الفصل الثاني

رواية نجاح دون تشجيع الجزء الثاني 2 بقلم تقى مصطفى نجاح دون تشجيعرواية نجاح دون تشجيع الحلقة الثانية _بت يا لوكا ايه الجمدان دة!! _جمدان ايه يا مريم هو ايه اللي حصل؟ _ده البارت بتاعك جاب 3000 ريأكت يا بنتي. ضحكت بفرحة وانا بقولها _ايه اللي بتقوليه ده!! _طب والله بجد خدي شوفي. اخدت الموبايل منها بسرعة اشوف اللي بتقوله ده صح و فعلا انا كنت منزلاه على جروب علي فيس بوك و عجب ناس كتير. _ده بجد يا مريم!

دخلت على الكومنتات اشوفهم لقيت كله بيقول _جميلة اوي. _مشوفناش جمال كده من زمان. _الكاتبة دي موهوبه خسارة مكناش نعرفها قبل كدة. دخلت على اكونتي من مريم بفرحة و انا مش مصدقة نفسي لقيت الفولوورز كمان عددهم زاد عن الاول واو! فوقت على صوت مريم وهي بتقولي _لوكا انتي لازم تشوفي دار نشر اللي انتي بتكتبيه محتاج ناس اكتر تشوفه انتي فعلا عندك الموهبه حرام تضيعيها. _اكيد،بس مش دلوقتي يا مريم لسه بدري. _اللي يريحك.

_عدا كام يوم على الموقف ده بقيت بحسن من نفسي ومن طريقة كتابتي كتير و لسه بحاول أحسنها اكتر اصل الإنسان طول ما هو عايش بيتعلم و انا لسه في البدايه و كنت بتقبل النقد و الكومنتات السلبيه مش باخدها على أن هي مش عاجبه ناس لأ كنت باخدها عشان احسن النقطه دي اكتر. _لوكا بتعملي ايه؟ _بذاكر شويه يا سولي تعالى. كنت قاعدة بذاكر عشان بابا الحج طبعا ميقولش عليا اني فاشله و كذا و كذا،بحاول اعمل اللي عليا

و في نفس الوقت اوازن بين الحاجتين عشان مقصرش في حاجه. _طب ماما بتقولك تعالي اغرفي الرز عشان نتغدى. _حاضر جاية. قومت قفلت الكتاب و روحت اغرف الرز و حطيت الاكل و اتغدينا و بعدين انا جيت ادخل اوضتي بابا وقفني بصوته _ملك احنا محتاجين نتكلم شوية عشان انتو مبقتوش صغيرين. قعدت تاني مكاني و انا مش فاهمه حاجه _اتفضل طبعا يا بابا بس احنا مبقيناش صغيرين على ايه؟ بابا سكت و ماما ردت

_بصي يا لوكا انتم دلوقتي بقيتو كبار و القرارات دي انتو كمان لازم تاخدوها معانا. _طب قرارات ايه يا جماعة حد يفهمني؟! _بابا نقلوه من الشركه اللي في مصر هنا للشركة اللي في دبي. رديت بعدم استيعاب _ايوة ايه برضو مش فاهمه. _يعني احنا هنتناقش و نشوف هل عاوزين نروح مع بابا و لا نقعد هنا،ايه رأيكم؟ _انا عاوز اروح معاك يا بابا عشان اكل بوظة من هناك. شاورت بعيني ل سليم عشان يسكت بوظة ايه اللي عاوزنا نسافر عشانها المتخلف ده.

همسلي جنب ودني _ايه عاوز اكل بوظة. _سليم ممكن تسكت، بوظة ايه يا متخلف انت. _بس انا يا ماما مش عاوزة اسافر دبي. بابا بصلي بهدوء _ليه يا لوكا ممكن اعرف؟ غمضت عيني و نزلت وشي للأرض و انا بقوله _عشان يا بابا انا عيشتي و حياتي كلها هنا مدرستي و صحابي و دروسي كل حاجه هنا مش هعرف اسيب كل ده هنا و اروح دبي ابدأ من جديد. _اممم بس انا هبقى قلقان عليكم و انا سايبكم هنا لوحدكم. _مش حضرتك يا بابا هتنزل اجازة برضو ولا هتفضل هناك؟

_لأ ان شاءالله هبقى اجي بس مش في الأول شوية كدة. سكت و مردتش و حقيقي مش عارفه اقرر رغم ان بابا بيستخف و بيقلل من الحاجات اللي بعملها و اللي بحب اعملها بس انا برضو مقدرش اعيش من غيره و لا هقدر اسيب كل صحابي و اروح معاه يا ربي بقى. فوقت على صوت بابا وهو بيقول بهدوء مقلش من اول ما قعدنا _طيب هسبكم تفكروا و تاخدوا القرار و تبلغوني بقراركم بكرة. هزيت راسي من غير ما اتكلم و قومت دخلت اوضتي بهدوء. _بعد شويه لقيت الباب بيخبط

_مين؟ ملقتش رد ولقيت الواد سليم داخل دخله المخابرات و فتح الباب جامد هبده في الحيطة و لسه هتكلم سمعنا صوت بابا من برة _انت يا حيوان بتهبد الباب كدة ليه داخل تقبض على مجرم ولا ايه؟!! سليم علا صوته عشان يوصل لبابا _معلش يا حاج عندي انا دي حقك عليا. و بعدين قفل الباب بهدوء و جه قعد على السرير قدامي _لوكا بصي يا روحي احنا المفروض نتفق انا وانتي على حاجه و نطلع نقولهم، تمام؟ _انا و انت و نتفق إزاي؟

بصلي بطرف عينه و تجاهلني _تمام؟ _ماشي كمل. _انتي عايزة نقعد هنا ولا نروح مع بابا؟ _نقعد هنا انا مش عايزة اروح. _يبقى هنروح معاه. و قام من قدامي عشان يطلع يقولهم روحت جبته من قفاه قعدته قدامي تاني _خد يالا هنا انت رايح فين؟ _هروح اقولهم انك موافقه نسافر. _طب اتلم بقى يا سليم بدل ما انفخك و اهدى بقى ها. _بس يا بت متقدريش تعملي حاجه اصلا. قولت له بمرح و انا بتوه عن الموضوع _في ايه يا عم ده الجار للجار.

_الجار للجار مش معاكي انتي بذات. _ليه كنت جوز امك و لا مرات ابوك؟!! قام ضربني بالمخدة في وشي وهو بيقول بغيظ _انيل، انيل. شلت المخدة من على وشي و قومت فضلنا باصين لبعض ثواني و بعدين انفجرنا في الضحك احنا الاتنين. _تاني يوم/على سفرة الغدا _ها يا ولاد قررتوا ولا لسة؟ قالها بابا و احنا قاعدين على الغدا. بصيت انا و سليم لبعض و الصراحه يعني انا و سليم امبارح قعدنا نهزر و متكلمناش في الموضوع ده اصلا.

بابا اتكلم تاني لما لقى صمتنا طول _انتم متكلمتوش اصلا صح؟ هزينا راسنا احنا الاتنين راح بابا اتعصب و قالنا _امال انتم قعدتو امبارح ساعتين في الأوضة بتنيلو ايه انتم الاتنين؟ حاولت انقذ الموقف _احم لا يا بابا اتكلمنا شوية. _فعلا،طيب و قررتوا ايه بقى؟ سكت شويه و بعدين قولت له _بابا انا اسفة بس احنا مش هنيجي معاك السفر ده. _اه يعني افهم من كده انكم بتحبوا مصر اكتر من دبي؟ هزيت راسي بالإيجاب و سليم فضل يبص لي

بغيظ لحد ما خلصنا و دخلت اوضتي و يدوب بقول بسم الله و بفتح الكتاب لقيت اللي بيقتحم الاوضه و طلع مين بقى؟ ايوة هو مفيش غيره اللي بيدخل دخله المخابرات دي سولي المتخلف. _الله مالك بس يا سولي متضايق ليه؟ سألته و أنا بتحرك بالكرسي بتاع المكتب ابو عجلات بتاعي يمين و شمال. رد عليا بغيظ _انا كنت عاوز اسافر عشان آكل بوظة من هناك. _بوظة ايه يا متخلف انت في حد كبير عنده 17 سنه يقول عاوز بوظة؟!! _مش انا قولت يبقى فيه.

_اطلع برا يا سليم. _طب ايه رأيك بقى مش طالع و ادي قاعدة. وراح قعد على السرير قدامي ببرود غمضت عيني بغضب _سليم اطلع برا عشان مهبش فيك و ساعتها هتزعل مني. _طالع جاتك القرف حد يسيب دبي و يترزع في مصر يا فقرية!! _عدا كام يوم و بابا جهز ورقه و المفروض انه هيسافر النهاردة البيت نكد و كله عمال يعيط معرفش ليه. و يدوب وصلنا بابا المطار و لسة هنروح لقيت مريم بترن عليا _الو يا لوكا ايه انتي فين؟

_احنا في المطار كنا بنوصل بابا ما انا قولتلك. _طب متروحيش البيت تعالي عليا بسرعة. _ليه يا مريم فيه ايه؟ _خلصي بس لما تيجي هتعرفي متتأخريش بس. _طيب مسافة السكة هقول لماما و اجي على عندك بس قولي فيه ايه؟ _قولتلك لما تيجي بقى موضوع مهم مينفعش في الفون. _….