للكاتبه
التنشف دموعة اعلة خدة وگاعد مگابـــل صـــــوركم ينتركـ !! 💔
__________________
نهى.. ها حبيبي
شهم.. تعالي الحضني
نهى.. اجت حضنتني : خير شهم خو ماكو شي
شهم.. تعرفين شگد احبچ لو لا
نهى.. اي اعرف
شهم.. وتدرين كلش زين ما اشوف مره الي غيرچ بكل الكون
نهى.. خوفتني شهم .. شنو معنى هالكلام !!
شهم.. اكو امانه من مهيب الي ولازم انفذها
نهى.. وشنو هي ؟!!
شهم.. اتزوج مياس
هو اني گلت هيچ .. فتحت عيونها وما اشوفها إلا تكومت من طولها بالگاع
تخبلت من شفتها بهل منظر گدامي .. شلتها ع السريع خليتها ع الچربايه وحطيت ايدي على خشمها حتى اصحيها
عاينت عليها بدت تصحى .. جريت نفس : الحمد لله والشكر .. رحت للميز جبتلها علاجها وانطيتهيا
فجأه فتحت عيونها عليه الظاهر تذكرت الشي الصار .. صفنت بوجهي ثواني وگامت تشهگ
شهم.. حضنتها بسرعه : يا عمري كافي
انطيني مجال خل افهمچ
نهى.. دفعتني حيل : وخر لتلزمني بعد
شهم.. ماشي ،، هاي وخرت بس اهدي
نهى.. شنو هذا الكلام السمعته منك !!
شهم.. مو مني
هذا كلام مهيب الله يرحمه
نهى.. لتتحجج باخوك
انت تريد تتزوج لان مليت من وضعي ولگيت هالسالفه حجه الك
شهم.. خو انعم الله عليچ
نهى.. لتحچي ببرود
تسمعني لو لا
لتحچي ببروووووووود
شهم.. هاي شبيچ لتصيحين ليسمعوچ اهلي
نهى.. خلي يسمعون
اصلا اني نازله انطيهم خبر بالمهزله التريد تسويها حضرتك
شهم.. لزمتها من ايدها : لتشلعين گلبي البيه مكفيني
اگعدي خل نتفاهم احسن الي والچ
نهى.. ههههههه
نتفاهم !!! لا الله عليك
جاي تگلي اريد اتزوج مرت اخويه وتريد نتفاهم ،،، صدگ چذب
شهم.. نهى تخليني الغي لو لا
نهى.. لزمت ايدي ودموعها تجري : شهم شوف اعرف انت تعبت .. وبنفس الوقت اعرف من حقك تتزوج ويصير عندك جهال حتى تعيش حياتك حالك حال كل الناس
صدگني حاسه بيك والله حاسه
ماشي اني راح اضغط على نفسي واخطبلك من عين باچر بس مو مياس .. فدوه شهم اختار اي وحده بس لا مياس
شهم.. نهى
نهى.. عفيه لتذبحني
شهم.. بس خلي احچي
انطيني فرصه افهمچ مو تعبتيني
نهى.. ماكو تفاهم بهل موضوع ....
شهم مياس مثل اختي تريد تموتني بيها
ليش ولك ليش
شهم.. نهى حياتي اهدي شويه ،،، بس اهدي حتى اگدر اتناقش وياچ ...
شو عاينيلي ،، مسحت دموعها بيدي وظليت لازم وجهه
اني ما مليت منچ ولا ضايج من الوضع الاحنه بي .. الله وحده يعلم شگد احبچ وجودچ بحياتي وحده يغنيني عن كلشي حتى عن الاطفال الدتحچين عليهم هسه
كل الموضوع اني مجبوره اتزوج مياس حتى احميها مثل ما طلب مهيب بوصيته
زواجي منها زواج شكلي ع الورق وبس .. لتتصورين تحلى بعيني مره غيرچ بلأخص مياس الاعتبرها مثل بنتي وانتي تعرفين هالشي كلش زين
نهى.. حچي شهم
بس تتزوجها متشوف نفسك إلا بديت تتعلق بيها واحتمال حتى تحبها خصوصا بهذا وضعك
شهم.. هههههه ولچ بابا حب شنو تحچين من كل عقلچ !! مياس مثل بنتي ما اگدر اعاينلها بغير نظره
نهى.. من تتزوجها كلشي يتغير
شهم.. لا اله إلا الله
شنو ما عندچ ثقه بيه ؟؟ ليش تحچين وكأنچ متعرفيني .. ليش نهى ليش
نهى.. صاحت بعصبيه : لأن احبك واحبها وما اريد اخسر اي واحد بيكم
اني متأكده اذا تزوجتها راح ينتهي كلشي
زواجنا
حبنا البعض
صداقتي وياها
وحتى اني انتهي واموت
شهم.. گمت من مكاني ونترت بيها : هسه اني شسوي بس فهميني
اخلي براسي طلقه حتى ارتاح واريحكم ويايه
نهى.. لا اضربني الي حتى ترحمني من هالعذاب .. وگامت تشهگت بحرگه
شهم.. كافي نهى مو گلبچ راح يوگف
مديت ايدي بجيبي طلعت الوصيه : هاچ الزمي .. مو دا احچي وياچ ارفعي راسچ
نهى.. شتريد
شهم.. اخذي
نهى.. شنو هاي ؟!!
شهم.. وصية ابن خالتچ التحبي وتعبتي بسبب استشهاده
اقريها وشوفي تتحملين الكلام مالته .. بلكت الله يهديچ وتحسين بيه لأن راح اموت من كل الديصير
مدت ايدها .. اخذتها تقره ودموعها تجري
خفت عليها كلش لا يصيرلها شي بسبب القهر سحبتها منها ع السريع
نهى.. هاي ليش !!
شهم.. كافي بچي حياتي .. مو زين عليچ لتتخربطين
نهى.. ليش سوه مهيب هالشكل ؟؟
شفته شلون گايلك ادري راح اكسر نهى بهل قرار .. اذا يدري ليش كسرني لعد !!!
شهم.. نهى حياتي .. حاولي تهدين حتى تستوعبين الموضوع
مهيب حچه هيچ لأن رادني اتزوج مياس زواج كامل بس اني مراح انفذ هالشي
زواجي من مياس سببه الاول والاخير بس حتى احميها من عماد وسميحه لا غير
نهى.. اطلع من الغرفه شهم
شهم.. صدگ تحچين ؟!!!
نهى.. اي والله اطلع .. اريد اظل وحدي رجائاً
شهم.. ماشي مثل متحبين بس اترجاچ بلا بچي
اگعدي ويا نفسچ وفكري زين واتمنى تتركين عنچ الانانيه ومتفكرين بس بنفسچ
مهيب
مياس
اني
كلنه نستحق تنطينه جزء من تفكيرج علمود متظلمين اي احد بينه
والاهم من كل هذا اريدچ تكونين واثقه مني ومن حبي الچ بلكت الله ساعتها تحسين بيه وبالحمل الثگيل الشايله على ظهري
سحبت موبايلي ونزلت للأستقبال انام .. تمددت فكري كله يم نهى ادري بيها مراح تنام للصبح واذا ظلت بهل شكل يصيرلها شي لا سامح الله
شغلت الواي فاي .. فتحت الوتساب وراسلت مياس
شهم.. گاعده ؟؟
بعد ما راحت نهى من يمي ظليت ابچي بالثلث ساعه اعاين لصورة مهيب واعاتبه على روحته لحد ما فرغت گلبي وهدأت .. غسلت ورجعت للكتب اكمل الشرح وحدي لأن التهوا عني ثنينهم بسبب الصار
سمعت موبايلي دگ رساله .. سحبته شفت شهم مراسلني يسأل گاعده
استغربت وخفت بنفس الوقت ليكون صاير شي .. جاوبته ع السريع
مياس.. اي گاعده
شهم.. حچيت ويا نهى
مياس.. اي
شهم.. اصعديلها لان ظلت وحدها
حاولي تهديها واحچي وياها نفس الكلام الگلته الچ بلكت ترتاح وتبطل بچي
مياس.. مو اخاف متقبل تحچي ويايه
شهم.. لازم تصعديلها مياس
اذا ظلت على هالحاله تتخربط وتروح بيها
مياس.. اي ماشي هسه اصعد
شهم.. شكرا بابا
مياس.. العفو
سديت الموبايل وگمت لبست حجابي .. صعدت فوگ دگيت الباب مرتين ما ردت ظل بالي كلش
فتحت الباب لگيتها گاعده ع الچربايه حاضنه نفسها بأيدها وتبچي بحرگه .. متت من القهر عليها
رفعت راسها بس شافتني استغربت .. مسحت دموعها وگامت باتجاهي
نهى.. شنو عرفتي ؟؟
مياس.. دنگت : اي عرفت
نهى.. شوكت ؟؟
مياس.. بعد ما اجه ابويه
نهى.. وشنو رأيچ بالموضوع ؟!!
مياس.. شوفي نهى ....
والله العظيم مجبوره اوافق لان مهيب
نهى.. رفعت ايدها : كافي لتكملين
مياس.. بس لازم تسمعيني
نهى.. ما اريد اسمعچ وياريت تطلعين من الغرفه .. اريد اظل وحدي رجائاً
مياس.. نهى عفيه اسمعيني
نهى.. نترت حيل : اطلعي بره
مياس.. فدوه نهى لتحاربيني .. تدرين بيه شگد احبچ وما عندي غيرچ بهالدنيا الصعبه
نهى.. هه احاربچ ؟!!
مياس.. خليچ متأكده مو مياس التغدر اختها
من يوم ما اجيت لهذا البيت وانتي بالنسبه الي اخت واكثر
اما شهم فـ بمقام ابويه من قبل لا اتزوج مهيب حتى
نهى.. گلتيلي ابوچ ؟؟
زين اريد اعرف اكو بنيه تتزوج ابوها ؟!!
جاوبي ليش ساكته
مياس.. دنگت منها : زواج ع الورق لان مهيب راد هالشي
صدگي هاي الطريقه الوحيده الراح تحميني من سميحه وعماد وانتي تعرفيهم شنو من ثنين نگسين
نهى.. واني
مياس.. شبيچ انتي ؟!!
نهى.. منو الراح يحميني منچ ؟؟!
مياس.. تفاجأت من كلامها : بس نهى اني مستحيل أأذيچ وتعرفين بهل شي كلش زين
نهى.. بعد اليوم كلشي ما اعرف
مياس.. ماشي نهى ... اذا مموافقه مستحيل اقبل بهل زواج حتلو چان هذا اخر طلب المهيب
راح ارفض كلشي لخاطر عيونچ
نهى.. عوفيني وحدي مياس
مياس.. بس
نهى.. اترجاچ اطلعي محتاجه اگعد وحدي لو حرام
مياس.. على راحتچ بس عفيه بداعة امچ لتبچين لأن مو زين عليچ البچي
دارت وجهه بلا متجاوبني .. طلعت وسديت الباب ورايه
رجعت الغرفتي اخذت موبايلي من الميز وراسلت شهم
بعد ما دزيت مياس النهى ظليت انتظر ردها على نار بس اريد اطمأن عليها .. عشر دقايق وراسلتني
مياس.. بعدك گاعد ؟؟
شهم.. اي شصار احچي بسرعه
مياس.. حچيت وياها مثل ما طلبت مني
بلأول ما قبلت تسمعني بس بعدين جبرتها تسمع كلشي
شهم.. وشگالتلچ ؟؟
مياس.. ما گالت شي مهم
بس اني الگلت
شهم.. شنو يعني ؟!! ما فهمت
مياس.. گلتلها اذا متوافقين مستحيل اقبل بهل زواج حتلو چان هذا اخر طلب المهيب
شهم.. من كل عقلچ تحچين ؟!!
مياس.. اي شهم موافقة نهى اهم عندي من اي شي لأن ما اگدر اجرحها او اخذلها
شهم.. بابا تقتنع اذا مو اليوم باچر
ماكو رجعه بعد افهموا هالشي انتي وهي حتى لا تتعبوني وياكم
مياس.. هسه اتركها ترتاح لان تريد تبقى وحدها بس باچر ضروري تحچي وياها مره ثانيه
شهم.. ان شاء الله .. يلا تصبحين على خير
مياس.. وانت بخير
سديت الموبايل وگمت من مكاني .. ردت اصعدلها بس تراجعت
خليها تفكر محتاجه تظل وحدها حتى تفهم الموضوع من زاويه ثانيه غير الدتشوفها هسه
بقيت افكر لحد ما نمت .. گعدت الصبح على صوت المنبه طفيته وگمت اغسل
دا اصعد سمعت احد بالمطبخ .. مديت راسي شفت نهى دتسوي الريوگ
شهم.. صباح الخير
نهى.. صباح النور
شهم.. شلون صرتي ؟
نهى.. الحمد لله
شهم.. رفعت وجهه بيدي : شو عاينيلي
هاي شمسويه بروحچ اني شگلت ؟؟ شلون تالي وياچ بس فهميني
نهى.. اصعد غير ملابسك حتى تتريگ
شهم.. ما اريد
نهى.. ليش ؟؟
شهم.. بدون ليش
صعدت فوگ غيرت ملابسي ع السريع وطلعت من البيت لان اختنگت من هالحاله ،، شغلت السياره وخابرت يوسف
شهم.. صباح الخير
يوسف.. هلا حبيبي صباح الخيرات
شهم.. محتاج اشوفك ضروري
يوسف.. شلون مو عندي دوام ؟؟ .. خليها للعصر اذا تگدر
شهم.. لا هسه يوسف .. اخيك كلش مخنوگ
يوسف.. اسم الله عليك
ظل بالي خو ما صاير وياك شي
شهم.. اشوفك ونسولف
يوسف.. ماشي هسه اخابر الدوام اخذ اجازه واجيك للمعارض
شهم.. لا تعالي المطعم **** عازمك لأن طلعت من البيت بلا ريوگ
يوسف.. باگله ودهن
شهم.. ههههه يمعود شلون تتحملها من الصبح والله ثگيله ع المعده
يوسف.. مثل متتحمل الكرفس
دخيل ربك شلون تجرعه بس ارد افتهم
شهم.. صحه حبيبي صحه .. شفهمك بيها انت
يوسف.. هيچ صحه هم متنراد
شهم.. ههههه ديلا ولك استعجل شويه .. رايح بوجهي للمطعم انتظرك هناك
يوسف.. نص ساعه تلگاني يمك
شهم.. ماشي حبيبي
رحت للمطعم انتظر يوسف وبالي كله يم نهى لأن ادري دتاكل بنفسها هسه .. شويه وحسيت ايد يوسف على چتفي
يوسف.. ما دام بيها صفنه معناها السالفه چبيره
شهم.. هلا حبيبي شلونك
يوسف.. زين بشوفتك .. احچيلي شصاير
شهم.. دگعد خلي نتريگ اول
يوسف.. اي والله كلش جوعان
شهم.. هههه يابه مو تتدلل
اطلب التريده بين ما اخابر جهاد
طلب الريوگ واني خابرت جهاد حتى يطلع للمعارض .. اول ما كملنه سألني :
يوسف.. شصاير احچيلي
شهم.. طلعت الوصيه : هاك اقره
يوسف.. شنو هاي ؟!!
شهم.. اقرها وانت تعرف
اعاين علي اول ما بده يقره بيها وجها نگلب لأن چان يحب مهيب بشكل .. كمل شمرها ع الميز وفرك راسه بأيده
شهم.. اذا انت هيچ صار بيك اني شگول لعد ؟؟
يوسف.. والله ما ادري شهم !!!
تنهد بحسره : زين نهى عرفت ؟
شهم.. اي البارحه
يوسف.. وشگالتلك ؟؟
شهم.. شتگول يعني .. گضتها بچي للصبح وما انطتني فرصه احچي واتفاهم وياها
الله وكيلك حتى طردتني من الغرفه
يوسف.. ههههه ضحكتني واني ضايج
شهم.. دعوف الضحك يمعود
ساعدني شاسوي بهل مصيبه النزلت على راسي فجأه
يوسف.. نفذ الوصيه حبيبي
هاي امانه برگبتك وميصير تتخلى عنها
شهم.. ونهى ؟
يوسف.. عوفها عليه اني احچي وياها
شهم.. اي بشرفك
والله ميهون عليه قهرها .. تعال شوف شصاير بيها بعد ما عرفت الخبر
يوسف.. وانت منو گلك تصخم وجهك وتتزوج
صير مثلي يا اخي حر طليق بلا حب بلا وجع گلب
شيجي من النسوان غير الهم
شهم.. هههه لك مو هاي اختك
يوسف.. حتلو اختي .. مره لو مو مره
شهم.. دحچيلي وياها اخيك بلكت تسمع منك وتقتنع
يوسف.. بسيطه خويه بسيطه
شهم.. يلا صار لازم اروح لان جهاد وحده بالمعرض
يوسف.. الله وياك .. سلملي علي
شهم.. الله يسلمك ،، يوصل ان شاء الله
گعدت الصبح على صوت جهال ايهاب يلعبون بصياح .. عاينت الساعه بثمانيه ونص
گمت غسلت وطلعت للصاله لگيت الكل كاعدين
مياس.. صباح الخير
محد رد بس منال .. عاينت النهى دايره وجهه عني عرفتها ضايجه .. ما ادري هالزعل فتره وينتهي لو راح اخسرها للأبد
رحت للمطبخ .. دا اجهز بالريوگ نزلت دموعي من گد الخنگه البصدري
حسيت احد ورايه درت وجهي شفتها منال
منال.. شبيچ حبي اكو احد مضوجچ
مياس.. لا بس تعبانه
منال.. لعد فوتي اگعدي اني اسويلچ ريوگ
مياس.. شكرا حياتي .. خليني اشتغل حتى التهي هيچ احسن
منال.. على راحتچ .. اگول شبيها نهى وياچ شو ما ردت عليچ
مياس.. ما ادري سأليها
منال.. هههههه
مياس.. شبيچ تضحكين ؟!!
منال.. مو نفس جوابها .. هم گلتلي سألي مياس
مياس.. منو ممتريگ غيري ؟؟
منال.. نهى
مياس.. ماشي لعد راح اسويلها ويايه
سويت الريوگ واخذته للصاله .. خليته ع الميز درت وجهي صحتلها حتى تجي تاكل عاينتلي صفح وگامت لغرفتها
رنا.. هههههه هااااا حتى نهى گلبت عليچ
مو گلت فگر محد صدگني
ما رديت عليها
رجعت الصينيه بالمطبخ ورحت لغرفتي .. طلعت كتبي وگعدت اقره للعصر حتى ما تغديت وياهم
رجعت من الشغل اعاين لنهى گالبه وجهه ومتحچي شي .. للعصر اجه يوسف وانفرد بيها ما اعرف شحچوا بس متأمل يقنعها لان ادري بيها تحبه وتحترمه كلش
ثاني يوم اجه ابو مياس حتى ياخذ جوابها ..
دخلته للاستقبال ورحت دگيت الباب عليها
مياس.. ها شهم
شهم.. ابوچ بلاستقبال
مياس.. ليش ؟؟
شهم.. جاي حتى ياخذ جوابچ لو نسيتي
مياس.. واني شريد اجاوبه ونهى بعدها ماخذه موقف من الموضوع
شهم.. اتركي نهى يمعوده
فوتي گوليله موافقه حتى تفض السالفه ع خير
مياس.. بس شهم
شهم.. كافي لتشلعين گلبي
امشي گدامي يلا
اجت ويايه سلمت على ابوها .. شويه وسألها :
اشرف.. ها بابا شنو جوابچ ؟
مياس.. عاينت على شهم : اي بابا موافقه
اشرف.. بيها الخير ان شاء الله
شهم.. رحم الله والديك
اشرف.. وشوكت ناوي تعقد عليها
شهم.. فد ٦ اشهر واتصور تعرف السبب
اشرف.. اي طبعا
لعد خليها تجي ويايه منا لهذاك الوقت
شهم.. هاي گدامك اسألها اذا تقبل اخذها وروح
اشرف.. ها يابه تجين
مياس.. عاينت الشهم اشرلي بحواجبه افتهمت علي : لا بابا ما اجي
اشرف.. ليش بنتي ؟!!
مياس.. مو دا ادرس خارجي وهنا كلهم يشرحولي
اذا اجيت وياك منو يقريني بعد
شهم.. عوفها ابو مصطفى
ترى البيت بيتها مگاعده يم اغراب
اشرف.. بس صعبه تظل كل هالفتره هنا بلا ميربطها شي بيكم
شهم.. ومنو راح يعرف ؟؟
عموما اي احد يسألك گلهم للسنه مالت رجلها وترجع وان شاء الله قبل السنه اني اعقد عليها
اشرف.. ها مياس
مياس.. اي بابا فدوه خليني هنا
امتحاناتي ما ظللها شي ولازم اجهز الها حتى انجح
اشرف.. ماشي يابه على راحتچ
يلا استأذن
شهم.. بعدك ابو مصطفى ما ضيفناك شي
اشرف.. بيت العامر ان شاء الله
شهم.. رحم الله والديك
طلع ابويه ويا شهم رحت ورى .. وگفت يم الممر انتظره شويه ورجع
شهم.. ها شو واگفه هنا
مياس.. عفيه شهم بعد ما اتحمل زعل نهى اكثر من هالشي
شهم.. هههه يابه والله حتى ويايه مدتحچي
هسه هي بحالة صدمه يجي يوم وتتقبل الموضوع لمن تشوف الحق ويانه بس اصبري
مياس.. شنو اصبر !!
انت تدري النهار كله گاعده بين اربع حياطين لأن محد منهم يرضى يحچي ويايه وكملت السبحه بنهى
شهم.. ليش محد يحچي وياچ ؟!!!
مياس.. تداركت الموقف بسرعه : لا مو قصدي
بس يعني هي صديقتي الوحيده ما ارتاح احچي ويا غيرها بهل بيت وتالي زعلت عليه
راد يحچي شفته رفع راسه وصفن .. درت وجهي لگيت نهى واگفه تعاين علينه بعصبيه : لا يا الله چانت عايزه التمت خرب حظي
نهى.. اسفه اخاف قطعت حديثكم الحلو
شهم.. شنو هالحچي نهى !!
مياس.. عفتهم ورحت الغرفتي ع السريع : خلص مياس اگعدي بالغرفه واسكتي لهنا وكافي بعد چفي الناس شرچ وشر مشاكلچ
مرت اكثر من ٤ اشهر على استشهاد مهيب وماكو شي جديد غير عزلتي البدت تذبحني ع البطيء
حبست نفسي بالغرفه بين كتبي وذكريات زواجي من مهيب المصبرتني على فراگه .. ولو من اختنگ كلشي ميفيد حتى هالذكريات الاحچي عنها
گاعده العصر دا اقره كالعاده سمعت صوت هلاهل بالبيت .. لزمت گلبي لان تذكرت هذاك اليوم المشؤوم وخفت كلش على جهاد
خليت حجابي على راسي وطلعت اركض .. عاينت عليهم فرحانين وديتحاضنون بيناتهم ويصلون على محمد
مياس.. باستغراب : شصار ؟!!
منال.. هلهلي مياس هلهلي
دم رجلچ مراح بالخالي بلاش لا والله فلا راح
مياس.. احچي عفيه شكو ؟؟
منال.. ولچ تحررت جرف الصخر بزود سباعنه
مياس.. نزلت دموعي بحرگه وهلهلت : گلللللللللللللاللللللللللووووش
ركضت على منال حضنتها وشبعنه بچي .. عم الفرح بالبيت بعد ما خيم الحزن على گلوبنه طول الاشهر الفاتت
ثاني يوم الظهر طلعت اتوضى للصلاه سمعت الباب الخارجي انفتح
عاينت من الشباك وانصدمت من شفت جهاد طب .. صحت بكل صوتي
مياس.. منااااااااااااااال
منال.. اجت تركض : ها ها شبيچ
مياس.. عايني منو اجه
بس شافته تخبلت .. فتحت الباب وراحت لحضنه تركض
اعاين عليهم ودموعي تجري .. من جهه فرحانه برجوعه بالسلامه ومن جهه ثانيه مفتقده المهيب چان المفروض يطب ويا هسه
شويه ودخل للبيت حاضن امه .. بس شافني گدامه ابتسملي
جهاد.. شلونچ ؟
مياس.. الف الحمد لله على سلامتك
جهاد.. الله يسلمچ مرت خالي
اخذته من ايده وراحت تركض .. رحت وراهم اعاين لفرحتهم برجعته بحيث احتاروا شيسوون هلاهل على چكليت على صلوات ودموع الفرح بعيون الكل
طب شهم بهلاثناء بس شافه ركض حضنه حيل ..
شهم.. يا هلا بالسبع
يا هلا برجال خاله
جهاد.. شتاقيتلك خالو
شهم.. مو بگدي يبعد خالك وكل هله
الف مبروك انتصاركم يلضباع رفعتوا روسنه ورجعتولنه دم ولدنه
جهاد.. نزلت دموعه : اي خالي دم مهيب وكل الشهداء هو چان السبب بهذا الانتصار
شهم.. مسح عيونه بايده : لتبچي حبيبي
هنيئاً الهم الشهاده وبالعافيه عليكم الانتصار
ظلت دموعي تجري على كلامهم وداخلي الوجع مينوصف واني اتخيل مهيب واگف بيناتنا
وهيچ بدماء شهدائنا وسواعد ابطالنا تحررت جرف الصخر ورجعت الگاع لأصحابها
برجوع جهاد من الحشد گدرنه نتنفس وننسى الخوف شويه .. وبعد ست اشهر ضبط چنت گاعده بالصاله وبيدي الرياضيات حايره بالشرح لا اگدر اروح لنهى لان زعلانه عليه ولا اگدر اخلي شهم يشرحلي لأن اخاف عليها تنقهر
چان شهم دائما يسألني عندچ شي اچذب علي واگله منال دتشرحلي حتى لا انحرج واحرجه ويايه
صفنت ع المسأله ما اعرف منين بدت وشلون انتهت .. سمعت جهاد يسألني
جهاد.. شبيچ صافنه ؟؟
مياس.. هااا لا ماكو شي
جهاد.. عندچ شي ما فاهمته جيبي اشرحه الچ
مياس.. لا كلشي ما عندي
جهاد.. ههههه ممبين والله
مياس.. بصراحه ،،، اي عندي
جهاد.. لعد دنطيني اشرحلچ شنو مستحيه مني
مياس.. تفضل
گعدت بالصاله يشرحلي وعيوني تراقب نهى واني اشوفها شلون تعاين عليه بنظرات غريبه
ساعه تقريباً وكملي جهاد الماده...
جهاد.. ها فهمتي
مياس.. اي
جهاد.. لعد هاچ حلي
طب شهم بهلاثناء سلم وبس عاين علينه ابتسم
شهم.. ايباااااااا ... والله اجه الوكت الاشوف بي جهاد يدرس
جهاد.. ههههه ليش خالو ناقصني شي
عدل ياخته : اصلا اتحده واحد يدرس مثلي
شهم.. هههه واني اشهد
جهاد.. اگول خالي ترى اني خطت وخربطت ويا المسكينه تعال تأكد من صخامي
شهم.. ههههه هااااا شگلنه
جهاد.. هسه عاد لتبلش دخيل ربك
شهم.. شو دوخر خلي اگعد يمها
مياس.. لا ميحتاج كلشي افتهمت
شهم.. هههه ما سمعتي شگال
مياس.. لا صح شرحه اني تأكدت منه
چنت بس اريده يوخر مني علمود نهى بس ما اهتم الكلامي وگعد بصفي .. حسيت عليها رادت تنفجر من القهر وكلش ضجت على حالتها
شهم.. هاي شمسوي ولك هي هيچ السالفه
جهاد.. احلف بالله
شهم.. هههه لا اتشاقه وياك شرحك كله صح بس هاي المسأله بيها غلط
عايني مياس
مياس وين صافنه ؟؟
درت وجهي شفتها تعاين النهى عرفت السالفه : مياس يابه خليچ ويايه شويه
مياس.. اي وياك
گعدت اشرحلها قريب العشر دقايق لحد ما افتهمت .. عاينت الاهلي كلهم مجتمعين صار الوقت حتى انهي هل موضوع وينتهي ويا عذاب نهى
شهم.. اگول يوم
الحجيه.. ها يمه
شهم.. وصلچ خبر بوصية مهيب الله يرحمه
الحجيه.. لا يمه وصية شنو !!!!
شهم.. وصاني اتزوج مياس من بعده واني راح انفذ وصيته لان امانه برگبتي
اعاين عليهم انصدموا وواحد يباوع ع الثاني باستغراب .. همستلي مياس :
مياس.. ليش هيچ شهم عاين النهى شصار بيها
شهم.. اصبري شويه
الحجيه.. يمه شتحچي
هاي مرت اخوك
بعدين نهى ما فكرت بيها ؟
شهم.. حجيه زواج ع الورق بس حتى اخلي اخويه ينام بگبره وهو مرتاح
الحجيه.. شلون يعني ع الورق ؟!!
شهم.. شنو شلون ؟!! ترديني اگعد اشرحلچ هههه
الحجيه.. لا مو قصدي
عاينت النهى : ها يمه شنو رأيچ بكلام رجلچ
نهى.. وافقت ولا ما وافقت هو مقرر وخلص شيفيد الحچي بعد
ابنچ باعني يمه
شهم.. صدگ تحچين ؟!!!
صارلي اشهر اقنع بيچ واعيد وازيد بس حتى لا اجرح مشاعرچ تالي هذا جوابچ !! خلف الله عليچ
نهى.. تعال للغرفه اريد احچي وياك ضروري
صعدت قبلي وظلت امي تلوم بيه علمودها لان تحبها كلش لدرجة تفضلها حتى على ابنها
الحجيه.. لا يمه ممرجيه منك تزعل نهى بهل شكل
شهم.. يمه شبيدي
دا اگلچ هاي وصية ابنچ ترديني اخلفها شلون تقبليها فهميني ؟!!
ايهاب.. حقه يمه اذا موصي لازم ينفذ وصيته لان تظل برگبته طول العمر
الحجيه.. وهاي المسكينه الفوگ !! ما فكرت شراح يصير بيها لمن رجلها يتزوج مرت حماها
شهم.. يمه تعرف من زمان والاهم من هذا تدري بزواجي من مياس ع الورق بس
على شنو مكبرين الموضوع انتي وياها بهل شكل
سمر.. حتلو خالو والله صعبه عليها تتقبل هالشي
جهاد.. رجائاً لحد يعترض
ديگللكم وصية مهيب يتزوجها متفهمون !!
خلوا هو ونهى يحلون السالفه بيناتهم احسن من تدخلكم المالي داعي
عفتهم يتناقشون وصعدت فوگ .. طبيت لگيتها نايمه ع الچربايه تبچي انقهرت عليها كلش
رحت يمها خليت ايدي على راسها حتى اهديها
شهم.. حياتي انتي .. كافي تسوين بروحچ هيچ
وداعة امي زواجي منها شكلي .. متصيرلي مره غيرچ طول ما انتي بگلبي وعلى اسمي
نهى.. مو بيدي شهم والله مو بيدي
اغار عليك لدرجة ما اتحمل اشوف اسمك يقترن باسم مره غيري حتلو بصوره شكليه
شهم.. شسوي بس گوليلي
اتجاهل وصية اخويه واخلي مرته تضيع من بعده يم الناس الما ترحم
نهى.. يعني افهم من كلامك بعدك مصر تتزوجها ؟؟
شهم.. ليش اكو غير حل برأيچ
نهى.. ماشي راح اوافق بس بشرط ....
يتبع...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!