رواية نقطة لقاء الفصل التاسع 9 - بقلم الكاتبة دينا _ الكاتبة نور

طب ياسر يتمركص ويهوس وطبوا كلهم طلعوا ويركصون وياه واني رحت ويه ريم انطتني منها صاية سودا ونزلنا جوا نضحك ونباوع عليهم من الباب وهو ما شاء الله متونس وكأنما متزوج صدك وشفت أخو حسن اجه سلم علية هم وجانت الأوضاع يعني نكدر نكول زينه بس اني يعني شوية استغربت ممكن نكول همه تعايشوا ويه الوضع نفس اليوم بس فهد من حجه وياهم غيروا نظرتهم 180 درجه ، على كولاً الحمد لله بس هو مصدك نفسه حيل

آخر شي قفلنا البيت والدنيا ليل والساعه 12 بالليل والكل كاعدين وفروحه يم ابوها وكل متشوفني تضحك وتكول هاي صديقتي و بيبي حيل فرحانه بفهد والله لو يدرون الصدك شيسوون ههههههههَ

ياسر : اي عيني شنو وين رايحين

خزره فهد : انطم لتدخل

ياسر : أتدخل غير اني اخوك

فهد : اي اخويه يلا من رخصتك

ياسر : ويننننن يمعود بعدني ممتعرف على بنان

ضحكت بنان : باجر اعرفك علية أكثر

ياسر : شينيمني فضولي قاتل هسه اضل افكر بأسئله بدماغي

فهد : روح لف راسك ونام يم اخيك همام وانكلع متشوف بيت حسن راحوا شعندك مجلب بية شو وخر

ياسر : دروح يابه اروح يم الحب والحرب " زوزو "

فهد باوعلي ولزمني هيج من ايدي وجرني وصعدنا فوك يعني ماكول مخجلت بس تصرفاته غريبه واني مثل المصدومه امشي منا اروح منا لحد الان ممستوعبه اي شي

طبينا للغرفه وخرت شالي وذبيته وراح فهد جاب فراش من غرفة زوزو يحطون بيها فراش زايد وجابه وحطه بالكاع وفرش

بنان : ترى والله اني كلت انام بالكاع

فهد : اني انام هنا وكتلج الظهر وحجينا واتفقنا وهاهيه يلا ماريد اي كلام

بنان : على كيفك سيادة الضابط

فهد : بنان

بنان : ها

فهد : ليش هيج شعرج حلو وطويل

ياربي من سألني هذا السؤال حسيت مادري شصارلي كبت نار بوجهي مع العلم اليوم سألوني واني اي احد يشوفني يكلي ليش وشلون وشتستعملين بس ولد مسائلني وفهد يسألني ؟ ارتبكت من سألني وخجلت

حجيت : هو هيج من الله

فهد : من انتي صغيره جان هيج ؟

بنان : اي هو هيج

فهد : بنان مكدرت اليوم اتصل على امج شوفت عينج شصار ومكدرت وساعتين كعدت احجي وية ابوية وامي

بنان : شلون غيرت نظرتهم بهالسهوله ؟

فهد : مالج دخل خيه

بنان : اي هم صدك

فهد : بنااان

بنان : نعمممم
ضحك فهد وكال: اسمج عاجبني

ضحكت : اي هو هيج .. غريب اقصد يعني مو غريب بس نادر ما يسمون هيج اسم

فهد : عجبني من البداية وكتيلي اسمج

بنان : اسمك هم حلو

فهد : الفهد هو اسمي الفهد بالجنسيه بس تعرفين يعني للسهوله وهيج فهد يصيحولي

بنان : احلى .. احلى هيج بهواي الفهد

فهد : اي اني الفهد

ضحكت وكتله: اذا من تزوج أن شاء الله سمي ابنك نمر لو نسر تصير عندك حديقة حيوانات

فهد : سكتي لج شو مسويتني مضحكه

ضحكت جاوبت : لا والله اسمك حلو مو قصدي غير شي

فهد : اكول نامي نامي احسن وها صدك هاي اخر شي باجر اني رايح للشغل اروح الصبح ارجع بالليل ساعه 9 هيج تمام مرات يصير دوامي 10 ايام يعني ماعرف شلون اشرحلج بس بوقتها أن شاء الله افهمج هسه قصدي انوا هذا ياسر متحتكين بي زايد خوش

بنان : ليشششش والله حباب شبيك ويا

اشر ع راسه: بكيفي ماريد اي سؤال ثاني وتسوين مثل مكلت خوش ؟

بنان : لاا احجي ويا

فهد : اي احجي ويا مكلت لتحجين بس تحتكين وهيج مواضيع خشنه متلومين الا نفسج

باوعتله وغطيت راسي ونمت ميكلي هذا ليش شايف نفسه هيج زين ليش هيج ديسوي .. الفرج يارب اريد اشوف خواتي تعبت ...

..............................................

الهام : ولك هاي وين جنت هل فتره مختفي

فراس : عوفينيي يمه

الهام : ولك هاي شنو الريحه الي بيكك

فراس : يمه وخري من يمي راسي يوجعني

الهام : لا تعال كولي شنو تجيني بنص الليل وهاي القتره كله مختفيي وريحه بيك

فراس : معليج يمه معليج عوفيني

الهام : فراس انتي شارب

فراس : اي شارب يلا هسه شتريدين هااا

الهام : ولك ليش

فراس دفعتها وكلت : يمه شو وخري من يمي

الهام دفعني : اهخخ روح لا بارك الله بيك

الهام كعدت بقيت افكرر شحسوي شلون وي رزان باجر حيجون يشوفوها اني صوجي شمدريني جمال حيسوي هيج اووف يربي وبنان ما ادري وي صفه الدهر بيها وما اكدر اخابرها خاف جمال يدري ..

.....................................

بنان جنه نايمين ومنسمع غير الباب كاعد يدك

بنان : فهد فهد الباب كاعد يدك

فهد : اهووو من هذا من صباحيات الله

بنان : شبيك فهد كوم شوف منو عيب

كام فهد فتح الباب

ريم : احم فهد تعال انزلوا تريكوا

فهد : ديلا هسه ننزل روحي

ريم : تمام

فهد : بنان يصيحونه ننزل

بنان : اها اي تمام

فهد : عود لبسي صايه الي اخذتيها من ريم ونزلي

بنان : ها

فهد : مثل مسمعتي

بنان : تمام

.............................................

رزان حضرت نفسي حتئ اروح للمدرسه فلبست وكملت داطلع

جمال : لحظه لحظه هاي شنو ست رزان وين رايحه

رزان : للمدرسه

جمال : للمدرسه شنوو ماكوو روحي صعدي اليوم حيجون يشوفوج

رزان : عفيهه ما اريد هل خطوبه ما اريده ما اريد ازوج

جمال : لا عفيه ولا بطيخ تزوجينه تزوجينه ويلا روحي صعدي يوم ماكو مدرسه

فراس بضحكه خبيثه : هاي شنو منو حتنخطبين علخير رزان

رزان : معليك انت

فراس : انجبي يلا همزين انتي هم نخلص منج وتبقه ذيج اختج اني اغرف شلون اخلص منها وها اها نرتاح منكم

رزان عفتهم ورحت صعدت فوك يم روان

روان كعدت لكيت رزان تبجي

روان : ها شكوو رزان ليش تبجين

رزان : هذا الي ميتسمئ اب ميقبل اروح للمدرسه ويكلي اليوم حيجون يشووفج وين تروحين و فراس يجي يكلي يلا وحده وره الخ ونخلص منكن

روان : هذوله شبيهم

رزان : ما ادري روان تعبت والله تعبت ما اريد اتزوج ما اريد يا اخي ما اريد شهل عيشه هاي

روان : كافي رزان لتقهرين نفسج ربج يحلها ان شاء الله

رزان : ونعم بالله

........................................

ياسرر نزلت لكيت الكل مجتمعين

ياسرر : صباح الخيرر الله هسه اكتملت العائله بس اجت بنان يوم الاليي وتجيي مرتي تنوركم

زوزو : يريد يتزوج ابو الوصخ

ياسر : وليش عيني اني الف وحده تتمناني

ريم : واثق من نفسيه

ياسر : انجبي انتي اي شلونها مرتي اخويه اليوم

بنان ابتسمت : الحمدالله وانت

ياسر : الحمدالله الي يشوف هيج خلقه صبح اكيد يكون تمام

فهد : ياسر مو كأنوا كمت ادوس بالكلام وتروح زايد عن الزوم هاا

همام : ياسر شبيكك لتحجي هيج اخوك قيورر

ياسر : هسه شحجينهه واصلا بنان مثل اختيي واعز

ريم : هاا هيج صارت

ياسر : ايي عندج مانع

ريم : اي عندي

مريم : اي ياسر انت لما اجت بنان نسيت مرت اخوك ثانيه كمت تسلمم بس علئ بنان

ياسر : يلا لزعلين انت هم صباح الخير

حسن : عوفي خيولي

بنان ابتسمت علئ حجيهم وشلون حلوو وكعدتهم وسوالفهم وضحكهم واجوائهم العائليه الي محرومه اني منها

فهد : صدك باجر معزومين يم بيت مؤمل

ريم ابتسمت لا اراديا وكلت بگلبي واخيرا حشوفه

محمد : اي تمام

بنان بهمس ويه فهد : اليوم نروح نشتري ملابس

فهد : اي نروح بليل كلنه

بنان : تمام

ياسر : هاي شنو اشو تتهامسون شعدكم هاا

فهد : انت شنو متبطل حشريه بكلشي حاط خشمك

ياسر : هسه شبيك شكلنه

فهد : اليوم حنروح نشتري كم شغله

فرح : عمو عادي اتي وياكم (اجي)

فهد : اي عمو عادي تعالوا كلكم

الهام : لعد تمام اليوم نطلع كلنه

فهد : ايي

ياسر : يلا ريموو تعاي تأخرنه عيني

ريم : يلا

..........................................

ريم

رحت للمدرسه واني فرحانه شويه الي صار يمكن شويه غير مود الضوجه .. بنان بنية كلش مؤدبة وحبابه وصدك هنيال فهد عليها جمال واخلاق يستاهلون بعض

اباوع وامشي بالساحه ماعندي صديقات جانوا روان ورزان بس اليوم رزان ماهيه مادري ليش ضليت امشي وكعدت ضليت افكر باجر العزيمه .. بيت مؤمل

ما اروح ؟ لو اروح ؟ همه كلهم معزومين شلون ابقى بالبيت وحدي مستحيل محد يقبل وكلهم حيروحون
هسه اني بيش افكر ريم ركزي على دراستج ، مستقبلج بقالج سنه و تتخرجين من المدرسه .. بس الحب صعب اني حتى ماعرف بنفسي شلون حبيته .. من ارجع اخابر روان فد ضوجه وحشه من دونها وهم اشوفها شوكت تداوم وشوكت تفتح ايدها من الچبس

@@@@

ياسر
داومت للكلية وهيج امشي وكاشخ .. اصلا اني دومي كاشخ بس وربي مشتاق لاحمد الجلب مكانه فارغ ويعني مادري ماعرف حتى شلون امشي هههههَ ..

بس اخذت حقه .. هو جرحه عميق شوية ف متأذي لحد الان واسبوع اجازه حتى يرتاح وهاي ويكدر يداوم وداجيب المحاظرات اوديهن اله جان قبل من انفصلت هو يجيبهن الي يلااااا يمعود ياسر دنيا متسوهه ادور منين الكاها ام كفشه ماهيه لا من حب ولا من صداقه طاحظك و انسحلت يا ياسر

@@@

زوزو : تعاي يمه بنان تعاي يمي اريد احاجيج

بنان : ها بيبي كولي

زوزو : شلونه فهد وياج يعني خما مضوجج

بنان : لا والله ممضوجني بالعكس كلش زين وياي

زوزو : الحمد لله والشكر بنيتي انتي لازم تعرفين اطباع فهد وهذا مو اي وحده تتحمله وانتي زوجج واتحملي شميسوي مرات يتخبل علينه ويتعارك وية رايح والجاي من ورا شغله وتعرفين هو ضابط وشغله معقد

بنان " حجيت ب ارتباك " : اي خطيه شغله صعب وكل يوم قضايا اشكال والوان ولازم هو يديرهن

زوزو : اي ولج تعاي اسولفلج على هذا فهد الجايف شوف شلون كبر بسرعه

بنان : هههههه شنو شبي

زوزو : اسولفلج على فهد من جان صغير دباع من هو صغير و وكح وكح حيل نار وشرار

طبت رحاب : يمه فهد من جان صغير شالع كلبي من الوكاحه

زوزو : مرة جان عمره 3 سنين والكاه كاعد بالطرمه وحافر ومطين نفسه كتله ليش هيج مسوي كال اسوي بيت مدري شنو وملابسه وايده ورجله

رحاب : هي بس هاي وتذكرين من انكلب على رجله جدر المي الحار وجان يلعب بالمطبخ

بنان " بخوف " : شنو شلون انكلب عليه

رحاب : لج جنه هم مسوين عزيمه والله يرحمهم سراب واياد وجمانه ومحمود واحنه يعني ما شاء الله عزيمه جبيره وكلنا جايين واني جنت حاطه جدر صغير مي حار عالميز وهو اجه يلعب وية ايمن ابن جمانه اختي وبالغلط ايمن دفع فهد عالميز وانكلب عليه جدر المي

زوزو : وبهذاك اليوم صارت مناحه وانكلبت العزيمه وخطيه محمد واياد ومحمود يتراكضون بي بالمستشفى واحنه هنا نتلاطم

بنان " بقلق " : اي يعني بعدين شلون صار زين
رحاب : موتني بنان بهاي الادويه والعلاجات ورجله صار بيها تشوه بالبدايه حيل خفنا بس الدكتور شرحلنه حالته وكال مو خطره وماكو اي خطورة ولا تتشوه لان صايره بالطبقه الثانيه مادري شلون وهالعصارات والدهن خطيه تقريباً 3 اشهر لو 4 وتحسن والحمد لله صار زين

بنان : اوف خطيه

زوزو : ومره جان توه مراهق ابو الوصخ وأخذ مفاتيح محمد ابو وطلع أخذ سيارته ومدري وينه ما يرجع الا ساعه 12 بالليل ومحمد استلمه رزايل وصياح بس فهد ميضربه

رحاب : اي فهد ميضربه حيل يعزه ويحبه حتى هذا موضوعكم بسرعه قبل من حجاله فهد وكعد ويا

هزيت راسي ب أي وابتسمت هذوله عبالهم صدك اني مرته وديسولفولي اخخخ هسه شسوي ياربي احس خجلانه نفس الوقت اريد اهلي اريد امي وخواتي مداعرف شسوي بنهاية حضل هنا يارب ساعدني

@@@@@@

ياسر
طلعت من الكلية اليوم وخلصت محاظرات من وكت نسختهن حتى اوديهن لاحمد رحت للكراج وصعدت بالسياره ورحت اجيب ريم منوكت اطلعها وهم

خميس ايع اني كل ما اتذكر المدرسة تلعب نفسي جانت قوانين مدرستي جنها قوانين رئيس كوريا الشمالية لدرجة مرة اشتهرت تسريحة الديج وكلنا مجموعه ولد مسوين منها وجابولنا حلاق وزين شعورتنا خرب شلون ايام هاي

وصلت لمدرستها ونزلت من السياره كاتلني الحر وجهي مكلوب وتعبان وحتى منايم زين طبيت لمدرستها وأشوف الحبايب .. عيوني تدورها مع العلم ادري بيها ممداومه بس كلبي مدري شبي اباوع بالوجوه وهنه عبالهن غير شي لو يدرن ادور عليها هيهيهيهي رحت بوجهي كبل وعدل للاداره وكلت للمديره

المديرة : انت اخوها ؟

ياسر : اي اني اخوها ليش ؟

المديره: الست البارحه جانت متعاركه

ياسر : اي عادي حتى اني وياها نتعارك تصير بالكوكب عادي

المديرة : لا العركه مجانت سهله جانت كفش من الروس واحنه الإدارة واكعين بيها بسبب اشياء تافها مثل هاي

ياسر : اي نعم .. هي وينها اريدها خل تجي حتى افتهم شصاير

حجى بكلبه : واني اكول شبيها جانت كالبه خلقتها
جتي ريم وضلت تباوع لياسر

المديرة : العركه اني حتى ما اذكر شنو جانت بالضبط ذكريني

خنزرت ريم وحجت بعصبية خفيفه: ست اني ما متعاركه اني دافعت لصديقتي وكلش زين تدرين بية اني وروان من زمان واحد من المتوسطه

المديرة : متوصل هيج

ريم : العفو منج ست بس اني عندي توصل وردت اسوي اكثر لو ما البنات وخرونا

ضليت صافن هاي الشغله بيها روان خل استأذن وافتهم من ريم من نطلع

حجى ياسر بضحكه : من رخصتج ست يعني بس اني مالي موقع من هيج سالفه بالنهايه هي عركة بنات واني ما ادخل بهيج اشياء

باوعت المديرة وانطته ورقة توقيع خروج وأخذها وطلع

بسياره
ياسر : شسالفه ريم ؟

ريم : هيج مو مهم

ياسر : تكولين لو شلون الظاهر عركه جبيره

حجت بنرفزه : ياسر انت مو ما تحملت من صديقك هيج سوو بيي

ياسر : ايي ؟

ريم : اني هم ماقبل صديقتي مريضه وايدها مكسوره وتجي وحده عالفاضي تحجي عليها اشياء مو صحيحه

ياسر : منية ؟

باوعتلي صفح وكالت : تعرفها زيننن

صغرت عيوني وجاوبت : منية ام كفشه ؟
ريم : شوف عرفتها بلمح البصر

ياسر : اي اكيد لان كتيلي تعرفها ف منو غيرها ؟

ريم : اي باع هنه مو قبل شفتنا نتعارك وجيت وخرتنا هنه ذني نفسهن تعاركت وياهن لان غلطن عليها وعد وصف واني ماكدر

ياسر : وربي موش بنات فلك خلوني اصير صنم احنه الولد منتعارك هيج

ريم : ايي واني تعاركت وياهن الحقيرات

ياسر : هي روان شوكت تداوم ؟

ريم : ياسررررر

ياسر : ترى سؤال عادي حسستيني مسوي جريمه
ريم : لا مو جريمه تعرف قصدي احممم

ياسر : ابتلي احجي حجايه وياج اني ؟

ريم : مو تبتلي هذا صدك يعني انت تحبها متحبها مدري شوضعك

ياسر : اعوف بنات العراق اجي احب ام كفشهه ؟ من كل عقلج

ريم : ليش لا تصير تصير

ياسر : لو تكولين كلمة زينه لو تسكتين

ريم : صارت كلمه مو زينه ؟

ياسر : ريمممم

ريم : ايييي كافي سد الموضوع خل ارجععع اشوف بنان

ياسر : اي حتى اني اريد اشوفها

ريم : مرت اخوك يولو

ياسر :صديقتي

ريم : مريم انضربت بوري

ياسر : لا عمي مريم وحد وبنان وحد خليني اسوق لا ادعم الكبالي

.......................................

ليان
كاعده تبجي ومغطيه راسها
دخلت عليها امها وبيدها صينية الغدا

جمانه: كومي اكلي يلا

ليان : ماريد اطلعوا ماريد أحد يجي علية

ذبت جمانه الصينيه على صفحه وراحت عليها: متكليلي انتي ليش هيج مسوية بروحج يعني هسه لو اني اكتلج احد يكلي ليش شكبرج شكدج بابا افتهمي فهد راح راح ماكو فهد تزوج طلعي من راسج احلامنا والمخططات راحت

عاطت : لا لا ميروح أخذه لو اعرف يتزوجني الثانيه عليها آخذه

جمانه: انجبي لج شنو ثانيه اصلا اني بعد لو اموت مانطيج بس انتي وحده ثوله مافلحتي من البداية تفلحين هسه ولج بيبيتج زهره خابرتني تكول ماخذها حب ومدري ايش لعد انتي شجنتي تسوين من تروحين ها مو تكولين اجيبه ومادري شنو

مسحت دموعها وباوعت بوجه امها بحقد : صدكيني اجيبه لو اعرف اكتلها وادفنها وماخليها لفهد بس اصبري واني أعلمهم منو " ليان "

@@@@

دخلوا للبيت

ياسر : دخوليتنا فخمه

مد ايده ل ريم وهي لزمت ايده شلون حركة العريس والعروس هيج

بنان : نورتوا

مريم : صدك اليوم سوينا برياني وبنان صلوات ما شاء الله من صدك من اشوفها تسوي مبين طيب

فرح : اي هسه اني اتله تله ( اكله كله )

بنان : اي واسويلج جدر ثاني هم

فرح ضحكت : هم اتله تله

ياسر : ولكم برياني اهخخخ خل اصعد ابدل وانزل دقايق واني هنا خوش

ريم : واني هم دقائق واجيكم حتى نصب لان ميته جوععع

بنان
رحت صعدت فوك لغرفة فهد طبيت وطلعت تلفوني ودكيت على فهد ماعرف شلون بس حسيت بفدشي بداخلي خلاني ادك عليه

بنان : الو

فهد : مية هَهلا .. تفضلي رايده شي ؟

بنان : لا ابد والله مرايده شي

فهد : امريني اكو شي ثاني ؟

بنان : لا والله يعني هو مرايده شي بس هيج يعني دكيت

"ضحك" فهد : بخير بخير انتي شخبارج شصار بالبيت مصار شلونهم وياج خما ضوجوج

بنان : ابد بالعكس عادي وطبخت وياهم ومريم وياي و بيبي و خاله رحاب هم

فهد : تمام .. انتِ شلونج مرتاحه المكان واهلي ماخذه راحتج

بنان: اي عادي كلش هسه خاله تصيحني حروح وياهم نصب الغدا

فهد : شمسوين

بنان : نننن ميخصككك

فهد : صوجي سألت

بنان : نعمم صوجك

فهد : عايف شغلي والملفات العندي وجاي عليج تضحكين علية

بنان : امممم

فهد : خوش يصير خير بس ارجع
وسد تلفون

يصير خير شتسويلي مثلاً .... رجعت نزلت جوا ولكيت الكل موجود حتى همام راجع من وكت
همام : هلا بمرت اخويه اييي ياسر يكول اليوم هي سوت البرياني

ياسر بثقه : متأكد اني انتي شيف

ريم : اكيد مدام مرت فهد ف اكيد عرف يختارها

زوزو : اي هذا ابو الوصخ شوكت يرجع ؟

همام : زوزو متدرين بي هذا يرجع بالليل

زوزو : اي اي

بنان

رحت اصب غدا وياهم ومريم وخالتي وريم وكلنا مجموعين بالمطبخ سألتهم على عمو ابو فهد كالوا بالشغل

مريم : بنان شعجب مصبغتي شعرج ولو لونه ما شاء الله كلش حلو

بنان : هو هيج اني احب لونه

مريم : عندج اني كله عركات وية حسن حتى اصبغ شعري لو اغير فدشي كلشي ميقبل لج عيني يفت الواحد فتت اسئله ليش يكول اني احبه هيج زين اني اريد اغير ومرات أتوسل بي يلا يقبل

بنان : عندج اني لا عادي اني احب طبيعتي حتى بالمكياج ما احط هواي كلش خفيف احس ميلوكلي طوخ يطلعني مهرج

مريم : دباع هاي المكياج نتكافش اني ويا ميقبل ولا عبالك مرة متزوجه يعاملني وحده صغيره

بنان : عادي يمعوده

فرح : يلا يلا سبوا اني دوعانه " صبوا اني جوعانه"

بنان : تمام هسه باعي داصب ويه بيبي

فرح : اييي

ياسر : يوم جعتتت صبي

همام : انجب ابو حلك عيب من البنية

ياسر : يابه دروح انت الثاني

جبنا السفره وفرشناها وصبينا الغدا وما شاء الله المواعين وكلهم كعدوا ياكلون وكل شوي فرح تكول تيب يمي يمي ( طيب ) وصراحه فرحت وحتى خالتي هم فرحت اني من زمان متعلمه اطبخ وكلشي اسوي من المتوسطه جمال شسوه بينه

ياسر : اللهه منصدك عاشت ايدج بنان

بنان : بالعافيه

همام : بنان ترى هذا لوكي شوية تحملي

بنان : لا عادي والله احنه اصدقاء مو هيج

ياسر : معزتج خاصه

مريم : الله بالخير

ياسر : الله بالنور اعرف وانتي هم اخت واعز هم مريوم انت ام الفرحه بعددد جبتيلنا هاي العوبه

مريم : ههههههَ

زوزو : أكلوا ولكم لتخرطون ماحب احد يحجي وهو ياكل خوش

همام : خوش زوزو تدللين

ياسر " هو وياكل " : يبعدي زوزو تتنرفز مو بعيني
اباوع عليهم واني مبتسمه عائلتهم حلوه ومتفاهمين
مجنت عايشه هالاحساس طول عمري عالغدا والعشا جمال يسوي مشكله ما الها نهاية وكله بسبب فراس جان يخبث ،، فراس السبب كله هو فراس السبب الله ينتقم منه وياخذلي حقي منه ومن جمال بس اريد خواتي تبهذلتي وشصار بحالج بنان

@@@

جمال : تقدم موعد الخطبه وراح يجون باجر حظروا نفسكم زين ورزان يا ويلج وشفتج تبجين لو تفشليني لو تخربين اي شي خلي بعلمج نهايتج مثل نهاية بنان تسمعوني لو لا

الهام : صدكني مابقى هنا لحظه لو تسوي شي جماللل

جمال : شتسوين سوي بعد ما اهتم

رزان تبجي : والله حرام عليك ليش هيج معقوله معندك ذرة حنية علينه ليش هيج سويت بينا ليش خربت مستقبلنا لك انت خربت مستقبل بنان الي بقت الها اخر سنه بالمدرسه وخربت مستقبلي بقالي سنتين واتخرج كل وحده بينا جان الها طموحها انت محيت كلشي خليتنا ميتين .. ياريتني ميته ولا جيت يمكم

طلعت روان وكالت ببرود : اذبح نفسي اذا سويت شي لرزان

جمال : انتي انجبي ولتدخلين كح**

الهام تبجي : الله يخليك عوفهن والله اني وياهن
نزل فراس من فوك ويعدل شعره: خيركم شصاير بس لا موضوع جديد نحب سينما بيت جمال

جمال خزره وكمل : كلت كلمه وحده رزان راح تتزوج وأشوف اليكسر كلمتي

تقدمت روان وكالت : بس اني كلت اذبح روحي اذا سويت شي الها

رزان : روانننن معليج بيهه

روان : علية ونص واذا صار شي بركبتك انت وابنك الجايف

فراس : اووووو السالفه قويه اني طالع

روان : محد مهتم

جمال : شتسوين مثلا يا هانم ها ؟

روان : شي متتوقعه صدكني راح اندمك واخليك متعرف راسك من رجلك وهاي اني روان لك انت شنو من انسان اريد يوم خالي من المشاكل وياك ماكو انت منين جاي ها شلون تحملت روحك اصلا انتي يمه شلون تحملتي .. لك انت خليتنا نتمنى ميتين ولا جايين هنا هي هاي الحياة الناس كاتله نفسها عليها ؟ شوفو كلكم والكل يسمع اذا رزان سويتلها شي يا جمال اسوي شي ميعجبك

طكت عروكه وصار وجه احمر من الأعصاب سحبها من شعرها ودفعها عالحايط بكل قوته

عاطت روان بحيث حسيت طلعت روحها
رزان

ركضتلها واني ابجي وهي تمثل قوية بس ادري متأذية متحب تشوف بنظرة الناس شفقه عليها تحب تأخذ حقها متحب تنهان ولا احد يتقرب من شخص
تحبه واحنه المقربين بالذات اني وامي وبنان حسيتها تخبلت من راحت بنان ، عافت ايدي وكالت حروح للغرفه وماريد احد يجيني وسمعت طكة المفتاح حسيت انهرت تماماً

لا اخ ولا ام لا اب

خواتي مكدرن يسون شي اني انتهيت جمال موتني من كال متداومين جانت آمالي غير احلامي غير ماكول غير حسبي الله امي صعد ضغطها ورحت غسلتلها وجبتلها مي وضليت يمها

@@@@@

العصر متجمعين واجه محمد ابو فهد والكل كاعدين بالصاله وضحك وكل واحد يحجي فد شي

ياسر : فديوم جنت بالابتدائية قبل ف اني واصدقائي جنه متعاركين ويه مجموعه وعداوة وكذا ف همه جانوا كبار ..
اهااا تذكرت جانوا سادس واني جنت صف رابع يعني صغار مقارنة بيهم واني جنت ناعم وأحمد هم شوية لا طول لا ضخامه لا سمن وضعاف اجه واحد منهم هيج شطوله جبير ومبين راسب اجه علينا بالفرصه كال فلان رايدكم بالحلة ورا المدرسة واذا انتوا كدها تعالوا وهيج ضربني على جتفي مثل يستهزء ف احنه ضجنه واني كتله بعيني تدلل وانه اخوك اشوفك منو ياسر ..
انتضرنا بالحلة مال مدرسة ما انكر جنه شوي خايفين لان احنه صغار وهمه كبار

هيج طلعنا احنه جنه 4 بس عبالك فارات يمهم المهم طلعنا نمشي كلتلهم غلسوا وروحو من غير مكان كولو مشفناكم ف عود احنه دنغلس طب طلع واحد كبالنا يضحك هذا اعرفه هو هذا الي تعاركنا وياه احنه اجتنه ام الركب وضلينا صافنين واحد عثاني وراها جان طب يجون بال 6 هيج يعني شلة هواي مجمعهم ف ضلوا يضحكون اني شالتني الغيره كتلهم ذبوا جنطكم شمرناهن بالتراب ضلينا نسوي حركات وكذا رفعنا أكمام القميص ماشوف غير واحد شالني بتك ايد وركعني بالكاع وكل واحد منهم على واحد دمرونا ليش ما جان واحد ويانه بالصف اعرفه شافنه رايح لابو المكتبه يم المدرسه وهذا ابو المكتبه جيرانا يابه تذكر

ضل محمد دايخ وهو يسمع : اي

اي خل اكمللكم شبيكم عبالك نمتوا ههههههههَ

المهم هذا ضربني شلون بوكس على بطني وجنت مماكل لا فرص ولا شي ملتهي العب وية هذا وذاك وجان احس ايده طبت لبطني جوا ضليت اتلوى جوا ايده حسيت نهاية العالم وبوكسات على وجهي من يم عيني زوركني

جان يركض ابو المكتبه وابنه جبير شاب عاطوا عليهم هذوله خلوا وشردوا والتراب يطاير وراهم واحنه ردنه نبجي جنه صغار وهيج ورجعت للبيت فوكاها اجي اكول لامي هيج " لا شبيج خايفه عركه بسيطه كتلتهم اني " واني قميصي دماية والدنيا مكلوبه

خلصت حجي اباوع للكل صافنين علية هذولة اكيد داخوا

اشرت بايدي .. هلوووو

هذوله مدري انسطروا اخر شي طلع همام بين ما اني مندمج واحجي مأشرلهم مينطون ردة فعل وضاحكين علية

اني كمت ورحت بدلت وطلعت رحت لاحمد اوديله محاظرات ونفس الوقت زيارة مرحتله البارحه

@@@

بنان
فجأه انفتحت الباب وطب فهد هو مو كلي ارجع بالليل ؟

طفرت فرح : عمووووو

شالها وهو يضحك : يروح عمج أنتِ

فرح : تاكدني اسلي ايس كليم ؟ ( تاخذني اشتري ايس كريم )

فهد : اي واشتريلج بدلة هم يا لون ترديها انتِ

فرح : امممم احب احمل ( احمر )

فهد : يجنن حلوو

رحاب : هلا يمه نورت

باوع علينا إلى أن شافني وابتسم ابتسامه خفيفه وكلب وجهه

فهد : وينها ريمه ليش ماهيه اليوم

همام : والله اني قبل لتطب غرفتها كلتلي نعسانه وتعبانه

فهد : تمام

محمد : بويه جوعان خلي بنان تصبلك غدا

فهد : لا ما اريد اكلت قبل لا اجي مؤمل جابلي اكل
يلا اني اترخص حصعد فوك

اجه علية وحاوط ايده على كتفي وصعدنا فوك

فهد : اي ست بنان

بنان : ايي استاذ فهد

فهد : شكوو منا منا

بنان : سلامتك

طبينا الغرفه

فهد : حتخبل هاي الدشداشه شلون بيها انييي حشكها عليج انتي ليش تعاندين

بنان " انصدمت " : شنو

فهد: داحجي هندي اني مو كلت تلبسين صاية يعني هيج تفترين كدامهم ؟

بنان : ليش شبيها حلوه حيل علية ولايكتلي

فهد : عقلج شبي أنتي شنو تضحكين علية لو انتي هيج

بنان : شبي لتخبلنيي بعدين اذا اني اضحك عليك شكو عقدت هاا اذا متثق ليشششش ما خ..

بعدني ممكمله كلامي جمدت من الموقف قرب حلكه يم اذني وهمس : اعصابج عيني روحي بدلي حتى نطلع

رجعت ليوره واني كلبي يدك سريع

ماحس غير ضحك واني ضحكته توترني زايد رحت كبل طلعت ملابس وهو كاعد عالابتوب اكيد شغل واني رحت طلعت هدومي وبدلت طلعت لكيته مبدل وكاشخ وديحط عطر صراحه طالع حلو

"حجيت بتردد" : منو حيجي ويانه ريم تجي مو

باوعلي صفح : كلتلهم هسه ديتحضرون حتى امي راح تجي بس همام ومريم يبقون يم زوزو وابوية وياهم هم

بنان : زين هسه انت وين حتاخذنه

فهد : للمول

بنان : ملابسهم غالية اغلى من محلات السوك

فهد : مالج دخل اني بكيفي

بنان : اوك تمام

اندكت الباب وراح فتحها فهد

طلعت ريم ومبدله وهاي وجاهزه

ريم : اني وامي خلصنا ننتضركم جوا

فهد : تمام هسه نجي ، يلا بنان ننزل

بنان : تمام جيت

طلع وطلعت وراه وجانت ريم تنتضرني يمه
ريم : لج شطالعه تموتين

بنان : يحياتي من ذوقج

ريم : شوفي عود اقنعي فهد ينتضرنا اريد اروح كوزمتك هذا يتخبل اذا ينتضر احَد يموت من الانتظار يريد الشغله تجي بسرعهه

فهد : منو مينتظر

ريم : ياسر هذا مينتظر يريدني اطلع بسرعه حتى نرجع

بنان حبست ضحكتها لان موقف يفشل

نغزتها ريم وهي تنزل من درج : استري علينا يمعوده

فهد : يلا يمه امشي نطلع

طلعنا و فهد ديسوق وكذاا وريم تسولف وياي وبديت احس علاقتنه تكبر

حجى فهد : بيت عمي ليش ما جوي اليوم شعجب

رحاب : مادري هسه من نرجع اخابر خالتك جمانه اشوف

فهد : اي تمام

بنان : انتبهت على ريم كلبت خلقتها

نغزتها كتلها بهمس : شنو شكو

ريم : من نرجع اريد تجين غرفتي نسولف خوش

بنان : تمام

وصلنا المول طبك فهد السياره ونزلنا
ريم : فهددددد

فهد : شنو

ريم : فرح نايمه نسيت ناخذها ويانهه

فهد : اي صدك شوف خطيه كلتلي تريد ايس كريم

ريم : من نرجع من ابو الأسواق نجيب

بنان : ضليت اباوع بالمول واني وريم نمشي ونسولف وتكلي شعدها ملابس وهيج دنمشي بأمان الله ورانه هيج مسافه بسيطه يمشي فهد وخالتي وراه

فاتوا اثنين شباب يمشون بصفنا ويضحكون اني ضجت ودرت وجهي وريم تدير وجها وماكو ميروحون لازكين

الولد : يا حلو يمعود دنطينا نظره

الولد ثاني : انانيييي فديت دباع نعمة الله

بنان : اكلج هاي شنو هذولههه تعصبت

ريم : اششش بنان يمعوده خل نطب بأي محل بس ماكو ملابس بس اكل استغفر الله

الولد : شبيك مستعجل ركضتنا وراك

التفتت بنان : توخرون منا لا صدك هسه افضحكم
اجه فهد وكف كباله برود : شنو المشكله ؟

الولد : انت شدخلك ؟ منو انت ؟؟؟؟

فهد : تاج راسك وانطاه بوكس على وجهه

صاح الولد : انت منو وتمد ايدك علية

فهد : الضابط فهد محمد وهذني الي طول هالمسافه شفتك تحجي وياهن هايييي تكون زوجتي وهاييي اختي

تحب اعتقلك لو تنكلع ولا اشوف خلقتك
رجع الولد ليوره اخذه صديقه الثاني وراحوا

صاح فهد : حيوانن

لزمته من ايده وحجيت ( بنان ) : عوفهم راحواا شوف الناس تباوع علينا

باوعلي بنظرة معرفت افسرها: كملوا طريقكم

ضلينا نمشي وصعدنا طابق ثاني مال ملابس
طبينا لمحل مال ملابس بيت

بنان : فهد من صدك احجي يعني اني اريد اختار أحسك تريد تلبسني كونيه وانت دشداشة ريم مقبلت عليها

فهد : كيفي

ضليت اني اختار ملابس وكم واحد بواحد ميعجبه كلشي دوخني وريم تحجي ويا يلا يقتنع بالحاجه عايش الدور من صدك هو اني مرته بالجذب بس ياعيني يقار غيررر اوففف صدك دوخه

اشتريت ملابس بيت وهو يكلي شنو ذني اشتري بعد
بنان : شنو بعد غاليات يمعود صدك تحجي

باوعلي برود وكال : مالج دخل اشتري بنان ولتحجين
درت وجهي بفشلة صدك احس احجي هواي وضليت وية ريم ونختار وتجي تسألني وخالتي هم أشترت الها ملابس واخر شي طلعنا من المحلات احنه وعلاليكناا

فهد : هسه وين تردون

ريم : خل ناكل متشوف صار ليل صارلنا ساعه نفتر من محل لمحل يمههه

فهد : سوالفچن هاي

راحوا وكعدوا على طاولة من الطاولات وكعدت وياهم اكيد وياهم

شاورتني ريم : بس اخلص اكل كليلة نريد كوزمتك وهيج خوش

بنان : مو استحي

ريم : انجبي والله لو اني متزوجه فلا استحي واحجي ويا طك بطك وهاذهوه لعد شكو تزوجته تهي بهي حبابه بنانن

بنان : تمام عادي

راح جاب صاج وببسي واجه واشوف عين البنات عليه يعني اكيد يباوعوله هو ضابط يعني وحلو ليش ميباوعوله وبالنهاية بنان لتنسين زواج " شكلي " حتى يحميج من ظلم جمال وبس وهاي العائله صدك هنيال الي يجي يمهم

خلصنا اكل وكلشي وكمنا ودفع الحساب

كتله : فهد

فهد : ها

بنان " بتردد " : يعني نريد نروح كوزمتك هنا وهاي
هز راسه بتفهم واخذنا ورحنا

من طبينا المحل وعرفت ريم نقطة ضعفها المكياج كلش تحب ف اشترت مكياج وعناية بالبشره وهيج واسألها وتكلي هيج واشتري واني اكوللها ماحب اني هيج احلى كلتلي أخذي علبة وأخذت وهاهي
طلعنا من المول ورجعنا للبيت

@@@@

طبينا للبيت تعبانين من الفرارة وفهد مطنكر مادري شبي بس عالاغلب لأن فلسناه

تلكته فرح وهي تبجي : ليس ما احدتني وياتتت ؟ ( ليش ما اخذتني وياك )

فهد : يا عمري انتي غير جنتي نايمه

بنان : نطلع عود اني وياج تمام

سكتت وابتسمت وراحت يم مريم ومريم اخذتها فوك تراضيها

ورا دقايق من طبينا طب حسن

حسن : ها لكمممم شلونكم وينها بتي

ريم : فوك هي وامهاا

حسن : خوش لعد حظروا العشا

رحاب : اني اكلت عشا برا وية فهد ما اريد اكل بس راح اسويلكم

محمد : اي عيني شكو عليج طالعه بالمولات وعايفه رجلج مو صح يمه

زوزو : دسكت انت الثاني هي وينها خطيه وين طالعه وخطيه طلعت وية بنان چنتها بعد

محمد : اي اي ليش لا عندج حماية عيني

رحاب : اييي عندي حماية ليش لا

ضحك فهد وكال هسه نجيكم وتغيرت ملامح وجهه ولزمني كأنما يلا بس اصعدي يمعوده هيج

طبينا للغرفه كتله بعصبية : شبيك ليش هيج

فهد : ماكو

بنان : لا احجي خاف لان اشتريتلي هدوم ولو معايزه عليك جان بقيت بهذيج دشداشه ولا اخذت منك

عاط بوجهي: ولا كلمههه

يبست بمكاني من المنظر اول مرة اشوفه هيج عصبي شبي ليش هيج بس لا صاير شي يمه بالشغل لازم اتحمله وهسه هاي الغراض كلها اوديها لريم ماريد شي هضمني حيل ودمعت عيني وبجيت ودرت وجهي ورحت كعدت عالقنفه

ورا دقايق بدل وطلع وين ما وين ما ادري
كمت بدلت ورحت كعدت وحدي عالجربايه لحد الان استحي انزل رغم محسسوني بشي ابد يشهد الله بس اني مادري تحسست من فهد ومن موقفه يقهر وعناد بي ملبست شي جديد لبست دشداشة ريم

....................................

ريم

كعدت بغرفتي واني ضايجه رغم طلعت وتونست وية استاذ فهد النفسيه بس مادري ضايجه ومقهوره باجر مادري شبية

لزمت تلفوني ودورت رقم ام روان ودكيت عليها جانت ساعه 10 ادك وادك وماكو رد دكيت مرة ثانيه طلعتلي امها تهلي وترحب : هلا يمه ريم شلونج

ريم : الحمد لله خاله انتوا شلونكم شلونها روان

الهام : والله على الله هسه اصيحها واجيج

راحت صاحتها وجتي روان تحجي بس صوتها متغير انصدمت منه

روان : هلو ريم مشتاقتلج ونبي

ريم : والله حتى اني .. ولج صوتج شبي

روان : مابي والله بس اني اسبوع اللاخ الاحد راح اداوم

ضحكت ريم : الله حتجين يمههه مداصدك ايدج شلون صارت

ريم : هي مكسورة بعد بيها الم بس مو مثل اول مرة هسه اشوف شلون باجر حروح

ريم : تمام

روان : اي شصار مصار من وراية

ريم : على حطة ايدج

روان : هسه ارجع محظره اكشن اسويها بالمدرسه تصبرلي مروة وذيج الوياها

ريم : من تداومين اسولفلج كلشييييي بس اكلج روان رزان ليش مداومت بالي ضل يمها

روان: ها خطيه مريضه فلاونزه.. اكلج ريم حروح هسه تمام ونلتقي عود الاحد

وانسد الخط حتى بدون ماكول باي

روان شبيها اكيد بيها شي لا صوتها بي خير ولا هي الفضول حيموتني اريد اشوفها الاسبوع هذا موتنيي

@@@@@@

بنان

اندكت الباب فتحتها لكيت ريم مبتسمه كلتلي
ريم : تعاي نزلي وياي فهد طالع شوية جوه يم زوزو
ابتسمت كتلها ثواني البس شال ونزلت وياها

ياسر صفر : يااااا هلااا ومية هلا لكم تعالوااااا

ريم : جينه جينه

زوزو تضحك : همام راح يجيبلنا البوم الصور من همه وصغار تعاي بنان يمي كعدي

بنان : اي بيبي جيت

حسن : اصلا اني احلاكم من جنت صغير

مريم : اكيد حبيبي انت الاحلى بدون منازع

ياسر : سكتوا عيني سكتوا اصلا لحد ينكر اني احلى واحد بينهم

ريم : فهد

محمد : شبي فهد

ريم : بابا مو فهد احلانا

ضحك محمد : كلكم حلوين مدام اني ابوكم
نزل همام وجايب البومات ثنين يعني صور هواي حسيت تحمست اشوف فهد من جان صغير

اجوي كلهم تجمعوا واني كعدت بصف مريم وريم وكعد ياسر أخذه من همام وبده يطلع صور

ياسر : شوفو الافتتاحيه بية اني الأمير الوسيم

ريم : نزول امير وسيم

ياسر : اي شعبالكم هيهيهيهي

باعوا همام لابس مناضر ابوية وكاعد بالسطح
طكيناها بضحكه جانت الصوره تموت ضحك

ياسر : هاي الأميرة الوسيمه حتى متزعلين كاعده بالمرجوحه وحاطه ورده بشعرها كاطعتها من الحديقه

ريم : والله اني كيوت مو صح بابا

محمد : طالعه علية

ياسر : باعوني دا اكل لبن هنا وحلكي رايح كله لبن
رحاب : يمه فديت ابني الحلو

همام : اي اي ابنج حلو اكيد

حسن : على كولته الأمير الوسيم

ياسر : اكيد اكيد

باعوا هنا كلنا كاعدين يم زوزو

ضحكت زوزو : عزههه جنت صغيره شوف شحلاتني

باسها ياسر : لحد الان تجننين والعباس

زوزو : وين راحت علية

ياسر : دباعي الجمال لحد الان تجننين زوزو تخبلين
هنا كاعده زوزو تمشط لريم

بنان : فدوههه شكد حلوين وربي تجننون

همام : اي عيني شعبالج

ياسر : بنان اني احلاهم مو صح

بنان بحيرة : والله كلكم حلوين ماعرف المن اختار

مريم : بقى فهد

ياسر: فهد الالبوم الثاني

بنان : ضليت انتظر واباوع للصور ونضحك وحده من الصور واكفه بيهم خالتي رحاب و يمه الجهال كلهم وحده زوزو وياهم وشلون صور تجنن ياريت اني حتى صور ماعندي اي شي عن طفولتي

انفتح الالبوم الثاني ب ايد ياسر

هذا الألبوم حسيت شكله غريب
مادري بس جاني فضول قوي ينفتح مو علمود فهد لا بس اجاني شعور هيج

باوع ياسر لزوزو وأمه وأبوه : كال تعرفون هذا الالبوم شبي افتحه لو لا

زوزو : اي أريده افتحه

هزوا راسهم وهمه مبتسمين واني صافنه ماعرف شنو السالفه

اول صوره جانت خاله رحاب واكفه بصفها مره آية من الجمال وشعرها مفتوح وطاير بالهوا وبصفهم خالتهم جمانه و بالكاع كاعده زوزو

اشرت ريم بحزن : هاي خاله سراب

وجواها صوره بيها عمو محمد وبصفه عمهم محمود و اياد بالاخير جان لازم ورده وهم الصوره بيها زوزو

مريم : وهذا عمهم اياد الي مات

بنان : كلتوا مات بحادث هو ومرته ؟

مريم : اي خطيه قهر وربج

حسيت الصوره حلوه بيها شي حلو بس معرفت شنو
بجت زوزو وهي تشوف الصور وعاط ياسر بشقه ومال حسده واروح ومقبلت

كمل وبدت تطلع صور فهد

وحده من الصور طلعت جان فهد بيها صغير حيل عمره سنتين وعنده سنون ثنين
ضحكت عليها كيوت حيلل
وراها صوره ثانيه

ريم : هاي صورة فهد حيل حلوه
: سمعت طاري فهد !

نهاية البارت
يتبع ..

لاتنسوا التصويت

إلى اللقاء يا أعز العابرين في قلبي ♡.

الكاتبات دينا & نور