رواية نادره الفصل السابع 7 - بقلم sasso

..(سما)..

أقف بجانب أمي و " محمد" ننظر لغرفه  العمليات ، انها الثامنة مساءً ، أخبرنا "محمد" بميعاد العملية صباح اليوم ، وجهتُ نظري للواقفين أمامي ، الجميع هنا ، "محمود" "ابتهال" "أسماء" "عادل" حتى "طاهر" و "رودينا" ، هذا الرجل يذكرني بأمي ، رجل بحق ينظر لي بحب و اهتمام كما تفعل أمي ، الجميع هنا ما عداها ، خرجت الطبيبه التي رأيتها أمس ، عقدتُ حاجباي و أنا أحاول تذكرها ، أنا متأكده انني أعرفها ، اقترب الجميع منها و ناظرتني بهدوء

سهام: العمليه ماشيه كويس متقلقوش

نادره: طب أنت خرجتي ليه ، مش المفروض معاهم في العمليه

ابتسمتْ تطمئننا

سهام: أنا لسه مش مؤهله أدخل عمليات زي عمليه البنوته الصغيره ، دكتور بدير خبره كبيره جدا و بإذن ربنا هتطلع كويسه

اتجه "طاهر" لها

طاهر: كل المطلوب لمها اعملوه ، اذا محتاجين تروح مستشفى تانيه عرفوني و أنا هوديها

سهام: لا ان شاء الله هتكون كويسه ، محتاجين بس الأم تكون معانا عشان نعرفها طريقه التعامل بعد العمليه

خطى "محمد" لها خطوتين ليقترب منها كتيرا و الذي قد لفت انتباهي

محمد: أنا الي هتولاها ، قوليلي

نظرتُ "لمحمد" و قد عقدتُ حاجباي ، ما باله يبعد "عزه" عن كل شي ؟

سهام: طيب هستأذنك معايا شويه

أومأ "محمد" برأسه و سار خلفها و أعيننا جميعا تناظره باهتمام ، نظرت لأمي و اقتربتُ منها هامسه

سما: هو في أيه محمد ماله ، و فين عزه

نظرت لي بهدوء أعرفه

نادره: ربنا يستر و بيت أخوكي ميتخربش

نظرتُ لها بتعجب

سما: هو في حاجه ولا إيه

نادره: مش وقته يا سما

إبتعدت عني و ذهبت لتقف أمام "أسماء" التي  يبدو عليها الألم ، اقتربتُ منهم و أنا أراها تضع يديها على أسفل ظهرها

سما: انت كويسه يا أسماء

ناظرتني بحاجبين معقودتان

أسماء: أه كويسه متقلقيش

أمسك "عادل" يد "أسماء" و بدأ بتوجيهها للكرسي حتى تستريح ، جلست و هي تتألم

سما: احنا في المستشفى يا أسماء ، لو تعبانه قولى نطمن

عادل: قلتلك مليون مره ارتاحي

ناظرته أمي فناظرها

عادل: من التوتر قاعده تقلب في البيت ومش راضيه ترتاح

نادره: لا قومي يا أسماء يلا

أغمضت عينها بألم و تكلمت بهدوء

أسماء: أنا كويسه يا ماما ، مش الحركتين الي عملتهم امبارح هيتعبوني يا عادل

نادره: قومي يا أسماء

ناظرت"عادل"

نادره: خد مراتك بالراحه و روحو قسم النسا ، ولو احتجت حاجه كلمني

أومأ برأسه و أمسك يد "أسماء" ليساعدها على الوقوف ، بدأت بالمشي بهدوء و على ملامحها الألم ، "مها" و الآن "أسماء" ما الأمر ؟ ، وقف "طاهر" بجانب أمي و بدأ بمحادثتها ، اقتربت "رودينا" مني و ابتسمت ، لحظات حتى وجدتُ هاتفي يُضيء ، نظرتُ فيه و ابتسمت ، "حمزه" يراسلني ، ظللتُ أحادثه بابتسامه و أنا لا أعي من بجانبي

حمزه: وحشتيني

رفعتُ عيني عن الهاتف لأرى مصدر الصوت ، فتحتُ فاهي بتعجب ، أنا أراه أمامي

حمزه: إيه موحشتكيش؟

نظرتُ حولى لأرى الجميع منشغل ، عاودتُ النظر إليه

سما: انت جيت ازاي؟

حمزه: بالعربيه

مططتُ شفتاي حتى ظهرت غمازتيّ

سما: ظريف

حمزه: مقدرش مجيش أشوفك ، متعودتش مشوفكيش

ظهر على وجههي شبح ابتسامه و قد لاحظها ، ظللتُ صامته ، اقترب مني حتى استنشقتُ عطره

حمزه: فين أخوكي محمد ؟

سما: مع الدكتوره

واجه الحضور و ابتسم

حمزه: طيب يا سماسم ، أخوكي محمود أهو

ابعتد عني ليقترب من "محمود" ، قلبي ينبض بشده ، اقتربتُ منه أراه يسلم على الحضور واحدا تلو الآخر و الابتسامه تعلو وجوههم ، وقفت أمي بجانبي مبتسمه و قد ضربت كتفي بكتفها برفق ، ناظرتها

نادره: مطلعتيش انت بس الي واقعه

ابتسمتُ ابتسامه واسعه و قد ظهرت الحمره على وجههي

نادره: بس اتقلي في إيه

أومأت برأسي أحاول أن لا أبتسم و لكن وجههي يأبي الخضوع لي ، ابتسمت أمي رتبت على ظهري بحنان

نادره: بصي بصي كل شويه عينه تيجي عليكي ، يالهوي دا دايب

ناظرتها و قلبي يكاد يقف

سما: خلاص يا ماما ، انا بقي وجعني ، أنا ماشيه

سمعت ضحكاتها و أنا أغادر ، ابتعدتُ قليلا ثم عاودت النظر إليه ، يتكلم مع "محمود" و "طاهر" بحماس ، ابتسمتُ ثم عاودتُ المشي

___________________________________

..(محمد)..

أجلس أمامها و هي تشرح لي كيفيه التعامل مع "مها" في الوقت الحالي ، أستمع بكل تركيز  لكل كلمه ، كل كلمه الآن تؤثر على حياه ابنتي الصغيره ، ناولتني ورقه بها جميع التعليمات

سهام: المهم دلوقتي الغذا و الدوا ، و دكتور بدير هيكون معاها علطول في أي وقت هيرد عليك

أومأت برأسي و أنا أناظر الورقه ، عاودتُ النظر لها

محمد: تنصحيني بإيه يا سهام

سهام: تركز معاها أول شهر لو عدى على خير إن شاء الله هتكون زي الفل

محمد: طيب حاضر

جلستُ أمامها بهدوء أقرأ محتويات الورقه مره أخرى

سهام: محمد

ناظرتها بهدوء و أنا أراها تناظرني

محمد: نعم

سهام: ممكن أسأل سؤال

ابتسمتُ و أومأت برأسي

سهام: أنا أسفه لو هكون متطفله ، بس انت ازاي هتاخد بالك من مها و انت رايح الشغل ، مش كان المفروض مامتها هي الي تسمع الكلام دا ؟

ابتسمتُ و أنا أرى الحرج في ملامحها

محمد: عزه مراتي مشغوله عن بنتها أكتر مني ، معندهاش وقت تراعي مها

عقدت حاجبيها باستنكار ، ابتسمتُ و تنهدت

محمد: تخيلي مراتي مشغوله عن بنتها أكتر مني ، وراها صحابها و شغلها و فسحها

سهام: أنا أسفه مش قصدي اتدخل ، لا أكنك سمعت سؤالي

استقامت و أنا أرى الحرج على وجهها ، استقمتُ أمامها واقفا جاعلا الحركه صعبه ، نظرت لي بهدوء

محمد: ممكن تساعديني ؟

عقدتْ حاجبيها بتعجب

محمد: مسؤوليه مها مش هقدر عليها لوحدي ، محتاج مساعده

سهام: أنا موجوده في المستشفى في أي وقت مع دكتور بدير ، إذا احتاجتني ..

قاطعتها مقتربا منها جاعلا عطرها في أنفي ، إبتعدت خطوتين عني

محمد: أنا محتاجك انت ، أنا عاوزك يا سهام

رأيتها تبتلع لعابها و إبتعدت عني مقدار ٤ خطوات ، ناظرتني بجمود قاتل

سهام: دكتور بدير هيستنى حضرتك كمان ساعه في مكتبه ، اذا في أي مشكله ياريت يكون الكلام معاه

بدأت في التحرك باتجاه الباب و لكنى وقفتُ أمامها ، إبتعدت عني حتى أمسكت ذراعها و قربتها نحوى ، ناظرتني بملامح يملؤها الجمود ، ناظرت عيناي بكل قوه

سهام: انا ورايا شغل تاني استاذ محمد ، استأذنك تبعد ايدك عني كدا مينفعش

محمد: ليه كل دا يا سهام ، أنا محتاجك

ناظرتني و ابتسمتْ و قد رأيتُ عينيها تلمعان نتيجة لتراكم الدموع فيها

سهام: بقا الاستاذ محمد الي مفيهوش غلطه هيحتاج سهام الي أبوها رماها و ملهاش كبير ؟

ناظرتها بهدوء ، للآن تتذكر كلماتي ، أمازالت تؤلمها ؟

محمد: سهام أنا ...

قاطعتني و قد رجعت الحده تعلو وجهها و قد أبعدت يدي عنها ، نظرت لعيناي بتحدي

سهام: لولا إن بنتك بجد تعبانه و أنا الي كاشفه عليها ، كان زماني قلت إنك رجعت لأيام الجامعه تاني

واجهتني و تكلمت بهدوء تحاول إخفاء رجفه صوتها الي ظهرت

سهام: سهام القديمه ماتت ، ومش هسمح إنها ترجع ، و اعمل حسابك إذا حاولت تقرب أو تفكر إني هرجع تاني مش هيحصل كويس ، و إياك ثم إياك تقرب مني أو تحاول تتلاطف يا محمد

إبتعدت عني بسرعه و أنا أرى يديها تصعد لوجنتها حتى تمسح دمعتها التي سقطت إثر كلماتها ، ظللت واقفا بلا حراك ثوانٍ أنظر الباب الذي خرجت مني ، مسحت بيدي على وجههي و قد مططت شفتاي

محمد: أنا آسف

___________________________________

..(سهام)..

خرجت من الغرفه و أنا ألعن دمعاتي ، كيف لها أن تخرج ، و لمن تخرج ؟ تخرج أمامه! ، لا أعرف ما الذي يريده و ماذا يطمح ولكني لن أقع في نفس الجحر مره أخرى ، لقت مضى سبع سنوات على تلك اللحظه ، لن أسمح له أن يدخل لحياتي مره أخرى ، لقد بذلت مجهودا جبارا حتى أعتاد على فراقه ، ولست قادره على بذل ذاك المجهود مره أخرى ، دخلت دوره المياه و غسلت وجههي بالماء ، نظرتُ لنفسي بالمرآه

سهام: ضعيفه ، غبيه ، اكيد محمد مش هيطلع كدا و نيته بسيطه ، لزقته مره واحده دي مش طبيعيه ، أكيد جاي مفكرني سهام القديمه ، و أنت زي الغبيه قدمتيله فرصه من دهب يدخل منها ، معاه موبايلك و عارف شغلك ، هيفضل ينطلك في كل مكان شويه

امتلأت عيناي بالدموع و سقطت دمعه سريعه ، مسحتها بعنف و أنا أنظر لإنعكاسي بالمرآه

سهام: لأ متعيطيش ، انت مش ضعيفه ، مش هتسيبي فرصه يستغلك تاني ، هو استغلك أول مره عشان كنتي ضعيفه ، أوعى تضعفى طول ما أنت قويه مش هيقرب منك

استنشقتُ الهواء بهدوء و بدأتُ في ترتيب ملابسي و شعري ، أخرجت أحمر شفاهي من جيب المئزر الطبي و وضعته ، ابتسمتُ و ناظرتُ نفسي

سهام: أيوا كدا ، أوعي تضعفى أو تهملى في نفسك ، طول ما هو شايفك قويه مش هيقدر يقرب لك

خرجتُ من دوره المياه و بدأت في ممارسه عملى ، وقفتُ بجانب دكتور "بدير" و أنا أرى تلك الصغيره في غرفتها على سريرها ، عاريه الصدر و لاصق طبي موضع العمليه ، أراها نائمه بهدوء صدرها يعملو و يهبط ، هذه ابنه الرجل الذي أحب ، أو من كنت أحب ، ابتسمتُ باستهزاء على حياتي ، كل من أحبهم يبتعدون عني ، أبي ، جدتي ، جدي ، خالاتي ، و بالطبع أعمامي ، حتى أمي كانت على وشك أن أفقدها ، هل أنا سيئه لهذه الدرجه ؟ الرجل الذي أحببته بعمق هجرني هو الآخر ، ناظرتُ دكتور"بدير" عندما وجه كلامه لي

بدير: أنت كويسه؟

ابتسمتُ أحاول أن أبعد الأفكار المتناثرة عن رأسي

سهام: اه كويسه

بدير: وشك مخطوف ، انت تعبانه ولا حاجه ؟

وضعت يدي على وجنتي اليمني ، صحيح عندما أحزن صحتي تتدهور

سهام: لا انا كويسه ، هتلاقيني عشان مكلتش حاجه بقالي كام ساعه

واجهني و ابتسم لي بهدوء

بدير: لا يا دكتور مينفعش ، حاله شبه دي تبقى ممتازه جدا لرساله الماجيستير بتاعتك لازم تكوني فيقالها

ناظرته بصدمه

سهام: مش فاهمه ، انا معملتهاش العمليه

بدير: بس أنت الي هتتابعي الحاله ، اعتبري دا العملى بتاعك

تبا ، سأكون في وجه "محمد" كل يوم و كل لحظه

سهام: لا يا دكتور الحاله كبيره عليا ، مقدرش عليها ، وبعدين أنا لسه حتى مخلصتش النظري عشان ابدأ في العملى

بدير: انا شفت منك اهتمام بالحاله دي ، يعني عندك استعداد تدوري ، البنت حالتها مش صعبه و انا معاكي متخافيش

سهام: بس يا دكتور ..

قاطعني

بدير: مفيش بس ، هستنى تقريرك عن الحاله كل يوم لحد ما تخرج من المستشفى على خير ، ولو معملتيش التقرير هرخم عليكي و انت عارفه رخامتى

ابتسم و اقترب مني ، أنزل رأسه ليواجه رأسي فيما ابتعدتُ عنه بضعه خطوات

بدير: هستني تقاريرك

___________________________________

..(حمزه)..

أراها بجانب اخوتها "محمد" و "محمود" و "أسماء" ، تتكلم بهدوء و تمسك بيد "محمد" لتطمئنه ، ابتسمتُ و أنا أرى ذاك الجانب منها ، إنها حنونه لم أعهدها هكذا ، حولتُ نظرى لأمها "نادره" إنها تجلس بجانب رجل طويل "طاهر" ، انه رجل جميل ، تحدثت معه قليلا ، رجل مثقف و على خلق ، إذا هذا من سيكون حماي! ، لن يكون هذا صعبا ، لقد أحبني ، نظرتُ "لمحمود" وهو يتحدث من زوجته ، لا أذكر اسمها ، وجهتُ نظري "لمحمد" يبدو قلقا ، أين زوجته ؟ لم أرها منذ أن جئت ، وجهتُ نظرى لمصدر الصوت الذي كان بجانبي

سما: سرحان في إيه ؟

ابتسمتُ و واجهتها بجسدي باهتمام

حمزه: سرحان في حلاوتك

ابتسمتْ و قد ظهرت الحمره على وجهها ، ابتسمتُ و أمسكتُ يديها لأسحبها بعيدا عن الجميع

سما: رايح فين ؟

حمزه: عاوز اتكلم معاكي شويه

سما: طيب سيب ايدي

ناظرتُ يدي إلي تمسك يدها ، تركتها و قد عقدتُ حاجباي

سما: أنا مش عاوزه حد يلمسنى تاني

حمزه: بس أنا عمرى ما هأذيكي يا سما

سما: حتى لو ، الي كنت بعمله غلط و مش عاوزه أكمل فيه

ناظرتها بهدوء و أومأت برأسي

حمزه: براحتك

بدأت تمشي معي في هدوء و عيناي لا تفارقها ، أهذا خوف ؟ ، جلسنا أمام بعضنا و ناظرتُ عيناها

حمزه: الشغل من غيرك وحش أوي

ابتسمت

سما: ايوا طبعا وحش ، مهو أكيد مش لاقي حد تشيله الشغل بتاعك

ضحكتُ و أنا أتذكر كم مره جعلتها تعمل عملا إضافيا حتى تتيح لي الفرصه في الجلوس معها أكثر

حمزه: للأسف الدكاتره الي موجودين ناصحين

سما: ايوا ايوا كله عشان أنا طيبه

ابتسمتُ

حمزه: شوف مين بتتكلم ، تس تس انا الثعبان

فتحت فاهها بصدمه و أمسكت علبه المناديل الورقيه و ألقتها علي

سما: تعبان ، انا تعبان ، ماشي يا عم الضفضع

حمزه: انا ضفضع

سما: مش قلبناها زواحف بقا ، استحمل

ضحكتُ و الوقتُ منديلاً ورقيا من العلبه التي ألقتها علي

حمزه: طب خدي المنديل دا

ناظرتني بتعجب و التقطته

سما: ليه؟

حمزه: الكحل سايح على طرف عينيكي ، امسحيه

أمسكت هاتفها لتتأكد من كلماتي ، وقفت متجه لدوره المياه ، ظللت أناظرها حتى أختفت

حمزه: و عقبال ما كحلك يسيح و انت نايمه جنبي

دقائق حتى رجعت لي و جلست بهدوء

حمزه: انت بتحبيني يا سما ؟

نظرت لي بهدوء و قد توردت وجنتيها ، شكلها لطيف

سما: هكون كدابه لو قولتلك اه او لا ، أنا معرفش أيه هو الحب يا حمزه

حمزه: الحب يا سما هو الأمان ، إنك تحسي بالأمان مع الي بتحبيه ، الحب هو السعاده ، إنك تبقى طايره من الفرحه مع الي بتحبيه ، الحب يا سما هو الضحكه الي طالعه من قلبك و الكلمه الي مش خايفه تطلعيها ، و التضحيات الي مستعده تقديمها في سبيل راحه الي بتحبيه ، أنا مستعد أعمل أي حاجه عشان تبقى سعيده و مرتاحه يا سما

ظلت تناظرني بعينان تلمعان و البسمه لا تفارق وجهها

سما: انت بتحبني أوي كدا ؟

ابتسمتُ و ناظرتُ ملامحها اللطيفه ، عيناها التي تلمع و وجنتيها المتوردتان

حمزه: انطلك من الشلال زي أحمد السقا عشان تصدقي يعني

تبدلت ملامحها و ناظرتني بهدوء

سما: دا انت فصيل

ضحكتُ بشده و ناظرت ملامحها الممتعضه

حمزه: أنا بحبك لدرجه إني مش قادر اعدي يوم من غير ما اسمع صوتك فيه ، بحبك لدرجه إني بتمنى تبقى مراتي النهارده قبل بكرا

ابتسمتْ بخجل و ناظرت أصباعها ، تداعبها بخجل واضح

حمزه: مش عاوزه تقولى حاجه

ناظرتني بهدوء

سما: أنا خايفه

عقدتُ حاجباي باهتمام تاركا لها المجال حتى تتكلم

سما: خايفه أحبك يا حمزه

ناظرتها بهدوء ، ظلت تناظرني و هي صامته

سما: ساكت ليه

حمزه: بسمعك

سما: انت مدايق من كلامي ، بس أنا محدش لمس قلبي قبل كدا و أنا خايفه أوي

حمزه: اذا خايفه مني هبقى غبي أوي لو قلتلك متخافيش ، بس هقولك سيبي الأيام تثبتلك ، أما لو خايفه من الحب الحب ميتخافش منه يا سما ، الحب بيتعاش زي ما هو ، الي يخليكي تخافي هو اختيارك الي تحسي معاه بالحب مش الحب

ناظرتني بهدوء و أكملت أعلم أنها خائفه

حمزه: أول ما اشتغلنا مع بعض كنتي قاصده تطلعي نفسك البنت الي فاهمه كل حاجه القويه الحِركه الي بتفهمها و هي طايره ، الكل افتكر كدا ما عدا أنا ، كان باين إنك بتمثلي ، إنت الصغيره وسط ولدين و أخت الكل خايف عليكي طبيعي تحاولى تثبتي إنك غير كدا

ظلت تناظرني بصدمه و قد فتحت ثغرها فتحه بسيطه تدل على التعجب

حمزه: انت خايفه عشان حاسه إن الناس هتستغلك ، عاوزه تثبتي إنك قويه بس خايفه من التجربه ، لو عاوزه وقت زياده براحتك ، بس خليكي عارفه إنك عمرك ما هتخافي و انت معايا

مددتُ يدي لأغلق فاهها و ضحكت

حمزه: اقفلي دا بدل ما تدخل دبانه كدا و لا كدا

تداركت الوضع التي كانت عليه و أخفضت عينها تناظر هاتفها المحمول ، ظللت أناظرها و على وجههي ابتسامه ، تعرف الآن أنني أعرف كل شئ عنها ، ستخاف قليلا ولكنها ستصبح حبيبتي لا محاله

___________________________________

..(أسماء)..

ظهري يؤلمني كثيرا ، لقد حذرني الطبيب أن لا اتعرض للتوتر أو الاجهاد البدني ، أخاف أن يحدث شيئا لطفلي الصغير ، جلستُ على الكرسي و أنا أغمض عيني بألم ، الدواء الذي أعطاني اياه الطيب ساعد على تحسني و لكني مازلت أشعر بالتوعك ، أمسك "عادل" يدي ، ناظرته مبتسمه هو مبتسم لي ، يخفف عني كثيرا ، لو أن رزقي من الحياه هو "عادل" فأنا سعيده

عادل: أحسن؟

أسماء: أه هديت كتير عن الأول الحمد لله

عادل: ماما و بابا جايين قادره تقعدي و لا اروحك البيت

تبا ، سأقابل تلك العجوز الشمطاء الآن

أسماء: لا انا قاعده ، مقدرش أسيب محمد خصوصا إن عزه مش موجوده

عادل: متأكده ؟ انت شكلك تعبان يا أسماء

أسماء: أنا كويسه متقلقش

جلس بجانبي و بدأ بتصفح هاتفه المحمول ، جلستُ أناظر أمي و هي تتكلم مع "طاهر" تبدو سعيده ، كيف كنت أفكر حينما عارضتها ، لم أعهد أمي مطمئنه منذ مده ، صحيح هو ليس زوجها بعد و لكني أرى في عيناها الراحه ، نظرتُ "لسما" التي تقف مع ذاك الرجل الوسيم "حمزه" كنت أعرف أنه يحبها ، يناظرها كل لحظه أكاد أجزم أنه يريد أن يحضنها الآن ، وجهتُ نظري "لمحمود" يتكلم مع "حمزه" يبدو عليه الهدوء ، "محمود" حذر في علاقاته و لكن يبدو ان "حمزه" قد نال اعجابه ، إلتفتُ لأرى "سما" و "ابتهال" تتحاورن مع "رودينا" هذي الصغيره مليئه بالطاقه ، ابتسمتُ و بدأت ألمس بطني بعد أن شعرت بأن الألم قد زال ، أشعر بحركه صغيري هذه الفتره ، دقائق حتى سمعتُ صوتها

ساميه: سلامو عليكو ، ألف سلامه يا نادره يا حبيبتي ، اول ما عادل عرفني جيت جري

وقفتُ بهدوء بمساعده "عادل" و اقتربت منهم ، أحتضنتني حماتي و عينها تراقب الجميع ، أجل أعرفها كيف لها أن تفوت شيئا ما خاص بعائلتي ، بعد قليل أقبل "محمد" و معه الطبيب و الطبيبه و بدأ كل منهم بإلقاء وابل من النصائح علينا و طمئنتنا أن حاله "مها" مستقره الآن ، و ستكون في المشفى أسبوعين

طاهر: طيب الحمد لله ، في أي حاجه نقدر نوفرها لمها يا دكتور ، علاج أكل أي حاجه

بدير: لا الحمد لله المستشفى موفره كل حاجه ، و كدا او كدا ان شاء الله استاذ محمد مشرفنا كمرافق و دكتوره سهام معاه اذا احتاج أي حاجه ، و انا طبعا على تواصل لو في أي مشكله ، و ربنا ميجبش مشاكل

نادره: طيب الحمد لله ، شكرا يا دكتور

ناظرتُ الجميع على وجوههم الراحه ، إلا هي تناظر أمي و "محمد" بشكل غريب ، بدأت في تحريك رأسها و لمس ذقنها ، ستفجر قنبله الآن

ساميه: الحمد لله ، بس مش تعرفينا يا نادره على الاستاذ الي معاكي ؟

بدأ الرعب يدب في قلبي ، لن تصمت ستزيد الطين بله ، أقسم أن "طاهر" سيهرب أمس "عزه" و اليوم حماتي ، ستحزن أمي كثيرا ، ابتسمت أمي

نادره: المستشار طاهر

ساميه: أهلا بيك يا سياده المستشار ، حضرتك تقرب لنادره ، أصلي أول مره أشوفك

ابتسم "طاهر"

طاهر: أنا خطيب نادره

صمتٌ مميت يحل على المكان ، لقد صمتت !! هل تحضر الكلمات لتلقيها أم أنها تقبلت ما سمعته ، أكاد أبكي من التوتر ، بدأت أنفاسي بالتسارع و أمسكتُ أسفل ظهري و تأوهت بصوت خفيف لفت انتباه "عادل"

عادل: انت كويسه

تنفستُ بهدوء و أومأت برأسي ولكني لم أستطع أن اتحمل ألم ظهري فتأوهت بصوت عالٍ و أملت بجسدي على "عادل" ، حاوطني بذراعيه و قد سمعتُ الجميع يهرع لي

نادره: مالك يا أسماء

أشعر بألم في أرجلى أكاد أقف عليها ، الألم يتصاعد

نادره: حاسه بايه

لم أستطع الوقوف و شعرت بأيدي "عادل" تساندني

عادل: أنا هروح بيها الدكتور تاني

نادره: طب استني هاجي معاك

ساميه: و انا كمان دا حفيدي الأول لازم اتطمن عليه

ناظرتُ "عادل" و قد فهم ما أريده ، اقترب مني حتى أستطيع أن أهمس في أذنه

أسماء: روحني يا عادل ، انا هرتاح لما أنام ، دا كله من التوتر

همس بهدوء

عادل: أطمن عليكي بعد كدا أروحك ، دي غلطتي مكنش لازم أطاوعك و أنزلك من البيت النهارده

أشار لممرضه حتى تجلب له كرسي متحرك ، جلستُ عليه و بدأ يدفعني بهدوء حتى وصلنا للقسم النسائي ، أسمع همسات أمي و حماتي ، بالتأكيد سيتشاجرون ، مرت نصف ساعه تقريبا و قد طمئننا الطبيب أن الصغير بخير و أن ما أشعر به فقط من التوتر ، خرجتُ مع "عادل" بهدوء و انا اتمنى أن لا أرى أمي نتشاجر مع حماتي ، حمدا لله كل شئ على ما يرام ، لم يتشاجرا بعد

عادل: أنا هروح أنا و أسماء يا طنط ، مش هقدر أقعد معاكم أنا أسف

رتبت أمي على كتف "عادل"

نادره: لا يا حبيبي انت عملت الي عليك و زياده ، احنا تعبناكم معانا النهارده ، روح ارتاح و كل لقمه كدا عشان تقويك

عادل: تسلمي يا طنط ، لو محتاجه أي حاجه كلمني انت عارفه غلاوتك عندي

ابتسمت أمي و ابتسمتُ فخورة بزوجي ، أنه خير الزوج حقا

نادره: تسلم يا عادل

ساميه: متقلقش يا عادل حماتك معاها بدل الراجل ٤ ماشاء الله

ناظرناها بهدوء ، أقسم أنها ستفجر قنبله الآن

نادره: نعم ؟

ساميه: أقصد يعني ولادكم محمد و محمود و خطيبك طاهر و الراجل الي لازق في بنتك سما ، ما شاء الله يعني

نادره: اه الحمد لله ، حب الناس نعمه يا ساميه

حاولت حماتي الرد على أمي و لكن قاطعها "عادل"

عادل: يلا يا ماما مع السلامه ، مع السلامه يا طنط

تحركنا من جانبيهما و أنا أقسم أن المشفى ستنفجر الآن ، أمي ليست على وفاق مع حماتي ، لولا حبها "لعادل" لكانت بادلتها الكلمات ، خرجنا بهدوء و جلستُ في السياره متجةً للبيت

___________________________________

..(طاهر)..

ظللتُ اتكلم مع "محمد" حتى أهدئه قليلا ، يبدو عليه الحزن الشديد ، لا أعرف أهذا بسبب ابنته أم لأن زوجته لم تظهر بالصوره ، الجميع متعب في حياته ، اتمنى أن يصلح الله بينهما ، بعد لحظات سمعت صوتها الجميل و هي تقترب ، إلتفتُ حتى أراها تمشي بهدوء و ثبات ، خلفها تلك السيده تبدو على ملامحها الإمتعاض ، اقتربتُ منها و ابتسمت

طاهر: أسماء كويسه ؟

أومأت برأسها بهدوء دون ابتسام ، ناظرت تلك السيده حين ظهر صوتها

ساميه: ألف مبروك يا نادره ، و الله و حضرت فرح ابني و فرح حماته

ضحكتْ بطريقه توحي على الاستهزاء ، ناظرتها "نادره" و قد عقدت حاجبيها ، فتحت فاهها حتى تتكلم و لكن صمتت حين تكلم "محمد"

محمد: وعقبال ما تحضري فرح جوزك ان شاء الله

ابتسمتُ و أشحتُ بوجههي أحاول أن لا اظهر ضحكي ، ناظرتها مرة أخرى و قد ناظرتني نظره حاده ، لم تستطع الرد و ابتعدت بصحبه زوجها و أنا أجزم أنها تخرج نيرانا من أذنيها ، ناظرتُ "محمد" و قد اقترب من "نادره" و احتضنها و قَبٌلَ رأسها بابتسامه هادئه ، ناظرنا جميعا و ابتسم بهدوء

محمد: كتر خيركم و الله شكرا تعبتكم معايا ، مها كويسه الحمد لله ارتاحو انتو

طاهر: لا تعب ولا حاجه يا محمد ، انت مش محتاج حاجه

محمد: لا شكرا ، سما هتجيبلي كل حاجه من الشقه عندي

طاهر: طيب لو محتاج أي حاجه متتردش احنا خلاص بقينا عيله

ابتسم و أومأ برأسه ، بدأتُ بالتحرك مع "رودينا" مودعا الجميع ، ناظرتُ "نادره" و هي تستقل سياره "محمود" و بدأتُ أتجه للبيت

رودينا: بوب

ناظرتها و هي بجانبي

طاهر: نعم يا قلب البوب

رودينا: انت مرتاح مع نونه ؟ يعني هتتجوزها خلاص

ابتسمتُ و ناظرتها

طاهر: انت أيه رأيك فيها

ابتسمت

رودينا: حنينه أوي ، بتفكرني بماما الله يرحمها

ابتسمتُ و أنا أرى الاطمئنان على وجه الصغيره

طاهر: انت عارفه إن لو ربنا تمم الجوازه تعيش معانا ، انت شايفه انك هتقدري تعيشي معاها ؟

رودينا: اه ، طيبه أوي و حنينه كمان ، اعتقد انها بتحبني و لا أيه ؟

طاهر: محدش يقدر يشوف العسل دا و ميحبوش

ابتسمتْ في خجل و ناظرتني

طاهر: الجواز موضوع كبير يا رودينا ، هي شخصيه بحياه بطباع مختلفه عني ، لازم نوصل لنقطه التقاء مع بعض ، و الموضوع مش في لحظه كدا ، لازم نقعد مره و اتنين و تلاته و عشره

رودينا: بس باين عليك انها عجباك

ابتسمتُ في حرج ، تلك الصغيره لاحظت ، ظننت أن لا أحد يعلم

رودينا: و طالما عجباك يعني أكيد هتتجوزها

طاهر: الاعجاب حاجه و الجواز حاجه تانيه ، الموضوع محتاج وقت و هدوء ، وبعدين انت شكلك الي هتموتى و تجوزيهالي

ضحكت بشده

رودينا: بصراحه اه

اقتربتُ منها و قبلا رأسها

طاهر: هفكر في الموضوع حاضر

ابتسمت و ناظرت الطريق مره أخرى ، ناظرتُ الطريق و ابتسمتُ

___________________________________

..(عزه)..

سأداهمهم الآن و أجعله يعرف أنني لست التي أُخان ، انها الحاديه عشر صباحا ، أقف أمام غرفه ابنتي و لم أطرق الباب ، دخلتُ دون إذن ، وجدته بجانب "مها" ، يرتبُ على شعرها ، لا يوجد أحد معه في الغرفه ، نظر لي و وقف بهدوء

محمد: ما لسه بدري يا هانم

عزه: بتقول حاجه يا محمد ؟

محمد: لا أبدا ، أصل بنتك عملت عمليتها و خرجت و فاقت و باتت ليله و انت مجيتيش

عزه: و انت ما اتصلتش بيا ليه ، مش ممكن يكون حصل لي حاجه ، هو أنا مش مراتك بردو

محمد: اتصل بيكي ؟ ما انا علطول بتصل بيكي يا عزه بشحت اهتمامك بيا و ببنتك عملتي أيه جديد ؟

عزه: صحيح ، ما الاستاذ معدش فاضي

عقد حاجبيه أمامي ، ناظرته و إلتفتُ للصغيره ، جلستُ بجانبها و أمسكت يدها اليمنى و ابتسمت

عزه: عامله أيه يا قلب ماما

اشارت لصدرها

مها: واوا

عزه: ألف سلامه عليكي

ناظرتُ "محمد"

عزه: ماما جت خلاص تقعد معاكي و تأخد بالها منك

فتح فاهه ليتكلم و لكن اوقفه صوت طرق الباب ، فتح الباب و كانت هي ، وقفتُ بجانب "محمد" و قد أمسكتُ ذراعه بتملك و رققتُ صوتي و بدأتُ في التململ في كلماتي

عزه: اه انت الدكتوره الي بسببك بنتي حبيبتي عملت العمليه ، اتفضلي اتفضلي

دخلتْ الغرفه و أنا أرى عيناه عليها ، ملامحها صارمه ليست كما رأيتها قبلا ، بدأت في متابعه "مها" و عيناه لا تبتعدان عنها ، ناظرني بغير قصد منه و قد تبدلت ملامحه الإمتعاض ، أعاد النظر إليها ، جلستُ أمامها و قد وضعت  قدمي فوق الأخرى كي أظهر ملابسي الثمينه ، ويدي على قدمي اليمنى أظهر خاتم زواجي و خاتمي الألماس ، أنا أغنى منها و أفضل منها ، سأجعلها تندم لأنها حاولت أن تأخذ زوجي مني

عزه: حبيبي أقعد واقف ليه ، انت يا عمري تعبان من امبارح

لم تناظرني أو تناظره ، نظر "محمد" لي بشده و قد إبيضت يداه من شده قبضته عليها ، حاولتُ أن ألفت نظرها بما أرتدي أو ما أقول و لكنها لا تهتم ، ما هذا هل أسأت الظن بها ، ناظرتُ "محمد"  القلوب تكاد تخرج من عينيه

عزه: دكتوره انت اسمك أيه

اعتدلت و ناظرتني بعد ان انتهت ، بادلتني بابتسامه

سهام: اسمي دكتور سهام ، بنوتتكم كويسه جدا ما شاء الله ، العمليه ممتازه و قريب هتخرج من المستشفى ، أنا كنت بلغت أستاذ محمد بكل الحاجات الي المفروض يعملها من بعد العمليه ، بما إن حضرتك هنا ممكن يعرفك كل حاجه

عزه: اه طبعا ، صحيح دا دكتوره انت متجوزه ؟

ناظرتني بتعجب

سهام: أفندم ؟ حضرتك محتاجه تعرفي في حاجه معينه ؟

عزه: لا فضول بس ، أصلك ماشاء الله كبيره اكيد متحوزه

صمتت و سارعتُ في الحديث

عزه: قصدي كبيره مقاما طبعا

ابتسمتُ و أنا أعرف أنها ستبكي الآن ، ناظرتني بهدوء ثم ناظرت "محمد" الذي انتقل بجانبي حتى يناظر وجهها ، ابتسمت بهدوء

سهام: انا مقري فاتحتى

عزه: و الله ، ألف مبروك ربنا يتمم بخير

ابتسمت ابتسامه سريعه و خرجت دون كلمات ، جلستُ أناظر "محمد" و قد تبدلت ملامحه ، أراهن أنه سيخرج لها الآن ، واحد اثنان ، تلاثه ، ابتسمتُ و أنا أراه يخرج من الغرفه غير آبه بي أو بالصغيره

عزه: ماشي يا محمد ، استنى عليا
___________________________________

..(محمد)..

قُرأت فاتحتها ! كيف لهذا أن يحدث ، هل كان هذا قبل أن أراها أم بعده ؟ لقد أضعتها مره من يدي لن أسمح أن أضيعها مني ، خرجتُ أسأل الجميع عنها حتى وجدتها في غرفه من غرف المرضى ، وقفتُ اناظرها منتظرا أن تخرج ، بعد دقائق خرجت و ناظرتني بهدوء ، بدأت تتحرك ولكني أوقفتها

سهام: بعد إذن حضرتك يا استاذ محمد ..

لم أسمح لها بالتكمله و أمسكت يديها أسحبها خلفي غير آبه بالماره ، حاولت أن تبتعد عني و لكني شددت قبضتي على يدها

سهام: سيب ايدي

لم أعير كلماتها اهتماما و بدأت في سحبها في المصعد و أغلقتُ الباب ، ضغطُ على رز ايقاف المصعد ، أبعدت يديها عني و بدأت بالصراخ

سهام: انت مفكر نفسك مين ، انت ازاي تتجرأ و تلمسني

محمد: انت مقري فاتحتك بجد

سهام: و انت مالك ان شا الله يكون مقري القرآن كله ، انت مالك

على صوتي و ناظرتها بحده

محمد: ردي عليا

سهام: ميخصكش

محمد: لا يخصني ، اي حاجه خاصه بيكي تخصني

سهام: يا سلام ليه ان شاء الله من بقيه أهلى ؟

محمد: عشان بحبك يا سهام

ضحكت أمامي و ناظرتني بحده

سهام: انت مخك تعبان يا محمد ، حب إيه فوق ، انت سبتني زي الكلبه وراك بعد ما كسرتني من ٧ سنين ، متعرفش أنا حصلي إيه من بعدك ، اتجوزت و خلفت ، يا أخي دا أنا لسه معالجه بنتك ، فوق

وقفتُ أمامها صامت و قد أكملت و بدأت عيناها تدمعان

سهام: انت ملكش حق تحاسبني على أي حاجه عملتها و لا هعملها ، الغلطه غلطتي بس انا مش هسمح ليك انك تقرب مني

التقطت أنفاسها نظرت حولها و وضعت يدها على صدرها

سهام: افتح الباب ، هتخنق

ضغطتُ على رز فتح الباب ، خرجت من المصعد و أنا وراءها أخاف أن تفقد الوعي ، وقفت تستند على الجدار و أغمضت عينياها

محمد: انت كويسه

سهام: امشي

وقفتُ أناظرها ، فتحت عيناها و ناظرتني

سهام: امشي ، مش عاوزه أشوفك

تقدمت خطوات بسيطه بهدوء حتى تمالكت أنفاسها ، اتعدلت و إبتعدت عني في هدوء ، نظرتُ للمصعد ثم ناظرتها مره أخرى ، لم تكن تخاف الأماكن المغلقه !
___________________________________

..(حمزه)..

وقف أمامي و هو ينهر الأطباء بشده ، لقد عاد " بندر" القديم ، يصرخ و ينهر بشده ، اقبل لي و ناظرني بهدوء

حمزه: صباح الخير

بندر: صباح النور ، كيف الخيل اليوم

حمزه: كويسين الحمد لله ، ان شاء الله هيشرفوك في السبق

بندر: ان شاء الله

وقف أمامي صامت قليلا ثم أعاد الكلام

بندر: جد دكتوره سما ما بتجي مره ثانيه

حمزه: ايوا  ، انا بلغت حضرتك

بندر: طيب ما بتاخذ أوراقها ؟

حمزه: هاخدها أنا ، هي مش هتقدر تيجي

بندر: ياريت تبلغها إني في انتظارها تستلم أوراقها مني

نظرتُ له بهدوء

حمزه: بس حضرتك ...

قاطعني

بندر: عشان ما اتعرض للمساءله القانونيه ،  أوراقها و شهاده خبرتها ما بتتسلم غير لها

ابتعد عني و أنا استشيط غضبا ، كيف سأبعدها عنه الآن ؟ دخلتُ الإسطبل و بدأت أعاين الخيول و أنا أفكر في شئ ما ، ولكن ليس في رأسي شئ
___________________________________

..(سامي)..

وقف أمامي أربعه شبان جميعهم في نفس السن و بجانبهم "سيد" ينظر الجميع له نظره حاده ، أرى الغدر في أعينهم

سامي: هتتحولو على الطب الشرعي

على: ليه يا سعاده الباشا هو احنا عملنا ايه

سامي: انت مش هتناقشني يا روح أمك

على: هو عشان سمعت كام كلمه من عيل هتصدقهم

وقفتُ و ضربتُ بيدي على المكتب لينتفض الجميع و بدأت بالصراخ في وجهه

سامي: اسمع يا ابني ، كلمه كمان و هتلاقي نفسك في الحجز

على: هو انت مفكر نفسك مين ، انت عارف انا ابن مين

سامي: ابن وزير ابن غفير محدش فوق القانون ، يا عسكري

دخل الظابط على و أدى التحيه

سامي: تخرج انت و ٣ زمايلك تتأكد انهم اتحولو للطب الشرعي و انا هبعت جواب يستعجل الإجراء ، و اسمع اذا حصل أي حاجه هتكون في رقبتك انت فاهم

أدى التحيه و أمسك الأربعه بعد أن كبلهم بالأغلال ، خرجو و أنا اشعر بالدم يغلى في عروقى ، إن كان كلام "سيد" صحيحا فيجب على أن أحقق مع "يارا" فموازين القضيه اختلفت تماما الآن ، جلستُ و حاولتُ الهدوء ، لحظات حتى وجدتُ هاتفي يصدع ، ابتسمتُ و حادثتها

سامي: ست الكل صاحيه بدري

سمعتُ صوتها المليء بالنوم

رحمه: وحشتني

ابتسمتُ

سامي: و انت أكتر

رحمه: هتاخدني امتى النهارده ؟

سامي: هعدي عليكي على المغرب كدا

رحمه: طيب ممكن تتأخر شويه ؟

سامي: شوف مين الي كانت بتقول وحشتني

ضحكت و ابتسمتُ على ضحكها

رحمه: لا طبعا انت واحشني جدا ، بس بعمل كام حاجه هتخلص على العشا ، عشان متزهقش من القعده

ابتسمت

سامي: هتصبغيه أحمر و لا اخضر المرادي

ضحكت بهدوء

رحمه: لا هيعجبك المرادي ، متنساش و انت جاي تجيب بامبرز لورد

سامي: ايوا بامبرز و عيش فينو ، ها أيه كمان

رحمه: و حاجه حلوه من الي بتجيبهالي كل مره

سامي: عنيا الاتنين بس كدا

سمعتُ الباب يطرق و دخل علىّ من يبلغني أن "يارا" أتت ، انهيتُ المكالمه مع "رحمه" و جلستُ متأهبا ، لم أتت الآن ؟ ، دخلت علىّ و ملامحها متغيره ، هناك شئ ما فيها ، هذه ليست "يارا" البريئه التي رأيتها أول مره ، جلست بهدوء و ناظرتني

يارا: هو على و سيد هم الي عملوها ؟

سامي: لسه بنحقق

يارا: أكيد قالكم حاجات محصلتش صح

ناظرتها بهدوء و ظللت أسمعها

يارا: أكيد قالك اني سكرت بنفسي صح

سامي: و أيه الي خلاكي تقولى كدا

صمتت قليلا

يارا: هو مقالش كدا

اعتدلت و أسندت يدي على المكتب ناظرها لها بحده

سامي: في إيه بينك و بين على و سيد

يارا: مفيش حاجه

سامي: اذا متكلمتيش حقك مش هيرجعلك

يارا: يعني أيه ، هو مش انت وظيفتك ترجعلي حقى

سامي: اتكلمي يا يارا

ناظرتني بخوف شعرته من لغه جسدها

يارا: أنا مكنتش أقصد إن يحصل دا كله

ناظرتها باهتمام و أشرتُ لها أن تكمل

يارا: لما على قرر يبعد عني حاولت أقنعه بس مرضاش ، عرفت إن عنده أخت قربت منها و صاحبتها بس بمجرد ما عرف زعقلي و زعقلها ، قررت أعمل حاجه تانيه

صمتت قليلا ، نهرتها حتى تتكلم ، فزعت و بدأت تتوتر

يارا: مكنش قصدي يحصل دا كله

سامي: عملتي أيه

يارا: سلطت عليها واحد أعرفه يخوفها و يخوفه شويه ، بس تقريبا حليت في عينيه و أذاها

صمتُ قليلا اتدارك ما قالته

يارا: و الله مكنش قصدي

سامي: إن تدين تدان ولو بعد حين

بدأت تبكي

يارا: محدش يعرف حاجه حتى هو ميعرفش إني كنت السبب في أذيته ، الراجل الي سلطته عليه بوظله شغل أبوه و خلاهم على الحديده

سامي: سيد شَهَد إن على و الباقيين اتنابو عليكي ، و هو الي فَوَقِك

ناظرتني بصدمه و بدأت في البكاء ، ناظرتها بتقزز

سامي: انا اعتبرتك زي اختي ، التحقيق مخلصش يا يارا ، القضيه هتتحول من إنك المجني عليها المجني ، و قبل ما تطلبي الرحمه و السماح من القاضي ، اطلبي الرحمه و السماح من ربنا ، عشان انت معملتيش قليل

ناظرتني و الندم يشع من عينيها ، أشحت بنظري عنها و تأكدت من كتابه الظابط لكل شئ ، أشرت لها أن توقع تحت أقوالها و أمرتها بالخروج ، خرجتُ من المكتب و قلبي يؤلمني ، أنا في المهنه منذ ٨ سنوات ، رأيتُ و سمعتُ مالم يخطر على بال أحد ، ولكني اليوم و لأول مره أشعر بالألم في قلبي ، أصبحنا نستهين بخواطر الناس بل و نضع شرفهم تحت الأرجل ، هذه الفتاه الصغيره أخذ الله حقها دون أن تعرف ، ولكن ستعرف الآن ، سينال الجميع ما يستحق
__________________________________

..(عزه)..

الجميع يزور "مها" و أنا لا أنفك عن البحث عن تلك الطبيبه ، تدخل الغرفه كل أربع ساعات ، إنها السابعه مساءا و الجميع هنا ، دخلت الطبيبه و ألقت التحيه بهدوء ، عينا "محمد" عليها لا تبتعد عنها

سما: بصي أنا عاوزه أسألك سؤال بس محرجه

نظرت الطبيبه لها باهتمام و ابتسمت

سهام: لا خالص براحتك ، اتفضلي

سما: أنا بشبه عليكي ، شفتك قبل كدا فين

ابتسمت

سهام: ممكن في الجامعه ، احنا بتعدي علينا دفعات و احنا لسه متخرجناش ، احنا تقريبا في سن بعض

سما: ممكن فعلا

ناظرتني بسرعه و التفتت "لمها" ، ظللتُ اناظرها و أناظر "محمد" حتى انتهت

سهام: مها في تقدم ملحوظ جدا ، إن شاء الله بكرا هتتابع معاكم دكتور عبير مكاني الصبح و هكون معاكم في شفت بليل ، وهي هتكون معايا في كل خطوه

وقفتُ و ابتسمت

عزه: بصراحه مش عارفه هنقضي الكام ساعه دول ازاي ، دا محمد حبيبي مركز معاكي أكتر من أي حد

ناظرتني بهدوء و أعادت النظر "لمحمد" ، مررت عيناها سريعا على الجميع و أخفضت عيناها

سهام: بالشفا ان شاء الله ، عن إذنكم

جلستُ و ناظرته بتحدي ، وقف أمامي

محمد: انت مش هتلمي الدور بقا

عزه: مش لما تلمه انت الأول يا عم فلانتينو

نظرتُ لحماتي و "سما" و ابتسمتُ

عزه: أه صحيح انتو متعرفوش ، أصل محمد بيخوني

وقفتْ حماتي بسرعه و ناظرتني بحده

نادره: احترمي نفسك

عزه: انا بردو الي احترم نفسي ، ولا ابنك الي شغال يجري ورا ست الدكتوره زي الكلب المسعور

شعرتُ بألم في وجنتي ، وضعتُ يدي على وجنتي لأتدارك أنها قد صفعتني

نادره: اياكِ تقلي أدبك تاني يا عزه

وقف أمامي يناظرني بحده

محمد: انت عارفه أنا قلت هتخافي على جوازنا و تتعدلى بس لا ، انت مفيكيش فايده

عزه: يعني انت الي خفت على جوازنا يا محمد ، انت الي رايح تعرف عليا واحده تانيه

محمد: انت طالق يا عزه

صمتُ قليلا اتدارك ما سمعت ، لقد تفوه بها

عزه: انت اتجننت

محمد: هقضي فتره نقاهه مها عند ماما ، ورقتك هتكون عندك بكرا ، ياريت أرجع البيت ألاقيكي خدتي حاجاتك كلها ، و متقلقيش مؤخرك و عفشك الي شارياه هيجيلك ، ممكن تحطيهم في شقه من شققك الي بابي اشتراهم لك

وقفت حماتي أمامه

نادره: محمد انت مستوعب انت بتقول إيه

ناظرها

محمد: اه مستوعب ، كفايا بقا

نظرتُ "لمها" النائمه و لهم مره أخرى ، خرجتُ دون أن أعي ما أفعل ، سقطت دمعه من دمعاتي على وجنتي ، رأيتها تلك صاحبه المشاكل في حياتي تشرب كوبا من القهوه في ردهه المشفى ، مسحتُ دمعاتي بعنف

عزه: و الله لأوريكي يا سهام

.

.

.

.