رواية مينا الفصل الثالث والعشرون 23 - بقلم Chra

#مينا23

مرت 6 اشهر على زواجنا مخليت خلال هالفترة مينا تحس اكو زوجة ثانية بحياتي من ارجع للبيت اقفل تليفوني وخصوصا بالليل اكثر وقتي اكضي وياها نطلع نسافر نروح مطاعم نتسوق للبيت اسوي وياها شغلات عمري متخيلت اسويها سمعت صوت ااباب رجعت من الدوام والضحكة ماليه وجها اللي يخلي غصب الواحد يعوف كل الدنيا علمودها تحضني وتتحارش بيا

ليش احبك جاوبني بسرعه قبل لاازعل منك مشتاقتلك حبيبي وعمري

لان انتي نصابة ومتردين تطبخين تسوين هالحركات حتى تسكتيني واطلبلج من برا واني شبعان جنت معزوم وانتي سويلج لفة جبن وتعالي نامي بحضني قبل لاأزعل

اخ منك ماكدر عليك غيرت ملابسي واني احجي وياه وهو كاعد بالصالة تليفونه بأيده يحجي سمعته يصيح وصار عصبي طلعت بسرعه من الغرفة وكفت يمه جان صوت شوق وهي تبجي وهو يحجي عليها فهمت ابنها مريض كلش حسيت نفسي ظالمة كلش باوعتله وهو متعصب يسب بشوق أحمد روحلهم بسرعه خطية شنو ذنبه

صارله ايام مريض هسة الخاتونه فكرت تخابرني تريد تعاقبني اني الها بس اوصل يمهم اذا مخليتها تتمنى الموت فلا اني احمد

لا أحمد لاتسوي شي ترى هي ام نزلت دموعي تمنيت اصير ام مثلها هي حامل من جديد راح يصيرون 3 واني بعدني ولاشي صح صعب عليه اتقبلها بس مجبورة لان اشوف احمد اشكد يراعيني ويحبني

وانتي شلون اخليج وحدج وعدتج

خليت ايدي على شفايفه لاتكمل طمني على ابنك من توصل اروح احضر غراضي واخابر مصطفى يجي ياخذني مخليته يحجي شي دخلت للغرفة واني على الاساس اطلع غراض بعد شوية سمعت صوت الباب باوعت من الشباك وهو يصعد بسبارته كعدت بمكاني ابجي صعب كلش صعب نص حياة واحد يعيشه  اعرف يضغط على نفسه علمودي بس من توصل لسالفه جهاله ماكو مقارنة

وصلت بيتنا مخبوص ابني نايم بالمستشفى الكل زعلان وضايج مني محمليني السبب واني هامل عائلتي علمود مينا أبويه اولهم وحبوبة متقصر تزيد نار على الحطب اخر شي بعد معرك ومشاجرات بينتنا ابويه حلف ماطلع من البيت اذا مااخذت شوق وجهالي ويايه لو يتبرون مني كل اللي اني بي بجهة ومينا شلون اقنعها اكدر اسيطر على شوق واصلا عادي اخذه بس هي صعب قررت اخذهم ومابلغها أحطها كدام امر الواقع بقيت اسبوع يوميا تخابرني واحجي وياها بس ماكوللها على جية شوق

رحت للصالون رتبت نفسي استغليت غياب احمد اشتريت غراض جديدة وترتيبات لغرفة النوم والصالة غيرت من ديكور الاثاث واماكنها عدنا غرفة فارغة كل يوم افتحها وأدعي يمتى الله يرزقني بطفل واكعد اتخيل شلون ارتبها وازينها نظفت الشقة وطبخت اليوم راح يرجع يمكن أكثر من مرة غيرت لبسي سمعت صوت المفتاح بالباب ركضت حتى احضنه دخل صيحت حبيبي ردت احضنه شفت شوق وجهالها وراه تراجعت خطواط واني مصدومه وهمه دخلو سلمو عليه بست الجهال وسلمت على شوق محجيت شي لزمت نفسي حتى نوصل لغرفتنا وافهم منه السالفة ضيفتهم وصبيت الاكل كعدنا وكل واحد بينا رايح بعالمه ردت أشيل المواعين هو راح للغرفة وصاحني جاوبته بعدين خلي انظف

تعالي خلي شوق تكوم تنظف اريد احجي وياج

باوعت على شوق وجهها مو مبين تعبانة لو ابنها مريض كأنه وحدة وصلت لهدفها

اي روحي شوفي شيريد منج اني انظف واسوي الجاي اخذو راحتكم قابل اني غريبة هذا بيتي

دخلت للغرفة واني كلامها يرن بأذني شنو هذا بيتي شنو تقصد أحمد ممكن تفهمني شيصير

حجيتلها الموضوع ومرض ابني مقتنعت ضاجت حاولت وياها نامت وانطتني ظهرها وهي تبجي اهواية حاولت احضنها جانت توخرني خليتها على راحتها وطلعت بالصالة ابني الجبير يلعب والثاني توه يكعد والثالث بالطريق تعالي شوق هالمكان انتي مجرد ضيفة بي لاتاخذين راحتج على الاخر ولاتدخلين بشي ميعنيج لاتخليني أتصرف وياج تصرفات محلوة

اللي تشوفه عيوني راح اسكت ماافتح حلكي المهم نبقى وياك ماريد جهالي يتربون بعيدين عنك حتى لو اضطريت اتنازلك وانطيك حريتك تنام يمي او لا مراح اجبرك المهم ابني يصير زين وأولد بالسلامه

كمت من النوم مفزوعه الدنيا ليل الغرفة مظلمه احس بشي كاتم على نفسي بأيدي دورت على احمد ماكو بمكانه صيحت بكل قوتي دخل وشغل الأضوية حضني وهو يمسح على راسي وطلب من شوق تجيبلي مي والجهال من خوفهم يبجون ظل حاير يسكت منو بينا عرفت هاي حياتي ولازم ارضى بيها ماكو مفر ولازم اتحمل مرت الايام واحمد كله ينام يمي شوق ويا جهالها تنام بالغرفة الثانية بعد ماجهزه احمد ألهم صارت  هي تطبخ الغدا  لان اني بالدوام والعشا عليه ومرات نطلع برا لبسها تغير حتى شعرها وستايلها تغيرت طلبت مني اخذها لنفس الصالون اللي اروح بي ولدت وجابت ولد صارو 3 احمد طاير بيهم مراحت لبيت اهلها اشكد حاول وياها تروح يمهم فترة النفاس مقبلت مرات اساعدها مرات اعتزل بغرفتي واطلب من ربي ينطيني طفل افرح بيها أحمد

مينا ممكن اطلب منج طلب احتمال تضوجين وميعجبج بس لازم اكولج لان ماريد أخدعج

مسحت ايدي ودخلت صينية الاكل للفرن وبديت اسوي السلاطة كولي شوق خير

اريد احمد ينام يمي حتى لو مرة بالاسبوع اتصور هذا حقي ومطالبة بشي مو معقول ميخالف بقية الايام كله يمج الله ميقبلها

جرحت ايدي من القهر مسحتها شتريدين اكوله طلبج لو اني اطلب منه ينام يمج

انتي طلبي منه لان يحبج وميكسر كلامج حتى الله يرضى عليج وتجيبين طفل يملي عليج حياتج

عفتها ودخلت لغرفتي يعني سعادتي مربوطة بدعواتها شنو تقصد هلكد ظالمة اني لو مااخاف الله رجع احمد بالليل كعدته راد ينام كوم روح يم شوق

نعم شبيج اليوم مجنتي تمام حتى طول مانكل سرحانة ومحجيتي كلمة ونايمه بلبس البيت مو من عوايدج وهسة تردين اروح يم شوق

اي روح يمها حتى مااكو ظالمه والله يفتحها بوجهي واصير ام سمعتني اريد اصير ام بجيت بحضنه اذا تحبني روحلها

نامي حبيبتي وانتي طفلتي الحلوة وشوق تعرف ماعندي رغبة بيها ماعليج منها

كمت من حضنه ورفعت اصبعي اذا متروح يمها اروح لبيت اهلي ومتشوف وجهي بعد افتهمت ضربني راشدي

اخر مرة تهدديني بأصبعج وتصيحين بوجهي ومو انتي تهدديني من غير شي راح اطلع من هالغرفة وراح تندمين افتهمتي جربي تعيدي مرة ثانية فتحي عينج زين لاعبالج مرخيلج الحبل واحبج تسويني طرطور وخري من كدامي دخلت يم شوق مبين الخاتون عدها علم اروح يمها محضرة نفسها وتنتظر على عناد مينا لاول مرة ابادل شوق  أحساسها ويايه

مكدرت انام طول الليل واني اسمع صوت ضحكاتهم خليت نفسي بمكانها هي تعيش هالشي كل ليلة واني بحضن احمد اشكد صعب هالاحساس انتظرت يطلع الصبح بدلت حتى اروح للدوام قبل وقته ماريد اشوفهم ولا اصبح بوجههم طلعت من غرفتي شفت شوق وهي تطلع من المطبخ مسوية حليب لأبنها باوعت على لبسها حدث ولا حرج من شافتني خلت ايدها على صدرها على الاساس تستر نفسها سلمت عليها ردت اطلع

وين رايحه مينا مو اليوم عطلة اسفة نسيت البس الروب ابني جان يبجي على السريع طلعت من الغرفة 

الله ياخذكم من وراكم نسيت اليوم عطلة جاوبتها اخذي حذرج مرة ثاني اتصور احمد مبلغج ممنوع نطلع من غرفتنا بهالشكل

بمناسبة احمد اشكرج على اللي سويتي البارحه

مكدرت اسمع شي بعد جريت مفاتيح سيارة احمد من التعليقة اللي ورا باب المدخل وسديت الباب واني ماشوف طريقي من الغضب ركبت السيارة ومشيت بيها بدون هدف قفلت تليفوني جانت بعدها مصايرة ساعه 7 افتريت بالشوارع لحد ماتعبت ردت ارجع لبيت اهلي واعوف احمد يعيش ويا عاىلته مكدرت اسويها لان اني جبانة وماكدر اتخذ هالقرار وماكدر اعيش من دونه اشتريت لوازم الفطور ورجعت الساعه صايرة 9 ركنت السيارة بالكراج شفت سيارة أهلي شنو جابهم من الصبح

كمت على صياح شوق وهي تكولي مينا تركت البيت ماعرف شلون لبست ونزلت حافي على السلالم وصلت للكراج ماخذة السيارة صعدت للشقة واني اغلي واضرب بشوق واسالها راح اتخبل مستحيل تعوفني خابرتها كله مقفول ياربي وين راحت متحملت خالرت اهلها مرايحه يمهم نزلت ركبت تكسي رحت لدوامها رغم اليوم عطلة بس كلت بلكي رايحه دورت باكثر من مكان ماكو رجعت اهلها يمنا انخبصنا نخابر ونسال عليها ماكو صار عندي اغماء من كثرة القلق والتفكير عليها شوية وانجن رجعت الخاتون وهي شايلة بيدها اكياس وغراض ماعرف شعوري ساعتها اكوم اضربها لو احضنها حسيت الدنيا ظلمة وماكدر اسيطر على رجلي راسي يدور .

ركضت على احمد واني اسمع عتاب من أهلي يسالوني وين جنت شوية واموت جنت ارجف من الخوف واني اشوف احمد كدامي متمدد ياربي من كل عقلي فكرت اعوفه شلون فكرت هيجي من فتح عينه حضنته لاتعوفني اني مخبلة وزعطوطة وماعندي عقل واحبك

لاتسويها مرة ثانية اموت من غيرج والله كل اللي جنا نحجي اني وهي ناسين اللي حوالين واكفين يسمعون كلامنا جان هذا اليوم مثل درس النا احنا الاثنين حياتنا متكمل الاسويا مينا صار عدها قبول تام بوجود شوق بحياتها حتى صارو يتفقون ضدي اكثر شي يقهرني نظرات الحزن بعيونها وهي تباوع على ابني الصغير بحضن شوق خليت شوق تسلم مسؤوليته الها حتى تتعود عليهم وتعتبرهم جهالها مو غربة