رواية مياس قلب الشهم الفصل الثاني والعشرون 22 - بقلم لبنى الموسوي

#مياس_قلب_الشهم

للكاتبه #لبنى_الموسوي

أمنيتي أعرف سوآد الليل ،
بيمن يقتنع كل يوم ؟ شيگله الفجر ويروح ..؟
أريد أطرد سوآد الروح 💔

______________

شهم.. وگفت بالدرج صحت بكل صوتي : جهاااااااااااااااااد

جهاد.. ها خالي

شهم.. تعال اصعدلي بسرعه

رجعت طبيت للغرفه ثانيتين ودخل ورايه .. گتله يسد الباب حتى لحد يسمعنه

جهاد.. نعم خالو

شهم.. جهاد اريد اطلب منك طلب

جهاد.. خير أأمرني خالي

شهم.. اريدك تتزوج مياس

جهاد.. فتح عيونه عليه : خالو شنو هالحچي الدا اسمعه !!
مهيب هو الطلب منك هالشي برسالته ؟؟!

شهم.. اي بس مو بالضبط

جهاد.. يعني شلون مو بالضبط
يا اي  يا لا  لتخبلني !!

شهم.. طلب مني اني اتزوجها

جهاد.. اي لعد خلص نفذ وصيته وتزوجها انت

شهم.. ما اگدر جهاد

جهاد.. واني هم ما اگدر

شهم.. جهاااد

جهاد.. لتحاول خالو لان راح تتعب ع الفارغ

شهم.. فدوه وليدي لتركب راسك
والله مياس طيبه واخلاقها ذهب ... ثق بالله مراح تندم على زواجك منها طول العمر

جهاد.. ادري بيها طيبه واخلاقها على راسي من فوگ .. بس ما اگدر والله خالي ما اگدر
هاي مرت مهيب شلون تطلب مني اتزوجها ترى انت دتطلب المستحيل ومحاس على نفسك

شهم.. جهاد بس اسمع

جهاد.. لتكمل عفيه
بعدين اني كلها شهرين او اكثر شويه وارجع للحشد
يعني شنو تريد ترملها مره ثانيه

شهم.. اسم الله عليك شنو هالكلام الزايد منك

جهاد.. هذا الواقع خالو .. اصلا تسويلي فضل اذا تدعيلي استشهد والحگ مهيب حتى ارتاح

شهم.. جهااااااد

جهاد.. تريد شي تعبت اريد اروح انام

شهم.. يعني هذا اخر كلام عندك

جهاد.. اي خالي واتصور تگدر تجبرني على كلشي إلا زواجي من مياس

شهم.. لا طبعا ما اجبرك على راحتك

جهاد.. تصبح ع خير

شهم.. وانت من اهل الخير

طلع مني .. گمت افتر على نفسي من القلق
توقعته راح يقبل لأن بأخير فتره تحسنت معاملته المياس وصار الاحترام واضح على اسلوبه
بس الظاهر موت مهيب مأثر بي كلش لدرجة مديتقبل الحقيقه ويعتبر مياس لحد الأن مرته واذا اخذها معناها يخونه

شهم.. زين ربي هسه اني شسوي ؟؟ شلون اگدر انفذ وصية مهيب بعد ما رفض جهاد طلبي ،،، طبت نهى بهلاثناء

نهى.. ويامن دتحچي

شهم.. ويا روحي

نهى.. ليش حبي ؟!!

شهم.. ليش برأيچ

نهى.. سوده عليه .. الله يعينك ويقويك على ما بلاك

شهم.. طفي الضوه اريد انام

تمددت وغمضت عيوني ع السريع .. ما اريد افكر بشي اريد انام واگعد الگه كل الصار كابوس واخلص من هالعذاب للتالي

حسيت على نهى حضنتني .. درت وجهي وخليت راسي على صدرها

شهم.. لعبي بشعري بلكت انام

نهى.. صار حياتي

گمت اردد ايات قرأنيه حتى ابعد التفكير عن دماغي لحد ما الله رحم بحالي وغفيت

انطتني منال الاكل وجبرتني اكل بايدها حتى اخلصه كله مثل ما طلب شهم

اخذت علاجي وگمت طفيت الضوه احاول انام .. اتگلب مثل الطير المذبوح وبعقلي صايره مجزره من الذكريات

مياس.. كافي مهيب ما دامك اختاريت تطلع من حياتي فاترجاك اطلع من گلبي وعقلي لان تعبت وداعتك عندي تعبت

للفجر انسطرت من گد النوح .. نمت على نفسي واني گاعده

حسيت الصبح على صوت الباب تندگ .. خليت حجابي ع راسي وصحت : تفضل

شهم.. صباح الخير

مياس.. صباح النور

شهم.. گدرتي تنامين

مياس.. شويه

شهم.. وشلون صرتي ؟؟

مياس.. الحمد لله احسن

شهم.. زين تگدرين تگومين تسويلي ريوگ لو مابيچ حيل ؟؟

مياس.. اي من عيوني

شهم.. تسلم عيونچ

عفتها ورحت للمطبخ .. طبعا تعمدت اطلب منها هالشي علمود اطلعها من الكأبه العايشه بيها
صار لازم تتحرك وتشغل نفسها لأن لو تظل گاعده وحابسه روحها بالغرفه تموت بقهرها

گعدت ع الميز طلعت رسالة مهيب من جيبي حتى انطيها لمياس .. شويه وحسيت عليها دخلت للمطبخ

بدت تحضر بلاكل .. اعاين عليها وگلبي يتگطع من منظرها واني اشوفها گدامي مثل الورده الذبلانه ما ظال منها بس عطرها الطيب

شهم.. جهزي ريوگ الروحچ هم

مياس.. لا ما اشتهي هسه

شهم.. اذا متاكلين ويايه اخلي واگوم ،، بعد بكيفچ

مياس.. والله ما اشتهي

شهم.. براحتچ .. هستوني داگوم صاحت بسرعه

مياس.. لا اگعد .. ميخالف راح اكل وياك

گعدت ويايه تجاملني بس اني جبرتها تاكل لان صحتها كلما جالها تصير بالنازل .. خلصنه وگامت تشيل المواعين مديتلها الرساله

شهم.. تفضلي

مياس.. بتعجب : شنو هاي ؟!!

شهم.. رساله من مهيب الچ

تخبلت بس سمعت اسم مهيب .. جريت الرساله من ايده ع السريع ورحت اركض ممصدگه عافلي منه ذكرى اخيره ولا مصدگه راح ارجع اقره كلامه من جديد

دخلت للغرفه .. اريد افتح الرساله ما اگدر مو بس ايدي حتى گلبي يرجف

گعدت ع الچربايه وخليتها گدامي .. بدت دموعي تجري بلا وعي احس مهيب گاعد گدامي بس صعب عليه المسه

غمضت عيوني حيل .. نزلت دموعي الحاره على ايدي
جريت الرساله فتحتها وانهاريت بس شفت دموع مهيب ع الورقه

مياس.. سوده عليه حبيبي بگد ما عانيت وانت دتكتب هالكلمات بگد ما راح اعاني واني اقراها

مهيب.. مرتي الحلوه شتاقيتلچ

مياس.. شمرتها من ايدي اشهگ بحرگه : اخ يا ربي ما اتحمل والله ما اتحمل ما اتحمل

گمت على حيلي افتر بالغرفه .. امسح بدموعي واهفي لوجهي لان حسيت راح افقد الوعي من القهر

حاولت اهدي بنفسي حتى ارجع اقره ....
شتاقيت الكلامه الحلو وغزله بيه .. شتاقيت لكل تفاصيله

ضحكته
صوته
انفاسه
عصبيته
حتى زعله عليه

مهيب.. لتبچين بداعتي .. مسحي دموعچ وركزي على كلامي زين

اني وعدتچ ما اعوفچ وراح اظل عد وعدي الچ
لتتصورين يلوحچ الذل بغيابي وشهم موجود

كل الأريده منچ تمشين ورى وانتي مغمضه .. اتمنى متعارضين كلامه وتنفذين كل طلب منه وتأكدي كلشي يگوله شهم بي مصلحه الچ

قوي نفسچ لخاطري لأن ما احب اشوف الضعف بعيونچ القويه

اهتمي الدراستچ ولتخلين الشي الصار يأثر عليها .. هي السلاح الراح تواجهين بي الحياة وقسوتها

والاهم من كل هذا ديري بالچ على روحچ يا روحي انتي

چنت اكلچ دائما احبچ للموت .. هاي اني متت وحبچ مزروع بيه
بس انتي لازم تدفنين هالحب ويايه حتى تگدرين تعيشين من بعدي

لهنا وصار لازم اودعچ .. اتمنى تنفذين وصيتي الچ حتى تخليني انام بگبري واني مرتاح

احبچ مياس....

مياس.. واني احبك يروحها لمياس

ليش رحت وعفتني .. ولك والله العظيم گلبي يوجعني بغيابك

شلون اگدر اتخلص من هالوجع بعد ما اخذت روحي وياك

يا ريت لو باقيه بالشارع مثل المتشردات ولا ملتقيه بيك ع الاقل مچنت اعرف شي عن الحب ولوعة فراگه

مسحت دموعي وگمت من الگاع .. طلعت للمغاسل غسلت ورحت للصاله احس البيت ما بي روح بعد موت مهيب

مياس.. السلام عليكم

منال.. وعليكم السلام حبيبتي
شلون صرتي ؟؟

مياس.. على الله

نهى.. دتاخذين علاجچ ؟

مياس.. اي

عفتهم ورحت للمطبخ ردت اسوي اي شي حتى التهي وانسى الوجع .. هستوني لزمت الوصله امسح طبت سمر

سمر.. شدتسوين ؟؟

مياس.. اشتغل

سمر.. جرتها من ايدي حيل : منريد منچ شي بس چفينه شرچ

صفنت عليها ودمعتي بطرف عيني .. درت وجهي دا اطلع صدمتني بكلامها

سمر.. يا ريت لو تولين لأهلچ باسرع وقت حتى نخلص من النحس الشفنا من يوم ما طبيتي لهذا البيت

مياس.. استغربت من كلامها : شسويتلچ اني ليش دتحچين ويايه بهل اسلوب ؟!!

سمر.. لا عيني كلشي ما سويتي
بس گمعتي خالي و ورى ابنه يعني شتسوين بعد اكثر من هالشي

منال.. شكو سمر ليش دتصيحين ؟؟

سمر.. ماما شوكت تروح مياس لأهلها ؟؟
خالي ومات شعدها باقيه هنا

منال.. احترمي نفسچ سمر لتخليني اهينچ

سمر.. ظلي دافعيلها لحد ما تخسرين كل اهلچ من وراها وجه البومه

منال.. لتتجاوزين على مرت خالچ حقيرررره

طب جهاد بهلاثناء وچان هستوه گاعد من النوم..

جهاد.. شنو هل صياااااح

سمر.. جهاد حاچي خالو خلي يشمر هل حقيره يم اهلها ... وتأشر عليه

تفاجأت من شفت جهاد ركض عليها ولزمها من شعرها حيل

جهاد.. عليمن دتتجاوزين ولچ !!

سمر.. ااااي ،، هاي شبيك هد شعري

جهاد.. اعتذري بسرعه

سمر.. دفعت ايده : لا والله خاف مترضى !!!
اني اعتذر من هااااي

جهاد.. سمررررر
اعتذري بسرعه لتطلعيني من طوري

سمر.. ما اعتذر وشتريد تسوي سوي

مياس.. رفع ايده يريد يضربها ركضت لزمتها ع السريع : لا جهاد لتمد ايدك عليها ما اريد اعتذارها بس عوفها

جهاد.. لا بكيفچ ولا بكيفها
تعتذر ورجلها فوگ راسها .. دار وجها عليها : اعتذري بسرعه

منال.. اعتذري يمه وتعوذي من الشيطان ليش تسويلنه سالفه
انتي غلطتي ولازم تصححين غلطچ اخوچ ويا الحق بهل شي

سمر.. والله ولا اعتذر لبت الشوارع لو تنگلب الدنيا

جهاد.. ركض سحلها بالگاع من شعرها : تعالي ولچ
اليوم اعلمچ شلون تطولين لسانچ

مياس.. جهاد لااا
اتركها الله يخليك .. جهاد مو دا احچي وياك شبيك يمعود

ولا سمع مني .. استمر يسحل بيها وهي تصيح من الوجع ... منال واگفه بيناتهم تحاول تفكهم بس ما گدرت لان جهاد فاقد اعصابه وميشوف گدامه بعد ...
اخير شي استسلمت وگامت تتوسل بي :

سمر.. الله يخليك عوفني ... والله اعتذر بس عوفني ابوس ايدك

جهاد.. شمرها من ايده حيل : يلا اعتذري گدامي

سمر.. گامت تعاينلي بحقد : اسفه

مياس.. مصار شي

طلعت من المطبخ صارت الحجيه گدامي .. بس شافتني خزرتني وهي تصيح عليه :

الحجيه.. ها ولچ هالنوبه حتى جهاد خربتي ويا اخته

رنا.. خاله هي بقت احد يسلم منها
شو من اجت لهذا البيت يوميه واحد متعارك ويا الثاني بسببها
اخير شي حتى رجلها گمعته ... دخيلك ربي فگر من فگر

نهى.. عيب عليچ رنا .. شنو هالحچي الزايد منچ
هاي فوگ مصابها تصيرين انتي والزمن عليها
بعدين هي ما گمعت مهيب مثل متگولين .. مهيب راح شهيد وهو اختار هل طريق بالعافيه علي
اترجاكم خلو الله بين عيونكم بالمسكينه لان البيها كافيها

الحجيه.. شبيچ نهيوه شو نهديتي علينه

نهى.. متسمعيها يا يمه .. لسانها ينگط سم كأنها متعرف الكلمه الطيبه صدقه

جهاد.. كافييييييييييييييييي
ما صارلنه ٣ ايام من دفنه مهيب وانتو گاعدين تكفخون بمرته .. خوش تحافظون ع الامانه بارك الله بيكم

خليت ورحت بلا ما احچي شي .. طبيت لغرفتي ع السريع سديت الباب وشبعت بچي على حظي الما فد يوم گعد ويا احد بهل دنيا

دخلت عليه نهى شافتني ابچي ركضت حضنتني وهي تبوس بيه :

نهى.. حياتي اترجاچ لتبچين
والله بس يجي شهم إلا اگله على هذني الحقيرات

مياس.. لا عفيه نهى .. ما ناقصه مشاكل
الله يخليچ لتحچيله شي

نهى.. لعد مسحي دموعچ خلي اشوف

مياس.. ماشي حبي ... هاي مسحتهن

نهى.. باستني من خدي : فدوه لهل عيون الحلوه

مياس.. فدوه لگلبچ الطيب

مرت الأيام بألم بس الله يعلم بي .. صار الاربعين ورجعت تكررت اجواء الفاتحه ببچيها  ونوحها .. نفس الصياح ونفس اللطم بس الفرق هالمره اني حاضره وياهم وشفت كلشي بعيوني

لليل گاعده بالصاله ويا نهى دتشرحلي لأن رجعت اقره لخاطر وصية مهيب .. دخل شهم من بره

دشهم.. السلام عليكم

الكل.. وعليكم السلام

شهم.. نهى گومي سويلي عشه ... اني اشرح المياس

مياس.. لا ارتاح انت .. اصلا خلصت ما ظل شي

شهم.. ميخالف اني ما...

ديحچي اندگ الجرس .. راد يگوم جهاد يفتح الباب گله : خليك اني اشوف منو

راح شويه وسمعنا صاح : سوو طريق
رحت لغرفتي واجت نهى ويايه ... ظلت تشرحلي رياضيات لحد ما اندگت الباب وفات شهم

شهم.. مياس

مياس.. نعم

شهم.. گومي ابوچ بالاستقبال يريد يحچي وياچ

بس سمعته گال هيچ لزمت گلبي .. خايفه ارجع ويا لأن ادري بسميحه مراح ترحمني وتضوگني المر مرين بعد انكساري بموت مهيب

شهم.. يلا بابا ليش صافنه

مياس.. اي اجيت

رحت ويا طبيت للاستقبال سلمت على ابويه .. اعاينلهم واحد ديعاين ع الثاني استغربت من نظراتهم الغريبه الما گدرت افهم معناها

مياس.. خير اكو شي ؟؟

اشرف.. بابا اني اجيت لهنا حتى اخذچ ويايه بس قبل كلشي شهم عنده كلام وياچ اسمعي وفكري بكلامه زين
يومين واجي اخذ جوابچ واني وياچ بكل قرار تتخذي لأن اهم شي عندي راحتچ

مياس.. صفنت عليهم : ما فهمت !!

شهم.. هسه افهمچ بس اصبري شويه

اشرف.. يلا اني صار لازم اروح

مياس.. اخواني شلونهم ؟

اشرف.. زينين ومشتاقيلچ

مياس.. اني هم مشتاقتلهم بوسهم الي

اشرف.. يوصل حبيبتي

شهم.. مياس رايح اوصل ابوچ وارجع لتطلعين منا

مياس.. ميخالف

طلعوا من الاستقبال .. ظليت صافنه وراهم : شنو هالكلام المهم اليريد يحچي ويايه وشلون ابويه راح بلا مياخذني ويا ؟!!! بعدني ميحتاره باسألتي رجع شهم طب وسد الباب ورى

مياس.. شبيك تعاين هيچ خوفتني

شهم.. ليش ؟!!

مياس.. من نظراتك حاسه اكو خبر مو زين تريد تگوله الي

شهم.. صح كلامچ
بس مو كله ... بي جانب زين بالنسبه الچ

مياس.. دوختني .. احچي بوضوح خلي افتهم عليك

فرك وجها بأيده حيل بعدين ضرب على راسه .. تأكدت ساعتها راح تصيرلي مشكله متشبه اي مشكله مريت بيها بس مچنت متوقعه الشي الراح اسمعه منه ابد

مشت الايام بصعوبه بالنسبه الي واني يوميه انام واگعد على نارين .. نار فراگ اخويه ونار الوصيه الخلاها برگبتي بلا ميفكر بيه

اجه اربعين مهيب وهذا هو اليوم الچنت خايف منه لأن  صار لازم اقرر قراري الاخير حتى انقذ مياس من ابوها ومرته

هستوني راجع من بره اندگ الجرس .. رحت افتح الباب ومثل ما توقعت اشرف اجه ياخذ بنته

دخلته للاستقبال حتى اتناقش ويا .. مچان الكلام الاريد اگوله سهل عليه بس مجبور احچي بعد ما نحطيت بخانة اليك

شهم.. اهلا وسهلا

اشرف.. اهلا بيك عيوني

شهم.. تفضل استريح عندي حچي مهم وياك قبل لتاخذ مياس

اشرف.. گعد بسرعه : خير ان شاء الله !!

شهم.. خير خير
طبعا انت تعرف كلش زين مياس شگد چانت متعلقه بمهيب وشفت بعينك شصار بيها بعد استشهاده

اشرف.. اي اعرف
الله يرحمه برحمته الواسعه
بس شنو المغزى من هذا الكلام

شهم.. بگد ما بنتك حبته هو حبها اضعاف هالحب
لذالك ما هان علي يموت ويعوفها ضايعه من بعده

اشرف.. ليش تضيع وابوها عايش

شهم.. مكان البنيه يم رجلها مو ابوها
عمرك طويل ان شاء الله بس باچر عگبه اذا متت منو الها ؟؟ مرتك مثلا !!

اشرف.. بعد استشهد شنريد نسوي قابل ؟؟

شهم.. ابو مصطفى اسمعني
اخويه مات وترك وصيه برگبتي
تعرف شنو هالوصيه ؟؟

اشرف.. لا شمعرفني

شهم.. طلب مني اتزوج مياس

اشرف.. صدگ تحچي !!!!

شهم.. اي
واني اكيد انفذ وصيته حتلو على حساب نفسي

اشرف.. يعني افهم من كلامك تريد تتزوجها ؟؟

شهم.. نعم

اشرف.. لا شهم لا
ترى طلبك ممقبول ابد

شهم.. ليش حرام لو عيب ؟؟

اشرف.. هو لا حرام ولا عيب
بس والله صعبه كلش .. يعني مدا اگدر اتقبل الفكره

شهم.. مو احسن ما تزوجها العماد

اشرف.. رفع حاجبه : وانت شعرفك بهل موضوع ؟!!

شهم.. سالفه طويله يجي يوم واحچيلك
هسه شگلت

اشرف.. لا بويه لا ... والله ما راهمه ابد
بعدين ما اتصور مياس تقبل بكلامك

شهم.. معليك بيها
انت وافق وهي راح توافق وراك

اشرف.. والناس شتگول يا شهم

شهم.. ابو مصطفى الناس لو تفيد چان اجت شالت الوجع من صدري وصدر بنتك
خلي يحچون اليحچوا مادامنه ممسوين شي يغضب رب العالمين فكلامهم بالنسبه الي هو والماكو سوه

اشرف.. وهسه شنو ؟؟

شهم.. اذا وافقت مياس على زواجها مني .. انت توافق ؟؟

اشرف.. اي لان اهم شي عندي راحتها

شهم.. لعد يومين وتعال اسمع جوابها
وافقت تظل هنا اشيلها على راسي من فوگ
ما وافقت اخذها وروح الله ومحمد وعلي وياكم

اشرف.. زين لعد صيحها خلي احچي وياها

شهم.. صار

گمت صحتها .. حچه وياها بس استغربت كلش من منظرنه لأن مبين علينه التوتر حتى اني انتبهت على هالشي

طلع ورجعت للاستقبال حتى افتح وياها الموضوع .. حست اكو شي مو زين ورى كلامي لذالك حاولت ما اطول عليها حتى انهي كلشي وارتاح

شهم.. مياس لازم نتزوج

مياس.. ههههههههههههههه

شهم.. شبيچ تضحكين

مياس.. تتشاقه اكيد

شهم.. لا ما اتشاقه دا احچي صدگ احنه لازم نتزوج

مياس.. شبيك شهم مصخن لو شنو ؟!!
اني مياس التعتبرها بتك لو نسيت

شهم.. لا ما نسيت .. زواجي منچ ع الورق بس

مياس.. هههه وليش !!!

شهم.. مجبور حتى احميچ من سميحه وعماد

مياس.. لا شهم لا .. لا لا لا
ما اريد تحميني بهل طريقه

شهم.. ماكو غيرها

مياس.. لعد ارجع ويا ابويه والله موجود متأكده مراح ميعوفني

شهم.. مستحيل اخليچ ترجعين

مياس.. ومستحيل اتزوجك حتلو ع الورق

شهم.. مياس شبيچ .. هو زواج شكلي على شنو مكبره الموضوع

مياس.. وابويه راح يقبل بكلامك ؟؟

شهم.. ماكو داعي يعرف

مياس.. ونهى

شهم.. تنهدت : شبيها نهى ؟؟

مياس.. راح تتقبل هالزواج حتلو عرفت بحقيقته ؟!!

شهم.. تتقبل .. اذا مو اليوم باچر

مياس.. لا شهم لا
مستحيل اكسرها .. هاي اختي الوگفت ويايه وساندتني بكل ما بيها شلون تريدني اطعنها بظهرها بعد كلشي صار

شهم.. لا اله إلا الله
اگلها ثور تگلي ما ينحلب
ولچ بابا ماكو غير هالحل .. عوفي كلشي وفكري شلون تطلعين نفسچ من ورطة سميحه بعد ما راح رجلچ

مياس.. ما اريد هي گوه .. ما اريد
حتلو اعرف ارجع للشارع بس مستحيل اتزوجك وادمر نهى بهل زواج

مديت ايدي بجيبي والاعصاب طافره بعيوني .. طلعت وصية مهيب الما فارگتني ولا لحظه وضربتها ع البوفيه حيل

شهم.. هاچ اقررررري

مياس.. شنو هاي ؟؟

شهم.. وصية مهيب الي
اقريها واذا انطاچ گلبچ تكسرين كلامه وتضربي بعرض الحايط ساعتها اكون سويت العليه بس انتي ما سمحتيلي

فتحت الورقه اقراها ودموعي تنزل بحرگه .. كل حرف منه ينزل مثل التيزاب على گلبي : ليش مهيب شلون تسوي هيچ ؟!! ما فكرت بحياة اخوك الراح تتدمر بسبب هالقرار

شهم.. كافي لتبچين فطرتي گلبي

مياس.. شهم والله صعبه

شهم.. بنيتي دتفهمين الكلام لو لا ؟؟ دا اگلچ زواج ع الورق حتى تظلين هنا ومحد يتجرأ يأذيچ بوجودي

مياس.. ونهى شلون راح تتفهم

شهم.. خليها عليه المهم توافقين

دنگت راسي محتاره ودموعي مدا تنطيني مجال حتى افكر صح .. تذكرت كلام مهيب بالرساله لمن گال لتعارضين شهم معناها چان يقصد ما اعارض زواجي منه

شهم.. شو ساكته جاوبي

مياس.. رفعت راسي امسح بعيوني : ليش اني اگدر ارفض طلب المهيب
مجبوره اوافق بس الله يخليك قنع نهى ما اتحمل اخسرها بسبب هالشي

شهم.. راح تقتنع لتشيلين هم

مياس.. تريد شي بعد قبل لا اروح

شهم.. لا سلامتچ بس بطلي بچي مو عيونچ انتهت

مياس.. ان شاء الله

طلعت ع السريع الغرفتي .. شفت نهى بعدها موجوده وگاعده تگلب بموبايلها

نهى.. هاي شنو حبي ليش باچيه ؟؟

مياس.. ماكو شي حياتي

نهى.. حضنتني حيل : شنو ابوچ يريد ياخذچ

بادلتها الحضن وبچيت بحرگه : كلش صعب عليه اخذلچ او اجرحچ بس مو بيدي ما اگدر ارد المهيب اخر طلب يطلبه مني

نهى.. كافي فدوه والله مردتيني بدموعچ

طلعت للصاله ادور على نهى ماكو ... سألت منال گالتلي بغرفة مياس

رحتلها چانت الباب مفتوحه ،، عاينت من بعيد هي ومياس متحاضنات ويبچن

شهم.. نهى

نهى.. ها حبيبي .. اسفه تأخرت عليك بالعشه

شهم.. ما اريد
تعالي فوگ عندي حچي مهم وياچ

نهى.. اصعد هسه اجي وراك

راح شهم وظلت نهى تمسح بدموعي وتحاول تهدأ بيه .. عشر دقايق عافتني وصعدت لغرفتها

سديت الباب وانتهيت من البچي : اكيد راح يگلها يا رب ساعدها وساعدني حتى نعدي هل أزمه على خير

صعدت فوگ انتظر نهى حتى اگلها على زواجي من مياس .. قريب العشر دقايق يلا اجتني

نهى.. ها حبيبي

شهم.. تعالي الحضني

نهى.. اجت حضنتني : خير شهم خو ماكو شي

شهم.. تعرفين شگد احبچ لو لا

نهى.. اي اعرف

شهم.. وتدرين كلش زين ما اشوف مره الي غيرچ بكل الكون

نهى.. خوفتني شهم .. شنو معنى هالكلام !!

شهم.. اكو امانه من مهيب الي ولازم انفذها

نهى.. وشنو هي ؟!!

شهم.. اتزوج مياس

هو اني گلت هيچ .. فتحت عيونها وما اشوفها إلا تكومت من طولها بالگاع ....

يتبع..