رواية نبض دافي الفصل الثالث 3 - بقلم Nabá baqer

نبض _دافي

Nabà _baqer

البارت الثاني ...

 

••••••••••••••••••••••••••

وصلناا للدوام وهمزين اليوم ماكو رزاله ولا خزره
اخذت كل محاظراتي وخلصتهاا بين اكل ودراسه

وطلعناا وصلناا للبيت ونفس الروتين هو هو ميتغير بيه شي ...

للعصر بدلت لبست عبايه خليجيه ولفيت الشال لفه تركيه وسوسن هم اجت وياي لان ذوقهاا حلو هم لبست عبايه خليجيه وشال اسود واني شال ماروني واني بيضه طلع حلو علي ..

بس لوماالشعر اللي بوجهي وحواجبي اللي خلصت عمري وهنه واگفات محتجات جان طلعت بعد احلاا

وصلناا مهيمن بسيارته وطبعاً مليون الف وصيه وصاني ...لاتجيبين الوان فاتحه جيبيهن اعراض
ماريد بنطرون ....

امشي وانتي راسج بالگاع ..ظحك وخفه ماريد ..

كرهني بروحي من گد ماوصه ومن گد ممنوعاته
يمكن راح اشتغل بالممنوعات ....

نزلنه بسوگ ***** يصير اكبر سوگ بمنطقتناا
وكلشي بيه ملابس ومعجنات ومرطبات ومخظر
وذهب ليشوفه يگول مول مو سوگ شعبي

افتريناا على المحلات وشتريت تنانير وفساتين وقمصان وشالات وجنط واحذيه الــ٣٠٠الف صرفتهن كلهن ...

متت من التعب طلعناا بـ٤العصر رجعناا بـ٨بالليل

شمرناا العلاليگ وبدلناا ورحناا نسوي عشاا ...

طلعناا بتيته فنگر وكبه وطماطه وزلاطه خير من الله صار تعشيناا بس احنه النسوان وبابا
الولد طالعين ....

كملناا سوسن غسلت المواعين واني سويت چاي وديته الأمي ولأبويه ورحت لغرفتي اقيسهن ..

واشوفهن بعدهاا طلعتلي قميص سمائي وتنوره سوده وشال اسود وحذاء وجنطه بيض قررت اكسر شويه لان مليت من الأسود والجوزي ....

ثاني يوم لبستهن وهمزين مهيمن جان طالع على وقت ومشافني وحطيت شوي مورد خدود وكحل بس كولش خفيف ....

ورحت للدوام كملت اول محاظره وطلعت للسنتر گعدت اراجع امتحاني وجان السنتر بيومهاا ازدحام لان الجو بدا يبرد ومغيمه ومتوقعين مطر لهذا كلهاا داخل الكافيهات والسنتر المغلق ...

اجت بنيه لابسه شورت اسود وبلوزه سوده وجواهن كالون اسود بس شنو شفاف لوملابسته احسن وعود هي محجبه ولافه الحجاب (بنات عنجد هذا الموقف صار گدامي يعني موخيال )...

اجت تتمشه ورجليهاا طالعه وكل الشباب صارت عيونهم عليهاا وهذا اللي يذب كلمه وذاك اللي يصوفر الصراحه اني تقززت من الموقف ومتت بدمي شلون هي قابله على نفسهاا هذا الشي ...بقت عيوني عليهاا وعلى الموقف بشكل عام ومجنت منتبه لنفسي اني عاقده حواجبي وبوجهي علامات تقزز واستفهام ...

نبهتني عيطتهاا بوجهي ..اني جفلت ونصدمت بقيت ساكته وهي تعيط علي بكل صوتهاا جنهاا وحده استغفرالله العظيم ....

......هاييييييي نزلي عيوونج لااجي افگسهن الج
خفة لهل شكل وبلاا .... شلون عيون صلفه عابت لهل حواجب ديررري وجهج يلاااااا .....

متت بدمي ومن فشلتي احس روحي راحت وراح اتخربط ....واحد من الولد شافني شلون دمعتي نزلت وهو كام عليهااا .....

....انجبي للللج وسدي منهولتج (عذراً للالفاض )
هااي التحجين عليهاا اشرف منج ومن عشيرتج ..ياااسافله يامنحطه ..ويلااااا منااا لااجي اسحلج من اكراعاتج يلااااا ...

....باوعتلي بنظرات من نار وراحت واني ماتحملت ابقاا لان الكل بقاا يسولف ويتوشوش علي ..شلت غراضي وگمت واني دموعي غرگن خدي وعبرتي متكسره بصدري ماگدر اطلعهاا ...

..اوووگفي يبنيه انتي زينه ...

زينه واشكرك لان دافعت عني ..

لاهذا واجبي ماكو داعي للشكر انتي مثل اختي
وماقبلهاا وحده مثل هااي تنزل دمعة اختي ..يلاا مسحي دموعج ولاترخصيهن علمود هيج نماذج فسدت المجتمع ....

..مسحت دمعتي وباوعتله بأمتنان وبتسمت ونزلت راسي اول مره واحد يحجي وياي بهاي الحنيه والتفهم ..هاي لواحد من اخواني جان خلصوهاا علي عيااط وصياح ويجوز حتى يضربوني ...

تنهدت وكملت بقلبي ..هنيال خواتك عليك وياريت لو انته صدگ اخوي ...

...رفعت راسي وگتله ..اشكرك مره ثانيه واترخص مشيت عنه واني گلبي مقبوض الكل گامت تحجي من دافع عني وعبالهم بينه شي ..وخايفه لايوصل الحجي لحسين وتطين حياتي ...

استر يارب وعديهاا على خير مابيه حيل اتعاقب ووره شي موصحيح واني مومسويته ...

امتحنت واني الف حسبه بدماغي ومافتهمت شي من الاسئله ولااعرف شكتبت ..ايدي تكتب شي وعقلي يفكر بشي ثاني ...

كمل امتحاني وطلعت من القاعه رحت اتمشه لقسم حسين لان تعبت وبعد ماگدر اكمل واحس راسي ثگل من التفكير والخوف ...

شفته واگف يسولف ويه بنيه جانت تخبل لابسه تنوره بينصل قصيره لونهاا زيتوني وقميص اوف وايت عريض وشعرهاا اسود نازل جوه خصرهاا وبارمته من الاطراف والمكياج عبالك رايحه لحفله
والجنطه والكعب لبسهاا كله ماركه وهي نازكه مبينه من وگفتهاا ....

بقيت واگفه اباوع عليهم من بعيد شلون هو يحجي وهي تبتسم وتنزل براسهاا مبين دايتغزل بيهاا من خجلهاا ....

تنهدت بضوجه ..ليش يسوي هيج ويلعب بعراض الناس ميخاف ميفكر هو هم عنده اخت وعرض والدنياا دواره واليدگ باب الناس يندگ بابه ...

رجفت بخوف من اجه بالي بيوم اني ادفع ثمن اخطائهم ..لايربي لاتگولهاا ..كلشي ولا اتحاسب على اخطاء غيري ...

بدت الدنيا ترعد وراح تمطر رحت ركض عليه وهو بس شافني تغيرت ملامح وجهه وصار مكشر ...

...حسين عفيه رجعني للبيت راسي ذبحني من الوجع احس راح اوگع ...

...ليش شصاير وياج و ليش وجهج اصفر وشفايفج بيض ...

..تلبكت من باوعلي بتركيز وحجه وهو عاگد حواجبه وصرت ادور بعيوني وافرك بأدي وجاوبته ..

..هااا ماكو شي بس تعبت لان منايمه البارحه سهرت ادرس ومانمت إلا وجه الصبح ....

لم شفايفه وباوعلي بنظره خوفتني وحجه ..
همممم منايمه وسهرانه ..زين يلاا امشي گدامي بس والله ياا نبض لوعرفت غير شي مراح يصير زين ...

فخليهاا ابالج واحجي هساا قبل مااعرف من غيرج وبوقتهاا مراح ارحمج ..

رجعت ادموعي تنزل وگعدت واني اشهك والمطر نزل ومتزج ويه دموعي ...

نزل حسين لمستواي وهو الخوف مبين بوجه گومني من ايدي واگعدني جوه مظله ومسح وجه من المي
وگعد گدامي وحجه ....

...شصاير ..كافي بچي واحجي شصاير ...

حجيتله كولشي وحتى الولد من اجه وتطمن علي ونظرات الطلاب وهمسهم مردت اظم عليه اي شي لان اعرف اذا سمع من غيري راح تكون نهايتي بيومهاا  ...

توقعت تجيني ظربه كفخه رزاله بس الصار مسح دمعتي واخذني بحظنه وحجه

كافي بسج ادموع وصدگيني الا اندمهاا واخليهاا تجي وتعتذر منج گدام كل الطلاب ..
واذا على حجي الطلاب لتهتمين انتي مسويتي شي وعوفي الموظوع علي اني اسد حلوگهم ...
بس متجيبين سيره بالصار بالبيت ولا حتى ويه نفسج مفهوم ...

هزيت راسي واني متعجبه ..شلون صار هيج اول مره ميعصب ولا يتعامل بعنف وخصوصاً بهيج موظوع ...سكتت ومحجيت شي وگمت وياه ورجعناا للبيت ...

دخلت رأسن لغرفتي بدلت ملابسي ولفيت راسي ونمت واني افكر بغرابة تصرف حسين

لليل گعدت راسي صاير هاگده رحت اخذتلي بندوله وطلعت بره احنه بيتناا صاير اول مندخل حديقه صغيره جوانبهاا زارعين ورد وريحان ونعناع والنص صبه ممزروع شي بيهاا

بعدهاا ندخل من الباب يصير مقابيلناا حوش واسع وبيه غرف ومطبخ وحمام وتواليت وگعده بالنص مسقفه من الشمس لو المطر وداير مدايرهاا نباتات ورود
ودرج يصعد للطابق الثاني بيه غرفتين وصاله وحمام وتواليت مشترك والطابق الثالث هذا سطح

غرفتي وغرفة صباح واهلي جوه والاستقبال
وحسين ومهيمن وعائلته فوك غرفهم ....

طلعت گعدت بالگعده والحوش كله مبلل من المطر وريحة الورد والنباتات فايحه بكل مكان وترد الروح

عيوني تعلگت على النجوم شلون تلمع بوظوح و السماا صافيه  سبحان الله الصبح جانت السماا سوده من الغيوم وترعد وتمطر وهساا السماا صافيه ومابيهاا ولاغيمه بس الهوا بارد ومنعش

بقيت على گعدتي والهوا يلعب بشعري وخدودي تيبست من البرد بس حلوه الگعده وريحة القداح بعد احلاا ...

...هااااولج شعدج هناا ...

..بسم الله نگزتني ..شبيك من تمشي طلع صوت حم حم سوي اي شي بس لاتدخل هشكل ..والله گلبي وگف ...

.....اوي عيوني سندوسه خافت ..گليلي شمگعدج هساا مو وراج دوام باجر ...

..ماروح باجر

..ليش بالله

..حسين انته تعرف ليش فلاتسأل ...

...رفعت حاجبي واني معاجبني خوفهاا وجبنهاا
اني شگلت موگتلج انسي وداومي عادي وعوفي كلشي علي ..انتي ليش جبانه وخوافه ...

..حسين اني موجبانه بس مااحب المشاكل ...وماريد تصيرلي سالفه واخسر دراستي من وراهاا

انته تعرف شرط مهيمن علي من ردت اداوم ...

...وشنو يعني حادث عابر وصار والدنياا مامشينهاا بكيفناا حتى منتعرض لحوادث ...وبعدين اني مونبهت عليج متحجين بالصار لأحد ...

..ايي واني محجيت شي اصلاً من رجعت نمت وهساا گعدت وماشفت ولا واحد بيهم ...

...زين لعد هاي هيه محلوله داومي باجر وعوفي الخوف والتفكير وصيري قويه ولاتخلين اي احد يدوسلج على طرف ...وليأذيج بكلمه رجعيهاا عليه بعشره ترا اذا تبقين هيج مراح تعيشين بهاي الدنياا وراح تاكلج هي وذيابتهاا ...

...حسين انته ليش اليوم معصبت ولاصيحت واني توقعتك راح تضربني تبهذلني ..بس اللي صار صدمني ...

..نبض انتي اختي وتربيتي واعرفج انتي شنو واخلاقج شنو ...وتأكدي مستحيل اشك بيج لو بيوم اوگف ظدج ..واليوم من شفتج وشفت الخوف بعيونج وحالج تأكدت انتي صاير وياج شي

ومن سألتج ونكرتي ..ظجت وماتحملت فكرة انو يصير وياج شي وماتلجئيلي لهذا هددتج ..

ومن حجيتي وانتي تبجين وترجفين ..ماهانت علي دموعج ولاحالج ...وحلفت إلا اندمهاا لان نزلت دمعتج ...

نبض ترا صح احناا قاسين وياج وتعاملنه جاف بس ترا هذا كله لمصلحتج ..منريدج تتأثرين بالي دايصير برا ...ولانريد احد يوصل حدج ويأذيج ..

ترا انتي غاليه عليناا ودموعج بعد اغلاا انتي وحيدتناا وردة بيتناا واحناا تكفلناا نحرس ونحمي هاي الورده ونخليهاا مفتحه وعطرهاا فايح لحد منسلمهاا بأيد اللي يستاهلهاا ويقدرها ويحافض عليهاا ....

...ماعرف شنو هاي المشاعر اللي احتلتني وخلت عيوني تدمع ... واحس بفرحه عمري محاستهاا من قبل

وقدرت وحبيت خوفهم علي وشلون وصفني وصف تصرفاتهم وياي وخلاني اعيد حساباتي ونظرتي الهم

...الله لايحرمني منكم ولامن خوفكم علي ..وانشالله ابقاا رافعه راسكم وتفتخرون بيه ...

...انشالله ..وهساا گليلي شنو شيخ صباح مااجه

..لابعده هو گال عقد شهر ويرجع وبعدله اسبوع ويقبط الشهر ...

...زين لان رايده يحظر حفلة تخرجي ..اگلج اني جوعان ماعدكم شي منا مناا ..

..والله اني هم جوعانه وماماكله شي ..هساا اكوم اسويلناا عشاا

گمت دخلت للمطبخ لگيت عجين كباب عروگ گليته وسويت زلاطه بالنعناع كولش احبهاا مكوناتهاا

خيار وراس بصل صغير ونعناع وغسلهن واحطهن بمحظرة الطعام ينثرمن ناعم بس موطحين لا وسط
واثرم طاطه بأيدي هم ناعم لان اذا احطهاا بالمحظره تصير مي وتنمرد ...

اطلعهن بطاسه وملح ارش عليه واجيب گلاص احط بيه مي وليمن دوزي اخلطهن لحد ميذوب واحطه فوگ الزلاطه واخبطهن ...

فرغتهاا بكاسه وحطيت عليهاا ورق نعناع للزينه وطلعت فنگر من المجمده گليته وسويت صينيه مرتبه وطلعت لگيت حسين على گعدته حطيت الأكل وگعدناا ناكل ونسولف لحد مكملنه حسين صعد لغرفته واني غسلت المواعين ورحت لغرفتي ....

درست شويه وحظرت ملابسي ونمت ...

ثاني يوم گعدت واني اردد ويه روحي ...
لاتخافين نبض وصيري قويه ..انتي مامسويه شي لاتهتمين للحجي ...

بقيت اردد هذا الكلام ويه روحي واني ابدل
لبست فستان اسود وشال وجنطه وحذاء لونهن بيج

وطلعت لگيت الكل ملتم ع الريوگ ...

..صباح الخير .

..صباح النور تعاي حاجيني البارحه سألت عليج گالو نايمه ..شبيج صاير شي موعوايدج تنامين هلگد

..تلبكت من سألني مهيمن وباوعت لحسين غمض عيونه واشرلي بمعنا لاتخافين ...

واني هم ظبطت نفسي وجاوبته واني عيوني بحظني ...ماكو شي بس البارحه تخربطت بالامتحان لان سهرانه وبس رجعت نمت وبعد مادريت بروحي .....

سكت ماحجه شي وامي هي اللي حجت ..

يمه على كيفج ويه روحج هاتگه روحج هتك على الدراسه وهامله نفسج ...اذا تمرضتي شتفيدج الكتب والدراسه ....

...جاوبهاا ابوي ...

لاتخافين عليهاا ام مهيمن بنتج سباعيه وماينخاف عليهاا ..وانشالله نفرح بتخرجهاا وزواجهاا بيوم واحد ...

..الكل جاوب ..انشالله بوجودكم يابه ...

كملناا ريوگ ورحناا للدوام ..وبالباب لزمني حسين من ايدي و وصلني لقسمي وگلي رفعي راسج مواختناا اللي تنزل راسهاا من تمشي ...

..رفعت راسي ودخلت وشفت الكل عيونهم علي وكل مجموعه تسولف بيناتهاا ....

گعدت بستولي وحسين وگف وحجه بصوت عالي ...

...شباب رجاءاً الكل تنتبه علي ...

الكل انتبهتله وهو كمل ...

نبض علي موسى ..تصير اختي اني حسين علي موسى ..البارحه گدامكم وحده زباله زايعتهاا الدنياا عاطت عليهاا ورزلتهاا ونزلت دمعتهاا ...ومحد بيكم دافع عنهاا وسكت ذيج منهاا ..كلكم بقيتو تتفرجون و واحد بس صاحب غيره وشهامه ماقبل عليهاا ودافعلهاا ... وانتو ابدال متوگفون وياه وتدافعون عن زميلتكم اللي صالهاا وياكم سنه كامله تعرفونهاا وتعرفون اخلاقهاا وتربيتهاا ...

رحتو والفتو عليهاا سيناريو وقصص وسويتوهاا عدهاا علاقه بهذا الشهم ...وصارت هي حديث الساعه ..ونزلتو دموعهاا واني اختي دموعهاا غاليه

واللي يفكر ينزلهاا معناها لعب بالنار والنار هاي اني
والي يفكر يلعب وياي لويتعرض لشي يخصني معناهاا يقرا على روحه الفاتحه ...

لهذا اني اليوم گدامكم احجي وبعالي صوتي اللي اسمعه يحجي عنهاا لو جايب سيرتهاا لومألف قصص
مايلوم إلا نفسه وقد اعذر من انذر ...وبالنسبه لذيج الساقطه فحسابهاا عندي وراح تسمعون اخبارهاا ...

كمل كلامه واجه باسني براسي گدام عيون الكل وراح واني رافعه راسي بيه ومتفاخره بخوته ...

صارت ضجه وهوسه والكل بقت تحجي واكو كم شخص اجه عتذر مني واني ماعندي مشكله ويه احد
لهذا تقبلت اعتذارهم وكمل اليوم واني الفرحه موسايعتني من تصرف حسين وصدگ سكتهم ولصم حلوگهم ....

رجعناا لكيناا بيت عمو عدناا والبيت صاير جنه سوگ هرج من هوسة الجهال وسوالف النسوان سلمت ودخلت غيرت ملابسي لبست دشداشه نيليه  عريضه لان الولد جاين وياهم ولفيت شالي البيجي وحطيت

قدم بيجي برجلي وطلعت شفت الجهال تگطع بالورد
ومهاتهم ولامهتمات ولاجن يشوفنهم ...عطت بيهم وطلعتهم بالحديقه ودخلت للمطبخ لگيت سوسن تسوي بالتمن سألتهاا ...

..اگول ام السوس شنو الغدا ....

جاوبتني وهي تهدر بالجدر ...تمن ومرگة باميه وسمج شوي وخظره لگطتهاا فاطمه وزلاطه تعاي انتي سويهاا ومهيمن جاب لبن وفواكه واني خابزه
خير من الله ....

خير من الله ...جاوبتهاا واني اطلع طاسه وتخته حتى اسوي الزلاطه وهي اخذت السمجه وصعدت تشويهاا بالتنور فوگ ....

رتبناا السفره ونترست خير من الله وصحناهم الكل التم واني اجيت اگعد خزرني مهيمن وگمت للمطبخ ميقبل اگعد وياهم لان ولد عمي موجودين مع العلم همه كلش محترمين وعيونهم نظيفه وراسهم بالگاع ميرفعونه بوجه مره غريبه ابد بس هو ميقبل هاي عقليته .....

صبيتلي بماعون واجت سوسن هم ميقبل تگعد وياهم اجت صبتلهاا وگعدناا ناكل ونسولف بأشياء عامه ...ودخلت عليناا العجاجه فاطمه بنت عمي ...

طبعاً هاي فد وحده ملعبه وزاحفه ومباقي شاب بالعشيره مزاحفتله وانتو لوتشوفونهاا جنهاا فزاعة خظره شطولهاا وشظعفهااا  ... يتبع