رواية نبض دافي الفصل التاسع 9 - بقلم Nabá baqer

نبض _ دافي

Nabà  _ Baqer

الجزء الثاني عشر.......

بدون تجريح بالكلام ولا تجاوز لطفاً وليس امراً ✋😔

__________________________________

انا لم اعد أحبك بعد الآن ....
Seni sevmiyorum artik...🤚💔

_____________________________________

من بعد هذا اليوم اني وأسامه وضعنا اتغير
ومكالماتنه قلت وحتى اذا خابر شويه ونسده
بس على كد السلام واللي شلونج شلونك وبعدها
انسده...

البرود احتل علاقتنا من الجهتين اني بسبب كل هاي الهوسه اللي صارت بس
هو ماعرف شبيه فجأة اتغير صار يتماده بكلامه وياي ويطلب شغلات سخيفه وصور

يكلي صوري نفسج ودزيلي
ومن ارفض يصير يصيح ويغلط ويسب وهذا السب صار عنده مثل السلام ما ينزل من السانه...

وكل كلمه والثانيه وكال ...

بت المطي انتي شايفه نفسج عليه وحاسبه نفسج اليسا لو شيرين هو انتي كلج وحده معقده فاهيه وفوكاها
تتعزز وتدلل...

اني ما اتحمل هذا كلامه ولا اعرف ارد عليه لهذا اسده واخلصها بس بجي لحد ما تتعب عيوني وانام...

حالي اتغير ضعفت وذبلت وعيوني شوكت ما اشوفهن امورمات ومنفوخات من البجي والقهر...

صرت احس نفسي عايشه بسجن وماعندي حل يا اطلع من هذا السجن لقبري او ابقى حبيسة هذا السجن...

ماعندي بس صلاتي وقرءاني ورب العالمين اللي تقربت منه بهاي الفتره كلش وصرت اخلص وقتي اصلي واستغفر.... وحتى اخلص من واقعي صرت اللجاء اقره ختمات قرءانيه ختمته مره وهسه بديت بالثانيه....

  جنت كاعده على سجادتي واقره بسورة البقرة
بنهايتها كملتها بيوم واحد من بعد ماجنت اجزئها ليومين...دخلت علي سوسن اشرتلي اقطع القرائه
اني صدقت وحطيت المصحف بمكانه وباوعتلها بدون ما احجي بس منتظرتها ادكول اللي عدها.....

.... نبض حبي عمو والولد يردوج بالاستقبال

اشرتلها براسي وكمت نزعت الحرم ولميت شعري بايدي حطيته وره اذني وشفت نفسي بالمرايه متغيره كلش

اني مو اني صاير شكلي اكبر من عمري والسواد داير عيوني...حتى لبسي هملته جنت لابسه دشداشه جوزيه حاظر ورداناتها طويله وعريضه وشكلي مبهذل...

دخلت للاستقبال شفتهم كلهم كاعدين حجيت بس بلاعيمي وجعني وطلع صوتي مبحوح لان صارلي فتره قاطعه الكلام وبس حابسه نفسي بالغرفه...

نعم بابا صحتلي؟؟؟

ايي بنيتي تعاي كعدي يمي وكليلي شبيج ليش هيج حالج وين نبض اللي كلها حياة وجمال ليش هيج ذبلانه

باوعتله وحجيت بكلبي جان بعد وقت يابه هاي صارلي 6 اشهر اني حالي يوم عن يوم يسوء وانته هسه يالله جيت تسألني شبيه !!!!!!.... بقيت ساكته وماعرفت شكله او بمعنى اصح منين ابدي لو بشنو انهي...

من الغلط والسب لو من الشرب والبنات.!!!!!!!!!

ايي اكتشفته يشرب ويصاحب بنات
البارحه خابرني وهو مايدري بروحه من الشرب ويمه اصوات بنات وضحك وكلام يقزز اشمئزت نفسي منه أكثر وأكثر....

حسين حجه ... نبض شصاير اسامه مختفي صارله فتره والبارحه بين وجان وضعه مو طبيعي كليلي ولا ضمين علي اكو شي احنه ما نعرفه...

اني هناا بعد ما تحملت ونفجرت عيوني بالدموع وصوتي بالنحيب صرت ابجي بكل حركه و وجع
كلهم خافوا ولتموا داير مدايري واني الكلمه اريدها تطلع ما اكدر من البجي...

استمريت بالبجي لحد ما ارتاحيت وهديت وبعدها كعدت وسولفتلهم كولشي ... كولشي مبقيت حتى على الشرب والبنات همات سولفت وياريتني ماسولفت

بعدني ما سكتت وماشوف بس مهيمن وحسين هدو حسين طلع فاير من الاعصاب ويمكن راحله ومهيمن هد علي ضربني راشدي(كف ) على خدي وعيني وحلكي من كد ما جفه جبير على وجهي غطا نص وجهي...

وصار يغلط ويسب..

.... كلبه حيوانه كل هذا وساكته ليش ماتحجين ليش ما دكولين شنو شايفتنه خوان لو زمايل حتى ما حاسبتلنه احساب بس انتي حيوانه وساكته وقابلتها على نفسج ... هد علي واني قرفصت على نفسي وضميت راسي بين رجلي والدموع واشهكات مستمرات

بعده ابوي مني اللي شفته جان كله يرجف وحسيته راح يوكع علينا... أخذني لحظنه وحطاني على رجله وصار يمسح على راسي....

.... ليش بنيتي ما حجيتي ليش بقيتي ساكته ومتحمله كل هذا ؟؟ لج يابه اني شعندي غيرج اذا صار عليج شي لو مزوجه هذا النذل ومأذيج لو اموتج اني شحجي شكول

.... واني ابجي وحالتي حاله ... يابه شحجي وانته شفت بعينك مهيمن شسوه بيه من انخطبت لليوم وهو يسألني شوكت ازوج عبالك حمل ثقيل عليه وحتى من بطلوني من الدوام هم محد حجه وبقيتوا ساكتين وراضين ومن اجت امه هنا وهانتني وكلتوا راح نفصخ
وفرحت وعبالي راح اخلص بس هم رجع مهيمن وتنازللهم وكمل ولا كأن اي شي صاير ... كلي يابه اني بهاي الحاله شسوي من اشوف اهلي بايعيني ومرخصيني شتريدني احجي لو اصرف....

.... كله مني يابه كله مني سامحيني بنيتي اني السبب بكل هاي دموعج وحالج بس من اليوم بعد ما اخلي أحد يتحكم بيج من اخوتج اني راح اصرف بعد وفنه اللي يفتح حلكه وياج ... بس اريدج اي شي يصير وياج تجين ادكوليلي وما اظمين علي شي .. ماشي بنيتي ....

هزيتله براسي وهو باسني وشال راسي من حظنه حطه على الكوشه وكام وهو تعكز على الحايط واني عيوني اتابعه لحد ما طلع من الاستقبال غمضت عيوني وصار كولشي يمر كدامي مثل الشريط حطيت ادي على ذاناتي ماريد .... ماريد اذكر اي شي صرت اهز براسي

مثل المخبله... يمكن اتخبلت بوقتها لان صرت اصرف تصرفات ما موزونه اجتني سوسن ....

نبض شبيج حبيبتي كافي يروحي كافي

ولج شكافي شوفي حالي شوفي شون حياتي خربت
ادمرت حسبي الله ونعم الوكيل  ... حسبي الله ونعم الوكيل.... 

بقيت ابجي وارد بحسبي آلله ونعم الوكيل لحد ما غفيت بمكاني مافزيت غير على الصياح والعرك فزيت مخترعه كمت ركض عثرت وكعت ونظربت رجلي بالقنفه اتأذيت بس ماهتميت كمت صارت الساعه كدامي جانت ب 8 وربع بالليل حيل كل هذا نمته ...

كمت وعظم ساقي يأذيني مشيت على كيفي وطلعت وزاد الصياح ورجع بعد اقوى جانوا مهيمن وابوي  وحسين كاعدين بالحوش ويتناقشون بس بصوت عالي عبالك يتعاركون مو يتناقشون...

صرت كدامهم شافوني وسكتوا عبالك ميردوني اسمع شنو جانوا يحجون ابوي اشرلي اجي يمه اجيت كعدت تحت اجناحه....

شلونها بنيتي هسه حاجاني وهو يبتسم بوجهي ويده ترجع بشعري وره اذني ابتسمتله واشرتله براسي بمعنا زينه وهو رجعلي الابتسامه ورفع رأسه وكال
بويه ام منير سوي عشه لاختج بدون أمر عليج ...

سوسن .. بدون مدكول عمو اني بديت احميلها (اسخن )عشاها  ... جاوبها ينطيج العافيه بنيتي واني كمت واشرتلها بأيدي بمعنا اريد اصلي ورحت للمطبخ اتوضا اقرب علي من المغسله بره...

بديت اتوضا بخشوع(اللهم بيض وجهي يوم تبيض الوجه .... اللهم لا تسود وجهي يوم تسود الوجه )

وثبتت ورفعت راسي شفت سوسن متكأه على الكاونتر وتباوعلي بعيون محتاره ومدمعه اشرتلها شكو وهي هزت راسها بالنفي ودارت على الطباخ اجيت يمها وهزيتها من كتفها دارتلي ونزلت دمعتها وحظنتني

استغربت تصرفها هاي شبيها؟؟؟

بعدتها مني وحجيت بصوت خافت بالقدره كدرت اطلعه

شكو شصاير؟؟؟

... نبض حبي كافي فدوه لا تاذين نفسج اكثر والله قلبي يأذيني عليج ماكدر اشوفج هذا حالج ...
نزلت راسي بيأس وهي رجعت رفعته وكملت كلامها

نبض اريدج تقوين نفسج وحتى تكدرين تواجهين الجايج مهيمن اليوم رايح هو وحسين ومطيحين حظ هذا الخايس خطيبج ومبلغينه كلشي منتهي وباجر يجي يطلكج وخابروا على عمج و ولده وباجر راح يجون واكيد راح تجي وياهم مرة عمج وبتها الحيه

اريدج اطلعين وتبينين كلشي طبيعي ماريد يشوفن انكسارج هذا انتي اختي وماريد أحد يشمت باختي
زين .... نبض احجي وياج زين...

بتسمت باستهزاء وكتلها ليش هو منو الي كسرني غير أخوتي ومشيت وصلت للباب وذكرت امي اليوم كله ماشفتها ولا اجت تطمن علي ؟؟

سوسن شنو امي وين شو ماشفتها اليوم ؟

امج ضغطها اليوم معلك من الضهر و اخذوها للمستشفى وهمزين اتلاحكولها لو متاخرين شويه جان اسم الله ضربتها جلطه بس هسه الحمدلله وضعها احسن ... تلكينها نايمه بغرفتها...

اني بس سمعت بأمي متخربطه ركضت وسمعت باقي كلام سوسن وهي اصيح وراي

دخلت لغرفة اهلي شفت امي متمدده بفراشها وغافيه وجها اصفر كركم بست ايدها وراسها وسمعت صوت سوسن وراي ...

زينه هسه لا تخافين نزل ضغطها

لعد شبيها ليش نايمه وجها هيج اصفر ...

مابيها شي قبل شوي جانت كاعده عشيتها واخذت دواها ونامت سألت عليج كتلها نايمه بالها جان يمج رادت ادكوم اشوفج بس ماخليناها لان دايخه ومابيها تمشي لو تتحرك ....

سوده علي كله من وراي اني فكر وراح اعم على امي

لا دكولين هيج بس هاي بعد قلب والده ماتتحمل اشوف واحد من ولدها متأذي اذا تردينها اصير زينه لازم اتقوين نفسج واطلعين من هاي عزلتج وترجعيلنا نبض اللي صارلها غايبه عنه 6اشهر ...

انشالله 
اكتفيت بهاي الكلمه وطلعت لغرفتي لبست حرم الصلاه ومديت سجادتي و وجهت وجهي لربي وسلمت امري اله ....

كملت الفرض وكعدت استغفر رب العالمين بستغفار خاص هذا ينقري 3 مرات قبل التسبيح وبعد التسليم
واليقراه الله يغفرله ذنوبه اللي سواهن كلهن ويرجع مثل الطفل اللي هسه طالع من بطن أمه من الوقت اللي يقره بيه هذا الاستغفار لحد ثاني يوم نفس الوقت

( أستغفر الله الذي لا إله إلا هو الحي القيوم ذو الجلال والإكرام واتوب اليه ) 3 مرات

بعدها سبحت تسبيحة فاطمة الزهراء عليها السلام
وفتحت القرءان بديت أقرأ بالختمه مالتي ختمت سورة آل عمران  وطبكت المصحف وكمت  رجعته لمكانه انتبهت لجهازي جان يدك شفت الشاشه تضوي بأسم معذبي(أُسامه)

اني شفت الاسم واني خفت وسارت رجفه بكل جسمي صرت ارجع ليوره وعيني مركزه على الشاشه والاسم واهز براسي عبالك هو واكف كدامي مو اسمه استمريت بالرجوع لحد ما حسيت برجلي داست على شي ناعم

نزلت راسي وشفت نفسي واكفه على سجادتي باوعتلها ورجعت باوعت للجهاز شفته متوقف ....

تنهدت وكلت بداخلي ... ماعندي بس سجادتي وربي همه اللي راح ينصروني على كل واحد يحاول يأذيني

لهذا رجعت كملت صلاتي وبقيت حتى بعد ماكملت الفرض كاعده على السجاده واردد...

( ناد علياً مظهر العجائب تجدهُ عوناً لك في النوائب كل همً وغماً سينجلي بولايتك يا علي.. يا علي.. يا علي )

اردد بيها ودموعي شلال ينزلن على خدودي لحد ما دخلت علي سوسن بصينية العشه باوعتلها واني مو مشتهيه العسل بس انجبرت اكل لكمتين علمود سوسن خطيه ادكول مامتعشيه منتظرتج.. بعد ما كملنه شالت الصينيه وجابت كوبين جاي واجت يمي سحبت موبايلي وفتحت بيه يوتيوب مقاطع مضحكه( لمرتضى اركان ) وبقت تتفرج وتضحك وتحاول اضحكني واني روحي موطايقتها بس جنت ابتسم كذب لان ادري بيها كل هذا اسويه حتى اطلعني من مود الحزن والكئابه

استمرت اطلع مقاطع ساعه كارتون مدبلج كوميدي ساعه مواقف كوميديه للحظه نسيت ولتهيت وضحكت من كل قلبي بس هي لحضه ومادامتلي من رجع يدك ع الواتساب ورجع اسمه يضوي كدامي بسرعه شمرت الجهاز من ايدي ورجعت وره واني اباوعله بعيون مفتوحه وتارسها الدمع....

شالته سوسن واردت تفتح خط واني اأشرلها لاااا عفيه لااااا
وهي ماسمعتلي فتحته وكالت....

مونبض اللي تنهزم وماتواجه هاج احجي وياه وطلعي كل اللي بقلبج وطيحي حظه بعد لا تبقين هيج جبانه

كلامها انطاني طاقه عجيبه بحيث اخذته من أيدها ومسحت دمعتي وتنفست بقوه واني ناويه ما اسكتله بعد ....
كلت الو
وسمعت صوته وهو يصيح....

كلبه  ..حيوانه .. تردين اطلكج موووووو ولج نجوم السمه اقربلج من الطلاق... لو تموتين والطلاك هو اللي يحيج هم ما اطلكج... صايرتلي شقاوه انتي وخوانج البعران وهدو علي مووو بسيطه ولج اذا ماطلعت كل هذا من عيونج فلا اسمه ابن امي وابوي.... كلبه حيوانه
صار عندج السان وطلعتي تعرفين تحجين وتتشكين عد اخوتج والمخانيث المابيهم خير..........الخ

يحجي .. يحجي واني ادموعي اتكت وشهكاتي بدت تطلع وكلمه ماكدرت اكول من خنكة ادموعي وبجاي

ومن بدت شهكاتي تعلى هو سكت بس صار يتنفس بصوت عالي عبالك جان يركض وقاطع مئات الامتار
مويرزل ويسب...

اخير شي كال بس بهدوء مخيف..

شتردين؟؟؟ !!!!!
كليلي انتي شتردين!!!!! موحبيتج وردتج بس اصيرين الي وتحملت كلشي علمودج وانتي جنتي تعامليني حالي حال الغريب وصلتيني مرحله كمت حتى شرب اشرب حتى انساج وانسه امي وعركها وياي صبح ومسا
وصلت لمرحله اصاحب واطلع ويه بنات حتى اشوف واعرف كلهن مثلج لو بس حظي هيج نايم بالوحل....

كليلي يابت الناس شتردين؟؟؟؟

جاوبته واني مستمره ابجي... عوفني  ماريدك ... اترجاك عوفني وروح للي تستاهلك وتنطيك اللي تريده اني انسانه هذا طبعي وهاي أني وعمري مراح اتغير ما اعرف احب ولا اعرف اهتم كل اللي اكدر انطيه هو الاحترام والثقه وانت ذن مايكفنك وتريد أكثر واني ماعندي لهذا عوفني يابن الناس وطلكني وشوف حياتك
وكافي مهانه ودموع بعد مابيه طاقة صبر ولا تحمل

جان ساكت ويستمعلي ويه كل كلمه اكولها جان يزيد تنفسه و من كملت رجع حجه بنفس الهدوء بس مبين بالقدره ضابط نفسه.... طلاك ما اطلك انتي هسه مرتي شرعاً وقانوناً وباجر اني جاي وساحلج من بيت اهلج لبيتي واريد رجال يطلع ويفتح حلكه وإلا وسمعي زين

وإلا يانبض افضحج بكل مكان وانشر صورج العندي واخلي اهلج همه اللي يجون ويبوسون ايدي حتى اخذج واستر عليج ...

انسد الخط واني جنت جامده بمكاني وفاتحه عيوني على وسعها من كلامه وتهديده وكل اللي بالي ياصور هاي اللي يحجي عنهن اني ابد ما دازتله صور الي

ولا هو لازم فوني ولاعب بيه حتى اكول ماخذهن منه
بس بعدين اذكرت ولطمت على خدي واني اذكر الصور اللي اخذناهن بالمطعم من طلعنه بيوم العقد ...

بقيت جامده بمكاني والخوف احسه صعد لراسي وجمد دماغي وخلاني ابطل اعرف افكر وبس الخوف من كلامه والفضيحه هنه اللي مصيطرات على تفكيري

سوسن حالها مجان احسن من حالي همات جانت كاعده وتلطم وكل شويه سألتني ياصور هاي لحد ما كتلها وهي هدت رادت تروح ادكل لرجلها واني سمعت بأسم مهيمن واني ركضت عليها ولزمتها ومنعتها ادكله....

سوسن فدوه لااا  ابوس ايدج لا ادكوليله والله يذبحني والله يموتني ومايرفله جفن...

فهميني شلون مااكله وهذا النذل كاعد يهددج وانتي مرته ولج نبض اصحي كافي جُبن وخوف هذا هسه يهددج بالفضيحه باجر عكبه يبعج لبيوت الدعاره بحجة مرته لج هذا ناقص غيره مالازم ينسكتله...

ادري والله ادري واني اصلاً ما اسكتله بس مهيمن لا عفيه اني اكل لبابا لو لحسين همه يصرفون بس مهيمن لا والله يذبحني علقبله...

زين مراح اكله بس امشي نحجي لحسين هو يحلها
يلا امشي
تمام

صعدنه لغرفة حسين دكينه الباب شويه وفتح الباب وشكله جان نايم من عيونه المقفله وكفشته الواكفه...

خيرج نبض بيج شي امي بيها شي ؟؟ خطيه انفزع من منظرنا اني وسوسن ثنينه جنه نبجي وحالتنا حاله

سوسن.... لا لا تخاف عمتي مابيها شي بس نبض صار وياها شي هسه وتريد ادكلك بدون ميعرف مهيمن...

هو بسرعه دخلنه وفتح ضوا غرفته اني وسوسن كعدنا على السرير وحده اتباوع للثانيه ومنعرف شلون انكله لو نفتح الموضوع  وهو جان واكف فوك راسنا ومتخصر وجول بنضره علينا ومنتظرنا نحجي عاد ما تحمل وعاط بينا

مااااااتحجن عااااد

نحجي نحجي بس انته اهدء وتعال اكعد .. سوسن حجت

يا صبر ايوب وهاي كعده يلاا غردن..

اني بلعت ريكي وسميت بسم الله وغمضت عيوني وحجيتله كلشي بدون ميقاطعني انتظرته يهد .. يهجم
يضرب ماكوا كلشي ماحصلت الحمدلله عاد فتحت عيوني شويه شويه شفته جان صافن بالفراغ واديه عاصرهن بكل قوته بعدها حجه وياي بهدوء وبصوت تعبان يجاهد حتى يطلع وعرفت سبب حالته هاي وليش ماتعامل وياي بعنف لان اليوم الدنيا اندارت وصار بيه اللي جان يسويه ابنات العالم وتحقق المثل اللي يكول
(اللي يدك باب الناس يندك بابه )
وحسين اليوم اندك بابه بس الي دكاه هو نسيبه وصاحبه!!!!

أخذ الموبايل مني وكلي لا تخافين اني احلها ونزلت لغرفتي وحاولت انام بس منين يجي النوم وكل هاي المصايب فوك راسي ...

ثاني يوم مصار شي النهار كله لحد الليل دك التليفون على ابوي والمتصل جان ابو اسامه
خابر حتى يستفسر ويعرف شدايصير لان هو جان مسافر و محد ماكايله عن اي شي بس من راجع وشايف وجه ابنه اللي مزورك من الكتل مستفسر من ابنه وسامع عكس السالفه ومخابر يعاتب  بس من ابوي
حجاله كلشي بماانزل عليه من سلطان هنا هو اللي معتذر و وعدنا هو راح يحل كلشي...

ثاني يوم لميت كلشي الهدايا والذهب والملابس اللي شتراهن الي وحطيتهن بجنطه ورحنه للسيد حتى نفصخ...

اني لبست اسود بأسود مثل حياتي وحظي ورحت
وراح وياي ابوي ومهيمن ولد عمي ثنينهم 
صعدت بالسياره واني هاي اول مره اطلع من شهرين
شافتنه جارتنه ام عقيل سلمت على ابوي واخوي وسلمت علي وسألتني...

شني خاله نبض ماعرستي بعدج؟؟؟

بقيت ساكته ماحجيت بس اللي جاوبها ابوي...
ماصارت القسمه ام عقيل وكلمن راح لحال سبيله

جارتنه بسرعه لطمت خدها وحجت ياااااا خاله سوده علي ليش ... وشنوو هو العافج انتي العفتيه؟؟

مهيمن جاوبها بنفاذ صبر ... ام عقيل الولد موخوش ولد واحنه اللي فصخنها مجايزين من بتنه حتى ننطيها لهيج واحد ...

وعافها وصعد واشرلي اصعد اني هم اختنكت وماتحملت بسرعه صعدت ونزلت دمعتي مسحتها قبل لا أحد ينتبهلها...

ورحنه لمكان جان مثل المكتب كعدنه بره على الكراسي
ننتظر سرانه شويه واجه هو وابوه وياه عمه وابن عمه

كعد كدامي والحقد يطاير من عيونه وجهه جان مامبين من الكتل الماكله...

شويه ودخلنه لمكتب وكاعد وراه رجال كبير بالعمر
لابس اعمامه سوده ولحيته بيضه و وجهه نوراني كلش اريحي...

كعد ساعه كامله يقنعني اغير رائي بس اني جنت مصره
على قراري بس هو وابوه جانوا مقابلين على الطلاك بعدها السيد طلكنا

وتنازلت على كولشي وهذا جان شرطهم حتى يتم الطلاك...
ارتاحيت وحسيت جبل ونزال من علي ...

طلعنا بره المكتب ابوه واللي جاي وياه سلموا على ابوي والولد بس هو اجه و وكف كدامي ونطاني نظره قاتله وبعدها تفل (بصق) بوجهي...

بقيت مصدومه بمكاني وهو بثانيه وحده انشال باوعت عليه شفته ممطول بالكاع وابوه وعمه و ولد ومهيمن كلهم دايرين عليه ومشبعينه كتل ...

بعدها شالوه وشمروه بالسياره واجوا اعتذروا مني وبعدها رجعنا للبيت ومنا بدت مرحله جديده بحياتي ولازم اواجها بصبر وقوه.....يتبع

_________________________________

ليش مستغربين وجود حاله مثل حالة نبض واهلها
ترا البنيه موجوده ودتقرا وياكم وتابع تعليقاتكم...

لهذا بدون تجريح بالكلام ولا تجاوز لطفاً وليس امراً ❤