رواية نبض حقيقي الفصل الأول 1 - بقلم فونا

_رميت أمك في دار مسنين عشان تتجوزني؟! أنتَ إزاي جاحد كدا! كنت ماشية في الشارع جنبه، الناس حوالينا بتبص علينا، بس أنا ما كنتش شايفة غير خيبتي فيه. بصلي ببرود وهو بيعدّل جاكيته: _ومالها دار المسنين؟ هتبقى مرتاحة هناك أكتر. وقفت فجأة قدامه. _مرتاحة؟! دي أمك! الست اللي ربتك وتعبت عشانك! نفخ بضيق: _بلاش دراما يا مريم، أنا عايز أعيش حياتي، مش هفضل مربوط بواحدة عجوزة طول عمري. الكلمة نزلت عليّ زي جرد تلج! قلت بصدمة:

_أنتَ إزاي كدا؟! قرب مني وقال بصبية: _بصي بقى أنا عايز أتجوز، والشقة دي لازم تفضى، ومفيش شغل هيجيب لي فلوس أجيب شقة تانية دلوقتي، يبقى الحل إيه؟ ضحكت بسخرية: _ترمي أمك اللي ربتك وكبرتك عشان تتجوز. _أيوه. الشقة باسمي، وأنا حر فيها. ضحكت ضحكة مخنوقة من القهر. _لا… الشقة دي تمن دموع أمك، تمن سهرها عليك، تمن تعبها وهي بتشتغل عشان تصرف على شحط زيك! سكت لحظة، وبعدين قال ببرود أقسى: _وأنتِ مالك؟ مش كنتي عايزة نتجوز بسرعة؟

رجعت خطوة لورا. _أنا عمري ما هوافق أنك ترمي أمك عشان تتجوزني! لو ده تمن جوازنا… يبقى أنا مش عايزاك! شد دراعي بعصبية: _بطلي مثالية زيادة عن اللزوم، كل الناس بتعمل كده. شديت إيدي منه بعنف. _لا… مش كل الناس جاحدة. واللي يرمي أمه النهاردة… يرمي مراته بكرة. عيونه وسعت لحظة، بس غروره خلاه يضحك بسخرية. _يعني هتمشي وتسيبيني؟ بصيت له بقرف وكره. _أنا ربنا نجاني من واحد زيك. لفّيت ومشيت، دموعي بتنزل، مش من الزعل لأ، من الصدمة!

سمعته ورايا بيقول ببرود: _ماشي يا مريم بكرة تندمي وتيجي سِتّك وتتمني أنك كنتِ مكانها! لفيت وضحكت بسخرية. _بكرة أنتَ هتشوف أسود أيام حياتك وافتكر أن كما تدين تدان يا يوسف! سيبته ومشيت وكنت بدعي أن ربنا ما يسامحه أبدًا! روحت البيت وبلغت أهلي باللي حصل وهما احترموا كلامي. "تاني يوم" صحيت بدري كالعادة وجهزت، نزلت واتجهت لشغلي. وصلت الشركة اللي أنا شغالة فيها، قعدت على المكتب بتاعي وبدأت اشتغل.

مر كام ساعة وجيه وقت البريك. حركت جسمي بتعب من القعدة وقمت اتجهت لمكان معين في الشركة عشان أعمل قهوة. _مريم بعد البريك عندنا اجتماع مع المدير. _تمام. عملت القهوة ونزلت في جنينة الشركة قعدت شوية. الهوا كان هادي، كنت بحاول ما أفكرش في يوسف، بس دماغي كانت بتعيد كلامه تاني وتالت. _أحم بصيت جنبي وكان جون صديق طفولتي وفي نفس الوقت شغال معايا في الشركة. _جون ما أخدتش بالي أنك هنا. ابتسم وقعد جنبي على الكرسي

سكت لحظة وبصلي باهتمام: _مالك يا مريم؟ شكلك مش طبيعي من الصبح. ابتسمت ابتسامة مصطنعة: _ضغط شغل بس. رفع حاجبه كأنه مش مصدق: _بقالنا سنين صحاب… وفاكرة أنك هتضحكي عليا؟ نزلت عيني للأرض. قلت بهدوء: _أنا فركشت. ثواني… وملامحه اتجمدت. _فركشتي؟ مع يوسف؟ هزيت راسي. سكت لحظة… بس عيونه لمعت، بس حاول يخبيها بسرعة. _ليه؟ لو حابة تحكي يعني. حكيت له كل حاجة حصلت. كان ساكت طول الوقت. أول ما خلصت، قال بصوت منخفض: _هو قال كده فعلًا؟

_أيوه. خد نفس طويل وبص بعيد شوية، وبعدين رجع بصلي: _يبقى أحمدي ربنا إنك سبتيه. رفعت عيني ليه باستغراب. _يعني ما حاولتش تدافع عنه؟ ابتسم بخفيفة: _أدافع عن إيه؟ عن واحد رمى أمه؟ اللي ما يحترمش أصله… ما يحترمش حد. سكت لحظة وبعدين قال بهدوء: _بصي يا مريم… يمكن أنا ما ليش حق أقول كده، بس خسارته هو مش خسارتك. ابتسمت بخفوت: _يعني أنا الكسبانة؟ بصلي نظرة طويلة ودافية. _جدًا. اتوترت. _جون… عدل قعدته بسرعة.

_قصدي يعني أنتِ تستاهلي حد أحسن. سكت وهنا السكرتيرة نادت من بعيد: _مريم الاجتماع هيبدأ. خدت نفس وقمت. دخلنا الاجتماع وخرجنا سوا، كان في كام حاجة بشرحها لجون بخصوص الشغل الجديد. وإحنا بنتكلم فجأة سمعنا صوت زعيق: _عملالي شريفة وأنتِ مدوراها!