الفصل الثالث

رواية نجاح دون تشجيع الجزء الثالث 3 بقلم تقى مصطفى نجاح دون تشجيعرواية نجاح دون تشجيع الحلقة الثالثة _الو يا لوكا ايه انتي فين؟ _احنا في المطار كنا بنوصل بابا ما انا قولتلك. _طب متروحيش البيت تعالي عليا بسرعة. _ليه يا مريم فيه ايه؟ _خلصي بس لما تيجي هتعرفي متتأخريش بس. _طيب مسافة السكة هقول لماما و اجي على عندك بس قولي فيه ايه؟ _قولتلك لما تيجي بقى موضوع مهم مينفعش في الفون.

_ماما بقولك اطلعوا انتم انا هروح لمريم عشان عايزاني ماشي؟ _ماشي بس هي عايزاكي ليه هي كويسة؟ _معرفش هي كلمتني و احنا في المطار و قالتلي انها عاوزاني ضروري. _طب روحي و ابقي اتصلي بيا طمنيني عليها. _اوكي باي. روحت لها و رنيت الجرس و فتحتلي مريم _ايه يا اللي منك لله جايباني على ملا وشي كدة ليه؟ شدتني من أيدي تدخلني معاها الشقة _تعالي بس ادخلي هقولك. جرتني من أيدي زي اللي بيجر حمار و دخلنا

اوضتها و اول ما دخلنا اوضتها فلتت أيدي منها و قولتلها بعصبية _ايه يا بنتي فيه ايه جراني من أيدي زي اللي بيجر حماره و رايح على الغيط كدة ليه؟ _يا ملك والله في حاجه مهمة اترزعي بقى قرفتيني. قعدنا على سريرها وهي فتحت اللاب توب بتاعها و جابت الرسايل لإني كنت مدياها الباسوورد بتاعي و بعدين فتحت شات و قالت لي _بصي بقى هو ده المهم. بصيت لقيت كاتب مشهور في معرض الكتاب باعتلي و بيقول في الماسدج

_هاي يا ملك ازيك يارب تكوني تمام عاوز اقولك ان انتي مستواكي حلو جدا ما شاء الله في الكتابة هو بس محتاج شوية تعديلات بسيطة هتتحسن مع الوقت انا كنت عاوز اقولك ان انا مستعد اخد بإيدك و اخليكي تنشري اول كتاب ورقي ليكي و كمان ممكن اساعدك و اديكي افكار لو تمام ابعتيلي تم. انا قرأت الماسدج و فتحت عيني بصدمة و انا مش مستوعبة و عمالة اقرأ في الجملة مرة واتنين لحد ما لقيت مريم بتحدفني بالمخدة في وشي عشان تفوقني.

_ها ارد عليه اقوله تم؟؟ _لا يا مريم استنى شوية. _ليه هنستنى ليه؟ كاتب مشهور و باعتلك و بيقولك مستعد يساعدك و يديكي افكار يبقى نستنى ليه؟ _طب و هو يا مريم هيساعدني كدة من غير مقابل يعني؟ _ليه لأ شاف مستواكي في الكتابة و عجبه. _طب و انتي ايش عرفك أن هو ده البيدج بتاعته و مش بيدج فيك؟؟ بصتلي بإقتناع _تصدقي ممكن،بس أنا قلبي بيقولي انه هو و ان دي صفحته هو. اخدت اللاب توب منها و انا بقولها

_اوعي يا مريم الله يخليكي انا هتصرف. _ليه ما انا قلتلك قلبي بيقولي انه هو. _اوعي يا مريم قلبك المهزء ده اخر مره قولتي كدة في الدرس وقولتيلي قلبي بيقولي مفيش امتحان روحنا في ستين داهيه. رفعت صوتي شوية _بأمارة الخمسة من تلاتين ها؟! حطت ايدها على بوقي بسرعة قبل ما طنط تسمع _بس ايه صوتك الجعورة ده ما انتي كمان جبتي زيي على فكرة. _لا يا ماما انا جبت عشرة من تلاتين. بصتلي بطرف عينها _مش فارقة على فكرة!

_ششش اكتمي بقى خليني اشوف هرد على الراجل ده ازاي. قولتها وأنا برجع بنظري على اللاب توب من تاني. و كتبتله ماسدج _هو انا ليا الشرف و كل حاجه بس انا محتاجة شوية وقت اقول لماما و اظبط اموري. شوية و فتح و قال _تمام خدي وقتك براحتك طبعا. و قعدت مع مريم شوية و بعدين روحت البيت ساعدت ماما و اتغدينا و بعدين دخلت اوضتي اذاكر شوية و نمت. _بعد مرور يومين عدا يومين و انا الصراحة مش عارفة اطلع اقول لماما

على الموضوع ازاي و مريم لسة متصلة بيا من شوية مهزقاني عشان كل ده مردناش على الكاتب ده و انه مستني الرد. بس خلاص حسمت الأمر و هطلع اقولها. طلعت لقيتها بتتكلم في التلفون قعدت جنبها لحد ما خلصت و بعدين قولتلها _احم..ماما انا كنت عاوزة اقولك حاجه ممكن؟ بصتلي باهتمام _قولي يا لوكا في ايه يا حبيبي؟ طلعت لها الشات بتاع الكاتب ده ووريتهولها بعد ما شافته كله قالتلي _يعني ده مضمون يعني؟

_مش عارفه بس ايه المشكله لما اجرب انا كدة كدة معنديش حاجه اخسرها. _على رأيك،يعني انتي شايفة انه هيفيدك البتاع ده؟ _مش عارفه،بس ليه لأ. و حقيقي انا عايشة بمبدأ No risk no fun يعني اي حد مكاني كان هيرفض لكن انا بجازف دايما. _بعت للكاتب ده تم و فعلا بدأ يساعدني كتير شوية بس في طريقة كتابتي و في الأفكار

كمان و يعني بجد طلع شاب لطيف اكتشفت بعد كدة انه اسمه رحيم لاشين صاحب سلسلة كتب جرائم و تحقيقات انا لسة مقرأتهاش للأمانه بس هبقى اشوفها. في يوم بعتلي _ملك خلصتي قد ايه في الكتاب لحد دلوقتي؟ _انا لسه بكتب في الفصل التالت. _يلهوي الطم،يا ملك خلصي فاضل بس تلات شهور على معرض الكتاب عايزين ننزله في الكوليكشن بتاع السنه الجديدة. _اعمل ايه طيب يا رحيم بحاول بس برضو عندي مذاكرة. _ملك هو انتي بتكتبي على ايه معلش؟ _هتفرق؟

_قولي بس بتكتبي على ايه؟ _بكتب على الموبايل بتاعي. _ما طبيعي متخلصيش، يا ملك احنا محتاجين حاجه اكبر بتكتب بسرعة ده انتي كدة على متخلصي الكتاب هتكوني اتعميتي. _اعمل ايه طيب قولي انت؟ سكت ثواني و رد _عندك لاب توب؟ _لأ معنديش. _طب انا عندي فكرة احنا ممكن ننزل نتقابل و انا عندي على اللاب بتاعي موقع بكتب عليه كتبي بيكتب بسرعة ايه رأيك؟ _هشوف. و فعلا قولت لماما ووافقت بس بشرط أن سليم

يجي معايا و الصراحة انا مكنش عندي مشكله و بقينا ننزل نتشارك الأفكار و نكتب سوا و خلصنا الكتاب في شهر ونص بس. و بدأنا نشوف الديزاين بتاع الغلاف روحنا مطبعة تبعه لحد ما استقرينا على الاسم و الغلاف و اللي كان اسمه “بلاد المسلمين القديمة”. حبيت اول حاجه اعملها احكي عن بلاد المسلمين زمان و طبعا احتاجت اعمل بحث كبير اوي و كنت حريصة اني مكتبش اي معلومه غلط في الكتاب عشان مضرش حد بمعلومه غلط و الكتاب كان

بيحكي عن الأحداث اللي حصلت في مكه و المدينه و بعد كدة بلاد المسلمين كلهم من اول عهد الرسول صلى الله عليه وسلم لحد اخر الدولة المملوكية. _خلص الكتاب و جه يوم معرض الكتاب اخيرا و كنت هناك انا و ماما و سليم و مريم و رحيم كمان و جه المسئول عن دار النشر اللي نشرنا الكتاب عندهم قالي _عندي ليكي خبر. سألته بقلق _ايه الكتاب منجحش ولا ايه؟ _منجحش ايه بس اللهم صلي على النبي ده الدفعة الأولى خلصت و بعتت المطبعة اجيب

الدفعة الجديدة. _طب الحمد الله. و ببص على الباب بتاع القاعة اللي كنا فيها لقيت بابا داخل و معاه بوكيهين ورد و مبتسم و هو بيبصلي جريت بسرعه حضنته و هو كمان و بعدين ادالي الورد و انا مسكت نسخه من الكتاب بتاعي و انا بوريهوله بفخر _بابا بص قولتلك هنجح عشان انا بحب الكتابة شفت، الدفعه الأولى كلها خلصت و بعتنا نجيب التانيه. _مبروك يا قلبي متتصوريش انا فخور بيكي قد ايه دلوقتي بجد. _شكرا يا بابا، يعني مبقتش فاشلة دلوقتي؟

ضحك و قالي _لا يا قلبي ده انتي أنجح حد في العالم كله ميبقاش قلبك اسود كدة. و بعدين كمل _تعالي اصورك بالكتاب بتاعك بقى. و قفت و انا ماسكه حلمي بين أيدي، ماسكه الكتاب بتاعي و انا فخورة بنفسي اني كملت و مستسلمتش من البداية. ماسكه الكتاب بتاعي اللي عليه اسمي بس ككاتبة المرادي مش ك قارئة جاية اخد الامضاء من حد تاني، المرادي أنا إللي بمضي بإسمي بمضي بإسم و شايفة فخر اهلي في عيونهم ليا. _و توته توته خلصت الحدوته