رواية مياس قلب الشهم الفصل التاسع والثلاثون 39 - بقلم لبنى الموسوي

#مياس_قلب_الشهم

للكاتبه #لبنى_الموسوي

ملاحضه/

١-حبايب اليگولون عوضينه وطولي البارت
ترى والله هذا اقصى ما عندي لان (مريضه)
عيوني منتهيه گوه دا اكتبلكم هالحد من البارت في سبيل ما اوقف القصه واخليكم تنتظرون
لذالك اتمنى منكم تعذروني شويه وتدعولي بالشفاء لأن متأذيه كلش الله شاهد

٢- التصويت كلش ضعيف ليش هيچ ؟!
ترى والله القصه تستاهل اكثر لذالك كثفو تصويتكم الخاطر مياس على الاقل ⁦❤️⁩

____________________

بعد ما عرفت السالفه من مياس ارتاحيت كلش : واخيراً خليت ايدي ع العله حتى اخلص من التفكير

طلعت العصر شفت جماعتي متواعد وياهم ومناك رحت للجم لگيت يوسف ينتظرني

يوسف.. وينك يمعود صارلي ساعه انتظر

شهم.. چنت ويا ماهر وجماعته وكلما اريد اگوم ميخلوني تعرف بيهم شلون لزگه

يوسف.. هههههه
ديلا خل نتمرن

شهم.. انت شجابك لهنا مو البارحه متبرع بلتر دم
درتاح شويه لو البيك ميخليك

يوسف.. مرتاح ليظل ببالك

شهم.. زين لعد
اروح ابدل واجيك انتظرني ما اتأخر

يوسف.. ماشي

ساعه وخلصنه من التمرين .. عزمت يوسف ع العشه حتى احل المشاكل وحده ورى الثانيه

اخذته للمطعم وطلبنه الاكل
اول ما خلصنه نزلت الچايات وفتحت ويا الموضوع

شهم.. يوسف اريد اگلك على سالفه مهمه

يوسف.. گول حبيبي

شهم.. قبل كلشي اسألك سؤال واريدك تجاوبني بصراحه

يوسف.. ليش يا يوم مچذب عليك اني حتى تريد احچيلك الصراحه

شهم.. لا حشاك ما قصدت
المهم سؤالي يخص خطوبتك من تبارك

يوسف.. شبيها ؟!!

شهم.. انت تريدها للبنيه يعني اقصد عندك مشاعر اتجاها لو مجرد تتزوج والسلام

يوسف.. لا ما عندي مشاعر اتجاها
هو اني وين شايفها هي مره لو مرتين .. بس فكرت بيها على سمعة اهلها وتربيتهم المحموده

شهم.. زين يعني متضوج اذا نخطبت الغيرك

يوسف.. لا وليش اضوج
اذا خوش ولد الله يهنيها ويسعدها ويا
هسه شفهم من اسألتك ؟؟ انخطبت تبارك لو شنو

شهم.. لا ما نخطبت
بس عرفت بيها معجبه بواحد تعرفه انت

يوسف.. منو

شهم.. جهاد

يوسف.. هههههه يلوگلها والله

شهم.. يعني ما ضجت

يوسف.. يا اخي ليش اضوج
دا اگلك البنيه مو ببالي .. بعدين جهاد انسبلها مني اني چبير عليها

شهم.. لا يول شنو هالحچي هي تطول تحصل واحد مثلك

يوسف.. هههه الله يجبر بخاطرك

شهم.. ويجبر خاطرك بعد گلبي

يوسف.. رحم الله والديك
زين جهاد شنو هم معجب بيها

شهم.. ما ادري اني فهمت السالفه من النسوان لذالك اجيت احچي وياك قبل الكل

يوسف.. بالخير خويه يستاهل جهاد هيچ بنيه

شهم.. وانت تستاهل الاحسن
ربي يفرحنا بيك بأقرب وقت

يوسف.. ههههه لا يمعود شكلي تراجعت عن فكرة الزواج
خليني هيچ اريح وابرد راس

شهم.. ابرد راس گتلي
خير ان شاء الله

يوسف.. شنو هاي النبره الغريبه ؟!!

شهم.. ههههه لا هيچ
يلا دگوم خل نرجع للبيت تأخر الوقت

يوسف.. شلون صارت سمر

شهم.. نفس وضعها
ما شفتها من الغده ولمن طلعت چانت نايمه

يوسف.. شهم الزم جهاد عنها
شفت البنيه من ورى الحرب النفسيه شلون وصلت للانتحار

لهنا وكافي حاولو تنسون الصار .. ما كفرت لمن حبت بس غير هو هذاك نذل واستغل حبها اله حتى ينتقم

صدگ هو شخباره ؟؟

شهم.. زي الفل

يوسف.. ههههه لا بشرفك

شهم.. وعيونك الما احلف بيهن چذب
ما يعرف نهاره من ليله بحيث يگعد بلليل وينام بالنهار حسباله الدنيا بالمگلوب

يوسف.. ههههه والله ما استبعد تنسي حتى اسمه
عمي انت شهم وما ادراك ما الشهم

شهم.. ههههه دگوم لك عاجبك تنام هنا لو شنو بالضبط

يوسف.. هههه لا گايم ها اها

رجعت للبيت گعدت وياهم شويه بعدين صحت جهاد ورحت الغرفته حتى احچي ويا بموضوع تبارك

شهم.. سد الباب وراك

جهاد.. خير خالو خو ماكو مصيبه

شهم.. لا ماكو اطمأن

جهاد.. شعجب

شهم.. هههههه جهاد مو وكتك

جهاد.. ماشي يلا اسمعك

شهم.. سولفلي تحب لا ؟؟

جهاد.. باوعلي باستغراب : ليش هالسؤال ؟!!

شهم.. ندردش لو ميصير

جهاد.. لا طبعا يصير
ع العموم لا ما احب ويني وين هالسوالف اني

شهم.. وتبارك

جهاد.. ها يعني عرفت بالموضوع

شهم.. اي مياس حچتلي

جهاد.. ما ادري والله خالو
للصراحه هي خوش بنيه وما شفت منها إلا كل خير بس مو ببالي يعني ممفكر بيها ابد

شهم.. اذا مثل ما گتلي متحب وما عندك وحده بحياتك فمستحيل تلگه مثل تبارك

جهاد.. بس اني ما افكر بالزواج حاليا

شهم.. انت كبرت جهاد
اول وتالي نزوجك محد راح يقبل تظل على هالحاله لا اني ولا امك ولا حتى بيبيتك

جهاد.. ويوسف

شهم.. شبي يوسف

جهاد.. مو يريدها

شهم.. لا بطل

جهاد.. ههههه شنو بطل قابل السالفه لعبه

شهم.. هو من اول متردد بس اني ورطته لمن حچيتلكم الموضوع

جهاد.. والله خالي ما اعرف

شهم.. جهاد على شنو محتار بس گلي
ما طولك متحب والبنيه اخلاق وجمال ومنك وبيك وفوگ كل هذا تحبك
توكل بالله وانوي عليها لأن مراح تلگه احسن من هالفرصه صدگني

جهاد.. بس انت تدري اني وابوها مو تمام

شهم.. عوفه عليه
عمي واني اتصرف ويا
بس قبل كلشي اريدك توعدني تصير رجال وتعاملها بغيره وشرف حتى لا اتخجل ويا العالم من وراك

جهاد.. شنو السالفه خالي ؟!!
هو هذا حچي بشرفك

شهم.. ادري بيك تغيرك بس مع ذالك ما اضمنك هههه

جهاد.. رحم الله والديك

شهم.. ووالديك حبيبي بالخدمه

جهاد.. ههههه

شهم.. هسه ها عليها ان شاء الله

جهاد.. بكيفك خالو

شهم.. لا مو بكيفي
انت الراح تتزوج مو اني .. اريد اسمع رأيك اذا البنيه ما عاجبتك بلا هالسالفه من الاساس

جهاد.. لا ما بيها شي يتعيب

شهم.. يعني مقتنع

جهاد.. ان شاء الله

شهم.. يلا لعد نطلع نبشرهم

جهاد.. شتبشرهم غير ينصدمون صدمه من هاي التمام

شهم.. ههههه ليش بلا

جهاد.. ضربتين ع الراس توجع
هم تگلهم بلا مقدمات جهاد راح يتزوج وهم تبارك القبل يومين گلت يوسف راح يخطبها

شهم.. ههههه ما طول هيچ شوقتني اصدمهم من صدگ

جهاد.. هههه والله ما عرفتك خالي

شهم.. دتعال ويايه حتى تعرفني زين

طلعت ويا للصاله بعدهم على نفس الگعده .. گبل فتحت الموضوع وياهم بلا مقدمات

شهم.. حجيه جيبي البشاره

الحجيه.. خير يمه

شهم.. جهاد راح يخطب تبارك

مياس.. هو گال هيچ لو اني ردت انجلط من الصدمه
بلا ما احس على نفسي صحت : شنوووووو

شهم.. شبيچ سلامات

الحجيه.. يمه شنو خربطت
تقصد يوسف راح يخطب تبارك

شهم.. لا يمه جهاد راح يخطب تبارك

منال.. تحچون صدگ !!!

جهاد.. اي يمه ليش ما عاجبتچ البنيه ؟!

منال.. لا يمه وين اكو منها ورده مال الله
بس شنو ؟
يعني من شوكت
لحظه شهم انت مو گلت يوسف يريدها

شهم.. يمعوده حچايه وگالها .. قابل صارت طابو
بطل ميريد يتزوج رجع اضرب عن الزواج من جديد

الحجيه.. چا انتو بكيفكم تشمرون بالبت
لعبه خو ما لعبه هي

مياس.. والله احلى خبر

جهاد.. ههههه ليش لان صديقتچ

مياس.. اي وانت تعرف بالباقي هههه

منال.. ع الخير وليدي خوش بنيه تستاهلك وتستاهلها

جهاد.. باس راسها : خير اليصيب گلبچ الطيب امي الغاليه

الحجيه.. وشوكت ناوي تخطبها اله يمه

شهم.. هذا الاسبوع افتح الموضوع ويا عمي
بس الزواج بعد السنه مالت نهى الله يرحمها

الحجيه.. اي زين تسوي

باوعت السمر صافنه عليهم وبس تسمع ما ابدت اي ردة فعل .. انقهرت من منظرها كلش عرفت الصار كسر حتى احساسها

انطيت نونه لمنال واخذت سمر للغرفه .. گعدت ع السرير تباوع عليه بنظرات كلها قهر
بس لزمت ايدها بچت بسرعه

مياس.. ليش تبچين سمر
هاي يوسف ومراح يتزوج تبارك

سمر.. مياس ليش مدا تستوعبين
يوسف خلص لغاني من قاموس حياته مستحيل يرجع يفكر بيه ولو للحظه وحده

مياس.. غلطانه حبيبتي غلطانه
حقچ ما شفتي من گتله سمر انتحرت شلون چانت ردة فعله

ولچ تخبل الله وكيلچ وگبل لحگكم للمستشفى وامچ گالت تبرع ببطلين دم لخاطر عيونچ

الله شگد حلو يعني هسه دمه يجري بيچ

سمر.. ههههه مخبله والله

مياس.. اي فدوه ضحكي
صدگيني لو ناسيچ مچان تراجع عن خطوبة تبارك بس هو ما نساچ ولا راح ينساچ لذالك مدا يگدر يرتبط بغيرچ

سمر.. يعني تتصورين راح يرجعلي

مياس.. اكيد بس شويه ها شويه اصبري

سمر.. ليش عندي غير حل
اصبر والله كريم  

مياس.. يلا عمري نامي ارتاحي
اروح انوم نونه قبل لتطير نومتها وشيخلصني بعد

سمر.. هههه الله يساعدچ

مياس.. تصبحين على خير

سمر.. وانتي من اهل الخير

طفيت الضوه وطلعت صارت منال بوجهي .. ابتسمت الها حتى اطمنها
رحت للصاله شفت شهم ديلعب ويا نونه ردت اخذها منه انومها بس ما انطاني گلبي

ظليت گاعده يمهم قريب الربع ساعه يلا انطانياها
اخذتها منه ورحت الغرفتي
غيرتلها وخليتها بالحجله بين ما اسويلها ممه

رجعت لگيتها تدردم ويا روحها وتضحك .. گزگزت عليها بوستها لحد ما ضاجت
دا انطيها الممه چان گالت ممه يعني ماما

هو اني سمعت هالكلمه منها لو ما ادري شصار بيه .. گمت اگمز واضحك ويا نفسي

ما حسيت على روحي إلا واني صاعده لشهم .. دگيت الباب ودخلت ع السريع لگيته متمدد يباوع اخبار

شهم.. ها خير صاير شي

ركضت علي بلا ما اجاوبه
لزمته من ايده گومته .. نزلت ع السريع واني گايدته

الطريق كله يصيح شبيچ ما بيچ بس اني ما حچيت لأن ردته يسمع بأذنه

دخلنه للغرفه چانت نونه بعدها تلعب .. درت وجهي على شهم والضحكه شارگه حلگي

مياس.. اسمع الله عليك
نونه حبيبي يلا گولي .. ممه
يلا يلا ممه

ظلت تضحك وتناغي واني اتوسل حتى تگولها فجأه گالت : ممه

گمت اگمز بفرح واعيط
هدأت شويه درت وجهي على شهم لگيته يباوعلي ويضحك

مياس.. سمعت الله عليك

شهم.. سمعت والله
ليش متفاجأه يعني هذا شي طبيعي

مياس.. شنو شي طبيعي
ما سمعت شلون گلتلي ممه

شهم.. اي غير انتي امها لعد المن تگولها اذا مو الچ

مياس.. رجعت اگمز : يا الله والقرأن ممصدگه ممصدگةةةةةةةةةةة

شهم.. هههه يربي اني ما شايف طفله تربي طفله

مياس.. اسمع اسمع
نونه گولي ممه

نونه.. ممه

مياس.. اااااااااااااااااه

شهم.. هههههههه خبال اي والله
شلون اليوم راح نظل للصبح ويا الممه مالتچ

مياس.. دشوف شلون حلوه بحلگها
يلا نونه بعد بعد

درت وجهي لشهم شفته يضحك .. فجأه گلب وجها
صفنت علي مستغربه تصرفه

مياس.. شبيك

شهم.. احنه مو خربنه
شنو جايه تقشمرني بهاي السوالف

مياس.. ههههه مو اعتذرت منك
والله مچان قصدي
بعدين تعال گلي شلون قنعت جهاد يخطب تبارك

شهم.. شعليچ انتي
اسرار دوله هاي

مياس.. هههههه
صدگ ويوسف شسويت ويا

شهم.. بعدين
خل اكمل من سالفة جهاد وعود وراها التفت علي
يلا تردين شي اصعد انام

مياس.. لا سلامتك
تصبح على خير

شهم.. وانتي من اهل الخير

باس نونه وطلع .. شربتها الممه وقريب الساعه يلا قبلت تنام
ركضت ع الموبايل سريع ابشر تبارك

خابرتها اكثر من مره ما ردت
شمرت الجهاز ع الميز بس بالي يمها لأن چانت بالمستشفى وما عرفت شصار وياها بعد

دا افكر سمعت الموبايل يدگ رسائل .. عاينت تبارك شلته بلهفه

فتحتهن تعتذر متگدر تحچي لأن تعبانه
دزيتلها رساله حتى تجاوب ضروري وراها خابرتها عاد ردت

مياس.. ها حبي شلونچ

تبارك.. تعبانه كلش

مياس.. سلامتچ توته شجاچ متگليلي قابل الشغله صارت صدگ حتى تسوين بروحچ هيچ

تبارك.. واني انتظر الفاس يوگع بالراس يلا اصحى
مياس وحق الله دا اموت ومحد حاس بيه

مياس.. لا حبي اني حاسه بيچ لذالك خابرتچ حتى اگلچ اخبار حلوه تفرحچ وتزيل كل التعب عنچ

تبارك.. يا الله بشري

مياس.. يوسف بطل يخطبچ

تبارك.. الله عليچ
تحچين صدگ مياس لو بس تردين تهديني

مياس.. وداعة نونه صدگ

تبارك.. يا عمري انتي
اروحلچ فدوه على هالخبر الحلو

مياس.. اسم الله عليچ حبي
وبعد اكو بشاره احلى منها بألف مره

تبارك.. شنو هي ؟!!

مياس.. جهاد راح يتقدملچ نهاية هذا الاسبوع
سكتت ولا انطت اي رد فعل : تبارك
الوووو
تبارك انتي ويايه

فجأه انسد الخط : دخيلك ربي بس لا صار بالبنيه شي من الفرحه

رجعت خابرتها ما ردت .. ظليت اتصل بيها لحد ما مليت
گمت طفيت الضوه
هستوني دا انام اتصلت بيه

مياس.. هاي وينچ يمعوده

تبارك.. اغمى عليه والقرأن

مياس.. ههههه زين ما نجلطتي من الفرحه

تبارك.. مياس عليچ الله احچي الصدگ

مياس.. وداعة عيونچ الحلوه شهم راح يجي يفتح الموضوع ويا ابوچ بهاي الايام

تبارك.. ما اصدگ والله ما اصدگ
احچيلي شصار
شلون اقتنع جهاد وشلون بطل يوسف ترى انسطر راسي من الصدمه

مياس.. ههههه
كل ما بالموضوع شهم عرف بمشاعرچ اتجاه جهاد مني
وهو حل كل السالفه بنص نهار بس

تبارك.. شگد فشله منه

مياس.. فشله مو فشله المهم الچ الصافي يعني بين قوسين جهاد

تبارك.. يمه اروح فدوه الطوله الحلو

مياس.. ههههه على كيفچ ويا روحچ حياتي
مو زين عليچ الحب الزايد ترى يوجع الگلب بأقل موقف

تبارك.. فدوه اله كل الوجع

مياس.. هههه عمري الله يسعدكم ان شاء الله
ثنينكم تستاهلون
ولچ توته يعني راح تجين يمي يا سلام

تبارك.. اي وهذا احلى شي من بعد زواجي من جهاد

مياس.. لا ومو بس هيچ
الكل هنا يحبچ منال وخالتي وحتى سمر

تبارك.. نسيتي رنا

مياس.. هههه لا هاي عاد متحب إلا روحها وبس

تبارك.. صح لسانچ ... وصفگت

مياس.. ههههه شخطتي حبي

تبارك.. ولچ ما ظل عقل براسي بعد هالخبر
يعني صدگ جهاد راح يخطبني الله عليچ

مياس.. اگلچ حبي بين متخلصين صدمتچ اروح اخذلي كسره وارجع لأن راسي انسطر من موضوعكم

تبارك.. على هالحاله راح تنامين فد عشر سنوات ليگدام

مياس.. على شنو تصحين بعد
ظلي مصدومه طول العمر احسن

تبارك.. ههههه هو هم هيچ
لا حبي صدگ روحي نامي وارتاحي الله يساعدچ فوگ تعب نونه اجيت اني ازودها عليچ

مياس.. فدوه الچ عمري
اهم شي انتي بخير واطمأنيت عليچ

تبارك.. بعد هالخبر اني طايره بالسما مو بس بخير

مياس.. هههه الله يجعلچ دوم

تبارك.. شكرا حبي
يلا تصبحين على خير
والله عليج شيصير تعالي گليلي لأن راح اظل افكر منا لما تصير السالفه صدگ

مياس.. هههه تتدللين

سديت الخط ونمت بسرعه من التعب
مر الاسبوع على خير وراح شهم خطب تبارك من ابوها والحمد لله وافق بعد معاناة حسب ما فهمت من منال والحجيه

صارت المشيه وبعد يومين عقدوا سكته علمود نهى الله يرحمها
اما الزواج فتفقوا بعد السنه يسوو

مرت الايام هادئه ما بيها غير التفكير الياكلني يوم بعد يوم واني خايفه ليكون شهم متزوج وعنده اطفال مثل ما گلبي حاسني

وبعد شهرين التحق شهم بس هالمره الوضع اختلف عن كل مرات التحاقه لأن حسيت بفراغ چبير من بعد ما راح وعافني

ظليت اعد الايام لرجعته وچان الشي الوحيد المصبرني هو نونه الاشوفه بيها كلما اعاين لعيونها او احضنها

تأخر اكثر من ٣ اشهر بس ظل يتصل كل يومين خمس دقايق ويروح
فد مره چنت نايمه حسيت بالسبعه على صوت نونه تبچي

گعدت سويتلها ممه وحاولت وياها بلكي ترجع تنام بس ماكو عاندت

استسلمت وگمت غسلت رغم چان النوم بعيوني لدرجة احس راسي يريد ينفجر من السهر طول الليل

خليتها بالحجله وگعدت العب وياها واتصفح الفيس بملل

دخلت على صفحة شهم اگلب بصوره والخنگه بصدري : شوكت گلبك يحن وترجعلي مو والله اشتاقيتلك كلش

سمعت الباب يندگ بس چان عقلي فاصل .. حسيت على اخير دگه قويه كلش
تصورتها منال فصحت : ادخلي منال گاعده اني

شهم.. فتح الباب : لعد وين چنتي اذا گاعده
صارلي ساعه ادگ بالباب

دخل النونه ع السريع شالها يضحك ويبوس بيها حيل .. وگفت على حيلي فاتحه عيوني من الصدمه لأن ممصدگه دا اشوفه گدامي

شهم.. دار وجها عليه مبتسم : شلونچ

مياس.. الحمد لله
اشتاقينالك كلش

شهم.. واني هم اشتاقيتلكم
تعالي اخذيها مني خلي اسلم على اهلي واغير ملابسي بعدين ارجعلها

تقربت علي بس عيني ما نزلت عنه
دا اخذ نونه طخت ايدي بأيده رجف گلبي من الموقف

اخذتها ع السريع ودرت وجهي حتى لا انفضح
حسيت علي طلع .. خليتها بالحجله وطلعت ورى بسرعه

گعدوا كلهم على صوت الحجيه فرحانه بي .. ظلوا بالنص ساعه يسلمون عليه ويسولفون ويا لحد ما عافهم وصعد يبدل

رحت للمطبخ اجهز الريوگ دا اشتغل اجتني منال تركض

منال.. مياس
مياس

مياس.. ها ها شبيچ

منال.. تركي كلشي من ايدچ وصعدي الشهم

مياس.. يااااااااا

منال.. وجعا

مياس.. شعندي صاعدتله يمعوده

منال.. جهزيله الحمام يغسل
طلعيله ملابسه
اسألي شمحتاج
لو اظل اعلم بيچ اني

مياس.. والله استحي

منال.. امشي ولچ لتزهگيني

عفتها وصعدت فوگ .. وگفت بالباب خجلانه اطب
تشجعت ودگيتها مرتين يلا گال : تفضل
دخلت لگيته ديجهز ملابسه

مياس.. تريد تغسل لو بعد الريوگ

شهم.. لا هسه اغسل

مياس.. لعد اترك عنك .. اني اجهزلك كلشي

شهم.. لتزحمين نفسچ اني..

مياس.. قاطعته بسرعه : انت تعبان
اگعد ارتاح بين ما احظرلك الحمام تغسل 

ما حچه شي وگعد ع الچربايه .. طلعتله الملابس اخذتهن للحمام وراح يغسل

فرغت جنطته من الملابس ونزلتهن للحمام الجوه حتى اغسلهن
نص ساعه ونزل تريگنه سويه وظل گاعد يم نونه والحجيه للظهر تغده وصعد ينام

للمغرب وهو ما نازل من فوگ
وگفت اصلي بالصاله هستوني مخلصه سمعته يصيح : چاي بسرعه

منال.. گومي ودي چاي الرجلچ

الحجيه.. شناويه منال

منال.. طلعي انتي منها يمه

الحجيه.. يمصخمه عوفي اخوچ بحاله لتلعبين باعصابه البي كافي

منال.. وشمسويه قابل
ترى افتهمتي السالفه غلط كل ما بالموضوع ما بيه حيل اخدمه ومرته موجوده

الحجيه.. اي صدگتچ

عفتهن يحجن ورحت سويت الچاي
صعدت فوگ شفت الباب مفتوحه .. سمعته ديحچي بالتلفون
باوعتله داير ظهره ممنتبه الجيتي

شهم.. شهرين ان شاء الله بين ما اكمل الاجرائات
جيكي تاريخ جوازه خاف ساقط لتوازيها ويا سفرنه
عموما نص ساعه واجيكم

دخلت ع السريع حس عليه : يلا صار لازم اروح مع السلامه

مياس.. شنو راح تطلع

شهم.. اي

مياس.. اليوم اجيت اگعد ارتاح شويه

شهم.. ضروري اطلع عندي شغله مهمه

مياس.. تفضل الچاي

شهم.. شكرا
اگول ملابسي وين

مياس.. جوه هسه راح اغسلهن الك

شهم.. عاشت ايدچ

عفته ونزلت بس احس روحي دتطلع من القهر : يا ربي اريد اعرف هاي منو وشعنده وياها مو راح اطگ واموت بمكاني 

رحت خليت الملابس بالغساله ورجعت للصاله
شويه ونزل مبدل ديطلع

تقرب مني دنگ يبوس نونه
اشتميت عطره ضجت كلش : لو ادري ليش هالگد يحط عطر چان ارتاحيت

سلم وطلع
ظليت افور مثل البركان بس ما حچيت المنال لأن الكلام بهذا الموضوع لا يقدم ولا يأخر
الحل الوحيد شهم يحچي ماكو غير حل

تأخر بالرجعه لل١٢ تقريبا
چنت گاعده بالغرفه اگلب بجهازي سمعت الباب انفتح
طلعتله ع السريع

مياس.. ها شهم

شهم.. شو گاعده

مياس.. دا انتظرك
ليش تأخرت ظل بالي يمك

شهم.. مو گتلچ عندي شغله مهمه

مياس.. هاااا

شهم.. نايمه نونه

مياس.. اي نامت من زمان
متعشي لو اسويلك عشه

شهم.. لا متعشي
شكرا

مياس.. تصبح على خير

شهم.. وانت بخير

دخلت للغرفه بس بعد ما احس براسي من العصبيه : منو هاي يا ربي منو هاااااي ؟!!

ومرت الايام بلا ما احصل جواب لكل تساؤلاتي

صارت السنه مالت نهى الله يرحمها
الكل راح للوادي إلا اني ما گدرت بسبب نونه فظليت بالبيت بس جهاد جابلي تبارك لان شهم طلب منه هالشي

صارت السبعه بلليل وهم ما جايين .. ظل بالي تأخروا كلش

خابرت شهم اكثر من مره مغلق
طلبت من تبارك تخابر جهاد نفس الشي هم طلع مغلق

ظلينه نلوب اني وتبارك
گمت افتر على روحي
اروح واجي من القلق وادعي كون ما صاير وياهم شي

فجأه سمعت جهازي يدگ
باوعت رقم غريب

شلته ع السريع رغم اني ما اجاوب الارقام الغريبه بس مدري ليش گلبي چان يفور كلش

اول ما خليته على اذني انصدمت لمن سمعت....

يتبع..