رواية نادره الفصل الرابع 4 - بقلم sasso

..(محمود)..

حمزه: شَرْبات ، عاوز أشرب الشَرْبات

نظرتُ له بتعجب و ناظرت " سما" ، مصدومه ! ما الذي يحدث ؟

محمود: أفندم ؟

اعتدل أمامي و جلس ينظر إلى عيني بثقه

حمزه: أنا طالب إيد الدكتوره سما

ناظرت " سما" التي تقدمت خطوات ناحيته

سما: إيه ؟ انت بتقول إيه ؟

نظر لها " حمزه" و على وجهه ابتسامه بسيطه ، و أعاد النظر لي مره أخرى

حمزه: أنا حمزه الرشيد دكتور بيطري بشتغل مع سما في نفس الإسطبل من ٥ سنين ، انا أصلي من القاهره و عيلتي صعايده لو تسمع عن عيله الرشيد

محمود: أه اسمع عنها ، مش عندكم إبراهيم الرشيد صاحب مصانع الرشيد

حمزه: أه فعلا دا ابن عمي

محمود: أهلا بيك

ناظرت "سما"

محمود: ادخلى يا سما ، انا و حمزه هنتكلم مع بعض شويه

ناظرتني بهدوءٍ قلق ، تفرك يديها أعرف "سما" حين تقلق ، ابتسمت مهدئا لها و أومأت بهدوء ، ابتعدت عني و مشت خطوات صغيره و عيناي لا تبتعد عنها ، ناظرت " حمزه" و اعتدلتُ في جلستي

محمود: بص يا دكتور حمزه ، انت عارف سما اختى الصغيره ، و غاليه عليا قد عنيا ، ممكن أعرف انت تعرفها بقالك قد أيه

ابتسم و ظهر على ملامحه أنه قد فهم مقصدي

حمزه: أنا بحبها من ٣ سنين و هي متعرفش ، سما شغاله معايا من ٥ سنين ، و عمري ما شفت منها حاجه تعيبها

محمود: و خبيت حبك ليها ٣ سنين ليه ؟

حمزه: عشان مكنتش جاهز ، مكنتش قادر ادخل البيت و انا واثق أني هعيشها في أقل من بيت والدها

محمود: و سما بتحبك؟

حمزه: عشان أبقى صريح معاك انا لسه معترف ليها من ساعه ، مقدرش أحدد مشاعرها نحيتي

محمود: و ليه مستنتش ترد عليك و بعد كدا تتقدم

حمزه: خفت

عقدتُ حاجباي بتعجب

محمود: نعم ؟

حمزه: خفت عليها من نفسي ، خفت انها تطلع بتحبني هي كمان و الشيطان يحليها في دماغي و افضل أحب فيها من غير خطوه حقيقيه تعززها و تكرمها

ابتسمتُ و إرتاحت ملامحي

محمود: انت اخبارك أيه

حمزه: الحمد لله مرتاح ، شقتي موجوده في القاهره متشطبه على وش الدهان وقت ما العروسه تطلبه ، و عندي بيت في الصعيد ورث من جدي الله يرحمه ، و ٤ فدادين ورث بردو ، و مشارك ابن عمي في المصنع كمصدر دخل تاني

محمود: و علاقتك مع ربنا ؟

خفض عيناه و نظر لي مره أخرى

حمزه: مش هقولك اني شيخ و لا هقولك اني خاربها ، انا بعافر و ربنا يسامحني على تقصيري

نظرت في عيناه ، تبدو صادقه

محمود: يعني ؟

حمزه: الحمد لله ملتزم بصلاتي و على قد ما أقدر بحاول أزود

محمود: يعني لو أديتك سما هتتفي ربنا فيها ؟

حمزه: طبعا ، دي هتبقى في عنيا

ابتسمتٔ و ناظرته بارتياح ، دخلت أمي و بيدها القهوه و بعضا من قطع الكيك ، وقف "حمزه" و ابتسم مواجها لها

نادره: أهلا بيك يا دكتور نورت البيت

حمزه: منور بناسه و أهله ، تسلم ايدك و الله تعبتك

نادره: لا تعب ولا حاجه يا دكتور ، أتفضل ارتاح

جلس "حمزه" و جلست أمي بجانبي ، واجهت أمي و ابتسمت

محمود: دكتور حمزه طالب إيد سما يا ماما

تهللت أساريرها و لمعت عيناها ، ناظرتني بسعاده ، ابتسمتُ لها و ناظرت " حمزه"

محمود: أتفضل يا دكتور مد ايدك انت مش غريب

ابتسم و أمسك كوب القهوه ، وكزتني أمي في يدي ناظرتها لأراها تُشير على " سما" الواقفه على مدخل الصاله ، ابتسمتُ و أنا أرى عيناها تلمعان ، هذه الحمقاء تحبه ، نظرت " لحمزه" و قلت مبتسماً

محمود: بكرا في مناسبه عندنا في البيت ، ان شاء الله تنورنا بعد بكرا و تقعد مع محمد أخويا ، و الي فيه الخير يعمله ربنا

ابتسم و أومأ برأسه مؤكدا على كلماتي

حمزه: ان شاء الله

وضع كوب القهوه على الطاوله و استقام مبتسماً

حمزه: طيب عن إذنكم ، انا جيت من غير معاد و دي قله زوق مني بصراحه ، فأنا بعتذر عليها

أخرج كارت من جيب بنطاله و ناولني إياه

حمزه: دا رقمي ، ان شاء الله هنتظر مكالمه حضرتك

ابتسمتُ و أومأت برأسي

محمود: ان شاء الله

أخذت من يده الكارت و صافحت يده ، توجهت معه للباب و ودعته ، أغلقت الباب و أمي تناظرني بقله صبر

نادره: ها كويس؟

ابتسمتُ و مسحتُ على وجههي

محمود: الصغيره كبرت و عاوزه تتجوز

___________________________________

..(محمد)..

خرجت من الكافيه و قلبي يرفرف ، لقد قضيت معها ٣ ساعات نتحدث ، صحيح انها أحاديث طبيه و مكالمات كثيره و لكني على الأقل استطعت أن أناظرها عن قرب ، ابتسمتُ و أنا أتذكر ملامحها المجهده ، شفاهها الورديه المنتفخه ، انفها الصغير ، عيناها الكبيرتان ، أهدابها الكثيفه ، حاجبيها المرسومان بحرفيه ، شعرها الأسود القصير ، لقد غيرت من شكله اليوم ، لا أدرى ماذا يسمونه كيرلي؟ لا أعلم ، كل ما أعرفه أنها حقا جذابه .

جلست في سيارتي و أنا أبتسم ، إنها تخرج من الكافيه تركب سياره حمراء ، صحيح الأحمر لونها المفضل ، سياره صغيره حفظتها ، هذه سياره حبيبتي ، وضعت يدي اليسرى على مقود السياره لكن عيني وقعت على خاتم زواجي ، اختفت ابتسامتي و رفعت يدي لأنظر لخاتم زواجي

محمد: مش عارف انا مخي كان فين و انا بتجوز الزفته دي ، لا اهتمام و نضافه و لا جمال ، ليه عملت في نفسي كدا ؟

أخرجت خاتم زواجي من يدي و ناظرته بهدوء

محمد: انت عارف عشان تدخل في صباعي دفعت فيك قد أيه ؟ و عارف عشان تخرج من صباعي هدفع فيك قد أيه ؟

ارتديته مرة أخرى و أنا أخرج زفيرا طويلا ، ناظرت أمامي ، تبا لقد اختفت سيارتها ، كنت انوى أن أعرف بيتها ، حاولت المرور على بيتها القديم و لكني لم أرها ، لقد غيرت مسكنها ، نظرت لخاتم زواجي

محمد: الله يخربيتك ، موقف حالي في كل حته ، حتى البنت الي بحبها حالى واقف معاها بسببك

بدأت بإداره السياره و اتجهت هائما على وجههي من جديد ، حتى وقفت تحت بيتي المشؤوم ، ترجلت من السياره و صعدت للشقه ، أخرجت مفتاحي و فتحت الباب ، وجدت " مها" تجري لي بسرعه و هي مبتسمه ، شفتاها زرقاوتان هي متعبه ، مددتُ يدي حتي أرفعها و آخدها في حضني

محمد: حبيبة بابا ، وحشتيني قد الدنيا

ابتسمتْ و ظهر على ملامحها التعب ، أسندت رأسها على صدري و بدأت أنفساها تتسارع

محمد: بسم الله عليكي ، فين الوجع يا حبيبه بابا ، شاوري على الواوا

أشارت على قلبها و رأسها لا يزال على صدري ، أغمضت عيني بحزن و قبلتُ رأسها ، أقبلتْ على " سيده"

سيده: نورت يا بيه ، أجهزلك الغدا ؟

محمد: اه يا سيده ، هي عزه فين

سيده: الهانم نزلت من بدري

عقدت حاجباي

محمد: نزلت من امتى؟ و راحت فين ؟

سيده: معرفش يا بيه ، انت عارف انا على قد الكلمه معاها

أومأت لها و نظرت " لمها" المتعبه مره أخرى ، أي أم هي تترك ابنتها دون رعايه ، أمسكت هاتفي النقال و اتصلت بتلك المهمله ، أجابت

محمد: انت فين؟

أجابت بهدوء

عزه: عند عليا

محمد: ازاي تخرجي من غير اذني ؟

عزه: عادي يا محمد هي أول مره ؟ ، ما انت كنت بتيجي من برا تلاقيني خرجت من غير ما اقولك

محمد: و كنتِ بتسيبي بنتك لوحدها

عزه: لوحدها أيه مهي سيده معناها

أقسم أنني على وشك الانفجار

محمد: أعمل أيه بسيده ، هي مين أمها ، أفرضي حصل للبنت حاجه

احتدت نبرتها

عزه: في أيه يا محمد ؟

محمد: صوتك ميعلاش ، نص ساعه بالكتير و تكوني في البيت لإما و الله ليكون في تصرف تاني مش هيعجبك

عزه: يادي الجوازه الي جابتلي وجع القلب ، لا مرتاحه وهي راكبه فوق راسي و لا مرتاحه و هي ملتهيه عني

أغمضت عيني و انا أكتم صوتي خوفا على الصغيره الي تنام على كتفي

محمد: أقسم بالله كلمه كمان و هتندمي ، سلام

أغلقت الهاتف و ألقيته على الكرسي بغضب ، جلست و بدأت في تناول الطعام بهدوء ، بدأت اشعر بثقل "مها" على ذراعي ، وضعتها على أرجلى أتأمل ملامحها ، لقد غفت الصغيره ، أنهيت طعامي و أمسكت هاتفي أتابع أحوال شركتي ، الأسهم في انحدار ، مضت ثلاثون دقيقه و سمعت الباب يُفتح ، وقفت أمامي بعد أن ألقت حقيبتها بعصبية و طوقت ذراعها صدرها

عزه: نعم يا محمد ، أيه مش هرتاح بقا من وجع القلب دا

ناظرتها

محمد: وجع القلب ؟

عزه: اه وجع القلب ، كل يوم و كل ساعه شكل على هيافات ، أيه مش عارف تصبر على البنت ساعه ولا اتنين

محمد: يعني انت شايفه ان العيب فيا صح كدا

عزه: شكله الصبح على القميص و سيده كوته و طلعت لك الجزمه ، و شكله دلوقتي عشان خرجت ، في أيه كل حاجه شكل

وضعت "مها" على الكرسي و بجانبها وساده و أقتربت منها

محمد: أنا قرفت منك

صمتتْ و ناظرتني و عيناها على عيناي

محمد: متحمل إهمالك و عدم نضافتك و لسانك الطويل طول الخمس سنين الي فاتو و كله عشان الغلبانه دي ، بعدي غلطات على حساب كرامتى و رجولتي و أقول عشان المركب تمشى ، أما البنت الوحيده الي ربنا رزقني بيها ترميها في حضن واحده مش أمها عشان حضرتك تتفسحي يبقى كفايه أوي كدا

ناظرتني بصدمه

محمد: من بكرا هاخد مها عند ماما و أقعد هناك كام يوم لحد ما أهدى و بعدها ربنا يسهلها

ظلت صامته و لكن أمسكت معصمي لتوقفني عن الحراك

عزه: يعني إيه لحد ما ربنا يسهلها

محمد: يا أطلقك يا تفضلي على عصمتي يا عزه

صمتتْ و تجمعت الدموع في عينها

عزه: تطلقني ؟

ناظرتها بهدوء

عزه: كل دا عشان نزلت مع عليا شويه ؟

أزحت يدها و توجهت للصغيره أحملها لأضعها على سريرها ، دخلت غرفتي و أخرجت ملابس لي ، وضعت هاتفي النقال و محفظتي بجانب السرير ، و دخلت دوره المياه لأستحم

___________________________________

..(طاهر)..

إنها الحاديه عشر قبل منتصف الليل ، أنظر للسقف أفكر ، غدا سأقابلها ، كيف هو صوتها ؟ مسحت على وجههي ، اه تبا يكفى لست مراهقا يا طاهر ماذا بك ؟ هذه ليست المره الأولى التي تتزوج بها ، استقمت و دخلت دوره المياه أغسل وجههي ، خرجت لأرى صوتها " سلمى" زوجتى الاولى رحمه الله عليها ، ابتسمت و ممرت إصبعي على وجهها

طاهر: متزعليش مني يا سلمى ، و الله انت كنت ست الستات و تاج يتشال على الراس ، انا متعود اني أحكي معاكي الي بحسه صح ؟ انا حاسس بحاحات غريبه ، أنا خايف و متوتر ، هي جميله ، جميله أوي يا سلمى ، تفتكري هعجبها لما تشوفني ؟ طب هعجب ولادها ؟ انا قابلت ابنها الكبير ، دكتور في الجامعه بس ولد زوق و محترم ، بنتك مصممه تلبسني قميص وردي ، بنتك هتهزأني في أخر عمرى ، تخيلي كدا العروسه تكون لابسه لبس عادي و انا داخل عليها بقميص وردي ، و الله مسخره

ابتسمتُ و ناظرت ملامحها البسيطه

طاهر: متزعليش مني ، انا بحبك يا سلمي انت مراتي الاولى و عمر ما في واحده هتاخد معزتك في قلبي

وضعت صورتها على الطاوله و فتحت الهاتف أنظر لصورتها تلك " نادره" ، ابتسمت و انا اتأمل ملامحها

طاهر: باين لك اتهطلت يا طاهر على كِبَر ، قاعد بتبص على الصور و تكلمها ، بس هي بجد جميله

أغمضت عيني و أغلقت الهاتف

طاهر: أستغفر الله العظيم ، وبعدين يا شيطان انت الست مش حلالى ، بطل بقا الأفكار الزباله الي بتزرعها في نفوخي دي

نظرت للهاتف و وجهت يدي له لأحاول فتحه مره أخرى ، أغمضت عيني و أبعدت يدي عنه

طاهر: الله يخربيتك يا شيطان

استقمتُ و اتجهت لدورة المياه و توضأت ، وقفت أمام سجادة الصلاه ، رفعت يدي للسماء و انا أناظرها

طاهر: يا رب لو ليا خير فيها تتمه و لو مليش اصرفها عني ، يا رب انا مهما كنت ضعيف متحكمش شيطاني عليا

وجهت نظري لموضع سجودي و بدأت بالصلاه

___________________________________

..(سما)..

ابتهال: و انت بتحبيه؟

نظرت لها و أنا متردده

سما: مش عارفه ، انا برتاح معاه على عكس الي حوليا ، بعمل معاه حاجات محدش في الدنيا ممكن أعملها معاه

ابتهال: زي إيه ؟

ناظرتها و انا أعلم أنها ستنهرني

سما: بصي انا عارفه ان الي عملته غلط بس و حياتي عندك متقوليش لحد لا ماما ولا محمود

ناظرتني بتعجب

ابتهال: و أيه بقا الي عملتيه و خايفه لطنط او محمود يعرفوه

سما: بصي أنا كنت فري معاه شويه

ابتهال: فري ازاي يعني ؟

صمتَتٔ قليلا ثم تداركت ما سمعته ، وضعت يدها على فمها و فتحت عيناها على وسعهما

ابتهال: يالهوي ، اوعي يكون الي في بالي يا سما

سما: لا لا ، و الله ما كدا ، هو عمره ما تجاوز معايا حدوده و انا عارفه حدودي كويس

ابتهال: اومال أيه فري دي

سما: يعني كان يلمس ايدي ، يلمس دراعي كدا

ابتهال: وهو دا بالنسبالك عادي ؟

سما: انا قلتلك اني غلطت ، و فهمته اني مش هسمح بتلامس بعد كدا بينا

ابتهال: طب كويس

نظرت لها قليلا و اقتربت منها ، امسكت معصمها

سما: في حاجه محتاجه اقولهالك

ابتهال: قولى حبيبتي

سما: أنا سِبت الشغل في الإسطبل

ابتهال: ليه ، آخر مره لما كلمتك قولتيلي انك كنت مرتاحه

سما: انا كنت مرتاحه فعلا ، بس حصل حاجه كدا خلتني اسيبه

نظرت لي مستفسره ، و اقتربت مني أكثر ، وضعت يدها اليمنى على ظهري لتفركه بحب

ابتهال: قولى حبيبتي

سما: بس اوعي تقولى لحد ، حتى محمود

ابتهال: لا مهو لو موضوع كبير لازم اخواتك يعرفو ، بلاش محمد على الأقل محمود

سما: خلاص مش هقول حاجه

ابتهال: طيب قولى و ربنا يسهل

سما: اوعديني الأول

مطتْ شفتيها باستسلام

ابتهال: اوعدك

قصصت عليها ما حدث في المزرعه ، ترغرغت عيناي بالدموع وقت تذكري للمساته على جسدي ، ابتسمتُ و أنا أتذكر " حمزه" و لهفته علىّ ، نظرت عيناها و هي تتوسع مع استرسالي في الحديث

سما: لو حد من اخواتي عرف مش هيسكتو ، كفايا عليا جنون حمزه

ظلت صامته تناظرني

سما: انا عارفه اني غلط ، و حمزه حذرني منه بس أنا على قولته غبيه ، انت عارفه اننا ياما شفنا في الشارع الي يقول كلمه و الي يمد ايده ، لو بتحبيني متقوليش لحد

مسحت على وجهها بهدوء

ابتهال: طب انت كويسه دلوقتي

سما: الحمد لله

ابتهال: بصي انت عارفه انك في غلاوه تسنيم اختي ، من ساعه ما اتعرفت على محمود و انت أقرب حد ليا ، بصي حبيبتي ربنا حرم التلامس بين الراجل و الست في اطار غير اطار الزواج عشان هو نوع من انواع المتعه ، انت كبيره و فاهمه كويس جدا انا قصدي أيه

أومأت برأسي مستمعه لها بانصات

ابتهال: ربنا قال في كتابه الكريم 'ولا تقربوا الزنا' القرب هنا بمعني اللمسه و النظره حتى رشه البرفان قرب من الزنا ، و ربنا قال كمان أمر لأمهات المؤمنين ' فلا تخضعن بالقول فيطمع الذي في قلبه مرض' ، تخيلي ربنا أمر أمهات المسلمين الي هم أصلا متحرمين على أي راجل بعد موت سيدنا النبي صلى الله عليه و سلم عشان خايف عليهم لحسن حد يطمع فيهم او يشتهيهم ، ما بالك بقا بينا أحنا و انت عارفه الرجاله خيالهم واسع و كل حاجه الضعف ، الضحكه و اللمسه ان مطمعتش حمزه فيكِ طمعت الزفت التاني دا ، طب حمزه و طلع راجل و خاف عليكِ و دخل البيت من بابه ، غيره مش كدا

نظرتُ لها بهدوء و أشعر أنني عاريه ، زوجه أخي التي تصغرني بثلاث سنوات تكلمنى بحكمه ، بل تعطيني دروساً أخلاقيه ، خجلتُ و أخفضتُ نظري عنها ، أمسكت وجنتاي بكلتا كفيها و رفعت بصري لها

ابتهال: اوعي تتكسفى ، إحنا عيله واحده و سعادتك و راحتك من راحه محمود ، و انا بحب أخوكِ و بحب أريحه

ابتسمتُ و أقتربت منها لأضمها بين زراعاى

سما: ربنا يخليكِ ليا يا ابتهال ، مش عارفه من غيرك كنت عملت أيه

ابتهال: كنت رحتى مالطه ، يلا يا ست سما أخوكِ زمانه جاي و معاه الفشار و اللب و الحركات ، قومي يلا خلينا نجهز عده الحفله ، أخوكِ واخد أجازه بكرا أخيرا

ضحكتُ عليها ، ناظرتها بحب و ابتسمتْ ، إنها الزوجه المثاليه "لمحمود" يستحقها و تستحقه

___________________________________

..(محمد)..

أمسكتُ هاتفي لأرسالها ، دقايق حتى ردت على

سهام: صباح النور يا محمد ، اه الدكتور موجود ، تعالي في أي وقت

ابتسمتُ و بدأت نبضات قلبي تزداد ، سأراها اليوم مره ثانيه ، سأراها و هي تعمل ، بل ستتعرف على "مها" ، ستكون أول خطوه في دخولها حياتي ، إذا تقبلت "مها" كل شئ بعدها يُحل

محمد: طيب ساعه بالكتير و هكون عندك

سهام: ان شاء الله

أغلقتُ الهاتف و بدأت أُنجز بعضا من عملى الذي أهملته في الأيام الماضيه ، مرت نصف ساعه و عقلي و قلبي مشعان بالطاقه ، لفتت نظرى ورقه بين الورق أمسكتها و بدأت بقراءتها بهدوء ، عقدت حاجباي ، و أمسكت الهاتف و اتصلت بمدير مكتبي

محمد: تعالى يا أمير

دخل "أمير" علىّ ، مررت له الورقه

محمد: دا إيه دا ؟

نظر للورقه بتمعن و أعاد النظر لي

أمير: معرفش

محمد: يعني أيه متعرفش ؟ اومال مين الي يعرف

أمير: حقيقي معرفش ، أكيد حاجه شبه كدا لو أعرفها مش هسيبها تطلع للعلن كدا

محمد: انت عاوز تفهمني ان في عميل عامل قضيه على الشركه و انت متعرفش؟ ما طبيعي الأسهم تبقى في النازل

أمير: انا هشوف الموضوع دا يا فندم

خرج أمير و نظرت للورقه مره أخرى ، تكاليف محامي الشركه في الأشهر الماضيه كثيره ، لا نعطى هذه المبالغ إلا في حاله القضايا بالغه الصعوبه ، أمسكت الهاتف و هاتفت المحامي

محمد: حالا تكون عندي و معاك كل القضايا الي ماسكها للشركه

أغلقت الهاتف و انتظرت دقائق حتى دخل على المحامي ، جلس أمامي و على جبينه قطرات العرق التي توحى بتوتره

خالد: دي كل القضايا الي شغال عليا يا محمد باشا

محمد: اخر قضيه شغال عليها أيه ؟

خالد: قضيه التسمم

فتحت عيناي في صدمه

محمد: تسمم؟ تسمم أيه مين الي اتسمم

رفع نظاراته الطبيه بهدوء

خالد: هو حضرتك متعرفش ؟ استاذ على لسه مقالكش؟

عقدتُ حاجباي و كورت يدي بشده حتى إبيضت

محمد: انطق

ابتلع لعابه بتوتر و أومأ برأسه

خالد: من ٤ شهور استلمنا محضر إن في راجل عامل قضيه على الشركه بسبب حاله تسمم لمنتج من منتجاتنا ، استاذ على قعد معاهم و حاول يمشيها بهدوء و يديه قرشين و يسكت ، اتفقو انه هياخد ٢٠ ألف و هيسكت ، بعدها بأسبوع لقينا محضر تاني من نفس الشخص و الموضوع كبر و بقا فيه تحاليل و اثباتات بالصوت و الصوره على واقعه التسمم ، اتدخلت وقتها و بدأت أمشي الدنيا بس الراجل غريب جدا و كل ما أحاول اسكته ألاقيه قامله قومه تانيه ولا أكن حد واقف وراه بيسنده

محمد: كل دا و انا معرفش ؟

خالد: يا فندم حضرتك وقتها كنت مختفي بسبب عمليه بنت حضرتك و قعدت شهر مبتجيش الشركه ، غير كدا استاذ على أصر عليا أنى مقولش لحضرتك أي حاجه نظرا لحالتلك وقت عملية بنتك ، أنا و استاذ على شغالين و الله مش بننام ، بس الراجل دا انا متأكد ان وراه حد و حد تقيل بيقويه

محمد: القضيه دي حد عرف بيها من أصحاب الأسهم

خالد: أضمنلك أن محدش طلع حاجه من عندنا ، بس ممكن يكون طلع من النحيه التانيه

مسحتُ على وجههي بغضب

محمد: الموظفين الي بتمشي دي بتمشي بسبب القضيه

خالد: انا دورت في الموضوع دا و عرفت انهم جالهم عروض تانيه افضل في شركه منافسه ، و الغريب ان الشركه دي مش بتركز غير على موظفينا بس

محمد: بيضربو من تحت الترابيزه

خالد: بالظبط كدا

أرحتُ ظهري على الكرسي بقله حيله ، و أغمضتُ عيني

محمد: الأسهم لو قلت أكتر من كدا الشركه هتفلس ، لازم نلحق الموضوع

خالد: متقلقش يا فندم ، محلوله ان شاء الله

أومأت برأسي و أشرت له أن يخرج ، أغمضت عيني بتعب و رأسي يفكر في حل لهذه المعضلة الكبيره ، ناظرت الهاتف

محمد: خلاص انسى دلوقتي ، قابلها و روق و ان شاء الله تتحل

أمسكت الهاتف و فتحت صورتها على تطبيق المراسله

محمد: قعدت معاكي يوم ، الدنيا بدأت تفتح في وشي و أعرف راسي من رجلى ، أومال لو صحيت من النوم لقيتك جنبي حياتي هتبقى عامله ازاي ؟

استقمت و خرجت لبيتي حتى أخذ الصغيره و اتجه للمشفى

___________________________________

..(رودينا)..

وقفت أمام المرآه اتأمل ملابسي ، هل يا ترى جميل أم أغيره؟ ، سمعتُ طرقات الباب و دخل سامي على

سامي: انت معندكيش محاضرات و لا أيه ؟

رودينا: عندي واحده بس النهارده ، عندي أناتومي ماده مقرفه و رزله و غلسه

سامي: دا نوع دوا دا و لا أيه

ضحكتُ و أشرتُ على كتاب كبير على مكتبي

رودينا: التهمه الي هناك دا

سامي: اللهم أعفينا ، يعني مش هوصلك النهارده؟

رودينا: لا

سامي: طيب ، انا همشي عشان ألحق أرجع قبل معاد بابا

رودينا: سامي

ابتسم بحب

سامي: نعم يا قلب سامي

رودينا: بابا مش هيتغير لما يتجوز صح ؟

اقترب مني بابتسامه هادئه و مسح على شعري ، قَبّل مقدمه رأسي

سامي: انت حبيبته الاولانيه ، استحاله هيفاضل حد عليكِ

أخفضتُ عيني و امتلأت عيني بالدموع ، رفع وجههي له

سامي: طب بتعيطي ليه دلوقتي بس

رودينا: هتيجي واحده تانيه تطبخله و تأكله و تهزر معاه ، معدش هيكون ليا لازمه في حياته

مسح دمعاتي المتفرقه و ابتسم

سامي: بابا راجل يا رودينا ، محتاج يتجوز ، مهما كِبِر هو محتاج زوجه تعفه و يعفها ، مكانتك في قلبه مختلفه عن مكانه الست الي هيتجوزها ، بابا مش عيل صغير ، بابا عارف كويس جدا ازاي يوازن بين حياته و بينك

ضربني برفق على ذراعي

سامي: وبعدين يا خربيت أم كئابتك يا شيخه ، هو لسه قعد معاها اصلا عشان تفرضي انه اتجوزها ، يالهوي على الكئابه

ضحكتُ بخفوت و وضعتُ رأسي على صدره ، حاوت جسدي بذراعيه و قبل مفرق شعري

رودينا: انا حاسه انه هيتجوزها

سامي: بصراحه لو متجوزهاش يبقى معندوش نظر

ضربت ضهره بقبضتي

رودينا: اتلم ، دي هتبقى مرات بابا

ضحك و مرر يده على ظهري بحنان

سامي: متخافيش ، مراتي ماليه عيني ، وبعدين ايديها تقيله أوي

ضحكتُ بشده و سمعت ضحكاته معي ، ناظرني في عيناي

سامي: خدي بالك من نفسك يا رودينا ، انت وصيه ماما الله يرحمها و عمر ما حد فينا هيجي عليكي و لا هيزعلك ، خديها قاعده

ابتسمتُ و قَبّلتُ وجنتاه ، ابتسم

سامي: يلا يا أم عشرين سنه هتأخر على المجرمين بوتعي ، بحب أصبح عليهم كل يوم

___________________________________

..(أسماء)..

وقفتُ أناظر بطني التي ظهرت بحب ، ابتسمتُ و بدأت في لمسها بهدوء

أسماء: حبيب قلب ماما ، ربنا يخليك ليا و ميحرمنيش منك أبدا

سمعتُ هاتفي ذهبتُ إليه و أجبت

أسماء: أيوا حبيبي

عادل: أخبار المسكر إيه

أسماء: المسكر واحشها جوزها

عادل: طب اجهزي هعدي عليكي كمان ساعه

أسماء: بجد ، و شغلك

عادل: أخدت نص يوم النهارده ، يلا بس

أسماء: طب هنروح فين

عادل: هنتغدى برا النهارده و نطلع على طنط علطول

صمتُ قليلا و أنا أتذكر ميعاد اليوم ، اليوم سنجلس مع زوج أمي المستقبلي

عادل: ألو رحتي فين

أسماء: معاك

عادل: طب يلا ، عاوز نجيب لطنط حاجه هديه صغيره

ابتسمت

أسماء: أنت افتكرت جدتك الله يرحمها

سمعتُ أنفاسه التي تدل على أخذه لشهيق كبير

عادل: وحشتني أوي يا أسماء

أسماء: يبقى نزورها قريب إن شاء الله

عادل: إن شاء الله ، المهم إلبسي حاجه سهله كدا و خدي معاكي لبسك عشان هنغير عند طنط ، ممكن تجهزيلي الطقم الي بتحبيه

ابتسمت

أسماء: عنيا حاضر ، حاجه تانية

عادل: تسلم ايدك و عنيكي ، متتعبيش نفسك ماشي

أسماء: حاضر

عادل: باي مؤقتا يا مسكر

أغلقتُ الهاتف و مبتسمه ، ناظرتُ وجههي في المرآه

أسماء: هو خلاص أمر واقع ، مشي الدنيا اذا كان جوزك ذات نفسه مش مدايق هتشيلي هم حماتك ؟

فتحتُ خزانه الملابس و أخرت منها ملابسي و ملابس " عادل" و بدأت في وضعها في الحقيبه ، ناظرتُ الهاتف متردده ، أغمضتُ عيني و أمسكته اتصلتُ بأمي

أسماء: إزيك يا ماما

أجابت بصوت خافت دل على حزنها

نادره: الحمد لله يا أسماء ، أخبارك أيه يا حبيبتي و أخبار حملك

أسماء: انا كويسه يا ماما

صمتُ قليلا و ترددت في الحديث حتى قطعت صمتى

نادره: أخبار جوزك أيه

أسماء: كويس الحمد لله ، هنجيلك النهارده يا ماما ان شاء الله

نادره: تنوري بيت أبوكي حبيبتي

ابتلعت لعابي

أسماء: سامحيني يا ماما

صمتتْ قليلا ثم أجابت

نادره: على أيه ؟

أسماء: على قله أدبي يوم التجمع ، انا عارفه اني كنت قليله الادب يومها

نادره: ممكن أسألك سؤال و تحاوبيني بصراحه ؟

أسماء: طبعا يا ماما

نادره: بتحسي بإيه و انت نايمه في حضن جوزك

أسماء: أيه السؤال دا يا ماما ؟

نادره: هو أنا مش من حقي يتقفل عليا باب انا كمان ؟

صمتُ و قد آلمني قلبي من كلمتها

نادره: مش من حقي أحس بنفس أحاسيسك و انت نايمه في حضن جوزك ؟

أسماء: حقك عليا يا ماما ، زعلك فوق راسي

نادره: ماشي يا أسماء ، خدى بالك من نفسك و بالراحه و انت بتتحركي عشان حملك

ابتسمتْ ، مهما كانت هي أمي تحبني و تخاف علىٌ أكثر من نفسي

أسماء: حاضر يا ماما ، و انت يا عروسه روقي كدا مش عاوزين العريس يطفش من أولها

سمعتُ ضحكاتها

نادره: ماشي يا أروبه انت ، مستنياكي معايا

أسماء: عنيا ليكي يا ماما

___________________________________

..(حمزه)..

وقفتُ أمام المُهرةِ الصغيره أعانينها ، و معي أطباء آخرين ، كلما أنغمس في العمل ألتفت لأمازح "سما" ولكني أتذكر انها ليست هنا ، تلك الشقية احتلت تفكيري ، خرجت أستنشق بعض الهواء و إذا بي أرى ذاك المتحرش ، أقتربتُ منه راسماً على وجههي ابتسامةً بسيطه

حمزه: ازيك يا استاذ بندر

نظر لي و أومأ برأسه ثم نظر للهاتف مرة أخرى ، هكذا إذا " سما" من كانت تجذبك أيها المنحرف

حمزه: استاذ بندر

نظر لي متاففاً

بندر: ايش تبغى

حمزه: كنت عاوز أجازه

رفع حاجب من حاجبيه

بندر: لا ما في ، الإسطبل يحتاجك الحين

حمزه: الموضوع مهم مينفعش يتأجل

نظر لى بعدم اهتمام ، أهذا الذي كان يتلون حتى يصل لعزيزتي؟

بندر: ايش تبغى؟

حمزه: هروح أتقدم للبنت الي بحبها بكرا ، فمحتاج أجازه

نظر لي بندر باهتمام و ابتسم ابتسامه جانبيه

بندر: جد ، الله يتمم بخير ، بس ليش تبغى أجازه بدل شيفتك

حمزه: لا مهي بعيده عن القاهره

عقد حاجباه باهتمام ، أكملتُ و أنا أرى ملامحه المتهجمه

حمزه: هروح أتقدم لدكتوره سما في المنصوره

نظر لي بصدمه ظاهره على وجهه ، ابتسمت و أنا أعرف أنني قد فجرت قنبله في رأسه الآن

حمزه: مش هتقولى ألف مبروك ولا إيه؟

ابتسم مجبر ليجاريني

بندر: ألف مبروك ، ان شاء الله يتمم بخير

حمزه: ان شاء الله ، المهم حضرتك موافق على الأجازه؟

بندر: أيه ان شاء الله

ابتسم لي

بندر: فيك تحضر أنت و دكتوره سما ان شاء الله بعد ما تطلب يدها

حمزه: هو دكتوره سما مبلغتش حضرتك؟

نظر لى باستفسار

حمزه: هي بلغتني أنها هتسيب الشغل ، أصل في كلب هنا اتعرض لها ، لو تقولى بس مين و الله لأفرمه

اصفر وجهه و ابتسم يخفى توتره الذي ظهر

بندر: مين الحيوان الي يتعرض لدكتوره سما ، كيف يحصل شي زي كذا ، هذا مكان عمل

اقتربتُ منه و ابتسمتُ بخفوت

حمزه: هو حيوان فعلا ، الي يسمح لنفسه أنه يمد إيده على جسم واحده تحرمله و يستحلها غصب و شهوته تتحكم فيه يبقى حيوان فعلا

نظر لعيني و أومأ برأسه ، ابتسمتُ بات يعرف أنني أعرف كل شي

حمزه: أنا مش هسكت لحد ما أخد حقها من الحيوان الي لمسها ، و قريب إن شاء الله

بندر: إن شاء الله

أدار وجهه و ابتسمتْ ، ظللت أناظره حتى اختفى أثره

حمزه: حيوان و قليل الأدب ، أصبر عليا يا بندر و الله لأسويك

___________________________________

..(محمد)..

وقفتُ أناظرها و هي تفحص صغيرتي "مها" ، ملامحها جاده للغايه ، بجانبها الطبيب " بدير" اه لا تعلم كيف حاولت أن أصل لك ، يتحدث معها و يناقشها في كل شئ يراه ، نظرت ليده انها فارغه لا يرتدي خاتم زواج ، هذه خطوره هل هو أعزب ؟ أم متزوج و لا يرتدى خاتم زواجه ، يتكلم معها بألفه ، ماذا بي إنه يكبرها بما لا يقل عن عشر سنوات ، ولكنه لايزال رجل ، و فاتنتي فاتته ، ترتدي قميص سماوي بفتحه صغيره تبرز عنقها ، أستطيع أن أرى شامتها التي على مقدمه صدرها ، كورتُ يدي هل يرى الجميع شامتها ؟ هل يتأملون جسدها هكذا ؟ ، ظللت أنظر ليديها و حركاتها الرقيقه حتى قاطع تفكيري الطبيب

بدير: استاذ محمد ، مها هتبقى كويسه ان شاء الله ، هنحتاج بس شويه تحاليل و إيكو و رسم القلب و وقتها نبقى نحدد

ابتسمتُ و أنا أشعر بالاطمئنان

محمد: إن شاء الله ، ربنا يبارك فيك يا دكتور

بدير: العفو دي وظيفتي ، كله عشان دكتور سهام ، لولا غلاوتها هي عارفه ان وقتي مزحوم

ابتسمتُ و أنا أشعر بالنار في صدرى ، يغازلها و أمامي

سهام: شكرا يا دكتور لزوقك و الله ، حضرتك معروف عنك إنك صاحب واحب مع كل الطلبه كلهم

أحسنتِ يا فاتنتي  صديه ، ابتسم الطبيب و خرج بهدوء ، بدأت تساعد "مها" في إرتداء ملابسها العلويه ، أرى شامتها بوضوح عندما تنحنى ، يكفى انحناءاً يا فتاه يكفى

محمد: أنا هلبسها انا

نظرت لي و عقدت حاجبيها

سهام: طيب تمام ، انا برا لو احتجت حاجه

بدأت في التحرك ولكني وقفت أمامها بسرعه

محمد: لحظه متخرجيش

نظرت لي بهدوء

سهام: محتاج حاجه؟

محمد: ممكن تقفلى البالطو عليكي؟

عقدت حاجبيها و نظرت لمئزرها الطبي

سهام: نعم؟

محمد: صدرك كله باين

أمسكت طرف القميص لتغلقه باستنكار

سهام: و انت بتبص على صدرى ليه مش فاهمه ، انت كنت مركز في الكشف ولا في صدرى

اقتربت منها و عقدت حاجباي ، تكلمت ببطء و صوت هادئ كحفيف الأفعى

محمد: مهو لو الدكتوره واخده بالها إن الحسنه الي تحت رقبتها على أول صدرها بتبان مع الحركه كنت عرفت أركز في الكشف

رأيتُ الحمره على وجهها تتجلى ، لم أرها يوما تخجل إنها المرة الأولى ، تبدو جميله ، عينها تلمعان و وجنتيها تشتعل بالحمره ، تقطم شفتيها من الداخل ، اه يكفى عقلي يفكر بأفكار منحرفه الآن ، أغمضت عيني أحاول أن لا أنظر لها كي أتجنب أن أفعل شيئا يؤذيني و يؤذيها ، فتحت عيني حين سماع صوتها يعلو بغضب

سهام: على فكره انت ملكش حق تحاسبني أو تعلق على لبسى ، أنا عارفه حدودي كويس جدا ، كون إنك راجل قليل الأدب دي مش مشكلتي

قالت كلماتها و خرجت بسرعه دون أن تترك لي فرصه في الرد عليها ، ابتسمتُ و حركتُ رأسي يمينا و يسارا ، اقتربتُ من "مها" و بدأت في تنظيم ملابسها

محمد: بنت المجنونه هتطيرلى عقلي

مرت دقائق حتى خرجت من الغرفه و الصغيره على كتفى ، التفت يمينا حتى أراها ، ابتسمتُ عندما رأيتها قد بدلت ملابسها ، ترتدي قميصاً وردي اللون و قد أغلقته حتى لا يظهر من جسدها شئ ، رفعت عينها في عيني و أنا أرى الغضب في عينيها ، لا يهم المهم أن لا أحد يرى شامتها غيري

محمد: هي لسه هتطيره ؟ هي  طيرتلى عقلي خلاص

ابتسمتُ و أومأت لها كنوع من أنواع الوداع ، و خرجت من المشفى و أنا أشعر بفراشات في بطني ، بدأت بالضحك بصوت عالٍ و أنا أتذكر ملامحها

محمد: ياخربيت حلاوتك يا شيخه
___________________________________

..(نادره)..

انها السادسه مساءاً ساعه و سألاقيه ، أشعر بالتوتر ، البيت مليء بالأشخاص ، "أمنيه" "عصام" "ابتهال" "محمود" "سما" "أسماء" "محمد" "عزه" ، جميعهم معي ، معدتي تؤلمنى ، دخلت "أمنيه" و ناظرتني بتمعن

أمنيه: جاهزه يا عروسه

نادره: لا مش جاهزه ، أنا متوتره جدا يا أمنيه ، بطني واجعاني و حاسه أن ضغطي هيوطى في أي وقت

أمنيه: إيه دا في إيه يا نادره ، مش للدرجادي مش هياكلك يعني

نادره: معرفش ، أنا خايفه أوي

أمنيه: ولا خايفه ولا بتاع بطلى عبط ، محمد عاوز يتكلم معاكي بس محرج يدخلك ، فصدرني أقولك

نادره: دخليه يا أمنيه و اقفلى الباب وراكي لو سمحتى

أومأت برأسها في سعاده ، خرجت لتنادي "محمد" ، دخل بهدوء و ناظرني ، أرى عيناه تملؤها الندم ، صغيري أهانني و جعل مني أضحوكه أمام إخوته و زوجته و زوج أخته ، أغلقت "أمنيه" الباب و نظر لى بهدوء ، ابتسم

محمد: أيه الحلاوه دي يا ست الكل

ناظرته بهدوء و لم أتحرك قيد أنمله ، زالت ابتسامته و اقترب مني ، أمسك بيدي و قَبّلَها

محمد: حقك عليا يا ماما ، انا اسف

ناظرته بهدوء و لم أعلق

محمد: بالله عليكي ما تسكتى كدا ، أنا من غير دعواتك و رضاكي عني تايه

صمتُ أناظر عينيه ، صغيري عيناه تدمعان ، لم أرى دموعه منذ مده ، رقّ قلبي له ، رفعت يدي و وضعتها على وجهه أتحسس لحيته

نادره: هُنت عليك يا محمد

سقطت دمعه ساخنه على كفي

محمد: يتقطع لساني ، أنا آسف ، أنا بس كنت غيران عليكي

نادره: وهو الي بيغير على حد بيجرح فيه يا محمد

محمد: اقلعي جزمتك و اضربيني بيها ، انا استاهل ضرب الجزمه

سقطت دمعه أخرى على وجنته ، مسحتها بيدي اليمنى

نادره: أنت راجل كبير و عارف أني محتاجه حد جنبي صح

محمد: عارف بس الفكره صعبه عليا ، تخيلك مع حد تاني بيموتني

نادره: و هو باباك الله يرحمه لو كان مع واحده تانيه مكنش هيموتك؟ هو أنا مليش حق أنام في حضن راجل يحافظ عليا و يحبني يا محمد؟ ليه دايما شايف إن الستات ملهمش حق في طلباتهم ، ليه حلال للراجل يتجوز و يطلق مره و اتنين و تلاته و حرام على الست ؟ مش الصحابه كانو يجرو يتجوزو الأرمله و المطلقه عشان يحموها و يعفوها ، عاجبك مامتك و الرجاله يتمحكو فيها يا محمد ؟

اقترب مني و احتضنني

محمد: أبدا ، دا أنا أمشى أدبح فيهم واحد واحد يا ماما ، سامحيني عشان خاطري ، أنا آسف

وضعت يدي على ظهره و مررتها بحنان

نادره: مسامحاك يا حبيبي ، انت ابني الكبير نِنْ عيني ، مقدرش أزعل منك

بدأ بالبكاء ، "محمد" يبكي ؟ هذا لا يصدق ، عقدت حاجباي

نادره: محمد انت كويس يا حبيبي ؟

حاولت الخروج من أحضانه و لكنه ثبتني رافضا أن أتحرك ، تكلم بنبره مهزوزه

محمد: خليني في حضنك يا ماما ، أنا محتاجك أوي

نادره: طب في أيه يا محمد ، قول يا حبيبي مالك

ظلّ في حضني قليلا ثم ابتعد عني يمسح دمعاته ، أقتربت منه مرتبةً على ظهره ، ابتسم و نظر في عيناي

محمد: أوعدك هاجي و أقولك كل حاجه ، بس مش دلوقتي

ابتسمتُ و قلبي ينفطر ، فلذه كبدي مهموم و لا أعرف كيف أُداويه

نادره: ماشي حبيبي 

سمعتُ صوت ضحكات "سما" و ابتسمت

نادره: انت عارف إن سما أتقدم لها عريس

ابتسم

محمد: أيه دا في إيه ، العيله كلها بتتجوز في نفس الوقت

ضحكتُ ، أضاف لي مبتسماً

محمد: مين الي أمه داعيه عليه دا

نادره: دكتور زميلها في الاسطبل ، بس شكله ابن ناس و محترم

محمد: مليش دعوه بالشكل يا ماما ، دي سما مش أي حد ، عرفتي منين

قصَصّتُ عليه ما حدث ، ظل يستمع لي باهتمام بالغ حتى ابتسم

محمد: بنت الايه موقعه راجل ابن ناس

نادره: أخوك محمود كان هيكلمك يعرفك كل حاجه النهارده ، هو إدى للراجل معاد بكرا و عاوزك معاه تتعرف عليه ، ولا أكني عرفتك حاجه ها

ابتسم و أومأ برأسه بهدوء

محمد: عنيا يا ماما ، يلا يا عروسه مش عاوزين نتأخر من أولها زمان العريس وصل

سمعتُ كلماته و تملكنى الخوف ، شعرتُ بمعدتى تؤلمني مرة أخرى ، ابتسمت مجارية و الخوف يتملكني ، خرجنا من الغرفه و استقليت سياره "سما" ، انظر للشوارع و أفكر بالمجهول ، ودعتني "أمنيه" و هي تلقى على وابل النصائح و تطلب مني عدم التوتر ، أقسم أنني لم أكن بهذا التوتر عندما تزوجت للمره الأولى ، بدأنا بالتحرك حتى استقرينا أمام مكان اللقاء ، ترجلت من السياره و تحركتُ محاطة بأولادي الأربعة و أزواجهم ، أشعر بالأمان بجانبهم ، لحظات حتى وجدت رجلا طويلا يقف أمام"محمود" و يسلم عليه بحراره  ، سلم على "محمد" و أومأ برأسه لكلٍ من "سما" و "أسماء" ، تلاقت أعيننا ، عيناه بنيتان كبيرتان ، زادت نبضات قلبي ، معدتى تؤلمني ، ابتسمت له ببلاهه ، خرقاء أتبتسمين للرجل من أول نظره ، ما سيقول عني الآن ، أخفضتُ عيني في خجل ، مهلا إنه يرتدي قميص وردي ، ناظرت فستاني ، رفعتُ عيني عليه مره أخرى ، ما هذه المصادفه ؟ ، ابتسم لي

سامي: اتفضلو تعالو

جلسنا بهدوء و أنا بين أبنائي ، أنظر له خلسه ، ما الذي أفعله أأنا مراهقه ؟

رودينا: إزيك يا طنط

رفعتُ عيني لمصدر الصوت ، فتاه عشرينيه جميله بحجاب مهندم و ابتسامة هادئه ، أحاول الرد عليها و لكن صوتي لا يخرج

سما: لا طنط أيه ، قوليلها يا نونه

رأيت "محمد" يوكز "سما" في ذراعها ، ابتسمتُ

نادره: قولى الي تحبيه يا سكره ، عاوزه تقولى طنط قولى ، عاوزه نادره قولى براحتك

ابتسمت الأخرى ، تبدو فتاه مليئه بالطاقه ، تذكرني بالمجنونه "سما"

رودينا: ماشي يا نونه ، أنا رودينا ، عاوزه تناديني رودينا رودي رورو الي يعجبك

ضحكتُ بخفوت و ظهرت غمازتيّ

رودينا: الله انت ضحكتك أحلى كتير من الصوره

شعرتُ بالدماء تتجمع في وجنتيّ ، ابتسمتُ في حرج

سامي: أنا سامي وكيل نيابه ، عندنا كمان عمر بس معرفش ينزل بسبب شغله ، كان نفسه يتعرف على حضرتك جدا

نادره: أهلا بيك يا سامي ، ان شاء الله اتعرف عليه قريب

سامي: إن شاء الله ، الرغايه دي لسه في الجامعه ، بتدرس طب فمخها لاسع

ابتسمتُ

نادره: ما شاء الله ، سما بنتي دكتوره بردو ، هي شغاله في اسطبل كبير في القاهره

محمد: أنا محمد انا و محمود توأم بس مش شبه بعض في أي حاجه خالص ، انا صاحب شركه 'suger' للمنتجات الغذائيه ، ودي عزه مراتي و الصغيره مها بنتي

طاهر: ما شاء الله ربنا يباركلك ، دا انت منتجاتك مكتسحه السوق كله ، بصراحه جوده و سعر ممتازين

ابتسم "محمد" ولكن ابتسامته ليست كالمعتاد ، صغيري يحمل في قلبه هماً كبيراً

محمود: انا محمود ، استاذ مساعد في كليه علوم جامعه المنصوره و دي ابتهال مراتي

طاهر: اهلا بيك يا دكتور ، أنا طاهر مستشار مالي عندي شركه للاستشارات الماليه

بدأت الأحاديث بين الشباب و أنا أناظرهم بابتسامه ، صغاري يبدو عليهم الراحه ، أولاده مهذبون ، تجولت عيني على وجوه الجميع حتى تلاقت عيناي مع عيناها للمره الثانيه ، تنظر لي بابتسامه خفيفه
___________________________________

..(طاهر)..

جميله ، أقسم أنني على وشك أن أغازلها ، كيف لسيده جميله مثلها أن تكون عزباء طيله عشرين عاما ؟ ، ولِمَ لا هي عزباء لأتزوجها أنا ، مهلا ماذا بي ؟ لم تقل إن كانت موافقه علىّ أم لا ، لم تتكلم حتى

سامي: طيب تحبو شربو إيه

محمود: لا أبدا عليا أنا

سامي: بس يا دكتور تحبو إيه

محمد: اسمع الكلام يا سياده الظابط خليها علينا المرادي

سامي: و الله ما هيحصل ، و بعدين هو انا لما أعزم اخواتي و مرات بابا يبقى فيها عيب؟

ناظرته بهدوء و ابتسمتْ يعرف كيف يقنع الآخرين ، شاهدتُ الابتسامه على وجوه الحاضرين و من بينهم هي ، غمازاتها ستقتلني

سامي: قولى يا نونه تحبي تشربي إيه

ابتسمت و قد ظهرت حمره على وجنتيها زادت من لطافتها

نادره: على زوقك يا سامي ، شوف انت تحب إيه

سامي: طيب طالما على زوقي بقا يبقى أجيبلك انت و بوب اتنين لمون عشان ترتاحو و انتو بتتكلمو مع بعض

ابتسمتْ بخفوت ، نظرت أبناءها الرجال

طاهر: تسمحولى اتكلم مع والدتكم شويه

محمود: أكيد إتفضل

وقفتُ و ناظرتها تقف و ابنها "محمود" يمسك يدها بحب ، أهي خائفه؟ قبلها على رأسها ليطمئنها ، مهلا هي خائفه حقا ، هل شكلى مخيف؟ ، وقفتْ أمامي مبتسمه مددتُ يدي أوجهها لطاولةً بعيدةً نسبياً عن طاولتهم ، جسلتْ أمامي بهدوء و جلستُ أمامها ، ظلت صامتةً لثوانٍ حتى قطعتُ الصمت

طاهر: فستانك لونه جميل

ابتسمتْ و نظرتْ في عيناي

نادره: شكرا ، و قميصك كمان لونه جميل

ناظرت قميصي و ابتسمتُ ، شكرا لك رودينا

طاهر: رودينا بنتي صممت أني ألبس الوردي على البدله

نادره: زوقها حلو أوي ، الكحلى مع الوردي شكله جميل ، ربنا يخليهالك

طاهر: انت الي عيونك جميله

ناظرتني بهدوء و ابتسمتْ

نادره: أحنا ناس كُبار يا استاذ طاهر ، و أعتقد أننا واعيين كفايه عشان نتكلم بكل هدوء و عمليه

طاهر: أكيد ، بس ممكن بلاش أستاذ دي !

نادره: صحيح أنا اسفه سياده المستشار

ضحكتُ بهدوء

طاهر: لا مش قصدي ، انا اسمي طاهر ، طول ما أنا برا الشغل اسمي طاهر ، ربنا خلقنا سواسيه محدش له إنه يتنطط على حد بسبب لقبه ، تسمحيلي أقولك نادره؟

ابتسمتْ و ظهرت غمازاتها ، أومأت برأسها و قد رأيت ملامحها تبدأ بالارتياح

طاهر: أنا هكون صريح معاكي ، عارف إن مش أفضل حاجه أتكلم عنها هي مراتي الاولانيه ، و لكن بيها فضل كبير مقدرش انكره ، أنا زوجتى الأولانيه اتجوزتها صالونات مكنتش أعرفها ، بس كانت بنت أصول و فضلت جنبي في أسوء ظروفي ، خلفت منها عيالي التلاته و الحمد لله ربتهم أحسن تربيه ، مقدر عشرتها بس محبتهاش ، أنا عمرى ما جربت الحب

ظلت تسمعني بانصات

طاهر: عيلتي كانت على قد حالها ، و أتربيت إن الراجل راجل مسؤول عن نفسه ، فمن وأنا صغير بشتغل ، اتخرجت بتقدير كويس و بنيت نفسي بنفسي من الصفر ، يعني عارف قيمه كل قرش طالع و داخل ، أنا حريص مش بخيل

ابتسمتْ و أومأت برأسها

نادره: هو دا الصح ، الحرص أحسن حاجه ، خير الأمور الوسط

طاهر: و انت؟

نادره: أنا اتجوزت زوجي الله يرحمه وانا صغيره يادوبك اتخرجت من الجامعه اتجوزته ، بردو جواز صالونات ، كان راجل محترم و ابن أصول بس أهله كانو صعبين شويه ، دا كان العيب الوحيد الي فيه ، بعد ما خلفت سما بحاجه بسيطه استقبلت مكالمه من زميله انه عمل حادثه و مات ، كنت وقتها ٢٨ سنه بالظبط اترملت و انا على مشارف ال٣٠ لقيت نفسي مسؤوله عن ٤ عيال ، اشتغلت و عملت مشروع شموع صغير كدا جنب شغلي يساعدني في مصاريفهم ، و الحمد لله كبرو و اتجوزو و خلفو كمان

طاهر: مشروع شموع ؟ دا انت بتعمليها ؟

نادره: اه ، البلكونه بتاعتي قفلتها عشان تبقى مشغل صغير ، و انا اصلا بحب الشموع و اشكالها و ألوانها و روايحها الكتير  ، فقررت أعمل شموع و أبيعها

طاهر: ممتاز ! طيب و عندك براند بقا و كدا

ضحكت

نادره: لا لا مش للدرجادي ، أنا بعمل لزمايلي في الشغل ، جيراني ، للمحلات القريبه مني ، متطورتش للدرجادي ، كنت بعافر في الوقت عشان أربي عيالي و اصرف عليهم في نفس الوقت

طاهر: طيب لو مش هيدايقك السؤال يا نادره ، ليه متحوزتيش و انت صغيره؟

نادره: اتقدملى ناس كتير أوي ، بس كلهم كانو شارطين أسيب العيال عند ماما الله يرحمها ، محدش هيقدر على مسؤوليه ٤ عيال مش من دمه ، عيالي أولى مني فالكفه طبت نحيتهم

ابتسمت ُ و انا أستمع لها

نادره: ومش ندمانه ، كفايا اني عارفه اني ربيتهم أحسن تربيه و وصلت كل واحد فيهم لبر الأمان ، لسه سما ربنا يرزقها بابن الحلال

طاهر: ان شاء الله

سامي: اتنين لمون و صلحه للبوب و نونه

وجهتُ بصري "لسامي" الذي وقف بجانب "نادره" يضع الليمون و يبتسم بوجهها ، لم أرى أولادي مطمئنين لأناس كما رأيتهم اليوم ، "سامي" لا يمازح أحد إلا إذا كان يعرفه جيدا ، أعترف لقد اطمئن قلبي لها ، لن أبالغ إن قلت أن قلبي تعلق بها أيضا ، بالتأكيد ليس حباً و لكن على الأقل راحه

نادره: سامي ابنك لطيف أوي

طاهر: سامي دا دماغ لوحده ، الي يشوفه ميصدقش انه وكيل نيابه و بتعامل مع المجرمين

نادره: روحه حلوه ، ربنا يخليهولك

ابتسمتْ

طاهر: نادره ، انت محتاجه مني إيه كزوج

نظرتْ لي مطولاً ثم أجابت

نادره: أمان ، مش محتاجه غير أمان ، حب و رحمه و تراعي أولادي دا الي أنا محتاجاه

طاهر: بس كدا

نادره: هحتاج أيه تاني ، مهو يا طاهر لو هحتاج فلوس ، الفلوس اجيبها من أي حته ، الواحد ميغلبش ، بس أنا محتاجه الي أهم من الفلوس

طاهر: أوعدك لو الموضوع تم على خير ، مش هتلاقي غير الراحه و الأمان معايا

ابتسمتْ

نادره: و انت محتاج مني إيه كزوجه؟

طاهر: حب ، اهتمام ، حضن ألجأله لما الدنيا كلها تيجي عليا

ابتسمتْ و ظلت تناظرني بهدوء

نادره: أنت راجل محترم يا طاهر ، انا عارفه اني مينفعش أقول حاجه زي كدا ، بس أنا محتاجه أقولها ، انا كنت خايفه قبل ما اتكلم معاك ، معرفش ليه ، بس أنا حاسه أني أول مره اتجوز كل حاجه بالنسبالي مخيفه

لهذا كانت خائفه ، كيف لتلك الفراشه أن تعيش كل هذه المسؤوليات بمفردها ، أكاد لا أصدق

طاهر: مقدرش أقولك سبب ، بس انا مبسوط انك اطمنتي لما اتكلمتي معايا ، عاوز اقولك اني اطمنت أنا كمان ، و أتمنى من كل قلبي الموضوع يكمل

ابتسمتْ و بدأت تنفتح بالكلام معي ، كل مره تنطق فيها اسمي قلبي يرفرف ، اسمي من فمها جميل ، ذات ضحكه جميله ، و صوت رقيق ، و جمال آخذ للعيون ، ظللنا نتكلم بعض الوقت لا أعرف كم من الوقت مر ، ولكنه كان كالبرق ، وقف "محمود" بجانبها مبتسم

محمود: خلصتو ؟

استقامت و أمسكت يده بحنان ، أومأت برأسها و ابتسم الآخر ، وقفتُ أنا أيضا و أنا أرى الابتسامه على وجهها ، رجعت بهدوء الطاوله بجانب أولادي ثم لحقا بي ، جلس " محمود" بجانبي مبتسم

طاهر: نقرا الفاتحة؟
.

.

.

.