نبض دافي الفصل التاسع عشر 19 - بقلم Nabá baqer

نبض _ دافي

Nabà _ Baqer

الجزء الخامس عشر.....

بالبدايه احب اشكركم من كل كلبي على
حبكم وكلماتكم دعائكم بالشفاء
لاخويه...
كولش هوايه فرحتوني
فعلاً حسستوني احنه
عائله وحده ..
ربي لا يحرمني منكم ..
والي أطلبه منكم تدعوله كون نتيجة الزرع تطلع
سليمه والغده تطلع حميده
لان منتظرين نفرح بزواجه على فرحة الزهره
ومانريد اي شي يبعد الفرحه عنه ولا يفجعنه بيه ..
بجاه هذا الشهر 🙏🙏

_____________________________

وليعلم آلله اني بذلت حتى ، ذبلت 🥺 🥀

_____________________________

حسين ...

من سمعته بقيت ساكت لااكدر
اكله تفضل ولا اكدر اكله لا

لان اذا كتله ايي وراح يجي
اعرف نبض مراح توافق ومهيمن راح يجبرها
حتى بس يخلص من الكلام ..
ويسكت الناس ...

واذا كلت لا ..
يجوز تطلع خوش قسمه واضلمها

بقيت محتار شأكله بعدها كتله هلا بيك
بأي وقت ..
ومادري اذا سويت زين لو شين
عفتها يم الله ..
رجعت للبيت واني بس افكر
وحتى احطهم بالصوره باليل اجتمعت بيهم
وكتلهم على هاي الشله الي رحت وطيحت حظهم
ورحت للمختار هم كتله عليهم وهو ماقصر
راح لاهاليتهم واحد واحد
ومنعهم من التجمع بالشارع...

وبعدين كتلهم على سالفة ياسر
مهيمن كيف وكال
مابيها شي ياسر خوش ولد
بس امي وابوي ماقبلوا

ليش يمه تريد اذب اختك هيج ذبه
شبيها وزوجونها لياهو الجان
شو جمال وشهاده وأخلاق

اني ماقابله... ومراح اقبل

وانته ابومهيمن شو ساكت..

والله يا أم مهيمن الولد خوش ولد
هم أخلاق وسمعته مثل المسك
وهمه ناس على كد حالهم لاعدهم زايده ولا ناقصه
امهم متوفيه وابوهم خوش رجال بس صار وياه
حادث وراحت رجليه..

وبنيتهم هم جنها نبض نفس الاخلاق..
بس يابويه...
اني هم ماريد انطي اختك...
ولاتنسه اختك مصارلها هواي من طالعه من تجربه
اخذت منها ما اخذت..

اني حتى هاي القسم الي تجيها مراضي عنها
بس انته جنك ماتصدك أحد يدك الباب
عبالك حمل وتريد تخلص منه ..

مهيمن ...

لا يابه شهل حجي شنو حمل
انته تدري نبض اعتبرها بنتي مو اختي
بس يابه الحجي كثر ..

والناس الساناتهم ماترحم
وياسر ابن المحله ويعرف كلشي
ورغم هذا اجه ودك الباب..
بعد ليش نرفض..
وهي هم موطفله حتى نكول بعد وكت
دخلت للعشرين والبكدها فاتحات بيوت
وعدهن جهال..
واني برأيي هاي انسب قسمه الها
وهم يمنه بالمنطقه..
والولد وحيد لاعنده أخ ولا كومة خوات هي وحده والاعرفه عنها صغيره بعدها تدرس..
يعني مراح تتعذب..

مهيمن يسولف واني مامقتنع لان جنت ناوي اخليها ترجع لجامعتها بس من باوعت وشفته شلون قنع ابوي وحتى امي شكلها اقتنعت من عرفت راح اصير قريبه
عليها وماعدها عيال عيذبونها..اقتنعت واني انجبرت اسكت... لان اني هم بيني وبين نفسي مقتنع من ناحية الولد ... بس وضعيته وعيشتهم هاي الي ماجنت مرتاحلها...

ثاني يوم....

نبض ...

جنت كاعده بالكاع وألف كبه للغده
اجت امي كابلتني وكعدت
باوعتلها عرفت عدها سالفه
احجي يمه شكو
امي باوعتلي عود شتقصدين
ماما ترا اجتماعاتكم هليام كثرانه واعرف اني محور هاي الاجتماعات واعرف انتي هسه عندج سالفه فأحجي لا تترددين...

يمه منج خوب انتي مفتحه بالبن اي عندي سالفه واريدج اسمعيني بدون ما طفرين مثل كل مره ...

اليوم جايج ناس... الولد من المنطقه خوش ولد
وخوتج موافقين وكلنا موافقين موبس اخوتج لان
هاي خوش قسمه ..

لهيج اريدج ترتبين نفسج للعصر زين يمه ..

اني جنت الف واسمعها من كملت كلامها كتلها
اكلج يمه اني هيج صايره حمل عليكم
هيج تردون بس تخلصون مني ..
يوميه جايبيلي ناس شكل ويوميه لبسي وطلعي
وتاليها يرحون ومايرجعون ترا مصارت عيشه هاي
كافيي
رحموني ترا اني بشر من دم ولحم وإحساس
يعني مومطي حتى تحملون عليه وتردونه ينفذ ويمشي بشوركم وهو ساكت...

زواج مازوج وشسون سوو

لجججججججج نبببببببببض ...
حيوانه عديمة التربيه ..
تصيحين على امج ولج
.. هاي الجامعات هيج تعلم وتربي... ام التعليم والدراسه.
شو تزوجينه ورجلج فوك راسج.. وإذا اسمعلج صوت
احط راسج بالبلوعه وانحرج افتهمتي...

لا مافتهمت كافي حرام عليك انته اخ انته
انته انتقام.. بلاء من رب العالمين ونزله علينه
دمرت حياتي...
موتتني بالحيا..
مكفاك مستقبلي الضاع... لو سمعتي الي صارت جوه الرجلين بسببك... مية مره كلت ماريد لا زوجوني
بس انته لاا شلون أحد يعصيك..
كمت وقنعت البيت كله وزوجتوني لذاك الحيوان
ورجعت اتحاربني بالصغيره والجبيره
حصره علي اسويلي حاجه لو اريد اطلع لمكان
وكلت...
ماكوا عود من تتزوجين وطلعي وسوي البعجبج
هاي اذا اله نيه ياخذج...

لك حسستني اني عار ولازم تتخلص منه
مرض وتريد تبعده بأي طريقه...

ليالي تعدي علي اخلصها بجي..
وسؤال واحد بس الي اتمنه الكاله جواب...

ليششش.. ليش اخوي يريد يخلص مني
ليش المعتبرته سندي... نابذني ومرخصني
وبايعني بالرخص.. ليششششش ولك ليشششش

جنت احجي بكل حركة قلب ودموعي وشهكاتي
ملن المكان... ما حسيت غير انجريت من شعري
ونسحلت...
وامي تعيط وتتصيح
ولك عوفها الله لاينطيك ولك اختك هاي عوفها
مهيمن عوفها ولك اغضب عليك اذا جستها

وهو ماكوا ولا كأنه يسمع اخذني سحل من شعري شمرني بالغرفه وقفل الباب ونزل علي ضرب
بالحزام...

يضرب ويغلط

حيوانه مامربايه اليوم موتج على ايدي
ولج تصيحين بوجهي... اني تكليلي ولك
اليوم اعيد تربيتج من جديد ..

لج فوك عارج.. جايه بكل عين صلفه تحجين وتصيحين
بسيطه ولج بسيطه...

ويه كل كلمه يكولها جنت احصلي ضربه
وجهي .. رجلي .. ضهري ... اديي
ضرباته جانت تتوزع بكل مكان بجسمي

دموعي جفت وصوتي انبح من كثر العياط والبجي
وجسمي خدر كمت ما احس بيه

وهو تعب وصار يتنهد من كد ماضربني
كابلني وكعد واني ضميت
راسي منه خفت لا يضربني بوجهي

رفع راسي من شعري وعينه صارت بعيني
حجه بصوت متقطع من سرعة تنفسه
وعيونه محومره وكصته تذب عرك

شوفي لج صوت ماريد اسمعلج دمعه ممنوع تنزل
تبقين هنا محبوسه بغرفتج... طلعه ماكوا
خلقتج ماريد اشوفها لحد ما تنكلعين
اسبوع بس وترحين... وعساج مارجعتي..

بعدها هد شعري بكل قوته بحيث راسي انضرب بالكاع ورتفع مرتد...
بعدها فقدت الوعي ...

بعد مدري شكد حسيت نفسي بفراشي وامي كاعده تقره علي وصوت بجيها زرف قلبي تبجي بحركه
...
حركت نفسي ردت اعدل نومتي حسيت اعظامي اتفككن والالم جان يسري بكل جسمي عطت بشهكة بجي لان ماتحملت كل هذا الوجع

امي خطيه فزت تمسح على راسي وصيح
اسم آلله يمه اسم آلله.. بيه ولابيج كون
يمه نبض اسمعيني يمه باوعيلي بس فتحي عيونج

جنت اسمعها بس ماكدر لاافتح عيوني ولا اكدر احجي
عيوني ثكيله واحس حراره تطلع من كل جسمي
اديي اريد احركهن ماكدر ثكال ماينرفعن
وراسي يوجعني بقوه...

سمعت صوت الباب انفتح..
هذا صوت سوسن تحجي ويه امي اريد افرزن شيحجن ماكدر.. بعدها حسيت بجكة ابره...
يمكن ضربتني ابره بس مال شنو ماعرف..
بعدها رجع النوم غلف عيوني وستسلمت اله...

ياسر ...

جانت امنيتي ارجع اكمل دراستي الجامعيه
رحت وسألت كالوا بس مسائي ولازم تدفع
٣ملايين ..

زين اني منين أجيب ال٣ ملايين
خليت وكعدت وشلت هاي الفكره من بالي ..

وبقيت لازم الاسواق حياتي صارت عباره عن محل
من الصبح لليل بالوحده بالثنتين ياله أسد المحل...
لان اني الاسواق الوحيده بالمنطقه الي توفر كلشي
لهذا اكوا سحب قوي...

شويه شويه بديت أكبر بالمحل..
لحد مصار سوبر ماركت..

والحمدلله الحال تحسن و وضعنا المادي صار بعد احسن ...

أملي صار بشمس بلكي هي تكمل وتحققلي حلمي
واصير مختبريه..
لان هي هم حلمها تكون بمجال الطب..
لهذا من هسه سويتلي صندوق وخصصته بس الها
اريد اجمعلها فلوس للسادس..
ماريد أقصر وياها بشي ...

فديوم جنت كالعاده واكف بالمحل وفاتن سيارات
كلها فخمه وراقيه طلعت باوعت شفتها طلعت كبل
وطبكت بالفرع المقابيلنه...

سألت طفل كتله هاي شنو السيارات
كلي لبيت ام مهيمن اليوم خطبة بتهم..

بالبدايه ماعرفت منو بيت ابومهيمن بس بالليل
اجوا شباب كالولي
... تجي ويانه للكهوه اليوم العبه
ريال مدريد ويه فالنسيا...

كتلهم ايي انتظروا بس اقفل الاسواق واجي
قفلت المحل ورحنه نتمشه بالطريق كتلهم

شنو حسين ماكوا ... يابه خابروه لا يعتب لان رايحين بدونه...

جاوبني واحد من الولد ..
يابه حسين اليوم مختفي.. خطبة اخته اليوم وخابرته
يكول عدهم خطار مايكدر يطلع...

هااا بالخير انشالله..

كلمه حجاها الساني واذاني قلبي من عرفتها انخطبت

أيام خلصتها واني عيني عليها من تطلع الصبح ويه اخوها جانن عيوني تحرسها وعقلي يبقى
مشغول بيها...
لحد مترجع واني ابقى مراقب الطريق
منتظر جيتها...
من تمشي جنت احسها تعزف على أوتار قلبي

برائتها وجمالها ونظراتها كلشي بيها يسحر
ويجذب...

ليالي واني جنت احلم بيها ...
ولساني مابطل يدعي ربي يرزقني اياها
ويخليها اصير حلالي...

بس بعد صارت بذمة رجال غيري ..
لازم اشيلها من راسي..
وادعيلها بالراحه والسعاده..

مرت الايام والاشهر وجنت اشوف خطيبها
يفوت من يم محلي بسيارته الراقيه..
وكشخته الي ادل على يسر حاله ..

من جنت اشوفه اكعد اقارن حالي بحاله
الكه الكفه تميل اله بكلشي...

حقها اذا ارتبطت بيه شاب مرتب وانيق وحالته زينه
قابل تباوع لواحد مثل حالتي...

كل هذا جنت اضمه بقلبي واني مطحون طحن من القهر بس مابيدي شي اسوي...

بس بيوم صار شي رجعلي ضحكتي والأمل من جديد

جانت الدنيا مغرب...واكف اوزن شكر لمره ودخلت ام عقيل هاي مره جبيره بالمنطقه بس شنو تعرف أخبار المنطقه كلها ..

سلمت ورديت عليها السلام

خاله تردين بس شكر ؟

لا يمه انطيني وياك من هذا الجكليت لوليدات ابني

اي خاله ادللي أخذت كيس وكعدت انوعلها بالحلويات

وحجت ام عقيل ...

خيه ابنج ما رجع مرته ؟
جاوبتها المره...
لأخيه منين فلك طرها تريد تطلك

يا خيه طلكوها ختولي وزوجيه اغاتها

خيه شيطلكها وعنده منها ثنين ولد منو يربيهم
اني هلشوفة عينج مابيه اعين نفسي رجلي خراب

يعيشون خيه شعليهم.. بعدين هاي نبض بت ام مهيمن
مو اطلكت وهي حتى ما ماخذينها ... ماتاخذينها لابنج

هنه يسولفن واني بالي كله يمهن من سمعت اسم نبض رفعت راسي وعفت كلشي وركزت وياهن ..

ومن كالت اطلكت وهي ما ماخذينها احس الفرحه ترستني وبتسامتي ما سيطرت عليها
حته المره انتبهت علي وسألتني

يااا خاله شبيك تضحك ويه روحك

بقيت ساكت ماجاوبتها وهي هزت ايدها وراحت
بيومها سديت الاسواق من وقت
ردت بس اختلي بروحي ...
اريد استوعب الكلام السمعته...
صدك لو يتهيألي ...

ثاني يوم تأكد الخبر من اجوا شباب
وحجوا بالسالفه كدامي ...
بس الضوجني الحجي الي صرت اسمعه
كاموا يألفون قصص.. ويطعنون بأعراض الناس ..

أكثر من مره يحجون عليها كدامي واتعارك وياهم واطردهم...

وهاي الفتره أكثر من مره يجون ناس يسألون عن اخلاقها وسمعتها واعرفهم خطابه...

من اجاوبهم وامدح بيها احس قلبي ينعصر ويه كل كلمه تطلع مني ...

يوم عن يوم صرت اخاف لا اخسرها مره ثانيه

وفكرة اروح واتقدم الها شاغله تفكيري بس اخاف
خاف لا انرفض بسبب وضعي المادي ...

لان شكد ما اني اشوف وضعي زين والماده زينه
بس ماتجي قطره بحر خطيبها السابق...

لهيج جنت متردد...

بس من اجه حسين البارحه وسألني عن الحجي الي دايطلع ... و وضحتله كلشي .. وتفهم الموضوع

تشجعت افاتحه بموضوعي...
ومن حاجيته وسمعت رده ارتاحيت وتحمست
افاتح والدي بالموضوع
ومن حاجيته وشفته فرحان وما عنده أشكال خصوصاً اني حطيته بالصوره وماضميت عنه اي شي
حتى الحجي الي طلع عليها ...

بس هو ماهتم خصوصاً من شاف فرحتي واني اسولفله عنها ...

يابه البنيه بعدها ماطالعه من بيت اهلها
يعني ما ماخوذه حتى نكول موخوش وحده
وبعدين هي جانت مزوجه بشرع الله ورسوله
واكوا هواي قسم هيج توصل ليوم الزواج واكوا بيهم بالزفه وتخرب ليش لان الله ما قسم يكملون
مو لان بيهم عيب
لا بس هي قسمه وكل انسان
ينولد وقسمته مكتوبه بكصته...
بس ربك يسوي هيج
حتى يبين لبني آدم اشياء هو مجان منتبهلها..

لو يختبره بهيج مواضيع حتى يشوف صبره ويبينله
الي وياه والي عليه ...

وهاي البنيه حالها من حال هواي بنات ارتبطت
ومصارت يعني لا جرمت ولا زنت ...

بس خوفك من النفوس الضعيفه الي متخاف من ربها
وما محسبه حساب لكبرها وكاعده تلعب بأعراض الناس
وتخرب بيها ...

لهيج يابويه اذا جنت هاويها للبنيه ورايدها
توكل بالله واني اخابر على عمامك وعماتك
همه يخطبونها الك ...

من سمعت كلام ابوي ارتاحيت وحسيت اول مهمه تمت
بقت بس موافقة البنيه واهلها ...

لهيج اليوم كعدت من الصبح رحت اشتريت ملابس جديده وزينت ...

ورجعت لكيت عماتي ثنينهن يمنه ومرة عمي الجبير
وشمس الخبله فرحانه وتمشي وطبل وتغني ...

عريسنا جوكليته حامض حلو اباكيته..

ههههههه خبله موبيدها

للعصر اخذتهن ورحت.. دكينه الباب طلع اخوها الجبير
سلم علينه ودخلنا
النسوان دخلن جوه واني فوتني للاستقبال
كعد يمي حسين وأبوها واخوها الجبير ...

سلام وكلام وكعدنا نسولف عن البلد والوضع
وبعدها جبنها على البيوت والأراضي..

وشدارس وشمخلص سولفتلهم كلشي عني
وعن امكانيتي...

وفتحت وياهم موضوع الخطبه ...

والحمدلله جان جوابهم الموافقه بس اكوا شغله
حيرتني وهي استعجالهم..

رادوا الخطبه والمهر بيوم والعرس بعدها بسبوع

اني تفاجأت لان مجنت حاسب احساب هيج بسرعه بسرعه ...
بقيت محتار شلون راح ادبرها لان اني جنت مخلي ابالي أخطب وره شهرين تلاثه العرس هم البنيه تتعود علي واخليها تحبني وهم اني احظر
الغرفه واصبغ البيت ..

بس بعد ماعندي حل غير اوافق واني الشيطان
صار يلعب بعقلي ليش هيج بسرعه حتى المهر ماطلبوا
كالوا احنه مشترين رجال ...

بس اني ما قبلت وحطيته خمسه بخمسه
وتفقنا المشيه على الخميس هذا يعني بعد سبوع لان احنه هسه بالاحد ...
والخميس الوراه العرس اذا الله راد ...

بعدها رجعنا للبيت ..
عماتي كامن يحجن لان البنيه ما طالعه الهن بس امها ومرة اخوها...
وهي يكولون مريضه فلاونزه نايمه بالفراش ...

هنا زاد شكي أكثر بس بعدها لعنت الشيطان..
وماخليته يخرب علي فرحتي...

ثاني يوم طلعت شكو عندي فلوس حسبتهن طلعن
خمس ملايين ...
عمامي تكفلوا واحد عليه الغرفه والثاني عليه صبغ البيت لان ولده كلهم يشتغلون بالصبغ ...

بقه بس فلوس المهر والعشه من هاي الخمسه طلعتهن

طلعوا العماله يصبغون ويرتبون واني والولد وياي وابوي وشمس وديتهم ابيت عمي ...

يومين احنه بس شغل من الصبح لليل
البيت كله صبغته وجددته...

بس غرفة ابوي ما قبل أحد يغير بيها شي لأن يكول
هاي الغرفه الي بيها ذكريات ويه امكم الله يرحمها

شمس رادت غرفتها كلها وردي .. سويتها الها
وغرفتي صبغتها كل ضلع لون وسويتلها سقوف
ثانويه وترستها اضويه...
صارت تخبل ...
والغرفه اشتريت تركيه لونها صاجي ومنقش بزغارف ذهبي كلش حلوه فخمه ...

بقت بس البرادي والتحفيات هاي عليها هي تختارها
بفترة الخطبه...

باجر انشالله المشيه ...

كلشي جهزته القاط اشتريته
وعمامي والولد كلهم وكفولي خوش وكفه
ماجنت متصور وكفتهم هاي..

ثاني يوم كعدت من الصبح لان المعازيم هوايه
وجنه عازمينهم على الغده حتى بعدها
نروح لبيت أهل البنيه..

للضهر اني ماكعدت من مكان لمكان
ودي الاكل جيب كيكه ناخذها لبيت العروس
جيب مي .. جيب جيب افتر راسي
لحد ما كملنا غده رحت سبحت
ولبست القاط واجه الحلاق للبيت سوالي
تسريحه ورتبني...

وطلعنا لبيتهم أخذت المنطقه كلها..
حتى يشهدون هي بعد صارت مالتي حلالي
و محد اله حق يحجي عليها كلمه ...

دخلنالهم لكينا استقبالهم مليانه زلم
سلمنا تعارفنه وبعدها شيخنا هو الي تكفل
بطلبها من اهلها...
همه بسرعه وافقوا لان بعتبار احنه متفقين من قبل
وهاي مجرد اشكاليات كدام الناس
حتى يكون كلشي علني ..

قرينا الفاتحه وبعدها عقدلنه السيد وصارت حلالي
ومريتي وانشالله كلها سبوع وتصير ابيتي...يتبع

__________________________________

بنات حبيت. انوه الي عدها موضوع وحابه اطرحه كقصه...
او عدها احداث ابالها وحابه اسردها بأسلوب قصه
خلي تتفظل عندي بالخاص...
تكتب كل الاحداث او المشاهد الي بالها او حتى الفكره
واني حرجع اراسلها

وبالنسبه لقصة نبض دافي
اريد رأيكم بيها لحد الان
شلون شوفونها..

واريد تفاعلكم يزيد وياها
اذا حابينها..
ورجاءاً بدون كملي لو شوكت تنزلين
لان احنه متفقين
التنزيل ماله موعد محدد..
لهذا ارجع واكول
انتظروها تكمل
واقروها كامله للي متحب تنتظر أو ادكول
دانسه الاحداث
طبعاً اني اعتذر بس والله موبيدي مجبوره

وشكراً

Nabà Baqer

Dan ❤😘