رواية مزهق للإقتصاص الفصل الحادي عشر 11 - بقلم رمش عقيل

بقلم:رمش عقيل

#مزهق للإقتصلص

تصويت لطفاً.التعليق بين الفقرات.🤍

꧁ـــــــــــــــــــــــ꧂

إذا روحك بدوني تعيش بأستقرار
أقبل ع البدَوني بشرط ينفعَها .

꧁ـــــــــــــــــــــــ꧂

"سما"

أحس أعيوني يردن يطلعن من مكانهن نفسي ضاك وصوت أنفاسي عالي دخل أمير مفزوع صحت عليه

::-اطلـــعع!

بس هوه ما سمع سد باب الحمام بوجه طاهر ووگف يمي يغسل بوجهي بيده يحاول يهديني وأنا جسمي يرجف دموعي نازله وأحس عيوني فعلاً راح تطلع من مكانها صوتي اختنگ بس بعده يحچي

::-هدي اتنفسي مو گتلج لا تاكلين هلكد

معدتي تفور وجسمي يرجف وصياح أهلي من بره يزدا شبيها وشصار أصواتهم مخلوطة بين خوف وارتباك

مسح وجهي بالمنشفة وكأنه يريد يمحي التعب رتب حجابي نضف الحمام وسندني بيده وفتح الباب طلعني للحوش رجلي ما تشيلني وهوه شايلني بنظرة كلها رعب

أمي ركضت علي إيدها ترجف وهي تلمس وجهي
::-يمه شبيچ يا روحي شبيچ

أخواني ملتمين علينه وأبويه واگف بجانبي مخطوف لونه يحاول يتمالك نفسه

أمير رفع راسه يطمنهم
::-صار عدها تسمم من الحلويات الأكلتها بالطريق

صوتهم عالي وكل كلمة توجع راسي أكثر، أحس الأرض تدور وگلبت الدنيا بوجهي.

الأمير ::-اترخص آخذها لدكتور

سما::-وين ما أروح ما بية شي

ولح وياي اله ياخذني بس اني ما بيه حيل شويه وصدك طلعنه بس معدتي تگلب ابوي گال باتوا بس هوا ما قبل بعد واني چنت اريد اشوف اركان اله اروح رجعنه للبيت وگبل صعدت للغرفة وأطرافي ثگيلة خطواتي تجرجر من التعب بدلت عالسريع وكأن بس أريد اخلص ثگل هاليوم شمرت نفسي عالچرباية وغمضت عيني لا كلمة ولا حتى نفس عميق ورحت بالنوم ...

"سرور"
كعدت من النوم عيوني ثگيله وگلبت يمين چانت بس ميليس نايمه عالچربايه الثانية گمت أريد أطلع بس مصيبه لابسه برموده وتشيريت مال ولد وشكبرهن خفت واحد من الولد يلاگيني أخذت الشال من التعلاگه وحطيته على راسي بعدين شلت الغطوه الصغيره ولفيت روحي بيها والله ورطه من انتم عشيرة بيت واحد

طلعت أركض للمطبخ بس ماكو أحد البيت كلها نايمه ذبيت الشال وبقيت بس بالغطوه دخلت أدور عصير البرتقال مالي لأن لو أنام بدون ما أشربه أموت دورت عدل ماكو

بديت أحچي ويا نفسي ياهو الگعده هسه؟
مهدي؟ نومته عزة ما يگعد لو يشيلوني جنازه
سيف؟ نايم بيتهم.
هارون؟ خبيث.
غفار؟ هم بيته خرب.
شيث؟ لا لو أموت ما أروحله.

آخر حل بقه سديم ولو تعبان بس يلا بس هالمرة.
رحت لافه الغطوه علي ونص رجليه طالعين من جوه والشال ضل بالمطبخ غرفتي بأخر الممر وغرفة سديم على إيدي اليمين ثاني غرفة.

دخلت عالراحه مغطيه راسي وشفت هارون نايم بالصفحه الثانية حاضن وقار بحضنه رحت صوب سديم وهمست يمه همست

::-سديم سدوميي

ماكو هزيته هزه خفيفه أول ما فز سحبت الغطه وغطيت راسه وگتله بسرعة
::-هاي أني بس بدون شال

حچه من جوه الغطه بصوت نعسان

::-شتريدين ولج؟

گتله بخجل وبنفس الوقت ضايجه

::-كوم أريد عصير

سند راسه من الصفحه الثانيه داير
::-البارحه جبتلج

::-وين

::-اهنا بثلاجه

::-مالتك؟

::-اي وثاني مرة لا نجين هيج احسلج

بعده، مغطي راسه ويحچي
أخذت جانن ثلاثه باردات ثلج أخذت اثنين وعفت واحد سديت الثلاجه

::-شلون اجيتي ما فكرتي واحد من الولد كاعد حتى اعمامج ما يصير هيج تلبسين گدامهم مو انوب البيت متروس شباب؟

:: -اهوو شسويلكم؟ ما تخلونه نرجع لبيتنه بطرانين.

::-هسه لي يشوفج شيگول؟

:: -اجت تاخذ عصير.

ضحك بصوت
::-هههههههه مصيرلج چارة ولي.

طلعت من الغرفه همستله

:: -بس انتَ الحبيب.

لفيت روحي عدل وركضت قبل لا أحد يطلع دخلت الغرفه وسديت الباب وشغلت التلفون اشرب العصير وباوع شويه طفيته بعد وتمددت على الچربايه ونمت...

"مُنتهى"

الضهر كله هادئ لحظات وبعدين فجأة اصياح سرور بالبيت كله صوتها يقطع الصمت ويدوي بكل زاوية بالبيت

::-والله العضيم انتحر وابليكم

أمها تحجي وياها تحاول تهديه بصوت هادي وهيه بس تصرخ وتصيح

::-تنطووون مواافقهه من كيفكم

ركضنا صوب الغرفة مال أمها وهيه تصيح ودموعها على وجهها وفجر تحچي وياها وتحاول تهديها بس هيه گلبها كله نار وغضب صوتها يهتز بين الغرفة حضنتها فجر خايفه عليها

::-ولچ محددين عقدي من ابن عمج واني ياغافل الك الله ولكم انتم الي تزوجون انتم الي تعيشون غير حياتي

كلها سكتت وگلبي يدگ بسرعه من كلماتها والعيون كلها عليها تحس الألم والغضب والخذلان كلهم مجتمعين في لحظة وحدة اصيح محروگ گلبها واحنه ما دارين عن منو تحچي.

فجر بصوت هادي تمسح بوجها

::-كافي محد من ولد عمج يسويها إذا مو راضية ما يرضون جذب أحد تنغصبين علي معليج منو؟

::-لاا وناهي هم ابن الكلب ال***السربوت

أمها حاولت تضبط الموقف وضربتها وهيه بعدها تغلط لحد ما دخل جدي بس سكتت شافها اشرلنا نطلع وتبقه بس هيه طلعنا وسد الباب

فجر:: -منوو يمه؟

جاوبت امها

::-شيث

ام هيثم::- شماله اسودن

انصدمت فاتحه اعيوني جاوبت امها

::- اي وگايل باجر العقد راضين ما راضين اني ناهي عليها وحاجي وي جدها وبوها

بقينه مصدومين واني گلبي گام يخفك صبينه الغده وتغدوا كلهم اجه العصر شيث اخذها يحچي وياها

"سرور"

صرنه بغرفه هيف وعاف الباب مفتوح

::-عبالك هيچ ما تخليني احچي والحچي الجديد تريد تزوج بسرعه علمود تروح تكمل شغلك وتاخذني وياك هم؟

ابتسم

::-شيء اكيد لا عبالچ تلعبين بذيلچ وما فاهم ترا فاهم وعارف

::-والله زين اسمع واني اگلك من الاخير والله العلي العظيم اذا ما ندمتك على كل تهديد وشوف

::-تنتحرين؟

::-لا هاي قديمه حچيتها الصبح بس هسه غير والله اله اطلعك انتَ وهاي صاحبتك اهاا ونسل السيوف هم

خزرني وسحبني لازمني من زندي

::-وحگ علي ابو اليتامى لو طلع حرف غير نحرج انتِ واهلج على ايدي

ابتسمت اله

::- الما وگفوا وياي وما هتموا الي انحرهم شلي شغل اني علية بروحي

احچي اريدة يفكرني ما اهتم الهم بس وين وين واحد يفرط بهله بس حچيتها بحزم

::-والله

::-والله

ضحك وگال

::-انشوف العقد باجر والسبوع الجاي الـ عرس

::-گلت تاخذني وياك؟

::-اي

::-احسن

::-ليش؟

غمزت له واني مبتسمه، وطلعت وگلبي يفور من شعور مختلط بين الخوف والإثارة رحت للغرفة غفلتها وصابني انهيار داخلي أخذني وهددني وعرف نقطة ضعفي وعرف هو أكثر واحد يوجع روحي والله اندمك مسحت وجهي وگمت طلعت غسلت ونزلت لاگني البنات كاعدات بالصال گعدت يمهن للمغرب وحتى من گامن يسوون عشاء ما گمت وياهن رحت أصلي

اجت فجر يم الباب وگفت شافتني كملت دخلت وگعدت انا ساكتة

:-لا ضوجين من امي علمودج والله

::-هههههه لا مو علمودي تموت على الزناگيل وضيفه شافته ودارس وماخذ شهادة الدكتوراء ههههه مثل من ربطتج بهيثم لأن هيج والله العظيم وأقسملج هيج تفكيرها امج

::-ايي قابل هيه حاطه بجيبها

::-وأن چاان خلي يخلولي احترام شويه وأبوج من حجه وياي واني ما قبلت عادي عنده راح رد الموافقه الجدي

حضنتني وباستني بشعري وخرت عنها لفيت المصلايه وتمدد على رجلها همست بأذني

::-اگلج بسر وما تگولين

عاينت بعيونها رافعه حاچبي

::-اني ليمت گايله ولج

::-ولچاجه تلج اعضامج وتكسرهن الج هاي عليمن

::-كولي يلا

همست بأذني

::-راح تصيرين احلى خاله

ضحكت واني مكيفه بصوت عالي

::-جذااابه

::-اششش هاي انتِ ثاني وحده تدري ياويلج

::-ايي العزيززز اول مو؟؟ واني اختج ما گايلتلي

::-لاا والله مكايلتله

::-الفففف مبرووك

هزت ايدها وگالت

::-عود اكلها لا تكولين البيت كله سمع

::-وليي لج احح ابنيه كون وين الله علمود ما تبقه حوراء تتبطر علينه وبالگوه تودي سدر النه

::-يلا انجبي كومي راح يوصلون شعيب وريفان مشتاقتله

گامت راحت گدامي واني وراها گمت أمشي بالممر صوب غرفتي وگلبي ما مرتاح من صوت جاي من غرفة مُنتهى رفعت حاجبي مو كلهن جوه منو هنا؟ تقربت يم الباب وأصغي بحذر سمعت رفل تحچي

فتحت الباب بيدها تلفون مُنتهى بس من التلفون چان يطلع صوت ومبتسمة شويه بس من شافتني تغيرت ملامحها وحچت بتوتر وهيه تضم التلفون وراها

رفل::-هاا تردين شي

تقربت يمها واني أسئل

::-ويه منو چنتي تحجين

::-مو ويه احد اعاين

::-انطيني التلفون

رفل::-ليش

::-لو تگولين ويه منو تحچين لو تنطيني التلفون

::-مالج شغل سرور مالج شغل انتِ شعنديي قابل شلج بهالحچي الماصخ من ليمت وحده تفتش وره الثانيه

چان مجرد سؤال مثل ما اگول لهايف وميليس وينطنه عادي وأرجع اله، وأگول "اشاقه وياچن" بس رفل شككتني بنفسي

::-من اليوم جيبي التلفوووون

::-لااا اصيحيين

::-موو ماكو شي انطينيي

راحت جابت تليفونها انطتنياه

::-وهاذا تليفون مُنتهى رايحه ارجعه الها

فتحت اعيوني على فهاوتها عود صايرة لوتيه هيه نفذ صبري صحت

::-جيبييي مال مُنتهى جيبي

جريتها من إيدها وهي تشد وتقاوم بكل قوتها ما كانت راح تعطي أي أحد بكل قوة أخذتها وضربتها بدون قصد صرخت وبنفس اللحظة الباب انفتح شيث دخل بسرعة ووراه هارون مصدومين هي لبست شالها بسرعة وشيث صافن علية وعليها
وصاح بيه

::-ليش طگيتيها

::-گول الها لا تغلط عليه بعد

هارون غمانا وراح

رفل::-ماكو شي بس هيه صايرة ما تتحمل شقه

شيث::-لا تغلطين حتى بالشقه

وهيه ايدها ترجف وتعاينلي اجه يمها شيث يمسح على أثر الراشدي

راح طلع واني غفلت الباب وجريتها من شعرها

سرور::-والرسول الاعضم شايفه لو لعبتي بذيلج وهسه ما انطيتي التلفون هسه اروح اصيح الـ غفار او اگول الولد عمج خليهم يهدمونج هدم جيبييي

اخذته منهاا واني الي ادعي يطلع ماكو شي مو هيه اول ما فتحته صار الاسم گدامي "نرجس" ضغطت اتصال وفتحت مكبر الصوت وهيه تفرك بيدها بكل قوتها واجه صوت

::-ها رفل وين رحتي ما كملت الحچيته اي وين وصلنه

باوعت عليه وهي مبتسمة تأشرلي بطريقة تگول "مو گتلج" أنطيتها التلفون وطلعت

ثاني يوم أمي گامت تحضر هيه ونسوان أعمامي والبنات للعقد چنت گاعدة وما رايدة كلشي بس جدي ما قبل وگال "أنا أريدها خطوبة لها كاملة"

التحضيرات صارت مليانة حركة وكل واحد راح يختار اله ملابس ويشتري اله انا ولا رحت ومن رادوا يجيبون الذهب عركة شكبرها يلا رحت أنا والغثه نشتري حتى أمي ما اجانت ويانا رحت لوحدي أخذت ملابس وكمت أغلط وأسب فجأة فجر سحبتني وگعدتني گدام المراية علمود تمكيجني

فتحت الكنتور طلعلي وچنت ودي ما اروح ابدد كملت أخذت ملابسي ولأن اطلع سافرة امي ما قبلت وگتلها لو اروح مثل ما متعودة لو ما اروح عافوني براحتي

::-وينج يلا

::-انطي صبر شسالفه

لبست ونزلت وامي تعاين عليه من الباب درت وجهي زعلانه بعدين رجعت هيه شلها شغل والله يالله بوستها گالت الله يهديج

::-اييي يمه اي مو اني مخبله

طلعت وهو بالسيارة بالساحه صعدت وضربت الباب بقوه

فر راسه ما عاجبه الحچي والطريق كله احلف اله اخسرك خسارة عمرك ما خاسر هيجي وهو يسولف بتليفونه واني ولا كأن ذاك الچنت نهار كله اسولف وياه نزلنه دخلنه انطاني الولد اختار اخذت حلقتين وحده بيها شذرة والثانيه لا هيج

::-هذول ثنينهم اريدهم

وهو هم اختار واني اختاريت الثانيه

::-المن؟

::-الك اني عاجبني هيج واذا ما اخذت الي بالي ارجع وأفضحك لو مو اخوي تهددني بي

هز راسه موافق واخذت باقي الذهب اخذت كومه وهو عادي يكول اي رجعتهم كلهم وگعدت على القنفه

::-ما اريدهم مو حلوات

شيث::-شنو الما عجبج رجعي واختاري غيره

::-ما اريدهم كلهم

::-صدك تحجين صار ساعه منتضرج تخلصين تأخرنه

::-ماا اريد

اخذت الجنطه وردت اطلع سحبني وگال للولد

::-اعذرنه

::-معذورين بس اذا اكو شي بالها غير هاذا عادي اكو طلبيه واصله غير تگدر تختار

::-حطلنه الحلقات والتخم الاول والثاني لو ما تردينهن

::-ما عجبني

حس وجها وهو يباوع عليه واني ضجت ضوجه بعد لو اموت ما اتحرك وهاي الطنگورة تجيني بكل مرة اطلع بيها ويه اهلي تربعت وگعدت على القنفه

::-يلا يابويه لا تعبيني

گمت اخذت اشياء بسيطه عكس كلامي وطلعت فتحت باب السيارة وصعدت ورجعت وثاني يوم چان العقد ...

"سما"

كعدت والاضوية مطفايه والغرفه هادئة الليل. أخذت شالي ولبست الصايه طلعت وبعيني نظرة على الساعة بالثمانية نزلت، محد جوه غسلت ورحت لغرف البنات چانن كاعدات بغرفة سرور تحضر للعقد باجر وهيه ولا چنها موجودة گعدتت يمهن وفتحن الفساتين يشوفني وأنا ما جبت گلت لهم "اشتري بالعرس"

بعد تجهيزات الدوام كومه ميليس چانت كاعده على الصفحة تسولف وهيف ورفل عيونهن على تلفوناتهن وسرور متمدده على الچربايه تعاين علينا الغراض كلها مطشره بالگاع صاح جدي على مُنتهى طلعت واحنه بقينه للساعة عشرة نلملم كلشي لأن باجر لازم نگعد من وكت

طلعت للغرفة ادور طلعت فستان أخضر داكن شيفون منفوش وأنيق وحزام حرير داير على الخصر حطيت فوگه شال جورجيت حطيتهم على صفحه واخذت ملابس غير ورحت سبحت وتعطرت أحس كلشي حواليه يوگف وما أشتهي أكل بعد الغدة رجعت تمددت على الچربايه أخذت التليفون المشمور محد مگلبه دخلت من تطبيق التطبيق شفت عبارة گدامي وحسيتها تعبر عني، أخذتها ونشرتها استوري بس سويت اخفاء لأمير چانت صورة وعليها عبارة وموسيقى.

انتَ لو غلطه هم اعيدك .
ادري استاهل الأحسن بس اريدك.!

ابتسمت نشرته وهو دخل وراه اخته ترطن على راسه

::-ماكو لا

::-اموري فدوة

::-والدوام يبعد اخوج شلون

ذب ملابسه واخذ من الكنتور ملابس وطلع وهيه تصيح ورا سبح ورجع وهيه تفتر بعدها وراه

::-هيف

::-ها

::-راسي يوجعني موتني وعندي شغل فوك راسي امشي

وخرت الغراض زحفتهن شويه وگعدت على ميز المرايه عاين عليها خازرها وهيه ما مهتمه الفتهمته تريد تروح عند اخوانها وتبقه اهناك شهر والدوام باقي اله سبوعين

::-وحضري روحج بعد ماكو طلعه بلا حجاب

رفعت حاجبها ما قابلة على كلامة وهو لزمها من حنكها

::-ولجج

بقت صافنه بوجه اخذت المشط واجت كدامي امشط شعرها وهيه بعد بوزت هوه اخذ ملفات بيده وگعد على الميز مالتي الچنت ادرس علي مشطتها التفتت عليه وگالت

::-بعد لا اعرفك وتعرفني

::-ههههههههه خوش افلوس ماكو طلعه ماكو روحه الخوانج ماكو

::-موو هيهه بكيفك

راحت وهو بقه واني بقيت على الچربايه متمدده شويه وطلع من الغرفه واني غفيت گعدت على دكه الباب لگيته نايم بالگاع واني على الچربايه گعدته يلا گمت فتحت الباب طلعت فجر گالت

::-صباح الخير

::-صباح النور

::-شمسكم عاليه يلا ايدج ويانه الان ذنيج الدايحات راحن للصالون

::-جايه بس ابدل

::-گلي الامير هارون وشيث بعدهم منتضريك واليسع هم يريده عنده مفاجأة اله

راحت، وأنا هم گعدته. دخل يسبح وحضرت ملابسه ورتبت الغرفة وبعدين نزلنا سوينه رويوك اني وياه لأن چانوا كلهم كاعدين قبلنه اتريكنه وكمنا على البيت شويه شويه بدو چتمعون.

وصلت عمتهم والبنات أفنان ورهف اجن ويانه،ط هم ومهرة وياس اله يروحن للصالون وراهن راح سيف يأخذهن للصالون اجت أديان شايلة كوارتين الكيك والببسي رحنه، أنا ومُنتهى ننقل بيهن من شفنه سديم أشرلنه بيده ندخل لأن كلشي محطوط بالساحة

أنا وزهرة رحنا لترك نخبز شويه واجت أفنان ويانا الجو كله حيوية كل واحدة مشتغلة بشي والبيت مخبوص بالتحضيرات والناس تعجبت شلون لحكوا يعزمون بس حلوه والضحك والحركة تنطي إحساس بالحياة والاحتفال القريب بعدنه نخبز وگالت افنان

::-زهرة خالتي ام جلال اصيح عليج

::-اجيت

راحت وافنان وگفت يمي نكمل الخبز نحمسنه حمس

::-روحي اني اكمله

::-ما بقه شي نكمله سوه

وصدك، هيه گاعدة تخبز وأنا أحطه بالتنور كلشي يمشي بتناغم كملنا الشغل شلته ورحت وهيه جابت صينية الطحين وراي والمخبازة رحنه كملنه كلشي وبعدها بدينا نودي الزلم الجاية للورة الغدة إحنه فد وگفة شويه ورحنه نسبح ونبدل

الولد أخذوا بيت عمي أبوهيثم سبحت وبدلت ورحت أتمكيج بغرفة البنات وچانت الغرفة عبارة عن مهرجان البنات كلها منشغلات بتحضيراتهن أخذت شال وجيت ألبسه بس زهرة ولا حتى حوراء ما قبلت بس البنات دخلن وبدت الهلاهل والضحك يملي الغرفة.

نزلنه من گالوا وصلت وخالاته وبدن يطكن بهلاهلهن شغلوا أغاني والجو صار نار وبدأ الردح على أصوله دخلن ميليس وهيف ورفل يركصن والحماس زايد العقد صار على أصوله من خالاته اخذن الصالة الهن.

::-الماينزل ويهوس جاي مسير مو فرحان

::-الف مبروك يحلوه يمزيونه اخذتيلج سبع من فدوه لعيونه

::-احنه قماش ابيض كل غش ما بينه

وهنه يجاوبن حسيت روحي فحطت جبت ماي صاحت فجر

::-احنه اهل الولد واحنه اهل البنيه وحگنه لو لعبنه اليوم چوبيه

::-‏بنيتنه غزاله شلون صادوها بنيتنه غزاله

::-شلون صادوها

جاوبت مُنتهى

::-عيون الغزاله عيون جنتنه صلو على النبي هل صيده صيدتنه

صاحن راح يدخل كل وحده ركضت اجيب غطه الها جبت الصايه لبستها ولبست شالي وتنقبت بي لأن وجهي مكياج ومن دخل صاحت وحده من خالاته

::-‏شيث اتين ومحلي البساتين وسويرة دكول مابدله ملايننن

صاحت عمتي

::-اخواله شيوخ واهل امه سلاطين

::-وزفينا الولد واريد هلهوله ولو موجود ابيه جا لعب جوله كللووووش

دخل مدنك سلم على خاللاته ومن بعيد سلم على عماتي كلهن ومُنتهى تلگته وهو حضنها وباسها هي ورفل

كعد على الكوشه باسها ومُنتهى ناوشته الذهب

::-‏رگبتها صواني استيل ويلوك الذهب بيهة

لعبن جوله خالاته

::-لرگص رگص يكسر الكاشيه احنه اهل الولد موش اهل البنيه

حوراء::-اخونه خوش اخو يستاهل الهوسه

عفتهم وصفنت بي من يلبس بيها وهيه لزمت ايده بقوه ولبسته اله وبعدتها وهو مدري شهمس الها وهيه كزت على اسنونها بالگوه متحمله.

::-فرح گلبي يوم الدگن طبوله وبت الزين تستاهل الهلهوله

::-گلللللوووش

::-نلعب نلعب نلعب جوله ابشر ودلل

::-نعلب جوله

::-ابشر وادلل

يأشر على راسه

::-مقصرتاً ينطيچن العافية

::-الف عل خير يبنيه يمزيونه وخذتيلج سبع من فدوه لعيونه

::-وشيث غالي وغالي وچنه الگمر ويلالي

من راد يطلع صاحن

::-عونج ياگاع التمينه

بقن يهوسن شويه وكعدن وجبنه الحلويات والاكل نوزعهن وسرور دخلناها جوه ما تقبل بعد ابد ولا ترضه تكعد شويه وگامت تروح ومن بقوا بس البنات غفلن الباب وشغلن الديجي وگامن يركصن كلهن حتى فجر ونسوان اعمامي كعدن. وصاحن بصوت واحد ويه الديجي

::-الحفلة والجو مشتعل من ركصك يشيب الطفل بس انتَ وحدك بالحفل دك يالكمر

::-شعر شعر

::-هز يالگمر

::-شعر

عزا فكيت اعيوني عليهن وهنه فد ردح تگابلن ميليس ومهرة فكيت اعيوني

::-ويه الهوى شعرك صعد گعد الناس وما گعد والمسرح يگلك بعد دك يالكمر

::-لا لا لا لاا

وهنه يردن واني وزهرة ميتين من الضحك عليهن

::-مو كلمن يهز بالچتف مثلك بشغله محترف بالوصف عديت الوصف دك يالگمر

::-بالوصف عديت الوصف دگ يالگمر

::-شعر شعر

::-هز يالگمر

::-شعر شعر

::-مو كلمن يهز بالچف مثلك بشغله محترف بالوصف عديت الوصف دگ الگمر

::-شعررر شعرر

سحبني وياهن بس هزيت راسي بلا نزعت الصايه وذبيت الشال وگمنه انضف اني واديان وزهرة قبل لا يجون الولد وسمعت اصياح عمي ابو هيثم وغفار والأمير من برا وعمي من برا يصيح

::- انييي مربي كااوليه اهناا

الامير::-خرببب اهلچننن افتحننن

التفتت، الباب مغفول يدك عليه وركضت أديان بسرعة طفت الديجي وصاحت بأعلى صوتها عليهن اركضن وهنه انثولن أفنان شالت شالها وركضت يمي أمها ميليس تركض على الدرج والباقي كلهن طايرات وراها وحدة تدفع الثانية والضحك مخلوط برعب ما لحگت أمسح المكياج ولا حتى ألبس الصايه بس شديت الشال بسرعة.

أديان فتحت الباب وأنا قبله درت على الكاونتر أسوي نفسي أنضف أريدهم يطلعون بسرعة أريد أروح على أقرب غرفة وأمسح الجير طلعوا تنفست أخيراً أخذت الصايه وگمت أركض للغرفة
لگيت هوه التفتلي بسرعة بس ما گال شي مجرد نظرة أخذت الگلنكس ومسحت وجهي على عجل نزلت بعدني أتنفس لحگنه نضفنه وكملنه. حسيت نفسنا ميتين من التعب بس أخيرًا صار شويه هدوء

اجيت چنت تعبانة كلش چنت أريد أنام وأرتاح قبل لا أگعد وأفكر بأي شي دخلت للحمام سبحت درت على التعلاگه غميت روحي من التعب نسيت حتى أشيك إذا ملابسي وياي لبست الصايه بسرعه وطلعت بس چنت أدور على افراشي احس انثولت دخلت للغرفه طلعت الملابس لبست الداخليات وگفت ألبس التيشيرت رفعت إيديي وانفتح الباب تجمدت أنفاسي وگفت التفتت نص لفة
وشفته واگف بالباب عيونه على جسمي بس نظراته تشنجت إيديي نزلت التيشيرت بسرعه بقت إيديه ترجف ما أدري أضم جسمي لو وجهي من الفشلة رفعت الصايه علية واني اگله

::-اطلع

لأن حتى ماكو مكان اطلع منه جسمي كله نار احسه دار وجها وهو يتعذر لبست بسرعه وگعدت ميته من الخجل وهو بعد ما رجع

طلع واني ضليت متيبسة حتى التيشيرت ما كملته
لبسته برجفة وگعدت على الچربايه وكلشي بيه يصيح اشردي تحسن شلون اعاين بوجها احس وجهي بوخ تمددت على افراشي صوت خطواته رجعن غمضت اعيوني شويه وغفيت گعدت الصبح على صوته گال

::-هم واحد ماخذ من الفلوس الضامهن

::-لا ليش؟

::-بيهن نقص

::-لا والله لا اني ولا هيف هاليام ما ماخذين شكد

::-نص مليون ماكو

بلعت ريگي مصدومه

::-صدك

هز راسه بأي وطلع وأنا أخذت المفاتيح الحاطهم فوگ فتحت الميز جوه طلعت كلشي وماكو بيهن نقص فتحت الميز ماله رجعت أدور بعد هم، ماكو شي لبست بسرعة ونزلت أشوفه بس ماكو

رحت لگيت البنات گاعدات شويه، وصوت صياحه يطلع من غرفة هوه وعمتي سجى وعمتي أم هيثم. چان يفور من العصبية وهيه تصيح عليه گلبي نقبض شكو صاير؟ كلشي حواليه مضطرب صوتهم صياحه گلبي يطير من الخوف والفضول بنفس الوقت بقينه اني والبنات متصنمين

::-البيييت كلههه يسمععع هايي سماا وهاي هيف ابنن امه وابو اليي يجيسهن او يمسهن بحچايه واني گلتها وارجع اگولها ما ترودوني انا اخذ اختي ومرتي ولا منيتكم تتهنون بخيرنه كله وحگي هم الكم

ام هيثم::-واناا طاردتكم طردتكم

::-لا حشاج

سجى::-شحچت ويااك وهيج طفرت

::-مالكم شغل لا بيه ولا باليخصني حمزة جاي ياخذ مرته حضرت روحها سما گولي لـ هيف تحضر نفسها

هزيت راسي بأي وصعدت الها گلت الها حضرت جنطتها رجعت اريد انزل لاگاني بنص الممر صعد واني نزلت ولاگتني ام هيثم صاحت علية وصارت ويه نزلته

::-خاله

ام هيثم::-ماا رايده منها شي بس احاچيها

::-واعتقد اني حچيت الگلته كافي

::-مااا اريددد منككك اني اريد منهاا اسمع

أمير::-اصعدي سما لمي غراضنه

شدهان::-وين تريد

أمير::-اني باقي اهنا لخاطر هيف وهسه راح تروح لخوانها اني طالع اروح لبيتي

شدهان::-ليش شني باقي گوه عليك متحمل

أمير::-لا

شدهان::-ارجع وين ويوميه احنه شايلين ابقه ماكو طلعه راح يجينه خطار.

صافنه عليهم وما ادري شكو وشبيهم ابلع ريگي واگول ان شاءلله مايكون يخصني گعد جدي بالصاله اجت سرور گعدت يمه اسولف وياه تموت على جدها اكثر وحده تحبه ويحبها ما اعرف ليش من دون بنات ولده هيه هوه يحبهم ذنيج مو ما يحبهن بس هيه الاكثر وهواي اسولف وياه وتگعد وياه اشوفها وهو ضحك وجراها علي وهمس بأذنها وضحكت بصوت عالي خلتها كلها تتفلت التفتت علينه

::- جدة حميدة راح تجي الله بعد فنه اليحجي

شدهان::-حبيبه جدها هسه تگوم اجهز الها الغرفه وتجي

اديان::-جدي عادي احچي وياك

::-تعالي جدي

راحوا وهاي جده حميده اصير اخته مزوجه ومتوفي وماعدها بزرة رجلها وكل فترة يم احد من اخوانها رحنه انضف وشويه واجه حمزه وابو طلعوله الولد يسلمون عليه اجت اديان تفرك بيديها واسولف ويانه اني وزهرة ومُنتهى

اديان::-ابوي ما يقبل

زهرة::-مدام جدي قابل معليج بعد بأي احد حتى عمي هسه يقتنع

بقينه سوينه چاي اخذه شيث الهم وفجر گاعده على الكرسي تكرط اخيار واديان تفتر يمنه عبالك راح تولد

اديان::-شلون اذا ماقبل

فجر::-كافي مو حتى توترت وبطني گامت توجعني

حطت ايدها على بطنها وگالت

::-صارت بطني سهال

مُنتهى::-شو انچبي واگعدي

شويه وصدك صاح هيثم

::-اديان يلا بعد اخوج استعجلي

ضحكت لوتي هوه متفق حتى ويه اخوانها گبل لا يجي على ابوها

::-يلا سلام اني اولي وانتن ابقن

فجر::-من امداج اي والله روحي اهناك يم همس الخايسه

::-لجج هي هاي اخت العزيز

::-اي كلش هسه باچر تتعاركن علمود غسل الماعين

::-شكالوا عليها هيه فجر بعدين اصلاً احنه انتقلنه

ام هيثم::-دوينه

راحت تركض الامها شويه وكعدن بنات عمتي سجى اجت افنان ومهرة وراها گعدن

فجر::-كعدن امهات الضهاري

افنان::-انجبي انتِ والله انعس

فجر::- اي من الردح وراح تجيجن حميده شدوا روسكم يگرعان الما يگعد بال6 تنعل والدي الله خرب انه ليمت توصل وها اذا ما اخرط الأول والتالي

افنان::-احنه شعدنه بعد نخابر ابونه يجينه

زهرة::-لا والله اشو ولا تروحون اله تجي

مهرة::-لا عمي احنه ناس خطار يلا كومي خيه

مُنتهى::-ولحسن ما اخليجن اطلعن الباب

افنان::-هههههههه أكلجن بربجن عود هيه ليش تكرهني

مُنتهى::-ههههههه والله الله اعلم تعرف بسوالفجن

افنان::-سما هلا مو يمنه

::-ها

افنان::-سولفي

سما::-ماعندي شي اسولف

اجت يمي حمت الچاي وهيه اسولف عفيه بنات يوم خبيثات يوم لطيفات مدري هنه هيچ طبعهن اجت اديان سلمت علينه وطلعت اجت وراها بشويه هيف هم سلمت وصاحت

::- سمااوي اخوي ديري بالجج علي من المفخخات

افنان::-مووو هيه درع

فجر::-ههههه ولا تگعد راحه

طلعت انضف بالصاله اشرتلي عمتي ام هيثم من غرفتها اروح الها دخلت وهيه سدت الباب گالت

::-ليش الحد الان ما حملتي

حسيت رجفه سرت بيه بقيت ساكته گالت

::-ما تخلفين؟

بلعت ريگي وگلت

::-هوه هوه ما يصير

::-شلوون ما يصير ياعمه

::-عمه هوه ما يريد هسه

::-أمير واعرفه روحه بالجهال مو انوب هوه ما يريد

وهاي المعلومه چنت اول مرة اعرف بيها لأن ولا مرة شفت بعينه لهفه على الجهال غيرت الموضوع وگلت

::-اول ماخطبنه گلت اله ما اسوي جهاال اله من أتخرج

::-لااا اجذبين ليش هوه يمشي بهيج سوالف احچي الحگ

::-شحچي؟

::-ما تخلفين لو شنو؟

::-عمه والله مو هيج

::-ابني هوه وهيف اني بعد امهم ربيتهم وحبيتهم اكثر من خلفتي مو نوب اعرف شنو اليردونه وشنو الاله أمير مثل ما قنعته يتزوج واجه خطبج اخذله غيرج الف وحده موجودة وافنان موجوده بس هاذا الشهر الج اني مو ما أحبج والله مثل بناتنه بس هوه عزيز لو شلون يحب الجهال لو من اجهضت هاجر مات من القهر اريدله جهال يشيل اسمه اريد اشوفه فرحان

حطت ايدها على متني وگالت

::-فدوه يمه اذا بيچ شي گولي

وگفت الغصة بالعومي ودموعي طاحت بدون سابق إنذار درت من يمها أفتح الباب بصعوبة طلعت صعدت لغرفتي وگلبي يرفرف ويدي ترجف أبكي بصمت غفلت الغرفة وجلست وراه، أفكر شلون أقنعهم شلون يقبلون ابنهم ما ينحمل شلون يفهموني

شلون اقنعكم ما معبرني ولا رايدني هوه گوه متحملني بچيت وشهگت يطلگني وما يتقرب الغير عزيزته والله مستعد يموت ولا يتقرب الي شلون اقنعه والله تهدد اذا بقت يمه يوم

مسحت وجهي ببطء وروحي تتمايل من التعب دخلت الحمام أغسل أنفض أثر الدموع عن وجهي أحاول أرتب نفسي نزلت بعدين أحضر وياهن وأسمع صوت هيثم جايب السمج هوه وجلال دخل وراهم يحچي ويضحك وياهم والجو

هيثم::-جدي گال سته شوي واربعه گلنهن

طلعوا واحنه اخذناهن اني ومُنتهى نغسلهن غسلناهن وكملنه طلعنه ولگينه عماتي بالمطبخ منزله الطباخ العفريت بالگاع وتحمس بالحم اخذنه السمج ورحنه برا
والشمس اطك براس

مُنتهى::-هااي شلون نشويهن لو اثنين اثنين هم ما نلحك

سما::-أوكفي اني اسويهن تعالي نگول العمتي ام هيثم ونروح أنجيب التنور الي بيتها

طلعنه من الترك لاگانه أمير وهارون دايرين البيت عمي دفار

::-أمير

التفت عليه رحت يما گتله

::-اريد التنور الجوه

أمير::-هسه اجيبه الجن والولد راح يجون اهنا لا تجن

طلعت رحت لتنور الطين وخلينه بي الحطب شويه واجه هارون وسيف جايبين التنور شغلته وصحت على سرور اجيب جداحه وسيم والشباجه مال السمج رجعت عليه جايبه بس الجداحه لأن ذنيج كلهن بيت عمي دفار خلتهن وشويه واجه أمير وسديم

سرور::-شهال شلعان گلب جيبوا فرن لو كله گلي

دار عليها خازرها واجه امير يمنه يحطهن بالشباجه

أمير::- والسيم شلج بي

::-اشدهن بي

اخذتهن منه حطيتهن بالتنور بكل جه وحده صارن اربعه بالتنور وشديتهن بالسيم وعبرتها على اليده وشديتها اجه يمي اكو حديد بالتنور من جوه طفه التنور دخلها وسحبها من وره وشدهن واني رحت شغلت الثاني وحطهن سديم ورتبهن لأن هاذا طين ما يصير حط وحده بي من فوك والثانيه حطها فوك ذاك التنور كملنه واحنه محموسين حمس من الحر

مُنتهى::-تريدونها بصلصه لو بلا

أمير::-لا بصلصه بس مو سونها حامضه

سما::-اسوينها لو اني اسويها

::-لا روحي انتِ اني ابقه اهنا يمهن

::-حارة عليج اتنقبي

::-شنسوي

رحت طلعت الطاوه لگيت كل وحده بيدها شغله ولا وحده فارغه وسادات الباب عليهن علمود براحتهن اني هم من دخلتوذبيت الصايه وطلعت الطماطه والمعجون طلعت دبس الرمان واليمون التفتت على ميليس اگل الها

::-ميليس گلي الواحد من ولد عمج هم نحط عليهم قطع اليمون والطماطه لو بس الصلصه

راحت ورجعت گالت

::-كلهن بس الصلصه واثنين عليهن

كملت لبست ورحت لمُنتهى لگيتها محموسه من الشمس

::-روحي ادخلي جوه وديلي وحده من البنات

::-كملنه ما بقه شي بس اشرب ماي وارجع

راحت واني جبت وصله علمود اطلعهن السعت بيدي السعه كمت ارفس بالگوه كملتهن ورجعت شديتهن وحده من جوه ما گدرتلها عفتها شلون ما چان لأن هيه مستويه بس تنمزج وياها ال صلصه اجت سوت ذيج واجتنه عمتي ام جلال گالت

::-كملتن يلا راح يصير الأذان

مُنتهى::-وبقن ذنيج لازم نگليهن

::-اخذتهن زهرة وفجر البيت عمج ابراهيم اهناك يگلنهن ويخبزن

::-خوش

شويه ودخلوا زلم ولد شباب ووياهم حجيه دخلت للدوانيه ما اجت يمنه شويه وطلعت النه اجت واحنه ريحتنه تكتل وهاي اول مرة چنت اشوفها وسلم عليها ما شايفتها من قبل مرة چبيرة بالعمر حيل حجيه گصيرة وبيدها عكازة ومن راحت مُنتهى اسلم عليها گالت الها

::-اعذينه بينه ريحه الطبخ

::-معزبات ليش اكو من ريحه شطارجن

سلمنه وكملنه ولمن صار وقت الصب أصواتهم من برا ماليه المطبخ صياح وضحك كلشي مخلوط وإحنا نخبص خبص لحد ما انطيناهم

رجعنه للصالة صبينه وسوينه كلشي بعدين كعدنه ناكل الحچيه مسترسلة بالسالفة تضحك وتبدي تحچي عن أيامها والبنات يردن عليها بحماس الجو كله سوالف ولمة وانا ساكته أسمعهم متونسه بس ما أحچي اشرت علية هيه وتحچي

::-انتِ مرة أمير

::-اي

سرور::-اي جده سولفي شو سكتي

::-جده زهكتيني جنج اعجيزه وين باقي البنوات دينه ولهيفه

أبتسمت على اسمائهن

فجر::-جده هنه سمعن بيج راح تجين وطير طير حتى عمتي رادت تروح واحنه مچلبين بيها

::-أخويسات وعمتج امها ياهي گاعده الچن اني واشوفجن شسوي

خليتهم يسولفون وگمت اسوي الچاي وهم تگابلنه على الماعين الحد ما كملنه احس ضهري صار نصين

سما::-اني بعد ولا بيه ولحسين حتى الدرج ما اكدر اصعده اني شورطني

فجر::-تدرين واجيتي

سما::-گلت بيتي اكعد واسكت تالي ورطتني وشردت

::-هيف؟

::-اي

افنان::-انعل يومه اليجيكم بعد وين اكو خطار يشتغل

زهرة::-انجبي ودي وحده اشوف بناتي وين

غمتها ومشت واني صعدت للغرفة لحمدلله لگيتها مرتبة وعلى نظافتها حسيت براحة أخذت ملابسي وطلعت على الحمام سبحت وخلصت نشفت شعري وعليت السبلت طفيت الضو جريت الجرجف وشمرت جسمي على الجرباية.

أخ يمه غفوة چانت مو غفوة چانت نوم واحد ميت من التعب غفيت بعمق لا حس ولا خبر بس گعدت على صوت الباب ينفتح بهدوء عيوني نص مفتوحة دخلت سرور.

::-صح النوم

::-هلا

گمت الف بشعري الساعه بال6 دخلت وگالت

::-أمير راح للنجف ويه الولد

::-شعجب ما گال

::-اجه ولگاج نايمه وگال گلولها من تگعد اتأخر

هزيت راسي راحت تطلع

::-تعالي يمنه بالصالة

::-خوش

رتبت الغرفة أخذت المشط مشطت شعري بهدوء طلعت صاية وشال لبستهم وطلعت لگيتهن كلهم مجتمعين بالصالة سلمت ومشيت صوب المطبخ شربت ماي والبنات يضحكن ويحضرن كيك وببسي أخذناهن وگعدنه يمهم.

گعدت شوية بمسافة عنهم يم زهرة چانت تمشط شعر وقار بعدين طلعت للمطبخ لاگتني خالتي وام فجر ابتعدت عنهن ومن اكلوا وشلنه المواعين طلعوا البنات كلهم ما بقى غير عماتي والحچية وام هيثم.

رجعت وسمعت عمتي تفتح سالفة الزواج بلشت تحچي وكالعادة وگالت الصوج مني مو من غيري الصوج مني اني

چنت واكفة على باب المطبخ أراقب بصمت وإذا بيها فجأة ألتفتت الحجية وشافتني صارت عينها بعيني ابتسمت ابتسامة صغيرة وصاحت بعمتي

::-صمي حلگج على كيفج

عضيت شفتي چنت أحاول أسيطر على دموعي لا تفضحني بس گلبي ينفض مثل الطير المحبوس سحبت روحي بهدوء مشيت بخطوات سريعة صعدت للغرفة سديت الباب واني أبچي بالگوة

الغصة خانگتني حيل ما بيه أتحمل بعد أخذت تلفوني چنت أريد أتصل بي بس حتى أگله أريد أروح لأهلي لأي مكان بعيد عن هالبيت ما عندي طاقة أتواجد بعد

أول ما رد ما حسيت بنفسي غير نترت عليه بصوتي المكسور

::-اوولل ماا تجيي اطلگنيي كاافي ماا خلص الاتفااق مليييتت حسس بيهه مليت والله

صوتي چان مختنگ وهو ساكت وبعدين گال

::-شصاير احد محاجيج؟

انهاريت هنا دموعي نزلن غصب چنت أريد أحچي كل شي واني ابچي

::-والله احس بتعب يمك والله العظيم ما مرتاحه ما اريدك اميرر اني مليت والله

حچه بصوت مبحوح بيه ذچ النبرة الي من زمان ما سامعتها نبرة ذيج الأيام الي يجيني بي مترب وصوته مبحوح هدوءه ذبني بالهاوية خلاني أضم راسي وأشهك لأن عرفت عرفت شنو معنى سكوته وليش صوته مبحوح هيچ

::-چنت يمها؟

"همس"

مرت أيام اهواي وأنا عايشة بين الشغل وبين البيت كل يوم نفس الروتين بس مجرد ما كالو هيف تجي كأن العالم كله يختفي وكلشي يهون حتى الشغل ما يهم

بس چان اليوم الوضع مختلف ما گدرت أبقى يمها لأن ميراڤ محتاجتني وهذا الشي زعل هيف وانا نصي تعلق بين الحنين والواجب طلعت من البيت بالطريق دگ تليفوني أول ما رفعت عيوني شفتها ميراڤ

::-اجيت

::-بسرعه

هستوني دخلت المحكمه وهم رجعت دگت

::-إي وصلت للمحكمة

دخلت المحكمة سلمت هويتي شفتها من بعيد اجتني تركض حضنتني وخرت بسرعه

::-فدوه ولجج خاايفه ميته خوف شعدج أنتِ اليوم

::- ماعندي بس اريد أرجع للمكتب أكتب طلب الاستئناف شبيج ليش هيج متوترة

::-صعبه ولج والله صعبه اخاف لا اضيعها تعالي راجعيها وياي

::-خوش تعالي

اتجهنه لقاعه گعدنه وهيه تفتح الملف قرينا كل تفاصيلها تقرير الطب العدلي أقوال الشهود الأدلة الجنائيه تقرير الشرطة

::-كلشي ما بيها ابتسمي بيدج ان شاءلله

::-ابقي وياي فدوه

::-خوش بس اتصل على اديان ثواني

اتصلت عليها علمود تروح اشوف هيف علمود تاخذ علاجها

چنت على الخط ويه اديان كملت ورفعت عيني وصارت على الملف الـ بيدها من الأمام مكتوب بخط واضح

قضية تيمور إبراهيم شدهان - جناية قتل - رقم 1357حسيت الصاعقة ضربت گلبي وجسمي كله رجف بدون سابق إنذار

يتبع ... 𐙚

حساب الأنستگرام.

ma_la_k.313

قناة التلكرام.