رواية نبض دافي الفصل العاشر 10 - بقلم Nabá baqer

نبض _ دافي

Nabà _ Baqer

الجزء الثالث عشر......

_________________________________

نُصقطِكُم من حيث رفعّناكم
ونُطويكُم طي الصُحف أنِ وجب !

___________________________________

رجعت للبيت واني بداخلي فرحه وكسره
فرحه لان خلصت واخيراً من هذا الكابوس الجنت
عايشه بيه
وكسره لان واني بهذا عمري الي حتى بعده مصاير عشرين صرت مطلقه ونكسرت من اقرب الناس الي

مهيمن الطريق كله يسب ويغلط و ولد عمي جانوا بس
يلومون بأبويه لان انطاني لهيج ناس ماتستحي

وابوي خطيه جان ساكت ويسبح بسبحته وعينه على الشارع ومافتح حلكه بولا كلمه...

وصلنه لرأس الشارع شفنا مسدود حفريات
لفنا من الافرع ودخلنا بنفس الفرع اللي جنه نفوت منه
من انروح للدوام...

السياره تمشي واني ذكرياتي مستمره بالمرور كدام عيني ... عبرنه الأسواق اللي جان دائماً حسين يشتري منها... رجعت قريت الاسم مثل عادتي
قبل كل ما افوت
ارفع راسي واقره الاسم(اسواق الياسر ) .. مو بس هذا المحل ... كل المحلات اللي تصادفني اقره أسمائها
هاي عادتي من اني صغيره وبقت وياي للكبر ...

دخلنه لفرعنه شفت الجهال جانت تلعب طوبه ومنير وياهم بس شافنه بسرعه راح يركض للبيت

نزلت من السياره ودخلت للبيت واسمع منير يصيح

اجت عمه ... اجت عمه

بداخلي كلت اليسمعك يكول جايه من الحج

طلعت سوسن وامي اجن حظنني وامي خطيه دمعتها على خدها وصيح
الله يعوضج يمه لا تنقهرين.. الله يرزقج اللي يفرحج ويستر عليج..

بوستها ودخلت لغرفتي واني مالي خلك احجي الحرف
بدلت ملابسي وكعدت ابجي على
حظي واردد
.... الحمدلله على كل حال
اندك باب الغرفه بسرعه مسحت ادموعي وسويت نفسي ارتب بملابسي  وصحت
.... اتفظل

دخلت مرة عمي هي وبتها وجنتها
اني شفتهن واني عرفت نفسي هاي هيه بعد ما اخلص
من حجيهن وبساميرهن...

شلونج عمه نبض لا ضوجين يمه انشالله ربج يرزقج بالي احسن منه اني البارحه سولفلي عمج والله يمه تفطر قلبي عليج الله لا ينطيه شلون مذبلج و ماسح حتى ابتسامتج...

هاي جانت مرة عمي تواسيني عود جاوبتها
تسلمين عمه
ورجعت سألت بس نظرة العطف انشالت من ملامحها وصار مكانها نظرة استفسار على فضول ماعرف شلون افسرها

.... اكلج عمه انتي خوماطلعتي وياه؟؟؟ !!!!!!!!!!

جاوبتها واني صافنه على سؤالها 
لا عمه بس من عقدنا محكمه رحنه تغدينه بالمطعم

ايي زين عفيه عليج ..زين من جان يجيكم جنتوا تبقون وحدكم؟؟؟؟؟ !!!!!!!

... لا عمه مهيمن مايقبل لهذا جان حسين وصباح يكعدون يمنه وهو اصلاً اجاني بس اربع مرات مجان يجينا هوايه...

هاااا ايي احسن ... يمه انتي موزعلين مني بس اني سألتج من خوفي عليج وانتي وحده من بناتي اعتبرج لهيج اني ردت اطمن عليج...

سكتت ماجاوبتها بس هزيت راسي وبعدها نطت الساحره الشريره فطيم

... اكلج نبض عود صدك هسه انتي صرتي مطلقه !!!!!
اووووي خطيه انتي والله بعدج اصغيره وطلكتي

جاوبتها بحده والغصه متكسره بلعومي

فاطمه انتبهي لكلامج واسلوبج اني مامطلقه لان لاسويت عرس ولا زفه هو عقد وفسخنا وكلمن راح لسبيله

حجت جنتهم... ايي بس انتي عاقده محكمه يعني لازم تتطلكين عند القاضي وهم راح تعتبرين مطلقه حتى لو ماكوا دخله ولا عرس...

اسمع كلامها وابدي اكوم املخها...

زينب هذا كله ميخصج أن جنت مطلقه او غير مطلقه مراح تنظرين بشي لهذا رجاءاً اريد انام ممكن

طلعن واني مخليت شي ما شمرته وراهن المخاد و الورد احس داخلي نار تغلي واريد بس اطفيها
ميته قهر و محد ماحاس بيه بس للشماته جاين علي

شمرت نفسي على السرير وصرت ابجي واناشغ
واردد
..... اريد ارتاح كافي اريد اموت ربي فدوه اخذني يمك... تعبانه واريد اشوفك ربي فدوه موتني

اليوم كله بقيت حابسه نفسي بالغرفه لا اكل ولا شرب
وفكرة الموت امسيطره على عقلي بس ما اكدر انفذها
خوف من رب العالمين لا يذبني بالنار... وتروح كل صلاتي وعبادتي واخسر الدنيا والاخره

بس بنفس الوقت جنت تعبانه واكو هوسه براسي
واريد بس ارتاح... اريد هدوء...

استمر انعزالي على ماهو عليه بس جنت اطلع وقت الوجبه اكل لكمتين وارجع انام
كرهت الدنيا كلها...
الجوارين عمرنا ما اختلطنه وياهم بس من فصخت لليوم وهمه يوميه جايه وحده تسأل
لو من يشوفون امي بالشارع يسألونها
حتى منير هذا الطفل هم مره سمعته يكول لامه

.... ماما صدك عمه صارت مطلكه لان خطيبها مدري شنو شاف عليها وعافها !!!!!!!!!!

اني سمعته واني احس انظربت على راسي اريد اوكف على رجلي ماكدر بيه ومابيه رحت لغرفتي وقرفصت بالكاع واني احط ايدي على ذاناتي حتى لا اسمع اي شي ...

ليش هيج ياربي ليش ... لييييييييييششش

كاااافي تعبت وحق السموات تعبببببببببت
ربي فدوه اخذني عندك وخلصني...

وعيت على نفسي واني جنت اضرب براسي بالحايط
بسرعه استغفرت رب العالمين وكمت أخذت ملابسي ورحت سبحت وشطفت واجيت اصلي لان صارلي أسبوع بدون صلاه واحس الشيطان استحوذ علي

صليت وقريت قرءان ورجعت اختمه بعد ماجنت متوقفه وقررت اشيل فكرة الموت من راسي
لان هذا كله اختبار من رب العالمين ولازم اكون كده
واتعداه واني ناجحه..
ثاني يوم جان لازم انروح للمحكمه حتى نطلك رحنا اني وابوي واكيد مهيمن وكلنه محامي جان شاب صغير هسه متخرج باوعلي ومن شكله انقهر علي لان بعدني صغيره ...

حجه ويه بابا كله خلي الأخت تستريح هنا وتعالوا وياي كعدت اني على الكرسي وهمه راحوا ..
بقيت عيني على الناس الموجوده شكد شباب صغار مع الاسف جاي يطلكون وبنفس الوقت اكو بيهم جاي يعقدون الاعمار كلها صغيره وناعمين ليشوفهم ميحط عليهم جاي يزوجون... ماعرف على شنو مستعجلين
على طياح الحظ لو على شلعان القلب...
بقت عيني تتبع كل ثنين كامشين ادين بعض واراقب تصرفاتهم وفرحتهم ...
لحد ما اجه المحامي وياه ابوي ومهيمن صاحلي
كلي دخلي للقاضي دخلت
سألني القاضي

تردين الطلاك  بأرادتج لو احد جابرج
جاوبته لا بأرادتي
رجع كلي تتنازلين عن كلشي
جاوبته نعم
تم الطلاك
طلعت من يم القاضي لاكاني مهيمن سأل المحامي الجان وراي

... هاا 
جاوبه المحامي
هاي هيه تم الطلاك
زين هسه هيه تعتبر مطلقه لو شنو
المحامي ... لاا ابد وهذا عقد الزواج وشكيته كدامكم ولا تعتبر مطلقه ولا شي بس فاصخه لان هي ممحوله جنسيتها ...

اشكرك حبيبي

ولو هذا واجبي راح المحامي واحنه طلعنا ورجعنا للبيت بقوا همه يسولفون لأمي شصار واني رجعت لعزلتي....

الولد صرت ما التقي بيهم ابد كارهتهم كلهم لان من البدايه عرفت مدامه صديق حسين مراح ارتاح وياه
بس همه وافقوا واصرو عليه لان عمتهم المضاهر والفلوس والبيت العالي والسيارات الحديثه
وهاي النتيجه كلهم عايشين حياتهم بس اني الوكعت بيها... عمري مراح اسامحهم

بعد فتره تقريباً شهرين بيوم اجه مهيمن فرحان على غير عادته وطبعاً الي كالتلي هي مرته لان اني كلش مقاطعتهم...

من كلتلي كلت يالله عسى دوم الفرحه

العصر مثل عادتي جنت كاعده وحاطه يدي على خدي لان الكهرباء جانت طافيه وماكو TV اخلص الوقت عليه
و فوني اخذه مني مهيمن من فصخت وكسر الشريحه كدامي وبعد ما رجعلي اياه ...

اجه علي منير للغرفه
... عمه بيبي اصيحج
...ايي حبيبي اجيت
رحت لأمي بالاستقبال جانت كاعده وحاطه سراج بحظنها تنومه ومنير جان يحوس يريد بس يطلع بالشارع باوعتله وبتسمت

هاا ولك منيرو شبيك تحوس جنك عجوز ماكلين عشاها

عمه فدوه كلي لبيبي اريد اطلع العب ويه اصدقائي طوبه
رجعت باوعت لأمي... ماما خطيه عوفيه يطلع لوهذا هم بنيه ولازم ينحبس...

... نبض يمه كافي ورجعي مثل قبل وهذا واسلوبج
بطليه... وانته منير بيبي اكعد لا يجي ابوك ويشوفك بالشارع ويسويلنه حفله.. ماريد مشاكل اكعد واسكت

اني بقيت ساكته ماجاوبتها بس خطيه منير قهرني كعد بالعتبه وصار يبجي...

بقيت منتظرتها تحجي اريد اعرف ليش صاحتلي
عاد هي طلعت فلوس من جيبها ونطت لمنير يروح يشتري ويرجع بس كون يسكت

وشالت سراج وحطته بحظني

كومي اخذي ابن اخوج حطيه بفراشه وتعاي يمي
كمت سويت مثل مكالت ورجعتلها

ايي ماما احجي شكو ؟

امي طلعت سبحتها صارت أسبح وتباوعلي وتبتسم واني اعرف هاي الابتسامه شنو معناها الله يستر

يمه انتي إلى متى تبقين حابسه نفسج وذبلانه تره محد يستاهل تسوين بنفسج هيج والراح الله وياه
هو الخسران موانتي...

اعتبريه انعال ونكطع وذبيتيه ولازم اجيبين غيره واحسن واحلى منه...

ضحكت على تشبيه امي بس خوفني الي فهمته من كلامها...

ماما تره الي صار موشويه حياتي كلها ادمرت ونهدمت شلون ترديني انسه وارجع مثل قبل وكأن شيئا لم يكن

ميخالف بنيتي الحياة تجارب ولازم نعيش هيج تجارب حتى نتعلم واصير عدنه خبره بالناس وبالحياة
والمثل يكول الوكعه الي ما تموتك تقويك ...

لعد شلون تردين تتعلمين وتعيشين بهاي الدنيا يابنيتي
تره مثل ماكو الحلو والوردي اكو المر والاسود

وهسه عوفينا من هذا الحجي لان الراح راح ومايفيد الحجي بيه لازم تعوفينه وره ضهرج وتكملين حياتج
بس ماتنسينه وتخلينه دائماً ابالج وتتعلمين من اخطائج
وتحاولين تتلافينها وما تكررينها بعد زين يمه

انشالله ماما راح احاول بس ماما من هسه اكلج زواج بعد ماكو لو اموت بعد ما ازوج ولا تفتحون هذا الموضوع وياي...

هذا موحجي شنو قابل تردين اضيعين شبابج والله شنو مريتي بتجربه ومانجحت لا يمه هاي سنة الحياة
لازم تزوجين وتعيشين حياتج لان محد دايملج لا اني ولا ابوج 

طولة العمر الكم ماما لا تحجين هيج فدوه

نبض ماما تره انتي موطفله وتعرفين الموت موبيدنه بيد رب العالمين  و محد يعرف ورقته شوكت اطيح
وخوانج كلمن عنده حياته مهيمن عنده عائلته ومحتار بيهم وحسين بده يشتغل وهم باجر عكبه يزوج ويلتهي
بمرته وصباح هالعايفنا ولا سأل عن واحد بس الروحه

لهذا بنيتي اريد اشوفج ابيتج حتى ارتاح واطمن ماريد بالي يبقى مشغول بيج اريد احط راسي عالمخده واني مرتاحه...

بقيت ساكته وماعرف شكلها امي تريد تطمن علي وهذا حقها بس اني بعدني ماملتئم جرحي ولا متعافه كسر روحي شلون ارجع افكر بالزواج واني كرهت جنس آدم كله ...

صديق اخوج اليوم اجه وفاتحه يريدج لاخو مرته يكول خوش شاب صغير وحلو وبن عالم وناس والولد شاغول وشايل حمولته صح هو ماعنده شهاده بس عنده شغله
يشتغل طباخ بالاعراس والفواتح والمناسبات الدينيه

اخوج كلي افاتحج بالموضوع حتى يجون النسوان باجر يشوفوج... اريدج ترتبين نفسج وتلبسين أحلى ماعندج
زين يمه ...

هزيتله براسي وكمت
واني اليحاجيني ابجي مقهوره وخايفه لا يرجعون يجبروني شلون ياربي ...

بقيت كاعده وكالساع تجيني أفكار جهنميه شلون اشردهم آخر شي فكرت اسوي مثل ياسمين عبدالعزيز  بفلم حاحا وتفاحه من كفشت شعرها وصخمت وجها وصارت تمشي اعوج ... بس اذا سويتها معناها اقره على نفسي الفاتحه لان هذول نسابته صديق مهيمن واكيد مراح يسكتلي...

هسه شون ياربي شون...

بقيت اجيبها منا واوديها منا لليل دخلت علي سوسن

لااا  ماصدك  صدك جذب هذا وجهج لو القمر دخل علي
عاش من شافج صايره عمله نادره ماتنشافين إلا بالمناسبات القويه...

اووووي نبض عفيه لا اصنفين علي بدون شي اني كارهه روحي
ليش ولج قابل انتي الي راح يجوج خطابه باجر...

سوسن المعنفصه جاوبتني وهي تنام بسريري... هاا كلتلج عمتي

كمزت عليها... يااا ثوله ياعوبه هاي انتي تدرين وماكتيلي..

هو اني شفت دربي حتى اكلج كملت غده منا رحت لاهلي منا وهاي جيتي منهم ...

زين شبيج معنفصه موعادتج ترحين لاهلج وترجعين هيج خلقتج مكلوبه...

ايي غير حظي لاغبر واخوج ثنينهم اتفقوا علي ..

اويلي صار بيها حظ ومهيمن يعني مغامره وتشويق سولفي حبي سولفي...

سوسن كعدت وتربعت واني كعدت كدامها وبقيت اسمعلها...

هاي صارلي فتره غايبتلي واني مامهتمه لان بعدني ارضع بسراج ومتأكده ماكو حمل واخوج عاجبته السالفه وماخذ راحته وماخذني اكباله لحد ما البارحه

بنص العمليه وصرت انزف خطيه هو كام مفزوع وخاف بس اني طمنته حسبالي الخاتون نزلت علي .. هو ضاج لان كطعت عليه رزقه بس ضهري موتني وجع واليوم زاد النزف عاد وداني لاهلي امي أخذتني لطبيبتها

النسائيه ومن فحصتني جان اطلع حامل والطفل مهدد بالاسقاط...

ولج نبض من كلتلي حامل احس الدنيا اسودت بعيني
ودمعتي صارت بطرف عيني وفوكاها امي شبعتني رزايل... لان كتلها مو وقته هسه سراج بعده صغير وحتى ما فاطمته من صدري شلون يصير هيج ...

الطريق كله جابته رزايل وكملت السبحه من اخوج عرف بيه حامل ومهدد بالاسقاط  صارت الرزايل تنزل علي من كل حدب وصوب...

يااااااا سوسن حبي فدوه انتي حامل وراح ارجع اصير عمه اووي فدوه مبروك حبيبتي بس عفيه جيبيلنه بنوته حلوه...

نبضو بيج شي عزيزتي يعني هاي الجريده كلها الحجيتها وماعلقتي بس على حملي ...

ايي شبيج انتي طبعاً اعلق بس على حملج لان هذاك كله حياتكم انتي ورجلج مالي دخل بيها...

بس سوسنو فدوه حبابه جيبيلنا بنوته حلوه كيوت اكعد العب عليها حبابه مارنيد ولد بعد كرهتم وكرهت حتى سيرتهم...

ايي مواني بكيفي بس ادوس الدكمه تجيني بنيه شبيج انتي جنج زعطوطه هو غير بيد رب العالمين وشيجي من الله انعمالله بس اني هسه افكر بسراج حبيبي لازم افطمه وهو مايتقبلها للمميه...

عادي يتعود بس عوفيه على أمي هي تعوده وبعدين هاي هيه قابل لطلاط بالقرءان مذكور ...
(فطامهُ في عامين )
وانتي ابنج راح يصير ٣ اعوام مو عامين...لو انتم آل مهيمن كلشي عدكم اكباله وغمزتلها...

ههههههه عابتلج ولا ينحجي يمج شي يلاا خليني أروح لغرفتي هسه يجي اخوج يكمل مسيرة الرزالة مالته

راحت هي ..
واني بقيت الليل كله افكر شلون اطفشهم شلون
من التفكير صار عندي ارق وبقيت لحد ما طلع الضوا اني كاعده بعدها نمتلي شويه وكعدت على هوسة منير هليام كلش متوكح لان ميخلونه يطلع بالشارع فيكلبها علينا ساحة قتال وبالعناد طبعاً يسوي هيج..

كمت اسحل بروحي سحل ميته نعاس اريد انام بعد
باوعت للساعه شفتها بالعشره
لا يالحمزه هاي شبسرعه هسه قبل لا انام شفتها جانت بالخمسه اووف...

طلعت من الغرفه واجتني ضربه على راسي بالطوبه
هاي هيه كملت هو منا هاكبره من التفكير والسهر وهسه كملت بضربه...

اسف عمه مااقصد..

منيرو اكعد راحه ترا صايره فلم هندي وماناقصني دوختك..

ماكعد اله تخلين ماما توافق اطلع بره

هاا يعني اعناد لو تهيم بالشوارع لو ماكوا تخبصنا بوكاحتك..

ايي

لعد اذا هيج ماكوا طلعه وحتى لو امك قبلت اني ما اخليك وهاي طوبتك اله اشكها الك واريد اشوفك شلون تلعب بعد ...

أخذت الطوبه وشكيتها بالسكين وشمرتها بالزبل وهو صار يعيط عبالك ميتله أحد.. عفته ورحت غسلت وحطيت القوري على الطباخ وسويتلي بيضه عين
ورحت اتريك يم ال TV  بالاستقبال..

شبيج ويه الطفل يمه حاطه عقلج ويه عقله..

هوو اني لو هو بس طلعت من غرفتي ضربني براسي وفوكاها احاجيه يكلي اعناد بيكم شلون متخلوني اطلع بالشارع دشوفي الشمس شلون تضرب بالراس وهو جنه مطي يريد يطلع ...شكيتها وحل ..

امي ماقبلت علي بسرعه صاحتله وطلعت فلوس من جيبها ونطته..

هاك بيبي روح جيبلك وحده بس العب بيها بدون صوت
عفيه بالسبع ..

أخذ الفلوس وباوعلي وهو يهز بحواجبه
لا يانذل بسيطه اله اشكها الك اصبرلي...
وانتي يمه دلليه بعد وبعد خليه يشيخ علينا

ليش ما ادلله ابن ابني وحفيدي البكر بس كولي انتي تغارين وماتردين الدلال بس الج ..

هاا هاي اني .. اكوم منا احسنلي لان اذا ابقه يمكم انجلط أخذت صينيتي ورحت لغرفة مهيمن واني جني ام البزازين كلساع بمكان..

دك دك دوك.. احم احم يهل الدار وينكم ..

هناا هناا فوتي ياهلا اليوم شمسج عاليه شكو

اهوووو سوسنو لا تبدين انتي الثانيه كافي علي ابنج رافع ضغطي...

شبيج وياه سمعت صوتكم بس مابيه اكوم ضهري كلش مأذيني واخوج امسوي علي حظر تجول
ممنوع اتحرك

مابينه شي عادي ضربني وشكيت طوبته والبيبي الحنونه راضته وراح يشتري غيرها وهم راح ارجع اشكها انشالله...
بس انتي كليلي شلون بيج تبقين هيج نايمه ترا البيت مو حلو بدونج ...

ياروحي انتي شسوي بعد هاي لازم ابقه نايمه لحد  ما تعدي مرحلة الخطر  بس انتي شلون بيج اليوم يجون النسوان واحنه ماعدنه ضيافه ولا مختاره شتلبسين

اوووي شوفي النسوان الشايله همهن... لا تخافين
الضيافه اي شي حتى لو كيك ابو الربع اقطه ونطيهم اياه ... واذا على اللبس
البس اي شي حتى لو هاذا ثوبي اطلع بيه (جنت لابسه ثوب حاضر ربع ردن ومابيه بس خرطه من الصدر والقماش صيفي بارد وماباقي لون بالكوكب ماحاطينه بيه يعني بختصار زرق ورق ) ....

خرب اعرفج راح اطفشينهم زين وجهج شوفيه شلون ذبلان والسواد جوه عيونج عيب اطلعين هيج جنج
سجينه باكستانيه طالعه بكفاله....

قهقهقه ترا مظحك نكتج لان بايخه مثلج يلاا جاو اروح
اسوي غده و وجهي هذا يعجبهم اهلاً وسهلاً مايعجبهم يضربون راسهم بالطوفه على كولة الخليجيين..

طلعت منها للمطبخ كبل سويت الغده واذن صلينا وصبيت ألهم
واني وسوسن اخذت صينيتة الغده واكلنه سوه بغرفتها بعدها سبحت وبوجهي للمخده نمت ماصحيت غير لما ماما كعدتني لان خابرو راح يجون...

كمت واني اتململ غسلت وجهي ورحت طلعتلي ثوب عادي مال بيت اسود ومنقط بأبيض لبسته وظفرت شعري وحطيت عطر ورتبت حواجبي بأيدي لان رجعن
لشكلهن القديم خصوصاً اني ماحفيتهن بس مرتين
وبعد بطلت ما اسويهن...

سمعت صوتهن اجن يسلمن طلعت أخذت الصينيه ودخلت عليهن صارن كدامي ٣ نسوان لابسات عبي زينبيه وحده عجوز مبينه امه وثنين مبين عمرهن  بالاربعين ولا بسات الذهب كله ومبين من لهجتهن
من الجنوب..

بوستهن وضيفتهن وكعدت وهنه كصني كص سونار ماشالله عليهن مو عيون شوكت ما ارفع راسي الكاهن مركزات بيه... ماتحملت خليت وطلعت وعفت امي منطلقه بالكلام وياهن عبالك تعرفهن من سنين..يتبع

________________________

رأيكم مهم ...
وتوقعاتكم تفرحني...
لهذا لا تبخلون علي بيهن...

Nabà Baqer

Dan ❤😘