رواية مياس قلب الشهم الفصل الثامن والثلاثون 38 - بقلم لبنى الموسوي

#مياس_قلب_الشهم

للكاتبه #لبنى_الموسوي

تنويه / البارت اليوم قصير لذالك تقبلوا مثل ما هو لأن حالتي الصحيه جدا تعبانه بس ما هان عليه اخليكم تنتظرون
وللعلم قفلت بقفله بسيطه حتى تجرون نفس من التفكير

لمن سألت مياس عن وضع سمر ونكرت كلشي صرت متأكد اكو ان بالموضوع واصريت اعرفها اليوم قبل باچر

رجعت للصاله گعدت وياهم بس بالي مو يمهم افكر شلون راح اعرف بوجع سمر
وشلون راح اگدر اوصل للسبب الخلاها تسوي بروحها هيچ

اجت مياس قدمت الچاي وسألت عن جهاد ولمن عرفته مموجود يمنه راحت توديلهيا لغرفته

ظلت عيني تراقبها ما اعرف ليش
شفتها دخلت وتأخرت يمه .. شويه وانسدت الباب عليهم

تخبلت من الشي الصار گدامي .. گمت ع السريع فتحت الباب عليهم بعصبيه
صفنوا بوجهي ثنينهم .. خزرت مياس واشرتلها بأيدي تجي يمي

جهاد.. خالي بس اسمعني

شهم.. اش ولا كلمه

جهاد.. خالو صدگ

شهم.. جهااااااد

اول ما دخل علينه صار جسمي كله يرجف واني اشوف اعصابه بعيونه .. حاول جهاد ويا بس ما انطا مجال يحچي

اشرلي مرتين بأيده
من الخوف رجلي بعد متعيني اوصل يمه .. جرني من ايدي حيل لزمه جهاد حتى يمنعه تفاجأت بشهم من دفعه حيل

شهم.. لتتدخل جهاد
مشكلتي وياها مو وياك لذالك احسن الك والها تطلع من الموضوع

جهاد.. اترجاك خالو بس اسمعني
معقوله تشك بيها ؟!!

شهم.. ههههه اشك بيها !!!
ولك انت زعطوط لو شنو بالضبط ؟؟

رايح اني بس دير بالك تحچي لاحد عن الشي الصار هسه لأن راح تشوف مني الميعجبك تشوفه

جهاد.. ماشي مراح احچي شي
بس الله يخليك لتأذيها اسمع منها اول وبعدين تصرف باليعجبك مثل ما تسوي دائماً

دار وجها عليه : مياس احچيله الموضوع الحچيتي الي حتى يفهم السالفه لتظلين ساكته تسمعيني

هزيتله راسي وطلعت من يمهم
رحت الغرفتي شفت اخواني بعدهم يلعبون
انفتحت الباب .. طب شهم باوعلهم وگال :

شهم.. امشي الغرفتي بسرعه

مياس.. ليش ؟
خل نحچي هنا

شهم.. رفع حاجبه بعصبيه : گدامييي

فتت من يمه بالگوه لو بيدي ادفن روحي واخلص من هذا الموقف .. صعدت فوگ انتظرته يم الباب بس گلبي ما احس بدگاته بعد

صعد ورايه باوعلي صفح .. فتح الباب ولزمني من ايدي حيل

شهم.. ادخلي خاتون على شنو واگفه بالباب مستحيه مثلاً

ما فهمت قصده بس اكيد حز بداخلي هذا الكلام ... دخلت ودخل ورايه
اخترعت من رگع الباب بقوه

درت وجهي علي حايره شراح اتصرف ويا وشلون اشرحله السالفه .. اقترب مني رجعت ليوره من الخوف لان چان عصبي كلش

شهم.. لزمني من زندي : احچي مياس

مياس.. تلعثمت بسرعه : ش ااا شنو ؟؟
شحچي ؟؟

شهم.. كلشي
كل المواضيع الضامتهن عليه

مياس.. اني رحت الجهاد بس حتى اگله...

صدمني من جر ايدي وسحبني علي حيل .. عاين بعيوني وهو صاك على سنونه بعصبيه

شهم.. شلون تدخلين الغرفته وتسدون عليكم الباب ؟!!
شلون حاچينييييي

مياس . بكل ثول جاوبته : شكو بيها مو هسه احنه وحدنه بالغرفه وسادين علينه الباب

شهم.. لا يا الله
لا يالكعبه
ادگ على راسي هسه لو شسوي بالضبط
ولچ اني رجلچ .. رجلچ يالثووووووله

مياس.. على كيفك عفيه

شهم.. بعدين احاسبچ على هذا الشي
هسه سولفيلي شنو الموضوع الچنتي تحچين بي ويا جهاد

مياس.. علمود سمر
ردته يحسن معاملته وياها لان خطيه تعبت من هذا الوضع وهو ميحس على روحه

شهم.. مو طفل گدامچ حتى تخرطين هالخرط وترديني اصدگ

مياس.. ليش متصدگ يعني

شهم.. فرك وجها حيل : لا اله إلا الله
شلون تخليني هسه افقد اعصابي واطلع ضيم گلبي بيها

مياس.. شهم

شهم.. احچيييييييي

مياس.. ماشي راح احچي والله
بس قبل كلشي توعدني متصير عصبي وتفهم السالفه مثل ما هي

شهم.. اي ميخالف
احچي بسرعه

مياس.. سمر تحب يوسف
ويوسف يحب سمر بس زعلان منها لان صدته بالبدايه
وتبارك هم تحب جهاد بس جهاد ميحبها

صفن بوجهي فاتح عيونه .. باوعتله بخوف : ما اعرف هالصفنه نتيجتها الصدمه لو وراها كارثه چبيره

مياس.. شهم شبيك ؟!!

شهم.. شنو عيدي شبي يوسف ؟

مياس.. يحب سمر
وهي هم تحبه من زمان بس چانت تخاف ترتبط بي لأن يشبهك

شهم.. بيناتهم علاقه يعني ؟؟

مياس.. لا والله لا
اصلاً ما حاچين سوه هي عرفت بمشاعره عن طريق نهى الله يرحمها
بس بعد ما صار الحادث ويا سمر اجه يوسف يحچي وياها بوجودي فعاتبته وگالتله سويت هيچ حتى تنتقم مني لان رفضتك

شهم.. وشجاوبها ؟؟

مياس.. صار عصبي وگلها اني سويت كل هالشي من خوفي وغيرتي عليچ بس للاسف متستاهلين
لهنا وانتهت وياچ سمر اخذي راحتچ بعد

شهم.. وهي شسوت ؟؟

مياس.. تندمت لان ضيعته من ايدها
هي اصلا من اول چانت تحبه بس گتلك خافت ترتبط بي بسبب طبعه الصعب نوعاً ما

شهم.. يعني افهم من كلامچ انتحارها چان بسبب خبر خطوبته

مياس.. مو بس علمود خطوبته
معاملتكم الجافه هم سببت الها ضغط نفسي لحد ما وصلت لهل مرحله واجه يوسف كملها بهذا الخبر

شهم..تنهد : وتبارك شبيها

مياس.. تحب جهاد

شهم.. من شوكت

مياس.. مثل سمر فتحت عينها على حبه

شهم.. وهو

مياس.. حسب ما افتهمت ميحبها ولا يحس بيها حتى

شهم.. يعني رحتي الغرفته علمود تحچين ويا بهذا الموضوع

مياس.. لا رحت اوديله الچاي بس من شفته گدامي ما اعرف شلون تجرأت وفتحت ويا موضوع تبارك

گلت يجوز لو احچي ويا يتصرف ويمنع يوسف يخطبها من ابوها لأن لو صار هالشي الكل راح يتأذه بنفس الوقت
سمر ويوسف وتبارك

شهم.. يعني تفضلين تحچين ويا جهاد على انچ تجين وتگليلي بهذا الموضوع ؟!!

مياس.. خفت منك لا تفهم السالفه غلط
بعدين اني ما گلت الجهاد على سالفة سمر ويوسف

شهم.. لعد شگتيله ؟؟

مياس.. بس گتله لتخلي يوسف يخطب تبارك لأن تحبك ومتريد تتزوج واحد غيرك

شهم.. فرك وجها وجر حسره قويه : وتالي وياچ مياس
لشوكت تظلين تدخلين روحچ بالمصايب واني اركض وراچ حتى اطلعچ منها

بعدين تعالي گليلي اني شموصيچ ؟؟

مو حذرتچ اذا ضميتي عليه شي راح اخرب وياچ

ليش صافنه احچي .. گتلچ لو لاااااااا ؟؟

مياس.. نزيت من مكاني : اي گتلي

شهم.. لعد شنو معنى تصرفچ هذا

مياس.. العفو مچان قصدي

شهم.. مچان قصدچ مووو
بسيطه مياس بسيطه

حچه هيچ وخله ونزل .. ركضت ورى ع السريع لأن خفت من ردة فعله ليروح يأذي سمر

شفته گاعد بالصاله يم يوسف .. استغربت كلش

ظليت فاتحه حلگي علي مصدومه من الموقف : يربي والله راح اتخبل
شنو تركيبة هذا الرجال بس اريد افهم

اخذت نونه من منال ورحت الغرفتي .. نومتها وگعدت العب اخواني منا ل٣ الظهر دگ جهازي ابويه

لبست حجابي واخذتهم اطلعهم اله .. فتت بالصاله صاحني شهم من بعيد وگام باتجاهي

شهم.. وين

مياس.. ابويه اجه ع الجهال

شهم.. واني شنو هنا !!
روحي الغرفتچ اني اخذهم اله

مياس.. اي ماشي

رجعت لغرفتي نمت ساعتين تقريبا .. گعدت على صوت نونه تبچي
گمت غيرت الها وطلعت للصاله محد چان بس الحجيه ومنال

مياس.. السلام عليكم

منال.. عليكم السلام حبيبتي

مياس.. شلون صارت سمر شفتيها لو لا

منال.. زينه بس بعدها نايمه من المهدئات

مياس.. اي احسن خلي ترتاح اعصابها شويه
اگول شهم طلع ؟؟

منال.. لا بعده
بس ايهاب وجهاد طلعوا قبل نص ساعه
ذبي حجابچ .. واشرتلي بحواجبها

الحجيه.. انطيني نهاوي وروحي سويلي چاي راسي يوجعني

مياس.. صار خاله

خليت نونه يمهم ورحت للمطبخ .. ذبيت حجابي وخليت القوري ع النار
ظليت افكر بكلشي صار لحد ما حسيت ع الچاي ديفور واني ممنتبهه

انتظرته يتهدر شويه وصبيتلهم .. صعدت فوگ اودي الشهم وگفت يم الباب متردده اطب بلا حجاب لأن بعدني ممتعوده

خليت ايدي ادگها سمعت صوته ديحچي بالموبايل .. ما ادري ليش گلبي لعب
قربت اذني اتسمع علي

شهم.. ميخالف اني اجيبلچيا واذا ما گدرت ادزه بيد يوسف
اي ديري بالچ علي البرد مو زين على صدره دفي زين
ان شاء الله

فارت اعصابي من عرفته ديحچي وياها وما گدرت اسيطر على نفسي بعد

فتحت الباب بلا ما ادگها .. صفن بوجهي متفاجأ شويه وگال : يلا صار لازم اسد الخط
مع السلامه

مياس.. جبتلك الچاي

شهم.. شكرا

اخذه مني بلا ميباوع عليه .. ضجت كلش بس ما گدرت احچي شي حتى لا تنفضح مشاعري

نزلت للصاله گعدت وياهم بس داخلي صاير نار
خليت نونه بحضني ودرت وجهي للتلفزيون صافنه علي وافكر بالشي الصار

سمعت خطوات شهم ع الدرج .. باوعتله كاشخ على سنگة عشره
تقرب من نونه دنگ يبوسها شميت عطره لو اني فرت

حچيت بداخلي : اي عيني ليش لا اكشخ واسبح بالعطر حتى تروح تقابل حبيبة الگلب

شهم.. تردون شي

الحجيه.. وين رايح يمه

شهم.. عندي شغل يوم
ليش محتاجه شي ؟؟

الحجيه.. لا وليدي سلامتك
الله وياك

طلع من يمنه گمت ورى بسرعه .. انطيت نونه للحجيه ولحگته قبل ليطلع

مياس.. شهم

شهم.. نعم

مياس.. وين رايح

شهم.. ليش تسألين !!!

مياس.. يعني اقصد تتأخر لو لا

شهم.. هم ليش ؟؟

صفنت بوجها ما عرفت شجاوب .. هز بيده وعافني وراح
دخلت بوجهي للمطبخ فجأه نزلت دموعي من الخنگه الچنت احس بيها

گعدت ع الميز اكل بنفسي وافكر : شلون لو طلع متزوج صدگ ؟؟ شسوي بروحي ساعتها
لا اگدر اظل هنا على هالحاله ولا اگدر اعوف نونه وارجع الاهلي

منال.. ها مياس وين صافنه

مياس.. لا هيچ

منال.. احچي شكو
من صعدتي الشهم ونزلتي وضعچ صار مو تمام

مياس.. ما ادري شلون اشرحلچ الموضوع لان متأكده راح تنصدمين مثلي

منال.. احچي ولچ خوفتيني كلش

سولفتلها كلشي صار من يوم النام شهم يمي بالغرفه لحد قبل شويه لمن صعدت وديتله الچاي وسمعته يحچي وياها

منال.. لا مياس لا
مستحيل شهم يسويها ونهى عايشه

مياس.. لعد هذا الحچيته الچ شنو تفسيره ؟؟

منال.. ما اعرف بس رغم كلشي ما اصدگ شهم يتزوج ويخلف واحنه مندري
ولچ انتي خو شفتي بعينچ شلون چان يحب مرته ويريد خاطرها

مياس.. انتي گلتيها
يريد خاطرها...
يعني يجوز ما اعلن زواجه علمود لا يأذيها ويجرح مشاعرها

منال.. وليش ما اعلن عنه بعد موتها

مياس.. ما ادري والله

منال..باوعيني مياس
ادري شهم حقه يتزوج ومن زمان هم

وادري بي ماكو بطيبته وشهامته وحنية گلبه لذالك الف وحده تحاول تكسبه وتحرك مشاعره الها

بس رغم كلشي ما ادري ليش مدا اصدگ يسويها .. عموما هسه من يرجع راح افتهم من السالفه

مياس.. لا الله عليچ
ما اريده يعرف اني گتلچ حتى لا انفضح گدامه

منال.. هاي شبيچ ؟!
قابل راح اگله مياس گالتلي

مياس.. لعد شلون تفتهمين

منال.. يجي وتشوفين
سكتت شويه : اگول عيني لهل درجه تحبين اخويه واني ما ادري

مياس.. لا شنو احبه

منال.. لعد ليش چنتي تبچين ؟؟ غير خفتي لا يطلع متزوج وعنده ولد

مياس.. اف منال
اني نفسي ما ادري شدا احس لدرجة تعبت من الافكار الغريبه التوديني وتجيبني

منال.. والله كله من ايدچ
انتي فاهيه وما بيج حظ غيرچ وحده من زمان كسبته وحركت مشاعره

مياس.. شسوي متگليلي اذا هو اخوچ مينعرف ساسه من راسه
خو اذا طلع متزوج صدگ .. انسحب من حياته بلا تفكير

منال.. شو دسكتي
تنسحب
مو هي بكيفچ

مياس.. لعد شنو تردين قابل

منال.. قاطعتني : اسكتي كافي
گومي نكمل الشغل راح يصير الغروب

مياس.. وين رنا لعد

منال.. طلعت ويا ايهاب

خلص الوقت بين الشغل والصلاه وبين نونه لحد ما صارت العشره ونص

اجو شهم وجهاد سويه .. صعد بدل شويه ونزل
گعدنه بالصاله بس شنو اريد انفجر كلما اتخيله چان يمها

اجت منال وياها سمر
فرحت كلش من شفتها كبالي .. گمت ع السريع اخذتها من ايدها وگعدتها بصفي

شهم.. شلون صرتي خالو

سمر.. الحمد لله زينه

جهاد.. اكلتي شي

مياس.. اي اني عشيتها ليظل بالك

منال.. اگول شهم عرفت بالصار

شهم.. لا
خير ان شاء الله

منال.. مو جيرانه ابو فلاح طلع متزوج على مرته وعنده ولد بس محد يدري حتى اهله

شهم.. عاينلها صفح : شلچ بالقال والقيل منال
اول تالي

منال.. ما بيها شي خويه دنسولف شويه

شهم.. وما لگيتي سوالف غير النميمه ع العالم

منال.. ههههه هاي متعتبر نميمه
الناس كلها عرفت ودتحجي بالسالفه ظلت علينه

شهم.. واحنه شعلينه بالناس

منال.. لا صدك اريد رأيك
شتگول تصرفه صح لان ضم على اهله ومرته هاي السالفه

شهم.. لا طبعا
چان المفروض يفاتح مرته بالموضوع قبل لا يتزوج مهما كانت الظروف لان هذا ابسط حق الها ان تعرف بزواجه

منال.. اي مثل رأيي والله

شهم.. ديلا سدي الموضوع وبعد لتتدخلين بالعالم
نارهم تاكل حطبهم احنه شكو بيهم

منال.. هههه ان شاء الله

صفنت على كلامه : شفهم منه هسه اني

درت وجهي على منال تباوعلي وتضحك عرفتها تأكدت منه ممتزوج .. ظليت حايره اريد بس افسر السالفه بدماغي ماكو

گام شهم اخذ نونه يلعب وياها .. شويه وصاح جهاد
اخذه وراحوا لغرفته نص ساعه يلا رجعوا

شهم.. حجيه جيبي البشاره

الحجيه.. خير يمه

شهم.. جهاد راح يخطب تبارك...

يتبع..