رواية مياس قلب الشهم الفصل الثالث والخمسون 53 - بقلم لبنى الموسوي

أسندي رأسكِ إلى كتفي، وأنا أتكلّف بأوجاعكِ، فنحنُ معًا إلى نهاية العمر. صعدتُ فوق، فتحتُ الباب وجفلتُ بمكاني من شفت شهم واقف ديمشّط على الميز، شكله هستوه طالع من الحمام. بس شافني ابتسم واجى باتجاهي، سحبني من ايدي وسد الباب، لأن فصلت بشوفته حتى حركة ما بيا أتحرك بعد. مياس: شوكت إجيت؟ شهم: الصبح. مياس: يااا! لعد ليش ما گالولي وفوگاها منال ناصبة عليه، والله شنو اصعدي نظفي غرفة شهم لأن... شهم: (قاطعني) مياس. مياس: نعم.

شهم: أحبّچ. صفنت بوجهه مصدومة. باوعلي وابتسم، خفت كلش منه، ما أريد أكرر الشي الصار قبل أشهر وارجع أحس بالذل من جديد. درت وجهي دا أطلع، لزمني من ايدي وسحبني لحضنه. شهم: وين رايحة؟ مياس: شتريد مني شهم؟! شهم: دا أگولچ أحبّچ يولي. مياس: أكيد مو بوعيك حاليًا. كلها ساعات وتندم على هاي الكلمة وتجي تعتذر مني. شهم: ههههههه الله يطيح حظّچ على هذا الرد. مياس: لعد شـ تتوقع أجاوبك بعد كلشي صار؟ شهم: ما راح تنسين يعني؟

مياس: مستحيل أنسى شهم، مستحيييل. صفن بوجهي. شوية ودنّگ ديبوسني، دفعته على السريع وطلعت من الغرفة ركض. أول ما نزلت صارت منال گدامي تضحك. باوعتلها بطرف عيني ومشيت باتجاهها. مياس: منال عود ليش سويتي هيچ؟ منال: هههه شسويت؟ مياس: شنو تگولين شهم يومين ويجي، وشنو أصعد للغرفة ألقاه بوجهي. منال: ولچ وتالي وياچ، الرجال تعبان ليش تشلعين گلبه بزعلچ الماله داعي. مياس: ليش ومنو گالچ أني زعلانة؟ هو!

منال: حتى أبو محمد البقال البراس الشارع عرف بزعلچ، ظلت عليه هههه. مياس: شو ناصبة عليه أنتي؟! ترى أني ما زعلانة من فراغ. أخوچ غلط غلط چبير ولازم يتحمّل نتيجته. منال: شسوى بس گليلي؟ مياس: ما أگدر أحچي عليه حتلو أذاني. ما ينطيني گلبي أنطي بي. منال: شوف الحب شوف. لعد إذا هالشكل تحبي ليش تتزعلين عليه. مياس: مو بيدي منال. بعد ما عندي ثقة بحبه لأن هو نفسه ما واثق من روحه ولا يدري بنفسه شيريد.

منال: مياس أخذيها نصيحة مني واعتبريني مثل أمّچ ودتنصحچ علمود مصلحتچ. ترى الرجال صبره محدود لا عبالچ مثلنه. إذا ظليتوا على هالحالة هو يركض وراچ وأنتي تصدي راح يمل ويشوف غيرچ وهايني گلتلچ. مياس: زين بس گليلي هو اتفق وياچ علمود تصعديني لغرفته؟ منال: لا وداعة جهالي. هو إجى من الصبح بس چان شوقه إلچ فاضحه لأن يسلم علينه وعيونه تدور عليچ. عاد من شفته هالشكل انكسر خاطري عليه وسويتها لكم مفاجأة، بس الواضح خربتيها حضرتچ.

عفتها ورحت لغرفتي على السريع. سديت الباب وگعدت على الچرباية أفكر باللي صار. مياس: شنو معقولة صدگ يحبني لو هم غريزته مسيطرة عليه حاليًا؟! زين إذا هو ما متفق ويا منال معناها ما يدري بيه راح أصعد له. ليش أول ما شافني گلي أحبّچ؟!

يا ربي هسه أني شسوي. والله أحبه وأموت عليه وما أتمنى شي من هاي الدنيا غير حبه بس خايفة مو بيدي. آااخ يا شهم، حبك عبارة عن عذاب وتعب، ما فد يوم ارتاحيت بي. أنت أول رجال يدگ گلبي إله بس بالوقت الغلط ولمن الزمن افتر وصار الوقت صح رفضتني بإرادتك. ضربت على راسي بقوة أريد أطلع هالأفكار من دماغي وأقوّي نفسي: ميصير أستسلم إله بسهولة إلا إذا تأكدت من مشاعره وصدقه اتجاهي.

طلعت برا أكمل شغلي بس التفكير بهذا الموضوع ما فارگ بالي ولا لحظة وحدة. للظهر دا أصب الغدا وحدي بالمطبخ، حسيت على أحد ورايا. درت وجهي شفته شهم ديشرب ماي. سويت روحي ما منتبهة لوجوده يمي. دا أطلع الحكاكة من الگلدر، چان أنصدم بي لطش جسمه على جسمي من ورا ومد ايده على الماعون البيدي ياكل منه. شهم: كلش طيب هذا التمن، منو مسوي؟ مياس: (فتحت عيوني عليه من الصدمة) شهم وخر ليجي أحد على ساعة. شهم: ليش شمسوي أني؟!

هو بس دا أضوگ التمن. مياس: وخر الله علييييك. شهم: وإذا ما وخرت شتسوين؟! مياس: شهم عفية. الله يخليك أبعد عني. شهم: وداعة هاي العيون الحلوة المصدومة مني وتترجاني بنفس الوقت. أحبّچ حيل. ابتسمت مثل الثولة بس سمعت منه هالكلام. ثواني وانتبهت لنفسي رجعت دلغمت بوجهه ودفعته بيدي. مياس: يلا روح للصالة وصيح وحدة من البنات حتى ينقلن الأكل. شهم: صار حبيبتي. درت وجهي للطباخ أضحك. صدمني من گال: شهم: لا تضحكين ترى دا أشوفچ.

مياس: وتالي وياك يلا رووح. شهم: ظلي معاندة ظلي. عافني وطلع، ظليت صافنة وراه: يبووو على حظّچ مياس، منين ما تدوريها تظل عوجة السالفة. كملنا الغدا وصعد شهم ينام. للعصر گاعدة بالصالة بس عيوني تراقب نزلته لحد ما أيست ينزل لأن راح يصير الغروب. گمت للمطبخ جهزت الفواكه وأخذتهن إلهم. هستوني گاعدة شميت ريحة عطره وصلّي قبله. رفعت راسي للدرج شفته دينزل وكاشخ كالعادة حتى يطلع.

ضجت كلش: يعني يجي من السفر بدل ما يگعد يمنا يگضيها نوم وبس يصحصح ما يظل بالبيت. الحجية: ها يمه وين؟ أگعد ويانا شوية خلي نشوفك. شهم: عندي شغل يوم. بالليل إن شاء الله. مياس: وبنتك؟! كلّف نفسك شوية تشوفها على الأقل. شهم: هههههه. يلا مع السلامة. باس نونَة وطلع. باوعت وراه والضوجه تقره مليار عندي، لو بيدي أگوم أعيط بوجهه وما تبرد نار گلبي. ظليت ويا البنات سوالف وضحك لأن بس هن ينسّني همومي لحد ما صار الليل.

أجوا الولد بس شهم تأخر لـ ١١ ونص وهو ما جاي. صرت أحوص كل شوية أريد أخابره أشوفه وين صار بس أتراجع، ما أريد أخرب الشغل عليه. ربع ساعة سمعت صوت سيارته. گمزت للشباك شفته ديدخل السيارة بالگراج، رجعت لمكاني على السريع قبل لا يطب ويشوفني أراقبه. دقيقة ودخل، ما أعرف شنو شايل بيده. سلم على الكل وأخذ نونة من حضني يبوس بيها ويلعب وياها. شهم: أگول أم جهاد. منال: ها خويه گول.

شهم: چنت ويا يوسف قبل شوية حچينا بموضوع المشية وهاي الأمور. أني گتله ما يحتاج مشية نسوان گبل زلم علمود عمامها والعالم. شتگولين أنتي؟! موافقة لو عندچ غير رأي. منال: أكيد موافقة خويه، قابل تريدني أگعد أتفاصل ويا خالتي؟ ما ترهم طبعًا. شهم: زين لعد راح تجيكم باچر على الغدا هي والبنات. شوفيها شتريد تگول أكيد جيتها وراها شي. أما مشية الزلم بعد يومين إذا الله راد حتى وراها مباشرًا يعقدون. منال: إن شاء الله خويه.

باوعت لسمر مبتسمة بوضوح حتى نست وجود خوالها وأخوها يمها من الفرحة. مياس: حقها إذا من يمي الدنيا طايرة بيه بعد هذا الخبر وأخيرًا راح يتحقق حلمهم. خطية هواي عانوا بالأخص يوسف الصبر سنين بلا زواج كله علمودها. سمعت نونة گامت تبچي لأن صار وقت نومتها. أخذتها من إيد شهم ورحت لغرفتي نومتها، هستوني دا أنام اندگت الباب على كيف. لبست الروب لأن ثوبي مال نوم ورحت فتحت الباب، شفت شهم داير ظهره عليه. مياس: ها شهم خير؟

شهم: خلي حجاب على راسچ وتعالي ويايه. مياس: وين؟ شهم: دتعالي بلا أسئلة زايدة. مياس: ماشي انتظرني فد لحظة. رحت للكنتور طلعت حجابي، درت وجهي شفته يباوع عليه. باوعت لروحي لازم أبدل لأن الگدامي مو ثقة أبد. مياس: شهم خلي أبدل وأجي وراك. اسبقني أنت. شهم: ما يحتاج ملابسچ مستورة والكل راحوا لغرفهم ينامون. مياس: هسه شبيك ما تصبر هي دقيقة وأجيك.

تقدم عليه سحبني من ايدي وسد الباب. ظليت أباوع عليه باستغراب. بس شفته أخذني للدرج خفت كلش، جريت نفسي منه بسرعة. مياس: وين ماخذني؟ شهم: (باوعلي بطرف عينه) امشي لا تشلعين گلبي. صعدت وياه والخوف ماكلني. فتح الباب ودخل قبلي، ظليت أباوع عليه. أشرلي بيده طبيت للغرفة بس عيوني عليه مستغربة تصرفه. سد الباب وابتسم. هزيتله راسي بخوف يعني شكو. حط ايده على وجهه يضحك. مياس: ليش تضحك؟

شهم: يابه شبيچ راح تموتين، ترى ما أكلچ والله العظيم. مياس: ليش جبتني لهنا بس فهمني؟ شهم: باوعي گدامچ وتعرفين. درت وجهي بالغرفة شفته مرتب الميز حاط عليه كيك وشموع على شكل قلب وداير ما دايره كله ورد أحمر، چان المنظر مثل الأحلام. فتحت عيوني من الشي الشفته گدامي وما دا أعرف شنو المناسبة هالشكل مسوي وبشنو د يحتفل بالضبط. شهم: كل عام وأنتِ بألف خير حياتي. باوعتله بصدمة وصفنت ويا نفسي: على شنو كل عام وأني بخير؟

مياس تذكري اكو مناسبة اليوم؟ ذكرى زواجنا يمكن؟ لا لا لا أحنا تزوجنا بشهر الواحد وهسه أحنا بالرابع. لعد شنو؟ أخاف عيد ميلاده؟ لا ولچ ثولة شلون يگلچ كل عام وأنتِ بخير إذا عيد ميلاده المفروض يگول لنفسه هالحچي. عصرت مخي حتى أتذكر: يلا مياس تذكري ولچ. ياااا شهر الرابع يعني عيد ميلادي. دمعت عيوني فجأة لمن تذكرت اليوم عيد ميلادي.

حقي أستغرب لأن آخر مرة احتفلت بي ويا أمي الله يرحمها من چان عمري ٧ سنوات وهي آخر شخص گلي كل عام وأنتِ بخير. شهم: راح تظلين صافنة، مياس. ألوووووو ويايه لو شنو يمعودة. مياس: هاا. أي وياك. شهم: شبيچ وين صفنتي؟ مياس: چنت أتذكر المناسبة لأن ناسيه اليوم عيد ميلادي. شهم: هههههه خو چان سألتيني وأني أجاوبچ على شنو متعبة دماغچ بالتفكير. بعدين اكو واحد ينسى عيد ميلاده؟!

مياس: ما متعودة أحتفل بي لذالك نسيت. المهم شكرًا جزيلًا على المفاجأة الحلوة بس ليش ما خليتنا نحتفل وياهم جوه. تقرب مني أخذ ايدي بايده وابتسم. شهم: لأن هذا اليوم خاص كلش. هذا مو بس ميلادچ، بل يعتبر ميلاد لحبنا وحياتنا الجديدة. أني وأنتي نولدنا بهذا اليوم ويا ما نولد حبنا لذالك حبيت أحتفل بي وياچ على انفراد. ضربني الثول گدام كلماته. بقيت بس أباوع

له وأريد أبچي إلا شوية: ما أعرف دموعي سببها الفرح لو الخوف لو شنو بالضبط. كل اللي أعرفه أريد أبچي وبس. حسيت عليه سحبني من ايدي للميز. باوعت للكيكة بصدمة. عليها اسمي واسمه وبيناتهم خاتم زواج تركي. شهم: ها شو صافنة. عجبتچ لا؟ مياس: كلش حلوة والله. شهم: زين لعد انطيني ايدچ. مياس: ليش؟ شهم: دنطينيها ولا تسألين. مديتله ايدي اليمنى أشرلي بعيونه على اليسرى. صفنت بوجهه دنّگ سحبها بسرعة. باوعت

عليه أخذ الخاتم من الكيكة: ياااااا وأني الثولة عبالي هذا المحبس چذابي طلع حقيقة. مسحه بالكلنس من كريم الكيك. لبسه إلي بهدوء وشال ايدي باسها. هنا أني صدگ راد يغمى عليه إلا شوية من الموقف. رفعت راسي إله ودموعي نزلت بسرعة. لزم وجهي ويمسح بأطراف أصابعه جوه عيوني. شهم: ليش تبچين حياتي؟ أني سويت كل هالشي حتى أفرحچ مو العكس. مياس: هاي دموع الفرح. شهم: دوم إن شاء الله.

دنّگ عليه باس راسي وراح لسترته طلع علبة فتحها بيها حلقة رجالية. إجى باتجاهي انطانياها ومدلي ايده اليسرى. لبستها إله بالگوة لأن ايدي ترجف من الموقف. أخذ الجداحة ودنّگ يشغل الشموع. صفنت عليه ما مصدگة اللي ديسوي وكأني دا أحلم بس يا خوفي من هاي الأحلام. راح طفى الضوه ورجع وگف بصفي وحضني من خاصرتي. شهم: كل عام وأنتِ حبيبتي، ومرتي، وبنتي اللي ربيتها على ايدي، وأم جهالي إن شاء الله بالمستقبل القريب.

إذا الحايط نطق فـ أني ساعتها أگدر أنطق ولو بحرف واحد. درت وجهي للكيكة خجلانة منه، وخفت لا أضعف من جديد. شهم: يلا تمني أمنية حتى تطفين الشموع.

غمضت عيوني وتمنيت: يا ربي كل شيء ما أريد من هاي الدنيا غير شهم. هو بالنسبة لي أبويه وأخويه وحبيبي وكل شيء حلو صار بحياتي. أتمنى أملك قلبه مثل ما ملك قلبي. لا، أتمنى يحبني ولو ربع الحب الأحبه الهِ أني، أكتفي به وزيادة هم. وبعد، أتمنى يصير عندي طفل منه ويثبت ببطني. أنا، هو، نونة، كلنا محتاجين لهاي الفرحة، لا تحرمنا منها يا رب، عليك حبيبك محمد. قاطعني صوته من قال: شهم: شنو دتتمنين مال سبعين سنة لقدام؟

مياس: ههههه لا خلصت. شهم: شتمنيتي، ممكن أعرف؟ مياس: لا، سر بيني وبين نفسي. وبقلبي قلت: أنتَ نفسي وهذا السر بيني وبينك. أنا تمنيتك شهم، وبالتحديد تمنيت حبك الماكو منه بكل الدنيا. شهم: ماشي براحتك، بس إن شاء الله يتحقق الشيء التمنيتيه مهما كان. مياس: إن شاء الله. شهم: يلا قطعي الكيكة. مياس: إي هسه. دنجت حتى أقطعها، صارت عيني على اسمه. أخذت السكينة، قطعت من يم اسمي وانطيتها اله. رفعت راسي، شفته مبتسم. مياس: ليش تضحك؟

شهم: ليش انطيتيني اسمك؟ اممم يمكن دتگوليلي تعال أكلني؟ مياس: شمرت السكينة من إيدي: لا والله مو قصدي. جيبها يمعود، أنا أكلها وهسه أقطع لك غيرها. شهم: ههههه لا، أنا أريد آكلك. أقصد آكلها. هسه أقطع لك قطعة على ذوقي. وغمز لي. باوعت عليه، أخذ السكينة وقطع اسمه. رفع رأسه مبتسم ومد لي الماعون. شهم: تفضلي وألف عافية. مياس: هسه ليش دتضحك، بس أريد أعرف؟ شهم: حرام يعني؟ على العموم، إذا مستخسرة بيَ الضحكة، فـ بلاها أحسن.

مياس: لا والله مو قصدي. يلا دعوف الموضوع وأكل. هاك الببسي. شهم: شكرًا حياتي. غمضت عيوني بحيرة: معقولة صدق حبني فجأة؟ والله ما أصدق. باوعت للماعون، خجلانة آكل بعد الكلام اللي قاله. مياس: عززززه. هسه بس أبدي آكل يشطح فكرة لبعيد ويتخيلني دا أكله اله. صدق عود شلون آكله يعني؟ شبيك مياس؟ شو صايرة ثولة كلش. يعني ما تعرفين شلون تأكلين ويأكلك؟ هسه شلون آكل لو لا؟ يا ربي والله فشلة منه، شلون موقف ما أتمنى حتى للعدوي.

صحاني صوته. شهم: هواي تفكرين مياس. مياس: هاا، شنو؟ لا ما مفكرة أني. شهم: مبين من صفنتك. دكلي يلا وكافي تفكير. دنجت راسي على الماعون، ما رفعته إلا ما كملت القطعة كلها، لأن بس أرفع وجهي يخرب كل شيء. باوعت له صافن عليّ ويضحك: يا قاع انشقي وابلعيني. شطح فكره والله شطح. مياس: قمت بسرعة: راح ألم الهوسة وأنزل أنام. عاشت إيدك على كل شيء شهم.

دنجت على الميز، حسيت عليه وقف. فجأة لزم إيدي ورفعني اله. باوعت له خايفة، ما أريد أضعف حتى لا أندم ويا ندمة. باوع لي بنظرات ذبلانة، غمضت بسرعة. حسيت على شفته صارت على شفتي، جمدت بمكاني من الصدمة. باسني بلهفة وأنا مثل الحجارة، بس مجرد دقات قلبي صارت مسموعة. مد إيده على الروب ديفتحه، حسيت على نفسي ولزمت إيده بسرعة. فتح عيونه، باوع لي مستغرب. وخرت إيده من خاصرتي وبعدت عنه مسافة.

مياس: لا شهم. أنتَ هسه مو بوعيك، شوية وتندم على هاي اللحظة. شهم: شـ تحجين مياس؟ أندم شنو؟ ولك بابا أنا أحبك. أحبببببببببببك. استوعبي هذا الشيء ولا تعبيني أكثر. مياس: وإذا قلت لك ما عندي ثقة بيك؟ شهم: شلون يعني ما عندك ثقة؟ ما فهمت. مياس: يعني ما عندي ثقة بمشاعرك. ما أعرف اللي دتسوي نابع منا. وأشرت على قلبه. لو مجرد شهوة بس تنتهي، ينتهي كل شيء وياها.

شهم: مياس كافي. ألف مرة اعتذرت لك وبعدك تلفين وتدورين بنفس الدائرة. ما أنكر أنا آذيتك وجرحتك بنفس الوقت، بس أنتِ هم لازم تعذريني. بوقتها كنت ضايع وعايش بدوامة وصراع ما بيني وبين نفسي. من جهة إحساس الأبوة اللي حسيته اتجاهك كل السنين اللي فاتت، ووجود مهيب ونهى مثل الحاجز بيناتنا. ومن جهة ثانية مشاعري اللي فجأة بدت تتحرك اتجاهك وتريد قربك باستمرار. هالشيء كله سبب لي توتر وقلق. صرت ما أعرف بنفسي شـ أريد ولا أقدر أميز

الصح من الغلط. ورغم كل هذا، حبي لك انتصر على كل الحواجز. إي، أنا حبيتك مياس، واكتشفت هالشيء بعد ما بعدتي عني ورحتي لأهلك. اليوم لمن رجعت من دوامي ما كنت أريد غير شوفة عيونك دون الكل. من هنا قدرت أعرف بنفسي شقد أحبك، بس ما أجرأ أعترف بهالـ حب.

مياس: وليش هسه تجرأت واجيت تعترف لي؟ شهم: لأن تعبت وتعبتك ويّاي. صار لازم نعيش حياتنا ونرتاح. كافي كل القهر اللي مرّينا به كل السنين اللي فاتت. لا نهى ولا مهيب يقبلون بأذيتي لك، لأن أنا لمن صديتك، أذيتك وأذيت نفسي ويّاك بلا ما أحس على روحي. مياس: ما أعرف شهم، بس مو بيدي، والله مو بيدي. أتمنى تتفهم خوفي منك. انطي لنفسك فرصة حتى تتأكد من مشاعرك، أحسن ما نخسر بعضنا للأبد لو كررنا الغلطة السابقة مرة ثانية.

شهم: لك اللي تريدي مياس. حكى هيج وراح للچرباية، قعد بعصبية. شسوي؟ مستحيل استسلم اله إلا إذا اتأكد منه يريدني بقلبه قبل جسمه. لميت الهوسة وأخذت الكيكة أنزلها جوه حتى ياكلون منها. درت وجهي عليه، شفته متمدد وإيده على عيونه، انقهرت عليه. مياس: شهم. شهم: نعم. مياس: شكرًا على عيد الميلاد وآسفة إذا ضوجتك. شهم: إدللي بنيتي.

ابتسمت بوجهه ونزلت. خليت الكيكة بالثلاجة ورحت لغرفتي فرحانة كلش. دخلت، شفت نونة نايمة، تقربت بستها بهدوء وشميت ريحتها. نزعت الحجاب وذبيت الروب من جسمي. وقفت قدام المراية، أباوع لنفسي وأضحك بصوت مسموع. رفعت إيدي، خليتها على وجهي، شفت المحبس بيها، نسيته تقريبًا. لزمته أتلمس الشذرة مالته: شنو يعني هذا المحبس هو حلقة زواجي من شهم؟

بيومها ما قدرت أنام من الفرحة للفجر. قعدت الصبح على صوت الهوسة، عرفت الخطّار إجو. قمت على السريع غسلت ورجعت أبدّل، قعدت نونة. غيرت لها وطلعت للصالة، شفت الكل موجودين. سلمت عليهم واتريقت بسرعة حتى أبدي بالشغل، تأخر الوقت كلش. للظهر إجو الولد. تغدينا ولملمت المطبخ ويا البنات علمود نلحق نقعد وياهم ونسمع شـ يحچون. خلصنا كل شيء واجتمعنا بالصالة، سمعت أم يوسف تحچي علمود الخطوبة، وكانت شـ تقول منال ما تعارضها.

بعد يومين صار وقت المشية. كنت واقفة الظهر أغسل بالمواعين، طب عليّ شهم. شهم: مياس. مياس: نعم. شهم: كويتي ملابسي لو لا؟ مياس: أووو، والله نسيت. هسه بس أخلص المواعين من إيدي، أصعد أكويهن. شهم: استعجلي لا تروح الكهرباء. مياس: صار. طلع من يمي، باوعت للمواعين هواي كلش. غسلت إيدي ورحت صحت تبارك حتى تغسلهن بمكاني وألحق أكوي له قبل ما تروح الوطني.

صعدت فوق، أول ما وصلت لغرفته سمعت صوته ديحچي بالموبايل ويضحك. لعب الفار بعبّي. حطيت أذني أتسمّع وانصدمت لمن سمعته يحجي ويا بنية. شهم: ههههه شلون تالي وياك؟ بطلي تزعلين، تدرين بيّ ما أقدر على زعلك. صار من عيوني أنا أجيبهن لك بنفسي، بعد شـ تريدين؟ فتحت الباب بعصبية، بس شافني قال: يلا صار لازم أسد الخط. ماشي من عيوني. مع السلامة. باوعت له بحقد. رفع حاجبه باستغراب وهز رأسه بمعنى شكو. مياس: ويّا من كنت تحچي؟

شهم: ليش تسألين؟ مياس: شهم، احچي لا تلعب على أعصابي، ترى روحي طافرة. شهم: ههههه اسم الله على روحك، يا روحي أنتِ. مياس: شهممممم. شهم: عيونه. مياس: ويّا من كنت تحچي؟ شهم: ليش غرتي عليّ؟ مياس: لا وليش دا أغار؟ بس سمعت شيء ما عجبني ودا أتأكد منه. شهم: وشـ سمعتي بلا؟ مياس: دتحچي ويا بنية وتتمضحك فوقها. شهم: هههههه إي صح. بس ليش ضجتي؟ مو حضرتك ما تريديّ لو أنا غلطان؟ مياس: لا ما غلطان.

فتت من يمه أخنزر عليه. طلعت الأوتي وثبتت الكاوية بالقاع. باوعت له بقهر. مياس: هدومك وييين؟ شهم: هذني يمك. لو من الغيرة صرتي ما تشوفين قدامك أي شيء؟ ما جاوبته، بس كنت أريد أنفجر من الضوجة. وقفت أكوي وأغلي ويا نفسي: أريد أعرف ويّا من كان يحچي، معقولة عنده علاقة وكان ديضحك عليّ؟ فجأة حسيت عليه حضني من ورا وحط حنچه على چتفي. شهم: تدرين غيرتك تخبل ومن تغارين تصير كلش حلوة. لأول مرة ما أضوج من الغيرة، وأنتِ السبب. مياس:

وخرت الأوتي وباوعت له: أنتَ ليش هالشكل دتسوي بيّ بس فهمني؟ شهم: شمسوي حبيبتي؟ مياس: شهم، ويا من كنت تحچي؟ شهم: ههههه راح أقول لك بس لا تبكين عفية. انتبهت لنفسي دا أبكي وما حاسة. دنجت خجلانة منه. مسحت دموعي ورجعت باوعت له. شهم: إذا تحبيني لهالدرجة ليش شالعة قلبي يا ولي؟ مياس: شو دتلف وتدور شهم؟ ويا من كنت تحچي، فضها عاد. شهم: هز رأسه يضحك: لا إله إلا الله على هاي الغيرة.

فتح جهازه وحطه قدام وجهي. باوعت مكتوب خالتي حبيبتي. طبّيت بهدومي من الفشلة اللي حسيت بيها بسبب الموقف. شهم: لا تخجلين عمري، معذورة. هذا مرض عند كل النسوان ولا على المريض حرج. مياس: باوعت له بطرف عيني: بس النسوان؟ على أساس أنتم ما تغارون عشتووو. شهم: هههههه دكوي الملابس مو راح تجي العالم وأنتِ بعدك بالياخة. مياس: إي، وخر من يمي شلون أشتغل وأنتَ لازق بيّ؟

ضحك وباسني من رقبتي بهدوء. كزبر جلدي بسرعة بس الحمد لله بعد عني قبل لا أنفضح قدامه أكثر. أخذ ملابسه وراح للحمام. استعجلت بالكوي ونزلت على السريع قبل لا يرجع، لأن صرت أخاف أنجمع وياه بمكان واحد، أحس صبره بده يخلص وأنا مو قدّه. صار العصر وإجو العالم. انخبصنا بهوسة المشية لحد الليل. قاعدين بالصالة، إجه شهم من برا. سلم وأخذ نونة مني لحضنه. لعب وياها شوية وانصدمت من سمعته يحچي ويا منال. شهم: منال، يوسف يقول باچر العقد.

منال: يااا... شـ جا مستعجل، والله ما ألحق. شهم: ههههه دبريها خويه، الولد هم حقه. منال: ها سمر شـ تقولين؟ سمر: دنجت خجلانة: بكيفكم ماما. الحجية: يمه شـ يراد لها، قولي يا الله وكل شيء يسهل. منال: يا الله. شهم: يلا راح أرد له خبر لعد. منال: إي خويه، خابره وخلي خالتي تعزم الأقارب، أنا ما راح أفرغ بعد. شهم: بسيطة خيتي. أخذت سمر وتبارك ورحنا لغرفتها. أول ما طبّينا عاطت من الفرحة. مياس: ههههه خبال إي والله.

تبارك: وثول، نززتيني. سمر: فرحانة ولكم... والله فرحانة فرحااااااننننننننه. مياس: دوم إن شاء الله حبي. شـ تريدين بعد؟ باچر راح تصيرين مرت يوسف رسميًا. سمر: الله شقد حلوة هاي الكلمة (مرته) تبارك: لا هاي البنية شخطت وعليّ ما بيها مجال أبد. سمر: إي حبي، أعترف شخطت ولهذاك الصوب هم. دخلت علينا منال وبيدها المعدات. باوعت لتبارك ولطمت على وجهي بس شفتهن بيدها. مياس: هم راح ننعلس ولچن. منال: يلا يلا ما عندنا وقت، شلحن بسرعة.

تبارك: يا والله أستحي. مياس: شوف هاي تستحي. غير بعرسك لزمتنا غسل وتشحيم لحد ما طلعت لنا جلد ثاني. تبارك: عززززه. منال: فضني لا أدفعكن دف. مياس: يلا حبيبتي فوتي قفلي الباب وتعالي أحسن ما تندفين. قفلت الباب وظلت تباوع لمنال بخوف. بلشت بسمر، ساعة كاملة يلا خلصتها، وراها صاحت تبارك. منال: يلا تبارك. تبارك: لا عفية، أول مياس. مياس: إي عادي، قابل أنا جبانة مثلك؟ منال: يلا مياس تعالي.

قعدت وبداخلي خايفة: يا ربي والله توجع الشيرة، بس فشلة أحچي، خلي أبلعها وأسكت أشرف لي. خلصت مني بعد ما طلعت روحي. صاحت تبارك، ظلت تسوي ما واشتغل نفسي بالمكينة لحد ما گامت منال جرتها من شعرها. منال: تعالن لزمنها الي ولچن. سمر: صار يمه. ربطناها وهي ترفس بينه حيل.. شلعت گلبنه يلا كملت واخيراً. منال: هاي خلصت. ومن طاح حظچ اي والله. هسه شيگولون عليچ شهم وايهاب بعد ما سمعوا صياحچ يعرمه.

تبارك: والله اليوم اگول الجهاد عليچ بسيطه. منال: لا يمه خوفتيني. تبارك: اگله اعتدت عليه امك. منال: يا بت السگط على هالعمله. دخلي اگوم اصيحه يربيچ شويه. تبارك: ما اخاف منه والله اصلا هو يحتاج تربيه مو اني. اگلچ انتي تدرين بابنچ سرسري والعباس ابو فاضل. منال: هههههه وليش يمه سرسري. تبارك: يوميه مينام إلا ميتحارش بيه هاي من غير كلامه العيب احچي الچ. منال: شوف الصخله فضحت الولد گدام البنات.

مياس: هههي فاضحته من زمان حبيبتي. منال: گرت عينه على هيچ مره اي والله. طلعت وعافتنه.. گعدت تبارك تهفي الروحها من السمطه الاكلتها بالشيره. ضحكنه على سوالفها الحلوه. عفتهن ورحت غسلت ع السريع حتى انوم نونه لأن سمعتها تبچي بايد الحجيه. ثاني يوم گعدت من الصبح على صوت المنبه.. لگيت الكل گاعدين قبلي. تريگنه بسرعه واخذنه جهاد علمود نجهز سمر.. دخلت المحل البدلات صارت گدامي بدله ماروني تجنن.

قصيره وبيها لمعه واضحه بس الصدر فضيحه.. تقربت منها درتها اشوف فصال الخلف تخبلت من شفته شفاف. اخذت عقلي.. نسيت كلشي وظليت اباوع عليها. وعيت على صوت منال دتصيحني حيل. مياس: ها منال. منال: شبيچ وين صافنه صارلي ساعه اصيح. مياس: ما انتبهت.. شنو گولي؟! منال: شهم قبل ليطلع انطاني فلوس الچ والنونه. يلا اختاري اذا عجبچ شي. مياس: فتحت عيوني بفرح: صدگ والله. منال: لعد اتشاقه وياچ.

مياس: هاي البدله عجبتني كلش بس كون الگه بدله تشبهها النونه. منال: مو إلا تشبهها عادي اخذيلها غير شي. مياس: لا احلى من نصير سيت على گولتچ. منال: ههههه ماشي هسه نشوف. دفوتي قيسيها. اخذتها ودخلت ويا تبارك حتى اقيسها.. باوعت على نفسي طلعت اجنن لان البدله شگد ما اگول عليها حلوه قليل بحقها. تبارك: تموت تموت تموت. مياس: مو بلا. تبارك: اي والله كلش حلوه. مياس: اخذي مثلها اذا عجبتچ.

تبارك: لا ميصير نلبس نفس الشي.. هسه اكيد الكه بدله تعجبني. مياس: براحتچ. نزعتها وطلعت.. ظلينه اني وتبارك نختار بدله الها بس ما عجبها اي شي بالمحل. اخذتها وطلعت ندور بغير مكان.. دخلنه المحل بصفه چانن بدلاته كلش حلوات. تبارك: مياس هاي تجنن. باوعت عليها صدگ حلوه لونها زيتوني عدله كلش والظهر شفاف مثل بدلتي. مياس: اي كلش حلوه. فوتي قيسيها. ردت اروح وياها بس المنزع چان كلش صغير.. دخلت وحدها وظليت واگفه بره انتظرها.

انتبهت لابو المحل زرفني بعيونه وبكل صلافه اباوعله وميبعد نظره عني. ضجت كلش.. بقيت واگفه على اعصابي منا لما طلعنه. مياس: گبر ما شفتي شلون يباوع. تبارك: اي انتبهتله بس معذور غير نسحر بحمالچ. مياس: شنو هالحچي تبارك؟!! تبارك: ههههه يلا لتزعلين. باوعي هذاك المحل بي بدلات مال اطفال تعالي نشوف النونه. مياس: يلا امشي. دخلنه للمحل والحمد لله لگيت بدله بيها شبه من بدلتي صح مو كلش بس المهم تشبهها تقريباً.

رجعنه لمنال وسمر لگيناهن مخلصات ودينتظرنه. منال: ها اشتريتن. مياس: اي حتى النونه اشتريت. منال: امشن لعد بسرعه ظلت الاكسسوارات والاحذيه والمكياج. رحنه المحل الاحذيه وما تعبت لأن الشي البالي لگيته بسرعه.. حذاء اسود وعالي وبي شغل من فوگ. للظهر يلا خلصنه كلشي.. رجعنه للبيت هلكانات من التعب. تغدينه ع السريع ودخلنه للحمام حتى نتحظر للعقد. ما راحت سمر للصالون لأن بصراحه شغل منال ما اتصور اكو وحده تگدر تجيب احلى منه.

اول ما بلشت بيها قبل الكل.. طلبت مني علاگه تحط عليها الادوات. رحت للغرفتي اجيبلها وحده من مالت البدلات. صارت بيدي علاگه تبارك.. طلعت البدله وانصدمت من وگعت ورقه من عدها. دنگت شلتها من الگاع وفتحتها: عيونچ كلش حلوه. اذا ما مرتبطه يا ريت تتصلين بيه على هذا الرقم وصدگي غرضي شريف. صفنت من الصدمه: لا يا ربي هذا الولد ابو المحل الچان يعاين عليه الصبح. دخل شهم بهلاثناء ومن التوتر ما لحگت اخفي الورقه عنه. شهم: شنو هاي بيدچ؟!

مياس: لا هيچ. يعني اقصد ورقه مالت ملابس. شهم: شو خل اشوف. مياس: شبيك شهم!! جرها من ايدي بسرعه.. بده يقره بيها وايدي على گلبي خايفه من ردة فعله. رفع راسه باوع عليه والعصبيه بعيونه. شهم: شنو هذا المكتوب هنا؟!! مياس: والله مالي علاقه. هذا واحد عنده محل مال بدلات اشترينه منه وما اعرف شلون حط الورقه بالعلاگه. خزرني وشگ الورقه بسرعه.. شمرها بالگاع يم رجلي وخله وطلع. مياس: خرب حظچ مياس المصايب دوم تركض وراچ بأيدها ورجلها.

طلعت من الغرفه اركض لأن تاخرت على منال.. لگيت تبارك جايبتلها علاگه. اكلت رزاله منها ومشت السالفه. للخمسه يلا كملتنه ولو ما سريعه فلا تلحگ.. طلعت لگيت النسوان بالصاله. سلمت على الاعرفهم واخذت نونه حتى نبدل. رتبت نفسي وطلعت.. انطيت نونه لام يوسف ورحت لسمر. باوعتلها طالعه تجنن وچان مكياجها جاي فيت ويا بدلاتها الثلاثه. لبستها منال الروب الابيض.. شويه وخابرها شهم حتى تجيبها للاستقبال يعقدون.

اخذناها وسوت منال وياها نفس الشي السوته ويايه.. تم العقد بخير والحمد لله. نص ساعه ودخل يوسف. لبست عبايه ووگفت اصور بيهم.. اباوع علي الفرحه واضحه بعيونه بحيث حتى ميعرف شلون يتصرف. لبسها الذهب وگصوا الكيك سوه.. شويه وطلع راح. رگصنه وتونسنه لحد ما صار الليل. الكل راحوا محد ظل غير ام يوسف وخواته لان يوسف خابر وگلهم اجي عليكم لترحون. رحت للغرفتي بدلت النونه لأن ضاجت من البدله وطلعت انطيتها لام يوسف.

رجعت ابدل علمود اسوي العشه فشله من العالم. هستوني دا افتح السحاب دخل عليه شهم نزيت من مكاني. مياس: غير تدگ الباب. شهم: تقدم باتجاهي يضحك: ليش ادگ الباب؟!! مياس: شنو ليش!! چنت اريد ابدل وانت طبيت غفل. شهم: اي وشنو يعني غير اني رجلچ وانتي حلالي يعني لا حرام ولا عيب. باوعت بعيونه مصدومه من كلامه.. ما حسيت علي إلا جرني بقوه الحضنه واخذ شفتي بشفته. -دخلت لمياس بعد عقد يوسف وسمر لگيتها طالعه تفلج من الجمال.

ما قاومتها مع اني دا اخطط لشي بالي ومو وكته هسه. جريتها الحضني وبستها بلهفه.. اول شي ما تجاوبت ويايه. شويه وبادلتني بنفس اللهفه واكثر. حسيت نفسي راح اخرب كلشي.. وخرتها مني وطلعت ع السريع قبل لا تصير الكارثه. مياس: صفنت ورى: يااااااا هذا شبي يربي والله راح يخبلني.. شيريد بالضبط مجاي افهم؟!! خرب حظچ مياس شكو تتجاوبين ويا هاي تفشلتي هيچ احسنلچ. بدلت بسرعه وطلعت بس اريد

اطگ من القهر الچنت احس بي: مدا اعرف تركيبة هذا الرجال وصبري بده ينفذ بسببه. رحت للمطبخ لگيت تبارك تجهز بالمواعين والكباب على الميز. مياس: هاي منو جابه؟!! تبارك: شهم گال حتى لتعبون بالعشه. مياس: زين سوه. شنو هاي اشو ممبدله بعدچ. تبارك: وچ عيني غير منتظره رجلي يشوفني. هسه لو اعرف وين صار چان ارتاحيت. مياس: ههههه سمعت صوته ديحجي ويا منال. تبارك: گولي والله. مياس: هههه والله. طفرت من يمي مثل المخبله لبست العبايه وطلعت.

هزيت راسي بضحكه وكملت العشه بدل عنها عشر دقايق يلا رجعتلي. باوعت عليها مبدله والمكياج ممسوح.. رفعتلها حاجبي بمكر. مياس: ها ولچ شسويتوا. تبارك: هههههه. لتظلمينه هي بوسه ما لحگنه كلشي نسوي بعد. مياس: اي واضح الحمره مختفيه هههه. شگال من شافچ الله عليچ. تبارك: تخربطت احواله ههههه. بالگوه شلعت نفسي منه علمود النسوان فشله منهن بس اختفي يلگفن السالفه. مياس: ههههه ديلا خلي نتعشه حتى ترحيله خطيه. تبارك: واني هم خطيه وداعتچ.

مياس: ههههه عابت اي والله. اخذنه العشه وتعشينه سوه بس سمر ظلت بالغرفه تستحي تطلع گدام خوالها وجهاد وهي بالبدله والمكياج. شهم: هستوني خلصت عشه اندگ الجرس عرفته يوسف. فتحت الباب صار بوجهي يضحك: ها ولك شعندك جاي. يوسف: انچب يخوي مو وكت حرشتك. شهم: ههههه دتفضل عريسنه. يوسف: هههه زاد فضلك بعد گلبي. دخلنه سويه سلم وگعدنه نسولف.. شويه واشرت لجهاد وايهاب علمود يگومون وتطلعله سمر.

صعدت فوگ غيرت ملابسي وتمددت.. حاولت انام ماكو. عقلي يفتر داير مداير منظر مياس بالبدله. كمت للتلفزيون شغلته حتى التهي وانسى بس ولا گدرت.. اباوع علي وبالي غير مكان. اندگت الباب بهلاثناء ودخلت مياس بيدها نونه.. تفاجأت من جيتها بهيچ وقت. بعد ما صعد شهم وراحوا جهاد وايهاب لغرفهم طلعت سمر بسرعه. راحت هي ويوسف للاستقبال وبقيت اني ويا النسوان بالصاله. ظلو يسولفون بس بالي مو يمهم.. كلما اتذكر تصرف شهم اطگ من القهر.

اقل الساعه طلع يوسف اخذهم وراحوا.. باوعت لسمر حركتلها حواحبي وضحكت. راحت من يمنه ع السريع عود مستحيه.. دا اروح وراها طلعت تبارك من غرفتها. مياس: ها ولچ بشري. تبارك: كلشي تمام حبيبتي طلع الفلوس الصرفهن ولهذاك الصوب. مياس: هههه عابتلچ. امشي خـ نشوف الثانيه شصخمت. تبارك: اي بشرفچ خل ننصب عليها. دخلنه للغرفه لگيناها نازعه البدله.. باوعت عليها چان تطگها بضحكه. مياس: وجع شبيچ. سمر: منظرچن يضحك والقرأن.

تبارك: باوعي اللوتيه تريد تلوف السالفه. يلا لچ احچي شصار ما صار. سمر: والله ما صار شي. نيمني بحضنه وگعد يحچيلي عنه وعن حبه الي طول هاي السنين وشلون چان كاتمه بگلبه ومنتظر اليوم الاحن بي علي واريحه. مياس: هنيالي مثل ابن خالته.. نفس السالفه بالخطوبه سواها ويايه. واكيد ختمتوها ببوسه ام الحمره. سمر: اي ولچ شلون عرفتي. مياس: ههههه حبيبتي جيناتكم الوراثيه عاليه كلش لذالك تتشابهون.

سمر: ههههه لا بس الشهاده لله اني چنت مستحيه لذالك ما حب يضغط عليه. مياس: احسن خلوا هالسوالف للعرس احلى. تبارك: حبيبتي احلى شي بالخطوبه هاي السوالف. مياس: خو انتي وجهاد يمه منكم يمه. تبارك: خبره حبيبتي خبره. مياس: ههههه عابت لهيچ خبره. عفتهن وطلعت لأن سمعت نونه تبچي.. شلتها احاول اسكت بيها ماكو تصيح بابا. منال: الطفله تريد ابوها متصعدين توديها اله. مياس: اخاف نايم الساعه راح تصير ١٢. منال: لا ممعقوله ينام هيچ وقت.

ع العموم دگي الباب وشوفي اذا ما جاوبچ نزلي شخسرانه قابل. اخذتها وصعدت لأن ما خلتلي خيار ثاني مدا تقبل تسكت رغم حاولت وياها هواي. دگيت الباب صاح: تفضل.. دخلت لگيته يتفرج فلم اجنبي. شهم: ها خو ماكو شي. مياس: تبچي عليك تريدك. شهم: يا روح ابوها. گام ع السريع اخذها مني يبوس بيها.. ظليت صافنه عليهم اتأمل شكلهم اليجنن ويشرح الصدر. نص ساعه يلعب وياها لحد ما غفت بأيده من التعب.

اخذتها ونزلت.. چنت متوقعه يگلي ابقي هنا بس ما گال وهالشي زاد حيرتي حيره. مياس: مدا اعرف شبي؟!! معقولة ندم لأن اعترف لي بحبه مثل ما كنت أتوقع! إي لعد ماكو غيرها، وإلا ليش يتصرف بهالطريقة الغريبة؟ والله إذا صدق ندم، فهو مريض نفسي ولازم يتعالج بأقصى سرعة. مر شهرين بهدوء وماكو شي جديد. وضع أبويه مثل ما هو، وأحمد بعده موجود وياه خطية. كل كم يوم نمرلهم بالليل أنا وشهم.

سمر التهت طول هاي الفترة بتجهيزات العرس لأن يوسف مستعجل وطلب منها ما تتأخر. أما شهم فوضعه تراجع للأسوء بدل ما يتحسن. صح كان يعاملني بطريقة لطيفة، بس نهائيًا ما حاول يتقرب مني بعد عقد يوسف وسمر، وهالشي ضايقني لأن حسيت نفسي محقة بال فكرة اللي كنت ماخذتها عنه. قبل العرس بيومين كنت واقفة بالمطبخ أسوي العشاء أنا وسمر ونسولف على زواجهم. سمر: ولج يمه قلبي راح يوقف لأن صارت صدق.

مياس: ههههه لا حبيبتي لا تخافين، افصلي فيشة والله كريم. سمر: شنو قاعدة تستهزئين حضرتك؟! مياس: هيج شي. سمر: أووي صايرة تشبهين خالي حتى بطريقة كلامج. صفنت على نفسي: صدق هاي أنا ليش هيج صرت، حتى كلامه دا أقلده بلا ما أحس على نفسي. تبارك: ها بنات تحتاجن مساعدة؟ سمر: لا ما ظل شي. أقول جهاد شوكت يرجع ما عرفتي؟ تبارك: أوووف اسكتي وخليها، طقت روحي وأنا انتظره. اشتقت له والحسين.

مياس: ههههه. يا معودة، قولي يا الله. هو ما صار له أسبوع من راح. تبارك: ليش الأسبوع قليل برأيك؟ بعدين إذا هيج ما تهتمين ما خليتي رجلك يسافر بمكانه حتى يستلم السيارات. مياس: شعليه هو دز جهاد بمكانه. بعدين شنو هالحكي الزايد اللي يسمعك يقول نايمة بحضن شهم 24 ساعة. خليني ساكتة. تبارك: ههههه من إيدك عيوني. دا تحكي سمعنا صوت جهاد بالصالة. عاطت فجأة وطفرت من يمنا على السريع. مياس: خبال ههههههه.

طلعنا سلمنا عليه وكملنا العشاء. واقفين دا نغسل المواعين ونرتب بالمطبخ طب علينا جهاد. جهاد: تبارك تعالي أريدك. سمر: عززززة. شقد عيييب. اصبر يا أخي الليل جاي، شو صاير مدري شلونك. مياس: حبيبتي على قولة مرته العيب بالجيب والحرام بالحمام. جهاد: شبيجن استلمتني ولجن. مشترى لها شي ودا أراويها إياه، ليش راح فكرجن لبعيد؟ سمر: أييييييي صدقتك كلش.

مياس: روح عيني خلي تكمل شغلها وعود تجيك، خو ما تعوفه على رأسه وتروح. يلا بره بلا مطرود يلا. هز رأسه يضحك وطلع من المطبخ. باوعت لنا تبارك بخزرة وراها ابتسمت. صفنا عليها بخوف: شتريد تسوي هاي المخبلة؟ ما شفناها إلا شالت الطاسة من الحوض متروسة ماي وشمرتها علينا غرقتنا. سمر: يا حقيرة يا تبارك. مياس: هاي لييييش. هي خبيثة مو تدرين بالمرض يريد له حجة وياي. تبارك: تستاهلن حتى لا تغثن رجلي بعد.

حكت هيج وشردت. ركضنا وراها بس ما لحقنا، دخلت لغرفتها وسدت الباب. مياس: أعلمك يا خبيثة. سمر: ولك جهاااااااد. من اشتعلت غيرتك أنت وهاي الكلبة اللي يمك. جهاد: صاح من بعيد: تسكتن لا أطلع أبتلي بيجن اليوم. الحجية: عوفن المرة والرجال ولجن تسودنتن. سمر: بيبي شوفي شلون نقعتنا بالمي. منال: شو شسويتن لها ما معقولة تعيل بيجن بلا سبب. سمر: تريد رجلها عيني ومن قلنا خلصي الشغل يلا تروحين قبت علينا. رنا: تستاهلن.

سمر: وأنتِ منو حاكي وياج ونبزتي من مكانج. الحجية: كافي سمر، روحن بدلن وفضن السالفة. عفتهم ورحت لغرفتي أغير ملابسي قبل لا أستبرد. ثاني يوم رجعت الهوسة مال العقد نفسها. لزمتنا منال تعديل وترتيب لحد العصر. دخلت للحمام دا أنشف شعري قدام المراية، اندقت الباب وطب شهم. شهم: نعيماً. مياس: شكرًا. شنو طالع؟ شهم: إي. يلا بدلي حتى أوديك من طريقي ويا منال تشترين بدلة لك ولنهاوي.

مياس: لا ما أريد. عندي كومة مالت عرس جهاد وعقد سمر شسوي بيهن. وحتى نونة هم عندها مالت العقد ألبسها إياها. شهم: ماكو ما تريدين. بدلي على السريع خلي نطلع تأخرنا. مياس: والله ما أريد ليش.. شهم: قاطعني بصوت عالي: ميااااس. مياس: هههه هاي شبيك. أدري ما تنقهر على الفلوس أنت لو شنو بالضبط. شهم: فدوة لك ولها، ليش عندي أغلى منكم؟

دنقت منه ضايجة: ما أعرف شلون أفسر تصرفاته. من جهة كل كلامه يدل على حبه لي، ومن جهة ثانية تصرفاته تقول العكس. شهم: شبيك مياس؟! مياس: ها لا ما بي شي، هسه أبدل وأجي وراك. شهم: أنتظرك لا تتأخرين. مياس: صار. طلع وسد الباب. شلت شعري وبدلت على السريع حتى لا أتأخر عليهم. طلعنا أنا ومنال وسمر بس تبارك ما اجت لأن راحت ويا جهاد. اشترت منال بالأول لسمر احتياجاتها وآخر شي بدلتي.

دخلنا للمحل كانن البدلات وحدة أحلى من الثانية حتى احتاريت شـ أختار. منال: هاي تجنن مياس. باوعت عليها كلش حلوة، بيضة وشيفون وبيها سبعة تبرز الصدر ونفشتها تجنن لأن بيها كسرات على طولها. مياس: هي حلوة بس مو بعرس جهاد لبست بيضة. -عندنا غير ألوان أختي إذا تحبين أراويهن لكم. منال: لا لا البيضة حلوة. مياس ليش اكو أحلى من اللون الأبيض وربي تطلع تجنن عليك، خذيها ترى تندمين.

سمر: أنا مثل رأي أمي. كلش حلوة كاملة من كل النواحي وأجمل ما بيها بياضها الناصع. مياس: يلا ماشي أخذها. -بس سعرها غالي كلش للعلم. مياس: شقد يعني؟ -430 دولار. مياس: عززززة. لا يا معود بطلت. منال: ما عليك بيها خويه، انطينا قياس 38 حتى نقدره. -تدللون. مياس: تقربت منها أوشوشها: منال والله غالية كلش. شسوي بيها هي ليلة وتنشمر بالكنتور. منال: أنا شعليه، رجلك قال شي عجبها اشتري حتى لو غالي. مياس: آااف منك ومنه.

منال: لا والقسمة بدل ما تقول شكرًا جاية تتأفأف بوجهي. مياس: على شنو شكرًا، شو مقطوطين ذهابًا وإيابًا وأنتم الممنونين. منال: فدوة لعيونك الحلوة. مياس: للأسف خجلتيني وراح أنجبر على شكرك. شكرًا جزيلاً. منال: هههه العفو حبيبتي. قدرتها وكانت كلش مضبوطة علي. طلعنا لمحلات الأحذية وهم منال كلبت بالحذاء الأبيض ما أعرف شعدها ويا هذا اللون. اشترين كل شي وخابرنا شهم أجه علينا رجعنا للبيت. خلص اليوم بسرعة ما حسيت بي من قد الشغل.

ثاني يوم قعدت من الصبح علمود العرس. أول النهار التهينا بالشغل لحد ما صار الغداء، بعده مباشرًة منال بلشت بينا. أول ما بدت بتبارك وراها بي وآخر شي سمر. حسيت عليها تأخرت بشغلي مو مثل تبارك وتجيب وتخلي برأسي. استغربت وسألتها. مياس: منال شدا تسوين؟ منال: اش ولج، خلي أشوف شغلي وراي العروس راح تعطليني. ساعة تقريبًا وكملت مني. قمت للمراية باوعت لنفسي مصدومة: مثل العرايس بالضبط حتى بعرسي ما طلعت هيج. مياس: هاي شسويتي!!!

منال: العفو خيه، أحنا بالخدمة. مياس: ههههه شكرًا بس والله مالها داعي هاي الهوسة قابل أنا العروس. منال: تستاهلين الأكثر. ابتسمت لها وطلعت لغرفتي. بدلت للنونة ولبست البدلة وراها. وقفت أباوع بالمراية متعجبة بروحي على قد ما طالعة حلوة. أخذت نونة وطلعت. ساعة يلا كملت منال من سمر. رحت لغرفتها حتى أشوفها وكانت مثل القمر ما شاء الله. اجوا الولد علينا يأخذونا للقاعة. ضجت كلش لمن شفت شهم مو وياهم، كان يعجبني هو اللي يجي علينا.

مياس: منال. منال: ها حبيبتي. مياس: شهم يزف العرسان؟ منال: لا أخو يوسف محمد. ليش تسألين؟ مياس: مو ما شفت شهم فقلت يجوز هو اللي يزفهم. منال: أكيد ملتهي ويا يوسف بعد، تدرين بيهم إخوة وأكثر. مياس: إي صح. وصلنا للقاعة. بدت الحفلة وتونسنا ونسة العمر. أجه يوسف لبسها الذهب وقامن خواته يهوسن له بالنص ساعة. أباوع عليه طاير من الفرح خطية. شوية وطلع. صارت الجلوة وراها بدينا نتحضر للزفة.

أدور على شنطتي حتى أغير ملابسي ماكو. قلبت الدنيا عليها بس بلا فائدة، آخر شي رحت أسأل منال بلكت شايفتها. مياس: منال. منال: ها مياس. مياس: عفية شنطة ملابسي وملابس نونة ما شفتيها؟ منال: يااااا بيها ملابسك؟ مياس: إي ليش وين راحت؟ منال: مو أمي رجعت للبيت وأخذت نونة وياها فمن سألت على أغراضها انطيتها الشنطة ما أدري ملابسك وياهن. مياس: خرب حظي إي والله. هسه أنا شلون أطلع بهاي الملابس بس فهميني.

منال: هسه أخابر واحد من الولد يجيب لك عباية. مياس: خو خلي يجيبوا لي ملابسي فد نوب. منال: يا معودة وين يعرفون، العباية أسهل عليهم. مياس: زين والتسريحة شلون أطلع بيها؟ منال: شمر الشال عليها وفضي السالفة. مياس: حتى أخوك يشمرني من السطح أول ما نوصل للبيت. منال: هههه لا تخافين، كلشي ما يحاجيك وقولي قالت. مياس: أحكي لك وياها. عفتها ورحت بس ضايجة كلش من الحظ الأعوج.

شوية وجابت لي منال العباية. خليتها على كتفي وذبيت الشال فوق رأسي مثل ما علمتني. اجت الزفة وطب يوسف يهوس له الأقارب. ظليت أراقب الباب منتظرة شهم يطب لأن أكيد هو راح يسلمها. صدق عشر دقايق ودخل هو ورجال كبير يمكن عمها لسمر. تخبلت من شفته: ما أعرف ليش بكل الأعراس يلبس قاط وهو بالقاط يطلع فد شي مو طبيعي. كان لابس قاط نيلي ومزين شعره يعني من صدق طالع عريس حاله من حال يوسف.

تقرب لهم باس رأس سمر وتباوس ويا يوسف. وقف يمهم أسمع عماته قامن يقفلن له يوم لك شهومي. اجيت أرفس ببطنهن وحدة وحدة من القهر: يوم لك شنو؟! لعد أنا فزاعة خضرة قدامكن؟ شوية وحط إيدها بإيد يوسف وطلع على السريع حتى ما انتبه علي لأن ما يباوع للنسوان. صارت الزفة وظليت حايرة أدور على أحد أروح وياه والمشكلة تبارك اختفت ما دا أعرف وين راحت.

طلعت لباب القاعة رفعت رأسي أباوع بلكت أشوف أحد من الولد، صار شهم قدامي دا يحكي ويا يوسف وأخوه. ظليت واقفة بمكاني أنتظرهم يكملون كلامهم بلكت ينتبه علي. شوية وصعد يوسف للسيارة. دار وجهه شهم شافني قدامه أشرت له بإيدي حتى يعرفني. أجه باتجاهي على السريع. مياس: همزين لقيتك، صار لي ساعة حايرة ويامن أروح. شهم: غطي وجهك شووو. مياس: إي هاي شبيك، أصلًا كنت مدنقة رفعت رأسي بس لأن ردت أدور عليك. شهم: امشي هاي سيارتي هنا.

باوعت عليها كلش قريبة. مشيت وياه فتح لي الباب وصعدت بالصدر. راح يم الولد بالخمس دقايق يلا رجع لي. صعد حرك السيارة وانطلقت الزفة. مياس: شو محد وياك شعجب؟ شهم: مو زين حتى نظل وحدنا. وغمز لي. فتحت عيوني مستغربة تصرفه. صار له فترة ما مسوي هالحركات وياي. سكتت ما جاوبته. شغل أغاني مالت أعراس وصار يتسابق ويا سيارة العريس. أكثر عرس تونسنت بي: يمكن لأني ويا شهم هالمرة غير كل مرة.

وبعد ساعتين من الهوسة وصلنا للمصور، نزلوا العرسان يصورون وشهم نزل وياهم. ظليت بالسيارة أنتظرهم. تأخروا كلش لأن لود على الاستوديو. قريب النص ساعة شفت شهم أجه باتجاهي. فتح باب الصدر وقال: شهم: انزلي. مياس: وين؟ شهم: هسه تعرفين بس انزلي. مد لي إيده لزمت بيها لأن لابسة كعب والسيارة عالية كلش. مشيت وياه وتفاجأت من دخلني للاستوديو. فتح باب غرفة التصوير دخلني وطلع بره. ظليت أباوع باستغراب ما أدري ليش جابني هنا وشيريد يسوي.

شوية واجن ثنين بنات شابات سلمن وبدن يجهزن بالكاميرات. -يلا حبيبتي نزعي العباية وعدلي روحك. مياس: ليش!!! -حتى نصوركم غير. حكت الثانية: أرجوان روحي صيحي العريس وجيبي مسكة ورد العروس. صفنت عليها: شنو يصورون؟! شنو عريس؟! شنو عروس؟! شبيهن هذني!!!! -حبيبتي، نزعي، شمنتظرة؟ دخل شهم في هذه الأثناء، باوع عليّ وابتسم. صفنت بوجها متعجبة.

اجت وحدة منهم سحبت العباية والشال مني وگعدت تعدّل بتسريحتي دقيقتين تقريبًا، آخر شيء انطتني ورد طبيعي لون أبيض وأحمر يجنن. -يلا خويه، اوگف يم عروستك. مياس: شهم، شديصير؟!! ابتسم بلا ما يجاوبني، اجه بصفي وبدت تعلمه على الحركات علمود الصور. مرة حضني من خاصرتي. ومرة گعدت وهو ورايه ايده على چتفي. ومرة گعد على البيانو عود يعزف، واني على الطرف. هواي لقطات أخذنا، بس آخر شيء تفاجأت من راح يمها وحچى بصوت ناصي.

باوعت عليهم مستغربة، أريد أعرف شديصير هنا. رجع يمي وأشرتله براسها. انصدمت من شالني بحضنه، باوعت عليه باستغراب وهو مبتسم. چان أحس بفلاش الكاميرا اشتغل. درت وجهي للمصورة متعجبة، باوعت لشهم وگالت: -طلعت تجنن الصورة لأن عفوية. شهم: شو أشوفها خويه. -تفضل. جابت الكاميرا تراويه، خليت راسي أباوع ويا وفعلاً چانت الصورة عفوية وكلش حلوة. شهم: عاشت إيدكم، شغل راقي. -تتدللون. صارن عشر صور لحد الآن، تريد بعد لو كافي؟

شهم: لا، كلش كافي، بس على اتفاقنا أريدهن بنفس الترتيب مالت يوسف. -من عيونه، بس متأكدة صوركم أحلى لأن اللقطات مميزة والعروس تجنن. مياس: عروس شنو؟!! شهم: اسكتي حبي. مياس: حبي شنو؟!!! شهم: كافي عاد. طلعوا من يمي، ظليت صافنة ويا روحي أريد أفهم شديصير، ماكو. شوية ورجعلي شهم، باوع عليّ وفتح عيونه. شهم: هاي شنو، لهسه ما لابسة؟ مياس: شلبس؟ شهم: العباية يمعودة، خلي نروح فضيني. أخذت العباية والشال لبستهن وطلعت.

باوعت للشارع فارغ: يربي شنو السالفة، وين الزفة؟ صعدت بالسيارة وأول ما صعد شهم سألته: مياس: وين الزفة لعد؟ شهم: هههههه، والله سؤال. إن شاء الله تريديهم ينتظرونه؟ مياس: لا صدق، وينهم؟ شهم: راحوا للفندق بعد. مياس: شتسوي شهم؟!!! شهم: كل خير عمري. شغل السيارة وتحرك. ظليت صافنة عليه وعلى تصرفاته. الصور. حبي. عمري. كل شيء اليوم غريب وماله أي تفسير بالنسبة إلي. خلص الطريق بلا ما نحچي، فجأة وكف السيارة ونزل جاب جنطة من ورا.

شهم: يلا نزلي. باوعت گدامي فندق. درت وجهي عليه والأسئلة واضحة بعيوني قبل لساني. شهم: هسه تعرفين على شنو مستعجلة. بس غطي وجهچ زين لمن تمشين، ما أريده يبين. جريت الشال على وجهي ومشيت ويا بلا ما أشوف. حسيت على هوسة عالية، رفعت راسي شفت روحي بنص الفندق. تعبت من الأسئلة والصدمات، لذلك سلمت نفسي للأمر الواقع حتى أرتاح. لزمني من إيدي ومشينا، وگف گدام غرفة فتحها وأشرلي أدخل.

طبيت أباوع داير مدايري. الغرفة غرفة عرسان، حتى كاتبين بالگاع "ألف مبروك للعروسين مياس وشهم" وداير مدايرها ورد وشموع. رفعت راسي إله متعجبة. تقرب مني يضحك. أخذ العباية من چتفي وسحب الشال. شهم: طالعة كلش حلوة حياتي. مياس: عفية شهم، شديصير؟!!! شهم: شديصير يعني؟ اليوم عرسنا. مياس: منو؟!!! شهم: هههه، اني وإنتِ. مياس: أحلف بالله. شهم: وداعتچ عندي. مياس: زين شلون وليش وشوكت؟!!! شهم: على كيفچ، وحدة وحدة.

إنتِ مو چنتِ تصديني دائمًا لأن تخافين من مشاعري تكون مؤقتة وأندم بعدين؟ مياس: أييي. شهم: وهاي اني سويت كل هالشي حتى أثبتلچ شهم يحب مياس ويموت عليها. مياس: تحچي جد؟ شهم: وجد الجد وغلاتچ عندي. اليوم أحنا تزوجنا واليوم انكتبت لنا حياة جديدة. حياة حلوة ما بيها غير شهم ومياس. مياس: شلون سويت كل هالشي، والله ممصدگة. شهم: هههه، اتفقت ويا منال.

طلبت منها تشتريلچ بدلة بيضة وتسويلچ مكياج عرايس علمود يصير هذا اليوم مميز إلي وإلچ. مياس: يااااا. يعني هي أخذت ملابسي متعمدة؟ شهم: هههه، أي اني گلتلها حتى ما تبدلين. مياس: كل هذا واني ما حسيت، والله مو قليلين إنتوا الزوج. تقرب مني أخذ إيديه بإيده وباسهن ثنينهن. شهم: أحبچ مياس. أحبچ كلش هواي وفوق ما تتصورين لدرجة اني نفسي مستغرب شلون حبيتچ لهالدرجة.

ابتسمت ودنگت وجهي خجلانة منه. باوعت لإيدي، مسكة الورد تجنن، معقولة بالاستوديو منطيهيا؟ مياس: شهم. شهم: حياتي. مياس: هذا الورد يجنن، بس منو جابه؟ شهم: اني وطبيعي لعيونچ، ما حبيت أجيبيلچ اصطناعي. مياس: كلش حلو، عاش ذوقك. شهم: ما راح تعترفيلي هسه؟ مياس: بشنو؟!!! شهم: بحبچ، ما طول ما ظل شي تخافين منه بعد اليوم. مياس: دنگت وجهي: أحبك شهم. رفع راسي وعاينلي بابتسامة. شهم: گوليها وإنتِ تباوعين بعيوني. مياس: أحبك.

شهم: من شوكت؟ مياس: هههه، من أول يوم شفتك بيه بالشارع. باس راسي وحضني حيل. نزع سترته وراح للحمام توضأ ورجع. شهم: متوضية لو لا؟ مياس: أي طبعًا، لأن منال وصتني ألف مرة علمود أتوضأ حتى تكمل خطتكم عدل. شهم: هههه، تعالي أم السان، خلي نصلي سوة. وگفنا صلينا وأول ما خلصنا جابولنا العشا. تعشينا بس گوه أكلت، ما أعرف ليش خايفة كلش وكأني أول مرة أنجمع بيه. راح غسل ورجعلي، بس طلع من الحمام غمزلي، صخنت گبل.

مياس: شهم لا تسوي هالحركات. شهم: تقرب مني: ليش حياتي؟ مياس: أستحي والله. شهم: هسه شوية وينتهي هذا الخجل منچ. جرني من خاصرتي لحضنه بقوة. رفعت راسي باوعت عليه يضحك. شهم: تذكرين من تقربت منچ أول مرة؟ مياس: صحت بنبرة عصبية: ليش أگدر أنساها؟ شهم: ههههه. شوفي بيومها چنت أريدچ وما أريدچ. ما أعرف شلون أفسرلچ شعوري، بس كلش چنت مرتاح وياچ.

تمنيت أتغزل بيچ بس خفت، ما أدري ليش. إما هسه فمستعد أتغزل بيچ للصبح بلا ما أتعب أو أمل حتى. مياس: امممم، شلون تتغزل يعني؟ شهم: يعنيييي. نزل على رگبتي باسها بهدوء: هذا المكان هو كل راحتي لأن أول مرة حضنتچ صحيت واني مرتاح كلش. باس إيدي: وهاي الإيدين هي احتواءي ومملكتي الأريد أعيش بيها كل العمر. سحبني لحضنه: وهذا الحضن هو الشي الوحيد اللي راح يعوضني عن كلشي مر عشته بحياتي.

فتحت عيوني لأن كلامه چان فوق استيعابي وتصوراتي. عمري كله أحلم باللحظة اللي يعترفلي بيها شهم بحبه، بس ولا تخيلتها بهالجمال والروعة. شهم: مياس. مياس: نعم. شهم: أريدچ تصيرن روحي بحيث إذا فارگتيني أموت. مياس: خليت إيدي على حلگه بسرعة: اشش، اسم الله عليك عفية لا تحچي هالشكل. إنتَ أصلًا روحي وبدونك مياس تموت. تقرب مني وغمض. سحبت نفس قبل ليبوسني حتى أگدر أعدّي الموقف سلامات بلا ما يصير لي شي.

أخذ شفتي بشفته بس ما گدرت أتجاوب ويا من الصدمة. دنگ على رگبتي يبوس بيها برقة. ذبت بين إيدي، ما حسيت إلا شالني لحضنه. خلاني على الچرپاية وصار فوگايه. شهم: مستعدة تصيرين مرتي بقلبچ وروحچ وكلشي بيچ قبل جسمچ؟ مياس: اني مستعدة، بس الأهم من هذا إنتَ مستعد تسلمني قلبك وروحك وكلشي بيك؟ شهم: شهم وقلبه وحياته وعمره وكل أيامه الجاية إلچ فدوة ونذر. مياس: تحبني شهم؟ شهم: ذايب بحبچ وأبو فاضل العباس.

حچى هيچ ودنگ يبوس بيه. رحت ويا لغير عالم وحسيت هاي الليلة صدق مميزة وأبد ما تشبه أول مرة تقربلي بيها. هاي الليلة تميزت بحب شهم إلي. حسيت بهذا الحب ويا كل لمسة منه وكل حركة مو مثل قبل. شوية وبده يفقد: تأذيت كلش بس ولا يسمعني من أحاچي. سكتت وتحملت الخاطره لحد ما وخر مني. شهم: أحبچ يولي. مياس: واني أموت عليك. شهم: خو ما أذيتچ حياتي؟ مياس: فدوة إلك عمري. تمدد وسحبني لحضنه. خليت راسي على صدره، سمعت دگات قلبه مو طبيعية.

مياس: هاي ليش قلبك هالشكل يدق سريع؟ شهم: من حبچ غير. مياس: رفعت راسي ابتسمتله: صاير لوتي حبيبي. شهم: وعيونچ الحلوة، اللي ما أقبل أحد يتغزل بيهن غيري، مو لوتي. مياس: هههههه، ليش چنت حارمني من هالحب والدلال كل هاي السنين اللي راحت؟ شهم: واني محتاج هالحب والدلال اللي تحچين عنهن أكثر منچ، بس ما چنت أتجرأ أدخل بهذا العالم بسهولة. مياس: يا عالم؟ شهم: عالم السعادة والراحة. عالم مياس وشهم وبس. مياس: أموت عليك والله.

شهم: واني أعشقچ وروح أبويه. ظل يتغزل بيه وعيشني بليلة ولا بالأحلام لحد ما غفيت بلا ما أحس على نفسي. صحيت الفجر شفته ديقرا قرآن، ارتاحيت كلش لأن صارت عندي عقدة من هذيج الليلة. حس عليّ صدق وگام. شهم: صباح الحب. مياس: صباحي إنتَ. شهم: شلونچ، مرتاحة؟ مياس: شلون ما أرتاح واني وياك؟ شهم: تقرب باتجاهي وحضني: گومي غسلي لعد حتى تصلين ونطلع. مياس: ما عندي ملابس. شهم: هذني لعد شنو؟

درت وجهي شفته يأشر على جنطة. فتحت عيوني متعجبة. مياس: هاي جنطتي منو جابها؟ شهم: حبيبچ. مياس: بسته من خده: أروح فدوة لحبيبي ومفاجأته. شهم: اسم الله عليچ يولي لا تحچين هيچ. يلا استعجلي شوية. گمت غسلت وصليت. جابولنا الريوگ، تريگنا وطلعنا. باوعت للطريق ما أدري وين دنروح، مو طريق البيت هذا. مياس: شهم. شهم: عمري. مياس: وين دنروح؟ شهم: تعرفين أول وتالي، لذلك اتركي عنچ الأسئلة.

ما أعرف شگد مر على الوقت وإحنا بالطريق لأن نمت. حسيت على شهم ديگعدني. نزلت ويا مشينا مسافة وتفاجأت من وصلنا للوادي. باوعت على گبر مهيب ونهى. دمعت عيوني بسرعة، ولا مرة زرتهم من ماتوا لحد الآن. تقربت من گبر مهيب. گعدت يمه أمسح بإيدي على گبره. شوية شوية بديت أبچي بخنگة وأحچي ويا نفسي. مياس: شلونك حياتي، إن شاء الله مرتاح؟ اعذرني لأن ما اجيتك بس والله ما چنت أگدر. أدري بنفسي ما أتحمل أشوفك نايم بقلبك گدام عيني.

عمري كله ما أنساك لأن إنتَ مستحيل تنسي. إنتَ مثل البلسم ينحط على الجرح يطيب بس يترك أثر طيب وراه. بفضلك إنتَ من بعد رب العالمين اني عايشة بخير وأمان. وصيت شهم عليّ ووفيت بوعدك: ما خلفت كلامك من گلت ما أعوفچ حتى لو أموت. وشهم هم ما عافاني. سندني وحماني من سميحة وعماد لحد ما خلاني أحبه غصبًا عني. الله يرحمك يا غالي ويسكنك فسيح جناته مع الأولياء والصالحين لأنك تستاهل هالمنزلة الرفيعة.

باوعت لمياس دموعها تجري ولازمة گبر مهيب. گعدت بصفها وحطيت إيدي على گبر نهى أحچي وياها. شهم: بنيت گلبي شلونچ؟ اشتاقيتلچ حيل والله العظيم. هاي اني اليوم اجيت وجبت مياس ويايه حتى نزوركم إنتِ ووليدي الغالي. نفذت وصيتكم مثل ما طلبتي إنتِ ومهيب وما چذبتوا من گلتوا راح تحب مياس. فعلًا حبيتها. غصبًا عني حبيتها لأن صارت إلي والبنتچ الأم والأخت والصديقة وكلشي نحتاجه بهاي الدنيا.

شكرًا إلچ والمهيب من كل قلبي لأن لو ما إنتوا مستحيل أفكر بيها وأحبها كل هالحب. لو ما إنتوا چان ظليت كل عمري عايش وحيد وتعيس وضايع. بعد موت مهيب صبرت بوجودچ يمي بس بعد موتچ انكسرت. أي نهى انكسرت بس مياس ونهى بتنا هن الوحيدات اللي گدرن يصبّرني على غيابچ ويطلعني من حزني. ما أنساچ حياتي ويومية أدعيلچ. كلما أباوع بعيون نهاوي أشوفچ بيهن، لذلك إنتِ موجودة بعيوني قبل قلبي.

لزمت گبر مهيب بيدي وجرت دموعي اللي صالي ساعة لازمها بالگوه. خويه الغالي اشتاقيتلك. والعباس أبو فاضل اشتاقيتلك فوك ما تتصور. شكرًا لك على وصيتك اللي أنقذتني بيها قبل ما تنقذ مياس. بعد ما دفنت نهى يمك صرت شبه ميت وحب مياس حياني وداعة عيونك الحلوة. الله يرحمك ويرحم نهى ويحسن عاقبتنا مثلكم حتى نقابل رب العالمين بوجه أبيض. سمعت مياس حكت بصوت مسموع وهي تشهك وحاطة إيدها على قبر نهى: مياس: نهاوي حياتي اشتاقيتلك.

والله اشتاقيتلك واشتاقيت لأيامنا الحلوة سوى. اشتاقيت لضحكتك ولصوتك وشقاك العسل. اشتاقيت لكلشي بيك. لا تخافين على نونة لأن يشهد ربي ضامتها بقلبي قبل حضني. هاي بنتي نهى وداعتك عندي بنتي، أخاف عليها مثل روحي وأكثر صدقيني. جان جبتها لك بس ما أدري راح نجي لهنا، أوعدك المرة الثانية راح أجيبها وأقعدها يم قبرك حتى تشبعين منها. مديت إيدي عليها قومتها ومسحت دموعها بيدي.

شهم: كافي عمري لا تبكين بالعافية عليهم اثنينهم راحوا شهداء. مياس: اشتاقيت لهم شهم. شهم: دمعت عيوني من كلامها: وأنا هم اشتاقيت لهم. لزمت إيدها ودرنا وجهنا للقبر، قرينا لهم الفاتحة ودنقت بوستهم وطلعنا من الوادي. مياس: شهم نونة وين؟ شهم: يم منال لا تخافين. مياس: انطيني جهازك أخابرها ظل بالي يمها. شهم: لا عمري ما يحتاج هسة راجعين أحنا. مياس: حياتي شكرًا الك لأن جبتني لهنا. فعلًا جنت محتاجة أزورهم وأرتاح.

شهم: وأنا محتاج هالراحة أكثر منك لذلك ماكو داعي تشكريني عمري. شغل السيارة ورجعنا لبغداد، تفاجأت من وقفني قدام المحكمة حتى نعقد وفرحت بهاي الخطوة لأن بيها صرت مرته شرعًا وقانونًا. كملنا العقد ورحنا بوجهنا للبيت، أول ما وصلنا ركضت قبله حتى أشوف نونة. دخلت للصالة شفت الحجية قاعدة وبيدها نونة، رحت على السريع أخذتها لحضني وسلمت. الحجية: بالمبارك عليكم يمه. شهم: الله يبارك بعمرك يوم. مياس: شكرًا خالة.

طلعت منال من غرفتها تهلهل بس شافتنا، رحت على السريع بوستها لأن إلها فضل جبير بالسعادة اللي أنا بيها حاليًا. منال: ألف مبروك ميوس يوم الولد الصالح إن شاء الله. مياس: الله يبارك بيك حياتي ومبروك هالسمرة. صدك رحتي لها؟ منال: إي وأمورها زينة الحمد لله. مياس: الحمد لله. أجت تبارك بوستني وباركت لي والتهيت وياهم للظهر، رحت لغرفتي بعد الغدا نومت نونة. لسا خليتها بسريرها دخل شهم. شهم: ها خاتون شعندك هنا؟

مياس: ههههه غير دا أنوم نونة. شهم: ممنوع هنا بعد. عدها سرير فوق ونوميها هناك ما أقبل تبعدون عني ولا دقيقة منّا ورايح. تقربت منه حضنته حيل وداخلي طايرة من الفرح، بادلني الحضن وجرني من إيدي على السريع. طلعنا سوى محد اكو الكل بغرفهم، باوع داير مدايره يتفحص المكان ما أعرف ليش. مياس: صفنت عليه: شبيك تباوع هالشكل؟ ابتسم بوجهي وشالني بحضنه، انصدمت من حركته لسا دا أحكي عض شفته حتى يسكتني.

صعدني فوق فتح الباب وما نزلني إلا على الجرباية. مياس: هاي شسويت شهم؟ شهم: حبيت تدخلين للغرفة وأنت طايرة حتى تظلين العمر كله فرحانة مثل هاي اللحظة. مياس: تقصد أظل العمر كله بحضنك مثل هاي اللحظة؟ شهم: وأنا؟! مياس: أنت هم تظل بحضني أكيد. شهم: أموت عليك وعلى رب العالمين اللي خلقك كهدية وتعويض لي عن كل قهر السنين. مياس: وأنا أحبك يا كلشي حلو صار بحياتي. أنت عوضتني عن النقص اللي جنت عايشة بيه.

صرت لي الأب والأخ والحبيب والزوج والصديق وحتى ابني هههه. شهم: أروح فدوة لبنوتي الحلوة. مياس: هههه أنا اللي أروح لك فدوة باباتي. دنق عليه أخذ شفتي بشفته وووو... (يلا بلا مطرود لشوكت أظل أعلم بيكن، هاي خصوصيات متزوجين عيب يولن عييييب) مرت ٣ أيام على زواجي من شهم والكل عرفوا بالموضوع. كنا عازمين سمر ويوسف على الغدا، قريب الظهر سمعتهم أجوا طلعت أركض لأن اشتاقيت لها كلش. مياس: سمورة. سمر: عمري اشتاقيت لك موت.

مياس: وأنا هم والله البيت وحشة بدونك. عمومًا ألف مبروك. سمر: ولك هم حياتي الله يسعدك أنت وخالو لأن تستاهلون. مياس: يااا شعرفك؟ سمر: نسيتي أنا متزوجة منو؟ صندوق أسراره يوسف. مياس: خرب حظي الموضوع واصل حتى ليوسف وأنا مثل الأطرش بالزفة. سمر: ههههه مفاجأة يولي. مياس: وربي أحلى مفاجأة. صبينا الغدا وأول ما كملنا عفناهم يسولفون وسحبنا سمر للتحقيق. طبّينا لغرفتها وسدت تبارك الباب، باوعت لنا تضحك.

تبارك: خبيثة من هسة أقول لك تندفين مثل مياس إذا شلعتي قلبنا. سمر: ههههه شتريدين تعرفن فضني. مياس: يفصل فيشة لو لا؟ سمر: يفصل ولهذاك الصوب حبي حتى ما يدري بنفسه شيصخم ويلطم وداعتك. مياس: ههههههاي وأنت يولي بس لا ما تفصلين. سمر: أفصل بس بيه مجال بس تصعدين الجوزة أرجع. تبارك: هههه خرب حظك على هالسالفة. سمر: يا بنات أنا فرحانة. مياس: فدوة لقلبك دوم يا رب. سمر: وربي جنت غبية.

شلون أرفض واحد مثل يوسف وأعذبه وياي كل هاي السنين الفاتن. ما تعرفون شنو من إنسان، شقد ما هو طيب ونادر شقد ما طلع أطيب لمن عاشرته وحبيته. مياس: الله يخليه لك من صدك رجال مثل ابن خالته. تبارك: أحم أحم ورجلي شبيه لعد؟ مياس: عاد أنت تقولين لنا رجال لو لا؟ تبارك: ضربتني بالمخدة: رجال ونص حقيرة. ها صدك بنات بمناسبة الرجال أنا حامل. مياس: شنوووووو؟ سمر: أحلفي بالله.

تبارك: وداعتكن اثنينكن البارحة جاب لي جهاد تحليل منزلي وطلعت حامل بس ما قلت لكم علمود أسويها مفاجأة. مياس: عمري ألف مبروووووك. قمنا نبوس بيها ونحضنها ما مصدقين هذا الخبر لأن كان بالنسبة لنا مفاجأة تخبل بعد طول انتظار. مر شهرين وشهم ما كان يقبل نسوي أطفال لأن منال موصيته حسب ما قلت لها الدكتورة لازم أرتاح فترة طويلة علمود لا يتكرر الإسقاط عندي.

فد يوم قاعدة ألعب ويا نونة وأوكلها بيض لعبت نفسي من ريحته، عفتها وطلعت للحمام أركض لأن حسيت نفسي أريد أتقيأ. قلبت معدتي بالقوة، غسلت ورفعت راسي للمراية مصدومة: معقولة حامل زين شلون وأحنا ما نسوي طفل؟ رجعت للغرفة أحسب ويا نفسي وانصدمت لمن شفتها فايتتني صار لها ٣ أيام. فرحت كلش، أتمنى هذا الشي وأنتظره بلهفة بس خايفة لا أخسره مثله مثل الباقين.

نزلت لتبارك على السريع، خليتها تخابر جهاد وطلبت منه يجيب لي اختبار منزلي علمود أتأكد قبل لا أقول لشهم. أجا بالليل جايبه، انطتنياه تبارك ووقفت لي بباب الحمام تنتظر النتيجة. سويت الفحص وغمضت عيوني أدعي كون تطلع النتيجة إيجابية. شوية وفتحت، ما صدقت لمن شفت اكو خطين بالجهاز. طلعت على السريع. مياس: تبارك حامل والله حامل. تبارك: ياااي ألف مبروك ميسو. مياس: والنبي ما مصدقة. تبارك: ليش ما تصدقين غير متزوجة رجاااال.

مياس: بلا شقاك هسة وخري من وجهي خلي أصعد أبشر رجلي. صعدت أركض حتى نسيت نفسي حامل، دخلت لقيته متمدد يتفرج أخبار بس شافني قعد على حيله. شهم: شنو هذا حالك حبي؟ مياس: مديت له الجهاز: باوع. شهم: شنو هذا؟ مياس: أنا حامل. طفر من مكانه وأخذ الجهاز من إيدي، باوع علي ورفع راسه مصدوم. شهم: مياس شلون لا تخبليني. مياس: عمري عاد أنت مشهود لك بهاي السالفة. شهم: لا صدك أحكي. مياس: أسأل نفسك أنا شعليه والله حلوة هههه.

شهم: مو قالت الدكتورة مو زين الحمل هسة. مياس: كلشي ماكو عمري لا تخاف بس كون أقول لخالتي علمود تاخذني لسيد مدري شنو أخاف أرجع أسقط من جديد. شهم: الله لا يقولها يمعودة. مياس: فرحان حبي؟ شهم: فوق ما تتصورين بس والله أخاف عليك. مياس: وداعتك ماكو شي لا تخاف. زين قل لي شتريد ولد لو بنية؟ شهم: كلشي يجي من رب العالمين خير وبركة. مياس: طبعًا عمري، بس متأكدة اكو بقلبك أمنية قولها الله يخليك.

شهم: أتمنى ولد بس علمود أسمي مهيب مو أكثر. مياس: دمعت وحضنته بقوة: وربي أحبك وأموت عليك. شهم: أذوب بهاي الكلمة تصدقين لو لا؟ مياس: اللي أحبك؟ شهم: لا تقوليها بعد ترى ما يصير خير وأنت حامل. مياس: أحبك أحبك أحبك أحبك أحببببببببك. شهم: تعالي لعد أنت جبتيها لنفسك. شالني بسرعة للجرباية، نومني وووووو (نرجع ونطردكم لأن أنتو لزقة ما يفيد وياكم الحكي)

الكل عرف بخبر حملي وكانت فرحتهم ما توصف لأن منتظرين هالشي على الرغم من الخوف اللي بداخلهم من التابعة اللي عندي وزادت فرحتهم بخبر حمل سمر بنفس الشهر. أخذوني لكربلاء اكو سيد معروف هناك، سوى لي قطع لبسته وانطاني هواي أشياء أسبح بيهن وأقراهن ومن هالأمور. بعد ما رجعنا مباشرًة شهم أخذ أبويه لنفس هذا السيد لأن كلش معروف بهاي السوالف والناس تتعنى حتى من خارج العراق.

انصدمت لمن رجع وقال لي أبوك مسحور وسميحة اللي مسويته السحر لأن السيد وصفها لهم. أنا أدري بيها من أول ما تزوجته تشتغل بهاي الأعمال الشيطانية بس ما جنت أعرف هاي الأعمال تأثر على صحته وتسوي بيه كل هال المصايب. الحمد لله بفضل الله وهذا السيد تحسن أبويه ورجعت له عافيته وبعد ما اطمأن أحمد عليه رجع للرمادي ولحياته ويا أهله.

مرت ٥ أشهر على حملي، تبارك أخذت سونار بيها بنوتة وسمر ولد بس أنا ما بين لأن جنت مستعجلة فأخذته بأول الرابع. فد يوم الصبح اتصل بيه أبويه جاوبته بسرعة. مياس: ها بابا خير من الصبح خو ماكو شي؟ أشرف: لا بابا لا تخافين. بس سميحة مريضة كلش وتريد تشوف الجهال فخابرت... مياس: قاطعته على السريع: ليش شبيهة؟ أشرف: محد يعرف مثل ما سوت بيه وخلتني أنام بالفراش أشهر بلا ما أوقع على علتي صار بيها. مياس: لا حول ولا قوة إلا بالله.

والمطلوب بابا؟ أشرف: تريد تشوف الجهال وأنا ما أأمن أدزهم وحدهم لذلك روحي وياهم بنيتي إذا تقدرين. مياس: من عيوني بابا بس أسأل شهم بالأول. أشرف: تسلم عيونك باباتي. أنتظر ردك. سديت الخط منه وضجت على سميحة، رغم كلشي تظل أم إخواني وكسرتها كسرة لهم هم. أجا شهم وقلت له على طلب أبويه ما عارض لأن قال تظل أم ومو صحيح تموت بحسرة شوفة أطفالها. أخذنا شهم ثاني يوم إلها، دخلنا وهو ظل منتظر بالباب.

أول ما طبيت صارت قبالي، تعجبت من شفتها صايرة عبارة عن هيكل عظمي من الضعف وشعرها ماكو تقريبًا. خافوا إخواني يتقربون منها لأن ما عرفوها من شكلها المخيف، ظليت أقنع بيهم لحد ما بالقوة قبلوا يروحون لها. بوست بيهم وقامت تبكي، باوعت عليهم وبالقوة لازمة نفسي حتى لا تنزل دموعي عليها بعد كلشي سوته بيه. قريب الربع ساعة دق عليه شهم، سحبتهم منها وسلمت دا أطلع صدمتني من قالت: سميحة: سامحيني مياس. مياس:

باوعت لها بحزن وعتب: الله يسامحنا جميعًا. طلعت بسرعة بس صار شهم قدامي ما تحملت وبكيت، أجاني على السريع. شهم: حياتي ليش تبكين بس لا غثتك؟ مياس: لا شهم بالعكس طلبت مني السماح. شهم: لعد ليش دا تبكين؟ مياس: انقهرت عليها مثل الثولة ونسيت كلشي. شهم: طيبة حبيبتي مو ثول وأموت على هالخصلة اللي بيك. قدر يخليني ابتسم رغم الموقف المحزن، ابتسم لي وأخذ إخواني من إيدي صعدهم بالسيارة.

رجعناهم لبيت أهلي ورحنا للدكتورة من طريقنا عندي موعد وياها علمود أعرف جنس البيبي. سوت لي سونار وبداخلي أدعي يبين ويكون ولد علمود نسمي مهيب، هم ذكرى تظل بيناتنا وهم شهم يرتاح لمن يحس بأخوه عايش ما مات. الدكتورة: البيبي صحته تمام والحمل عال العال ماما. مياس: عرفتي جنسه؟ الدكتورة: إي ولد حبيبتي. مياس: تنفست بضحكة: ألف الحمد لله رب العالمين.

أول ما خلصت، طلعت ع السريع حتى أبشر شهم. باوعت له كاعد بالسيارة ينتظر وما حس عليّ من اجيت يمه. مياس: ها حبي، خو ما عطلتك؟ شهم: فدوة الچ عمري. بشريني. مياس: بنوتة. شهم: صدقة لله، أحلى أم وأحلى بنوتة. مياس: يعني ما ضجت؟ شهم: وليش دا أضوج بلا؟ مياس: مو چنت تريد ولد؟ شهم: لأن ردت أسمي مهيب، بس مو معناها أضوج إذا صارت أخت النهاوي. ما طولت أنتِ أمها، فهنيالي بيها ألف مرة. مياس: هههه، لعد شنو رأيك راح يجينا مهيب؟

شهم: بصلاة محمد. مياس: هههه، عليه أفضل الصلاة والسلام. شهم: تحچين صدق يعني؟ مياس: وداعة عيونك يروحي أنت. شهم: ألف الحمد لله والشكر ربي. وأخيرًا حس مهيب راح يرجع للبيت. مياس: أنت فعلًا شهم حياتي، وأني أحب الشهم. شهم: وأني أموت على مياس قلب الشهم. لهنا انتهت حكايتي مع الزمان، لكن حكايتي مع حبيبي وحياتي وزوجي شهم ابتدت اليوم. تعذبت أي. تشردت أي. انظلمت هم أي.

بس رغم كل هذا، الله عوضني عن كل شيء، ويا محلى تعويض رب العالمين. شكرًا لكل الناس الحبوني ورافقوني بحكايتي طول الأيام الفاتت. والشكر الكبير لحبيبتي وصديقتي وأختي اللي عرفتني عليها الصدفة الكاتبة (لبنى الموسوي) مشكورة حياتي وما قصرتي. رجعتي عيشتيني ويا قصتي وكأني دا أرجع بالزمن للوراء. بچيت ببعض المشاهد واحترق صدري ببعضها، وضحكت على الأخرى. وأهم شيء وصلت للعالم معاناة يتيمة وشهامة المنقذ لها.

المتابعين، أحبكم وأحب تعليقاتكم والله العظيم، وراح نظل على تواصل من خلال كاتبتنا المبدعة إذا الله راد. لذلك لا تحذفون القصة من مكتبتكم، يجوز نسوي جزء ثاني هههه. صح مرات أغار وهواي أغار هههه، بس أظل أحبكم خصوصًا المشاكسات زوزة وورود. دعواتي الكم بظهر الغيب: ربي يبعد عنكم وعن أحبابكم كل مكروه وأذى. _لهنا وخلصت قصتنا المميزة. عشنا ويا أبطالها أيام ما تفارق الذاكرة للأبد. وتعلمنا منها الكثير.

العدالة الإلهية هي سر الوجود، بدونها مستحيل يقدر الإنسان يكمل حياته. الدنيا بخير ما طول بيها ناس سباع ورجال من جد مثل شهم ومهيب والخ... (وأما اليتيم فلا تقهر) ... تأكد إذا ظلمت اليتيم عقاب رب العالمين على ظلمك راح يكون قاسي وأقسى مما تتصور. لحد يتبع طريق الشيطان (السحر والشعوذة) ، نهاية طريقها الهلاك لأنها تلف تلف وترجع على صاحبها.

الشرف غالي ورب العالمين ينهى عن رمي المحصنات بلا سبب، لذلك كلمن يدوس على عرض غيره ينداس على عرضه بنفس الطريقة. جزاء طيبتك هي الطيبة ذاتها، فلحد منكم يتصور الطيبة بلاء أو غباء، بل هي نعمة عظيمة من رب العالمين ما يحس بيها إلا اللي يفقدها. مهما عدت بيكم السنين، لحد منكم ينسى الشهداء اللي ضحوا بدمهم علمود يحموكم ويخلصوكم من بلاء داعش وغيره، لأن بدمائهم احنا انتصرنا.

أني شخصيًا تعلمت الكثير من هاي القصة، مو فقط الأمور اللي ذكرتهن، وأكيد كلكم تعرفون هذا الشيء ومتأكدين منه. قصة مياس نقلتني لعالم ثاني. حقيقة استمتعت بكتابتها رغم كل الظروف السيئة اللي مريت بيها من مرضي ومرض والدتي من بعدي وغيرها. لكن تظل هاي القصة محفورة بالذاكرة بعد الأيام الحلوة اللي قضيتهن بكتابتها.

أتمنى تكونون استفاديتوا منها أكثر مما استمتعتوا بيها. لا تنسون التصويت ع القصة، واللي ما مصوت خلي يرجع يصوت فضلًا وليس أمرًا. بعد ما انتهت القصة حبيت أرد على سؤال مهم متكرر كثيرًا عن (أعمالي) أني عندي 4 أعمال حاليًا كلها حقيقية: -مياس قلب الشهم / رافقتوني بيها للنهاية. -أبي لم يكن إنسانًا / انطبعت كتاب ويباع حاليًا في دار شمس للنشر والتوزيع. -فصلية لأناس لا يرحمون / مكتملة. -مذاق الحرمان / قيد الكتابة...

راح أبلش بيها عن قريب بعد ما أستعيد عافيتي، لذلك نزلوها بمكتبتكم حتى لمن أبدي بنشرها يوصل لكم الإشعار. وفي الختام، ابرولي الذمة أخاف قصرت وياكم أو تأخرت عليكم بقصد أو بغير قصد، وبدوري أني باريت لكم الذمة جميعًا. كل الحب والتقدير الكم متابعيني الأعزاء، وألقاكم في القريب العاجل مع (مذاق الحرمان) إن شاء الله. تحيات أختكم الكاتبة #لبنى _الموسوي.