جانت بنان تبچي وحالتها حاله
فهد بخوف : بنان شبيجج ؟
وهي مستمره تبجي
حضنها بين ايديه وهو يهديها ويهمس الها : شبيج بنان احجي ليش هيج دتبجين
دفعته بنان ومسحت دموعها وكالت من بين بچيها وشهكاتها
بنان : الدوا بسرعه
ركض فهد وراح جاب علاجها وانطاهيا
فهد : احجي بنان شبيج شصاير لتخبليني اني منا متخبل
مسحت دموعها : ماكو هيج
باوعلي وحجى بحده : تحچين لو شلون ؟
بنان : شحچي ؟
فهد : شبيچ بنان دتستغبين براسي احچي بسرعه شكو
بنان : ماكو شبيك ماكو كلتتتت ماككوو
فهد : كلت هسهههه تحچين ترى اني فهد مو حي الله
بنان " بچذب " : خابرتني امي وكلتلي رزان نخطبت
فهد : تبچين هيج وتتخربطين ؟
بنان : اي هاي اختي لعد شلون
فهد : ممقتنع
بنان : تمام .. اريد انام
فهد : ها تردين انام يمج ؟
بنان : فهد جاي تتمادى وياي مراقب نفسك
فهد " يقلد " : فهد جاي تتمادى وياي مراقب نفسك .. بس ترى ماصدك ويجي يوم وانتِ بنفسچ راح تحجيلي
بنان : تمام لتصدكني .. اريددد انام
فهد: اي ديلا تدني خل انام بصفج
بنان : شبيكك اقصد من اكول اريد انام يعني اسكت
فهد : اسكتتت ؟
بنان : لا احجي
فهد : شليتيني شل
غطيت راسي وابجي بصمت ومكدرت اكول الفهد لان محيسكت وحصير مشاكل ..
@@@@@@
فهد
هالفتره ركزت ع موضوع بنان واستمريت ابحث بالموضوع وادور عنهم ومستمر وما وكفت ولا دقيقه بس اللي چان يبين عندي ولا غلطه وبنان وخواتها جبت معلوماتهم .. چانت شكوكي كلش قوية بأنوا همه البنات المفقودين .. بنات عمي ونفس الوقت بنات خالتي
اللي انفقدوا من سنوات طوال .. رجع املي انوا الكاهم هسه ! .. الدنيا عجيبه .. بلشت ادور عنهم معلومات بس هم مجاي الكى اشياء تثبت الي هالشي
ومن ناحية ثانيه جمال اللي مجاي اكدر اوصل اله بس مستمرين كلنا ندور معلومات عنه وياي مؤمل يساعدني
وبنان .. ماعرف شحجي عنها بنان
هو اني يعني ما انكُر هي مو حلوة لا .. هي ملكة جَمال هههههَ عيونها الكُبار السود و شعرها الحرير الاسود الطويل
بنان مو بس من ناحية الجمال .. واعيه بعمر صغير
عقلها كلش جبير ومتفهمه وهذا بسبب الظروف اللي عاشتها .. بنان قوية لدرجة قبلت أعقد عليها وتنتظرني حتى اساعدها وترجع لخواتها .. اول بنية من بعد ( زينه ) احجيلها شي عني .. ارتاحلها بدون سبب
وجهها مجرد اشوفه انسى تعبي واضل افكر .. شلون راح اطلع هالبنية من هالموضوع .. بنان قوية لدرجة فوك هذا كُله مريضة قلب !
اهخخ شلتني شل هالبنية هاي .. كُل تفكيري صار بيها وشلون اطلعها وشلون اوديها وشلون راح الكى جمال وهذا الهدف الاول اذا صار راح ترجع بسهوله .. ونفس الوقت ابحث وادور معلوماتها
جبت فراشي وفرشت جوا بالكاع كبالها
تمددت واني اباوعلها .. وجهها بي شي يجذب الواحد يخليك بس تريد تباوع .. استغفر الله فهد شبيك زواج مؤقت وشكلي لتنسى وين عقلك ، ضليت فاتح عيوني وماكدر انام وباجر عندي شغل شسوي هسه
ضليت اتكلب واريد بس انام ماكو وكأنما النوم طار من عيني ، باوعت للساعه چانت ساعه 4 الفجر
كمت ع صوت اذان الجامع ونزلت جوا اتوضى حتى اصلي واروح للدوام
@@@@@@@
الصبح ساعه 7
بيت فهد
صاح محمد : ولكم وينكم ياسررر .. ريممم
فهد : هسه يجون يابه ، حرفياً اكثر ثنين يتأخرون
محمد : يشلعون الكلب .. يلا اني طالع مع السلامه
رحاب : الله وياك بالسلامه
نزل حسن : صباح الخير
فهد : هلا صباح النور
حسن : شبيك فهيدان مو على بعضك
فهد : هيج والله شغل
حسن : شنو الشغل ؟
فهد : هيج عسكري ميفيدك انت موظف
حسن : خاب دطير يا عسكري هذا .. خاف اللي ابالي ؟
فهد : اخي العزيز اسكت لا اركَع ماعون البيض بوجهك
حسن : ولك انه اخوك تركع ماعون بوجهي ؟
فهد : قلة ادب ولك اني اخوك الچبير شبسرعه زوجت وخلفت تهي بهي واني توني متزوج
حچى بكلبه : متزوج ؟ الله لك شلون زواج هذا
حسن : قل اعوذ برب الفلق ، قل اعوذ برب الناس ولك لا تطكنا بعين
فهد : لتخاف العندي كافيين مو مال اطكك بعين
ضحك حسن وهو يشرب چاي
نزلت بنان من فوك وهي توها كاعده
بنان : صباح الخير
ردوا : صباح النور
راحت وكعدت بصف فهد : خاله محتاجه شي اساعدج
رحاب: لا خاله تسلمين خلصت كلشي دا انتظر هذوله المگاميع ينزلون ويفضوني عاد .. ولككم تعالوووو لا تتأخرون
بنان : هسه ينزلون يعرفون وقتهم
حسن : يلا اني رايح
فهد : دقيقه اوصلك وياي
حسن : تمام انتظرك برا
فهد : بنان لتنسين العلاج خوش تعرفين اني وين اخليه
ابتسمت وردت : اعرف اعرف ولا يهمك
فهد : محتاجه شي قبل لا اروح
بنان : سلامتك
طلع فهد ورا حسن وراحوا لشغلهم
ورا دقيقه سمعنا اصواتهم لا غير
نزلت ريم تركض مستعجله
ريم : ولج بنان شفتي كتاب احياء هنا ؟
بنان : اي هذاك عالقنفه
ضربت كصتها : استغفر الله شلون بية اني صارلي ساعه ادور عليه طلع هناااااا
بنان : ههههههَ
ريم : اي صباح الخير
ضحكت بنان : صباح النور
ريم : اليوم عندي امتحان احياء ولازم هاي اراجعه
بنان : محتاجه شي اساعدج
ريم : لا عمري خلصت كلشي هي بس مراجعه
نزل همام سريع يركض
رحاب : ولك همام وين
همام : يمه تأخرت والله مو وكت ريوك يلا إلى اللقاء
رحاب : لك تعال لكمه وحده هسه هذا المن مسويته اني مو اكول ما اسوي ما اسوي بنهاية اسوي
طلع همام بسرعه وراح
اخر شي اجانه صوت ياسر : ها ولج بنان شلونج .. ولكممم عمي شفتو سويچ السياره
بنان : هلا عيني تمام وانت
ياسر : تمام تمام
ريم : ياسر تأخرنا عفيه
رحاب : شفتو صارلي ساعه أصيح وابوكم صاحكم ولا يمكم انتوا
ريم : يمه غير جنه نبدل مثلا نركص فوك
ياسر : لكم ويننن السويج لتخلوني اكمز مشفتو وين
ريم : مادري ما شفته
بنان : ولا اني
رحاب : ياسر شوفه عالطبله بالصاله مو بالهول
طكها بركضه وجاب السويج
ياسر : احسني جبت كأس العالم يلا يا جماعه بايي وانتي بنان اليوم عندي كعده وياج كلها نقاش حاد
بنان : تمام استاذ ياسر بأنتظارك
ياسر : خوش
جرته ريم : لك امشيييييي " همست " هسه متريد تشوف روان ؟
ياسر : لا عمي شلون
@@@@@@
بنان
ورا ما طلعوا كُلهم صارت ساعه تقريباً 9 كعدت زوزو ونزلوا مريم وفرح جوا
مريم : صباح الخير شلونكم
زوزو : هلا عيني هلا
بنان : هلو مريم صباح النور
مريم : شنو فهد راح
بنان : اي من زمان راح
فرح : اليد بيقه ( بيضه )
بنان : كدامج يبعدي
كامت بنان وراحت صعدت فوك للغرفه بعد ما ترخصت منهم
بنان
البارحه جان يوم صعب ومينوصف كمية الانهيار وكمية الخوف كله بسبب فراس .. شلون جاب رقمي شلون عرفني الچلب الحقير شلون راح اخلص من عنده
لزمت راسي بخوف .. يربي هذا منين طلعلي هسه !
خوفه مو طبيعيه فكرت اخابر امي واكوللها ع الصار بس مادري حسيت غلط .. حياتي صعبه كلش ومداعرف شسوي منا خواتي ومنا فراس ومنا اريد اطلع منا يربي ساعدني
بچيت واني حاطه ايدي على وجهي ، إلى متى حضل هيج والله تعبت مجاي اتحمل كُلشي
لزمت تلفون ودكيت ع فهد ... اجاني صوته
فهد : شلونج بويه
بنان : زينه اني بس هاي شسمه
فهد : شسمه
بنان : اقصد يعني هيج ضجت وخابرتك
فهد : كالعاده
بنان : ايي خاف ضجت مني
فهد : بالعكس ترد روحي من اسمع صوتج يا حلوه
بنان : فهددد
فهد : عيونه
بنان : دتخوفني منك ترى بعد مادك عليك
فهد : لا بويه ليش متدكين شحسويلج قابل آكلج ؟
بنان : مو هيج بس مدري اسلوبك مو نفس قبل متغير صاير تخوفني
ضحك ضحكته التخليني اجمد يربي هذاا شبي
كلت بكلبي : عزا كافي بنان
فهد : بنان دواج أخذتي
بنان : اي والله اييي كلش دتلح عالدوا والله اخذتههه
فهد : شلون لعد لازم تاخذي الدكتورة تكول لازم التزام
بنان : تمام
فهد : اي بعد شكو
بنان : ماكو .. انت شوكت تجي
فهد : جا غير هسه رحت شنو شوكت اجي
بنان : ضوجههه
فهد : ههههههَ شسويلج ضوجه هاي كليوم احنه على نفس الرطينه
بنان : اي شسوي يعني
فهد : اني عندي شغل بنان وارجع ان شاء الله بالليل مثل كل مرة
بنان : انت مو البارحه رجعت من وكت
فهد : اي مجان عدنا شي يلا بوية مع السلامه
بنان : الله وياك استاذ فهد
@@@@@@
بالمدرسه
روان : ضايجه حيل ريم الديصير كله مو طبيعي
ريم : اكلج روان باعي منو اجه
روان : ولج هذني ميتوبن هسه اذا املخهن ميروحن
ريم : اي مو حيوانات
مروة : اسمعوا والله العظيم اذا تقربتوا النا مرة ثانيه يصير شي ميعجب
ريم : ارجعي منين ما اجيتي خوش
روان : أنتن شنو تحبون تنهانون ؟
سجى : شوفو احنه حذرناكم اذا ما تبتعدون عنا يصير شي موزين
تقدمت روان : شيصير مثلاً .. هههههههَ تضحكون والله
مروة : نضحك ؟
ريم : هو منو الجاي ؟ مو انتوا اجيتوا علينا هسه !
مروة : دنحذركم وخلوها ترچيه بأذنكم
دفعتها روان : روحي حبيبتي روحي العبي مراجيح
مروة : انجبي لج حقيره
مروة أشرت لسجى بشي وركضت سجى مادري وين راحت بس اختفت
بلشوا يتعاركون وروان وريم عدهن العركات مثل شربة المي
صاحت روان : مروة تحلين عنا لو شلون
مروة : انجبي حيوانه تحلين عنا مو انتي كل ما نجي تتعاركين ويانه
ريم : انتي نفسج جاي تندكين بينا انتي والقرده الوياج
مروة : والله بسيطه اني الكم واني اعلمجن
روان : يلا يلا ولي منا احسنلج
ورا دقيقه جتي سجى وجايبه وياها قرابة 5 بنات كل وحده شطولها شعرضها احنه نمل يمهن وكل وحده نظراتها النا عبالك كاتلين امهن
لزمتني ريم : ولج هذني شنو
روان : مادري
ريم : بوكس يشوهن حلقتنا
روان : انجبي شوفي اني العب بيهن خلقه
تقدمت وحده واكفه بصف سجى وبدت دفع بروان وروان تهلس بشعرها وتضرب بيها راجديات بس ولا كأنوا وريم جني عليها ثنين تولوها ولية بحيث وجها راح ودم
روان : وخري عني مرووووههه اني الج صبري
ضحكت : نشوف ست روان عزيزتي
واكفه روان تباوع لمروة ماحست الا بوكس ع خشمها ( مو بنات زلم )
حجت بكلبها : ولج روان خشمج راح عزهههه دممم
هجمت عليهن تضرب بيهن والتمن البنات عليهن وحده دافع والثانيه تنضرب وريم مكدرت تسيطر عليهن لان اثنين وهي وحدها وروان خوب 3
عاطت المعاونه : ادبسززيات شنو هاي العركه انتن شنو متفهمني كبل يلا للإدارة
مسحت دم اللي على خشمها وجاوبت
روان : ست شوفي بعينج شلون جوي علينا وكتلونا
المعاونه: بسيطه حسابكم يم المديرة امشن كدامي
رحنا مجموعه شكبرها شكدها للإدارة
ريم : ولج روان عزه راسي
روان : اسكتي اني خشمي يمكن انكسر
ريم : عزهههه ولج يمه
روان : طاحظج شو صرتي جبانه يمهن
ريم : ماشفتيهن شسون بية مو كلتي العب بيهن خلقه وينج
طبوا للإدارة وكامت المديرة : وتالي وياجن اني كولولي وتالي تردون فصل صدكوني افصلكم من المدرسة نهائي
روان : ست اسمعي من عندي واحكمي
مروة : ست والله شتحجي جذابه
المديرة : اشوف احجي عيني احجي
روان : ست جنا كاعدين وهاي ريم وياي جوي علينا بدينه نحجي ومروة تكول ابتعدوا عنا ومدري ايش من هذا الحجي صار شوي كلام حاد بيناتنا تعاركنا من العركه اختفت هاي سجى وراحت جابت بنات مدري منين هذني وبدن يضربن بينا واحنه بس اثنين
مروه : ست جذابههه جاي تتعدى علية
ريم : اكول بس انطمي ماكو غيرج جذاب
لزمت راسها المديرة وكالت : باجر كل وحده تجيب ولي أمرها طفح الكيل منجن بنات الخامس راح اهج من المدرسه اطلعن برا وياويلجن اشوف مره ثانيه عركه واني نبهت ترى افصلكم كلكم ومعلية هاي الصح وهاي الغلط كافي عاد امشننننننن اطلعننننن
طلعنا وحده تباوع للثانيه بحقد راحن هنه بجهه واني وريم رحنا بجهه ثانيه
ريم: امشي نروح للحمامات
روان : خشمي ولج ريمم دينزف
ريم : عساس اني خلوا بية عظم صاحي
روان : طبهن مرض بس اني
ريم : شنو شبيج
روان : باجر منو اجيب مستحيل اجيب جمال
ريم : امج
روان : ماريد امي اكيد راح تحجي لجمال شصار وياي وعركه حيبطلني ويلكاها من يمه
ريم : راح اجيب ياسر عود ولي أمرنا ثنينا
روان : انجبي ريم شنو هالمسلته
ريم : اي هاذهوه وهي شمدريها قابل المديرة
روان : ماريد ياسر ولي امري هيهيهيهيهيييي لا حبيبتي
ريم : مو محد موجود غيره همام بشغل لو يموت ميجيني واخويه فهد هم بشغل وحسن يرجع بالليل من شغله بابا هم لج همههه كلهم بالشغل
روان : لا عفيه شلون
ريم : انجبي واسكتي ماكو غير حل
روان : ايييي بس ماريددد ياسرر يجي
ريم : شبيج مو كتلج ماكو احد غيره
روان : راح اتخبل ياربيييي
ريم : امشي نروح لصف
روان : اهوووو حنلكى ام الرياضيات الغثه
ريم : لعد خل نبقى هنا هو آخر درس خيسجلونا غياب عادي
روان : افففففف
@@@@@@
بيت جمال
الهام : رزان ولج رزان
رزان : خير يمه
الهام : امير راح يجي العصر
رزان : اي شمدريج ؟
الهام : غير خابرني
رزان : ها خوش ويعني شسوي
الهام : غير بدلي هاي ميصير هيج
رزان : ليش شبيها هدومي
الهام : ولج خطيبج راح يجي تطلعين بذني
رزان : اي هاذهوه شسويله هو بجذب مكال اريد احجي ويه خطيبتي
الهام : عادي يمه يمكن ملتهي بشغله
رزان : لا يمه يلا اني بغرفتي اذا تردين شي صيحيني
الهام: خوش
@@@@@@
نهاية الدوام / المدرسة
ريم : روان اسمعي باجر مثل ما اتفقنا تمام
روان : والله مادري شكلج
ريم : لتكولين شي
روان : احجي جد محد يوكف لأحد بهيج شي وحتى احتمال اخوج مراح يقبل ع هالشي
ضحكت ريم وكالت : لتخافين يجي يجي وراسه كبل رجليه
جتي سيارة ياسر
ريم : ولج استحي اروح لاخويه هسه يكول هاي منية من ورا الكتله الاكلتها
روان : واني شلون حرجع للبيت مادري يلا بايي
ريم : سيووو
راحت ريم لياسر وصعدت بالسيارة
ياسر : بسم اللههه منو انتِ
ريم : ريممممم
ياسر : شبي وجهج مكلوب هيج
ريم : عركه
ياسر : ياربي منج شنوو كليوم عركهه " ضل يباوع من جامه ع المدرسه "
ريم : راحت راحت لتطير عيونك
ياسر : اسكتي احسن
ريم : اسمع ياسر باجر لازم تجيني للمدرسة المديرة تكول جيبوا ولي امركم
ياسر : نعم نعم واني شكووو
ريم : شبيك مو روان هم شسمه احمم محتكول لاهلها وعود انت ولي أمرنا ثنينا
ياسر : شنووووووو
ريم : مثل مسمعت عيني
ياسر : عمي صدك تحجين ؟ تشاقين ؟
ريم : والله مدا اشاقه وهي مقبلت بس اني اصريت عليها
ياسر : متريدنيييي
ريم : انجب وامشي خنرجع للبيت
ياسر : لك اللهه هذا خبر حلو صراحه من بين الاخبار
ريم : ممكن تسوق انت وساكت ترا اليوم منتهيه مابية حيلك ولغوتك الزايده
ياسر : تهي بهي متتحملين لازم تنكدين
ريم : اي اي بس خلنرجع والله جوعانه ومنا قراية
@@@@@@
وصلت روان للبيت وطبت جانت روان كاعده
كامت رزان : عزه روان شبي وجهج
روان : مجرد عركه
رزان : ها روان هاي المجرد مالتج يعني عركه جبيرة دباعي وجهج خريطه
روان : اي تعاركت
رزان : هم مروة وسجى
روان : لج منو غيرهن المسمومات الحقيرات
رزان: شبيج روان الا تتعاركين عوفيهن يمسلتن معليج بيهن متتحملين الا تتعاركين هااا
روان : اي لج عينيييي جلدي يحكنييي .. غير هنا يبدنننن واني ما اتحمل صراحه ادور العركه دوارة
رزان ة ضلي ضلي إلى أن تنفصلين
روان: هههههايييي يلا من رخصتج عيوني حصعد فوك
رزان : صعدي صعدي ام العركات
روان : يمههههه وياج صبي غداااا
رزان : لج صوتججج
@@@@@
بيت فهد / جوي ياسر وريم
ياسر : ياااابه سلامون عليكووووم
زوزو : لك هااا جيت
ياسر : لا ما جيت
زوزو : ولك تضحك علية
ياسر : لا عمي .. اي شلونج شخبارج زوزو
طبت ريم : ها يا جماعه شلونكم
رحاب : هلا عيني دطبوا كعدوا
ريم : اي زوزو شلونج ماكو جديد
زوزو : على حطت ايدج
ياسر : وين فرح ومريم وبنان
رحاب : فوك هسه ينزلون
ياسر : يلا اني صاعد بين متصبون غدا
ريم : اي واني هم
رحاب : هسه حصب
صعدوا ياسر وريم فوك وصادفتهم بنان تنزل
ياسر : لك هلا
بنان : هَهلا بيك شلونكم ريم جاوبتي بعدين شبي وجهج هيج
ريم : دقايق ابدل وانزل انتضريني جوا
بنان : تمام اي ياسر صدك شنو نقاشك الحاد
حك راسه بتفكير وكال : ها اي صدك
بنان : شنوه ؟
ياسر : مو هاي شسمه .. نسيته
بنان : ههههههَ وربي بالي يمه اكول هذا شنو نقاش شنو شصاير
ياسر : اي نسيتهههه شسوي بعد
بنان : يلا اني حنزل
ياسر: هم حنزل وراج
نزلت بنان تساعد رحاب يمها بالمطبخ وراها اجتي مريم وفرح نزلوا هم مريم وكفت تساعدهم
طب همام : شلونكم يا جماعة المسلمين
زوزو : زينين زينين
همام : زوزو انتي حاطيج تسلمين عالطاب والطالع
شالت عكازتها وضربت بيها همام على رجله
همام : اخخخخ قويههه
زوزو. : حتى تتأدب عيني
همام : بس مكلت شي يعني صدك
لزمت عكازتها وضربته بي ضربة ثانيه
همام : لج زوزوووو
زوزو : زوزو بعينك ولك احترم مال الغسل
همام : مغسول حجيه
بنان : ها همام جيت
همام : اي خويه جيت
بنان : تمام احنه دنصب غدا عود صيح وياك ياسر وريم خل ينزلون
همام : تمام
جتي فرح على بنان
فرح: بنان ادلج ( اكلج )
بنان : كولي حبيبتي
فرح: صح أنتِ بتنج نونو ؟ ( بطنج)
بنان : عزااا لا ماكو
فرح : لا مو زوزو البالحه دالت بنان بتنها نونو ( لا مو زوزو البارحه كالت بنان بطنها نونو )
بنان : لا حبيبتي ماكو شوفي حتى بطني مو جبيرة صغيرة
فرح : اي بس حبابه جيبي نونو اني اعب نونو العب ويا (احب)
ابتسمت لكلامها: كولي لماما تجيبلج نونو يجنن
فرح : ما ما انتي
بنان : عود بعدين ميخالف
حجت بكلبها : ميخالف !!! واو
فرح : يلا يلا تعاي ناكل
نزلوا الجماعه ياسر وريم الثنائي اللي مثل توم وجيري هو يكفخ بيها وهي تكتل بي
ياسر : شنو شمسوين غدا ؟
رحاب : شوفة عينك
ياسر : عاااااشووو
مريم : ريم شنو شبي وجهج ؟
ريم : هسه خل نتغدا فوك اسولفلكم شصار بية هيهيهي
ورا دقايق نزل همام وكعد شاور ياسر
همام : ها خويه شفت الحب ؟
ياسر : حمام رجاءا مو بحالك
همام : اسمع لك مو تكلب علية اليوم اريدك تكعد تحجيلي كل شييييي خوش ؟
ياسر : هو انت تعرف كلشي بعد شكو
همام : جا غير اريدك تحجيلي
ياسر : بعيني تدللللللل
همام : ههههاي صدك تعال
ياسر : خير
همام : ضايج
ياسر : دخن
همام : اهووووو
ياسر : اكل اكل سمچ هذا ولك
كملوا غدا وغسلوا مواعين وكعدوا
ريم : اليوم تعاركت
مريم : عزه ويامن
بنان : مو اشوفج منتهي وجهج
ريم : ياخي همه يندكون بينا وتعاركنه وياهن اني وصديقتي عاد احنه نحب الطلايب
اجه ياسر كعد يمهم : ما ردنا الطلايب بس تجي كوا
ريم : لا عاب حلكك
ياسر : عالوا بينه يالحمزه الحك
ريم : شبيك اليوم انت المهم اسمعوا ورا ما تعاركنا وصديقتي مدري خشمها انكسر بس كام ينزف وتزوركنا صرنا مهرجين وجوي ألقوا القبض علينا
ياسر : وصديقتج شلونها
مريم : ههههههَ انت شكو
ياسر : جا غير نشوف شصار بيها
ريم : اي دسمعوني هي زينه بعدين المديرة كامت تعيط وهاي ورادت ولي أمرنا وباجر ياسر راح يجي
ياسر : شفتوا بالله صرت ولي أمر طبعاً باجر لازم اكشخ وكذا
بنان : وهسه شلون شحيصير
ريم : والله يا بنان عااااديييي
بنان : ما احب اتعارك
ياسر: انتي مسالمه طالعه علية
مريم: اني اليتعارك وياي اتعارك وياه
ياسر : كفو منك ابو فرح
مريم : اغاتي ابو اليسر
ياسر. : فد ضوجه اريد اخابر احمد اليوم نطلع نتعشا فد مطعم نروح كوفي نفرفر
ريم : أخذني وياك
ياسر : دولي
ريم : شبييييك
ياسر : طلعة ولد خيه شعندج انتي
ريم : غير ضايجه
ياسر : اقري تروح الضوجه
بنان : نفسي اعرف ياسر شلون صار مهندس
ريم : هذااا ؟؟ بالدفرات وفهد وابوية لازمي منا ومنا ودك قرايه ويقرون بي يلا طلع معدل
ياسر : اوف شلون ذكريات يلا طلعو اغنيه حزينه
مريم : كلش حزينه هههههَ
ريم : اي والله وابوية عاد من يقري الواحد ميعوفه لحد ميتوسل بي ويكوله الله عليك انطيني شوية استراحه
لج يلزم الواحد لزمه
بنان : تدريس صحيح
ياسر : من ط***
بنان : ههههههَ ليششش والله خوش تدريس وحتى متنسى
ياسر : هيهيهيهي عمي انتي وين اني ابوية وفهد علية وجنت انسى ويعيدولي الماده اكثر من مرة يلا ها تلزك بمخي
بنان : يلا اهمشي هسه صرت مهندس ويارب تعين
ياسر : الله يسمع منج بنانو
استمروا بالكلام لحد ما صار العصر وبعدهم كاعدين وضوجه حيل
صعدت بنان لغرفتها فوك
بنان
كعدت وحدها وهي مدمعه
يارب فرجك .. طلعني من هنا وسهل علية هالايام
اريد امي وخواتي بس والله ماريد اي احد اريدهم مشتاقتلهم حيل ونفسيتي كلش تعبت وخسرت وزن وبسبب مرضي والعلاج الي جاي اخذه شوية قوي بس اتحمله.. النوبات اللي تجيني كلش قويه لو ما فهد اني اصلا منتهيه من زمان
فهد شوكت يطلعني منا .. احس نفسي بورطه
سمعت صوت تلفوني يدك شلته بخوف شفته فهد
بنان : هلو فهد
فهد : هلوات عيني
بنان : شوكت ترجع
فهد : كم مرة تساليني واكلج بالليل
بنان : تكدر ترجع هسه
فهد : مستحيل فد شوية اكو اجتماع
بنان : تمام على راحتك
فهد : شلونج
بنان : زينه
فهد : خوش يلا اني رايح وان شاء الله اجي بالليل
بنان : انتظرك
حچى بضحكه : تمام
بنان : يلا باي
سديت الاتصال من فهد ورجعت افكر ب أمي ما اتصلت علية واني اخاف ادك عليها إلا هي من يصير عدها مجال يلا ادك
طبت علية مريم
مريم : هلووو
ابتسمت الها : هلواات
مريم : هاي ليش تكعدين وحدج راقبتج اكثر من مرة
بنان : مادري اني متعوده هيج وحدي
مريم : اوك .. ليش احس بيج مهمومه .. من فهد
ابتسمت الها شلون تحجي بحنية وياي : لا كلشي مابية وفهد زين وياي
مريم : تمام لعد باعي اني وريم قبل شوية جنه نسولف هي عدها فكره وكالتلي راح اجي هسه فوك واكولها الكم
حچت بنان بضحك : خير يا طير شعدها من أفكار الحلوه
مريم : مادري والله افكار توب كلوب وية ريم مفيش مستحيل
طبت ريم وصاحت : هلا بالغوالي تعالو اكوللكم فكرتي
بنان : دكولي بسرعهه
ريم : باعوا نسوي كعده بالحديقه هيج اجيب مدات ونسوي حلويات ونكعد نسولف
بنان : يعني عادي يقبلون
ريم : اي بين فتره وفتره نسويها وعندي افكار هم
مريم : حلو لعد خوش افكار عندج
ريم : هيهيهيهي شعبالج اني ريم بعد وصدك تدرون شنوو هيهيهيهيهي
بنان: يا ستار شنو
ريم : غير باجر عيد ميلادي وجنت أحاجي امي اسوي حفله
بنان : جذبببب
مريم : ريم كل سنه لازم تسوي حفله
ريم : جا غير عيد ميلادي الا اسوي حفله بشده واعزم صديقاتي طبعا القريبات بس
بنان : والتزين والأشياء
ريم : بسيطه بس ياسر يرجعني نروح اني ويا نجيب الكيك والأشياء ونرجع يعني واني مشترية فستان من طلعنا فهد للمول
بنان : حلوو حتى اني
مريم : لعد خوش حجي خل نتونس .. خوش اخبار عندج ولج ريم
ريم : شعبالكم عيني اني ريمه بعد
بنان : اي عيني منو يلحكج
@@@@@@
بيت جمال
رزان: والله هاي أني خل يشوفني مثل ما اني بعدين ملابسي حلوه شيسوي يسوي
الهام : شعلية اني كتلج
روان : تمام اهدأوا ماكو شي يمه عادي بعد خليها هو زواج كله غلط بقت عالملابس
الهام : اي وهو وصل
اندكت الباب
الهام : راح اطلع افتح الباب
رزان : روان شلون ماريد اشوفه
روان : تحملي شتسوين انتي وافقتي
رزان: مجان بيدي غير شي
روان : الله ياخذك جمال كلخطوه ادعي عليك وان شاء الله نخلص منك
رزان " تباوع من شباك " : هذا هذا طب عزا روان
روان : اوي دروحي اني لو منج ادفر الباب واطب اكله الله بالخير جاي كهوه
رزان : هاي انتي مو اني
روان : اوي دروحي نزلي شوف شحلاتج يا تبديل عيني
رزان : متنزلين تسلمين عليه
روان: اي اي عادي بعدين
نزلت رزان جوا شافتها الهام : اكو صينيه بيها كيك وعصير جيبيها وتعالي فوتي ينتظرج
رزان : خوش خوشش
راحت رزان جابت الصينيه من المطبخ وطبت هي وساكته
رزان : هلو امير شلونك
امير : هلا رزان تمام
حجيت بكلبي : هذا شبي شو ميكلي شلونج
امير : اني اجيت حتى احجي وياج بموضوع
رزان : خير ان شاء الله
امير : احمم ماعرف شلون راح ابدي بي بس اني ما مجبور اجذب عليج ولازم اكلج
حجت بكلبها : دخيلك ربي هذا شبي ادور مناقصني اني
امير : اسمعيني زين رزان
رزان : اسمع
امير : شوفي يابنت الناس اني ما احبج ولا يوم راح احبج وتزوجتج جان بأمر الوالده واني ما قبلت ولا ردتج وحتى مو ذوقي انتي
فتحت عيوني على وسعهن شنو مو ذوقه شبي هذا
رزان : صدك وان شاء الله انجبرت علية !
امير : ما مجبور بس ماردت اكسر كلام امي
رزان : اصلا اني هم ما احبك ولا يوم راح احبك
ردت اكوم شفته يباوعلي بنظرات تقزز : مية وحده غيرج تحبني ..
رزان " باوعتله بحقد " : الله يهنيك لعد .. ولا يوم يجي راح احبك
امير : شعور متبادل الحمد لله
رزان : اي الحمد لله
امير : يلا اني اروح
باوعت مصدومه هذا صدك يحجي ماطول ربع ساعه !
هذا ابتلاء ابتلاااااء يربي وفشله هيج يسوي اني بيش تورطت ربي ساعدني وساعدنا تعبنا
@@@@@@@
بالليل / بيت فهد
الهرج كاب بيتهم والهوسه بكل مكان وزوزو كاعده تشوف مسلسلها ومكيفه ويمها الكل كاعدين
ريم : يمهههه لتسوين اكل عشا ترى طلبت اكل
رحاب : شطلبتي
ريم : دجاج النا كلنا يعني اكلي عائلي يوم يجنن من مطعم خمس نجوم على عناد ياسر الطالع
همام : وان شاء الله بيش ؟
ريم : *
همام : تمام
ريم : بابا صدك ما دام انت اجيت اسمعني واسمعوني كل الحظور
محمد : خيرج بويه
ريم : اني باجر راح اسوي حفلة عيد ميلادي
ضحك محمد : هسه الا تسوين
ريم : بابا عليك الله يعني والله هي مرة بالسنه واجيب صديقاتي والله حتى اني ما اطلع هواي خليني اتونس هنا
محمد : تمام ما أعارض اني مثل كل سنه عادي تدرين بية بس التجهيز شلون
ريم : يمي بابا يمي هيهيهيهي
همام : هياتها مخططه لكلشي مبينه
ريم " تضحك" : اي اي صحححح
دخل حسن وهو تعبان سلم عليهم وكامت مريم راحت يمه فوك
حسن : ها عيني شلونج
مريم : تمام زينه
حسن : شوضع البيت
مريم : مثل كل يوم طبيعي
حسن : تعبان مريم
مريم : عمري انت ارتاح
حسن: انتي راحتي
مريم : اهخخ حسن ايدك وخر
حسن يقلد: وخرر بسيطه اني اعلمج اليوم
مريم : ههههههَ شتسوي مثلاً متكدرر
غمزلها وهي تصوفرت
مريم: تريد اسويلك عشا لو تنتظر اكل المطعم وصت ريم
حسن : لا ناكل وياهم
مريم : تمام
حسن : فرح وينها
مريم : جوا كاعده يم زوزو تشوف المسلسل وياها
حسن : خوش ليش متخليها الليله يمها
مريم : احممم حسننن شبيكك من كل عقلك عيب
ضحك حسن : مو عيب وداعتج العيب بالجيب
مريم : حنزل اروح اشوف فرح
ضحك حسن : ضلي تيهي الموضوع
مريم : حسننننن
@@@@@@
ورا ربع ساعه من جية حسن اجه فهد وجانت الطلبية واصله و ريم و بنان ديحضرون بيها بالمطبخ
فهد : اي شلونكم
محمد : مثل كل يوم ماكو اي تغير
صاح فهد : بناااان
جتي بنان : ها فهد جيت
فهد : اي جيت عود من تخلصين تعاي وراي فوك
بنان : خلصت
صعدت وراه فوك
بنان : يلا بسرعه عود انزل الاكل صبوه جوا
ابتسم وكال : تمام هسه تعاي فوتي
سأل : وين ياسر ؟
بنان : طالع ويه صديقه برا
فهد : خوش
دخلنا للغرفه كال
فهد : جانت الغرفه من اطبلها ما ارتاح واشوفها كئابه كلها
ضحكت بنان : بس من اجيت اني نورتها وخرت الكئابه
فهد : صح يا زوجتي
بنان : زوجتككك ؟
فهد ضحك : الجذبيه
بنان : اييي
فهد : يجوز تصير واقعيه اني كتلج قبل
تنهدت وكالت : فهد اريد اهلي عوف هالموضوع
فهد : بنان اني شكلت اني وعدتج .. و وعد الحُر دين ، واني ب ايدي راح ارجعج لأهلج كتلج اصبريلي هالايام بس اتحمليها
بنان " بچت " : اني مجاي اتحمل جاي اشتاقلهم حيل متتخيل شكد حتى صرت اشوفهم بأحلامي
حضنها .. ولأول مرة حضنها وهو يدري مو بالغلط
همس يم أذنها : تهون يا تَعبي تهون وتصير سوالف
بچت زايد وهي توخر شوي
بنان : اني تعبت
ابتعد وكال : صيري قوية بنان لتضعفين شدتها هالايام واني عند وعدي اذا خايفه مني ف وخري اوهامج
بنان: ابد مو قصدي هيج اني ولا خايفه منك اني ثقتي بيك متتخيلها فهد بس اني اريد امي وخواتي وبس صدكني
تنهد ورد : تمام يلا روحي غسلي وجهج .. " ضحك " طالعه حلوه وانتي تبجين
مسحت دموعها وهي تضحك : ضل اضحك علية
فهد : ماريد اشوفج ضعيفه محلو الضعف خليج قويه ما بقى شي
بنان : تمام .. جاي اتعبك هواي فهد
فهد : انتي الوحيده اللي كل ما اتعب علمودها اكول تعبها راحه وتستاهل اكثر
بنان: يلا خل ننزل هسه دينتضرونا عيب
فهد : نزلي واني نازل وراج
نزلت بنان جوا ولكت الكل كاعد وحتى مريم وحسن
كعدت يم ريم وراها نزل فهد واجه
زوزو : ولك سمعت فهد بريم باجر عيد ميلادها
ابتسم وكال : اي ادري
ريم : انت اول المدعوين لحفلتي عينيي
فهد : اكيد غير اني اخوج الجبير لازم اول واحد اصلا
ريم : مو بعيني
زوزو : اي ولكم خلصت مسلسلتي اليوم حلقه الأخيرة
فرح : اي كامت تبجي زوزو
زوزو : عيب ولج كولي بيبي معليج بهذوله
فرح : ياسر يكول زوزو
زوزو: عيب عيب عيبببب
فهد : عادي عادي وين العيب
زوزو : مرة شكبرني شكدني تصيحولي زوزو
همام : يجنن اسمج عمي يخبل زوزو
زوزو: اسكت اسكتتت لك المعقد
همام : شبي المعقد
زوزو : يضوجني
همام : اي انتي تزعلين بسرعه
زوزو : كوم ولك كومممم
همام : جاي اتعشى زوزو على بختج
زوزو : اكلللل
ورا ربع ساعه خلصوا عشا وكعدوا
ريم : امشوا وياي حبابات نطلع الغراض برا
بنان : تمام هسه
طلعوا ريم و مريم وبنان وكاموا يجيبون بالغراض وحضروا كلشي برا وجهزوا المكان والعصر جانوا غاسلين الحديقه وكلشي جاهز
ريم : يمهههه تعبت
بنان : عادي المهم حلوه طلعت
طلعوا كلهم برا فهد وهمام وحسن ومحمد بقت رحاب يم زوزو جوا
فهد : لك هاي شنو كاعدات وعايفينا
ريم : لاااا هسه جيت ردت اصيحك
فهد ضحك : اي واحنه اجينا
ريم : تعالوا تعالوا كعدوا عندي لعبه نلعبها
حسن : خيرج أم الالعاب
ريم : نلعب تحديات
فهد: احب التحديات
همام : حلو خيار موفق
مريم : وانت عمو
محمد : اني خلوني حكم
ضحك همام : بوية يا حكم هي لعبه مابيها حكم تفرج وشوف
ريم : تمام بس دقايق حجيب بطل حتى نفره بيناتنه
جابت بطل وجتي
ريم : راح افر البطل واللي يوكف عليهم واحد يسأل ثاني
جرأه لو صراحه خوش حجي
فهد : خوش
فرت البطل وكف على فهد و همام
فهد : اي همام جرأه لو صراحه
همام : جرأه خويه
فهد : اتحداك تروح تعيط جوا بالبيت احبج زوزو
همام : معندك غيره
فهد : ليش
همام : لان متأكد راح انكفخ منها
فهد : تحمل تحمل بوية كوم هذا تحدي
ريم : يلا شجعوا شجعوا خطيه خايف
وضلوا يصفكون ويصيحون .. يلا همام يلا
راح وهو يضحك طب جوا وكف كبال زوزو وعاط احبج زوزو
زوزو نطت عيونها : عيد شكلت ولك
همام : شبيج ممصدكه احبج ..
شالت عكازتها وطب هبدته على ظهره
زوزو : ولج رحاب ولدج تربية زفت شفتي بعينج شفتي
رحاب : عادي خاله يمعوده تصير يشاقون وياج غير يحبوج
طلع همام لازم ظهره: ولك فهددددددد
ضحك فهد وكال يلا تعال بعد اخيك
كعد همام وكال : شتختار
فهد : صراحه
همام : تخاف ههيهيهيهي
فهد : مو خوف هي لعبه واني اختاريت
همام : تمام .. تختارني اني لو ياسر
فهد : احس عقلك عقل جهال
همام : شنو ولك شكلت
فهد : اختار بنان
ضحكت بنان : تختارني !
هز راسه ب أي وهو يضحك على همام
ريم : يلا كافي سكتوا
وكف البطل مرا ثانيه على ريم وعلى بنان
ريم : جرأه لو صراحه
بنان : صراحه
ريم : اااا .. اكثر موقف محرج بطفولتج صارلج ومنسيتيه
ضحكت بنان وكالت : وكعت بالطين كبال المدرسه وداومت واني مطينه من فوك ليجوا
حسن : اني مرا داومت بالمطر وتنكعت ومجنت ماخذ شمسيه وياي
ريم : اني بس اشوف دنيا مغيمه اخذها وياي
بنان : اوك ريم تردين جراه لو صراحه
ريم : مادري .. دقيقه افكر .. صراحه
بنان : اكبر مصيبه سويتيها انتي وصغيره
ريم : مصيبه .. والله هواي مسويه
بنان : مثلاً
ريم : مره اني وياسر جنه منحب ولد جيرانه اسمه عمار وجنه ضايجين منه حيل لان مغرور وشايف نفسه ف رحنا اخذنا للحديقه يمنا و ضربنا وكام يبجي ورجع
بنان : خطيههههه
ريم : صراحه مو خطيه لان جنه صدك ضايجين منه وهو يكرهنا وجان يكول لامي ياسر وريم يروحون الهيج مكان وهوه جذب
فرت البطل ووكف على مريم وريم
ريم : يلا مريم جرأه لو صراحه
مريم : جرأه
ريم : اتحداج شنو مادري
مريم : خلصينا يختي بسرعه
ريم : ممممم اتحداج وشاورتها ( تبوسين حسن بس يعني من خده عادي كدام الموجودين )
مريم : ماسويها والله
ريم : مشكلتج
مريم: كلت ماسويها
طب ياسر بهاي الأثناء وضل يباوع الهم
ياسر : ايا خونه ممنتضريني !!!!!
فهد : راحت عليك
همام : هههههه حيبجي بجى بجى بجى
ياسر : شو دروح حصعد فوك فد تعباننننن والساعه صارت 11
كام فهد : صدك تعال وين جنت
ياسر : خير فهودي ترى عادي جنت بالكوفي ويه احمد
فهد : متأخر
ياسر : لا حبيبي دشوف ناس تضل للفجر واني لل 11 تكولولي متأخر هيهيهيهيهي
فهد : شنو رايك اكتلك
ياسر : من رخصتك عمي
فهد : روح روح
كالت ريم : يا جماعه اني حصعد فوك وراي اشغال
حسن : مثل شنو
ريم : اخابر صديقاتي اعزمهن ع باجر كومهههه
فهد : يلا لعد احنه هم حنروح
كاموا كلهم وطبوا جوا إلى أن كل واحد راح لغرفته
@@@@@@
ريم راحت لياسر
ريم : ياسر اخي العزيز
ياسر : ها عمي كولي خيرج
ريم : باجر اريدك ورا الدوام توديني نجيب تجهيزات الحفله لان اصلا الحفله العصر ساعه 5 ف حتى الظهر نحظر وهاي
ياسر : تمام تدللين .. صدك شلونها رواني
ريم : انجب لك شنو رواني هاي صديقتي ماقبل
ياسر : هسه شلونها دكوليييي هي باجر تجي لعيد ميلادج مو
ريم : اي شبيك اي والله ايييي يلا باي
ياسر : شوف اخذت مصلحتها وراحت
همام : اي ولك تعال كلي شلون طحت بالحب
ياسر : طحت بالفخ اعترف صاير بحبك صلف
همام : انجب واحجيييي
ياسر : طحت يا همام طحت
همام : شلون حبيتها
ياسر ؛ من اول عركه يعني جنت ماحبها وابد يعني شو يوم ورا يوم طنننن مدري تدهورت أحوالي وعرفت حبيتها
همام : الله يساعد كلبك
ياسر : ام كفشه .. تدري هي مميزه من بين الباقيات بكلشي حتى شعرها مميز هذا الاحجي عليه هم حلو
همام : انت طحت على وجهك خويه
ياسر : اي والله يا عمي اهخخخخخ القلب وما يهوى شنسوي هاذهوه
همام : حالك مال اشغلك نغمه حزينه وتكعد تبجي وأحط يمك كلينس لتروح تغركنا
ياسر : اي وجيبلي بلم فد مرة
همام : والله يا الله يحشش الاخ
ياسر : شو وخر خل انام احسنلي وراي باجر يوم جميل جداً خل اتخيله
همام : خبل انت ابد مو صاحي
تنهد وهو يكول : انتوا خبلتوني
@@@@@@@
بنان : فهد
فهد : ها بنان
بنان : مداكدر انام
ضحك فهد : اقري آيات
بنان : ختمت القرآن
فهد : تعاي تنامين يمي الكاع حلوه
بنان : اي خليها الك
فهد : بنان دتخابرين امج ؟
بنان : لا اخر مرة اول بارحه
فهد : شلونهم
بنان : كتلك اختي رزان نخطبت و ماكو اي احداث جديده
فهد : تمام
بنان : فهد سؤال
فهد : جواب
بنان : انت ليش ساعدتني
فهد : مو من أخلاقي اعوف أحد محتاج مساعده .. اني فهد مو حي الله
بنان : ونعم منك
فهد : ومنج .. زين هسة شلون صدك شربي دواج هسه ينومج
بنان : مشربته ماريده
فهد : خبله انتي شنو ماريده هو علاج
حجت بضحكه : مو ماريده بس نسيته
فهد : اوففف دشربي يمج هو
بنان : اي
شربته ورجعت كعدت
فهد نام وخله ايده ع وجه
بنان : فهدددد اكعدددد لتنام
فهد : شسويلج الوليلج مثلاً إذا اكعد
بنان : مادري لتنام الا اني انام
فهد : ليش بلا
بنان : مادري بس انتظرني انام يلا
ضحك وكال : ولج شليتيني شل خربب
بنان : لتضحكككك ولتنااام
فهد : ايباخ تحكم
بنان : مو تحكم بس حبااااب
فهد : كاعد بوية كاعد
.........................................
طبت ريم لغرفتها وهي تدور رقم روان حتى تعزمها و اتصلت عليها .....
نهاية البارت
يتبع ...
ادري تأخرنه بالبارت بس كله بسبب نور اخرتنه 😂😂
بس سوينالكم البارت طويل و ان شاء الله يعجبكم ♡︎ .
(ولا تنسوا التصويت)
إلئ اللقاء يا أعز العابرين في قلبي ♡ .
الكاتبات دينا & نور
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!