رواية مياس قلب الشهم الفصل الثاني 2 - بقلم لبنى الموسوي

#مياس_قلب_الشهم

للكاتبه #لبنى_الموسوي

گعدت الصبح ساعه سبعه على صوت المنبه كالعاده حتى اسوي ريوگ لابويه واروح للشغل قبل لا تگعد سميحه ويا ويلي اذا گعدت ولگتني ما طالعه معناها يوم كامل عقوبه مع التفنن بتنفيذها

بس قبل لا اروح لشغلي خلوني احچيلكم شويه عن معاناتي

امي الله يرحمها ربت يتيمة الاب والام لان بيبي توفت نتيجة مرض خبيث وچان عمر ماما بوقتها بس ١٠ سنوات بعدها بسنتين مات جدي بسكته قلبيه من حزنه عليها لان چان كلش يحبها وتعب يلا صارتله تالي ما لحگ يتهنى بيها

عم امي هو الاخذها ورباها وما قصر ابد بتربيتها لحد ما صار عمرها ١٦ سنه زوجها الابنه الي هو ابويه وهو هم چان صغير لان تزوج بعمر ال٢٠ سنه

بعد زواجهم بكم شهر ابويه اخذ امي وانتقلوا من الرمادي لبغداد لأن لگه شغل هناك هو وصديقه واستقروا بيها

وبعد انتقالهم لبغداد بشهر تقريبا امي صارت حامل بيه

مرت اوقات صعبه كلش على ابويه لدرجة تمرض لان ميلحگ على العيشه والمصاريف خصوصا الوضع المادي اله ولأهله چان جدا ضعيف

اجيت للدنيا وصار عمري سنه وزادت مسؤوليات ابويه لحد ما قررت امي تساعده وتخفف عنه

فتحت ويا الموضوع صح بلاول رفض بس بعدين وافق لان وضعه چان كلش صعب ويا الايجار والمصاريف اليوميه فشاف هذا انسب حل حتى يخف حمله شويه

بلشت امي تساعد ابويه وگامت تخبز للناس من الصبح للمغرب وتهلك نفسها في سبيل تشيل عنه وتساعده

ما اتذكر السنين الاولى من حياتي والشي الاتذكره منها كلش قليل ،، بس يوم واحد ما گدرت انسى ولا گدرت اشيله من بالي لحد هاي اللحظه

بوقتها چان عمري ٨ سنوات هستوني راجعه من المدرسه صبتلي امي الغده وگالتلي شويه واجي انيمچ بس اخلص خبز العالم

راحت تخبز كملت اكل ورحت خليت الصينه على الحوض دا ارجع للغرفه سمعت ماما تعيط بصوت طالع من كل گلبها

رحت اركض للحديقه ويا ريتني ما رحت لان منظر امي ظل بعيوني من هذاك اليوم واني اشوفها شلون گابه النار بيها وتفتر منا ومنا بس تريد تطفيها ومتعرف شلون وفوگ الضيم چانت حامل بشهر الثامن

بس شفتها بهاي الحاله تخبلت ... فزعت من خوفي وركضت عليها حتى اساعدها بدون ما اخاف من النار

وهي بهذيچ الحاله وروحها دتطلع امومتها تغلبت عليها وفكرت بيه ،، صيحت بصوت يخوف حتى تمنعني اتقرب منها ... مياس لتجييييييين

گمت ابچي واگمز بمكاني ما اعرف شلون اتصرف وياها لأن چنت كلش صغيره لحد ما حسيت الباب تندگ حيل

رحت اركض فتحتها وشفت الزلم جيرانه ملتمين بالباب على صوت ماما

مياس.. الحگ عمووووووو ماما احترگت

طبو الزلم يركضون جابو بطانيه من جوه لفوها بيها حتى تطفى النار وشالوها للمستشفى

ظليت بالبيت وچانن ويايه مجموعه من نسوان المنطقه وراها اجه بابا وصارت هوسه بلأول چنت بس ابچي واريد امي وهم يحاولون يلهوني ويچذبون عليه هسه تجي ومن هالحچي لحد ما عرفت بيها ماتت

ما گدرت اتقبل موتها رغم صغر عمري والسبب المنظر الشفتها بيها لان صعب كلش امحي من ذاكرتي مهما حاولت

مرت سنه كامله على وفاة امي وبهاي السنه كلش اتبهذلنه اني وبابا لان البيت بلايه مره ميسوه فلس

چان ابويه يرجع من الشغل تعبان وفوگ تعبه يجي لتعب البيت ودراستي ،، طبعا احاول دائما اساعده شگد ما اگدر بس اظل طفله وطاقتي على گدي

وبعد هاي السنه جيرانه سعتله بزواج من مره مطلقه وما عدها اطفال وگالتله تداريك وتداري بنتك الى متى تظل هيچ وابويه اقتنع بسرعه لان حقه تعب كلش بين الشغل والبيت

تزوج ابويه سميحه ومنا نسيت شي اسمه راحه وامان وبلش القهر يربه ويايه سنه بعد سنه

اول زواجهم چانت زينه ويايه بس مو لله لا غايتها تكسب ابويه خصوصا بابا فقير ومن اهل الله كلمه تودي وكلمه تجيبه

بدت المعاناة بعد زواجهم بسنه ،، اول ميطلع بابا للشغل تستلمني كفخ وضرب وعض وتخليني اشتغل البيت من فوگ ليجوه وتهددني اذا حچيت شي تذبحني بالسچينه

فتره بسيطه وسيطرت كلش على ابويه بحيث لو تضربني گدامه ميفتح حلگه بحرف خصوصا بعد ما جابت ثنين جهال مصطفى عمره حالياً ٦ سنوات ومياده ٤ سنوات

يوميه تستلمني من رجعتي من المدرسه ولحد ما انام شغل شغل شغل لحد ما اسمع عضامي تطگطگ بجسمي من التعب وبس اتنفس معناها اكلت صونده معدله او چويات بالسچينه او بواير الكهرباء وغيره من التعذيب الجسدي ناهيك عن تعذيبها النفسي الي من المنع عن الاكل والشرب او تحبسني بغرفه ظلمه للصبح بالشته بارده ثلج وبالصيف حاره نار

دراستي ما گدرت اكملها للسادس وبطلت من كيفي لان اصلا ما الحگ اقره كلمه وحده من گد الشغل واروح للمدرسه اترزل وانضرب من المعلمات اخير شي استسلمت لقدري وگعدت من المدرسه ،،، خلص الدراسه للانسان مو للحيوان مثلي

اول ما بطلت من الدراسه استغلت سميحه الفرصه وجبرتني اشتغل بالتهديد ،، گالتلي لو تطلعين تبيعين كلنس بالتقاطع البراس الشارع لو اذب عليچ بلوه بس الله اليعلم بيها واخلي ابوچ يذبحچ عكس القبله

بديت ابيع كلنس مثل ما طلبت مني حالي حال اي متشرده ما عدها اهل وما اسولفلكم على المواقف الامر بيها من الصبح للظهر بس حتى ابيع چم باكيت

طبعا شغلي چان بعلم ابويه وما اعرف شلون سميحه قنعته بس متأكده سالفة سحر لان بعيني اشوفها شلون تشتغله بتوالي الليل وما بيدي شي اسوي غير اتفرج واسكت لان اني مو گدها

بديت اكبر شويه وبدت تخطط لزواجي يوميه جايبتلي عريس شكل بس ابويه مچان يقبل ويگولها بعد وكت مو مال زواج هسه

اخير شي استقر خيارها على ابن اختها السرسري لان عنده فلوس حتى تستفاد براسي ويوميه تگعد يم ابويه ساعه كامل تقره براسه حتى يقبل يزوجني اله بس هو مصر على رفضه لان يدري بي شنو من نموذج

يلا لازم اطلع للشغل قبل لا تگعد السعلوه هههه تعرفون باقي التفاصيل من احداث القصه ان شاء الله

سويت ريوگ لابويه طلع لشغله كعامل للبناء وطلعت بعده بربع ساعه للتقاطع حتى ابيع الكلنس

وصلت ووگفت ابيعهن على السيارت واتوسل بيهم واحد واحد علمود يشترون مني لأن ما اگدر ارجع للبيت اذا ما بايعتهن كلهم

ولأن اكثر من مره تعرضت للتحرش والمضايقات گمت اذب شال على راسي والف نص وجهي بي حتى اخلص من هالسالفه

مياس.. اشتري مني الله يخليك

نزل الجامعه ورفع حاجبه وحچه ويايه بابتسامه

- اشتري ليش لا بس شنو رأيچ انطيچ ضعفهن عشر مرات وتصعدين ويايه

ضربت ايدي بطرف سيارته ونترت بوجها حيل

مياس.. اتحرك منا لا اراويك شي ميعجبك ابد

- واني شگتلچ ليش هيج عصبيه بعدين على شنو مغطيه وجهچ اذا مطلعه عيونچ الحلوه المفروض اول شي تغطيهن هن هالعيون يا عسل

مياس.. تتحرك لو ابتلي بيك وحق الخلقك

- براحتچ انتي الخسرانه حبيت افيدچ

مياس.. ولي منا يفديني ابو الوصخ

راح من يمي درت وجهي شمرت الكلنس بالگاع من قهري

مياس.. يربي شوكت اخلص من هالعذاب ،، الى متى اظل حالي حال بنات الشوارع افتر بين الزلم ويم اليسوه والميسوه .. الهي لو ماخذني ويا امي ولا مخليني تحت رحمة سميحه

گعدت ع الصبه حتى ارتاح شويه ،، عطشت كلش لان حاره موت وما عندي فلوس اشتري ماي ولا اگدر اصرف من فلوس الكلنس غير سميحه تذبحني من صدگ اذا سويتها

مرت سياره وبيها عائله رجال ومرته وثنين جهال ،، وگف يمي ونزل الجامه

- عمو انطيني باكيت كلنس

فرحت كلش وگمت على السريع

مياس.. اي عمو تفضل هذا

عاينت على المره بيدها بطل ماي واني العطش فطر حتى شفايفي ،، حست عليه وسألتني

- شنو حبيبتي عطشانه

مياس.. اي خاله كلش

- سوده عليه هاچ حبيبتي اشربي

اخذته منها ع السريع ،، وخرت الشال وشربت مثل الما شايفه بس حتى اروي نفسي

- انتي طول اليوم تظلين بالشارع تبيعين لو شنو

مياس.. لا خاله اول ما اخلص الكلنس هذا ارجع لبيتنه

- محمد اشتري كله منها خطيه خلي ترجع لبيتهم صعبه توگف بالشارع بهل حر وفوگاها بعدها طفله وولد الحرام ميرحمون

- اي عمو جيبي اني اشتري منچ بس بوجهچ للبيت لتظلين هنا

مياس.. صدگ عمو تشتري كله مني

- هههه اي عمو صدگ اشتري كله منچ

انطيته اله واني طايره من الفرح لان راح ارجع للبيت واخلص من الشمس والشارع صح هناك هم اروح اكرب واشتغل منا لما ينكسر ظهري بس يظل ارحم من وگفتي هنا

شفته طلع فلوس من جيبه وانطانه اكثر من سعرهن ،، ضجت ورديتهن علي

مياس.. لا عمو هذني كافي

- ليش حبيبتي اخذي من عمو لتردي يفيدنچ على الاقل تشترين ماي من تعطشين

مياس.. خاله اني مو مگديه وما اقبل احد يتصدق عليه ،، اشكركم كلش على موقفكم هذا ما راح انسى .. الله يوفقكم وميراويكم مكروه بجهالكم

خليت ورحت على السريع ،، مشيت بخنگه لحد ما دموعي نزلت على خدي

انقهرت كلش على حالي لان حسيت بالذل الحقيقي لمن اشوف الناس تتصدق عليه وتعاينلي بنظرات شفقه

تذكرت ماما الله يرحمها شلون چانت كاسره ظهرها بالشغل بس حتى متخليني اعتاز الشي واظل مرفوعة الراس عكس هسه استحي حتى ارفع عيوني بعيون المقابل

رجعت للبيت على غير العاده لأن چانت تقريبا الساعه عشره الصبح

سميحه.. شو راجعه من وقت ولچ

مياس.. بعتهن كلهن شعندي باقيه بالشارع

سميحه.. شلون بعتيهن بهل سرعه بس لا ك××× ويا احد وانطاچ فلوسهن

مياس.. والله عيب عليچ هيچ تحچين ششايفتني بت شوارع حتى ابيع نفسي علمود شكم فلس

سميحه.. بت القندره ليش تلاسنيني اليوم امچ احرگها بگبرها

لزمتني من شعري وجرتني حيل وهي تكفخ بيه

مصطفى.. لا ماما عوفيها الله يخليچ

سميحه.. انچب ولك لتدافع عن هاي ال×××

مياس.. ضربيني عادي اصلا جسمي تعلم على الضرب بحيث كلشي بعد ما احس بس اترجاج لتفشرين گدام اخواني ليش تعلميهن على الفشار وهم بهذا العمر

سميحه.. والله اليوم انهيچ يال××× اريد اشوف شلون تردين بوجهي

لزمتني ملختني تملخ واني مستسلمه الها لان بس ادافع عن نفسي معناها هاي الـ الله كاتبها عليه

وخرت عني بعد ما گطعتني بالصونده ،، گمت بالگوه ورحت للغرفه مالتي ومال اخواني

گعدت بالگاع واحس جسمي يون عليه من الألم ،، رفعت البدي اعاين طبع الصونده بجلدي وصاير المنظر مثل الخريطه

بچيت مو من الم الضرب لا بچيت من الم گلبي والوجع الاحسه يدگ حتى بدماغي

تعبت من كلشي ،، حياتي وعيشتي وجسمي الشبع ضرب طول هالسنين وعيوني الما مر عليهن يوم اذا ما ذبن كل دمعهن

طبت عليه سميحه تركض وبيدها النعال ،، ضربتني بي وگامت تصيح

سميحه.. گومي بت الصخله گومي بسرعه اشتغلي مو لگيتيها حجه حتى تخلصين من الشغل

مياس.. اخ كافي جسمي گام يوجعني ،، ارحميني الله يخليچ والله بعد ما بيه اتحمل ضرب

سميحه.. ارحمچ مو ،، من الله لا يرحمني اذا رحمتچ

ظلت تضرب بيه فوگ ضرب الصونده لحد ما شاغت روحي ،، طلعت من يمها اركض ورحت للمطبخ

مياس.. والله راح اشتغل بس عوفيني

سميحه.. يلا بسرعه تخلصين كل الشغل قبل لا يجي ابوچ تسمعين لو لا

مياس.. اي سمعت ،، صار صدگيني هسه كله اخلصه

عافتني وراحت ،، وگفت اشتغل ودموعي تجري بقهر وكل دمعه تنزل مني تچوي گلبي قبل خدي

صارت الوحده يلا خلصت لان الشغل كله عليه حتى الطبخ ارجع من الشارع الظهر اطبخ ع السريع قبل لا يجي ابويه وسميحه شغلها بالبيت بس تضرب وتفشر وتطلع للجيران تحش بهاي وهذيچ

صبيتلهم الغده ،، گعدو ياكلون اجيت اگعد صيحت عليه

سميحه.. ماكو زقنبوت يلا ولي من گدامي عقوبه للعشه

مياس.. بس والله جوعانه كلش

سميحه.. جوعة اهل الگبور لتخليني ازيد عقوبتچ واخليچ للصبح بلا اكل

عفتها ورحت للغرفه ،، ميته جوع لان من الصبح مماكله شي واصلا هي محددتلي حتى الاكل نص ماعون تمن الظهر ونص گرصة خبز بلليل غيرهن ماكو لو مدري شيصير

مياس.. يا الله جوعانه حتى بطني دتأذيني شلون اتحمل لليل

درت وجهي ع الميز شفت اكو بسكت يمكن مالت مياده اختي

ركضت شلته بي بس اربع بسكتايات يلا نعم الله عاد شويه يهدأن وجع معدتي

اكلتهن وتمددت ع المندر واحس ظهري يريد ينگطم من الوجع ،، شويه وطبتلي سميحه

سميحه.. گومي لچ لمي السفره وغسلي المواعين خلصنه

فتت من يمها بلا ما احچي شي ،، لميت المواعين وغسلتهن دا اروح للغرفه صاحتني

سميحه.. وين موليه

مياس.. للغرفه انام شويه تردين شي

سميحه.. واخوانچ شنو ان شاء الله تردين تعوفيهم عليه

مياس.. لا ما اعوفهم ،، گومو حبايبي خلي انومكم

اخذتهم ورحت ،، ظليت اسولفلهم قصص لحد ما ناموا

تمددت احاول انام بس ما گدرت من الجوع

مياس.. خلي اگوم بلكت الله طالعه لو نايمه حتى اكلي ولو لگمة تمن لان بعد ما اتحمل

طلعت اتسحب شفتها ماكو رحت اركض للمطبخ وهستوني فتحت الگدر ضربتني على راسي

سميحه.. اني شگلت ك××× تعانديني مو اليوم حتى عشه ماكو اله اربيچ من جده وجديد

مياس.. والله مو قصدي دا اشوف شگد باقي بالگدر تمن حتى من يجي ابويه اصبله

سميحه.. يلا لچ عليه تعبرين سوالفچ هاي ،، اليوم ماكو عشه لو تطلع نخله براسچ يلا ولي من گدامي وديري بالچ تعيديها بعد .. هل مره حرمتچ من الاكل مرة ثانيه احرمچ حتى من النفس وتفهمين قصدي كلش زين

رجعت للغرفه وبس طبيت نهاريت بالبچي

دفنت راسي بالمخده حتى ليحسون عليه اخواني وبچيت لحد ما اختنگت

سمعت صوت ابويه اجه ظليت گاعده بمكاني ما تحركت حتى ليشوفني بهل حاله ويبدي سين وجيم اصلا حتى اذا شافني شيريد يسويلي وهو مثل المحبس باصبع سميحه

صار العصر گعدو اخواني اخذتهم وطلعت للهول چانت گاعده ويا ابويه ع التلفزيون

مياس.. الله يساعدك بابا

اشرف.. هلا بنيتي شو ما شفتچ اليوم

سميحه.. اي عيني مدلله طول اليوم حابسه نفسها بالغرفه وعايفه شغل البيت كله على راسي

فتحت عيوني عليها بس ما گدرت اجاوبها حتى لا ازيد الطين بله

اشرف.. ليش بابا هم خطيه مو كافي عليها اخوانچ هالدور حتى متعاونيها بالبيت

مياس.. اسفه بابا بس چنت كلش تعبانه ،، هسه راح اسوي كل شغل البيت

سميحه.. هو شظل بالبيت كله اشتغلته اني

عفتها ورحت للمطبخ عاينت للگدوره ،، والله جوعانه بس مستحيل اگدر امد ايدي عليهن غير تعدمني عيشتي اكثر من هالضيم الاني بي

غسلت مواعين ابويه لان الخاتون عايفتهن ع الحوض بلا ما حتى تفرغهن

دا اسوي بيهن چان تطب ورايه

سميحه.. خو ما اكلتي ولچ

مياس.. لا ما اكلت اطمأني

سميحه.. عفيه بالشاطره ،، تدرين شلون نقذتي نفسچ من سكتي گدام ابوچ لان متدرين چنت ضامتلچ مصيبه اذا فاتحه حلگچ وحاچيه

مياس.. لا ادري

عافتني وطلعت كملت المواعين ورحت گعدت يم اخواني العبهم لحد ما صار الليل

سويتلهم العشه وفرشت السفره ،، گعدو ياكلون واني اتفرج عليهم لان ممنوع امد ايدي على الاكل

اشرف.. ليش متاكلين

عاينت عليها خزرتي بسرعه ورفعت حاجبها حتى تنبهني

قررت اگوم اكل لان جسمي ديرجف من الجوع وشيصير خلي يصير

مياس.. اي بابا اجيت

هستوني گاعده عاطت بيه بصوت عالي

سميحه.. متگعدين تاكلين

اشرف.. وليش متگعد

سميحه.. معاقبتها واليوم تظل بلا عشه

اشرف.. شسوت وعاقبتيها

سميحه.. تقبل بشرفك بنتك المصون اليوم فشرت عليه فشار مينلبس علي ثوب الظاهر تعلمت من الشوارع التوگف بيها يوميه

اشرف.. شنو هذا الحچي الدا اسمعه مياس

مياس.. والله بابا چذابه ما فشرت عليها

بس حچيت هيچ گمز عليه وجرني من ايدي

اشرف.. هاي عليمن چذابه ؟؟ اعتذري بسرعه لا ادفنچ هنا

درت وجهي عليها حتى اعتذر ،، شفتها تعاينلي صفح وتضحك لان انتصرت

مياس.. اسفه

سميحه.. ولي من گدامي ما اريد اشوف چهرتچ بعد

رحت اركض للغرفه طبگت الباب وشبعت بچي

نص ساعه وگمت اغسل المواعين احسن ما تجي وترزلني هن ورايه ورايه

واگفه بالمطبخ اشتغل ،، خرعتني من قربت راسها يم اذني وحچت بصوت ناصي وانفاسها تكفخ بأذني مثل الحيه

سميحه.. اني تتحديني ولچ ،، تعرفين منو سميحه لو لا ؟؟
اسمعيني حبابه وانصحچ تستوعبين كلامي حتى تنقذين نفسچ
اني حتى شرفچ اخذه منچ اذا اريد واخلي موتتچ تصير مثل موتت چلاب الشوارع فتحي مخچ واعرفي شلون تتصرفين ويايه لتخليني احطچ براسي وساعتها ما ارحمچ وداعة جهالي

حچت هيچ وعافتني وطلعت من المطبخ ،، جرت دموعي بسرعه لان كلامها چان چبير كلش واعرف بيها من تريد شي تسوي وميهمها اكبر واحد

خلصت الشغل على السريع وطبيت للغرفه ،، ظليت گاعده ساعه وكلشي بيه يوجعني جسمي من الضرب .. گلبي من الخوف .. بطني من الجوع
لحد ما طبت عليه وبيدها اخواني

سميحه.. هاچ نيمهم زباله

عافتهم وطلعت ،، صحتلهم وبديت اقنعهم حتى ينامون لان بعد وكت وما نامو إلا بعد ساعتين ضبط

اول ما نامو نمت اني هم من التعب لحد ما حسيت على المنبه بالسبعه الصبح

گمت ع السريع لان ممصدگه راح اتريگ واخيراً

سويت الچاي وگعدت اتريگ ويا ابويه ،، طلع لشغله واني طلعت ورى

لفيت الشال على وجهي ووگفت ابيع بالكلنس شويه ووگفت يمي سياره بيها رجال چبير بالعمر كلش

- انطيني كلنس

مياس.. اي عمو

شلت باكيت ومديتله ايدي من الجامه انطيته اله ومن دينطيني الفلوس لزم ايدي

سحبتها منه بسرعه واني مصدومه من تصرفه لان ممتوقعه يطلع هالشي من واحد بگده

- شبيچ خفتي شسويتلچ قابل كله لان لزمت ايدچ

ما حاچيته ورحت گعدت على الرصيف شفته نزل وتقرب مني

- شنو رأيچ اخلصچ من هالشغل وانطيچ اكثر من الفلوس التحصليهن بس بالمقابل تريحيني

رفعت راسي وفتحت عيوني بوجها ،، گمت على حيل ووخرت الشال من وجهي

مياس.. اسمع لك لتشوفني احترمت شيباتك اول بدايه وسكتتلك ترى وحق الله انزع حذائي واگطعه على راسك وراس شيب اهلك بگبرهم اذا متولي منا

صفن بوجهي شويه وراح بلا ميجاوب شي ،، دفرت الرصيف برجلي حيل من القهر واني احچي ويا روحي

مياس.. رجال شكبرك رجلك بباب الگبر وتدور هالسوالف الطايح حظها من كون الله يغسلك يا عار

ظليت للظهر مغثوثه من السالفه الصارت لحد ما بعت كل الكلنس

رجعت ب١٢ للبيت لگيته يضرب يگلب من الهوسه والوصاخه

انطيتها الفلوس بلا ما احچي وياها حتى اتجنبها لتروح تعاقبني لو تخليني ببالها

غيرت ملابسي وخليت الگدر على النار ،، نضفت البيت لحد ما صار الاكل

صبيت واكلنه دا اغسل المواعين اجتلي سميحه

سميحه.. مشتهيه لبن امشي شتريلي

مياس.. منين اشتريلچ بهالظهريه

سميحه.. انچبي واكلي ××× يلا فضيني بسرعه

مياس.. يمعوده منو مفتح هسه

سميحه.. ابو علي يفتح

مياس.. بس ابو علي كلش بعيد شيوديني اله

سميحه.. يلا بت الخبازه ،، بعيد ام حلگ طلعي فلوسچ الدتحصليهن من ال×××× الما اعرف وين ضامتهن وركبي تكسي وروحيله

مياس.. ديلا انطيني فلوس اروح وامري لله

جابتلي فلوس اخذتهن منها وطلعت بملابس البيت بدون ما ابدل لان روحي لعبانه من كل الدنيا حتى من نفسي

الساعه ثنتين الظهر تموز والشمس تضرب بالگلب قبل الراس

رفعت ايدي حتى احمي بيها وجهي وعيوني من الشمس العاموديه واشعتها القويه

اتلفت يمنه ويسره الشارع فارغ ما تلگه بي الطير الطاير

المحل بعيد عن بيتنه لان هو الوحيد اليفتح بهالفحيمه

الطريق طويل وميقبل يخلص ،، مجبوره اروحله واشتري منه اللبن لان لو رجعت وما مشتريته معناها انام بلا اكل لباچر الصبح هاي من غير المسبه والضرب الراح اكله من سميحه

مياس.. يا ربي كون بهاي الشمس التخلي الدجاجه تستوي بخمس دقايق تسمط جد جد سميحه وتريحني منها

امشي وادردم ويا روحي واحس العرگ يگطر من كل مكان بجسمي وشعري لزگ على رگبتي وحتى النفس كوه اجره من التعب

فجأه شخطت سيارة گدامي ونزلو منها ٣ شباب

عاينت عليهم مبين من شكولاتهم سرسريه ومو راحه

- وين رايحه الحلوه بهالظهريه

مياس.. وانت شعليك طايح الحظ

- احترمي نفسچ ولچ والزمي السانچ من تحچين ويا المعلم

مياس.. معلم عليكم وعلى روحه مو عليه ،، يلا وخرو من طريقي خلوني اولي

- تعالي خلي نوصلچ احسن من المشي بهالحر

مياس.. ميحتاج وصلت بس چفوني شركم

واگفين گدامي سادين عليه الطريق ومبتسمين بوجهي بابتسامه شريره

گمت ارجع ليوره واتلفت بلكت الله يجي واحد بالصدفه ويخلصني منهم بس منو اليطلع بهيچ وقت غير بس المخبل

ركضت بكل حيلي واحسهم يركضون ورايه واصوات ضحكاتهم عاليه كلش

صارت خرابه گدامي طبيت بيها على السريع من حلاة روحي حسبالك شفت باب بيت مفتوحه مو خرابه والنتيجه انحصرت هناك

- اي عاشت ايدچ همزين طبيتي هنا حتى ناخذ راحتنه

مياس.. احترم نفسك ولك ايدك تنكسر اذا تمدها عليه غير اصيح بصوت الم عليكم امة لا اله إلا الله

- ههههههااااااي منو اليسمعچ بهالظهريه العالم التحچين عنهم هسه بسابع نومه گدام السبالت والمبردات

- هههه دعوفها حقها مغشمه نفسها گول متدري محد يطلع بهيچ وقت غير بس الك... والع....

مياس.. زين والله من تعرفون نفسكم شنو من بشر

- ههههه وانت شنو لعد غير حالچ من حالنه قابل طبينالچ للبيت

- هاي شبيج دخلينه نتونس وياچ لتخافين مراح تنقص منچ قطعه ،، ومتأكد انتي هم عاجبچ هالشي بس تبيعين ثگل علينه

سمعت كلامهم وگلبي گام يدگ براسي من الخوف ،، يتقربون مني واني ارجع ليوره لحد ما جروني من ايدي

- ليش خايفه حياتي بعدين گوليلي شهل جسم اليموت انتي شگد عمرچ ولچ

- دعاين عيونها وشوف اللون الغريب مالتهن يبووووووي من يا قالب الله خلقچ بت الكلب

- اي والله تملخ ولكم ،، هي صح مبهذله بس مو مشكله تعديلات بسيطه وتصير صاروخ

- صح كلامك بس يمعود احنه خلي ناخذ النريده منها وهي بعدين تعدل روحها مثل متريد هههه

اسمعهم يحچون وارجف من الخوف واني اشوف مصيري مرسوم بنظراتهم التتفحص كل جسمي

مقيدين حركتي ويتلمسون بأيدي بشكل مقزز ،، جريت نفس قويت نفسي بي وحاولت ما انقللهم خوفي حتى لا يستغلون هالشي

ضحكت ضحكه قويه بس حتى اربكهم واتدارك الموقف قبل لا تفضحني عيوني

مياس.. ههههههه والله ضحكوتي كلش

- ليش تضحكين الظاهر عجبتچ السالفه

ثواني وسمعنه صياح رج المكان رج وهو يعيط بيهم بصوت عالي ،،، شديصير هناااااااااا

درت وجهي شفته رجال ضخم وطويل حاد نظرته علينه ويعاين باستغراب ....

يتبع..

__________

كل عام وانتم بألف خير متابعيني الكرام ،، ربي يجعلها سنة خير ومحبه وسلام عليكم وعلى بلادنا الحبيب