نبض دافي الفصل الثامن عشر 18 - بقلم Nabá baqer

نبض _ دافي

Nabà _ Baqer

الجزء الرابع عشر.....

_____________________________

كيف نصبر ؟
_ مثلما نصوم تماماً .. متأكدين ان أذان المغرب. سيأتي..

_______________________________

بوستهن وضيفتهن وكعدت وهنه كصني كص سونار ماشالله عليهن مو عيون شوكت ما ارفع راسي الكاهن مركزات بيه... ماتحملت خليت وطلعت وعفت امي منطلقه بالكلام وياهن عبالك تعرفهن من سنين..

رحت لغرفتي وبعد ماطلعت ...

لحد ما راحوا اجتني امي للغرفه وهي فرحانه
دكول خوش ناس وحابتهم ومرتاحه لامه

ادري ماما انتي القبلهم هم حجيتي نفس الشي
وسويتيهم انبياء الله بأرضه وماكوا منهم..
وشفتي شلون طلعوا... وشنو سواو

ميخالف بنيتي بس اني كلبي يكلي هالمره راح تنسعدين امه واخواته حبابات ولسانهن حلو
انشالله اذا هاي القسمه تسعدج اريد من الله يتممها...

بيني وبين نفسي جنت ادعي العكس
ياربي كون ماتم وابقه طول عمري بدون زواج يارب

بس بعدين اذكرت شغله !!!!

اكول ماما شو من حجيهم مبين همه مو منا يعني
موبغداديين. ؟؟؟

اي يمه همه أصلهم عماره بس شغلهم هنا ومنتقلين
لان يشتغلون بالبانزين والنفط وعدهم بانزين خانه (محطة تعبئة وقود ) وهمه كلهم يشتغلون بيها...

زين لعد ليش عريس الغفلة مايشتغل وياهم؟؟

والله يمه العرفته الولد مايكدر لان مدري عنده حساسيه بالقصبات مدري كالت ربو ومايتحمل ريحة البانزين....

بس شنو يايمه طارن بيج من شافنج وامه كلساع وكالت حبيتها وخشت قلبي ونشالله اصير من نصيبنا

وبقن بس يسألون وبعدها يجي الولد وشوفينه ويشوفج وانشالله اذا جانت قسمتج فتكمل على خير ..

اي مواني الدوري العراقي حتى نشالله اصير من نصيبهم ... والله يالله يحجون الواحد كوه...

عدن كم يوم والموضوع سكته واني فرحانه
لان خلصت و الحمدلله شويه شويه بديت ارمم نفسي من جديد وارجع مثل قبل ..

وخصوصاً مرض سوسن كلش فادني لان الشغل كله صار علي اضافه للطبخ والعجن والخبز فالنهار كله اخلصه شغل وبالليل اذب نفسي شهيده بالفراش
بدون تفكير ودموع وحزن..

يعني اطبق المثل الي يكول
(مصائب قوم عند قوم فوائد )
لا خطيه الله يكومها بالسلامه وتجينه بنوته حلوه
لان كلش داتتأذه وهي بعدها بأسبوعها الخامس ....

لليل اجه مهيمن كالب الخلقه ومايتحاجه بس يصيح
ويرزل حتى ابنه ما سلم منه هم أخذ المقسوم ونام ودمعته على خده خطيه..

مافهمنه شبيه ولو هو موجديده هاي بس يعني لازم اكو سبب..
وهالمره كلنا نريد نعرف السبب...

امي حاجته كلها بعدين
بس جان يسأل عن ابوي ..
شويه واجه ابوي من الكاظمية جان رايح ويه جماعته بالمنطقه رياجيل كبار ما عدهم شغل وعمل كلهم تقاعد
فمخلصينها مزارات وتسيورات وكعدات بالكهاوي الشعبيه اللي موجوده بمنطقتنه برأس الشارع فيروح يخلص العصريه وياهم...

المهم رجع الوالد صبينه العشه وتعشينه
وشربوا جايهم وشويه ودخلوا للاستقبال وسدوا الباب

اني هنا الدوده شتغلت بقيت رايحه راجعه اريد بس اسمعلي كلمه...
الفضول دمرني
اريد اعرف شنو عدهم حتى يسون اجتماع مغلق
مرت ربع ساعه وعدت النص ساعه وراحت الساعه
وهمه ماكوا وكأن الإستقبال بلعتهم...

هناا الفار كام يلعب بعبي على كولة المصرين
صرت اجيبها منا واوديها منا ...

وكلبي كرصني وتسلل الخوف الي من سمعت صوتهم بده يعلى وخصوصاً من اجه اسمي بالنص ...

عرفت السالفه بيها اني ...

صرت ارجف واردد
{وجعلنا من بين أيديهم سداً ومن خلفهم سدا فأغشيناهم وهم لا يبصرون } ...

ومتت خوف مع اني مامسويه اي شي حتى الشارع
مشايفته بس الخوف بهذل احوالي ...

لحد ما طلعوا وكلمن راح لغرفته واني عبالك وحده عدها ولاده يارايحه ياراجعه...

مهيمن راح لغرفته ينام وامي هماتين راحت وره ابوي وطفوا ضوا غرفتهم والبيت صار صنطه وكلها نامت
إلا اني النوم جافاني...

شيصبرني لباجر حتى اعرف شنو السالفه..
والله وصلت لمرحله صرت امشي واغني
(شيجيب باجر واصبر شلون ) ...

بألف يا علي ياله نمت وثاني يوم من غبشه
كعدت ريكتهم وطلعوا لاشغالهم واني ماكوا
سالفه ابالي بس اجتماع البارحه...

امي وضعها ماعاجبني شكلها مهموم
وحتى ابوي شكله مانايم وحتى مو مثل كل يوم
يسولف ويحاول يضحكني ويغير علي جو
ماكو اليوم اكل لكمتين وطلع لشغله
ومهيمن خوب هذا من الله معصب وميتحاجه
يمكن امي جايبته بعركة لو بوقت تأخير الرواتب
لان هذن الوقتين
الواحد يعصب ويصير مايتحاجه...

بقيت النهار كله اني اشتغل وعيني
على امي اريدها تحجي ماكوا
والمشكله كلبي حاسسني اكوا شي !!!

بس شنو هذا الشي الله اعلم وأمي تعلم
بس شون اخلي نفسي هم تعلم هاي اللي يرادلها
مخمخه وتفكير...

لهذا فكرت بخطه جهنميه بس تنفيذها
يتوقف على سرعتي بأكمال اعمالي الشاقه

فشسويت بسرعه.. بسرعه كملت كل الشغل وطفيت الطباخ
جوه الجدوره ورحت سويت ماعون فاكهه وعصير
طبيعي رتبتهن بصينيه وحطيت ماعون كيك وكاسة
كرزات مشكل
وسويتها صينية كعدة نسوان وغيبه ونميمه مرتبه

ورحت لسوسن لغرفتها...
لان اكيد هي تعرف لان اخوي الأستاذ روميو شكد
ماهو حقنه وماينبلع بس يحبها لمرته ومايضم عليها
شي ...لهذا فكرت اعرف السالفه من المصدر المقرب
للمصدر الرئيسي...

شلوني ولا اشطر صحفيه بال CNN
متخطط لرصد الأخبار مثلي...

المهم دكيت الباب ودخلت
شفت ام السوس نايمه وكفشتها واصله لتكريت
وفاتحه ال TV على قناة دينيه ..

تره كلش متلوكلج الديانه..

على ساس تلوكلج تعاي هاي شنو يعيني .. يعيني
نمنميات وكذا وذاكرتني بعد ... خيرج شو ما ارتاحيتلج

مو صوجج صوجي اني الكملت شغلي وكلت اجي يمها
اونسها شويه إبدال مباقيه لوحدها..
اكوم اكعد يم امي احسن ..

لا ولج تعاي اشاقه شبيج بسرعه صدكتي..
تعاي اجيتي بوقتج لأن جعت ..

هو انتي ياوقت ماجوعانه.. عوزج بس تاكليني ترا خوش بيه لحم والله ..

عوووع لعبتي نفسي عابتلج .. اكلج الجهال وين
شو مالهم صوت ..

جهال !!!!!!
لا حبي كولي الشواذي السعالوه الملايجه مو الجهال
المهم الجبير الغبير كاعد يلون بالاصباغ اليوم صاير
دافنشي.. والثاني كالعاده بحظن البيبي الحنونه...

عوفج من الجهال وكليلي شبيه رجلج من البارحه لليوم
عالن الاستنفار علينه ومدخلنه بحالة تأهب قصوى ...

هممممم كولي هيج من البدايه يعني هاي الصينيه
موحباً بيه .. مسويتها حتى ترشيني واكلج السالفه...

ايون يحبي وبعدين شنو انتي وجبة كنتاكي لو بطل ببسي حتى حباً بيج ترا ماخذه بروحج مقلب والله
المهم غردي عزيزتي واطربيني شنو من
مصيبه منتظرتني...

اممم اكلج بس ماظوجين ولا دخلين بحالة اكتأب
مثل عادتج...

الله يستر .. احجي بالله

الناس الي اجو عليج قبل فتره جاين وسألين
بالمنطقه و واحد ناقص غيره
كايللهم انتي مطلقه ووو

وشنو احجي شبيج كمتي تمتمتين...

نبض فدوه لا ضوجين بس حاجين عنج حجي موخوش وصديق مهيمن خابر ومعتذر عن الخطبه..
بس فدوه موضوجين..ولا تقهرين نفسج
هاي الناس ماعدها بس القيل والقال...

ماحجيت شي اكتفيت بالسكوت هو الوحيد الي
يكدر يعبر عن احساسي هسه...

ابد ماضجت لان ما تم الموضوع لان اني اكيد مجنت
حوافق..
بس القهرني سمعتي اللي صارت بالارض ...

من بعد هذا اليوم رجعت لعزلتي والسكوت صار هو
عنوان حياتي ...

شكد ما احاول انسه او اكمل حياتي بشكل عادي
وارجع نبض القديمه الي تضحك وتحشش..

ما انجح ليش لان
لازم اصير اشياء نغص علي ...
وترجعني للمربع الأول...

امي خطيه شبعت قهر وحتى ضغطها يوميه
صاعد ورايحه للمضمد لو للطوارئ..

واخوي وسندي جان كل مايصير شي لو احد حجه
يجي علي ويكعد يرزل ويغلط... هاي ماعدا النظرات
الي احصلها بالكومه والكعده..

بس حسين الوحيد من أخوتي الي جان يذكرني من يطلع .. بالحلويات وهو الوحيد الي ماسمعني كلام
ولا اذاناي بأي تصرف بالعكس هو جان يوكف
وياي ضد مهيمن...

وهو الجان ميقبل اي احد يسمعني كلمه حتى مره
من المرات رادو يجونا بيت عمو ...
واني ضجت لان من يجون بس يسألون
ويطقصون...

ماناويه ترجعيله؟؟
لو
هم تشتاقيله؟؟؟؟ !!!!!
وطبعاً هاي سوالف فاطمه
من تسألني ابقه مفهيه بوجها شجاوبها بالله
يعني هي هاي هم اسأله تنسأل اشتاقله!!!!!!
هي يالله
شو اني ادعي عليه بكل وقت
وهاي جايتني دكلي ترجعيله

لهذا بس شافني ضجت صاحلي

نبوض اليوم ماعندي شغل شنو رأيج نطلع للألعاب

اني سمعت اسم الألعاب واني طرت من الفرح
بسرعه رحت بدلت وجهزت نفسي
وطلعت انتظره بالحوش بهاي الاثناء دخل ابوي
ومنير الي بس شافني مبدله كعد يسأل

عمه وين رايحه
طالعه اني وعمو حسين
جاوبته وذكرت اني مامستأذنه من ابوي
رحت عليه ...

الله يساعدك بابا
ويساعد بختج بنيتي شنو اليوم كاشخه والعيون تلمع
شكو عساه خير ...

اني خجلت لان بدلت وجهزت نفسي بدون حتى ما انطيه خبر عاد بتسمت وكتله

ااا حسين كلي نروح للالعاب اءاء ميخالف اروح وياه
ابوي طكها بضحكه ومبينه طالعه من كل قلبه وبعدها
كلي

ههههه انتي بدلتي وكملتي وجاي ادكليلي هههههههه
روحي بويه تونسي... زين عندج فلوس او اوكفي هاج
خذي ذن حطيهن بجنطتج وديري بالج على نفسج
ولا تيهين اخوج خلي ايدج بأيده..

اني بست راسه وكتله شنو بابا قابل طفله اني وكاعد
توصيني لاتخاف مااضيع باقيه على قلبك ماتخلص مني ههههه

عمه اني هم اريد اروح للالعاب

درت وجهي وشفت منيرو اللزكه مبدل و واكف

لا والله عبالك اخذك وياي ماكو يلا روح لامك احنه مناخذ زعاطيط ويانه...

شو اني بعدني مامخلصه كلامي هذا كعد بالكاع وصار بيجي ويشمر برجليه ودموعه صارن عبالك شلال..

اني بقيت صافنه عليه وفاتحه حلكي مترين
ابوي كلي
يابه خذيه وياج خطيه خليه يغير جو شويه..

اخذته حتى اخلص من هوسته...بيومها تونسنت ونسه
مصايره...مخليت لعبه ماصعدتها.. وضحكت ضحك
احس بطني انشكت بالنص من كد الضحك..

صدك نسيت كلشي ورجعت طفله صغيره
بس ياراحه ما أتم مادام مهيمن موجود بحياتي
من رجعنا لعب بينا لعب وكلبها علينه عزه..

وبيومها تعارك هو وحسين لان طلعني
و شنو اطلعين وانتي سيرتج على كل اللسان ..
كافي علينا فضايح...

من هذا اليوم اني بعد ماطلعت
وحتى القرابه صرت ماروحلهم
عزلت نفسي بالبيت
وهملت نفسي وشكلي رجع ذبل
وصرت ادفن نفسي بالشغل
خصوصاً سوسن متكدر تتحرك هواي ولازم بس تنام
لهذا اني صار مهربي من واقعي الشغل
ما اخلي شي ما اجلفه من الحيطان والاصغر حاجه بالبيت ...

ورجعت سالفة الخطابه تتكرر
ونفس الحاله يجون يشوفوني وبعدها يرحون
ومانشوفهم... والسبب الجوره والمنطقه
سوني طالعه وياه ومدري شنو مسويه وهو مسويلي

لحد ما البارحه هم اجه صديق صباح والولد من اربيل
مو من بغداد
اجه هو وامه واخوه
كعدنا كلنا بالاستقبال واني بعدين اجيت الولد جان
حلو اشكر وعيونه ملونه وامه كولش حبابه اني نفسي من شفتها ارتاحيتلها بس اخوه جان شكله يخوف
مبين نفس طينة مهيمن لان هم حواجبه معكوده
والواضح حجايته هو المسموعه لان جانوا
بكلشي يستشيرونه...

بعد مراحوا الصراحه تمنيت أتم هاي الزيجه حتى بس اخلص من حياتي الي داعيشها ...

بس الي صار هو ...
عدن كم يوم وخابر صباح
يكول اخوه سأل بالمنطقه وكايليه نفس الكلام
ومعتذرين عن الموضوع...

حسين من سمع كولش اتأثر وطلع هاد يريد يحط
حد لهذا الكلام ...

طلع لليل رجع بس حاله مدري شلونه ...
وهم رجعوا اجتمعوا بالاستقبال..
بس هاي المره اني ما اهتميت ولا حاولت اعرف
لان خلاص الموضوع صار واضح وضوح الشمس ...

بس الي ماجنت حاسبه احسابه هو ....

.
.
.
.
.
.
.
.
.
.
حسين ...
من يوم الي فصخت بيه نبض والكلام صار يطلع أشكال الوان ..
صرت واني كاعد بمحلي يجيني الحجي..
والأكثر سببه الكرايب..
النسوان وين مايرحن يحجن
واحنه بمنطقه شعبيه... يعني الناس هناا
تموت على هيج سوالف...

حتى الخطابه يجون وخوش قسم بس مع الأسف يرحون بس يسألون ...

اني بعد ما كدر اسكت لان فاض الصبر بيه
لان شكد ما احجي وأكول ماكوا هيج شي ..
ماكدر اسيطر على الحجي ... لان لا واحد ولا ثنين

اليوم رحت للأسواق الرئيسيه الموجوده بالمنطقه
لان اي واحد يجي يريد يسأل يروح ياللاسواق يا للحلاق.. هاي المكانين الي عدهم السيفي الخاص بكل سكان المحله...

دخلت وكلت السلام عليكم

جاوبني ياسر ..
وعليكم السلام ياهلا بأبوعلي وين هالغيبه
جاوبته واني مثكل وجهي عليه ..
هلا بيك.. موجود بالمحل تعرف شغل وموسم هذا

جاوبني ...
الله يرزقك.. ايي تفضل وسحبلي الكرسي اني هم كعدت وهو حط كدامي عصير وكيك
رجعته عليه
هو ستغرب ردة فعلي
سألني ...
هاا بوعلي شصاير وماتريد ضيافتي..

جاوبته..
ياسر بدون لف ودوران انته الي ادكول للناس الي تجي تسأل عنه وقصدهم الخطبه من بيتنا...

ياسر سكت شويه ..
وبعدها كلي ..

شوف حسين اني راح اكلك والله شاهد علي ما مكذب بكل كلمه راح اكولها ...

صحيح هواي يجون يسألون بس وستر اختي ماحاجي بحرف موزين عنكم لان اني اعرفك واعرف انتوا شنو
بس جانوا يطلعون مني يرحون يسألون الشله التكعد
برأس الفرع... وانته تعرفهم شنو من شله هاي ..
النبي مايسلم من هم
ولبارحه كدامي صاروا يحجون عن كم عائله بالمنطقه وانتوا وياهم واني والله شاهد علي
ماسكتت ألهم تعاركت وياهم وتضاربنه
وطردتهم وهسه اي واحد يجي اني اطرده
لان هاي أعراض ناس واني هم عندي عرض
وماقبلها على غيري مثل ما اقبلها على نفسي ...

والله يا ياسر ماعرف شكلك عذرني لان جان اسلوبي جاف وياك بس انته هم تعرف حقي لان اختي سمعتها اطشرت... وصار الكل يحجي بيها
وهي لأبيها ولا عليها ... كل ما بالموضوع انخطبت
وماصارت... يعني لا صاحبت ولا نهبت ...
كله صار بشرع الله ورسوله..
وكدام الدنيا كلها...

على العموم اني هاي الشله اعرف شلون اكص السانهم
واعلمهم شلون يحجون بأعراض العالم...
يلاا اني اترخص ومشكور على كلشي...
ولا تزعل مني لان انته صاحبي واني شلت عليك بس هسه اني المديونك وتندعيني عزيمه

حبيبي ابوعلي انته غالي وهذا حقك واني لو مكانك اسوي نفسك واكثر... وعزيمتك واصله بس قبلها اني اليوم جنت ناوي امرلك للمحل
لان جنت رايد استأذنك بموضوع بس مدامك انته هسه هنا راح اكلك...

كول ياسر واني خادم وركبتي سداده

تسلم والله ماتقصر..
بس جنت رايد اكلك.. اريد اجيب الأهل واطلب ايد المستوره اختك شتكول... خوماعدكم اعتراض!!!!!
يتبع

________________

اعتذر منكم بس الأيام الجايه
مراح اكدر انزل ولا اكتب
لان اخوي البارحه سوه
عمليه ...
ومن البارحه لليوم الخطار
ماوكف..
مجاميع مجاميع
واحتمال اسبوع احنه راح نبقى على هالحاله
وبهاي الحاله مراح اكدر اكتب
لان تعرفون الخطار
يخلصها
جاي .. مي .. غده .. عشه
يعني من الصبح لليل احنه وكفه وحده
بس انشالله احاول اكتب ولو نص بارت
وانزل..
بس اذا ماكدرت الله والعاذرين...

مع حبي واحترامي للجميع ❤

Nabà Baqer

Dan 😘