رواية نقطة لقاء الفصل الثامن 8 - بقلم الكاتبة دينا _ الكاتبة نور

ياسر
بالرجعه رجعت واني فرحان لان لكيتهم واتصلت على احمد

ياسر : لك هلاااا بحمود ابشرككك لكفناهمم

احمد: ياااا بعد روحي ياسرررررر لكك تعال اريدك تجي اليومم يمي خوش

ياسر : تدلل شوكت اجيك فارغ

احمد: تعال بالليل حتى عندي كومه سوالف وياك

ياسر : ايوالله حتى اني عندي سوالف وحش بالناس كومهه فاتتك احداث فدشي

احمد : من اغيب كلشي يصير ويمكن حتى ينزلون فضائيين بالجامعه

ضحك ياسر وكال : وهو كذالك يا صديقي يلا الان اتركك واذهب الى صخامي

احمد : انصحك تصير مدبلج بقناة سبيستون

ياسر : من حلاة صوتي ديلا روح مو كلنا حجيك بالليل

احمد : حبيبتي لتنسين تجيبيلي وياج ببسي شربت وها كون صندوك وحتى لو صندوك نساتل ايشي

ياسر : حياتي انتي شعندج غيرج اني حمودتي يلا سيوو ابو شهاب

احمد : كلعه

انسد الاتصال

ياسر : يا جلب .. وراي ريم خرب هسه اكيد طلعوا
مشيت سريع بسيارة واني عالك اغاني وساجده عبيد ولاعب لعب وفرحان كمشوا هذوله وهسه حروح اجيب ريم من المدرسه

رحت وكفت باب المدرسه والحبايب يطلعن وحده تباوع للخ ويباوعن علية ويحجن لك هاي شنو ياسرررر وانت اليوم كاشخ نزل نظارتكك

نزلت نظارتي وهيج كالب خلقتي عود ضايج وهيج علكت اغنيه حزينه اخر شي مندمج جان تندك الجامه مالتي باوعت شفتها ريم نزلت الجامه جان تعيط بوجهي

ريم : تفتح الباب لو ارجع مشي

ياسر " ابتسم ابتسامه خبيثه بشقى" : ما افتح الباب شتسوين ههههههه باع خديداتج جنهن طماطه مكلايه

ريم : يااااسرررر قسماً بالله اذا متفتح الباب هسه ارجع واعوفك

ياسر بخباثه: تعاي كولي آسفه ياسر يلا افتح

فتحت عيونها وكالت : ليش يمه اني شسويت واتأسف هسه ارجع بكرامتي احسن

اندارت بعصبيه وهي تمشي

ياسر : لا يا الله هاي سوتها صدك ولج تعاييي ام زعله

ريم : عوفنييي ارجع وحدييي

ياسر شغل سياره وضل يمشي وياها وهي تعيط عليه
ياسر : صعدي ريم فضحتينااا

ريم : تريد اعيط هسه واكول هذا يتحرش بية يا ناس

ياسر : انجبي حتنكتلين صعدييي لا اصعدج بطريقتي

ريم : نننننننن بطريقتي .. وربي شايف نفسك على شنو متكليييي

ياسر : اني شايف نفسي تهي بهي تعاي بابا صعديييي
ريم بحقد : اصعدد ليش لاا

ياسر : صعدي بس ارجع اني اعلمج جايفههه خايسههه

ريم: نشوففف

@@@

بيت اهل فهد

جايين بيت محمود وجمانه وليان وابنهم مجاي هالمره

ليان : خاله فهد وينه شو ماهوا

رحاب : والله بالشغل

زوزو : اي سوده علية يتعب تعب

جمانه : اي صدك شكوو ماكو بعدد

مريم : والله ماكو

جمانه : اي شلونه حسن شلون شغله

مريم : الحمد لله

ليان تشاور امها : يمهه تأخر هوا كل مرة يجي منوكت

جمانه : اسكتي وانتظري هسه يجي

ومحمد و محمود كاعدين يسولفون على صفحه

انفتحت الباب ودخلوا ياسر وريم

ريم بصدمه : هههههه يا هلا هاي منو اليوم

زوزو عوجت حلكها وضايجه حيل من جمانه وليان هي تحب بس محمود لان يختلف مو مثل مرته وبنته حياية

سلم ياسر وهم صعد ورا ريم فوك يتعارك وياها
ياسر : ادبسزز مو اخت شيطان يمي حرام واحد يشاقههه وياج

ريم : ايييي مدام تعرفني هيج شكو تتشاقه واني طالعه روحي من المدرسهه

صعدت فرح وراهم وصاحت : هلووووو ديتووو ( جيتوو ) وراحت حضنت ياسر لان هوا دائما يلعبها
وريم طبكت باب غرفتها وطبت

فرح : انت وينَت اليوم سو ماتو ( انت وينك اليوم شو ماكو )

ياسر : والله يا عيني جنت بالمدرسه

فرح : تان اخدتني وياك ( جان اخذتني وياك)

ياسر : غير المدير ميقبل نجيب ويانه جهال

فرح : هاا يعني اذا ادي يتلني بالعوده ؟ ( هاا يعني اذا اجي يكتلني بالعوده )

ياسر : لا هو حباب بس ميقبل ، يلا روحي يم ماما وزوزو جوا

فرح بضوجه : هاي خاله ليان دُلي انتِ محلوه اني احلى

ضحك ياسر : كليلها لا عيني عمو فهد يكلي أنتِ ماكو بجمالج خوش

ضحكت فرح وكالت : خوش هيهيهيهي

. .......................................

ريم

اليوم جنت ضايجه حيل من المدرسه لان تعاركت ويه سجى ومروة اللي شادات ويانه الحقيرات
اجتي مروة تحجي على روان وأم الولد وحجي موزين اني مقبلت وضليت ارادد وهنه ماصدكن وتكافشنا ورحنا للإدارة

واكفين نباوع بحقد وحده للخ وشعورتا طايره حجابي مخربط وطالع نص شعري ومروة جان شعرها مكفوش من جهه والقراصه بجهه ثانيه وسجى مدري شوضعها عود فزعه لمروة وجه النعال هم كطعت شعرها وتستاهل اكثر

المديرة : جاي كهوه " عاطت " اوكفن عدلل طايحات الحظ

ريم : ست والله هنه بدن

مروة : ست هي فشرت وغلطت علينا

سجى : محجينا شي غلط صدك صديقتها ام الولد

ريم : صمي حلكج لا هسه اسوي شي ميعجبج حقيره روان تاج راسج

مروة : انجبي لج شايفه نفسج علينة شوفه

ريم : انتي وحده حقيره متستحق احجي وياها " ودرت وجهي "

سجى : ماكو غيرج حقيره ام عطوب

كامت المديره مچتفه أيدها كبالنه وضلت تمشي كدامنا

وانطتنه كل وحده وراجدي

المديره : حتى تتعلمن شلون تتأدبن من توكف المديره يا صلفات يلا ولن من خلقتي روحنن والا أنقص من درجاتجن كل وحده بكدجن عدها ابن وانتن تتعاركن هاي جذب وهاي صدك وخرن من كدامي

طلعنا من الاداره وحده متحجي وية اللخ وراها رأسا طلعنا للبيت ورحت رجعت ويه ياسر الخبيث
ومن رجعت زادت انوا جاين جمانه و ليان

شمرت روحي عالجربايه بتفكير
شراح يصير بية بعد تعبت حيل الدنيا مادري شبيها وياي لا من حب ولا من اي جهه

رفعت شعري وبدلت هدومي ونزلت جوا اشوف السينما الصايره

زوزو : تعاي ولج ريم يمي بعد روحي لج شطالعه شنو هالجمال " علت صوتها وتباوع صفح ليان وتحجي " : تشبهين اخوج فهد فديتكم جهال محمد شكد حلوين

ليان : اي كلهم حلوين بس فهد أكثر شي

زوزو : اي حتى احلى منج

ليان بلعتها وسكتت وضلن هي وجمانه يتبادلن نظرات

زوزو : اي ولج ريم تعاي سولفيلي على هاي صديقتج الحلوه روان

ريم : اي يا زوزو هاي روان لحد الان ممداومه صارلها 4 ايام تقريباً وهي اجازتها اسبوعين مرضيه خطيه ايدها مكسورة واكعه عليها

زوزو : لو متكولين زوزو اني بخير اني عمي اسمي زهره صيحولي بيبي لو وحد عبالك صديقتكم .. اي ياعيني عود كليلها تجي يمنه خوش

ريم بضحكه: اصلا متجي البيت مدام بي ياسر وهي ويا متعاركين من قبل مستحيل تجي

زوزو : معليج انتي كوليلها بيبيتي تريد تشوفج وحبتج

ريم : أن شاء الله

اندارت ريم وكالت

ريم : اي ليان شلونج .. هاي شنو مسويه فلر لشفايفچ ؟

ليان : زينه ، اي سويت بالله مو هيج احلى شفتي مرفوعه

ريم : لا صراحه قبل جانت كلش احلى ليش هيج سويتي احس وجهج تخربط

زوزو : اي عزه ولج باع شفايفج تكول عبالك طماطات لا مو طماطات تفاح ههههههههه

وراها الكل ضحك وليان تفشلت بس سوت نفسها تلعب بتلفونها

رحاب : تعاي ريم وياي ساعديني نصب الاكل

طفرت ليان : اي اني هم اجي وياكم

رحاب : تعاي خاله تعاي

@@@@@@

فهد

راح مؤمل لبيتهم وفهد أخذ همام و بنان وراحوا لبيتهم

بنان

صافنه على الطريق واني اشوف الناس والعالم
مجنت متوقعه هيج راح يصير بية
اهله شنو ردة فعلهم شنو راح تكون
يارب ساعدني مسويت هالشي الا علمود اكون بأمان
زين خواتي وامي ميدرون

دمعت عيوني واني صافنه واتذكرهم
هسه شلونهم
شسوه بيهم جمال
لازم اتحمل

هي فتره وهالزواج شكلي ، حتى احمي نفسي هم
فهد تعب وياي حيل .. لازم اتحمل هالفتره لازمم
حتى ارجع لامي وخواتي

اباوع دخلنا منطقه يعني حلوه وبيوتهم هم كلش حلوه جانت شوارعها تجنن وتلمع من النظافه وكل بيت شكبره شكده والجمال والزرع مينوصف ورا دقايق

دخلنا من باب جبيره انفتحت
فكيت حلكي من الصدمه شنو وين اني خاف جاي احلم

بنان : شنو وين جايين احنه ؟

ضحك فهد : لبيتج يا زوجتي

بنان : هذا بيتكم ؟

ضحك همام ع شكلها المصدوم : اي هذا بيت العائله الكريمه ، من هسه خويه اكلج تحضري شتشوفين اسكتي ، حالياً اهم شي لازم تكون عندج ثقه بنفسج من تطبين لتبينين خايفه لو شي بالعكس بثقه حتى لحد يعني يحس اكو شي غلط وان شاء الله خير
ضليت صافنه ومركزه بكل كلمه كالها همام

ورا دقايق طبينا لكراج البيت وطبكنا السياره ونزلنا
جتني رجفه ب ايدي ومداعرف شسوي
طب همام الاول

حجى فهد : بنان ، لتنسين هالشي لحمايتج ومصلحتج لتخربين كلشي سمعتي شكال همام ؟
هزيت راسي

طب هو أول شي وراه اني
وكف الكل مصدوم مني ومنو اني

رحاب تهمس لريم : منية هاي عزه

ريم : والله يمه علمي علمج

مريم جتي ولازمه فرح : اكول هاي منية

ريم : استغفر الله هسه لو اعرف اكوللكم اكيد
نزل ياسر يركض عالدرج واجه يم ريم : منيه هاي الحلوه

ريم : يااااسرررر

ياسر : شبيج عمي شو وخري خل اشوف صماخج شكبره

كام وكف محمد وكال ب استغراب : منو ؟ عرفنا عليها ؟

ضليت صافنه واباوع عليهم بس مبينت خايفه بس اكو وحده جانت تباوعلي بنظره ماعرفت اوصفها بس رادت تاكلني الا شوية شبيها يلا خاف مستغربه حقها

حجى فهد : همزين كلكم موجودين ما اريد احد يسألني ليش وليش وشلون تعرفوني زين اكره الملحه اني وهاي كدام الكل حكول هالكلمات وانتوا مجبورين تتعايشون ويه الوضع خوش

زوزو : عزه بعينك ولك دحجي

تشابكت اصابعنا سوا وكال كدام اهله : بنان مرتي
همام جان مسوي روحه راجع من الشغل وصادف جية فهد ويمثل مصدوم الاخ

عاط ياسر : مرتتتتتككككك شنو شوكت عرست لا زفه لا حنه

خزره فهد وكمل : ماريد اي احد يسألني هاي مرتي واذا اشوف احد مسها بكلمه لو بفعل لو بأي شي ضوجها لو قهرها انتوا اهلي صدكوني حتشوفون فهد ثاني

تعاي مريم تعاي ريم

راحن ريم ومريم

فهد : اخذوها لغرفتي فوك بين ما اتفاهم ويه اهلي
صعدوها فوك

وفهد ضل جوا

جمانه بقهر : لج شفتي كله بسببج شوفي شلون طلع متزوج وانتي مكدرتي تسوين شي محصلت منج غير اجيبه واجيبه تفضلي جبتي تزوجتي لا

حطت ليان ايدها على حلكها تريد تبجي من القهر
صاح محمود : يابه احنه نترخص نروح نعوفكم وية ابنكم فهد وعيب من عدنا نضل كاعدين بهيج موقف واحنه هم عفنا ايمن هناك حنرجع يمه

فهد : لا عمي همزين الموضوع صار كدامكم حتى تعرفون ومتنصدمون وتفسرون الموضوع بغير اشياء هاي مرتي وهاذهوه والكل مجبور يتقبل الوضع
سكت محمد من الصدمه ورحاب دمعت ومحد يعرف شيسوي وزوزو فرحانه وتضحك على ليان

طلعت اول وحده ليان لسيارتهم وهي تبجي وتدمع بس من صدمة الكل محد انتبه الها وترخصت جمانه وطلعت ورا بنتها وزوزو تضحك ومكيفه

عاط محمد : بدون علمي ليش لك احنه مو اهلك ليش مكلت ليش محجيت شصار لو سوينا الك عرس وفرحنا بيك كلنا وهاي امك لك انت ليش هيججج
حجى فهد : بويه انت على عيني وعلى راسي
وباس راس أبوه

وكمل : وانتي يمه على راسي وبطن عيني وباس رأسها وكمل ، اني تزوجت وماريد ابرر لو احجي اي شي انتوا مجبورين تتقبلون هذا الوضع وهاي مرتي تعرفوا عليها شوفوها وكلت الي يحجي عليها لو يمسها بحجاية تطلع شخصية ثانيه .. هسه اجيبها واعرفكم عليها ليش انتوا هيج ضايجين منها مشفتوا الحقيقه ولا تعرفتوا عليها ولا شفتوا اخلاقها

بجت رحاب : ليش مكلتلنا عليها خطبناها الك حسب الأصول ليش هيج تزوجتها من ورا ظهرنا ها لك انت اول فرحتي ليش مخليتني افرح بيك بعرس واتباها بعرسك كدام هالاوادم ليش هيج سويت ها لك اني ممعترضه عليها بس انت شبيك ليش هيج سويت فهد

مسح فهد وجهه بعصبية وكال : يوم اني مو كلت ماريد أحد يسألني على شي هاذهوه تقبلوا هالشي واني صاعد هسهه

محمد : اوف منك فهد اووووففف

ياسر فاتح حلكه ومصدوم ركض ورا فهد واجه وراهم همام

ياسر : لك ها سيادة الضابط طلعت متزوج واني مادري

فهد : اي متزوج عندك مانع

ياسر : اي اكيد عندي مانع

فهد : ياسر وخر من كدامي مو وكتك " كمل طريقه لغرفته وعافهم "

ياسر : تعال لك المعقد اشرحلي شصاير

همام : انجب معقد بعينك ، يعني ششرحلك كلشي صار كدامك وكدامي نفس الشي هذا فهد انت متعرفه من زمان جان غامض ومتعرفله حاجه لتنصدم من هيج شي

ياسر : قصدك مو غامض خنوسييي

همام : نفس الشي يلا اروح انام احسنلي

ياسر : تعال لك شنو تنام ومرت اخونه نعوفها

همام بكلبه يريد يضحك: تعبان واريد انام مابية حيل احد

ياسر يهز ايده : تهي بهي ويكول ليش تصيحولي معقد

بس والله هي حلوه حيل هيهيهيهيهي

@@@@

بنان

اجوي علية البنات وجهم مبتسم ما بينوا شي بس جنت اعرف مصدومات من حركاتهن ضليت ساكته إلى أن كالت ريم

ريم : هاي غرفة فهد تعاي شوفيها

طبينا للغرفه جانت غرفة مأثثه اثاث كامل ولون نيلي و بيجي هيج الوان تقريباً والأثاث كلش حلو ويجنن ضليت صافنه

ريم : اول شي اني ريم اخت فهد الصغيره عمري 17 وصف خامس علمي

ابتسمت وكلتلها: حلوو

مريم : اني مريم حماتج مرت أخو فهد " حسن " عمري 24 هو زوجي شغله الصبح يرجع بالليل ، هو اني متخرجه بس ما اشتغل يعني

بنان : ليش

مريم : غير هذا حسن ميقبل

باوعت علية وابتسمت : واخيرا مرت فهد الي محد جان يعرف منو حيتزوج هذا الكائن الغريب

ضحكت : اي فعلاً هو غريب

ضحكت ريم بفرحه: مو لازم عرس وهيج احس حبيتج وهسه امي هم تحبج صدكيني بس هي هسه جوا هي وابويه متعصبين من الوضع ومصدومين بس هسه بس اليوم لو يومين و يتعودون وتشوفين حنيتهم

بنان : أن شاء الله

مريم : يلا اني حروح انيم هاي فرح متعوده تنام الظهر وهي خليتها بالغرفه تلعب بالتلفون لج لو تدري عمها فهد متزوج الا تلزك بيج مثل ما لازكه لياسر المكرود واجي يمكم خوش

طبعاً ياسر رادار راح ركض خابر حسن وحسن مصدوم ميكدر يعوف شغله وخبص الكل مضل احد ما كله

فات فهد للغرفه وكال

فهد : من رخصتج ريمه اريد ابقى يم مرتي

ضحكت ريم : اي عيني ابقى ليش متبقى طالعهههه يم زوزو احسن

ضحك فهد سد الباب

أندار علية وكال : شحجوا وياج ؟

ابتسمت وكلت : لا والله حبابات حيل

فهد : شوفي بنان اريدج تبدلين وتنزلين جوا حتى تسولفين ويه ابوية وية امي شوية بلكي يعني شوية يتعودون لو يحبوج

بنان : بس اني معندي هدوم مال بيت مجبت وياي خليناهن بهذاك البيت

فهد : اصلا عوفيهم هناك راح أصيح ريم تنطيج تمام وباجر اطلعكم روحو اشتروا ملابس انتي وهي وية امي هم اخذها

ابتسمت وكتله : عائلتك حلوه بس مصدومين

ضحك وكال : شترديهم بويه اكيد مصدومين بس صدكيني بعدين حتحبيهم وتتعودين عليهم بذات زوزو هسه مصدومه جوا وريم نزلت يمها

بنان : منو زوزو

فهد : هاي بيبيتي ام ابوية " ضحك وكمل " اسمها زهره بس احنه من صغار متعودين نصيحلها زوزو وهي متقبل وتضل تعيط ، راح تحبيها حيل

بنان : اوك

التفتت اباوع للغرفه

بنان : ها اليوم وين حنام اني

فهد باوع : عالجرباية وين يعني

بنان : لا يا جرباية اكيد هذا مكانك اني حنام على هذيج القنفه

جانت بزاوية يم الشباك

فهد : لا بويه شبيج تردين تكسرين ظهرج يا قنفه اني انام بالكاع عادي

بنان : لااا اني انام بالكاع

فهد : كلت اني أنام بالكاع وكافي سدي الموضوع لان البراسي اسوي يا ست بنان اني فهد مو حي الله
صغرت عيني وكتله : واني بناااان

ضحك علية وكال حروح أصيح ريم

هزيت راسي بضحك : تمام

ورا ربع ساعه اجتي ريم وشايله دشداشه بيدها بس كلش حلوه هي مثل الفستان

ريم : هاج بنان هاي دشداشه فهد كلي انطيها

بنان : اي والله شكراً باجر حيطلعنا نشتري ملابس مو
بس اني

ريم : صدكك ؟

بنان : اي والله .. " ابتسمت وكملت " يصيحلج ريمه
ضحكت وكالت : اي اي من زمان من اني صغيره

بنان : كلش حلوه علاقتكم كأخ بأخته ربي يحفظكم

ريم : تسلمين حبيبتي يلا اخليج على راحتج ومن تحتاجين شي غرفتي اخر شي فوك تعاليلي تمام

بنان : تمام ، شكراً مرة ثانيه

ضحكت ريم : يابه دسكتي شكراً وشكراً هي دشداشه
باوعت ع نفسي وضحكت

طلعت ريم وضليت وحدي اباوع الغرفه كلش حلو اثاثها وتناسق الالوان عنده ذوق و جان اكو حمام وكلشي كأنما نكول جناح كامل وعازل نفسه تماماً عن أهله وحده وكلشي مجهز

رحت بدلت ملابسي جانت الدشداشه شوية مخصره زياده بس كلش حلوه لونها وردي فتحت شعري امشطه واباوع لنفسي وشعري الطويل وأتذكر امي من جانت تمشطلي وتكلي لو تموتين ما اكصه الج مع العلم يعجبني اكصه بس مجانت تقبل

تذكرت فهد البارحه كلي اخابر امج بس مخابرها جان مخبوص وملتهي حقه بالليل احجي ويا اخلي يدك عليهم اريد اسمع صوت امي

فززني من افكاري صوت فهد

فهد : شنو تنزلين هيج ؟؟؟

بنان : ا ا ايي هيج ليش اكو شي غلط ؟

فهد : اي اكيد اكو شي غلط هاي دشداشة لو فستان لو شنو بالضبط بعدين اصلا هي حصرر عليج واخواني جوا مستحيل اقبل غيريها

بنان : شلون اغيرها والله عيب يعني كلسع اطلب من ريم فشله انت مو كلت باجر اشتريلج هي بس اليوم

فهد : بابا شداحجي داكول ممنوععع هيج

بنان : انت مو كلت زواجنه شكلي هاهيه خيليني البسها وحتى عجبتني هي شنية بس اليومم حباااابب

فهد من سمعها كالت حباب بهتت ملامح وجها ولزمته الضحكه وأشر بتهديد: بس اليوم

بنان : بس اليوممم والله

فهد : يلا لبسي شال حتى ننزل جوا الجماعه يردون يحجون وياج وزوزو ذبحتني

بنان : اي هسه

لبست شالها ونزلوا جوا

@@@@@

جمال يعيط : اموتج اذا فكيتي حلكج بكلمه

الهام : شبيك يا رجال تخبلت والله اهج من البيت واخذ بناتي ولا تشوفنا بعد

جمال : انتي سكتي لج ما اسمع صوتج هذنييي اني اعرف شلون اتصرف وياهم ويا ويلج اذا اسمعج حاجيه شي لاهل الولد رزان راح يخطبوها وماريد اي حجاية منكم قسماً عظماً اذا اسمع شي متلومون الا نفسكم

روان : لك انت شنو من انسان والله اذا سويت شي برزان مستحيل اسامحك ، واشتكي عليك هم لا عبالك تخوفنا بصوتك العالي

جمال : هاي عليمن تشتكين كح*** اذا سويتي شي اخليج متعرفين ليلج من نهارج رواننننن اني جمال

رزان تبجي : معليككك عوفنا بحالنه اذا متريدنا نطلع ونعوفك كافي عذبتنا

جمال : هههههاي تطلعون ؟ لا عيوني ميصرفلي هيج الا بفلوس وصراحه انتن فايداتني ومستحيل اضيع هيج فرصه

الهام : لك حرام عليك انت ابوهم لك انت كلبك وين متكلي شنو من انسان انت

ضربها جمال كف قوي وكعت بالكاع
وهنا روان ما تحملت

روان : والله العظيم وهاي اني حلفتتت اذا تسوي ألنا شي حتشوف شي ميعجبك يا جمال واشهرك بين الناس والمنطقه

جمال : تشهريني ؟؟؟! هههههاي يا عيني بعدج متعرفين منو جمال واذا حابه نخلي مصيرج مثل بنان يا حلوه

تعصبت روان وراحت صعدت فوك ورزان كاعده يم امها تدك وتلطم

جمال : مثل ما سمعتوا بخصوص الخطبه انطيتهم كلمه وراح يجون بعد 5 ايام تقريبا وماريد اي كلمه منكم ورزان تنخطب وراسها قبل رجلها سمعتواااا ؟
ماسمع منهم رد وطلع وعاف البيت

رزان : يمه والله صوجج شلون هيج حجيتيله

الهام تبجي : مادري مادري دخيلك ربي شديصير بينا والله راح اموت

رزان تبجي : هاهيه يمه مدام جمال كال كلمه يسويها واني صدك حتزوج

الهام : والله اني ماقبل هالزواج يصير وأشوف شلون

رزان : راح يصير وهسه تشوفين

الهام : اوف ياربي ساعدنا وطلعنا من المصيبة الثانيه كل يوم احنه بمصيبه .. وكون بعون بنان وساعدها وين ما جانت وبأي مكان يا الهي

.....................................
العصرر

بنان

ياسر : يااا هلا بمرت اخويه اي تعاي نتناقش
ضحكت بنان : اهلا بيك

رحاب : شكد عمرج ؟

بنان : 19

رحاب : يا صف

باوعت لفهد وكلت : اني طالبة سادس بس مخلصته وقبله جنت تاركه

رحاب : اهاا

محمد : لعد ابوج وين امج يعني اهلج ؟

حجى فهد : هي يتيمه وعايشه بيت خالتها و يعني هسه بيت خالتها سافروا للخارج واحنه تزوجنا

محمد : يعني لهذا السبب ؟

فهد : اي

رحاب : تعاي ماما تعاي اكعدي يمي

راحت بنان كعدت يمها توها

صاحت زوزو : تعاي يمه بنان يمي اريد احجي وياج
ضحكت بنان وراحت لزوزو

زوزو دمعت وباست رأسها لبنان : يمه شوف شلون حلوه لك فهيدان عندك ذوق ابو الوصخ .. اوف يا يمه اسمج ذكرني بأسم عزيز على كلبي

بنان باست زوزو : لا بيبي لتبجيني ماتحمل تراا

زوزو : روحي يمه شكد عيب من رحاب روحي يمها أنتِ جنتها وأشوف هذا فهد وين لكاج شني هالكيكه هاي

بنان تحجي ويه رحاب : خاله كلشي صار بسرعه بسرعه اعذرينا والله احنه هم اسفين يعني

دنجت رحاب وابتسمت : اسمج يشبه اسم بنت سراب

ابتسمت بنان : منية سراب

رحاب : اختي الي توفت

بنان بحزن : الله يرحمها

وفهد ومحمد مندمجين يسولفون وفهد يحجيله تفاصيل جذب ويعني ديسولفله حتى محد يشك

ياسر : بنان تعرفين تطبخين

بنان : اييي انواع الاكل

ياسر : اللههه هاي المرة المعدله .. تعاي ولج مريم وين فرح

مريم : نايمه فرح

ياسر : اي بنان عرفينا أكثر عليج عندج خوات لا
ضحكت بنان بتوتر وفهد ضل يباوعلها بحذر : اي عندي اثنين بس راحن يم بيت جدي يعني

ياسر : اهااا كم أعمارهم

ريم : ياسرررررر

سكت ياسر وكال : اي اللههه شنو ليش هيج عيونج حلوه

بنان : هنه هيج من صغيره

فهد ضل يخزر ياسر وياسر افتهم وضحك

ياسر : اني اعلمكم خلي اخرب هالجلسه الجميله واجيبلكم كائن تتخبلون عليه اوي يحبايب ئلبي
راح ياسر فوك وكعد فرح

ياسر : ولج فروحه كعدي كعدي عمج فهد جايب عروسه مرته وجاي

كعدت فرح: فهد ادا ( اجى )

ياسر : اي ديلا كومي اشوفج العروسه شلون حلوه
فرح : لعد بابا وينه

ياسر : معليج بأبوج تعاي خلننزل ابوج يجي بالليل
نزلها جوا وهي شافت فهد وصاحت وهي تركضله

فرح : عمووووو فهددددددد

ضحكلها وكلها: لك يا هلا بفروحتي وحظنها

فرح : وين العروسه

فهد باوع لياسر : انت

ياسر : اكيد اكيد

فهد : هاي العروسه

ضحكت وراحت لبنان : نتي سسمت ( انتي شسمج)

بنان : اني اسمي بنان .. وانتي ؟

فرح : اسمي فلح ( فرح )

بنان : يلا لعد خل نصاحب ونصير صديقات ومدت الها الاصبع الصغير

فرح مدت الها الاصبع الصغير عود يعني تصاحبوا

جرتها فرح وكالت : تعالي تعالي اشوفج البيت وراحت جابت مريم وجابت ريم وكلتلهم تعالوا نطلع نشوفها بيتنا

ياسر : اي بس بقت علية مثلاً

نزل همام من الدرج : شلونكم يا جماعه .. شلونج بنان

بنان : تمام

فهد باوع لهمام بنظرة وهمام ابتسم وطلع راح لاصدقائه

ضحكت بنان وكالت : تعاي بيبي ويانه نطلع برا

فرح : اي جيبي ذوذو تكعد بالمدوحه تحبها ( جيبي زوزو تكعد بالمرجوحه تحبها

بنان باوعت لفهد يعني اطلع وهز راسها اله ب أي
وضل فهد يسولف ويه امه وأبو

زوزو : اي يمه بنان اني مشفت شعرج

ضحكت بنان ونزعت شالها بما انوا مجان اكو احد بالطرمه وكلهم بالهول

بنان : هذا شعري

زوزو : يمه صلوات عالنبي شنو هالشعر هذا عيني بارده عليج

بنان لبست شالها : حبيبتي بيبي هذا شعري ماعرف بين خواتي هيجي اني مميزه بشعري سرح وطويل وناعم مع العلم ما استعمله اي شي

مريم بضحكه: مسودن فهد

ضحكت بتوتر وهي من جوا فشلانه وخجلانه نفس الوقت

ريم : حروح أخذ فرح لغرفتي تريد حلويات كل يوم تريد نساتل

فرح جرت بنان : تعاي تعاي ويايييي فودددد هسه ليم تنتيج نتله ( تعاي تعاي وياي فوك هسه ريم تنطيج نستله)

بنان : يلا امشي

دخلوا جوا وبدت ريم تشوفها الغرف
ريم : بنان هاي هنا غرفة ياسر وهمام نفس الغرفه واني غرفتي هم اخر شي وكبال غرفتي غرفة مريم وحسن وهسه حسن بالليل تقريباً ساعه تسعه يرجع من شغله

وتعاي اشوفج غرفتي

فرح : هاييي كلفة ليمه ( غرفة ريمه )

ريم : شوفي بنان هاي جربايتي المتواضعه وهذا كنتوري وهاي هنا اقرا وضلت تشوفها الغرفه
وبنان فرحانه بس بنفس الوقت ضايجه

صاحت رحاب : وين جنتي عيني ماخذيها فلاحه ملاچه اريد احجي وياها نشوفها

ريم ضحكت : هسه حنطي نستله لفرح وانزل نزلي قبلي

نزلت بنان بتوتر وراحت كعدت

ابو فهد يباوع لفهد ومبتسم كال : والله انت كارثه
ضحك فهد: صدكني سويت كل هالشي علمودي يعني مكدرت تروح من ايدي

حظنه وباسه: الله يوفقكم واني ماكدر أعارض زواج ابني لو اسوي شي وهاهيه

ياسر : اي عيني لتعارض ، اني هم اريد اتزوج مو بس فهد يتزوج

نزلت ريم : اي عيني تزوج احد لازمك

ياسر : انتي سكتي

رحاب : يمه احنه حجينه من فهد وافتهمنا كلشي
باوعت بنان لفهد باستغراب وهو ابتسملها: هههه اي خاله

رحاب : والله ماكدر اكول غير الله يوفقكم ، عيني اوصيج بأبني هذا فهد ويعني شوية مزاجي ومخبلني شيسوي لو هاي اصبري عليه مهما يكون زوجج

بنان : أن شاء الله

رحاب : تعاي چنتي اليوم تسوين وياي عشا

زوزو طبت من برا هي ومريم : اي عينييي واني هم اجي وياجن بالمطبخ يم مرت فهودي الغالي

باوعت زوزو لفهد : على عنادكم كلكم تصيحلي بيبي مو مثلكم عديمين الاخلاق

فهد بغرور: بس زوزو احلى وما اغيره للموت

زوزو : وجعععع

فهد : بكلبييييي

زوزو : لا يمه اسم الله عليك تعال اسولفلك لككك
ضحكت مريم على زوزو ساعه تكول اجي وياكم للمطبخ ساعه تكول اجي يم فهد

فهد : اي سولفيلي زوزوتي

زوزو : انجب اول شي وثاني شي لك ليان طك عدها عرج من عرفتك متزوج وطبيت هيج بهيبتك وكلت هاي مرتي وبنان يمه عين الله عليها تجنن واحلى من ليان بألف قاط لك وين لكيتها ملعون

فهد يمثل : حبيتها ولج زوزو حبيتهاا

زوزو : نزل عليك ابو الوصخ

فهد : فضحتيني يم البنية كلتي ابو الوصخ قبل شوية شلون تخجليني هيج يا زوزو فد فشلههههه
زوزو : أني اعلمك ابو الوصخ مداجذب اني صدك انت ابو الوصخ

فهد : هذا الحجي مو كدام بنان زوزو

زوزو بغرور: افكرررر عود

فهد : عشتووو تفكر

@@@@@@@

ياسر واكف بالمطبخ يم امه وبنان

ياسر : اي بنان سولفي شو خرسه

بنان : لا اني مو خرسه مم بس يعني ماعرف شسولف
ياسر : اي احجيلي ايشي يعني صدك انتي شلون هيج ضعيفه

لزمت رحاب الچفچير: ياسر تنكلع من فوك راسي احسلك دوختني حيل

ياسر : اني هنا يم بنان ، مو صح بنان

بنان : خاله خنسولف يلهينا شوي المطبخ كئيب

ياسر : اي واني الراحه النفسيه هيهيهيهيي

ضحكت بنان : اي فعلاً.. انت يا صف

ياسر بغرور: شنو يا صف قصدج يا مرحله

بنان : يا انت يعني كلية ؟

ياسر : اي كلية

طبت ريم : وياج الموهنديس ياسر محمد

بنان : اللهه شكد حلوه الهندسه

ياسر : تلعب ستين نفس يا حلوهه كل ماطب للكلية تجيني لعبان نفس اصلا

ريم : ليغرج بنان جذاب اصلا كاتل نفسه عالروحه يدور بناتتتتت

ياسر بصدمه : لاااا كده اوي ولج اختي انتي تتهمينيييي

اليوم اعلمج منو ياسر

بنان

وهجم عليها يكفش شعرها وتكفش شعره واني رحت أفزع بيناتهم وكل واحد عطوبه طايره وخالتي ( رحاب ) تعيط وميفيد

اخر شي طب فهد وعاط : شصاير هنا شبيكم مطبخ لو الحرب العالميه الثانيه

صاحت رحاب : فهد طلع هذوله خبلوني ميصير اضل وية جنتي يعنيييي شلون اني اليوم

ريم : اي عيني ضلي ضلي اصلا رايحه أقره باجر خميس والله كريم الجمعه طولتتتت

ياسر : ارووووححح يم زوزو احسننننننن

فهد عاط : امشوااا عاد شمسوين دباع المواعين تهي بهي عبالك عدنا اطفال حديثين الولاده

ضحكت على هاي كلمته وكلت : لا خطيههه واللههه
ضحك فهد : يلا عيني ام فهد احجي ويه جنتج

رحاب : اي تعاي يمه تعاي احجي وياج

@@@@@

ورا ما تعشوا وكضوها سوالف ما تخلى من زوزو وفرح وخلصوا عشا سمعوا صوت مزيقه بالباب واجه اتصال لياسر من همام

همام : حبيبي ياسر كول لأهلك حسن عرف وجايب مزيقه ويريد يحتفل بأخو

أنصدم ياسر وسد الخط : اخواني جايبين مزيقه ومكايليلي اليوم انعل و **

مكمل الحجايه الا بكفخه من محمد على رأسه
محمد : انجب لك عينك عينك

ياسر : اخخخخ راسي والله مو قصدي بس هيج اوويييييي دخل اطلع اركص وها وها

فهد ضل يباوعلي واباوعله وأشوف شلون انخبصوا وطلعوا برا ويركصون وفرحانين

باوعت عليه وكلت : هذا زواج شكلي

فهد حابس ضحكه: ويه اهلي غير شكلي والله اليوم حسن خلاني معرس من صدك امشي نطلع بس لبسي صايه فوك دشداشتج هاي دقتني ..

نهاية البارت
يتبع ..

لاتنسوا تصويت

الئ اللقاء يا اعز العابرين في قلبي ♡ .

الكاتبات دينا & نور