للكاتبه
أسفي على الشخص الذي كان مستثنى بقلبي من سوء هذا العالم
فـ قابلني بسوء أعظم 💔
ما اعرف شلون غفيت
فتحت عيوني الفجر مرتاحه كلش .. رفعت راسي استغربت من ما لگيته يمي
تذكرت نونه گمزت ع السريع مفزوعه لبست ونزلت اركض الغرفتي
فتحت الباب چان انصدم بشهم نايم على چربايتي
باوعت النونه نايمه وفوگ راسها الممه .. ابتسمت بيني وبين نفسي : اكيد بچت وحس عليها لذالك نزل ينام هنا
تقربت منها بستها بهدوء وغطيتها .. رحت تمددت بصفه اباوع على ملامحه مبتسمه واتذكر الي صار بيناتنا وكأني بحلم
فجأه تحرك .. فرك راسه بأيده وفتح عيونه
بس شافني گدامه گمز من مكانه بسرعه
مياس.. اسم الله هاي شبيك !!
گام من يمي بلا ميحچي شي
ظليت صافنه ورى مصدومه من وضعه .. فتح الباب راد يطلع رجع سدها ودار عليه
شهم.. مياس
مياس.. صفنت بوجها .. ما گدرت إلا ان اهز راسي اله بمعنى شكو
شهم.. اني اسف
مياس.. على شنو ؟!!!!
شهم.. ع الشي السويته اليوم
مچان المفروض اتقرب الچ
الصار بيناتنا غلط واكبر غلط بس ما اعرف ليش سويت هالشي والله العظيم ما اعرف
انضربت على راسي من كلامه .. ظليت صافنه بوجها والكلمه ما ترضى تطلع مني
باوع عليه وفرك وجها حيل
شهم.. اسف والله اسف
گمت من مكاني تقدمت باتجاها
وگفت گباله مباشرتاً احاول استوعب كلامه بلكت دا افهم غلط وينتهي هالخوف البداخلي
مياس.. شهم شبيك ؟!!
شهم.. شبيچ بابا اني دا اگول
مياس.. قاطعته بسرعه : بابا شنو ؟!!
شهم.. مياس
مياس.. بلا مياس بلا بطيخ
فسرلي الحچي الدتحچي لا احرگ الغرفه بلي بيها
شهم.. هاي شبيچ يابه صدگ تحچين ؟!!
مياس.. هذا السؤال الك المفروض
صدگ تحچي شهم !!!
شهم.. مياس بس اسمعيني
اني ما ادري شصار وشلون وصلنه لهل نقطه
وداعة بنتي ما چنت بوعيي ولا رايد هالشي من الاساس لأن
مياس.. صحت قبل ليكمل كلامه : اطلع بره
شهم.. شنووو !!
مياس.. مثل ما سمعت
اطلع بره شهم .. وفوراً ،، فوراً
شهم.. مياس
لزم زندي جريت نفسي منه ع السريع
مياس.. دير بالك تطخني مره ثانيه
باوعت علي صافن بوجهي .. حاولت اتمالك نفسي وما اضعف گدامه
بديت احس بحرگه مو طبيعيه بعيوني على گد ما كاتمه دموعي بالگوه
مياس.. شهم دتفهم كلامي ؟؟
اطلع منا .. ما اريد اشوف خلقتك بعد طول ما اني عايشه
دار وجها ديطلع تخبلت : گلبي شاعل نار مستحيل يبرد بطلعته منا
لازم ادوس علي مثل ما داسني واكثر
مياس.. لحظه لحظه
باوعلي باستغراب : عود انت عبالك احبك لذالك قبلت تتقرب مني
لا شهم غلطان
كل القريته بالسجل چان مراهقه وطيش وانت تعرف بهاي المرحله شگد الانسان يخربط لأن ميگدر يسيطر على مشاعره
ماكو احد بگلبي غير مهيب الله يرحمه
بس هو اليستاهل هذا الحب لأن رجااااال ومستحيل يجي احد بعده
واذا تتسائل ليش خليتك تتقرب مني واني ما عندي مشاعر الك فراح اجاوبك حتى ارضي فضولك
واجب ... اي اي واجب
السويته وياك مجرد واجب لا اكثر ولا اقل
رجال متزوج واجه يريد يتقرب من مرته اكيد متگدر تصده لأن حرام عليها هالشي
اعرف كلش زين ماكو شي بالدنيا اهم للرجال من غريزته
وغريزتك بالتحديد صارلها فتره طويله مكبوته فقدرتلك هالشي بس...
شهم.. قاطعني بصيحه : كافي خربطه ميااااااس
مياس.. رديت باستهزاء : شو ضجت !!
تو تو تو تو
اسسسسسفه .. والله مو قصدي ما اعرف شلون طلع مني هالحچي يمكن اني مو بوعيي
طلع وضرب الباب حيل حتى ما اهتم النونه باوعت عليها ما حست .. اخذت ملابسي ورحت للحمام اغسل حتى ابرد نار گلبي الشابه بين ضلوعي
فتحت الماي صافنه علي : يمكن الدموع المحبوسه بعيوني حالياً اكثر من هذا الماي الجاري
مياس.. ابچي مياس شمنتظره
ابچي ولتخافين محد راح يحس بضعفچ وانتي بين هالحيطان الاربعه
نزلت بالگاع ويا ما جرت دموع عيوني
شويه وگمت اشهگ بحرگه .. بچيت بچيت بچيت لحد ما انگطع نفسي تقريباً
مياس.. الله لا يسامحك شهم
الله ينتقم منك ويضوگك من نفس الألم الضوگته الي وبنفس الكاس هم
گمت غسلت ع السريع اخاف نونه گعدت واني مو يمها
دخلت الغرفتي لگيتها بالفعل گاعده بس تلعب ويا روحها الحمد لله
مياس.. يروح الماما
گعدتي
صباح الورد على عيونچ الحلوه
تعالي يعمري تعالي
اخذتها الحضني ابوس بيها ودموعي تجري بلا وعي
باوعت على وجهي برطمت وگامت تبچي حيل لأن حست بيه
مياس.. لا گلبي لا
لتخافين .. هاي مسحت دموعي شوفي
كافي لتبچين عمري انتي
لهيتها بلالعاب ومشطت بسرعه حتى اسويلها حليب
خليت حجابي على راسي واخذتها ويايه للمطبخ
سويت الممه دا ارجع الغرفتي شفت شهم طلع من الحمام الفوگ .. صارت عيوني بعيونه
باوعت علي بحقد وعفته ومشيت
بيومها حسيت بذل ما حاسته بحياتي حتى لمن چنت ابيع بالشوارع بنص العالم وگدام اليسوه والميسوه
صارت العشره واني على نفس الوضع .. ما عندي غير الدموع المتقبل تخلص ولا تگدر تطفي النار المستعره بداخلي
حاولت اضغط على نفسي واطلع من الغرفه علمود ليشكون بوضعي
وگفت ع المرايه البس حجابي شفت اثاره على رگبتي انغثيت بشكل مو طبيعي
لزمت روحي عن البچي وطلعت للصاله .. مچان اكو غير الحجيه
مياس.. صباح الخير خاله
الحجيه.. هلا يمه يسعد صباحچ
صفنت بوجهي : شبيهن عيونچ ؟!!
مياس.. ما بيهن بس ما نايمه زين
نونه مدري شبيها طول الليل تريد تلعب ما قبلت تنام إلا قبل ساعه وهسه گعدت
الحجيه.. لا مو سالفة نوم
احچي شبيج ليش باچيه
مياس.. دنگت اداري دموعي : على ابويه خاله بالي يمه وخايفه لا يصيرله شي لا سامح الله لأن محد ديوگع على علته
الحجيه.. اسم الله علي
الله يحفظه الچ ويطول بعمره .. شيلي عنچ الافكار المو زينه خليچ متفائله بالخير احسن
ربچ موجود ويحلها ان شاء الله
مياس.. الله يسمع منچ
الحجيه.. يلا انطيني نهاوي وروحي تريگي ويا جهاد وتبارك هستوهم گعدوا
مياس.. ليش جهاد مو المفروض بالمعارض ؟؟
الحجيه.. لا ما راح لأن شهم تعبان وگله لتفتحون اليوم
مياس.. بس سمعت اسمه ضجت كلش : هاچ خاله خلي اروح اساعد البنات بشغل البيت
انطيتها نونه ورحت للمطبخ لگيت جهاد وتبارك گاعدين يتريگون وحدهم : صباح الخير
جهاد.. صباح النور
تبارك.. صباح العسل .. تعالي حبي تريگي ويانه
مياس.. لا بالعافيه ما اشتهي
جهاد.. بيچ شي مياس ؟!
مياس.. لا .. ليش تسأل !!
جهاد.. ما اعرف دا اشوف وضعچ مو طبيعي
مياس.. ماكو شي بس بالي يم ابويه شويه
جهاد.. الله يشافي ان شاء الله
مياس.. تسلم
التهيت بالشغل بس چذب اذا اگول نسيت او ارتاح گلبي من القهر
للظهر صبينه الغده وشهم ماكو .. ما اهتميت بصراحه على گد ما كارهته بعد كلشي صار
منال.. مياس متصعدين تشوفين شهم شنو سالفته
صيحي خل ينزل يتغده من الصبح ما ماكل شي
مياس.. بيدي شغل دزيله سمر اذا تردين
منال.. سمر صعدي الخالچ بسرعه
سمر.. المن متزوج لعد والله يا الله
مياس تصعدله ما بيه حيل اني
مياس.. مو وكت شقاچ سمر
جهاد.. وحده منچن تروح تشوفه بلا هاللغوه الزايده
سمر.. صاعده وامري لله
راحت تشوفه شويه ونزلت .. باوعت عليها راحت بتجاه جهاد مباشرتاً
سمر.. جهاد يمكن خالو ضغطه صاعد
وجها كلش احمر ونايم ميقبل يتحرك من مكانه
جهاد.. جيبولي جهاز الضغط بسرعه
الحجيه.. يا يمه شبي وليدي اليوم
بيبي اصعدله ع السريع شوف شجراله البارحه چان مثل الورده المفتحه
جهاد.. اي هسه بيبي صاعدله
جابتله سمر الجهاز وصعد يركض
خليت نونه بحضني وگعدت اباوع على باب غرفته : مو بيدي اخاف علي رغم الحقد الزرعه داخلي بتصرفه الحقير بس يبقى شهم
خمس دقايق ونزل .. گامنله الحجيه ومنال بسرعه واني ظليت بمكاني
اكو شي يمنعني اگوم اطمأن علي
الحجيه.. ها بيبي بشر
جهاد.. ضغطه صاعد كلش بس كالعاده يعاند اخذه للدكتور
سوله حامض وصعدولهيا ويا الغده حتى ياخذ علاجه بين ميجي خالي ايهاب
باوعتلي منال حتى اگوم اسوي شلت نونه ورحت الغرفتي
اول ما دخلت اجت ورايه لأن شكت بالموضوع
منال.. مياس شكو
مياس.. شنو يعني ؟ ما فهمتچ
منال.. صاير شي بيناتكم انتي وشهم
مياس.. لا
ليش تسألين ؟؟
منال.. هو مريض وانتي ممهتمه شلون ترديني ما اسأل
مياس.. لا يمعوده شنو ممهتمه
كل ما بالموضوع اريد اغير النونه من الصبح ممغيرتلها بعدين انتي وسمر موجودات وحده منچن تسويله ما وگفت عليه
منال..والله ما ادري شگلچ
ديلا كملي منها وتعالي تغدي ويانه
مياس.. ما اريد اكلت قبل شويه
منال.. وين اكلتي ؟!
ليش تچذبين مياس مو حتى ريوگ ما تريگتي تبارك گالتلي
مياس.. لا صدگي اكلت قبل شويه بالمطبخ لأن جعت كلش لذالك ما گدرت انتظركم للغده
منال.. على راحتچ
طلعت من يمي گمت ع السريع قفلت الباب وراها
غيرت النونه وگلبي رايح من القهر
ظليت اباوع عليها لحد ما نهاريت بالبچي
مياس.. شفتي شسوه بيه ابوچ نونه ؟؟
هذا الچنت احتمي بي من كل وجع من تالي هو بأيده سببلي اكبر وجع بحياتي
ماراح اسامحك شهم ولا راح افوتها الك وروح امي
مو اني التدوس عليه واسكتلك ولا اني الترخصني لهل درجه واوگف اتفرج .. بسيطه بسيطه
باوعت الموبايلي تذكرت ابويه .. گمت ع السريع اخابره بلكت ارتاح شويه
مسحت دموعي واتصلت علي اكثر من مره بأخير محاوله جاوبني يگح
مياس.. اسم الله بابا ليش دتگح
اشرف.. ماكو بنيتي فلاونزا واستبراد
مياس.. يا الله ناقصك مرض يعني
اشرف.. اي انتي شلونچ رجلچ نهى ان شاء الله بخير
مياس.. الحمد لله كلنه بخير
شوكت ترجع والله شتاقيتلك انت واخواني
اشرف.. والله بابا منتظر بس اوگف على رجلي حتى اگدر ارجع
ما بيه اطلع لباب الحوش بهذا وضعي .. فوگاها الشغل يوميه متصلين عليه على ساعه يبطلوني واروح بيها اني واخوانچ
مياس.. بابا كلشي لتفكر اهم شي صحتك هسه ياشغل يا بطيخ
اشرف.. ادعيلي بنيتي دا اموت يوميه وماكو شي يخفف وجعي
مياس.. سوده عليه حبيبي
شتحس بس فهمني
اشرف.. كلشي بجسمي يوجعني والنفس گوه اسحبو لصدري حتى ما اگدر اكل لأن اختنگ باللگمه
مياس.. هاي شنو يعني وضعك ساء اكثر بدل ما يتحسن
اشرف.. اي والله بابا بس شسوي ربچ موجود ميعوفني بهل حيره
مياس.. من عافيتي على عافيتك ان شاء الله
اشرف.. اسم الله عليچ بويه
يلا صار لازم اسدو تردين شي
مياس.. لا بابا سلامتك
بوسلي اخواني وسلم ع الكل
اشرف.. يوصل حبيبتي
سديت الخط والحيره ملازمتني : شنو السالفه ليش محد ديوگع على علته اذا لهل درجه مريض
يا ربي حلها من عندك انت تعرف ما عدنه غيره اني واخواني
ظليت طول الظهر على هالحاله
ساعه افكر بأبويه ومرضه
ساعه ابچي على الصار بيه وبي
لحد العصر لبست حجابي وطلعت للصاله قبل لا يستفقدوني
منال.. شنو چنتي نايمه ؟
مياس.. اي
شلون صار شهم ... سألت بس حتى ليزيد الشك عدها وإلا اني مچنت مهتمتله نهائياً
منال.. معاند حتى ايهاب ما گدر علي
هسه جهاد خابر يوسف بلكت يشوفله حل .. ماكو غيره يفهم علي ويگدر يطلعه من هالوضعيه
مياس.. لعد وينه جهاد ؟!
منال.. طلع للشغل ويا ايهاب صارتلهم طلبيه مستعجله لازم يسلموها
مياس.. خير ان شاء الله
خليت نونه يمهم ورحت للمطبخ اسوي چاي اهدأ بي وجع راسي
لحگتي سمر اول ما طبيت
سمر.. مياس
مياس.. ها حبي
سمر.. يوسف راح يجي
مياس.. اي شنو يعني
سمر.. صدگ تحچين ؟!!
ولچ ما شايفته من عرس جهاد .. حاچيني شسوي هسه
مياس.. ههههه ركضي الحضنه اول متشوفي
سمر.. بلا شقاچ الماصخ
احچي جد ترى گلبي راح يوگف من التوتر
مياس.. اسمعيني لعد
روحي جيبي حجاب الچ واوگفي يمي هنا حتى بس نسمع الباب تفتحيلهيا انتي
سمر.. اي خوش فكره
راحت جابت الحجاب واني سويت چاي وكعك .. گعدنه بالمطبخ ناكل سوه
تسولف ويايه بس گوه اجاوبها لأن مالي خلگ لحد ما سمعنه الجرس اندگ
سمر.. اجه والله اجه
مياس.. هههه يلا روحي فتحيله الباب شمنتظره
راحت وگمت وراها ع السريع .. طب سلم ع الكل بصوره جماعيه وصعد فوگ چان مبين علي القلق علمود شهم
بعد الشي الصار بيني وبين مياس ندمت كلش .. باوعت عليها نايمه بحضني اختنگت : اني شسويت ؟! شلون گدرت المسها واقربها مني لهل درجه
خليت راسها ع المخده وگمت بسرعه .. نزلت جوه باوعت الغرفتها تذكرت نهاوي
دخلت بهدوء شفتها نايمه بسريرها وما حست عليه من طبيت
گعدت ع الچربايه اكل بنفسي ندم وعقلي يضرب اخماس باسداس اريد اوصل الحل لهل مشكله بس ما گدرت للأسف
شويه وگعدت تبچي سويتلها ممه ورجعت نومتها .. ردت اگوم اغسل ما بيه تمددت افكر ويا نفسي لحد ما غفيت
حسيت على مياس بصفي گمزت من مكاني
گمت اطلع بس تراجعت : لازم انهي هاي السالفه حالاً
لازم تعرف كلشي صار چان غصباً عني وما قاصده ولا اريده
اعتذرت منها وچنت متوقعها تزعل او تعاتبني على الاقل بس الما متوقعه كلامها الما گدرت استوعبه بوقتها
طلعت من يمها صعدت فوگ اغلي من العصبيه على الشي السمعته منها .. دخلت للحمام وذبيت نفسي چفي حتى انام واخلص من كلشي عسى ولعل اگعد والگه الصار مجرد كابوس وارتاح منه
للظهر حسيت ع الاذان .. لزمت راسي من الوجع المو طبيعي عرفت ضغطي صاعد
گمت صليت ورجعت انام
صعدتلي سمر علمود الغده گتلها ما اريد
وراها جهاد وايهاب ظلو رايحين جاين لأن عرفوا ضغطي صاعد ومحد منهم قبل يعوفني بحالي
للعصر اندگت الباب وطب يوسف .. گمت ع السريع بس شفته گبالي
شهم.. شجابك انت ؟!
يوسف.. شبيك شهم
لا ترد على مكالماتي ولا طلعت للمعارض اليوم واخير شي يتصل بيه جهاد ويگلي الحگ خالي ضغطه صاعد وميقبل ناخذه للمستشفى
شهم.. يمعود والله العظيم مامستاهله الشغله هم كبروها كلش
اخذت علاج وهسه احس بنفسي صرت احسن ليظل ببالك
يوسف.. بس وجهك ميگول هيچ شهم
احچيلي شوصلك لهل حاله ؟!
شهم.. ماكو شي مجرد تعب من ضغوطات الحياة
يوسف.. عليه شهم ؟! معقوله تضم عليه سر
اول تالي
شهم.. ااااااف .. تعال خويه تعال
يوسف.. شبيك شهم احچيلي والقرأن ظل بالي يمك
شهم.. يوسف سويت مصيبه البارحه وهسه دا اعض اصابيعي ندم عليها وياريت يفيد
يوسف.. شسويت احچي !!!
شهم.. بعد ما عفتك ورجعت للبيت شفت مياس گدامي ما گدرت إلا ما اتقرب منها
يوسف.. هههه وهي هاي تعتبر مصيبه بشرفك
شهم.. بالنسبه الي مصيبه واكبر مصيبه
يوسف هاي مياس تعرف منو مياس
بنتي الطول عمري ما باوعت عليها غير بنظرة الاب البنته
ولتگلي مو بنتك هي .. اني دا اشرحلك احساسي اتجاها وكلامك ميگدر يغير مني شي
يوسف.. خو كمل بعد
شهم.. مرت مهيب يوسف
ااااااخ يا مهيب ولچمة فراگه التعيل بگلبي كل يوم وكأنه البارحه استشهد
ونهى ولك .. شلون گدرت انساها بهل سهوله واتقرب لغيرها بلا ما احس على نفسي
ما اعرف شلون تجرأت ولمستها كل الاعرفه ما چنت بوعيي .. والله العظيم ما چنت بوعيي
يوسف.. اگدر اسألك سؤال
شهم.. اي اسأل
يوسف.. بس لتخجل مني حتى اگدر افهم السالفه ونحاول نلگه حل الها باسرع وقت
شهم.. احچي يوسف احچي
يوسف.. من تقربت منها چنت واعي هي مياس لو تخيلتها نهى
شهم.. لا طبعا
بكل حركه مني اشوف گبالي مياس مو غير وحده ومع ذالك ما گدرت امنع نفسي عنها
يوسف.. حلووو
زين سؤال ثاني : ليش تقربتلها ؟؟
يعني قصدي شنو الشي الخلاك تنسى كلشي وتباوع عليها بنظرة رجال المرته
شهم.. ما اعرف
يجوز رغبه
او حاجه
ويجوز السبب وضعي المو طبيعي الچنت عايشه ويا نهى الله يرحمها
يوسف.. لتچذب شهم
الموضوع ماله علاقه لا برغبتك ولا حاجتك والكبت البداخلك
تعال گلي صارلك شگد على هالوضع .. لحظه اني راح اجاوبك يمكن بالعشر سنوات اذا مو اكثر
زين گلي رغبتك وحاجتك وين چانت كل هالسنين لو ما تذكرتهن إلا هسه
انت دتچذب على روحك لا اكثر ولا اقل
مياس مو بنتك شهم
ساعدتها اي
حسيتها طفله بريئه ومحتاجه وگفتك وياها فوگفتلها بشهامتك وغيرتك هم اي
بس هي مو بنتك ... نقطه راس سطر
اصلاً حتى حرام عليك تحچي هالحچي بعد كلشي صار بيناتكم
صدگني انت ما تقربت منها إلا لانك حبيتها بس مشكلتك رافض تعترف بهذا الحب لذالك دتتحجج برغباتك وقانع نفسك بهل شي
گام من مكانه : وين وصية مهيب
شهم.. ليش شتسوي بيها ؟!!
يوسف.. دحچي وينها
شهم.. بهذاك الميز اول مجر
يوسف.. راح جابها ورجع حطها بوجهي : هاك اقره
شهم.. شبيك يوسف ؟!!
قاريها الف مره لدرجة حافظها على غيبي
يوسف.. حافظها بس ما فاهمها للأسف
شكاتبلك اسمع : ادري بيك ما تقبلت الفكره هسه بس تأكد بعدين راح تحبها غصباً عنك وهي هم كذالك لأن مستحيل اكو مره تعاشرك ومتحبك
تعاشرك !!!
يعني زواج تام مو ع الورق مثل ما سويت حضرتك
مهيب طلب منك تحميها بزواجك الكامل منها يعني هو رايد هذا الشي وبقوه
تعرف ليش ؟؟ احچي شبيك صافن
شهم.. ليش ؟؟
يوسف.. لأن راد يسعدها
چان راغب يودع هاي الدنيا وهو مطمأن عليها لذالك امنها عندك
تعرف هو يفكر احسن منك
اي يا اخي بنيه بعدها هستوها بأول عمرها وحلوه وحبابه يعني الف واحد يتمناها
شنو الشي اليجبرها تعيش العمر كله وياك على الورق بس !!!
طلگها لعد ..
شهم.. شدتحچي يوسف !!!!
يوسف.. اي يا اخي اذا متريدها وتشوفها مثل بنتك ومتگدر تتقرب منها بس لأنها مرت اخوك الله يرحمه فطلگها حتى تشوف حياتها لأن الدتسوي بيها اكبر حرام
ولتتحجج بحمايتك الها
عماد ومات .. سميحه و ولت يعني بعد ما عندك اي عذر حتى تبقيها يمك
شو استغربت ؟! ان شاء الله تريدها تظل معلگه وياك علمود مصلحتك
اي ليش لا
وحده تخدمك
تربي بنتك
تسمع كلشي منك بلا نقاش
وين لاگيها الله ربك ايدك فوگ الايدين
واخير شي من يجي بمزاجك تتقرب منها حتى ترتاح بعدين تندم والمطلوب منها تظل ساكته ومتفتح حلگها بحرف
احچي انت واجهتها بندمك لو لا .. احچي بسرعه
شهم.. اي
يوسف.. اذاً انت مو گد الوصيه شهم
مهيب امنها يمك حتى تحميها ومتخلي احد ينزل الدمعه من عينها بس بالمقابل انت سببتلها اكبر وجع بالعالم لأن مسيت كرامتها
تعرف هسه شدتحس المسكينه .. اكيد دتحس نفسها رخيصه ومجرد سلعه شبعت منها وشمرتها بلا ما تلتفت وراك
اصحى شهم قبل لتخسر كلشي
مياس مو بنتك
مهيب ميقبل بالديصير
ونهى راحت وعافتلك وصيه وحده هي زواجك من مياس
كافي تجرم بروحك وبالمسكينه بهالشكل الظالم
شهم.. راسي يوجعني يوسف احس بي راح ينفجر والله العظيم
يوسف.. گوم بدل خلي اخذك للدكتور
شهم.. ما اريد
يوسف.. مو بكيفك شو يلا گوم
راح انزل جوه شويه واريد اشوفك واگف گبالي
گاعده بالمطبخ انظف بالخضره حتى الهي نفسي حسيت على يوسف طب علينه
يوسف.. چاي يبنات
سمر.. اي تتدلل بس شصار ويا خالو
يوسف.. هسه راح اخذه للدكتور لان ضغطه كلش صاعد
باوع عليه دنگت بسرعه : معقوله شهم حچاله شي
اي اكيد وإلا ليش ديعاينلي بهالشكل
يوسف.. مياس
مياس.. نعم خويه
يوسف.. شلون صار ابوچ
مياس.. نفس وضعه ادعيله
يوسف.. الله يشافي ويگومه الكم بالسلامه
مياس.. امين
گعد يمي ع الميز وسمر تسوي الچاي .. ظليت مدنگه استحي ارفع عيني بعينه بعد ما شكيت بي يعرف الصار ويانه
حسيت على شهم دخل للمطبخ .. گمت بسرعه بدون ما اباوعله وطلعت من المطبخ
اخذت نونه ورحت الغرفتي
ظليت حابسه نفسي لليل لأن مالي خلگ لأي بشر ومچان عندي غير دموع عيني بلكت تخفف شويه من وجعي المينوصف
ب١١ گاعده اگلب بالفيس وبالي مو يمي سمعت الباب تندگ
رفعت راسي وصحت : تفضل
تفاجأت بشهم دخل عليه گمت ع السريع
مياس.. شجابك لهنا !!
شهم.. اريد احچي وياچ
مياس.. واني ما اريد احچي وياك ولا حتى اسمع صوتك
اطلع منا بسرعه
شهم.. مياس
مياس.. اترجاك تطلع .. ما اطيقك يا اخي وروح امي ما اطيقك
ما اهتم الكلامي دخل باتجاه نونه وشالها يبوس بيها
گعدت بمكاني ودنگت راسي عنه حتى لا اشوفه حسيت علي صار يمي
شهم.. مياس لازم تسمعيني
گمت من يمه ع السريع رحت للحمام حبست روحي هناك ابچي بحرگه
ربع ساعه تقريباً طلعت لأن بالي يم نونه اخاف عافها وحدها وراح
دخلت الغرفتي لگيته ما موجود .. مگعد نونه بالگاع وحاط يمها الالعاب تلتهي بيهن
سديت الباب دا امشي للچربايه انتبهت اكو قصاصه ع الميز
عرفتها منه .. شلتها عصرتها بيدي حيل وذبيتها بالزباله
گعدت يم نونه العب وياها بس گلبي مثل النار ما يقبل يهيد
باوعت ع الزباله وگمت بلا وعي .. طلعتها اريد اعرف شكاتبلي بيها
شهم.. اسف واعتذر وروحه المهيب الغالي مو قصدي اجرحچ
صدگيني شما صار تبقين اغلى شي على گلبي بعد امي
درت الورقه : الرابط الي بيناتنا قوي كلش مستحيل يضعف بهيچ موقف لأن البيناتنا روح ( نهى ) بنتي وبنتچ
شگگتها وشمرتها بحرگه : ماكو اي رابط يجمعني بيك شهم حتى نهى التحچي عنها
مر اسبوع ع الموضوع وماكو شي تغير بل على العكس بدت الامور تزداد سوء يوم بعد يوم
مرتين حاول شهم يحچي ويايه بس المشكله كلما يحاول يبرر تصرفه هذا احقد علي اكثر واكثر
صرت ما اطيق اشوفه گدامي وكلشي بالبيت صار يخنگني لو بيدي اطلع انام بالشارع ولا ابقى هنا دقيقه وحده
چنت العصر گاعده بغرفتي دگ جهازي .. شفت ابويه يتصل جاوبت بسرعه
مياس.. ها بابا
اشرف.. شلونچ حبيبتي
مياس.. زينه انت شلونك
اشرف.. الحمد لله شويه احسن
حبيت انطيچ خبر اني اجيت لهنا قبل ربع ساعه وصلت للبيت
مياس.. طرت فرح : صدگ تحچي ؟!
اشرف.. اي بنيتي
مياس.. ماشي جايتكم حالاً
سديت الخط وركضت الم ملابسي بلهفه : واخيراً راح اخلص من هذا البيت
حضرت كلشي بحيث فرغت الكنتور تقريباً
لبست حجابي بس باوعت النونه بچيت بحرگه
مياس.. اسفه ماما راح اعوفچ واروح بس والله مو بيدي
بعد كلشي صار ما اگدر ابقى هنا لأن مالي مكان بهذا البيت
شلتها ابوس بيها عسى ولعل اشبع منها قبل ما اروح
اخذتها وطلعت چانن منال والحجيه بالصاله يتفرجن تلفزيون
منال.. شو مبدله
مياس.. رايحه لاهلي ابويه اجه
ديري بالچ على نونه عفيه بعد ما اوصيچ
منال.. بعيوني حبيبتي بس منو راح يوصلچ شهم طلع
مياس.. جهاد موجود ؟؟
منال.. اي بغرفته
مياس.. زين لعد بلكت هو يوصلني
رحت دگيت الباب علي .. فتح الباب مبدل شكله ديطلع
جهاد.. ها مياس
مياس.. توصلني لاهلي لأن ابويه اجه
جهاد.. اي من عيوني بس انطيتي خبر الخالي
مياس.. اي طبعاً
جهاد.. يلا جهزي نفسچ لعد
مياس.. ماعندي شي مكمله
جهاد.. تبارك اني طالع تردين شي
تبارك.. لا عمري الله وياك
هاي شنو رايحه انتي ؟؟
جهاد.. اي اوصلها لاهلها تشوف ابوها
تبارك.. يا اجه
الحمد لله على سلامته
مياس.. الله يسلمچ حبيبتي
رحت الغرفته اخذت جنطتي وطلعت للصاله باوعت عليهم وكأني دا اودعهم لأخير مره بس ما گدرت ابوسهم حتى ليشكون بشي
خليت وطلعت .. وصلت يم جهاد صفن ع الجنطه باستغراب
جهاد.. هاي شنو الجنطه ؟؟
مياس.. غراضي غير
جهاد.. ليش شگد ناويه تبقين هناك
مياس.. ما ادري حسب لأن ما اگدر اعوف ابويه وهو بهل وضع
جهاد.. ونونه ما فكرتي بيها
مياس.. دمعت عيوني : اكيد شهم يجيبها الي لأن ادري متگدر تنام بدوني
جهاد.. دمشي يلا
وصلنه الاهلي سلمت علي ونزلت .. دگيت الباب تفاجأت بولد شاب فتحها
باوعتله باستغراب يشبه ابويه كلش
احمد.. مياس وضحك
مياس.. اي نعم منو انت
احمد.. ابن عمچ ابراهيم واسمي احمد
مياس.. ابتسمت : هلا والله واخيراً صحت الفرصه حتى نشوفك
احمد.. تفضلي ليش واگفه بمكانچ
طبيت ع السريع لگيت ابويه متمدد بالصاله .. شمرت نفسي علي وشبعت بچي وكأني اريد حجه حتى افرغ گلبي من قهره
اشرف.. بويه على شنو هالبچي هايني گدامچ ما متت
مياس.. اسم الله عليك
اشرف.. تعرفتي على ابن عمچ
مياس.. اي بابا
شعجب اجه وياك
اشرف.. يظل هنا يمي .. عمچ ما قبل ارجع ولمن اصريت دز ابنو ويايه گال ما اگدر اعوفك وحدك وانت بهل وضع
مياس.. زين يسوي والله
گمت شبگت اخوني ابوس بيهم بلهفه على گد ما مشتاقتلهم .. شويه ورحت اخذ الجنطه للغرفه اجه احمد سحبها من ايدي بسرعه
احمد.. هاي شدتسوين !!
انطينياها عنچ اني اخذها
مياس.. شكرا الك
احمد.. على شنو بت عمي هذا واجب
وگفت بالمطبخ سويتلهم اكل وراها نظفت البيت لأن متروك صارله فتره طويله
للتسعه نومت اخواني لأن تعبوا من السفر وطلعت للصاله
شفت ابويه نايم واحمد ديتفرج اخبار بس منصي الصوت للأخير
احمد.. شنو ناموا
مياس.. اي
احمد.. منو جابچ لهنا
مياس.. ابن اخت رجلي
احمد.. ورجلچ وينو لعد
مياس.. عنده شغل لذالك ما گدر يوصلني
احمد.. تعالي اگعدي لعد خل نتعرف شويه من زمان منتظر هاي اللحظه
مياس.. ابتسمتله : اي ليش لا
عرفني عن نفسك بلاول
احمد.. اسمي احمد عمري ٢٦ خريج قانون بس گاعد عطال بطال للأسف
مياس.. ههههه الله يساعدك
لعد شلون عايش اذا متشتغل
احمد.. شايل روحي لأن اشتغل ويا صديقي بمحل مال البسه نسائيه
مياس.. صانع يعني
احمد.. شتشوفين هاي الشكول تلوگ لغير الصانع
مياس.. ليش تحچي هيچ ترى الفقر مو عيب
بعدين شبيك خريج وتعبان على روحك بس هذا العراق العظيم مينطي الحق الصاحبه
احمد.. اي صح
وانتي ؟!
تدرين كلشي ما اعرف عنكم
چنت اسمع من ابويه عندو اخ عايش ببغداد بس كلشي ما اعرف عنو بعد
لحد ما شفتو يمنه وبديت اتعرف عليه شويه شويه .. وهسه حاب اتعرف على بنتو اذا متمانعين
مياس.. اني ... دا احچي اندگ الجرس بصوره سريعه بحيث فز ابويه من نومته
احمد.. يا ستار يا رب هاي شكو
خليت ايدي على گلبي
گام احمد فتح الباب ثواني طب شهم واعصابه طافره بعيونه...
يتبع..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!