رواية مياس قلب الشهم الفصل الثاني والخمسون 52 - بقلم لبنى الموسوي

#مياس_قلب_الشهم

للكاتبه #لبنى_الموسوي

چنتّ أغآزلهآ ويُمرّهآ ألمستحة
وتگليّ هآ : هـٱ يَ بعد ألهآ إحبچ 💕

تقرب مني بابتسامه
فات من يمي سد الباب ورجعلي .. باوعت علي مستغربه تصرفه هذا

ظل يتقرب مني واني ارجع ليوره بخوف لحد ما انحصرت يم الباب

صرت بين شهم وبين الباب ما بيني وبينه غير سنتيم واحد
دنگ عليه حط گصته على گصتي وغمض عيونه

شهم.. اممم گلتيلي اليحب مستحيل شي ينسي حبه غير الموت

بلعت ريگي بتوتر .. باوعتله مغمض ومبتسم عرفته وين يريد يوصل من كلامه
دفعت صدره بقوه حتى اوخره عني وگتله :

مياس.. شدتسوي انت !!!!

شهم.. دا اسألچ ومنتظرچ تجاوبيني

مياس.. وعلى شنو اجاوبك ؟؟

شهم.. اليحب ماكو شي ينسي حبه غير الموت ؟!

مياس.. اي طبعاً

شهم.. زين اني بعدني عايش ما متت
افهم من كلامچ بعدچ تحبيني .. ورفع حاجبه

مياس.. فتحت عيوني مصدومه : شجاب هاي على هاي !!
بعدين والله مصدگ نفسك انت .. منو گلك اني احبك من الاساس

شهم.. ابتسم : انتي شنو شنوووو ؟ عيدي

مياس.. باوعلي والله العظيم...

بعدي ممكمله كلامي قاطعني من باس شفتي حيل
جمدت بمكاني من الصدمه .. شويه وصحيت على نفسي دفعته وطلعت من الغرفه اركض

نزلت بوجهي الغرفتي .. وگفت گدام المرايه لزمت شفتي وصفنت على روحي مدا استوعب الصار قبل شويه

مياس.. يا ربي هذا شبي ؟!!
ليش ديتصرف ويايه هيچ والله راح يخبلني

من جهه يگلي بابا وندم لأن تقربلي ومن جهه ثانيه گام يسوي هالحركات الغريبه فجأه وبلا مقدمات

وين تريد توصل شهم !!
حرام عليك والقرأن تعبتني .. ليش دتلعب على مشاعري بهل طريقه الحقيره  !!

ظليت بالربع ساعه متوتره وضايجه لحد ما هدأت شويه
طلعت اشتغل ويا البنات واصبر سمر بنفس الوقت على مصيبتها لحد ما صار العصر

واگفه بالمطبخ اجهز التقديم ويا منال دخل علينه شهم مبدل ديطلع

شهم.. ها منال كلشي جاهز ؟ لتفشلونه ويا العالم

منال.. لا خويه ليظل بالك كلشي تمام

مياس.. باوعتله بقهر : شهم راح تسويها صدگ ؟!!

شهم.. لعد عدنه لعب جهال قابل

مياس.. شبيكم انتو ؟!!
ما فكرتوا بسمر  المسكينه شراح يصير بيها من تجبروها ع الزواج من شخص ما راغبتله

شهم.. بالخطوبه تتعود علي حالها حال بقية العالم
هي لا اول ولا اخير وحده تتزوج زواج تقليدي

مياس.. حرام عليكم .. والله العظيم حرام عليكم

عفتهم وطلعت بعصبيه
رحت الغرفة سمر لگيتها مگطعه نفسها من البچي

مياس.. عمري كافي والله مردتي روحچ مرد

سمر.. مياس ما اريد اتزوج
ليش محد ديفهم عليه .. وروح خالو مهيب ما اريد اتزوج

لهل درجه اني ثگيله عليهم بحيث بس يردون يخلصون مني بأي طريقه

شسويتلهم بس فهميني ؟!!
غلطت مره وگلت التوبه .. صرت گدام عيونهم ٢٤ ساعه مثل الكتاب المفتوح

لا موبايل
لا طبه وطلعه
وحتى دوامي ما احس بي شوكت يبدي وشوكت يخلص ركض ركض ارجع للبيت علمود ليحچون عليه او يضوجون مني

شيردون اكثر من هذا ؟!! بس فهميني

مياس.. باوعيلي سموره
شهم يعرف انتي تحبين يوسف ويوسف يحبچ

سمر.. صفنت بوجهي : صدگ تحچين ؟!
منو گله ولچ

مياس.. اني
تذكرين من عرفتي بخبر خطوبة يوسف وانتحرتي بوقتها

سمر.. اييي

مياس.. شهم شك بالموضوع ونزل بيه دگ تحقيق لحد ما اعترفتله بكلشي حتى حب تبارك الجهاد
وهو هم ما قصر قنع جهاد يتزوجها بنفس اليوم

سمر.. لعد ليش ما حلي مشكلتي اني

مياس.. حسب ما فهمت منه اليوم هو ملمح اليوسف اكثر من مره بس ما شاف منه تجاوب فگلي : شسويله بعد .. خو ما اجبره عليها اذا ميريدها

سمر.. شفتي مو گتلچ ميريدني
والله ميريدني .. ورجعت تبچي بحرگه

مياس.. لا يريدچ بس انتي ثوله سمر

سمر.. ليش ؟!!

مياس.. اخير مره تواجهتو بيها شگتيله تذكرين ؟؟

سمر.. اي
گتله انت ردت تنتقم مني وتحاسبني على مشاعري المو بيدي بهاي الطريقه

مياس.. جيد لعد وصلتي للأريد اگوله

سمر.. شنو يعني ما فهمتچ ؟؟!

مياس.. صدگ ثوله والله
ولچ بعد هذا الكلام الحچيتي اله تأكد يوسف انتي متحبي
شلون تردي يتحرك ويتصرف وهو ميدري عندچ مشاعر اتجاها

سمر.. اي صح كلامچ
بس شلون اخلي يعرف ؟! خو ما اروح اگله يوسف اني احبك لتعوفني
صعبه .. كلش صعبه

مياس.. لا طبعا متگليله هيچ .. كرامتچ فوگ كلشي
الرجال هو الـ الازم يبادر مو العكس

سمر.. والحل شنو ؟؟

مياس.. الحل بعد ميخلص هذا اليوم ويرحون العالم تتصلين من جهازي بيوسف

سمر.. ليش اتصل ؟!!!

مياس.. خلي اكمل لتقاطعيني

سمر.. يلا كملي

مياس.. تتصلين وتگليله هالحچي
يوسف اني ما اريد اتزوج الله يخليك حاچي شهم وامنعه يوافق على هذا الولد

اكيد هو الفضول راح يشتغل عنده ويسألچ ليش ؟

انتي بدورچ تجاوبي : ما اريد اتزوج شخص ما احبه
وبنفس الوقت صعب الگه رجال مثل خالي يحميني ويحافظ عليه

الله وكيلچ بس تگليله هيچ يعترفلچ بمشاعره غصباً ما علي لأن راح يعرف قصدچ كلش زين

سمر.. خرب عقلچ مياس
وربي انتي داهيه .. منين دتجيبين هاي الافكار بس فهميني ؟!!

مياس.. اسرار دوله على گولة خالچ ههههه

سمر.. اروحلچ فدوه انتي وخالي .. وگمزت باستني

مياس.. هههه اسم الله عليچ
يلا دگومي عدلي نفسچ فشله العالم على جيه ولتخافين ان شاء الله يوسف يتحرك قبل لننطيهم الموافقه

سمر.. الله يسمع منچ يا رب

رحت الغرفتي غيرت النونه وبدلت اني هم وياها
سمعت الجرس اندگ وصارت هوسه عرفتهم اجو

طلعت ع السريع محد اكو يمكن بلاستقبال
شفت تبارك دتطلع صحتها ع السريع

مياس.. تبارك تعالي

تبارك.. ها عيني

مياس.. اجو الناس ؟؟

تبارك.. اي

مياس.. شگد عددهم

تبارك.. اربع نسوان كبار بالعمر وثنين شابات

مياس.. زين لعد هاچ نونه اجهز التقديم الهم

تبارك.. لا حبي ارتاحي انتي حامل
روحي گعدي واني اقدملهم بس اخذي سمر من طريقچ لأن منال وصتني ادخلها عليهم

مياس.. بسيطه هاي

رحت الغرفة سمر دگيت الباب لگيتها صافنه ع المرايه

مياس.. ها اجو مستعده

سمر.. لا

مياس.. شحچينه احنه ؟!
فوتي اگعدي وياهم فد ربع ساعه ويرحون وبلليل سوي الگتلچ علي وكلشي يخلص ان شاء الله

سمر.. الله يسمع منچ

اخذتها ورحنه للاستقبال
دخلنه بوسناهم وگعدنه .. ظلوا يباوعون السمر ويحچون بس مبين من كلامهم كلش خوش ناس ومرتبين

شويه وگاموا يرحون
ما فهمت شي من گعدتهم يعني بين قوسين لا حصلنه منهم حق ولا باطل
بس مجرد تعارفوا بيناتهم وطلبوا ايد سمر ومنال ردت عليهم الله كريم نرجعلكم خبر بأقرب فرصه

اول ما طلعوا صحت منال ع السريع بلكت افهم منها شي

مياس.. منال

منال.. ها ميوس

مياس.. شنو گتيلهم نرجعلكم خبر ؟؟
هو غير الولد صديق شهم وهو قبل يجون يخطبونها يعني شمنتظرين بعد ؟؟

منال.. شهم ميريد يستعجل وبنفس الوقت حاب سمر تقبل بي بلا ميجبرها
گال بلكت احچي وياها اقنعها توافق وتنسى يوسف

مياس.. عفيه والله زين يسوي ولو من هسه اگلچ مستحيل تنسى لأن تحبه

منال.. الله كريم شوفي وين تصفى تالي

مياس.. الله كريم

التهينه بمخلفات الخطار لحد الليل
تعشينه ولملمنه المطبخ .. هستوني گعدت بالصاله العب ويا نونه سمعت شهم يصيح : يا الله

منال.. منو جاي ويا ؟!

الحجيه.. يجوز يوسف

باوعت السمر تخربطت احاولها بس سمعت اسمه .. گمنه ع السريع لبسنه الحجاب ورجعنه للصاله لگينه يوسف فعلا موجود

-بعد ما زوجت جهاد وتبارك ورجعت مياس للبيت خلصت من كل المشاكل
ظلت الي مشكله وحده يوسف وسمر

طلعت بلليل للنادي والتقيت بي هناك حتى ابلغه برجعة مياس لان يوميه يسألني عليها چان

شهم.. شلونك ابو يعقوب

يوسف.. هلا بابو نهاوي الورده
اسأل عنك حبيبي ولو احنه يوميه نتشاوف هههه

شهم.. والله يوميه ؟!
لعد ليش هالگد اشتاقلك

يوسف.. هههه اخ منك انت فد واحد ما چذبت امي من گالت ماينگدر للشهم

شهم.. هههه وربي مشتاقلها بلكت باچر العصر امرلكم

يوسف.. تنورنا بعد گلبي

شهم.. ابشرك مياس رجعت

يوسف.. لا بربك !!
شلون ؟؟ احچيلي ولك بسرعه

شهم.. اول باركلي راح اصير اب للمره الثانيه

يوسف.. لا لا هيچ هواي
على كيفك ويايه وحده وحده لا كلهن سوه

شهم.. ههههه يابه الموضوع وما بي عرفتها حامل فسويت بيها مقلب على اساس نونه نشمرت وبالتالي اجتني تركض برجليها

يوسف.. هههه اخ منك اخ
حضني يضحك : الف مبروك حبيبي تگوملك بالسلامه ان شاء الله

شهم.. الله يبارك بيك ويسلمك
يوم الألك وافرح بيك

يوسف.. رحم الله والديك
هسه حاچيني خو ما بعدك تعتبرها بنتك وهي حامل منك يول

شهم.. هههه لا مترهم بعد

يوسف.. يعني اگدر اگول حبيتها

شهم.. عوف هذا الموضوع وگلي شوكت ناوي تتزوج ؟؟
ولك عمرك صار ٣٥ بعد محد تقبل بيك وعلي

يوسف.. ديلا يابه يلا
هاي انت ٣٩ سنه ومتزوجلك بت ال١٧

شهم.. ههههه ولك اني حالتي خاصه
بعدين لتقارني بيك .. اني تزوجت من چان عمري ٢٥ وهذا زواجي الثاني مو مثلك قافل ع القضيه

يوسف.. اوووف خليني ساكت يخوي

شهم.. ليش حاس اكو شي ومتقبل تحچيلي ؟؟

يوسف.. لا ماكو شي ليظل ببالك

شهم.. متأكد ؟!

يوسف.. اي

شهم.. براحتك

ما ضغطت علي بس داخلي ضجت كلش منين دا اجي يلفوها عليه مديقبل يعترف ويريحني

رجعت للبيت .. شفت مياس شايله نونه و واگفه اخذتها منها لأن اخاف عليها تتأذه وهي حامل

اشتغلت تحقيقات العائله لحد ما بلغتهم بالخبر اول وتالي لازم يعرفون شگد نريد نضم عليهم قابل

رحت العب ويا نونه بغرفة مياس وهي طلعت وعافتنه عود ضايجه مني

نص ساعه ورجعت .. كلما تشوفني تحجي بحديه وبصوتها نبرة هجوم وحقد

گمت من نهاوي مبتسم بداخلي من شكلها .. وصلت يمها ضربت چتفي بچتفها متعمد وطلعت بلا ما احچي شي

ثاني يوم رحت للمركز چان عندي دوام هناك .. هستوني واصل اندگت الباب ودخل صديقي

غسان.. عاش من شاف هالطول عيوني

شهم.. ههههه هلا بغسان والله وياك الحق بس ثق بمعزتك عندي مشغول وما شايف دربي

غسان.. حقك حقك
الطلب عليك عالي منو گدك

شهم.. هههه اي شلونك انت ؟ شعجب شرفتني لهنا

غسان.. اها
شكلك نسيت ؟

شهم.. شنو ؟!!

غسان.. اني مو قبل فتره گتلك اريد اتقدم البنت اختك وحضرتك گلت اجل السالفه شهر وهاي السالفه صارلها بدل الشهر اربعه وانت مغلس

شهم.. اي والله صح
حقك عليه بس راح من بالي صدگ

ع العموم دز الاهل اذا تحب يتدانشون وياهم بالموضوع بس من هسه اگلك الرأي الاول والاخير للبنيه يعني اذا ما وافقت تعذرني ساعتها

غسان.. طبعا لازم توافق ميصير تجبرها
افهم من كلامك نعتبر الجيه تعارف مو مشيه

شهم.. بالضبط
خلي تتعرف على اهلك ويتعرفون عليها بعدين اسألها
وافقت بالخير والبركه عليك وعليها .. ما وافقت اعذرني خويه

الله شاهد بالنسبه الي ما الگه احسن منك البنت اختي بس يبقى رأي البنيه فوگ كلشي

غسان.. رحم الله والديك حبيبي
واني اتشرف بيك وبيها سواء صارت القسمه او لا

شهم.. النه الشرف صديقي الغالي

غسان.. يلا استأذن عندي شغل مهم وما اريد اعطلك عن اعمالك

شهم.. نورتني ضلع

غسان.. نورك يالغالي
اودعناكم

شهم.. الله وياك

بس طلع ضحكت : والله و وگعت بيدي يا يوسف إلا اخليك تحچي غصباً عنك وانت الممنون

خلصت شغلي ورجعت للبيت .. تغديت وصحت المنال حتى انطيها خبر بجية الجماعه

شهم.. ام جهاد تعالي شو

منال.. خير خويه

شهم.. اليوم جاين خطابه السمر من طرفي

منال.. لطمت على صدرها : صخام الصخمني
لا خويه دخيلك تدري بالبنيه تريد يوسف وهو يريدها

شهم.. خل اكمل يا عيني

منال.. العفو خويه گول

شهم.. اني ببالي شي معين اريد اسوي
كل الاطلبه منچ تنفذين كلامي بلا حچي زايد

منال.. صار اسمعك

شهم.. هذا الولد صديقي يصير
اليوم العصر يجون اهله يتعرفون عليكم
انتبهي الكلامي ..
مجرد تعارف مو مشيه يعني لتنطيهم كلمه نهائياً ما اوصيچ بعد

منال.. اي خويه فهمتك
بس سمر شلون

شهم.. عادي گليلها جايچ خطابه من طرف خالچ وانهي الكلام
ما اريدچ تحچين غير هالجمله خيتي

منال.. اي ماشي مثل متحب

عفتها وصعدت انام .. هستوني متمدد طبتلي مياس وجها مخطوف
گمت بسرعه عبالي صاير وياها شي

تفاجأت من فتحت ويايه موضوع يوسف وسمر وگعدت تعاتبني لان موافق

كالت جمله : اليحب مينسي حبه إلا الموت
ضحكت من كلامها لأن تذكرت مشاعرها الي بالسجل

تحارشت بيها حتى استفزها وما شفت نفسي إلا واني ابوسها
استغربت من تصرفي اكثر من استغرابها حتى

نزلت ع السريع تركض .. صفنت على روحي احاول الگه سبب للشي السويته بحيث حتى ما گدرت انام من التفكير

للعصر رحت لبيت خالتي اشوفهم وبطريقي انفذ الخطه على يوسف حتى اوگعه وارتاح من هاي السالفه

بقيت يمهم تعشيت وطلعنه للنادي .. اول ما خلصنه طلبت من يوسف يجي ويايه بحجة امي تريد تشوفه وهو وافق بسرعه 

وصلنه للبيت چانو الكل بالصاله بس سمر ومياس ماكو .. شويه واجن سويه بس شفتهن حچيت

شهم.. ها ام جهاد شصار وياكم اليوم

منال.. ماكو شي خويه شافوا سمر وگتلهم اردلكم موافقتنه باقرب وقت

يوسف.. موافقة شنو ؟!!

شهم.. يا ما گتلك
صديقي غسان تعرفه مو ؟؟

يوسف.. اي شبي ؟

شهم.. خطب سمر اليوم

يوسف.. شنو يعني خطبها !
يعني وافقت ؟؟

شهم.. لا بعد بس ان شاء الله تصير القسمه لأن خوش ولد ويتساهلها

يوسف.. خير ان شاء الله

اباوع علي وجها صاير ينطي الوان والضوجه نطت بعيونه .. لزمت نفسي بالگوه منتظر راسه اليابس شوكت يلين ويفضني عاد

عفتهم يحچون بالموضوع وصعدت فوگ حتى اغير ملابسي

شويه ونزلت شفت يوسف ديروح ويا مياس للمطبخ علمود ياكل .. عفتهم براحتهم لأن عرفت مياس دتساعدني بالخطه بدون متدري بروحها

اول ما شفت شهم صعد اشرت السمر لأن هاي انسب فرصه تحچي بيها ويا يوسف

مياس.. سمر روحي للمطبخ بسرعه

سمر.. ليش ؟!

مياس.. دروحي ولچ هسه اجيبلچ يوسف ونفذي الاتفاق

سمر.. عزه اخاف والله

مياس.. سمررررر

سمر.. يلا عمي رايحه وامري لله

باوعت اليوسف وافكر ويا نفسي شلون اگدر اگومه للمطبخ بلا ميحسون علينه

بعد تفكير عميق توصلت للحل واخيراً .. لزمت جهازي دورت على رقمه لگيته الحمد لله

دزيتله رساله : يوسف گول جوعان حتى اخذك للمطبخ لأن عندي حچي ضروري وياك اني مياس

سديت الموبايل و وكفت اتفرج .. ثواني ودگ جهازه رساله
طلعه من جيبه قراها ورفع راسه يباوعلي باستغراب

هزيتله راسي بمعنى اي اني

يوسف.. خاله جوعان متعشوني

الحجيه.. سوده عليه خاله يخسه الجوع ان شاء الله بس غير انتو گلتوا تعشينه واجينه

يوسف.. اي جعت مره ثانيه شسوي يعني

الحجيه.. يبعد خالتك هسه يجيك اطيب اكل

مياس.. تعال ويايه للمطبخ وتتدلل

الحجيه.. خو جيبيله لهنا

يوسف.. لا اروح هناك احسن من الهوسه

الحجيه.. براحتك يمه

گام ويايه نزل شهم بهلاثناء .. باوع علينه باستغراب وگال

شهم.. خير

يوسف.. رايح اكل جعت

شهم.. ههههه ولك مو قبل شويه تعشينه يمكم

يوسف.. اي ما شبعت عندك اعتراض

شهم.. روح تزقنب احد لازمك

يوسف.. رحم الله والديك وزقنبوتك راجعلك ان شاء الله

شهم.. ههههه الله يشافيك

عافنه وراح للصاله .. جريت نفس لان خفت ليظل واگف يمنه بس بنفس الوقت استغربت : شعجب عافنه والله ما ادري

اول ما دخلنه لگيت سمر گاعد ع الميز تهز برجلها بس شافته گامت بسرعه

يوسف.. شكو شبيچن ؟!!

مياس.. سمر تريد تحچي وياك بموضوع مهم

يوسف.. اي اسمع گولي

سمر.. يوسف اني ما اريد اتزوج هذا الولد عفيه قنع خالو يتراجع عن قراره

يوسف.. ليش !!!

سمر.. ما اگدر اتزوج انسان ما احبه واضافه لهذا اريد شخص يشبه خالو شهم برجولته وغيرته وطيبة گلبه حتى أأمن على نفسي ويا

يوسف.. شهم واحد ميتكرر سمر

سمر.. ليش ميتكرر ؟؟ هاي وينك انت تشبها بكلشي

خليت ايدي على حلگي حتى اكتم الضحكه .. باوعتله صافن بوجها واتصور من شكله عرف قصدها كلش زين

يوسف.. شلون يعني اشبها ؟!

سمر.. يعني نفس المواصفات رجوله وشهامه وطيبه

يوسف.. يعني افهم من كلامچ مواصفاتي تتمنيهن موجوده بالشخص الترتبطين بي

سمر.. بالضبط

يوسف.. زين واذا تقدمتلچ توافقين ؟؟

سمر.. دنگت خجلانه : اكيد ليش وين الگه احسن من عندك

طلع من يمنه ع السريع .. اخذت سمر ورحنه ورى نريد نشوفه شناوي يسوي

يوسف.. شهم

شهم.. نعم حبيبي

يوسف.. اني اريد سمر لتوافق على غسان

شهم.. صدگ تحچي ؟!!

يوسف.. لعد قابل اتشاقه وياك

الحجيه.. يا يمه هاي ساعة المباركه وين تلگه بنيتنه احسن منك

يوسف.. ها شهم شگلت ؟؟

شهم.. صعبه يا يوسف

الولد صارله چم شهر متقدم الها من وصلت للجد ودز اهله اجي اگله اعذريني والله ابن خالتي يريدها
مترهم والله مترهم

يوسف.. ليش مترهم شهم لتخبلني
ما بيها شي گله البنيه مموافقه واكيد راح يتفهم خو ميتزوج وحده مجبوره علي

شهم.. لا اني گتله البنيه موافقه
بعدين تعال گلي وين چنت طول هاي الفتره هسه يلا تذكرت حضرت جنابك تريدها

يوسف.. شهم لتزعلني منك
معقوله تفضل الغريب على اخوك ؟؟!

شهم.. ترى السالفه مو افضل احد على احد
السالفه وما بيها اني انطيت كلمة للرجال وما اگدر اتراجع عنها

منال.. شهم

شهم.. اسكتي ام جهاد

يوسف.. شهم شوف
قسماً بالله العلي العظيم اذا وافقت على هذا الولد لا انت ابن خالتي ولا اعرفك بعد

شهم.. هيچ الحچي صار !!!
ترى انت العايل مو اني .. چان تقدمتلها من اول وخلصتني من هاي الاحراجات

يوسف.. تگدر تدبرها بمعرفتك لتصير لوتي بس انت الضاهر عاجبك غسان اكثر مني

الحجيه.. يمه شجاك معقوله ترد يوسف
هاي الما مرجيه منك يوليدي

شهم.. يوم افهمي .. اني انطيت كلمه للولد ما اگدر اتراجع عنها
بعدين يوسف ما طول تأخر فيتحمل نتيجة تأخره هذا

يوسف.. شهم اني من زمان اريد اتقدملها بس مچنت اگدر لاسباب هواي
وثانياً انت ليش ما جبتلي طاري غسان چان منعتك تنطي كلمه بنفس الوقت

شهم.. واني اخلي البنيه معلگه لحد ما حضرتك تستعد وتجي تتقدملها

كلامك مو منطقي .. انت تعرف سمر كبرت وشي اكيد يتقدملها بدل الواحد عشره فـ على شنو هذا الكلام الزايد منك بعد

يوسف.. مدا اصدگ حچيك شهم ؟!!
ليش تخلينه نخرب على شي ميسوه وبيدك حله

سمر.. خالو ممكن تسمعني

شهم.. لا ما اسمعچ ولا اريدچ تحچين

مياس.. شهم عفيه...

شهم.. مياس اسكتي

يوسف.. ماشي شهم ماشي
منا وجاي لا انت اخويه ولا اعرفك واحسب حسابك اذا سويتها وزوجت سمر لغسان مراح يصير خير وروح اختي

دار وجها ديطلع طلعت ابتسامتي ليبره لأن بعد ما گدرت اكتمها اكثر

شهم.. تعال يمعود وافقت والله وافقت

يوسف.. باوعلي بعصبيه : شو تضحك ؟!
بس لا چنت ناصب عليه

شهم.. اي للأسف

هو اني گلت هيچ شو هذا هجم عليه .. وگع بيه ضرب من الضحك حتى ما اگدر ادافع عن نفسي 

الحجيه.. يا يمه عوف وليدي ولك

يوسف.. خليني اطلع حرگتي بي خاله لهل حقير

شهم.. الله عليك عوفني
گلبي گام يوجعني من الضحك والله

يوسف.. تستاهل خبيث

منال.. عوفه يوسف ليروح يتراجع ويبطل ينطيك سمر

يوسف.. مو هي بكيفه الشغله

شهم.. اي والله صدگت
مو بكيفي بكيف گلبي اليحبك

يوسف.. قشمرني بهاي سوالفك .. حفظتك ترى

شهم.. ههههه
كمت حضنته : الف مبروك حبيبي ليش اني اگدر ارفضك واقبل بغيرك إلا اذا تخبلت

يوسف.. الله يبارك بيك حبيبي

دخلوا جهاد وايهاب بهلاثناء .. شافونه هوسه استغربوا ميدرون بالمعركه الطاحنه الچانت صايره قبل شويه

جهاد.. خير شصاير هنا

يوسف.. اريد اتزوج اختك ولك

جهاد.. صدگ تحچي ؟!!

يوسف.. اي .. ليش ان شاء الله متريد توافق حضرتك

جهاد.. ههههه قابل مسودن وارفض واحد مثلك

ايهاب.. احلى خبر سمعته بهاي الفتره

يوسف.. ههههه يوم التفرح بجهالك

ايهاب.. رحم الله والديك خويه

شهم.. لعد خير ان شاء الله
اني اسبوع والتحق بس ارجع بيك خير وتتدلل

يوسف.. ترجع بالسلامه خويي

شهم.. الله يسلمك

تم الموضوع والحمد لله .. مر اسبوع وماكو شي جديد
بليلة التحاقي چنت نايم فزيت على صوت صياح مياس طفرت من مكاني بسرعه

بعد ما ثگل شهم بالكلام ويا يوسف عرفته ديتشاقه چان

قبل بي بس بعد ما شلع گلبه للمسكين وطبعاً فرحت سمر متنوصف بهذيچ اللحظات

مر اسبوع بلا جديد ..
بليلة التحاق شهم چنت نايمه  شفت باب غرفتي انفتح .. خفت كلش ما ادري حلم لو حقيقه

اباوع للباب ماكو احد بس الدنيا ظلمه هندس بحيث كلشي ما اشوف بره

ردت اگوم اشوف شكو ما گدرت عبالك نشليت .. احرك بجسمي حيل احاول انزل من الچربايه ماكو

رفعت راسي للباب خايفه فجأه صارت گدامي نفس المره العجوز الاجتني بحملي الاول

بچيت بسرعه من الخوف احس الهوى ميدخل الصدري بعد .. اريد اصيح حتى يجون ينقذوني منها ماكو حسي ميطلع نهائياً

باوعت عليها اشرت بالگاع .. درت وجهي شفت بزونه سوده بس شكلها غريب عبالك حيوان مفترس متحول البزونه

رفعت ايدها باتجاهي مثل الانطتها اشاره حتى تهجم عليه وفعلاً ركضت صعدت على بطني وبدت تفترس بيه

شغت من الألم اباوع البطني اللحم طالع لأن دتاكل بيها .. طلع صوتي فجأه دا اصيح بحرگه حسيت على صوت شهم يصيح باسمي

فزيت مرعوبه
باوعت البطني ماكو شي .. رفعت راسي الشهم وشهگت بحرگه
حضني بسرعه

شهم.. اسم الله شبيچ .. شنو شفتي كابوس ؟؟

مياس.. اي اجتني المره العجوز حتى تاخذ ابني مني

بس گلت هيچ تذكرت الموقف .. وخرت الغطه ع السريع وانصدمت بنفسي دا انزف

شهم.. هاي شنووووو ؟؟

مياس.. راح اطرح والله راح اطرح .. وگمت ابچي حيل

شهم.. ركض للباب : منااااااااااال
وين صرتي

منال.. اجيت خويه چنت اغير ملابسي
شبيها تصيح ؟؟

شهم.. دتنزف منال دتنزززززف

منال.. لا يا الله
شو وخر خلي اشوفها

اجت باتجاهي حاولت تگومني للحمام ماگدرت
لزمني الوجع فجأه گمت اصيح من كل گلبي

شهم.. شبيچ شدتحسين حاچيني

مياس.. منال راح اموت
احس اكو شي دينزل مني

منال.. يا يمه راح تطرحين معناها
شهم ساعدني نوديها للحمام

شهم.. وخري شو

دنگ عليه شالني بحضنه و وداني للحمام .. گعدني هناك وطلع وگف يم الباب

ظليت الوب ومنال لازمه ايدي بالخمس دقايق ارتاحيت شويه
باوعت المنال ابچي

مياس.. راح الوجع بس مدري شنزل مني

منال.. طرحتي حبيبتي

درت وجهي الشهم شفته صافن عليه والخوف واضح بعيونه
باوعلي بقهر وراح من يمنه لأن منال اشرتله حتى تبدلي

غيرت ملابسي واجه هو ومنال سندوني للغرفه
لگيت تبارك مغيره الچراچف وشايله نونه بيدها لأن گعدت على صياحي

تمددت بمكاني والله ذب عليه البچي من القهر الحسيت بي بوقتها

هاي ثاني مره اخسر قطعه من روحي ومدا اعرف ليش ومنو هاي الدتجيني وتاخذ ابني مني

شهم.. منال ناخذها للمستشفى ؟؟

منال.. لا خويه ميحتاج البنيه طرحته وكامل هم
باچر عود اخذها للدكتوره ويا جهاد لو ايهاب حتى ينطوها علاج

شهم.. دار وجها عليه : كافي لتبچين مو زين عليچ البچي وانتي هستوچ طارحه

منال.. تبارك انطيني نونه وتعالي ويايه

طلعن وسدن الباب وراهن .. باوعت الشهم رجعت ابچي گعد بصفي واخذ راسي الحضنه

شهم.. الله عليچ كافي
الله ما قاسمه النه ليش دتسوين بروحچ هالشكل

مياس.. ليش ديصير ويايه هيچ شهم ؟!
هاي المره ليش كلما احبل تجي تاخذ جهالي مني

شهم.. يا مره ؟!!

مياس.. بالحلم اشوفها
مره عجوز وشكلها مقزز كلش وبس اشوفها انشل بمكاني ما اگدر اتحرك بعد

بحملي الاول صعدت على بطني ضغطت عليها حيل مردتها بايدها ومن گعدت لگيت نفسي انزف

شهم.. وهسه هم نفسي الشي شفتي ؟؟!

مياس.. لا هالمره الحلم چان يخوف اكثر
چانت وياها بزونه شكلها متوحش اشرتلها وخلتها تهجم عليه تاكل ببطني بحيث شغت من الألم

شهم.. شنو السالفه ؟!!

مياس.. ما ادري والله ما ادري .. ورجعت ابچي

شهم.. بداعتي لتبچين .. شلون التحق باچر وانتي بهاي الحاله

مياس.. صدگ انت عندك سفر من الصبح روح نام

شهم.. غير تنامين بلاول يلا انام اني

مياس.. الله عليك روح نام مو تتعب

شهم.. اذا متنامين ما اتحرك منا

مياس.. يلا هسه راح انام

تمددت بمكاني اباوع علي گاعد گبالي وايده على راسي
ظليت اباوعله لحد ما غفيت على نفسي

- شفتها نامت ارتاحيت الراحتها
صح بداخلي انقهرت كلش لأن طرحت بس حاولت ما ابين الها حتى لا ازيدها عليها

طفيت الضوه وطلعت من يمها .. صعدت فوگ تمددت وبالگوه يلا گدرت انام بسبب قهري عليها وعلى ابني الراح

حسيت على صوت المنبه
گمت صليت وبدلت .. اخذت جنطتي ونزلت لگيت منال دتسوي الريوگ

شهم.. ليش تعبتي نفسچ خويه

منال.. تعبك راحه بعد گلبي
شلون تالي نامت المسكينه ؟!

شهم.. بالگوه لو ما دوامي فلا تنام
صدگ خويه حچتلي عن حلم وعجوز عود خليها تسولف الامي بلكت تعرف شنو سبب الاسقاط المتكرر عدها

منال.. يا صدگ ؟!!
ماشي يصير خير وليظل ببالك اني راح اخذها للدكتوره العصر

شهم.. الله ينطيچ العافيه

تريگت ع السريع ورحت الغرفتها اشوفها اخاف گاعده .. دخلت على كيف لگيتها نايمه بس وجها اصفر كلش

تقربت منها بخوف .. دنگت بست راسها ومسحت ايدي على وجها : حيل دا اتأذه الأذيتها

طلعت من يمها سلمت على اهلي والتحقت

گعدت الصبح بثمانيه .. باوعت السرير نونه ما هي نزيت من الخرعه

دا اگوم اشوفها وين تذكرت الصار .. لزمت بطرف الچربايه وسندت روحي حتى اوگف علي حيلي

طلعت لگيت الحجيه بالصاله وبحضنها نونه

الحجيه.. ها يمه گعدتي
شلون صرتي هسه ؟!!

مياس.. على الله خاله

الحجيه.. تعالي سولفيلي شدتشوفين بالحلم

گعدت بصفها وسولفتلها الاحلام مثل ما سولفت الشهم بالضبط

الحجيه.. يا يمه هاي عندچ تابعه
ليش ما گلتي اول الحمل چان تلاحگنالچ

مياس.. ما اعرف شنو تابعه خاله

الحجيه.. بسيطه يمه
على حملچ الثاني ان شاء الله ناخذچ السيد يگطعلچ حتى يثبت الطفل ببطنچ

صفنت بوجها احچي ويا نفسي : هه مره ثانيه والله مسكينه حجيه كلشي متدرين

اهتموا بيه طول اليوم لحد ما صار العصر .. اخذنه جهاد اني ومنال للدكتوره كتبتلي علاج ورجعنه

اول ما طبيت الغرفتي دگ جهازي
طلعته من الجنطه وفرحت من شفت شهم ديتصل بيه لأن ما شفته قبل ليروح

مياس.. الوو

شهم.. ها مياس شلون صرتي

مياس.. الحمد لله
وصلت انت ؟؟

شهم.. اي
گليلي رحتي للدكتوره

مياس.. رحت ليظل ببالك
ماكو شي مجرد كتبتلي علاج ورجعنه

شهم.. خو مدا تتوجعين هسه

مياس.. لا ما احس بشي

شهم.. ديري بالچ على نفسچ وعلى نهاوي

مياس.. وانت هم دير بالك على نفسك

شهم.. ان شاء الله
راح اشتاقلچ

مياس.. ابتسمت من كلامه : واني هم راح اشتاقلك

شهم.. يلا صار لازم اروح

مياس.. خابرني دائماً لتخلي بالي يمك

شهم.. ان شاء الله

سد الخط وراح وروحي راحت ويا : مشكلتي بديت اتعلق بي بشكل مو طبيعي رغم اعرف هالشي غلط بعد كلشي صار بيناتنه

مر شهرين على التحاقه وهو يتصل كل چم يوم يسأل عن اخبارنه خمس دقايق ويسد الخط بس اشتياقي اله يذبحنه يوم بعد يوم

فد يوم گعدت الصبح كالعاده غسلت واخذت نونه للصاله
لگيت الكل بالصاله استغربت گعدتهم من الصبح

مياس.. خير شو گاعدين من وكت

تبارك.. اني گعدت ويا جهاد وبعد ما اجاني نوم

الحجيه.. شو مستغربه يمه شنو الجديد اني ومنال يوميه نگعد من صباحيات ربچ

مياس.. اي صح
تريگتوا لا

منال.. اي الحمد لله
انطيني نونه وروحي تريگي

مياس.. قبل كلشي خلي اغسل بس اتريگ اصير ثگيله بعد
البارحه ردت اغسل بلليل ما خلتني لأن للـ ٢ هي گاعده

منال.. يلا انطينياها وروحي

انطيتها المنال ودخلت للحمام .. غسلت وطلعت اتريگ
اول ما خلصت اجتني منال

منال.. ميوس اذا بيچ حيل اصعدي نظفي غرفة شهم لأن راح يجي بهل يومين

مياس.. گمزت من مكاني : صدگ والله شو ما گلي

منال.. ههههه اي صدگ اليوم خابر من الصبح

مياس.. هاا
اني مو علمود شي بس خطيه نونه شتاقتله

منال.. وهو اكيد اشتاق النونه .. وغمزتلي

طلعت من يمها فشلانه : غبيه مياس دوم حب شهم فاضحچ بين العالم

صعدت فوگ فتحت الباب وجفلت بمكاني من شفت شهم واگف ديمشط ع الميز شكله هستوه طالع من الحمام

بس شافني ابتسم واجه باتجاهي
سحبني من ايدي وسد الباب لأن فصلت بشوفته حتى حركه مابيه اتحرك بعد

مياس.. شوكت اجيت ؟!!

شهم.. الصبح

مياس.. يااا
لعد ليش ما گالولي وفوگاها منال ناصبه عليه والله شنو اصعدي نظفي غرفة شهم لأن

شهم.. قاطعني : مياااس

مياس.. نعم

شهم.. احبچ....

يتبع..