رواية نادره الفصل الخامس 5 - بقلم sasso

..(رودينا)..

لا أصدق أن هذه الحوريه ستكون زوجه أبي ، رقيقه جدا ، عينا أبي تلمعان ، أرى في عينه شيئا غريبا لم أره طويله سنوات

رودينا: نونه ، ممكن أتصور معاكي ؟

ابتسمتْ زوجه أبي المستقبلية و أومأت برأسها

نادره: أكيد طبعا

وقفتُ و أمسكتُ بيدها طوقتْ ظهري بذراعها و اقتربتْ مني ، أشعر بشئ غريب ! التقطت "سامي" الصوره لنا ، نظرتُ لها و هي تبتسم عندما رأت الصوره ، نظرت لي و ابتسمتْ

نادره: حلوه أوي يا رودينا

ابتسمتُ و قبلتُ وجنتها اليمنى بدون وعي ، نظرت لي و ابتسمتْ

رودينا: انت الي جميله يا نونه

جلسنا و بدأنا نتناول أطراف الحديث ، أنظر لأولادها ، "محمود" و "ابتهال" يضحكان ، أرى يدهما متشابكتان ، يمرر "محمود" إصبع الإبهام على يدها ، نظرتُ لعينا "ابتهال" تبدو سعيده و مطمئنه ، نظرت "لمحمد" يتكلم مع أبي بمواضيع السوق و الأسهم و هذه الأمور الممله غير منتبه لزوجته "عزه" ، هذا غريب أخ يكاد يُقَبِلُ زوجته أمامنا و أخ لا ينظر لزوجته ، أهو جاف المشاعر أم أنهم غير متوافقَين ، نظرتُ لزوجته "عزه" تتصفح الهاتف و ابنتها نائمه في حضنها ، لم شفاه الصغيره زرقاء ، أهي بخير

رودينا: هي البنوته الصغيره كويسه ؟

نظر الجميع لي ثم نظرو للصغيره ، ظلت "عزه" تتصفح الهاتف دون اهتمام و لم تنتبه أن الجميع ينظر لها ، رفعت عيناها لهم و عقدت حاجبيها

عزه: في إيه ؟

سامي: هي بنتك الصغيره كويسه؟

نظرتْ لها دون اهتمام

عزه: اه كويسه نايمه بس

أغمض "محمد" عينه و مسح على وجهه ، يبدو غاضب

رودينا: طب اتأكدي البنت شفايفها زرقا لتكون مبتتنفسش

عزه: لا دا الطبيعي متقلقيش

نظر الجميع لها باستنكار ، اقترب "محمد" من الصغيره و حملها يحاولُ أن يفيقها ، نظر لنا بهدوء

محمد: مها عندها مشكله في القلب ، أوقات الاكسجين مبيوصلش لجسمها كويس و دا بيسبب زرقان الشفايف

طاهر: طب اتأكد يا محمد ليكون أغمى عليها و لا حاجه ، البنت مبتردش

وقفتْ "نادره" و اتجهت "لمحمد" بسرعه و قد رُسِم القلق على وجهها ، نظرت "لعزه" نظره حاده لاحظها الجميع ثم أخذت حفيدتها في حضنها

سما: هاتي يا ماما خليني أشوف نبض قلبها عامل إيه

اقتربت "نادره" من "سما" و ضعت اصبعها على رقبه الصغيره و عينها على ساعتها ، تبدو طبيبه ماهره

سما: ماما لازم مستشفى

انتفض الجميع و بدؤا بالتحرك بتوتر ، وقف أبي معهم

طاهر: انتو بتتعاملو مع دكتور معين

عزه: اه دكتور حمدي

محمد: لا دكتور بدير

نظرت"عزه" "لمحمد" بتعجب

محمد: دكتور بدير دكتور قلب كبير و تابع البنت النهارده و اتبناها ، هتصل بيه أشوفه موجود في المستشفى ولا لا

أمسك هاتفه و ابتعد عنا ، ناظرتُ "عزه" التي لا تزال تحت الصدمه ، نظرت للصغيره ثم عاودت النظر "لمحمد" و امتعض وجهها

سامي: طيب ناسعدكو بإيه

محمود: ولا أي حاجه ، احنا هنروح المستشفى نطمن عليها

طاهر: لا طبعا ، رجلينا على رجليكم

ناظرتُ "نادره" و التي كانت في عالم موازي ، تناظر الصغيره بقلق ، بدأت في فرك يديها ، تبدو متوتره ، دقائق حتى رجع "محمد"

محمد: الدكتور مستنينا في المستشفى ، يلا بسرعه

أمسك الصغيره من بين أحضان عمتها " سما" و انطلق أمامنا يهرول متجها لسيارته ، جلستُ في السياره

سامي: بابا قادر تسوق و لا أسوق أنا

طاهر: لا يا حبيبي انا هسوق ، يلا بس عشان ميتوهوش مننا

بدأ أبي في القياده و هو يتبع سياره "محمود"

رودينا: هو إزاي امها محستش بحاجه ؟

سامي: هتلاقيها مخدتش بالها يا رودينا ، البنت نايمه من أول ما قعدنا

رودينا: عزه دي مستفزه ، شفتها و هي بتقول عادي ، مكلفتش خاطرها تتأكد ان البنت كويسه و لا لا

طاهر: ملناش دعوه يا رودينا ، المهم نقف جنبهم دلوقتي و لو في ايدنا حاجه نعملها

أسندتُ ظهري على الكرسي و ناظرت الطريق ، إذا هي حقا بذاك الاهمال فلا أتعجبُ نفور " محمد" منها ، وصلنا للمشفى و ترجل الجميع من سياراتهم ، "محمد" يهرول بسرعه وراءه "نادره" و البقيه ، أمسك " سامي" يدي و دخلنا المشفى وراءهم
___________________________________

..(محمد)..

مهمله ، غبيه ، سأخسر ابنتي بسببها ، ناظرتُ الصغيره تكاد تتنفس ، أدمعت عيناي ، أهرول غير عابءٍ بأمي و اخوتي ، أمسكتُ هاتفي و هاتفتها

محمد: انتِ فين

سهام: في الطوارىء انت الي فين

بدأت أتوتر و أهتز صوتي

محمد: معرفش قدامي أوض كتير

سهام: إدي الموبيل لأي ممرضه

أعطيتُ الهاتف لممرضه ، شعرت بأمي و البقيه خلفي ، ناظرتني الممرضه و أشارت لي أن اتجه معها ، بدأت أمشي لا أعي أحدا ، تسقط نظراتي على الصغيره ، وصلتُ لها اقتربت مني

سهام: متقلقش الدكتور جوا مستنيها

أخدت مني الصغيره و اتجهت للغرفه ، أمسكتُ ذراعها غير واعٍ لما أفعل

محمد: مينفعش أدخل

سهام: خليك هنا ، متقلقش هتبقى كويسه

وقفتُ ساكنا أراها تبتعد حتى أختفت ، شعرت بيد أمي على ظهري

نادره: هتبقى كويسه يا حبيبي متقلقش

ناظرتها و أنا أحاول أن أتحكم بدموعي

محمد: ماما أنا خايف ، من آخر عمليه و هي تعبانه

اقترب الجميع مني

سما: متقلقش ، إن شاء الله خير

جلستُ على الكرسي حين شعرت بأنني منهك ، رفعت نظري لتلك المهمله ، ناظرتها بحده شديده ، أغمضتُ عيني أحاول السيطره على أعصابي ، الصغيره في حضنها منذ ٤ ساعات و هي لا تعي شيئا ، اقتربت "عزه" مني و جلست بجانبي

عزه: انت غيرت الدكتور امتى ، و شافها امتى ؟ كل دا و انا معرفش

ناظرتها بحده و تكلمتُ من بين أسناني

محمد: مهي لو الهانم بتهتم ببنتها كان زمانها عرفت ، بس الهانم همها شغلها و صحابها و خروجاتها و سايبن بنتها مع الشغاله ، أهي كانت في حضنك و قطعت نفس ، تقدري تقوليلي إيه لازمتك في حياتي و حياتها

عقدت حاجبيها

عزه: يعني العيب مني دلوقتي ؟ أنا الي خلتها تتولد بقلب تعبان

أغمضتُ عيني و أقسم انا على وشك أن أنفجر

محمد: امشي من جنبي الساعادي يا عزه ، إلا و قسما بالله لأعمل حاجات مش هتعجبك دلوقتي

عزه: صحيح ما انت عاوز تبان راجل قدام أمك ، شاطر تتشطر عليا بس

لقد ختمتها ، وقفتُ بعصبيه و ناظرتها و قد على صوتي

محمد: امشي من قدامي يا عزه

لم أنتبه أن الجميع قد ناظرني ، اقترب "محمود" مني و قد أمسك ذراعي بشده

محمود: اهدى احنا في الشارع ، يبقى اعمل الي انت عاوزه في بيتك

أغمضتُ عيني أنا على وشك الانفجار ، نفضتُ يده و ابتعدتُ عنهم خارجا من المشفى بأكملها
___________________________________

..(عزه)..

ظللتُ أتابعه حتى اختفى من أمامي ، ما الذي أفعله لأتلقى كل هذي الاعتراضات ؟ امس يهددني بالانفصال و اليوم يصرخ علىّ أمام الناس ؟ ما الذي أفعله ، الفتاه كانت على ذراعي نائمه كيف أعرف هل أنا طبيبه ؟ ، دائما ما يُلقى علىّ اللوم في كل شئ ، انا لست سيئه لهذه الدرجه ! اقتربت "ابتهال" مني و رتبت على ظهري

ابتهال: معلش هتلاقيه متوتر بس عشان مها ، غصب عنه متزعليش منه

ناظرتها و أومأت برأسي ، ناظرتُ الجميع ثم ناظرتُ غرفه الطوارئ التي تقبع ابنتي فيها ، أدرت وجهي لحماتي حينها تكلمت معي

نادره: ممكن أفهم في إيه بينك و بين محمد ؟

عقدتُ حاجباي

عزه: و الله روحي اسألي ابنك مش أنا هو الي بيتخانق على الهايفه قبل المليانه

نادره: اتكلمي بهدوء و خدي بالك من الي بيطلع من بقك ، انا مش عيله صغيره قدامك

عزه: هو انت و ابنك هتجننوني ، انا عملتلك حاجه دلوقتي ؟

نادره: انت ازاي محستيش بالبنت و هي تقريبا قاطعه نفس في حضنك؟

عزه: و احس بيها ازاي شايفاني دكتوره

نادره: لا يا عزه ، شايفاكي مهمله ، مش دي البنت الي كنت طايره بيها طير اول ما اتولدت ، و كنت خايفه عليها من الهوا ، في أيه من امتى الاهمال دا

على صوتى و احتدت ملامحي

عزه: يوه ، هو انت و ابنك عليا ، شاطرين بس تنظرو و محدش حاسس بحاجه ، انت متعرفيش مسؤوليه بنت مريضه قلب عامله ازاي ، متجيش تنظري عليا و انت متعرفيش حاجه

اقترب الجميع على صوتي و وقفو بجانبها

سما: في أيه يا عزه ، وطي صوتك انت بتتكلمي مع حماتك

عزه: ايوا و ست سما هتنظر عليا انا كمان يلا مين كمان

ناظرتُ "رودينا"

عزه: مش عاوزه تنظري عليا انت كمان ، يلا مهي كملت بقا

اقتربت "نادره" مني و أمسكتني من ذراعي بقوه

نادره: انا محدش يجي على بناتي فاهمه ، رودينا بنتي و انت عارفه أنا بعمل أيه لو حد قرب منهم

ناظرتها بصدمه ، ناظرتُ "رودينا" وجدتها تنظر "لنادره" بابتسامه صغيره

محمود: اقعدي هنا لحد ما يجي جوزك ، و مسمعش صوتك يا عزه

ناظرتهم بصدمه ، هل الجميع ضدي؟ لِمَ أنا لم أفعل شيئا خاطئا ، هل لأنني أدافع عن نفسي أصبحتُ مخطئه ؟ لست مهمله ، أنا فقط أعيش حياه الترف التي اعتدت عليها ، ما العيب في هذا ؟
___________________________________

..(نادره)..

ما بال هذه الفتاه ، ألا تُدركُ ما تفعل ، هل لهذا علاقه ببكاء "محمد" في حضني اليوم؟ ، ناظرتُ "رودينا" اتجهتُ لها و ابتسمت مترتبةً على ظهرها

نادره: متزعليش من عزه ، هي متوتره بس عشان بنتها في الكشف

ابتسمت

رودينا: لا عادي يا نونه

صمتتْ قليلا ثم عاودت الكلام

رودينا: هو أنا بنتك بجد ؟

ابتسمتُ و لاحظتُ اهتمام "سامي" و "طاهر" بالحديث

نادره: طبعا بنتي ، انا حبيتك اول ما شفتك ، انت في مقام بنتي

رودينا: انت عارفه يا نونه آخر مره حسيت بالدفا في كلمه بنتي من امتى ؟ من بعد وفاه ماما الله يرحمها

ابتسمتُ و احتضنتها ، هذه الصغيره تحتاج أماً ، تحتاج لمن يحبها دون مقابل

نادره: الله يرحمها ، انت تستاهلى كل خير يا رودينا

ناظرتُ "طاهر" و "سامي"

نادره: انا اسفه على الي حصل ، محمد حساس جدا من نحيه مها

طاهر: لا خالص طبيعي مهي بنته ، ربنا يطمنكم عليها

ابتسمتُ و أومأتُ برأسي

نادره: آمين

وقفتُ أناظر الباب منتظرةً أن يُفتح ، وقف "طاهر" بجانبي

طاهر: انت كويسه؟

ناظرته و ابتسمت

نادره: كويسه ، قلقانه بس على مها

طاهر: هتبقى كويسه ان شاء الله ، هي علطول بتقطع نفس كدا ؟

نادره: لا أول مره ، هي علطول تعبانه أه ، بس موصلتش أنها تقطع نفس

طاهر: محمد كان قال انها تعبانه من آخر عمليه ، هي عملت عمليات قبل كدا

نادره: اه من ٤ شهور كدا عملت عمليه قلب مفتوح ، فضلت كويسه شويه و فجأه تعبت أكتر من الأول ، من تعبها حبيبتي بقت مش قادره تتكلم

طاهر: للدرجادي ؟ طب مفيش علاج

نادره: ادينا بنسعى يا طاهر ، و ربنا الشافي

طاهر: ربنا يقومها بالسلامه

تذكرتُ "أسماء" ، إلتفتُ بسرعه لها

نادره: أسماء ، روحي حبيبتي خليكي ترتاحي

أسماء: أروح و أسيبكم ازاي يعني

نادره: إسمعى الكلام ، بدل ما تلقطي حاجه من المستشفى إنت مناعتك ضعيفه أصلا ، هبقى أتابعك أول بأول

ناظرتُ "عادل"

نادره: يلا يا عادل خد مراتك و روحو البيت ، لو احتجتكم هكلمكم ، يلا حبيبي عشان أكون متطمنه عليكم

عادل: حاضر يا طنط ، يلا يا أسماء

اقتربت مني و احتضنتني ، احتضنني "عادل" و راقبتهما يخرجان بهدوء ، التفت "لمحمود"

نادره: شوف أخوك فين يا محمود

أومأ برأسه لي و بدأ بمهاتفته
___________________________________

..(محمد)..

كالعاده أقود السياره هائما على وجههي لا وجهة لي ، سأخسر "مها" هذي ابنتي الوحيده كيف أخسرها ، لازلتُ اتذكر جسدها وهو يترنح مع خطواتي المهروله ، شفتيها الزرقاوتين ، وجهها الشاحب ، و هذي المهمله لا تهتم لها ، هذا خطئي ، كنت أدرى أنها فتاه مهمله ، ظننتُ أنها ستتغير ، مسؤوليه الزواج مسؤوليه كبيره تغير الجميع ، لولا حملها في "مها" بعد زواجنا بتلاتة أشهر لكنت إبتعدت عنها ، أتذكر حينما حملت "مها" لأول مره بعد ولادتها ، صغيره ككفِ اليد ، لم أكن أعرف أنني سأحب تلك الصغيره كل هذا الحب ، و الآن سأخسرها بسبب الإهمال ، توقفتُ بالسياره أمام المشفى و أنا أراقب المرضى ، سمعتُ هاتفي يدقُ أجبته بهدوء

محمود: أنت فين ؟

محمد: قدام المستشفى

محمود: تعالى انت برا ليه

محمد: مش قادر ادخل دلوقتي ، لو دخلت هتخانق معاها

محمود: مفيش حاجه اسمها كدا تعالى و تتفاهم مع مراتك بعدين

محمد: أرجوك يا محمود متضغطش عليا ، أنا تعبان و مش قادر

محمود: معلش تعالى على نفسك شويه ، مش هينفع أسيب مامتك و البنات مع الراجل لوحدهم ، لو عليا كنت جيت لك و فهمت مالك

تنهدتُ و شعرتُ بالإختناق

محمد: هتروح مني يا محمود

محمود: لا يا حبيبي بعد الشر ان شاء الله هتكون كويسه

سقطت دمعه حاره على وجنتي و بدأت بالبكاء

محمود: انا جايلك يا محمد

أغلق الهاتف معي و استمريتُ بالبكاء ، دقائق حتى وجدته بجانبي في السياره يرتب على ظهري

محمود: اهدى يا محمد و وحد الله

أرحتُ ظهري و مسحتُ دموعي

محمد: لا إله الا الله

محمود: ان شاء الله خير اهدى ، ادخل معايا يلا و متتعصبش على مراتك هي ملهاش ذنب

محمد: ملهاش ذنب أيه ، دا هي المشكله كلها

محمود: يا محمد و بعدين ، الست خايفه على بنتها بردو

على صوتي في احتاج على كلماته

محمد: خايفه أيه ، دي مهمله معندهاش احساس ، دي أسوء حد شفته في حياتي ، انت متعرفش حاجه يا محمود ، أنا عايش في جحيم ، راميه البت للشغاله طول النهار ، الصبح في شغلها و بليل بتخرج ، شَكٌل طول اليوم ، قله أدب و طوله لسان ، بتجرح فيا و رجولتي يا محمود انا تعبت ، هي مبتحسش أني تعبان ، كل حاجه واقفه كل حاجه بايظه ، عمرها ما جت طبطبت عليا و سألتي مالك ، مهونتش عليا حاجه من ساعه ما اتجوزتها ، كل مره أقول هتتغير هتبقى أحسن هتحس بزعلى مبتحسش ، دي جِبِلْه مبتحش ، انا مش مستعد أخسر بنتي الوحيده بسبب إهمالها

ظل يناظرني بهدوء دون للتعقيب على كلماتي

محمد: انا اتجوزتها مبهور بعيلتها و حياتها ، و اتخدعت ، كنت مبسوط بمامي و بابي و البنت الي بتهزر و تضحك و تصرف و تلبس و تخرج و تسهر ، فكرت ان حياتي هتكون كدا بعد الجواز ، قلت البنت مفرفشه مش هتنكد عليا بعد الجواز ، طلعت هي بؤره النكد كلها ، مش عاجبها حاجه ، كل حاجه وحشه ، مش طايقه ماما ، مش عاوزاها في حياتي مع إن ماما مبتعملش حاجه ، جيت على ماما كتير بسببها ، بتصرف بطريقه رهيبه ، معترضه على كل حاجه ، يا مؤمن دا انا بقيت بشحت حقوقى منها بالعافية ، كل ما يعجبهاش حاجه تبعد عني بالأيام ، تعبت خلاص مش قادر ، بس عارف انا استاهل كله بسبب الي عملته في سهام ، كله بسبب ذنبها ، أنا الي عملت في نفسي كدا

شعرتُ بيديه ترتبان على ظهري بحنان

محمود: و إيه دخل سهام دلوقتي يا محمد ؟ مش خلاص كانت واحده و فركشت معاها

محمد: لا يا محمود انا بتحاسب على كل كلمه جرحتها و هنتها ، أنا مقلتلهاش حاجات بسيطه

محمود: هو في حاجه تانيه معرفهاش ؟ مش انت فركشت مع سهام عشان كانت لازقه و قارفاك

نظرتُ له مبتسماً بحسره و أنا أتذكر كل كلمه قلتها لها

محمد: مش مهم يا محمود ، المهم دلوقتي بنتي أنا مش نقدر أكمل كدا ، هربيها لوحدي أنا مش مستغني عنها

نظر لي مطولاً ، أعرف نظرته تلك ، يحاول أن يفهم شيئا ، إستنشق الهواء و وضع يده على كتفي مترباً عليه

محمود: انا معاك في أي قرار تأخده طالما هترتاح فيه ، بس بردو مينفعش تزعق لمراتك قدامنا و قدام الراجل ، مهما كانت هي في عصمتك لسه ، عزه هتفضل على صله بيك سواء فضلت على عصمتك او لا ، انت الي في إيدك تظبط حياتك ، بس قبل دا كله لازم تقف مع بنتك هي محتاجاك ، إذا كانت أمها مهمله أبوها ميبقاش ضعيف

ناظرته باستنكار

محمد: ضعيف؟ انا ضعيف يا محمود

محمود: بنتك محتاجاك جنبها ، بعدك عنها ضعف ، لمستك لإيديها و هي نايمه بتحس بيها ، هي محتاجه حد قوي تتسند عليه ، متبقاش أنت و قلبها عليها

سقطت دمعه حاره على وجنتي

محمود: يلا يا محمد قوم و أغزي الشيطان ، مامتك و البنات مع طاهر و سامي لوحدهم مينفعش نتأخر عليهم أكتر من كدا

أومأت برأسي و مسحت دمعتي ، خرجتُ من السياره و واجهته

محمد: أنا اسف ، يوم التجمع خبطت فيك جامد

ضحك و ضرب ظهري بحب

محمود: مسامحك يا سيدي ، عارف إنك طروبش و قلبك طيب

ضحكتُ و بدأت أخطو خطوات هادئه معه للمشفى
___________________________________

..(سما)..

أشعر بالتوتر ، لاتزال الصغيره بالداخل ، مرت ساعه و لا أخبار عنها ، أمي تقف بجانب "طاهر" تتحدثُ معه بهدوء ، يبدو أنه يستطيع أن يكبح قلقها ، "رودينا" تناظر "عزه" نظرات غريبه ، هذا طبيعي فالحمقاء أدخلت "رودينا" في جمله مفيده دون جدوى ، "سامي" يتكلم في الهاتف ، يبدو أنه مشغول ، فتحتُ هاتفى و وجدت رسالةً من "حمزه" ، لم أفكر اتصلتُ به

حمزه: كنت مستني الاتصال دا من امبارح ، وحشتيني

سما: حمزه

كانت نبرتي حزينه و يكسوها القلق و الخوف

حمزه: في إيه صوتك ماله

سما: فاضي أتكلم معاك شويه

حمزه: ولو مش فاضي أفضالك ، قولى حبيبتي

سما: انا في المستشفى

حمزه: إيه ليه ، انت كويسه؟

سما: اه ، مها بنت محمد هي الي تعبانه أوي

حمزه: مالها مها ، مش كانت عملت العمليه و بقت أحسن؟

بدأت عيناي تدمعان و ظهر الارتجاف في صوتي

سما: البنت كان نبضها ٦٠ في الدقيقه ، شفايفها زرقا و وشها أصفر ، قلبي وجعني لما مسكتها في ايدي

حمزه: طب اهدى واحده واحده ، مش الدكتور كشف عليها

سما: بقالهم ساعه جوا محدش طلع ، مرعوبه ليكون حصل لها حاجه

حمزه: لا يا بنتي إن شاء الله خير ، خليكي ثابته بس أكيد محمد أخوكي قلقان

سما: حاضر

حمزه: أوعى تعيطي يا سما ، هتصل بيكي كمان نص ساعه اتطمن عليكي ، لو محتاجه أي حاجه كلميني و متشيليش هم حاجه انا موجود

سما: تسلم يا حمزه

حمزه: أنا مبهزرش ، لو عليا أجيلك دلوقتي

سما: لا متجيش خليك زي ما انت ، لو احتجت حاجه هكلمك

حمزه: ماشي يا سما ، خدي بالك من نفسك ، بحبك

ابتسمتُ بهدوء و لم أعلق

حمزه: هستناها منك قريب ، سلام

أغلقتُ المكالمه و اتجهتُ لهم ، وجدت "محمد" و "محمود" يقفان بهدوء مع أمي يتكلمان مع "طاهر" و "عزه" جالسه بمفردها تنظر لهم ، اقتربتُ منهم

سامي: أنا أسف هستأذن أنا ، رحمه مراتي محتاجاني

محمد: تعبناكم معانا يا سامي

سامي: لا تعب ولا حاجه ، دا واجب احنا خلاص بقينا أهل

محمود: استاذ طاهر كتر خيرك تعبت معانا و الله ، احنا الموضوع شكله مطول ارتاح انت

طاهر: لا طبعا ، حفيده نادره حفيدتي ، أقف معاكم لحد ما اطمن عليها

وجدتُ أمي تناظره بسعاده ، وجدنا توأم أمي ، رجل مضحى يحب المساعده كأمي ، إنهما يناسبان بعضهما

محمد: دا شرف لينا و الله يا طاهر بيه

طاهر: ما بلاش طاهر بيه و استاذ طاهر دي ، نادوني طاهر بس

محمود: لا طبعا مينفعش

طاهر: يا عم اسمع الكلام ، انا برتاح كدا

ابتسمتُ أقسم إنه توأم أمي

سما: حضرتك شبه ماما أوي

نظر لي و ابتسم

طاهر: ازاي ؟

سما: نفس التفكير و نفس الردود

ابتسم و نظر لأمي ثم نظر لي

طاهر: يعني مطلعش اللون بس هو المشترك

ضحكتُ بهدوء على حسه الفكاهي ، دقائق حتى وجدت الطبيب يخرج و وراءه فتاه بشعر أسود قصير ، عقدتُ حاجباي أنا اعرف تلك الفتاه ! ولكني لا أتذكر من هي
___________________________________

..(عزه)..

خرج الطبيب و معه فتاه شابه بمئزر طبيّ ، أقبل "محمد" عليهم بسرعه

محمد: طمني يا دكتور

أخذ الطبيب شهيقاً و نظر له بهدوء

بدير: بنت حضرتك محتاجه عمليه تاني في أسرع وقت

نادره: تاني ، مهي لسه عامله عمليه من ٤ شهور

نظر لها الطبيب

بدير: دي مضاعفات بعد العمليه ، المفروض إنكم بتتابعو البنت لمده لا تقل عن ٥ شهور اذا حصل لها أي اعراض غريبه بنرجع نكشف على القلب

محمد: ما احنا كنا متابعينها

بدير: المفروض كانت أول ما تحسو بالاعراض تتعرض فورا ، حاليا لازم عمليه تانيه لإن بالمعدل دا الاكسجين الي في جسمها قليل جدا و ممكن يسبب مشاكل بعد كدا

نظرتُ الطبيب مستفهمه و اقتربتُ منه

عزه: يعني هي كويسه ؟

ناظرني "محمد" نظرةً ثاقبه و أعاد النظر للطبيب

بدير: هتتحجز في المستشفى كام يوم نجهزها للعمليه في صرف يومين هتكون عامله العمليه، متقلقوش كل حاجه هتبقى تمام

ابتعد الطبيب و ظلت تلك الفتاه ذات الشعر القصير واقفةً أمامنا ، ناظرت"محمد"

سهام: ربنا يقومها بالسلامه يا محمد ، إن شاء الله خير ، محتاجين بس مرافق واحد معاها

أتناديه باسمه دون ألقاب؟ هل تعرفه؟ ، ناظرتها بهدوء بدايةً من رأسها حتى اصبع قدميها ، كيف يعرفها ، ولماذا لم يقل لي شيئا عنها ؟ ، ناظرها"محمد" بسرعه

محمد: أنا هكون مرافق معاها

عزه: انا هقعد يا محمد ، أنا أمها

ناظرني بهدوء غريب ، عيناه تشعان بالشرار ولكن وجهه هادئ

محمد: لا أنا عارف هتعامل مع بنتي ازاي ، روحي انت

عقدتُ حاجباي ، هل يظن أنني لن أكون كُفءًا لها ، ناظرتُ الطبيبه انها تناظرني بهدوء ، ما بال ملامحها ، ما الذي يحدث

نادره: ارتاح انت يا محمد ، انا هبات معاها

محمد: لا يا ماما ، انا مع بنتي

اقتربت حماتي منه

نادره: مش مستأمن بنتك معايا ؟

محمد: ابدا يا ماما ، أنا اديهالك و انا مغمض بس مش هقدر أقعد في حته هي مش فيها

عقدتُ حاجباي ، ما هذا الحب الغريب ؟ لم أعهد "محمد" بمشاعر ! أهذا هو وجهه اللطيف؟ ، إذا لماذا لم أره يوما ؟

نادره: ماشي يا محمد ، متجهدش نفسك أهم حاجه و انا هجيلك أطمن عليك كل شويه

أومأ برأسه ، نظرت حماتي لي

نادره: عزه هتبات معايا يا محمد لحد ما ترجع البيت ان شاء الله

ناظرها بهدوء و عيناه مثبتته علىّ

محمد: لا يا ماما ، عزه كانت متفقه مع أهلها تقضي عندهم كام يوم ، أنت عارفه هم لسه راجعين من عند ابنهم ، هتروح تقعد هناك

نادره: و بنتها في المستشفى؟

ناظرني "محمد" بحده

محمد: أه عادي ، متقلقيش هي متعوده

ناظرته بصدمه و هو يبتعد ، لم يكن يهدد ! هل سيطلقني حقا ؟ ما الذي فعلته لأعيش هذه الحياه ، نظرتُ أمامي أرى الجميع يتكلم عدا تلك الطبيبه تناظرني فقط ، ما بال نظراتها ، من تلك الفتاه ؟ ، أخفضتْ عيناها و ذهبت دون كلمات ، أشعر بالنار في صدري هناك أمر ما يدور حولى و أنا لا أفهمه.
___________________________________

..(محمد)..

أجلس بجانب سريرها الابيض ، صغيرتي التي لا يتعدى طولها المتر ، جسدها مليءٌ بالأجهزه الطبيه ، مصل في يدها اليمنى و آخر في يدها اليسري ، تجلس عاريه الصدر مكبلةً بالأجهزه ، أراقب خط جهاز القلب ، أرقام و كلمات لا أفهمها ، أصوات غريبه ، أكاد أبكي ، افتحي عينيكِ يا صغيره أرجوكِ ، سمعتُ صوتاً بجانبي

سهام: متقلقش هتبقى كويسه

ناظرتها ، تقف بجانبي تواجهني و على ملامحها الشفقه ، شعرتُ بدموعي تسقط على وجنتاي بصمت ، اقتربت مني و جلست تقابلني باهتمام ، صوتها حنون و هادئ

سهام: محمد متقلقش ، و الله مها كويسه ، بس قطع النفس خلانا نتأكد ان مفيش جاهز من أجهزه جسمها اتضرر ، عشان كدا اتأخرنا في الكشف ، دكتور بدير هيعمل العمليه بالمنظار و الله شاطر جدا ، متقلقش

لأول مره تقترب مني لهذا الحد ، أمسكت يديها و رفعتها لوجههي حتى تكون قريبه مني ، بدأت بالبكاء بانهيار ، لم أرى ملامحها ولكنى أجزم أنها ستبكي معي ، هذي هي الانثى الوحيده التى رأت دموعي بعد أمي ، أنا أنهار في وجودها ، أحتاج إلي أهتمامها و كلامتها الحنونه

سهام: محمد ارفع وشك كدا

أملتُ برأسي يمينا و يسارا رافضا أن ترى وجههي الذي كان على يديها ، أبعدت يدها و رفعت وجههي للأعلى لتناظر عيناي ، شعرتُ بيديها تمسح دمعاتي بمنديل و نظري معلقٌ عليها

سهام: مها محتاجه حد قوي جنبها ، أنت عارف إن الناس الي بتكون في غيبوبه بنصر نخلى أهلهم يتكلمو معاهم و يلمسوهم ، اللمسه الي بتلمسها لجسمها مخها بيستقبلها ، بيدي اشارات عصبيه إنك جنبها ، ريحتك صوتك نفسك كل دا هي سامعاه ، يمكن مش هتفتكر حاجه بس مش هتبقى خايفه

أمسكت يدي و ابتسمت

سهام: مش هقولك انا حاسه بيك ، أنت أب و أكيد أحساس ان حته منك تعبانه بيوجعك ، بس أنا اكتر واحده تقدر تفيدك ، ماما كانت في غيبوبه لمده ٤ شهور و لما فاقت قالتلي انها لما كنت بدخل عليها كانت بتحس بيا ، يعني الانشا الي في الكتب بتاعتنا دي حقيقيه

ناظرتها بهدوء و ابتسمت ، كيف أضعتُ تلك الحوريةُ من يدي ؟

محمد: شكرا يا سهام

سهام: لا شكر على واجب يا محمد ، انت في مقام أخويا

أخاكِ ، كلمتكِ فطرت قلبي ، ولكن ستغيرين رأيك ، ستكون "مها" حلقه الوصل بيني و بينك ، ستحبينها كما أحبها ، و تحبينني كما أحبك

محمد: انت اتأخرتي على بيتك أوي يا سهام ، مين هيوصلك

سهام: متقلقش ، هروح عادي ، انا بكرا معنديش شغل في المستشفى بس هجيلك اول ما أخلص محاضراتي ، لو محتاج أي حاجه كلمني في أي وقت و انا هكلم دكتور بدير

ابتسمتُ و ناظرتُ عيناها ، تلمعان كما كانت حين تهتم لأمر شخص ما

محمد: شكرا على جدعنتك يا سهام ، مش عارف أقولك أيه

سهام: ولا أي حاجه ، ارتاح و كل حاجه هتبقى تمام

ابتسمتُ و انا أراها تستقيم و تخرج بهدوء ، ناظرتُ الصغيره

محمد: يلا شدي حيلك و قومي ، عاوزين نخليها ماما في أسرع وقت

___________________________________

..(طاهر)..

طاهر: روحتى البيت؟

نادره: اه الحمد لله

جلستُ على سريري و أنا أحادثها

طاهر: أنت فاضيه الأول و لا وراكي حاجه؟

نادره: برتب كام حاجه في البيت ، بس قول عاوز حاجه ؟

طاهر: كنت عاوز أقولك إن النهارده كان يوم جميل بالنسبالي ، و اتمنى حفيدتك تقوم بالسلامه ان شاء الله

نادره: كان يوم حلو أوي فعلا ، أولادك لُذاذ بيفكروني بعيالي لما يتجمعو مع بعض

طاهر: لا أنت مشفتيش وشهم التاني ، دول مجانين

سمعتُ ضحكاتها و ابتسمتْ

نادره: ربنا يسعدهم ، خليهم يتجننو إن متجننوش دلوقتي هيتجننو إمتى؟

طاهر: على رأيك ، أنت كويسه ؟

نادره: أه ، سما اتصلت بمحمد و طمنى إن الدكتوره الي معاه طمنته و قالت إن كل حاجه هتمشي تمام ، و مش بإيدي حاجه غير الدعاء

طاهر: ان شاء الله تقوم بالسلامه

ظلت صامتةً قليلا

طاهر: أنا هسيبك ترتاحي ، بكرا هبقى أطمن عليكي ، تصبحي على خير

نادره: و انت من أهله

أغلقتُ الهاتف و وضعتُ يدي على قلبي ، نبضاته سريعه ، سريعه جدا

طاهر: في إيه ، مالك دي قاعده الي قعدتها معاها ، متتقل كدا في إيه

أغمضتُ عيني ألوم نفسي

طاهر: زمانها تعبانه و متوتره ، رايح تكلمها و تتحاكى معاها ، دا وقته بذمتك

تمددتُ على السرير و أغلقت النور

طاهر: مراهق و الله العظيم مراهق

___________________________________

..(نادره)..

تحممتُ و جسلتُ أُمشط شعري ، أتذكر ما حدث اليوم ، لقد وافقت ! لم أتخيل يوما أن يحدث كل هذا لي ! وقفتُ أمام المرآه ابتسم و أرجعتُ شعري للوراء بهدوء

نادره: عيب يا نادره في إيه ، دي أول مقابله مش هتقعي على بوزك من أولها كدا

نظرتُ فستاني الوردي و ابتسمتُ حين تذكرتُ شكله وهو يرتدي قميصه الوردي

نادره: لأ و نفس الدرجه ، دول المخطوبين مش بيعرفو يظبطو درجه الفستان مع القميص

أمسكته و بدأتُ في تعليقه ، راسلت "محمد" لأطمئن عليه ، أجابني برساله سريعه أنه بخير و سيراسلني اذا جَدّ جديد ، سمعتُ الباب يُطرق دخلت"سما" مبتسمه

سما: هتنامي؟

نادره: عاوزه حاجه ؟

سما: ممكن أقعد في حضنك شويه؟

ابتسمتُ و فتحتُ ذراعاي على مصرعيهما ، هرولت لي و جلست بحضني أداعب خصلات شعرها

نادره: وحشتيني يا سما و وحشني حضنك

سما: انت وحشتيني أوي يا ماما ، كنت مفتقده حضنك أوي

نادره: قولي إنك هتقعدي شويه معايا مش هتمشي زي كل مره

ابتسمتْ

سما: هقعد معاكي متقلقيش ، هقعد فتره طويله

قبلت مفرق شعرها

نادره: ياه أخيرا ، بس شغلك انت واخده أجازه قد ايه؟

سما: أنا قدمت استقالتي

ناظرتها بهدوء و قد عقدتُ حاجباي

نادره: ليه؟ أيه الي حصل فجأه كدا

سما: مكنتش مرتاحه ، غير أني محتاجه أرتاح شويه و هدور على شغل جديد

نادره: بجد ، يعني مفيش مشكله عندك ؟

سما: لا خالص أنا كويسه

إبعدت عن حضني و ناظرتني

سما: ماما حمزه كدا مش هيعرف يجي بكرا صح ؟ ، قصدي أكلمه أقوله مش هينفع بكرا

ابتسمتُ و أنا أرى الشوق في عينيها

نادره: هقول لمحمود أخوكي يكلمه يحدد معاه معاد تاني غير بكرا

أومأت برأسها و ابتسمتْ

نادره: بس دكتور حمزه دا شكله بيحبك أوي

ابتسمتْ بحرج ، إنها تحبه ، هي فقط خجوله

نادره: انت بتحبيه؟

سما: يا ماما عادي يعني

نادره: سما انطقي قولى بتحبيه

ابتسمتْ و بدأت تداعبُ أصابعها كما تفعل عندما تخجل

سما: مش عارفه ، كل الي أنا عارفاه أني بطمن في وجوده ، مبخفش ، مبحملش هم حاجه ، ساعات بحس إني بتغابي و هو موجود ، مبفكرش ، مبجهدش نفسي بالتفكير و انا معاه ، تسميه حب تسميه الي تسميه معرفش

ابتسمتُ و أنا أرى وجنتيها تتوردان ، صغيرتي المجنونه تحب

نادره: دا أنت واقعه

ناظرتني بسرعه و اختفت ابتسامتها

سما: بجد ، باين عليا

تداركت ما قالت

سما: قصدي يعني باين في فرق في التعامل

لمستُ وجنتيها بابتسامه

نادره: أهم حاجه تحافظي على نفسك ، و تحافظي على دا

لمستُ صدرها الأيسر مكان موضع قلبها

نادره: ألف مين يتمناكي يا سما ، خليه يجري وراك لحد ما ياخدك في الحلال ، أوعي تفرطي في حقك او في أي حاجه ليكي ليه لمجرد إنك بتطمني معاه ، يمكن هو راجل محترم و ابن أصول ، بس في الآخر راجل

سما: يعني أيه

نادره: يعني شيطانه اقوى منه ، مبتكلمش هنا إنه يعمل حاجه حرام ، بتكلم عن ان دماغه هتشتغل كتير أوي ، و تشغيل الدماغ الكتير غلط

سما: مش فاهمه

نادره: هسألك سؤال بس جاوبيني عليه بصراحه

أومأت برأسها

نادره: طول ال٥سنين الي اشتغليها معاه ، تعاملاتك معاه كانت عامله ازاي ؟

سما: هزار ضحك و كدا ، هو صاحبي الوحيد و زميلي في الشغل

نادره: أولا مفيش حاجه اسمها صاحبي ، مفيش راجل بيصاحب بنت ، الراجل لما بيقرب من بنت بيبقى عاوز يتجوزها ، مش يصاحبها ، ثانيا و الأهم حصل تجاوزات بينكم؟

سما: لا أبدا ، حمزه محترم و كان بيحافظ عليا اكتر من نفسي ، عمره ما أذاني أو ساب حد يئذيني

ابتسمتُ ، صمتتْ قليلا ثم أكملتْ

سما: ماما ممكن أسألك سؤال

نادره: سؤالين مش سؤال واحد بس

سما: و انت في الشغل ، حد عمره مد ايده عليكي ؟

ناظرتها بهدوء

سما: أصل في واحده اعرفها مديرها اتحرش بيها ، مكنتش عارفه أنصحها ازاي و بالذات هي خايفه و بتحلم بكوابيس الفتره دي

ظللت أستمع لها بانصات ، صغيرتي تعرضت للتحرش ! ألهذا تركت العمل ، لم تُخفي عني ؟ هل تظن أنني سأنهرها ؟

نادره: كتير يا سما ، في بعض الرجاله قليله الأدب بتكون ايديها و لسانها طوال ، مبيعرفوش يتحكمو في نفسهم ، افتكر في مره شخص كدا لمسني ، لميت عليه المكان كله و عرفته قيمته ، يوميها رجعت خايفه أوي بس مبسوطه ، الي صحبتك حاساه دا طبيعي ، احساس إن حد بنتهك مساحتك الشخصيه دا مؤذي و بالذات لو كانت انتهاكاته مش بريئه ، الي مش طبيعي انها سكتت ، المفروض كانت تقف تديله بالقلم و تفرج زمايلها عليها ، مينفعش تسكت ، الناس الي شبهها هم الي بيضيعو حقهم

سما: بس هي قالتلى إنها ضربته بالقلم ، بس كانت خايفه أوي

نادره: جدعه ، بس مكنتش تمشي غير لما تفرج عليه أمه لا اله الا الله ، عشان يعرف إن الله حق

أمسكت يديها و قبلتها

نادره: الكوابيس الي بتشوفها هتروح لما ترتاح و تبطل تفكير

أومأت و رجعت في حضني ، نظرتُ لها بهدوء ، خائفه هي ، سأحرص الليله على أن أطمئنها
___________________________________

..(محمود)..

محمود: صباح الفل على الي نايم و مسقع خالص

تململت الفاتنه و ابتسمت لي بابتسامتها المعهوده

ابتهال: انت صاحي بدرى ليه كدا ، الساعه لسه ٦

أمسكتْ هاتفها و هي تتكلم ، انتفضتْ حين رأت الساعه

ابتهال: يا خبر أبيض الساعه ٩

ناظرتني و اختفتْ الابتسامه من على وجهها ، وقفتْ مسرعه و أرجعت خصلاتها المتمرده وراء أذنيها و ناظرتني

ابتهال: انا اسفه المنبه مضربش ، إلبس و هعملك فطار بسرعه ، و الله أنا مركزه أصحى أنا عيني يا دوب غلفت

تحركتْ من أمامي و الإنزعاج حاضر على وجهها ، أمسكتُ ذراعها برفق و قربتها لي

محمود: اهدى مجراش حاجه

ابتهال: سيبني بس ألحق وقتي عشان متتأخرش

ابعدتْ ذراعها من يدي ، أمسكتها مرة أخرى و جعلتُ صدرها يواجه صدري و عينانا تناظر بعضنا البعض ، لم أرى في عينيها الخوف ؟

محمود: أنا مش هروح الجامعه النهارده ، اهدى الموضوع أبسط من كدا

ابتهال: يعني أنا مأخرتكش ؟

ابتسمتُ و أنا ألمس خصلات شعرها التي وقفت نتيجه نومها

محمود: لا ، و حتى لو أخرتيني أيه المشكله ، مش آخر الدنيا

أغمضتْ عيناها و وضعتْ رأسها على صدري تستنشق الهواء بهدوء

محمود: ليه التوتر دا كله ، مالك ؟

ناظرتني بهدوء

ابتهال: مفيش ، خفت لأكون أخرتك

محمود: انت نايمه امبارح متأخر طبيعي تبقى صاحيه متأخر ، و بعدين أنا مش عيل هستناكي تفطريني و تديني الببرونه ، عادي يعني يوم مصحتيش فيه هفطر نفسي أنا

ابتهال: لا إزاي يعني ، أومال انا لازمتى أيه

ابتسمتُ و جلستُ على السرير جاعلا إياها تجلس بجانبي

محمود: انت عارفه ليله فرحى ماما قالتلى أيه ، قالتلى جمله عمري في حياتي ما هنساها ، قالتلي اذا متجوز عشان واحده تطبخلك و تغسلك بلاها جواز أنا موجوده ، أما لو متجوز واحده تبسطها و تتبسط معاها روح الله يسهلك

ابتسمتْ الفاتنه و ناظرتني بعينان تلمعان

محمود: الرسول صلى الله عليه و سلم كان في عون أهله ، كان بيخيط ثوبه و ينضف مكانه ، زوجاته كان شايلهم من على الارض شيل

ابتهال: عليه الصلاه و السلام

محمود: ممكن أعرف بقا انت كنت خايفه ليه

ابتهال: مكنتش خايفه انا كنت مدايقه

محمود: متأكده ؟

ابتهال: ايوا

نظرتُ لها و أنا أعلم أنها تخفي شيئا ، قَبَلتُ رأسها و باطن كفها

محمود: الحياه مشاركه يا ابتهال مش حرب ، مش هقف لك على الواحده و أأمرك تخدميني ، و خليكي واثقه عمري ما هزعلك أو أجرحك بكلمه

ابتسمتْ و ناظرتني بعيون تلمع ، وضعت رأسها على صدري

ابتهال: أنا بحبك أوي يا محمود ، أنا علطول بندم على قراراتي ، إنت القرار الوحيد الي مندمش عليه و لا عمري هندم

ابتسمتُ و قَبّلتُ رأسها بحنان ، هي لا تعلم ماذا تفعل بي كلماتها ، أشعر بجانبها أنني مكتمل الرجوله ، وكيف لا أشعر وهي مكتمله الانوثه

محمود: طب إيه العمل دلوقتي بقا

ناظرتني باهتمام مستفسره

محمود: عاوز أعدي على محمد و انت بصراحه صعبتي عليا الموضوع

عقدتْ حاجبيها و ناظرتني باهتمام

ابتهال: انا عملت حاجه غلط ؟

محمود: أنا الي هعمل الغلط

غمزتُ لها و ضحكتْ بخجل وقد توردت وجنتيها

محمود: لا بقولك إيه انا على تكه

ضحكتْ باتساع و بدأت تداعبُ أصابعها التي على صدري بخجل واضح

ابتهال: احنا ممكن نأجل الفطار شويه

رفعتُ حاجباي ، و ابتسمت

محمود: الله أكبر ابو الهول نطق ، لا دا إحنا لا نفطر و لا تتغدي و لا نتعشى

اقتربتْ من وجنتي و قَبلتني برَوِيَه ، لا أصدق نحن في تطور ، ابتسمتُ و لمستُ وجنتها و ابهامي يلمس وجنتها اليمني مقتربا من شفاهها

محمود: انا مش قدك خفى عليا

ابتسمتْ و ناظرتْ عيناي بحب ، تذكرتُ كلمات "محمد" و بكاءه في السياره ، كم من الوقت قد حُرم من لذه هذه اللحظه ؟
___________________________________

..(محمد)..

إنها الثالثه عصرا ، أمي تكرر اتصالاتها ، "محمود" معي منذ ساعتان ، "سما" تراسلني و تطمئن على الصغيره ، "أسماء" تكاد تبكي لعدم سماح زوجها "عادل" بالجلوس معي بالمشفى ، الجميع يطمئنُ على الصغيره إلا هي ، لم أتلقى إتصالا واحدا ، لم تحاول حتى أن تجعل أحدا يطمئن عليها ، مابالها ؟ كيف تكون أماً بلا رحمه لهذا الحد ، ناظرتُ الصغيره ، لقد فتحت عيناها الجميلتين ، تبتسمُ لي بوهن شديد ، أمسكتُ يدها و قَبّلتُها بحرص حتى لا أؤذيها بسبب المصل

محمد: حبيبه بابا ، لسه تعبانه ؟

نظرتْ لي بوهن و ابتسمت ، فتحت فهمها تحاول التكلم ، صوتها بالكاد يخرج

مها: اه

محمد: سلامتك روح قلب بابا ، خلاص إحنا هنبقى كويسين متخافيش

سمعتُ طرقاتٍ على الباب ، وجهتُ نظري لمصدره و إذا هي ، الفاتنه التي ملكت قلبي

سهام: ممكن أدخل؟

محمد: أه طبعا اتفضلي

دخلتْ و ابتسمتْ لي ثم وجهتْ بصرها للصغيره ، ابتسمتْ و اقتربتْ منها

سهام: الله مين الحلوه الجميله الي نايمه على السرير دي

ناظرتُ "مها" تبتسم بوهن

سهام: يا خبر أبيض على الجميل

جلستُ مقابلها أراقبُ حركاتها و يفصلنا سرير "مها" ، تضحكُ و تبتسم باهتمام ، هذي هي مالكه قلبي ، ناظرتُ "مها" و قد بدأت تبتسم معها متناسيةً ألمها ، أرحتُ ظهري على المقعد و تذكرتُ ما حدث أمس ، لقد بكيتُ أمامها ، لم أفعلها أمام "عزه" لقد هزمتني المشاعر ، بالتأكيد تظن أنني رجل ضعيف الآن ، سمعتُ ضحكات الصغيره تزداد ، لم أسمع ضحكاتها منذ مده ، لديها القدره على إسعاد الجميع ، ناظرتني و ابتسامه هادئه تعلو وجهها

سهام: الدكتور حدد العمليه ، النهارده بليل هتكون في العمليات

محمد: هتبقى كويسه صح ؟

سهام: هتبقى زي الفل ، متقلقش ، خليك جنبها زي ما انت

أومأتُ برأسي و ناظرتُ عيناها التي أخفضتهما لتواجه الصغيره ، رفعت عيناها عندما تكلمت

محمد: امبارح كان يوم صعب جدا عليا ، و ..

قاطعتني مبتسمه

سهام: انا مش فاكره إيه الي حصل إمبارح أصلا ، أنا موجوده في أي وقت تحتاجني أنا و دكتور بدير ، كلمني و متشيلش هم

ناظرتها بهدوء ، لن أكذب لقد اطمئن جزء كبير من قلبي ، هي تتناسى حتى لا تجرحني ، استقامت مبتسمه

سهام: أنا هستأذن ورايا شغل في الجامعه ، قلت أشوفكم محتاجين حاجه ولا لا

استقمتُ أيضا و ممدتُ يدي لأصافحها ، مدت يدها مبتسمه ، لامست أصابعي يدها الصغيره ، ناعمه و حنونه ، لا أكتفي بيديها أريدها أحتاجها بشده ، أزاحت يدها من يدي مبتسمه

سهام: مع السلامه

ظللتُ أناظرها و قلبي يكاد يقفُ ، لن أصمت حتى تكون زوجتي

___________________________________

..(سامي)..

سامي: بس الأقوال إلى يارا قالتها غير كدا ، هي قالت إنك ودتيها الأوضه و بعد كدا دخلتي عليها لقيتيها بالمنظر دا و طلعتي بيها على المستشفى

ولاء: محصلش ، أنا دخلت في الآخر لما لقيت سيد خارج من الأوضه ، أنا لا وصلتها أوضه و لا غيره

عقدتُ حاجباي باهتمام

سامي: مين سيد

ولاء: سيد الولد الي كلمته وقت الحفله

سامي: الي كانت بتضايق بيه صاحبها دا

أومأت برأسها

سامي: يعني سيد هو الي عملها

ولاء: معرفش ، أنا لقيته خارج من الأوضه و دخلت بعديه أجيب حاجه من جوا لقيت المنظر دا

سامي: طيب وقعي على أقوالك ، و اعملى حسابك انت لسه تحت التحقيق ، أي سفر برا المنصوره ممنوع و هتتعرضي لمساءله قانونيه

ولاء: ماشي

وقفت و خرجت ، أدخل العسكري "سيد" الفتى الذي قالت عنه ، فتى طويل بشعر أسود قصير من الجانبين و طويل من الوسط ما يسمونه بالقزع ، بنطال أسود و قميص أبيض بأزرار مفتوحه لمنتصف صدره ، سلسال من الفضه ، يمشي بطريقه غريبه ، أهلا بالمصائب ، جلس أمامي بهدوء و نظرته توحي بالقلق

سامي: بطاقتك

أخرج بطاقته من جيبه و أعطاني إياها ، نظرت لها "سيد محمد عبد ربه المكاوي" ٢٠ عام يسكن في حي راقٍ من أحياء المنصوره ، نظرتُ له و أعطيتُ البطاقه لمساعدي الذي يكتب الأقوال ، هيئته لا تدل على وجوده بمسكن راقٍ

سامي: تعرف إيه عن يارا المنزلاوي

سيد: زميلتنا

سامي: في شاهد من الشواهد قال إنه شافك خارج من الأوضه الي كانت فيها يارا و هي متخدره ، إيه أقوالك

سيد: يارا مكنتش متخدره ، يارا سكرت و دخلت مع على

عقدتُ حاجباي باهتمام

سيد: على كان متراهن إنه هينام معاها برضاها الليله دي

سامي: إيه دليلك على كدا ؟

أخرج هاتفه و فتح محادثته بينه و بين اصدقائه بمجموعه تسمى"الاشباح" وضعه أمامي و ناظرني بهدوء

سيد: ابدأ اسمع من أول هنا

بدأتُ في الإستماع لمحادثاتهم الصوتيه ، معظم محادثاتهم في كيفيه الانتقام من "يارا" بسبب ما فعلته له في الجامعه ، بدأت استمع في تركيز حتي سمعت *و الله لأخليها تاخدني بايديها للأوضه و ساعتها مش هسكتلها* ، ناظرته بصدمه

سامي: ليه بيعمل كدا ؟

سيد: يارا و علي كانو بيحبو بعض من زمان ، و هو قرر يفصل منها شويه بس يارا مسمحتش ليه ، و أخدتها على كرامتها إزاي حد يرفضها أو بمعنى أصح إزاي حد يقول لطلب ليها لا ، و بدأت تراقب علي لحد ما عرفت إنه اتعرض لأزمه ماديه و بيشتغل في ورشه عشان يساعد البيت ، وقفت في نص الجامعه و قالت كلام ميتقالش في حقه ، و بصراحه كلنا غلطناها لان علي من بعدها اتغير معانا كلنا و هي كل ما يبعد عنها تتجنن عليه أكتر و كل شويه تدايقه و تقلل منه ، لدرجه إنها قالت كلام مش كويس على أهله ، لحد ما لقيته بيبعت الرساله دي ، بمجرد ما لقيت الموضوع دخل في شرف سحبت نفسي ، حاولت أقنعه بس راسه كانت متربسه ، و إلا هياخد حقه غصب عنه

ظللتُ أستمع له بتعجب ، كيف يمكن أن يحدث هذا ، هل شرف الفتاه سهل لهذه الدرجه

سامي: و انت إيه دخلك الأوضه طالما سحبت نفسك

سيد: بعد ما علي خرج دخل كل واحد من زمايلنا عليها يكمل عليها ، دخلت خوفاً عليها ، بمجرد ما دخلت غطيتها و وقفت مش مستوعب الي شايفه قدامي ، حاولت أفوقها لحد ما بدأت تبربش بعينها ، خرجت خوفاً لحد يشوفني يفتكرني أني عملت فيها حاجه

تبدلت ملامحي للصدمه

سامي: يعني مش على بس ؟

سيد: كلهم مش على بس

ناظرتُ مساعدي الذي بدت على ملامحه الصدمه ، ابتلعتُ لعابي

سامي: وقع تحت أقوالك ، محتاج أسماء و عناوين الشباب كلهم

سيد: بس مش هتاخد في الرجلين ، و الله معملتش حاجه

سامي: هنحتاج تتحول للطب للشرعي و ساعتها يقرر

صمتْ بهدوء و أومأ برأسه و خرج ، نظرتُ لمساعدي و ألقيتُ القلم بعنف على الطاوله

سامي: إيه القرف الي إحنا فيه دا ، ياخربيت الأجيال الي باظت و الأهل الي مربتش

___________________________________

..(عزه)..

هناك أمر ما يحدث وراء ظهري ، بدأت بالتحرك يمينا و يسارا ، "محمد" لم يأخذ الانفصال على محمل الجد يوما ، لم الآن ؟ هناك أمرٌ ما ، دخلتُ غرفتي و بدأت بإخراج ملابسه بصوره سريعه ، هناك شئٌ يخفيه عني ، نظراتُ تلك الطبيبه مريبه ، تكلمه دون ألقاب !

عزه: و الله العظيم لأعرف وراك أيه يا محمد

بدأت أُدخل يدي في جيوب بنطاله واحدا تلو الآخر ، أعرف أنه يخفي شيئا ، بدأت بتفتيش معاطفه كل شي أراه أمامي ، لا شئ لا أجد شيئا أكاد أُجن ، أقسم أنني سأُجن ، جلستُ على السرير آخذُ شقيها و زفيرا ، بدأتُ بالصراخ

عزه: سيده ، يا سيده

سيده: نعم يا ست هانم

عزه: دخلى اللبس مكانه ، و متعرفيش حد إن اللبس كان على الأرض

سيده: حاضر يا ست هانم

بدأت بإعاده ترتيب الملابس ، عيناي تراقب كل شي ، حتى تذكرتُ خزينته ، بالتأكيد يُخبءُ فيها كل شئ ، وقفتُ أمام الخزينه و حاولتُ فتحها ، تباً لقد بَدّلَ كلمه المرور ، حسنا الآن أجزم أنه يخبءُ شيئاً عني ، جلستُ على الأرض أحاول التفكير ، لفتت نظري ورقه صغيره على الأرض ، إلتقطها و ابتسمت

عزه: يبقى إنت الي عامله كل دا ؟

نظرتُ الاسم المكتوب عليها

عزه: دكتوره سهام التميمي ، ماشي يا ست سهام يا أنا يا أنت
.

.

.

.