رواية نبض دافي الفصل الرابع 4 - بقلم Nabá baqer

نبض _دافي

Nabà _ baqer

البارت الثالث ...............

مسائكم سعاده....

بارت مثل ماوعدتكم وهاي أني داوفي وعدي بس بالمقابل طلبت منكم طلب ومالبيتولي اياه...

يعني صعبه اذا البارت وصلن نجماته لل500 ...

مطلبت غير حقي ترا 😥 ...

________________________

لله در المؤمنات .. كأنهن تحت العباءةِ لؤلؤٍ مكنونا🌷🙊

،،،،،،،،،،،،،،،،،،،،،،،،،،،،،،،،،،،

صبيتلي بماعون واجت سوسن هم ميقبل تگعد وياهم اجت صبتلهاا وگعدناا ناكل ونسولف بأشياء عامه ...ودخلت عليناا العجاجه فاطمه بنت عمي ...

طبعاً هاي فد وحده ملعبه وزاحفه ومباقي شاب بالعشيره مزاحفتله وانتو لوتشوفونهاا جنهاا فزاعة خظره شطولهاا وشظعفهااا  .

گعدت ولوت حلگها وفرت عيونهاا على المطبخ وحجت من وره خشمهاا ...

امممم بالعافيه على الكاونتر الجديد هذا بشگد جبتو

جاوبتهاا سوسن ..الله يعافيج هذا تفصال سواه اخوي بمليون وربع ...

هي سمعت بالسعر  شوهاي شهگت وغصت بالگمه وفتحت عيونهاا على كل حيلهااا ....

...يممممممه بمليون وربع امنيلكم موتگولون ماعدناا وماعدناا ورجلج يبچي بوجه العباس ....

هسه طلع الحجي وطلعتو تشتغلون بالخنگ ...

ماتحملت حجيهاا وگمت عليهاا

...قل اعوذ برب الفلق منج ومن عيونج ..شبيج ماشايفه وهيج فتحتي عيونج عساهن الفگس انشالله ...موعيب عليج تحجين هيج علينه ونتي دايسه بساطنه وتارسه حلگج من ماعونه ...صدگ لوگال ابو المثل اللي ستحو ماتو ... وبعدين هذا الكاونتر اللي حطيتي عينج عليه هذا مسوينه بالأقصاد يعني مدافعين فلوسه كاش مره وحده ...وهاي سالفة الخنگ انتي مالج دخل بيهاا ولاألج حق تحاسبيناا على رزقناا وحياتناا ..واذا عدتيهاا مره ثانيه لوسمعت حاجيه بيهاا گدام احد متلومين ألا نفسج ...واخلي اهلج همه يتصرفون وياج ...

اني احجي بحرگة قلب وصوتي عله وهي شفتهاا خافت وگامت تتلفت تخاف لايسمعون ويطينون عيشتهاا ...

..على كيفج عيوني تره محجيت شي حتى تاكليني بگشوري وتاخذيني بالصوت العالي ...وبالعافيه عليكم عسااا ماتشترونه ب ١٠٠مليون اني شعلي ...

حجت هيج وطلعت وسوسن طگتهاا بضحكه ماصخه مثلهاا ....

...وجع سدي حلگج لاتدخل بيه ذبانه ...

..اوووي لعبتي نفسي عابتلج ..بس فدوه رحتلج على هيج لسان لج شنو ولااقوى بكته امريكيه اني من يمي خفت منج گلت هساا تهجمين عليهاا من كفشتهاا ...

...لعد شترديني اسمعهاا تحجي عليناا زهي بــبيتنا واسكتلهاا ..لاوالله فلاسكت و لوعرفت بيهاا حاجيه هذا الحجي گدام احد صدگ بوقتهاا تستحق الكتله

والله يالله گابله وبزه بعينه ..صدگ من گال حسين اذا بقيت فقيره الدنياا راح تاكلني هي وذيابتهاا ....

سوسن رفعت حاجبهاا وتقربت علي وصارت عينهاا بعيني وحجت بتدقيق وهي مركزه على كل كلمه ادكولهااا  ...حسسسسين گالج صيري قويه وإلا تاكلج الدنياا ..شوكت وشلون ؟؟

نبض احجي شصاير وشنو المناسبه حتى حسين يحجي هشكل وهو وخوانج  ولابعمرهم سوهاا وطلبو منج تتقوين وتواجهين احد لاونوب الدنياا كلهاا ....

حاولت اظيع الموظوع عليهاا وتملص من سؤالهاا ..
أأأ شبيج سوسن عادي يعني هو گلي هشكل كنصيحه عامه يعني موإلا صاير شي ...وبعدين عوفج من السوالف وتعاي نسوي جاي لايعيط بيناا رجلج ويفشلنه گدام المايتسمون ....

رحت غسلت القوري وحطيت بيه مي وجاي وهيل وحطيته ع الطباخ وعيونهاا تتبعني وجنهاا مامصدگتني ...لان اني وياهاا صديقات ولامره ظميت عليهاا شي وهي تعرفني من عيوني اذا كذبت بس شسوي مجبوره ماگلهاا لانهاا جبانه وخاف يفلت لسانهاا گدام مهيمن واروح بيهااا ....

كمل الجاي اجه حسين ياخذه وهو طالعه روحه ..

...جايجن وين يلااا فظنهاا ...

..على كيفك شبيك تهش وتنش ...

...ياابه دفظنهاا بلكي يشربون جايهم ويرحون ..

سوسن سطرت الاستكاين وبدت تحط شكر وحجت بستغراب واني وگفت اغسل بالمواعين وعيني عليهم
...شبيك حسين عيب لايسمعونك وتصير مشكله ..اول تالي من يجون بيت عمو انته تظوج هيج شو كل مره انته تلزك بيهم يبقون ...

..كعد على الكرسي وحجه وعيونه على الشباك ...

...اووف ياسوسن والله لوماغلاة عمي والولد جان لعبت لعب بهاي بتهم وخليتهاا توب من سوالفهاا بس حاط عمي والولد گدام عيني ...

...حجيت اني ..شبيهاا بعد شسوت ...

...باوعلي بتك عين وجاوبني وهو ياخذ صينية الجاي ...مالج شغل انتي ولاتدخلين بسوالف الكبار ..

طلع واني فتحت عيوني بصدمه ...سمعتي يگلي سوالف كبار ...ليش ياابه شايفني اناغي لو ازحف

..مالج دخل بيه يمعوده وعوفي المواعين وتعاي شربي جايج وبعدين نكملهن اني وياج ...

...اي والله اجه بوقته ..لج ام السوس اني صايره مدمنة جاي اذا ماشرب راسي يذبحني من الوجع ...

..جاوبتني  وهي ترفع الأستكان و تشرب ..وشنو الجديد شو العراقين كلهم مدمنين جاي بقت عليج ..

.. كملناا جاينه وگمناا نظفناا المطبخ وعطرناا وطلعناا لگينه النسوان گاعدات بالحوش والزلم داخلين للاستقبال ...

گعدناا يم جناين بيت عمي سوالف وتقشيب وشگالت فلانه وشحجت فلتانه ..كولش تونسنه وغيرنه من روتين يوميه بس انتبهت فاطمه ماكو التفتت داير مدايري مشفتهاا ...

شلت السراحيه وگمت عود اجيب مي باوعت بالكلدور مشفتهاا بالحديقه هم ماكو ...

...وين راحت هاي ...

..صدگ تحجين واكفه هناا والمره منتظرتج ع لمي

..لج سوسن هاي فاطمه ماكو .. دورت عليهاا بكل البيت ماكو مختفيه ..

شكو شبيج نبض شنو مختفيه هساا جانت گاعده گدامي وتلعب بموبايلهاا ..

ايي واني هم شفتهاا بس بعدين انتبهت عليهاا مختفيه واجيت عود اجيب مي دورتهاا ماكو ...

اخذت السراحيه مني وترستهاا من الفلتر وحجت وهي تهز بيدهاا ..والله يانبض مادري ..الله يستر منهاا هاي بنت عمج تخوف ..

ايي والله تخوف ..يلاا ودي المي انتي واني راح اشوفها خاف صعدت فوگ ..

طلعناا ثنينه واحناا وحده صافنه بوجه الثانيه ومتعجبين وين راحت هاي ...

سوسن راحت يم الخطار واني صعدت فوك واني عيوني تتلفت بالصاله فوگ ...

نظام الطابق الثاني عدناا الدرج يصعد على  صاله كبيره وبيهاا غرفتين وتواليت وحمام مشتركات وترك بيه درج ثاني هذا يطلعناا للسطح ...

وگفت بالصاله واني اتلفت باوعت لغرفة حسين بابهاا مقفول مافتحتهاا لان متأكده هو جوه يعني الغرفه فارغه ..فتحت باب الحمام فارغ مبيه احد رحت لغرفة مهيمن فتحتهاا شفت ظواهاا طافي شغلته مبيهاا بس سراج ابن مهيمن الصغير نايم بكاروكه ..

طفيت الضوا وطلعت واني زادت حيرتي ...

..عزاا هاي وين ولت ..

مشيت خطوتين بنيتي انزل بس سمعت صوت من غرفة حسين ..عقدت حواجبي بستغراب ورحت اتمشى على كيفي ..حطيت ذاني ع الباب اريد اسمع

اكو صوت بس ناصي ومواظح ...

....

اني حسين علي موسى ..طالب سنه رابعه قسم حاسبات الجامعه المستنصريه مهتم بشكلي وبأناقتي وطولي ١٧٥ سم  وزني ٨٠ قبل لاادخل الجامعه جان وزني ٦٠ وشعري جنت لاطشه بجل تسريحة عبدالحليم حافظ  وملابسي كلهاا رياضيه يعني دريزات ريال وبجايم ريال لان اني ريالي للنخاع

بس من دخلت للجامعه وشفت الأجواء والبنات والشباب شلون مهتمين بنفسهم وشفت نفسي لگيت اكو فرق كبير مثل السما والگاع لهذا قررت اتغير واهتم بشكلي دخلت قاعه وصرت اتمرن فتنس
وغيرت حلاقي وگمت اسوي گصات وتسريحات ع الموديل وملابسي اللي بالكنتور كلهاا طلعتهاا للزباله ورحت اشتريت بناطير وقمصان جدد وتشيرتات وعطور وساعات وكله ماركه احناا عدناا محلات اثاث  غرف نوم بالكراده مستلمهن اخوي الكبير مهيمن والوالد الله يطول بعمره

واخوي الثاني اكبر مني بــ ٣سنين اسمه صباح خريج علوم اسلاميه ويشتغل جان بالحج والعمره بس قبل فتره طلع منهاا لان اكتشف بيها فساد ومحسوبيه وهو يستحرم لهذا عافهاا وگام يشتغل بشركة سياحه وسفر بأربيل عقود يوميه وماله دخل بالبيت لويحترگ و راتبه وفلوسه بس الكرشه ولايوم حط بالبيت خمس الاف ..

وبعدهاا اجي اني اصغر ولد بالعائله ومثل مگتلكم طالب بس مصرفي اني شايله العصريات لو بالعطل اطلع اسوي بواري بالمنطقه لو اصلح تليفونات لو صبغ بيوت يعني شي على شي لامهاا ومدبر أموري بين ماأتخرج و افتح محل موبايلات لان غاسل ايدي من التعين والوظيفه ...

المهم بديت اتغير وجسمي تغير وعظلت  و وزني زاد وطبعاً زاد عظلات مو دهون وكرش وبدت تصير عندي معجبات وصديقات وهاي شغلة الصداقه جانت حجه حتى نزحف ع البنات لو هنه يزحفن عليناا
والصداقه تتحول لنطيني رقمج ومخابرات وبعدين طلعات واكو بيهن يعترفن بحبهن واني جنت بنيه تعترفلي بحبهاا اصارحهاا بمشاعري واگلهاا

يبنت الناس اني ماحبج وبس صداقه ومن البدايه انتي تعرفين هذا الشي فلاتجين هساا وتگولين اني احبك وانته وعدتني وذبين بلاج عليه ...

اكو بيهن يتفهمن وينسحبن لان اني فعلاً مابيوم وعدت وحده بحب وزواج لان ماريد العب بعراض الناس واني عندي عرض

واكو لاوالله هي تلزگ و تبقى تتوسل ميخالف قابله حتى لوصداقه بس لاتعوفني ..يابه ترا ماحبج يابنت الناس ولا بيوم راح احبج لو افكر ارتبط بيج ..

ميخالف قابله بس لاتعوفني ..بعد اني من اسمع هيج يتوسلن قلبي ماينطيني واني قلبي رهيف وكلشي ولاكسر قلوب العذارا ابقى وياهن ...وعلى هل منوال كملت اربع سنين دراستي امخلصهاا مثل النحل اتنقل من ورده لورده ..

وبعدني ملاگي الورده اللي تاخذ عقلي وقلبي وتخليني احط رحالي بحظرتهاا وابطل تنقل واستقر بحياتي ..لأن مهماا كانت حياة العزوبيه حلوه بس متجي ربع حلاة الاستقرار والزواج والعائله ..

بعد الولد تجي اخر العنقود اختناا وردة بيتناا نبض

وفعلاً اسم على مسماا نبض وصدگ ليشوفهاا قلبه يتغير نبضه ويصير يدگ دگه مختلفه ...

جمالهاا وبرائتهاا تسحر وتاخذ العقل لهذا احناا متشددين عليهاا وعلى گولتهاا خانگينهاا ..بس كل هذا نسويه لمصلحتهاا ..ولو مهيمن وصباح مزيدينهاا عليهاا لأن حتى ألوان لبسهاا هم يتحكمون بيهاا ..

بس حقهم واني والوالد مندخل لان هي بيضه وعيونهاا عسلي فاتح وشكلهاا بريئ ومن تلبس الوان فاتحه تصير تضوي وتجذب النظر ...

هاي السنه دخلت جامعه ومن سويت انسيابيتهاا حطيت الجامعه المسنصريه بالبدايه واني متأكد حتطلعلهاا لان هي بالأصل معدلهاا قوي ..وفعلاً طلعلهاا تربيه تاريخ المستنصريه ..وصارت تروح وتجي وياي واني تكلفت اتابعهاا واحط عيني عليهاا

ولو احناا متأكدين من اخلاقهاا وتربيتناا الهاا بس ميخالف الحذر واجب واهم شي جان عندي صداقاتهاا كون متصادق اي بنيه ..لان الصاحب ساحب .. لهذا حذرتهاا هوايه من البنات ولازم اذا رادت تمشي ويه بنيه تكون نفس اخلاقهاا وتربيتهاا

وهي مگالت شي وافقت على كل الشروط بس كون تكمل دراستهاا .. وفعلاً طبقت كل الشروط وجانت سمعتهاا مثل المسك والكل تحلف بأخلاقهاا وحتى صداقات بالبنات مسوت وبقت وحدهاا ..وهذا الشي ريحني ...

والبارحه جنت واكف بالحديقه اني وبنيه تعرفت عليهاا من شهر تصير بنت خالة زميلتناا اجت وياهاا وشفتهاا عجبتني بس مزحفتلهاا لان استحيت من بنت خالتهاا بس هي اللي اجت علي وصارت تسولف وتشاقه واني انطلقت وياهاا وطلبت رقمي عود تريد تغير اثاث غرفتهاا لان عرفت عدنه محلات اثاث
بس ادري بيهاا كذب وحجه حتى تحصل رقمي

واني ماگلت لا انطيتهاا الرقم وصارت بيناا اتصالات ولقائات ...
فبيومهاا جنت متواعد وياهاا نلتقي بالدوام ..اجت وكالمعتاد خلصناهاا سوالف واني جنت احشش عليهاا وهي فطيره بس تظحك ..وبين ماجنه واگفين انتبهت لنبض اجت بتجاهي وحالهاا معجبني ...

سألتهاا صاير شي وهي كذبت وگالت واني عرفتهاا تكذب ومن هددتهاا  گعدت عالمسطبه ويارت تبچي وزيدتهاا الدنياا گامت تمطر ..سحبتهاا من ايدهاا وگعدتهاا جوه مظله وهي بعدها تشهك واني دين ماظل براسي اريدها تحجي تنطق ليش تبجي و وجهاا اصفر و وظعهاا متخربط الف حسبه اجت ابالي ...بس من گالت وحده معيطه عليهاا ومفشلتها گدام الطلاب وهي منا ترفه ومتتحمل گايمه تبجي  و واحد فازعلهاا وساد حلگ هاي الس***طه عنهاا

فررت واعصابي شاطت وتحلفت إلا اربيهاا واخليهاا عبرا لمن اعتبر ...سألتهاا منو هاي وليش سوت هيج وگلتلي متعرفهاا بس لان باقيه تباوعلهاا بستغراب عليهاا وعلى لبسهاا لان هي جانت لابسه شورت وحجاب !!

واني بس گالت شورت عرفتهاا نمارق اللي بالهندسه هاي وحده حلل وماعدهاا رداد واليوم الجامعه كلهاا بسيرتهاا من وره لبسهاا الطايح حظه ...

تحلفت بيهاا إلا افشلهاا مثل مسوت ويه نبض اخوهاا  وعدتهاا راح اسد حلوگ الطلاب عنهاا ...

وهذا اللي صار اليوم اخذتهاا من ايدهاا ودخلتها لقسمهاا وحجيت بعالي صوتي وفهمتهم هاي اختي والي يوصللها مايلوم إلا نفسه وطلعت بوجهي رحت للهندسه وهمزين عندي معارف هناك ...

خابرت على صديق الي بيهاا وتفقت اشوفه بكوفي
اجه وسألته عن هاي نمارق وطلبت منه يدبرلي رقمها وهو  سولفلي نشرة اخبار حياتها و وعدني حيجيبه لرقمها .. بعدها تسالمت وياه ورجعت للجامعه اخذت نبض ورجعنا للبيت لگينا بيت عمي عندنا ...

رحبت بيهم واني فرحان بشوفتهم لان صارلي فتره گاطع وماعرف اخبارهم ...بس من شفت بتهم الصغيره جايه وياهم ضجت وتمنيت بيني وبين نفسي كون هذا النهار يعدي على خير لان ماطيق شوفتهاا وحده زعطوطه وطايشه وماشيفه عين حمرا ...والف مره داخلتلي بالفيس وارزلهاا واحظرها وهي ماتوب من سوالفهاا ترجع ولا كأنما ..

واليشوفهاا ميگول عدهاا هيج سوالف صغيره عمرهاا يمكن ١٦سنه وظعيفه وطويله وموحلوه اني اشبهاا بالساحره ام مكناسه اللي بكارتون توم وجيري نفس الخلقه بس هاي ماعدها مكناسه ..والله على يوم اروح اجيبلها مكناسه من ياسر ابو الأسواق وانطيهياه حتى يكمل التشبيه ....

المهم گعدنه سوالف وشلون فلان وماسمعت بسالفة فلان بعد گعدة زلم ونتو حسبوها ..بقيناا نسولف لحد مصبو الغدا گعدنا نتغدا والبنات گامن للمطبخ يتغدن

اي غير هاي العله تحس وتروح تاكل ويه البنات ماكو بقت مگابلتني وگاعده وكل شويه وسأله سؤال لو تجيب وتحط گدامي اكل واني اگلهاا ماريد يابه اكلي انتي واني عندي ادين واكل ..ماكو لاتستحي ولاتخاف ولاجن خوانهاا وابوها مگابلينهاا ....

بالگوه عرفت اكل لگمتين واباوع لمهيمن عيونه صايره بگصته لان هو هم مايحبهاا ولا يرتاحلهاا ومايريد نبض تختلط وياها ..يخاف عليهاا لاتنعدي منهاا ومن خفتهاا ...

كملناا الغدا وصبينه جاي ورحنا للأستقابل نكمل گعدتنا وعفنه النسوان ياخذن راحتهن ...

والله بنص الگعده وخابر علي صديقي محصل رقم هاي نمارق ..دزلي اياه وحفظته عندي وكملنا گعدتنا بعدا عمي والولد وابوي تفقو يرحون لفصل بالعشيره

اني اعتذرت منهم لان مالي بهاي السوالف مال فصول والفواتح والاعراس ...معتمد على مهيمن والوالد همه يأدون الواجب بهيج طلعات ...

صارت بــ ٤طلعو الزلم لمشوارهم واني صعدت لغرفتي اريد اشوفلي طريق ادخل بيه لهاي نمارق حتى اندمها واخلي عيونها تبچي دم بدل الدموع ...

دگيت رقمهاا دك اكثر من مره مجاوبت ..رجعت حاولت هم مجاوبت عفتهاا بعدين اخابرهاا وشمرت التليفون وتمددت وحطيت ايد جوه راسي والثانيه على عيوني وبقيت افكر شلون اجيبهاا للدرب ...

اكثر من طريقه اجت بدماغي وكلهن سهلات بس خليهاا تفتح خط اول شي ..

بقيت متمدد ومغمض عيوني سمعت صوت الباب انفتح ونسد شلت ايدي من عيوني شفتهاا فاطمه

طفرت من فراشي وصرت گدامهاا واني شياطين ركبت براسي .... وجبت اخري من تصرفات هاي البنيه ...يعني مكفاهاا زحفهاا بالفيس هساا جايتلي للغرفه وتريد تسويلي مصيبه ...

لزمتهاا من ايدهاا وعتيتهاا عت وصوتي منصيه ماريد احد يسمع وابتلي وبوقتهاا تعال ياحسين وشيل الليله واني لو أموت مااخذهاا لهاي

....للللللج انتي شنووو شنو من صلافه شايله ..ماتستحين ماحاطه اعتبار لأهلج لخوانج لشيبة ابوج ...اني شكم مره گتلج جوزي من هاي سوالفج لا
اتوبج منهاا بطريقتي ...

...اووي على كيفك حسوني شبيك ليش هيج عنيف ترا اني اجيت اشوفك لان افتقدتك جوا وبقاا بالي عليك ...

...بالج علي مووو. امشي طلعي براا لااطلع روحج من جسمج امششششي ..فتحت الباب وشمرتهاا طاحت على نبض  عطت بيهاا ...

..وانتي الثانيه شعندج هناااا متفقاا وياهااا ولج ..

...يمه عزااا بعيني ..لاوااالله حسين والنبي لامتفقه ولا شي اصلاً اني جنت ادور عليهاا حتى اسئال سوسن هي هم جانت ادورهاا وياي ...

باوعت عليهن وحجيت واني اعصابي فالته ..

اشرت على هاي الس**طه فاطمه استغفر الله حاشا صاحبة الاسم منهاا ومن افعالهاا  ... سمعيني لج وهذا كلام اخر مره اعيده اذا رجعتي عدتي هاي سوالفج لو سمعت بيج حاجيه ويه واحد واللله وااالله بسماه محد يخلصج مني اذبحج بهاي ادي واشمرج بأقرب منهوله واخلص عمي منج قبل لااجيبيله العار وتنزلين راسه وهو مايستاهل ينزل راسه من وره وحده زباله مثلج ...

وهسااا يلاااا گدامي تنزلين وممنوع اشوفج خاطه عتبة بيتناا فاااااهمه ...

وانتي الثانيه واني أاشر على نبض ..والله والله والله يانبض وهاي صارت علي قسم اذا شفتج كاعده وياها لو مسولفه وياهاا لأگظي بيج التوبه واكسر اعظامج عظمه عظمه سمعتي ...

عطت بيهن ونزلن وهنه وحده تدعم بالثانيه خليتهن مايشوفن طريقهن منين ورجعت لغرفتي
 
.........

سوسن ...جنت اشطف بالگاع ونزلن فاطمه ونبض وثنينهن وجوهن مخطوفه ذيج راحت گعدت يم امهاا ونبض ركضت للمطبخ عفت الماسحه وركضت وراهاا ....

...شبيج ؟

....عزااا سوسن عزااا لج عمري مشفت هيج صلافه وانحطاط ...

..شكو نبض شنو صلافه وانحطاط مافهمت ترا ...

..تعاي واني افهمج ...سحبتني من ايدي وگعدت وسولفتلي على عملة هاي اللي ماتتسماا ....

وگف شعر راسي من اللي سمعته ..بعمري الراح والجاي ماشفت ولاراح اشوف هيج وكاحه
تروح للرجال برجليهاا لغرفته سترك ربي من هيج وقت وهيج زمن ...استر عليناا وعلى بناتناا يارب ...

عفتهاا واني راسي يفتر من وره هاي البنيه وكملت شغلي ونبض راحت تدرس من بعد ماطلعو بيت عمهاا ...

صعدت لغرفتي لگيت سروجي گاعد شلته لاعبته شويه ورحت غسلتله وبدلت ملابسه ونزلت وكلته
وحطيته يم عمتي جانت كاعده بالاستقبال فاتحه التلفزيون على قناة القرءان وتسمع وتسبح بسبحتهاا
عفته يمهاا ورحت صحت على منير ابني الثاني اكبر من اخوه سراج بــ٣سنين ...سراج عمره سنتين ومنير عمره خمسه ...

لگيته يلعب بالباب ويه الجهال طوبه ..دخلته سبحته وعطرته وتحلفت بيه ميطلع بعد لان ابوه على جيه وبس يشوفه يلعب بيه وبيا طوبه علبو عايفه ابنج وماتدرين عنه وين ...

وهم رحت وديته يم بيبيته وسويتلهم ماعون فواكه وحطيته گدامهم ....

وصعدت لغرفتي رتبتهاا وغيرت الفرشه وعطرتهاا ورحت سبحت وطلعت جففت شعري وعفته مفتوح مهيمن يحبه مفتوح بغرفتناا ميقبل الفه ..

وحظرت قميص نوم حلو اليوم ناويه اسهر ويه ابو زعاطيطي ..حطيته على صفحه ولبست گلبيه عاديه مال بيت ..لان بعد وقت حتى بعدا ممأذن ...

بقيت گاعده ارتاح شويه لان احس ظهري نكسر اليوم هواي اشتغلت ...

بعدهاا گمت احظر الحمام لمهيمن هساا يجي يريد حمامه حاظر ..فتحت الكنتور اطلع ملابسه شفته مگلوب گلاب ملابسه مخبوطه خبط ....

...اووف ادري هو اليطلعله ملابس هيج يگلب الكنتور
طلعت تراك وخاولي وداخليات وديتهن للحمام ورجعت ..وگعت ملابسه كلهن بالگاع وگعدت اصفط بيهن ...متت لحد مكملت ساعه اني ارتبهن وهو بثانيه يخربطهن ...

فتحت كنتوري ع الواهس هم رتبته مجان مهوس بس شويه عدلته ..لفت نظري البوم صور عرسناا اني حاطته بگاعية الكنتور ...

طلعته ورحت گعدت ع السرير وفتحته اول صوره جانت صور مهرناا ..
سحبتهاا ورفعتهاا وتذكرت بيهاا ذيج الأيام ..شلون اعترفلي بحبه ..

ههههه اذكر قبل ٦سنين  جنا گاعدين اني وابن عمي نتشاقه ونظحك وندك الباب فتحته واني اضحك صار مهيمن گدامي ..اختفت ظحكتي وسويتله مجال دخل وهو خازرني لان ظحكتي جانت عاليه ...

بس من شاف محمد ابن عمي انگلبت خلقته گلاب التفتلي وهو ظاغط على ايده ودمراته كلهاا برزت من عصبيته ...وعاط بيه ...

...دخللي جوووه وبلغي خالتي وخالي بجيتي  وبعد لاطلعين ....

طفرت جوه رحت بلغت امي ...

...يمه مهيمن ابن خاله سعاد اجه گاعد برا ...

...هلاا بيه يمه روحي سوي جاي وگليجه وجيبي وراي واني اروح اسلم عليه ...

...طلعت امي تسلم عليه واني بقيت بمكاني خايفه ومحتاره شلون اطلع وهو نبهني ماطلع بعد ...

رحت للمطبخ حطيت القوري ع النار ورتبت الكليجه بماعون وحظرت الصينيه ...ودخل اخوي ...

...هلاا اجيت بوقتك ..هاك اخذ الجاي للحديقه ...

..جيبي بس منو عدنه ...

...مهيمن ومحمد ابن عمو كمال ..

سجاد اخوي رفع حاجبه بضوجه ..اهووو مهيمن ابن خالي علي ..شعنده جاي ...

..جاوبته بسرعه ..لااااا ولك مهيمن ابن خاله سعاد مو ابن خالك هذا ...

سجاد بس سمع بمهيمن ابن خاله بسرعه اختفت تكشيرته وراح واني رحت لغرفتي ...

فتحت شالي وشمرته ع السرير ورحت وگفت گدام المرايه سحبت قراصتي ونزلت شعري وگعدت اسرح بيه واني اسمع سوالفهم وظحكهم من شباك غرفتي .....

وصوت واحد هو اللي ميزته وتعلقت بصاحبه وحبيته وحبيت كلشي بيه ...

اي اني سوسن رشيد طالبه قانون سنه ثالثه واللي جامعتهاا تحلف بجمالهاا وگعت بحب ابن خالتهاا المتعجرف الشايل خشمه ومحد بعينه ..وحقه ويلوگله اذا هو ميرفع خشمه لعد منو اليرفعه ...

اشو طول بضخامه بسمار ورجوله وعنده نظرات تشبه نظرة الصقر ..تنهدت ورحت شمرت نفسي ع السرير وغمظت عيوني وفصلت عن الدنياا وخليت بس صوته يفوت لأذني ..وحجيت واني صورته گدام عيوني ....

...اااااه يامهيمن اااه خالتي ظلمتك من سمتك بهذا اسمك ..المفروض تسميك صقر ،نسر ،فهد اسم يلوگلك وتلوگ عليه ...

حرمات انته مهيمن وابن خالو علي اسمه مهيمن فرق بينكم مثل فرق السما عن الگاع ....

انته وييين وذاااك ووين ..اشجاب الثوم للحلقوم ..

گطع علي هيماني واحلامي صوت امي وهي تصيح علي ...

...سوووووسن يمممه گومي جددي الچاي لأبن خالتج وحظري عشااج ..

..اوووف اوووف ادري وكت عشاا والساعه بعدهاا  بــ٥ العصر ..ماتخلون واحد يحلم ويترومص شويه ...

گمت جددت الچاي وصبيته وطلعته يمهم ..محمد ابن عمو جان ماكو سئلت امي ...

شنو ماما محمد ماكو ..جاوبتني امي ..

..ابن عمج خابرو عليه اهله وراح ..حظرتي عشاج حجت وياي ورجعت حجت ويه اللي خزرني بس سئلت عن ابن عمو ...يمه مهيمن اليوم عشاك يمناا ولاتكول لا  يبعد امك ...

...جاوبتهاا واني ارجع لجوه يمه هسا راح ابدي اسويه ...

دخلت للمطبخ وفتحت المجمده طلعت منهاا حافظة الكبه وطلعت لحم ..وسديتهاا ورحت حطيت اللحم بطاسه بيهاا مي حتى يحتل وطلعت الكبه فرغتهاا بصينيه هم تحتل ..وسمعت صوت مهيمن وهو يحاول يتملص من العشاا بس امي بقت مصره إلا يبقاا وهذا اللي صار ...

بين ما أذن المغرب وصلو كملت العشا صبيته وگعدو يتعشون واني رحت لمطبخ اكل لان استحي اگعد وياه بنفس المكان ....شگد احبه وروحي هيمانه بيه بس ماعرف اگعد وياه ولو ثانيه احس روحي كلي اتخردل واصير ما اعرف اتصرف ...

لهذا رحمت نفسي من الأحراج وگعدت بالمطبخ ...يتبع ...