني لحد ما نامت واخيرا ... خليتها ع الچربايه وطلعت ع السريع حتى الحگهم

لگيت جهاد واگف ديمشط ع المغسله

مياس.. صباح الخير

جهاد.. صباح النور

مياس.. راح اسوي الريوگ

جهاد.. لتحسبين حسابي

مياس.. ليش

جهاد.. ما اشتهي

حچه هيچ وخله وراح .. مشيت ورى عاينت الشهم گاعد بالصاله وايهاب يقيس بضغطه

ايهاب.. مياس بلا زحمه عليچ ريوگ لشهم

مياس.. اي هو اجيت اسوي

شهم.. ما اريد

ايهاب.. مو بكيفك تسمع لو لا
ضغطك بعده عالي ووراك يوم مليان تعب وهوسه لازم تتريگ حتى تبلع علاجك
لتأذينه شهم ما ناقصين والله العظيم ما ناقصين

عفتهم ورحت اركض .. سويت الريوگ بسرعه ووديته اله

جبره ايهاب ياكل بس بالگوه كمل ربع گرصه وگام .. التفت جهاد عليه واشرلي ع الميز عاينت شفت العلاج هناك

رحت للمطبخ جبت گلاص ماي ورجعت للصاله .. شلت العلاج وناوشته لجهاد

جهاد.. تفضل خالي

شهم.. انطيني
بلعه وهو يگول : مياس اقفلي البيبان ورانه بين ما ادزلچ وحده من بنات عمي

مياس.. اي صار

ايهاب.. راح اخذ الجهال ويايه لبيت جدهم

مياس.. خليهم اذا تريد

ايهاب.. لا متگدرين عليهم .. اوديهم احسن يلتهون هناك

مياس.. براحتك

شهم.. يلا تعالي سدي الباب ورانه

طلعوا ورحت قفلت البيبان وراهم .. دخلت لغرفتي عاينت لنهى نايمه مثل الملائكه بستها ع كيف وانسحبت اخاف تحس عليه وهي بالگوه نامت

گعدت بالصاله والدنيا طالعه من عيني .. مالي خلگ لأي شي حتى نفسي

مياس.. يا ربي لو ما خذني الي ولا نهى ع الاقل محد ينقهر عليه بس هاي المسكينه بروحتها كسرت هواي عالم وراها واولهم رجلها وبتها

ظليت ابچي بحرگه واني اتذكر ذكرياته الحلوه من اول ما طبيت لهل بيت لحد قبل يوم عمليتها .. فجأه سمعت الجرس يندگ

مياس.. گمت بخوف : معقوله نسوا شي ورجعوا ياخذوا ؟!!

عاينت من الشباك ما شفت ظل جوه الباب .. انتبهت اكو ورقه بالگاع

طلعت اركض شلتها وايدي ترجف .. فتحتها ع السريع وانصدمت من قريت هالكلام

عماد.. ها يا حلوه شلون تردين اطب للبيت
تفتحيلي الباب
لو اطفر من الحايط
لو تختصرين عليه كل هذا وتجين ويايه بارداتچ ....

يتبع..